သတင်း

လက်ဘနွန်စစ်မျက်နှာက အပစ်အခတ်ရပ်စဲရေးကို ခြိမ်းခြောက်နေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၁၀ ရက်။   အစ္စရေးနှင့် အီရန်အကြား တင်းမာမှုများ မြင့်တက်နေစဉ် လက်ဘနွန်စစ်မျက်နှာ၌ အပြန်အလှန် တိုက်ခိုက်မှုများပြင်းထန်နေခြင်းက အပစ်အခတ်ရပ်စဲရေး အလားအလာကို အဟန့်အတား ဖြစ်စေလျက်ရှိသည်။   အစ္စရေးစစ်တပ်က လက်ဘနွန်ပိုင်နက်အတွင်းသို့ လေကြောင်းတိုက်ခိုက်မှုများ ဆက်လက်လုပ်ဆောင်နေသကဲ့သို့ ဟစ်ဇ်ဘိုလာအဖွဲ့ကလည်း အစ္စရေးနိုင်ငံအတွင်းသို့ ဒုံးကျည်များဖြင့် ပြန်လည်တုံ့ပြန်ပစ်ခတ်လျက်ရှိသည်။   သို့ရာတွင် အမေရိကန်နိုင်ငံခြားရေးဝန်ကြီးဌာနက အစ္စရေးနှင့် လက်ဘနွန်အရာရှိများအကြား ငြိမ်းချမ်းရေးဆွေးနွေးပွဲများ ကျင်းပသွားမည်ဟု ထုတ်ပြန်ထားသည်။   တစ်ချိန်တည်းမှာပင် အမေရိကန်ဒုသမ္မတ ဂျေဒီဗန့်စ် (JD Vance) သည် အီရန်အဆင့်မြင့်အရာရှိများနှင့် တွေ့ဆုံရန် ပါကစ္စတန်နိုင်ငံ၊ အစ္စလာမာဘတ်မြို့သို့ ရောက်ရှိနေကြောင်း ဂျာမနီအခြေစိုက် DW သတင်းဌာနက ဖော်ပြသည်။   ဤတွေ့ဆုံမှုသည် ဆယ်စုနှစ်များစွာအတွင်း အမေရိကန်နှင့် အီရန်အကြား အမြင့်ဆုံးအဆင့် တိုက်ရိုက်ထိတွေ့မှုအဖြစ် ရှုမြင်ခံနေရသည်။     အပစ်အခတ်ရပ်စဲရေး သဘောတူညီချက်တွင် လက်ဘနွန်နိုင်ငံ ပါဝင်မှု ရှိ၊ မရှိမှာ အငြင်းပွားဖွယ်ဖြစ်နေပြီး၊ အမေရိကန်အစိုးရသည် လာမည့်သီတင်းပတ်အတွင်း ဝါရှင်တန်ဒီစီ၌ အစ္စရေး-လက်ဘနွန် အပစ်ရပ်ရေးဆိုင်ရာ သီးသန့်ဆွေးနွေးပွဲတစ်ရပ်ကို အိမ်ရှင်အဖြစ် လက်ခံကျင်းပသွားရန် စီစဉ်ထားသည်။   ပြီးခဲ့သည့် ဗုဒ္ဓဟူးနေ့ အပစ်ရပ်ရေးစတင်ချိန်မှစ၍ အစ္စရေး၏ ဗုံးကြဲမှုများကြောင့် လက်ဘနွန်တွင် လူပေါင်း ၃၀၀ ကျော် သေဆုံးခဲ့ရာ၊ ယင်းလုပ်ရပ်သည် အပစ်ရပ်မှုကို ချိုးဖောက်ခြင်းဖြစ်သဖြင့် တုံ့ပြန်ရခြင်းဖြစ်ကြောင်း ဟစ်ဇ်ဘိုလာဘက်က ဆိုသည်။   အခြားတစ်ဖက်တွင်လည်း ကူဝိတ်နိုင်ငံက ၎င်းတို့၏ အရေးကြီးအခြေခံအဆောက်အအုံများကို အီရန်က ဒရုန်းများဖြင့် တိုက်ခိုက်ခဲ့သည်ဟု စွပ်စွဲထားသော်လည်း အီရန်ဘက်ကမူ ယင်းစွပ်စွဲချက်ကို ငြင်းဆိုထားသည်။   #လက်ဘနွန်စစ်ပွဲ #အပစ်ခတ်ရပ်စဲရေး #အီရန်စစ်ပွဲ #အရှေ့အလယ်ပိုင်းစစ်ပွဲ #ဟစ်ဇ်ဘိုလာ #အမေရိကန်ဒုသမ္မတဂျေဒီဗန့်စ် #JDVance

လက်ဘနွန်စစ်မျက်နှာက အပစ်အခတ်ရပ်စဲရေးကို ခြိမ်းခြောက်နေ

လက်ဘနွန်စစ်မျက်နှာက အပစ်အခတ်ရပ်စဲရေးကို ခြိမ်းခြောက်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၀ ရက်။  အစ္စရေးနှင့် အီရန်အကြား တင်းမာ…

  • April 10, 2026
စီမံခန့်ခွဲမှု အလွဲကြောင့် ယာဉ်ပိုင်ရှင်များ သတ်မှတ် ဆီ ပမာဏ မဝယ်ယူနိုင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၉ ရက်။   ဧရာဝတီတိုင်းဒေသကြီး၊ ပုသိမ်မြို့တွင် QR စနစ်ဖြင့် စက်သုံးဆီရောင်းချမှု တစ်ပတ်နီးပါးကြာမြင့်လာပြီ ဖြစ်သော်လည်း စီမံခန့်ခွဲမှုအလွဲများကြောင့် အဆင်မပြေသေးဘဲ အခက်ကြုံနေရဆဲသည်ဟု မြို့ခံများက ပြောသည်။   ပုသိမ်မြို့တွင် စက်သုံးဆီအရောင်းဆိုင်များ၌ QR Code စနစ်ဖြင့် စတင်ရောင်းချခဲ့သည့် ၆ ရက်တာကာလ အတွင်း စီမံခန့်ခွဲမှု အလွဲအချော်များနှင့် နည်းပညာပိုင်းဆိုင်ရာ အားနည်းချက်များကြောင့် ဒေသခံယာဉ်မောင်း များနှင့် အခြေခံလူတန်းစားများ အလုပ်ပျက်အကိုင်ပျက်ဖြစ်ကာ အခက်ကြုံနေကြရသည်။   ပုသိမ်မြို့တွင် ဧပြီလ ၄ ရက်နေ့မှစတင်ကာ ယာဉ်အမျိုးအစားအလိုက် တစ်ပတ်စာ လီတာခွဲတမ်းသတ်မှတ်၍ QR Code စနစ်ဖြင့် ရောင်းချပေးနေခြင်း ဖြစ်သော်လည်း လက်တွေ့မြေပြင်တွင် ဆီတိုင်ကီဆန့်ပမာဏနှင့် သတ်မှတ်ခွဲတမ်း ကိုက်ညီမှုမရှိခြင်းကြောင့် ပြည်သူများ နစ်နာမှုများရှိနေသည်။   အသက် ၄၀ ကျော်အရွယ် အိုးဝေယာဉ်မောင်းတစ်ဦးက “တစ်ပတ်ကို ၂၅ လီတာ သတ်မှတ်တယ် ဝယ်လို့ရ မယ်ပေါ့။ ဒါပေမဲ့ ကျနော်တို့ တိုင်ကီက ၆ လီတာ၊ ၆ လီတာခွဲလောက်ပဲ ဆန့်တာ။ ၃ ခါထုတ်မှ အများဆုံး ၁၉ လီတာပဲ ရတယ်။ ကျန်တဲ့ ၆ လီတာက ဆိုင်မှာ မထုတ်ရဘဲနဲ့ ဆုံးသွားပြီ။ အဲဒီတော့ သုံးဖို့က မလုံလောက်တော့ ဘူး” ဟု ပြောသည်။   အလားတူ ဆိုင်ကယ်များအတွက်လည်း တစ်ပတ်လျှင် ၈ လီတာဖြင့် ၂ ကြိမ် ခွဲယူရန် ခွင့်ပြုထားသော်လည်း အများစုစီးနင်းသည့် ဆိုင်ကယ်တိုင်ကီငယ်များမှာ ခွဲတမ်းပါပမာဏကို တစ်ကြိမ်တည်းနှင့် အပြည့်မဆန့်ခြင်း ကြောင့် ခွဲတမ်းအချို့ ဆုံးရှုံးနေရသည်ဟု ဆိုကြသည်။   ဆိုင်ကယ်တက္ကစီသမားတစ်ဦးက “PCX တို့ ဗိုက်ပူတို့ကတော့ ၄ လီတာဆန့်တယ်၊ အဲဒါက လူနည်းစုပဲရှိတာ။ အများစုက တိုင်ကီသေးတွေဆိုတော့ တစ်ပတ်ကို ၂ လီတာလောက်စီ ဆုံးရှုံးနေရတယ်။ အဲဒီဆီတွေက မှောင်ခို ဈေးကွက်ထဲ ရောက်ကုန်ပြီး တိုင်စီသမားတွေက ဈေးကြီးပေး ပြန်ဝယ်နေရတာပေါ့” ဟု ပြောသည်။   လက်ရှိတွင် QR စနစ်ကြောင့် ဆီရရှိရန် နေပူအောက်တွင် ၃ နာရီမှ ၄ နာရီအထိ အချိန်ပေး တန်းစီနေရပြီး စုံ/မ ရက်ခွဲခြားမှုများကြောင့်လည်း စားဝတ်နေရေးအတွက် ပြေးလွှားနေရသည့် ယာဉ်မောင်းများမှာ အချိန်ကုန် လူပန်းဖြစ်နေကြရသည်။   ကုန်ကားယာဉ်မောင်းတစ်ဦးကလည်း “တစ်ပတ်မှ လီတာ ၁၅၀ ပဲရတာ၊ အဲဒါကို တစ်နာရီလောက် တန်းစီပြီး ထုတ်ရတာတောင် ၅၀ လီတာပဲ ရမယ်တဲ့။ နောက်တစ်ကြိမ်ကျမှ ဆီနည်းလို့ မပေးနိုင်ဘူးဆိုရင် ကျနော်တို့ပဲ ဆုံးရှုံးဦးမယ်။ စိတ်ညစ်ဖို့ အတော်ကောင်းတယ်၊ ဘယ်လိုမှ အဆင်မပြေပါဘူး” ဟု ပြောသည်။   ထို့ပြင် လိုင်စင်ရှိသော်လည်း QR Scan ဖတ်၍မရသည့် ယာဉ်အသစ်ပိုင်ရှင်များမှာ ပြင်ပမှောင်ခိုဈေးကွက်တွင် စက်သုံးဆီတစ်လီတာလျှင် ကျပ် ၁၂,၀၀၀ မှ ၁၅,၀၀၀ ခန့်အထိ ပေးဆောင်ဝယ်ယူနေရကြောင်း ဆိုသည်။   စက်သုံးဆီဆိုင် တာဝန်ရှိသူအချို့ကမူ ဆိုင်ကယ်နှင့် အိုးဝေများကို သတ်မှတ်ရက်အတိုင်းသာ ထုတ်ပေးမည်ဖြစ် ပြီး တိုင်ကီနှင့်မဆန့်ပါက ပုံးများဖြင့် ထုတ်ပေးမည်မဟုတ်ဘဲ လက်ကျန်ခွဲတမ်းကို ကုန်ဆုံးသည်ဟုသာ သတ်မှတ်မည်ဖြစ်ကြောင်း ပြောဆိုထားသည်။     ဧရာဝတီတိုင်းအတွင်းရှိ စိုက်ပျိုးရေးလုပ်ကိုင်သည့် လယ်သမားများနှင့် ကမ်းရိုတန်း ငါးဖမ်းလုပ်ငန်းရှင်များမှာ လည်း ဆီဆိုင်ကြီးများတွင် ဆီဝယ်ယူ၍ မရနိုင်တော့ဘဲ ဖြစ်နေသည်။   ထို့ကြောင့် ပြင်ပမှောင်ခိုဈေးကွက်တွင် အဆမတန် မြင့်တက်နေသည့် ဈေးနှုန်းများဖြင့် ဝယ်ယူနေရသဖြင့် လုပ်ငန်းများ ဆက်လက်လုပ်ကိုင်ရန် အခက်အခဲများနှင့် ကြုံတွေ့နေရသည်။   ယခုကဲ့သို့ ဧပြီလအတွင်း အပူရှိန်မြင့်တက်မှုနှင့်အတူ စက်သုံးဆီ အကျပ်အတည်းပါ ပေါင်းစပ်လာခြင်းကြောင့် ဒေသတွင်း ကုန်စည်စီးဆင်းမှုအပေါ်ပါ ထိခိုက်မှုများ ရှိလာနိုင်ကြောင်း စိုးရိမ်မှုများ မြင့်တက်နေကြသည်။   #စက်သုံးဆီပြတ်လပ်မှု #ပုသိမ်မြို့ #ဧရာဝတီတိုင်း  

စီမံခန့်ခွဲမှု အလွဲကြောင့် ယာဉ်ပိုင်ရှင်များ သတ်မှတ် ဆီ ပမာဏ မဝယ်ယူနိုင်

စီမံခန့်ခွဲမှု အလွဲကြောင့် ယာဉ်ပိုင်ရှင်များ သတ်မှတ် ဆီ ပမာဏ မဝယ်ယူနိုင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၉ ရက်။  ဧရာဝတီတိုင်းဒ…

  • April 9, 2026
အိန္ဒိယ- နာဂ နယ်စပ်ဖြတ်ကျော်ခွင့် ပိတ်ထားသဖြင့် စားသောက်ကုန်နှင့် စက်သုံးဆီ ပြတ်လပ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၉ ရက်။   အိန္ဒိယ - မြန်မာနယ်စပ် ခြံစည်းရိုးကာရံရေး လုံခြုံရေးယူနေသည့် အိန္ဒိယတပ်ဖွဲ့ဝင်များ တိုက်ခိုက်ခံရပြီးနောက်  နယ်စပ်ဂိတ်များ အားလုံး ပိတ်ထားလိုက်သဖြင့် မြန်မာဘက်ခြမ်းရှိ နာဂဒေသခံများမှာ စားသောက်ကုန်နှင့် စက်သုံးဆီ ပြတ်လပ်မှုဒဏ်ကို ရင်ဆိုင်နေကြရသည်။   ပြီးခဲ့သည့် မတ်လ ၂၅ ရက်နေ့က စစ်ကိုင်းတိုင်း၊ နန်းယွန်းမြို့နယ် ပန်ဆောင်လမ်းပိုင်းအနီး ခြံစည်းရိုးခတ်ရန် လုံခြုံရေးယူပေးနေသည့် အာသံရိုင်ဖယ် (Assam Rifles) တပ်ဖွဲ့ဝင်များကို နာဂလက်နက်ကိုင်အဖွဲ့ (NSCN-K/YA) က တိုက်ခိုက်ခဲ့ခြင်းဖြစ်သည်။   အဆိုပါဖြစ်စဉ်နောက်ပိုင်း နယ်စပ်တစ်လျှောက် လုံခြုံရေးတိုးမြှင့်ကာ နယ်စပ်ဖြတ်ကျော် သွားလာခွင့်များကို အိန္ဒိယဘက်က ပိတ်ပင်ထားခြင်းဖြစ်သည်။   နန်းယွန်းဒေသခံ အမျိုးသားတစ်ဦးက “အခုက ဒီနယ်စပ်တစ်လျှောက် လုံးဝအကုန်လုံး သူတို့ ပိတ်ချထား လိုက်တာ။ ပိတ်ချထားလိုက်တော့ အခုက ဒီဟိုဘက်ဒီဘက်ကို ကူးလူးတာက လုံးဝအခုလောလောဆယ် ရပ်သွားတာပေါ့နော်။ ပြီးတော့ သူတို့ ခြံစည်းရိုးခတ်တဲ့ ဟာကလည်း လောလောဆယ်မှာတော့ ခဏလေး နားထားတဲ့ သဘောမျိုးရှိတယ်” ဟု လက်ရှိအခြေအနေကို ပြောသည်။   နာဂဒေသခံများသည် အိန္ဒိယဘက်မှ တင်သွင်းသည့် ကုန်စည်များကို အဓိကအားထားနေရသူများ ဖြစ်သဖြင့် ယခုကဲ့သို့ ဂိတ်များပိတ်ထားခြင်းက ဒေသတွင်း ကုန်ဈေးနှုန်းကို အဆမတန် မြင့်တက်စေခဲ့သည်။   “နဂိုကတော့ ဒီဘက်က လိုအပ်တဲ့ ကုန်စည်တွေဆိုရင်လည်း ဟိုဘက်ကနေပြီးတော့ သွင်းတာတွေ အများကြီး ရှိတယ်။ ဆီတို့၊ ပြီးတော့ စားသောက်ကုန်တွေကအစ ပေါ့နော်၊ ဟိုဘက်ကနေ သွားဝယ်ကြတယ်။ အခုလော လောဆယ်မှာတော့ အဲ့လိုမျိုး ဝယ်လို့မရတော့ဘူးပေါ့နော်။ သွားလာလို့ မရတော့ဘူးဆိုတော့ ကုန်စည်နှုန်းတွေ ကတော့ နဂိုထက်တော့ တက်လာတာပေါ့” ဟု အဆိုပါဒေသခံက ဆက်ရှင်းပြသည်။   လက်ရှိတွင် အိန္ဒိယဘက်မှ ကုန်စည်များ ဝယ်ယူ၍ မရတော့သည့်အတွက် ဒေသခံအချို့မှာ လမ်းပန်းဆက်သွယ် ရေး ခက်ခဲလှသည့် ကချင်ပြည်ထိ သွားရောက်ကာ ကုန်စည်များကို ခက်ခဲစွာ သယ်ယူနေကြရသည်။   အိန္ဒိယအစိုးရသည် နယ်စပ်လုံခြုံရေးအကြောင်းပြကာ နှစ်ပေါင်း ၅၀ ကြာ ကျင့်သုံးခဲ့သည့် လွတ်လပ်စွာ သွားလာခွင့် (Free Movement Regime - FMR) ကို ရပ်ဆိုင်းပြီး နယ်စပ်တစ်လျှောက် မိုင်ပေါင်း ၁,၀၀၀ ကျော် (၁,၆၄၃ ကီလိုမီတာ) ကို ခြံစည်းရိုးခတ်ရန် စီစဉ်နေခြင်းဖြစ်သည်။   အဆိုပါ လုပ်ရပ်သည် နယ်စပ်နှစ်ဖက်ရှိ နာဂမိသားစုများ၏ လူမှုစီးပွားနှင့် ယဉ်ကျေးမှု ဆက်နွှယ် မှုများကို ဖြတ်တောက်လိုက်ခြင်းဖြစ်သည်ဟုဆိုကာ နာဂအဖွဲ့အစည်းများက ကန့်ကွက်နေကြသည်။   လက်ရှိတွင် နန်းယွန်းမြို့နယ်အတွင်းရှိ နယ်စပ်ကျောက်တိုင် အမှတ် ၁၇၂ နှင့် ၁၇၃ ကြားတွင် ခြံစည်းရိုးကာရံမှု တစ်မိုင်ကျော် ပြီးစီးနေပြီဖြစ်သော်လည်း ယခုတိုက်ခိုက်မှုများကြောင့် လုပ်ငန်းများ ခေတ္တရပ်နားထားခြင်း ဖြစ်သည်။   ပိတ်ထားသည့် နယ်စပ်ဂိတ်များ ပြန်ဖွင့်မည့်ရက်ကို မသိရသေးသဖြင့် ရှေ့လာမည့်ရက်များတွင် နာဂဒေသ၌ လူသားချင်းစာနာမှုဆိုင်ရာ အခက်အခဲများ ပိုမိုကြီးထွားလာနိုင်ကြောင်း ဒေသတွင်းသတင်းရင်းမြစ်များက ပြောသည်။ #အိန္ဒိယမြန်မာနယ်စပ် #နာဂဒေသ #ကုန်စည်စီးဆင်းမှု #နယ်စပ်ဖြတ်ကျော်ခွင့် #စက်သုံးဆီပြတ်လပ်    

အိန္ဒိယ- နာဂ နယ်စပ်ဖြတ်ကျော်ခွင့် ပိတ်ထားသဖြင့် စားသောက်ကုန်နှင့် စက်သုံးဆီ ပြတ်လပ်

အိန္ဒိယ- နာဂ နယ်စပ်ဖြတ်ကျော်ခွင့် ပိတ်ထားသဖြင့် စားသောက်ကုန်နှင့် စက်သုံးဆီ ပြတ်လပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၉ ရက်။  အိ…

  • April 9, 2026
ရွေးကောက်ပွဲမှာ စစ်အာဏာရှင် သက်ဆိုးရှည်စေမည့် နိုင်ငံရေး ထောင်ချောက်ဟု BNI ပြော   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၉ ရက်။   စစ်ကော်မရှင်က ကျင်းပခဲ့သည့် ၂၀၂၅ ခုနှစ် အတုအယောင် ရွေးကောက်ပွဲသည် တိုင်းရင်းသားပြည်သူများ၏ ကိုယ်စားပြုမှုကို လုံးဝဖော်ဆောင်နိုင်ခြင်းမရှိဘဲ ‘စစ်အာဏာရှင် သက်ဆိုးရှည်စေရန် အကွက်ကျစီစဉ်ထားသည့် နိုင်ငံရေးထောင်ချောက်’ ဖြစ်သည်ဟု နိုင်ငံတကာ မြန်မာ့သတင်း (BNI) က ဝေဖန်ထောက်ပြလိုက်သည်။   ဧပြီလ ၆ ရက်နေ့က ထုတ်ပြန်သည့် “ရွေးချယ်ခွင့်မဲ့ မဲဆန္ဒရှင်များ- မြန်မာနိုင်ငံရှိ တိုင်းရင်းသားဒေသများရှိ ရွေးကောက်ပွဲဆိုင်ရာ ဖြစ်ရပ်များ ဆန်းစစ်ခြင်း” အစီရင်ခံစာ မိတ်ဆက်ပွဲတွင် BNI က ယခုကဲ့သို့ ပြောကြား ခဲ့ခြင်း ဖြစ်သည်။   အဆိုပါ အစီရင်ခံစာအရ စစ်ပဋိပက္ခများကြောင့် နေရပ်စွန့်ခွာရသူ (IDP) များပြားခြင်းနှင့် စစ်အုပ်ချုပ်ရေး နယ်မြေအချို့တွင် မဲဆန္ဒနယ်များ ပယ်ဖျက်ခံရခြင်းတို့ကြောင့် ချင်း၊ ကချင်၊ ရှမ်း၊ ကရင်နီ၊ မွန်နှင့် ကရင်ပြည်တို့ရှိ မြို့နယ်အများစုတွင် မဲပေးမှုနှုန်းမှာ ၁၀ ရာခိုင်နှုန်းမှ ၂၀ ရာခိုင်နှုန်းဝန်းကျင်သာ ရှိခဲ့သည်။   BNI ၏ မူဝါဒရေးရာ ကော်မတီ ဥက္ကဋ္ဌ ဦးကိုကိုဇော်က “ပြည်ထောင်စု ရွေးကောက်ပွဲကော်မရှင်ရဲ့ သတ်မှတ် ထားတဲ့ ဥပဒေတွေက ယှဉ်ပြိုင်တဲ့ ပါတီတွေအတွက် အားလုံး ဒုက္ခရောက်စေအောင် ဘာမှလုပ်လို့မရနိုင်အောင် လုပ်ခဲ့တဲ့ အခြေအနေမျိုးတွေ ရှိပါတယ်။ တိုင်းရင်းသား ပြည်သူ အကုန်လုံးကိုလည်း ရွေးကောက်ပွဲ နှောင့် ယှက်ဖျက်စီး ဟန့်တားသူများ ဥပဒေတွေနဲ့ ဖမ်းဆီး ထောင်ချခဲ့တာလည်း ၄၀၀ ကျော်လောက် ရှိမယ်” ဟု ရွေးကောက်ပွဲကာလအတွင်း ဖိနှိပ်မှုများကို ပြောသည်။     ထို့ပြင် ၎င်းက ဆက်လက်၍ “ညသန်းခေါင်မှာ ဘယ်က ရောက်လာမှန်းမသိတဲ့ မဲတွေနဲ့ အနိုင်ရသွားတဲ့ ဖြစ်ရပ် ဆန်းတွေ အများကြီး တိုင်းရင်းသား ဒေသတွေမှာ ဖြစ်ပေါ်ခဲ့တာ ရှိပါတယ်” ဟုလည်း ဆိုသည်။   ၂၀၂၅ ခုနှစ် ရွေးကောက်ပွဲသည် တိုင်းရင်းသားပြည်သူများ၏ ကိုယ်စားပြုမှုကို လုံးဝဖော်ဆောင်နိုင်ခြင်းမရှိဘဲ၊ စစ်အာဏာရှင်စနစ် သက်ဆိုးရှည်စေရန် အကွက်ချစီစဉ်ထားသည့် လုပ်ငန်းစဉ်သာဖြစ်ကြောင်း နိုင်ငံတကာ မြန်မာ့သတင်း (BNI) က ထောက်ပြသည်။   BNI ၏ ထုတ်ပြန်ချက်အရ လူထုထောက်ခံမှုအများဆုံးရရှိထားသည့် NLD၊ SNLD၊ ALD ပါတီများကို စနစ်တကျဖယ်ထုတ်ကာ အတိုက်အခံအမတ် ၁၄၀ ကျော်ကို ဖမ်းဆီးနှိပ်ကွပ်ပြီးမှသာ ယခုရွေးကောက်ပွဲကို အပိုင်းလိုက် ကျင်းပခဲ့ခြင်းဖြစ်သည်။   BNI မီဒီယာ ဖွံ့ဖြိုးရေးကော်မတီဥက္ကဋ္ဌ မအားမီက “မဲဆန္ဒနယ် ၃၁ ခုမှာ ကိုယ်စားလှယ်တစ်ဦးတည်းက ကြိုတင် မဲတွေနဲ့ အနိုင်ရသွားတဲ့ အချက်အလက်တွေ ရှိပါတယ်။ အဲဒီထဲမှာ USDP က ၂၈ နေရာ (၉၀ ရာခိုင်နှုန်းကျော်) အနိုင်ရခဲ့တာဟာ မဲဆန္ဒရှင်တွေရဲ့ ရွေးချယ်ခွင့်ကို ပိတ်ပင်ပြီး USDP အတွက် အမတ်နေရာတွေ အသာစီးရဖို့ ဖန်တီးပေးထားတဲ့ ရုပ်ပြပွဲတစ်ခုပါပဲ” ဟု ပြောသည်။   ထို့ပြင် ယခင်ရွေးကောက်ပွဲ၌ မဲပေးနိုင်သူ ၃၈ သန်းခန့်ရှိခဲ့သော်လည်း ယခုအခါ ၂၄ သန်းသာ ကျန်ရှိတော့သဖြင့် ပြည်သူ ၁၃ သန်းကျော် မဲပေးခွင့်ဆုံးရှုံးခဲ့ရသည်။ ထိုသို့ ဖြစ်ရခြင်းမှာ စစ်ပဋိပက္ခကြောင့် အိုးမဲ့အိမ်မဲ့ဖြစ်ရခြင်း နှင့် တိုင်းရင်းသားဒေသများတွင် ရည်ရွယ်ချက်ရှိရှိ မဲပေးခွင့်ဖယ်ကြဉ်ခံရခြင်းတို့ကြောင့် ဖြစ်သည်ဟု BNI က ထောက်ပြထားသည်။   နေပြည်တော်နှင့် မြို့ကြီးအချို့တွင် မဲပေးမှုနှုန်း မြင့်မားသည်ဟု စစ်ကော်မရှင်က ထုတ်ပြန်သော်လည်း ယင်းမှာ နိုင်ငံ့ဝန်ထမ်းများနှင့် စစ်ဘက်မိသားစုဝင်များ၏ ကြိုတင်မဲယန္တရားကို အသုံးချထားခြင်းသာ ဖြစ်ကြောင်း အစီရင်ခံစာက ဆိုသည်။   ဒီမိုကရေစီစံနှုန်းများ၏ အနိမ့်ဆုံးလိုအပ်ချက်ကိုပင် မပြည့် မီဘဲ၊ အရပ်သား အစိုးရအမည်ခံကာ စစ်အာဏာ သိမ်းမှုကို ‘ဆေးရောင်ခြယ်ခြင်း’ သာဖြစ်ကြောင်း နိုင်ငံတကာ မြန်မာ့သတင်း (BNI) က ပြောသည်။   BNI ၏ မန်နေဂျင်းဒါရိုက်တာ မတင်တင်ညိုကလည်း “၁၃ သန်းသော ပြည်သူလူထုတွေက မဲပေးခွင့်မရှိခဲ့တဲ့ အခြေအနေတွေ ဒါတွေအကုန်လုံးကို ကြည့်လိုက်မယ်ဆိုရင်တော့ ဒီလိုအနေအထားပေါ်မှာ ဖြစ်လာမယ့် ရွေးကောက်ပွဲဟာ အတုအယောင် ဖြစ်တယ်။ လူထုကို ကိုယ်စားမပြုဘူး” ဟု ထောက်ပြသည်။   အမျိုးသားဒီမိုကရေစီ အဖွဲ့ချုပ် (NLD) အပါအဝင် အတိုက်အခံပါတီပေါင်း ၄၀ ကို ဖျက်သိမ်းခဲ့ခြင်းနှင့် တင်းကျပ်သော စည်းမျဉ်းများဖြင့် အရပ်သားအစိုးရ အမည်ခံရန် ကြိုးပမ်းခြင်းတို့အပေါ် BNI က ဝေဖန်ထား သည်။   ထို့ကြောင့် နိုင်ငံတကာအနေဖြင့် ဤရွေးကောက်ပွဲရလဒ်များကို အခြေမခံဘဲ၊ မြေပြင်ရှိ ပကတိအခြေအနေ မှန်ကိုသာ ဗဟိုပြု၍ မြန်မာ့အရေးကို ချဉ်းကပ်ဆောင်ရွက်သင့်ကြောင်း တိုက်တွန်းထားသည်။   ဓါတ်ပုံ - MOFA   #ရွေးကောက်ပွဲ #စစ်အာဏာရှင် #BNI #ထောင်ချောက် #အတုအယောင်အစိုးရ #စစ်အစိုးရ

ရွေးကောက်ပွဲမှာ စစ်အာဏာရှင် သက်ဆိုးရှည်စေမည့် နိုင်ငံရေး ထောင်ချောက်ဟု BNI ပြော

ရွေးကောက်ပွဲမှာ စစ်အာဏာရှင် သက်ဆိုးရှည်စေမည့် နိုင်ငံရေး ထောင်ချောက်ဟု BNI ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၉ ရက်။  စစ်ကော…

  • April 9, 2026
 အိန္ဒိယ ဒရုန်းကြောင့် ကလေးငယ် တစ်ဦး အပါအဝင် နာဂ ဒေသခံ ၂ ဦး ဒဏ်ရာရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၉ ရက်။    အိန္ဒိယစစ်တပ်က နာဂကိုယ်ပိုင်အုပ်ချုပ်ခွင့်ရဒေသ အတွင်းသို့ နယ်စပ်ဖြတ်ကျော်ကာ ဒရုန်းဖြင့် ဗုံးကြဲတိုက်ခိုက် ခဲ့ခြင်းကြောင့် ကလေးငယ်တစ်ဦး အပါအဝင် ဒေသခံနှစ်ဦး ထိခိုက်ဒဏ်ရာရရှိခဲ့သည်။   စစ်ကိုင်းတိုင်း၊ လဟယ်မြို့နယ်ရှိ ခမ္မိုင်လောရီ (ခေါ်) ကာမွေလောရီကျေးရွာရှိ လူနေအိမ်များကို ပစ်မှတ်ထားကာ အိန္ဒိယဗဟိုအစိုးရ၏ အာသံရိုင်ဖယ် (Assam Rifles) တပ်ဖွဲ့က ပြီးခဲ့သည့် ဧပြီလ ၆ ရက်နေ့၊ နံနက် ၂ နာရီခန့်တွင် ဒရုန်းဖြင့် ဗုံးသီး ၂ လုံး ကြဲချတိုက်ခိုက်ခဲ့ခြင်းဖြစ်သည်။   အဆိုပါ တိုက်ခိုက်မှုကြောင့် နေအိမ်အတွင်း အိပ်ပျော်နေသည့် အဘိုးဖြစ်သူနှင့် မြေးဖြစ်သူတို့မှာ ထိခိုက်ဒဏ်ရာ များ ရရှိခဲ့ပြီး နေအိမ်အချို့ ပျက်စီးခဲ့ရသည်။   ဒေသခံတစ်ဦးက “နယ်စပ်ဒေသမှာ နေထိုင်သူတွေအတွက်ကတော့ ဘယ်သူ့ကိုမှ အားကိုးစရာ မရှိတော့ပါဘူး။ အခုလို ဗုံးလာကြဲတာတွေကို ဘယ်အဖွဲ့အစည်းကမှ အကာအကွယ် မပေးနိုင်သလို ဖြစ်နေတယ်” ဟု ပြော သည်။   အဆိုပါ ကျေးရွာသည် နယ်စပ်မျဉ်းမှ မြန်မာနိုင်ငံအတွင်းသို့ ၉ ကီလိုမီတာမှ ၁၅ ကီလိုမီတာအထိ အကွာအဝေး တွင် တည်ရှိနေသော်လည်း အိန္ဒိယစစ်တပ်က နယ်စပ်ဖြတ်ကျော် တိုက်ခိုက်လာခြင်းဖြစ်သည်။     ထိုလုပ်ရပ်အပေါ် ဒေသခံပြည်သူများက ကန့်ကွက်ခဲ့ကြပြီး အရပ်သားများအား ပစ်မှတ်ထားနေမှုကို ချက်ချင်း ရပ်တန့်ရန်နှင့် တရားမျှတမှုရရှိရန် တောင်းဆိုခဲ့ကြသည်။   အိန္ဒိယစစ်တပ်၏ ယခုကဲ့သို့ ကျေးရွာများအပေါ် တိုက်ခိုက်မှုများကို ကန့်ကွက်ကြောင်းနှင့် ဒေသတည်ငြိမ် အေးချမ်းရေးကိုသာ လိုလားကြောင်း ဒေသခံများက စုပေါင်းဆန္ဒဖော်ထုတ်ခဲ့ကြသည်ဟု Naga News တွင် ဧပြီလ ၇ ရက်နေ့က သတင်းဖော်ပြထားသည်။   ယခုတိုက်ခိုက်မှုသည် ပြီးခဲ့သည့် မတ်လ ၂၆ ရက်နေ့က ပန်ဆောင်မြို့နယ်စပ်တွင် အိန္ဒိယဘက်က နယ်စပ်ခြံစည်း ရိုး ကာရံ နေမှုကို ဒေသခံများက ကန့်ကွက်ရာမှ နာဂလက်နက်ကိုင်တပ် (NSCN-K YA) နှင့် အိန္ဒိယစစ်တပ်တို့ အကြား တိုက်ပွဲဖြစ်ပွားခဲ့ခြင်း၏ နောက်ဆက်တွဲ ကျူးကျော်မှုဖြစ်နိုင်သည်ဟု ဒေသခံများက ယူဆနေကြသည်။   အိန္ဒိယစစ်တပ်သည် ၂၀၂၅ ခုနှစ် အောက်တိုဘာလကလည်း လဟယ်မြို့နယ်အတွင်း ဗုံးကြဲခဲ့သဖြင့် အရပ်သား ၂ ဦး သေဆုံးခဲ့ရပြီး၊ ယခု ၂၀၂၆ ခုနှစ်အတွင်း၌လည်း ဒရုန်းဖြင့် ဗုံးကြဲတိုက်ခိုက်မှုပေါင်း ၄ ကြိမ်အထိ ရှိလာခဲ့ပြီ ဖြစ်သည်ဟု ဒေသခံများက ပြောသည်။   ဒီမိုကရေစီနိုင်ငံကြီးဖြစ်သော အိန္ဒိယအနေဖြင့် နိုင်ငံတကာစံနှုန်းနှင့် ကျင့်ဝတ်များကို ကျော်လွန်ကာ မြန်မာနိုင်ငံ ၏ အားနည်းချက်အပေါ် အခွင့်ကောင်းယူ၍ နယ်စပ်ဖြတ်ကျော် တိုက်ခိုက်နေခြင်းဖြစ်သည်ဟုလည်း ဆိုကြ သည်။   လက်ရှိတွင် အိန္ဒိယစစ်တပ်၏ နယ်စပ်ဖြတ်ကျော် တိုက်ခိုက်မှုများကြောင့် ဒေသခံများမှာ စိုးရိမ်ထိတ်လန့်နေ ကြရသည့်အပြင်၊ နယ်စပ်ဂိတ်များ ပိတ်ထားခြင်းကြောင့်လည်း စားဝတ်နေရေး အခက်အခဲများနှင့်ပါ ရင်ဆိုင်နေ ကြရသည်။   နန်းယွန်းဒေသခံ နာဂ အမျိုးသားတစ်ဦးကလည်း “အခုက နယ်စပ်တစ်လျှောက် လုံးဝပိတ်ထားတော့ ဟိုဘက်ဒီ ဘက် ကူးလူးတာတွေ ရပ်သွားပြီ။ အရင်က လိုအပ်တဲ့ စက်သုံးဆီနဲ့ စားသောက်ကုန်တွေကို အိန္ဒိယဘက်ကနေ သွင်းနေရတာ၊ အခု ဝယ်လို့မရတော့ဘူးဆိုတော့ ကုန်ဈေးနှုန်းတွေကလည်း နဂိုထက် အများကြီး တက်လာတာ ပေါ့” ဟု လက်ရှိအခြေအနေကို ရှင်းပြသည်။   အထူးသဖြင့် အိန္ဒိယဘက်မှ အဓိကတင်သွင်းနေရသည့် စက်သုံးဆီနှင့် အခြေခံစားသောက်ကုန်များ ပြတ်လပ် ခြင်း၊ ကုန်ဈေးနှုန်း အဆမတန် မြင့်တက်ခြင်းတို့ကြောင့် ဒေသခံများမှာ လမ်းပန်းဆက်သွယ်ရေးခက်ခဲသည့် မြစ်ကြီးနားမြို့အထိ သွားရောက်ကာ ကုန်စည်များကို သယ်ယူနေကြရသည်။   အိန္ဒိယအစိုးရက နယ်စပ်တစ်လျှောက် မိုင်ပေါင်း ၁,၀၀၀ ကျော်ကို ခြံစည်းရိုးကာရံရန် စီစဉ်နေခြင်းနှင့် လွတ်လပ် စွာသွားလာခွင့် (FMR) ကို ရပ်ဆိုင်းလိုက်ခြင်းတို့သည် နယ်စပ်နှစ်ဖက်ရှိ နာဂမိသားစုများအကြား လူမှုစီးပွားနှင့် ယဉ်ကျေးမှုဆိုင်ရာ ဆက်နွှယ်မှုများကိုပါ ဖြတ်တောက်လိုက်သကဲ့သို့ ဖြစ်နေသည်။   ယခုကဲ့သို့ နယ်စပ်ဒေသတွင် စစ်ရေးတင်းမာမှုများ ဆက်ရှိနေပါက နာဂဒေသခံများ၏ နေ့စဉ်ဘဝမှာ ပိုမို ကျပ်တည်းလာနိုင်သည်ဟု ဒေသတွင်း သတင်းရင်းမြစ်များက သုံးသပ်ထားကြသည်။   #အိန္ဒိယ #AssamRifles #အာသံရိုင်ဖယ် #အိန္ဒိယမြန်မာနယ်စပ် #နာဂကိုယ်ပိုင်အုပ်ချုပ်ခွင့်ရဒေသ  

 အိန္ဒိယ ဒရုန်းကြောင့် ကလေးငယ် တစ်ဦး အပါအဝင် နာဂ ဒေသခံ ၂ ဦး ဒဏ်ရာရ

 အိန္ဒိယ ဒရုန်းကြောင့် ကလေးငယ် တစ်ဦး အပါအဝင် နာဂ ဒေသခံ ၂ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၉ ရက်။   အိန္ဒိယစစ်တပ်…

  • April 9, 2026
ဖားကန့်တွင် စစ်တပ် ဗုံးကြဲမှုများ ဆက်ရှိနေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၉ ရက်။   ကချင်ပြည်၊ ဖားကန့်မြို့နယ်အတွင်းသို့ စစ်အစိုးရတပ်က အင်အားဖြည့်တင်းကာ စစ်ကြောင်းထိုး ဝင်ရောက်လာ ခြင်းနှင့်အတူ လေကြောင်းမှ ဗုံးကြဲတိုက်ခိုက်မှုများ ပြုလုပ်နေသဖြင့် တိုက်ပွဲများ အချိန်မရွေး ပြင်းထန်လာနိုင် ကြောင်း ကချင်လွတ်လပ်ရေးအဖွဲ့ (KIO/KIA) က ပြောသည်။   ယနေ့ ဧပြီလ ၉ ရက်၊ မွန်းလွဲ ၂ နာရီကျော်အချိန်တွင် ဖားကန့်မြို့နယ်၊ ဆွတ်ဘွမ် (ခေါ်) အမှိုက်ပုံကျေးရွာရှိ စစ်အစိုးရတပ်က ဂျက်ဖိုက်တာ (၂) စီးဖြင့် ဗုံးကြဲတိုက်ခိုက်ခဲ့ရာ နေအိမ်များ ထိမှန် ပျက်စီးခဲ့သည်။   အဆိုပါကျေးရွာသည် ဖားကန့်ဗျူဟာကုန်းနှင့် ကပ်လျက်တည်ရှိပြီး တိုက်ပွဲဖြစ်ပွားခြင်းမရှိဘဲ လေကြောင်းမှ ဗုံးကြဲခံရခြင်းဖြစ်ကြောင်း ဒေသခံများက ပြောသည်။   လက်ရှိစစ်ရေးအခြေအနေနှင့် ပတ်သက်၍ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက “တင်းမာတဲ့ အနေအထားတော့ ဖြစ်ပါတယ်။ ဟို စစ်ကောင်စီဖက်ကလည်း စစ်အင်အားတွေ ပြန်ပြီးမှ ထပ်ထိုးထားတာ တော့ ရှိတယ်။ မနေ့ကလည်း ဒီနမ့်ယာ၊ ကာမိုင်း နမ့်ယာဖက်က ပြည်သူစစ်တွေနဲ့ ပူးပေါင်းတပ်ဖွဲ့တွေ စစ် ကြောင်းတွေ ဝင်ပြီးမှ အင်အားတွေ ပြန်ထပ်ထိုးထားတာကတော့ ရှိပါတယ်” ဟု ပြောသည်။   ဖားကန့်မြို့နယ်အတွင်း ကြီးမားပြင်းထန်သည့် မြေပြင်တိုက်ပွဲများ မရှိသေးသော်လည်း စစ်အစိုးရတပ်၏ စစ်ကြောင်းထိုး ဝင်ရောက်မှုများနှင့် ဗျူဟာကုန်းအတွင်း အင်အားဖြည့်တင်းမှုများကြောင့် အခြေအနေမှာ ပိုမို စိုးရိမ်ဖွယ် ဖြစ်လာနေသည်။   ထို့ပြင် ဗန်းမော်နှင့် ဝိုင်းမော်မြို့နယ်များတွင်လည်း စစ်အစိုးရတပ်ဘက်မှ လက်နက်ကြီးနှင့် ဒရုနန်းများ အသုံးပြု က တိုက်ခိုက်နေကြောင်း ဗိုလ်မှူးကြီး နော်ဘူက ဆက်ပြောသည်။   ဗိုလ်မှူးကြီး နော်ဘူက “ဗန်းမော်မှာကတော့ ခါတိုင်းလိုပေါ့ စစ်ကောင်စီဖက်ကနေ ဒရုန်းနဲ့ ပစ်တာတွေ၊ လက် နက်ကြီးနဲ့ လှမ်းပစ်တာတွေတော့ရှိတယ်။ မြေပြင်တိုက်ပွဲတွေကတော့ သိပ်မရှိပါဘူး။ ခလရ ၄၇ တို့၊ သုံးမိုင်တို့ အဲဒီနေရာမှာတော့ သူတို့ ထိုးလာလို့ရှိရင်တော့ ခုခံတဲ့ တိုက်ပွဲငယ်လေးတွေတော့ ရှိပါတယ်” ဟု ပြောသည်။   ၎င်းက ဆက်လက်၍ “ဝိုင်းမော်ဖက်မှာလည်း မိုင်းနားနားက စံပြတောင်ဆိုတဲ့နေရာမှာ သူတို့ လက်နက်ကြီးတွေ ထိုင်ထားတယ်လို့ ပြောတယ်။ အဲဒီလက်နက်ကြီးနဲ့ တစ်ခါတစ်လေတော့ သူတို့ ပစ်တာပေါ့ လှမ်းပစ်တာပေါ့။ အဓိကကတော့ ဖားကန့်၊ ဝိုင်းမော်၊ ဗန်းမော်ဖက်မှာကတော့ တင်းမာတဲ့ အနေအထားဖြစ်ပါတယ်။ ပြီးမှ အင်းတော်ကြီးပေါ့ အဲဒီနေရာမှာကတော့ အချိန်မရွေးတိုက်ပွဲတွေ ဖြစ်နိုင်ချေရှိတဲ့ နေရာတွေ ဖြစ်ပါတယ်” ဟု ပြောသည်။   ပြီးခဲ့သည့် ဧပြီလ ၂ ရက်နေ့ကလည်း ဖားကန့်မြို့ပေါ်သို့ လက်နက်ကြီးကျည် ကျရောက်ပေါက်ကွဲမှုကြောင့် ကလေးငယ်များ အပါအဝင် အရပ်သား ၅ ဦး ဒဏ်ရာရရှိခဲ့သည့် ဖြစ်စဉ်များ ရှိခဲ့သည်။ ဖားကန့်ဒေသတွင် စစ်ပွဲပိုမိုကျယ်ပြန့်လာမည်ကိုလည်း ဒေသခံများ စိုးရိမ်နေကြသည်။   လက်ရှိတွင် အမှိုက်ပုံရွာ၊ မော်ဝမ်းကြီးရွာနှင့် ထုံးဖိုရွာဘက်အခြမ်းတို့၌ စစ်အစိုးရတပ်နှင့် တော်လှန်ရေး အင်အားစုများအကြား စစ်ရေးတင်းမာမှုများ မြင့်တက်လျက်ရှိကြောင်း ဒေသတွင်းသတင်းရင်းမြစ်များက ပြော သည်။   ဓါတ်ပုံ - ပုံဟောင်း (RFA)   #ဖားကန့်တိုက်ပွဲ #KIA #KIO #စစ်ကော်မရှင်  

ဖားကန့်တွင် စစ်တပ် ဗုံးကြဲမှုများ ဆက်ရှိနေ

ဖားကန့်တွင် စစ်တပ် ဗုံးကြဲမှုများ ဆက်ရှိနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၉ ရက်။  ကချင်ပြည်၊ ဖားကန့်မြို့နယ်အတွင်းသို့ စစ်အစိ…

  • April 9, 2026
အိမ်ထောင်မပြုသူတွေမှာ ကင်ဆာဖြစ်နိုင်ချေ ပိုများ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၉ ရက်။   ကင်ဆာ ရောဂါ ဖြစ်ပွားမှုနဲ့ ပတ်သက်လို့ သုတေသန မျိုးစုံ လုပ်ကြပါတယ်။   ဘာအစားအစာစားရင် ကင်ဆာ ဖြစ်သလဲ၊ ငရုတ်သီး၊ ကော်ဖီ၊ စက်ရုံထုတ် အစားအစာ၊ တွေစားရင် ကင်ဆာ ဖြစ်တတ်သလား၊ လေ့ကျင့်ခန်း လုပ်တဲ့သူနဲ့ မလုပ်တဲ့သူ ဘယ်သူ့မှာ ကင်ဆာ ပိုဖြစ်သလဲ။ ဆေးလိပ်သောက်တဲ့သူတွေမှာ ကင်ဆာပိုဖြစ်သလား စသဖြင့် လေ့လာမှု အမျိုးမျိုး လုပ်ခဲ့ကြပါတယ်။   အခု လုပ်ခဲ့တဲ့ လေ့လာမှု အသစ်ကတော့ အိမ်ထောင်ပြုမှုနဲ့ ကင်ဆာရောဂါ ဆက်စပ်တဲ့ လေ့လာမှု အသစ်ဖြစ်ပါတယ်၊။   အမေရိကန်ပြည်ထောင်စုရဲ့ ပြည်နယ် ၁၂ ခုက လူဦးရေ သန်း ၁၀၀ ကျော်ကို ၈ နှစ်ကြာ လေ့လာခဲ့တဲ့ သုတေသနအရ တစ်ခါမှ အိမ်ထောင်မပြုဖူးသူတွေဟာ အိမ်ထောင်ရှိသူ (သို့မဟုတ်) အိမ်ထောင်ကျဖူးသူတွေထက် ကင်ဆာဖြစ်နိုင်ခြေ ပိုများနေတာ ကို တွေ့ရှိခဲ့ရပါတယ်။   အိမ်ထောင်မပြုဖူးတဲ့ အမျိုးသားတွေဟာ အိမ်ထောင်ရှိသူတွေထက် ကင်ဆာဖြစ်နိုင်ခြေ ၇၀% ပိုများပါတယ်။   အိမ်ထောင်မပြုဖူးတဲ့ အမျိုးသမီးတွေမှာတော့ ၈၅% အထိ ပိုများနေတာကို တွေ့ရပါတယ်။   အထူးသဖြင့် အိမ်ထောင်မပြုဖူးတဲ့ အမျိုးသမီးတွေမှာ သားအိမ်ခေါင်းကင်ဆာ ဖြစ်ပွားမှုနှုန်းဟာ အိမ်ထောင်ရှိသူတွေထက် ၃ ဆနီးပါး ပိုများနေတာကို တွေ့ရှိရပါတယ်။   လက်မထပ်ထားတဲ့သူတွေမှာ ဘာကြောင့် ကင်ဆာဖြစ်နိုင်ခြေ ပိုများတာလဲ?   သုတေသနပညာရှင်တွေရဲ့ အဆိုအရ ဒါဟာ လက်ထပ်ခြင်း (Marriage) ဆိုတဲ့ အခမ်းအနားကြောင့် မဟုတ်ဘဲ နေထိုင်မှုပုံစံ (Lifestyle) ကြောင့် ဖြစ်တယ်လို့ ဆိုပါတယ်။ အဓိက အကြောင်းရင်း ၄ ချက် ရှိပါတယ်။   ၁။ နေထိုင်မှုအလေ့အထ (Health Behaviors):   အိမ်ထောင်မရှိသူတွေဟာ အိမ်ထောင်ရှိသူတွေထက် ဆေးလိပ်သောက်ခြင်း၊ အရက်သောက်ခြင်းနဲ့ ကျန်းမာရေးနဲ့ မညီညွတ်တဲ့ အစားအသောက်တွေကို စားသုံးမိခြင်း ပိုများတတ်ကြောင်း တွေ့ရပါတယ်။   ၂။ ရောဂါရှာဖွေစစ်ဆေးမှု (Cancer Screenings):   အိမ်ထောင်ရှိသူတွေမှာ အဖော်ဖြစ်သူက ကျန်းမာရေးစစ်ဆေးဖို့ တိုက်တွန်းတာ၊ သတိပေးတာမျိုးတွေ ရှိတတ်ပါတယ်။ ဥပမာ- အိမ်ထောင်ရှိတဲ့ အမျိုးသားတွေဟာ အိမ်ထောင်မရှိသူတွေထက် အူမကြီးမှန်ပြောင်းကြည့် စစ်ဆေးမှု (Colonoscopy) လုပ်ဖို့ ၂၀% ပိုများပါတယ်။ ဒါကြောင့် ရောဂါကို ကြိုတင်ကာကွယ်နိုင်ခြေ ပိုများတာပါ။   ၃။ လူမှုရေးအရ အထီးကျန်မှု (Social Isolation):   တစ်ယောက်တည်း နေထိုင်သူတွေဟာ လူမှုရေးအရ အထီးကျန်မှု ပိုခံစားရလေ့ရှိပြီး၊ ဒါဟာ ကင်ဆာဖြစ်နိုင်ခြေကို မြင့်တက်စေတဲ့ အချက်တစ်ချက် ဖြစ်နိုင်တယ်လို့ သုတေသနအချို့က ဆိုပါတယ်။   ၄။ ကူးစက်ရောဂါနှင့် လိင်ပိုင်းဆိုင်ရာ ဆက်ဆံမှု:   လက်မထပ်ထားသူတွေမှာ လိင်ဆက်ဆံဖော် ပိုများနိုင်တဲ့အတွက် ကူးစက်ရောဂါတွေကတစ်ဆင့် ဖြစ်ပွားတတ်တဲ့ ကင်ဆာရောဂါတွေ (ဥပမာ- သားအိမ်ခေါင်းကင်ဆာ) ဖြစ်နိုင်ခြေ ပိုများတာ ဖြစ်နိုင်ပါတယ်။   ဒီလိုဆိုရင် မေးစရာ ဖြစ်လာတာက လက်မထပ်ရင် ကင်ဆာဖြစ်တော့မှာလား။   အဖြေကတော့ "မဟုတ်ပါ"။ ဆရာဝန်တွေက အောက်ပါအချက်တွေကို အလေးပေး ပြောကြားထားပါတယ်-   • လက်ထပ်ခြင်းကသာ အဖြေမဟုတ်ပါ: ◦  ဒီသုတေသနမှာ "လက်မထပ်ထားသူ" လို့ သတ်မှတ်ထားတဲ့အထဲမှာ အတူတူနေထိုင်နေတဲ့ ချစ်သူတွေ၊ ရေရှည်လက်တွဲဖော်ရှိသူတွေလည်း ပါဝင်နေပါတယ်။ အကယ်၍ သင့်မှာ အိမ်ထောင်မရှိပေမယ့် မိသားစု၊ သူငယ်ချင်း ဒါမှမဟုတ် လူမှုပတ်ဝန်းကျင်နဲ့ ခိုင်မာတဲ့ ဆက်ဆံရေးရှိမယ်၊ အပြန်အလှန် ဂရုစိုက်ပေးမယ့်သူရှိမယ်ဆိုရင် အိမ်ထောင်ရှိသူတွေလိုပဲ ကာကွယ်မှုရနိုင်ပါတယ်။   • ကင်ဆာက ရှုပ်ထွေးတဲ့ရောဂါပါ: ◦ အိမ်ထောင်ရေး အခြေအနေတစ်ခုတည်းနဲ့ ကင်ဆာဖြစ်၊ မဖြစ် ဆုံးဖြတ်လို့ မရပါဘူး။ မျိုးရိုးဗီဇ၊ ပတ်ဝန်းကျင်နဲ့ မိမိရဲ့ ကိုယ်တိုင် နေထိုင်မှုပုံစံတွေက ပိုပြီး အရေးကြီးပါတယ်။   ကင်ဆာကြောက်လို့ ချစ်သူရှာစရာမလိုပါဘူး။ အဓိကကတော့ မိမိရဲ့ ကျန်းမာရေးကို မိမိကိုယ်တိုင် ပိုပြီး ဂရုစိုက်ဖို့၊ ပုံမှန် ကျန်းမာရေးစစ်ဆေးမှုတွေလုပ်ဖို့ တိုက်တွန်းတာပဲ ဖြစ်တယ်လို့ သုတေသန တွေ့ရှိသူတွေက ပြောပါတယ်။ လက်မထပ်ထားတဲ့သူတွေဟာ မိမိကိုယ်မိမိ ပိုပြီး ဂရုစိုက်ဖို့ လိုအပ်ပါတယ်။ ဆေးလိပ်၊ အရက် ရှောင်ကြဉ်တာ၊ အစားအသောက် ဆင်ခြင်တာနဲ့ အသက်အရွယ်အလိုက် လုပ်သင့်တဲ့ ကင်ဆာရောဂါ ကြိုတင်စစ်ဆေးမှုတွေကို (Screening) ပုံမှန်လုပ်ဆောင်သွားမယ်ဆိုရင် အိမ်ထောင်ရှိသူတွေထက် ကင်ဆာဖြစ်နိုင်ခြေ ပိုများစရာ အကြောင်းမရှိဘူးလို့လည်း ဆိုထားပါတယ်။   #ကင်ဆာရောဂါ #Cancer #အိမ်ထောင်မပြုသူ #unmarriedhashighrisksforcancer

အိမ်ထောင်မပြုသူတွေမှာ ကင်ဆာဖြစ်နိုင်ချေ ပိုများ

အိမ်ထောင်မပြုသူတွေမှာ ကင်ဆာဖြစ်နိုင်ချေ ပိုများ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၉ ရက်။  ကင်ဆာ ရောဂါ ဖြစ်ပွားမှုနဲ့ ပတ်သက်လို့ သုတေ…

  • April 9, 2026
၁၇ ကီလို မီတာ ပြာကျစေနိုင်သည့် Cluster ဗုံးတပ် ဒုံးကျည်ကို မြောက်ကိုရီးယား စမ်းသပ်   သတင်းနှင့် မီဒီယာ ကွန်ရက်
၂၀၂၆ ခုနှစ်၊ ဧပြီ ၉ ရက်။   မြောက်ကိုရီးယားနိုင်ငံသည် ခေတ်သစ်စစ်ပွဲများတွင် အသုံးပြုနိုင်သည့် နည်းပညာမြင့် လက်နက်စနစ်သစ်များဖြစ်သော Cluster ဗုံး (ပဒေသာဗုံး) တပ်ဆင်ထားသည့် ဘော်လစတစ်ဒုံးကျည်နှင့် လျှပ်စစ်သံလိုက်လှိုင်းသုံး လက်နက် (Electromagnetic Weapon) တို့ကို ယခုအပတ်အတွင်း စမ်းသပ်ခဲ့ကြောင်း နိုင်ငံပိုင် KCNA သတင်းဌာနက ကြာသပတေးနေ့တွင် ထုတ်ပြန်ခဲ့သည်။   မြောက်ကိုရီးယား ကာကွယ်ရေးသိပ္ပံအဖွဲ့နှင့် ဒုံးကျည်စီမံခန့်ခွဲရေးဌာနတို့သည် ကာဗွန်ဖိုက်ဘာဗုံး (Carbon-fibre bombs) များနှင့် ရွေ့လျားပစ်ခတ်နိုင်သည့် တာတိုပစ် လေကြောင်းရန်ကာကွယ်ရေး စနစ်များကိုလည်း စမ်းသပ်ခဲ့သည်။   အထူးသဖြင့် Hwasongpho-11 Ka ဟု ခေါ်ဆိုသည့် မြေပြင်မှမြေပြင်ပစ် ဒုံးကျည်တွင် Cluster ဗုံးထိပ်ဖူး တပ်ဆင်ကာ စမ်းသပ်ခဲ့ရာ ၇ ဟက်တာ (၁၇ ဧကခန့်) အကျယ်အဝန်းရှိသည့် ပစ်မှတ်တစ်ခုလုံးကို ပြာကျစေနိုင်ကြောင်း မြောက်ကိုရီးယားဘက်က ဆိုသည်။   လျှပ်စစ်သံလိုက်လှိုင်းသုံး လက်နက်စနစ် (Electromagnetic Weapon) သည် ရန်သူ့ဘက်က အီလက်ထရွန်နစ် ပတ်လမ်းစနစ်များကို ချို့ယွင်းသွားအောင် လုပ်ဆောင်နိုင်စွမ်းရှိသည်။     ကျွမ်းကျင်သူများ၏ အဆိုအရ ဤလက်နက်သည် တောင်ကိုရီးယား၏ ခေတ်မီ F-35A ကိုယ်ပျောက်တိုက်လေယာဉ်များနှင့် ဖျက်သင်္ဘောများရှိ လျှပ်စစ်စနစ်များကို တုံ့ပြန်မရအောင် လုပ်ဆောင်နိုင်သည့် အလားအလာရှိနေသည်။   ကာဗွန်ဖိုက်ဘာဗုံးများသည်လည်း လျှပ်စစ်ဓာတ်အားပေးစက်ရုံများကဲ့သို့သော အခြေခံအဆောက်အအုံများကို လျှပ်စစ်ဓာတ်အား ပြတ်တောက်သွားအောင် ပြုလုပ်နိုင်သည့် စွမ်းရည်ရှိသည်။   ယခုလက်နက်စမ်းသပ်မှုများသည် မြောက်ကိုရီးယားအနေဖြင့် ၎င်း၏ မဟာမိတ်များနှင့် ရန်ဘက်နိုင်ငံများအား စစ်ရေးအင်အား ပြသလိုခြင်းဖြစ်သည်ဟု လေ့လာသူများက သုံးသပ်ကြသည်။   ကလပ်စတာ ဗုံးများသည် ပင်မဗုံးသီးကြီးထဲတွင် ဗုံးကလေးပေါင်း ရာနှင့် ချီ ပါဝင်ပြီး ကျယ်ပြန့်သော မြေပြင် ပစ်မှတ် တခုလုံးကို ထိမှန်စေခြင်းဖြင့် စစ်သား အရပ်သား မခွဲခြားပဲ ထိခိုက် ‌သေကြေစေနိုင်သောကြောင့် နိုင်ငံတကာတွင် ပိတ်ပင်ထားသည်။   သို့သော်လည်း ကလပ်စတာဗုံး တားမြစ်ပိတ်ပင်ရေး စာချုပ်ကို အမေရိကန်ပြည်ထောင်စု၊ ရုရှား၊ တရုတ်၊ အစ္စရေး၊ ယူကရိန်း၊ မြောက်ကိုရီးယား နှင့် တောင်ကိုရီးယား တို့က လက်မှတ်ရေးထိုးထားခြင်း မရှိပါ။   #Cluster #ElectromagneticWeapon #Hwasongpho_11_Ka #မြောက်ကိုရီးယား #KCNA

၁၇ ဧက ပြာကျစေနိုင်သည့် Cluster ဗုံးတပ် ဒုံးကျည်ကို မြောက်ကိုရီးယား စမ်းသပ်

၁၇ ဧက ပြာကျစေနိုင်သည့် Cluster ဗုံးတပ် ဒုံးကျည်ကို မြောက်ကိုရီးယား စမ်းသပ်  သတင်းနှင့် မီဒီယာ ကွန်ရက်၂၀၂၆ ခုနှစ်၊ ဧပြီ ၉ ရက်။  မြောက်ကိုရီး…

  • April 9, 2026
ဩစတေးလျ စစ်သူရဲကောင်း စစ်ရာဇဝတ်မှုဖြင့် တရားစွဲခံရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၉ ရက်။   သြစတြေးလျနိုင်ငံ၏ ဂုဏ်ထူးဆောင်ဘွဲ့တံဆိပ် အများဆုံးရရှိထားသည့် ဝါရင့်စစ်သည်ဟောင်း ဘင်ရောဘတ်စမစ် Ben Roberts-Smith အား အာဖဂန်နစ္စတန်စစ်ပွဲအတွင်းကျူးလွန်ခဲ့သည့် စစ်ရာဇဝတ်မှုများအတွက် တရားစွဲဆိုလိုက်သည်။   သြစတြေးလျနိုင်ငံ၏ သက်ရှိထင်ရှား ဂုဏ်ထူးဆောင်ဘွဲ့တံဆိပ် အများဆုံးရရှိထားသူ Ben Roberts-Smith သည် အာဖဂန်နစ္စတန်စစ်ပွဲအတွင်း စစ်ရာဇဝတ်မှု (လူသတ်မှု) ကျူးလွန်ခဲ့သည်ဟူသော စွဲချက်များဖြင့် ဗုဒ္ဓဟူးနေ့က ဆစ်ဒနီတရားရုံးတွင် ရုံးထုတ်စဉ် အာမခံလျှောက်ထားခြင်း မပြုခဲ့ပေ။   အသက် ၄၇ နှစ်အရွယ်ရှိ Roberts-Smith သည် ၂၀၀၉ ခုနှစ်နှင့် ၂၀၁၂ ခုနှစ်အတွင်း အာဖဂန်နစ္စတန်နိုင်ငံ၊ အူရုဇ်ဂန်ပြည်နယ်တွင် အထူးတပ်ဖွဲ့ဝင် (SAS) အဖြစ် တာဝန်ထမ်းဆောင်စဉ်အတွင်း အာဖဂန်အရပ်သား ၅ ဦးအား သတ်ဖြတ်ခဲ့မှု၊ သို့မဟုတ် လက်အောက်ခံစစ်သည်များအား သတ်ဖြတ်ရန် အမိန့်ပေးခဲ့မှုတို့ဖြင့် စွဲချက်တင်ခံထားရခြင်း ဖြစ်သည်။   ၎င်းအား စစ်ရာဇဝတ်မှု (လူသတ်မှု) ၂ ခုနှင့် စစ်ရာဇဝတ်မှုတွင် အားပေးကူညီမှု ၃ ခု၊ စုစုပေါင်း စွဲချက် ၅ ခုဖြင့် တရားစွဲဆိုထားပြီး ပြစ်မှုထင်ရှားပါက တစ်သက်တစ်ကျွန်း ပြစ်ဒဏ်အထိ ကျခံရနိုင်သည်။       ၂၀၂၀ ပြည့်နှစ်က ထွက်ပေါ်ခဲ့သည့် စစ်ဘက်ဆိုင်ရာ အစီရင်ခံစာတစ်ခုအရ သြစတြေးလျ အထူးတပ်ဖွဲ့ဝင်များသည် အာဖဂန်အကျဉ်းသားများနှင့် အရပ်သား ၃၉ ဦးအား မတရားသဖြင့် သတ်ဖြတ်ခဲ့သည်ဟူသော အထောက်အထားများ တွေ့ရှိခဲ့ရသည်။   Roberts-Smith သည် အာဖဂန်စစ်ပွဲအတွင်း စစ်ရာဇဝတ်မှုဖြင့် တရားစွဲဆိုခံရသည့် ဒုတိယမြောက် သြစတြေးလျစစ်သည်ဟောင်း ဖြစ်လာခဲ့သည်။   ယခင်က အလားတူစွဲချက်ဖြင့် တရားစွဲဆိုခံထားရသည့် အော်လီဗာ ရှုဇ် Oliver Schulz ကမူ ၎င်းတွင် အပြစ်မရှိကြောင်း ငြင်းဆိုထားပြီး ၂၀၂၇ ခုနှစ်တွင်မှ တရားရင်ဆိုင်ရဖွယ် ရှိပါသည်။   သြစတြေးလျဝန်ကြီးချုပ် အန်တိုနီ အယ်လ်ဘာနီးစ်က ယခုဖြစ်ရပ်သည် သြစတြေးလျ ကာကွယ်ရေးတပ်ဖွဲ့အတွက် "ခက်ခဲသောအချိန်ကာလ" ဖြစ်ကြောင်း ပြောကြားခဲ့သော်လည်း ဥပဒေကြောင်းအရ ဆောင်ရွက်နေသည့်ကိစ္စဖြစ်၍ မှတ်ချက်ပေးရန် ငြင်းဆိုခဲ့သည်။   အတိုက်အခံခေါင်းဆောင် Angus Taylor ကမူ တရားစွဲဆိုခံရသည့် စစ်သည်များအတွက် အစိုးရက ရှေ့နေစရိတ် ကျခံပေးရန် တောင်းဆိုထားသည်။   Roberts-Smith သည် ၎င်းအား စစ်ရာဇဝတ်ကောင်အဖြစ် ရေးသားဖော်ပြခဲ့သည့် သတင်းစာတိုက်များကို အသရေဖျက်မှုဖြင့် တရားစွဲဆိုခဲ့ဖူးသော်လည်း ၂၀၂၃ ခုနှစ်တွင် အရပ်ဘက်တရားရုံးက ၎င်းသည် အရပ်သား ၄ ဦးအား သတ်ဖြတ်ခဲ့သည်မှာ မှန်ကန်နိုင်ခြေရှိသည်ဟု ဆုံးဖြတ်ကာ အဆိုပါအမှုကို ပလပ်ခဲ့ပါသည်။     သို့သော်လည်း ယခု ရာဇဝတ်ကြောင်းအရ တရားစွဲဆိုမှုတွင်မူ တရားလိုဘက်က သံသယဖြစ်ဖွယ်မရှိ လောက်အောင် ခိုင်လုံသည့် သက်သေအထောက်အထားများ တင်ပြနိုင်ရန် လိုအပ်မည် ဖြစ်ပါသည်။   ၎င်းအား ဆစ်ဒနီလေဆိပ်တွင် အင်္ဂါနေ့က ဖမ်းဆီးခဲ့ခြင်းဖြစ်ပြီး တရားရုံးက အမှုကို လာမည့် ဇွန်လ ၄ ရက်နေ့သို့ ရွှေ့ဆိုင်းလိုက်သဖြင့် Roberts-Smith သည် အချုပ်ထဲတွင် ဆက်လက် ရှိနေမည် ဖြစ်ပါသည်။   #BenRoberts_Smith #စစ်ရာဇဝတ်မှု #ဩစတေးလျစစ်သူရဲကောင်း

ဩစတေးလျ စစ်သူရဲကောင်း စစ်ရာဇဝတ်မှုဖြင့် တရားစွဲခံရ

ဩစတေးလျ စစ်သူရဲကောင်း စစ်ရာဇဝတ်မှုဖြင့် တရားစွဲခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၉ ရက်။  သြစတြေးလျနိုင်ငံ၏ ဂုဏ်ထူးဆောင်ဘွဲ့တ…

  • April 9, 2026
×Close