သတင်း

ထားဝယ်ခရိုင် နေအိမ်ခြံဝင်းအတွင်း သစ်ပင်ခုတ်သူ မြေမြှုပ်မိုင်းထိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၆ ရက်။   ထားဝယ်ခရိုင်၊ အရှေ့တောဒေသရှိ သင်္ကန်းတုံးကျေးရွာတွင် နေအိမ်ခြံဝင်းအတွင်း သစ်ပင်ခုတ်ထွင်နေသည့် အမျိုးသားတစ်ဦး မြေမြှုပ်မိုင်းပေါက်ကွဲမှုကြောင့် ဒဏ်ရာရရှိခဲ့ကြောင်း ကျေးရွာသားများက ပြောသည်။   ပြီးခဲ့သည့် မေလ ၂ ရက်နေ့၊ ညနေ ၃ နာရီခွဲခန့်တွင် အသက် ၄၀ ခန့်ရှိ အမျိုးသားတစ်ဦးသည် ၎င်း၏ နေအိမ် ခြံဝင်းအတွင်းရှိ သစ်ပင်များကို ခုတ်ထွင်ရှင်းလင်းနေစဉ် သစ်ပင်လဲကျသည့်နေရာမှ မြေမြှုပ်မိုင်းတစ်လုံး ပေါက်ကွဲခဲ့ခြင်းဖြစ်သည်။   အဆိုပါပေါက်ကွဲမှုကြောင့် ၎င်းအမျိုးသား၏ ဘယ်ဘက်ခြေသလုံးတွင် မိုင်းစထိမှန်ဒဏ်ရာများ ရရှိခဲ့ပြီး လက်ရှိတွင် ဆေးကုသမှုခံယူနေရသည်။   ဒေသခံရွာသားတစ်ဦးက “သူ့အိမ်က စစ်တပ်မီးရှို့လို့ ပါသွားတာကြာပြီ၊ လက်ရှိက အနီးနားက ရွာတစ်ရွာမှာ နေပြီးတော့ သူ့ခြံထဲကိုဝင်ပြီး တောခုတ်တာပါ” ဟု ပြောသည်။   သင်္ကန်းတုံးကျေးရွာသည် ၂၀၂၂ ခုနှစ်ကတည်းက တိုက်ပွဲများကြောင့် ရွာလုံးကျွတ်နီးပါး နေရပ်စွန့်ခွာကာ စစ်ဘေးရှောင်နေကြရသည့် ကျေးရွာတစ်ရွာဖြစ်သည်။       စစ်တပ် လက်အောက်ခံ တပ်ဖွဲ့များက ကျေးရွာအတွင်းရှိ နေအိမ်များကို မီးရှို့ဖျက်ဆီးခဲ့ခြင်းကြောင့် လက်ရှိတွင် ကျေးရွာအတွင်း ပြန်လည်ဝင်ရောက်နေထိုင်သည့် အိမ်ထောင်စု သုံးလေးစုခန့်သာ ကျန်ရှိတော့ကြောင်း ရွာသားများက ပြောသည်။   တနင်္သာရီတိုင်းအတွင်းရှိ စစ်ဘေးသင့်ဒေသများတွင် မြေမြှုပ်မိုင်းအန္တရာယ်က ဒေသခံများအတွက် စိန်ခေါ်မှု တစ်ရပ် ဖြစ်လာနေသည်ဟု ဆိုကြသည်။   #မြေမြှုပ်မိုင်းအန္တရာယ် #မိုင်းပညာပေး

ထားဝယ်ခရိုင် နေအိမ်ခြံဝင်းအတွင်း သစ်ပင်ခုတ်သူ မြေမြှုပ်မိုင်းထိ

ထားဝယ်ခရိုင် နေအိမ်ခြံဝင်းအတွင်း သစ်ပင်ခုတ်သူ မြေမြှုပ်မိုင်းထိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၆ ရက်။  ထားဝယ်ခရိုင်၊ အရှေ့တောဒေ…

  • May 6, 2026
မြောက်ကိုရီးယား အမျိုးသမီး ဘောလုံးသင်း တောင်ကိုရီးယားတွင် ကစားမည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၅ ရက်။   မြောက်ကိုရီးယား အမျိုးသမီးဘောလုံးကလပ်အသင်း တောင်ကိုရီးယားနိုင်ငံကို သွားရောက် ကစားရမှာ ဖြစ်ပါတယ်။   ဒါဟာ ၈ နှစ်အတွင်း ပထမဆုံးအကြိမ် မြောက်ကိုရီးယားအားကစားသမားတွေ တောင်ကိုရီးယားမြေပေါ် ခြေချမယ့်ခရီးစဉ်လည်း ဖြစ်ပါတယ်။   မြောက်ကိုရီးယားကလပ်အသင်းဖြစ်တဲ့ နေဂိုလျန်အမျိုးသမီး ဘောလုံး အသင်း (Naegohyang Women’s FC) ဟာ တောင်ကိုရီးယားကလပ်ဖြစ်တဲ့ ဆူဝမ် အမျိုးသမီး ဘောလုံး အသင်း ( Suwon FC Women ) အသင်းနဲ့ လာမယ့် မေလ ၂၀ ရက် မှာ ယှဉ်ပြိုင်ကစားမှာဖြစ်ပါတယ်။   ဒီပွဲဟာ အာရှအမျိုးသမီး ချန်ပီယံပွဲ Asian Women's Champions League ရဲ့ ဆီမီးဖိုင်နယ်ပွဲစဉ်ဖြစ်ပြီး တောင်ကိုရီးယားနိုင်ငံ၊ ဆူဝမ် (Suwon) မြို့မှာ ကျင်းပမှာပါ။   မြောက်ကိုရီးယားဘက်က ကစားသမား ၂၇ ဦးနဲ့ ဝန်ထမ်း ၁၂ ဦး၊ စုစုပေါင်း ၃၉ ဦး လာရောက်ဖို့ စာရင်းပေးထားပါတယ်။   အခုခရီးစဉ်ဟာ ၂၀၁၈ ခုနှစ် ပြုံချမ်းဆောင်းရာသီအိုလံပစ်နောက်ပိုင်း မြောက်ကိုရီးယား အားကစားသမားတွေ တောင်ကိုရီးယားကို ပထမဆုံးအကြိမ် လာရောက်တာဖြစ်ပါတယ်။   တောင်ကိုရီးယားသမ္မတ လီဂျေမြွန်း (Lee Jae Myung) အနေနဲ့ အေးစက်နေတဲ့ နှစ်နိုင်ငံဆက်ဆံရေးကို ပြန်လည်ကောင်းမွန်အောင် ကြိုးပမ်းနေချိန်နဲ့လည်း တိုက်ဆိုင်နေပါတယ်။   ပြီးခဲ့တဲ့နှစ်တွေမှာ မြောက်ကိုရီးယားက တောင်ကိုရီးယားကို "အန္တရာယ်အရှိဆုံး ရန်သူနိုင်ငံ" လို့ သတ်မှတ်ခဲ့သလို၊ ကိုဗစ်ကြောင့် နယ်စပ်တွေပိတ်ထားခဲ့လို့ အားကစားဖလှယ်မှုတွေလည်း ရပ်ဆိုင်းနေခဲ့တာပါ။   တောင်ကိုရီးယား ပြန်လည်ပေါင်းစည်းရေးဝန်ကြီးဌာနကတော့ ဒါဟာ နိုင်ငံတကာကလပ် အသင်းအဆင့် ပြိုင်ပွဲဖြစ်တဲ့အတွက် အစိုးရအနေနဲ့ အနည်းငယ်ပဲ ပါဝင်ပတ်သက်မှာဖြစ်ပေမယ့် လိုအပ်တဲ့ ကူညီထောက်ပံ့မှုတွေတော့ ပေးသွားမယ်လို့ ပြောထားပါတယ်။     တကယ်လို့ မြောက်ကိုရီးယားအသင်းသာ နိုင်ခဲ့ရင် မေလ ၂၃ ရက်မှာ ကျင်းပမယ့် ဗိုလ်လုပွဲကို ဆက်လက်ယှဉ်ပြိုင်ရမှာဖြစ်ပြီး Melbourne City ဒါမှမဟုတ် Tokyo Verdy အသင်းနှစ်သင်းထဲက တစ်သင်းနဲ့ တွေ့ရမှာပါ။     ရှုံးခဲ့ရင်တော့ နောက်တစ်နေ့မှာပဲ နေရပ်ပြန်ကြမှာ ဖြစ်ပါတယ်။   #မြောက်ကိုရီးယားဘောလုံးအသင်း #တောင်ကိုရီးယားအမျိုးသမီးဘောလုံးအသင်း #AsianWomensChampionsLeague # NaegohyangWomensFC #SuwonFCWomen

မြောက်ကိုရီးယား အမျိုးသမီး ဘောလုံးသင်း တောင်ကိုရီးယားတွင် ကစားမည်

မြောက်ကိုရီးယား အမျိုးသမီး ဘောလုံးသင်း တောင်ကိုရီးယားတွင် ကစားမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၅ ရက်။  မြောက်ကိုရီးယား အမျိုး…

  • May 5, 2026
သီရိလင်္ကာတွင် ကျားဖြန့်လုပ်ဆောင်သော တရုတ် ၃၇ ဦးအား ဖမ်းဆီး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၅ ရက်။   သီရိလင်္ကာရဲတပ်ဖွဲ့သည် ကိုလံဘိုမြို့ဆင်ခြေဖုံး တလန်ဂါမာ (Talangama) အရပ်ရှိ အွန်လိုင်းငွေလိမ်ဂိုဏ်း အခြေစိုက်စခန်းတစ်ခုကို ဝင်ရောက်စီးနင်းခဲ့ရာ တရုတ်နိုင်ငံသား ၃၇ ဦးကို ဖမ်းဆီးရမိခဲ့သည်။   ဖမ်းဆီးရမိသူများမှာ အမျိုးသမီးတစ်ဦး အပါအဝင် အသက် ၂၃ နှစ်မှ ၄၄ နှစ်အတွင်းရှိသူများဖြစ်ပြီး ၎င်းတို့နှင့်အတူ တက်ဘလက် ၃၅ လုံး၊ ဖုန်း ၁၄၇ လုံးနှင့် SIM ကတ် ၁၀၀ ကျော်ကို သက်သေခံအဖြစ် သိမ်းဆည်းခဲ့သည်။   ၎င်းတို့သည် ကမ္ဘာလှည့်ခရီးသွားဗီဇာ (Tourist Visa) ကို အသုံးပြု၍ ဝင်ရောက်လာကာ တရားမဝင် အလုပ်လုပ်ကိုင်နေသူများဖြစ်သည်။   သီရိလင်္ကာနိုင်ငံတွင် ယခုနှစ်အတွင်း တရုတ်နှင့် အိန္ဒိယနိုင်ငံသား ရာဂဏန်းကို ကျားဖြန့်လုပ်ငန်းများနှင့် ဆက်စပ်၍ ဖမ်းဆီးခဲ့ပြီးဖြစ်သည်။   သီရိလင်္ကာရှိ တရုတ်သံရုံးကလည်း ဆိုက်ဘာရာဇဝတ်မှုများ နှိမ်နင်းရေးတွင် ဒေသခံအာဏာပိုင်များနှင့် ပူးပေါင်းဆောင်ရွက်နေကြောင်း ပြောကြားခဲ့သည်။ #Scammer #Scam

သီရိလင်္ကာတွင် ကျားဖြန့်လုပ်ဆောင်သော တရုတ် ၃၇ ဦးအား ဖမ်းဆီး

သီရိလင်္ကာတွင် ကျားဖြန့်လုပ်ဆောင်သော တရုတ် ၃၇ ဦးအား ဖမ်းဆီး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၅ ရက်။  သီရိလင်္ကာရဲတပ်ဖွဲ့သည် ကိုလ…

  • May 5, 2026
သြစတြေးလျနှင့် ဂျပန်တို့ စွမ်းအင်နှင့် အရေးကြီးသတ္တုကဏ္ဍ ပူးပေါင်းမည်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၅ ရက်။   ဂျပန်ဝန်ကြီးချုပ် ဆာနိုင်း တာကာအီချီ (Sanae Takaichi) ၏ သြစတြေးလျ ၃ ရက်ကြာ ခရီးစဉ်အတွင်း နှစ်နိုင်ငံအကြား စွမ်းအင်၊ စားနပ်ရိက္ခာနှင့် အရေးကြီးသတ္တုတွင်းထွက် (Critical Minerals) ကဏ္ဍများတွင် ပူးပေါင်းဆောင်ရွက်ရန် သဘောတူညီခဲ့ကြသည်။   သြစတြေးလျဝန်ကြီးချုပ် အန်ထော်နီ အယ်လ်ဘာနီးစ် (Anthony Albanese) နှင့် တွေ့ဆုံစဉ် ကမ္ဘာ့စီးပွားရေး မတည်ငြိမ်မှုများမှ ကာကွယ်ရန် စီးပွားရေးလုံခြုံမှုဆိုင်ရာ မဟာဗျူဟာမြောက် လက်တွဲလုပ်ဆောင်ရန် ဆုံးဖြတ်ခဲ့ခြင်းဖြစ်သည်။   သြစတြေးလျအစိုးရအနေဖြင့် ဂျပန်နှင့် ဆက်စပ်နေသော အရေးကြီးသတ္တုစီမံကိန်းများအတွက် သြစတြေးလျဒေါ်လာ ၁.၃ ဘီလီယံ ထောက်ပံ့မည်ဖြစ်ပြီး နီကယ်၊ ဂရပ်ဖိုက်နှင့် မြေရှားသတ္တုများကို ဂျပန်သို့ တည်ငြိမ်စွာ တင်ပို့သွားမည်ဖြစ်သည်။   ဂျပန်နိုင်ငံသည် ၎င်း၏ စွမ်းအင်လိုအပ်ချက် ၃ ပုံ ၁ ပုံကို သြစတြေးလျထံမှ ရယူနေရပြီး ပြီးခဲ့သည့်လကလည်း ဂျပန်နိုင်ငံထုတ် စစ်သင်္ဘောများကို သြစတြေးလျသို့ ဒေါ်လာ ၁၀ ဘီလီယံ ဖိုး ရောင်းချရန် သဘောတူညီထားခဲ့သည်။ #ဂျပန်ဩစတြေးလျ #SanaeTakaichi #AnthonyAlbanese

သြစတြေးလျနှင့် ဂျပန်တို့ စွမ်းအင်နှင့် အရေးကြီးသတ္တုကဏ္ဍ ပူးပေါင်းမည်

သြစတြေးလျနှင့် ဂျပန်တို့ စွမ်းအင်နှင့် အရေးကြီးသတ္တုကဏ္ဍ ပူးပေါင်းမည်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၅ ရက်။  ဂျပန်ဝန်ကြီးချုပ်…

  • May 5, 2026
ဟောမုဇ်ရေလက်ကြားတွင် အမေရိကန်နှင့် အီရန် တို့ ပစ်ခတ်မှုများ ပြန်ဖြစ်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၅ ရက်။   ဟော်မုဇ်ရေလက်ကြား (Strait of Hormuz) ထိန်းချုပ်ရေးအတွက် အမေရိကန်နှင့် အီရန်တို့အကြား တိုက်ခိုက်မှုသစ်များ ဖြစ်ပွားလျက်ရှိရာ ဒေသတွင်းစစ်ရေးအခြေအနေ ပြင်းထန်လာနေသည်။   အမေရိကန်သမ္မတ ဒေါ်နယ်ထရန့်က ပိတ်မိနေသော ကုန်တင်သင်္ဘောများ ဘေးကင်းစွာ ဖြတ်သန်းနိုင်ရန် "Project Freedom" စစ်ဆင်ရေးကို ကြေညာခဲ့ပြီးနောက် အမေရိကန်တပ်ဖွဲ့များက အီရန်စစ်ဘက်သုံး လှေငယ် (၇) စီးကို ပစ်ခတ်ဖျက်ဆီးခဲ့ကြောင်း ကြေညာသည်။   အီရန်ဘက်ကမူ လှေငယ် ၇ စီး ပစ်ခတ်ခံရမှုကို ငြင်းဆိုထားသည်။   အီရန်အစိုးရက ၎င်းတို့၏ ထိန်းချုပ်နယ်မြေကို ယူအေအီး (UAE) ကမ်းရိုးတန်းအထိ တိုးချဲ့သတ်မှတ်ထားသည့် မြေပုံကို ထုတ်ပြန်ခဲ့ပြီး အမေရိကန်သင်္ဘောများကို ပစ်ခတ်မောင်းထုတ်ခဲ့ကြောင်း ပြောဆိုသည်။   ထို့ပြင် ယူအေအီးနိုင်ငံရှိ အရေးပါသော ဖူဂျိုင်ရာ (Fujairah) ရေနံဆိပ်ကမ်းကို အီရန်က ဒရုန်းနှင့် မစ်ဆိုင်းများဖြင့် တိုက်ခိုက်ခဲ့သဖြင့် မီးလောင်မှုများ ဖြစ်ပွားခဲ့သည်။   အဆိုပါ တင်းမာမှုများကြောင့် ကမ္ဘာ့ရေနံဈေးနှုန်းမှာ ၅ ရာခိုင်နှုန်း ခန့် ထပ်မံမြင့်တက်သွားခဲ့ပြီး နိုင်ငံတကာပညာရှင်များက နှစ်နိုင်ငံအကြား အပစ်အခတ်ရပ်စဲရေး ပျက်ပြားသွားပြီဖြစ်ကြောင်း သုံးသပ်နေကြသည်။ #StraitofHormuz

ဟောမုဇ်ရေလက်ကြားတွင် အမေရိကန်နှင့် အီရန် တို့ ပစ်ခတ်မှုများ ပြန်ဖြစ်

ဟောမုဇ်ရေလက်ကြားတွင် အမေရိကန်နှင့် အီရန် တို့ ပစ်ခတ်မှုများ ပြန်ဖြစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၅ ရက်။  ဟော်မုဇ်ရေလက်ကြား (…

  • May 5, 2026
မော်လူးမြို့ကို တော်လှန်ရေးတပ်များ လက်လွှတ်ရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၅ ရက်။   စစ်ကိုင်းတိုင်းဒေသကြီး၊ အင်းတော်မြို့နယ်ရှိ တော်လှန်ရေးအင်အားစုများ ၂ နှစ်နီးပါးကြာ စိုးမိုးထားခဲ့သည့် မော်လူးမြို့ကို ယနေ့ မေလ ၅ ရက်နေ့ နံနက်ပိုင်းတွင် စစ်တပ် စစ်ကြောင်းများက ပြန်လည်ဝင်ရောက်စီးနင်းကာ ထိန်းချုပ်လိုက်ပြီဖြစ်ကြောင်း စစ်ရေးသတင်းရင်းမြစ်များက ပြောသည်။   ပြီးခဲ့သည့် ဧပြီလ ၃၀ ရက်နေ့က အင်းတော်မြို့ကို ပြန်လည်ထိန်းချုပ်ခဲ့သည့် စစ်တပ် စစ်ကြောင်းသည် မေလ ၂ ရက်နေ့မှ စတင်ကာ မော်လူးမြို့သို့ ဦးတည်ထွက်ခွာလာခဲ့ခြင်း ဖြစ်ပြီး ၃ ရက်အကြာတွင် မြို့တွင်းသို့ ဝင်ရောက် သွားခြင်းဖြစ်သည်။   စစ်ရေးသတင်းရင်းမြစ်တစ်ဦးက မော်လူးမြို့၏ အခြေအနေနှင့် ပတ်သက်၍ “မော်လူးပါတာတော့ သေချာသွား ပြီ။ ဘယ်လိုလဲဆိုတာတော့ အသေးစိတ်မသိသေးဘူး။ သေချာသွားပြီဝင်သွားတာ။ မနေ့ကဝင်တာတော့ မဟုတ် ဘူး။ ဒီနေ့မနက်ပိုင်းမှ ရောက်သွားတာဟုတ်တယ်” ဟု အတည်ပြုပြောသည်။


 မြစ်ကြီးနား-မန္တလေး ကားလမ်းမကြီးနဘေးရှိ မော်လူးမြို့ကို စစ်တပ် စစ်ကြောင်းများ ဝင်ရောက်လာခြင်း ကြောင့် မော်လူးမြို့ခံများနှင့် နဘား၊ ပင်ဝယ်၊ ဟဲနု အပါအဝင် အင်းတော်-မော်လူး လမ်းပိုင်းရှိ ကျေးရွာ ၂၀ ကျော်မှ ဒေသခံများသည် ဘေးလွတ်ရာသို့ အရေးပေါ် ထွက်ပြေးတိမ်းရှောင်နေကြရသည်။   မော်လူးမြို့ကို ၂၀၂၃ ခုနှစ်၊ ဒီဇင်ဘာလတွင် ကချင်လွတ်လပ်ရေးတပ် KIA၊ ကျောင်းသားတပ်မတော် ABSDF NUG လက်အောက်ခံ ပူးပေါင်းတပ်ဖွဲ့များက သိမ်းပိုက်ခဲ့ခြင်းဖြစ်ပြီး ယခု ၂ နှစ်နီးပါးအကြာတွင် ပြန်လည် လက်လွှတ်လိုက်ရခြင်း ဖြစ်သည်။   ယခုကဲ့သို့ နယ်မြေအချို့ ပြန်လည်လက်လွှတ်လိုက်ရသည့် အခြေအနေနှင့် ပတ်သက်၍ ပြည်သူ့ကာကွယ်ရေး တပ်မတော် (PDF) ၅ နှစ်ပြည့်နေ့တွင် ပြည်ထောင်စုဝန်ကြီးချုပ် မန်းဝင်းခိုင်သန်းက ယခုကဲ့သို့ ပြောသည်။   “စစ်ရေးသဘော သဘာဝအရ လိုအပ်တဲ့အခါမှာ တန်ပြန်ထိုးစစ်မှ ခုခံစစ်ကို တဖန်ဆင်နွှဲရတဲ့အခါ စိတ်ဓာတ် ရေးရာအရ အားလျော့မသွားကြဖို့ သတိပေးလိုပါတယ်၊ ဒါဟာ ရန်သူကိုကြောက်လို့ မဟုတ်ဘဲ ပြည်သူကို မျက်နှာမူတဲ့ ပြည်သူ့ကာကွယ်ရေး တပ်မတော်ရဲ့ ဆုံးဖြတ်ချက်တွေ ဖြစ်သလို ရှေ့ဆက်ရမယ့် ဗျူဟာမြောက် တိုက်ပွဲများအတွက် အင်အားစုဆောင်းတာလည်း ဖြစ်ပါတယ်။”   ဝန်ကြီးချုပ်က ဆက်လက်၍ စစ်တပ်၏ သာလွန်အင်အားနှင့် ရင်ဆိုင်ရချိန်တွင် ပြည်သူများ၏ အသက်အိုးအိမ် ကို ကာကွယ်ရန်နှင့် အစုလိုက်အပြုံလိုက် ထိခိုက်မှုများ မရှိစေရန်အတွက် အချို့နယ်မြေများတွင် နည်းဗျူဟာ အရ ယာယီဆုတ်ခွာပေးခဲ့ရခြင်းဖြစ်ကြောင်းလည်း ဖြည့်စွက်ပြောဆိုထားသည်။   #မော်လူး #စစ်ကိုင်းတိုင်း #အင်းတော်

မော်လူးမြို့ကို တော်လှန်ရေးတပ်များ လက်လွှတ်ရ

မော်လူးမြို့ကို တော်လှန်ရေးတပ်များ လက်လွှတ်ရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၅ ရက်။  စစ်ကိုင်းတိုင်းဒေသကြီး၊ အင်းတော်မြို့နယ်ရှိ…

  • May 5, 2026
သိမ်းဆည်းနယ်မြေ အချို့ လက်လွှတ်နေရကြောင်း NUG ပြော   သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မေလ ၅ ရက်။   စစ်အုပ်စု၏ သာလွန်အင်အားဖြင့် ထိုးစစ်ဆင် တိုက်ခိုက်မှုများကြောင့် သိမ်းပိုက်ထိန်းချုပ်ထားသည့် နယ်မြေ အချို့ကို ပြန်လည် လက်လွှတ်နေရသည်ဟု အမျိုးသား ညီညွတ်ရေး အစိုးရ NUG ဝန်ခံပြောဆိုလိုက်သည်။   အဆိုပါ ပြောဆိုမှုကို မေလ ၅ ရက်နေ့ (ယနေ့)တွင် ကျရောက်သည့် ပြည်သူ့ကာကွယ်ရေး တပ်မတော်  PDF ဖွဲ့စည်းတည်ထောင်ခြင်း ၅ နှစ်ပြည့် အထိမ်းအမှတ်နေ့ မိန့်ခွန်းတွင် NUG တာဝန်ရှိသူများက ပြောဆိုလိုက် ခြင်းဖြစ်သည်။   NUG ယာယီ သမ္မတ ဒူဝါလရှီးလက “ကျနော်တို့အနေနဲ့ လက်ရှိအချိန်မှာ ကြုံတွေ့နေရတဲ နိုင်ငံရေး စိန်ခေါ်ချက်တွေ အမြောက်အများရှိနေသလို စစ်ရေးအရ လက်လွတ်ဆုံးရှုံးရမှုတစ်ချို့လည်း ခပ်စိပ်စိပ် ကြုံတွေ့နေကြရပါတယ်။ တော်လှန်ရေးရဲ့သ ဘောဟာ အနိမ့်အမြင့် အတက်အကျတွေ ရှိတတ်သလို ရှေ့ နှစ်လှမ်းတိုး နောက်တစ်လှမ်းဆုတ်ရတဲ့ ဖြစ်စဉ်မျိုးတွေလည်း ရှိတတ်ကြောင်းပြောကြားလိုပါတယ်။” ဟု ပြောသည်။   တရုတ်၏ ကြားဝင် ဆောင်ရွက်မှုကြောင့် ရှမ်းမြောက်ဒေသရှိ တော်လှန်ရေး တပ်ဖွဲ့များ သိမ်းဆည်းထားသော မြို့ အချို့ကို လက်လွှတ်ခဲ့ရသည်။ ယင်းတို့တွင် လားရှိုး၊ ကွတ်ခိုင်၊ ကျောက်မဲ၊ သီပေါ၊ နောင်ချိုတို့ပါဝင်သည်။   ထို့အပြင် မကြာသေးမီက မန္တလေးတိုင်းဒေသကြီးအတွင်းရှိ မတ္တရာနှင့် တကောင်းနယ်မြေများ၊ မိုးကုတ်နှင့်မိုးမိတ်မြို့များ၊ နှင့် စစ်ကိုင်းတိုင်း အတွင်း ထီးချိုင့်၊ ဗန်းမောက်၊ ကသာ၊ အင်းတော်၊ မော်လူး စသည့် မြို့များကို စစ်တပ်က ပြန်လည် ထိန်းချုပ်နိုင်ခဲ့သည်။   နယ်မြေအချို့ကို လက်လွတ်ထားရသော်လည်း လက်ရှိ အနေအထားအရ မြေပြင်ပကတိအခြေအနေကို လျစ်လျူရှု့၍ မရသကဲ့သို့ အားလုံးမျှော်မှန်းသည့် တော်လှန်ရေး ရည်မှန်းချက် ပန်းတိုင်ကိုလည်း မျက်ခြေပျက် ၍ မရကြောင်း NUG ယာယီ သမ္မတ ဒူဝါလရှီးလ က ဆိုသည်။   NUG ပြည်ထောင်စုဝန်ကြီးချုပ် မန်းဝင်းခိုင်သန်း ကလည်း ထိန်းချုပ်နယ်မြေများမှ ယာယီဆုတ်ခွာခြင်းသည် ပြည်သူလူထုများ၏ အသက်အိုးအိမ်စည်းစိမ် ထိခိုက်မှုကို ရှောင်ရှားရန် လုပ်ဆောင်ရခြင်းဖြစ်သည်ဟု ပြောသည်။   မန်းဝင်းခိုင်သန်းက “ကျွန်တော်တို့ ပြည်သူ့ကာကွယ်ရေး တပ်ဖွဲ့တွေအနေနဲ့ စစ်ရေးအောင်မြင်မှုတွေ ရရှိနေတဲ့ ကြားကပဲ အကြမ်းဖက် စစ်တပ်ရဲ့ သာလွန်အင်အားနဲ့ ရင်ဆိုင်ကြရတဲ့အခါမှာ ပြည်သူလူထုရဲ့ အသက်အိုးအိမ် စည်းစိမ်ကို ကာကွယ်ဖို့နဲ့ အစုလိုက်အပြုံလိုက် ထိခိုက်နစ်နာမှုတွေ မဖြစ်ပေါ်စေဖို့ အတွက် အလေးထား စဉ်းစားခဲ့ရတာတွေကြောင့် တချို့သော စစ်ဆင်ရေးနယ်မြေတွေမှာ နည်းဗျူဟာအရ ခံစစ်အနေအထားနဲ့ ရင်ဆိုင်ခဲ့ရတာတွေ၊ ယာယီဆုတ်ခွာပေးခဲ့ရတဲ့ မြေပြင် အမှန်တရားတွေ ရှိခဲ့ပါတယ်။” ဟု ပြောသည်။   သိမ်းပိုက်ထိန်းချုပ်ထားသည့် နယ်မြေများမှ ယာယီ ဆုတ်ခွာလိုက်ခြင်းသည် ရန်သူကို ကြောက်၍ မဟုတ်ဘဲ ရှေ့ဆက် ရမည့် ဗျူဟာမြောက် တိုက်ပွဲများအတွက် အင်အားစုဆောင်ခြင်းဖြစ်သည်ဟု မန်းဝင်းခိုင်သန်း က ဆိုသည်။   နယ်မြေဆုတ်ခွာမှုများနှင့် အခက်အခဲ အချို့ရှိသော်လည်း တော်လှန်ရေး အောင်မြင်သည့်အထိ ဆက်လက်တိုက်ပွဲဝင် သွားမည်ဟု NUG ကာကွယ်ရေး ဝန်ကြီးဌာန ပြည်ထောင်စု ဝန်ကြီး ဦးရည်မွန်ကလည်း ပြောသည်။   “လက်ရှိ အခြေအနေမှာ ငါတို့ သိမ်းပိုက်ထားတဲ့ မြို့တချို့ ယာယီစွန့်ခွာရမှု အပါအဝင် အခက်အခဲတချို့ရှိပေမဲ့ ငါတို့အားလုံးရဲ့ ခိုင်မာတဲ သံဋိဌာန်၊ ပြင်းပြတဲ့ ယုံကြည်ချက်၊ ထက်မြက်တဲ့ ညာဏ်ပညာနဲ့ ရင့်သန်တဲ့ စိတ်ခွန်အားကို အရင်းတည်ပြီး လက်တလောအခြေအနေကို အတူတကွ ရင်ဆိုင်ကျော်လွှားကြရမယ်။တော်လှန်ရေး ပန်းတိုင် မရောက်မချင်း စိတ်ဇွဲမလျှော့စတမ်း ဆက်လက်ချီတက်တိုက်ပွဲဝင်သွားကြရမယ်”   NUG  အနေဖြင့် ပြည်သူ့ကာကွယ်ရေး တပ်မတော်ကို PDF  ဖွဲ့စည်းတည်ထောင်ပြီး ၅ နှစ်တာ ကာလအတွင်းတွင် တိုင်းရင်း သား လက်နက်ကိုင် မဟာမိတ် တော်လှန်ရေး အဖွဲ့အစည်းများနှင့်အတူ ပြည်နယ်နှင့် တိုင်းဒေသကြီးများရှိ နယ်မြေအများအပြားကို သိမ်းပိုက်ထိန်းချုပ်နိုင်ခဲ့ပြီး အုပ်ချုပ်ရေး ယန္တရားများကိုလည်း ခိုင်ခိုင်မာမာ တည်ဆောက်နိုင် ခဲ့ကြသည်။   သို့သော် စစ်အုပ်စုက တော်လှန်ရေး အဖွဲ့အစည်းများအတွင်း သပ်သျှိုသွေးခွဲမှုများနှင့် အိမ်နီးချင်းနိုင်ငံအချို့၏  အဖက်ဖက်မှ ပံ့ပိုးကူညီမှုများကို ရယူကာ သာလွန်အင်အားဖြင့် ထိုးစစ်ဆင် တိုက်ခိုက်ရာမှ NUG နှင့် မဟာမိတ်ပူးပေါင်းတပ်များက နယ်မြေအချို့ကို ပြန်လည် လက်လွှတ်ခဲ့ ရခြင်းဖြစ်သည်။   #NUG #NUGကာကွယ်ရေးဝန်ကြီးဌာန #PDF #မန်းဝင်းခိုင်သန်း #ဦးရည်မွန် #ဒူဝါလရှီးလ

သိမ်းဆည်းနယ်မြေ အချို့ လက်လွှတ်နေရကြောင်း NUG ပြော

သိမ်းဆည်းနယ်မြေ အချို့ လက်လွှတ်နေရကြောင်း NUG ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၅ ရက်။  စစ်အုပ်စု၏ သာလွန်အင်အားဖြင့် ထိုးစစ်ဆင် တိ…

  • May 5, 2026
KNU ထိန်းချုပ်ထားသည့် မောတောင်ကို လေယာဉ်ဖြင့် ဗုံးကြဲ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၄ ရက်။   ထိုင်း-မြန်မာနယ်စပ် ကရင့်အမျိုးသား အစည်းအရုံး KNU က မကြာသေးခင်က သိမ်းပိုက်ထားသည့် မောတောင်မြို့ပေါ်ကို စစ်တပ်က လေယာဉ်ဖြင့် ဗုံးကြဲတိုက်ခိုက်ခဲ့ရာ လသားအရွယ် ကလေးငယ်တစ်ဦး အပါအဝင် အရပ်သား ၄ ဦး ထိခိုက်ဒဏ်ရာရရှိပြီး နေအိမ်များ ပျက်စီး ဆုံးရှုံးခဲ့သည်။   စစ်တပ်က လေယာဉ်နှစ်စီးဖြင့် တနင်္သာရီတိုင်းဒေသကြီး၊ မြိတ်ခရိုင်၊ မောတောင်မြို့ပေါ်ရှိ သုဿာန်နှင့် ကာစီနိုရုံအနီးသို့ မတ်လ ၂ ရက်နေ့၊  မွန်းလွဲ ၂ နာရီဝန်းကျင်တွင် ဗုံးကြဲတိုက်ခိုက်ခဲ့ခြင်း ဖြစ်သည်။   အဆိုပါ လေကြောင်းတိုက်ခိုက်မှုနှင့် ပတ်သက်၍ ဘေးလွတ်ရာသို့ တိမ်းရှောင်နေရသည့် အသက် ၅၀ ခန့်အရွယ် ဒေသခံအမျိုးသားတစ်ဦးက ယခုကဲ့သို့ ပြောသည်။   "ဗုံးလာကြဲတာ လေယာဉ်နှစ်စီးနဲ့ ရှေ့ဆင့်နောက်ဆင့် ကြဲချသွားတာ။ အိမ်တွေလည်း မီးလောင်တယ်။ လူက တော့ သိသလောက် ထိခိုက်တာ လေးယောက်ရှိပြီလို့တော့ သိရတယ်။ ကိုယ်တွေလည်း ပုန်းရှောင်နေရတာ ဆိုတော့ အသေးစိတ်တော့ မသိရသေးဘူးလေ။"   မောတောင်မြို့ကို ပြည်သူ့ကာကွယ်ရေး ပူးပေါင်းတပ်ဖွဲ့များက တိုက်ခိုက်သိမ်းပိုက်ပြီးနောက်ပိုင်း စစ်တပ်ဘက် က မြို့ပေါ်သို့ လေကြောင်းဖြင့် ပထမဆုံးအကြိမ် ဗုံးကြဲတိုက်ခိုက်လာခြင်း ဖြစ်သည်။     စစ်တပ်သည် ပြီးခဲ့သည့် ဧပြီလ ၂၆ ရက်နှင့် ၂၇ ရက်နေ့များတွင်လည်း မောတောင်မြို့အနီးရှိ ကျေးရွာများကို လေကြောင်းမှ တိုက်ခိုက်ခဲ့ရာ အမှတ် ၆ ကျေးရွာမှ ရွာသားနှစ်ဦး သေဆုံးခဲ့ပြီး နေအိမ်များ ပျက်စီးခဲ့သည့် ဖြစ်စဉ်များလည်း ရှိခဲ့သည်။   တစ်ဖက်တွင်မူ ထိုင်းနိုင်ငံ၊ ပရာကျွတ်ခီရီခန် ပြည်နယ်အုပ်ချုပ်ရေးမှူးက မောတောင်ဒေသတွင်း တိုက်ပွဲများ ရပ်တန့်သွားပြီဟုဆိုကာ နယ်စပ်ဂိတ်၌ ယာယီသတ်မှတ်ထားသည့် ကန့်သတ်ချက်များကို ဧပြီလ တတိယပတ်မှ စတင်ကာ ဖယ်ရှားမည့် အမိန့်ကို လက်မှတ်ရေးထိုး အတည်ပြုပေးထားသည်။   အဆိုပါ ဖြေလျှော့မှုအရ ဆင်ခွန်း-မောတောင် နယ်စပ်ဂိတ်မှာ ကုန်သွယ်ရေးလုပ်ငန်းများကို နေ့စဉ် နံနက် ၆ နာရီမှ ညနေ ၆ နာရီအထိ ခွင့်ပြုသွားမည်ဟု ထိုင်းသတင်းဌာနများက ဆိုသည်။   ယခင်က အင်္ဂါနှင့် စနေနေ့တို့တွင် နံနက် ၈ နာရီမှ မွန်းတည့်ချိန်အထိသာ ယာယီဖွင့်လှစ်ပေးခဲ့ခြင်း ဖြစ်သည်။ နယ်စပ်ဂိတ် ပြန်လည်ဖွင့်လှစ်ခြင်းသည် ထိုင်း-မြန်မာ နယ်စပ်စီးပွားရေး တည်ငြိမ်စေရေးအတွက် အရေးကြီးသည့် ခြေလှမ်းဖြစ်သည်ဟု ထိုင်းအာဏာပိုင်များက ဆိုသည်။   ထိုသို့ နယ်စပ်ဂိတ်၌ ယာယီသတ်မှတ်ချက်ကို ဖယ်ရှားလိုက်သည့်နောက်၊ လက်ရှိတွင် စစ်တပ်က မောတောင်မြို့ နှင့် အနီးဝန်းကျင်ရှိ ကျေးရွာများကို ရက်ပိုင်းအတွင်း ဆက်တိုက်ဆိုသလို လေကြောင်းမှ ဗုံးကြဲနေသဖြင့် ဒေသခံများအနေဖြင့် ဘေးလွတ်ရာသို့ ပြောင်းရွှေ့နေထိုင်ကြရသည်။   ထို့ကြောင့် လေကြောင်း အန္တရာယ်ကို အထူးသတိပြုကြရန်နှင့် ဗုံးခိုကျင်းများ စနစ်တကျ ဆောက်လုပ်နေထိုင် ကြရန် ပြည်သူ့ကာကွယ်ရေး ပူးပေါင်းတပ်ဖွဲ့က ဒေသခံပြည်သူများကို သတိပေးနှိုးဆော်ထားသည်။   #KNU #မောတောင်မြို့ #စစ်တပ် #လေကြောင်းတိုက်ခိုက်

KNU ထိန်းချုပ်ထားသည့် မောတောင်ကို လေယာဉ်ဖြင့် ဗုံးကြဲ

KNU ထိန်းချုပ်ထားသည့် မောတောင်ကို လေယာဉ်ဖြင့် ဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၄ ရက်။  ထိုင်း-မြန်မာနယ်စပ် ကရင့်အမျိုးသား…

  • May 4, 2026
စစ်တပ်စစ်ကြောင်းများ မော်လူးသို့ ဦးတည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၄ ရက်။   စစ်ကိုင်းတိုင်းဒေသကြီး၊ အင်းတော်မြို့ကို ပြန်လည်ထိန်းချုပ်ခဲ့သည့် စစ်တပ်သည် အမျိုးသားညီညွတ်ရေး အစိုးရ (NUG) ၏ အုပ်ချုပ်ရေး ယန္တရား လည်ပတ်နေသော မော်လူးမြို့သို့ ဦးတည် စစ်ကြောင်းထိုးလာနေသဖြင့် ဒေသခံများ ဘေးလွတ်ရာသို့ ထိန့်လန့်တိမ်းရှောင်နေကြရသည်။   အင်းတော်နှင့် မော်လူးမြို့ကြားရှိ တုံးလုံကျေးရွာအနီးသို့ စစ်တပ် စစ်ကြောင်းများ ရောက်ရှိနေပြီဖြစ်ကြောင်း ဒေသခံတစ်ဦးက အတည်ပြုပြောသည်။   “တုံးလုံရွာဘက်ကိုရောက်ပြီလို့သိရတယ်။ မော်လူးမြို့နားပေါ့ ၅ မိုင်၊ ၇ မိုင်ပတ်ချာလည်ပေါ့။ အင်းတော်နဲ့ မော်လူးကြားမှာ အဲ့ရွာက။ မော်လူးမြို့ကိုဦးတည်ပြီး ပြီးခဲ့တဲ့ မေလ ၂ ရက်နေ့ကတည်းကထွက်သွားတာ” ဟု ဒေသခံတစ်ဦးက ပြောသည်။   မော်လူးမြို့သည် အင်းတော်မြို့၏ မြောက်ဘက် မိုင် ၅၀ ခန့်အကွာ၊ မြစ်ကြီးနား-မန္တလေး ဗျူဟာလမ်းမကြီး ပေါ် တွင် တည်ရှိပြီး စစ်ရေးအရ အရေးပါသည့် မြို့တစ်မြို့ဖြစ်သည်။   အဆိုပါမြို့ကို ၂၀၂၃ ခုနှစ်၊ ဒီဇင်ဘာလအတွင်းက ကချင်လွတ်လပ်ရေး တပ်မတော် (KIA)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး- ကျောင်းသား တပ်မတော် (ABSDF) နှင့် NUG လက်အောက်ခံ ပူးပေါင်းတပ်ဖွဲ့များက တိုက်ခိုက်သိမ်းပိုက်ထားခြင်း ဖြစ်သည်။   ယခုစစ်ကြောင်းထိုးလာသည့် တပ်ဖွဲ့များသည် ထီးချိုင့်၊ တကောင်း၊ ကသာနှင့် အင်းတော်မြို့တို့ကို စစ်တပ်က ပြန်လည် ထိန်းချုပ်ရာတွင် ပါဝင်ခဲ့သည့် တပ်ဖွဲ့များဖြစ်ပြီး တိုက်ပွဲများအတွင်း လက်နက်ခဲယမ်းနှင့် အသေခံ ဒရုန်း (Kamikaze Drone) များကို အမြောက်အမြား အသုံးပြုလေ့ရှိကြောင်း မြေပြင်သတင်းရင်းမြစ်က ဆို သည်။   စစ်ရေးတင်းမာမှု မြင့်တက်လာခြင်းကြောင့် အင်းတော်-မော်လူး လမ်းပိုင်းရှိ ကျေးရွာသားများနှင့် မြို့ပေါ် ဒေသခံများမှာ ကြိုတင်တိမ်းရှောင်နေကြရပြီး ကာကွယ်ရေးတပ်ဖွဲ့များနှင့် နီးစပ်သည့် ဒေသခံတစ်ဦးကလည်း ယခုကဲ့သို့ သတိပေးနှိုးဆော်ထားသည်။   “အရပ်သားတွေကိုတော့ အဓိကကတော့ စစ်ကြောင်းနဲ့ဝေးရာကို ရှောင်ကြဖို့မှာ ချင်တယ်။ နီးမှမရှောင်နဲ့ပေါ့ ကြိုရှောင်ထားကြပေါ့လေ။ ပစ္စည်းတွေကြိုရွှေ့ကြပေါ့လေ။ နီးမှရှောင်ရင်တော့ လက်နက်ကြီးတွေ မတော် တဆ ထိတတ်တယ်လေ။ အဓိကကတော့ ရှောင်ကြဖို့ပါပဲ။”   စစ်တပ်သည် ၎င်းတို့လက်လွှတ်ခဲ့ရသည့် မြို့ရွာများကို ပြန်လည်ထိန်းချုပ်နိုင်ရန် အင်အားအလုံးအရင်းဖြင့် စစ်ကြောင်းထိုးမှုများ ဆက်တိုက်ပြုလုပ်နေသဖြင့် မြောက်ပိုင်းစစ်မျက်နှာတွင် စစ်ရေးအခြေအနေမှာ ပိုမို ပြင်းထန်လာနိုင်ကြောင်း စစ်ရေးလေ့လာသူများက သုံးသပ်နေကြသည်။   #မော်လူး #အင်းတော်မြို့ #စစ်တပ်ထိုးစစ် #စစ်ကိုင်းတိုင်း

စစ်တပ်စစ်ကြောင်းများ မော်လူးသို့ ဦးတည်

စစ်တပ်စစ်ကြောင်းများ မော်လူးသို့ ဦးတည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၄ ရက်။  စစ်ကိုင်းတိုင်းဒေသကြီး၊ အင်းတော်မြို့ကို ပြန်လည်ထ…

  • May 4, 2026
×Close