သတင်း

နိုင်ငံတော်လုံခြုံရေးနှင့် အေးချမ်းသာယာရေး ကော်မရှင် ဖွဲ့စည်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၁ ရက်။   အမျိုးသား ကာကွယ်ရေးနှင့် လုံခြုံရေး ကောင်စီက ဇူလိုင်လ ၃၁ ရက်နေ့မှာ နိုင်ငံတော် လုံခြုံရေးနှင့် အေးချမ်း သာယာရေး ကော်မရှင်ကို ဖွဲ့စည်းလိုက်သည်။   အဆိုပါ နိုင်ငံတော် လုံခြုံရေး နှင့် အေးချမ်းသာယာရေး ကော်မရှင်က ဥပဒေပြုရေး၊ အုပ်ချုပ်ရေးနှင့် တရားစီရင် ရေး အာဏာတို့ကို ကျင့်သုံးသွားမည်ဟု ထုတ်ပြန်ထားသည်။   လက်ရှိ ယာယီသမ္မတနှင့် တပ်မတော် ကာကွယ်ရေး ဦးစီးချုပ်ဖြစ်သည့် ဗိုလ်ချုပ်မှူးကြီး မင်းအောင်လှိုင်ကို နိုင်ငံတော် လုံခြုံရေးနှင့် အေးချမ်းသာယာရေး ကော်မရှင်တွင် ဥက္ကဋ္ဌ တာဝန်ပေးထားသည်။   ထို့ကြောင့် ဗိုလ်ချုပ်မှူးကြီး မင်းအောင်လှိုင်မှာ ယာယီသမ္မတ တာဝန်နှင့် ကော်မရှင် ဥက္ကဋ္ဌ ရာထူးတို့ကို ပူးတွဲ တာဝန်ယူသွားမှာ ဖြစ်သည်။   ကော်မရှင်၏ ဒုတိယ ဥက္ကဋ္ဌမှာ ဒုတိယ ဗိုလ်ချုပ်မှူးကြီး စိုးဝင်း ဖြစ်ပြီး ဦးညိုစော၊ ဦးအောင်လင်းဒွေး နှင့် ဗိုလ်ချုပ်ကြီး မောင်မောင်အေးတို့ အပါအဝင် စုစုပေါင်း အဖွဲ့ဝင် ၁၀ ဦးပါဝင်သည်။   အတွင်းရေးမှူးအနေဖြင့် ဗိုလ်ချုပ်ကြီး ရဲဝင်းဦးကို တာဝန်ပေးအပ်ထားသည်။   အဆိုပါ တာဝန်များကို ပေးအပ်သူမှာ ယာယီသမ္မတ အဖြစ် တာဝန်ယူထားသည့် ဗိုလ်ချုပ်မှူးကြီး မင်းအောင်လှိုင် ဖြစ်သည်။   တချိန်ထဲမှာပင် ကာကွယ်ရေး ဦးစီးချုပ်ကို နိုင်ငံတော် အာဏာ လွှဲအပ်ထားသည့် အမိန့်ကိုလည်း ရုတ်သိမ်း လိုက်သည်။   ဆိုလိုသည်မှာ နိုင်ငံတော် စီမံ အုပ်ချုပ်ရေး ကောင်စီကို ဖျက်သိမ်းလိုက်ခြင်း ဖြစ်သည်။   ထို့ကြောင့် ယခု ဖွဲ့စည်းလိုက်သည့် နိုင်ငံတော် လုံခြုံရေးနှင့် အေးချမ်းသာယာရေး ကော်မရှင်က အစိုးရအနေနဲ့ အာဏာသုံးရပ်ကို ကိုင်ပြီး အုပ်ချုပ်သွားမည်ဟု ဖြစ်သည်။   အဖွဲ့ဝင် အယောက် ၃၀ ပါဝင်သည့် အစိုးရ အဖွဲ့ကို ဖွဲ့စည်းကြောင်း ကြေညာလိုက်ခြင်း ဖြစ်သည်။ 
နိုင်ငံတော် ဝန်ကြီးချုပ်မှာမူ ယခုဖွဲ့စည်းလိုက်သည့် နိုင်ငံတော် လုံခြုံရေးနှင့် အေးချမ်းသာယာရေး ကော်မရှင်၌ အဖွဲ့ဝင် အဖြစ်ပါဝင်သည့် ဦးညိုစော ဖြစ်သည်။

နိုင်ငံတော်လုံခြုံရေးနှင့် အေးချမ်းသာယာရေး ကော်မရှင် ဖွဲ့စည်း

နိုင်ငံတော်လုံခြုံရေးနှင့် အေးချမ်းသာယာရေး ကော်မရှင် ဖွဲ့စည်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃၁ ရက်။ အမျိုးသား ကာကွယ်ရေးနှင့် လ…

  • July 31, 2025
မြေမြှုပ်မိုင်းနှင့် ပေါက်ကွဲစေတတ်တဲ့ ပစ္စည်းတွေဟာ ဘယ်လိုနေရာမှာ ရှိနေတတ်ပြီး ဘယ်လိုအန္တရာယ်တွေ ပေးနိုင်သလဲ။ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၁ ရက်။ မြန်မာနိုင်ငံဟာ အင်္ဂလိပ်လက်အောက်က လွတ်လပ်ရေး ရစဉ်ကတည်းက ပြည်တွင်း စစ်စတင်ခဲ့ပါတယ်။ ပြည်တွင်းစစ် ဖြစ်ပွားခဲ့တာ အခုဆိုရင် နှစ်ပေါင်း ၇၀ ကျော်ရှိခဲ့ပါပြီ။ အဓိကက‌တော့ ဒီမိုကရေစီရေး ဆုံးရှုံးမှုတွေ၊ တိုင်းရင်းသား အခွင့်အရေး ဆုံးရှုံးမှုတွေကြောင့် ပြည်တွင်းစစ်ဟာ ကြီးလာလိုက် နည်းနည်းလေး သေးသွားလိုက်နဲ့ ရှိခဲ့ပေမယ့် စစ်ကင်းစင်တဲ့ အချိန်ကတော့ မရှိသလောက်ပါပဲ။ အထူးသဖြင့်တော့ မြန်မာနိုင်ငံရဲ့ တိုင်းရင်းသား ဒေသတွေ ဖြစ်တဲ့ နယ်စပ်ဒေသတွေနဲ့ တောင်ပေါ်ဒေသတွေ ဟာ စစ်ဘေးစစ်ဒဏ် အခံရဆုံး ဖြစ်ပါတယ်။ ၂၀၂၁ ခုနှစ် စစ်အာဏာ သိမ်းချိန်မှာတော့ ပြည်တွင်းစစ်ဟာ တပြည်လုံး တနိုင်ငံလုံးကို ကျယ်ကျယ်ပြန့်ပြန့် ပြန့်နှံ့သွားခဲ့ပါတယ်။ နေပြည်တော်နဲ့ ရန်ကုန်ကလွဲလို့ ရှမ်းပြည်မြောက်ပိုင်း နဲ့ စစ်ကိုင်းတိုင်း အထက်ပိုင်း အပါအဝင် ကျန် ပြည်နယ်နဲ့ တိုင်း အားလုံးမှာ စစ်ပွားတွေ ဖြစ်ပွားနေခဲ့ပါတယ်။ ပြည်တွင်းစစ်အတွင်းမှာ ပြည်သူတွေကို ဒုက္ခပေးတဲ့ အရာတွေ အများအပြား ရှိပေမယ့် ဒုက္ခအပေးဆုံး တစ်ခု ကတော့ မြေမြှုပ်မိုင်းတွေနဲ့ ပေါက်ကွဲစေတတ်တဲ့ စစ်ကျန် ပစ္စည်းတွေ ဖြစ်ပါတယ်။ ဒီအပိုင်းမှာတော့ မြေမြှုပ်မိုင်းနဲ့ ပေါက်ကွဲ စေတတ်တဲ့ ပစ္စည်းတွေက ဘာတွေလည်း ဘယ်လိုနေရာတွေမှာ ရှိတတ်သလဲ ဘယ်လို အန္တရာယ်တွေ ပေးတယ်ဆိုတာကို ပြောပြသွားမှာပါ။ မြေမြှုပ်မိုင်းတွေ ဆိုတာကတော့ ကလေး၊ လူငယ်၊ လူကြီး၊ ကျားမ မရွေး ဘယ်သူ့ကိုမဆို ထိခိုက်ဒဏ်ရာ ရစေသလို ထိခိုက်သေဆုံးစေတဲ့အထိ ဖြစ်စေနိုင်ပါတယ်။ မြေမြှုပ်မိုင်းကို တိုက်ပွဲတွေထဲမှာ တဘက် ရန်သူတွေကို ထိခိုက်သေကြေအောင် ဒဏ်ရာရအောင် လုပ်တဲ့ စစ်လက်နက် ပစ္စည်းတွေ ဖြစ်ပါတယ်။ အဲဒီထဲမှာ Anti-personal (လူသတ် မြေမြုပ်မိုင်း) တွေ ပါသလို၊ မော်တော်ယာဉ်တွေကို ထိခိုက်ပျက်စီးစေဖို့ ပြင်းအားများတဲ့ တင့်ဖျက်မိုင်း၊ ယာဉ်ဖျက်မိုင်း နဲ့ မြေမြှုပ်မိုင်း တွေလည်း ပါဝင်ပါတယ်။ မြေမြှုပ်မိုင်းတွေမှာတော့ ပုံသဏ္ဍာန်၊ အရွယ်အစားနဲ့ အရောင် အမျိုးမျိုး ရှိပါတယ်။ များသောအားဖြင့်တော့ ပတ်ဝန်းကျင်နဲ့ ရောထွေးသွားတဲ့ အရောင်၊ ပုံသဏ္ဍာန်တွေနဲ့ လုပ်ထားတာကြောင့် တွေ့မြင်နိုင်ဖို့ ခက်ခဲပါတယ်။ သတ္တု၊ သစ်သား၊ ဝါး၊ ပလပ်စတစ် စတာတွေနဲ့ လုပ်ထားတတ်ကြပါတယ်။ မြေမြှုပ်မိုင်း တစ်လုံးတွေ့ရင် အနားမှာ တခြားမြေမြှုပ်မိုင်းတွေ ထပ်ရှိနိုင်သေးတယ်ဆိုတာကို သတိပြုရမှာ ဖြစ်ပါတယ်။ မြေမြှုပ်မိုင်းနဲ့ ပေါက်ကွဲစေတတ်တဲ့ ပစ္စည်းတွေနဲ့ ပတ်သက်ပြီး အဓိက အန္တရာယ်ရှိတဲ့ နေရာတွေက စစ်စခန်း ဟောင်းနေရာတွေ၊ စစ်ဆေးရေးဂိတ်တွေ၊ လူမနေတာ ကြာသွားတဲ့ ရွာတွေ၊ စွန့်ပစ်ခဲ့တဲ့ ရွာမြေ၊ လယ်ယာမြေနဲ့ အသုံးမပြုတော့တဲ့ လမ်းတံတားဟောင်းတွေ ဖြစ်ပါတယ်။ မြေမြှုပ်မိုင်းတွေကိုတော့ ရန်သူ လာရာလမ်းတွေမှာ ထောင်ထားတာ၊ ရန်သူလာနိုင်တဲ့ လမ်းမှာရှိတဲ့ မြက်ပင် တွေ၊ သစ်ပင်တွေအောက်၊ အပေါ်မှာ ထားတာမျိုး၊ တပ်ဆုတ်တဲ့ အခါမှာ ရန်သူဝင်လာရင် အန္တရာယ် ဖြစ်အောင် ထောင်ခဲ့တာမျိုးတွေ ရှိပါတယ်။ စစ်ဖြစ်ပွားထားတဲ့ နေရာတွေ၊ စစ်စခန်းဟောင်းတွေ၊ ပဋိပက္ခဒေသတွေက လမ်းကြောင်းတွေ၊ လမ်းဘေးနေရာ တွေနဲ့ ရေခပ်ဆင်းတဲ့ နေရာတွေမှာလည်း ရှိနေတတ်ပါတယ်။ ဒါ့ကြောင့် ခရီးသွားပြီဆိုရင် ကိုယ့်အရှေ့မှာ တိရိစ္ဆာန် အသေကောင်တွေ၊ အရိုးစုတွေ၊ ပျက်စီးနေတဲ့ ဆိုင်ကယ်/ကားတွေ၊ စွန့်ပစ်စခန်းဟောင်း နေရာတွေနဲ့ မြေမြှုပ်မိုင်းနဲ့ ပေါက်ကွဲစေတတ်တဲ့ ပစ္စည်းတွေ ပေါက်ကွဲ ထားတာမျိုးတွေ့ရင် အန္တရာယ်ရှိတယ်လို့ ယူဆနိုင်ပြီး လာရာလမ်းအတိုင်း ပြန်လှည့်လာတာမျိုးက အန္တရာယ် အကင်းဆုံး နည်းလမ်းတစ်ခု ဖြစ်ပါတယ်။ မြေမြှုပ်မိုင်း ဆန့်ကျင်ရေးနဲ့ ပညာပေးရေး အဖွဲ့တွေရဲ့ အချက်အလက်တွေ အရဆိုရင် ၁၉၉၉ ခုနှစ်ကနေ ၂၀၂၃ ခုနှစ်အထိ နှစ်ပေါင်း ၂၀ ကျော်ကာလမှာ မိုင်း ထိမိသူပေါင်း ခုနှစ်ထောင် ကျော်ရှိခဲ့ပေမယ့် ၂၀၂၃ ခုနှစ် တစ်နှစ်ထဲမှာတော့ နှစ်ထောင့်ကိုးရာကျော် အထိ ရှိလာခဲ့တယ်လို့ ဆိုပါတယ်။ ဒါကြောင့် တိုက်ပွဲနဲ့ ပဋိပက္ခဒေသတွင်းနဲ့ စစ်မက်ဖြစ်ပွားတဲ့ နေရာတွေမှာ နေထိုင်ကြတဲ့ ပြည်သူတွေအနေနဲ့ မြေမြှုပ်မိုင်းအကြောင်း သိသင့် သိထိုက်တာတွေ သိထားပြီး အန္တရာယ်တွေကို ရှောင်ရှားနိုင်ဖို့ လိုအပ်ပါတယ်။ ဒီမြေမြှုပ်မိုင်းတွေနဲ့ ပေါက်ကွဲစေတတ်တဲ့ ပစ္စည်းတွေဟာ ဘာတွေလဲ၊ အန္တရာယ် မဖြစ်အောင် ဘယ်လို ရှောင် ရှားသင့်လဲ ဆိုတာတွေကို နောက်ပိုင်းတွေမှာလည်း အသေးစိတ် တင်ဆက်ပေးသွားဖို့ ရှိပါတယ်။ Photo - ABSDF

မြေမြှုပ်မိုင်းနှင့် ပေါက်ကွဲစေတတ်တဲ့ ပစ္စည်းတွေဟာ ဘယ်လိုနေရာမှာ ရှိနေတတ်ပြီး ဘယ်လိုအန္တရာယ်တွေ ပေးနိုင်သလဲ။ 

မြေမြှုပ်မိုင်းနှင့် ပေါက်ကွဲစေတတ်တဲ့ ပစ္စည်းတွေဟာ ဘယ်လိုနေရာမှာ ရှိနေတတ်ပြီး ဘယ်လိုအန္တရာယ်တွေ ပေးနိုင်သလဲ။  သတင်းနှင့် မီဒီယာ ကွန်ရက်။၂၀၂၅ ခုနှစ်…

  • July 31, 2025
ရုရှားတွင် အင်အားပြင်းငလျင် လှုပ်ခတ်ပြီးနောက် အမေရိကန်နှင့် ဂျပန်တွင် ဆူနာမီ သတိပေးချက် ထုတ်ပြန်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၀ ရက်။   ရုရှားနိုင်ငံ အရှေ့ဘက် ကမ်းခြေက ကျွန်းဆွယ် တစ်နေရာတွင် အလွန်ပြင်းထန်သည့် ငလျင် လှုပ်ခတ်သွားသော ကြောင့် အမေရိကန်နှင့် ဂျပန်နိုင်ငံက ပြည်သူများ ရွှေ့ပြောင်းနေကြရသည်။   ဇူလိုင်လ ၃၀ ရက်နေ့ ရုရှား စံတော်ချိန် ၁၁ နာရီ ၂၅ မိနစ်တွင် ပြင်းအား ၈.၈ ရှိသည့် ငလျင်က လှုပ်ခတ်ခဲ့ခြင်း ဖြစ်သည်။   အဆိုပါ ငလျင်ကြောင့် ရုရှား ကမ်းခြေ၌ ၁၀ ပေ မှ ၁၃ ပေ (၃ မီတာ မှ ၅ မီတာ) ရှိသည့် ဆူနာမီလှိုင်းများကို မှတ်တမ်းတင်ထားနိုင်ခဲ့သည်ဟု ရုရှားက ပြောသည်။   ယခုမှတ်တမ်းတင်နိုင်မှုမှာ ခေတ်သစ်သမိုင်းတွင် မှတ်တမ်းတင်ထားနိုင်သည့် အကြီးမားဆုံး ဆူနာမီလှိုင်း ဖြစ်သည်။   ထို ဆူနာမီ လှိုင်းအရှိန်က ဂျပန်နိုင်ငံ၊ ဟော့ကိုင်းဒိုးကျွန်းက မြို့တစ်မြို့ကို ရောက်ရှိခဲ့သည်။   ဆူနာမီလှိုင်းမှာ ၁ ပေအထိရှိပြီး ဆက်မြင့်တက်လာနိုင်သည်ဟု ဂျပန် ပညာရှင်တွေက ခန့်မှန်းထားကြသည်။   လက်ရှိတွင် ဂျပန်က လူဦးရေ ၁.၉ သန်းကို နေရာ ရွှေ့ပြောင်းကြဖို့ သတိပေးထားသည်။   အမေရိကန်က အလက်စကာမြို့နှင့် ဟာဝိုင်အီ၊ ဂူအမ်ကျွန်းတို့အပြင် နယူးဇီလန်၊ တရုတ်၊ ဖိလစ်ပိုင်၊ အင်ဒိုနီးရှား၊ ပီရူးနိုင်ငံတို့နှင့် အီကွေဒေါနိုင်ငံက ဂါလာပါဂိုကျွန်းတွင်လည်း ဆူနာမီ သတိပေးချက်များ ထုတ်ပြန်ထားသည်။   ဓါတ်ပုံ - USA Today

ရုရှားတွင် အင်အားပြင်းငလျင် လှုပ်ခတ်ပြီးနောက် အမေရိကန်နှင့် ဂျပန်တွင် ဆူနာမီ သတိပေးချက် ထုတ်ပြန်

ရုရှားတွင် အင်အားပြင်းငလျင် လှုပ်ခတ်ပြီးနောက် အမေရိကန်နှင့် ဂျပန်တွင် ဆူနာမီ သတိပေးချက် ထုတ်ပြန် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃၀…

  • July 31, 2025
အမေရိကန်-တရုတ် ကုန်သွယ်ခွန်ကိစ္စ ဆွေးနွေးမှု ရလဒ်မထွက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၀ ရက်။   စကော့တလန်တွင် လုပ်နေသည့် အမေရိကန် နှင့် တရုတ် ကုန်သွယ်ခွန်ကိစ္စ အသေးစိတ် ဆွေးနွေးပွဲများမှာ ရလဒ် တစ်စုံတစ်ရာ မထုတ်ပြန်နိုင်ဘဲ ပြီးဆုံးသွားခဲ့သည်။   တွေ့ဆုံဆွေးနွေးမှုနှင့် ပတ်သက်၍ နှစ်ဘက်စလုံးက “အပြုသဘော” ဆောင်သည်ဟု ပြောဆိုခဲ့ကြသော်လည်း ရလဒ် တိတိကျကျ မထုတ်ပြန်ခဲ့ပေ။   တရုတ်ဘက်က ဆွေးနွေးပွဲ ဦးဆောင်သူ Li Chenggang လီချန်းဂန်က ကုန်သွယ်ခွန်များ ဆိုင်းငံ့ရန် ရက် ၉၀ သတ်မှတ်ချက်ကို ရက်တိုးရေး ဆွေးနွေးခဲ့သည်ဟု ဆိုသည်။   သို့သော် အမေရိကန်ဘက်က ဦးဆောင်သူ Scott Bessent စကော့ဘက်ဆဲန့်ကမူ သမ္မတထရန့် အတည်ပြုရန် လိုသေးသည်ဟု ဆိုသည်။   မေလတွင် အခွန်များကို တိုးမြှင့်သည့် ကိစ္စ ရက် ၉၀ ဆိုင်းငံ့ရန် သဘောတူညီချက်မှာ လာမည့် ဩဂုတ်လ ၁၂ ရက်နေ့တွင် သက်တမ်းကုန်တော့မည် ဖြစ်သည်။   ယခု ဆွေးနွေးပွဲ မတိုင်ခင်လေးက ဖိအားပေးသည့် အနေဖြင့် တရုတ်က မြေရှားသတ္တုများ နိုင်ငံခြား တင်ပို့မှုကို ကန့်သတ်ခဲ့သည်။   ဇွန်လအတွင်း၌ တရုတ်က မြေရှားသတ္တု ၃,၁၈၈ တန်ကို ကမ္ဘာအနှံ့အပြားကို တင်ပို့ခဲ့သည်။ မေလတုန်းကနှင့် နှိုင်းယှဉ်ပါက ၁၅၈ ရာခိုင်နှုန်း မြင့်တက်လာသည်။   ထိုသို့ တင်ပို့မှုထဲက အမေရိကန်ကို ၃၅၃ တန် တင်ပို့ခဲ့သည်။ သို့သော် ယခုနှစ် ပထမ သုံးလက အမေရိကန်ကို တစ်လ ပျမ်းမျှ ၆၂၂ တန်နှင့် နှိုင်းယှဉ်မည်ဆိုပါက တရုတ်က ကန့်သတ်ထားဆဲ ဖြစ်သည်မှာ သိသာနေသည်။

ဓါတ်ပုံ - Reuters

အမေရိကန်-တရုတ် ကုန်သွယ်ခွန်ကိစ္စ ဆွေးနွေးမှု ရလဒ်မထွက်

အမေရိကန်-တရုတ် ကုန်သွယ်ခွန်ကိစ္စ ဆွေးနွေးမှု ရလဒ်မထွက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃၀ ရက်။ စကော့တလန်တွင် လုပ်နေသည့် အမေရိကန်…

  • July 31, 2025
အမေရိကန်နှင့် မဟာမိတ်များ PrSM (ပရစ်ဇင်မ်) တာဝေးပစ် ဒုံးကျည် စမ်းသပ်အောင်မြင်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၀ ရက်။   အမေရိကန်နှင့် မဟာမိတ်တို့သည် လက်နက်ပြိုင်ဆိုင်မှုတွင် တရုတ်နိုင်ငံ၏ ရှေ့ကို ရောက်နေအောင် ကြိုးစား ကြရသည်။   ထိုသို့ ရှေ့ကို ရောက်နေအောင် ကြိုးစားမှုသည် တရုတ်၏ သိမ်းပိုက်မှုကို ခြိမ်းခြောက်ခံနေရသော ထိုင်ဝမ် အတွက် အာမခံချက် တစ်ခုလည်း ဖြစ်သည်။   စီးပွားရေး အင်အား ကြီးလာပြီး လက်နက်အင်အား တောင့်တင်းလာသော တရုတ်သည် လက်နက်ပြိုင်ဆိုင်မှု၌ အသာစီးရလာသည်နှင့် ထိုင်ဝမ်ကို သိမ်းပိုက်ရန် အလားအလာ အများကြီး ရှိနေသည်။   ယခုနှစ်ဆန်းပိုင်းတွင်လည်း တရုတ် သမ္မတ ရှီကျင့်ဖျင်က ထိုင်ဝမ်မှာ တရုတ်နိုင်ငံ၏ အစိတ်အပိုင်း ဖြစ်ပြီး တရုတ်က တချိန်ချိန်တွင် ပြန်ယူမှာ ဖြစ်သည်ဟု ပြောဆိုခဲ့သည်။   လက်နက် အားပြိုင်မှုကို အပြောင်းအလဲ ဖြစ်စေနိုင်သည့် လက်နက်တစ်ခုကို အမေရိကန် မဟာမိတ်များက စမ်းသပ်နိုင်ခဲ့သည်။   မကြာသေးခင် ရက်အနည်းငယ်က (Precision Strike Missile - PrSM) ပရစ်ဇင်မ် ဟု ခေါ်သည့် ပစ်မှတ်ကို အတိအကျ ပစ်နိုင်သော မျိုးဆက်သစ် တာဝေးပစ် ဒုံးကျည် တစ်ခုကို စမ်းသပ်အောင်မြင်ခဲ့ကြသည်။   ထိုဒုံးကျည်ကို ဩစတေးလျနိုင်ငံတွင် ဩစတေးလျ စစ်တပ်က စမ်းသပ်ခဲ့ခြင်း ဖြစ်သည်။   PrSM ပရစ်ဇင်မ် ဟုခေါ်သည့် ပစ်မှတ်ကို အတိအကျ ပစ်နိုင်သော မျိုးဆက်သစ် တာဝေးပစ် ဒုံးကျည်ကို ဟိုင်းမားစ်ဟု ခေါ်သော အမေရိကန်ထုတ် ဒုံးကျည်ပစ် စနစ် (သို့မဟုတ်) အင်္ဂလန်ထုတ် MLRS ဒုံးကျည်ပစ် စနစ်တို့နှင့် ပစ်၍ ရသည်။   ဩစတေးလျ စစ်တပ်က စမ်းသပ်ခဲ့သည့် စမ်းသပ်မှုမှာ ကီလိုမီတာ ၁၉၀ ကျော် ဝေးသော ပစ်မှတ်ကို တစ်နာရီ ကီလိုမီတာ ၄၀၀၀ နှုန်းနှင့် သွားပြီး ထိမှန်ခဲ့သည်။ ယခုနောက်ဆုံးထုတ် PrSM (ပရစ်ဇင်မ်) ဒုံးကျည်များသည် ကီလိုမီတာ ၄၀၀ - ၅၀၀ ခန့်အထိ ပစ်နိုင်သည်ဟု လည်း ဆိုသည်။   အမေရိကန်နှင့် မဟာမိတ်များ၏ လက်နက် စမ်းသပ်မှု အလျင်စလို နိုင်နေခြင်းကိုမူ ယခု စမ်းသပ်မှုက သက်သေ ပြနေသည်။ ယခု စမ်းသပ်မှုကို ၂ နှစ်စော၍ လုပ်ခဲ့ကြသည်။   ဩစတေးလျကို PrSM (ပရစ်ဇင်မ်) ဒုံးကျည် တင်ပို့မှု တစ်နှစ်စော ပို့ဆောင်ခဲ့ပြီး ဟိုင်းမားစ် ပစ်လွှတ်မှု စနစ်ကိုမူ တစ်လစော၍ ပေးပို့ခဲ့သည်။   အဆိုပါ ပစ်မှတ် တိကျမှုရှိသည့် တာဝေးပစ် ဒုံးကျည်များမှာ တရုတ်၏ လေယာဉ်တင် သင်္ဘောကြီးများကို ခြိမ်းခြောက်နိုင်သည် ဖြစ်၍ တရုတ် - အမေရိကန် စစ်ရေး ကစားပွဲကို အလှည့်အပြောင်း ဖြစ်စေနိုင်မည်ဟု  ပညာရှင်များက သုံးသပ်နေ ကြသည်။   ဓါတ်ပုံ - EurAsian Times

အမေရိကန်နှင့် မဟာမိတ်များ PrSM (ပရစ်ဇင်မ်) တာဝေးပစ် ဒုံးကျည် စမ်းသပ်အောင်မြင်

အမေရိကန်နှင့် မဟာမိတ်များ PrSM (ပရစ်ဇင်မ်) တာဝေးပစ် ဒုံးကျည် စမ်းသပ်အောင်မြင် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃၀ ရက်။ အမေရိကန်နှ…

  • July 31, 2025
နောင်ချိုက နေအိမ်အချို့ကို စစ်ကောင်စီ ချိပ်ပိတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၀ ရက်။ စစ်ကောင်စီတပ်က ပြန်လည် ထိန်းချုပ်လိုက်သည့် ရှမ်းမြောက်၊ နောင်ချိုမြို့တွင် နေအိမ်အချို့နှင့် စျေးဆိုင်အချို့ ချိပ်ပိတ် ခံလိုက်ရသည်။ တော်လှန်ရေးအင်အားစုများကို ထောက်ခံအားပေးသည် ဆိုသော စွပ်စွဲချက်နှင့် ဒေသခံများ၏ ရွှေဆိုင်၊ ကုန်မာဆိုင်များ အပါအဝင် နေအိမ် ၁၀ လုံးထက် မနည်းကို စစ်ကောင်စီက ချိပ်ပိတ်လိုက်ခြင်း ဖြစ်သည်ဟု မြို့ခံများက ပြောသည်။ “အဓိကတော့ ဒလန်တွေက သတင်းပေးလို့လေ PDF ကို ထောက်ပံ့တဲ့သူ၊ ပလောင်တပ်ပေါ့ TNLA ကို ထောက်ပံ့တဲ့အိမ် အဲ့လိုပေါ့ ဒီလိုသတင်းပေးတဲ့လူတွေက ရှိတယ်။ အဲ့ဒီအိမ်တွေကို ချိပ်ပိတ်တာ။ လာပိတ်တဲ့ အချိန်တော့ အဲ့လိုမျိုးတွေ့တာ မဟုတ်ဘူး။ ဟိုအိမ်ကို ပိတ်သွားတယ်၊ ဒီအိမ်ပိတ်သွားတယ် အဲ့လို အချင်းချင်း ပြောပြမှ သိတာ။ နောက်ပြီး လိုင်းပေါ်မှာ ပုံတွေတက်လာတယ်လေအဲ့လို” ဟု မြို့ခံ အမျိုးသားတစ်ဦးက ပြောသည်။ နေအိမ်အချို့ ချိပ်ပိတ်ခံနေရသည့်အပြင် တအာင်းတပ် TNLA၊ ပြည်သူ့ကာကွယ်ရေး တပ်မတော် PDF အဖွဲ့တို့ နှင့် ဆက်စပ်မှု ရှိသည်ဟု စွပ်စွဲကာ ဖမ်းဆီးရခံသူများလည်း ရှိသည်ဟု မြေပြင် သတင်းအရင်းအမြစ်များက ပြောသည်။ အထက်ပါ နောင်ချိုမြို့ခံ အမျိုးသားက “ကျနော်တို့ကတော့ သွားတော့ မကြည့်ဘူးလေနော်။ သွားကြည့်ရင် အဲ့နားမှာ ဘယ်သူရှိမှန်းမသိ ဆိုတော့ စိုးရိမ်တယ်လေ။ ဒလန်ကလည်း ဘယ်သူဆိုတာ အတိအကျလည်း မသိ ဘူး။ ကိုယ့်ဟာကိုယ် သတိနဲ့ နေရတာပဲ” ဟု ဆက်ပြောသည်။ ဖမ်းဆီးခံရသူ အရေအတွက်ကိုမူ သတင်းနှင့်မီဒီယာ ကွန်ရက်သတင်းဌာန အနေဖြင့် စုံစမ်းစိစစ်နေဆဲ ဖြစ်သည်။ ထို့အပြင် ဇူလိုင်လ ၂၃ ရက်နေ့ကလည်း နောင်ချိုမြို့နယ်ထဲက လုံစံကျေးရွာမှ ဒေသခံ အမျိုးသားတစ်ဦးကိုလည်း စစ်ကောင်စီတပ်က မိသားစုဝင်များ၏ ရှေ့၌ပင် သေနတ်နှင့် ပစ်သတ်သွားသည်ဟု ရှမ်းမြောက် အခြေစိုက် ရွှေဖီမြေ သတင်းဌာနတွင် ဖော်ပြသည်။ စစ်ကောင်စီကို အားပေးထောက်ခံသည့် တယ်လီဂရန် ချန်နယ်များတွင်မူ တော်လှန်ရေး အင်အားစုများကို အားပေးထောက်ခံသူများ၏ ပိုင်ဆိုင်မှုများကို နိုင်ငံတော်ပိုင်အဖြစ် သိမ်းဆည်းလိုက်သည်ဟု ဓါတ်ပုံများနှင့် တကွ ရေးသားဝါဒ ဖြန့်နေကြသည်။ စစ်ကောင်စီက နောင်ချိုမြို့ခံများကို နေရပ်ပြန်လာကြရန် ခေါ်နေသော်လည်း မြို့ခံအများစုက ၎င်းတို့အား ယုံကြည်မှု မရှိသောကြောင့် မပြန်ကြသေးပေ။ လက်ရှိတွင် လူအနည်းစုသာ နေရပ်ပြန်ကြပြီး အချို့မှာမူ နေအိမ် အခြေအနေသွားကြည့်ကာ ပြန်ထွက်လာကြသည်ဟု ဆိုသည်။ နောင်ချိုမြို့ကို စစ်ကောင်စီတပ်က ဇူလိုင်လ ၁၆ ရက်နေ့တွင် ပြန်လည်သိမ်းယူလိုက်ခြင်း ဖြစ်ပြီး ယခုကဲ့သို့ စစ်ကောင်စီတပ်က မြို့ကို ပြန်ရသွားခြင်းသည် တရုတ်၏ ဖိအားကြောင့်​ ဖြစ်နိုင်သည်ဟု လေ့လာသုံးသပ်မှုများ ရှိနေသည်။

နောင်ချိုက နေအိမ်အချို့ကို စစ်ကောင်စီ ချိပ်ပိတ်

နောင်ချိုက နေအိမ်အချို့ကို စစ်ကောင်စီ ချိပ်ပိတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃၀ ရက်။ စစ်ကောင်စီတပ်က ပြန်လည် ထိန်းချုပ်လိုက်သည…

  • July 30, 2025
အင်္ဂပူမြို့နယ်ထဲရှိ ကျေးရွာများကို စစ်ကောင်စီက စားနပ်ရိက္ခာနှင့် ဆေးဝါးသယ်ယူခွင့် ပိတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၀ ရက်။   စစ်ကောင်စီတပ်က ဧရာဝတီတိုင်း၊ အင်္ဂပူမြို့နယ်ထဲက ကျေးရွာများကို စားနပ်ရိက္ခာ၊ ဆေးဝါးနှင့် စက်သုံးဆီ သယ်ယူခွင့် ပိတ်ပင်ထားသည်ဟု ဒေသခံများက ပြောသည်။   အင်္ဂပူမြို့နယ်ထဲက ကျီးပင်နှင့် ထုံးပေါ်ကျေးရွာတို့ကို ဇူလိုင်လ ၂၅ ရက်နေ့မှ စတင်၍ စားနပ်ရိက္ခာ သယ်ယူခွင့် ပိတ်လိုက်ခြင်း ဖြစ်သည်။   အသက် ၄၅ နှစ်အရွယ် ဒေသခံ အမျိုးသား တစ်ဦးက “ဆန်သယ်ခွင့်ကို အဓိကပိတ်တာ၊ အခြေခံ စားနပ်ရိက္ခာ ပေါ့နော် အဲ့ဒါတွေကို ပေးမသယ်ဘူးလို့ ပြောတယ်။ တချို့လည်း ကိုယ့်နည်းကိုယ့်ဟန်နဲ့ ညှိပြီး နည်းနည်း ပါးပါး သယ်လို့ရတဲ့လူတွေလည်း ရှိတယ်။ တချို့ဟာတွေတော့ ပိုက်ဆံပေးပြီး သယ်ကြတာမျိုးပေါ့နော်” ဟု ပြော သည်။   အင်္ဂပူမြို့ အဝင်အထွက် နေရာများနှင့် ကွင်းကောက်ဂိတ် (ကွင်းကောက် အမှတ် ၅ လေ့ကျင့်ရေး တပ်ရင်း စစ်ဆေးရေးဂိတ်) တို့တွင် ဆန်၊ အခြေခံစားနပ်ရိက္ခာ၊ ဆေးဝါးနှင့် စက်သုံး ဆီ သယ်ယူလာမှုများနှင့် ပတ်သက်၍ တားဆီးစစ်ဆေးမှုများ လုပ်နေခြင်း ဖြစ်သည်ဟု အထက်ပါ ဒေသခံ အမျိုးသားက ပြောသည်။   လက်ရှိတွင် ကျီးပင်နှင့် ထုံးပေါ်ကျေးရွာတို့ကို စားနပ်ရိက္ခာသယ်ယူခွင့် လုံးဝပိတ်ပင်လိုက်သော်လည်း အင်္ဂပူ မြို့နယ်ထဲက ပိန္နဲကွင်း၊ စမကုန်း၊ တောင်စင်း၊ ပဒတ်ကုန်းနှင့် ဂွက်ကြီးကျေးရွာတို့ကိုမူ စားနပ်ရိက္ခာ ၅ ရက်စာခန့်အတွက် သယ်ယူခွင့် ပြုထားသေးသည်ဟု ဆိုကြသည်။   အလားတူ လေးမျက်နှာနှင့် ရေကြည်မြို့နယ်ထဲက ရေနံ့သာ စစ်ဆေးရေးဂိတ်တို့တွင်လည်း ဆန်နှင့် စက်သုံးဆီ သယ်ယူခွင့်ကို ထောက်ခံစာပါမှသာ သယ်ယူခွင့်ပေးသည်ဟု ဒေသခံများက ပြောသည်။   အင်္ဂပူမြို့နယ်တွင် စစ်ကောင်စီနှင့် တော်လှန်ရေးပူးပေါင်းတပ်တို့ အကြား ပြီးခဲ့သည့် မေလက တိုက်ပွဲများဖြစ်ခဲ့ ပြီး ကျေးရွာအချို့ကို စစ်ကောင်စီက လက်လွှတ်ထားရသည်။   လက်ရှိတွင် ရခိုင်ရိုးမ တောင်ခြေမှာရှိတဲ့ အင်္ဂပူမြို့နယ်ထဲမှာ နှစ်ဖက် ထိတွေ့တိုက်ပွဲများ မရှိသော်လည်း စစ်ရေး တင်းမာမှုများ ဆက်ရှိနေဆဲဖြစ်သည်ဟု ဆိုသည်။ အလားတူ စစ်ကောင်စီတပ်သည် လေးမျက်နှာမြို့နယ်သို့ ယခု ဇူလိုင်လအတွင်း၌ပင် ရေကြောင်းမှတဆင့် လက်နက်ခဲယမ်းနှင့် စစ်အင်အားဖြည့်တင်းမှုများ ရှိခဲ့သည်။  

အင်္ဂပူမြို့နယ်ထဲရှိ ကျေးရွာများကို စစ်ကောင်စီက စားနပ်ရိက္ခာနှင့် ဆေးဝါးသယ်ယူခွင့် ပိတ်

အင်္ဂပူမြို့နယ်ထဲရှိ ကျေးရွာများကို စစ်ကောင်စီက စားနပ်ရိက္ခာနှင့် ဆေးဝါးသယ်ယူခွင့် ပိတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃၀ ရက်။ …

  • July 30, 2025
စဉ့်ကူးတွင် လေကြောင်းတိုက်ခိုက်ခံရမှုကြောင့် ၂၄ ဦး သေဆုံးသူ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၀ ရက်။   မန္တလေး PDF အဖွဲ့နှင့် တော်လှန်ရေးပူးပေါင်းတပ်တို့ ထိန်းချုပ်ထားသည့် စဉ့်ကူးမြို့နယ်ထဲက လက်ပံလှရဲစခန်း အပါအဝင် နေရာ ၂ ခု လေကြောင်းတိုက်ခိုက်ခံရမှုထဲ သေဆုံးသူ ၂၄ ဦး ရှိခဲ့သည်။   တော်လှန်ရေးတပ်ဖွဲ့များ ထိန်းချုပ်ထားသည့် မန္တလေးတိုင်း၊ စဥ့်ကူးမြို့နယ်ထဲက နေရာ ၃ ကို စစ်ကောင်စီတပ်က လေကြောင်းကနေ ဗုံးကြဲခဲ့ရာ သေဆုံးသူ ၂၄ ဦး ရှိခဲ့ပြီး အယောက် ၃၀ ဝန်းကျင် ထိခိုက်ဒဏ်ရာ ရရှိခဲ့သည်ဟု ပြည်သူ့ကာကွယ်ရေး တပ်မတော် (မန္တလေး) က ဇူလိုင်လ ၃၀ ရက်နေ့တွင် ထုတ်ပြန်သည်။   လက်ပန်လှရဲစခန်း လေကြောင်းတိုက်ခိုက်မှုထဲ ပြစ်ဒဏ်ကျ အကျဉ်းသားများနှင့် စစ်ဆေးနေဆဲ သံသယတရားခံ အားလုံးပေါင်း ၂၂ ဦး သေဆုံးခဲ့ခြင်း ဖြစ်သည်။   မြေပြင်ရှိ သတင်းအရင်းအမြစ် တစ်ဦးက “သေတဲ့သူတွေထဲ အချုပ်သားတွေပါတယ်။ အချုပ်သားတွေက အများဆုံးပဲ။ ထိခိုက်ဒဏ်ရာ ရတဲ့လူလည်း များတယ်။ ဒဏ်ရာ ရတဲ့လူတွေလည်း ပြင်းထန်တော့ စိုးရိမ်ရတဲ့ လူလည်း များတယ်” ဟု ပြောသည်။   လက်ပန်လှရဲစခန်း ဗုံးကြဲခံရမှုထဲ အမျိုးသား ၂၁ ဦး၊ အမျိုးသမီး ၁ ဦး သေဆုံးခဲ့ခြင်း ဖြစ်ပြီး ထိခိုက် ဒဏ်ရာ ရတဲ့သူ အယောက် ၃၀ ဝန်းကျင် ရှိခဲ့သည်။   ထို့အပြင် စဉ့်ကူးမြို့နယ်ထဲက ရွှေပန်းတောကျေးရွာ လေကြောင်းတိုက်ခိုက်မှုထဲတွင်လည်း ဒေသခံပြည်သူ ၂ ဦး သေဆုံးခဲ့သည်။   ရွှေပန်းတောကျေးရွာက အမျိုးသား တစ်ဦး၊ အမျိုးသမီး တစ်ဦး အသက်ဆုံးရှုံးခဲ့ရခြင်း ဖြစ်သည်။   စဉ့်ကူးမြို့နယ်ထဲက လက်ပန်လှရဲစခန်း နေရာနှင့် ရွှေပန်းတောကျေးရွာတို့အား ဇူလိုင်လ ၂၉ ရက်နေ့ ညနေပိုင်း အချိန်တွင် စစ်တပ်က လေကြောင်းကနေ ဗုံးကြဲတိုက်ခိုက်ခဲ့ခြင်း ဖြစ်သည်။   စစ်ကောင်စီသည် ပြည်သူလူထုကို ပစ်မှတ်ထား၍ လေကြောင်းတိုက်ခိုက်မှုများ ဆက်တိုက်ပြုလုပ်လျက်ရှိပြီး စစ်ရာဇဝတ်မှုများကို ပေါ်ပေါ်ထင်ထင် ကျူးလွန်နေသည်ဟု ပြည်သူ့ကာကွယ်ရေး တပ်မတော် (မန္တလေး) က ထုတ်ပြန်ထားသည်။

စဉ့်ကူးတွင် လေကြောင်းတိုက်ခိုက်ခံရမှုကြောင့် ၂၄ ဦး သေဆုံး

စဉ့်ကူးတွင် လေကြောင်းတိုက်ခိုက်ခံရမှုကြောင့် ၂၄ ဦး သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃၀ ရက်။ မန္တလေး PDF အဖွဲ့နှင့် တော်လှန…

  • July 30, 2025
ကွတ်ခိုင်လေကြောင်း တိုက်ခိုက်ခံရမှု ကလေးအပါအဝင် အရပ်သား ၆ ဦးသေဆုံး   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၀ ရက်။   ရှမ်းမြောက်၊ ကွတ်ခိုင်မြို့ကို စစ်ကောင်စီတပ်က ဂျက်ဖိုက်တာနှင့် ဗုံးကြဲတိုက်ခိုက်ခဲ့ရာ ကလေးအပါအဝင် အရပ်သား ပြည်သူ ၆ ဦး သေဆုံးခဲ့သည်။   ကွတ်ခိုင်မြို့ကို ဇူလိုင် ၃၀ ရက်နေ့၊ နံနက်အစောပိုင်း ၁ နာရီအချိန်ခန့်တွင် စစ်ကောင်စီတပ်က ပေါင် ၂၅၀ ဗုံး နှစ်လုံး ကြဲခဲ့ခြင်း ဖြစ်သည်။   ကွတ်ခိုင်မြို့ခံ အမျိုးသမီးတစ်ဦးက “သေတာ ၆ ယောက်ရှိသွားပြီ။ ကလေးတစ်ယောက်ပါတယ်။ အမျိုးသမီး တစ်ယောက်၊ အမျိုးသားက ၄ ယောက်ပေါ့နော်။ ကြဲသွားတဲ့နေရာက ရပ်ကွက် ၂ပေါ့နော်။ ရပ်ကွက် ၂ က ရာစုသစ်ဟိုတယ်နေရာကို ကြဲသွးတာပါ” ဟု ပြောသည်။   ကွတ်ခိုင်မြို့၊ ရပ်ကွက် ၂ ရှိ ရာစုသစ်ဟိုတယ်ကို ဂျက်ဖိုက်တာနှင့် လာရောက် ဗုံးကြဲသွားခြင်းခြင်း ဖြစ်သည်ဟု မြို့ခံများက ပြောသည်။   ကလေး ၁ ဦး၊ အမျိုးသမီး တစ်ဦးနှင့် အမျိုးသား ၄ ဦး စုစုပေါင်း ၆ ဦး သေဆုံးခဲ့ခြင်း ဖြစ်ပြီး သေဆုံးသွားသူများ ထဲတွင် ဗန်းမော်မှ ကွတ်ခိုင်သို့ စစ်ဘေးရှောင်လာသူများလည်း ပါသည်ဟု ဆိုကြသည်။   အဆိုပါ လေကြောင်း ဗုံးကြဲတိုက်ခိုက်မှုထဲ ထိခိုက်ဒဏ်ရာ ရသူများထဲ၌ ဒေသခံမဟုတ်သည့် ကားသမားများ လည်း ပါသည်ဟု အကူအညီပေးနေသူများက ပြောသည်။   ကွတ်ခိုင်ဒေသခံ အမျိုးသားတစ်ဦးက “ရာစုသစ် ဟိုတယ်နားက အိမ်က အဘွားရယ်၊ ကလေးရယ် သေသွား တယ်။ သူတို့က စစ်ရှောင်တွေဟုတ်တယ်။ အဲ့ဒီအိမ်မှာ စစ်ရှောင်ပြီး လာနေတာပါ။ အဲ့ဒီအိမ်က ဒဏ်ရာ ရတဲ့သူတွေလည်း ရှိတယ်။ ရာစုသစ် ၂ ဟိုတယ်နေရာ ဗုံးကြဲခဲ့ရတာ။ အခုပျက်စီးသွားတဲ့ အိမ်တွေထဲမှာ ဟိုတယ်ဘေးကပေါ့နော် မြောက်ဘက်ကလို့လည်း ပြောလို့ရတယ်။ အဲ့ဒီက အိမ် ထိသွားတာလေနော်” ဟု ပြောသည်။   ကွတ်ခိုင်မြို့ လေကြောင်း ဗုံးကြဲတိုက်ခိုက်ခံရမှုထဲ အိမ်အချို့အပြင် ရာစုသစ်ဟိုတယ် အဆောက်အအုံပါ ထိမှန်ပျက်စီးကုန်သည်ဟု ဒေသခံများက ပြောသည်။   အလားတူ ဇူလိုင်လ ၂၉ ရက်နေ့ ကလည်း ကျောက်မဲခရိုင်ထဲက မိုင်းလုံမြို့ကို စစ်ကောင်စီတပ်မှ ဂျက်ဖိုက်တာ ဖြင့် ဗုံးကြဲချတိုက်ခိုက်မှုကြောင့် အမျိုးသား တစ်ဦး ဗုံးစထိမှန်ပြီးသေဆုံးသွားခဲ့သည်။   ဇူလိုင်လ ၂၉ ရက်နေ့၊ ညနေ ၅နာရီခွဲ အချိန်ခန့်တွင် စစ်ကောင်စီတပ်က မိုင်းလုံမြို့၊ ခန်နီရပ်ကွက်ကို လေကြောင်း ဖြင့် ပေါင် (၂၅၀) ဗုံး တစ်လုံး ကြဲချခဲ့ရာ အမျိုးသားတစ်ဦး သေဆုံးခဲ့ရပြီး နေအိမ် ၇ လုံး ဗုံးစထိမှန် ပျက်စီးကုန် သည်ဟု TNLA က ထုတ်ပြန်သည်။   ထို့အပြင် မိုးကုတ်မြို့ရှိ လူစည်ကားသည့် နေရာများထဲ ဇူလိုင်လ ၂၉ ရက်နေ့၊ နံနက်ပိုင်းတွင် စစ်ကောင်စီက လေကြောင်းမှ ဗုံးကြဲတိုက်ခိုက်မှု ၇ ကြိမ် ပြုလုပ်ခဲ့ရာ အရပ်သား ၄ ဦး ပွဲချင်းပြီး သေဆုံးခဲ့ပြီး ၉ ဦး ပြင်းထန် ဒဏ်ရာများ ရရှိခဲ့သည်။

ကွတ်ခိုင်လေကြောင်း တိုက်ခိုက်ခံရမှု ကလေးအပါအဝင် အရပ်သား ၆ ဦးသေဆုံး

ကွတ်ခိုင်လေကြောင်း တိုက်ခိုက်ခံရမှု ကလေးအပါအဝင် အရပ်သား ၆ ဦးသေဆုံး သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃၀ ရက်။ ရှမ်းမြောက်၊ ကွတ်ခိုင်…

  • July 30, 2025
×Close