သတင်း

ဝန်ကြီးချုပ်ကို အပြစ်ရှိကြောင်း ထိုင်း တရားရုံး ဆုံးဖြတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၉ ရက်။ ထိုင်းဝန်ကြီးချုပ် ပေထုန်တန် ရှီနာဝပ် (Paetontarn Shinawatra) ကို ဖွဲ့စည်းပုံ အခြေခံ ဥပဒေ ခုံရုံးက ကမ္ဘောဒီးယား ဝန်ကြီးချုပ်ဟောင်း ဟွန်ဆင်နဲ့ စကားပြောရာမှာ အခြေခံ ဥပဒေကို ဖောက်ဖျက်ခဲ့မှုရှိခဲ့တယ်လို့ ဆုံးဖြတ်လိုက်ပါတယ်။ ဒါကြောင့် ထိုင်းဝန်ကြီးချုပ် ဖြစ်ခဲ့တဲ့ ပေထုန်တန် ဟာ ဝန်ကြီးချုပ် တာဝန်ကို လက်လွှတ်ရတော့မှာ ဖြစ်ပါတယ်။ တရားရုံးက ကမ္ဘောဒီးယား အထက်လွှတ်တော် ဥက္ကဌ ဟွန်ဆန်နဲ့ စကားပြောရာမှာ ပေထုန်တန်က အမှတ်နှစ် တပ်မတော် တပ်မှူး ဗိုလ်ချုပ် ဘွန်းဆင် ပက်ကလန် (Boonsin Padklang) ဟာ သူ့ရဲ့ ဆန့်ကျင်ဘက် မှာ ရှိတယ်လို့ ပြောကြားခြင်းဟာ ထိုင်းပြည်တွင်း နိုင်ငံရေး အားနည်းချက်ကို ထုတ်ဖော်လိုက်တာ ဖြစ်တယ်လို့ ကောက်ချက်ချပါတယ်။ တရားရုံးက ဝန်ကြီးချုပ် အနေနဲ့ အတိအကျ ဖော်ပြခြင်းမရှိပဲ ဟွန်ဆင်ဘက်က တောင်းဆိုချက်တွေကို လိုက်လျောမယ်လို့ ပြောဆိုချက်ဟာလည်း “အမျိုးသားလုံခြုံရေး” ကို ထည့်သွင်းစဉ်းစားမှု မပြုပဲ နိုင်ငံ အကျိုးစီးပွားထက် သူ့ရဲ့ အကျိုးစီးပွားကို ရှေ့တန်း တင်လိုက်တာ ဖြစ်တယ်လို့ သုံးသပ်ပါတယ်။

ဝန်ကြီးချုပ်ကို အပြစ်ရှိကြောင်း ထိုင်း တရားရုံး ဆုံးဖြတ်

ဝန်ကြီးချုပ်ကို အပြစ်ရှိကြောင်း ထိုင်း တရားရုံး ဆုံးဖြတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၉ ရက်။  ထိုင်းဝန်ကြီးချုပ် ပေထုန်တန် ရှီ…

  • August 29, 2025
ပေါင်းလောင်းတွင် တောင်ကျရေကြောင့် မြေပြိုမှုထဲ နှစ်ဦးသေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။   ရှမ်းပြည်တောင်ပိုင်း၊ ပင် လောင်းမြို့နယ်ထဲက ပေါင်းလောင်းမြို့သစ်၊ သပြေကုန်းအုပ်စုရှိ ဧဒင်ကျေးရွာတွင် တောင်ကျရေနှင့် မြေပြိုမှုများကြောင့် လူသေဆုံးမှုရှိခဲ့သည်။   မိုးသည်းထန်စွာ ရွာသွန်းပြီး နေအိမ်များအပေါ် မြေပြိုမှုများ ဖြစ်ပွားခဲ့သည်ဟု ဒေသခံများက ပြောသည်။   ဒေသခံအမျိုးသား တစ်ဦးက “သေဆုံးက နှစ်ယောက်ပါ။ အမျိုးသမီးတစ်ယောက်နဲ့ အမျိုးသားတစ်ယောက် သေဆုံးပါ။ ရွာထဲ တောင်ကျရေ ရုတ်တရက် ဝင်လာပြီး အခုလို သေဆုံးတဲ့အထိ ဖြစ်သွားတာပါ။ အိမ်တွေ လည်း တော်တော်လေး ပျက်သွား ပါတယ်” ဟု ပြောသည်။   ဩဂုတ်လ ၂၇ ရက်နေ့၊ နံနက်အစောပိုင်း အချိန်၌ ဧဒင်ကျေးရွာထဲ တောင်ကျရေများ ရုတ်တရက် စီးဝင်လာပြီး ယခုကဲ့သို့ လူသေဆုံးမှုအထိ ရေကြီးရေလျှံ မြေပြိုမှုများ ဖြစ်ခဲ့ခြင်း ဖြစ်သည်ဟု  ဒေသတွင်း အကူအညီ ပေးနေ သူများက ပြောသည်။   တောင်ကျရေကြောင့် မြေများ ပြိုကျပြီး အသက် ၆၀ အရွယ် အမျိုးသမီးတစ်ဦးနှင့် အသက် ၂၀ အရွယ် အမျိုးသားတစ်ဦး မျှောပါပြီး သေဆုံးခဲ့ခြင်း ဖြစ်သည်။   သေဆုံးသွားသည့် အမျိုးသမီးမှာမူ နေအိမ်ထဲတွင် ပိမိနေခြင်းဖြစ်ပြီး အမျိုးသားမှာမူ သစ်ပင်ကြားတွင် ညှပ်ပြီး သေဆုံးနေခြင်း ဖြစ်သည်။   အဆိုပါ ဖြစ်စဉ်အတွင်း အမျိုးသမီးနှစ်ဦးလည်း ထိခိုက်ဒဏ်ရာ ရရှိခဲ့သည်ဟု ဒေသတွင်း အကူအညီ ပေးနေသူ များက ပြောသည်။   ဒေသတွင်း မိုးကြီးပြီး တောင်ကျရေကြောင့် မြေပြိုကာ တောင်စောင်းတလျှောက်ရှိ အိမ် ၁၀ လုံးလည်း ပျက်စီး သွားသည်။   ထို့အပြင် ပေါင်းလောင်းဘက်ကိုသွားသည့် လမ်းမှာလည်း တောင်ပြို၊ မြေပြိုမှုများကြောင့် ယခုအချိန်ထိ သွား လာ၍ မရသေးဘူးဟု ဒေသခံများက ပြောသည်။   ပေါင်းလောင်းဒေသ၌ ဩဂုတ်လ ၂၆ ရက်နေ့က ကာဂျိကိ မုန်တိုင်းအရှိန်ကြောင့် မိုးသည်းထန်စွာ ရွာသွန်းခဲ့ခြင်း ဖြစ်သည်။

ပေါင်းလောင်းတွင် တောင်ကျရေကြောင့် မြေပြိုမှုထဲ နှစ်ဦးသေဆုံး

သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။ ရှမ်းပြည်တောင်ပိုင်း၊ ပင် လောင်းမြို့နယ်ထဲက ပေါင်းလောင်းမြို့သစ်၊ သပြေကုန်းအုပ်စုရှိ ဧဒင်…

  • August 28, 2025
မြောက်ဦး လေကြောင်းတိုက်ခိုက်ခံရမှု ၂ ဦး ထပ်မံသေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။   အာရက္ခတပ်တော် AA က ထိန်းချုပ်ထားသည့် မြောက်ဦးမြို့၊ ဒိုင်းကျီရပ်ကွက် လေကြောင်းတိုက်ခိုက်ခံရမှု ကြောင့် ဒဏ်ရာ ရရှိထားသူများအနက် နှစ်ဦး ထပ်မံသေဆုံးသွားသည်။   လေကြောင်း ဗုံးကြဲတိုက်ခိုက်မှုကြောင့် ဒဏ်ရာရထားသူများအနက် ကလေးငယ်တစ်ဦးနှင့် အမျိုးသမီး တစ်ဦး ထပ်မံ သေဆုံးခဲ့ခြင်း ဖြစ်သည်။   “ဒဏ်ရာ ပြင်းပြင်းထန်ထန် ရထားတာလို့ ပြောပါတယ်။ ၅ နှစ်အရွယ် ကောင်လေးကတော့ ခေါင်းမှာ ထိထား တာပါ။ မအေးစန္ဒာဆိုတဲ့ အမျိုးသမီးကလည်း တစ်ကိုယ်လုံး ရစရာမရှိအောင် ထိထားတာ။ ဆေးကုသနေရင်း သေဆုံးသွားတာပါ” ဟု မြောက်ဦးဒေသခံတစ်ဦးက ပြောသည်။   ဩဂုတ်လ ၂၆ ရက်နေ့ ညနေပိုင်းတွင် သေဆုံးသွားခြင်း ဖြစ်သည်ဟု ဒေသခံများက ပြောသည်။   စစ်ကော်မရှင်တပ်က မြောက်ဦးမြို့ကို ဩဂုတ်လ ၂၅ ရက်နေ့၊ ည ၁၁ နာရီကျော်အချိန်ခန့်တွင် လေကြောင်းမှ ပေါင် ၅၀၀ ဗုံး နှစ်လုံးကြဲခဲ့ခြင်း ဖြစ်သည်။   အဆိုပါ ဖြစ်စဉ်ထဲ ကလေးများ အပါအဝင် ပြည်သူ ၁၂ ဦး သေဆုံးခဲ့ပြီး အယောက် ၂၀ ထိမှန် ဒဏ်ရာ ရခဲ့သည်ဟု အာရက္ခတပ်တော် AA က ထုတ်ပြန်ထားသည်။   ထိမှန်ဒဏ်ရာ ရထားသူများအနက် နှစ်ဦး ထပ်မံသေဆုံးသွားသည့်အတွက် မြောက်ဦးမြို့ လေကြောင်း ဗုံးကြဲ တိုက်ခိုက်ခံရမှုထဲ သေဆုံးသူ ၁၄ ဦး ရှိသွားပြီ ဖြစ်သည်။   ၂၀၂၅ ခုနှစ်အတွင်း ရခိုင်ပြည်အတွင်းရှိ ကျောက်တော်၊ ရသေ့တောင်၊ မြောက်ဦး၊ ရမ်းဗြဲမြို့နယ်တို့ထဲ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှုများ လုပ်ခဲ့ရာ အပြစ်မဲ့ပြည်သူ ၈၆ ဦး သေဆုံးခဲ့သည်ဟု အာရက္ခတပ်တော် ULA/AA ၏ စာရင်းများအရ သိရသည်။

မြောက်ဦး လေကြောင်းတိုက်ခိုက်ခံရမှု ၂ ဦး ထပ်မံသေဆုံး

မြောက်ဦး လေကြောင်းတိုက်ခိုက်ခံရမှု ၂ ဦး ထပ်မံသေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၈ ရက်။ အာရက္ခတပ်တော် AA က ထိန်းချုပ်ထားသည့် မ…

  • August 28, 2025
ဝက်လက်ကို စစ်ကော်မရှင် ဗုံးကြဲ၊ အရပ်သား ၄ ဦးသေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။   စစ်ကိုင်းတိုင်း၊ ဝက်လက်မြို့နယ် အရှေ့တောင်ခြမ်းက ရုံပင်ကုန်းကျေးရွာ ပတ်ဝန်းကျင်ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ပြည်သူ ၄ ဦး သေဆုံးခဲ့သည်။   ဩဂုတ်လ ၂၇ ရက်နေ့ ညနေပိုင်းတွင် ဂျက်ဖိုက်တာနှင့် ၄ ကြိမ် ပစ်ခတ်ဗုံးကြဲခဲ့ခြင်း ဖြစ်သည်ဟု Wetlet Informational Network က ထုတ်ပြန်သည်။   ဒေသခံတစ်ဦးက “ရုံပင်ကုန်းရွာ အနီးတဝိုက်ကို တံတားဦးကနေ တက်လာတဲ့ ဂျက်ဖိုက်တာနဲ့ ကြဲသွားတာပါ။ ညနေ ၅ နာရီကျော်လောက်မှာ ၄ - ၅ ကြိမ်လောက် ဆက်တိုက် ကြဲသွားတာဗျ။ အမျိုးသား ၃ ယောက်၊ အမျိုးသမီး တစ်ယောက် သေသွားတယ်။ အမျိုးသမီးက အသက် ၅၀ လောက်ရှိပြီ။ ဒဏ်ရာရတဲ့လူတွေလည်း ရှိတယ်။ ၆ ယောက်ထင်တယ် ဒဏ်ရာ ရသွားတာကလေ” ဟု ပြောသည်။   စစ်ကော်မရှင်တပ်၏ လေကြောင်း ဗုံးကြဲတိုက်ခိုက်မှုထဲ အမျိုးသမီးတစ်ဦး အပါအဝင် ပြည်သူ ၄ ဦး သေဆုံးခဲ့ပြီး ၆ ဦး ဒဏ်ရာ ရခဲ့သည်။   ဝက်လက်မြို့နယ်ထဲက ရုံပင်ကုန်းကျေးရွာကို လေကြောင်းမှ ဗုံးကြဲတိုက်ခိုက်ပြီးနောက် မတ္တရာမြို့ပေါ်မှပါ လက်နက်ကြီးများနှင့် အဆက်မပြတ် ပြန်လည် ပစ်ခတ်ခဲ့သေးသည်ဟု ဒေသခံများက ပြောသည်။   မြေပြင်တွင် တိုက်ပွဲဖြစ်ပွားခြင်းမျိုး မရှိဘဲ စစ်ကော်မရှင်တပ်က ရုံးပင်ကုန်းကျေးရွာကို လေကြောင်းမှ တိုက်ခိုက်ခဲ့ခြင်း ဖြစ်ပြီး ဟောင်ဝှစ်ဇာ လက်နက်ကြီးများနှင့်ပါ အဆက်မပြတ် ပစ်ခတ်ခဲ့ခြင်း ဖြစ်သည်။

ဝက်လက်ကို စစ်ကော်မရှင် ဗုံးကြဲ၊ အရပ်သား ၄ ဦးသေဆုံး

ဝက်လက်ကို စစ်ကော်မရှင် ဗုံးကြဲ၊ အရပ်သား ၄ ဦးသေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၈ ရက်။ စစ်ကိုင်းတိုင်း၊ ဝက်လက်မြို့နယ် အရှေ့တေ…

  • August 28, 2025
ကျောက်မဲတွင် တိုက်ပွဲပြင်းထန်နေ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။   စစ်ကော်မရှင်တပ်က ရှမ်းမြောက်ရှိ ကျောက်မဲမြို့ကို ပြန်လည်ရရှိရေး မြေပြင်ထိုးစစ်အပြင် လေကြောင်းမှပါ ဗုံးကြဲတိုက်ခိုက်မှုများ ဆက်လုပ်နေသောကြောင့် ယနေ့အချိန်ထိ နှစ်ဖက်ကြား တိုက်ပွဲများ ပြင်းထန်စွာ ဖြစ်ပွားနေသည်။   ကျောက်မဲမြို့နယ်၊ နောင်ပိန်ကျေးရွာတွင် ဩဂုတ်လ ၂၈ ရက်နေ့အထိ တိုက်ပွဲများ ပြင်းထန်နေပြီး စစ်ကော်မရှင် တပ်က လေကြောင်းကနေပါ ဆက်တိုက် ဗုံးကြဲနေသည်ဟု မြေပြင် သတင်းအရင်းအမြစ်များက ပြောသည်။   မြေပြင် သတင်းအရင်းအမြစ် တစ်ဦးက “နောင်ပိန်မှာက တိုက်ပွဲ ဆက်ဖြစ်နေတယ်။ လေယာဉ်လည်း လာ တယ်။ မနေ့က Y-12 လာတယ်။ ဒီလေကြောင်း တိုက်ခိုက်မှုထဲမှာတော့ အသေအဆုံးမရှိဘူး။ ၂၅ ရက်နေ့ တုန်း ကတော့ ထိခိုက်တာတွေ ရှိခဲ့တယ်။ ကိုရင် ၃ ပါး ဒဏ်ရာရတယ်။ အရပ်သားတစ်ယောက် ဒဏ်ရာရတယ်။ ဒီရက်ပိုင်းက ဆက်တိုက်ပဲ ဖြစ်နေတာ” ဟု ပြောသည်။   ဩဂုတ်လ ၂၇ ရက်နေ့ကလည်း Y-12 လေယာဉ်နှင့် နောင်ပိန်ကျေးရွာ အုပ်စုထဲ ဗုံးကြဲတိုက်ခိုက်မှုများ လုပ်ခဲ့သည်ဟု ဆိုသည်။   ထို့အပြင် အသေခံ ဒရုန်းများ အသုံးပြုပြီး ဆက်တိုက် ဗုံးကြဲတိုက်ခိုက်နေသည်ဟု ကျောက်မဲမြို့၏ စစ်ရေးအခြေအနေကို စောင့်ကြည့်နေသည့် မြေပြင် သတင်းအရင်းအမြစ်များက ဆိုသည်။   နောင်ပိန်ကျေးရွာ အုပ်စုထဲက နေရာ အများစုကို သိမ်းပိုက်ထားသည့် စစ်ကော်မရှင်တပ်က ကားလမ်ကြီးကိုပါ ထိန်းချုပ်နိုင်ရေး မြေပြင်၊ လေယာဉ်အပြင် ဒရုန်းတို့ကို သုံးပြီး ထိုးစစ်ဆင်နေခြင်း ဖြစ်သည်။   နောင်ချိုမြို့ကို ထိန်းချုပ်ပြီးနောက် စစ်ကော်မရှင်တပ်သည် ကျောက်မဲမြို့နှင့် နောင်ချို-မိုးကုတ်လမ်းမ နေရာတို့ကို အင်အားအလုံးအရင်းဖြင့် ထိုးစစ်ဆင်တိုက်ခိုက်နေပြီး တိုက်ပွဲများ ပြင်းထန်နေခြင်း ဖြစ်သည်။

ကျောက်မဲတွင် တိုက်ပွဲပြင်းထန်နေ 

ကျောက်မဲတွင် တိုက်ပွဲပြင်းထန်နေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၈ ရက်။ စစ်ကော်မရှင်တပ်က ရှမ်းမြောက်ရှိ ကျောက်မဲမြို့ကို ပြန်လည်ရရ…

  • August 28, 2025
ရုပ်ဝတ္ထုပစ္စည်း တစ်ခုလို လေလံပစ်ခံရတဲ့ ကြောင်ကလေး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။   ဒီတခါတော့ “Coal Ball” (မီးသွေးလုံး) လို့ လူအများက နာမည်ပေးထားတဲ့ ကြောင်လေး အကြောင်း ပြောပြ မှာပါ။   မီးသွေးလုံး ဆိုတဲ့ ကြောင်လေးက အသက် သုံးနှစ် အရွယ် တရုတ် လီဟွာ အမျိုးအစား ကြောင်လေး ဖြစ်ပါ တယ်။   ဩဂုတ်လ ၂၃ ရက်နေ့ကတော့ သူ့ကို တရုတ်နိုင်ငံ အရှေ့ပိုင်းမှာရှိတဲ့ ဘဏ်တစ်ခုက လေလံပစ်တဲ့ ပွဲမှာ တခြား ပစ္စည်းတွေနည်းတူ လေလံ ပစ္စည်းတစ်ခု အနေနဲ့ လေလံ ပစ်ခဲ့တာပါ။   ကြောင်ကလေးရဲ့ ပိုင်ရှင်က ဘဏ်ကို အကြွေးပေးစရာ ရှိတာတွေ မပေးနိုင်လို့ မီးသွေးလုံးလေးကို ပိုင်ရှင်ရဲ့ ပိုင်ဆိုင်မှု ထဲက တစ်ခု အဖြစ် ဘဏ်က သိမ်းယူ ထားခဲ့တာပါ။   သူ့ကို ဒေါ်လာ ၁၀၀ နဲ့ တန်ဖိုး ဖြတ်ပြီး အကြွေးရဲ့ အစိတ်အပိုင်း ငယ်တစ်ခု အဖြစ် သိမ်းယူခဲ့တာ ဖြစ်ပါတယ်။   ကြောင်ကလေး “မီးသွေးလုံး” ကြောင့် အဲဒီ လေလံပွဲကို လူတွေ စိတ်ဝင်စားသွားကြပြီး အွန်လိုင်း လေလံပွဲကို ဝင်ရောက်ကြည့်ရှုသူ ၄၅၀,၀၀၀ ကျော်သွားခဲ့ပါတယ်။   ကြောင်လေးကိုလည်း လိုချင်သူတွေ များသွားပြီး ကြိုတင်စပေါ်ငွေ ယွမ် ၅၀ စီ ပေးထားတဲ့ ဝယ်ယူလိုသူက ၅၀၀၀ ရှိခဲ့ပါတယ်။   ကြောင်ကလေးကို လေလံပစ်တဲ့ သတင်းက လူအများကြားမှာ ပြန့်နှံ့သွားပြီး နောက်ဆုံးမှာ တရားရုံးက သိသွားပြီးတဲ့နောက် ကြောင်ကလေးကို ပစ္စည်းတစ်ခုအနေနဲ့ လေလံ ပစ်တာကို တရားရုံး အမိန့်နဲ့ ဖျက်သိမ်း ခဲ့ပါတယ်။   နောက်ဆုံးမှာတော့ ကြောင်ကလေးကို လူတစ်ယောက်က တာဝန်ခံပြီး မွေးစားဖို့ ခေါ်သွားခဲ့တယ်လို့ Hongxing (ဟောင်ဇင်း) သတင်းဌာနက ဖော်ပြပါတယ်။   သူ့ကို လိုချင်လို့ စဘော်ငွေ ပေးထားသူတွေကိုတော့ လေလံပွဲက ငွေပြန်အမ်းပေးခဲ့တယ်လို့ ဆိုပါတယ်။

ရုပ်ဝတ္ထုပစ္စည်း တစ်ခုလို လေလံပစ်ခံရတဲ့ ကြောင်ကလေး 

ရုပ်ဝတ္ထုပစ္စည်း တစ်ခုလို လေလံပစ်ခံရတဲ့ ကြောင်ကလေး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၈ ရက်။  ဒီတခါတော့ “Coal Ball” (မီးသွေးလုံး) လိ…

  • August 28, 2025
တရုတ်သုတေသန ပညာရှင်ကို သူလျှိုမှုဖြင့် အမေရိကန် ဖမ်းဆီး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။   တရုတ် သုတေသန ပညာရှင် တစ်ဦးကို အမေရိကန် က သူလျှိုလုပ်သည်ဟု စွပ်စွဲပြီး ဖမ်းဆီးလိုက်သည်။   ဖမ်းဆီးခံခဲ့ရသည့် တရုတ်နိုင်ငံသား ပါရဂူဘွဲ့လွန် ပညာရှင်  Yunhai Li (ယွန်ဟိုင်း လီ) သည် သုတေသန ပညာရှင် ဗီဇာ ဟုခေါ်သည့် ပညာရေး ဗီဇာ အမျိုးအစားဖြင့် အမေရိကန်သို့ လာရောက်ခဲ့ခြင်း ဖြစ်သည်။   ၎င်းကို အမေရိကန် အစိုးရက ထောက်ပံ့ထားသည့် ကျန်းမာရေး အစီရင်ခံစာအား ခိုးယူပြီး တရုတ်ပြည်သို့ ယူဆောင်သွားရန် ကြိုးပမ်းသည်ဟု ဆိုကာ ဖမ်းဆီးခဲ့ခြင်း ဖြစ်သည်။   အသက် ၃၅ နှစ်အရွယ် မစ္စတာ လီ သည် ၂၀၂၂  ခုနှစ်မှ စတင်၍ MD Anderson Cancer Centre တွင်  အလုပ်ဝင်ခဲ့ပြီး အမေရိကန် အမျိုးသား ကျန်းမာရေး သိပ္ပံ နှင့် ကာကွယ်ရေး ဝန်ကြီးဌာနက ငွေကြေး ထောက်ပံ့ထားသည့် သုတေသန စီမံကိန်းတွင် လုပ်ကိုင်ခဲ့သည်။   မစ္စတာလီ က ရင်သားကင်ဆာ ကာကွယ်ဆေး သုတေသန လုပ်ငန်းတွင် Texas ပြည်နယ်အစိုးရ၏ ဝန်ထမ်း တစ်ဦးအဖြစ် တာဝန်ထမ်းဆောင်ခဲ့ခြင်းလည်း ဖြစ်သည်။   မစ္စတာလီသည် ဖက်ဒရယ် အစိုးရက ငွေကြေးထောက်ပံ့ထားသည့် စီမံကိန်းမှ လျို့ဝှက်ဖိုင် ၉၀ Gigabytes ကို ဒေါင်းလုဒ် လုပ်ယူပြီးနောက်ပိုင်း ဇူလိုင်လ ၁ ရက်နေ့တွင် တာဝန်မှ နှုတ်ထွက်သွားခဲ့သည်။   ၎င်းကို အမေရိကန်နိုင်ငံမှ ထွက်ခွာခါနီးတွင် လေဆိပ် အကောက်ခွန်ဌာန၌ ဖမ်းဆီးလိုက်ခြင်း ဖြစ်သည်။   Herris ကောင်တီ ခရိုင် တရားရုံး ရှေ့နေရုံးက စုံစမ်းစစ်ဆေးရေးမှူးများက မစ္စတာလီကို စစ်ဆေးသည့် အခါ ထိရှလွယ်သည့် အချက်အလက်များအား နိုင်ငံ ပြင်ပ ထုတ်ယူသွားရန် ကြိုးပမ်းမှုကို အထောက်အထားများ ရထားသည်ဟု ဆိုသည်။   မစ္စတာလီက အဆိုပါ သုတေသန အချက်အလက်များ အလဟာသ မဖြစ်စေရန် နှင့် တရုတ်ပြည်တွင် ဆက်လက် သုတေသန လုပ်ရန် ယူဆောင်ခဲ့ခြင်း ဖြစ်သည်ဟု စစ်ဆေးသူများကို ပြောသည်။   တရားရုံး မှတ်တမ်းများက မစ္စတာလီသည် တရုတ် အစိုးရ ထိန်းချုပ်ထားသော သိပ္ပံဖောင်ဒေးရှင်းမှ ထောက်ပံ့ငွေများ ရယူနေပြီး အစိုးရနှင့် သက်ဆိုင်သည့် ဆေးရုံမှလည်း လစာငွေကို ရယူနေသည်ဟု ဆိုထားသည်။     ပြစ်မှု ထင်ရှားခဲ့မည် ဆိုပါက တရုတ် သုတေသနမှူးသည် ထောင်ဒဏ် ၁၀ နှစ် အထိ ကျခံရနိုင်သည်။   မစ္စတာလီကို အစောပိုင်းတွင် ပြန်လွှတ်ထားပေးပြီး ဩဂုတ်လ ၂၂ ရက်နေ့တွင် ဒုတိယအကြိမ်ထပ်မံ ဖမ်းဆီးခဲ့ခြင်း ဖြစ်သည်။

တရုတ်သုတေသန ပညာရှင်ကို သူလျှိုမှုဖြင့် အမေရိကန် ဖမ်းဆီး

တရုတ်သုတေသန ပညာရှင်ကို သူလျှိုမှုဖြင့် အမေရိကန် ဖမ်းဆီး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၈ ရက်။ တရုတ် သုတေသန ပညာရှင် တစ်ဦးကို အမေရ…

  • August 28, 2025
ထိုင်း-မြန်မာ နယ်စပ်က ဒုက္ခသည်များကို အလုပ် လုပ်ခွင့်ပေးရေး ထိုင်းအစိုးရက မူအားဖြင့် သဘောတူ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   ထိုင်း-မြန်မာ နယ်စပ်တလျှောက်က မြန်မာဒုက္ခသည်များကို အလုပ်လုပ်ခွင့်ပေးရန် ထိုင်းအစိုးရက မူအားဖြင့် သဘောတူလိုက်သည်။ မြန်မာဒုက္ခသည်များကို ထိုင်းအစိုးရက တရားဝင် လုပ်ကိုင်ခွင့်ပြုမည်ဟု ထုတ်ဖော်ပြောဆိုလာကြောင်း ဒုက္ခသည်အရေး တက်ကြွလှုပ်ရှားသူများက ပြောသည်။   ထိုင်း - မြန်မာနယ်စပ်က ဒုက္ခသည်စခန်း များတွင် နေထိုင်ကြသည့် ဒုက္ခသည်များကို ထိုင်းနိုင်ငံထဲတွင် အလုပ် လုပ်ခွင့်ပြုရေး ဆွေးနွေးမှုနေမှုများနှင့် ပတ်သက်၍ ထိုင်းအစိုးရက မူအားဖြင့် လက်ခံသဘောတူလိုက် ခြင်း ဖြစ်သည်။   သို့သော် အသေးစိတ်အခြေအနေကိုမူ မသိရသေးသလို ဒုက္ခသည်စခန်းများကိုလည်း တရားဝင် အကြောင်း ကြားလာခြင်းမျိုး မရှိသေးဘူးဟု မယ်လဒုက္ခသည်စခန်းက ဒုက္ခသည်အချို့က ပြောသည်။   ယခုကဲ့သို့ ထိုင်းနယ်စပ်က ဒုက္ခသည်စခန်းများတွင် ခိုလှုံနေကြရသည့် မြန်မာဒုက္ခသည်များကို စခန်းအပြင် ထွက်ပြီး တရားဝင် အလုပ်လုပ်ခွင့်ပြုမည် ဆိုသည့်အပေါ် ကုလသမဂ္ဂ ဒုက္ခသည်များ ဆိုင်ရာ အေဂျင်စီ (UNHCR)က ကြိုဆိုလိုက်သည်။   အဆိုပါ ဆုံးဖြတ်ချက်မှာ ကြီးမားသည့် အလှည့်အပြောင်းတစ်ခု ဖြစ်ပြီး ဒုက္ခသည်များကို ထောက်ပံ့ပေး ရုံသာမက ဒေသတွင်း စီးပွားရေးကိုပါ အကျိုးပြုစေမည်ဟု ထိုင်းနိုင်ငံရှိ UNHCR ကိုယ်စားလှယ် က ဆိုသည်။   ဇူလိုင်လကုန်မှ စတင်၍ စားနပ်ရိက္ခာထောက်ပံ့မှုများ ရပ်ဆိုင်းခံလိုက်ရသည့်အတွက် မြန်မာဒုက္ခသည်များမှာ အခက်အခဲ အမျိုးမျိုးနှင့် ရင်ဆိုင်နေရခြင်း ဖြစ်သည်။   ထိုင်း-မြန်မာ နယ်စပ် တလျှောက်တွင် ဒုက္ခသည်စခန်း ၉ ခုရှိပြီး စုစုပေါင်း လူဦးရေ ၁၀၇,၅၀၀ ကျော်ရှိသည်ဟု ဒုက္ခသည်များကို အကူအညီပေးနေသည့် နယ်စပ် အကူအညီပေးရေး ညွှန့်ပေါင်းအဖွဲ့ TBC ၏ စာရင်းများ အရ သိရသည်။

ထိုင်း-မြန်မာ နယ်စပ်က ဒုက္ခသည်များကို အလုပ် လုပ်ခွင့်ပေးရေး ထိုင်းအစိုးရက မူအားဖြင့် သဘောတူ 

ထိုင်း-မြန်မာ နယ်စပ်က ဒုက္ခသည်များကို အလုပ် လုပ်ခွင့်ပေးရေး ထိုင်းအစိုးရက မူအားဖြင့် သဘောတူ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။ …

  • August 28, 2025
×Close