သတင်း

သပိတ်ကျင်းတွင် စာသင်နေသည့်အိမ် လေကြောင်းမှ ဗုံးကြဲခံရ၊ ကလေးတစ်ဦးသေ၊ ၇ ဦးဒဏ်ရာရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   မန္တလေးတိုင်း၊ သပိတ်ကျင်းမြို့နယ်ထဲက ကျောက်ဖြူကျေးရွာရှိ ကလေးငယ်များ စာသင်နေသည့် နေအိမ်ကို စစ်ကော်မရှင်တပ်က လေကြောင်းမှာ တိုက်ခိုက်ခဲ့ရာ ကလေးငယ်တစ်ဦး သေဆုံးပြီး ၇ ဦး ထိမှန် ဒဏ်ရာရခဲ့ သည်။   တော်လှန်ရေးတပ်များ ထိန်းချုပ်ထားသည့် သပိတ်ကျင်းမြို့နယ်ထဲက ကျောက်ဖြူကျေးရွာကို စစ်တပ်က လေယာဉ်သုံးပြီး ဗုံးကြဲတိုက်ခိုက်ခဲ့ခြင်း ဖြစ်သည်ဟု မန္တလေး PDF အဖွဲ့က ထုတ်ပြန်ထားသည်။   ဒေသခံတစ်ဦးက “လေယာဉ်နဲ့ ပစ်သွားတာပါဗျ။ ကျနော်တို့ဆီက ကလေးတွေ စာသင်နေတဲ့ အိမ်ထိသွားတာ ပါ။ စာသင်ဝိုင်းလို့ပဲ ပြောရမှာပေါ့နော်။ အဲ့ဒီစာသင်ဝိုင်းကို ဗုံးကြဲတာ၊ ကလေးတစ်ယောက်သေတယ်။ ၇ ယောက် ဒဏ်ရာရတဲထဲမှာ ဆရာမက တစ်ယောက်ပေါ့နော်။ အသက်လား အသက်က ၁၀ နှစ်အောက် ကလေး တွေပါဗျ။ လေယောဉ်က တစ်ခါတည်းလာတာမဟုတ်ဘူးနော်၊ နှစ်ခါလာပြီး ကြဲသွားတာပါဗျ” ဟု ပြောသည်။   သပိတ်ကျင်းမြို့နယ်၊ ကျောက်ဖြူကျေးရွာမှာ တော်လှန်ရေး တပ်ဖွဲ့များ ထိန်းချုပ်ထားသည့် နေရာ ဖြစ်သော် လည်း တိုက်ပွဲဖြစ်ပွားခြင်းမျိုး မရှိဘူးဟုဆိုသည်။   တိုက်ပွဲဖြစ်ပွားခြင်း မရှိဘဲ စက်တင်ဘာလ ၇ ရက်နေ့၊ နေ့လည်ပိုင်း ၂ နာရီခန့်အချိန်၌လည်းကောင်း၊ ည ၁၁ နာရီကျော် အချိန်တွင်လည်းကောင်း စစ်ကော်မရှင်တပ်က အကြောင်းမဲ့ လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်ဟု ဆိုသည်။   ကျောက်ဖြူကျေးရွာထဲက ကလေးငယ်များအား စာသင်ကြားပေးနေသည့် နေအိမ် လေယာဉ်ဖြင့် ဗုံးကြဲခံရမှုထဲ အသက် ၁၀ နှစ်အရွယ် ကလေးငယ် ၁ ဦးသေဆုံးခဲ့ပြီး ကလေးငယ် ၅ ဦး အပါအဝင် အရပ်သား ၇ ဦး ထိမှန်ဒဏ်ရာ ရခဲ့သည်။   သပိတ်ကျင်းမြို့ တောင်ဘက် ၁၀ မိုင်ခန့်အကွာက မန္တလေး - မြစ်ကြီးနား လမ်းပေါ်ရှိ ကျောက်ဖြူကျေးရွာကို စစ်ကော်မရှင်တပ်က လေယာဉ်သုံး ဗုံးကြဲ တိုက်ခိုက်ခဲ့သည့်အပြင် လေယာဉ်ပေါ်မှလည်း စက်သေနတ်ဖြင့်ပါ ပစ်ခတ်တိုက်ခိုက်ခဲ့သည်ဟု ဒေသခံများက ပြောသည်။   စစ်ကော်မရှင်တပ်က အရပ်သား ပစ်မှတ်များ ဖြစ်သည့် ရပ်ရွာများ၊ ဆေးရုံ ဆေးခန်းများ၊ ဘုန်းကြီးကျောင်း များနှင့် စာသင်ကျောင်းများကို မကြာခဏ ဦးတည်တိုက်ခိုက်နေသည်ဟု မန္တလေး PDF အဖွဲ့က ဆိုသည်။   ထိုသို့ အရပ်သားပစ်မှတ်များကို တိုက်ခိုက်နေခြင်းသည် စစ်ရာဇဝတ်မှုမြောက်ပြီး အောက်တန်းကျသည့် လုပ်ရပ်ဖြစ်သည်ဟုလည်း မန္တလေး PDF အဖွဲ့၏ ထုတ်ပြန်ချက်ထဲတွင် ရေးသားဖော်ပြထားသည်။

သပိတ်ကျင်းတွင် စာသင်နေသည့်အိမ် လေကြောင်းမှ ဗုံးကြဲခံရ၊ ကလေးတစ်ဦးသေ၊ ၇ ဦးဒဏ်ရာရ

သပိတ်ကျင်းတွင် စာသင်နေသည့်အိမ် လေကြောင်းမှ ဗုံးကြဲခံရ၊ ကလေးတစ်ဦးသေ၊ ၇ ဦးဒဏ်ရာရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။ မန္တလေးတိ…

  • September 9, 2025
ပုလောက စစ်ကော်မရှင် စခန်းကို KNLA နှင့် ပူးပေါင်းအဖွဲ့ သိမ်းယူ

 သတင်းနှင့် မီဒီယာ ကွန်ရက်။
၂၀၂၅ ခုနှစ်၊ စက်တင်ဘာလ ၉ ရက်။   ပုလောမြို့နယ်ထဲက ထမင်းမစားကျေးရွာတွင် ရှိနေသည့် စစ်ကော်မရှင်တပ်၏ စစ်ခန်းကို ကရင်အမျိုးသား လွတ်မြောက်ရေး တပ်မတော် KNLA နှင့် ပူးပေါင်းအဖွဲ့က တိုက်ခိုက်သိမ်းယူလိုက်သည်။   KNLA နှင့် ပူးပေါင်းအဖွဲ့က သိမ်းယူလိုက်သည့် စစ်တပ်စခန်းမှာ တနင်္သာရီတိုင်း မြိတ် - ထားဝယ်ခရိုင်၊ ပုလောမြို့နယ်၊ ထမင်းမစားကျေးရွာတွင် ရှိနေသည်ဟု စုပေါင်းထိုင်ထားသည့် စခန်းဖြစ်သည်။   အဆိုပါ စစ်ကော်မရှင်စခန်းကို KNLA နှင့် ပူးပေါင်းတပ်ဖွဲ့ စက်တင်ဘာလ ၈ ရက်နေ့တွင် တိုက်ခိုက် သိမ်းပိုက် နိုင်ခဲ့ခြင်း ဖြစ်သည်ဟု ကရင်အမျိုးသား အစည်းအရုံး KNU က ထုတ်ပြန်သည်။   ထမင်းမစားကျေးရွာတွင် အမှတ် ၂၈၀ ခြေလျင်တပ်ရင်း၊ အမှတ် ၃၀၉ အမြောက်တပ်ရင်းနှင့် အမှတ် ၁၂ တပ်မတော် လေ့ကျင့်ရေး သင်တန်းကျောင်းတို့က အင်အား ၄၀ ခန့်ဖြင့် တပ်စွဲထားခြင်း ဖြစ်သည်။   အဆိုပါ စစ်တပ်စခန်းကို KNLA၊ တပ်မဟာ(၄) လက်အောက်ခံ KNDO တပ်ရင်း (၇)၊ တပ်ခွဲ (၂)၊ တပ်ခွဲ (၅)၊ KNLA အထူးတပ်ဖွဲ့၊ ပုလောပြည်သူ့ကာကွယ်ရေး တပ်ဖွဲ့နှင့် တော်လှန်ရေး ပူးပေါင်းတပ်ဖွဲ့‌တို့က တိုက်ခိုက် သိမ်းပိုက်ခဲ့ခြင်း ဖြစ်သည်။   ထမင်းမစားကျေးရွာ စခန်းသိမ်း တိုက်ပွဲတွင် စစ်တပ်ဘက်က ထိခိုက်သေဆုံးမှု အချို့ရှိခဲ့သည့် အပြင် လက်နက်ခဲယမ်းများကိုလည်း သိမ်းယူရရှိခဲ့သည်ဟု KNU က ဆိုသည်။   မြိတ် - ပုလော - ထားဝယ် လမ်းပိုင်းတစ်လျှောက်တွင် စစ်ကော်မရှင်တပ်နှင့် KNLA ပူးပေါင်းအဖွဲ့တို့ကြား ထိတွေ့ တိုက်ပွဲများ ဆက်တိုက်ဖြစ်ပွားလျှက်ရှိသည်။

ပုလောက စစ်ကော်မရှင် စခန်းကို KNLA နှင့် ပူးပေါင်းအဖွဲ့ သိမ်းယူ



ပုလောက စစ်ကော်မရှင် စခန်းကို KNLA နှင့် ပူးပေါင်းအဖွဲ့ သိမ်းယူ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။ ပုလောမြို့နယ်ထဲက ထမင်းမစာ…

  • September 9, 2025
ကမ္ဘာ့ ဖလား လက်မှတ်များစတင်ရောင်းချတော့မည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၄ ရက်။   ၂၀၂၆ ကမ္ဘာ့ဖလား ဘောလုံးပွဲများအတွက် လက်မှတ်ရောင်းချမှု လုပ်ငန်းစဉ်များကို လာမည့် ရက်သတ္တပတ်တွင် စတင်တော့မည်ဖြစ်ကြောင့် ကမ္ဘာ့ ဘောလုံး အဖွဲ့ချုပ်   FIFA က ကြေညာလိုက်သည်။   လက်မှတ်ရောင်းချသည့် စနစ်မှာ တန်ဖိုး အပြောင်းအလဲ ရှိသည့် စနစ်ကို အသုံးပြုထားမည် ဖြစ်ကြောင်းလည်း ကြေညာထားသည်။ ဆိုလိုသည်မှာ အစောပိုင်း ကမ္ဘာ့ ဖလား အုပ်စု ပွဲစဉ်များအတွက် လက်မှတ်ဈေး သက်သာပြီး ဖိုင်နယ်ပွဲ နီးလာလေလေ လက်မှတ်ဈေးကြီးလေလေ ဖြစ်သွားမည်။   အနိမ့်ဆုံး လက်မှတ်ဈေးသည် ဒေါ်လာ ၆၀ (ထိုင်းဘတ် ၂၀၀၀) လောက်သာ ရှိမည်ဖြစ်ပြီး ဈေးအကြီးဆုံး ဖြစ်သည့် နောက်ဆုံး ဖိုင်နယ်ပွဲစဉ်များ အတွက် လက်မှတ်များကိုမူ ဒေါ်လာ ၆,၇၃၀  က (ထိုင်းဘတ် ၂၀၀,၀၀၀) မှ စတင်ရောင်းချသွားမည်ဟု ဆိုသည်။   ယခုကဲ့သို့ လက်မှတ်ဈေးနှုန်း ပြောင်းလဲရောင်းချသည့် စနစ်ကို ကမ္ဘာ့ဖလား ပြိုင်ပွဲများတွင် ယခင်က အသုံးပြုခဲ့ခြင်း မရှိခဲ့ဟု ဆိုသည်။     နောက်ထပ် အပြောင်းအလဲ တစ်ခုကတော့ ထိုင်ခုံ တည်နေရာ ကိုလိုက်၍ လက်မှတ် အမျိုးအစားများကို သတ်မှတ်ထားခြင်း ဖြစ်သည်။   အကောင်းဆုံးဟု သတ်မှတ်ထားသည့် ထိုင်ခုံ နေရာများကို အမျိုးအစား ၁ ဟု ခေါပြီး ဒုတိယ အကောင်းဆုံး ခုံနေရာများကို အမျိုးအစား ၂ ဟု ခေါ်ဆိုမည် ဖြစ်သည်။ အမျိုးအစား သတ်မှတ်ချက် ၄ မျိုး အထိရှိမည် ဖြစ်သည်။   ဘေးဘက်ပွဲကြည့်စင်များတွင် ရှိသည့် ထိုင်ခုံများသည် အမျိုးအစားသတ်မှတ်ချက် ၁ ဖြစ်နိုင်ပြီး ဂိုးတိုင်နောက်ဘက် ပွဲကြည့်စင်တွေရှိ ထိုင်ခုံများကတော့ အမျိုးအစား သတ်မှတ်ချက်နိမ့်မှာ ဖြစ်သည်။  အရင် ကမ္ဘာဖလားပွဲများတွင်တော့ ခုံတန်းအနိမ့်အမြင့် တည်ရှိမှု အပေါ်မှာ အမျိုး အစားတွေ ခွဲခြားခဲ့တာ ဖြစ်ပါတယ်။

ကမ္ဘာ့ ဖလား လက်မှတ်များစတင်ရောင်းချတော့မည်

ကမ္ဘာ့ ဖလား လက်မှတ်များစတင်ရောင်းချတော့မည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၄ ရက်။  ၂၀၂၆ ကမ္ဘာ့ဖလား ဘောလုံးပွဲများအတွက် လက်မှတ်ရ…

  • September 4, 2025
ထိုင်းဝန်ကြီးချုပ်သစ်ကို သောကြာနေ့တွင် ရွေးချယ်မည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၄ ရက်။   ထိုင်းလွှတ်တော်ကို ဖျက်သိမ်းခွင့်ပြုရန် ယာယီ ဝန်ကြီးချုပ်၏ တင်ပြချက်ကို ထိုင်းဘုရင့် အတိုင်ပင်ခံ ကောင်စီက ပယ်ချလိုက်သည်။   ဥပဒေ လုပ်ထုံးလုပ်နည်းများနှင့် မကိုက်ညီမှုများ ရှိနေသည်ဟု ဆိုကာ တင်သွင်းလွှာကို ပြန်ပေးခဲ့ခြင်း ဖြစ်သည်။   ထို့ကြောင့် ထိုင်းလွှတ်တော်သည် ဝန်ကြီးချုပ် သစ်ကို ရွေးချယ်ရတော့မည် ဖြစ်သည်။   ထိုင်းဝန်ကြီးချုပ်သစ်ကို မနက်ဖန် စက်တင်ဘာလ ၅ ရက် သောကြာနေ့တွင် လွှတ်တော်ကိုယ်စားလှယ်များက မဲပေးရွေးချယ်ကြမည် ဖြစ်သည်ဟု လွှတ်တော်ဥက္ကဌ Wan Muhamad Noor Matha က ဗုဒ္ဓဟူးနေ့ညက ပြောသည်။   အခုအခါ အဓိက အတိုက်အခံ ပါတီဖြစ်သော Bhumjaithai ပါတီ ခေါင်းဆောင် Anutin Charnvirakul သည် ဝန်ကြီးချုပ်ဖြစ်လာရန် အလားအလာ အရှိဆုံး ဖြစ်လာနေသည်။   ရှေးရိုးစွဲ Bhumjaithai ပါတီကို ဦးဆောင်သူ Anutin သည် ထိုင်းနိုင်ငံတွင် ကျန်းမာရေးအရ ဆေးခြောက် သုံးစွဲခွင့် ဥပဒေများကို အဆိုတင်သွင်းခဲ့သူလည်း ဖြစ်သည်။   တဖက်တွင်လည်း လွှတ်တော်တွင် ကိုယ်စားလှယ်နေရာ အများအပြားရရှိထားသည့် ပြည်သူ့ ပါတီက Anutin ကို ဝန်ကြီးချုပ်အဖြစ် ထောက်ခံသွားမည်ဟု ပြောကြားထားသည့်အတွက်လည်း သူသည် အလားအလာ အကောင်းဆုံး ဖြစ်နေခြင်း ဖြစ်သည်။   ပြည်သူ့ပါတီက Anuthin အနေနှင့် အာဏာရပြီး လေးလ အကြာတွင် လွှတ်တော်ကို ဖျက်သိမ်းပြီး ရွေးကောက်ပွဲ အသစ် ပြန်လုပ်မည်ဆိုပါက ဝန်ကြီးချုပ် အဖြစ် ထောက်ခံသွားမယ်ဟု ဆိုထားခဲ့ခြင်း ဖြစ်သည်။ အဆိုပါ သတ်မှတ်ချက်ကို Bhumjaithai.ပါတီ ကလည်း လက်ခံထားခဲ့သည်ဟု ဆိုသည်။

ထိုင်းဝန်ကြီးချုပ်သစ်ကို သောကြာနေ့တွင် ရွေးချယ်မည်

ထိုင်းဝန်ကြီးချုပ်သစ်ကို သောကြာနေ့တွင် ရွေးချယ်မည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၄ ရက်။  ထိုင်းလွှတ်တော်ကို ဖျက်သိမ်းခွင့်ပြ…

  • September 4, 2025
နျူစွမ်းအင် ထုတ်လုပ်ရေး တရုတ်ကို ရုရှားကူမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၄ ရက်။   နျူကလီးယား စွမ်းအင်ထုတ်လုပ်မှုမှာ အမေရိကားကို ကျော်သွားအောင် တရုတ်ကို ရုရှားက ကူညီသွားမည်ဟု ရုရှားနိုင်ငံတော် နျူကလီးယား ကော်ပိုရေးရှင်း တာဝန်ခံက ပြောလိုက်သည်။   ပီကင်းတွင် တွေ့ဆုံ ပြောကြားပြီးနောက်ပိုင်း ရုရှားအစိုးရပိုင် ရုပ်သံနှင့် ဗုဒ္ဓဟူးနေ့က မေးမြန်းခန်းတွင် Alexei Likhachev က ပြောလိုက်ခြင်းဖြစ်သည်။   လက်ရှိတွင် အမေရိကန်က တပ်ဆင်ထားပြီး နျူကလီးယား စွမ်းအင် ထုတ်လုပ်မှု ၉၇ ဂျီဂါဝပ် (GW) ရှိနေပြီး တရုတ်၏ လက်ရှိလည်ပတ်နေသော နျူကလီးယား စွမ်းအင် ထုတ်လုပ်နိုင်စွမ်းမှာ ၂၀၂၄ ခုနှစ် ဧပြီလတုန်းက 53.2. GW ရှိနေခဲ့သည်။   သို့သော်လည်း တရုတ်တွင် လက်ရှိ မထုတ်လုပ်နိုင်သေးပဲ တည်ဆောက်နေဆဲ စက်ရုံများက ဒါဇင်နဲ့ချီပြီး ရှိနေသည်ဟု ဆိုသည်။   ရုရှား နိုင်ငံတော် ရုပ်သံက မေးမြန်းမှုကို ဖြေကြားရာတွင် Alexei Likhachev က လက်ရှိတွင်လည်း ရုရှားအနေနှင့် တရုတ်ကို အကူအညီပေးနေပြီး ဖြစ်သည်ဟု ဖြေကြားခဲ့သည်။   ရုရှားက တရုတ်နိုင်ငံတွင် နျူကလီးယား စွမ်းအင်ထုတ် စက်ရုံ ၄ ရုံကို ကူညီတည်ဆောက်ခဲ့ပြီး လတ်တလောတွင်လည်း နောက်ထပ် စက်ရုံ ၄ ခုကို ဆောက်လုပ်ရာတွင် ကူညီနေသည်ဟု ပြောသည်။   တရုတ်အနေဖြင့် အမေရိကန်၏ နျူစွမ်းအင် ထုတ်လုပ်နိုင်စွမ်းကို ကျော်လွန်လိုပါက တနည်းပြောဆိုလျှင် တနှစ်ကို GigaWatt ၁၀၀ ကျော် ထုတ်လုပ်နိုင်ရန် ယူရေနီယမ် နှင့် နျူကလီးယား စက်သုံးဆီ အများအပြား လိုအပ်မည် ဖြစ်သည်။

နျူစွမ်းအင် ထုတ်လုပ်ရေး တရုတ်ကို ရုရှားကူမည်

နျူစွမ်းအင် ထုတ်လုပ်ရေး တရုတ်ကို ရုရှားကူမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၄ ရက်။  နျူကလီးယား စွမ်းအင်ထုတ်လုပ်မှုမှာ အမေရိကား…

  • September 4, 2025
မြန်မာ အလုပ်သမကို အခြား မြန်မာအလုပ်သမားတစ်ဦးက သံဒိုင်ဖြင့်ရိုက်သဖြင့် သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၃ ရက်။   ဆောက်လုပ်ရေးတွင် အသုံးပြုသော ကွန်ဂရစ် အားဖြည့်သံတိုင်နှင့် အချက်ပေါင်းများစွာ ရိုက်နှက်ခံရသည့်အတွက် ထိုင်းနိုင်ငံရောက် မြန်မာ အလုပ်သမ တစ်ဦး သေဆုံးသွားခဲ့သည်။   ရိုက်နှက်သူမှာ မြန်မာ အလုပ်သမားတစ်ယောက်ဖြစ်ပြီး သေဆုံးသူက သူ့ကို မကြားဝင့် မနာသာ ဆဲရုံသာမက အကြိမ်ကြိမ် တံတွေးဖြင့် ထွေးခဲ့သည်ဟု ဆိုသည်။   တိုက်ခိုက်မှုသည် ထိုင်းနိုင်ငံ အရှေ့မြောက်ပိုင်း ဘူရီးရမ် မြို့က ဘူရီးရမ် ဆေးရုံ အမှတ် ၂ ဆောက်လုပ်နေသော ဆောက်လုပ်ရေး လုပ်ငန်းနေရာတွင် ဖြစ်ပွားခဲ့သည်။   အသက် ၄၉ နှစ်အရွယ် မြန်မာ ရွှေ့ပြောင်း အလုပ်သမားတစ်ဦးက လုပ်ဖော်ကိုင်ဖက် မြန်မာ အမျိုးသမီးတယောက်ကို ဆောက်လုပ်ရေးသုံး အားဖြည့် သံတိုင်ဖြင့်  အကြိမ်ကြိမ် ရိုက်နှက်ခဲ့ခြင်း ဖြစ်သည်။   တိုက်ခိုက်မှုမှာ ဩဂုတ်လ ၃၁ ရက်နေ့တွင် ဖြစ်ပွားခဲ့ပြီး အရိုက်ခံရသည့် အသက် ၂၅ နှစ်အရွယ် အမျိုးသမီးမှာ ဘူရီးရမ် ဆေးရုံအရောက်တွင် သေဆုံးခဲ့သည်။   ရဲစစ်ဆေးမေးမြန်းမှုတွင် တရားခံ အမျိုးသားက သူတို့ နှစ်ဦး မကြာခဏ အချင်းများလေ့ရှိခဲ့ပြီး သေဆုံးသွားသူသည် တရားခံကို မကြာခဏ စော်ကား ပြောဆိုမှုများ, လုပ်လေ့ရှိပြီး တံတွေးနှင့်လည်း ထွေးလေ့ရှိသည်ဟု ပြောသည်။   မှုခင်း ဖြစ်ပွားသည့် နေ့ ထမင်းစားချိန်အတွင်း သေဆုံးသူက တံတွေးနဲ့ ထပ်ထွေးပြီး ကျိန်ဆဲခဲ့သည်ကို လက်တုန့်ပြန်မိတာဟု တရားခံက ပြောသည်။   သေဆုံးသူသည် ခင်ပွန်းဖြစ်သူနဲ့အတူ ဤဆောက်လုပ်ရေး လုပ်ငန်းခွင်တွင် အလုပ်ဝင်သည်မှာ ၄ လသာ ရှိသေးသည်ဟု ဆိုသည်။

မြန်မာ အလုပ်သမကို အခြား မြန်မာအလုပ်သမားတစ်ဦးက သံဒိုင်ဖြင့်ရိုက်သဖြင့် သေဆုံး

မြန်မာ အလုပ်သမကို အခြား မြန်မာအလုပ်သမားတစ်ဦးက သံဒိုင်ဖြင့်ရိုက်သဖြင့် သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၃ ရက်။  ဆောက်လုပ်ရ…

  • September 3, 2025
အနူတင်ကို ဝန်ကြီးချုပ် အဖြစ် ပြည်သူ့ပါတီ ထောက်ခံမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၃ ရက်။     လက်ရှိ အကြီးဆုံး ပါတီဖြစ်တဲ့  ပြည်သူ့ပါတီခေါင်းဆောင် Nattthaphong Ruengpanyawut (နတ်ထာဖုန် လွမ်ပန်ယာဝတ်) က Bhumjaithai Party ခေါင်းဆောင် အနူးတင် ချန်ဝိရာကူး (Anutin Charnvirakul) ကို ဝန်ကြီးချုပ် အသစ် အဖြစ် ထောက်ခံမည်ဟု ယနေ့မနက်တွင်  ထုတ်ဖော်ပြောကြားခဲ့သည်။   ထိုင်းဝန်ကြီးချုပ် ပေထုန်ထန် ရှီနာဝပ်ကို တရားရုံးက ရာထူးက ဖယ်ရှားပြီး နောက်တွင် ထိုင်းနိုင်ငံသည် ဝန်ကြီးချုပ် အသစ် ရွေးချယ်ရည့် အခြေအနေကို ရင်ဆိုင်နေရခြင်း ဖြစ်သည်။   အိမ်စောင့်အစိုးရ အဖြစ်တာဝန်ယူနေသော လက်ရှိ အာဏာရ Pheu Thai Party ကတော့ လွှတ်တော်ကို ဖျက်သိမ်းရန် ဘုရင့်ထံသို့ ခွင့်ပြုချက်တောင်းခံလွှာ ပေးပို့ထားသည်။   ပြည်သူ့ ပါတီ က Anutin ကို ဝန်ကြီးချုပ် အဖြစ် ထောက်ခံရာတွင်  သတ်မှတ်ချက်များ ပါဝင်သည်ဟု ပြောဆိုလိုက်ပြီး Anutin က အဆိုပါ သတ်မှတ်ချက်များကို သူ့အနေနှင့် လက်ခံနိုင်သည်ဟု သီးခြား မေးမြန်းမှု တစ်ခုတွင် ဖြေကြားခဲ့သည်။   အဆိုပါ သတ်မှတ်ချက်မှာ အစိုးရသစ် ဖွဲ့စည်းပြီး လေးလ အကြာတွင် ဝန်ကြီးချုပ် သစ်အနေဖြင့် အောက်လွှတ်တော်ကို ဖျက်သိမ်းပြီး အထွေထွေ ရွေးကောက်ပွဲ ကျင်းပရန် တောင်းဆိုထားခြင်း ဖြစ်သည်။   ဖွဲ့စည်းပုံ အခြေခံ ဥပဒေသစ်အတွက် ပြည်သူ့ ဆန္ဒခံယူပွဲ ကျင်းပရန် လိုအပ်ပါက ရွေးကောက်ပွဲ မတိုင်ခင် ကျင်းပရန် ပြည်သူ့ပါတီက သဘောထား ပေးထားသည်။   ထိုင်းစစ်တပ်က အာဏာသိမ်းမည် မဟုတ်ပဲ ဝန်ကြီးချုပ်သစ် ရွေးချယ်သည့် ကိစ္စမှာ ဘေးတွင် နေမည်ဟု ပြောသည်။

အနူတင်ကို ဝန်ကြီးချုပ် အဖြစ် ပြည်သူ့ပါတီ ထောက်ခံမည်

အနူတင်ကို ဝန်ကြီးချုပ် အဖြစ် ပြည်သူ့ပါတီ ထောက်ခံမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၃ ရက်။  လက်ရှိ အကြီးဆုံး ပါတီဖြစ်တဲ့  …

  • September 3, 2025
အောင်ပွဲနေ့တွင် တရုတ်က ခေတ်မီလက်နက်များ ထုတ်ပြ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၃ ရက်။   တရုတ်နိုင်ငံသည် ရုရှားနှင့် မြောက်ကိုရီးယား ခေါင်းဆောင်များ အပါအဝင် နိုင်ငံပေါင်း ၂၆ နိုင်ငံက ခေါင်းဆောင်များကို ဖိတ်ကြားပြီး အောင်ပွဲနေ့ အခန်းအနားကို ကျင်းပခဲ့သည်။   ဖက်ဆစ်ဂျပန်ကို အောင်နိုင်သည့် အနှစ် ၈၀ မြောက် အထိမ်းအမှတ် အခမ်းအနားတွင် တရုတ်သည် သူ၏ ခေတ်မီလက်နက်များကို ထုတ်ဖော်ပြသခဲ့ခြင်း ဖြစ်သည်။   ဤအခန်းအနားတွင် စိတ်ဝင်စားမှု အများဆုံးခံရသည့် လက်နက် ပစ္စည်းမှာ AJX-002 ဟု အမည်ပေးထားသည့် ရေငုတ်သင်္ဘောပစ် ဧရာမ ဒရုန်း ဖြစ်သည်။ ယင်း ရေအောက် ဒရုန်းသည် မီတာ ၂၀ ရှည်လျားသည်။ ရေအောက် ဧရာမ ဒရုန်းများသာမက ယနေ့ ပြသထားသည့် လက်နက်များတွင် တရုတ်ထုတ် လေဆာ လက်နက်များ၊ နျူကလီးယား စွမ်းအင်သုံး ပဲ့ထိန်း ဒုံးကျည်များလည်း ပါဝင်သည်။   ရေဒါရှာမတွေ့နိုင်သည့် Stealth အမျိုးအစား ကိုယ်ပျောက် ဒရုန်းများလည်း ပါဝင်ပြီး အဆိုပါ ဒရုန်းများသည် လူမောင်းနှင်သည့် ဂျက်တိုက်လေယာဉ် အနီးတွင် ကပ်လိုက်သွားပြီး တိုက်ခိုက်မှုများတွင် အကူအညီပေးနိုင်သည်ဟု ဆိုသည်။   လူကြိုက်များသည့် အခြား ပစ္စည်းတစ်ခုမှာ စက်ရုပ်များ ဖြစ်သည်။ စက်ရုပ် မြေခွေးဟု အမည်ပေးထားပြီး ကင်းထောက်ခြင်း၊ မိုင်းရှင်းခြင်း နှင့် အမဲလိုက်ခြင်းတို့ အထိ ကျယ်ကျယ်ပြန့်ပြန့် လုပ်ငန်းများ လုပ်ဆောင်နိုင်သည်ဟု ဆိုသည်။   စစ်ရေးပြပွဲ အပြီး ဂုဏ်ပြု နေ့လည်စာစားပွဲတွင် သမ္မတ ရှီကျင့်ပင်က ကမ္ဘာကြီးသည် အားနည်းသူကို အမဲလိုက်သည့် တောတွင်းဥပဒေကို ပြန်သွားရန် မဖြစ်နိုင်တော့ကြောင်း ပြောခဲ့သည်။   စစ်ရေးပြပွဲ မတိုင်မီ အချိန်တွင် မြန်မာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က မြောက်ကိုရီးယား ခေါင်းဆောင် ကင်ဂျုံအန် နှင့် တွေ့ဆုံခဲ့သည်ဟု သတင်းများက ဆိုသည်။

အောင်ပွဲနေ့တွင် တရုတ်က ခေတ်မီလက်နက်များ ထုတ်ပြ

အောင်ပွဲနေ့တွင် တရုတ်က ခေတ်မီလက်နက်များ ထုတ်ပြ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၃ ရက်။  တရုတ်နိုင်ငံသည် ရုရှားနှင့် မြောက်ကိုရီး…

  • September 3, 2025
အမေရိကန် စစ်တပ်က နိုင်ငံတကာ ရေပိုင်နက်တွင် မော်တော်ဘုတ်တစ်စီးကို ပစ်ခတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၃ ရက်။   အမေရိကန် စစ်တပ်သည် မူးယစ်ဆေးဝါးများ သယ်ဆောင်လာသည် ဆိုသော စွပ်စွဲချက်ဖြင့် မော်တော်ဘုတ်တစ်စီးကို ပစ်ခတ်ခဲ့ရာ လူ ၁၁ ဦး သေဆုံးခဲ့သည်။   ကာရေဘီယန် တောင်ပိုင်း နိုင်ငံတကာ ရေပြင်တွင် မော်တော်ဘုတ်တစ်စီးကို စက်တင်ဘာ ၂ ရက် အင်္ဂါနေ့က ပစ်ခတ်ခဲ့ခြင်း ဖြစ်သည်။   မော်တော်ဘုတ်သည် ဗင်နီဇွဲလား မူးယစ်ဂိုဏ်း တစ်ခုကပိုင်ဆိုင်ပြီး  မူးယစ်ဆေးဝါးတွေကို အမေရိကန် နိုင်ငံထဲ သယ်ဆောင်လာရန် ကြိုးပမ်းခဲ့တာကြောင့် အမေရိကန် စစ်တပ်က ယခုကဲ့သို့ ပစ်ခတ်ခြင်းဖြစ်သည်ဟု အမေရိကန် သမ္မတ ဒေါ်နယ် ထရန့်က ပြောသည်။   ပစ်ခတ်မှုတွင် ပါဝင်သော မော်တော်ဘုတ်သည် လူအစုအပြုံလိုက် သတ်ဖြတ်မှု၊ မူးယစ်ဆေးဝါး ကုန်သွယ်မှု၊ လိင် ကုန်ကူးမှုနဲ့ အကြမ်းဖက်မှုတွေ ကျူးလွန်ထားသည့် Nicolas Maduro (နီကိုလပ်စ် မာဒူရို) ၏ Tren de Aragua (TDA) အဖွဲ့ပိုင် ဖြစ်သည်ဟု အမေရိကန်က ပြောသည်။   အမေရိကန် နိုင်ငံခြားရေး ဝန်ကြီး မာကို ရူဘီယို က အမေရိကန်နိုင်ငံအနေနှင့် မူးယစ်ဆေးဝါး နှိမ်နင်းမှုများကို ဆက်လက် လုပ်ဆောင်သွားမည်ဟု ဆိုသည်။

အမေရိကန် စစ်တပ်က နိုင်ငံတကာ ရေပိုင်နက်တွင် မော်တော်ဘုတ်တစ်စီးကို ပစ်ခတ် 

အမေရိကန် စစ်တပ်က နိုင်ငံတကာ ရေပိုင်နက်တွင် မော်တော်ဘုတ်တစ်စီးကို ပစ်ခတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၃ ရက်။  အမေရိကန် စစ်တပ်…

  • September 3, 2025
×Close