သတင်း

ရာသီတုပ်ကွေးနှင့် ဝမ်းပျက်ဝမ်းလျှော ကူးစက်ခံရသဖြင့် ရှမ်းတောင် ဖယ်ခုံ၌ စာသင်ကျောင်းပါ ပိတ်ထားရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   ရှမ်းပြည်တောင်ပိုင်း၊ ဖယ်ခုံမြို့နယ်၊ မယ်စုံတောင်ကျေးရွာတွင် ဒေသခံများနှင့် စစ်ဘေးရှောင်များ အပါအဝင် လူဦးရေ ၁၆၀ ခန့် ရာသီတုပ်ကွေးနှင့် ဝမ်းပျက်ဝမ်းလျှော ရောဂါများ တစ်ပြိုင်နက်တည်း ကူးစက်ခံနေရသဖြင့် ကျန်းမာရေး စောင့်ကြည့်နိုင်ရန် အခြေခံပညာ စာသင်ကျောင်းများကိုပါ ယာယီ ပိတ်ထားရသည်။   အဆိုပါ ကျေးရွာတွင် လွန်ခဲ့သည့် ဩဂုတ်လဆန်းမှစ၍ တစ်ရွာလုံးနီးပါး ချောင်းဆိုး၊ နှာစေး၊ ဖျားနာသည့် လက္ခဏာများ စတင်ဖြစ်ပွားခဲ့ခြင်းဖြစ်ပြီး မိုးရာသီ ကာလအတွင်း ရောဂါကူးစက်မှုနှုန်း အရှိန်အဟုန်ဖြင့် မြင့်တက်လာခြင်းဖြစ်သည်။   ဒေသခံ စစ်ရှောင်တစ်ဦးက “ရွာမှာက ဖျားတဲ့သူတွေ အများကြီးပဲ။ ကလေးရော လူကြီးရော အကုန်လုံး ချောင်းဆိုးပြီး ဖျားနေကြတာ။ ရောဂါကူးတာ အရမ်းမြန်တော့ ကူးစက်မှု ပိုမဆိုးသွားအောင် အခု စာသင် ကျောင်းပါ ပိတ်ထားလိုက်ရတယ်” ဟု ပြောသည်။   ထို့ပြင် ဖယ်ခုံမြို့နယ်အတွင်း တိုက်ပွဲများနှင့် စစ်အုပ်စုတပ်၏ လက်နက်ကြီး၊ လေကြောင်း အန္တရာယ်များကြောင့် စစ်ဘေးရှောင်များ စုဝေးနေထိုင်နေရသည့် အခက်အခဲများကြားမှ ယခုကဲ့သို့ မိုးရာသီ ရောဂါဘယများ ထပ်မံ ကူးစက်လာသဖြင့် ကျန်းမာရေး စောင့်ရှောက်မှု ကဏ္ဍတွင် ကြီးမားသည့် စိန်ခေါ်မှုများနှင့် ရင်ဆိုင်နေရသည်။   မယ်စုံတောင်ရွာတွင် ရောက်ရှိနေပြီး စစ်ရှောင်များကို အကူအညီပေးနေသူ တစ်ဦးက “မယ်စုံတောင်ရွာမှာရှိတဲ့ ရွာခံနဲ့ စစ်ဘေးရှောင် ၁၆၀ လောက်ပေါ့နော် ပြောရမယ်ဆိုရင် တစ်ရွာလုံးနီးပါး ဖျားနာနေကြပါတယ်။ ဖြစ် တာတော့ နှာစေး၊ ချောင်းဆိုး ဖြစ်တယ်။ တုပ်ကွေးဖြစ်နေကြတယ်။ ဆိုတော့ အခုက အကူအညီတွေ လိုနေ တယ်ဗျ။ ဖျားနေကြတာ တော်တော်ကြပြီဗျ။ အခုက ကျောင်းတွေလည်း ပိတ်ထားရ တယ်။ ဆေးအဖွဲ့တွေကို တတ်နိုင် သမျှ ဝိုင်းကူပေးဖို့ အကူအညီတောင်းပါတယ်ဗျာ” ဟု ပြောသည်။   ဖြစ်ပွားနေသည့် ရောဂါကူးစက်မှုများနှင့် ပတ်သက်၍ ကယန်းအမျိုးသား ကျန်းမာရေးကော်မတီ (KNHC) က ဩဂုတ်လ ၈ ရက်နေ့တွင် လာရောက်၍ အရေးပေါ် ဆေးကုသမှုများ ပေးခဲ့သည့်အပြင် ကျန်းမာရေး အသိပညာ ပေးခြင်းများကိုပါ ဆောင်ရွက်ပေးခဲ့သည်ဟု စစ်ရှောင်များက ပြောသည်။   မိုးရာသီကာလအတွင်း ဝမ်းပျက်ဝမ်းလျှော ရောဂါမှ ကာကွယ်နိုင်ရန် သန့်ရှင်းသည့် ရေကိုသာ ကျိုချက် သောက်သုံးကြရန်နှင့် ရာသီတုပ်ကွေး မကူးစက်စေရန်အတွက် လူစုလူဝေး ရှိသည့်နေရာများကို ရှောင်ရှားကြ ရန်၊ ချောင်းဆိုး နှာချေပါက ပါးစပ်နှင့် နှာခေါင်းကို သေချာစွာ ဖုံးအုပ်ကြရန် ကျန်းမာရေးအဖွဲ့များက တိုက်တွန်း ထားသည်။   လက်ရှိတွင် ရောဂါသက်သာမှု အခြေအနေများကို အနီးကပ် စောင့်ကြည့်လျက်ရှိပြီး ပြင်းထန်သည့် လက္ခဏာ များ ပေါ်ပေါက်လာပါက နီးစပ်ရာ ဆေးရုံ၊ ဆေးခန်းများသို့ အမြန်ဆုံး သွားရောက်ကာ အရေးပေါ် ကုသမှု ခံယူကြရန် ကျန်းမာရေး တာဝန်ရှိသူများက နှိုးဆော်ထားသည်။   ဓါတ်ပုံ - ထွန်းမြန်မာ ဒိုနေးရှင်း   #ဖယ်ခုံမြို့နယ် #ရာသီတုပ်ကွေး #ဝမ်းပျက်ဝမ်းလျှော

ရာသီတုပ်ကွေးနှင့် ဝမ်းပျက်ဝမ်းလျှော ကူးစက်ခံရသဖြင့် ရှမ်းတောင် ဖယ်ခုံ၌ စာသင်ကျောင်းပါ ပိတ်ထားရ

ရာသီတုပ်ကွေးနှင့် ဝမ်းပျက်ဝမ်းလျှော ကူးစက်ခံရသဖြင့် ရှမ်းတောင် ဖယ်ခုံ၌ စာသင်ကျောင်းပါ ပိတ်ထားရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်…

  • August 14, 2026
မိုးမိတ်တွင် စစ်တပ်ထိုးစစ်ကို KIA ကြားဖြတ်တိုက်၊ ရေကြီးနေသည့် မဘိမ်းကို စစ်တပ် ဗုံးကြဲ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၃ ရက်။   ရှမ်းပြည်မြောက်ပိုင်း၊ မိုးမိတ်မြို့နယ်အတွင်း စစ်တပ်က အင်အား ၁၅၀ ခန့်ဖြင့် မဘိမ်းမြို့နယ်ဘက်သို့ စစ်ကြောင်းထိုးလာသဖြင့် ကချင်လွတ်လပ်ရေးတပ်မတော် (KIA) နှင့် တော်လှန်ရေး မဟာမိတ်တပ်များက ကြားဖြတ်တိုက်ခိုက်ခဲ့ရာမှ တိုက်ပွဲများ ပြင်းထန်လျက်ရှိသည်။   မိုးမိတ်မြို့အထွက် အထက်ညောင်နီနှင့် အောက်ညောင်နီကျေးရွာအနီး KIA တပ်မဟာ (၄)၊ အမှတ် (၃၄) တပ်ရင်း လှုပ်ရှားနယ်မြေအတွင်းသို့ စစ်အုပ်စုတပ်က ထိုးစစ်ဆင်လာခြင်းကြောင့် ဩဂုတ်လ ၁၀ ရက်နှင့် ၁၁ ရက်နေ့များ တွင် တိုက်ပွဲများ ပြင်းထန်စွာ ဖြစ်ပွားခဲ့ခြင်းဖြစ်သည်။   စစ်အုပ်စုတပ်ဘက်မှ Mi-35 တိုက်ခိုက်ရေး ဟက်လီကော်ပတာများအပြင် Y-12 လေယာဉ်များကို အသုံးပြုကာ လေကြောင်းမှ ဆက်တိုက် ဗုံးကြဲတိုက်ခိုက်ခဲ့သည်။   မိုးမိတ်ဒေသခံ စစ်ရေးသတင်းရင်းမြစ်က “တိုက်ပွဲထဲမှာက ဟက်စကီးနဲ့ ပြန်လာပစ်တယ်။ ပြီးတော့ Y-12 နဲ့ ရော လာပစ်တယ်။ စစ်အုပ်စုတပ်ဘက်က ထိုးလာတာကြောင့် တိုက်ပွဲဖြစ်လာတာပါ။ မဘိမ်းဘက်ကို ဦးတည် ပြီး ထိုးစစ်ဆင်နေတဲ့ သဘောမျိုးဗျ။ စစ်ကြောင်းက ထွက်တာနဲ့ တော်လှန်ရေး ပူးပေါင်းတပ်တွေက ကြား ဖြတ် တိုက်ခိုက်တာပေါ့နော်။ မြေပြင်မှာ တိုက်ပွဲဖြစ်ပြီ ဆိုတာနဲ့ လေကြောင်းက လာပြီပဲ” ဟု ပြောသည်။   အဆိုပါ တိုက်ပွဲအတွင်း မိုးမိတ်မြို့အခြေစိုက် ခမရ (၃၄၈) မှ ဗိုလ်ကြီးတစ်ဦးနှင့် တပ်သားများ လမ်းဝက်တွင် ပိတ်မိသွားခဲ့ပြီး တပ်သားတစ်ဦး သေဆုံးခဲ့ကြောင်း KIA နှင့် နီးစပ်သူများက ပြောသည်။   ထို့ပြင် ညောင်နီကျေး ရွာအနီးက တိုက်ပွဲတွင် ရှမ်းပြည်တိုးတက်ရေးပါတီ (SSPP/SSA) တပ်ဖွဲ့များပါ တော်လှန်ရေး တပ်များဘက်မှ ပါဝင်တိုက် ခိုက်ခဲ့ကြောင်း ဒေသတွင်း သတင်းရင်းမြစ်အချို့က ဆိုသော်လည်း SSPP ဘက်မှ အတည်ပြုနိုင်ရန် ဆက်လက် စုံစမ်းနေဆဲ ဖြစ်သည်။   မိုးမိတ်မြို့နယ်သည် ၂၀၂၄ ခုနှစ်အတွင်း တအာင်းအမျိုးသားလွှတ်မြောက်ရေးတပ်မတော် (TNLA) က သိမ်းပိုက် ခဲ့သည့် မြို့ဖြစ်ပြီး ၂၀၂၅ ခုနှစ် အပစ်ရပ်စဲရေး သဘောတူညီချက်အရ စစ်အုပ်စုတပ်ထံ ပြန်လည် လွှဲပြောင်းပေး ခဲ့ရသော မြို့ဖြစ်သည်။   စစ်အုပ်စုတပ်သည် ၂၀၂၅ ခုနှစ် နိုဝင်ဘာလတွင် မိုးမိတ်မြို့ပေါ်ကို အပြည့်အဝ ပြန်လည်ထိန်းချုပ်ခဲ့ပြီးနောက် ၂၀၂၆ ခုနှစ်ဆန်းပိုင်းမှစ၍ KIA အမှတ် (၃၄) တပ်ရင်းနှင့် တော်လှန်ရေး တပ်ပေါင်းစုများက မြို့ပြင်မှ ဝိုင်းပတ် ပိတ်ဆို့ထားခဲ့ခြင်း ဖြစ်သည်။   လက်ရှိတွင် စစ်အုပ်စုတပ်သည် KIO ထိန်းချုပ်ထားသည့် ရွှေလီမြစ်ဝှမ်းတစ်ကြော မြစ်ဆုံကျေးရွာနှင့် မဘိမ်းမြို့ နယ်ဘက်သို့ ပြန်လည်စိုးမိုးနိုင်ရန် ထိုးစစ်ဆင်လာခြင်းဖြစ်သည်။   အခြားတစ်ဖက်တွင်လည်း မဘိမ်းမြို့နယ်အတွင်း တရုတ်နိုင်ငံ ရွှေလီမြစ်အထက်ပိုင်းမှ ဆည်ရေများ လွှတ်ချမှု ကြောင့် ရွှေလီမြစ်နှင့် နမ့်ပေါ်ချောင်းရေများ မြင့်တက်ကာ ကျေးရွာများနှင့် မြို့ပေါ်ရပ်ကွက်များ ရေလွှမ်းမိုးမှု ခံနေရစဉ် စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သည်ဟု ရှမ်းလူ့အခွင့်အရေးမဏ္ဍိုင်က ဩဂုတ်လ ၁၂ ရက်တွင် ထုတ်ပြန်ထားသည်။   ဇူလိုင်လ ၂၈ ရက်မှ ဩဂုတ်လ ၈ ရက်အထိ စစ်အုပ်စုတပ်၏ လေကြောင်းတိုက်ခိုက်မှုများကြောင့် မဘိမ်းမြို့ နယ်အတွင်း အရပ်သား ၄ ဦး သေဆုံးကာ ၈ ဦး ဒဏ်ရာရရှိခဲ့ပြီး မဘိမ်းမြို့ ပြည်သူ့ဆေးရုံကြီး အပါအဝင် နေအိမ် အလုံး ၂၀ ခန့် ပျက်စီးခဲ့ကြောင်း သိရသည်။   မဘိမ်းဒေသခံတစ်ဦးက “ဒီမှာက ဗုံးသံ လက်နက်သံတွေ ကြားရတယ်။ ဒီရက်ပိုင်းတော့ ပြန်တိတ်နေပေမဲ့ စစ်အုပ်စုတပ်တွေ မြစ်ဆုံဘက် မရောက်သေးဘူး၊ မိုးမိတ်အထွက်လောက်မှာတင် ကြားဖြတ်တိုက်ခိုက်ခံ နေရတာ” ဟု နယ်မြေအတွင်း အခြေအနေကို ပြောပြသည်။   ထို့ပြင် “ရေဘေးဒုက္ခ ဖြစ်နေတဲ့ကြားထဲကမှ စစ်တပ်က ဆေးရုံရော၊ ပြည်သူတွေရဲ့ အိမ်တွေကိုပါ လေကြောင်း ကနေ ညဘက်ပိုင်းတွေမှာ ဗုံးလာကြဲတာမျိုးတွေ လုပ်နေတာပါ” ဟု အဆိုပါ ဒေသခံက ဆက်ပြောသည်။   လက်ရှိတွင် မိုးမိတ်မြို့ပြင်၌ နှစ်ဖက်တပ်များ စစ်ရေးအရ အပြန်အလှန် စောင့်ကြည့်လျက်ရှိပြီး စစ်ရေးတင်း မာမှုများ ဆက်လက် မြင့်တက်လျက်ရှိသည်။   ဓါတ်ပုံ - (SHRF) လေကြောင်းတိုက်ခိုက်မှုကြောင့် ပျက်စီးသွားသော မဘိမ်းမြို့နယ် ရပ်ကွက် ၃ ရှိ ဆေးရုံ အဆောက်အအုံ   #မိုးမိတ် #မဘိမ်း #KIA

မိုးမိတ်တွင် စစ်တပ်ထိုးစစ်ကို KIA ကြားဖြတ်တိုက်၊ ရေကြီးနေသည့် မဘိမ်းကို စစ်တပ် ဗုံးကြဲ

မိုးမိတ်တွင် စစ်တပ်ထိုးစစ်ကို KIA ကြားဖြတ်တိုက်၊ ရေကြီးနေသည့် မဘိမ်းကို စစ်တပ် ဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၃ ရက်။ …

  • August 13, 2026
စစ်တပ်က ကျောက်ဖြူစစ်မျက်နှာသို့ အင်အားရာချီ ဖြည့်တင်းနေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၃ ရက်။   တိုက်ပွဲများ ခေတ္တငြိမ်သက်နေသည့် ရခိုင်ပြည်၊ ကျောက်ဖြူမြို့နယ်ရှိ စစ်မျက်နှာများသို့ စစ်တပ်က အင်အား ရာချီ ဖြည့်တင်းနေသောကြောင့် မကြာမီ တိုက်ပွဲများ ပြန်လည်ဖြစ်ပွားလာနိုင်ကြောင်း ဒေသခံ စစ်ရေးသတင်း ရင်းမြစ်များက ပြောသည်။   ကျောက်ဖြူမြို့နယ်တွင် ဇူလိုင်လ နောက်ဆုံးအပတ်မှစ၍ ဩဂုတ် ၁၃ ရက်နေ့အထိ အာရက္ခတပ်တော် (AA) နှင့် စစ်တပ်တို့အကြား ရင်ဆိုင်တိုက်ပွဲများ မရှိဘဲ လက်နက်ကြီးနှင့် ဒရုန်းများဖြင့် ပစ်ခတ်မှုအချို့သာ ရှိနေပြီး၊ စစ်တပ်ဘက်က အင်အား ဆက်တိုက် ဖြည့်တင်းလျက်ရှိသည်။   ကျောက်ဖြူဒေသခံ စစ်ရေးသတင်းအရင်းအမြစ် အမျိုးသားတစ်ဦးက “တရုတ်မှ ဒရုန်းနည်းပညာအကူအဖွဲ့တွေ ဇူလိုင်လကတည်းက ရောက်တယ်၊ ကျောက်ဖြူမြို့နဲ့ ၁၂ မိုင်ခန့်အကွာနေရာ တွေမှာအခုရက်ပိုင်း စစ်တပ် အင် အားဖြည့်နေတာ” ဟု ပြောသည်။   အဆိုပါ အင်အားဖြည့်တင်းမှုတွင် ကျောက်ဖြူမြို့အခြေစိုက် ခလရ (၅၄၂) နှင့် (၅၄၃) တပ်ရင်းများမှတစ်ဆင့် အမှတ် (၃၂) ရဲတပ်ရင်းအပြင် တရုတ်စီမံကိန်းများရှိရာ ဂုံးချွိန်ကျေးရွာအုပ်စု၊ မလကျွန်းကျေးရွာဘက်သို့ ဩဂုတ်လ ၂ ရက်မှ ၁၂ ရက်နေ့အထိ အင်အားများ ဆက်တိုက် တိုးမြှင့်ထားကြောင်း ဆိုသည်။   ကျောက်ဖြူဒေသခံက “မင်းပြင်နဲ့ ဇင်ချောင်းဘက် တောင်မော်ဦးရေတပ်နားက အဝတောင်ရွာတွေကို အင်အား တွေ တိုးပြီးဖြည့်နေပါတယ်။ တိုက်ပွဲမကြာခင် ဖြစ်နိုင်တယ်။ မိုးတွင်းဆိုတော့ စစ်တပ်က အချိန်ယူနေတယ်။ အေအေက မူလနေရာတွေမှာ ရှိတယ်လို့ သိရတယ်” ဟု ပြောသည်။   ထို့ပြင် မင်းပြင်နှင့် သိုင်းချောင်း ဝန်းကျင်တွင်လည်း အင်အား ၂၀၀ နီးပါးပါ စစ်ကြောင်းတစ်ကြောင်း တိုးမြှင့် ထားသကဲ့သို့ ဒရုန်း နည်းပညာအဖွဲ့များကိုပါ တိုးချဲ့ချထားသည်။   ကျောက်ဖြူလေဆိပ်ကိုလည်း လေတပ်စခန်းသဖွယ် ပြုလုပ်ကာ ဂျိုင်ရိုကော်ပတာ (Gyrocopter) များကို အချိန်မီ အသုံးပြုနိုင်ရန် စုဖွဲ့ထားကြောင်း ဒေသခံများက ဆိုသည်။   ဩဂုတ် ၁၁ ရက်နေ့ကလည်း တရုတ် ဒရုန်းနည်းပညာ အကူအဖွဲ့များ ကျောက်ဖြူလေဆိပ်သို့ ရောက်ရှိခဲ့ပြီး ထိုမှတစ်ဆင့် ကျောက်ဖြူမြို့နှင့် ၁၂ မိုင်ခန့်အကွာသို့ ထုတ်နုတ်အင်အား အချို့ တိုးမြှင့် ဖြည့်တင်းခဲ့သည်။   လက်ရှိတွင် ကျောက်ဖြူမြို့နယ် တောင်မော်ဦး ရေတပ်စခန်းအနီး၌ နှစ်ဖက်တိုက်ပွဲများ ငြိမ်သက်နေသော်လည်း စစ်တပ်က စစ်သုံးကား ၄ စီးခန့်ဖြင့် စစ်အင်အားများ ဖြည့်တင်းနေသည့်အတွက် စစ်ရေးတင်းမာမှု မြင့်တက် လျက်ရှိသည်။ မင်းပြင်နှင့် ဇင်ချောင်းဘက်တွင်လည်း စစ်မှုထမ်းသစ်များ ပါဝင်သည့် အင်အားများကို ထပ်မံ ဖြည့်တင်းထားသည်။   ရာသီဥတု အခြေအနေအရ နှစ်ဖက်တပ်များ ထိုးစစ်ဆင် တိုက်ခိုက်မှုများကို ရပ်တန့်ကာ စစ်ဆိုင်ထားသည့် အနေအထားတွင် ရှိနေသော်လည်း စစ်တပ်ဘက်မှ ကုန်းလမ်း၊ စစ်သင်္ဘောများ အသုံးပြု၍ ဓညဝတီ ရေတပ် ဌာနချုပ်နှင့် တောင်မော်ကြီး ရေတပ်စခန်းတို့တွင် အင်အား ဖြည့်တင်းလျက်ရှိသည်။   အဆိုပါ စစ်အင်အားများကို ဧရာဝတီတိုင်းမှ စစ်သင်္ဘောများဖြင့် အဓိက ပို့ဆောင်နေခြင်းဖြစ်ပြီး တစ်ခါတစ်ရံ ကျောက်ဖြူလေဆိပ်မှ တစ်ဆင့် Y-12 လေယာဉ်များဖြင့်လည်း ပို့ဆောင်လျက်ရှိသည်။   #ကျောက်ဖြူမြို့

စစ်တပ်က ကျောက်ဖြူစစ်မျက်နှာသို့ အင်အားရာချီ ဖြည့်တင်းနေ

စစ်တပ်က ကျောက်ဖြူစစ်မျက်နှာသို့ အင်အားရာချီ ဖြည့်တင်းနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၃ ရက်။ တိုက်ပွဲများ ခေတ္တငြိမ်သက်နေသည့် ရ…

  • August 13, 2026
အာရက္ခပြည်သူ့ကျန်းမာရေးဌာနက စစ်ရှောင် ၆၀၀ ကျော်ကို အခမဲ့ မျက်စိစမ်းသပ်ကုသပေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၃ ရက်။   ရခိုင်ပြည်၊ စစ်တွေခရိုင်အတွင်းရှိ စစ်ဘေးရှောင် ပြည်သူ ၆၇၈ ဦးကို အာရက္ခတပ်တော် (AA) ၏ ကျန်းမာရေး ဌာနက ဩဂုတ်လအတွင်း မျက်စိရောဂါ အခမဲ့ စမ်းသပ်ကုသပေးခဲ့ကြောင်း နီးစပ်သည့် ကျန်းမာရေးဝန်ထမ်း များက ပြောသည်။   ထိုသို့ မျက်စိဝေဒနာရှင် ၆၇၈ ဦးအား စမ်းသပ်ပေးခဲ့ရာတွင် မျက်စိခွဲစိတ်ရန် လိုအပ်သည့် လူနာ ၁၅၂ ဦးရှိသည့် အနက် ၅၈ ဦးကို အခမဲ့ ခွဲစိတ်ကုသပေးခဲ့ပြီး မှန်တပ်ရန် လိုအပ်သည့် လူနာ ၉၆ ဦးကိုလည်း မျက်မှန် တပ်ဆင် ပေးသွားမည်ဖြစ်သည်။   ဒေသခံဆရာဝန်တစ်ဦးက “စစ်တွေခရိုင်ထဲမှာကို စမ်းသပ်ပေးတာပါ။ နေရာတော့ ပြောလို့မရပါဘူး။ မျက်စိ အခမဲ့ကုသပေးမယ့် နေရာကို လာမယ့် လမ်းစရိတ်၊ ရောက်ရင် စားစရိတ်၊ ဆေးဝါးခလည်း မယူပါဘူး။ ဒီမျက် စိအတွက် အကုန်ကျခံထားတာ တပ်တော်က စက်ပစ္စည်းတွေ၊ နည်းပညာတွေ၊ ဝန်ထမ်းတွေရဲ့ ကျွမ်းကျင်မှုတွေ ကိုပါ တွေ့ရပါတယ်။ ကျနော်တို့ ဆက်တိုက်လုပ်သွားမှာပါ” ဟု ပြောသည်။   စစ်ဘေးရှောင်များ နေထိုင်ရာ ဒေသများနှင့် အခြား လိုအပ်သည့် နေရာများတွင်လည်း မျက်စိဆရာဝန်များနှင့် ပြသရန် အခက်အခဲ ဖြစ်နေသူများအတွက် အာရက္ခပြည်သူ့ကျန်းမာရေးဌာနက ကျန်းမာရေး စောင့်ရှောက်မှုများ ကို ဆက်လက် ဆောင်ရွက်ပေးသွားမည်ဟု ဆိုသည်။   အာရက္ခပြည်သူ့ကျန်းမာရေးဌာနသည် ပြီးခဲ့သည့် မေလ တတိယအပတ်ကလည်း စစ်ရှောင် မျက်စိဝေဒနာရှင် ၂၂၃ ဦးကို ဒုတိယအကြိမ်အဖြစ် ကုသပေးခဲ့ရာ အပျော့စား မျက်စိအတွင်းတိမ်လူနာ ၃၃ ဦး၊ မျက်သားခြစ်လူနာ ၅ ဦးနှင့် ပါဝါမျက်မှန်တပ် လူနာ ၂၁ ဦး၊ စုစုပေါင်း ၅၉ ဦးကို ခွဲစိတ်ကုသမှုနှင့် မျက်မှန် တပ်ဆင်ပေးမှုများ ပြုလုပ် ခဲ့သည်။   ထို့ပြင် ဧပြီလ ပထမအပတ်ကလည်း စစ်ရှောင် ၂၀၀ ဝန်းကျင်အနက် ၂၇ ဦးကို ပထမအကြိမ် အခမဲ့ ခွဲစိတ်ကုသ ပေးခဲ့သေးသည်။   လက်ရှိတွင် အာရက္ခတပ်တော် (AA) ၏ ကျန်းမာရေးဌာနအနေဖြင့် မျက်စိခွဲစိတ်ကုသပေးခြင်းအပြင် သွား ရောဂါ ကုသခြင်း၊ ကာကွယ်ဆေးထိုးပေးခြင်း၊ မိခင်နှင့် ကလေး ကျန်းမာရေး စောင့်ရှောက်မှု၊ ရောဂါကာကွယ် ထိန်းချုပ်ရေးနှင့် အထွေထွေရောဂါ ကုသမှုများကို ဒေသတွင်း ဆောင်ရွက်ပေးလျက် ရှိသည်။   ရမ်းဗြဲဒေသခံ အမျိုးသမီးတစ်ဦးက “ဆေးဝါးတွေ ရှားပါးနေပေမယ့် အခုလိုကွင်းဆင်းပြီးကုပေးတော့ ကလေး တွေနဲ့ ကိုယ်ဝန်ဆောင်တွေအတွက် အဆင်ပြေပါတယ်။ ပုံမှန်ဆေးထုတ်ဖို့လည်း နေရာတွေ ပြောခဲ့တာ ရှိပါ တယ်” ဟု သတင်းနှင့်မီဒီယာ ကွန်ရက် သတင်းဌာနကို ဇွန်လတွင် ပြောဆိုထားသည်။   ရခိုင်ပြည်အတွင်း လမ်းပန်းဆက်သွယ်ရေးနှင့် ကုန်စည်စီးဆင်းမှုများကို စစ်တပ်က အလုံးစုံဖြတ်တောက်ထား သဖြင့် ဆေးဝါးပြတ်လပ်မှုနှင့် ရင်ဆိုင်နေရသော ဒေသခံပြည်သူများမှာ ကျန်းမာရေးစောင့်ရှောက်မှုအတွက် အာရက္ခတပ်တော် (AA) ၏ အခမဲ့ဆေးကုသပေးမှုများကိုသာ အဓိကအားထားနေကြရခြင်း ဖြစ်သည်။   #AA #ULA #စစ်တွေ #ArakkhaHealthDepartment

အာရက္ခပြည်သူ့ကျန်းမာရေးဌာနက စစ်ရှောင် ၆၀၀ ကျော်ကို အခမဲ့ မျက်စိစမ်းသပ်ကုသပေး

အာရက္ခပြည်သူ့ကျန်းမာရေးဌာနက စစ်ရှောင် ၆၀၀ ကျော်ကို အခမဲ့ မျက်စိစမ်းသပ်ကုသပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၃ ရက်။ ရခိုင်ပြည်၊ စ…

  • August 13, 2026
ဆမီးမြို့ လေကြောင်းမှ ဗုံးကြဲခံရ၊ ၁၆ နှစ်ရွယ် မိန်းကလေးသေဆုံးပြီး ၈ ဦးဒဏ်ရာရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၃ ရက်။   အာရက္ခတပ်တော် (AA) ထိန်းချုပ်ထားသည့် ချင်းပြည်၊ ပလက်ဝခရိုင်၊ ဆမီးမြို့ပေါ်ကို ညနက်ပိုင်းအချိန်တွင် စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် အသက် ၁၆ နှစ်အရွယ် အမျိုးသမီးငယ်တစ်ဦး သေဆုံးပြီး ကလေးသူငယ်များ အပါအဝင် ၈ ဦး ထိခိုက်ဒဏ်ရာ ရရှိသွားခဲ့သည်။   ဩဂုတ်လ ၁၂ ရက်နေ့၊ ည ၁၁ နာရီခွဲခန့်တွင် စစ်အုပ်စုတပ်၏ ဂျက်ဖိုက်တာ အမျိုးအစား တိုက်လေယာဉ် တစ်စီးသည် ဆမီးမြို့အဝင်နှင့် ဗျူဟာစခန်းဟောင်း နေရာများကို ပန်းတိုင်ထား၍ ဗုံး ၄ လုံး ကြဲချတိုက်ခိုက်ခဲ့ ခြင်း ဖြစ်သည်။   အဆိုပါ ဗုံးသီးများအနက် အချို့သည် အရပ်သားများ နေထိုင်ရာ အမှတ် (၂) ရပ်ကွက်အတွင်းသို့ ကျရောက် ပေါက်ကွဲခဲ့သဖြင့် အပြစ်မဲ့ ပြည်သူများ ထိခိုက်သေဆုံးခဲ့ရခြင်း ဖြစ်သည်ဟု ဒေသခံများက ပြောသည်။   ဆမီးမြို့မှ ဒေသခံတစ်ဦးက “လူတွေ အိပ်ပျော်နေတဲ့အချိန် ရုတ်တရက် လေယာဉ်သံကြားပြီး ဗုံးတွေ ဆက် တိုက် ကျပေါက်တာပါ။ အမှတ် (၂) ရပ်ကွက်ထဲ စက်ဝိုင်းလို ကျကွဲတော့ အိမ်တွေလည်း ပျက်စီးပြီး မိသားစု လိုက် ထိကြတာ။ အသက် ၅ နှစ်၊ ၈ နှစ်အရွယ် ကလေးတွေပါ ဒဏ်ရာရကုန်ကြတယ်” ဟု ပြောသည်။   ယခု တိုက်ခိုက်မှုကြောင့် အသက် ၁၆ နှစ်အရွယ် အမျိုးသမီးငယ်တစ်ဦး သေဆုံးခဲ့သည့်အပြင် ၎င်း၏ မိဘနှစ်ပါး နှင့် မောင်ငယ် ၃ ဦး၊ အသက် ၅ နှစ်နှင့် ၈ နှစ်အရွယ် ကလေးသူငယ်များ အပါအဝင် စုစုပေါင်း ၈ ဦး ဒဏ်ရာရရှိခဲ့ သည်။ လက်ရှိတွင် ဒဏ်ရာရရှိသူများကို ဘေးလွတ်ရာသို့ ရွှေ့ပြောင်းပေးထားပြီး အရေးပေါ် ဆေးကုသမှုများ ဆောင်ရွက်ပေးလျက် ရှိသည်။   စစ်အုပ်စုတပ်သည် ဩဂုတ်လ ၁၁ ရက်နေ့ကလည်း ပလက်ဝမြို့အဝင်ကို လေကြောင်းမှ ဗုံးကြဲတိုက်ခိုက်ခဲ့ သဖြင့် ကျောင်းသူ ၂ ဦး ဒဏ်ရာရရှိခဲ့သေးသည်။   ဒေသတွင်း သတင်းရင်းမြစ်တစ်ဦးက “မြေပြင်တိုက်ပွဲတွေမှာ အထိနာလာရင် စစ်အုပ်စုတပ်က AA ထိန်းချုပ် ထားတဲ့ နယ်မြေတွေထဲက ပြည်သူတွေကိုပဲ ပစ်မှတ်ထားပြီး လေကြောင်းကနေ ဒေါသထွက်ထွက်နဲ့ လာကြဲ တာပါ။ ဆမီးတင်မကဘူး၊ ပလက်ဝရော၊ သံတွဲ၊ အမ်း စတဲ့ မြို့တွေမှာပါ ပြည်သူတွေရဲ့ အသက်အန္တရာယ်က နေ့ရောညပါ စိုးရိမ်နေရတယ်” ဟု နယ်မြေတွင်း အခြေအနေကို မှတ်ချက်ပြုသည်။   ထို့ပြင် ရခိုင်ပြည်နှင့် ပလက်ဝဒေသအတွင်း စစ်အုပ်စုတပ်၏ ပစ်မှတ်ထား တိုက်ခိုက်မှုများကြောင့် ၂၀၂၆ ခုနှစ် ဩဂုတ်လ ၁ ရက်မှ ၁၁ ရက်နေ့အထိ ကာလအတွင်း အရပ်သား ၁၉ ဦး သေဆုံးပြီး ၂၆ ဦး ထိခိုက်ဒဏ်ရာရရှိခဲ့ပြီး အရပ်ဘက် အဆောက်အအုံများနှင့် ဘာသာရေး အဆောက်အအုံများ ပျက်စီးခဲ့ကြောင်း လူသားချင်းစာနာ ထောက်ထားမှုနှင့် ဖွံ့ဖြိုးရေးပူးပေါင်းဆောင်ရွက်ရေးရုံး (HDCO) က ဩဂုတ်လ ၁၂ ရက်နေ့တွင် ထုတ်ပြန်ထား သည်။   HDCO ၏ မှတ်တမ်းများအရ သံတွဲ၊ အမ်း၊ မြောက်ဦးနှင့် ပလက်ဝမြို့နယ်များအတွင်း စစ်အုပ်စုတပ်က လေ ကြောင်းမှ ပစ်မှတ်ထား တိုက်ခိုက်နေမှုများကြောင့် အရပ်သား ပြည်သူများ၏ ဘေးအန္တရာယ်မှာ အထူးစိုးရိမ် ဖွယ်ရာ အခြေအနေသို့ ရောက်ရှိနေကြောင်း သတိပေးထားသည်။   #ဆမီးမြို့  #ချင်းပြည် #ပလက်ဝ #AA

ဆမီးမြို့ လေကြောင်းမှ ဗုံးကြဲခံရ၊ ၁၆ နှစ်ရွယ် မိန်းကလေးသေဆုံးပြီး ၈ ဦးဒဏ်ရာရ

ဆမီးမြို့ လေကြောင်းမှ ဗုံးကြဲခံရ၊ ၁၆ နှစ်ရွယ် မိန်းကလေးသေဆုံးပြီး ၈ ဦးဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၃ ရက်။ အာရက္ခတပ်တော်…

  • August 13, 2026
စစ်အုပ်စု၏ တစ်ဖွဲ့ချင်းစီခွဲ၍ ဆွေးနွေးပွဲ ဖိတ်ခေါ်မှုကို KIO လက်ခံမည်မဟုတ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၂ ရက်။   တရုတ်၏ ဖိအားပေးမှုကြောင့် မြန်မာ - တရုတ် နယ်စပ်အခြေစိုက် လက်နက်ကိုင် အဖွဲ့အစည်းများနှင့် စစ်အုပ်စု တို့ တွေ့ဆုံဆွေးနွေးမှုများ ရှိလာနေသော်လည်း ကချင်လွတ်လပ်ရေးအဖွဲ့ (KIO/KIA) အနေဖြင့် အားလုံးပါဝင် သည့် တွေ့ဆုံဆွေးနွေးရေးမူကိုသာ ဆက်လက်ကိုင်စွဲထားသည်ဟု ပြောသည်။   စစ်အုပ်စုသည် တရုတ်-မြန်မာနယ်စပ်ရှိ အင်အားကြီး လက်နက်ကိုင် တော်လှန်ရေး အဖွဲ့အစည်းများဖြစ်သည့် “ဝ” ပြည်သွေးစည်းညီညွတ်ရေး ပါတီ (UWSP/UWSA)၊ တအာင်း အမျိုးသား လွတ်မြောက်ရေး တပ်မတော် (PSLF/TNLA)၊ အမျိုးသား ဒီမိုကရက်တစ် မဟာမိတ် တပ်မတော် - မိုင်းလားအဖွဲ့ (NDAA) နှင့် ရှမ်းပြည်တိုး တက်ရေးပါတီ (SSPP/SSA) စသည့် အဖွဲ့များနှင့် တစ်ဖွဲ့ချင်းစီ သီးခြားတွေ့ဆုံ ဆွေးနွေးမှုများ ဆက်တိုက် ပြုလုပ်လာခဲ့သည်။   ထိုသို့ တစ်ဖွဲ့ချင်းစီ ဖိတ်ခေါ်သည့် တွေ့ဆုံဆွေးနွေးမှုမျိုးတွင် KIO အနေဖြင့် ပါဝင်မည်မဟုတ်ဘဲ အားလုံးပါဝင် နိုင်သည့် အခင်းအကျင်းမျိုးမှသာ တွေ့ဆုံမည်ဟု KIO ၏ ပြောရေးဆိုခွင့်ရှိသူ ဗိုလ်မှူးကြီးနော်ဘူက အတည်ပြု ပြောဆိုသည်။   ဗိုလ်မှူးကြီးနော်ဘူက “ကျနော်တို့ အမြဲတမ်းပြောနေတဲ့ အားလုံးပါဝင်နိုင်တဲ့ အနေအထားမှာပဲ ကျနော်တို့ တွေ့ ဆုံမှု ရှိမှာပါ။ တစ်ဖွဲ့ချင်း တစ်ဖွဲ့ချင်းနဲ့ ဖိတ်ပြီးမှ တွေ့ဆုံတဲ့ တွေ့ဆုံမှုမှာတော့ ကျနော်တို့ KIO အနေနဲ့တော့ တွေ့ဆုံမှာတော့ မဟုတ်ပါဘူး” ဟု ပြောသည်။     ထို့ပြင် စစ်အုပ်စုနှင့် တွေ့ဆုံဆွေးနွေးရန် တရုတ်ဘက်မှ ဖိအားပေး ပြောဆိုခြင်း မရှိသကဲ့သို့ စစ်တပ်ဘက်မှ လည်း တွေ့ဆုံရန် ပြောဆိုလာခြင်း မရှိသေးကြောင်း ၎င်းက ဆက်ပြောသည်။   တစ်ဖွဲ့ချင်းစီ တွေ့ဆုံဆွေးနွေးသည့် နည်းလမ်းသည် တော်လှန်ရေး အဖွဲ့အစည်းများအကြား သပ်လျှိုသွေးခွဲသည့် လုပ်ရပ်ဖြစ်ပြီး တစ်နိုင်ငံလုံး အတိုင်းအတာဖြင့် အပြောင်းအလဲဖြစ်စေမည် မဟုတ်ကြောင်း KIO ဘက်က ထောက်ပြသည်။   “အားလုံး တစ်နိုင်ငံလုံး အတိုင်းအတာ ပါဝင်ပြီးမှ တစ်နိုင်ငံလုံး အတိုင်းအတာ အပြောင်းအလဲ ဖြစ်နိုင်ခြေရှိတဲ့ တွေ့ဆုံဆွေးနွေးပွဲမှာပဲ ကျနော်တို့က ဆွေးနွေးဖို့ ဖြစ်ပါတယ်” ဟု ဗိုလ်မှူးကြီးနော်ဘူက ပြောသည်။   စစ်အုပ်စုတပ်၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) သည် မိုင်းလားအဖွဲ့ (NDAA) နှင့် ဩဂုတ်လ ၁၀ ရက်မှ ၁၁ ရက်နေ့အထိ တွေ့ဆုံခဲ့ပြီး အဆင့်မြင့် ကိုယ်ပိုင် အုပ်ချုပ်ခွင့်ရရေးနှင့် ဒေသဖွံ့ဖြိုးရေးကိစ္စများကို ဆွေးနွေးခဲ့ကြသည်။   အလားတူ ဩဂုတ်လ ၃ ရက်နှင့် ၄ ရက်နေ့များတွင် “ဝ” တပ်ဖွဲ့ (UWSP/UWSA) နှင့် တွေ့ဆုံကာ ပြည်နယ် ရရှိရေး တောင်းဆိုချက်များကို ဆွေးနွေးခဲ့သလို၊ ဩဂုတ်လ ၇ ရက်နေ့က SSPP/SSA နှင့် တွေ့ဆုံ၍ ငြိမ်းချမ်း ရေး၊ အွန်လိုင်းလိမ်လည်မှု (ကျားဖြန့်) နှင့် လောင်းကစားတိုက်ဖျက်ရေး အပါအဝင် ဒေသဖွံ့ဖြိုးရေးဆိုင်ရာများ ကို ဆွေးနွေးခဲ့ကြသည်ဟု ထုတ်ပြန်ထားသည်။   ထို့ပြင် PSLF/TNLA နှင့်လည်း ဇူလိုင်လ ၁၉ ရက်နေ့က စစ်တပ်တို့ တွေ့ဆုံကာ နိုင်ငံရေးနည်းလမ်းဖြင့် ဖြေရှင်း ရေးနှင့် ဒေသတွင်း ပညာရေး၊ ကျန်းမာရေး၊ လမ်းပန်းဆက်သွယ်ရေး ကိစ္စများ ဆွေးနွေးခဲ့ကြသည်။ စစ်အုပ်စုနှင့် ဆွေးနွေးခဲ့သည့် အဆိုပါအဖွဲ့များသည် KIO/KIA အပါအဝင် မြောက်ပိုင်း လက်နက်ကိုင်များဖြင့် ဖွဲ့စည်းထားသည့် ပြည်ထောင်စု နိုင်ငံရေး ဆွေးနွေးညှိနှိုင်းရေးကော်မတီ (FPNCC) ၏ အဖွဲ့ဝင်များ ဖြစ်ကြသည်။   လက်ရှိတွင် စစ်အုပ်စုနှင့် တွေ့ဆုံဆွေးနွေးနေသည့် အဖွဲ့များမှာ နယ်မြေအတွင်း တိုက်ပွဲဖြစ်ပွားခြင်း မရှိသော် လည်း၊ အားလုံးပါဝင်ရေးမူကို ဆုပ်ကိုင်ထားသည့် KIO/KIA မှာမူ ကချင်ပြည်ရှိ မြို့နယ်အများအပြားတွင် စစ်တပ်နှင့် စစ်ရေးတင်းမာလျက်ရှိပြီး တိုက်ပွဲများ ဆက်လက်ဖြစ်ပွားနေသည်။   ဓါတ်ပုံ - Crd (ပုံဟောင်း)   #KIO #KIA #Peaceprocess

စစ်အုပ်စု၏ တစ်ဖွဲ့ချင်းစီခွဲ၍ ဆွေးနွေးပွဲ ဖိတ်ခေါ်မှုကို KIO လက်ခံမည်မဟုတ်

စစ်အုပ်စု၏ တစ်ဖွဲ့ချင်းစီခွဲ၍ ဆွေးနွေးပွဲ ဖိတ်ခေါ်မှုကို KIO လက်ခံမည်မဟုတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၂ ရက်။ တရုတ်၏ ဖိအားပေး…

  • August 12, 2026
ရခိုင်တွင် ၁၁ ရက်အတွင်း အရပ်သား ၁၉ ဦး သေဆုံးဟု HDCO ထုတ်ပြန်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၂ ရက်။   ရခိုင်ပြည်အတွင်း စစ်တပ်၏ ပစ်မှတ်ထား တိုက်ခိုက်မှုများကြောင့် ၂၀၂၆ ခုနှစ် ဩဂုတ်လအတွင်း အရပ်သား ၁၉ ဦး သေဆုံးပြီး ၂၆ ဦး ထိခိုက်ဒဏ်ရာရရှိခဲ့ကာ အထူးစိုးရိမ်ဖွယ်ရာ အခြေအနေသို့ ရောက်ရှိနေကြောင်း Humanitarian and Development Coordination Office (HDCO) က ဩဂုတ်လ ၁၂ ရက်နေ့တွင် သတိပေး ထုတ်ပြန်လိုက်သည်။   ဩဂုတ်လ ၁ ရက်နေ့မှ ၁၁ ရက်နေ့အထိ ကာလအတွင်း ရခိုင်ပြည်ရှိ အရပ်သားပြည်သူများ နေထိုင်ရာ ဒေသ များကို စစ်တပ်က ပစ်မှတ်ထား တိုက်ခိုက်ခဲ့သဖြင့် လူနေအိမ်များ၊ ဘာသာရေး အဆောက်အအုံများနှင့် အခြား အရပ်ဘက် အဆောက်အအုံများ ထိခိုက်ပျက်စီးခဲ့ရသည်။   HDCO နှင့် နီးစပ်သည့် ရခိုင်မြောက်ပိုင်းမှ အမျိုးသမီးတစ်ဦးက “ကျမတို့ စာရင်းတွေအရ တော်တော် ထိခိုက် လာတဲ့ အနေအထားပါ။ သံတွဲမြို့ဆိုရင် အငြိုးနဲ့လုပ်သလိုပါပဲ။ အခု ဆိုင်ကယ်မောင်းရင်တောင် ကောင်းကင် မော့ကြည့်နေရတယ်။ ဩဂုတ်လ ပထမ ၁၁ ရက်မှာတင် စစ်တပ် လေကြောင်းတိုက်လို့ သေဆုံးတာ ၁၉ ယောက်ရှိတယ်။ ထိခိုက်ဒဏ်ရာရတာ ၂၆ ယောက်ဆိုတော့ တော်တော်များတာ။ လူ့အသက်က တော်တော် ပေးနေရတာပါ” ဟု ပြောသည်။   HDCO က မှတ်တမ်းတင်ထားသည့် ဖြစ်စဉ်များတွင် သံတွဲ၊ အမ်း၊ မြောက်ဦးနှင့် ပလက်ဝ ဒေသရှိ အရပ်သား များ နေထိုင်ရာ နေရာများအပေါ် လေကြောင်းမှ ပစ်ခတ်တိုက်ခိုက်မှုများ ပါဝင်သည်။     ထို့ပြင် ရသေ့တောင်မြို့နယ်၊ နံ့သာကျွန်းတွင် ငါးဖမ်းနေသည့် စစ်ဘေးရှောင် အရပ်သားများကို အရပ်ဘက် ဝတ်စုံ ဝတ်ဆင်ထားသော စစ်အုပ်စု တပ်ဖွဲ့ဝင်များနှင့် လက်နက်ကိုင် မွတ်ဆလင်များက သေနတ်ဖြင့် ပစ်ခတ်ခဲ့ သည့် ဖြစ်စဉ်လည်း ပါဝင်သည်။   သံတွဲမြို့ လေကြောင်းတိုက်ခိုက်ခံရမှုတွင် အကူအညီပေးခဲ့သူ ဒေသခံတစ်ဦးက “နေရာတင် သေသွားတဲ့သူတွေ ရှိသလို ချက်ချင်းရှာမတွေ့တာ လည်း ရှိတယ်။ ဒဏ်ရာရသူတွေလည်း အရမ်းများတယ်။ ဒဏ်ရာရတဲ့သူတွေ ကိုလည်း ရွာထဲက ရနိုင်တဲ့နည်းနဲ့ အရေးပေါ် ကူညီပေးနေရတယ်။ အသေအပျောက်ကတော့ တဖြည်းဖြည်း ထပ်တိုးလာတာမျိုးလို့ ပြောလို့ရ တယ်” ဟု သတင်းနှင့်မီဒီယာ ကွန်ရက်သတင်းဌာနကို ပြောသည်။   စစ်တပ်က အရပ်သားများအပေါ် ယခုကဲ့သို့ ပစ်မှတ်ထား တိုက်ခိုက်နေခြင်းကြောင့် ထိခိုက်သေဆုံးမှုများ ဆက်တိုက် ဖြစ်ပေါ်နေခြင်းသည် အထူးစိုးရိမ်ဖွယ်ရာဖြစ်ကြောင်းနှင့် အရပ်သား ပြည်သူများနှင့် အရပ်ဘက် နေရာများကို တိုက်ခိုက်မှုများအပေါ် ပြင်းထန်စွာ ကန့်ကွက်ရှုတ်ချကြောင်း HDCO က ထုတ်ပြန်ထားသည်။   အရပ်သားပြည်သူများသည် စစ်ရေးပစ်မှတ်များ မဟုတ်သည့်အတွက် အရပ်သားများ၏ အသက်အိုးအိမ် စည်း စိမ်၊ လူနေအိမ်များ၊ ဘာသာရေး အဆောက်အအုံများနှင့် အခြား အရပ်ဘက် အဆောက်အအုံများကို အကာအကွယ် ပေးရမည်ဟု HDCO က ထောက်ပြထားသည်။   သို့ဖြစ်ပါ၍ ရခိုင်ပြည်အတွင်း ဆက်လက် မြင့်တက်နေသည့် အရပ်သား ထိခိုက်သေဆုံးမှုများအပေါ် နိုင်ငံတကာ အသိုင်းအဝိုင်းအနေဖြင့် အရေးတကြီး အာရုံစိုက်ရန်၊ အရပ်သားများ ကာကွယ်ရေးအတွက် ကြိုးပမ်းဆောင်ရွက် မှုများကို ပိုမိုအားကောင်းစေရန်နှင့် နိုင်ငံတကာ လူသားချင်းစာနာထောက်ထားမှု ဥပဒေ ချိုးဖောက်မှုများအတွက် အမှန်တကယ် တာဝန်ခံမှုရှိစေရေး ဆောင်ရွက်ကြရန် HDCO က တိုက်တွန်းထားသည်။   #HDCO #Humanitarian_and_Development_Coordination_Office #AA

ရခိုင်တွင် ၁၁ ရက်အတွင်း အရပ်သား ၁၉ ဦး သေဆုံးဟု HDCO ထုတ်ပြန်

ရခိုင်တွင် ၁၁ ရက်အတွင်း အရပ်သား ၁၉ ဦး သေဆုံးဟု HDCO ထုတ်ပြန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၂ ရက်။ ရခိုင်ပြည်အတွင်း စစ်တပ်၏ ပစ်မ…

  • August 12, 2026
စစ်ဘေးသင့်နေသည့် မြန်မာနိုင်ငံအထက်ပိုင်းတွင် ရေဘေးကြောင့် သေဆုံးသူ ၂၅ ဦးအထိ ရှိလာ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၂ ရက်။   ရေဘေးနှင့် စစ်ဘေး အလူးအလဲခံနေရသည့် မြန်မာနိုင်ငံအထက်ပိုင်းတွင် ရေဘေးကြောင့် သေဆုံးသူ ၂၅ ဦးအထိ ရှိလာပြီဟု အမျိုးသားညီညွတ်ရေး အစိုးရ (NUG)၊ လူသားချင်းစာနာ ထောက်ထားရေးနှင့် ဘေး အန္တရာယ် ဆိုင်ရာ စီမံခန့်ခွဲရေးဝန်ကြီးဌာနက ထုတ်ပြန်လိုက်သည်။   မြန်မာနိုင်ငံ အထက်ပိုင်းဒေသများတွင် ရက်ဆက် မိုးသည်းထန်စွာ ရွာသွန်းခြင်းနှင့် ဆည်ရေများ ဖောက်ထုတ် လိုက်ခြင်းတို့ကြောင့် တိုင်းနှင့် ပြည်နယ် ၄ ခုရှိ မြို့နယ် ၂၁ ခုတွင် အဆိုးရွားဆုံး ရေကြီးရေလျှံမှုနှင့် ရင်ဆိုင် နေရပြီး သေဆုံးသူ ၂၅ ဦးအထိ မြင့်တက်လာကြောင်း (NUG) က ဆိုသည်။   ဩဂုတ်လ ၁၂ ရက်နေ့ စာရင်းများအရ စစ်ကိုင်း၊ မန္တလေး၊ မကွေးနှင့် ဧရာဝတီတိုင်းတို့တွင် ရေဘေးကြောင့် ပျောက်ဆုံးနေသူ ၈ ဦးရှိပြီး စုစုပေါင်း လူဦးရေ ၄၅၂,၆၆၃ ဦးခန့် ဘေးဒုက္ခကြုံတွေ့နေရသည်။   ထို့ပြင် ရေဘေးကြောင့် သေဆုံးသူ အရေအတွက်လည်း ဆက်တိုက် တိုးလာနေပြီး NUG ၏ ဩဂုတ် ၁၁ ရက် စာရင်းများအရ စစ်ကိုင်းတိုင်းအတွင်း ကျွန်းလှမြို့နယ်တွင် ၈ ဦး၊ ဒီပဲယင်းမြို့နယ်တွင် ၇ ဦး၊ ကောလင်းမြို့နယ် တွင် ၃ ဦး သေဆုံးပြီး ၂ ဦး ပျောက်ဆုံး၊ တန့်ဆည်မြို့နယ်တွင် ၂ ဦး၊ ရွှေဘို၊ ကန့်ဘလူနှင့် ခင်ဦးမြို့နယ်တို့တွင် ၁ ဦးစီ သေဆုံးခဲ့ကြောင်း သိရသည်။   ယခုအခါ ရေဘေးသင့် ဒေသများတွင် ရေဘေးအပြင် စစ်တပ်၏ လေကြောင်းတိုက်ခိုက်မှုအန္တရာယ်ကိုပါ ပူးတွဲစိုးရိမ်နေရကြောင်း ရေဘေးကူညီပေးနေသည့် စစ်ကိုင်းတိုင်း၊ ပြောသည်။   ယခုအခါ စစ်ကိုင်းတိုင်းသည် အိမ်ထောင်စု ၅၁,၈၅၉ စုမှ လူဦးရေ ၂၂၇,၄၉၁ ဦးဖြင့် ထိခိုက်ဆုံးရှုံးမှု အဆိုးရွားဆုံး ခံစားနေရကာ ရေဘေးသင့် ဒေသများတွင် ရေဘေးအပြင် စစ်တပ်၏ လေကြောင်းတိုက်ခိုက်မှု အန္တရာယ်ကိုပါ ပူးတွဲစိုးရိမ်နေရကြောင်း မြေပြင်၌ အကူအညီပေးနေသူများနှင့် ဒေသခံများက ပြောသည်။   ရွှေဘိုမြို့ခံတစ်ဦးက “စစ်ရှောင်စခန်းတွေော ရွာတွေရောပါ ရေမြုပ်ကုန်တာ။ စစ်ရှောင်တဲတွေဆို ရေထဲမျောပါ ကုန်လို့ ပြေးစရာ မြေမရှိတော့ဘူး။ လမ်းတံတားတွေလည်း ကျိုး၊ ဖုန်းလိုင်းနဲ့ လျှပ်စစ်မီးတွေလည်း ပြတ်နေ တော့ ကူညီရေး အဖွဲ့တွေနဲ့ ချိတ်ဆက်ရတာ အတော်ခက်တယ်။ ဒါ့အပြင် ကျနော်တို့ ဒေသကို ရေဘေးကြားထဲ စစ်ကောင်စီက လေကြောင်းကပါ ဗုံးကြဲမှာကို စိုးရိမ်နေရတော့ ဒုက္ခက နှစ်ထပ်ကွမ်းဖြစ်နေကြတာ။ ခင်ဦး ဘက်ဆိုလည်း လေကြောင်းက ဗုံးကြဲတာတွေ ကြားနေရတာဆိုတော့ဗျာ” ဟု အဆိုပါ ဒေသခံက ပြောသည်။   လက်ရှိတွင် စစ်ကိုင်းတိုင်းအတွင်းရှိ မြောင်နှင့် မင်းကင်း၊ မန္တလေးတိုင်းမှ မြင်းခြံနှင့် ညောင်ဦး၊ ပဲခူးတိုင်းမှ တောင်ငူနှင့် မကွေးတိုင်းမှ ဧရာဝတီမြစ်ကမ်းဘေး မြို့နယ်များသို့ မြစ်ရေများ ဆက်လက် စိုးရိမ်ရေမှတ်အထက် ရောက်ရှိနေသဖြင့် ကူညီကယ်ဆယ်ရေးလုပ်ငန်းများကို အရေးပေါ် ဆောင်ရွက်နေရသည်ဟု NUG က ဆိုသည်။   ထို့ပြင် စိုက်ပျိုးမြေဧက ထောင်ပေါင်းများစွာ ရေဝင်ပျက်စီးထားသည့်အပြင် အဓိကအားဖြင့် သက်ကြီးရွယ်အို များ၊ နာတာရှည်ရောဂါသည်များ၊ ကိုယ်ဝန်ဆောင်များနှင့် ကလေးသူငယ်များအတွက် အာဟာရနှင့် ဆေးဝါး စောင့်ရှောက်မှုများ အရေးတကြီး လိုအပ်နေသည်။   ရေဘေး၌ အကူအညီပေးနေသူ ခင်ဦးဒေသခံ အမျိုးသားတစ်ဦးကလည်း “ငွေကြေးလွှဲရတာ ခက်တာရယ်၊ လမ်းတွေပိတ်ကုန် လို့ ကုန်ပစ္စည်းဝယ်ရတာ ကြန့်ကြာတာတွေက အဓိက အခက်အခဲပါပဲ။ ကလေးတွေနဲ့ သက်ကြီးရွယ်အိုတွေ အတွက် အာဟာရနဲ့ ဆေးဝါးတွေက လုံးဝမလုံလောက်တော့တဲ့ အနေအထား ဖြစ်နေ တယ်” ဟု လက်ရှိ အခြေအနေကို ပြောပြသည်။     ဘင်္ဂလားပင်လယ်အော် မြောက်ပိုင်းနှင့် ရခိုင်ကမ်းရိုးတန်း၊ မုတ္တမပင်လယ်ကွေ့တို့တွင် မိုးတိမ်တောင်များ စက်ဝိုင်းသဖွယ် ဖြစ်ပေါ်နေသဖြင့် လာမည့် ၃ ရက်အတွင်း ချင်းတောင်တန်းများတွင် မိုးထပ်မံ သည်းထန်စွာ ရွာသွန်းကာ စစ်ကိုင်းတိုင်းအောက်ပိုင်းနှင့် ရခိုင်ပြည်နယ်တို့တွင် လျှပ်တစ်ပြက်ရေကြီးခြင်းနှင့် မြေပြိုခြင်းများ ထပ်မံဖြစ်ပေါ်လာနိုင်ကြောင်း မိုးဇလ၏ ထုတ်ပြန်ချက်များအရ သိရသည်။   ကရင်ပြည်ရှိ သံလွင်မြစ်ဝအနီး၊ ရခိုင်ပြည်နယ်ရှိ ကုလားတန်နှင့် လေးမြို့မြစ်၊ ပဲခူးတိုင်းရှိ စစ်တောင်းမြစ်တို့ တွင်လည်း မြစ်ရေများ စိုးရိမ်ဖွယ် မြင့်တက်နေသည့်အတွက် အနီးဝန်းကျင်မှ ပြည်သူများအနေဖြင့် ရေဘေး အန္တရာယ်ကို ကြိုတင်ပြင်ဆင်ထားကြရန် ဒေသအသီးသီးရှိ တာဝန်ရှိသူများက သတိပေးနှိုးဆော်ထားသည်။   ဓာတ်ပုံံ - ခင်ဦးမြို့နယ် သတင်းမှန်ပြန်ကြားရေး   #IDPs #Flood #Myanmar #NUG

စစ်ဘေးသင့်နေသည့် မြန်မာနိုင်ငံအထက်ပိုင်းတွင် ရေဘေးကြောင့် သေဆုံးသူ ၂၅ ဦးအထိ ရှိလာ

စစ်ဘေးသင့်နေသည့် မြန်မာနိုင်ငံအထက်ပိုင်းတွင် ရေဘေးကြောင့် သေဆုံးသူ ၂၅ ဦးအထိ ရှိလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၂ ရက်။ ရေဘေးနှင…

  • August 12, 2026
ဖမ်းဆီးထိန်းသိမ်းထားသည့် မူးယစ်ဆေးသုံးစွဲသည့် ကျောင်းသားနှင့် လူငယ် ၁၉ ဦးကို AA ပြန်လွှတ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၂ ရက်။   ရခိုင်ပြည်၊ ကျောက်တော်မြို့နယ်တွင် မူးယစ်ဆေးဝါး သုံးစွဲမှုဖြင့် ဖမ်းဆီးထိန်းသိမ်းထားသည့် ကျောင်းသားနှင့် လူငယ် ၁၉ ဦးကို ဩဂုတ်လ ၁၁ ရက်နေ့တွင် အာရက္ခတပ်တော် (AA) က မိဘအုပ်ထိန်းသူများထံ အာမခံဖြင့် ပြန်လည်လွှတ်ပေးလိုက်ကြောင်း နီးစပ်သူများက ပြောသည်။   အဆိုပါ လွတ်မြောက်လာသူများ အနက် အသက် ၂၀ အောက် ကျောင်းသား ၁၃ ဦး ပါဝင်ပြီး ကျောက်တော် မြို့နယ်တွင် အခမ်းအနားပြုလုပ်၍ မိဘများထံ ပြန်လည်အပ်နှံခဲ့ခြင်းဖြစ်သည်။   AA နှင့် နီးစပ်သည့် အမျိုးသမီးတစ်ဦးက “အေအေတာဝန်ရှိသူတွေ၊ ဒီလပ်တာဝန်ရှိသူတွေ၊ မြို့နယ်အဆင့် တာ ဝန်ရှိသူတွေနဲ့ ရပ်ရွာအုပ်ချုပ်ရေး တာဝန်ရှိသူတွေက မနက်ပိုင်းမှာ မိဘတွေဆီ ပြန်လည်အပ်နှံခဲ့တာပါ။ နောက် နောင် မူးယစ်ဆေးဝါး မသုံးစွဲဖို့ ကတိခံဝန်နဲ့ ပြန်လည်အပ်နှံခဲ့တာပါ။ ကျန်းမာရေးအခြေအနေကို စစ်ဆေးခဲ့ပြီး ကြိမ်ဒဏ် ပြစ်ဒဏ်ပေးခဲ့တာတွေလည်း ရှိပါတယ်” ဟု ပြောသည်။   အာရက္ခပြည် ပြည်သူ့လုံခြုံရေးတပ်ဖွဲ့ (DLEPS) သည် အဆိုပါ ကျောင်းသားလူငယ်များကို မူးယစ်ဆေးဝါး သုံးစွဲမှုမှ ကင်းဝေးစေရန်နှင့် အနာဂတ်ဘဝ လှပစေရန် ခေါ်ယူထိန်းကျောင်းခြင်း၊ အကျင့်စာရိတ္တ ပြုပြင်ခြင်းနှင့် အသိပညာပေးခြင်းများ ပြုလုပ်ခဲ့ပြီး မိဘများထံ မအပ်နှံမီ ကျန်းမာရေးစစ်ဆေးကာ ကြိမ်ဒဏ် ၃ ချက်မှ ၅ ချက်အထိ ပေးခဲ့သည်။   ထို့ပြင် ပြန်လည်လွတ်မြောက်လာသည့် လူငယ်များအနေဖြင့် နောက်ထပ် မူးယစ်ဆေးဝါး သုံးစွဲမှုဖြင့် ထပ်မံ ဖမ်းဆီးခံရပါက ယခင်ပြစ်ဒဏ်များကိုပါ တပေါင်းတည်း ကျခံရမည်ဖြစ်သည်။   ကျောက်တော်မြို့နယ်အတွင်း ကျောင်းသား ၁၃ ဦး၊ DLEPS တပ်ဖွဲ့ဝင် ၇ ဦးနှင့် မူးယစ်ဆေးဝါး သုံးစွဲ၊ ရောင်းချ သူများ အပါအဝင် စုစုပေါင်း ၇၇ ဦးကို DLEPS တပ်ဖွဲ့က လွန်ခဲ့သည့် ဇွန်လနှင့် ဇူလိုင်လအတွင်း ဖမ်းဆီးခဲ့ခြင်း ဖြစ်သည်။   ရခိုင်ပြည်တွင် ၂၀၂၃ ခုနှစ် တိုက်ပွဲများ စတင်ချိန်မှစ၍ ပညာရေးစနစ်များ ရပ်တန့်ကာ ကျောင်းသားနှင့် လူငယ် များ ကျောင်းပြင်ပသို့ ရောက်ရှိခဲ့ရပြီးနောက် မူးယစ်ဆေးဝါး သုံးစွဲမှုများ ရှိလာခဲ့သည်။   AA နှင့် DLEPS တို့အနေဖြင့် ဒေသတွင်း မူးယစ်ဆေးဝါး ကင်းစင်ရေးနှင့် တရားဥပဒေ စိုးမိုးရေးအတွက် အထူး ကြပ်မတ် ထိန်းသိမ်းဆောင်ရွက်သွားမည်ဟု တာဝန်ရှိသူများက ပြောဆိုထားသည်။   #ကျောက်တော်မြို့နယ် #AA

ဖမ်းဆီးထိန်းသိမ်းထားသည့် မူးယစ်ဆေးသုံးစွဲသည့် ကျောင်းသားနှင့် လူငယ် ၁၉ ဦးကို AA ပြန်လွှတ်

ဖမ်းဆီးထိန်းသိမ်းထားသည့် မူးယစ်ဆေးသုံးစွဲသည့် ကျောင်းသားနှင့် လူငယ် ၁၉ ဦးကို AA ပြန်လွှတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၂ ရက်။ …

  • August 12, 2026
×Close