သတင်း

သမ္မတ ထရန့်ရဲ့ မိတ်ဆွေကို စည်းရုံးလှုံ့ဆော်ပေးဖို့ စစ်အုပ်စု ငှားရမ်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁ ရက်။ အမေရိကန်သမ္မတ ဒေါ်နယ်ထရမ့်ရဲ့ ရင်းနှီးတဲ့ မိတ်ဆွေတစ်ဦးဖြစ်သူ ရော်ဂျာစတုန်း (Roger Stone) ဟာ မြန်မာ စစ်အုပ်စုရဲ့ ဝန်ကြီးဌာနတစ်ခုအတွက် အမေရိကန်မှာ စည်းရုံးလှုံ့ဆော်ပေးဖို့ လက်မှတ်ရေးထိုး သဘောတူညီခဲ့တယ်လို့ Bloomberg သတင်းမှာ ဖော်ပြထားပါတယ်။ ဒီသဘောတူညီချက်အရ ရော်ဂျာစတုန်းဟာ မြန်မာနိုင်ငံအပေါ် ချမှတ်ထားတဲ့ အမေရိကန်ရဲ့ ပိတ်ဆို့အရေးယူမှုအချို့ကို ဖြေလျှော့ပေးဖို့နဲ့ နှစ်နိုင်ငံဆက်ဆံရေး ကောင်းမွန်လာစေဖို့အတွက် ဝါရှင်တန်ဒီစီမှာ ကြိုးပမ်းပေးရမှာ ဖြစ်ပါတယ်။ လက်ရှိ စစ်အုပ်စုက လွှမ်းမိုးထားတဲ့ မြန်မာ့နိုင်ငံရေး အခြေအနေတွေကြောင့် ဒီလုပ်ရပ်အပေါ် လူ့အခွင့်အရေးလှုပ်ရှားသူတွေနဲ့ နိုင်ငံရေးလေ့လာသူတွေက ဝေဖန်နေကြပါတယ်။ ရော်ဂျာစတုန်းဟာ အမေရိကန်နိုင်ငံရေးလောကမှာ အလွန်ထင်ရှားပြီး အငြင်းပွားဖွယ်ရာများတဲ့ "နိုင်ငံရေး မဟာဗျူဟာမြောက် အကြံပေးပုဂ္ဂိုလ်" (Political Strategist) တစ်ဦး ဖြစ်ပါတယ်။ သူဟာ အမေရိကန်သမ္မတ ဒေါ်နယ်ထရမ့်ရဲ့ ရင်းနှီးသူတစ်ဦးလည်း ဖြစ်ပါတယ်။ သူဟာ ဒေါ်နယ်ထရမ့်ကို နိုင်ငံရေးလောကထဲ ရောက်အောင် ကူညီပေးခဲ့တဲ့ နှစ်ရှည်လများ မိတ်ဆွေဖြစ်ပြီး ၂၀၁၆ ရွေးကောက်ပွဲမှာလည်း အဓိကနေရာက ပါဝင်ခဲ့သူပါ။ ဒါ့အပြင် သူဟာ နိုင်ငံရေးပြိုင်ဘက်တွေကို တိုက်ခိုက်ရာမှာ ပြင်းထန်ပြီး အငြင်းပွားဖွယ်ရာ ညစ်ပတ်တဲ့ နည်းလမ်းတွေကို အသုံးပြုတတ်တာကြောင့် "Dirty Trickster" လို့တောင် နာမည်ကျော်ပါတယ်။ အမေရိကန်ရွေးကောက်ပွဲကို ရုရှားနိုင်ငံက စွက်ဖက်မှုနဲ့ ပတ်သက်ပြီး စစ်ဆေးရာမှာ လွှတ်တော်ကို လိမ်ညာပြောဆိုမှု၊ သက်သေတွေကို ခြိမ်းခြောက်မှု စတဲ့ ပြစ်မှု ၇ ခုနဲ့ ထောင်ဒဏ် လ ၄၀ ချမှတ်ခံခဲ့ရဖူးပါတယ်။ ဒါပေမဲ့ ၂၀၂၀ ခုနှစ်မှာ သမ္မတထရမ့်က သူ့ကို ထောင်ကလွတ်အောင် ပြစ်ဒဏ်လျှော့ပေါ့ပေးခဲ့ပြီး နောက်ပိုင်းမှာ လွတ်ငြိမ်းချမ်းသာခွင့် အပြည့်အဝ ပေးခဲ့ပါတယ်။ သူဟာ ဆယ်စုနှစ်ပေါင်းများစွာအတွင်း အမေရိကန် ရီပတ်ဘလစ်ကန်ပါတီ သမ္မတတွေ ဖြစ်တဲ့ သမ္မတနစ်ဆင်၊ သမ္မတ ရော်နယ် ရေဂင် စသူတို့ အတွက်လည်း အလုပ်လုပ်ပေးခဲ့ဖူးတဲ့ ဝါရင့် နိုင်ငံရေးသမားတစ်ဦး ဖြစ်ပါတယ်။ အကျဉ်းချုပ်ရရင် သူဟာ အမေရိကန် ရှေးရိုးစွဲနိုင်ငံရေးလောကမှာ သြဇာညောင်းပြီး ထရမ့်နဲ့ အလွန်နီးစပ်တဲ့၊ နည်းလမ်းမျိုးစုံသုံးပြီး နိုင်ငံရေး ရည်မှန်းချက်အောင်မြင်အောင် လုပ်ဆောင်တတ်သူတစ်ဦး ဖြစ်ပါတယ်။ သူ့ကို စစ်အစိုးရက အမေရိကန်ရဲ့ အရေးယူ ပိတ်ဆို့မှုတွေ ဖယ်ရှားနိုင်ဖို့အတွက် စည်းရုံးလှုံ့ဆော်ပေးဖို့ ငှားရမ်းလိုက်တာ ဖြစ်ပါတယ်။ #Trump #RogerStone #Bloomberg

သမ္မတ ထရန့်ရဲ့ မိတ်ဆွေကို စည်းရုံးလှုံ့ဆော်ပေးဖို့ စစ်အုပ်စု ငှားရမ်း

သမ္မတ ထရန့်ရဲ့ မိတ်ဆွေကို စည်းရုံးလှုံ့ဆော်ပေးဖို့ စစ်အုပ်စု ငှားရမ်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁ ရက်။ အမေရိကန်သမ္မတ ဒေါ်နယ်ထရမ…

  • May 1, 2026
နိုင်ငံရင်းတွင် အန္တရာယ်ရှိသူများ အမေရိကန် ဗီဇာ ပေးမည်မဟုတ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁ ရက်။   အမေရိကန်အစိုးရသည် နိုင်ငံအတွင်း နိုင်ငံရေးခိုလှုံခွင့် (Asylum) တောင်းခံမှုများကို ထိန်းချုပ်ရန်အတွက် ဗီဇာလျှောက်ထားသူများအပေါ် တင်းကျပ်သည့် ညွှန်ကြားချက်အသစ်တစ်ရပ်ကို ထုတ်ပြန်လိုက်သည်။   အဆိုပါ စည်းကမ်းချက်အရ ကျောင်းသားဗီဇာ၊ ယာယီအလုပ်လုပ်ခွင့်ဗီဇာနှင့် ခရီးသွားဗီဇာ လျှောက်ထားသူများသည် မိမိတို့၏ မူရင်းနိုင်ငံတွင် ညှဉ်းပန်းနှိပ်စက်ခံရခြင်း သို့မဟုတ် အန္တရာယ်ပြုခံရမည်ကို စိုးရိမ်ခြင်းမရှိကြောင်း အတည်ပြုနိုင်မှသာ ဗီဇာထုတ်ပေးမည်ဖြစ်သည်။   ကောင်စစ်ဝန်အရာရှိများ၏ မေးမြန်းမှုဖြစ်သော "မိမိနိုင်ငံတွင် မတရားနှိပ်စက်ခံရဖူးခြင်း ရှိ၊ မရှိ" နှင့် "နိုင်ငံသို့ ပြန်သွားပါက အန္တရာယ်ရှိနိုင်သလား" ဆိုသည့် မေးခွန်းနှစ်ခုစလုံးကို "မရှိပါ (No)" ဟု နှုတ်ဖြင့် ဖြေဆိုနိုင်မှသာ ဗီဇာ လုပ်ငန်းစဉ် ရှေ့ဆက်နိုင်မည် ဖြစ်သည်။   ဤလုပ်ဆောင်ချက်သည် ဗီဇာအမျိုးအစားများကို အသုံးချ၍ အမေရိကန်သို့ ရောက်ရှိပြီးမှ ခိုလှုံခွင့်တောင်းခံခြင်းကို ကာကွယ်ရန်နှင့် နောက်ပိုင်းတွင် နေရပ်ပြန်ပို့ရန် လိုအပ်ပါက ဥပဒေကြောင်းအရ အခက်အခဲမရှိစေရန် ရည်ရွယ်ခြင်းဖြစ်သည်။   သို့သော် လူ့အခွင့်အရေးနှင့် လူဝင်မှုကြီးကြပ်ရေး ပညာရှင်များကမူ ဤစည်းကမ်းသစ်သည် အမှန်တကယ် အကာအကွယ်လိုအပ်သူများကို အမှန်တရားကို ဖုံးကွယ်ပြောဆိုရန် တွန်းအားပေးသလိုဖြစ်စေပြီး အန္တရာယ်ရှိသော တရားမဝင် လမ်းကြောင်းများကို ရွေးချယ်လာစေနိုင်ကြောင်း ဝေဖန်ထောက်ပြထားကြသည်။   #အမေရိကန်ဗီဇာ #VISA #American #Asylum #နိုင်ငံရေးခိုလှုံခွင့်

နိုင်ငံရင်းတွင် အန္တရာယ်ရှိသူများ အမေရိကန် ဗီဇာ ပေးမည်မဟုတ်

နိုင်ငံရင်းတွင် အန္တရာယ်ရှိသူများ အမေရိကန် ဗီဇာ ပေးမည်မဟုတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁ ရက်။  အမေရိကန်အစိုးရသည် နိုင်ငံအတွ…

  • May 1, 2026
နိုဘယ်လ်ငြိမ်းချမ်းရေးဆုအတွက် သမ္မတထရန့် အပါအဝင် ၂၈၇ ဦးကို အဆိုပြုထား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁ ရက်။   ၂၀၂၆ ခုနှစ်အတွက် နိုဘယ်လ်ငြိမ်းချမ်းရေးဆု လျာထားခံရသူ အမည်စာရင်းတွင် လူပုဂ္ဂိုလ် ၂၀၈ ဦးနှင့် အဖွဲ့အစည်း ၇၉ ခု၊ စုစုပေါင်း ၂၈၇ ဦး ပါဝင်ကြောင်း နိုဘယ်လ်ကော်မတီ၏ သတင်းရင်းမြစ်များက ဆိုသည်။   အဆိုပါလျာထားချက်များတွင် အမေရိကန်သမ္မတ ဒေါ်နယ်ထရန့်အား အစ္စရေး၊ ပါကစ္စတန်နှင့် ကမ္ဘောဒီးယားနိုင်ငံ ခေါင်းဆောင်များက အဆိုပြုထားကြောင်း ထွက်ပေါ်နေသဖြင့် ၎င်းသည် အမည်စာရင်းတွင် ပါဝင်နေရန် များစွာသေချာလျက်ရှိသည်။   ထို့အပြင် အာတိတ်ဒေသ တည်ငြိမ်အေးချမ်းရေးအတွက် ကြိုးပမ်းခဲ့ကြသည့် အလက်စကာ အထက်လွှတ်တော်အမတ် Lisa Murkowski နှင့် ဂရင်းလန်းကျွန်း (Greenland) မှ လွှတ်တော်အမတ်တစ်ဦးတို့လည်း အဆိုပြုခံထားရသည်။     တစ်ဖက်တွင်လည်း နိုဘယ်လ်ကော်မတီအနေဖြင့် ၂၀၂၃ ခုနှစ် ငြိမ်းချမ်းရေးဆုရှင် အီရန်လူ့အခွင့်အရေးလှုပ်ရှားသူ နာဂစ် မိုဟာမ္မဒီ (Narges Mohammadi) ၏ ကျန်းမာရေးအခြေအနေအတွက် အထူးစိုးရိမ်လျက်ရှိသည်။   ၎င်းသည် လက်ရှိတွင် အီရန်ထောင်တွင်း၌ နှလုံးရောဂါဝေဒနာ ခံစားနေရသဖြင့် အမြန်ဆုံးပြန်လွှတ်ပေးရန် တောင်းဆိုမှုများ ရှိနေသည်။   ၂၀၂၆ ခုနှစ်အတွက် နိုဘယ်လ်ငြိမ်းချမ်းရေးဆုရှင်ကို အောက်တိုဘာလ ၉ ရက်နေ့တွင် ကြေညာမည်ဖြစ်ပြီး ဆုချီးမြှင့်ပွဲကို ဒီဇင်ဘာလ ၁၀ ရက်နေ့တွင် ကျင်းပမည်ဖြစ်သည်။   ပြီးခဲ့သည့် ၂၀၂၅ ခုနှစ်တွင်မူ ဗင်နီဇွဲလားနိုင်ငံမှ Maria Corina Machado က ဆုရရှိခဲ့သည်။   ဤစာရင်းမှာ စာရင်းတင်သွင်းသူများ၏ ထုတ်ဖော်ချက်များကို စုစည်းထားခြင်းသာ ဖြစ်ပြီး ပုံမှန်အားဖြင့် နိုဘယ်လ် ဆုလျာထားသူ စာရင်းကို နစ်ပေါင်း ၅၀ ကြာမှသာ ထုတ်ပြန်လေ့ရှိသည်။   #နိုဘယ်လ်ငြိမ်းချမ်းရေးဆု #NobelPeacePrize

နိုဘယ်လ်ငြိမ်းချမ်းရေးဆုအတွက် သမ္မတထရန့် အပါအဝင် ၂၈၇ ဦးကို အဆိုပြုထား

နိုဘယ်လ်ငြိမ်းချမ်းရေးဆုအတွက် သမ္မတထရန့် အပါအဝင် ၂၈၇ ဦးကို အဆိုပြုထား  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁ ရက်။  ၂၀၂၆ ခုနှစ်အတွက် …

  • May 1, 2026
ကမ္ဘာ့ရေနံဈေးနှုန်း ၄ နှစ်အတွင်း အမြင့်ဆုံးရောက်ရှိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁ ရက်။   အမေရိကန်ပြည်ထောင်စုနှင့် အီရန်နိုင်ငံတို့အကြား စစ်ရေးတင်းမာမှုများ မြင့်တက်လာခြင်းနှင့်အတူ ကမ္ဘာ့ရေနံဈေးနှုန်းများသည် ၂၀၂၂ ခုနှစ်နောက်ပိုင်း အမြင့်ဆုံးစံချိန်သို့ ရောက်ရှိလာခဲ့သည်။   အမေရိကန်စစ်ဌာနချုပ် (CENTCOM) က အီရန်နိုင်ငံအပေါ် အင်အားပြင်းထန်သည့် လေကြောင်းတိုက်ခိုက်မှုများ ပြုလုပ်ရန် စီစဉ်နေကြောင်း သတင်းများထွက်ပေါ်လာပြီးနောက် ရေနံဈေးများ ပြန်လည် မြင့်တက်သွားခဲ့ခြင်း ဖြစ်သည်။   ကမ္ဘာ့ရေနံဈေးကွက်တွင် Brent ရေနံစိမ်းတစ်စည်လျှင် အမေရိကန်ဒေါ်လာ ၁၂၆ ကျော်အထိ ရုတ်တရက် မြင့်တက်သွားခဲ့ခြင်းဖြစ်သည်။   ထို့အပြင် ကမ္ဘာ့ရေနံသယ်ယူပို့ဆောင်ရေး၏ အဓိကသွေးကြောဖြစ်သော ဟော်မုဇ်ရေလက်ကြား (Strait of Hormuz) ပိတ်ဆို့နေခြင်းနှင့် ယူအေအီးနိုင်ငံ (UAE) က ရေနံတင်ပို့သည့်နိုင်ငံများအဖွဲ့ (OPEC) မှ နုတ်ထွက်လိုက်ခြင်းတို့က ရေနံဈေးကွက်ကို ပိုမိုရိုက်ခတ်စေခဲ့သည်။   ရေနံဈေးနှုန်း မြင့်တက်မှုကြောင့် နိုင်ဂျီးရီးယားနိုင်ငံရှိ Dangote ရေနံချက်စက်ရုံက ဆီဈေးနှုန်းများ တိုးမြှင့်လိုက်ရသည့်အပြင် တင်ပို့မှုအချို့ကို ယာယီရပ်နားထားရသဖြင့် တစ်လီတာလျှင် နိုက်ရာ ၁,၄၀၀ ဝန်းကျင်အထိ ပေါက်ဈေးရှိနေသည်။   ကင်ညာနိုင်ငံတွင်လည်း အစိုးရက အခွန်လျှော့ချပေးထားသော်လည်း ဒီဇယ်ဈေးနှုန်းမှာ စံချိန်တင်မြင့်တက်လျက်ရှိပြီး ယူကေနိုင်ငံတွင်လည်း ဓာတ်ဆီနှင့် ဒီဇယ်ဈေးနှုန်းများမှာ စစ်ပွဲမတိုင်ခင်ကာလထက် သိသိသာသာ မြင့်တက်နေဆဲဖြစ်သည်။   စီးပွားရေးပညာရှင်များက ရေနံဈေးနှုန်း တစ်စည်လျှင် ၁၂၅ ဒေါ်လာဝန်းကျင်သို့ ရောက်ရှိလာခြင်းသည် ကမ္ဘာလုံးဆိုင်ရာ ငွေကြေးဖောင်းပွမှုကို ပိုမိုဆိုးရွားစေနိုင်ကြောင်း သတိပေးထားသည်။   အမေရိကန်သမ္မတ ဒေါ်နယ်ထရန့်သည် စားသုံးသူများအပေါ် သက်ရောက်မှု လျော့နည်းစေရန် ရေနံကုမ္ပဏီကြီးများနှင့် ညှိနှိုင်းဆွေးနွေးမှုများ ပြုလုပ်နေကြောင်း သိရသည်။   #ကမ္ဘာ့ရေနံဈေးနှုန်း #အီရန်စစ်ပွဲ #StraitofHormuz #OPEC

ကမ္ဘာ့ရေနံဈေးနှုန်း ၄ နှစ်အတွင်း အမြင့်ဆုံးရောက်ရှိ

ကမ္ဘာ့ရေနံဈေးနှုန်း ၄ နှစ်အတွင်း အမြင့်ဆုံးရောက်ရှိ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁ ရက်။  အမေရိကန်ပြည်ထောင်စုနှင့် အီရန်နိုင်…

  • May 1, 2026
မြိတ်အကျဉ်းထောင်နှင့် ရဲဘက်စခန်းမှ လွတ်မြောက်သူများတွင် နိုင်ကျဉ်းပါဝင်မှု မရှိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၃၀ ရက်။   မြိတ်အကျဉ်းထောင်နှင့် ရဲဘက်စခန်းများမှ အကျဉ်းသားစုစုပေါင်း ၂၈ ဦး လွတ်မြောက်သော်လည်း နိုင်ငံရေး အကျဉ်းသားများ မပါဝင်ဟု အကျဉ်းဦးစီးဌာနနှင့် နီးစပ်သူများက ပြောသည်။   စစ်အုပ်စုက ကဆုန်လပြည့်နေ့ အထိမ်းအမှတ် လွတ်ငြိမ်းချမ်းသာခွင့်ဖြင့် အကျဉ်းသားများကို ပြန်လွှတ်ပေးခဲ့ရာ မြိတ်အကျဉ်းထောင်နှင့် ရဲဘက်စခန်းများမှ စုစုပေါင်း ၂၈ ဦး လွတ်မြောက်လာသော်လည်း နိုင်ငံရေးအကျဉ်းသား များ တစ်ဦးမျှ ပါဝင်လာခြင်းမရှိကြောင်း အကျဉ်းသားမိသားစုဝင်များက ပြောသည်။   ယနေ့ ဧပြီလ ၃၀ ရက်တွင် ပြန်လွှတ်ပေးခဲ့သည့် မြိတ်အကျဉ်းထောင်မှ အကျဉ်းသား ၁၃ ဦးတွင် ခိုးဆိုး လုယက် မှုဖြင့် ပြစ်ဒဏ်ကျခံနေရသည့် လွတ်ရက်နီးသူ အကျဉ်းသား ၁၁ ဦးနှင့် အကျဉ်းသူ ၂ ဦးတို့သာ ပါဝင်ခဲ့သည်။   ထို့ပြင် ကျောက်ဖြူတောင် ကုန်ထုတ် ရဲဘက်စခန်းမှ ၁၂ ဦးနှင့် နတ်စင်ကုန်း ကုန်ထုတ်စခန်းမှ ၃ ဦးတို့လည်း လွတ်မြောက်လာခဲ့သည်။   နံနက်အစောပိုင်းကတည်းက ထောင်ရှေ့တွင် သားဖြစ်သူကို လာရောက်စောင့်ကြိုနေသည့် အသက် ၄၅ နှစ် အရွယ် မိခင်တစ်ဦးက “မနက်အစောကြီးကတည်းက ထောင်အရှေ့မှာ သွားစောင့်နေတာ၊ လွတ်ခါနီး အပြင် ဘုတ်ကျနေတဲ့သူတွေပဲ လွှတ်တာ၊ အိမ်က သားတော့ မပါဘူး” ဟု ပြောသည်။     စစ်တပ်သည် ယခုတစ်ကြိမ် လွတ်ငြိမ်းချမ်းသာခွင့်တွင် တစ်နိုင်ငံလုံးအတိုင်းအတာဖြင့် အကျဉ်းသား ၁,၅၀၈ ဦးနှင့် နိုင်ငံခြားသား ၁၁ ဦးတို့ကို လွှတ်ပေးခဲ့ကြောင်း ကြေညာထားသည်။   အဆိုပါ လွတ်ငြိမ်းခွင့်သည် ရာဇဝတ်ကျင့်ထုံးဥပဒေ ပုဒ်မ ၄၀၁၊ ပုဒ်မခွဲ (၁) အရ နောက်တစ်ကြိမ် ပြစ်မှုထပ်မံ ကျူးလွန်ပါက ယခုကျန်ရှိသည့် ပြစ်ဒဏ်များကိုပါ ဆက်လက်ကျခံရမည်ဟူသော ကန့်သတ်ချက်ဖြင့် လွှတ်ပေး ခြင်း ဖြစ်သည်။   မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ၏ ထုတ်ပြန်ချက်အရ ထားဝယ် အကျဉ်းထောင်မှ လည်း အသက်ကြီးပိုင်း အကျဉ်းသား ၁ ဦးသာ ပြန်လည်လွတ်မြောက်လာပြီး နိုင်ငံရေး အကျဉ်းသားများ ပါဝင်ခြင်းမရှိကြောင်း သိရသည်။   မြန်မာနှစ်ဆန်းတစ်ရက်နေ့နှင့် ယခု ကဆုန်လပြည့်နေ့ လွတ်ငြိမ်းချမ်းသာခွင့်တို့တွင် နိုင်ငံရေးအကျဉ်းသားများ ပါဝင်မှု အလွန်နည်းပါးနေသည့်အပေါ် ပြည်တွင်း၊ ပြည်ပ လူ့အခွင့်အရေး လှုပ်ရှားသူများက ဝေဖန်ပြောဆိုမှုများ ပြုလုပ်နေကြသည်။   ကျန်ရှိနေသော အကျဉ်းသားများအတွက် ကျခံရန်ကျန်ရှိသည့် ပြစ်ဒဏ်များအနက်မှ ၆ ပုံ ၁ ပုံကို လျှော့ပေါ့ပေး မည်ဟု စစ်အစိုးရက ထပ်မံကြေညာထားသော်လည်း နိုင်ငံရေးအကျဉ်းသားများ လွတ်မြောက်ရေးအတွက်မူ မျှော်လင့်ချက် နည်းပါးနေဆဲ ဖြစ်သည်။    #အကျဉ်းထောင် #လွတ်ငြိမ်းခွင့်  

မြိတ်အကျဉ်းထောင်နှင့် ရဲဘက်စခန်းမှ လွတ်မြောက်သူများတွင် နိုင်ကျဉ်းပါဝင်မှု မရှိ

မြိတ်အကျဉ်းထောင်နှင့် ရဲဘက်စခန်းမှ လွတ်မြောက်သူများတွင် နိုင်ကျဉ်းပါဝင်မှု မရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  မြိတ်…

  • April 30, 2026
တနင်္သာရီမြို့နယ်အတွင်း လေယာဉ်ကွင်းဆောက်ရန် လူထု မြေများ သိမ်းယူ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၃၀ ရက်။   တနင်္သာရီတွင် ရဟတ်ယာဉ်ကွင်းဆောက်ရန် ရွာသား ၁၅ ဦးပိုင် မြေနှင့်အိမ်များကို စစ်တပ်က အဓမ္မသိမ်းယူနေ သည်ဟု ဒေသခံများက ပြောသည်။   မြိတ်ခရိုင်၊ တနင်္သာရီမြို့နယ်၊ ညောင်ပင်ကွင်းကျေးရွာရှိ အမှတ် (၅၆၁) ခြေမြန်တပ်ရင်းအရှေ့ဘက်တွင် ရဟတ် ယာဉ်ကွင်း တည်ဆောက်ရန်အတွက်ဟုဆိုကာ ဒေသခံရွာသား ၁၅ ဦး ပိုင်ဆိုင်သည့် လယ်ယာမြေများ၊ ခြံများနှင့် နေအိမ်များကို စစ်ကတပ်က အဓမ္မသိမ်းယူလျက်ရှိကြောင်း ဒေသခံများက ပြောသည်။   ပြီးခဲ့သည့် ဧပြီလ ၂၈ ရက်နေ့မှစတင်ကာ စစ်တပ်သည် ကြိုတင်အကြောင်းကြားခြင်းမျိုး မရှိဘဲ ညောင်ပင်ကွင်း ရွာသားများ၏ မြေနေရာများကို သိမ်းယူခဲ့ပြီး မြေတူးစက်များဖြင့် နေအိမ်များကို ဖြိုဖျက်ကာ မြေညှိခြင်း လုပ်ငန်းများ လုပ်ဆောင်နေခြင်း ဖြစ်သည်။   အဆိုပါ ဖြစ်စဉ်နှင့်ပတ်သက်၍ အသက် ၅၀ ခန့်အရွယ် ရွာသားတစ်ဦးက “လမ်းကို ပေး မသွားခိုင်းတော့ဘဲ ပိတ် ပစ်ထားတယ်၊ ဘက်ဟိုးတွေနဲ့ အိမ် ၂ ဆောင်ကို ဖျက်တယ်၊ မြေကြီးတွေလည်း အကုန်လုံး တူးဆွပစ်နေတယ်။ မြင်ရတာ စိတ်မကောင်းတောင် မကောင်းဘူး။ အိမ်ရှင် မြေရှင်တွေ ငိုတဲ့သူတွေ ငိုကုန်တယ်” ဟု ပြောသည်။   အဆိုပါ ရဟတ်ယာဉ်ကွင်းကို အနံ ၁၅၀ ပေနှင့် အလျား ၃,၀၀၀ ပေအထိ ကျယ်ဝန်းစွာ ဖော်ဆောင်သွားရန် စီစဉ်နေခြင်းဖြစ်ကြောင်း ရွာသားများက ဆိုသည်။   လက်ရှိတွင် တနင်္သာရီမြို့နယ်အတွင်းရှိ ဘန်လောကျေးရွာနှင့် ၆ မိုင်ကျေးရွာတို့တွင် စစ်တပ်နှင့် ပြည်သူ့ ကာကွယ်ရေး ပူးပေါင်းတပ်ဖွဲ့များအကြား တိုက်ပွဲများ ပြင်းထန်လျက်ရှိသည်။   ထို့ပြင် ဧပြီလ ၂၈ ရက်နေ့၊ ညပိုင်းကလည်း အမှတ် (၅၆၁) ခြေမြန်တပ်ရင်းမှ သကျက်ကျေးရွာဘက်သို့ လက်နက်ကြီး ၉ လုံးခန့် ပစ်ခတ်ခဲ့သဖြင့် နယ်မြေအတွင်း စစ်ရေးတင်းမာနေဆဲ ဖြစ်သည်။   #တနင်္သာရီ #လေယာဉ်ကွင်း #လူ့အခွင့်အရေးချိုးဖောက်မှု

တနင်္သာရီမြို့နယ်အတွင်း လေယာဉ်ကွင်းဆောက်ရန် လူထု မြေများ သိမ်းယူ

တနင်္သာရီမြို့နယ်အတွင်း လေယာဉ်ကွင်းဆောက်ရန် လူထု မြေများ သိမ်းယူ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  တနင်္သာရီတွင် ရဟတ်ယာ…

  • April 30, 2026
၁၂ နှစ်အရွယ် လေးတန်းကျောင်းသား ဓါးဒဏ်ရာအများအပြားဖြင့် သေဆုံး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၃၀ ရက်။   ထားဝယ်ခရိုင်၊ ရေဖြူမြို့နယ်၊ ကလိန်အောင်မြို့အနီးရှိ ကျေးရွာတစ်ရွာတွင် ငါးရှာသွားသည့် အသက် ၁၂ နှစ် အရွယ် စတုတ္ထတန်းကျောင်းသား တစ်ဦးမှာ ဓားဒဏ်ရာအများအပြားဖြင့် အသတ်ခံထားရ သည့် ဖြစ်စဉ်တစ်ခု ဖြစ်ပွားခဲ့သည်။   ဖြစ်စဉ်မှာ မိကျောင်းလှောင်းရွာသစ်တွင် နေထိုင်သည့် မောင်ကျော်လင်းထွေး (၁၂ နှစ်) သည် ဧပြီလ ၂၈ ရက်နေ့၊ ညနေပိုင်းက နေအိမ်အနီးရှိ ချောင်းစပ်သို့ ငါးရှာရန် ထွက်ခွာသွားခဲ့သည်။   သို့သော် ညနေ ၆ နာရီခန့်အထိ ပြန်လည်ရောက်ရှိမလာသဖြင့် မိဘများနှင့် ရွာသားများက ဝိုင်းဝန်းရှာဖွေကြရာ တွင် ချောင်းစပ်၌ပင် ထိုးသွင်းဓားဒဏ်ရာများစွာဖြင့် သေဆုံးနေသည့် ကလေးငယ်၏ ရုပ်အလောင်းကို တွေ့ရှိခဲ့ရခြင်း ဖြစ်သည်။   အသက် ၄၅ နှစ်အရွယ် ရွာသားတစ်ဦးက “ကလေးရဲ့ ဝမ်းဗိုက်၊ လည်ပင်း၊ ကျောပြင်နဲ့ လက်တို့မှာ ဓားနဲ့ ထိုး သွင်းထားတဲ့ ဒဏ်ရာတွေ မနည်းဘူး၊ အချက် ၂၀ ဝန်းကျင်လောက်တောင် တွေ့ရတယ်။ စတုတ္ထတန်း ကျောင်း သား လူအေးလေးတစ်ယောက်ပါ၊ မိဘတွေကလည်း ချို့တဲ့တယ်၊ သနားစရာပါ။ ဘယ်သူက ဘယ်အငြိုးနဲ့ ဒီလောက်တောင် ရက်ရက်စက်စက် လုပ်တာလဲ ပြောမတတ်တော့ဘူး” ဟု ပြောသည်။   သေဆုံးသူ ကလေးငယ်၏ ရုပ်အလောင်းကို ကလိန်အောင်ဆေးရုံသို့ ပို့ဆောင်ကာ ရင်ခွဲစစ်ဆေးမှုများ ပြုလုပ်ခဲ့ပြီးနောက် ဧပြီလ ၂၉ ရက် နံနက်ပိုင်းတွင် နေအိမ်သို့ ပြန်လည်ယူဆောင်လာခဲ့ကြသည်။   လူသတ်မှု ဖြစ်ပွားပြီးနောက် ကလိန်အောင်မြို့မရဲစခန်းမှ တာဝန်ရှိသူများက အခင်းဖြစ်ပွားရာသို့ လာရောက် စစ်ဆေးမှုများ ပြုလုပ်ခဲ့ကာ အမှုဖွင့်လှစ်ပြီး ပြစ်မှုကျူးလွန်သူကို ဖော်ထုတ်နိုင်ရန် ကြိုးပမ်းလျက်ရှိသည်။   ဒေသခံများကမူ အပြစ်မဲ့ ကလေးငယ်တစ်ဦးအပေါ် ယခုကဲ့သို့ အဆင်အခြင်မဲ့ လုပ်ရပ်မျိုး ကျူးလွန်ခဲ့သူကို ထိရောက်စွာ အရေးယူပေးရန် လိုလားနေကြသည်။   မိကျောင်းလှောင်းရွာသစ်သည် ကရင်၊ ထားဝယ်၊ မွန်နှင့် ဗမာ တိုင်းရင်းသားများ စုပေါင်းနေထိုင်သည့် ကျေးရွာ တစ်ရွာဖြစ်ပြီး ရေး-ထားဝယ် ကားလမ်းမကြီးဘေးတွင် တည်ရှိသော ကျေးရွာတစ်ရွာ ဖြစ်သည်။   #မိကျောင်းလှောင်းရွာသစ် #ထားဝယ်ခရိုင် #ရေဖြူမြို့နယ် #ကလိန်အောင်ကျေးရွာ

၁၂ နှစ်အရွယ် လေးတန်းကျောင်းသား ဓါးဒဏ်ရာအများအပြားဖြင့် သေဆုံး

၁၂ နှစ်အရွယ် လေးတန်းကျောင်းသား ဓါးဒဏ်ရာအများအပြားဖြင့် သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  ထားဝယ်ခရိုင်၊ ရေဖြူမြို…

  • April 30, 2026
မိုးကုတ်တွင် စစ်တပ်က စစ်ကား ၃၀ ခန့်ဖြင့် စစ်အင်အားဖြည့်တင်း   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၃၀ ရက်။    မန္တလေးတိုင်း၊ မိုးကုတ်မြို့အတွင်းသို့ စစ်တပ်က လူအင်အားနှင့် လက်နက်ခဲယမ်းများ အပြည့်တင်ဆောင်လာ သည့် စစ်ကားအစီးရေ ၃၀ နီးပါးဖြင့် စစ်အင်အားများ ဖြည့်တင်းနေကြောင်း မြို့ခံများနှင့် စစ်ရေး သတင်း ရင်းမြစ်များက ပြောသည်။   ဧပြီလ ၂၉ ရက်နေ့၊ ညနေပိုင်းတွင် ပြင်ဦးလွင်ဘက်မှတစ်ဆင့် စစ်ယူနီဖောင်းအပြည့်အစုံ ဝတ်ဆင်ထားသည့် စစ်သားများ တင်ဆောင်လာသည့် စစ်ကားအစီးရေ ၂၀ ကျော်မှာ မိုးကုတ်မြို့အတွင်းသို့ ရောက်ရှိလာခြင်း ဖြစ်သည်ဟု ဆိုသည်။   မိုးကုတ်မြို့ စစ်ရေးသတင်းရင်းမြစ်နှင့် နီးစပ်သူတစ်ဦးက “စစ်ကားက ၂၀ ကျော်တယ်ပေါ့နော်။ တချို့ပြောက အစီးရေ ၂၅ စီး၊ ၂၃ စီး အဲ့လိုပြောကြတယ်ဗျ။ အဲ့ဒီစစ်ကားတွေ ထပ်ရောက်လာတာ။ ကားတိုင်းမှာလည်း စစ်သားတွေ ပါလာတယ်။ ပြီးခဲယမ်းသယ်တဲ့ကားတွေပေါ့၊ ပြောရမယ်ဆိုရင် စစ်မိုးကာကြီးတွေ အလုံပိတ် ထားတဲ့ ကားကြီးတွေလည်း ရောက်ထားတယ်ဆိုတော့ မိုးကုတ်တစ်ဝိုက် နယ်မြေရှင်းလင်းဖို့ ဒါမှမဟုတ် အနီးနားက မိုးမိတ်နဲ့ မဘိမ်းဘက်ကို စစ်ကြောင်းထိုးဖို့ ပြင်နေတာလို့ ခန့်မှန်းရတယ်” ဟု ပြောသည်။   ထို့အပြင် လက်နက်ခဲယမ်းများ တင်ဆောင်လာသည့် စစ်ကား အများအပြား ရောက်ရှိနေသည်ဟု မြို့ခံအချို့က ဆိုသည်။   လက်ရှိတွင် မိုးကုတ်မြို့လယ်ကောင်၌ စစ်တပ် လက်အောက်ခံ တပ်သားများက သွားလာလှုပ်ရှားနေကြသဖြင့် မြို့ခံများအကြား စိုးရိမ်မှုများ မြင့်တက်လျက်ရှိသည်။   မြို့ခံတစ်ဦးက “မြို့ထဲမှာ စစ်ကား ၁၀ စီးလောက် လက်နက်တွေနဲ့ သွားနေတာ တွေ့ခဲ့ရတယ်။ ပြင်ဦးလွင် လမ်းဘက်ကနေ ဝင်လာတာဗျ။ စစ်ကားတွေ ရောက်လာပြီးမှ ပေါ်တာဆွဲတာတွေ၊ စစ်သားစုဆောင်းတာတွေ လုပ်လာမှာစိုးလို့ အခုဆို လူတွေက သတိနဲ့ သွားလာနေကြရတယ်။ နောက်ပြီး သူတို့က မထင်ရင်မထင်သလို လူတွေကို ဖမ်းတာဆီးတာ၊ ခေါ်စစ်တာတွေလုပ်တတ်တယ်ဗျာ။ အထူးသဖြင့် ယောက်ကျားလေးတွေကိုပေါ့။ ဖုန်းပဲတောင်းစစ်သလိုလို ဘာလိုလိုနဲ့ ဖမ်းသွားတတ်တယ်။ အဲ့တော့ သတိထားရတာပေါ့ဗျာနော်” ဟု ပြောသည်။   မိုးကုတ်မြို့သည် ၁၀၂၇ စစ်ဆင်ရေး ဒုတိယပိုင်းအတွင်း တော်လှန်ရေးပူးပေါင်းတပ်များက တိုက်ခိုက်သိမ်းပိုက်ခဲ့ သော်လည်း ၂၀၂၅ ခုနှစ်၊ နိုဝင်ဘာလတွင် စစ်တပ်ထံ ပြန်လည်လွှဲပြောင်းပေးခဲ့ရသည့် မြို့ဖြစ်သည်။   လက်ရှိတွင် စစ်တပ်က စည်ပင်၊ လဝက နှင့် စီးပွားရေးဘဏ်တို့ကို ဖွင့်လှစ်ကာ အုပ်ချုပ်ရေးယန္တရားကို ပြန်လည် လည်ပတ်ရန် ကြိုးပမ်းနေသော်လည်း မြို့ပြင်ပတ်ဝန်းကျင်တွင် တော်လှန်ရေးတပ်များ လှုပ်ရှားနေဆဲ ဖြစ်သည်။   ထို့အပြင် ပြီးခဲ့သည့် မတ်လအတွင်းကလည်း မိုးကုတ်မြို့ အရှေ့ပိုင်းနှင့် အနောက်ပိုင်းရှိ ဘော်ဗဒါန်းနှင့် ကျောက်ဆင်ကျေးရွာများဘက်တွင် တိုက်ပွဲများ ပြင်းထန်ခဲ့ပြီး စစ်တပ်ဘက်မှ ထိခိုက်သေဆုံးမှု များပြားခဲ့ သည်။   အဆိုပါ တိုက်ပွဲများကြောင့် စစ်တပ်က စစ်ကူများ ဆက်တိုက် ပို့ဆောင်နေခြင်းဖြစ်ပြီး ရှေ့တန်းစစ်မျက်နှာများ တွင်လည်း တိုက်ပွဲများ ပိုမိုပြင်းထန်လာနိုင်သည်ဟု ဒေသခံများက ပြောသည်။   ဓာတ်ပုံ-ပုံဟောင်း   #မိုးကုတ်တိုက်ပွဲ #မိုးကုတ်မြို့

မိုးကုတ်တွင် စစ်တပ်က စစ်ကား ၃၀ ခန့်ဖြင့် စစ်အင်အားဖြည့်တင်း

မိုးကုတ်တွင် စစ်တပ်က စစ်ကား ၃၀ ခန့်ဖြင့် စစ်အင်အားဖြည့်တင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။   မန္တလေးတိုင်း၊ မိုး…

  • April 30, 2026
ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၃၀ ရက်။   ကရင်နီပြည်၊ ဖားဆောင်းမြို့ကို ပြန်လည်ထိန်းချုပ်နိုင်ပြီဖြစ်၍ လမ်းပိုင်းများအားလုံး မကြာမီပြန်ဖွင့်မည်ဟု စစ်တပ်က ကြေညာခဲ့သော်လည်း နှစ်လကျော်ကြာမြင့်လာသည့် တိုင်အောင် ဖွင့်လှစ်နိုင်ခြင်း မရှိသေးဘဲ တိုက်ပွဲ များ ဆက်လက်ပြင်းထန်နေကြောင်း စစ်ရေးသတင်းရင်းမြစ်များက ပြောသည်။   စစ်တပ်သည် ၂၀၂၆ ခုနှစ်ဆန်းပိုင်းတွင် ဖားဆောင်းမြို့ထဲသို့ ပြန်လည်ဝင်ရောက်နိုင်ခဲ့ပြီးနောက်၊ လွိုင်ကော်-ဖားဆောင်း လမ်းတစ်ခုလုံးကို ပြန်လည်ဖွင့်လှစ်တော့မည်ဟု ဖေဖော်ဝါရီလ ၁၅ ရက်နေ့တွင် ထုတ်ပြန်ခဲ့သည်။   သို့သော် ကရင်နီတော်လှန်ရေး ပူးပေါင်းတပ်ဖွဲ့များ၏ ကြားဖြတ်တိုက်ခိုက်မှုများကြောင့် လက်ရှိအချိန်ထိ ထိုလမ်းပိုင်းအား ဖွင့်လှစ်ရန် ခက်ခဲနေဆဲဖြစ်သည်။   ကရင်နီအမျိုးသားများကာကွယ်ရေးတပ် (KNDF) မှ စစ်ရေးသတင်းရင်းမြစ်တစ်ဦးက “စခ(စစ်တပ်) ဘက် ကတော့ လမ်းပြန်ဖွင့်ဖို့ ကြိုးစားနေတာတွေရှိတယ်၊ ဒါပေမဲ့ ကျနော်တို့ဘက်ကတော့ ပြန်လည်ထိန်းချုပ်ဖို့ အလူးအလဲ ကြိုးစားနေကြတော့ လမ်းဖွင့်ဖို့ ခက်ခဲလိမ့်မယ်” ဟု ပြောသည်။   ဖေဖော်ဝါရီလလယ်မှ ဧပြီလ ၂၉ ရက်နေ့ အတွင်း ဖရူဆို–ဘောလခဲ-ဖားဆောင်း လမ်းပိုင်းရှိ စစ်တပ်ယာဉ်တန်း များကို KNDF နှင့် ပူးပေါင်းတပ်ဖွဲ့များက အနည်းဆုံး (၁၀) ကြိမ်ထက်မနည်း ကြားဖြတ်တိုက်ခိုက်ခဲ့သည်။     ဧပြီလ ၂၆ ရက်ကလည်း ဒီးမော့ဆို - ဖရူဆို လမ်းပိုင်းဖြစ်သည့် ဖရူဆိုမြို့နယ်၊ ဒေါညေးခူကျေးရွာဘက်မှ ထိုးစစ်ဆင်လာသည့် စစ်တပ် စစ်ကြောင်း သည် တော်လှန်ရေးတပ်ဖွဲ့များ၏ ခုခံမှုကြောင့် နောက်တစ်နေ့တွင် ပြန်လည်ဆုတ်ခွာသွားခဲ့ရသည်။   လက်ရှိဖြစ်ပေါ်နေသည့် တိုက်ပွဲများနှင့် လမ်းပိုင်းများ ပိတ်ထားရမှုကြောင့်လည်း ဒေသခံပြည်သူများမှာ ကျန်းမာရေးနှင့် ကုန်စည်စီးဆင်းမှုအတွက် အခက်အခဲများနှင့် ကြုံတွေ့နေရသည်။   မြေပြင်အခြေအနေသိသူတစ်ဦးက “လမ်းပိတ်သွားတော့ အထူးသဖြင့် အရှေ့ခြမ်းကလူတွေက အနောက်ခြမ်း ကို ကူးလို့မရတော့ဘူး။ ကုန်ပစ္စည်းတွေအစ ကျန်းမာရေးကိစ္စအဆုံး အနောက်ခြမ်းမှာပဲ ပိုစုံတော့ အဲ့ဒီ အခက် အခဲ ရှိသွားတယ်။ အရမ်းအရေး ပေါ်ဆိုရင်တော့ ရဲဘော်တွေက လမ်းရှင်းပြီး လူထုကို ပို့ပေးတယ်၊ ဒါပေမဲ့ အန္တရာယ်အရမ်းများတယ်” ဟု ပြောသည်။   ၎င်းက ဆက်လက်၍ "ဗမာစစ်တပ်က တောင်ပေါ်မှာဆိုတော့ လှမ်းမြင်ရတော့ ၉၇ တွေနဲ့ လှမ်းလှမ်းထုတာ။ အရပ်သားတွေကလည်း တောင်းဆိုတော့ ရှေ့ကင်းက ရဲဘော်တွေက လမ်းရှင်းပြီး ကာပေးပြီး ကူးကြတာ မျိုးပေါ့။ ဒါမယ့် အန္တရာယ်အရမ်းများတယ်။ ထိကြတယ် ရဲဘော်တွေ။ အခုတော့ မဖြစ်မနေမှ ကူးပေးတော့ တာမျိုးပေါ့နော်” ဟု ဆက်ပြောသည်။   ၉၇ ဆိုသည်မှာ ၉၇ အမျိုးအစား အမြှောက် လက်နက်ကြီးကို ဆိုလိုသည်။   လက်ရှိတွင် ပြည်ထောင်စု လမ်းမကြီးတစ်လျှောက်ရှိ ကျေးရွာများစွာမှ ပြည်သူများမှာ ရွာလုံးကျွတ် စစ်ဘေး ရှောင်နေရဆဲဖြစ်ပြီး ကုန်သွယ်ရေးနှင့် ခရီးသွားလာမှုများလည်း ရပ်တန့်နေသည်။     ထို့အပြင် စစ်တပ်သည် ဖားဆောင်းမှ တစ်ဆင့် ခဲသတ္တုထွက်ရှိရာ မော်ချီးဒေသသို့ ဆက်လက် စစ်ကြောင်း ထိုးရန် ပြင်ဆင်နေသဖြင့် ပြည်သူများအနေဖြင့် စစ်ရေးအသိ သတိဖြင့် နေထိုင်ကြရန် တော်လှန်ရေးတပ်ဖွဲ့များ က သတိပေးနှိုးဆော်ထားသည်။   #ဖားဆောင်းတိုက်ပွဲ #ကရင်နီပြည်တိုက်ပွဲ #KNDF #KA #PDF

ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး

ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  ကရင်နီပြည်၊ ဖားဆောင်းမြို့ကို…

  • April 30, 2026
×Close