သတင်း

စစ်ကော်မရှင်က ဝက်လက် အနောက်ခြမ်း ကျေးရွာ ၇ ရွာ မီးရှို့ဖျက်ဆီး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၇ ရက်။ စစ်ကော်မရှင် တပ် စစ်ကြောင်းများ အပြင်းအထန် ထိုးဝင်လာနေသည့် စစ်ကိုင်းတိုင်း၊ ဝက်လက်မြို့နယ် အနောက်ခြမ်း၌ တစ်ပတ်အတွင်း ကျေးရွာပေါင်း ၇ ရွာ မီးရှို့ခံလိုက်ရသည်။ ဝက်လက်မြို့နယ် အနောက်ခြမ်းကို စစ်ကော်မရှင်တပ်က အင်အား အလုံးအရင်းဖြင့် စစ်ကြောင်းထိုး ဝင်ရောက် စီးနင်းရာ တစ်ပတ်အတွင်း ကျေးရွာ ၇ ရွာကို မီးရှို့ဖျက်ဆီးခဲ့သည် ဟု Wetlet Informational Network (WIN) (ဝက်လက် သတင်း ကွန်ရက်) က ထုတ်ပြန်သည်။ တော်လှန်ရေး အင်အားစုများ အားကောင်းသည့် ဝက်လက် အနောက်ဘက်ခြမ်းကို စစ်တပ်က တစ်နှစ်ဝန်းကျင် ခန့် စစ်ကြောင်းထိုးခြင်း မရှိခဲ့ရာမှ ယခုတစ်ကြိမ် စစ်ရေးလှုပ်ရှားမှုကြောင့် ဒေသခံ သောင်းနှင့်ချီ၍ ဘေးလွတ် ရာသို့ ထွက်ပြေးတိမ်းရှောင်နေကြရသည်။ နိုဝင်ဘာလ ၁ ရက်နေ့မှ စတင်ကာ ဆားတောင်မြို့နှင့် ရွှေဘိုမြို့အခြေစိုက် စစ်ကော်မရှင် စစ်ကြောင်းက အင်အား ၄၀၀ ကျော်ဖြင့် စစ်ကြောင်း နှစ်ကြောင်းခွဲကာ ဝက်လက်မြို့နယ် အနောက်ဘက်ခြမ်းသို့ စစ်ရေး လှုပ်ရှားမှုများ ပြုလုပ်ခဲ့ခြင်း ဖြစ်သည်။ အဆိုပါ စစ်ကြောင်းနှစ်ကြောင်းသည် နိုဝင်ဘာလ ၄ ရက်နေ့တွင် တမာကုန်း၊ ရွာတော်ကုန်း၊ တံတားဦး၊ ထုံးဘို ကျေးရွာများ၊ နိုဝင်ဘာလ ၅ ရက်နေ့တွင် စစ်ဘေးရှောင်နေအိမ်များ၊ မူးကြီးကျေးရွာ တို့အပြင် နိုဝင်ဘာလ ၆ ရက်နေ့က မြင်တော်ကျေးရွာတို့ကိုပါ စီးနင်းမီးရှို့ဖျက်ဆီးခဲ့ကြောင်း မြေပြင်သတင်းရင်းမြစ်က ပြောသည်။ စစ်ကော်မရှင်တပ်၏ စစ်ကြောင်းထိုးလာရခြင်းနှင့် ပတ်သက်၍ ဒေသခံတစ်ဦးက “ကျနော်တို့အင်အားစုက ရွာသာကြီးအထိုင်ကို ဝင်ရောက်သိမ်းပိုက်တဲ့ အခါကျတော့ ကျနော်တို့ဘက်က လိုအပ်ချက်တွေကြောင့် မသိမ်းနိုင်သေးဘူး။ အဲ့ချိန်မှာ သူတို့က အင်အားဖြည့်ပြီးတော့ နယ်မြေပတ်ရှင်းတယ်။ ပြီးတော့ ရွာတွေကို မီးရှို့တယ်။ အဲ့လို ယူဆပါတယ်” ဟု ပြောသည်။ ပြီးခဲ့သည့် အောက်တိုဘာလ ဒုတိယအပတ်တွင် ဝက်လက်မြို့နယ် ရွာသာကြီးကျေးရွာတွင် အထိုင်ချထားသည့် စစ်ကော်မရှင်တပ်နှင့် တော်လှန်ရေး အင်အားစုများအကြား တိုက်ပွဲများ ပြင်းထန်စွာ ဖြစ်ပွားခဲ့ရာ စစ်တပ်ဘက် က လေကြောင်းတိုက်ခိုက်မှုများ ပြုလုပ်ခဲ့သေးသည်။ အဆိုပါတိုက်ပွဲ အပြီးတွင် စစ်ကော်မရှင်တပ်က Mi-17 ထောက်ပို့ရဟတ်ယာဥ်များ အသုံးပြုကာ ရွာသာကြီး ကျေးရွာရှိ အထိုင်စခန်းကို အင်အားဖြည့်တင်းမှုများ ပြုလုပ်ခဲ့သည်ဟု တော်လှန်ရေး အင်အားစုများက ပြော သည်။ ဒေသခံများ၏ ပြောပြချက်အရ ဝက်လက် အနောက်ခြမ်းဒေသသည် တော်လှန်ရေးအင်အားစုများ လွှမ်းမိုးထား သော ဧရိယာ ဖြစ်သည်။ ဒေသခံတစ်ဦးက “အနောက်ခြမ်းက စစ်ကြောင်းမထိုးတာကြာပြီ တစ်နှစ်ဝန်းကျင်လောက်ရှိပြီ။ ဒီနှစ်ထဲမှာ တော့ ဒါပထမဆုံးဘဲ။ ဒီမှာက ကျနော်တို့တွေက စိုးမိုးထားတာ၊ သူတို့က အထိုင်ဘဲရှိတာ အထိုင်ကနေ ဘယ်မှ မထွက် ဘူး” ဟု ပြောသည်။ ယခုတစ်ကြိမ် စစ်ကြောင်းထိုးမှုကြောင့် ကျေးရွာပေါင်း ၂၀ ခန့် မှ အရပ်သားများ ဘေးလွတ်ရာသို့ ထွက်ပြေး တိမ်းရှောင် နေကြရသည်။ စစ်ကော်မရှင်တပ်သည် လာမည့် ဒီဇင်ဘာလတွင် ပြုလုပ်မည့် အပိုင်း (၁) ရွေးကောက်ပွဲ အတွက် ကျင်းပမည့် မြို့နယ် ၁၀၂ မြို့နယ်ကို ထုတ်ပြန်ထားရာ စစ်ကိုင်းတိုင်းမှ မြို့နယ် ၁၂ ခု ပါဝင်သည်။ ဝက်လက်မြို့နယ် အနောက်ခြမ်းကို ယခုကဲ့သို့ အင်အားသုံး စစ်ရေး လှုပ်ရှားလာခြင်းမှာ ရွေးကောက်ပွဲ ကျင်းပ မည့် မြို့နယ်များအတွင်း နယ်မြေစိုးမိုးမှု ရရှိရေးအတွက် စစ်ရေး အပြင်းအထန် လှုပ်ရှားခြင်း ဖြစ်ကြောင်း နိုင်ငံရေး လေ့လာသုံးသပ်သူများက ယူဆကြသည်။ ထို့ကြောင့် Wetlet Informational Network (WIN) က ဝက်လက်မြို့နယ် အနောက်ခြမ်းမှ ဒေသခံများအနေ ဖြင့် စစ်ကော်မရှင်တပ်၏ လေကြောင်း တိုက်ခိုက်မှုများကို သတိထားကြရန် နှင့် အရေးကြီး အချက်အလက်နှင့် စာရွက်စာတမ်းများကို ကြိုတင်ပြင်ဆင်ထားကြရန် သတိပေးနှိုးဆော်ထားသည်။  

စစ်ကော်မရှင်က ဝက်လက် အနောက်ခြမ်း ကျေးရွာ ၇ ရွာ မီးရှို့ဖျက်ဆီး

စစ်ကော်မရှင်က ဝက်လက် အနောက်ခြမ်း ကျေးရွာ ၇ ရွာ မီးရှို့ဖျက်ဆီး သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၇ ရက်။  စစ်ကော်မရှင် တပ် စစ…

  • November 7, 2025
ဗန်းမော်တွင် တိုက်ပွဲများ ပြင်းထန်ဆဲဖြစ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၇ ရက်။ ကချင်ပြည်၊ ဗန်းမော်မြို့နယ်အတွင်း၌ တိုက်ပွဲများမှာ နေ့စဉ်နှင့်အမျှ ပြင်းထန်စွာ ဖြစ်ပွားနေဆဲဖြစ်ပြီး၊ နိုဝင်ဘာ လ ၆ ရက်နေ့ တွင် စစ်ကော်မရှင်၏ ခလရ (၄၇) တပ်ရင်းဘက်၌ တိုက်ပွဲများ ပိုမိုပြင်းထန်ခဲ့ကြောင်း ကချင် စစ်ရေးသတင်းရင်းမြစ်များက ပြောသည်။ ကချင်လွတ်လပ်ရေး တပ်မတော် (KIA) သည် ဗန်းမော်မြို့ကို ထိုးစစ်ဆင်လျက်ရှိပြီး၊ စစ်ကော်မရှင်တပ် က ၎င်းတို့ လက်လွတ်ဆုံးရှုံးခဲ့ရသည့် နေရာများကို ပြန်လည်သိမ်းပိုက်နိုင်ရန်အတွက် အင်အား အလုံးအရင်း ဖြင့် ကြိုးပမ်းတိုက်ခိုက်နေခြင်းကြောင့် တိုက်ပွဲများ ဆက်တိုက်ဖြစ်ပွားနေခြင်းဖြစ်သည်။ ကချင်လွတ်လပ်ရေးအဖွဲ့ (KIO) ၏ သတင်းနှင့်ပြန်ကြားရေး တာဝန်ခံ ဗိုလ်မှူးကြီး နော်ဘူ က “ဗန်းမော်ဘက်မှာ တော့ နေ့တိုင်း တိုက်ပွဲ ဖြစ်ပါတယ်။ အခုအချိန်မှာကတော့ စစ်ကော်မရှင် စစ်သားတွေလည်း သူတို့ လက်လွှတ် ဆုံးရှုံး ခဲ့တဲ့ စခန်းတွေ၊ နေရာတွေ၊ မြို့ရွာရပ်ကွက်တွေ ပြန်ထိန်းချင်လို့ မြေပြင်ကနေလည်း ထိုးတာ။ လက် နက်ကြီးမျိုးစုံနဲ့ ပစ်ပြီးမှ ဒီဗန်းမော်မြို့မှာတော့ တိုက်ပွဲက တော်တော်ပြင်းထန်တယ်။ တိုက်ပွဲတွေက ဆက် တိုက်ဖြစ်တယ်။ အဲ့ဒါက ဗန်းမော်ဘက်က အခြေအနေ” ဟု အတည်ပြုပြောဆိုသည်။ ဗန်းမော်မြို့သိမ်းတိုက်ပွဲသည် ၂၀၂၄ ခုနှစ် ဒီဇင်ဘာလ ကတည်းက စတင်ခဲ့သည်ဖြစ်ရာ လက်ရှိအချိန်အထိ ၁၀ လနီးပါး ကြာမြင့်လာပြီဖြစ်သည်။ နိုဝင်ဘာလ ပထမပတ်အတွင်း နှစ်ဖက်ကြား တိုက်ပွဲများ ပြင်းထန်နေသည့် နေရာများမှာ ဗန်းမော်တက္ကသိုလ်ဝင်း နေရာ၊ ၃ မိုင် နေရာ နှင့် စစ်ကော်မရှင်တပ်၏ ခလရ ၄၇ တပ်ရင်းအနီးတစ်ဝိုက်တို့ဖြစ်သည်ဟု KIO သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက ပြောသည်။ တိုက်ပွဲများ ပြင်းထန်ရခြင်း၏ အဓိကအကြောင်းအရင်းမှာ နှစ်ဖက်၏ အပြန်အလှန် ထိုးစစ်များကြောင့် ဖြစ်သည်။ ပြီးခဲ့သည့် ဇူလိုင်၊ ဩဂုတ်လ အတွင်း စစ်ကော်မရှင်တပ်သည် စစ်သင်္ဘော အစီး ၂၀ ကျော် အသုံးပြု၍ စစ်လက် နက်နှင့် ရိက္ခာများ ပို့ဆောင်နိုင်ခဲ့သည်။ ထို့အပြင် လေကြောင်းတိုက်ခိုက်မှုများအပြင် အဆင့်မြင့် ဒရုန်းများကိုပါ သိသိသာသာ အသုံးပြုလာခဲ့သည်။ KIA အနေဖြင့် အောက်တိုဘာလဆန်းပိုင်းအတွင်း လက်လွတ်လိုက်ရသည့် ကာကင်းတပ်စခန်း ၃ ခု နှင့် ရွှေပြည် သာက KBC ဘုရားကျောင်းဝင်းနေရာ တို့ကို ပြန်လည်သိမ်းပိုက်နိုင်ခဲ့သော်လည်း၊ ဗန်းမော်မြို့ကို အပြီးသတ် ထိန်းချုပ်နိုင်ရန်အတွက် နှစ်ဖက်တပ်ဖွဲ့တို့ကြား တိုက်ပွဲများ ဆက်လက် ပြင်းထန်နေဆဲဖြစ်သည်။ ဗန်းမော်အပြင် ကချင်ပြည်ရှိ အခြားစစ်မျက်နှာများတွင်လည်း စစ်ရေးတင်းမာမှုများ ဆက်လက် ရှိနေကြောင်း ဗိုလ်မှူးကြီးနော်ဘူက ဆက် ပြောသည်။ “နောက် ဝိုင်းမော်ဘက်မှာလည်း လေကြောင်းနဲ့ ပစ်တာတွေ၊ လက်နက်ကြီးနဲ့ ပစ်တာတွေ ရှိတယ်။ မြေပြင်နေ တော့ သူတို့ထိုးတက်တာ မတွေ့ရဘူး။ ဖားကန့်ဘက်မှာတော့ တပတ်လောက်တော့ ငြိမ်နေပါတယ်။ လန်ဆယ် ဘက်မှာကတော့ သူတို့လည်း ထိုးလာလို့ ကျနော်တို့ ခုခံတိုက်ပွဲတွေ ရှိပါတယ်။ ဒါပေမယ့် ကျနော်တို့ ရွာတွေ ဘာတွေ ရွာနာမည်တွေ သိပ်မသိဘူး။ ကျနော်တို့လည်း သိပ်မကျွမ်းဘူး။” အဆိုပါ ပြောဆိုချက်အရ ဝိုင်းမော်ဘက်တွင် လေကြောင်းနှင့် လက်နက်ကြီး ပစ်ခတ်မှုများရှိနေသော်လည်း မြေပြင်၌ ထိုးစစ်မှာ ငြိမ်သက်နေပြီး၊ လန်ဆယ်ဘက် တွင်မူ KIA နှင့် စစ်ကော်မရှင်တပ်တို့အကြား ခုခံတိုက်ပွဲ များ ဖြစ်ပွားလျက်ရှိနေသည်။ ဗန်းမော်တိုက်ပွဲကို ရပ်တန့်စေရန်အတွက် နိုင်ငံရေးဖိအားများလည်း ရှိနေသည်။ ပြီးခဲ့သည့် အောက်တိုဘာလ ဒုတိယအပတ် တွင် KIO နှင့် တရုတ်အာဏာပိုင်များ တို့ တရုတ်နိုင်ငံ၊ ကူမင်းမြို့၌ တွေ့ဆုံခဲ့ပြီးနောက် တိုက်ပွဲ ငြိမ်သက်သွားပြီဆိုသော သတင်းများ လူမှုကွန်ရက်တွင် ပျံ့နှံ့ခဲ့သည်။ သို့သော်လည်း စစ်ကော်မရှင် ဝါဒဖြန့်သူများက KIO/KIA နှင့် စစ်တပ်တို့ တွေ့ဆုံဆွေးနွေးရန် ပြင်ဆင်နေပြီဟု ဝါဒဖြန့်မှုများ ဆက်တိုက်ပြုလုပ်နေသည်ကို KIA ဘက်က ငြင်းဆိုထားသည်။ ဗန်းမော်မြို့သည် ဗန်းမော်၊ မိုးမောက်၊ မံစီ၊ ရွှေကူ မြို့နယ်တို့ပါဝင်သော ခရိုင်ရုံးစိုက်ရာ ဒေသဖြစ်ပြီး၊ KIA နှင့် ပူးပေါင်းတပ်များက မိုးမောက်နှင့် မံစီမြို့များကိုမူ သိမ်းပိုက်ထားပြီး ဖြစ်သည်။  

ဗန်းမော်တွင် တိုက်ပွဲများ ပြင်းထန်ဆဲဖြစ်

ဗန်းမော်တွင် တိုက်ပွဲများ ပြင်းထန်ဆဲဖြစ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၇ ရက်။  ကချင်ပြည်၊ ဗန်းမော်မြို့နယ်အတွင်း၌ တိုက်ပ…

  • November 7, 2025
KNU မှ ပဋိပက္ခဒဏ်ခံ လူငယ်များအတွက် အနာဂတ် ပညာရေးဖော်ဆောင်မည် သတင်းနှင့်မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၆ ရက်။ ကရင်အမျိုးသား အစည်းအရုံး (KNU) သည် ပဋိပက္ခနယ်မြေများမှ လူငယ်များအတွက် အာမခံချက်ရှိသော ပညာရေးစနစ် ဖော်ဆောင်ရန် ရည်ရွယ်၍ ‘ကော့သူးလေ အဆင့်မြင့်ပညာရေးကောင်စီ (Council of Higher Education, Kawthoolei)’ ကို ဥပဒေအရ အဖွဲ့အစည်းတစ်ခုအဖြစ် တည်ထောင်ရန် မူအားဖြင့် သဘော တူညီခဲ့ကြောင်း နိုဝင်ဘာလ ၆ ရက်နေ့တွင် ထုတ်ပြန်ခဲ့သည်။ အဆိုပါ ဆုံးဖြတ်ချက်ကို နိုဝင်ဘာလ ၆ ရက်နေ့က ကျင်းပသော ကော့သူးလေ အဆင့်မြင့်ပညာရေးဆိုင်ရာ ဦးဆောင်ညီလာခံတွင် ပညာရေးခေါင်းဆောင်နှင့် ပညာရှင်များ အပါအဝင် အယောက် ၈၀ ကျော် ပါဝင် ဆွေးနွေးပြီးနောက် ချမှတ်ခဲ့ခြင်းဖြစ်သည်။ အဆိုပါ ကောင်စီကို ဖွဲ့စည်းရခြင်းမှာ ပဋိပက္ခဒဏ်ခံနေရသည့် ဒေသများတွင် ပညာရေး၏ စဉ်ဆက်မပြတ်ရှိမှု ကို သေချာစေဖို့ရန်နှင့် အရည်အသွေးရှိသည့် ပညာရေးကို ဆက်လက်ပံ့ပိုးရန် ဖြစ်သည်ဟု ဆိုသည်။ ထိုကောင်စီသည် အဆင့်မြင့် ပညာရေး ကဏ္ဍအတွက် အုပ်ချုပ်မှု ဖွဲ့စည်းပုံနှင့် မူဝါဒများကို ခိုင်မာစေရန်၊ လက်ရှိ နှင့် ရေရှည် စိန်ခေါ်မှုများကို ဖြေရှင်းရန် မဟာဗျူဟာမြောက် လမ်းညွှန်မှုများ ပေးအပ်ရန် ရည်ရွယ်သည်။ KNU ထုတ်ပြန်ချက်တွင် “ဒီပဏာမ ခြေလှမ်းဟာ နောက်မျိုးဆက် လူငယ်တွေကို တတ်သိပညာ တပ်ဆင်ပေးရုံ သာမကဘဲ၊ ကော့သူးလေရဲ့ မိမိကိုယ်ကို ဆုံးဖြတ်ပိုင်ခွင့်နဲ့ ရေရှည်တည်တံ့တဲ့ နိုင်ငံတည်ဆောက်ရေး မျှော်မှန်း ချက်ကို အထောက်အကူ ပြုဖို့အတွက်ပါ” ဟု ဖော်ပြထားသည်။ ဤလုပ်ဆောင်ချက်သည် ပဋိပက္ခများကြားမှနေ၍ အနာဂတ်ကို တည်ဆောက်မည့် ပညာရေးစနစ် သစ် တစ်ခုကို စနစ်တကျ ခိုင်မာအောင် လုပ်ဆောင်ရန် ခြေလှမ်းသစ်တစ်ခုသည်ဟု KNU က ဆိုသည်။

KNU မှ ပဋိပက္ခဒဏ်ခံ လူငယ်များအတွက် အနာဂတ် ပညာရေးဖော်ဆောင်မည်

KNU မှ ပဋိပက္ခဒဏ်ခံ လူငယ်များအတွက် အနာဂတ် ပညာရေးဖော်ဆောင်မည် သတင်းနှင့်မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၆ ရက်။ ကရင်အမျိုးသား အစည်းအရုံး (KN…

  • November 6, 2025
ဝက်လက်နှင့် ရွှေဘိုတွင် စစ်ကြောင်း ၄ ကြောင်းခွဲ၍ ကျေးရွာ ၈ ရွာ မီးရှို့၊ အရပ်သားများ သေဆုံး ဖမ်းဆီးခံရ သတင်းနှင့်မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၆ ရက်။ စစ်ကိုင်းတိုင်း၊ ဝက်လက်နှင့် ရွှေဘိုမြို့နယ်များတွင် စစ်ကော်မရှင်တပ်က နိုဝင်ဘာလဆန်းကတည်းက စစ်ကြောင်း ၄ ကြောင်းခွဲ၍ ရွာများကို ဝင်ရောက် မီးရှို့ဖျက်ဆီးမှုများကြောင့် ဒေသခံရာပေါင်းများစွာ ဘေးလွတ်ရာသို့ ထွက်ပြေးတိမ်းရှောင်နေရကြောင်း ဒေသခံများနှင့် တော်လှန်ရေးတပ်ဖွဲ့များက ပြောကြားသည်။ နိုဝင်ဘာလ ၄ ရက်နေ့တွင် ဝက်လက်မြို့နယ်၊ လှထွေကျေးရွာ၌ စစ်ကော်မရှင်တပ်၏ ရမ်းသမ်းပစ်ခတ်မှုကြောင့် အရပ်သား အမျိုးသားတစ်ဦး သေဆုံးပြီး နှစ်ဦး ဒဏ်ရာရရှိခဲ့သည်။ ထို့အပြင် နိုဝင်ဘာလ ၃ ရက်နေ့က မောင်ကထီးကျေးရွာကို ဝင်ရောက်လာသည့် စစ်ကြောင်းမှ ဒေသခံ ၄၀ ခန့်ကို ဖမ်းဆီးခဲ့ပြီး၊ သက်ကြီးပိုင်းအချို့ကိုသာ ပြန်လည် လွှတ်ပေးခဲ့သည်ဟု သိရသည်။ ဝက်လက်မြို့နယ် ဒေသခံတစ်ဦးက “စစ်ကြောင်းတွေက ရွာတွေကို တမာကုန်း၊ ရွာတော်ကုန်း စသဖြင့် ဆက် တိုက် ဝင်ပြီး မီးရှို့နေတာ။ အိမ်တွေ မီးလောင်ကုန်လို့ ရာနဲ့ချီတဲ့ လူတွေ နေစရာမရှိဘဲ တောထဲမှာပဲ ထွက်ပြေး နေကြရတယ်” ဟု ပြောသည်။ ဝက်လက်နယ် အနောက်ခြမ်းနှင့် ရွှေဘိုမြို့နယ်ဘက်ရှိ ဇီးတော၊ တဂဏန်း၊ ဘုန်းဘွတ် စသည့် ကျေးရွာ ၈ ရွာဝန်းကျင်မှာ မီးရှို့ဖျက်ဆီးခံထားရပြီး၊ ဒေသခံရာပေါင်းများစွာသည် နေရပ်စွန့်ခွာ၍ ရွှေဘို - မန္တလေး လမ်းမ ပေါ်မှ ကျေးရွာများ အနီးတဝိုက်သို့ ထွက်ပြေးနေကြရသည်။ တော်လှန်ရေးတပ်ဖွဲ့ဝင်တစ်ဦးက “သူတို့ ဒီစစ်တပ်က ရွာတွေကို မီးရှို့တာ၊ လူငယ်တွေကို ဖမ်းဆီးတာတွေ လုပ်ပြီး ဒေသခံတွေ မနေရဲအောင် ဖိအားပေးနေတာပဲ။ တိုက်ပွဲ ကြီးကြီးမားမား မရှိရင်တောင် အရပ်သား တွေကို ပစ်မှတ်ထားနေတာပါ” ဟု ဝေဖန်ပြောဆိုသည်။ ဒေသခံများ၏ ထွက်ပြေးတိမ်းရှောင်နေရမှုနှင့် ရွာများ မီးရှို့ဖျက်ဆီးခံရမှုများကြောင့် လူသားချင်းစာနာမှု အကူအညီများမှာ အရေးတကြီး လိုအပ်လျက်ရှိသည်။ စစ်ရေးကျွမ်းကျင်သူများကမူ စစ်ကော်မရှင်တပ်သည် အဆိုပါ မြို့နယ်များအတွင်း ၎င်းတို့၏ စစ်ရေးအရှိန်ကို မြှင့်တင်ရန်နှင့် ဒေသခံ တော်လှန်ရေး တပ်ဖွဲ့များအား ထောက်ပံ့မှု ဖြတ်တောက်ရန် ရည်ရွယ်ပြီး စစ်ကြောင်း ထိုးမှုများ၊ ရွာမီးရှို့မှုများကို အသုံးပြုနေကြောင်း သုံးသပ်သည်။ လက်ရှိတွင် နေအိမ်များ ဆုံးရှုံးသွားသော စစ်ဘေးရှောင်များအတွက် အမိုးအကာ၊ အစားအသောက်နှင့် ဆေးဝါး များ ရရှိနေရးမှာလည်း အဓိက စိန်ခေါ်မှုဖြစ်နေကြောင်း ဒေသတွင်း ကူညီရေးအဖွဲ့များက ဆိုသည်။

ဝက်လက်နှင့် ရွှေဘိုတွင် စစ်ကြောင်း ၄ ကြောင်းခွဲ၍ ကျေးရွာ ၈ ရွာ မီးရှို့၊ အရပ်သားများ သေဆုံး ဖမ်းဆီးခံရ

ဝက်လက်နှင့် ရွှေဘိုတွင် စစ်ကြောင်း ၄ ကြောင်းခွဲ၍ ကျေးရွာ ၈ ရွာ မီးရှို့၊ အရပ်သားများ သေဆုံး ဖမ်းဆီးခံရ သတင်းနှင့်မီဒီယာ ကွန်ရက်။၂၀၂၅ ခုနှစ်၊ နိုဝင်…

  • November 6, 2025
ကျောက်ဖြူ သိုင်းချောင်းတောင် အပြင်းအထန် တိုက်ပွဲဖြစ်ပွား၊ စစ်တပ် အင်အား ၃၀၀ ထပ်မံဖြည့်တင်း သတင်းနှင့်မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၆ ရက်။ ရခိုင်ပြည်၊ ကျောက်ဖြူမြို့နယ်ရှိ စစ်ရေးအရ အရေးပါသော သိုင်းချောင်းတောင်ကုန်းကို ပြန်လည်ရယူနိုင်ရန် အတွက် စစ်ကော်မရှင်တပ်မှ နိုဝင်ဘာလဆန်းမှ စတင်၍ အင်အား အလုံးအရင်းဖြင့် ထိုးစစ်ဆင်လျက်ရှိသည်။ စစ်ကော်မရှင်တပ်က အင်အားအလုံးအရင်းဖြင့် ထိုးစစ်ဆင်လျက်ရှိရာ အာရက္ခတပ်တော် (AA) နှင့် နှစ်ဖက်ကြား တိုက်ပွဲများ ပြင်းထန်နေကြောင်း မြေပြင်သတင်းရင်းမြစ်များ၏ ပြောပြချက်အရ သိရသည်။ မြေပြင်သတင်းရင်းမြစ်တစ်ဦးက "စစ်တပ်ဟာ အကျအဆုံး အရမ်းများလာလို့ အခုလို စစ်သား အင်အားတွေ ထပ်ဖြည့်နေရတာ။ ဒါပေမဲ့ သူတို့က မြေပြင်ထက် ဝေဟင်လေကြောင်းပစ်ကူနဲ့ နည်းပညာကိုပဲ ပိုအားကိုးနေရ တယ်" ဟု ပြောသည်။ စစ်ကော်မရှင်တပ်သည် တိုက်ပွဲများတွင် အကျအဆုံး များပြားလာမှုကြောင့် စစ်သား ၃၀၀ နီးပါးနှင့် လက်နက် ခဲယမ်းများကို ရေတပ် (Navy) မှတစ်ဆင့် ကျောက်ဖြူဆိပ်ကမ်းသို့ တင်ဆောင်ကာ အမှတ် (၃၂) ရဲတပ်ရင်းရှိရာ ဂုံးချွိန်တိုက်နယ်သို့ ထပ်မံဖြည့်တင်းခဲ့သည်။ ဒေသခံတစ်ဦးက “စစ်ကော်မရှင်ဟာ ရေ၊ ဝေဟင်၊ မြေပြင် အင်အားသုံးပြီး AA ဆီက နယ်မြေတွေ ပြန်ရဖို့ ရည်ရွယ်ချက်ရှိရှိနဲ့ အရှိန်မြှင့် တိုက်ခိုက်လာနေတာကို တွေ့ရပါတယ်” ဟု သုံးသပ်သည်။ အမြင့်ပေ ၁,၀၀၀ ခန့်ရှိသော သိုင်းချောင်းတောင်သည် စစ်ရေးအရ အလွန်အရေးပါပြီး စစ်ကော်မရှင်တပ်၏ အမှတ် (၃၂) ရဲတပ်ရင်း (ဒိုးတန်းတောင်) နှင့် ၅ မိုင်သာ ကွာဝေးသည်။ AA မှ အဆိုပါ နေရာကို ထိန်းချုပ်ထားခြင်းသည် ရဲတပ်ရင်းအပြင် ကျောက်ဖြူမြို့ ကိုပါ စစ်ရေးအရ ခြိမ်းခြောက်နေခြင်း ဖြစ်သောကြောင့် စစ်ကော်မရှင်တပ်က အပြင်းအထန် တိုက်ခိုက်နေရခြင်းဖြစ်သည်။ ရှမ်းမြောက်ဒေသတွင် တိုက်ပွဲများ ငြိမ်သက်သွားပြီးနောက်၊ စစ်ကော်မရှင်တပ်သည် ရေပြင်၊ ဝေဟင်၊ မြေပြင် မှ အင်အားအလုံးအရင်းဖြင့် AA ထံမှ နယ်မြေများ ပြန်ရရှိရေး အရှိန်မြှင့် တိုက်ခိုက်လာနေသည်ဟု စစ်ရေးလေ့ လာသူ အချို့က သုံးသပ်နေကြသည်။

ကျောက်ဖြူ သိုင်းချောင်းတောင် အပြင်းအထန် တိုက်ပွဲဖြစ်ပွား၊ စစ်တပ် အင်အား ၃၀၀ ထပ်မံဖြည့်တင်း

ကျောက်ဖြူ သိုင်းချောင်းတောင် အပြင်းအထန် တိုက်ပွဲဖြစ်ပွား၊ စစ်တပ် အင်အား ၃၀၀ ထပ်မံဖြည့်တင်း သတင်းနှင့်မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၆ ရက်။ …

  • November 6, 2025
ဖရူဆို- ဘောလခဲ လမ်းမကြီး ရက်အကန့်အသတ်မရှိ ပိတ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၆ ရက်။ ကရင်နီပြည်၊ ဖရူဆိုမြို့နယ်ထဲတွင် စစ်ကော်မရှင်တပ်နှင့် ကရင်နီ တော်လှန်ရေးတပ်ဖွဲ့တို့ကြား တိုက်ပွဲများ ဖြစ်ပွားနေသောကြောင့် ပြည်သူ့လုံခြုံရေးအတွက် အရေးကြီး လမ်းမကြီးတစ်ခုကို ပိတ်ဆို့လိုက်ရသည်။ ဖရူဆိုမြို့နယ်အတွင်း စစ်ကော်မရှင်တပ်များက ထိုးစစ်များ ပြန်လည်စတင်လာခြင်းနှင့်အတူ အရပ်သား ပြည်သူ များ၏ လုံခြုံရေး အန္တရာယ် မြင့်တက်လာသောကြောင့် ကရင်နီအမျိုးသားများ ကာကွယ်ရေးတပ်ဖွဲ့ (KNDF) က အရေးပါသော လမ်းမကြီးတစ်ခုကို နိုဝင်ဘာလ ၆ ရက်နေ့မှ စတင်၍ ရက်အကန့်အသတ်မရှိ ပိတ်လိုက်ကြောင်း အသိပေး ထုတ်ပြန်သည်။ နိုဝင်ဘာလ ၃ ရက်နေ့မှ စတင်ကာ ဖရူဆိုမြို့နယ်၊ မာခရော်ရှေ့ကျေးရွာဘက်မှ စစ်ကော်မရှင် တပ်ဖွဲ့ဝင်များသည် ထားလဲ ဘက်သို့ ဦးတည်ပြီး စစ်ကြောင်းထိုး လှုပ်ရှားမှုများ ပြန်လည်ပြုလုပ်လာခဲ့ပြီး မြေပြင်၌ တော်လှန်ရေး တပ်ဖွဲ့များနှင့် ထိတွေ့တိုက်ပွဲများ ဆက်တိုက် ဖြစ်ပွားနေသည်ဟု မြေပြင်သတင်းရင်းမြစ်များက အတည်ပြု သည်။ မြေပြင် စစ်ရေးအခြေအနေ တင်းမာလာမှုကြောင့် KNDF ဗဟိုသတင်းနှင့် ပြန်ကြားရေးဌာနမှ အရေးပေါ် အသိပေးချက်ကို နိုဝင်ဘာလ ၅ ရက်နေ့ တွင် ထုတ်ပြန်လိုက်ခြင်း ဖြစ်သည်။ “ဖရူဆို - ထားလဲ - နန်းဖဲ - ဘောလခဲ လမ်းမကြီးတစ်လျှောက်နှင့် လမ်းသွယ်များအားလုံးကို နိုဝင်ဘာလ ၆ ရက်နေ့မှစ၍ ရက်အကန့်အသတ်မရှိ ပိတ်လိုက်ကြောင်း” အဆိုပါ ထုတ်ပြန်ချက်တွင် ဖော်ပြထားသည်။ လမ်းပိတ်ဆို့ရခြင်း၏ အဓိကရည်ရွယ်ချက်မှာ အရပ်သားပြည်သူများ စစ်ရေးနယ်မြေထဲ မရောက်ရှိစေရန်နှင့် စစ်ကော်မရှင်တပ်၏ ပစ်မှတ်ထား တိုက်ခိုက်မှုများမှ ရှောင်ရှားနိုင်ရန်ဖြစ်သည်။ KNDF ၏ သတိပေးချက်တွင် စစ်ကော်မရှင်တပ်၏ လုပ်ရပ်များသည် အရပ်သားများကိုပါ ရည်ရွယ်ချက်ရှိရှိ တိုက်ခိုက်နေကြောင်း အလေးပေးဖော်ပြထားသည်။ ကရင်နီတော်လှန်ရေးအဖွဲ့နှင့် အရပ်ဘက် အဖွဲ့အစည်းများ၏ ထုတ်ပြန်ချက်များအရ၊ စစ်ကော်မရှင်သည် ဒေသခံပြည်သူများ စပါးရိတ်နေသည့် တောင်သူများကဲ့သို့ အရပ်သားပစ်မှတ်များကိုပင် ဒရုန်းနှင့် လက်နက်ကြီး များသုံးပြီး ရည်ရွယ်ချက်ရှိရှိ တိုက်ခိုက်နေသည်။ ၎င်းတို့သည် ဒေသခံပြည်သူများ စိုက်ပျိုးသီးနှံများ မရိတ်သိမ်းနိုင်စေရန်နှင့် စားနပ်ရိက္ခာ ပြတ်လပ်စေရန် ကြိုးပမ်းနေကြောင်း သတိပေးထားသည်။ ဖရူဆိုမြို့နယ်ရှိ ဒေါညေးခူနှင့် ဒေါကူးခူကျေးရွာ အကြားရှိ လူနေအဆောက်အအုံများကိုလည်း စစ်ကော်မရှင် ဘက်မှ ဒရုန်းဖြင့် ဗုံးကြဲချ မီးရှို့ဖျက်ဆီးမှုများ လုပ်ဆောင်ခဲ့သည့် မှတ်တမ်းများလည်း ရှိခဲ့သည်။ ကရင်နီတပ်မတော် (KA) စစ်ရေးချုပ် ဗိုလ်မှူးကြီး ဘုန်းနိုင်က “စပါးရိတ်တဲ့ လူထုတွေကို ဒရုန်းနဲ့ ကြဲချနေတာ တော့ရှိတယ်။ ဖရူဆိုမြို့နယ်ပေါ့နော်၊ ဒရုန်းနဲ့ လာချတာတွေတော့ရှိတယ်” ဟု ပြောသည်။ မြေပြင်က အခြေအနေနှင့် ပတ်သက်၍ စစ်ရှောင် အမျိုးသမီးတစ်ဦးက “လုံခြုံမှုမရှိဘူး။ အခုတောင်မှ လာ လာ ထုနေတာ။ ထုတာတော့ ရွာနားမှာပဲ။ ဘယ်နေရာမှာပဲ နေနေ လုံခြုံမှုမရှိဘူး။ စိတ်ထိခိုက်တာပေါ့ တစ်ခါ တစ်လေ လေယာဉ်ညပိုင်းလာရင်ပိုဆိုး အိပ်မရတော့ဘူးလေ” ဟု ပြောသည်။ ဖရူဆိုမြို့နယ်သည် လွိုင်ကော် - ဘောလခဲ - ဖားဆောင်း ပြည်ထောင်စု လမ်းမကြီးပေါ်တွင် တည်ရှိသည့် အတွက် စစ်ရေးအရ အလွန်အရေးပါသော နေရာတစ်ခုဖြစ်သည်။ စစ်ကော်မရှင်တပ်များသည် လွိုင်ကော်နှင့် ဖယ်ခုံ/မိုးဗြဲဘက်မှ ညှပ်၍ ကရင်နီပြည် အလယ်ပိုင်းဒေသ (ဖရူဆို အပါအဝင်) ကို ပြန်လည်ထိန်းချုပ်ရန် ကြိုးပမ်းနေကြောင်း တော်လှန်ရေးတပ်ဖွဲ့များက သုံးသပ်သည်။ KNDF က အဆိုပါ ပိတ်ဆို့ထားသော လမ်းမကြီးကို အသုံးပြု သွားလာခြင်း လုံးဝ မပြုလုပ်ကြရန်နှင့်၊ စစ်ရေး အန္တရာယ်များကို အထူးသတိပြုကြရန် ပြည်သူလူထုကို သတိပေးထားသည်။  

ဖရူဆို- ဘောလခဲ လမ်းမကြီး ရက်အကန့်အသတ်မရှိ ပိတ်

ဖရူဆို- ဘောလခဲ လမ်းမကြီး ရက်အကန့်အသတ်မရှိ ပိတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၆ ရက်။  ကရင်နီပြည်၊ ဖရူဆိုမြို့နယ်ထဲတွင် စစ…

  • November 6, 2025
ကရင်နီ စစ်ရှောင်များအတွင်း စိတ်ဖိစီးမှုကြောင့် မိသားစုပဋိပက္ခများ မြင့်တက်လာ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၆ ရက်။ ကရင်နီ (ကယား) ပြည်ထဲက စစ်ဘေးရှောင်များမှာ စားနပ်ရိက္ခာရှားပါးမှုနှင့် စိတ်ဖိစီးမှုများကြောင့် မိသားစုတွင်း ပဋိပက္ခ များ မြင့်တက်လာနေသည်။ စစ်အာဏာသိမ်းပြီးနောက်ပိုင်း တိုက်ပွဲများကြောင့် ကရင်နီ စစ်ရှောင်ပြည်သူများသည် ရေရှည်တည်တံ့ရေး အခက်အခဲများ၊ စားနပ်ရိက္ခာရှားပါးမှုများ အပြင် စိတ်ပိုင်းဆိုင်ရာ ဖိစီးမှုများကြောင့် အိမ်တွင်းပဋိပက္ခများကို စတင်ရင်ဆိုင်နေရကြောင်း ကရင်နီ လူ့အခွင့်အရေးအဖွဲ့ (KnHRG) က ထုတ်ဖော် ပြောဆိုလိုက်သည်။ KnHRG ၏ နိုဝင်ဘာလ ၅ ရက်နေ့ ထုတ်ပြန်ချက်အရ၊ စစ်ရှောင်ကာလကြာမြင့်လာခြင်း၊ အောက်တိုဘာလ အတွင်း တိုက်ပွဲများ ထပ်မံပြင်းထန်လာခြင်းတို့ကြောင့် လက်ရှိတွင် အရေးပေါ် စားနပ်ရိက္ခာနှင့် နေထိုင်ရန် အမိုးအကာ လိုအပ်ချက်မှာ အကြီးမားဆုံး စိန်ခေါ်မှုဖြစ်နေသည်။ နှစ်ဖက်တိုက်ပွဲ စတင်ဖြစ်ပွားချိန်မှ စ၍ စစ်ရှောင်နေရသူများမှာ အခြေခံစားနပ်ရိက္ခာပင် မလုံလောက်သည့် အခြေအနေသို့ ရောက်ရှိနေပြီ ဖြစ်သည်။ ဝင်ငွေရရှိနိုင်သည့် အလုပ်အကိုင်မရှိခြင်း၊ အလှူရှင်အဖွဲ့အစည်းများ၏ အကူအညီ ပေးနိုင်မှု အားနည်းလာခြင်း တို့ကြောင့် ရေရှည်ရပ်တည်ရန် ပိုမိုခက်ခဲလာနေသည်။ ဒီးမော့ဆိုမြို့နယ် အနောက်ခြမ်းတွင် ၅ နှစ်ဝန်းကျင်ခန့် စစ်ဘေးရှောင်နေရသည့် အမျိုးသမီးတစ်ဦးက “တစ်ခါ တစ်လေ စားစရာ ဆန်မရှိတဲ့ အချိန်ဆို အရမ်း စိတ်ပင်ပန်းတယ်ပေါ့နော်။ ကိုယ့်မှာ သားသမီးတွေရှိတော့ သား သမီးတွေ စားဝတ်နေရေး ငတ်ပြတ်မှာ အဒေါ် အရမ်း စိုးရိမ်တာပေါ့။ စိတ်ဆို ရူးချင်တဲ့စိတ် အထိတောင် ဖြစ် လာတယ်ပေါ့နော်” ဟု ၎င်း၏ ဖိစီးမှုကို ဖွင့်ဟပြောဆိုသည်။ ဝင်ငွေမရှိခြင်းနှင့် ကုန်ဈေးနှုန်း မြင့်တက်လာခြင်းတို့ကြောင့် မိဘများအနေဖြင့် သားသမီးများအား အာဟာရ ပြည့်ဝစွာ မကျွေးနိုင်သည့်အတွက် စိတ်မကောင်းဖြစ်ရကြောင်း ထိုအမျိုးသမီးက ဆက် ပြောသည်။ “ဝင်ငွေက မရှိတော့ ကလေး အာဟာရဆို တစ်ခါတစ်လေ ကိုယ့်သားသမီးဆို ကိုယ့်ကို ဘယ်လိုတောင်းဆိုလဲဆို ကြက်ဥတို့ ဘာတို့ ဝယ်ကျွေးပါဆို ကိုယ်က မတတ်နိုင်ဘူးလေးနော်။ တစ်ခါတစ်လေဆို ရေလုံပြုတ်လေးနဲ့ ဟင်းရည်လေးနဲ့ စားရရင်တောင်မှ ကံကောင်းပေါ့လို့ ကိုယ့်ကလေးကို ဒီလိုပဲ ချော့မော့ပေးရတယ်ပေါ့နော်။ အာဟာရနဲ့ ပတ်သက်လို့ရှိရင် ကလေးတွေက ပြည့်စုံအောင်တော့ မစားရတာတော့ အမှန်ပဲပေါ့” ဟု ၎င်းက ရင်ဖွင့်သည်။ ကရင်နီပြည် အတွင်း စစ်ကော်မရှင်၏ စစ်ကြောင်းထိုးမှုနှင့် ပိတ်ဆို့မှုများကြောင့် ကုန်စိမ်းရှားပါးလာခြင်း၊ ကုန်စည်စီးဆင်းမှု ကန့်သတ်ခံရခြင်းတို့ကြောင့် ကုန်ဈေးနှုန်းမှာ တစ်လထက်တစ်လ ပိုမိုမြင့်တက်လာနေ သည်ဟု KnHRG က ဆိုသည်။ ကုန်ဈေးနှုန်းမြင့်တက်ခြင်း၊ ဝင်ငွေရလမ်း ရပ်တန့်ခြင်းတို့ကြောင့် စစ်ဘေးရှောင်များမှာ စားနပ်ရိက္ခာ မလုံ လောက်တော့ဘဲ၊ ရှေ့ဆက်တွင် အငတ်ဘေး ကြုံတွေ့လာနိုင်သည်ဟု KnHRG က သတိပေးထားသည်။ ထို့အပြင် စားဝတ်နေရေး အဆင်မပြေမှုသည် အိမ်တွင်း ဆက်ဆံရေးကိုပါ ထိခိုက်စေကြောင်း စစ်ဘေးရှောင် အမျိုးသမီးတစ်ဦးက ရှင်းပြသည်။ တစ်လေးလုံး စစ်ဆင်ရေးတိုက်ပွဲကြောင့် လွိုင်ကော်မြို့မှ စစ်ရှောင်လာသည့် အမျိုးသမီးတစ်ဦးက “အမိုးရေ ဒီမျိုး မုန့်စားချင်တယ် ဒီမျိုးစားချင်တယ်ပြောရင် ကိုယ်က အရင်လိုမျိုး အဆင်မပြေ။ ကလေးတွေကို အော် မိတာပေါ့။ သူတို့စားချင်တဲ့ဟာ မကျွေးနိုင်တော့ စိတ်တိုပြီးတော့ ကလေးကို အော်မိတယ်။ မိသားစုတွေနဲ့ အိမ်ထောင်ရေးလည်း စကားများရန်ဖြစ် စားဝတ်နေရေး အဆင်မပြေတဲ့ အခါကြတော့လေ။ ငွေရေးကြေးရေး နဲ့ စကားပြောရင်းနဲ့ စကားများ တစ်ယောက်နဲ့ တစ်ယောက် ပြန်အော်ကြတာပေါ့ အဲ့လိုမျိုး” ဟု ပြောသည်။ ကရင်နီလူ့အခွင့်အရေးအဖွဲ့ (KnHRG) ၏ ယခုလ နိုဝင်ဘာ ၅ ရက်နေ့ ထုတ်ပြန်ချက်တွင် ဖော်ပြထားသည်မှာ ကရင်နီပြည် တစ်ခုလုံး၌ လူဦးရေ သုံးသိန်းဝန်းကျင်ရှိသည့်အနက် ပြည်သူ နှစ်သိန်းကျော် (၂၀၀,၀၀၀ ကျော်) မှာ စစ်ရှောင်နေရကြောင်း ဖော်ပြထားသည်။ လက်ရှိတွင် စစ်ကော်မရှင်၏ အကြမ်းဖက်မှုများနှင့် လေကြောင်းတိုက်ခိုက်မှုများကြောင့် ကရင်နီပြည်တွင်းရှိ စစ်ဘေးရှောင် နှစ်သိန်းကျော်ကို အကူအညီပေးနိုင်ရန်အတွက် အရေးပေါ်လိုအပ်နေသည်ဟုဆိုသည်။ ထို့ကြောင့် အဆိုပါ စစ်ရှောင်များအတွက် စားနပ်ရိက္ခာနှင့် အမိုးအကာများ ရရှိရေး နိုင်ငံတကာအသိုင်းအဝိုင်း ထံမှ ငွေကြေးနှင့် အရင်းအမြစ်များ ဆက်လက်ရရှိရန် KnHRG က တောင်းဆိုထားသည်။

ဓာတ်ပုံ - ကရင်နီပြည် စစ်ဘေးရှောင် ကူညီစောင့်ရှောက်ရေး ကွန်ရက် (ပုံဟောင်း)  

ကရင်နီ စစ်ရှောင်များအတွင်း စိတ်ဖိစီးမှုကြောင့် မိသားစုပဋိပက္ခများ မြင့်တက်လာ

ကရင်နီ စစ်ရှောင်များအတွင်း စိတ်ဖိစီးမှုကြောင့် မိသားစုပဋိပက္ခများ မြင့်တက်လာ သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၆ ရက်။  ကရင်န…

  • November 6, 2025
သူခိုးကြီးည ကြက်ခိုးသူ PPP ပါတီ အမတ်လောင်း၏ ရိုက်သတ်ခြင်းခံရ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၆ ရက်။ ၏ ပြည်သူ့ ရှေ့ဆောင်ပါတီ PPP အမတ်လောင်းနှင့် သားဖြစ်သူ၏ ရိုက်နှက်မှုကြောင့် 'သူခိုးကြီးည' အပျော်သဘောမှ လူသတ်မှုတစ်ခု ဖြစ်ခဲ့သည်။ ရှမ်းပြည် တောင်ပိုင်း၊ တောင်ကြီးမြို့နယ်၊ အေးသာယာမြို့တွင် မြန်မာ့ရိုးရာ 'သူခိုးကြီးည' အပျော်သဘောကနေ လူသတ်မှုအဖြစ် ပြောင်းလဲသွားသည့် ရာဇဝတ်မှုတစ်ခု ဖြစ်ပွားခဲ့ပြီး၊ ပြည်သူ့ရှေ့ဆောင်ပါတီ (PPP) မှ အမတ်လောင်းတစ်ဦး ပါဝင်ပတ်သက်ခဲ့သည့်အတွက် ဒေသခံလူထုကြားတွင် ဝေဖန်မှုများ မြင့်တက်နေသည်။ နိုဝင်ဘာလ ၅ ရက်နေ့၊ နံနက် ၂ နာရီခွဲခန့်က အေးသာယာမြို့၊ ရပ်ကွက် (၁)၊ နယ်မြေ (၁) တွင် ဖြစ်ပွားခဲ့ခြင်း ဖြစ်သည်။ အဆိုပါ ရပ်ကွက်တွင် နေထိုင်သည့် လော်တာ (ခေါ်) စိုင်းထွန်းဆာ ဆိုသူသည် PPP ပါတီ၏ ပြည်နယ်လွှတ်တော် ကိုယ်စားလှယ်လောင်း စိုင်းရွှေထီး၏ ခြံဝင်းအတွင်း ဝင်ရောက်ကာ ကြက်တစ်ကောင် ခိုးယူခဲ့ရာမှ အမတ်လောင်းနှင့် ၎င်း၏သားဖြစ်သူ စိုင်းကျော်စိုးမိုး တို့၏ ဝိုင်းဝန်းရိုက်နှက်ခြင်းကို ခံခဲ့ရသည်။ ရိုက်နှက်မှုကြောင့် စိုင်းထွန်းဆာသည် နေအိမ်ရှေ့ ကွန်ကရစ်ခင်းထားသည့် ရေမြောင်းပေါ်တွင် ပွဲချင်းပြီး သေဆုံးခဲ့ရကြောင်း မျက်မြင်ဒေသခံအချို့က ဆိုသည်။ အဆိုပါဖြစ်စဉ်သည် မြန်မာ့ရိုးရာဓလေ့အရ တန်ဆောင်မုန်းလပြည့်ညတွင် အပျော်သဘော ခိုးယူခြင်းသာဖြစ်ပြီး သေဆုံးသူနှင့် အမတ်လောင်းတို့မှာ အပြင်တွင် သိကျွမ်းရင်းနှီးသည့် ဆက်ဆံရေးရှိသည်ဟု နီးစပ်သူများက ပြောသည်။ အေးသာယာမြို့နယ်အတွင်း PPP ပါတီနှင့် နီးစပ်သူ တစ်ဦးက “အပျော်သဘောနဲ့ ကြက်ဝင်ခိုးတာပါ။ ကြက်က လည်း တစ်ကောင်တည်းပါ။ စီးပွားဖြစ်ခိုးတာလည်း မဟုတ်ပါဘူး။ ခိုးတဲ့သူနဲ့လည်း အပြင်မှာ သိနေခင်နေတဲ့ ဆက်ဆံရေးမျိုးပါ။ ဘာကြောင့်မို့ သေတဲ့အထိ ရိုက်လဲဆိုတာတော့ မပြောတတ်ပါဘူး” ဟု ရှင်းပြသည်။ PPP ပါတီမှ ပြည်နယ်လွှတ်တော် ကိုယ်စားလှယ်အဖြစ် ဝင်ရောက်ယှဉ်ပြိုင်ရန် မှတ်ပုံတင်ထားသည့် စိုင်းရွှေထီး၏ ရာဇဝတ်မှု ကျူးလွန်ပုံအပေါ် ဒေသခံများက ပြင်းပြင်းထန်ထန် ဝေဖန်လျက်ရှိပြီး၊ ၎င်း၏ ကိုယ်ကျင့်တရားနှင့် ဒေါသထိန်းသိမ်းနိုင်မှု အပေါ် မေးခွန်းထုတ်နေကြသည်။ အေးသာယာမြို့၊ ရပ်ကွက် ၁ အတွင်း နေထိုင်သည့် အမျိုးသား တစ်ဦးကလည်း “အပျော်တမ်းခိုးတာကို ဒီလောက် လုပ်စရာ မလိုဘူး ထင်တာပဲ။ ခေါင်းဆောင် ဖြစ်လာရင်တော့ ဒေါသထိန်းရမှာပဲ။ အာဏာ မရသေး တာတောင် ဒီလောက်သောင်းကျန်းနေတာ။ အာဏာသာရရင် မတွေးရဲစရာပဲ။ ရပ်ကွက်ထဲမှာတော့ PPP ပါတီ မဲမပေးရဲတော့ဘူး ပြောနေကြတယ်” ဟု ၎င်း၏ အမြင်ကို ပြောဆိုသည်။ လက်ရှိတွင် ပြစ်မှုကျူးလွန်သူ နှစ်ဦးကို အေးသာယာမြို့၊ နယ်မြေရဲစခန်း၌ ထိန်းသိမ်းထားပြီး (ပ) အမှတ် ၇၁၊ ၂၀၂၅၊ ပုဒ်မ ၃၀၂ (လူသတ်မှု)/ ၁၁၄ (ပူးပေါင်းပါဝင်မှု) ဖြင့် အမှုဖွင့်ထားကာ ဆက်လက် တရားစွဲဆိုသွားမည် ဖြစ်ကြောင်း သတင်းရရှိသည်။  

သူခိုးကြီးည ကြက်ခိုးသူ PPP ပါတီ အမတ်လောင်း၏ ရိုက်သတ်ခြင်းခံရ

သူခိုးကြီးည ကြက်ခိုးသူ PPP ပါတီ အမတ်လောင်း၏ ရိုက်သတ်ခြင်းခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၆ ရက်။ ၏ ပြည်သူ့ ရှေ့ဆောင်ပါတီ PPP…

  • November 6, 2025
ပေါက်မြို့နယ်တွင် စစ်ကောင်စီ စစ်ကြောင်းထိုးမှုကြောင့် အရပ်သား ၁၂,၀၀၀ ကျော် ထွက်ပြေးတိမ်းရှောင်နေရ သတင်းနှင့်မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၅ ရက်။ မကွေးတိုင်း၊ ပေါက်မြို့နယ်တွင် စစ်ကော်မရှင်တပ်၏ စစ်ကြောင်းထိုးမှုနှင့် ကျေးရွာများအား မီးရှို့မှုများ ကြောင့် အရပ်သား ၁၂,၀၀၀ ကျော် ထွက်ပြေးတိမ်းရှောင်နေကြရသည်။ ပေါက်မြို့နယ်တွင် စစ်ကော်မရှင်တပ်၏ ထိုးစစ်များကြောင့် ဒေသခံပြည်သူ ၁၂,၀၀၀ ကျော်သည် ဘေးလွတ်ရာ တောတောင်များသို့ ထွက်ပြေးတိမ်းရှောင်နေကြရကြောင်း ပေါက်မြို့နယ် ပြည်သူ့အုပ်ချုပ်ရေးအဖွဲ့ (ပအဖ) လူသားချင်းစာနာဌာနက နိုဝင်ဘာ ၄ ရက်နေ့တွင် ထုတ်ပြန်ခဲ့သည်။ နိုဝင်ဘာလ ၃ ရက်နေ့မှ စတင်၍ ဆိပ်ဖြူအခြေစိုက် ကပစ (၂၂) လက်နက်စက်ရုံမှ စစ်သား ၅၀၀ နီးပါးသည် ပျူစောထီးများနှင့် ပူးပေါင်းကာ စစ်ကြောင်း ၃ ကြောင်းခွဲ၍ ပေါက်မြို့နယ်အတွင်း ထိုးစစ်ဆင်ခဲ့သည်။ အဆိုပါ စစ်ကြောင်းကြောင့် ကျေးရွာပေါင်း ၁၉ ရွာမှ အိမ်ထောင်စု ၃,၀၀၀ ကျော် နေရပ်စွန့်ခွာ ထွက်ပြေးခဲ့ရ ခြင်း ဖြစ်သည်။ ပေါက်မြို့နယ် ပအဖနှင့် နီးစပ်သူတစ်ဦးက “တနင်္လာနေ့ကဆိုရင် မြို့ရဲ့ အရှေ့ပိုင်းက အုန်းတောတောင်စုက နေအိမ်တွေ မီးရှို့ခံရတယ်လို့ ဒေသခံတွေဆီက သတင်းရထားပါတယ်” ဟု အတည်ပြုသည်။ ထို့အပြင် စစ်ကော်မရှင်တပ်သည် ရွာထဲဝင်ရောက်လာပြီး အရပ်သားပြည်သူပိုင် နေအိမ်များကို မီးရှို့ဖျက်ဆီး မှုများကို ဆက်တိုက် လုပ်ဆောင်နေကြောင်း ပေါက်မြို့နယ် (ပအဖ) ၏ ထုတ်ပြန်ချက်တွင် ဖော်ပြထားသည်။ မြေပြင် စစ်ရေးအခြေအနေကို သိသူ တစ်ဦးက “စစ်ကော်မရှင်တပ်ဟာ တော်လှန်ရေးတပ်ဖွဲ့တွေ အားကောင်း တဲ့ ပေါက်မြို့နယ် တောင်၊ မြောက်နဲ့ အနောက်ဘက်ခြမ်းက အရေးပါတဲ့ဒေသတွေကို ထိန်းချုပ်ဖို့ ကြိုးပမ်းနေ တာဖြစ်ပြီး စစ်မျက်နှာအသစ်ဖွင့်ဖို့ ရည်ရွယ်ပုံရတယ်” ဟု သုံးသပ်သည်။ လက်ရှိတွင် ထွက်ပြေး တိမ်းရှောင်နေရသည့် စစ်ဘေးရှောင်ပြည်သူ ၁၂,၀၀၀ ကျော်အတွက် အစားအသောက်၊ ဆေးဝါးနှင့် အမိုးအကာ စသည့် လူသားချင်းစာနာမှု အကူအညီများ အရေးတကြီး လိုအပ်နေကြောင်း ပေါက်မြို့ နယ် (ပအဖ) လူသားချင်းစာနာဌာနက မေတ္တာရပ်ခံထားသည်။

ပေါက်မြို့နယ်တွင် စစ်ကောင်စီ စစ်ကြောင်းထိုးမှုကြောင့် အရပ်သား ၁၂,၀၀၀ ကျော် ထွက်ပြေးတိမ်းရှောင်နေရ

ပေါက်မြို့နယ်တွင် စစ်ကောင်စီ စစ်ကြောင်းထိုးမှုကြောင့် အရပ်သား ၁၂,၀၀၀ ကျော် ထွက်ပြေးတိမ်းရှောင်နေရ သတင်းနှင့်မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၅…

  • November 5, 2025
×Close