သတင်း

နှစ်နှစ်ခွဲအတွင်း ကျောင်းပေါင်း ၂၄၀ ကျော် လေကြောင်း တိုက်ခိုက်မှု ခံရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ မေလ ၁၄ ရက်။   နှစ်နှစ်ကျော် ကာလအတွင်း စစ်ကောင်စီက လေကြောင်းတိုက်ခိုက်မှုပေါင်း ၂၆၀၀ ကျော် ပြုလုပ်ခဲ့ပြီး ကျောင်း ပေါင်း ၂၄၀ ကျော် ထိမှန်ပျက်စီးခဲ့ရသည်ဟု အမျိုးသား ညီညွတ်ရေး အစိုးရ NUG လူအခွင့် အရေးဆိုင်ရာ ဝန်ကြီးဌာန က မေလ ၁၃ ရက်နေ့ (ယမန်နေ့) က ထုတ်ပြန်သည်။   အဆိုပါ အရေအတွက်သည် ၂၀၂၃ ခုနှစ်မှ ၂၀၂၅ ခုနှစ် မေလ ၁၂ ရက်နေ့အထိဖြစ်သည်ဟု NUG လူ့အခွင့်အရေး ဆိုင်ရာ ဝန်ကြီးဌာနက ဆိုသည်။   NUG လူ့အခွင့်အရေးဆိုင်ရာ ဝန်ကြီးဌာနက “၂၀၂၃ ခုနှစ် ဇန်နဝါရီလ ၁ ရက်နေ့မှ ၂၀၂၅ ခုနှစ် မေလ ၁၂ ရက်နေ့အထိ လေကြောင်း တိုက်ခိုက်ခံရသည့် ဖြစ်စဉ်ပေါင်း (၂၆၇၉) ကြိမ် ရှိရာတွင် ကျောင်းပေါင်း ၂၄၀ ကျောင်း ပျက်စီးဆုံးရှုံးခဲ့ရသည်” ဟု ပြောသည်။   လက်ရှိတွင် စစ်ကောင်စီသည် နိုင်ငံတဝန်း ယာယီ အပစ်အခတ်ရပ်စဲရေးကို ၂၀၂၅ ခုနှစ် မေလ ၃၁ ရက်နေ့အထိ သက်တမ်းတိုးသည်ဟု ကြေညာထားသော်လည်း အရပ်သား ပြည်သူများအား ပစ်မှတ်ထား တိုက်ခိုက်မှုများကို ပိုမိုတိုးမြင့်လုပ်ဆာင်လာခဲ့သည်။ ထိုတိုက်ခိုက်မှုများတွင် ဘာသာရေး အဆောက်အအုံများ၊ စာသင်ကျောင်းများ၊ ဆေးရုံများကို ပစ်မှတ်ထား တိုက်ခိုက်မှုများသည် ပိုမိုမြင့်တက်လာခဲ့သည်ဟု NUG က ဆိုသည်။   ပြီးခဲ့သည့် မေလ ၁၂ ရက်နေ့က စစ်ကိုင်းတိုင်း ဒီပဲယင်းမြို့နယ်၊ အိုးတိန်တွင်းကျေးရွာကို စစ်ကောင်စီက လေကြောင်းဖြင့် တိုက်ခိုက်ခံရာ ကျောင်းသား/သူ နှင့် ဆရာမများ သေဆုံးခဲ့ရသည့်အပြင် ပြည်သူ ၁၀၂ ဦး ထိခိုက်ဒဏ်ရာ ရရှိခဲ့ပြီး ဘေးလွတ်ရာသို့ အများအပြား ထွက်ပြေးတိမ်းရှောင်နေရသည်ဟု NUG က ပြောသည်။   “အကြမ်းဖက် စစ်အုပ်စုသည် စစ်ကိုင်းတိုင်း ဒီပဲယင်းမြို့နယ်၊ အိုးတိန်တွင်းကျေးရွာ စာသင်ကျောင်းကို ၂၀၂၅ ခုနှစ် မေလ ၁၂ ရက်နေ့ မနက် ၉ နာရီ ၃၅ မိနစ်ခန့်တွင် လေကြောင်းမှ တိုက်ခိုက်ခဲ့ရာ ကျောင်းသား၊ ကျောင်းသူ ၂၀ ဦးနှင့် စေတနာ့ဝန်ထမ်း ဆရာမ ၂ ဦး သေဆုံးခဲ့ပြီး၊ ပြည်သူ ၁၀၂ ဦး ကျော် ထိခိုက်ဒဏ်ရာရမှု ဖြစ်စေခဲ့သည်။ အဆိုပါ တိုက်ခိုက်မှုကြောင့် အိမ်ခြေ ၃၀၀ ခန့်ရှိသော အိုးတိန်တွင်း ကျေးရွာမှာ ပြည်သူ ၅၀၀ ခန့် ဘေးလွတ်ရာ သို့ ထွက်ပြေးတိမ်းရှောင်နေကြရသည်” ဟု NUG လူ့အခွင့်အရေးဆိုင်ရာ ဝန်ကြီးဌာန၏ ထုတ်ပြန်ချက်ထဲတွင် တွေ့ရသည်။   လက်နက်ကိုင် ပဋိပက္ခအတွင်း ကလေးသူငယ်များအပေါ် ပစ်မှတ်ထား တိုက်ခိုက်မှုသည် စစ်ရာဇဝတ်မှုမြောက် သော ကျူးလွန်မှုဖြစ်ပြီး စစ်ကောင်စီ အနေဖြင့် ယခုကဲ့သို့ လူမဆန်သည့် ကျူးလွန်မှုများကို ကျယ်ကျယ်ပြန့် ပြန့်နှင့် စနစ်တကျ ကျူးလွန်နေသည်ဟု ဆိုသည်။ ထိုကျူးလွန်မှုများအတွက် စစ်ကောင်စီကို ရာဇဝတ်ကြောင်း အရ အရေးယူနိုင်ရန်အတွက် နိုင်ငံတကာ တရားရုံးများတွင်သာမက နိုင်ငံအလိုက် တရားရုံးများတွင်ပါ တရားမျှတမှု ဖော်ဆောင်နိုင်ရေး လူ့အခွင့်အရေးဆိုင်ရာ ဝန်ကြီးဌာန အနေဖြင့် ကြိုးပမ်း ဆောင်ရွက်သွားမည် ဖြစ်သည်ဟု ပြောသည်။   ထို့အပြင် လူမဆန်သော တိုက်ခိုက်မှုအပေါ် လူ့အခွင့်အရေးဆိုင်ရာ ဝန်ကြီးဌာန အနေဖြင့် ပြင်းထန်စွာ ရှုတ်ချပြီး  ကုလသမဂ္ဂအပါအဝင် နိုင်ငံတကာ အသိုင်းအဝိုင်းများအနေဖြင့်လည်း ယခုကဲ့သို့သော အရပ်သား၊ ပြည်သူများ အပေါ်  စစ်ကောင်စီက ဆက်လက် တိုက်ခိုက်နေမှုများကို ရပ်တန့်စေရေး ဖိအားပေး ဆောင်ရွက်ရန် NUG လူ့အခွင့်အရေးဆိုင်ရာ ဝန်ကြီးဌာနက တိုက်တွန်းသည်ဟု ဆိုသည်။

နှစ်နှစ်ခွဲအတွင်း ကျောင်းပေါင်း ၂၄၀ ကျော် လေကြောင်း တိုက်ခိုက်မှု ခံရ

နှစ်နှစ်ခွဲအတွင်း ကျောင်းပေါင်း ၂၄၀ ကျော် လေကြောင်း တိုက်ခိုက်မှု ခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၄ ရက်။ နှစ်နှစ်ကျော် ကာလအတွင်း…

  • May 14, 2025
စစ်ကောင်စီ၏ နျူကလီးယားစီမံကိန်း ဒေသတွင်း နိုင်ငံများ အန္တရာယ် ဖြစ်စေမည်။   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ မေလ ၁၄ ရက်။   စစ်ကောင်စီ၏ နျူကလီးယား ဓာတ်အားပေးစက်ရုံ စီမံကိန်းသည် ဒေသတွင်းနိုင်ငံများ၏ လုံခြုံရေးနှင့် တည်ငြိမ် ရေးကို ထိပါးလာနိုင်သည့်အတွက် အထူးအလေးထား တုန့်ပြန်ဆောင်ရွက်ကြရန်  အမျိုးသား ညီညွတ် ရေး အစိုးရ NUG က ဒေသတွင်း နိုင်ငံများအား သတိပေး ပြောဆိုလိုက်သည်။   အမျိုးသား ညီညွတ်ရေး အစိုးရ NUG က မေလ ၁၃ ရက်နေ့ (ယမန်နေ့) က  နှစ်ပတ်တစ်ကြိမ်ပြုလုပ်သည့် ပြည်သူလူထုနှင့် နိုင်ငံတကာသို့ သတင်းစကားပြောကြားခြင်း (Press Briefing) အစီအစဉ် တွင် NUG ပြည် ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ထို့သို့ ထည့်သွင်းပြောကြား ခဲ့ခြင်းဖြစ်သည်။   ဦးနေဘုန်းလတ်က “ဒီလိုလုပ်ရပ်မျိုးတွေဟာ နောင်တစ်ချိန်မှာ မြန်မာနိုင်ငံနဲ့ မြန်မာနိုင်ငံသူ နိုင်ငံသားတွေ သာမက ဒေသတွင်း နိုင်ငံတွေနဲ့ အဲဒီနိုင်ငံတွေရဲ့ ပြည်သူလူထုတွေရဲ့ လုံခြုံရေးနဲ့ တည်ငြိမ်အေးချမ်းရေးကိုပါ ထိပါးလာနိုင်တဲ့ အခြေအနေမျိုး ဖြစ်တာကြောင့် ဒေသတွင်း နိုင်ငံတွေအနေနဲ့ မြန်မာပြည်သူလူထုနဲ့အတူ တော်လှန်ရေး အင်အားစုတွေနဲ့အတူ ရပ်တည်ပြီး အထူးအလေးထား တုန့်ပြန်ဆောင်ရွက်ကြဖို့ ပြောကြား လိုပါတယ်” ဟု ပြောသည်   စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်၏ ပြီးခဲ့သည့် မတ်လအတွင်း ရုရှားနိုင်ငံ ခရီးစဉ်တွင် အသေးစား နျူကလီးယား ဓာတ်အေားပေးစက်ရုံ တည်ဆောက်ရေးကို နှစ်နိုင်ငံ ပူးပေါင်းဆောင်ရွက်ကြရန် သဘောတူညီ လက်မှတ်ရေးထိုးခဲ့ကြသည်။   စစ်ကောင်စီက နျူကလီးယား ဓာတ်အားပေးစက်ရုံကို ပဲခူးတိုင်း အလယ်ပိုင်းနှင့် ထိုင်းနိုင်ငံ နယ်စပ် တနင်္သာရီ တိုင်း၊ ထားဝယ်ဒေသရှိ ထားဝယ် အထူးစီးပွားရေးဇုန်တွင် တည်ဆောက်မည်ဟု ထီးခီး စစ်ရေး အခြေအနေနှင့် ပတ်သက်၍ KNU ကလည်း မေလ ၉ ရက်နေ့ ထုတ်ပြန်ချက်ထဲတွင် ထည့်သွင်းထားသည်။   စစ်ကောင်စီက နျူကလီးယား စက်ရုံတည်ဆောက်မည့် အခြေအနေကြောင့် ဒေသတွင်း ပြည်သူများနှင့် ထိုင်းနိုင်ငံ ပြည်သူများ၏ လုံခြုံရေး၊ အန္တရာယ် ကင်းရှင်းမှုနှင့် ကောင်းမွန်သော ဘဝ နေထိုင်မှုအတွက် အလွန်စိုးရိမ်ပူပန်မိသည်ဟု KNU က ပြောသည်။   စစ်ခေါင်းဆောင်၏ လုပ်ရပ်နှင့် ပတ်သက်၍ ဦးနေဘုန်းလတ်က  “အကြမ်းဖက် စစ်ခေါင်းဆောင် မင်းအောင် လှိုင်နဲ့ အပေါင်းအပါ တစ်စုဟာ သူတို့ရဲ့ အာဏာ တည်မြဲရေး တစ်ခု သာ ရှေ့ရှု့ပြီး ပြည်သူလူထုရဲ့ အခွန်ဘဏ္ဍာ တွေကို ထင်သလို အသုံးပြုနေသလို အချို့သော နိုင်ငံတွေနဲ့ နျူကလီးယား စွမ်းအင်သုံး ဓာတ်အားပေး စက်ရုံ တည်ဆောက်ခြင်း စတဲ့ လုပ်ငန်းစာချုပ်တွေ ချုပ်ဆိုပြီး တိုင်းပြည်ကိုလည်း အမြော်အမြင်ကင်းမဲ့စွာ အသုံးချ လျက်ရှိနေပါတယ်” ဟု ပြောသည်။     အဆိုပါ အသေးစား နျူကလီးယား ဓာတ်အားပေးစက်ရုံကို ရှရှားနိုင်ငံက တည်ဆောက်ပေးမည် ဖြစ်ပြီး မဂ္ဂါဝပ် ၁၁၀ အသေးစား နျူးကလီးယားဓာတ်ပေါင်းဖိုကို မဂ္ဂါဝပ် ၃၃၀ အထိ စွမ်းဆောင်ရည် ထပ်မံ တိုးချဲ့နိုင်ရန်လည်း သဘောတူညီခဲ့ကြသည်ဟု ရှရှားသတင်းဌာနများ၏ သတင်းဖော်ပြချက်များအရ သိရသည်။   ရုရှားအစိုးရပိုင် Rosatom ကုမ္ပဏီ ညွှန်ကြားရေးမှူးချုပ် Alexei Likhachev နှင့် မြန်မာနိုင်ငံ သိပ္ပံနှင့် နည်းပညာ ဝန်ကြီး မျိုးသိန်းကျော်တို့က နှစ်နိုင်ငံ နားလည်မှုစာချွန်လွှာ သဘောတူညီချက်ကို  လက်မှတ်ရေးထိုးခဲ့ ကြခြင်း ဖြစ်သည်။   ထို့အပြင် အဏုမြူနှင့် ဓာတ်ရောင်ခြည် ဘေးအန္တရာယ် ကင်းရှင်းရေး နယ်ပယ်တွင် ပူးပေါင်းဆောင်ရွက်ရေး အတွက်လည်း နားလည်မှု စာချွန်လွှာ လက်မှတ်ရေးထိုးခဲ့ကြသည်ဟု သိရသည်။   အာဆီယံ ၁၀ နိုင်ငံက ၁၉၉၅ ခုနှစ်မှာ နျူးကလီးယား လက်နက် ကင်းမဲ့ဇုန် သဘောတူညီချက်ကို လက်မှတ်ရေး ထိုး ထားကြပြီး ထိုသဘောတူညီချက်ကို ဘန်ကောက် သဘောတူညီချက် Bangkok Treaty ဟု ခေါ်သည်။

စစ်ကောင်စီ၏ နျူကလီးယားစီမံကိန်း ဒေသတွင်း နိုင်ငံများ အန္တရာယ် ဖြစ်စေမည်။

စစ်ကောင်စီ၏ နျူကလီးယားစီမံကိန်း ဒေသတွင်း နိုင်ငံများ အန္တရာယ် ဖြစ်စေမည်။ သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၄ ရက်။ စစ်ကောင်စီ၏ နျူကလီးယ…

  • May 14, 2025
နဝမ အကြိမ်မြောက် တိုင်းရင်း ညီလာခံတွင် လွတ်လပ်သော မီဒီယာများ ရှင်သန်ရေး ဆွေးနွေး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ မေလ ၁၄ ရက်။   စစ်အာဏာသိမ်းပြီးနောက် အကျပ်အတည်း အမျိုးမျိုးအောက်တွင် ရှင်သန်ရပ်တည်ရေး ကြိုးပမ်းနေရသည့် သတင်းမီဒီယာများ၏ အခက်အခဲများကို တစ်စုံတစ်ရာ ဖြေရှင်းနိုင်ရေး လွတ်လပ်သော တိုင်းရင်းသား မီဒီယာ များက ညီလာခံတစ်ရပ်တွင် တိုင်ပင် ဆွေးနွေးခဲ့ကြသည်။   နိုင်ငံတကာ မြန်မာ သတင်းအဖွဲ့ (Burma News International - BNI) က ကြီးမှူးကျင်းပသည့် ၉ ကြိမ်မြောက် တိုင်းရင်းမီဒီယာ ညီလာခံ (Ethnic Media Conference – EMC) ကို မြန်မာနိုင်ငံ၏ ပြင်ပ တစ်နေရာတွင် ကျင်းပခဲ့ကြသည်။   BNI ၏ မန်နေဂျင်းဒါရိုက်တာ မတင်တင်ညိုက “ဒီနှစ်မှာ ကျမတို့က နိုင်ငံရေး လူမှုရေး စီးပွားရေး အဖက်ဖက် ကနေပြီးတော့မှ ကျပ်တည်းမှုတွေဖြစ်လာတယ်။  တစ်ဖက်မှာလည်း စစ်ပွဲတွေက ပိုမိုပြင်းထန်လာတဲ့ အနေ အထားပေါ့နော်။ ပြီးရင် လူထုတွေကလည်း ပိုပြီးဒုက္ခရောက်လာတယ်။ ဒီလိုမျိုး အခြေအနေအောက်မှာပဲ သတင်းတွေ ဆက်ပြီးတော့ ရေးသားနိုင်ဖို့အတွက် လုပ်ဆောင်နေတဲ့အချိန်မှာ ငွေကြေးပိုင်းဆိုင်ရာ ပံ့ပိုးမှုတွေ ကလည်း ပြတ်တောက်လာတယ်” ဟု ပြောသည်။   “အကျပ်အတည်းအောက်မှ လွတ်လပ်သော မီဒီယာများ အသက်ရှင်ရပ်တည်နေမှု” (Independent Media Surviving Under Crisis) ခေါင်းစဉ်နှင့် မေလ ၅ ရက်နေ့မှ မေ ၇ ရက်နေ့အထိ ကျင်းပခဲ့သည့် အဆိုပါ ညီလာခံတွင် လက်ရှိကြုံတွေ့နေရသည့် အခက်အခဲများကြားမှ မီဒီယာလုပ်ငန်းများ ဆက်လက် ရပ်တည်နိုင်ရေး နည်းလမ်းများကို အဓိကထား ဆွေးနွေးခဲ့ကြသည်။   မတင်တင်ညိုက “ဆိုတော့ ပြောရမယ်ဆိုရင် အကျပ်အတည်းပေါင်းစုံ တစ်ပြိုင်နက်ဝင်တဲ့အနေအထားမှာ ကျမတို့ မီဒီယာတွေက ဆက်လက်ရှင်သန်မယ် ဆက်လက်ပြီးတော့ သတင်းမှန်တွေဖော်ထုတ်မယ် ပြီးတော့ ပြည်သူလူထုတွေရဲ့ အသံတွေကို ဖော်ထုတ်သွားမယ်ဆိုတဲ့ အပိုင်းမျိုးကို ဒီအကျပ်အတည်းကြားက ဘယ်လို လုပ်လို့ရမလဲဆိုတာကို ကျမတို့အားလုံး ဝိုင်းဝန်း အဖြေရှာတယ်ဆိုတဲ့ သဘောနဲ့ ဒီတစ်နှစ်မှာ ဒီခေါင်းစဉ်ကို ရွေးချယ်လိုက်တာပဲဖြစ်တယ်” ဟု ဆက်ပြောသည်။   ညီလာခံတွင် လက်ရှိဖြစ်ပေါ်နေသည့် နိုင်ငံရေး အခြေအနေများကြောင့် သတင်းမီဒီယာ သမားများနှင့် မီဒီယာ များအပေါ် ခြိမ်းခြောက်မှုများ ရှိနေပြီး အထူးသဖြင့် ဘဏ္ဍာရေးပိုင်း မလုံလောက်မှုကြောင့် ဖြစ်ပေါ်လာနိုင်သည့် ခြိမ်းခြောက်မှုများက မြန်မာနိုင်ငံ၏ နိုင်ငံရေးအရွေ့ကိုပါ ထိခိုက်စေနိုင်သည်ဟု BNI စီမံခန့်ခွဲရေး ဒါရိုက်တာက ပြောသည်။   မတင်တင်ညို “ဒါတွေက ဘာကိုပြနေလဲဆိုရင် မြန်မာသတင်းမီဒီယာတွေ ပုံမှန်သတင်းတွေ ဆက်ထုတ်နိုင်ဖို့ အတွက် အကန့်သတ်တွေ အများကြီးရှိဖြစ်သွားမယ်။ အကယ်၍ သူတို့သာ သတင်းတွေ ဆက်မထုတ်နိုင်တော့ ဘူး ဆိုရင် ပြည်သူလူထုတွေ သတင်းအမှန်မရတော့ဘူးဆိုရင် ကျမတို့နိုင်ငံရဲ့ နိုင်ငံရေးပြုပြင်ပြောင်းလဲမှုက ပြည်သူလူထုအတွက် အကျိုးစီးပွားတွေကို ရှေးရှုတဲ့ ပြောင်းလဲမှုတစ်ခုဖြစ်နိုင်ပါတော့မလားဆိုတဲ့ စိတ်ပူချက် တွေ ရှိတယ်။ အဲ့ဒါကလည်း ပြောရမယ်ဆိုရင်တော့ မြန်မာ့နိုင်ငံရေးအရွေ့ တစ်ခုအတွက် ခြိမ်းခြောက်မှု တစ်ခု လို့လည်း ပြောလို့ရတယ်ပေါ့လေ” ဟု ပြောသည်။   ထို့အပြင် ယခုကဲ့သို့သော ခြိမ်းခြောက်မှုများအား အကျပ်တည်းကာလတွင် မီဒီယာဥပဒေများကို လက်ရှိနှင့် အနာဂတ်တွင် ဖြစ်ပေါ်လာမည့် ဖက်ဒရယ် ဒီမိုကရေစီစနစ်နှင့် အညီ ပြင်ဆင်ဖြည့်စွက်နိုင်ရန်လည်း တိုင်းရင်း မီဒီယာ ညီလာခံ EMC တွင် ဆွေးနွေးခဲ့ကြသည်။   လွတ်လပ်သော မြန်မာသတင်းမီဒီယာ ကောင်စီ (IPCM) အတွင်းရေးမှူး ဦးတိုးဇော်လတ် “အဓိက က ပြောရ မယ်ဆိုရင်တော့ တိုင်းရင်းမီဒီယာတွေက ဒီဥပဒေတွေအားလုံးက ဗဟိုနေပြီးတော ဗဟိုဦးစာပေးပြီတော့ လုပ် ထားတဲ့ ရေးဆွဲထားတဲ့ ဥပဒေတွေဖြစ်တယ်။ နောက်တစ်ခုက မီဒီယာတွေကို လွတ်လပ်ဖွံ့ဖြိုးဖို့ဆိုတာထက် မီဒီယာကိုထိန်းချုပ်ဖို့ သဘောသက်ရောက်တယ်။ တကယ်လို့များ ဖက်ဒရယ်ယူနစ်တွေဖြစ်လာရင် ဘယ်လိုမျိုး အောက်ခြေနေပြီးတော့မှ buttom up federalism ကို ပြောသလိုပါပဲ။ အောက်ခြေကနေ အပေါ်ကို ပြန်သွား မယ့် မီဒီယာဥပဒေ ဖြစ်သင့်လဲ၊ အထူးသဖြင့် တိုင်းရင်းသားလူမျိုး၊ ဒေသတွေကို ဘယ်လိုမျိုးအကျိုးရှိတဲ့ မီဒီယာဥပဒေ ဖြစ်သင့်လဲဆိုတာကို အဓိက ဦးစာပေးဆွနွေးကြတာပါပဲ” ဟု ပြောသည်။   ညီလာခံမှ ရရှိလာသည့် ဆွေးနွေးပွဲရလဒ်အနေဖြင့် အရည်အသွေးမြင့်မားသည့်  သတင်းထုတ်လုပ်မှုများမှ တစ်ဆင့် စာဖတ်ပရိသတ်များနှင့် ခိုင်မာစွာ ချိတ်ဆက်နိုင်ရေးအပြင် လူမှုကွန်ရက်စာမျက်နှာများက တစ်ဆင့် ဝင်ငွေရှာဖွေနိုင်ဖို့ နည်းလမ်းများကို ရရှိခဲ့ကြသည်ဟု ဆိုသည်။   ယခုနှစ် ကျင်းပပြုလုပ်သည့် တိုင်းရင်းမီဒီယာညီလာခံ EMC ကို ပြည်တွင်း၊ ပြည်ပအခြေစိုက် မီဒီယာ ၄၈ ဖွဲ့၊ အလှူရှင်များ၊ အရပ်ဘက်အဖွဲ့အစည်းများနှင့် NGO အဖွဲ့ အသီးသီးက ကိုယ်စားလှယ်ပေါင်း အယောက် ၁၃၀ ကျော် တက်ရောက်ခဲ့ကြသည်။   ပြီးခဲ့သည့် ၈ ကြိမ်မြောက် တိုင်းရင်းမီဒီယာညီလာခံကိုလည်း ထိုင်းနယ်စပ် တစ်နေရာတွင် ပြုလုပ်ခဲ့ကြပြီး “ဖက်ဒရယ် မြန်မာနိုင်ငံသို့ ရှေးရှု့သောမီဒီယာ” ဆိုသည့် ခေါင်းစဉ်နှင့် ကျင်းပခဲ့ကြခြင်း ဖြစ်သည်။  

နဝမ အကြိမ်မြောက် တိုင်းရင်း ညီလာခံတွင် လွတ်လပ်သော မီဒီယာများ ရှင်သန်ရေး ဆွေးနွေး

နဝမ အကြိမ်မြောက် တိုင်းရင်း ညီလာခံတွင် လွတ်လပ်သော မီဒီယာများ ရှင်သန်ရေး ဆွေးနွေး သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၄ ရက်။  စစ်အာဏာသိမ်…

  • May 14, 2025
စစ်ကောင်စီကို အားပေးနေသည့် နိုင်ငံများအား သတိထားရန် NUG ကာကွယ်ရေးဝန်ကြီးပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ မေလ ၁၄ ရက်။   မြန်မာပြည်သူများ အပေါ် အကြမ်းဖက်မှု အမျိုးမျိုး ကျူးလွန်နေသည့် စစ်ကောင်စီ၏ လုပ်ရပ်များကို အားပေး ထောက်ခံနေသော နိုင်ငံအချို့ကို သတိထားကြဖို့ အမျိုးသားညီညွတ်ရေး အစိုးရ NUG ကာကွယ်ရေး ဝန်ကြီး ဌာန ပြည်ထောင်စုဝန်ကြီး ဦးရည်မွန်က ပြောဆိုလိုက်သည်။   မေလ ၅ ရက်နေ့က ပြည်သူ့ကာကွယ်ရေးတပ်မတော် PDF ဖွဲ့စည်းတည်ထောင်ခြင်း ၄ နှစ်ပြည့် မိန့်ခွန်းထဲတွင် အမျိုးသား ညီညွတ်ရေး အစိုးရ NUG ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်က ထည့်သွင်း ပြောကြားခဲ့ခြင်း ဖြစ်သည်။   “အခုဆိုရင် မြန်မာ့အရေးဟာ ကမ္ဘာ့အခင်းအကျင်းနဲ့လည်း ဆက်စပ်လာတယ်။ ပြည်သူတွေရဲ့ ဆန္ဒသဘောထား ကို လျစ်လျူရှု့ပြီး မြန်မာပြည်အပေါ် ဩဇာလွှမ်းဖို့ ကိုယ်ကျိုးစီးပွား အမြတ်ထုတ်ဖို့ ကြံရွယ်ချက်နဲ့ စစ်ကောင်စီရဲ့ လူမဆန်မှုတွေကို လူမိုက်အားပေးလုပ်နေတဲ့ ပြည်ပနိုင်ငံ တချို့ ရှိလာတယ်ဆိုတာကိုလည်း သတိကြီးကြီးထား ရမယ်။”   ပြည်ပနိုင်ငံအချို့က စစ်ကောင်စီ၏ အကြမ်းဖက်မှုများအပေါ် အားပေးထောက်ခံနေမှုတို့ကို ဂရုစိုက်မနေဘဲ တော်လှန်ရေး ခရီးဆုံးသည်အထိ ဆက်ပြီးချီတက်သွားဖို့ လိုသည်ဟု ဝန်ကြီးဦးရည်မွန်က ပြောသည်။ 
“PDF တပ်မတော်အဖို့တော့ မရွဲ့မစောင်း ကိုယ့်လမ်းကြောင်းကို အားကောင်းမောင်းသန် ဆက်လက် ချီတက် ကြဖို့ပဲ ဖြစ်လိမ့်မယ်။ အင်းတော်အောင်ပွဲကို ပြန်ကြည့်ရင် တောင့်ခံနိုင်စွမ်းက အဆုံးအဖြတ်ဖြစ်ခဲ့တယ်။ PDF ရဲဘော်တစ်ဦးချင်းအနေနဲ့လည်း စိတ်ရှည်ဖို့၊ ဇွဲကောင်းဖို့ ဘယ်လိုအခက်အခဲမျိုးကြုံပါစေ ကြံ့ကြံ့ခိုင် ဖြတ် သန်းဖို့ လိုအပ်တယ်။ အင်းတော်အောင်ပွဲနည်းတူ တော်လှန်ရေးတစ်ခုလုံးရဲ့ အောင်ပွဲကိုလည်း ငါတို့ရဲ့ တောင့်ခံ နိုင်စွမ်းကပဲ အဆုံးအဖြတ်ပေးလိမ့်မယ်။”   စစ်တပ်က အာဏာသိမ်းပြီးနောက် ပေါ်ပေါက်လာခဲ့သည့် အမျိုးသားညီညွတ်ရေး အစိုးရ NUG က  ၂၀၂၁ ခုနှစ် မေလ ၅ ရက်နေ့တွင် ပြည်သူ့ကာကွယ်ရေးတပ်မတော် PDF ကို ဖွဲ့စည်းခဲ့ခြင်း ဖြစ်သည်။   ပြည်သူ့ကာကွယ်ရေး တပ်မတော် PDF ဖွဲ့စည်း တည်ထောင်ခဲ့သည့် ၄ နှစ်တာ ကာလအတွင်း မဟာမိတ်တပ် များနှင့် ပူးပေါင်းပြီး ပြည်နယ်နှင့် တိုင်းဒေသကြီးများတွင် ရှိသည့် စစ်ကောင်စီ တပ်စခန်းများ၊ မြို့များကိုလည်း သိမ်းပိုက်ထိန်းချုပ်နိုင်ခဲ့ကြသည့် အပြင် အုပ်ချုပ်ရေး လုပ်ငန်းများကိုလည်း အတိုင်းအတာ တစ်ခုအထိ လုပ်ဆောင်နေကြပြီ ဖြစ်သည်။   လက်ရှိ မြေပြင် အခြေအနေများအရ တရုတ်၏ ဖိအားပေးမှုများကြောင့် ၁၀၂၇ စစ်ဆင်ရေးကာလအတွင်း ကိုးကန့်တပ်မတော် MNDAA က တိုက်ခိုက်သိမ်းပိုက်ထားသော လားရှိုးမြို့ကို စစ်ကောင်စီကို ပြန်ပြီးပေးလိုက် ရသည်။   အလားတူ တအာင်းအမျိုးသား လွတ်မြောက်ရေး တပ်မတော် TNLA ကိုလည်း တရုတ်က ၁၀၂၇ စစ်ဆင်ရေး ကာလအတွင်း သိမ်းပိုက်ထားတဲ့ မြို့များကနေ ပြန်လည်ဆုတ်ခွာပေးရန် ဖိအားပေး ပြောဆိုမှုများ ရှိနေသည့် အပြင် ဆေးဝါးနှင့် ကုန်စည်သယ်ယူခွင့်တို့ကို ပိတ်ပြီး ပြည်သူလူထု ခက်ခဲမှုရှိအောင် ဖိအားပေး လုပ်ဆောင်မှု များ ရှိနေသည်ဟု မေလ ၄ ရက်နေ့က ပြုလုပ်သည့် သတင်းစာ ရှင်းလင်းပွဲတွင် PSLF/TNLA က ပြောသည်။  

စစ်ကောင်စီကို အားပေးနေသည့် နိုင်ငံများအား သတိထားရန် NUG ကာကွယ်ရေးဝန်ကြီးပြော

စစ်ကောင်စီကို အားပေးနေသည့် နိုင်ငံများအား သတိထားရန် NUG ကာကွယ်ရေးဝန်ကြီးပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၄ ရက်။  မြန်မာပြည်သူမျာ…

  • May 14, 2025
လူထုကို ကာကွယ်ရန် ပြည်ထောင်စု တပ်မတော် ပေါ်ပေါက်ရေး KNDF ကြိုးပမ်းမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ မေလ ၁၃ ရက်။   တစ်နိုင်ငံလုံးရှိ ပြည်သူလူထုများကို အကာအကွယ်ပေးနိုင်သည့် ပြည်ထောင်စု ကာကွယ်ရေးတပ် တရပ်ပေါ် ပေါက်ရေးကို ကြိုးပမ်းကြမည်ဟု ကရင်နီအမျိုးသားများ ကာကွယ်ရေးတပ် KNDF က ပြောဆိုလိုက်သည်။   မေလ ၁၂ ရက်နေ့ (ယမန်နေ့) နံနက် ၁၀ နာရီက စစ်ကိုင်းတိုင်း ဒီပဲယင်းမြို့နယ်၊ အိုးတိမ်းတွင်းကျေးရွာ စာသင် ကျောင်းကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့ရာ ဆရာမ ၂ ဦး၊ ကလေးသူငယ် ၂၀ ဦး ပွဲချင်း ပြီး သေဆုံးပြီး ၄၀ ကျော် ထိခိုက်ဒဏ်ရာ ရရှိခဲ့သည့်အပေါ် KNDF က ၎င်းတို့၏ သဘောထား ထုတ်ပြန်ချက်ထဲ တွင် ထိုသို့ ထည့်သွင်းပြောဆိုထားသည်။   KNDF က “မိမိတို့ တော်လှန်ရေးတပ်ဖွဲ့များအနေဖြင့် မြန်မာတနိုင်ငံလုံးရှိ တောလှန်ရေး ကာကွယ်ရေးတပ် များ နှင့်အတူ အရပ်သားပြည်သူနှင့် ကလေးသူငယ်များကို ကာကွယ်စောင့်ရှောက်သော အနာဂတ် ပြည် ထောင်စု ကာကွယ်ရေးတပ် တရပ်ပေါ်ပေါက်ရေးကို ကြိုးပမ်းကြရမည်ဟု တိုက်တွန်းသည်” ဟု မေလ ၁၃ ရက် (ယနေ့) ထုတ်ပြန်ချက်ထဲတွင် ပြောဆိုထားသည်။   စစ်ကောင်စီတပ်၏ ပြည်သူလူထုအပေါ်  ပစ်မှတ်ထား တိုက်ခိုက်မှုများကို ပိုမိုကာကွယ်နိုင်ရန်အတွက် ပြည် ထောင်စုတပ် တရပ် ပေါ်ပေါက်လာအောင်ကြိုးစားကြရမည်ဟု KNDF က ၎င်းတို့၏ သဘောထားကို ထုတ်ပြန် ချက်ထဲတွင် ဖော်ပြထားသည်။   ပြည်ထောင်စု ကာကွယ်ရေးတပ် တရပ်ပေါ်ပေါက်ရေးကို လုပ်ဆောင်နိုင်ရန်ကြိုးပမ်းကြရမည့် အခြားတစ် ဖက်တွင် စစ်ကောင်စီ၏ လုပ်ရပ်များကို မသိကျေးကျွန်ပြုပြီး စစ်ကောင်စီ၏ အင်အားကို အထောက်အကူ ပြုနေသည့် မည်သည့်အဖွဲ့အစည်းကိုမဆို ၎င်းတို့ကျူးလွန်မှုများနှင့်အတူ ထပ်တူတာဝန်ရှိကြောင်း ပြောကြား လိုပါသည်ဟု KNDF က ပြောသည်။   ထို့အပြင် စစ်ကောင်စီတပ်သည် အပစ်ခတ်ရပ်စဲရေး ကာလများ ထုတ်ပြန်ထားသော်လည်း နိုင်ငံအတွင်းရှိ နေရာအနှံ့အပြားကို နေ့စဉ်ရက်ဆက် အရပ်သား ပြည်သူများနေရာတွင် ပစ်မှတ်ထားပြီး နည်းမျိုးစုံ တိုက်ခိုက်ကျူးလွန် သတ်ဖြတ်နေသည်ကို အရေးယူရေးနှင့် စစ်လက်နက် ပစ္စည်းအထောက်အပံ့ တားဆီး ရေးများ စသည်တို့ကို ဝိုင်ဝန်းကြိုးပမ်း ဆောင်ရွက်ပေးရန် ထပ်မံတိုက်တွန်းသည်ဟု ဆိုသည်။   စစ်ကောင်စီတပ်က ပြည်သူများအပေါ် ကျူးလွန်နေမှုများ အားလုံးကို စစ်ရာဇဝတ် ကျူးလွန်မှု ဖြစ်ရပ် သက်သေများအဖြစ် သိမ်းဆည်းထားပြီး ကျူးလွန်သူများအားလုံးကို ပြင်းထန်စွာ အရေးယူနိုင်ရန်အတွက် ကရင်နီအမျိုးသားများ ကာကွယ်ရေးတပ် KNDF အနေဖြင့် ဆက်လက်ပူးပေါင်းဆောင်ရွက်သွားမည်ဖြစ်သည်ဟု ပြောသည်။

လူထုကို ကာကွယ်ရန် ပြည်ထောင်စု တပ်မတော် ပေါ်ပေါက်ရေး KNDF ကြိုးပမ်းမည်

လူထုကို ကာကွယ်ရန် ပြည်ထောင်စု တပ်မတော် ပေါ်ပေါက်ရေး KNDF ကြိုးပမ်းမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၃ ရက်။ တစ်နိုင်ငံလုံးရှိ ပြည်သ…

  • May 13, 2025
တနင်္သာရီတိုင်းအတွင်း စစ်ကောင်စီ တပ်စခန်းများ ရှင်းလင်းပြီး လူထု မြှင့်တင်ရေးလုပ်မည်ဟု KNLA ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ မေလ ၁၃ ရက်။   ပြည်သူများအတွက် အနာဂတ်တွင် ကောင်းမွန်သည့် လူမှုဘဝနှင့် လုံခြုံမှုကို ရရှိရန် တနင်္သာရီတိုင်းထဲတွင် ရှိနေ သည့် စစ်ကောင်စီတပ်များ အားလုံးကို မောင်းထုတ်မည်ဟု ကရင်အမျိုးသား အစည်းအရုံး KNU/KNLA ဒု-စစ်ဦးစီးချုပ် ဒု-ဗိုလ်ချုပ်ကြီး စောဘောကျော်ဟဲ က ပြောသည်။   တနင်္သာရီ ကမ်ပိန်းနှင့် ပတ်သက်ပြီး တိုက်တွန်းအားပေးသည့် ရုပ်သံထဲတွင် ကရင်အမျိုးသား လွတ်မြောက်ရေး တပ်မတော် KNLA ဒုတိယ စစ်ဦးစီးချုပ် ဒုတိယ ဗိုလ်ချုပ်ကြီး စောဘောကျော်ဟဲ က ထည့်သွင်း ပြောဆိုထား သည်။   ၎င်းက “အခုအချိန်ဟာ တနင်္သာရီ တစ်လျှောက်လုံးနဲ့ တပ်မဟာ ၄ နယ်မြေ တစ်ခုလုံးမှာရှိနေတဲ့ နေရာအများစု က ပြည်သူတွေရဲ့ လုံခြုံရေးအတွက်နဲ့ ကျနော်တို့ နယ်မြေထဲမှာရှိတဲ့ ရန်သူတွေ အားလုံးကို မောင်းထုတ်ရမယ်” ဟု ပြောသည်။   ထို့အပြင် တနင်္သာရီတိုင်းရှိ စစ်ကောင်စီတပ် အားလုံးကို မောင်းထုတ်မှသာ အနာဂတ်တွင် ပြည်သူလူထုအတွက် လုံခြုံစိတ် ချသည့် လူမှု့ဘဝကို ဖန်တီးနိုင်မည်ဟု ဆက်ပြောသည်။   ဒုတိယ ဗိုလ်ချုပ်ကြီး စောဘောကျော်ဟဲ က “ပြီးတော့ ကျနော်တို့ လူမျိုးအတွက် စစ်မှန်ပြီး မှန်ကန်တဲ့ အုပ်ချုပ်ရေး စနစ်ကို တည်ဆောက်ရမယ်။ အနာဂတ်မှာ တခြားလူမျိုးတွေနဲ့အတူ အသက်ရှင်နေထိုင်ဖို့ အတွက်နဲ့ ကျနော်တို့ လူမျိုးတွေရဲ့ ပြီးပြည့်စုံတဲ့ လူမှုဘဝနေထိုင်မှု ရရှိဖို့အတွက် တနင်္သာရီ ကမ်ပိန်းမှာ လိုအပ်နေတဲ့ အထောက်အပံ့တွေကို တနင်္သာရီ တိုင်းဒေသကြီး အတွင်းမှာရှိတဲ့ ကျနော်တို့ လူမျိုးတွေအပြင် အခြေားသော နေရာဒေသတွေမှာရှိတဲ့ ကျနော်တို့ လူမျိုးတွေအားလုံး ပူးပေါင်းပါဝင် အင်အားဖြည့်ကြဖို့ တိုက်တွန်းနှိုးဆော်ချင်ပါတယ်” ဟု ပြောသည်။   အဆိုပါ ပြောဆိုမှုကို တနင်္သာရီ ကမ်ပိန်းက ရုပ်သံနှင့် မေလ ၁၂ ရက်နေ့ (ယမန်နေ့) ထုတ်ပြန်ထားသည်။   တနင်္သာရီ ကမ်ပိန်း ဥက္ကဋ္ဌ စောနေထူးကလည်း တနင်္သာရီ ကမ်ပိန်း ပြုလုပ်ရသည့် ရည်ရွယ်ချက်ကို ယခုကဲ့သို့ ပြောသည်။   စောနေထူးက “ဒီဒေသကြီးသည် ကရင့်တော်လှန်ရေးအတွက် လူသားအရင်းမြစ်များအား ပြန်လည် စုဆောင်းဖြည့်တင်းရန်အတွက် အခြေခံ မြေခံ ကောင်းခြင်း၊ တနင်္သာရီတိုင်းရှိ ပြည်သူများရဲ့ အာဏာရှင် ကျရှုံးခြင်းနဲ့ ငြိမ်းချမ်းတည်ငြိမ်သော လူ့အဖွဲ့အစည်းကို တည်ဆောက်လိုသည့် သဘောထားသည်လည်း မိမိတို့ ကရင်တော်လှန်ရေးလမ်းစဉ်နဲ့ ကိုက်ညီခြင်း ရန်သူ၏ စီးပွားရေး ကုန်သွယ်ခြင်းနဲ့ ရင်းနှီးမြုပ်နှံမှုကို ရိုက်ချိုးနိုင်ခြင်းဖြင့် ပြည်ပမဟာ အင်အားကြီး နိုင်ငံများရဲ့ ဝင်ရောက်စွတ်ဖက်မှုကို ဟန့်တားနိုင်စေရန်အတွက် ဒီကမ်ပိန်းကို ကျနော်တို့ လုပ်ဆောင်ရခြင်းဖြစ်ပါတယ်” ဟု ပြောသည်။   ထို့အပြင် အကြောက်တရားများနှင့် ရင်ဆိုင်နေရသည့် ပြည်သူများကို အကာအကွယ်ပေးရန်၊ တည်ငြိမ်ရေးနှင့် ကောင်းမွန်သော အုပ်ချုပ်ရေးကို ပြန်လည် တည်ဆောက်ရန်နှင့် အာဏာရှင်ကို တနင်္သာရီတိုင်း ဒေသကြီးကနေ တွန်းထုတ်ရန်ဖြစ်သည်ဟု ဆိုသည်။   လက်ရှိ တနင်္သာရီတိုင်းဒေသကြီးထဲတွင် စစ်ကောင်စီတပ်၏ စစ်ရေးလှုပ်ရှားမှုများကြောင့် ဒေသခံ ပြည်သူများ ၏ ကျေးရွာများနှင့် အိုးအိမ်များ ပျက်စီးရှုံးဆုံးမှုများ ရှိနေသည့်အပြင် လူဦးရေ တစ်သိန်းကျော်သည် လည်း ၎င်းတို့၏ နေရပ်ကို စွန့်ပြီး စစ်ဘေးရှောင်နေရသည်ဟု စောနေထူးက ပြောသည်။   ၂၀၂၅ ခုနှစ်က စပြီး စစ်ကောင်စီတပ်သည် တနင်္သာရီတိုင်းထဲတွင် စစ်ရေး လှုပ်ရှားမှုများကို ပိုမိုတိုးမြှင့် လုပ် ဆောင်လာသည်သာမက နယ်စပ်ဒေသရှိ စီးပွားရေး၊ ကုန်သွယ်ရေး လုပ်ငန်းများကို ပြန်လည်လုပ်ဆောင်နိုင် ရန်အတွက် ကုန်သွယ်ရေးလမ်းမများကို သိမ်းပိုက်ရန်  ကြိုးစားလာသည်ဟု ဆိုသည်။   စစ်ကောင်စီတပ်ကို တနင်္သာရီတိုင်းဒေသကြီး တစ်ခုလုံးကနေ မောင်းထုတ်မည့် တနင်္သာရီ ကမ်းပိန်ကို မေလ ၁ ရက်နေ့မှ ဇွန်လ ၁၅ ရက်နေ့အထိ ပြုလုပ်သွားမည်ဖြစ်ပြီး ထိုကမ်ပိန်းမှ ဘတ် သုံးသန်း ရရှိရန် မျှော်မှန်းထား သည်ဟု စောနေထူးက ပြောသည်။

တနင်္သာရီတိုင်းအတွင်း စစ်ကောင်စီ တပ်စခန်းများ ရှင်းလင်းပြီး လူထု မြှင့်တင်ရေးလုပ်မည်ဟု KNLA ပြော

တနင်္သာရီတိုင်းအတွင်း စစ်ကောင်စီ တပ်စခန်းများ ရှင်းလင်းပြီး လူထု မြှင့်တင်ရေးလုပ်မည်ဟု KNLA ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၃ ရက်။…

  • May 13, 2025

ပညာသင် ကလေးများ လုံခြုံရေးအတွက် နိုင်ငံတကာက ပံ့ပိုးရန် NUG တောင်းဆို

ပညာသင် ကလေးများ လုံခြုံရေးအတွက် နိုင်ငံတကာက ပံ့ပိုးရန် NUG တောင်းဆို သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၃ ရက်။ ကလးငယ်များ လုံခြုံစွာ ပည…

  • May 13, 2025
ဧပြီလအတွင်း စစ်ကောင်စီကြောင့် အမျိုးသမီး ၇၀ ကျော် သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ မေလ ၁၂ ရက်။   တစ်နိုင်ငံလုံး အတိုင်းအတာဖြင့် စစ်ကောင်စီတပ်၏ အကြမ်းဖက်မှုကြောင့် ဧပြီလထဲ၌ အသက် ၁၈ နှစ်အောက် အမျိုးသမီးငယ် ၁၃ ဦး အပါအဝင် အမျိုးသမီးစုစုပေါင်း ၇၁ ဦး သေဆုံးခဲ့ရသည်ဟု မြန်မာ့အမျိုးသမီးသမဂ္ဂ (BWU) က ပြောသည်။   သေဆုံးသူများထဲ စစ်ကိုင်းတိုင်းက အများဆုံးဖြစ်ပြီး စစ်ကောင်စီတပ်၏ လေကြောင်း တိုက်ခိုက်မှုများကြောင့် အများဆုံး သေဆုံးရခြင်း ဖြစ်သည်ဟု BWU တွဲဖက်အထွေထွေ အတွင်းရေးမှူး- ၁ မဝေဝေလှိုင် က ပြောသည်။   “အကြမ်းဖက်စစ်တပ်က စစ်ကိုင်းတိုင်းထဲကို ပိုပြီးတော့မှ လေကြောင်းတိုက်ခိုက်မှုကို ဦးတည် လုပ်လာတာ ကြောင့် ဖြစ်တယ်။ ပြီးခဲ့တဲ့ မတ်လ ၂၈ ရက်နေ့က လှုပ်ခတ်ခဲ့တဲ့ စစ်ကိုင်းငလျင်ကြောင့် အရပ်သားပြည်သူတွေ ဟာ ထိခိုက်နစ်နာဆုံးရှုံးမှုတွေ အများကြီးဖြစ်နေတယ်။ အဲ့ဒီအချိန်မှာ စစ်အုပ်စုက အပစ်ခတ်ရပ်စဲရေး ကြေ ညာထားသော်လည်းပဲ သူတို့စကားကိုမတည်ပဲ အရပ်သားပြည်သူကို ပစ်မှတ်ထားတာ အထူးသဖြင့် စစ်ကိုင်း တိုင်းကို ပစ်မှတ်ထား လေကြောင်းတိုက်ခိုက်မှုတွေ လုပ်ဆောင်ခဲ့တာကြောင့် ဖြစ်တယ်။”   ဧပြီလ တစ်လထဲ၌ပင် စစ်ကောင်စီ၏ လေကြောင်းနှင့် ဗုံးကြဲတိုက်ခိုက်မှုကြောင့် အမျိုးသမီး ၅၉ ဦး၊ လက်နက် ကြီး ပစ်ခတ်မှုကြောင့် ၇ ဦးနှင့် သတ်ဖြတ်ခံရမှုကြောင့် ၅ ဦး သေဆုံးခဲ့တယ်လို့ BWU က ထုတ်ပြန်သည်။   အမျိုးသမီး ၇၁ ဦးထဲတွင် အသက် ၁၈ နှစ်အောက် အမျိုးသမီးငယ် ၁၃ ဦး ပါဝင်သည်ဟု BWU တာဝန်ရှိသူက ဆိုသည်။   မဝေဝေလှိုင်က “အကြမ်းဖက် စစ်အုပ်စုဟာ သူတို့ရဲ့ အာဏာတည်မြဲရေးအတွက်ဆိုရင် ဘယ်သူ့ကိုမှ ဘယ်လို အခြေအနေမှာမှ မငှဲ့ညာပဲ ရက်ရက်စက်စက် သတ်ဖြတ်တဲ့စစ်အုပ်စုဖြစ်တယ်လို့ မှတ်ချက်ပေးချင်ပါတယ်” ဟု ပြောသည်။   လေကြောင်း တိုက်ခိုက်မှုကြောင့် အမျိုးသမီး ၄၀ ဦး၊ လက်နက်ကြီးပစ်ခတ်မှုကြောင့် ၅ ဦး၊ မြေမြှုပ်မိုင်းကြောင့် ၄ ဦးနှင့် အာရက္ခတပ်တော် AA တပ်ဖွဲ့ဝင်က မုဒိမ်းပြုကျင့်မှုကြောင့်  ၁ ဦး စုစုပေါင်း အမျိုးသမီး အယောက် ၅၀ ထိခိုက်ဒဏ်ရာရရှိခဲ့သည်ဟု  BWU က ဆိုသည်။   ထို့အပြင် သဘာဝဘေး အန္တရာယ်ကြုံနေရသည့် ပြည်သူများကို ပစ်မှတ်ထားပြီး စစ်ကောင်စီတပ်က လေကြောင်း တိုက်ခိုက်မှုများကိုလည်း ယခင်လများကထက် ပိုမိုအသုံးပြု တိုက်ခိုက်ခဲ့သည်ဟု ဆိုသည်။   မြန်မာနိုင်ငံတစ်ဝန်း အမျိုးသမီးသေဆုံးမှု ပိုမိုမြင့်မားလာရခြင်းနှင့် ပတ်သက်၍ မဝေဝေလှိုင်က “အဓိက အကြမ်းဖက် စစ်အုပ်စုက လေကြောင်းတိုက်ခိုက်မှုတွေကို ပိုမိုပြီးတော့ လုပ်ဆောင်လာတာကြောင့်ဖြစ်တယ်။ အဲ့ဒါအပြင် ပဋိပက္ခနဲ့ဆက်နွယ်တဲ့ လိင်ပိုင်းဆိုင်ရာအကြမ်းဖက်တွေ ကျူးလွန်နေတဲ့ခါကြလို့ရှိရင် ကျူးလွန်နေ တဲ့ သူတွေက လက်နက်ကိုင်ထားတဲ့သူတွေက ပိုများတယ်။ လက်နက်ကိုင်ထားတဲ့သူတွေက သူတို့ကျူးလွန်တဲ့ ပဋိပက္ခနဲ့ဆက်နွယ်တဲ့ လိင်ပိုင်းဆိုင်ရာ အကြမ်းဖက်တွေ မုဒိမ်းမှုတွေ ကျူးလွန်ပြီးတဲ့ခါကြလို့ရှိရင် နှုတ်ပိတ်တဲ့ အနေနဲ့ ပစ်သတ်တာ နှုတ်ပိတ်တာတွေကြောင့်လို့မြင်တယ်” ဟု မှတ်ချက်ပြု ပြောဆိုသည်။   ဧပြီလအတွင်း သေဆုံးခဲ့ရသည့် အမျိုးသမီးများမှာ စစ်ကိုင်းတိုင်းဒေသကြီးက ၃၀ ဦး၊ မန္တလေးတိုင်းဒေသကြီး ထဲတွင် ၁၄ ဦး၊ ပဲခူးတိုင်းဒေသကြီးထဲက ၅ ဦး၊ မကွေးတိုင်းဒေသကြီးက ၄ ဦး၊ ချင်းပြည်က ၄ ဦး၊ ရခိုင်ပြည်က ၄ ဦး၊ ကရင်ပြည်က ၄ ဦး၊ ကရင်နီပြည်က ၃ ဦး၊ မွန်ပြည်က ၂ ဦးနှင့် ရှမ်းပြည်က ၁ ဦးတို့ ဖြစ်ကြသည်။   မြန်မာ့အမျိုးသမီးသမဂ္ဂ BWU အနေဖြင့် အမျိုးသမီးများ သေဆုံးရသည့် အခြေအနေ၊ အကြမ်းဖက်ခံရသည့် ဖြစ်စဉ်များကို နေ့စဉ်စာရင်းကောက်ယူနေပြီး နစ်နာသူများအတွက် တရားမျှတမှု တစ်စုံတစ်ရာ ဖော်ဆောင်ပေး နိုင်ရေးနှင့် ပြစ်မှုကျူးလွန်သူများကို ပြစ်မှုနှင့်အညီ အပြစ်ပေးအရေးယူနိုင်ရေး သက်ဆိုင်ရာ အသီးသီးကို စည်းရုံးတိုက်တွန်းလှုံ့ဆော်မှုများ လုပ်ဆောင်လျှက်ရှိသည်။

ဧပြီလအတွင်း စစ်ကောင်စီကြောင့် အမျိုးသမီး ၇၀ ကျော် သေဆုံး 

ဧပြီလအတွင်း စစ်ကောင်စီကြောင့် အမျိုးသမီး ၇၀ ကျော် သေဆုံး  သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၂ ရက်။  တစ်နိုင်ငံလုံး အတိုင်းအတာဖြင့် စစ်…

  • May 12, 2025
ဒီပဲယင်း စာသင်ကျောင်းကို စစ်ကောင်စီ ဗုံးကြဲ၊ ကျောင်းသူ/သား များ သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ မေလ ၁၂ ရက်။   စစ်ကိုင်းတိုင်း၊ ဒီပဲယင်းမြို့နယ်၊ အိုးထိန်းတွင်းကျေးရွာရှိ အလယ်တန်းကျောင်းကို စစ်ကောင်စီတပ်က လေကြောင်းမှ ဗုံးကြဲတိုက်ခိုက်ခဲ့ရာ ကျောင်းသူ/သားများနှင့် ဆရာမ စုစုပေါင်း အယောက် ၂၀ ကျော် သေဆုံးခဲ့ သည်။   မေလ ၁၂ ရက်နေ့၊ နံနက်ပိုင်း ၁၀ နာရီအချိန်ခန့်တွင် အမျိုးသားညီညွတ်ရေး အစိုးရ NUG က ဖွင့်ထားသော ကျေးရွာစာသင်ကျောင်းကို စစ်တပ်က လေကြောင်းမှ ဗုံးကြဲခဲ့ခြင်း ဖြစ်သည်။   မြေပြင်တွင် ကယ်ဆယ်ရေး လုပ်နေသူ တစ်ဦးက “ဒီမနက်မှာ လေယာဉ်နဲ့ လာကြဲသွားတာ ဟုတ်ပါတယ်ဗျာ။ မနက်ကတော့ ကလေးက ၁၃ ယောက်၊ ဆရာမက ၂ ယောက်ပေါ့ဗျာ။ အခု နောက်ဆုံးစာရင်းရတာက ကလေး က အယောက် ၂၀ ရှိသွားပြီ။ ဆရာမကတော့ ၂ ယောက် အားလုံးပေါင်း ၂၂ ယောက်ပါဗျာ” ဟု ပြောသည်။   အိုးထိန်းတွင်းကျေးရွာ စာသင်ကျောင်းအား လေကြောင်း ဗုံးကြဲတိုက်ခိုက်ခံရမှု ဖြစ်စဉ်အတွင်း  ထိခိုက်ဒဏ်ရာရ သူ အယောက် ၄၀ ကျော်ရှိသည်ဟု ဒီပဲယင်းမြို့နယ် ပြည်သူ့အုပ်ချုပ်ရေး အဖွဲ့က ထုတ်ပြန်ထားသည်။   အိုးထိန်းတွင်းရွာ အနီးဝန်းကျင်၌ တိုက်ပွဲဖြစ်ပွားခြင်းမရှိကြောင်း၊ စာသင်ကျောင်းကို ပစ်မှတ်ထားကာ ပေါင် ၃၀၀ ဗုံး ၂ လုံး ကြဲတိုက်ခိုက်ခဲ့ခြင်းကြောင့် ကျောင်းသူ/သားများနှင့် ဆရာမ ၂ ဦး သေဆုံးခဲ့ရခြင်း ဖြစ်သည်ဟု မြေပြင် သတင်းအရင်းအမြစ်များက ပြောသည်။   ထိခိုက်ဒဏ်ရာရထားသော ကျောင်းသူ/သားများကို လုံခြုံစိတ်ချရသော နေရာများသို့ ရွှေ့ပြောင်းကာ အရေးပေါ် ဆေးကုသမှု ပေးနေကြသည်ဟု ကူညီကယ်ဆယ်ရေး လုပ်နေသူများက ဆိုသည်။   ထိခိုက်ဒဏ်ရာ ရထားသူများထဲတွင် အသက်အန္တရာယ်စိုးရိမ်ရသည့် သူလည်း အတော်များသောကြောင့် သေဆုံး သူများ ထပ်တိုးလာနိုင်သည်ဟု ဆိုကြသည်။   ဒီပဲယင်းမြို့နယ် ပြည်သူ့အုပ်ချုပ်ရေး အဖွဲ့ တာယန်ရှိသူ တစ်ဦးက “အသက်အရွယ်လေးတွေက ၈ နှစ်ကနေ ၁၇ ကြားပေါ့၊ အဲ့ဒီအရွယ် ကလေးတွေပါတယ်။ အကြီးဆုံး ၁၇ နှစ် ဖြစ်မယ်။ နောက်ပြီး ဆရာမလေး နှစ်ယောက် ကလည်း စေတနာ့ဝန်ထမ်းလို့ ပြောရမယ်။ လုပ်အားပေး ဆရာမလေးတွေပါ။ တော်တော်ဆိုးတယ်ဗျာ။ ကျနော်တို့ ပဇီကြီးတို့၊ လက်ယက်ကုန်းတို့၊ နောက်ပြီး အနမ့်ပါတို့ပြီးရင် ဒါက အဆိုးဆုံး ဖြစ်ရပ်လို့ ပြောလို့ရ တယ်” ဟု ပြောသည်။   ဒီပဲယင်းမြို့နယ် ပြည်သူ့အုပ်ချုပ်ရေး အဖွဲ့၏ ထုတ်ပြန်ချက်အရ ယခုလေကြောင်း တိုက်ခိုက်မှုမှာ လေယာဉ်ဖြင့် စာသင်ကျောင်းပေါ် တည့်တည့်ဗုံးကြဲခဲ့ခြင်း ဖြစ်သည်ဟု ဆိုသည်။   ဒီပဲယင်းမြို့ အနောက်တောင်ဘက်တွင် ရှိသည့် အိုးထိန်းတွင်းကျေးရွာ လေကြောင်း တိုက်ခိုက်ခံရချိန်တွင် စာသင်ကျောင်း၌ စာမေးပွဲဖြေဆိုနေသူ ကျောင်းသူ/သား ၂၈၉ ဦး ရှိနေသည်ဟု ဒီပဲယင်းမြို့နယ် ပြည်သူ့အုပ်ချုပ် ရေး အဖွဲ့ တာယန်ရှိသူ ပြောသည်။   သေဆုံးသူ ဆရာမနှစ်ဦးနှင့် ကျောင်းသူ/သားများ၏ အမည်နှင့် အတန်းစာရင်းကိုလည်း အမျိုးသားညီညွတ်ရေး အစိုးရ NUG က ထုတ်ပြန်ထားသည်။   ယခုလေကြောင်း တိုက်ခိုက်ခံရမှုသည် ဒီပဲယင်းမြို့နယ်အတွင်း ဒုတိယအကြိမ်မြောက် လူသေဆုံးမှု အများဆုံး ဖြစ်ပြီး ၂၀၂၂ ခုနှစ်၊ စက်တင်ဘာလ ၁၆ ရက်နေ့ကလည်း လက်ယက်ကုန်းကျေးရွာ စာသင်ကျောင်း လေကြောင်း တိုက်ခိုက်ခံရမှုကြောင့် ကလေးငယ် ၁၁ ဦး အပါအဝင် အရပ်သား ၁၃ ဦးအထိ သေဆုံးခဲ့သည်။   အလားတူ စစ်ကိုင်းတိုင်း ကန့်ဘလူက ပဇီကြီး လေကြောင်းဗုံးကြဲမှု၊ ဒီပဲယင်းက လက်ယက်ကုန်းကျေးရွာ စာသင်ကျောင်း တိုက်ခိုက်ခံရမှုနှင့် ကချင်ပြည် ဖားကန့်ဒေသမှ အနန့်ပါ ဗုံးကြဲ တိုက်ခိုက်မှု ပြီးလျှင် ယခု အိုးထိန်းတွင်းကျေးရွာ လေကြောင်းတိုက်ခိုက်ခံရမှုမှာ အဆိုးရွားဆုံး ဖြစ်သည်ဟု ဒေသခံများက ဆိုသည်။   ဓာတ်ပုံ - ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့

ဒီပဲယင်း စာသင်ကျောင်းကို စစ်ကောင်စီ ဗုံးကြဲ၊ ကျောင်းသူ/သား များ သေဆုံး

ဒီပဲယင်း စာသင်ကျောင်းကို စစ်ကောင်စီ ဗုံးကြဲ၊ ကျောင်းသူ/သား များ သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ မေလ ၁၂ ရက်။  စစ်ကိုင်းတိုင်း၊ ဒီပဲ…

  • May 12, 2025
×Close