သတင်း

ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်     သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။   ထိုင်းနိုင်ငံအတွင်း အများပြည်သူနှင့်သက်ဆိုင်သော နေရာများ၌ အရက်၊ ဘီယာ ရောင်းချခြင်းနှင့် သောက်သုံးခြင်းကို တားမြစ်သည့် စည်းမျဉ်းအသစ် (၈) ချက်ကို အစိုးရက ထုတ်ပြန်လိုက်ကြောင်း ဘန်ကောက်ပို့စ်သတင်းစာတွင် ဖော်ပြထားသည်။   မေလ ၁၂ ရက်နေ့တွင် ထုတ်ပြန်ခဲ့သည့် အဆိုပါစည်းမျဉ်းများတွင် ရောင်းချခြင်းသာမက သောက်သုံးခြင်းကိုပါ ပိတ်ပင်ထားခြင်းဖြစ်သည်။   တားမြစ်ချက်များတွင် အောက်ပါအချက်များ ပါဝင်သည် - • လမ်းမပေါ်၊ မော်တော်ယာဉ်ပေါ် သို့မဟုတ် လမ်းဘေးတွင် ရပ်ထားသော ယာဉ်ပေါ်တွင် ရောင်းချခြင်း မပြုရ။ • မီးရထားဘူတာရုံနှင့် ရထားပေါ်တွင် ရောင်းချခြင်း မပြုရ။ (ဘန်ကောက်ဘူတာကြီးရှိ လေအေးပေးစက်ပါ ခမ်းမအတွင်း ကျင်းပသော အထူးပွဲလမ်းများမှအပ) • အများပြည်သူသုံး ဆိပ်ကမ်းနှင့် ကူးတို့သင်္ဘောဆိပ်များတွင် ရောင်းချခြင်း၊ သောက်သုံးခြင်း မပြုရ။ • တစ်နိုင်ငံလုံးရှိ ခရီးသည်တင်ယာဉ် လိုင်းကားဂိတ်များတွင် ရောင်းချခြင်း၊ သောက်သုံးခြင်း မပြုရ။ • အရက်ချက်စက်ရုံများ၏ ထုတ်လုပ်မှုလုပ်ငန်းစဉ်အရ မြည်းစမ်းခြင်းမှလွဲ၍ စက်ရုံဝင်းအတွင်း ရောင်းချခြင်း၊ သောက်သုံးခြင်း မပြုရ။ • အစိုးရဌာနဆိုင်ရာ အဆောက်အအုံနှင့် နိုင်ငံပိုင်လုပ်ငန်းနယ်မြေများတွင် ရောင်းချခြင်း၊ သောက်သုံးခြင်း မပြုရ။ (ဝန်ထမ်းအိမ်ရာ၊ ကလပ်များနှင့် သတ်မှတ်ထားသော ရိုးရာဧည့်ခံပွဲနေရာများမှအပ) • အစိုးရဌာန သို့မဟုတ် နိုင်ငံပိုင်လုပ်ငန်းပိုင် အများပြည်သူအပန်းဖြေပန်းခြံများတွင် ရောင်းချခြင်း၊ သောက်သုံးခြင်း မပြုရ။ • နိုင်ငံပိုင်စီးပွားရေးလုပ်ငန်းများ၏ ရုံးဝင်းအတွင်း ရောင်းချခြင်း၊ သောက်သုံးခြင်း မပြုရ။   အဆိုပါစည်းမျဉ်းများသည် ထုတ်ပြန်သည့်နေ့မှစ၍ ချက်ချင်းအသက်ဝင်မည်ဖြစ်သဖြင့် ခရီးသွားလာသူများနှင့် ဒေသခံများအနေဖြင့် အထူးသတိပြုလိုက်နာရန် တိုက်တွန်းထားပါသည်။   အကျဉ်းချုပ်အားဖြင့် ခရီးသွားလာမှုနယ်မြေများ၊ အများပြည်သူဆိုင်ရာနေရာများနှင့် အစိုးရပိုင်နေရာများတွင် ကန့်သတ်ထားခြင်း ဖြစ်သည်။

ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်

ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။  ထိုင်းနိုင်ငံအတွင်း အများပြ…

  • May 14, 2026
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ     သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။   ဖိလစ်ပိုင်နိုင်ငံ မနီလာမြို့ရှိ အထက်လွှတ်တော်အဆောက်အအုံအတွင်း ဗုဒ္ဓဟူးနေ့ညနေပိုင်းက သေနတ်သံများ ထွက်ပေါ်ခဲ့မှုကြောင့် လွှတ်တော်တစ်ခုလုံးကို ပိတ်ဆို့ (Lockdown) ထားလိုက်ရသည်။   အဆိုပါအဆောက်အအုံအတွင်း၌ နိုင်ငံတကာရာဇဝတ်ခုံရုံး (ICC) က ဖမ်းဝရမ်းထုတ်ပြန်ထားသည့် အထက်လွှတ်တော်အမတ် ရော်နယ်ဒယ်လာရိုဆာ (Ronald Dela Rosa) ခိုလှုံနေခြင်းဖြစ်သည်။   ပစ်ခတ်မှုအတွင်း ထိခိုက်ဒဏ်ရာရရှိသူမရှိကြောင်း တာဝန်ရှိသူများက အတည်ပြုသော်လည်း ပစ်ခတ်သူနှင့် အကြောင်းရင်းကိုမူ စုံစမ်းစစ်ဆေးဆဲဖြစ်သည်။   ပြည်ထဲရေးဝန်ကြီးက ၎င်းတို့အနေဖြင့် ရဲချုပ်ဟောင်းဖြစ်သူ အမတ်ဒယ်လာရိုဆာအား ဖမ်းဆီးရန်မဟုတ်ဘဲ အကာအကွယ်ပေးရန် ရောက်ရှိနေခြင်းဖြစ်ကြောင်းနှင့် လွှတ်တော်အမတ်များအားလုံး ဘေးကင်းစေရန် သမ္မတက ညွှန်ကြားထားကြောင်း ပြောကြားခဲ့သည်။   အမတ်ဒယ်လာရိုဆာသည် သမ္မတဟောင်းဒူတာတေး လက်ထက် ရဲချုပ်အဖြစ် တာဝန်ယူစဉ် "မူးယစ်ဆေးဝါးတိုက်ဖျက်ရေးစစ်ပွဲ" အတွင်း လူပေါင်းထောင်ချီ သတ်ဖြတ်ခံရမှုတွင် ပါဝင်ပတ်သက်နေသည်ဟု ICC က စွပ်စွဲထားသည်။   ICC သည် သမ္မတဟောင်းဒူတာတေးကို ၂၀၂၅ ခုနှစ် မတ်လကတည်းက နယ်သာလန်နိုင်ငံ သည်ဟိဂ်မြို့တွင် ဖမ်းဆီးထိန်းသိမ်းထားပြီးဖြစ်သည်။   ဖိလစ်ပိုင်အစိုးရက ၎င်းတို့သည် ICC အဖွဲ့ဝင်အဖြစ်မှ နုတ်ထွက်ထားသဖြင့် စစ်ဆေးပိုင်ခွင့်မရှိဟု ငြင်းဆိုထားသော်လည်း ICC ကမူ အဆိုပါရာဇဝတ်မှုများသည် ဖိလစ်ပိုင်နိုင်ငံ အဖွဲ့ဝင်ဖြစ်နေသည့် ၂၀၁၁ ခုနှစ်မှ ၂၀၁၉ ခုနှစ်အတွင်း ဖြစ်ပွားခဲ့ခြင်းကြောင့် တရားစီရင်ပိုင်ခွင့်ရှိကြောင်း ဆုံးဖြတ်ထားသည်။   လက်ရှိတွင် လွှတ်တော်အပြင်ဘက်၌ ဆန္ဒပြမှုများရှိနေပြီး အဆောက်အအုံအတွင်း စစ်ဘက်နှင့် ရဲတပ်ဖွဲ့ဝင်များက လုံခြုံရေးရယူထားသည်။

ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ

ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ  သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။  ဖိလစ်ပိုင်နိုင်ငံ မနီလာမြို့ရှိ အထက်လွှတ်တ…

  • May 14, 2026
ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   ရှမ်းပြည်အရှေ့ပိုင်း၊ ကျိုင်းတုံမြို့ပေါ်တွင် နေ့ခင်းကြောင်တောင် ရွှေဆိုင်ပိုင်ရှင်တစ်ဦး သေနတ်ဖြင့် ပစ်သတ်ခံ ရပြီး ရွှေ ၃ ပိဿာနှင့် မော်တော်ယာဉ်ပါ ဓားပြတိုက်လုယူခံရသည့် ဖြစ်စဉ်တစ်ခု ဖြစ်ပွားခဲ့ကာ ကျူးလွန်သူ တရားခံ ၃ ဦးမှာ ယနေ့အထိ ထွက်ပြေးလွတ်မြောက်နေဆဲဖြစ်သည်။   ဖြစ်စဉ်မှာ ကျိုင်းတုံမြို့မဈေးကြီးတွင် 'ခေမာရဋ်' ရွှေဆိုင်ဖွင့်လှစ်ထားသည့် အသက် ၄၀ အရွယ် ဆိုင်ပိုင်ရှင် ဦးစိုင်းယီသည် မိသားစုဝင် ၃ ဦးနှင့်အတူ ၎င်းတို့၏ နေအိမ်ရှိရာ ရပ်ကွက် (၃)၊ နောင်ခိုက်ရပ်ကွက်၊ ကျိုင်းငန်း ဝပ်အင်းလမ်းသို့ မော်တော်ယာဉ်ဖြင့် ပြန်လာစဉ် ပြီးခဲ့သည့် မေလ ၁၃ ရက်နေ့ မွန်းလွဲ ၁ နာရီခွဲခန့်တွင် အခင်း ဖြစ်ပွားခဲ့ခြင်း ဖြစ်သည်။   နေအိမ်အနီးသို့ ရောက်ရှိစဉ် အမည်မသိ အမျိုးသား ၃ ဦးက PAJERO IO အမျိုးအစား မော်တော်ယာဉ် တစ်စီးဖြင့် ရောက်ရှိလာပြီး ဆိုင်ပိုင်ရှင်ကို သေနတ်ဖြင့် ၂ ချက် ပစ်ခတ်ခဲ့ခြင်း ဖြစ်သည်။   သေဆုံးသူနှင့် နီးစပ်သူတစ်ဦးက “လူမှုရေးအရှုပ်အရှင်း ဘာညာတော့ မကြားမိပါဘူး။ အေးအေးလူလူထဲကပဲ။ ရန်ငြိုးလည်း မရှိပါဘူး။ ခုတောင် အံ့အားသင့်နေကြတာ။ ပစ္စည်းလိုချင်လို့ လုပ်တာပဲ ဖြစ်မှာပါ။ ကျိုင်းတုံမှာ က ဒါတွေ မဆန်းတော့ပါဘူး။” ဟူ ပြောသည်။   ကျူးလွန်သူများသည် သေနတ်ဖြင့် ပစ်ခတ်ပြီးနောက် ကားပေါ်တွင် ပါလာသည့် ကျန်မိသားစုဝင် ၂ ဦးကိုပါ လမ်းပေါ်သို့ ကန်ချကာ ကားအတွင်းပါရှိသည့် ရွှေ ၃ ပိဿာခန့်နှင့်အတူ ၎င်းတို့ စီးနင်းလာသည့် မော်တော် ယာဉ်ကိုပါ လုယူမောင်းနှင် ထွက်ပြေးသွားခဲ့ကြခြင်း ဖြစ်သည်။   သေနတ်ဖြင့် အနီးကပ်ပစ်ခတ်ခံရသည့် ဆိုင်ပိုင်ရှင် ဦးစိုင်းယီမှာ အခင်းဖြစ်နေရာ၌ပင် ပွဲချင်းပြီး သေဆုံး သွားခဲ့သည်။   ကျိုင်းတုံမြို့ခံတစ်ဦးကလည်း “ဓားပြတိုက်တာတော့ ခဏခဏပဲ။ သေတာတို့ သတ်သွားတာတို့ သိပ်မဖြစ်ဘူး။ မကြားတာ တော်တော်ကြာပြီ။ ဒီမှာက အဖွဲ့အစည်းများတော့ တစ်ခုခုဆို ပြောရခက်တယ်။ ဖြစ်ရင်လည်း စစ်တပ်က ကိုင်တာမဟုတ်တော့ တိုင်လို့တောလို့ သိပ်မထူးဘူး” ဟု ပြောသည်။   ကျိုင်းတုံမြို့သည် စစ်တပ်က မြို့ပြလုံခြုံရေးကို ထိန်းချုပ်ရန် ရုန်းကန်နေရသည့်အလျောက် ဒေသတွင်း အုပ်ချုပ်ရေးပိုင်းများတွင် စစ်တပ်အရာရှိများနှင့်အတူ ပြည်သူ့စစ် (ဌာနေ) အဖွဲ့ဝင်များကိုပါ တွဲဖက်ခန့်အပ် တာဝန်ပေးထားသည်။ သို့သော်လည်း မြို့ပေါ်နေရာအနှံ့အပြား၌ ခိုးဆိုးလုယက်မှုများနှင့် ရာဇဝတ်မှုပေါင်းစုံ မကြာခဏ ဆိုသလို ဖြစ်ပွားနေသည်ဟု ဒေသခံများက ပြောသည်။   ပြီးခဲ့သည့် မေလ ၁၂ ရက်နေ့ကလည်း ကျိုင်းတုံမြို့မဈေးအနီး၊ နားဟွေ့ရွာ၊ သစ်တောရုံးရှေ့ BOC လမ်းတွင် လမ်းလျှောက်လာသည့် ဒေသခံ ၂ ဦးကို အမည်မသိ လူ ၄ ဦးက ရှေ့နှင့်နောက် ညှပ်ပိတ်ရပ်ကာ ပိုက်ဆံအိတ်နှင့် လက်ကိုင်ဖုန်းကို ဓားပြတိုက်လုယူသွားသည့် ဖြစ်စဉ်တစ်ခုလည်း ဖြစ်ပွားခဲ့သေးသည်။   စစ်အာဏာသိမ်းပြီးနောက်ပိုင်း ကျိုင်းတုံမြို့ပေါ်တွင် ဖြစ်ပွားခဲ့သည့် ရာဇဝတ်မှုအများစုမှာ တရားခံ ပေါ်ပေါက် ခြင်းနှင့် ဖမ်းဆီးရမိခြင်း မရှိသလောက် နည်းပါးသည့်အပြင်၊ ဖမ်းဆီးရမိသည့် တရားခံအနည်းစုကိုလည်း စစ်တပ်၏ ရဲစခန်းများက ထိရောက်စွာ အရေးယူနိုင်ခြင်း မရှိကြောင်း ရဲတပ်ဖွဲ့နှင့် နီးစပ်သည့် သတင်းရင်း မြစ်များက ပြောသည်။   #ကျိုင်းတုံမြို့

ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ


ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ ရှမ်းပြည်အရှေ့ပိုင်း၊ ကျ…

  • May 14, 2026
ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက်

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   ရှမ်းပြည်တောင်ပိုင်း၊ ရွာငံမြို့မရဲစခန်းတွင် သက်ငယ်မုဒိန်းမှုဖြင့် ဖမ်းဆီးစစ်ဆေးခံနေရသည့် တရားခံတစ်ဦး သည် ရဲတပ်ဖွဲ့ဝင်များ၏ ပေါ့ဆမှုကြောင့် လက်ထိပ်ခတ်လျက်အတိုင်း စခန်းအတွင်းမှ ထွက်ပြေး လွတ်မြောက် သွားသဖြင့် ၎င်းအား ပြန်လည်ဖမ်းဆီးနိုင်ရေးအတွက် လိုက်လံရှာဖွေနေရဆဲဖြစ်ကြောင်း နစ်နာသူမိသားစုနှင့် အမှုလိုက်ပါဆောင်ရွက်ပေးနေသူများက ပြောသည်။   ဖြစ်စဉ်မှာ ရွာငံမြို့နယ်၊ တပင်ပျော်ကျေးရွာတွင် ပြီးခဲ့သည့် မေလ ၇ ရက်နေ့က အသက် ၁၄ နှစ်အရွယ် အမျိုး သမီးငယ် တစ်ဦးအား တစ်ရွာတည်းသားဖြစ်သူ အသက် ၄၀ အရွယ် မောင်တူးဆိုသူက ရိုက်နှက် အဓမ္မပြုကျင့် ခဲ့ခြင်း ဖြစ်သည်။   အဆိုပါကျူးလွန်သူကို မေလ ၉ ရက်နေ့တွင် ရဲတပ်ဖွဲ့က ဖမ်းဆီးရမိခဲ့သော်လည်း စခန်း၌ စစ်ချက်ယူနေစဉ် အတွင်း ထွက်ပြေးလွတ်မြောက်သွားခဲ့ခြင်း ဖြစ်သည်။   နစ်နာသူနှင့် နီးစပ်သူတစ်ဦးက “ရဲတွေစစ်ပြီးတော့ ဆရာမတွေ စစ်ခါနီးအချိန် ပြေးသွားတာ။ သူတို့ တစ်ညလုံး ဝိုင်းရှာကြတာပဲ။ တွေ့မှမတွေ့တာ။ မိသားစုဝင်ဖက်ကတော့ ရဲကိုပဲ အပစ်တင်နေကြတယ်။ ရဲကလည်း တော်တော်ပေါ့ဆတာ။ ဂိတ်တွေပိတ်ခိုင်းထားတယ်လို့ ပြောတယ်” ဟု ပြောသည်။   လက်ရှိတွင် အဆိုပါ ထွက်ပြေးလွတ်မြောက်နေသူ မောင်တူးကို ရွာငံမြို့မရဲစခန်းတွင် (ပ)၆၇/ ၂၀၂၆၊ ရာဇသတ် ကြီး ဥပဒေပုဒ်မ ၃၂၃ (နာကျင်အောင်ပြုလုပ်မှု) ၊ ပုဒ်မ ၃၇၆ (မုဒိန်းမှု) တို့ဖြင့် အမှုဖွင့်လှစ်ထားကြောင်း အမှု လိုက်ပါဆောင်ရွက်နေသူများက အတည်ပြုသည်။   တစ်ဖက်တွင်လည်း အသက်မပြည့်သေးဘဲ အဓမ္မပြုကျင့်ခံခဲ့ရသည့် အမျိုးသမီးငယ်မှာ ရိုက်နှက်ခံရသည့် ဒဏ်ရာများ သက်သာလာသော်လည်း ပတ်ဝန်းကျင်၏ ရှုံ့ချမှုများကြောင့် စိတ်ပိုင်းဆိုင်ရာ ပြင်းထန်စွာ ထိခိုက် ဒဏ်ရာရရှိနေပြီး စိတ်ပိုင်းဆိုင်ရာ ပြန်လည်ကုစားခြင်း (Counseling) ဆောင်ရွက်ပေးမည့် အဖွဲ့အစည်းများ အရေးပေါ်လိုအပ်နေကြောင်း ဆိုသည်။   အမှုလိုက်ပါဆောင်ရွက်ပေးနေသည့် လူမှုရေးတက်ကြွလှုပ်ရှားသူတစ်ဦးက နစ်နာသူ၏ လက်ရှိအခြေအနေကို ယခုကဲ့သို့ ရှင်းပြသည်။   “အရိုက်ခံရတဲ့ ဒဏ်ရာပြောရမလား အညိုအမဲစွဲတာတွေတော့ ပျောက်သွားပြီ။ စိတ်ကတော့ လုံးဝမရသေး ဘူး။ တော်တော်အချိန်ယူရဦးမှာ။ လောလောဆယ်တော့ မီဒီယာတွေ မဖြေနိုင်လောက်သေးဘူး။”   စစ်အာဏာသိမ်းပြီးနောက်ပိုင်း ရွာငံမြို့နယ်အတွင်း ဓနုအမျိုးသားလွတ်မြောက်ရေးတပ်မတော် (DPLA)၊ ဓနု ပြည်နယ် အမျိုးသား ကာကွယ်ရေးတပ်ဦး (DSNA) ကဲ့သို့သော တော်လှန်ရေးအဖွဲ့များသာမက စစ်တပ်နှင့် ၎င်းတို့လက်အောက်ခံ ပအိုဝ်းပြည်သူ့စစ် (PNA)၊ ပျူစောထီအဖွဲ့များအပြင် RCSS နှင့် SSPP တို့ပါ ရံဖန်ရံခါ လှုပ်ရှားသွားလာလျက်ရှိသည်။   အဆိုပါ နယ်မြေမတည်ငြိမ်မှုနှင့် ရှုပ်ထွေးသည့် စစ်ရေးအခင်းအကျင်းကို အခွင့်ကောင်းယူကာ အပြန်အလှန် လုပ်ကြံသတ်ဖြတ်မှုများနှင့် ပြန်ပေးဆွဲမှုများ နေ့စဉ်နှင့်အမျှ ဖြစ်ပွားနေသည့် ရွာငံဒေသတွင် ယခုကဲ့သို့ အဆိုးရွားဆုံး လူမှုရေးရာရာဇဝတ်မှု ကျူးလွန်သူပါ စနစ်တကျ ထိန်းသိမ်းနိုင်ခြင်းမရှိဘဲ လွတ်မြောက်သွားခြင်း အပေါ် ဒေသခံများအကြား တရားဥပဒေစိုးမိုးရေးအတွက် ပိုမိုစိုးရိမ်ပူပန်နေကြသည်။ #သက်ငယ်မုဒိမ်း #ရွာငံ

ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက်


ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ ရှမ်းပြည်တောင်ပ…

  • May 14, 2026
ကချင်ပြည်သို့ ကုန်းလမ်းပေါက်ရန် စစ်တပ် အင်အားအလုံးအရင်းဖြင့် စစ်ကြောင်းထိုး

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   ရှမ်းပြည်မြောက်ပိုင်း မိုးမိတ်မြို့နယ်မှတစ်ဆင့် မဘိမ်း-ငါးအိုးဘက်သို့ စစ်ကြောင်းထိုးကာ ကချင်ပြည်အတွင်းသို့ ကုန်းလမ်းဖြင့် ဝင်ရောက်နိုင်ရန် စစ်တပ်က အင်အားအလုံးအရင်းဖြင့် စစ်ရေးပြင်ဆင်နေမှုကြောင့် နှစ်ဖက် စစ်ရေး တင်းမာမှုနှင့် တိုက်ပွဲများ ပိုမိုပြင်းထန်လာနေသည်ဟု တော်လှန်ရေးပူးပေါင်းတပ်ဖွဲ့များက ပြောသည်။   ပြီးခဲ့သည့် မေလဆန်းပိုင်းမှ စတင်ကာ မန္တလေးမြို့ဘက်မှ မိုးမိတ်မြို့ဘက်သို့ စစ်တပ်၏ စစ်ကားယာဉ်တန်းများ အင်အားအလုံးအရင်းဖြင့် ဆက်တိုက်တက်လာခဲ့ခြင်းဖြစ်ပြီး၊ လက်ရှိတွင် စစ်တပ်က မိုးမိတ်နှင့် မဘိမ်းမြို့ ကြား ရှိ ကျေးရွာများမှ ဒေသခံ ပြည်သူများကို နေအိမ်များမှ အတင်းအဓမ္မ ထပ်မံရွှေ့ပြောင်းခိုင်းထားကြောင်း ဆို သည်။   စစ်တပ်သည် မိုးမိတ်မှ မဘိမ်း-ငါးအိုး လမ်းကြောင်းအတိုင်း ကချင်ပြည်အတွင်းသို့ မြေပြင်စစ်ကြောင်း ပေါက် ထွက်နိုင်ရန် စစ်ရေးဗျူဟာချ၍ ထိုးစစ်ဆင်ရန် ကြိုးပမ်းနေခြင်းဖြစ်ကြောင်း တော်လှန်ရေးတပ်ဖွဲ့များက သုံးသပ် ထားသည်။   မိုးမိတ်နှင့် မဘိမ်းကြား စစ်ကောင်စီတပ်၏ လှုပ်ရှားမှုနှင့်ပတ်သက်၍ ဒေသခံ သတင်းရင်းမြစ်တစ်ဦးက “မန္တလေးက တက်လာတဲ့ စစ်တပ်ယာဉ်တန်းတွေ မိုးမိတ်ထဲ ရောက်လာကတည်းက မြေပြင်က တော်တော်လေး လှုပ်ခတ်သွားတာ။ အခုဆို မိုးမိတ်နဲ့ မဘိမ်းကြားက ရွာတွေကို စစ်တပ်က အတင်းအဓမ္မ ရွှေ့ခိုင်းနေပြီ။ သူတို့ က ကချင်ပြည်ဘက်ကို စစ်ကြောင်းပေါက်အောင် သွားချင်လို့ လမ်းကြောင်းရှင်းတဲ့ သဘောပဲ။ ရွာသားတွေ လည်း ပြေးနေကြရတယ်” ဟု ပြောသည်။     ပြီးခဲ့သည့်ရက်ပိုင်းကလည်း ငါးအိုးကျေးရွာဘက်မှ ထွက်ခွာလာသည့် စစ်တပ် စစ်ကြောင်းကို ကချင်လွတ်လပ် ရေး တပ်မတော် (KIA) ၊ ပြည်သူ့ကာကွယ်ရေး တပ်မတော် (PDF) နှင့် ကျောင်းသားတပ်မတော် (ABSDF) ပူးပေါင်းတပ်ဖွဲ့များက လမ်းခရီးတွင် ကြားဖြတ်တိုက်ခိုက်ခဲ့သဖြင့် စစ်တပ်ဘက်က အထိနာကာ ပြန်လည် ဆုတ် ခွာသွားခဲ့ရသည့် ဖြစ်စဉ်ရှိခဲ့သည်။   ဒေသတွင်း တော်လှန်ရေးတပ်ဖွဲ့မှ ရဲဘော်တစ်ဦးက “လမ်းပိုင်းအများစုကို ကျနော်တို့ဘက်က ထိန်းချုပ်ထား တော့ သူတို့ မြေပြင်စစ်ကြောင်း ထိုးဖို့ တော်တော်ရုန်းကန်နေရတယ်။ ဒါပေမဲ့ ရွှေကူနဲ့ ဗန်းမော်ဘက်ကို လမ်းပွင့်ဖို့ သူတို့ အသေအလဲ ကြိုးစားလာနိုင်တာမို့ စစ်ရေးအရ အနီးကပ် စောင့်ကြည့်ပိတ်ဆို့ထားပါတယ်။ ပြည်သူတွေအနေနဲ့လည်း စစ်ရေးသတိ အမြဲရှိနေဖို့ လိုပါတယ်” ဟု ပြောသည်။   စစ်တပ်သည် ဗန်းမော်နှင့် ရွှေကူမြို့နယ်ဘက်သို့ ကုန်းလမ်းပေါက်ရန် ဆက်လက် ကြိုးပမ်းနေဆဲ ဖြစ်ရာ တော် လှန်ရေး ပူးပေါင်းတပ်ဖွဲ့များဘက်ကလည်း ၎င်းတို့၏ စစ်ကြောင်းများကို အနီးကပ်စောင့်ကြည့်ကာ လမ်း ကြောင်းများကို ပိတ်ဆို့ထားသည့် အနေအထားတွင် ရှိနေသည်။   လက်ရှိတွင် မြစ်ကြီးနား - ဗန်းမော် - မန္တလေး လမ်းပိုင်းတစ်လျှောက်နှင့် ရွှေလီမြစ်ဝှမ်းဒေသများကို တော် လှန်ရေး ပူးပေါင်းတပ်ဖွဲ့များက စိုးမိုးထိန်းချုပ်ထားသဖြင့် စစ်တပ်စစ်ကြောင်းများ လှုပ်ရှားရန် ခက်ခဲနေသည်။   တိုက်ပွဲများ အချိန်မရွေး ပိုမိုပြင်းထန်လာနိုင်သည့် အခြေအနေကြောင့် ဒေသခံပြည်သူများအနေဖြင့် ဘေးလွတ် ရာသို့ ကြိုတင်ရှောင်တိမ်းကြရန် KIA ဘက်က သတိပေးနှိုးဆော်ထားသည်။   ဓါတ်ပုံ - ပုံဟောင်း   #ကချင်ပြည်နယ်  

ကချင်ပြည်သို့ ကုန်းလမ်းပေါက်ရန် စစ်တပ် အင်အားအလုံးအရင်းဖြင့် စစ်ကြောင်းထိုး



ကချင်ပြည်သို့ ကုန်းလမ်းပေါက်ရန် စစ်တပ် အင်အားအလုံးအရင်းဖြင့် စစ်ကြောင်းထိုး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ ရှမ်းပြည်မြောက်ပိ…

  • May 14, 2026
ဗုံးကြဲပြီး ဒရုန်းဖြင့်စောင့်ကြည့်ကာ ထပ်ဆင့်တိုက်ခိုက်သည့် ဗျူဟာသစ် စစ်တပ် အသုံးပြုလာ

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   ချင်းပြည်၊ မင်းတပ်မြို့နှင့် စစ်ကိုင်းတိုင်း၊ ရွှေဘိုမြို့နယ်တို့တွင် စစ်တပ်က လေကြောင်းမှ ဗုံးကြဲတိုက်ခိုက်မှုများ ဆက်တိုက်လုပ်ဆောင်ခဲ့ရာ စစ်သုံ့ပန်းများ အပါအဝင် အရပ်သားပြည်သူများ သေဆုံးမှုရှိခဲ့ကြောင်း ဒေသခံများ နှင့် တော်လှန်ရေးအဖွဲ့အစည်းများက ပြောသည်။   အထူးသဖြင့် စစ်တပ်သည် လေကြောင်းမှ ဗုံးကြဲပြီးနောက် ဒဏ်ရာရရှိသူများကို လာရောက်ကူညီသည့် ကယ် ဆယ်ရေးသမားများကို ဒရုန်းဖြင့် စောင့်ကြည့်ကာ ဒုတိယအကြိမ် ထပ်ဆင့်ဗုံးကြဲသည့် ဗျူဟာ အသစ်ကို အသုံးပြုလာနေကြောင်း ချင်းပြည်သူ့အစည်းအရုံး (CPU/CPA) က သတိပေးလိုက်သည်။   ပြီးခဲ့သည့် မေလ ၁၁ ရက်နေ့ ညပိုင်းမှ မေလ ၁၂ ရက်နေ့ ညနေပိုင်းအထိ ၂၄ နာရီအတွင်း မင်းတပ်မြို့ပေါ်သို့ စစ်တပ်က လေကြောင်းတိုက်ခိုက်မှု ၁၁ ကြိမ်အထိ ဆက်တိုက်ပြုလုပ်ခဲ့ရာ စစ်သုံ့ပန်းများ အပါအဝင် လူ ၄ ဦး သေဆုံးခဲ့ပြီး၊ ပြည်သူ့နေအိမ် ၁၅ လုံးနှင့် အုပ်ချုပ်ရေးရုံးဌာန ၁၀ ခုထက်မနည်း ပျက်စီးဆုံးရှုံးခဲ့ရသည်။   လေကြောင်းဗျူဟာ အသစ်နှင့် ပတ်သက်၍ ချင်းပြည်သူ့အစည်းအရုံး (CPU/CPA) တာဝန်ရှိသူတစ်ဦးက “စစ်တပ်က အခုနောက်ပိုင်း အရင်လို ဗုံးကြဲပြီး ပြန်လှည့်သွားတာမျိုး မဟုတ်တော့ဘူး။ ဗုံးကြဲပြီးရင် ဒရုန်းနဲ့ အပေါ်ကနေ စောင့်ကြည့်နေတာ။ အဲဒီနောက် ဗုံးဒဏ်ကြောင့် ထိခိုက်ဒဏ်ရာရတဲ့သူတွေကို ကူညီဖို့ လူတွေ စုလာတဲ့အချိန်ကျမှ နောက်တစ်ကြိမ် ထပ်ဆင့်ဗုံးကြဲတဲ့ ဗျူဟာကို ကောက်ကျစ်စွာ အသုံးပြုလာတာ တွေ့ရ တယ်” ဟု ပြောသည်။     အလားတူ စစ်ကိုင်းတိုင်း၊ ရွှေဘိုမြို့နယ်၊ မဲတောကျေးရွာရှိ ဘုန်းကြီးကျောင်းကိုလည်း မေလ ၁၁ ရက်နေ့ ညပိုင်း တွင် စစ်တပ်က လေကြောင်းမှ ဗုံး ၂ လုံး ကြဲချတိုက်ခိုက်ခဲ့ရာ ဆွမ်းစားကျောင်းဆောင်ပေါ်သို့ တိုက်ရိုက် ကျရောက် ပေါက်ကွဲခဲ့သည်။   ထိုဖြစ်စဉ်ကြောင့် ဘုန်းကြီးကျောင်းအတွင်းရှိ အသက် ၃၀ အရွယ် အမျိုးသားတစ်ဦး နေရာ၌ပင် သေဆုံးခဲ့ပြီး အမျိုးသမီး ၂ ဦးအပါအဝင် ၃ ဦး ပြင်းထန်စွာ ဒဏ်ရာရရှိခဲ့သည်။   မြေပြသတင်းရင်းမြစ် တစ်ဦးက “ညဘက်ကြီး ဗုံးက ဝုန်းဆိုပြီး ကျောင်းပေါ်တည့်တည့် ကျလာတာ။ အိပ်နေ ရင်းနဲ့ကို အလန့်တကြား ထပြေးကြရတယ်။ အခုက ဘုန်းကြီးကျောင်းတွေပါ မချန်ဘဲ ပစ်မှတ်ထား တိုက်ခိုက် လာတော့ ဘယ်နေရာမှ မလုံခြုံတော့ဘူး။ ရွာထဲမှာလည်း လူစုလူဝေးမလုပ်ရဲကြတော့ဘူး” ဟု ပြောသည်။   စစ်တပ်သည် စစ်ရေးပစ်မှတ်မဟုတ်သည့် ဘာသာရေး အဆောက်အအုံများ၊ အရပ်သားပြည်သူများနှင့် ကယ်ဆယ်ရေးသမားများကိုပါ အငြိုးတေးဖြင့် ပစ်မှတ်ထားတိုက်ခိုက်လာနေခြင်း ဖြစ်သည်။   မြေပြင်စစ်မျက်နှာတွင် အထိနာနေသည့် စစ်တပ်သည် လေကြောင်း အသာစီးရမှုကို အသုံးချကာ အရပ်သား လူထုအား စိတ်ဓာတ်ရေးရာ ခြိမ်းခြောက်ရန်အတွက် ယခုကဲ့သို့ ဗုံးကြဲတိုက်ခိုက်မှုများကို ရက်ဆက် လုပ်ဆောင် နေခြင်း ဖြစ်သည်ဟု ဆိုသည်။   ထို့ကြောင့် ပြည်သူများအနေဖြင့် လေကြောင်းရန် သတိပေးချက်များကို ဂရုပြုရန်နှင့် လူစုလူဝေးများကို အထူးရှောင်ရှားကြရန် ဒေသတွင်း တော်လှန်ရေးအဖွဲ့အစည်းများက တိုက်တွန်းနှိုးဆော်ထားသည်။   #ချင်းပြည် #မင်းတပ် #စစ်တပ် #ရွှေဘို

ဗုံးကြဲပြီး ဒရုန်းဖြင့်စောင့်ကြည့်ကာ ထပ်ဆင့်တိုက်ခိုက်သည့် ဗျူဟာသစ် စစ်တပ် အသုံးပြုလာ


ဗုံးကြဲပြီး ဒရုန်းဖြင့်စောင့်ကြည့်ကာ ထပ်ဆင့်တိုက်ခိုက်သည့် ဗျူဟာသစ် စစ်တပ် အသုံးပြုလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ ချင်းပြ…

  • May 14, 2026
မိုးဗြဲတွင် မိုးစပါးစိုက်ပျိုးမှု ထက်ဝက်လျော့နည်း၊ ဆန်ဈေးထပ်တက်မည်ကို စစ်ဘေးရှောင်များ စိုးရိမ်

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   ရှမ်းပြည်တောင်ပိုင်းနှင့် ကရင်နီပြည်အစပ်၊ ဖယ်ခုံမြို့နယ်၊ မိုးဗြဲမြို့တွင် စစ်ရေးမတည်ငြိမ်မှုနှင့် မြေပြင် အခြေ အနေများကြောင့် လာမည့်မိုးရာသီ စပါးစိုက်ပျိုးမှု လယ်ဧကထောင်နှင့်ချီ၍ ရပ်နားထားရသဖြင့် ဆန်ဈေးနှုန်း များ ထပ်မံမြင့်တက်လာမည်ကို ဒေသတွင်း ခိုလှုံနေသည့် စစ်ဘေးရှောင်များနှင့် ပြည်သူများ စိုးရိမ်နေကြသည်။   မိုးဗြဲမြို့၊ ဘီလူးချောင်းဘေး အနီးတစ်ဝိုက် ပတ်ပတ်လည်ရှိ လယ်ကွင်းများနှင့် ဘီလူးချောင်း အနောက်ဘက် ခြမ်းရှိ နောင်ခိုက်၊ လက်ပံကွင်း၊ စပါးကွင်းတို့တွင် လယ်ဧကတစ်ထောင်ကျော် ရှိသော်လည်း ယခုနှစ်တွင် မိုးစပါးစိုက်ပျိုးသူ ထက်ဝက်ကျော်ခန့် လျော့နည်းသွားခြင်း ဖြစ်ပြီး လက်ရှိအချိန်အထိ စိုက်ပျိုးသူ မရှိသ လောက် နည်းပါးနေဆဲ ဖြစ်သည်။   မိုးဗြဲမြို့အတွင်း ခိုလှုံနေသည့် စစ်ဘေးရှောင် ပြည်သူတစ်ဦးက ကြုံတွေ့နေရသည့် မြေပြင်အခြေအနေနှင့် ပတ်သက်၍ ယခုကဲ့သို့ ပြောသည်။   “လယ်ထဲဆင်းရင် တဝုန်းဝုန်းနဲ့ ဘယ်ချိန်ကျလာမလဲ မသိဘူး။ အသက်နဲ့ရင်းရတော့ စိုက်မယ့်လူ မရှိတော့ဘူး။ တချို့လည်း စိုက်ကြတယ်။ မကြောက်တတ်တဲ့လူ နည်းနည်းပါးပါးပေါ့။”   အလားတူ ဘီလူးချောင်း အရှေ့ဘက်ခြမ်းရှိ လယ်ကွင်းများမှာ စစ်တပ် လက်အောက်ခံ တပ်စခန်းများနှင့် နီးကပ် နေခြင်း၊ မိုးဗြဲဆည်မှ စိုက်ပျိုးရေရရှိနိုင်မှု အာမခံချက်မရှိခြင်း၊ ဒေသခံအများစု စစ်ဘေးရှောင်နေရခြင်းတို့အပြင် ဓာတ်မြေဩဇာ၊ ပိုးသတ်ဆေးနှင့် စက်သုံးဆီ ဈေးနှုန်းများ ၃ ဆခန့်အထိ မြင့်တက်လာခြင်းတို့ကြောင့် တောင်သူ များ မိုးစပါး မစိုက်ပျိုးနိုင်ကြခြင်း ဖြစ်သည်။   ထို့ပြင် စစ်တပ်က လယ်ကွင်းအတွင်း သွားရောက်သည့် တောင်သူများကို လုံခြုံရေးအကြောင်းပြ ပိတ်ပင်ခြင်း၊ ဒရုန်းများဖြင့် စောင့်ကြည့်ခြင်း၊ လယ်ကွင်းအချို့တွင် မြေမြုပ်မိုင်းအန္တရာယ်များ ရှိနေခြင်းနှင့် တောင်သူအချို့ ပေါ်တာဆွဲခံရခြင်းတို့ကြောင့် တောင်သူများ လယ်ယာလုပ်ငန်းခွင်သို့ မဆင်းရဲကြကြောင်း စစ်ဘေးရှောင်များက ပြောသည်။   မိုးဗြဲဒေသ၏ အနာဂတ် စားနပ်ရိက္ခာအခြေအနေအပေါ် ဒေသတွင်း စစ်ဘေးရှောင်အရေး ကူညီဆောင်ရွက်ပေး နေသူ တစ်ဦးကလည်း ယခုကဲ့သို့ သုံးသပ်ပြောဆိုသည်။   “မိုးဗြဲဆိုတာ ဆန်တအားထွက်တဲ့ ဒေသပဲလေ။ ဒီလိုနေရာတောင် မစိုက်နိုင်ဘူးဆိုတော့ လာမယ့်နှစ် ဆန်ဈေးကိုပဲ ခန့်မှန်းလို့ရနေပြီ။ အလုပ်သမားလည်း ခေါ်ရခက်တယ်လို့ ပြောနေကြတာပဲ။ စိုက်တဲ့သူလည်း ခုက အကုန်မရောက်သေးဘူးလေ။ ဒီမိုးရာသီ နည်းနည်းငြိမ်ရင်တော့ တော်တော်များများ ပြန်လာကြမှာပါ။”   မိုးဗြဲမြို့တွင် ရှမ်းမလေး၊ မနောသုခ၊ မနောနီ၊ ကောက်ညင်းဆန်၊ တောင်ယာဆန်နှင့် ဒေသထွက် ရှမ်းဆန်များကို အဓိက စိုက်ပျိုးကြပြီး လက်ရှိ မြေပြင်ပေါက်ဈေးအရ ဆန်တစ်အိတ်လျှင် ပျှမ်းမျှ မြန်မာကျပ်ငွေ ၁၆၀,၀၀၀ ဝန်းကျင်အထိ ရှိနေကြောင်း ဒေသခံများက ပြောသည်။   #မိုးဗြဲမြို့ #မိုးစပါး #စစ်ဘေးရှောင်  

မိုးဗြဲတွင် မိုးစပါးစိုက်ပျိုးမှု ထက်ဝက်လျော့နည်း၊ ဆန်ဈေးထပ်တက်မည်ကို စစ်ဘေးရှောင်များ စိုးရိမ်


မိုးဗြဲတွင် မိုးစပါးစိုက်ပျိုးမှု ထက်ဝက်လျော့နည်း၊ ဆန်ဈေးထပ်တက်မည်ကို စစ်ဘေးရှောင်များ စိုးရိမ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ …

  • May 14, 2026
ကျောင်းဖွင့်ခါနီးတွင် တနင်္သာရီရှိ စာသင်ကျောင်းကို စစ်တပ် လေကြောင်းမှဗုံးကြဲ

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ် အတွင်းရှိ တကူကျေးရွာ အထက်တန်းကျောင်းကို စစ်တပ်က လေကြောင်းမှ ဗုံးကြဲတိုက်ခိုက်ခဲ့ရာ စာသင်ကျောင်းဆောင် နှစ်ဆောင် ပြင်းထန်စွာ ပျက်စီးသွားခဲ့ကြောင်း ဒေသခံရွာသားများက ပြောသည်။   မေလ ၁၃ ရက်နေ့၊ နံနက် ၁၀ နာရီဝန်းကျင်ခန့်တွင် မြေပြင်၌ တစ်စုံတစ်ရာ တိုက်ပွဲဖြစ်ပွားခြင်းမရှိဘဲ စစ်တပ်က တိုက်လေယာဉ်နှစ်စီးဖြင့် လာရောက်ဗုံးကြဲခဲ့ခြင်းဖြစ်ပြီး ကျောင်းဝင်းအတွင်းရှိ ကျောင်းဆောင် ၅ ဆောင်အနက် နှစ်ထပ်စာသင်ဆောင် တစ်ဆောင်နှင့် ရုံးခန်းပါရှိသည့် ကျောင်းဆောင်တို့ ပျက်စီးသွားခဲ့ရသည်။   ယင်းဖြစ်စဉ်နှင့်ပတ်သက်၍ အသက် ၅၀ အရွယ် ဒေသခံရွာသားတစ်ဦးက “ဝုန်း ဆိုပြီး အသံကြီး တစ်ချက် ကြားရတယ်။ ပြီးတာနဲ့ ပွိုင့်ဖိုက် (Point 5) ပစ်တဲ့အသံလည်း ကြားရတယ်။ ကျောင်းဖွင့်နေတဲ့ အချိန် မဟုတ် တော့ တော်သေးတာပေါ့” ဟု ပြောသည်။   ထို့ပြင် ထိုနေ့ နေ့လယ် ၁၂ နာရီ အချိန်ခန့်တွင်လည်း ကျေးရွာအနီးသို့ တိုက်လေယာဉ်တစ်စင်း ထပ်မံ ပျံသန်းလာ ခဲ့သော်လည်း ဗုံးကြဲတိုက်ခိုက်မှု ထပ်မံပြုလုပ်ခဲ့ခြင်းမရှိကြောင်း ၎င်းဒေသခံက ဆက်ပြောသည်။   လက်ရှိတွင် ကျောင်းဖွင့်ရာသီ ရောက်ရှိရန် နီးကပ်လာနေသည့်အချိန်၌ ယခုကဲ့သို့ စာသင်ကျောင်းများအထိ လေကြောင်းမှ ပစ်မှတ်ထားတိုက်ခိုက်ခံနေရခြင်းကြောင့် ကျောင်းသားမိဘများနှင့် ဒေသခံများအကြား သားသမီးများ၏ ပညာရေးနှင့် ဘေးကင်းလုံခြုံရေးအတွက် စိုးရိမ်ပူပန်မှုများ လွန်စွာမြင့်တက်နေကြသည်။   စစ်တပ်သည် တကူကျေးရွာအတွင်း မြေပြင်တိုက်ပွဲများ မရှိဘဲ ဝေဟင်မှနေ၍ မကြာခဏဆိုသလို ဗုံးကြဲ တိုက်ခိုက်လေ့ရှိရာ ပြီးခဲ့သည့် မတ်လ ၁ ရက်နေ့မှ ယနေ့ မေလလယ်အထိ ၎င်းကျေးရွာတစ်ရွာတည်းကိုပင် လေကြောင်းမှ (၄) ကြိမ်ထက်မနည်း ဗုံးကြဲတိုက်ခိုက်ခဲ့ပြီး ဖြစ်သည်။   ထိုသို့ ရက်ဆက် လေကြောင်းမှ တိုက်ခိုက်နေမှုများကြောင့် တကူကျေးရွာအတွင်း နေထိုင်သည့် အရပ်သား ပြည်သူ ၃ ဦး သေဆုံးကာ ၃ ဦး ထိခိုက်ဒဏ်ရာရရှိခဲ့သည်။   အလားတူ ဒေသခံပြည်သူများ၏ လူနေအိမ် ၃ ဆောင်လည်း လက်နက်ကြီးနှင့် ဗုံးစထိမှန်ကာ ပျက်စီးဆုံးရှုံးခဲ့ရ ကြောင်း ရွာသားများက ပြောသည်။   #တနင်္သာရီ #တကူးကျေးရွာ

ကျောင်းဖွင့်ခါနီးတွင် တနင်္သာရီရှိ စာသင်ကျောင်းကို စစ်တပ် လေကြောင်းမှဗုံးကြဲ


ကျောင်းဖွင့်ခါနီးတွင် တနင်္သာရီရှိ စာသင်ကျောင်းကို စစ်တပ် လေကြောင်းမှဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ တနင်္သာရီတိုင်း၊…

  • May 14, 2026
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၃ ရက်။   မြစ်ဆုံစီမံကိန်း ပြန်လည်စတင်ခြင်းသည် ငြိမ်းချမ်းရေးနှင့် ပိုမို အလှမ်းဝေး သွားစေမည်ဖြစ်သည့်အပြင် ဒေသခံများအတွက် အကျိုးဖြစ်မည်မဟုတ်သည့် အတွက် စီမံကိန်းကို လုံးဝဖျက်သိမ်းရန် ကချင်ဒေသခံများနှင့် အရပ်ဘက်အဖွဲ့အစည်းများက တောင်းဆိုထားသည်။   မြန်မာနိုင်ငံတစ်ဝန်း စစ်ပဋိပက္ခများ ပြင်းထန်နေသည့်ကာလအတွင်း ဧရာဝတီမြစ်ဆုံရေကာတာ စီမံကိန်းကို အတင်းအဓမ္မ ပြန်လည် အကောင်အထည်ဖော်ရန် ကြိုးပမ်းခြင်းသည် ငြိမ်းချမ်းရေးနှင့် ပိုမိုအလှမ်းဝေးသွား စေမည်ဟု ကချင် ဒေသခံများက ပြောသည်။   ၂၀၁၁ ခုနှစ်ကတည်းက ရပ်ဆိုင်းထားသည့် အဆိုပါစီမံကိန်းကို ပြန်လည်စတင်နိုင်ရေးအတွက် စစ်အုပ်စုက ကော်မရှင်ဖွဲ့စည်းကာ ဒေသတွင်း၌ စည်းရုံးရေးဆင်းနေမှုများအပေါ် ကချင်အရပ်ဘက်အဖွဲ့အစည်း ၄၉ ဖွဲ့က မေလ ၅ ရက်နေ့တွင် ထုတ်ပြန်ချက်တစ်စောင် ထုတ်ပြန်ကာ ကန့်ကွက်ခဲ့သည်။   ထုတ်ပြန်ချက်၏ ပြောရေးဆိုခွင့်ရှိသူ ဆိုင်းမိုင်က “ဒီလိုမျိုး ရင်းနှီးမြှုပ်နှံမှု အကြီးစားစီမံကိန်းတွေ သူတို့ လုပ်နေမယ်ဆိုရင် ငြိမ်းချမ်းရေး ဆွေးနွေးမှုစကားဝိုင်း၊ နိုင်ငံရေး ဆွေးနွေးမှုစကားဝိုင်းက ပိုပြီးတော့ အလှမ်း ဝေးသွားမှာ ဖြစ်တယ်။ ပြည်သူကို မျက်နှာမူတဲ့ အစိုးရတစ်ရပ်ဆိုရင် ငြိမ်းချမ်းရေးနဲ့ နိုင်ငံရေး ဆွေးနွေးမှုကိုပဲ ဦးစားပေးအနေနဲ့ လုပ်ဆောင်မှာ ဖြစ်တယ်။ ဒီလိုမတည်မငြိမ်မှုကို အခြေခံပြီးတော့ ဒီလိုအကြီးစား ရင်းနှီး မြှုပ်နှံမှုတွေကို အတင်းအဓမ္မ လုပ်ဆောင်သွားမယ်ဆိုရင် အဲဒီအတွက် ပဋိပက္ခ ပိုပြီးဖြစ်လာစေနိုင်မှာ ဖြစ်ပါ တယ်” ဟု ပြောသည်။   စီမံကိန်းကြောင့် အလုပ်အကိုင် အခွင့်အလမ်းများ ရရှိမည်ဟု စည်းရုံးပြောဆိုနေမှုများနှင့် ပတ်သက်၍လည်း ဆိုင်းမိုင်က ယခုကဲ့သို့ ဆက်ပြောသည်။   “စီမံကိန်းရဲ့ အကျိုးအမြတ် ပြည်သူတွေ မြင်ရမယ် အလုပ်အကိုင်ရမယ် ပြောတာ အခု ဒီ Suspension ပေါ့ နော်။ ရပ်ဆိုင်းမထားခင် ကတည်းက နေပြီးတော့ သူတို့ရဲ့ ဆောက်လုပ်ရေး ကုမ္ပဏီကို တရုတ်ပြည်သူတွေပဲ ခေါ်လာတယ်။ ထမင်းချက်ကအစ သူတို့နိုင်ငံကပဲ ခေါ်လာတာ။ ကိုယ့်နိုင်ငံက လူဆိုလို့ တကယ့် အလုပ်ကြမ်း လောက်ပဲ သူတို့ ခန့်ထားတာတွေ တွေ့ရတယ်။ ဒေသခံတွေဆို အနားကပ်လို့တောင် မရဘူး။ ဂိတ်တွေနဲ့ အလီလီ ချထားတယ်။ ဆိုတော့ ဒီလိုမျိုးနေရာမှာ ဘာမျှော်လင့်နေလဲ။”   ထို့ပြင် စီမံကိန်းမှ ရရှိမည့် အကျိုးအမြတ်များသည် တရုတ်နိုင်ငံသို့ အကြွေးဆပ်ရန်နှင့် စစ်လက်နက်ပစ္စည်း ဝယ်ယူရေးအတွက်သာ ဖြစ်နိုင်ကြောင်းနှင့် လက်ရှိတွင်လည်း မြစ်ဆုံအနီးတဝိုက်၌ ရွှေတူးဖော်မှုများကြောင့် သဘာဝပတ်ဝန်းကျင် ပျက်စီးမှုများ ကြုံတွေ့နေရကြောင်း ကချင်အရပ်ဘက် အဖွဲ့အစည်းများက ထောက်ပြ ထားသည်။   ကချင်လူ့အခွင့်အရေး စောင့်ကြည့်ရေးအဖွဲ့ (KHRW) မှ ဂျေကော့ကလည်း “နိုင်ငံတကာကို တောင်းဆိုချင်တာ က ပြည်သူလူထုနဲ့အတူ ရပ်တည်ပေးဖို့ တောင်းဆိုချင်ပါတယ်။ နောက်တစ်ခုကတော့ တရုတ်အစိုးရရော ပြည်သူလူထုရဲ့ အသံကို နားထောင်ပေးဖို့ တောင်းဆိုချင်ပါတယ်။ အခုလိုမျိုး အန္တရာယ်ကြီးမားတဲ့ စီမံကိန်းကို အမြန်ဆုံး ရပ်တန့်ပေးဖို့ ကျနော်တို့အနေနဲ့ တောင်းဆိုချင်ပါတယ်” ဟု တိုက်တွန်းထားသည်။   တရုတ်အစိုးရပိုင် ကုမ္ပဏီ (SPIC-YN) အနေဖြင့် ပြည်သူလူထု၏ ဆန္ဒကို လေးစားရန်နှင့် မည်သည့် အစိုးရ လက်ထက်တွင်မဆို ပြည်သူ့သဘောထား မပါသည့် ဖွံ့ဖြိုးရေး အမည်ခံ ရင်းနှီးမြှုပ်နှံမှုများကို အတင်းအဓမ္မ လုပ်ဆောင်ခြင်းမပြုရန် အရပ်ဘက်အဖွဲ့အစည်းများက စုပေါင်းတောင်းဆိုထားကြသည်။   #မြစ်ဆုံရေအားလျှပ်စစစ်စီမံကိန်း #မြစ်ဆုံရေကာတာ  

မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်

မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။  မြစ်ဆုံစီမံကိန်…

  • May 13, 2026
×Close