သတင်း

တနင်္လာရီတိုင်းအတွင်း နေအိမ် ၄၀ ခန့် စစ်ကော်မရှင် မီးရှို့   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်ထဲက ရန်တောင်နှင့် သင်းကျွန်းကျေးရွာရှိ နေအိမ် အလုံးရေ ၄၀ နီးပါးခန့်ကို စစ်ကော်မရှင် စစ်ကြောင်းက မီးရှို့ဖျက်ဆီးခဲ့သည်။   မိုင်းဆွဲ တိုက်ခိုက်ခံရသည့် စစ်ကော်မရှင်တပ် စစ်ကြောင်းမှ ရန်တောင်ကျေးရွာသို့ စက်တင်ဘာလ ၇ ရက်နေ့ နံနက် ၉ နာရီခွဲခန့်က စတင်ဝင်ရောက်လာပြီး နေအိမ်များကို မီးရှို့ဖျက်ဆီးခဲ့ခြင်း ဖြစ်သည်ဟု ရွာသားများက ပြောသည်။   အသက် ၄၀ ခန့်အရွယ် ရန်တောင်ရွာသားတစ်ဦးက “ရွာအလယ်ပိုင်းက လူမရှိတဲ့နေအိမ်တွေ မီးအရှို့ခံရတာ များတယ်။ မျက်စိနဲ့ တွေ့တာတောင် ဆယ်ဆောင်ကျော် ရှိနေတယ်၊ တခြားနေရာတွေမှာလည်း ရှို့ထားသေး တယ်။ တဆက်တည်း ရှိနေတဲ့ သင်းကျွန်းရွာဘက်မှာပါ ရှို့သွားသေးတာ” ဟု ပြောသည်။   အဆိုပါ စစ်ကြောင်းတွင် အင်အား ၁၀၀ ခန့်ပါပြီး သရက်ချောင်းမြို့နယ်ထဲက မိုးရွှေကုန်းကျေးရွာနှင့် အနီးဝန်း ကျင်ကို ခရီးသည်တင်ကား ၈ စီးဖြင့် စစ်ကြောင်းထိုးလာသည်ဟု ရွာသားများက ပြောသည်။   မီးရှို့ဖျက်ဆီးခြင်း မပြုလုပ်မှီ ခရီးသည်တင် ယာဥ်များဖြင့်လာသည့် စစ်ကော်မရှင် တပ်ဖွဲ့ စစ်ကြောင်းကို ပြည်သူ့ ကာကွယ်ရေး တပ်ဖွဲ့များက ရန်တောင်ကျေးရွာ အနီးတွင် မိုင်းဆွဲတိုက်ခိုက်ခဲ့သေးသည်ဟု ရွာသားများက ဆိုသည်။   မိုင်းဆွဲခံရမှုကြောင့် ထိခိုက်မှု အခြေအနေကို မသိရသေးသော်လည်း လက်နက်ကြီး၊ လက်နက်ငယ်များဖြင့် ပစ်ခတ်သံများကို ကြားခဲ့ရသည်ဟု ဆိုသည်။   မီးရှို့ဖျက်ဆီးခြင်း ခံရသည့် နေအိမ်များမှာ ရန်တောင်ကျေးရွာတွင် နေအိမ် ၂၉ ဆောင်ထက် မနည်းရှိပြီး သင်းကျွန်းကျေးရွာတွင် ၈ ဆောင်ရှိသည်ဟု ရွာသားများက ဆိုသည်။   စစ်ကော်မရှင် တပ်ဖွဲ့မှ ရန်တောင်ကျေးရွာနှင့် သင်းကျွန်းကျေးရွာရှိ နေအိမ်များကို မီးရှို့ပြီးနောက်မှာ သရက် နှစ်ခွကျေးရွာဘက်သို့ ထွက်ခွာသွားသည်ဟု ရွာသားများက ပြောသည်။   စစ်ကော်မရှင်တပ် စစ်ကြောင်းက ပြီးခဲ့သည့် ဩဂုတ်လလယ်ပိုင်းကလည်း သရက်ချောင်းမြို့နယ်ထဲရှိ စော်ဖျား၊ မိုးရွှေကုန်း၊ ဥတ္တူစသည့် ကျေးရွာများကို အင်အား အလုံးအရင်းဖြင့် စစ်ကြောင်းထိုးပြီး နေအိမ် ၇၀ ခန့်ကို မီးရှို့ ဖျက်ဆီးခဲ့သေးသည်။

တနင်္သာရီတိုင်းအတွင်း နေအိမ် ၄၀ ခန့် စစ်ကော်မရှင် မီးရှို့

တနင်္သာရီတိုင်းအတွင်း နေအိမ် ၄၀ ခန့် စစ်ကော်မရှင် မီးရှို့ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။  တနင်္သာရီတိုင်း၊ ထားဝယ်…

  • September 9, 2025
IMJA.က NUCC ကို သတင်းမီဒီယာ ဥပဒေ မူဘောင် အကြံပြု   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   အနာဂတ်ဖယ်ဒရယ် နိုင်ငံတော်တွင် ပြဌာန်းမည့် သတင်းမီဒီယာ ဥပဒေ မူဘောင်ဆိုင်ရာ အကြံပြုစာတမ်းကို IMJA က NUCC ထံ တင်ပြဆွေးနွေးခဲ့သည်။   လွတ်လပ်သော မြန်မာသတင်းစာဆရာများ အစည်းအရုံး (IMJA) မှ လာမည့် အနာဂတ် ဖယ်ဒရယ် နိုင်ငံတော် တွင် ပြဌာန်းမည့် သတင်းမီဒီယာ ဥပဒေ မူဘောင်ဆိုင်ရာ အကြံပြုစာတမ်းအား အမျိုးသား ညီညွတ်ရေး အတိုင် ပင်ခံကောင်စီ (NUCC)ထံ တင်ပြဆွေးနွေးခဲ့သည်ဟု ထုတ်ပြန်ထားသည်။   လက်ရှိ အာဆီယံနိုင်ငံ အချို့နှင့် အနောက် ဒီမိုကရေစီ နိုင်ငံများ စုစုပေါင်း ၁၁ နိုင်ငံတွင် ပြဌာန်းထားသည့် သတင်းမီဒီယာ လွတ်လပ်ခွင့်ဆိုင်ရာ ဥပဒေများအား ဆွေးနွေးတင်ပြခဲ့ကြခြင်း ဖြစ်သည်။   IMJA ကြားကာလကော်မတီ ယာယီအဖွဲ့ဝင် ကိုမှူးက “လာမယ့် မြန်မာ့နိုင်ငံရေး အခင်းအကျင်းက ဖက်ဒရယ် ယူနစ်တွေ ပေါ်လာတဲ့ အချိန်မှာ ဘယ်လိုပဲ ဖြစ်ဖြစ်ပေါ့လေ။ လက်ရှိချိန်မှာတော့ အားလုံးလည်း သိတဲ့ အတိုင်း ပဲ စစ်ကော်မရှင်က မီဒီယာလွတ်လပ်ခွင့်ဆိုတာ ဘယ်တုန်းကမှလည်း အလေးထားတာ မဟုတ်ဘူး။ အနာဂတ် မှာ ဥပဒေတွေ ဖြတ်သန်းတဲ့အခါ ဒီအချက်တွေကို ဦးစားပေးပြီး ပြဌာန်းဖို့၊ ဒီအချက်တွေက ပါသင့်တယ်။ ဖက် ဒရယ် ဒီမိုကရေစီနိုင်ငံတွေမှာ ပါက်ုပါရမယ့် အချက်တွေဆိုပြီး ဦးစားပေး ပြောခဲ့တာပေါ့လေ။ ဆိုတော့ အဲဒီ အချက်တွေက လက်တွေ့ကျကျ အသုံးဝင်မယ့် အချက်တွေပေါ့နော်” ဟု ပြောသည်။   စက်တင်ဘာလ ၅ ရက်နေ့တွင် ပြုလုပ်ခဲ့သည့် အဆိုပါ အစည်းအဝေး၌ လာမည့် အနာဂတ်တွင် သတင်း အကြောင်းအရာများနှင့် ပတ်သက်၍ တစ်စုံတစ်ရာ အငြင်းပွားမှု ဖြစ်ပေါ်ခဲ့ပါက သတင်းသမားများဖက်မှ အကာအကွယ် ပေးရန်နှင့် နှစ်ဖက် အဖွဲ့အစည်းများကြား ပူးပေါင်းဆောင်ရွက်ရန် အတွက်လည်း ဖြည့်စွက် ဆွေးနွေးခဲ့သည်ဟု ဆိုသည်။   ဆွေးနွေးပွဲအား IMJA က ကြားကာလ ကောင်မတီရှိ ယာယီအဖွဲ့ဝင်  ၅ ဦးနှင့် NUCC ဖက်မှ သက်ဆိုင်ရာ နယ်ပယ် အသီးသီးရှိ ခေါင်းဆောင် ၂၀ ဦး စုစုပေါင်း ၂၅ ဦး တက်ရောက်ခဲ့ပြီး IMJA ဖွဲ့စည်းပုံကိုလည်း ရှင်းလင်း တင်ပြခဲ့ကြသည်ဟု ဆိုသည်။   ကိုမှူးက “အဓိကတော့ ကျနော်တို့ တွေ့ဖို့ရှိတယ်။ Stake Holder တွေ၊ လက်ရှိနိုင်ငံရေး အခင်းအကျဉ်းမှာ ပါဝင် နေတဲ့ တခြားသော အဖွဲ့တွေ၊ တိုင်းရားသား လက်နက်ကိုင်တွေနဲ့ တွေ့ပြီး ဒါတွေကို ပြောပြဖို့ ရှိပါတယ်။ ဒီဟာ တွေက မဖြစ်မနေ လုပ်ရမှာတော့ မဟုတ်ဘူး။ ကျနော်တို့တော့ တိုက်တွန်းတာပေါ့လေ။ ဒီအချက်တွေတော့ ကောင်းတယ် ဆိုပြီးတော့လေ။ ဒါပေမယ့် လက်ရှိ အခင်းအကျင်းမှာတော့ သူတို့ ဘယ်လို သုံးသပ်ကြမလဲ ဆို တာတော့ ကျနော်တို့လည်း မပြောတတ်သေးဘူးပေါ့လေ။ ဒါပေမယ့် ဒီဟာက အားလုံးအတွက် အဆင်ပြေစေ မယ့် မူဘောင်တွေကို ကျနော်တို့က ပြတာပေါ့လေ” ဟု ဆက်လက် ရှင်းပြသည်။   IMJA အား ဦးဆောင် ကော်မတီဝင် EC ၁၂ ဦး ဖြင့် ဖွဲ့စည်းထားသော်လည်း အကြောင်းအမျိုးမျိုးကြောင့် မအားလပ်သည့် အဖွဲ့ဝင်များ နုတ်ထွက်သွားသည် ဖြစ်ရာ ၂၀၂၄ ခုနှစ်၊ နိုဝင်ဘာလ ၁ ရင်နေ့၌ ကြားဖြတ် ရွေးကောက်ပွဲ ပြန်လည်ကျင်းပခဲ့သည်။   အဆိုပါ ကော်မတီဝင်များမှာလည်း ဇူလိုင်လ အကုန်တွင် သက်တမ်း ကုန်ဆုံးသွားသဖြင့် လတ်တလော ယာယီ အဖွဲ့ဝင်များဖြင့် လည်ပတ်လျက်ရှိပြီး လာမည့် ရက်ပေါင်း ၁၀၀ အတွင်း ရွေးကောက်ပွဲ ထပ်မံ ကျင်းပသွား မည် ဟု IMJA လက်ရှိ ဦးဆောင် အဖွဲ့ဝင်များက ဆိုသည်။

IMJA က NUCC ကို သတင်းမီဒီယာ ဥပဒေ မူဘောင် အကြံပြု 

IMJA က NUCC ကို သတင်းမီဒီယာ ဥပဒေ မူဘောင် အကြံပြု  သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။  အနာဂတ်ဖယ်ဒရယ် နိုင်ငံတော်တွင် ပြဌာန်း…

  • September 9, 2025
စစ်သင်္ဘောယာဉ်တန်းဖြတ်စဉ် ပစ်ခတ်မှုကြောင့် အရပ်သားများ သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   ကချင်ပြည်၊ ဗန်းမော်မြို့မှ စုန်ဆင်းလာသည့် စစ်သင်္ဘော ယာဉ်တန်း ထီးချိုင့်မြို့နယ်ကို ဖြတ်သန်းချိန် စစ်တပ်က လေကြောင်းအပြင် လက်နက်ကြီးဖြင့် ပစ်ခတ်မှုတို့ကြောင့် အရပ်သား ၁၁ ဦး သေဆုံးခဲ့သည်။   ထီးချိုင့်မြို့နယ်ထဲ စစ်သင်္ဘောများ ဝင်လာချိန်တွင် စက်တင်ဘာလ ၆ ရက်နေ့ နှင့် ၇ ရက်နေ့က ဝေဟင်မှ ခြံရံလာသည့် Y 12 ရဟတ်ယာဥ်ဖြင့် လည်းကောင်း၊ မြေပြင်နှင့် စစ်သင်္ဘောများပေါ်မှ လည်းကောင်း လက်နက်ကြီးများဖြင့် ပစ်ခတ်မှုများ ပြုလုပ်ခဲ့ခြင်းဖြစ်သည်။   စစ်ရေး သတင်းအရင်းအမြစ် တစ်ဦးက “ထီးချိုင့်နယ်ထဲ ရောက်တော့ စပြီးပစ်တော့တာပဲ။ တော်တော် အပစ်ခံ  ရတယ်။ ထီးချိုင့်နယ်ထဲ ရောက်တာနဲ့ ဆက်တိုက် သင်္ဘောပေါ်ကနေ တဒုန်းဒုန်း တဒိုင်းဒိုင်းနဲ့ စပြီး ပစ်တော့ တာပဲ။ လေယာဥ်တွေနဲ့လည်း ဗုံးကြဲတာ” ဟု ပြောသည်။   သေဆုံးသူများမှာ မောင်းကုန်းကျေးရွာမှ ရွာသား ၅ ဦး၊ ကျောက်မှော်ကျေးရွာမှ ၁ ဦး၊ ဘိုကုန်းကျေးရွာမှ ၃ ဦးနှင့် ဝဲကြီး (ချွန်း) ကျေးရွာမှ ၂ ဦး စုစုပေါင်း ၁၁ ဦး သေဆုံးခဲ့သည်ဟု ထီးချိုင့် တော်လှန်ရေးအဖွဲ့ (Tigyaing Revolution – TR) က သတင်း ထုတ်ပြန်သည်။   သို့သော် သေဆုံးသူများ၏ အသေးစိတ် အချက်အလက်များကိုမူ Tigyaing Revolution က မထုတ်ပြန်သေး ပေ။   ဗန်းမော်မြို့ကို ရောက်ရှိနေသည့် စစ်သင်္ဘောနှင့် သံခွန်သင်္ဘောများပါသည့် စစ်ရေယာဉ်တန်းသည်သည် ဝေဟင် မှ Y 12 အမျိုးအစား ရဟတ်ယာဥ်များ ခြံရံကင်းထောက်စေကာ မြစ်ကြောင်းအတိုင်း စက်တင်ဘာလ ၅ ရက်နေ့၊ နံနက်ပိုင်းမှ စတင်ကာ စုန်ဆင်းလာခဲ့ခြင်း ဖြစ်သည်။   အဆိုပါ စစ်သင်္ဘောအုပ်စုမှာ ထီးချိုင်မြို့နယ် အထက်ဘက်ရှိ ကသာမြို့နယ်၊ ရွှေကူမြို့နယ်တို့ကို ဖြတ်သန်း စုန်ဆင်းလာချိန်တွင်လည်း စစ်ကောင်စီက အလားတူ ပစ်ခတ်တိုက်ခိုက်မှုများ လုပ်ခဲ့သေးသည်။   ကသာမြို့နယ်ဒေသခံ တစ်ဦးက “ကသာနယ်ကတော့ မိုးတားလေးရွာ ဈေးရှေ့ အိမ်တွေလည်းထိတယ်။ တကယ့် လူစည်ကားတဲ့နေရာ အဲ့တကြောလေးပေါ့ အိမ်တွေ ဟိုထိ ဒီထိပေါ့။ ပြီးတော့ ကျန်တဲ့ နေရာတွေ လည်း လေယာဥ် ဗုံးချသွားတာ ရှိတယ်။ ဒါပေမဲ့ ပြည်သူတွေကတော့ အားလုံး သင်္ဘောလာတဲ့ အချိန် ရှောင်နေ ကြတော့ အသေအဆုံး အထိအခိုက်တော့ မရှိဘူး” ဟု ပြောသည်။   ကသာနှင့် ရွှေကူမြို့နယ်ထဲ လေကြောင်းမှ ဗုံးကြဲတိုက်ခိုက်မှု၊ လက်နက်ကြီးဖြင့် ပစ်ခတ်မှုများထဲ အရပ်သား သေဆုံးမှုများမရှိခဲ့သော်လည်း မြစ်ကမ်းဘေးရှိ ကျေးရွာများထဲက နေအိမ်များစွာ ပျက်စီးခဲ့သည်ဟု ဒေသခံများ က ပြောသည်။   စစ်သင်္ဘောများမှာ ပြီးခဲ့သည့် ဇူလိုင်လအတွင်းက မန္တလေးဂေါဝန်ဆိပ်ကမ်းမှ ဗန်းမော်မြို့အထိ ဆန်တက်ခဲ့ချိန် တွင်လည်း ရေယာဉ်တန်းအတွက် စစ်ကော်မရှင်က လမ်းကြောင်းရှင်း လေကြောင်း တိုက်ခိုက်မှု၊ လက်နက်ကြီး ပစ်ခတ်မှုများကြောင့် အရပ်သား ၃၁ ဦး သေဆုံးခဲ့ရသေးသည်။    ထို့အပြင် ဧရာဝတီမြစ်ကမ်းဘေးရှိ ‌ကျေးရွာအချို့သည် ပစ်ခတ်မှုများ အကြား နေအိမ်များစွာ ပျက်ဆီးမှုများရှိခဲ့ သည့်ပြီး ဘာသာရေး အဆောက်အအုံများနှင့် စေတီပုထိုးများပါ လမ်းကြောင်း ရှင်းပစ်ခတ်မှုတို့ကြောင့် ထိမှန် ပျက်စီးခဲ့သေးသည်။   ဓာတ်ပုံ - ချင်းတွင်းမြစ်ကြောင်းပေါ်ရှိ စစ်သင်္ဘောတစ်စီး (ချင်းတွင်းမြစ်ကမ်းဘေး ကျေးရွာများ သပိတ်စစ်ကြောင်း)

စစ်သင်္ဘောယာဉ်တန်းဖြတ်စဉ် ပစ်ခတ်မှုကြောင့် အရပ်သားများ သေဆုံး

စစ်သင်္ဘောယာဉ်တန်းဖြတ်စဉ် ပစ်ခတ်မှုကြောင့် အရပ်သားများ သေဆုံး  သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။  ကချင်ပြည်၊ ဗန်းမော်မြို့…

  • September 9, 2025
ဒုက္ခသည် ၄၂၀၀၀ ကို ထိုင်းနိုင်ငံက ကနဦး အလုပ်လုပ်ခွင့်ပြုမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   ထိုင်း - မြန်မာနယ်စပ်ရှိ ဒုက္ခသည်စခန်း ၉ ခုမှ ဒုက္ခသည်များအား ကနဦးအနေဖြင့် ဒုက္ခသည် အယောက် ၄၂,၀၀၀ ကျော်ကို ဦးစွာ အလုပ်လုပ်ကိုင်ခွင့် ပြုမည်ဟု ထိုင်းအစိုးရက ထုတ်ပြန်သည်။   ဤဆုံးဖြတ်ချက်ကို ဒုက္ခသည်များ၊ ၎င်းတို့အား ကူညီဆောင်ရွက်ပေးနေသည့် အရပ်ဘက်အဖွဲ့အစည်းများနှင့် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) တို့က တခဲနက် ကြိုဆိုလိုက်ကြ သည်။   ကရင်ငြိမ်းချမ်းရေး အထောက်ကူပြု ကွန်ယက် (KPSN) မှ တာဝန်ရှိသူ နော်ချယ်ရီက “အရင်ဦးဆုံးပြောချင် တာကတော့ ဒီလိုမျိုးတွေ ဖြစ်မြောက်လာအောင် ထိုင်းအစိုးရနဲ့ ပြည်ထဲရေးဌာန၊ အလုပ်သမားဌာနတို့က တောင်းဆိုလာတာကနေ အစိုးရက ခွင့်ပြုလာတာ ဒါကတော့ ပထမဆုံး အဆင့်အနေနဲ့ သတင်းကောင်းပါပဲ။ ဒုက္ခရောက်နေတဲ့ ဒုက္ခသည်စခန်း ၉ ခုလုံးက အလုပ်လက်မဲ့နဲ့ အခက်အခဲတွေကို ရင်ဆိုင်နေရတဲ့ အခါမှာ ဒီလိုမျိုးကြားရတာတော့ အရမ်းကို ကျေးဇူးတင်ပါတယ်” ဟု ပြောသည်။   ထိုင်း - မြန်မာနယ်စပ်ရှိ ဒုက္ခသည်စခန်း ၉ ခုမှ ဒုက္ခသည်များအား နိုင်ငံအတွင်း တရားဝင် အလုပ်လုပ်ကိုင် ခွင့်ပြုမည့် မူဝါဒတစ်ရပ်ကို ထိုင်းအစိုးရအဖွဲ့က ဩဂုတ်လ ၂၆ ရက်နေ့တွင် အတည်ပြုထားသည်။   အမေရိကန်နိုင်ငံ၏ လူသားချင်း စာနာမှုဆိုင်ရာ ထောက်ပံ့မှုများ ရပ်ဆိုင်းလာခြင်းကြောင့် ဒုက္ခသည် စခန်းများ တွင် နေထိုင်သူများသည် စားဝတ်နေရေး အခက်အခဲ သာမက စိတ်ပိုင်းဆိုင်ရာ ဖိအားများကိုပါ ပြင်းထန်စွာ ရင်ဆိုင်နေရသည် ဒုက္ခသည်များက ပြောသည်။   ထိုအခက်အခဲများနှင့် စိန်ခေါ်မှုများကြားကနေ ယခုကဲ့သို့ ထိုင်းအစိုးရ၏ ဆုံးဖြတ်ချက် ထွက်ပေါ်လာခြင်း အပေါ် ဝမ်းသာကြိုဆိုကြောင်း ကရင်နီ အမှတ်(၁) ဒုက္ခသည်စခန်းတွင် ဆယ်စုနှစ် နှစ်ခုကျော်ကြာ နေထိုင်လာခဲ့သော အမျိုးသားတစ်ဦးက ယခုကဲ့သို့ ပြောသည်။   ကရင်နီဒုက္ခသည် အမျိုးသားက “ဒီကိစ္စကို ကျနော်တို့ကတော့ တောင်းဆိုနေတာ ကြာပြီ။ ဖြစ်လာနိုး ဖြစ်လာနိုးနဲ့ စောင့်နေရတာ လည်း ကြာပြီပေါ့နော်။ အခုအချိန်မှာ လက်ရှိအခြေအနေမှာလည်း ထောက်ပံ့မှုတွေလည်း၊ တခြား ဝန်ဆောင်မှုတွေလည်း လျှော့ချကုန်ပြီပေါ့နော်။ ကျန်းမာရေးတို့၊ ရိက္ခာထောက်ပံ့ရေးက အစလည်း မရှိ တော့ဘူး။ ပြီးတော့လည်း ဒီ တတိယနိုင်ငံ သွားနိုင်မယ့် အခွင့်အရေးကလည်း မရှိတော့ဘူး။ ဒီအပေါ် မှာ ဒီလိုမျိုး ထိုင်းအစိုးရကနေပြီးတော့ ဒုက္ခသည်လူထုတွေကို အလုပ်လုပ်ကိုင်ခွင့် ပြုပေးတယ် ဆိုတာ ကျနော်တို့ကတော့ အများကြီး ဝမ်းသာတာပေါ့နော်။ ဆိုတော့ ဒီလူထုတွေလည်း လက်ခံတယ်။ သဘောလည်း ကျတယ်။ ဝမ်းလည်း သာတယ်။ ကြိုလည်းကြို ဆိုတာပေါ့နော်။ ဆိုတော့ ရောင်ခြည်သန်း လာပြီပေါ့နော်” ဟု  ပြောသည်။   ကုလသမဂ္ဂ ဒုက္ခသည်များ ဆိုင်ရာ အေဂျင်စီ (UNHCR) ကလည်း ယခုကဲ့သို့ ထိုင်းနယ်စပ်ရှိ ဒုက္ခသည် စခန်းများ တွင် ခိုလှုံနေကြရသည့် မြန်မာဒုက္ခသည်များကို စခန်းအပြင် ထွက်ပြီး ထိုင်းနိုင်ငံ အတွင်း တရားဝင် အလုပ် လုပ်ခွင့်ပြုမည့် အပေါ်ကြိုဆိုကြောင်း ဩဂုတ်လ၂၇ ရက်နေ့တွင် ထုတ်ပြန်သည်။   အဆိုပါ ဆုံးဖြတ်ချက်မှာ ကြီးမားသည့် အလှည့်အပြောင်းတစ်ခု ဖြစ်ပြီး ဒုက္ခသည်များကို ထောက်ပံ့ပေး ရုံသာ မက ဒေသတွင်း စီးပွားရေးကိုပါ အကျိုးပြုစေမည်ဟု ထိုင်းနိုင်ငံရှိ UNHCR ကိုယ်စားလှယ် က ဆိုသည်။   ထိုင်းအစိုးရ၏ ထုတ်ပြန်ချက်အရ ဤမူဝါဒသည် နိုင်ငံ၏ တည်ငြိမ်အေးချမ်းမှုကို တိုးမြှင့်နိုင်ပြီး ဒုက္ခသည် များအား စောင့်ရှောက်ရာတွင် နိုင်ငံတော်၏ ဝန်ထုပ်ဝန်ပိုးကို လျှော့ချနိုင်မည်ဖြစ်သည်ဟု ဖော်ပြထားသည်။   ထို့အပြင် နိုင်ငံ၏ လုံခြုံရေး၊ စီးပွားရေး၊ ပြည်သူ့ကျန်းမာရေးနှင့် နိုင်ငံတကာ ဆက်ဆံရေးတို့ အတွက်ပါ အကျိုး ဖြစ်ထွန်းစေမည်ဟု ရှုမြင်ထားသည်ဟု ဆိုသည်။   ယခု ဆုံးဖြတ်ချက်သည် ထိုင်း - ကမ္ဘာဒီးယား ပဋိပက္ခကြောင့် ဖြစ်ပေါ်လာသည့် ထိုင်းအလုပ်သမား လိုအပ်ချက် ကို ဖြည့်ဆည်းပေးနိုင်မည့် အပြင် နေရပ်မပြန်နိုင်သေးသော ဒုက္ခသည်များအတွက်လည်း လူသားဆန်သော အဖြေတစ်ခုကို ပေးစွမ်းနိုင်မည်ဖြစ်ကြောင်း လေ့လာသူများက သုံးသပ်ထားသည်။   ထိုင်းအစိုးရ၏ အချက်အလက်များ အရ ထိုင်းနိုင်ငံ နယ်စပ်တစ်လျောက်တွင် နေရပ်စွန့်ခွာသူ ၇၇,၇၁၈ ဦးကို ယာယီ ဒုက္ခသည် ခိုလှုံရေးစခန်း ၉ ခုတွင် လက်ခံထားသည်ဟု သိရသည်။   ထိုထဲမှ လူအများစုသည် ဒုက္ခသည်စခန်းများတွင် ဆယ်စုနှစ်ပေါင်းများစွာ နေထိုင်နေကြရသူများ ဖြစ်ပြီး ဒုက္ခသည် လူဦးရေ၏ ၄၇ ရာခိုင်နှုန်းသည် ထိုင်းနယ်စပ်ရှိ ဒုက္ခသည်စခန်းတွင် မွေးဖွားခဲ့ခြင်း ဖြစ်သည်ဟု ဆိုသည်။

ဒုက္ခသည် ၄၂၀၀၀ ကို ထိုင်းနိုင်ငံက ကနဦး အလုပ်လုပ်ခွင့်ပြုမည် 

ဒုက္ခသည် ၄၂၀၀၀ ကို ထိုင်းနိုင်ငံက ကနဦး အလုပ်လုပ်ခွင့်ပြုမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။  ထိုင်း - မြန်မာနယ်စပ်ရှိ ဒု…

  • September 9, 2025
ထိုင်းဝန်ကြီးချုပ်ဟောင်း Thaksin Shinawatra အား ထောင်တွင် တစ်နှစ်နေရန် တရားရုံး အမိန့်ချ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   ထိုင်းနိုင်ငံ၏ ဝန်ကြီးချုပ်ဟောင်းလည်းဖြစ်၊ ဘီလီယံနာ သူဌေးကြီးလည်းဖြစ်သည့် တာ့က်ဆင် (Thaksin Shinawatra) ကို ထိုင်းနိုင်ငံ တရားရုံးချုပ်က ထောင်တွင် တစ်နှစ်နေရန် အမိန့်ချမှတ်ခဲ့သည်။   အမိန့်ချမှတ်မှုသည့် ယခင် အမှုဟောင်း၏ အဆက် ဖြစ်သည်။   ယခင် အမှုဟောင်းတွင် ဝန်ကြီးချုပ်ဟောင်း တာ့က်ဆင်ကို နှစ်ချီထောင်ဒဏ်များ ချမှတ်ခဲ့သော်လည်း ထောင်ထဲတွင် တစ်ရက်ပြည့်အောင် မနေရဘဲ ဆေးရုံသို့ ပြောင်းရွေ့နေထိုင်ခဲ့ခြင်းကြောင့် ဖြစ်သည်။   တရားရုံးချုပ်က ယနေ့ စက်တင်ဘာ ၉ ရက်နေ့တွင် တာ့က်ဆင် ရှင်နာဝပ်၏ ဆေးရုံသို့ ရွှေ့ပြောင်းနေထိုင်ခြင်း သည် ဥပဒေနှင့် မညီဟု ဆုံးဖြတ်ခဲ့သည်။   ဝန်ကြီးချုပ်ဟောင်း တာက်ဆင်နှင့် မိသားစုများသည် တာ့က်ဆင် ပထမဆုံး ဝန်ကြီးချုပ်အဖြစ် အရွေးခံခဲ့ရသည့်  ၂၀၀၁ ခုနှစ်မှ စတင်ပြီး ထိုင်းနိုင်ငံရေးတွင် လွှမ်းမိုးမှုများ ရှိနေခဲ့သည်။   ဝန်ကြီးချုပ် တာဝန်ယူနေစဉ် ၂၀၀၆ ခုနှစ်အတွင်း ထိုင်းနိုင်ငံတွင် စစ်တပ်အာဏာသိမ်းမှု ဖြစ်ပွားခဲ့ပြီး တာ့က်ဆင် သည် နိုင်ငံ ပြင်ပတွင် နှစ်ပေါင်းများစွာ နေထိုင်ခဲ့သည်။   ၂၀၂၃ ခုနှစ်၌ ထိုင်းနိုင်ငံသို့ ပြန်လာချိန်တွင် ယခင်က စွဲဆိုထားသော ခြစားမှုနှင့် အာဏာအလွဲသုံးစားမှုများ အတွက်ဟု ဆိုကာ ထောင်ဒဏ် ၈ နှစ်ချမှတ်ခံခဲ့ရသည်။   တာ့က်ဆင်သည် ဆေးရုံတွင်သည် နေခဲ့ပြီး ထိုင်းဘုရင်ကို အသနားခံစာ တင်ခဲ့သောကြောင့် ၎င်း၏ ပြစ်မှုများကို ဘုရင်အမိန့်ဖြင့် ၁ နှစ်အထိ လျော့ချခဲ့ခြင်းလည်း ဖြစ်သည်။   ထိုစဉ်က တာ့က်ဆင်သည် ဆေးရုံတွင် ၆ လနေထိုင်ပြီး လွတ်ငြိမ်းချမ်းသာခွင့်ရကာ အိမ်ပြန်ခွင့်ရခဲ့သည်။   ထိုင်းနိုင်ငံတွင် သမီးသူ ပေထုန်ထန် ရှင်နာဝပ်ကို တရားရုံးအမိန့်နှင့် တာဝန်မှ ရပ်ဆိုင်းခဲ့ပြီးနောက်တွင်  တာ့က် ဆင်သည် စင်္ကာပူနိုင်ငံကို ဆေးကုသွားမည်ဟု ဆိုကာ ယခင်က နေထိုင်ခဲ့သည့် UAE နိုင်ငံသို့ ရောက်ရှိ သွားခဲ့ သည်။   လေယာဉ် ထွက်ချိန် နောက်ကျခဲ့ခြင်းကြောင့် ပုဂ္ဂလိက လေယာဉ် ရပ်နားချိန် ကျော်လွန်သွားသဖြင့် စင်္ကာပူနိုင်ငံ ကို မသွားရောက်နိုင်ခြင်း ဖြစ်သည်ဟု လူမှုမီဒီယာတွင် Thaksin က ရေးသားခဲ့သည်။   တနင်္လာနေ့တွင် ထိုင်းသို့ ကိုယ်ပိုင် ဂျက်လေယာဉ်နှင့် ပြန်လာခဲ့ပြီး ယနေ့တွင် တရားရုံးက အမိန့်ချမှတ်လိုက်ခြင်း ဖြစ်သည်။   တရားရုံးချုပ်က ဝန်ကြီးချုပ်ဟောင်း Thaksin Shinawatra ကို ဘန်ကောက် ရမန်ထောင်တွင် တစ်နှစ်နေရမည် ဟု အမိန့်ချခဲ့ခြင်း ဖြစ်သည်။

ထိုင်းဝန်ကြီးချုပ်ဟောင်း Thaksin Shinawatra အား ထောင်တွင် တစ်နှစ်နေရန် တရားရုံး အမိန့်ချ 

ထိုင်းဝန်ကြီးချုပ်ဟောင်း Thaksin Shinawatra အား ထောင်တွင် တစ်နှစ်နေရန် တရားရုံး အမိန့်ချ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။  …

  • September 9, 2025
တရားမဝင် ရွှေ့ပြောင်းသူများအား အမေရိကန် လဝက ဖမ်းဆီးခွင့် ရသွားပြီ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   အမေရိကန်နိုင်ငံ၊ လော့စ်အိန်ဂျလိစ်မြို့တွင် ရွှေ့ပြောင်းသူများအား ဖမ်းဆီးသည့် ကိစ္စအား တားဆီးထားသည့် အမိန့်ကို တရားရုံးချုပ်က ရုတ်သိမ်းလိုက်သည်။   ထို့ကြောင့် အမေရိကန် အစိုးရ အနေဖြင့် လော့စ်အိန်ဂျလိစ်မြို့တွင် တရားမဝင် ရွှေ့ပြောင်းနေထိုင်သူများအား တားမြစ်ရှာဖွေ ဖမ်းဆီးခွင့် ရသွားပြီဖြစ်သည်။   တနည်းဆိုရလျှင် သမ္မတ ဒေါ်နယ် ထရန့်အနေဖြင့် နိုင်ငံအတွင်း တရားမဝင် ဝင်ရောက်သူများကို စံချိန်တင် ပြန်ပို့မှုများ လုပ်ဆောင်မည် ဆိုသော ကတိကို အကောင်အထည် ဖော်ခွင့်ရသွားခြင်းလည်း ဖြစ်သည်။   အဆိုပါ ဆုံးဖြတ်ချက်ကြောင့် အသားအရောင်၊ ဘာသာစကား သို့မဟုတ် အလုပ်အကိုင် အပေါ်အခြေခံပြီး သံသယထား ဖမ်းဆီးစစ်ဆေးမှုများကို လုပ်ဆောင်ခွင့်ရသွားမည် ဖြစ်သည်။   ကန့်သတ်ချက် ရုတ်သိမ်းသည့် တရားရုံး ဆုံးဖြတ်ချက်ကို အိမ်ဖြူတော်က ကြိုဆိုလိုက်သည်။   မကြာသေးမီက တောင်ကိုရီးယားပိုင် ဟွန်ဒိုင်း စက်ရုံကို ဥပဒေ စိုးမိုးရေး အရာရှိများက ဝင်ရောက် စစ်ဆေးခဲ့ရာ တရားမဝင် နေထိုင်နေသည့် တောင်ကိုရီးယား နိုင်ငံသား အယောက် ၃၀၀ ကျော်ကို ဖမ်းဆီးခဲ့သည်။

တရားမဝင် ရွှေ့ပြောင်းသူများအား အမေရိကန် လဝက ဖမ်းဆီးခွင့် ရသွားပြီ 

တရားမဝင် ရွှေ့ပြောင်းသူများအား အမေရိကန် လဝက ဖမ်းဆီးခွင့် ရသွားပြီ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။  အမေရိကန်နိုင်ငံ၊ လော…

  • September 9, 2025
ထိုင်း Canon စက်ရုံ ရွှေ့ပြောင်းမှု အလုပ်သမားများ အလုပ် ဆက်ပေးသွားမည်ဟု ကုမ္ပဏီ ကြေညာ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   ထိုင်းနိုင်ငံ Nakhon Ratchasima ခရိုင်ရှိ Canon ကုန်ထုတ် စက်ရုံကို လုပ်ငန်းလျော့ချသည့် အနေဖြင့် ရုံးချုပ်ရှိရာ အယုဒ္ဓယသို့ ပြောင်းရွှေ့မည် ဖြစ်ကြောင်း Canon ကုမ္ပဏီက ကြေညာသည်။   ထုတ်လုပ်မှု လုပ်ငန်းများကို ၂၀၂၅ ခုနှစ် နိုဝင်ဘာလတွင် စတင်ပြောင်းရွှေ့မည် ဖြစ်ပြီး ၂၀၂၆ ခုနှစ် ဇွန်လတွင် အပြီးသတ်မည်ဟု Canon ကုမ္ပဏီက ကြေညာထားသည်။   လုပ်ငန်းလျော့ချ ပြောင်းရွှေ့မည် ဖြစ်သော်လည်း အယုဒ္ဓယရှိ စက်ရုံသို့ ပြောင်းရွှေ့ရန် ဆန္ဒရှိသော အလုပ်သမား များကို ရွှေ့ပြောင်းခွင့် ပေးသွားမည် ဖြစ်ပြီး အလုပ်သမားများကို ဆက်လက်ထားရှိမည်ဟု Canon က ကြေညာ သည်။   ဈေးကွက် အနေအထား ပြောင်းလဲမှုကြောင့် ထိရောက်သည့် လုပ်ငန်း လည်ပတ်မှု ရှိစေရန်အတွက် နှစ်နေရာ ခွဲထားသည့် စက်ရုံများကို တစ်နေရာတည်းတွင် ပြန်လည် စုစည်းမည် ဖြစ်ကြောင်း Canon က ဆိုသည်။   Nakhon Ratchasima ခရိုင်ရှိ Canon စက်ရုံသည် Inkjet ပရင်တာများနှင့် စက္ကူထည့်သွင်းသည့် ပစ္စည်းများကို အဓိက ထား ထုတ်လုပ်သည်။   ထိုင်းနိုင်ငံ အလုပ်သမားရေးဌာနတွင် တရားဝင် မှတ်ပုံတင်ထားသည့် စာရင်းများအရ Nakhon Ratchasima ခရိုင်တွင် မြန်မာ ရွှေ့ပြောင်း အလုပ်သမား သောင်းနှင့် ချီပြီး အလုပ် လုပ်ကိုင်လျက် ရှိသည်။

ထိုင်း Canon စက်ရုံ ရွှေ့ပြောင်းမှု အလုပ်သမားများ အလုပ် ဆက်ပေးသွားမည်ဟု ကုမ္ပဏီ ကြေညာ

ထိုင်း Canon စက်ရုံ ရွှေ့ပြောင်းမှု အလုပ်သမားများ အလုပ် ဆက်ပေးသွားမည်ဟု ကုမ္ပဏီ ကြေညာ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။ ထ…

  • September 9, 2025
စောချစ်သူ၏ KNA ကို အမည်ပျက်စာရင်းထည့်သွင်းကာ ပိတ်ဆို့ အရေးယူမှု လုပ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။   ကရင်ပြည် အခြေစိုက် နယ်ခြားစောင့်တပ်ဖွဲ့မှ ကရင် အမျိုးသား တပ်မတော် (KNA) အဖြစ် ပြောင်းလဲထား သည့် အဖွဲ့အစည်းနှင့် ပတ်သက်သော လူပုဂ္ဂိုလ်များအပြင် လုပ်ငန်းများကို အမေရိကန် နိုင်ငံရပ်ခြား ပိုင်ဆိုင်မှု ဆိုင်ရာ ရုံးက အရေးယူ ပိတ်ဆို့မှု စာရင်းတွင် ဖြည့်စွက်လိုက်သည်။   အမေရိကန်မှ လူများအား အွန်လိုင်းလိမ်လည်မှု လုပ်ဆောင်နေသည့် လုပ်ငန်းများနှင့် ဆက်စပ် ပတ်သက် နေခြင်းကြောင့် ယခုကဲ့သို့ အရေးယူရခြင်း ဖြစ်သည်ဟု အဆိုပါ ရုံး ဝက်ဘ်ဆိုက် စာမျက်နှာတွင် ဖော်ပြထား သည်။   အရှေ့တောင်အာရှတွင် အခြေစိုက်သော ငွေလိမ်ဂိုဏ်းများသည် အမေရိကန်နိုင်ငံရှိ လူများကို အွန်လိုင်းမှတဆင့် လိမ်လည်မှုများ တိုးလာနေသည်ဟုလည်း ဆိုသည်။ ၂၀၂၄ ခုနှစ်အတွင်း အနည်းဆုံး ၁၀ ဘီလီယံ လိမ်လည်ခံခဲ့ရ သည်ဟု ဖော်ပြထားသည်။   ထိုင်း- မြန်မာနယ်စပ် ရွှေကုက္ကိုလ်တွင် အခြေစိုက်သည့် အဖွဲ့အစည်းအချို့သည် ငွေလိမ်ဂိုဏ်းများနှင့် ဆက်စပ်နေသည့် အတွက် အရေးယူပိတ်ဆို့မှု စာရင်းတွင် ထပ်မံ ဖြည့်စွက်ခဲ့ခြင်း ဖြစ်သည်။   ရွှေကုက္ကိုလ်တွင် ရှိသော ရတိုင် (Yatai) မြို့သစ်အခြေစိုက် ငွေလိမ်လုပ်ငန်းများကို မြန်မာနှင့် ကမ္ဘောဒီးယား နိုင်ငံသား စာရွက်စာတမ်း ကိုင်ဆောင်ထားသည့် တရုတ်လူမျိုး She Zhijiang (ရှီဇီကျန်း) နှင့် KNA  အဖွဲ့ ခေါင်းဆောင် စောချစ်သူတို့က တည်ထောင်ထားခြင်း ဖြစ်သည်ဟု ကြေညာချက်တွင် ဖော်ပြထားသည်။   အရေးယူမှု စာရင်းတွင် ထပ်မံ ဖြည့်သွင်းခံရသူများမှာ စောချစ်သူ၏ လက်အောက်တွင်  အလုပ်လုပ်နေသော ဦးတင်ဝင်းနှင့် စောမင်းမင်းဦး တို့ ပါဝင်သည်။   ဦးတင်ဝင်းသည် KNA အဖွဲ့မှ ဗိုလ်မှူးအဆင့် ရှိသူဖြစ်ပြီး ဗိုလ်ချစ်သူနှင့် ပတ်သက်သည့် ကုမ္ပဏီ အများအပြား တွင် ဘုတ်အဖွဲ့ဝင် အဖြစ် ပါဝင်သည်ဟု ဆိုသည်။   အရေးယူ ပိတ်ဆို့သည့် အဖွဲ့အစည်းများတွင် ချစ်လင်းမြိုင် ကုမ္ပဏီ၊ ချစ်လင်းမြိုင် တိုယိုတာ ကုမ္ပဏီ လီမိတက်၊ ချစ်လင်းမြိုင် သတ္တုတူးဖော်ရေးနှင့် စက်မှုလုပ်ငန်း ကုမ္ပဏီ လီမိတက်၊ ရွှေမြင့် သောင်ရင်း စက်မှုလုပ်ငန်းနှင့် ကုန်ထုတ်လုပ်ရေး ကုမ္ပဏီ လီမိတက်၊ ရတိုင် နိုင်ငံတကာ အုပ်စု လီမိတက် တို့ ပါဝင်သည်။   အဓိကအားဖြင့် KNA ခေါင်းဆောင်တစ်ဦး ဖြစ်သူ စောချစ်သူကို ပစ်မှတ်ထား ပိတ်ဆို့ခြင်းလည်း ဖြစ်သည်။   ကမ္ဘောဒီးယား အခြေစိုက် ငွေလိမ်ဂိုဏ်းများနှင့် ပတ်သက်သူ လူပုဂ္ဂိုလ် အဖွဲ့အစည်းများကိုလည်း အမည်ပျက် စာရင်း ထည့်သွင်းကာ ပိတ်ဆို့ အရေးယူလိုက်သည်။

စောချစ်သူ၏ KNA ကို အမည်ပျက်စာရင်းထည့်သွင်းကာ ပိတ်ဆို့ အရေးယူမှု လုပ်

စောချစ်သူ၏ KNA ကို အမည်ပျက်စာရင်းထည့်သွင်းကာ ပိတ်ဆို့ အရေးယူမှု လုပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။  ကရင်ပြည် အခြေစိုက်…

  • September 9, 2025
ကျောက်မဲက ပြည်သူ ၈,၀၀၀ ကျော် စစ်ဘေးတိမ်းရှောင်နေရ   သတင်းနှင့် မီဒီယာ ကွန်ရက်။
၂၀၂၅ ခုနှစ်၊ စက်တင်ဘာလ ၉ ရက်။   ရှမ်းပြည်မြောက်ပိုင်း၊ ကျောက်မဲမြို့နယ်ထဲက ပြည်သူ ၈,၆၀၀ ကျော် စစ်ဘေးလွှတ်ရာသို့ ထွက်ပြေးတိမ်းရှောင် နေကြရသည်။   စစ်ကော်မရှင်တပ်၏ လေကြောင်းအပြင် မြေပြင်မှ ထိုးစစ်များ၊ လက်နက်ကြီးဖြင့် ပစ်ခတ်မှုများနှင့် တိုက်ပွဲများ ကြောင့် ကျောက်မဲ ပြည်သူ ၈,၆၀၀ ကျော် နေရပ်မှ ထွက်ပြေး တိမ်းရှောင်နေရသည်ဟု ရှမ်း လူ့အခွင့်အရေး မဏ္ဍိုင် SHRF က စက်တင်ဘာလ ၉ ရက်နေ့တွင် ထုတ်သည်။   SHRF က “ကျောက်မဲမြို့နယ်၌ စစ်ကောင်စီ၏ လေကြောင်းနှင့် မြေပြင်မှ ထိခိုက်သေဆုံးစေနိုင်သော ပစ်ခတ် တိုက်ခိုက်မှုများကြောင့် အရပ်သားပြည်သူ ၂၉ ဦးသေဆုံးကာ အများစုမှာ ဘုန်းကြီးကျောင်းများတွင် ဖြစ်ပြီး ၆၆ ဦး ဒဏ်ရာရရှိခဲ့ရာ အရပ်သားပြည်သူ ၈,၆၀၀ ကျော် မှာ ထွက်ပြေးတိမ်း ရှောင်ခဲ့ကြရသည်” ဟု ဆိုသည်။   အဆိုပါ စာရင်းမှာ ဩဂုတ်လ ၁၈ ရက်နေ့မှ ၃၀ ရက်နေ့ အတွင်း ထွက်ပြေးတိမ်းရှောင်ရသည့် စာရင်းဟု ဆိုရမည်။   ကျောက်မဲမြို့နယ်ထဲ စစ်တပ်၏ ပစ်ခတ်တိုက်ခိုက်မှုများကြောင့် အရပ်သားပြည်သူ ၂၉ ဦး သေဆုံးပြီး ၆၆ ဦး ထိမှန်ဒဏ်ရာ ရခဲ့သည်ဟု SHRF က ဆိုသည်။   ဖြစ်စဉ်အများစုမှာ ဘုန်းကြီးကျောင်းနေရာများ၌ ဖြစ်ခဲ့သည်ဟု ထုတ်ပြန်ထားသည်။   စစ်တပ်က လေကြောင်းအပြင် လက်နက်ကြီးဖြင့် ပစ်ခတ်တိုက်ခိုက်ရာ ကျောက်မဲမြို့နယ်ထဲက နောင်ပိန် ကျေးရွာအုပ်စုကို အဓိက ပစ်မှတ်ထားခဲ့သည်ဟု ဒေသခံများက ပြောသည်။   ဗုံးများနှင့် လက်နက်ကြီးကျည်များသည် နောင်ပိန်ကျေးရွာအုပ်စုကို ဖြတ်သန်းသွားသည့် တရုတ်နိုင်ငံ၏ ရေနံနှင့် သဘာဝဓာတ်ငွေ့ပိုက်လိုင်းများအနီး အန္တရာယ် ရှိလောက်အောင် ကျရောက်ပေါက်ကွဲခဲ့သည်ဟု SHRF က ဆိုသည်။   ဒေသခံတစ်ဦးက “အခုက လေယာဉ်လည်း နေ့တိုင်းလာတယ်လို့ ပြောလို့ရတယ်။ တိုက်ပွဲကလည်း ဆက်တိုက် ဖြစ်နေတော့ လူတောင် မရှိတော့ဘူး။ မြို့ထဲဆိုလည်း လူပြတ်တယ်။ ရွာလမ်းတွေပေါ်လည်း လူက မရှိတော့ ဘူး။ ရှောင်တဲ့လူတွေက ရှောင်ကုန်တာပေါ့နော်။ ရွာမှာ မြို့မှာ ကျန်ခဲ့တဲ့လူတွေကလည်း အရင်လို ဘယ်သူမှ အပြင် မထွက်ကြတော့ဘူး သတိနဲ့နေရတာပေါ့ဗျာ။ ကျောက်မဲ ဗဟိုစျေး၊ မနက်စျေးတွေမှာလည်း လူမရှိ တော့ဘူး” ဟု ပြောသည်။   နောင်ချိုမြို့နယ်ဘက်မှ စစ်ကြောင်းထိုးလာသည့် စစ်ကော်မရှင်တပ်က မူဆယ် - မန္တလေး ကားလမ်းမပေါ်မှ တအာင်း တပ်မတော် (TNLA) ကို ရှင်းလင်းဖယ်ရှားနိုင်ရေး ကြိုးပမ်းနေသည်ဟု SHRF က ဆိုသည်။   ကျောက်မဲမြို့ခံ အမျိုးသားတစ်ဦးက “ဒီနေ့မနက် အစောကြီးနော် ၁ နာရီလောက်မှာပဲ ကျောက်မဲမြို့က လွယ် ခေါ် ရွာဖက် လေယာဉ်နဲ့ ဗုံးကြဲသွားသေးတယ်။ နောက်ပြီးတော့ ပြီးခဲ့တဲ့ ၇ ရက်နေ့တုန်းကရော၊ ၆ ရက်နေ့မှာ ရော လေယာဉ်က ဗုံးကြဲသွားတယ်ဗျ။ ၇ ရက်နေ့ရော ၆ ရက်ရော ညပိုင်းပဲ ကျောက်မဲ (၇) ရပ်ကွက် မြောက် ကုန်းကို ကြဲတာ၊ အိမ်တွေ ပျက်ကုန်တယ်။ ကုန်စုံဆိုင်နားလေးကို ကြဲတာဗျ။ လူတော့ ထိတာမရှိဘူး” ဟု ပြော သည်။   စစ်ရှောင် ၈,၆၀၀ ကျော်မှာ လက်ရှိတွင် ကျောက်မဲမြို့နယ် တောင်ပိုင်းက ရှမ်းပြည်တိုးတက်ရေးပါတီ (SSPP) ထိန်းချုပ်နယ်မြေထဲသို့ ထွက်ပြေးခိုလှုံနေကြရခြင်း ဖြစ်သည်။   ထိုစစ်ရှောင်ပြည်သူများမှာ သောက်သုံးရေ၊ အစားအသောက်၊ ဆေးဝါးနှင့် အခြား အခြေခံလိုအပ်ချက်များ ပြတ်လပ်မှုနှင့် ရင်ဆိုင်နေရသောကြောင့် အကူအညီများ လိုအပ်နေသည်ဟု ၎င်းတို့အား ကူညီပေးနေသူများက ပြောသည်။

ကျောက်မဲက ပြည်သူ ၈,၀၀၀ ကျော် စစ်ဘေးတိမ်းရှောင်နေရ

ကျောက်မဲက ပြည်သူ ၈,၀၀၀ ကျော် စစ်ဘေးတိမ်းရှောင်နေရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၉ ရက်။ ရှမ်းပြည်မြောက်ပိုင်း၊ ကျောက်မဲမြို့နယ…

  • September 9, 2025
×Close