သတင်း

အာဆီယံထိပ်သီးညီလာခံတွင် မြန်မာကိုယ်စားလှယ်အဖြစ် အဆင့်မြင့်အရာရှိသာ တက်ရောက်ခွင့်ရ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၈ ရက်။   ဖိလစ်ပိုင်နိုင်ငံ၊ စီဘူးမြို့၌ ကျင်းပနေသည့် အာဆီယံထိပ်သီးညီလာခံသို့ အဖွဲ့ဝင် (၁၀) နိုင်ငံမှ နိုင်ငံအဆင့် အမြင့်ဆုံးခေါင်းဆောင်များ တက်ရောက်လျက်ရှိသော်လည်း မြန်မာနိုင်ငံမှ နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးဟောက်ခန်ဆွမ် သာ တက်ရောက်ခွင့်ရရှိခဲ့သည်။   မြန်မာနိုင်ငံသည် အာဆီယံ၏ ဘုံသဘောတူညီချက် (၅) ရပ်ကို လိုက်နာရန် ပျက်ကွက်ခြင်းကြောင့် နိုင်ငံရေးအရ ကိုယ်စားပြုသူ တက်ရောက်ခွင့် မရခြင်းဖြစ်သည်။   ညီလာခံတွင် မြန်မာ့အရေးနှင့် ပတ်သက်၍ ထိုင်း၊ ကမ္ဘောဒီးယား၊ လာအိုနှင့် ဗီယက်နမ်တို့က ထိတွေ့ဆက်ဆံလိုသော်လည်း စင်ကာပူ၊ မလေးရှားနှင့် အင်ဒိုနီးရှားတို့က သိသာသော တိုးတက်မှုမရှိမချင်း စစ်ကောင်စီကို အသိအမှတ်ပြုရန် လက်မခံသေးကြောင်း သုံးသပ်ချက်များ ထွက်ပေါ်နေသည်။   အလားတူ မေလ ၉ ရက်နေ့တွင် ကျင်းပမည့် ရုရှားနိုင်ငံ၏ ဒုတိယကမ္ဘာစစ် အောင်ပွဲနေ့ အခမ်းအနားတွင်လည်း မြန်မာနိုင်ငံမှ နိုင်ငံရေးခေါင်းဆောင်များ တက်ရောက်မည့် စာရင်းတွင် ပါဝင်ခြင်း မရှိကြောင်း သိရသည်။   #အာဆီယံ #aseansummit2026

မြန်မာအပေါ် အာဆီယံက ဘုံသဘောတူညီချက် ၅ ရပ်အတိုင်း ဆက်လက်ကိုင်စွဲသွားမည်

မြန်မာအပေါ် အာဆီယံက ဘုံသဘောတူညီချက် ၅ ရပ်အတိုင်း ဆက်လက်ကိုင်စွဲသွားမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၂ ရက်။  ဖိလစ်ပိုင်နိုင်င…

  • May 12, 2026
ကယ်လီဖိုးနီးယား မြို့တော်ဝန်ဟောင်း တရုတ် စပိုင်လုပ်မှုဖြင့် စွဲချက်တင်ခံရ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၂ ရက်။   အမေရိကန်ပြည်ထောင်စုတွင် တရုတ်အစိုးရ၏ လျှို့ဝှက်အကျိုးဆောင်အဖြစ် ဆောင်ရွက်ခဲ့သည့် ကယ်လီဖိုးနီးယားပြည်နယ်၊ အာကေးဒီးယား (Arcadia) မြို့၏ မြို့တော်ဝန်ဟောင်း အိုင်လင်းဝမ် (Eileen Wang) ကို ဖက်ဒရယ်အစိုးရက တရားစွဲဆိုလိုက်သည်။   အိုင်လင်းဝမ်သည် တရုတ်ပြည်သူ့သမ္မတနိုင်ငံ၏ တရားမဝင်အကျိုးဆောင်အဖြစ် လျှို့ဝှက်ဆောင်ရွက်ခဲ့မှုဖြင့် တရားစွဲဆိုခံရခြင်းဖြစ်သည်။   ဖက်ဒရယ်အစိုးရရှေ့နေများ၏ ထုတ်ပြန်ချက်အရ သူမသည် ၂၀၂၀ ပြည့်နှစ်မှ ၂၀၂၂ ခုနှစ်အတွင်း တရုတ်အစိုးရအရာရှိများ၏ ညွှန်ကြားချက်နှင့် ထိန်းချုပ်မှုအောက်တွင် အလုပ်လုပ်ခဲ့ပြီး တရုတ်အစိုးရလိုလားသည့် ဝါဒဖြန့်သတင်းများ ဖြန့်ဝေရန် လျှို့ဝှက်ညှိနှိုင်း ဆောင်ရွက်ခဲ့ခြင်းဖြစ်သည်။   ထိုသို့ဆောင်ရွက်ရာတွင် အမေရိကန်ဥပဒေအရ ရှေ့နေချုပ်ထံ အကြောင်းကြားရမည့် လုပ်ငန်းစဉ်များကိုလည်း တမင်ချန်လှပ်ထားခဲ့သည်ဟု ဆိုသည်။   စုံစမ်းစစ်ဆေးမှုများအရ အိုင်လင်းဝမ်သည် ဒေသတွင်းသတင်းဌာနအဖြစ် အယောင်ဆောင်ထားသည့် ဝက်ဘ်ဆိုက်တစ်ခုကို တရုတ်အေးဂျင့်များနှင့် ပူးပေါင်းဖွင့်လှစ်ကာ တရုတ်အစိုးရက ပေးပို့သည့် ဝါဒဖြန့်ဆောင်းပါးများကို ချက်ချင်းဖော်ပြပေးခဲ့သည်။   အထူးသဖြင့် ရှင်ကျန်းဒေသတွင် အတင်းအဓမ္မ လုပ်အားခိုင်းစေမှု စွပ်စွဲချက်များကို ငြင်းဆိုထားသည့် ဆောင်းပါးများကို တရုတ်အရာရှိများ၏ စေခိုင်းချက်အတိုင်း ဖော်ပြပေးခဲ့ခြင်း ဖြစ်သည်။   အိုင်လင်းဝမ်သည် ၂၀၂၂ ခုနှစ် ဒီဇင်ဘာလတွင် မြို့ကောင်စီဝင်အဖြစ် ရွေးကောက်ခံခဲ့ရပြီးနောက် မြို့တော်ဝန် ဖြစ်လာခဲ့သူဖြစ်သည်။   သူမသည် လက်ရှိတွင် ရာထူးမှ နှုတ်ထွက်သွားပြီဖြစ်ကာ အာကေးဒီးယားမြို့ အာဏာပိုင်များကမူ ယခုကိစ္စမှာ သူမ၏ တစ်ကိုယ်ရေပြစ်မှုသာဖြစ်ပြီး မြို့တော်လုပ်ငန်းများအပေါ် ထိခိုက်မှုမရှိကြောင်း ထုတ်ပြန်ထားသည်။   အိုင်လင်းဝမ်သည် အပြစ်ရှိကြောင်း ဝန်ခံရန် သဘောတူညီထားပြီး ပြစ်မှုထင်ရှားပါက ထောင်ဒဏ် ၁၀ နှစ်အထိ ကျခံရနိုင်သည့်အပြင် ဒေါ်လာနှစ်သိန်းခွဲအထိ ဒဏ်ငွေရိုက်ခံရနိုင်ကြောင်း သိရသည်။   #EileenWang #ကယ်လီဖိုးနီးယားမြို့တော်ဝန်ဟောင်း #တရုတ်စပိုင်

ကယ်လီဖိုးနီးယား မြို့တော်ဝန်ဟောင်း တရုတ် စပိုင်လုပ်မှုဖြင့် စွဲချက်တင်ခံရ

ကယ်လီဖိုးနီးယား မြို့တော်ဝန်ဟောင်း တရုတ် စပိုင်လုပ်မှုဖြင့် စွဲချက်တင်ခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၂ ရက်။  အမေရိကန်ပြည်ထောင်စ…

  • May 12, 2026
စစ်တပ်က ကရင်နီ စစ်ရှောင်စခန်းကို မီးရှို့   သတင်းနှင့်မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   ကရင်နီပြည်၊ ဖရူဆိုမြို့နယ် အရှေ့ခြမ်းတွင် စစ်တပ် စစ်ကြောင်းက စစ်ရှောင်စခန်းကို မီးရှို့ဖျက်ဆီးခဲ့ရာ ဒေသခံ ၁,၀၀၀ ကျော် အရေးပေါ် ထွက်ပြေးတိမ်းရှောင်နေကြရသည်။   ဖရူဆိုမြို့နယ်အရှေ့ခြမ်းသို့ စစ်တပ် လက်အောက်ခံ တပ်များ စစ်ကြောင်းထိုးဝင်ရောက်လာပြီး စစ်ဘေးရှောင် စခန်းတစ်ခုကို မီးရှို့ဖျက်ဆီးခဲ့သဖြင့် ဒေသခံရွာသူရွာသား ၁,၀၀၀ ကျော်မှာ ဘေးလွတ်ရာ တောတောင်များ အတွင်းသို့ အရေးပေါ် ထွက်ပြေးတိမ်းရှောင်နေရကြောင်း အရေးပေါ်ကယ်ဆယ်ရေးအဖွဲ့ CTER-Karenni နှင့် ဒေသခံများက ပြောသည်။   စစ်ဘေးရှောင်တစ်ဦးက “စစ်တပ်က သေနတ်တွေ ပစ်ပြီး ဝင်လာတော့ အားလုံးက လန့်ပြီး ကိုယ်လွတ် ရုန်း ပြေးခဲ့ရတာ။ ပစ္စည်းယူချိန် မပြောနဲ့ ဘာမှကို မယူလိုက်ရဘူး။ ဘာပစ္စည်းမှ ယူချိန်ကို မရလိုက်ဘူး။ အချိန်မီ မပြေးနိုင်တဲ့သူတွေကိုလည်း ဖမ်းဆီးရိုက်နှက်တာတွေ ရှိတယ်” ဟု ပြောသည်။   ပြီးခဲ့သည့် ရက်အနည်းငယ်က ဒေသခံ ၂၀၀ ကျော် စစ်ဘေးရှောင်ခဲ့ရပြီးနောက်၊ ယခုမေလ ၁၁ ရက်နေ့တွင် နောက်ထပ်ဒေသခံ ၁,၀၀၀ ကျော်မှာလည်း စစ်ကြောင်းအန္တရာယ်ကြောင့် ထပ်မံထွက်ပြေးနေကြရခြင်း ဖြစ်သည်။   မေလ ၈ ရက်နေ့၊ မွန်းလွဲ ၂ နာရီဝန်းကျင်တွင် ဖရူဆိုမြို့နယ်ရှိ ဝှယ်ဒူးလျားစစ်ရှောင်စခန်းသို့ စစ်တပ်စစ်ကြောင်း က သေနတ်များပစ်ဖောက်ကာ ရုတ်တရက်ဝင်ရောက်စီးနင်းခဲ့ပြီး စစ်ရှောင်တဲအိမ်များနှင့် ယာဉ်များကို မီးရှို့ ဖျက်ဆီးခဲ့ခြင်းဖြစ်သည်။   အဆိုပါစခန်းတွင် အိမ်ခြေ ၆၈ အိမ်ရှိပြီး လူဦးရေ ၃၀၀ ကျော် ခိုလှုံနေခြင်းဖြစ်ကာ မီးရှို့မှုကြောင့် လူနေတဲအိမ် တစ်ဝက်နီးပါး ပြာကျပျက်စီးသွားခဲ့သည်။   ထို့ပြင် မေလ ၉ ရက်နေ့ ညနေပိုင်းတွင်လည်း ဖရူဆိုမြို့နယ်အခြေစိုက် အမှတ် (၁၄) တန်းမြင့် စစ်ရေးလေ့ကျင့် ရေး ကျောင်းမှနေ၍ ကျေးရွာများအတွင်းသို့ လက်နက်ကြီး ၉ လုံးခန့် ပစ်ခတ်ခဲ့ရာ အသက် ၉၀ အရွယ် အမျိုးသားတစ်ဦး ထိမှန်ဒဏ်ရာရရှိခဲ့သေးသည်။   လတ်တလောတွင် စစ်တပ် စစ်ကြောင်းများသည် ဖရူဆိုအရှေ့ခြမ်းရှိ ကျေးရွာများအနီးတွင် တပ်စွဲထားဆဲ ဖြစ် ပြီး အချို့သော ဒေသခံများမှာ ကျေးရွာများအတွင်း ပိတ်မိနေဆဲဖြစ်သည်ဟု CTER-Karenni အဖွဲ့က အသိပေး ထားသည်။   စစ်ရှောင်များကို အကူအညီပေးနေသူတစ်ဦးက “လက်ရှိမှာ စစ်ရှောင်တွေက တောတောင်တွေထဲမှာပဲ ယာယီ ခိုလှုံနေကြရတယ်။ နေရာထိုင်ခင်း အနည်းငယ်ရပေမယ့် စားနပ်ရိက္ခာကတော့ အရမ်းကို လိုအပ်နေပါတယ်။ လုံခြုံရေး အခြေအနေကြောင့် လူသားချင်းစာနာမှု အကူအညီတွေကလည်း အခုထိ သူတို့ဆီ မရောက်နိုင် သေး ဘူး။ ချိတ်ဆက်ပေးနေတုန်းပဲဗျ” ဟု ပြောသည်။   လက်ရှိတွင် လုံခြုံရေးစိုးရိမ်ရမှုကြောင့် စစ်ဘေးရှောင်ပြည်သူများထံသို့ လူသားချင်းစာနာမှုဆိုင်ရာ အကူအညီ များ ရောက်ရှိနိုင်ခြင်း မရှိသေးဘဲ အရေးပေါ်ရိက္ခာများ အထူးလိုအပ်နေသည်။   CTER အဖွဲ့က ထိခိုက်ခံရသည့်နယ်မြေများသို့ သွားရောက်ရန် ကြိုးပမ်းနေသော်လည်း အချို့နေရာများတွင် လမ်းကြောင်းများ ပိတ်ဆို့နေဆဲဖြစ်သည်ဟု မေလ ၁၁ ရက်နေ့တွင် ထုတ်ပြန်ထားသည်။။   ဖရူဆိုမြို့နယ်အတွင်း၌ ခမရ (၅၃၁)၊ ခမရ (၄၂၈) နှင့် အမှတ် (၁၄) စစ်လေ့ကျင့်ရေးကျောင်းတို့မှ တပ်ရင်းများက ယခုရက်ပိုင်းအတွင်း စစ်ကြောင်းထိုးမှုများ ခပ်စိပ်စိပ်လုပ်ဆောင်လာနေခြင်း ဖြစ်သည်ဟု ဒေသခံများနှင့် စစ်ရှောင်များက ပြောသည်။   ကရင်နီလူမှုအသင်းအဖွဲ့များ၏ စာရင်းအရ ပြည်နယ်အတွင်းရှိ လူဦးရေ ၄ သိန်းဝန်းကျင်အနက် ၃ သိန်းနီးပါးမှာ စစ်ဘေးရှောင်နေကြရပြီး စားနပ်ရိက္ခာနှင့် ဆေးဝါးများ အရေးပေါ်လိုအပ်လျက်ရှိသည်ဟု ဆိုသည်။   ဓါတ်ပုံ - CTER-Karenni   #KarenIDPs #ကရင်နီစစ်ရှောင်စခန်း #ဖရူဆိုမြို့နယ်

စစ်တပ်က ကရင်နီ စစ်ရှောင်စခန်းကို မီးရှို့ 

စစ်တပ်က ကရင်နီ စစ်ရှောင်စခန်းကို မီးရှို့ သတင်းနှင့်မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  ကရင်နီပြည်၊ ဖရူဆိုမြို့နယ် အရှေ့ခြမ်းတွင် စစ်တ…

  • May 11, 2026
မေလ ပထမပတ်အတွင်း ထိုင်းသို့ တရားမဝင် လာရောက်သူ အလုပ်သမား ၁၅၀ ကျော် ဖမ်းခံရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   ထိုင်းနိုင်ငံအတွင်း တရားမဝင် ဝင်ရောက်လာသည့် မြန်မာလုပ်သားများ ဆက်တိုက်ဖမ်းဆီးခံနေရပြီး မေလ ပထမပတ်အတွင်း အယောက် ၁၅၀ ကျော် ဖမ်းဆီးခံခဲ့ရသည်ဟု အလုပ်သမားအရေး ဆောင်ရွက်နေသူများက ပြောသည်။   မြန်မာနိုင်ငံအတွင်းရှိ အလုပ်အကိုင်ရှားပါးမှုနှင့် စစ်မှုထမ်းဥပဒေဆိုင်ရာ စိုးရိမ်မှုများကြောင့် ထိုင်းနိုင်ငံအတွင်း သို့ မှောင်ခိုလမ်းကြောင်းများမှတစ်ဆင့် ဝင်ရောက်လာသည့် မြန်မာလုပ်သား ၁၅၀ ကျော်ကို မေလ ပထမပတ် အတွင်း၌ ထိုင်းအာဏာပိုင်များက ဆက်တိုက်ဖမ်းဆီးခဲ့ကြောင်း အလုပ်သမားအရေး ဆောင်ရွက်သူများက ပြောသည်။   အကြီးမားဆုံး ဖမ်းဆီးရမိမှုမှာ ဖိစ်စုနုလုခ်ခရိုင်အတွင်း ဖြစ်ပွားခဲ့ခြင်းဖြစ်ပြီး မေလ ၇ ရက်နေ့၊ ညပိုင်းတွင် အမှတ် ၁၁ လမ်းမကြီးပေါ်၌ မောင်းနှင်လာသည့် ပစ်ကပ်ကား ၁၀ စီးခန့်ကို စစ်ဆေးရာမှ စတင်ခဲ့ခြင်းဖြစ်သည်။   ထိုစဉ်က အချို့ကားများမှာ မောင်းနှင်ထွက်ပြေးခဲ့သော်လည်း အာဏာပိုင်များက မေလ ၈ ရက်နေ့၊ နံနက်အထိ နီးစပ်ရာတောများအတွင်း လိုက်လံရှာဖွေခဲ့ရာ မြန်မာလုပ်သား ၁၁၀ ကျော်ကို ထပ်မံဖမ်းဆီးရမိခဲ့သည်။   အလုပ်သမားအရေး လိုက်လံဆောင်ရွက်ပေးနေသူ အမျိုးသားတစ်ဦးက “သူတို့ စဝင်လာကတည်းက ကားတန်း အရှည်ကြီးပဲလေ။ ပစ်ကပ်ကားနဲ့ကို လူအပြည့်တင်လာတာဆိုတော့ ဘယ်သူက မစစ်ဘဲနေမလဲ။ တောလမ်းက သွားတာလည်း မဟုတ်ဘူး။ အခုတော့ မိပြီလေ။ ဒီချိန် အောက်လမ်းကလာရင် လမ်းကြောင်း သေချာစုံစမ်းကြ ပါ။ ဖြစ်နိုင်ရင် အပေါ်ကပဲ လာစေချင်တယ်။ ပွဲစားတွေကတော့ ပိုက်ဆံရရင်ပြီးရော နှပ်ချခဲ့မှာပဲ” ဟု ပြောသည်။   ထို့ပြင် မေလ ၆ ရက်နေ့တွင် တာခ့်ခရိုင်၊ တာ့ဆောင်ယန်းမြို့နယ်၌ မြန်မာလုပ်သား ၁၉ ဦး၊ မေလ ၄ ရက်နေ့တွင် အဆိုပါမြို့နယ်အတွင်း၌ပင် ၁၁ ဦးနှင့် မေလ ၃ ရက်နေ့တွင် အယုဒ္ဓယခရိုင် အာရှလမ်းမကြီးပေါ်၌ ၉ ဦး စုစုပေါင်း မြန်မာလုပ်သား ၁၅၀ ကျော်ခန့် ဖမ်းဆီးခံခဲ့ရခြင်း ဖြစ်သည်။   အခြားအလုပ်သမားအရေး ဆောင်ရွက်သူတစ်ဦးကလည်း “ဒီနောက်ပိုင်းတော့ မဲဆောက်ဘက်က တအားဖမ်း တော့ တခြားလမ်းကြောင်း ပြန်ဝင်ကြတယ်။ အဲဒါလည်း မိတာပဲ။ ကျနော်ကတော့ မစွန့်စားစေချင်ဘူး။ မြန်မာငွေ အနည်းဆုံး သိန်း ၄၀ လောက်ကုန်တာလေ။ မိရင်လည်း ပလုံမှာ။ မလုပ်ကြပါနဲ့” ဟု ဖြည့်စွက် ပြောဆိုသည်။   ပွဲစားများ၏ အဆိုအရ တရားမဝင် လမ်းကြောင်းများမှတစ်ဆင့် ဝင်ရောက်ရန် တစ်ဦးလျှင် ထိုင်းဘတ်ငွေ ၂၀,၀၀၀ (မြန်မာငွေ ၂၆ သိန်းကျော်မှ သိန်း ၄၀ ခန့်အထိ) ကုန်ကျစရိတ်ရှိနေကြောင်း သိရသည်။   မွန်ပြည် လူ့အခွင့်ရေးဖောင်ဒေးရှင်း (HURFOM) ၏ အချက်အလက်များအရ ယခုနှစ် ဇန်နဝါရီလမှ မတ်လအထိ သုံးလတာအတွင်း တရားမဝင် မြန်မာလုပ်သား ၉၀၀ နီးပါး ဖမ်းဆီးခံထားရပြီး ဖြစ်သည်။   မြန်မာပြည်တွင်းရှိ စီးပွားရေးကျဆင်းမှု၊ ကုန်ကြမ်းရှားပါးမှုနှင့် ပြည်သူ့စစ်မှုထမ်း ဆင့်ခေါ်စာများကြောင့် ဖမ်းဆီးမှုများပြားနေသော်လည်း ထိုင်းနိုင်ငံဘက်သို့ ထွက်ခွာသူဦးရေမှာ နေ့စဉ်နှင့်အမျှ တိုးများလာနေသည်။   #ရွှေ့ပြောင်းအလုပ်သမား #migrantworker

မေလ ပထမပတ်အတွင်း ထိုင်းသို့ တရားမဝင် လာရောက်သူ အလုပ်သမား ၁၅၀ ကျော် ဖမ်းခံရ

မေလ ပထမပတ်အတွင်း ထိုင်းသို့ တရားမဝင် လာရောက်သူ အလုပ်သမား ၁၅၀ ကျော် ဖမ်းခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  ထိုင်းနိုင်င…

  • May 11, 2026
ရပ်ကွက် အုပ်ချုပ်ရေးမှူးနှင့် ဇနီး ပစ်သတ်ခံရ၊ သမီးဖြစ်သူ ဒဏ်ရာရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။    ထားဝယ်မြို့၊ ဆန်းချီရပ်ကွက် အုပ်ချုပ်ရေးမှူးနှင့် မိသားစုဝင်များသည် နေအိမ်တွင် ရှိနေစဉ် သေနတ်ဖြင့် ပစ်ခတ်ခံရသဖြင့် အုပ်ချုပ်ရေးမှူးနှင့် ဇနီးဖြစ်သူတို့ သေဆုံးကာ သမီးဖြစ်သူ ပြင်းထန်စွာ ဒဏ်ရာရရှိခဲ့ကြောင်း ရပ်ကွက်သားများက ပြောသည်။   ဖြစ်စဉ်မှာ မေလ ၉ ရက်နေ့ ည ၈ နာရီခန့်တွင် ဆန်းချီဘုန်းကြီးကျောင်း အနီးရှိ နေအိမ်၌ အုပ်ချုပ်ရေးမှူးမိသားစု စကားပြောနေစဉ် အမျိုးသားနှစ်ဦး ရောက်ရှိလာပြီး သေနတ်ဖြင့် ပစ်ခတ်သွားခဲ့ခြင်း ဖြစ်သည်။   ပစ်ခတ်မှုကြောင့် အုပ်ချုပ်ရေးမှူး ဦးမြင့်လွင်၊ ဇနီးဖြစ်သူနှင့် အသက် ၂၀ ကျော်အရွယ် သမီးဖြစ်သူတို့တွင် သေနတ် ဒဏ်ရာများ အသီးသီးရရှိခဲ့သဖြင့် ထားဝယ်ဆေးရုံကြီးသို့ အရေးပေါ် ပို့ဆောင်ခဲ့ရသည်။   အသက် ၄၀ ခန့်အရွယ် အမျိုးသားတစ်ဦးက “အုပ်ချုပ်ရေးမှူး ဦးမြင့်လွင်ကို အရင်ဆုံးပစ်လိုက်တာ၊ ပြီးတော့မှ မိန်းမနဲ့သမီးတို့ကိုပါ ပစ်ခဲ့တာပါ။ ဦးမြင့်လွင်တစ်ကိုယ်လုံး နေရာအနှံ့ သေနတ်ဒဏ်ရာ ဆယ်ချက်လောက် ရခဲ့တာကြောင့် ထားဝယ်ဆေးရုံကြီးမှာ ဆေးကုသနေစဉ် သေဆုံးသွားတယ်၊ သူ့မိန်းမမှာလည်း ဒဏ်ရာ နှစ်ချက် ထိပြီး ဆေးကုနေတုန်း ထပ်ပြီး သေသွားတယ်” ဟု ပြောသည်။   သေဆုံးသူ အုပ်ချုပ်ရေးမှူး ဦးမြင့်လွင်နှင့် ဇနီးဖြစ်သူတို့၏ ရုပ်အလောင်းများကို ထားဝယ်ဆေးရုံကြီး ရင်ခွဲရုံတွင် ထားရှိပြီး၊ ညာဘက်ညှပ်ရိုး ကျည်ဆန်ဖောက်ဝင်ဒဏ်ရာနှင့် လက်ဖဝါးတွင် ကျည်ထိမှန်ဒဏ်ရာများ ရရှိခဲ့သည့် သမီးဖြစ်သူမှာမူ ဆေးရုံတွင် ဆေးကုသမှု ခံယူနေရဆဲ ဖြစ်သည်။   ၎င်းတို့ကို ထားဝယ်မြို့နယ် ကြက်ခြေနီတပ်ဖွဲ့နှင့် ဇမ္ဗူသီရိ အရေးပေါ်လူနာ ကူညီသယ်ဆောင်ရေးအဖွဲ့တို့မှ လူနာတင်ယာဉ်များဖြင့် ဆေးရုံသို့ ကူညီပို့ဆောင်ပေးခဲ့ခြင်း ဖြစ်သည်။   ထားဝယ်မြို့ပေါ်တွင် အလားတူ ပစ်ခတ်မှုမျိုး ပြီးခဲ့သည့် ဧပြီလ ၁၆ ရက်နေ့ကလည်း ဥဿာရံရပ်ကွက်၌ ဖြစ်ပွား ခဲ့ဖူးပြီး၊ ထိုစဉ်ကလည်း သားအဖနှစ်ဦး ပစ်ခတ်ခံရကာ ဖခင်ဖြစ်သူ သေဆုံးပြီး သမီးဖြစ်သူ ဒဏ်ရာအပြင်း အထန် ရရှိခဲ့သည့် ဖြစ်ရပ်မျိုး ရှိခဲ့သည်။   ယခုဖြစ်စဉ်နှင့် ပတ်သက်၍ ကျူးလွန်သူများကို ဖမ်းဆီးရမိခြင်း ရှိ၊ မရှိနှင့် မည်သည့်အဖွဲ့က လုပ်ဆောင်သည် ကိုမူ သီးခြားအတည်ပြုနိုင်ခြင်း မရှိသေးဘဲ မြို့ပေါ်လုံခြုံရေး အခြေအနေများအပေါ် ဒေသခံများအကြား စိုးရိမ်မှုများ မြင့်တက်နေကြသည်။   #ထားဝယ်မြို့ #ဆန်းချီရပ်ကွက် #အုပ်ချုပ်ရေးမှူး

ရပ်ကွက် အုပ်ချုပ်ရေးမှူးနှင့် ဇနီး ပစ်သတ်ခံရ၊ သမီးဖြစ်သူ ဒဏ်ရာရ

ရပ်ကွက် အုပ်ချုပ်ရေးမှူးနှင့် ဇနီး ပစ်သတ်ခံရ၊ သမီးဖြစ်သူ ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။   ထားဝယ်မြို့၊ ဆန်း…

  • May 11, 2026
ပြည်နယ် ဝန်ကြီးချုပ် ဖြစ်လာတဲ့ အိန္ဒိယ မင်းသား ဗီဂျေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   အိန္ဒိယ နိုင်ငံမှ နာမည်ကျော် ရုပ်ရှင်မင်းသား ဗီဂျေးဦးဆောင်သော TVK ပါတီသည် တမီးလ်နာဒူး ပြည်နယ်တွင် ရွေးကောက်ပွဲ အောင်နိုင်ခဲ့ပြီး မင်းသားဟောင်း ဗီဂျေးမှာ ပြည်နယ် ဝန်ကြီးချုပ် ဖြစ်လာခဲ့သည်။   ရုပ်ရှင်သရုပ်ဆောင်မှ နိုင်ငံရေးသမားဖြစ်လာသူ စီ ဂျိုးဇက် ဗီဂျေး (C Joseph Vijay) သည် အိန္ဒိယနိုင်ငံ၊ တမီးလ်နာဒူးပြည်နယ်၏ ဝန်ကြီးချုပ်သစ်အဖြစ် တနင်္ဂနွေနေ့က ကျမ်းသစ္စာဆိုနိုင်ခဲ့သည်။   လွန်ခဲ့သည့် အပတ် အတွင်း ကျင်းပခဲ့သော ရွေးကောက်ပွဲများအတွင်း ဗီဂျေး ဦးဆောင်သော Tamilaga Vettri Kazhagam (TVK) ပါတီ အနိုင်ရခဲ့သော်လည်း အစိုးရ ဖွဲ့ရန် အမတ်နေရာ မပြည့်ပဲ ရှိနေခဲ့သည်။   အမတ်ဦးရေ ၂၃၄ ဦးရှိသော လွှတ်တော်တွင် TVK ၁၀၈ နေရာ အနိုင်ရပြီး အစိုးရ ဖွဲ့ရန် (၁၀) နေရာခန့် လိုအပ်နေခြင်းဖြစ်သည်။   အိန္ဒိယနိုင်ငံ၏ အဓိကအတိုက်အခံပါတီဖြစ်သော ကွန်ဂရက်ပါတီသည် အမတ်နေရာ (၅) နေရာ ရရှိထားပြီး ရလဒ်ထွက်ပေါ်ပြီး နာရီပိုင်းအတွင်းမှာပင် ဗီဂျေးအား ထောက်ခံမည်ဟု ကတိပြုခဲ့သည်။     သို့သော်လည်း ပြည်နယ်ဘုရင်ခံ ရာဂျန်ဒရာ ဗစ်ရှ်ဝါနတ် အရ်လီကာ (Rajendra Vishwanath Arlekar) က အစိုးရဖွဲ့ရန်အတွက် လိုအပ်သော ကိုယ်စားလှယ် (၁၁၈) ဦး၏ ထောက်ခံမှုအထောက်အထားကို တင်ပြရန် TVK ပါတီကို တောင်းဆိုခဲ့သည်။   စနေနေ့ညနေပိုင်းတွင် TVK သည် အိန္ဒိယကွန်မြူနစ်ပါတီ (CPI)၊ အိန္ဒိယကွန်မြူနစ်ပါတီ-မာ့က်စ်ဝါဒီ (CPI-M)၊ Viduthalai Chiruthaigal Katchi (VCK)၊ အိန္ဒိယယူနီယံ မွတ်စလင်အဖွဲ့ချုပ် (IUML)တို့၏ ထောက်ခံမှု ရရှိပြီး ဗီဂျေးမှာ ဝန်ကြီးချုပ် ဖြစ်လာခဲ့ခြင်း ဖြစ်သည်။   အဆိုပါပါတီတစ်ခုစီတွင် လွှတ်တော်အမတ်နေရာ (၂) နေရာစီ ရှိကြသဖြင့် TVK ပါတီသည် စုစုပေါင်း ကိုယ်စားလှယ် (၁၂၀) ဦး၏ ထောက်ခံမှုကို ရရှိသွားခြင်းဖြစ်သည်။   တနင်္ဂနွေနေ့ နံနက်ပိုင်း ကျမ်းသစ္စာဆိုပွဲ အခမ်းအနားကို ပြည်နယ်မြို့တော် ချန်နိုင်းရှိ ဂျဝါဟာလာနေရူး အားကစားကွင်းတွင် လုံခြုံရေးအထူးတင်းကျပ်စွာဖြင့် ကျင်းပခဲ့သည်။ မင်းသားဗီဂျေးနှင့်အတူ ဝန်ကြီး (၉) ဦးလည်း ကျမ်းသစ္စာဆိုခဲ့ကြသည်။   သာလာပသီ "Thalapathy" ဟု လူသိများသော အသက် (၅၁) နှစ်အရွယ် အက်ရှင်မင်းသား ဗီဂျေးသည် ရုပ်ရှင်ဇာတ်ကားပေါင်း (၆၉) ကားတွင် သရုပ်ဆောင်ခဲ့ပြီး အိန္ဒိယတွင် အခကြေးငွေအများဆုံးရသော မင်းသားတစ်ဦးဖြစ်သည်။   ဗီဂျေးသည် တမီးလ်နာဒူးပြည်နယ်ရှိ လူငယ်များနှင့် အမျိုးသမီးများအကြား အလွန်ရေပန်းစားသူ ဖြစ်ပြီး ၎င်း၏အနိုင်ရမှုကြောင့် ထောက်ခံသူများမှာ များစွာဝမ်းမြောက်လျက်ရှိသည်။     တမီးလ်နာဒူးနိုင်ငံရေးကို ယခင်က DMK နှင့် AIADMK ဟူသော ဒေသတွင်းပါတီကြီး နှစ်ခုကသာ ဆယ်စုနှစ်များစွာ အလှည့်ကျကြီးစိုးခဲ့သော်လည်း ယခုအခါ TVK ပါတီက ထိုအစဉ်အလာကို ရိုက်ချိုးကာ အကြီးဆုံးပါတီအဖြစ် ထွက်ပေါ်လာခဲ့ခြင်းဖြစ်သည်။   ဗီဂျေးသည် ၂၀၂၄ ခုနှစ်တွင် TVK ပါတီကို စတင်တည်ထောင်ပြီးနောက် နိုင်ငံရေးကို အချိန်ပြည့်လုပ်ဆောင်ရန် ရုပ်ရှင်လောကမှ အနားယူမည်ဟု ကြေညာခဲ့သည်။   #ဗီဂျေး #CjosephVijay #Vijay

ပြည်နယ် ဝန်ကြီးချုပ် ဖြစ်လာတဲ့ အိန္ဒိယ မင်းသား ဗီဂျေး

ပြည်နယ် ဝန်ကြီးချုပ် ဖြစ်လာတဲ့ အိန္ဒိယ မင်းသား ဗီဂျေး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  အိန္ဒိယ နိုင်ငံမှ နာမည်ကျော် ရုပ…

  • May 11, 2026
အင်ဒိုနီးရှားတွင် ကျားဖြန့် လုပ်ငန်း လုပ်နေသော နိုင်ငံခြားသားများ ဖမ်းဆီးရမိ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၁၁ ရက်။   အင်ဒိုနီးရှားနိုင်ငံ၊ မြို့တော်ဂျကာတာရှိ အွန်လိုင်းလောင်းကစားလုပ်ငန်းတစ်ခုကို ရဲတပ်ဖွဲ့က ဝင်ရောက်စီးနင်းခဲ့ရာ မြန်မာအပါအဝင် နိုင်ငံခြားသား ၃၀၀ ကျော်ကို ဖမ်းဆီးရမိခဲ့ကြောင်း အေပီ သတင်းတပုဒ်တွင် ဖော်ပြသည်။   ဤနှိမ်နင်းမှုသည် အင်ဒိုနီးရှားနိုင်ငံအတွင်း အကြီးမားဆုံးသော တရားမဝင် ဒစ်ဂျစ်တယ် လောင်းကစားကွန်ရက် နှိမ်နင်းမှုများထဲမှ တစ်ခုဖြစ်ကြောင်း စနေနေ့တွင် ရဲတပ်ဖွဲ့က ထုတ်ပြန်ခဲ့သည်။   ဂျကာတာမြို့ တရုတ်တန်းအနီးရှိ စီးပွားရေးအဆောက်အအုံတစ်ခုတွင် ဝင်ရောက်စီးနင်းခဲ့ခြင်းဖြစ်ပြီး ဖမ်းဆီးရမိသူ ၃၂၁ ဦးအနက် အများစုမှာ ဗီယက်နမ်နိုင်ငံသားများ ဖြစ်ကြသည်။   ဖမ်းဆီးခံရသူများထဲတွင် ဗီယက်နမ်နိုင်ငံသား ၂၂၈ ဦး၊ တရုတ်နိုင်ငံသား ၅၇ ဦး ပါဝင်ပြီး ကျန်ရှိသူများမှာ လာအို၊ မြန်မာ၊ ထိုင်း၊ မလေးရှားနှင့် ကမ္ဘောဒီးယားနိုင်ငံတို့မှဖြစ်ကြောင်း အင်ဒိုနီးရှားအမျိုးသားရဲတပ်ဖွဲ့၊ အထွေထွေရာဇ၀တ်မှုဆိုင်ရာ ညွှန်ကြားရေးမှူး Wira Satya Triputra က ပြောကြားခဲ့သည်။   အဆိုပါနေရာသည် အွန်လိုင်းလောင်းကစားဝက်ဘ်ဆိုက်ပေါင်း ၇၀ ကျော်ကို ချုပ်ကိုင်ထားသည့် ဗဟိုချက်ဖြစ်ပြီး ဒစ်ဂျစ်တယ်သက်သေအထောက်အထားများအရ အင်ဒိုနီးရှားနိုင်ငံပြင်ပရှိ ကစားသမားများကို ပစ်မှတ်ထားလုပ်ဆောင်နေခြင်းဖြစ်ကြောင်း စုံစမ်းစစ်ဆေးသူများက ပြောကြားခဲ့သည်။   လက်ရှိတွင် အဆိုပါကွန်ရက်၏ နောက်ကွယ်မှ စီစဉ်သူများနှင့် ငွေကြေးထောက်ပံ့သူများကို စုံစမ်းဖော်ထုတ်လျက်ရှိသည်။   အဆိုပါလုပ်ငန်းသည် လွန်ခဲ့သော နှစ်လခန့်ကပင် စနစ်တကျဖွဲ့စည်းလုပ်ကိုင်နေခြင်းဖြစ်ပြီး ဖောက်သည်ဝန်ဆောင်မှု၊ တယ်လီမားကတ်တင်းနှင့် ဘဏ္ဍာရေးစီမံခန့်ခွဲမှုဟူ၍ အခန်းကဏ္ဍများခွဲကာ လုပ်ကိုင်နေစဉ် ဖမ်းဆီးရမိခဲ့ခြင်းဖြစ်သည်။   ဖမ်းဆီးခံရသူအများစုမှာ ရက်တို ဗီဇာသက်တမ်းဖြင့် ဝင်ရောက်လာသူများဖြစ်ပြီး ဗီဇာသက်တမ်းကျော်လွန်နေထိုင်မှုများအပြင် ငွေကြေးခဝါချမှုနှင့် လောင်းကစားဆိုင်ရာ ပြစ်မှုများဖြင့်လည်း စွဲချက်တင်ခံရဖွယ်ရှိသည်။   စနေနေ့အထိ သံသယရှိသူ ၂၇၅ ဦးကို တရားဝင်အမှုဖွင့်လှစ်ထားပြီး ပြစ်မှုထင်ရှားပါက ထောင်ဒဏ် ၉ နှစ်အထိ ကျခံရနိုင်သည့်အပြင် အင်ဒိုနီးရှား ရူပီး ၂ ဘီလီယံ (အမေရိကန်ဒေါ်လာ ၁၁၆,၀၀၀ ခန့်) ဒဏ်ငွေရိုက်ခံရနိုင်သည်။   အင်ဒိုနီးရှားအခြေစိုက် နိုင်ငံတကာ ရဲတပ်ဖွဲ့ အင်တာပိုလ်ဗျူရို အတွင်းရေးမှူး Untung Widyatmoko ၏ ပြောကြားချက်အရ ယခင်က မြန်မာနှင့် ကမ္ဘောဒီးယားနိုင်ငံတို့တွင် အခြေစိုက်ခဲ့သော အွန်လိုင်းလောင်းကစားလုပ်ငန်းများသည် အဆိုပါနိုင်ငံများတွင် နှိမ်နင်းမှုများ ပြုလုပ်လာခြင်းကြောင့် အင်ဒိုနီးရှားအပါအဝင် အခြားနိုင်ငံများသို့ ပြောင်းရွှေ့လာသည့် လက္ခဏာများ တွေ့ရှိနေသည်ဟု ဆိုသည်။   ပြီးခဲ့သည့် ဗုဒ္ဓဟူးနေ့ကလည်း စင်ကာပူနိုင်ငံနှင့် ကပ်လျက်ရှိသော အင်ဒိုနီးရှားနိုင်ငံ ဘတမ် (Batam) ကျွန်းတွင် ရင်းနှီးမြှုပ်နှံမှုဆိုင်ရာ လိမ်လည်မှုများ၌ ပါဝင်သည်ဟု သံသယရှိသူ ဗီယက်နမ်၊ တရုတ်နှင့် မြန်မာနိုင်ငံသား ၂၁၀ ဦးကို ဖမ်းဆီးခဲ့သည်။   ထို့ပြင် ဆူရာဘာယားမြို့တွင်လည်း ရဲအရာရှိအဖြစ် ဟန်ဆောင်ကာ ဖုန်းဖြင့်လိမ်လည်နေသည့် ဂျပန်နှင့် တရုတ်နိုင်ငံသား ၄၄ ဦးကို ဖမ်းဆီးခဲ့သည်။   ကမ္ဘာ့အကြီးဆုံး မူစလင်လူဦးရေ အများဆုံးဖြစ်သည့် အင်ဒိုနီးရှားနိုင်ငံတွင် အွန်လိုင်းလောင်းကစားပြုလုပ်ခြင်းမှာ တရားမဝင်ဘဲ၊ ယခုအခါ နယ်စပ်ဖြတ်ကျော် ဆိုက်ဘာရာဇ၀တ်မှုများကို တိုက်ဖျက်ရန်အတွက် နှိမ်နင်းမှုများကို အရှိန်အဟုန်မြှင့် ဆောင်ရွက်လျက်ရှိသည်ဟု ရဲတပ်ဖွဲ့က ဆိုသည်။   #Indo #Scammer #Scam

အင်ဒိုနီးရှားတွင် ကျားဖြန့် လုပ်ငန်း လုပ်နေသော နိုင်ငံခြားသားများ ဖမ်းဆီးရမိ

အင်ဒိုနီးရှားတွင် ကျားဖြန့် လုပ်ငန်း လုပ်နေသော နိုင်ငံခြားသားများ ဖမ်းဆီးရမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  အင်ဒိုနီးရ…

  • May 11, 2026
အမေရိကန်-တရုတ် ထိပ်သီးဆွေးနွေးပွဲ ကုန်သွယ်ရေး၊ စစ်ရေး နှင့် AI တို့ ပါဝင်မည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   အမေရိကန်-တရုတ် ခေါင်းဆောင်နှစ်ဦး ပေကျင်းတွင် တွေ့ဆုံမည့်ခရီးစဉ် အမေရိကန်သမ္မတ ဒေါ်နယ်ထရန့်နှင့် တရုတ်သမ္မတ ရှီကျင့်ဖျင်တို့သည် ယခုရက်သတ္တပတ်အတွင်း တရုတ်နိုင်ငံ၊ ပေကျင်းမြို့တွင် မျက်နှာချင်းဆိုင် တွေ့ဆုံဆွေးနွေးကြမည်ဖြစ်သည်။   ဤခရီးစဉ်သည် သမ္မတထရန့်အနေဖြင့် ၂၀၁၇ ခုနှစ်နောက်ပိုင်း ပေကျင်းသို့ ပထမဆုံးအကြိမ် ပြန်လည်ရောက်ရှိမည့် ခရီးစဉ်ဖြစ်သည်။   ဆွေးနွေးပွဲတွင် နှစ်နိုင်ငံကြား တင်းမာနေသော ကုန်သွယ်ရေး၊ အီရန်စစ်ပွဲအရေး၊ ထိုင်ဝမ်အရေး၊ နျူကလီးယားလက်နက်နှင့် နောက်ဆုံးပေါ် AI နည်းပညာ အန္တရာယ်ကင်းရှင်းရေး စသည့် အရေးကြီးအကြောင်းအရာများကို ဆွေးနွေးသွားရန်ရှိသည်။   အမေရိကန်အစိုးရ တာဝန်ရှိသူများ၏ အဆိုအရ ဤခရီးစဉ်အတွင်း တရုတ်နိုင်ငံဘက်က အမေရိကန်၏ Boeing လေယာဉ်များ၊ စိုက်ပျိုးရေးထွက်ကုန်များနှင့် စွမ်းအင်ကဏ္ဍများကို ဒေါ်လာဘီလီယံနှင့်ချီ၍ ဝယ်ယူမည့် သဘောတူညီချက်များ ရရှိရန် မျှော်လင့်ထားကြသည်။   ထို့ပြင် နှစ်နိုင်ငံကြား “ကုန်သွယ်ရေးနှင့် ရင်းနှီးမြှုပ်နှံမှုကော်မတီ” များ ဖွဲ့စည်းရန်လည်း စီစဉ်နေကြသည်။   သမ္မတထရန့်သည် အမေရိကန်၊ အစ္စရေးနှင့် အီရန်တို့ကြား ဖြစ်ပွားနေသော စစ်ပွဲကို အဆုံးသတ်နိုင်ရေးအတွက် အီရန်အပေါ် သြဇာညောင်းသည့် တရုတ်နိုင်ငံက ကူညီပေးရန် တိုက်တွန်းသွားမည်ဖြစ်သော်လည်း၊ တရုတ်သမ္မတ ရှီကျင့်ဖျင်မှာမူ အမေရိကန်၏ ထိုင်ဝမ်အရေး ပါဝင်ပတ်သက်မှုအပေါ် စိတ်ပျက်နေဆဲဖြစ်သည်။   နည်းပညာပိုင်းတွင် AI ကြောင့် မလိုလားအပ်သော ပဋိပက္ခများမဖြစ်စေရန် နှစ်နိုင်ငံကြား ဆက်သွယ်ရေးလမ်းကြောင်းတစ်ခု ထားရှိရန်လည်း အမေရိကန်ဘက်က အဆိုပြုသွားရန် ရှိနေသည်။ #americanChinaSummit

အမေရိကန်-တရုတ် ထိပ်သီးဆွေးနွေးပွဲ ကုန်သွယ်ရေး၊ စစ်ရေး နှင့် AI တို့ ပါဝင်မည်

အမေရိကန်-တရုတ် ထိပ်သီးဆွေးနွေးပွဲ ကုန်သွယ်ရေး၊ စစ်ရေး နှင့် AI တို့ ပါဝင်မည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  အမေရိကန်-တ…

  • May 11, 2026
မြောက်ကိုရီးယားက နျူကလီးယား အလိုအလျောက် လက်တုံ့ပြန်မှု ဥပဒေပြဌာန်း   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   မြောက်ကိုရီးယားနိုင်ငံသည် ၎င်းတို့၏ ခေါင်းဆောင်ပိုင်းအား ပစ်မှတ်ထားတိုက်ခိုက်လာပါက နျူကလီးယားလက်နက်ဖြင့် အလိုအလျောက် ချက်ချင်းလက်တုံ့ပြန်တိုက်ခိုက်မည့် ဥပဒေတစ်ရပ်ကို ပြဋ္ဌာန်းလိုက်သည်။   အဆိုပါ အခြေခံဥပဒေပြင်ဆင်ချက်အရ ခေါင်းဆောင်ကင်ဂျုံအန်း သတ်ဖြတ်ခံရခြင်း သို့မဟုတ် နိုင်ငံတော်၏ နျူကလီးယားအင်အားစုများကို ကွပ်ကဲအုပ်ချုပ်သည့်စနစ် (Command-and-Control) သည် ရန်သူ့တိုက်ခိုက်မှုကြောင့် အန္တရာယ်ကျရောက်လာပါက နျူကလီးယားလက်နက်ဖြင့် အလိုအလျောက် ပြန်လည်တိုက်ခိုက်ရမည်ဟု ပါရှိသည်။   ဘယ်သူ့ကို တိုက်ခိုက်မည်နည်းဟူသော အချက်တွင် အတိအကျဖော်ပြထားခြင်းမရှိဘဲ “ရန်လိုသောအင်အားစုများ” ဟုသာ ယေဘုယျသုံးနှုန်းထားသည်။ ပစ်မှတ်များတွင် တောင်ကိုရီးယား၊ ဂျပန်နှင့် အမေရိကန်ရှိ မြို့ကြီးများ ပါဝင်နိုင်သည်ဟု စစ်ရေး အကဲခတ်များက ယူဆသည်။   ဤကဲ့သို့ ပြင်ဆင်ပြဋ္ဌာန်းရခြင်းမှာ ပြီးခဲ့သည့် အီရန်စစ်ဆင်ရေးအတွင်း အီရန်ဘာသာရေးခေါင်းဆောင် အလီခါမေနီ အသတ်ခံရမှုအပြီး ကမ္ဘာ့အခြေအနေများ တင်းမာလာမှုကြောင့်ဖြစ်ကြောင်း နိုင်ငံတကာသတင်းများက သုံးသပ်ဖော်ပြကြသည်။   မြောက်ကိုရီးယား၏ ပြဋ္ဌာန်းချက်အသစ်အရ နျူကလီးယားကွပ်ကဲမှုစနစ် အန္တရာယ်ကျရောက်ပါက လက်တုံ့ပြန်မှုကို “အလိုအလျောက်နှင့် ချက်ချင်း” ဆောင်ရွက်သွားမည်ဖြစ်သည်။   #Nuclear #NorthKoreaNuclear

မြောက်ကိုရီးယားက နျူကလီးယား အလိုအလျောက် လက်တုံ့ပြန်မှု ဥပဒေပြဌာန်း

မြောက်ကိုရီးယားက နျူကလီးယား အလိုအလျောက် လက်တုံ့ပြန်မှု ဥပဒေပြဌာန်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  မြောက်ကိုရီးယားနိုင်…

  • May 11, 2026
×Close