သတင်း

အာဖဂန် ငလျင် လူ ၈၀၀ ကျော် သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂ ရက်။  ပြင်းအား ၆ မဂ္ဂနီကျု  ရှိသည့် ငလျင် အရှိန်ကြောင့် အာဖဂန် နစ္စတန် နိင်ငံတွင် လူပေါင်း ရာနဲ့ ချီပြီး သေဆုံးခဲ့ရသည်။  အာဏာပိုင်များအဆိုအရ ယခု လှုပ်သွားသည့် ငလျင်သည် အာဖဂန်တွင် လှုပ်ခဲ့သော ငလျင်များအနက် အဆိုးဆုံး တစ်ခု ဖြစ်ပြီး ယခုထက်ထိ အတည်ပြုထားနိုင်သော လူပေါင်း ၈၀၀ ကျော် သေဆုံးပြိး အနည်းဆုံး ၂၈၀၀ ဒဏ်ရာရခဲ့သည်ဟု ဆိုသည်။ နောက်ထပ်လည်း ကိန်းဂဏန်းများ တိုးပွားလာနိုင်သည်ဟု အာဏာပိုင်များက ဆိုသည်။  ပါကစ္စတန် နယ်စပ်ပိုင်းကျသည့် အရှေ့ပိုင်း ပြည်နယ်များ ဖြစ်သော Kunar (ကူနာ) နှင့် Nangarhar (နန်ဂါဟာ) တို့သည် မြေငလျင် ဒဏ်ကို အဆိုးဆုံးခံခဲ့ကြရသည်။  အိမ်အများအပြား ပြိုကျပြီး အိပ်မောကျနေသူများ ပိကုန်ကြခြင်းလည်း ဖြစ်သည်။  ငလျင်က တနင်္ဂနွေနေ့ ည သန်းခေါင် မတိုင်ခင် လှုပ်ခတ်ခဲ့ခြင်းဖြစ်ပြီး တနင်္လာနေ့ တနေ့လုံး လူနာများအား ရဟတ်ယာဉ်များဖြင့် ဆေးရုံများသို့ ပို့ဆောင်နေခဲ့ရသည်ဟု ဆိုသည်။  ယမန်နေ့က လုပ်သည့် သတင်းစာ ရှင်းလင်းပွဲတွင် အာဖဂန်နစ္စတန် နိုင်ငံ ပြောရေး ဆိုခွင့်ရှိသူက သေဆုံးသူပေါင်း ၈၁၂ ယောက်ရှိသွားပြီဟု ဆိုသည်။  ကယ်ဆယ်ရေး လုပ်ငန်းများမှာ ငလျင်ဘေးသင့် ဒေသများသို့ သွားရောက်ဆဲဖြစ်ပြီး ငလျင်ကြောင့် ကျေးရွာအများအပြားမှာ ရွာလုံးကျွတ် ပြားသွားသည်ဟု ဆိုသည်။  အာဖဂန်နစ္စတန်တွင်ကျရောက်သော သဘာဝ ဘေးအန္တရာယ်သည် ဒေသန္တရ အာဏာပိုင်များ ကိုင်တွယ်နိုင်သည့် အတိုင်းအတာထက် ကျော်လွန်နေသောကြောင့် နိုင်ငံတကာ အလှူရှင်များအနေဖြင့် ဝိုင်းဝန်းကူညီကြပါရန် ဒုက္ခသည်များဆိုင်ရာ မဟာမင်းကြီးရုံး UNHCR က တိုက်တွန်းထားသည်။

အာဖဂန် ငလျင် လူ ၈၀၀ ကျော် သေဆုံး

အာဖဂန် ငလျင် လူ ၈၀၀ ကျော် သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂ ရက်။  ပြင်းအား ၆ မဂ္ဂနီကျု  ရှိသည့် ငလျင် အရှိန်ကြောင့်…

  • September 2, 2025
ကမ္ဘာတဝှမ်း အုပ်ချုပ်မှု ပုံစံသစ် တရုတ် အဆိုပြု  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂ ရက်။  တရုတ်သမ္မတ Xi Jinping (ရှီကျင်းပင်) က ကမ္ဘာတဝှမ်း အုပ်ချုပ်မှု ပုံစံ သစ်ကို တောင်းဆိုလိုက်ပြီး တရုတ်နိုင်ငံအနေဖြင့် ရှန်ဟိုင်း ပူးပေါင်းဆောင်ရွက်ရေး အဖွဲ့ SCO အဖွဲ့ဝင်များအား ၂၀၂၅ ခုနှစ်အတွင်း ငွေကြေးထောက်ပံ့မှုအဖြစ် တရုတ်ငွေ ယွမ် ၂ ဘီလီယံ (၉.၂ ဘီလီယံ ဘတ်) ပေးမည်ဟု ဂတိပြုလိုက်သည်။  ထို့အပြင် တရုတ်နိုင်ငံအနေဖြင့် SCO အဖွဲ့အစည်း ဘဏ်တွေ အကြား နောက်သုံးနှစ်အတွင်း တရုတ်ငွေ ယွမ် ၁၀ ဘီလီယံ ချေးငွေ ထုတ်ပေးမည်ဟုလည်း ကတိပြုလိုက်သည်။  ရှန်ဟိုင်း ပူးပေါင်းဆောင်ရွက်ရေးအဖွဲ့ ထိပ်သီးညီလာခံကို တရုတ်နိုင်ငံ Tianjin (တီယန်ကျင်း) မြို့တွင် စက်တင်ဘာ ၁ ရက်ကစပြီး ကျင်းပနေခြင်း ဖြစ်သည်။  သမ္မတ ရှီကျင်းပင်အဆိုပြုထားသော ကမ္တာတဝှမ်း အုပ်ချုပ်မှု ပုံစံသစ်တွင် အချက်ငါးချက် ပါဝင်သည်။ အချုပ်အချာ တန်းတူညီမျှမှုကို လိုက်နာခြင်း၊ နိုင်ငံတကာ တရားဥပဒေစိုးမိုးမှုကို စွဲကိုင်ခြင်း၊ နိုင်ငံစုံ ဝါဒကို ကျင့်သုံးခြင်း၊ လူထု ဗဟိုပြု ချည်းကပ်မှုကို ထောက်ခံ အားပေးခြင်းနှင့် လက်တွေ့ လုပ်ငန်း လုပ်ဆောင်မှုကို အာရုံစိုက်ခြင်းတို့ ပါဝင်သည်။   နိုင်ငံ ကြီးသည်ဖြစ်စေ ငယ်သည်ဖြစ်စေ၊ အင်အားနှင့် စီးပွားမည်သို့ ရှိသည်ဖြစ်စေ နိုင်ငံတိုင်းသည် ကမ္ဘာတဝှမ်း အုပ်ချုပ်မှုတွင် ပါဝင်ခွင့်၊ ဆုံးဖြတ်ချက်ချမှတ်ပိုင်ခွင့်နှင့် အကျိုးခံစားပိုင်ခွင့်များ တန်းတူဖြစ်စေရမည်ဟု ဆိုသည်။  ရှန်ဟိုင်း ပူးပေါင်းဆောင်ရွက်ရေး အဖွဲ့ (SCO) ရဲ့ နှစ်ပတ်လည် အစည်းအဝေးသည် ယခုနှစ်တွင် နိုင်ငံအများဆုံး တက်ရောက်ပြီး အကြီးမား ဆုံးလည်း ဖြစ်သည်။ ရုရှား၊ အိန္ဒိယ၊ မြောက်ကိုရီးယားနဲ့ မြန်မာနိုင်ငံတို့ အပါအဝင် နိုင်ငံပေါင်း ၂၀ ကျော်တက်ရောက်ပြီး နိုင်ငံတကာ အဖွဲ့အစည်း ၁၀ ခု တက်ရောက်ခဲ့ကြသည်။  ရှန်ဟိုင်း ပူးပေါင်းဆောင်ရွက်ရေးအဖွဲ့သည် အနောက်နိုင်ငံအဝန်းအဝိုင်း ပြင်ပ ဘဏ္ဍာရေးနှင့် ကုန်သွယ်ရေးကို ထူထောင်ထားသည့် တရုတ်ဦးဆောင်သော ငွေကြေး အဖွဲ့ အစည်းလည်း ဖြစ်သည်။  SCO နိုင်ငံတွေ အတွင်း တရုတ်၏ ရင်းနှီးမြှုပ်နှံမှုသည် အမေရိကန်ဒေါ်လာ ၈၄ ဘီလီယံ ကျော်ရှိပြီး SCO နိုင်ငံတွေ အကြား နှစ်စဉ် ကုန်သွယ်မှု တန်ဖိုးမှာ အမေရိကန် ဒေါ်လာ ဘီလီယံ ၅၀၀ ကျော်ရှိသည်။

ကမ္ဘာတဝှမ်း အုပ်ချုပ်မှု ပုံစံသစ် တရုတ် အဆိုပြု 

ကမ္ဘာတဝှမ်း အုပ်ချုပ်မှု ပုံစံသစ် တရုတ် အဆိုပြု  သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂ ရက်။  တရုတ်သမ္မတ Xi Jinping (ရှီကျ…

  • September 2, 2025
၂၀၂၆ ကမ္ဘာ့ဖလားအတွက် FIFA က စေတနာ့ဝန်ထမ်း ခေါ်ယူနေ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂ ရက်။   လာမယ့် ၂၀၂၆ ခုနှစ် အမေရိကန်၊ ကနေဒါနှင့် မက္ကစီကို နိုင်ငံ သုံးနိုင်ငံတွင် ကျင်းပမည့် ကမ္ဘာ့ဖလား ဘောလုံးပွဲအတွက် စေတနာ့ဝန်ထမ်းများကို ကမ္ဘာ့ ဘောလုံးအဖွဲ့ချုပ် FIFA (ဖီဖှာ) က ခေါ်ယူနေသည်။   စေတနာ့ဝန်ထမ်းများသည် ကမ္ဘာ့ဖလား အားကစားသမားများနှင့် အနီးကပ် လုပ်ငန်းများ လုပ်ဆောင်ရမည် ဖြစ်သည်။   စုစုပေါင်း စေတနာ့ ဝန်ထမ်း ၆၅,၀၀၀ အတွက် လျှောက်လွှာခေါ်ယူထားခြင်း ဖြစ်သည်။   လျောက်ထားချိန်တွင် အသက် ၁၈ နှစ်ပြည့်သည့် မည်သူ မဆို လျောက်ထားနိုင်သည်ဟု ပြောသည်။ သို့သော်လည်း အမေရိကန်နှင့် ကနေဒါ နိုင်ငံများတွင် စေတနာ့ ဝန်ထမ်းလုပ်ရန် ထိုနိုင်ငံများက သတ်မှတ်ထားသော ဗီဇာ လိုအပ်ချက်များကို ပြည့်မီဖို့ လိုအပ်သည်ဟု ဆိုသည်။   စေတနာ့ဝန်ထမ်း အစီအစဉ်ဆိုသည့် အတိုင်း လုပ်အားခ ပေးခြင်း မရှိသော်လည်း FIFA ကမ္ဘာ့ဖလား ၂၀၂၆ စေတနာ့ ဝန်ထမ်း ယူနီဖောင်း၊ သီးခြား ဆုလာဘ်များနှင့် အသိအမှတ်ပြုလက်မှတ်များနှင့်  လက်ဆောင်များ ရမည်ဖြစ်သည့်အပြင် ကျွမ်းကျင်မှု အခြေပြု သင်တန်းများကိုလည်း တက်ရောက်ခွင့် ရမည်ဖြစ်သည်။ စေတနာ့ ဝန်ထမ်း တာဝန်ထမ်းဆောင်စဉ် အချိန်အတွင်း အစားအသာက်များကို FIFA က တာဝန်ယူပေးမည်ဟု ဆိုသည်။   စိတ်ဝင်စားသူများ အနေနှင့် အခု စက်တင်ဘာလ ကုန်အထိ လျောက်ထားနိုင်သေးသည်ဟု ကြေညာထားသည်။   နေရာထိုင်ခင်းနှင့် ခရီးသွား ကုန်ကျစားရိတ်များကိုမူ ကိုယ်တိုင် ကျခံရမည်ဟု FIFA က ဆိုသည်။   လျောက်ထားလိုပါက FIFA  အင်တာနက် စာမျက်နှာ fifaworldcup.com/volunteers တွင်  ရှာဖွေနိုင်သည်။

၂၀၂၆ ကမ္ဘာ့ဖလားအတွက် FIFA က စေတနာ့ဝန်ထမ်း ခေါ်ယူနေ 

၂၀၂၆ ကမ္ဘာ့ဖလားအတွက် FIFA က စေတနာ့ဝန်ထမ်း ခေါ်ယူနေ  သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂ ရက်။  လာမယ့် ၂၀၂၆ ခုနှစ် အမေရိကန်၊ ကနေဒါန…

  • September 2, 2025
 တနင်္လာရီတိုင်း ကုန်စည်အချို့ အဝင်ပိတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ် ၃၀ ရက်။   တနင်္သာရီတိုင်းအတွင်းသို့ ဆိုလာနှင့် လျှပ်စစ်ပစ္စည်းအပါ ကုန်ပစ္စည်းအချို့ သယ်ဆောင်ခွင့် ကန့်သတ်လိုက်သည် ဟု ကုန်စည်ပို့ဆောင်ရေး လုပ်ငန်း လုပ်ကိုင်နေသူများက ပြောသည်။   စစ်ကော်မရှင်မှ ဆိုလာ၊ လျှပ်စစ်ပစ္စည်း၊ ဆေးဝါးနှင့် အလှကုန်ပစ္စည်း အပါအဝင် ကုန်ပစ္စည်းအချို့အား တိုင်းပြင် ပမှ သယ်ဆောင်ခွင့်ကို ကန့်သတ်လိုက်သည့်အတွက် ပို့ဆောင်မှုများ ရပ်ဆိုင်းလိုက်ရသည်ဟု ကုန်စည် ပို့ဆောင် ရေးလုပ်ငန်း လုပ်ကိုင်သူများက ပြောသည်။   ကုန်စည်ပို့ဆောင်ရေး လုပ်ငန်း လုပ်ကိုင်နေသူတစ်ဦးက “ကန့်သတ်လိုက်တဲ့ ကုန်ပစ္စည်းတွေကတော့ ဆိုလာ၊ ဘက်ထရီ၊ အလှကုန်၊ ဆေးဝါး၊ အမျိုးသမီး လစဥ်သုံးပစ္စည်းတွေ၊ စားသောက်ကုန်၊ လူသုံးကုန် ပစ္စည်း အမျိုး မျိုးနဲ့ စက်သုံးဆီတွေ လုံး၀ ပို့ခွင့်မရှိတော့ဘူး။ ဒါ့အပြင် လက်ကိုင်ဖုန်း၊ ပါဝါဘဏ် (Power Bank)၊ လက်ပတ် နာရီ၊ ကွန်ပျူတာစတဲ့ လျှပ်စစ်ပစ္စည်းတွေလည်း ပါသေးတယ်” ဟု ပြောသည် ။   ပြည်တွင်း ပါဆယ်ပို့ လုပ်ငန်းများနှင့် အမြန်ချောပို့ လုပ်ငန်းများ အားလုံး လိုက်နာရမည့် စည်းမျဉ်းစည်းကမ်း များနှင့် တားမြစ် ကန့်သတ်ကုန်ပစ္စည်းများ၊ မပို့ဆောင်ရမည့် နေရာများကို စစ်ကော်မရှင်မှ ထုတ်ပြန်ထားသည်။   အဆိုပါ ထုတ်ပြန်ချက်ကို မလိုက်နာသူများ အားလုံးကို လုပ်ငန်းလိုင်စင် ပိတ်သိမ်း ရပ်ဆိုင်းမည်ဟု ကုန်စည် ပို့ဆောင်ရေး လုပ်ငန်းရှင်များကို တရားဝင် ခေါ်ယူပြောဆိုထားခြင်း ဖြစ်သည်။   တနင်္သာရီတိုင်းအတွင်းရှိ ထားဝယ်၊ မြိတ်၊ ကော့သောင်းစသည့် မြို့များသို့ Royal Express၊ BeeXprss၊ Ninja Van စသည့် ကုန်စည်ပို့ဆောင်ရေး လုပ်ငန်းများအပြင် ခရီးသည် ယာဥ်လိုင်းများကလည်း ပို့ဆောင်လေ့ ရှိကြ သည်။   စစ်ကော်မရှင်တပ် စစ်ဆေးရေးဂိတ်များတွင် ကုန်စည် ပစ္စည်းပို့ဆောင်ပေးသည့် ဝန်ဆောင်မှုများကို ယခု သီတင်းပတ်အတွင်း၌ ကန့်သတ်လိုက်ခြင်း ဖြစ်ကြောင်း ကုန်စည်ပို့ဆောင်ရေး လုပ်ငန်း လုပ်ကိုင်နေသူများက ပြောသည်။   စစ်ကော်မရှင်တပ်က တနင်္သာရီတိုင်း အပါအဝင် ပဲခူး၊ မွန်၊ ကရင်၊ ရှမ်း/မြောက်၊ ကယား၊ ချင်း၊ မကွေး၊စစ်ကိုင်း တို့ကို ကုန်ပစ္စည်း ပို့ဆောင်ခွင့်ကို ကန့်သတ်ထားပြီး ရန်ကုန်၊ မန္တလေး၊ နေပြည်တော်တို့ကိုသာ ပို့ဆောင်၍ ရမည် ဖြစ်သည်။   သြဂုတ်လမှ စတင်၍ စစ်ကော်မရှင်တပ်မှ လေဆိပ်နှင့် နယ်စပ်ဂိတ်များမှ ကုန်စည် တင်သွင်းခွင့်နှင့် တစ်ပိုင် တစ်နိုင် ကုန်ပစ္စည်း သယ်ယူလာခွင့်များကိုပါ ကန့်သတ်ထားပြီး ထိုင်းနှင့် ကုန်သွယ်မှုအသစ် တစ်ခုအဖြစ် ရန်ကုန် - ကော့သောင်း - ရနောင်း တို့ကို ကွန်တိန်နာ စနစ်ဖြင့် ပို့ကုန်/သွင်းကုန် လိုင်စင်များကို ယမန်နှစ် ဇွန်လမှ စတင်ကာ တင်သွင်းခွင့် ပြုထားခဲ့သည်။   ဓါတ်ပုံ - တနင်္သာရီတိုင်းအဝင် မလွဲတောင် စစ်ကော်မရှင် စစ်ဆေးရေးဂိတ် (ပုံဟောင်း)  

 တနင်္လာရီတိုင်း ကုန်စည်အချို့ အဝင်ပိတ်

တနင်္လာရီတိုင်း ကုန်စည်အချို့ အဝင်ပိတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ် ၃၀ ရက်။  တနင်္သာရီတိုင်းအတွင်းသို့ ဆိုလာနှင့် လျှပ်စစ်ပစ္စည်…

  • August 30, 2025
ကုန်ကားတစ်စီးအား KNU PDF ပူးပေါင်းတပ်က မီးရှို့   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၃၀ ရက်။   မြိတ်မြို့နယ်ထဲက ပြည်ထောင်စု လမ်းမကြီးပေါ်တွင် စစ်ကော်မရှင်တပ်နှင့် ဆက်စပ်သည့် ကုန်ကားတစ်စီးကို ကရင်အမျိုးသား အစည်းအရုံး KNU နှင့် PDF ပူးပေါင်းအဖွဲ့က မီးရှို့ဖျက်ဆီးလိုက်သည်ဟု ရွာသားများက ပြောသည်။   မြိတ်မြို့နယ်၊ ပြည်ထောင်စုလမ်းမကြီးပေါ်ရှိ လသာကျေးရွာအနီးရှိ ဒေသအခေါ် ရေနက်ကြီးကွင်းဆိုသည့် နေရာတွင် ကော့သောင်းမြို့မှ မြိတ်မြို့သို့ မောင်းနှင်လာသည့် ကုန်ကားတစ်စီးကို KNU နှင့် PDF ပူးပေါင်းအဖွဲ့က မီးရှို့ ဖျက်ဆီးလိုက်ခြင်း ဖြစ်သည်။   ပူးပေါင်းအဖွဲ့တာဝန်ရှိသူက “သတင်းရလို့ တမင်စောင့်နေတာပါ၊ ကားပေါ်ပါလာတဲ့ ဆိုင်ကယ်တွေက မြိတ်ကို ပို့ပေးရမှာလို့ ကားဒရိုင်ဘာက ပြောတယ်၊ စားသောက်ကုန် ပစ္စည်းတွေကတော့ ပိုင်ရှင် အယောက် ၃၀ လောက် ပိုင်တယ်လို့ သိရတယ်။ သူတို့ကိုတော့ ပထမ အရှေ့ကကားနဲ့ ပြန်ထည့်ပြီး လွှတ်ပေးလိုက်တယ်” ဟု ပြော သည်။   ဆိုင်ကယ်အသစ် ရှစ်စီးနှင့်အတူ စားသောက်ကုန်များ တင်ဆောင်လာသည့် 4B-4160 နံပါတ်ပါ Hino အမျိုး အစား ကုန်တင်မှန်လုံကား တစ်စီးကို ဩဂုတ်လ ၂၆ ရက်နေ့၊ ညနေ ၄ နာရီအချိန်ခန့်တွင် ဖမ်းဆီးပြီး မီးရှို့လိုက် ခြင်း ဖြစ်သည်။   ကော့သောင်းမှ မြိတ်မြို့သို့ ရွှေသာရီယာဥ်လိုင်းက ကားနှစ်စီးဖြင့် ထွက်ခွာမောင်းနှင်လာပြီးနောက် လသာကျေး ရွာအနီးတွင် ပူးပေါင်းအဖွဲ့မှ ပထမဆုံးကားကို တားဆီးစစ်ဆေးပြီး ရပ်ခိုင်းထားသည်။   ထို့နောက် ဒုတိယကား ထပ်မံရောက်ရှိလာချိန်တွင် ပူးပေါင်းအဖွဲ့က ထပ်မံ၍ စစ်ဆေးခဲ့သည်ဟု ရွာသားတစ်ဦး က ပြောသည်။   ဒုတိယကားပေါ်မှ ယာဉ်မောင်း၊ ယာဉ်နောက်လိုက် အပါအဝင် ကားပေါ်လိုက်ပါလာသူ သုံးဦးကို စစ်ဆေးပြီး နောက် ကားပေါ်မှ ဆင်းခိုင်းကာ ပထမဆုံးကားဖြင့် လိုက်ပါစေပြီးနောက် ဒုတိယကားကို မီးရှို့ဖျက်ဆီးလိုက်ခြင်း ဖြစ်သည်။   မီးရှို့ဖျက်ဆီးလိုက်သည့် ကားမှာ စစ်ဘက်ရေးရာ လုံခြုံရေးတပ်ဖွဲ့ဝင် (စရဖ) ကိုနိုင်လင်းစိုးနှင့် ဆက်နွယ်နေသည့် ကားဖြစ်ကြောင်း သိရှိရပြီး ပါလာသည့် ကုန်ပစ္စည်းများနှင့် ဆိုင်ကယ် ရှစ်စီးကို သိမ်းယူဆွဲချပြီးနောက် ကားကို လမ်းမကြီးပေါ်၌ပင် မီးရှို့ဖျက်ဆီးလိုက်သည်။   ကားပိုင်ရှင်ဆိုသူကမူ ကားမှာ စရဖ တပ်ဖွဲ့ဝင်၏ ကားမဟုတ်ဘဲ သာမာန်အရပ်သား ပိုင်ဆိုင်သည့်ကားသာ ဖြစ်ကြောင်း ငြင်းဆိုထားသည်။   မီးရှို့ဖျက်ဆီးပြီးသည့်နောက် ညနေ ၆နာရီအချိန်ခန့်တွင် တုံးဗျောကြီးကျေးရွာရှိ စစ်ကော်မရှင် တပ်စခန်းမှ လသာကျေးရွာနှင့် တုံးဗျောကျေးရွာဟောင်းဘက်သို့ လက်နက်ကြီးများဖြင့် ပစ်ခတ်ခဲ့သေးသည်ဟု ရွာသားများ က ဆိုသည်။

ကုန်ကားတစ်စီးအား KNU PDF ပူးပေါင်းတပ်က မီးရှို့

ကုန်ကားတစ်စီးအား KNU PDF ပူးပေါင်းတပ်က မီးရှို့ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၃၀ ရက်။  မြိတ်မြို့နယ်ထဲက ပြည်ထောင်စု လမ်းမကြီးပေါ…

  • August 30, 2025
သတင်းပေးဆိုသူများ၏ ရော်ဘာခြံများကို မြိတ်ခရိုင် တပ်ရင်း ၂ မှ ချိပ်ပိတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၃၀ ရက်။   မြိတ်ခရိုင် တပ်ရပ်း ၂ က စစ်ကော်မရှင် သတင်းပေးများ၏ ရော်ဘာဥယျာဥ်များကို ထပ်မံချိပ်ပိတ်လိုက်သည်ဟု ဒေသခံများက ပြောသည်။   မြိတ်ခရိုင်၊ တနင်္သာရီမြို့နယ်၊ ပဝကျေးရွာရှိ စစ်ကော်မရှင်တပ် သတင်းပေးဆိုသူများ၏ နေအိမ်များကို မြိတ် ခရိုင်တပ်ရင်း ၂ မှ ချိပ်ပိတ်ခဲ့ပြီးနောက် ဥယျာဥ်ခြံနှင့် ‌ရော်ဘာခြံများကိုလည်း ‌ဆေးနီသုတ်၊ စာကပ်ပြီး ချိတ်ပိတ် လိုက် သည်ဟု ရွာသားများက ပြောသည်။   ‌အသက် ၄၀ ခန့်အရွယ် ရွာသားတစ်ဦးက “ဦးကြည်ဟုန်ခြံကို သူ့စပြီး ပြေးကတည်းက ပေါင်သွားတာကြောင့် ညီမတွေက ဝိုင်းစုပြီး ပြန်ထုတ်ထားတာ၊ အခုက ချိပ်ပိတ်လိုက်တော့ ထုတ်ထားတဲ့ သူတွေမှာ ကြားက ခံရတာ ပေါ့” ဟု ပြောသည်။   ပဝကျေးရွာရှိ စစ်ကော်မရှင် သတင်းပေးဟု ဆိုသူ ဦးဌေးနိုင်၊ ဦးကြည်ဟုန်နှင့် အခြားသူ တစ်ဦးတို့ ပိုင်ဆိုင်သည့် နေအိမ် ၃ ဆောင်ကို မြိတ်ခရိုင်တပ်ရင်း - ၂ က ဩဂုတ်လ ၁၇ ရက်နေ့တွင် ချိပ်ပိတ်ခဲ့ခြင်း ဖြစ်သည်။   ထို့နောက် ဩဂုတ်လ ၂၀ ရက်နေ့၌  ဦးဌေးနိုင်နှင့် ဦးကြည်ဟုန်တို့ ပိုင်ဆိုင်သည့် ရော်ဘာခြံနှင့် ဥယျာဥ်ခြံ အတွင်းရှိ အပင်များတွင် ဆေးအနီရောင်ဖြင့် ကြက်ခြေခတ်ကာ ချိပ်ပိတ်သိမ်းဆည်းကြောင်း စာပြားများ ကပ်ကာ ထပ်မံ၍ ချိပ်ပိတ်လိုက်သည်။   ချိပ်ပိတ်ခဲ့သည့် မြေအကျယ်အဝန်းမှာ ၈ ဧကကျော်ခန့် ရှိပြီး ကွမ်းခြံအတွင်း၌ အသီးသီးနေသည့် ကွမ်းပင်များ ရှိကာ ရော်ဘာခြံမှာလည်း လက်ရှိ ခြစ်နေသည့် ရော်ဘာခြံဖြစ်ကြောင်း ရွာသားများက ပြောသည်။   မြိတ်ခရိုင်တပ်ရင်း ၂ မှ ချိပ်ပိတ်ကြောင်း ဖော်ပြကပ်ထားသည့် စာတွင် စစ်ကော်မရှင်တပ်နှင့် ပူးပေါင်းလုပ်ဆောင်သူများ၏ အိမ်၊ ခြံ၊ မြေ၊ လယ်ယာ၊ ဥယျာဥ်၊ ယာဥ်ကြီး၊ ယာဥ်ငယ်များ အားလုံးကို ချိပ်ပိတ်လိုက်ခြင်း ဖြစ်သည်။   အဆိုပါ ချိပ်ပိတ်သိမ်းဆည်းထားသည့် အရာများကို အသုံးပြုခြင်း၊ ရောင်းဝယ်ခြင်းနှင့် သုံးစွဲခြင်းပြုပါက အရေးယူခံရမည် ဖြစ်ကြောင်း မြိတ်ခရိုင်တပ်ရင်း ၂ က ဆိုသည်။

သတင်းပေးဆိုသူများ၏ ရော်ဘာခြံများကို မြိတ်ခရိုင် တပ်ရင်း ၂ မှ ချိပ်ပိတ်

သတင်းပေးဆိုသူများ၏ ရော်ဘာခြံများကို မြိတ်ခရိုင် တပ်ရင်း ၂ မှ ချိပ်ပိတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၃၀ ရက်။  မြိတ်ခရိုင် တပ်ရပ်…

  • August 30, 2025
မြိတ်မှ ဝယ်လာသည့် ဆန်အိတ်များ ရေတပ် သိမ်းဆည်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၃၀ ရက်။   မြိတ်ခရိုင်၊ ကျွန်းစုမြို့နယ်၊ ဘဒ္ဒနဲကျေးရွာအုပ်စုထဲက ရှော်တောမော်ကျေးရွာ အရှေ့တွင် ရပ်နားထားသည့် ရေတပ်စစ်သင်္ဘောမှ ပြည်သူများအတွက် ဝယ်လာသည့် ဆန်အိတ်များကို သိမ်းယူသွားသည်။   မြိတ်မြို့မှ ဝယ်ယူလာသည့် ဆန်အိတ်များကို စစ်ကော်မရှင် ရေတပ်သင်္ဘောပေါ်က တပ်ဖွဲ့ဝင်များက သိမ်းယူ သွားခြင်း ဖြစ်သည်ဟု ရွာသားများက ပြောသည်။   အသက် ၅၀ ခန့်အရွယ် ရွာသားတစ်ဦးက “ဆန်အိတ်တွေ အသိမ်းခံရတော့ အုပ်ချုပ်ရေးမှူး ကိုယ်တိုင် သွားဖြေ ရှင်းတာ ရေတပ်ဗိုလ်မှူးက ပြန်မပေးဘူး။ ဘယ်လိုမှ အကြိမ်ကြိမ် ပြောဆိုလို့မရတော့ အုပ်ချုပ်ရေးမှူး လုပ်တဲ့ သူက ရွာသားတွေအတွက် ဒါလေးတောင် လုပ်ပေးခွင့် မရှိရင် ငါရွာလူကြီး မလုပ်နိုင်တော့ဘူး ဆိုပြီး မြိတ်ကို တက်သွားတာ။ ရွာမှာ မရှိတော့ပါဘူး” ဟု ပြောသည်။   အုပ်ချုပ်ရေးမှူး မြိတ်ကို တက်သွားပြီးသည့်နောက် ဆန်အိတ်များ ပြန်လည်ရရှိရေးအတွက် ရပ်မိရပ်ဖများက ဆက်လက်ညှိနှိုင်းနေ သည်ဟု ဒေသခံများက ပြောသည်။   လှေဖြင့်တင်ဆောင်လာသည့် ဆန်အိတ်တစ်ရာနီးပါးကို စစ်ကော်မရှင်တပ်၏ အမှတ် 116 ရေတပ်စစ်သင်္ဘောက သြဂုတ်လ ၂၄ ရက်နေ့တွင် သိမ်းယူခဲ့ခြင်း ဖြစ်သည်။   ဩဂုတ်လ ပထမအပတ်မှ စတင်၍ ကျွန်းစုမြို့နယ် အတွင်းရှိ ကျေးရွာများကို ဆန်နှင့် စက်သုံးဆီ တင်သွင်းခွင့်ကို စစ်ကော်မရှင်က ပိတ်ပင်ထားခဲ့သည်ဟု ရွာသားများက ဆိုသည်။   ထိုသို့ တင်သွင်းခွင့် ပိတ်ထားချိန်၌ ကျေးရွာများတွင် ဆန်ပြတ်လပ်လာမှု ရှိနေသည့်အတွက် ရှော်တောမော်ကျေးရွာ၊ အုပ်ချုပ်ရေးမှူးမှ ဘဒ္ဒနဲကျေးရွာအုပ်စုအတွင်းရှိ ကျေးရွာများကို ခွဲဝေရောင်းချပေးရန် ဆန်အိတ်တစ်ရာနီးပါးကို မြိတ်မြို့မှ မှာယူခဲ့ခြင်း ဖြစ်သည်။   ဘဒ္ဒနဲကျေးရွာအုပ်စုတွင် ၂၀၁၄ ခုနှစ် သန်းကောင်စာရင်းအရ လူဦးရေ ၆,၅၀၀ ဝန်းကျင်ခန့်ရှိသည်။   ကျွန်းစုမြို့နယ်အတွင်းရှိ ပင်လယ်ပြင်တွင် ကင်းလှည့် သွားလာနေသည့် စစ်ကော်မရှင်၏ စစ်သင်္ဘောများက စက်လှေကြီးများနှင့် အမြန်ရေယာဉ်များ‌ကိုလည်း တင်းတင်းကျပ်ကျပ် စစ်ဆေးနေသည်ဟု ခရီးသွားလာနေ သည့် ရွာသားများက ဆိုသည်။   စက်သုံးဆီနှင့် ဆန်အိတ်များကို တင်ဆောင်လာပါက စစ်သင်္ဘောမှ သိမ်းဆည်းကာ ဒဏ်ရိုက်မှုများ ဆက်တိုက် လုပ်နေကြသည်ဟု ရွာသားများက ပြောပြသည်။

မြိတ်မှ ဝယ်လာသည့် ဆန်အိတ်များ ရေတပ် သိမ်းဆည်း

မြိတ်မှ ဝယ်လာသည့် ဆန်အိတ်များ ရေတပ် သိမ်းဆည်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၃၀ ရက်။  မြိတ်ခရိုင်၊ ကျွန်းစုမြို့နယ်၊ ဘဒ္ဒနဲကျေးရွ…

  • August 30, 2025
လေကြောင်းတိုက်ခိုက်မှုများမှာ ပြည်သူကို ကြောက်ရွံ့စေရန် ဖြစ်ဟု BNI ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၃၀ ရက်။   စစ်ကော်မရှင်တပ်က တော်လှန်ရေးအင်းအားစုများ ထိန်းချုပ်ထားသည့် ဒေသများကို ပြန်လည် ထိန်းချုပ်ရ ယူရန်နှင့် ပြည်သူလူထုကို အကြောက်တရား ရိုက်သွင်းလိုသည့် ရည်ရွယ်ချက်နှင့် လေကြောင်း တိုက်ခိုက်မှု များကို ဆက်တိုက် လုပ်နေခြင်း ဖြစ်သည်ဟု နိုင်ငံတကာ မြန်မာသတင်း (BNI) ပြောသည်။   နိုင်ငံတကာ မြန်မာသတင်း BNI ၏ ငြိမ်းချမ်းရေး လုပ်ငန်းစဉ် စောင့်ရေးအဖွဲ့ (BNI-MPM Team) က ဩဂုတ်လ ၂၆ ရက်နေ့တွင် လုပ်သည့် ‘မြန်မာ့ငြိမ်းချမ်းရေး လုပ်ငန်းစဥ်ကို ပုံဖော်ခြင်း ရည်ညွှန်း အကိုးအကား ၂၀၂၄-၂၀၂၅’ စာအုပ်မိတ်ဆက် အခမ်းအနားတွင် ထည့်သွင်း ပြောဆိုခြင်း ဖြစ်သည်။   BNI မန်းနေဂျင်းဒါရိုက်တာ မတင်တင်ညိုက “စစ်တပ်က ပြည်သူလူထုကို နေ့စဉ် မလုံခြုံအောင် မအေးချမ်း အောင် အကြောက်တရားတွေရှိအောင် သူတို့အနေနဲ့ ဖန်တီးတယ်။ ပြည်သူလူထုတွေ သေကြေပျက်စီးဆုံးရှံးမှု တွေ အရမ်းကြီးသလို ကိုယ့်ရဲ့ တော်လှန် ရေးအင်အားစုအပါအဝင် တပ်သားအပါအဝင် ပြည်သူလူထုတွေရဲ့ ရှင် သန်ရေး ဘဝအေးချမ်းရေးကို ရှေးရူးတဲ့အနေနဲ့ တော်လှန်ရေး အင်အားစုတွေက နယ်မြေတွေကို လက် လွတ်လိုက်ရတဲ့ဟာတွေ ရှိတယ်” ဟု ပြောသည်။   လက်ရှိတွင် စစ်ကော်မရှင်တပ်သည် တော်လှန်ရေး တပ်ဖွဲ့များ ထိန်းချုပ်ထားသည့် ပြည်နယ်နှင့် တိုင်းဒေသကြီး များကို လေကြောင်းတိုက်ခိုက်မှု၊ ဒရုန်းနှင့် ဗုံးကြဲတိုက်ခိုက်မှုများ ယခင်ကထက် ပို၍ ကျယ်ကျယ်ပြန့်ပြန့် လုပ်ဆောင်လာသည်ဟု ဒေသခံများနှင့် တော်လှန်ရေးအင်အားစုများက ပြောသည်။   လေကြောင်းတိုက်ခိုက်မှုများ အပြင် ဒရုန်းနှင့် ဗုံးကြဲတိုက်ခိုက်မှုတို့ကြောင့် ဒေသခံ ပြည်သူများမှာ နေ့စဉ်ရက်ဆက် ထိခိုက်သေဆုံးနေရပြီး စိုးရိမ်ပူပန်စိတ်၊ ကြောက်ရွံ့စိတ်များနှင့် ရှင်သန်နေကြရသည်။   ကရင်နီပြည်ကြား ကာလအုပ်ချုပ်ရေး ကောင်စီ - IEC အတွင်းရေးမှူး ၂ ဦးဗညားက “အခုနောက်ပိုင်း လေယာဉ်နဲ့ ဗုံးကြဲခံရတဲ့ ဟာတွေက နေရာတကာမှာ ဖြစ်နေတယ်ပေါ့နော်။ အဲ့တော့ လူထုတွေရဲ့ စိုးရိမ် ပူပန်မှုတွေကတော့ အရမ်းမြင့်တက်နေတယ်ပေါ့နော်။ တချို့လည်း စိတ်ဒဏ်ရာ ပုံစံမျိုးတောင်မှ ဖြစ်နေ တယ်ပေါ့နော် လေယာဉ် သံကြားရင် နေမထိထိုင်မထိ ဖြစ်နေတာ ရှိတာပေါ့နော်“ ဟု ပြောသည်။   စစ်အာဏာသိမ်းပြီးနောက် ၂၀၂၁ ခုနှစ် ဧပြီလမှ စတင်၍ စစ်ကော်မရှင်တပ်က လေကြောင်း အသုံးပြု ဗုံးကြဲ တိုက်ခိုက်မှုများကို စတင် ပြုလုပ်လာခဲ့ခြင်း ဖြစ်သည်။   လက်ရှိတွင်လည်း တော်လှန်ရေး အင်အားစုများ ထိန်းချုပ်ထားသည့် ဒေသများထဲကို လေကြောင်းနှင့် ဗုံးကြဲ တိုက်ခိုက်မှုများ နေ့စဉ် လုပ်နေပြီး ယခင်ကထက် ပိုများလာသည်ဟု BNI က ပြောသည်။   BNI-MPM ငြိမ်းချမ်းရေး စောင့်ကြည့်ရေးအဖွဲ့ တာဝန်ခံ ကိုနှင်းကိုဦး “တဖြည်းဖြည်းနဲ့ အရှိန်မြင့်လာတာက အခုကာလဆိုရင် တောက်လျှောက်ကို အရှိန်မြင့်လာတဲ့ ကာလ ဖြစ်လာတယ်။ ဒီအတွက် ကျနော်တို့တွေ အသံ တွေ ဘယ်လောက်ပဲထုတ်ခဲ့ထုတ်ခဲ့ ဟန့်တားနိုင်ဖို့ အခွင့်အရေး မရှိခဲ့ဘူးပေါ့နော်။ ဒါက‌တော့ စစ်လေကြောင်း ရန်ကို ကာကွယ်အုပ်စုရဲ့လေကြောင်းရန်ကို ကာကွယ် နိုင်တဲ့ အင်အားစုမှာ အခင်းအကျင်း တော်လှန်ရေး ရှိမနေ သလို ကိုယ့်ကိုယ်ကို လုံခြုံဖို့ သတင်းအချက် အလက်တွေ ရရှိဖို့ဆိုတဲ့ အချက်ကနေပြီးတော့ပဲ လေကြောင်းရန် ကို ရှောင်ရှားနေရတဲ့ အနေအထားဖြစ်ပါတယ်” ဟု ပြောသည်။   စစ်တပ်က နောင်ချိုမြို့ကို ပြန်လည် ထိန်းချုပ်လိုက်ပြီးနောက် မိုးကုတ်၊ ကျောက်မဲ၊ သီပေါမြို့နယ်များထဲ မြေပြင်စစ်ကြောင်းများနှင့် အတူ လေကြောင်းကနေပါ ဗုံးကြဲတိုက်ခိုက်နေသည်ဟု ဒေသခံများနှင့် တော်လှန်ရေး တပ်တို့က ပြောသည်။   ၂၀၂၅ ခုနှစ် ဇန္နဝါရီလမှ လက်ရှိအချိန်ထိ ရခိုင်ပြည်ထဲရှိ ကျောက်တော်၊ ရသေ့တောင်၊ မြောက်ဦး၊ ရမ်းဗြဲမြို့ နယ်တို့ကို စစ်တပ်က လေကြောင်းမှ ဗုံးကြဲတိုက်ခိုက်မှုများ လုပ်ခဲ့ခြင်းကြောင့် အပြစ်မဲ့ပြည်သူ ၈၆ ဦး သေဆုံးခဲ့ သည်ဟု အာရက္ခတပ်တော် ULA/AA က ထုတ်ပြန်ထားသည်။   ၂၀၂၅ ခုနှစ် ဇူလိုင်လ ၁၆ ရက်နေ့မှ ဩဂုတ်လ ၁၂ ရက်နေ့အထိ မြန်မာနိုင်ငံအနှံ့ စစ်ကော်မရှင်တပ်က လေကြောင်း တိုက်ခိုက်မှုပေါင်း ၇၇ ကြိမ် ပြုလုပ်ခဲ့သည်ဟု BNI-MPM အဖွဲ့က ဆိုသည်။   တိုင်းနှင့် ပြည်နယ် အလိုက်ကို ယှဉ်ကြည့်ပါက ၂၈ ရက်အတွင်း မန္တလေးနှင့် ရှမ်းမြောက်ဒေသများထဲ လေကြောင်း တိုက်ခိုက်ခံရမှုဖြစ်စဉ် ၁၂ ခုစီ ရှိခဲ့ပြီး လေကြောင်း တိုက်ခိုက်ခံရမှု အများဆုံးဖြစ်သည်ဟု ဆိုသည်။

လေကြောင်းတိုက်ခိုက်မှုများမှာ ပြည်သူကို ကြောက်ရွံ့စေရန် ဖြစ်ဟု BNI ပြော

လေကြောင်းတိုက်ခိုက်မှုများမှာ ပြည်သူကို ကြောက်ရွံ့စေရန် ဖြစ်ဟု BNI ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၃၀ ရက်။  စစ်ကော်မရှင်တပ်က …

  • August 30, 2025
တိုက်ပွဲများကြောင့် မန္တလေး-မြစ်ကြီးနားလမ်း ပိတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၃၀ ရက်။   မန္တလေး-မြစ်ကြီးနား လမ်းပိုင်းတွင် စစ်ကော်မရှင် ပူးပေါင်းတပ် နှင့် ကာကွယ်ရေးတပ်တို့ အကြား တိုက်ပွဲများ ဖြစ်ပွားနေသဖြင့် လမ်းပိတ်ထားသည်ဟု ကားသမားများက ပြောသည်။   အင်အား ၂၀၀ ကျော်ရှိသည့် ပျူစောထီးနှင့် စစ်ကော်မရှင် ပူးပေါင်းတပ်တို့က မန္တလေး - ရွှေဘို - မြစ်ကြီးနား ဗျူဟာလမ်း တလျှောက်နှင့် ကန့်ဘလူမြို့နယ်ထဲက ကျေးရွာများတွင် စစ်ကြောင်းထိုး စစ်ရေးလှုပ်ရှားနေခြင်း ဖြစ်သည်ဟု ကာကွယ်ရေးတပ်များက ဆိုသည်။   အဆိုပါ စစ်ကော်မရှင်ပူးပေါင်း စစ်ကြောင်းကို ကာကွယ်ရေးတပ်များက ပြန်လည် တိုက်ခိုက်နေသည်ဟု မန္တလေး - ရွှေဘို - မြစ်ကြီးနား လမ်းပိုင်းတွင် ကားပြေးဆွဲနေသည့် ကားသမားအချို့က ပြောသည်။   ကားသမားတစ်ဦး က “အားလုံး ပိတ်တယ်ဆိုတာက ခင်ဦးလမ်းဆုံမှာ အဲ့မှာ ကျနော်တို့ ကားတွေက မနေ့က ရောက်တယ်။ မနက်ရောက်တော့ အကုန် မောင်းလွှတ်တယ်ဗျာ။ ဒီနားမလာနဲ့တော့ စစ်ကြောင်းထိုးနေပြီ ဘာညာ ဆိုပြီးတော့ပေါ့။ အဲ့မှာကို အရပ်မခံတော့တာ။ အဲ့ဒါပြန်လှည့်ခိုင်းတာပေါ့ အတက်ကားကို။ အဆင်း ကားကျတော့ ပုံမှန်လိုဆို မန္တလေးရောက်ရတော့မှာ ဒီနေ့ထက်ထိ ဆက်သွယ်လို့ကို မရဘူး။ ပိတ်မိနေကြတာ” ဟု ပြောသည်။   စစ်ကောင်စီတပ်သည် စစ်ကြောင်းထိုးနေ ရုံတင်မကဘဲ ကန့်ဘလူမြို့နယ်ထဲက ရွာမရွာသစ်၊ ထိန်တော၊ အင်္ဂါဒေါင့်၊ သရက်တာ၊ ကိုင်းရိုး၊ ကျေးပင်အက်နှင့် ကျီကျင်းကျေးရွာတို့ကို ဝင်ရောက်စီးနင်းကာ နေအိမ် ၅၀၀ ကျော်ကို မီးရှို့ဖျက်ဆီးခဲ့ပြီး အရပ်သား ၂၇ ဦးကိုလည်း ဩဂုတ်လ တတိယပတ်ထဲတွင် သတ်ဖြတ်ခဲ့သည်ဟု ကျွန်းလှ တက်ကြွလှုပ်ရှားသူများ အဖွဲ့က ထုတ်ပြန်ထားသည်။   ထို့အပြင် ဗျူဟာလမ်းပိုင်း တိုက်ပွဲအတွင်း လေကြောင်း အသုံးပြု ပစ်ခတ်နေမှုများနှင့် စစ်ကော်မရှင် ပူးပေါင်း စစ်ကြောင်း၏ ပစ်ခတ်မှုကြောင့် ခရီးသွားများနှင့် ကားသမားအချို့လည်း ထိမှန်သေဆုံးမှုများ ရှိခဲ့သည်။   လက်ရှိတွင် မန္တလေး - ရွှေဘို- မြစ်ကြီးနား ဗျူဟာလမ်းနှင့် ကွင်းလမ်း အသုံးပြုမှုများကို နှစ်ဖက်တပ်များက ကန့်သတ်ထားကြသည်ဟု ဆိုသည်။   ကျွန်းလှမြို့နယ် တက်ကြွလှုပ်ရှားသူများ အဖွဲ့ တာဝန်ရှိသူက “ကန့်ဘလူမြို့နယ် အရှေ့တောင်ခြမ်းရှိ ဗျူဟာ လမ်းပိုင်းမှာ စစ်ကောင်စီ တပ်အင်အား ၂၀၀ ကျော်နဲ့ စစ်ကြောင်း ထိုးနေတာကြောင့် ရွှေဘို -မြစ်ကြီးနား ဗျူဟာ လမ်းပိုင်းနဲ့ ကွင်းလမ်းပိုင်းမှာ အချိန်မရွေး လမ်းကြောင်းပိတ်နိုင်ကြောင်း ခရီးသွား မိဘပြည်သူတွေကို အသိပေးတာပါ ခင်ဗျ” ဟု ပြောသည်။   အဆိုပါ စစ်ကော်မရှင်တပ် ပူးပေါင်း စစ်ကြောင်းသည် ဩဂုတ်လ ၁၆ ရက်နေ့မှ စတင်ကာ ကန့်ဘလူမြို့နယ် တောင်ခြမ်းရှိ ဗျူဟာလမ်း အနောက်ဘက်နှင့် အရှေ့ဘက်ခြမ်းတို့အား စစ်ကြောင်းထိုးလာခြင်း ဖြစ်ပြီး ဩဂုတ်လ ၂၉ ရက်နေ့ အထိ ကန့်ဘလူ - ခင်ဦးမြို့ အစပ်ရှိ သုံးဆင့်ကန်ကျေးရွာ နှင့် အလယ်ရှိုကျေးရွာကြား၌ ရောက်ရှိနေကြောင်း နောက်ဆုံး သိရသည်။   စစ်ကော်မရှင်တပ်သည် ယခုနှစ် ဒီဇင်ဘာလ ၂၈ ရက်နေ့တွင် ရွေးကောက်ပွဲ ကျင်းပမည်ဟု ထုတ်ပြန်ထားသည့် အပြင် ရွေးကောက်ပွဲ ဖြစ်မြောက်ရေးအတွက် နိုင်ငံတစ်ဝှမ်းရှိ ၎င်းတို့ လက်လွှတ်ထားရသည့် မြို့များ အပါအဝင် တော်လှန်ရေး အင်အားစုများ လှုပ်ရှားနေသည့် နေရာများကို သိသိသာသာ ထိုးစစ်များ ဆင်နွှဲလာနေသည်။

တိုက်ပွဲများကြောင့် မန္တလေး-မြစ်ကြီးနားလမ်း ပိတ်

တိုက်ပွဲများကြောင့် မန္တလေး-မြစ်ကြီးနားလမ်း ပိတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၃၀ ရက်။  မန္တလေး-မြစ်ကြီးနား လမ်းပိုင်းတွင် စစ်ကေ…

  • August 30, 2025
×Close