သတင်း

ဖားကန့်တွင် လက်နက်ကြီးကြောင့် ကလေးငယ်အပါအဝင် အရပ်သား ၂ ဦးသေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၁၉ ရက်။   ကချင်ပြည်၊ ဖားကန့်တွင် တိုက်ပွဲများဆက်လက်ပြင်းထန်နေပြီး စစ်အစိုးရတပ်၏ လက်နက်ကြီးဖြင့် ပစ်ခတ်မှု ကြောင့် ကလေးငယ်တစ်ဦး အပါအဝင် အရပ်သား နှစ်ဦးသေဆုံးသွားသည်။   ဖားကန့်ရတနာမြေအတွင်း စစ်အစိုးရတပ်နှင့် ကချင်လွတ်လပ်ရေး တပ်မတော် (KIA)၊ KPDF ပူးပေါင်းတပ်များ အကြား တိုက်ပွဲများ ပြန်လည်ပြင်းထန်နေပြီး၊ စစ်အစိုးရတပ်၏ လက်နက်ကြီး ရမ်းသမ်းပစ်ခတ်မှုများကြောင့် ၄ နှစ်အရွယ် ကလေးငယ်တစ်ဦး အပါအဝင် အရပ်သားနှစ်ဦး သေဆုံးခဲ့ကြောင်း ဒေသခံများက ပြောသည်။   ယနေ့ ဧပြီလ ၁၉ ရက်၊ နံနက်အစောပိုင်း ၄ နာရီခန့်မှစတင်၍ လုံးခင်းကျေးရွာဘက်သို့ စစ်အစိုးရတပ်က စစ်ကြောင်းထိုးလာရာမှ ဆောင်ချိန်ရပ်ကွက်အနီးတွင် တိုက်ပွဲပြင်းထန်ခဲ့ခြင်းဖြစ်သည်။   အဆိုပါ စစ်ကြောင်းထိုးမှုအတွင်း စစ်အစိုးရတပ်ဘက်က လက်နက်ကြီးများဖြင့် ပစ်ခတ်ခဲ့သဖြင့် လုံးခင်းရွာရှိ အသက် ၄ နှစ်အရွယ် ကလေးငယ်တစ်ဦး ကျည်ထိမှန်သေဆုံးခဲ့ရသည်။   မြေပြင်အခြေအနေနှင့် ပတ်သက်၍ ဒေသခံတစ်ဦးက “မနက် အစောပိုင်းပေါ့ ၄ နာရီလောက်ကစပြီး စစ် ကြောင်းက ထိုးနေတာ၊ စစ်ကြောင်းထိုးတဲ့အချိန် လက်နက်ကြီးနဲ့ ပစ်တာ ဆက်တိုက်ပဲ။ အဲ့မှာ လက်နက် ကြီးကျည် ကျလို့ ကလေး တစ်ယောက်ထိပြီး သေသွားတယ်လို့ ပြောတယ်ဗျ” ဟု ပြောသည်။     ထို့ပြင် ဧပြီလ ၁၈ ရက်နေ့ ညပိုင်းကလည်း ဖားကန့်ဗျူဟာကုန်းမှ လက်နက်ကြီး အချက် ၂၀ ခန့် ပစ်ခတ်ခဲ့ရာ ဆိုင်းတောင်ရွာရှိ မော်လကင် ကချင်ရိုးရာစာပေကျောင်းဝင်းအတွင်း ကျရောက်ပေါက်ကွဲခဲ့သဖြင့် အမျိုးသား တစ်ဦး ဝမ်းဗိုက်နှင့် ခါးအောက်ပိုင်းတွင် ပြင်းထန်ဒဏ်ရာရရှိကာ သေဆုံးခဲ့သည်။   ဖားကန့်ဒေသတွင် ဧပြီလ ၂ ရက်နေ့မှစတင်ကာ တိုက်ပွဲများ ပြန်လည်းဖြစ်ပွားခဲ့ခြင်း ဖြစ်ပြီး၊ တိုက်ပွဲကာလ အတွင်း KIA ပူးပေါင်းတပ်များက ရှေ့တန်းကင်းစခန်း ၆ ခုကို သိမ်းပိုက်နိုင်ခဲ့သော်လည်း စစ်ရေးအရ အရေး ပါသည့် မရှီကထောင်ရပ်ကွက်ရှိ ဆုတောင်းကုန်းစခန်းကိုမူ စစ်အစိုးရတပ်က လေကြောင်းနှင့် လက်နက်ကြီး ပစ်ကူများသုံး၍ ပြန်လည်ထိန်းချုပ်ထားသည်။   မြေပြင် စစ်ရေးသတင်းရင်းမြစ်တစ်ခုက “အခု တိုက်ပွဲဖြစ်နေတဲ့ လုံးခင်းဘက်က ဖားကန့်မြို့ရဲ့ မြောက်ဘက် ခြမ်းပါ။ အရင်ဖြစ်ခဲ့တဲ့ မရှီကထောင်က တောင်ဘက်ခြမ်းဆိုတော့ အခုက စစ်ကြောင်းတွေက နေရာအနှံ့ ဖြန့် ပြီး တိုးလာနေတာ။ ဗျူဟာကုန်းကနေလည်း လက်နက်ကြီးတွေနဲ့ လှမ်းပစ်နေတုန်းပဲ” ဟု ပြောသည်။   ဖားကန့်ဒေသနည်းတူ ဆက်စပ်နေသည့် တနိုင်းမြို့နယ်တွင်လည်း KIA၊ KPDF ပူးပေါင်းတပ်များနှင့် စစ်အစိုးရ တပ်၊ ပြည်သူ့စစ်ပူးပေါင်းစစ်ကြောင်းများ အကြား တိုက်ပွဲများဖြစ်ပွားနေသည်။   တနိုင်းမြို့နယ် တိုက်ပွဲများအတွင်း စစ်အစိုးရတပ်ဘက်မှ ၁၅ ဦးထက်မနည်း သေဆုံးကာ စခန်းနှစ်ခုကို KIA ဘက်က သိမ်းယူနိုင်ခဲ့ကြောင်း မြေပြင်သတင်းရင်းမြစ်များက ဆိုသည်။   လက်ရှိတွင် ဖားကန့်-လုံးခင်း လမ်းပိုင်းအား အသုံးမပြုကြရန် KIA ပူးပေါင်းတပ်များက သတိပေးထားပြီး၊ စစ်အစိုးရတပ်ဘက်ကလည်း အင်အားထပ်မံ ဖြည့်တင်းနေသဖြင့် တိုက်ပွဲများ ပိုမိုပြင်းထန်လာနိုင်သည့် အခြေ အနေတွင် ရှိနေသည်ဟု ဆိုသည်။   #ဖားကန့် #KachinState #KIA #KIO #Jadeland #ကချင်တိုက်ပွဲ #ဖားကန့်တိုက်ပွဲ

ဖားကန့်တွင် လက်နက်ကြီးကြောင့် ကလေးငယ်အပါအဝင် အရပ်သား ၂ ဦးသေဆုံး

ဖားကန့်တွင် လက်နက်ကြီးကြောင့် ကလေးငယ်အပါအဝင် အရပ်သား ၂ ဦးသေဆုံး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၉ ရက်။  ကချင်ပြည်၊ ဖားကန့်တွ…

  • April 19, 2026
သင်္ကြန်အတွင်း KNU နယ်မြေများတွင် ဗုံးကြဲတိုက်ခိုက်ရာ အရပ်သား ၆ ဦးသေဆုံး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၁၉ ရက်။   သင်္ကြန်ကာလအတွင်း KNU နယ်မြေများတွင် စစ်အစိုးရတပ် လေကြောင်းမှ တိုက်ခိုက်ခဲ့ရာ အရပ်သား ၆ ဦး သေဆုံးကာ နေအိမ်နှင့် ကျောင်းများစွာ ပျက်စီးခဲ့သည်ဟု KNU က ထုတ်ပြန်သည်။   မြန်မာ့ရိုးရာသင်္ကြန်ကာလ ၄ ရက်အတွင်း ကရင်အမျိုးသားအစည်းအရုံး (KNU) တပ်မဟာ (၅) နယ်မြေဖြစ် သည့် ဖာပွန် (မူတြော်) ခရိုင်အတွင်း စစ်အစိုးရတပ်၏ လေကြောင်း ဗုံးကြဲတိုက်ခိုက်မှုများကြောင့် အနည်းဆုံး အရပ်သား ၆ ဦး သေဆုံးပြီး ၁၃ ဦး ဒဏ်ရာရရှိခဲ့ကြောင်း KNU က အတည်ပြု ထုတ်ပြန်ထားသည်။   ဧပြီလ ၁၃ ရက်နေ့ (အကြိုနေ့) မှ ၁၆ ရက်နေ့ (အတက်နေ့) အထိ စစ်အစိုးရတပ်သည် တိုက်ပွဲဖြစ်ပွားခြင်း မရှိသော ကျေးရွာများကို ဂျက်ဖိုက်တာများနှင့် Y-12 လေယာဉ်များအသုံးပြု၍ နေ့စဉ်ဗုံးကြဲခဲ့ခြင်းဖြစ်သည်။   အထူးသဖြင့် ဧပြီလ ၁၅ ရက်နေ့တွင် ခဲပါထကျေးရွာအား ဗုံးကြဲခဲ့သဖြင့် အရပ်သား ၄ ဦး သေဆုံးကာ နေအိမ် ၂၁ လုံးနှင့် ဘာသာရေး အဆောက်အအုံများ မီးလောင်ပျက်စီးခဲ့ရသည်။   ယခုတိုက်ခိုက်မှုများသည် လူထုကိုသာ သီးသန့်ပစ်မှတ်ထားခြင်းဖြစ်ကြောင်း KNU တပ်မဟာ (၅) ပြောရေး ဆိုခွင့်ရှိသူ ဒုဗိုလ်မှူးကြီး စောကလယ်ဒိုက သတင်းမီဒီယာများကို ပြောဆိုထာသည်။       ထို့ပြင် ဧပြီလ ၁၂ ရက်နေ့က ဦးမယ်ထာဆေးရုံအား ပေါင် ၅၀၀ ဗုံးများဖြင့် တိုက်ခိုက်ခဲ့သကဲ့သို့၊ ဧပြီလ ၁၄ ရက်နေ့တွင်လည်း မူတြော်ဂျူနီယာကောလိပ် (Mutraw Junior College) ကို ရည်ရွယ်ချက်ရှိရှိ ဗုံးကြဲဖျက်ဆီးခဲ့ သည်။   မြေပြင်အခြေအနေနှင့် ပတ်သက်၍ ဒေသခံတစ်ဦးက “သင်္ကြန်တွင်းမှာလည်း ဆက်တိုက်ပဲ ဗုံးကြဲနေတာ။ သူတို့က စာသင်ကျောင်းတွေ၊ ဆေးရုံတွေကိုပဲ ရွေးပြီး ကြဲနေတာ။ ရွာလုံးကျွတ်နီးပါး ပြာကျကုန်ပြီ” ဟု ပြော သည်။   အလားတူ မြဝတီမြို့တောင်ပိုင်းရှိ မင်းလက်ပံကျေးရွာတွင်လည်း ဝေါလေဗျူဟာသို့ စစ်ကူပို့ရန် ကြိုးစားသည့် စစ်အစိုးရတပ် စစ်ကြောင်းနှင့် KNLA ပူးပေါင်းတပ်များအကြား တိုက်ပွဲများ ပြင်းထန်နေသည်။   စစ်အစိုးရတပ်ဘက်က အသေခံဒရုန်းများနှင့် မီးလောင်ဗုံးများ အသုံးပြုတိုက်ခိုက်နေသဖြင့် မင်းလက်ပံကျေးရွာ အတွင်းရှိ နေအိမ် ၁၄ လုံးထက်မနည်း မီးလောင်ပျက်စီးသွားကြောင်း မြေပြင်သတင်းရင်းမြစ်များက ဆိုသည်။   KNU ဗဟိုက ဧပြီလ ၁၈ ရက်နေ့တွင် ထုတ်ပြန်ချက်တစ်ရပ် ထုတ်ပြန်ခဲ့ပြီး စစ်အစိုးရတပ်၏ လုပ်ရပ်များသည် အပြည်ပြည်ဆိုင်ရာ လူသားချင်းစာနာထောက်ထားမှုဥပဒေကို ပြောင်ပြောင်တင်းတင်း ချိုးဖောက်သည့် စစ်ရာဇဝတ်မှုများဖြစ်ကြောင်း ရှုတ်ချထားသည်။   အဆိုပါ ထုတ်ပြန်ချက်တွင် “အာဆီယံအဖွဲ့ဝင်နိုင်ငံများနှင့် နိုင်ငံတကာအသိုင်းအဝိုင်းအား မိမိတို့၏ စိုးရိမ် ပူပန် မှုကို ထုတ်ဖော်ပြသခြင်းထက်ပိုသော လက်တွေ့ကျသည့် အရေးယူဆောင်ရွက်မှုများကို ချက်ချင်း အကောင် အထည်ဖော် ဆောင်ရွက်ကာ ယခုဆက်လက်ဖြစ်ပွားနေသော လေကြောင်းတိုက်ခိုက်မှုများကို ရပ်တန့်စေရန် ထိရောက်သည့် တားဆီးကာကွယ်မှုများကို လုပ်ဆောင်ရန် တိုက်တွန်းသည်။ ထိုသို့ ထင်ရှားသည့် ဥပဒေချိုး ဖောက်မှုများကို မတားဆီးဘဲ ဆက်လက်၍ နှုတ်ဆိတ်နေခြင်းသည် အကြမ်းဖက်မှုများ ပြောင်ပြောင်တင်းတင်း ပိုမိုကျူးလွန်လာစေရန် အတွက် အားပေးကူညီရာရောက်မည်ဖြစ်သည်” ဟု ဖော်ပြပါရှိသည်။   လက်ရှိတွင် နှစ်ဖက်စစ်ရေး အခြေအနေမှာ သင်္ကြန်အပြီးတွင် ပိုမိုတင်းမာလာနိုင်သည့် အနေအထားရှိနေပြီး စစ်အစိုးရတပ် အနေဖြင့် အရပ်သားပြည်သူများ၏ ကျန်းမာရေးနှင့် ပညာရေးဝန်ဆောင်မှုများကို ဖျက်ဆီးရန် ရည်ရွယ်ချက်ရှိရှိ လုပ်ဆောင်နေခြင်းအပေါ် နိုင်ငံတကာက မျက်ကွယ်မပြုရန် KNU က တောင်းဆိုထားသည်။   #KNU #KNLA #လေကြောင်းတိုက်ခိုက် #စစ်တပ် #စစ်အုပ်စု

သင်္ကြန်အတွင်း KNU နယ်မြေများတွင် ဗုံးကြဲတိုက်ခိုက်ရာ အရပ်သား ၆ ဦးသေဆုံး

သင်္ကြန်အတွင်း KNU နယ်မြေများတွင် ဗုံးကြဲတိုက်ခိုက်ရာ အရပ်သား ၆ ဦးသေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၉ ရက်။  သင်္ကြန်ကာလအ…

  • April 19, 2026
မြိတ်ထားဝယ်တွင် နိုင်ကျဉ်းများ လွတ်မြောက်မှု မရှိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၁၉ ရက်။   မြိတ်နှင့် ထားဝယ်အကျဉ်းထောင်များမှ အကျဉ်းသားအချို့ လွတ်ငြိမ်းဖြင့်လွတ်မြောက်သော်လည်း နိုင်ငံရေး အကျဉ်းသားများ ပါဝင်ခြင်းမရှိဘူးဟု အကျဉ်းဦးစီးနှင့်နီးစပ်သူများက ပြောသည်။   မြန်မာနှစ်ဆန်းတစ်ရက်နေ့ လွတ်ငြိမ်းချမ်းသာခွင့်အရ တနင်္သာရီတိုင်းအတွင်းရှိ မြိတ်၊ ထားဝယ်နှင့် ကော့သောင်း အကျဉ်းထောင်များမှ အကျဉ်းသား၊ အကျဉ်းသူအချို့ လွတ်မြောက်လာခဲ့သော်လည်း ၎င်းတို့အနက် နိုင်ငံရေးအ ကျဉ်းသားများ ပါဝင်ခြင်းမရှိဘဲ ခိုးဆိုးလုယက်မှုနှင့် လောင်းကစားမှုဖြင့် ကျခံနေရသူများသာ ဖြစ်ကြောင်း ပြောသည်။   ဧပြီလ ၁၇ ရက်၊ နံနက်ပိုင်းတွင် မြိတ်အကျဉ်းထောင်မှ အကျဉ်းသား ၁၃ ဦးနှင့် အကျဉ်းသူ ၂ ဦး၊ စုစုပေါင်း ၁၅ ဦး လွတ်မြောက်ခဲ့ကြောင်း အကျဉ်းဦးစီးဌာနမှ အရာရှိတစ်ဦးက အတည်ပြုသည်။   ထို့အပြင် မြိတ်မြို့နယ်အတွင်းရှိ ကျောက်ဖြူတောင် ရဲဘက်စခန်းမှ အကျဉ်းသား ၁၅ ဦးနှင့် နတ်စင်ကုန်း ရဲဘက် စခန်းမှ ၅ ဦး (ကျား ၃၊ မ ၂)၊ စုစုပေါင်း ၂၀ ဦးကိုလည်း လွှတ်ပေးခဲ့သဖြင့် မြိတ်ဒေသတစ်ခုတည်းတွင် ၃၅ ဦး လွတ်မြောက်ခဲ့ခြင်းဖြစ်သည်။   သို့သော်လည်း လွတ်မြောက်လာသူများထဲတွင် နှစ်ရှည်ထောင်ဒဏ်ကျခံနေရသည့် နိုင်ငံရေးအကျဉ်းသားများ ပါဝင်လာခြင်းမရှိသည့်အတွက် အကျဉ်းထောင်ရှေ့တွင် လာရောက်စောင့်ဆိုင်းနေသည့် မိသားစုဝင်များမှာ စိတ်ပျက်ခဲ့ကြရသည်။   အသက် ၄၅ နှစ်အရွယ် နိုင်ငံရေးအကျဉ်းသားများ၏ ဖခင်တစ်ဦးက “လွတ်လာတဲ့သူတွေထဲမှာ လောင်းကစားနဲ့ ခိုးဆိုး လုယက်မှုနဲ့ သူတွေပဲ လွတ်တာ၊ နိုင်ငံရေးအမှုနဲ့သူတွေမပါဘူး။ နှစ်ဆန်းတစ်ရက်နေ့ကို မျှော်လင့်ပြီး သားနဲ့ သမီးကို လွတ်လာမလားလို့ လာစောင့်နေတာ၊ တစ်ယောက်မှ မပါလာဘူးဗျာ” ဟု ပြောသည်။   အလားတူ ထားဝယ်အကျဉ်းထောင်တွင်လည်း အကျဉ်းသား ၉ ဦးနှင့် အကျဉ်းသူ ၂ ဦး၊ စုစုပေါင်း ၁၁ ဦး လွတ် မြောက်ခဲ့သော်လည်း ၎င်းတို့အနက် နိုင်ငံရေးအကျဉ်းသားများ ပါဝင်ခြင်းမရှိကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်ထားသည်။   ကော့သောင်း အကျဉ်းထောင်တွင်မူ အကျဉ်းသား ၂၀ နှင့် အကျဉ်းသူ ၅ ဦး၊ စုစုပေါင်း ၂၅ ဦး လွတ်မြောက်ခဲ့ ကြောင်း စစ်အစိုးရ၏ ပြန်ကြားရေးဌာနက ဆိုသည်။   စစ်အစိုးရသည် ယခုနှစ် မြန်မာနှစ်ဆန်းတစ်ရက်နေ့တွင် တစ်နိုင်ငံလုံး အတိုင်းအတာဖြင့် အကျဉ်းသား၊ အကျဉ်းသူ ၄,၃၃၅ ဦးနှင့် နိုင်ငံခြားသား အကျဉ်းသား ၁၇၉ ဦးတို့ကို လွတ်ငြိမ်းချမ်းသာခွင့် ပြုခဲ့ခြင်းဖြစ်သည်။   အဆိုပါ လွတ်ငြိမ်းခွင့်တွင် သေဒဏ်ချမှတ်ခံထားရသူများကို ထောင်တစ်သက်သို့လည်းကောင်း၊ ထောင် တစ်သက်နှင့် နှစ် ၄၀ အထက် ကျခံနေရသူများကို ထောင်ဒဏ် နှစ် ၄၀ သို့လည်းကောင်း၊ ကျန်အကျဉ်းသားများ ကို ပြစ်ဒဏ်၏ ခြောက်ပုံတစ်ပုံ လျှော့ပေါ့ပေးရန် သတ်မှတ်ခဲ့သည်။   သို့သော်လည်း တော်လှန်ရေးနှင့် ဆက်စပ်၍ ဖမ်းဆီးခံထားရသည့် နိုင်ငံရေးအကျဉ်းသား အများစုမှာမူ ယခု လွတ်ငြိမ်းခွင့်တွင် ချန်လှပ်ခံထားရဆဲ ဖြစ်သည်။   #နိုင်ငံရေးအကျဉ်းသား #မြိတ်အကျဉ်းထောင် #ထားဝယ်အကျဉ်းထောင် #လွတ်ငြိမ်းချမ်းသာခွင့်

မြိတ်ထားဝယ်တွင် နိုင်ကျဉ်းများ လွတ်မြောက်မှု မရှိ

မြိတ်ထားဝယ်တွင် နိုင်ကျဉ်းများ လွတ်မြောက်မှု မရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၉ ရက်။  မြိတ်နှင့် ထားဝယ်အကျဉ်းထောင်များမှ …

  • April 19, 2026
KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ     သတင်းနှင့် မီဒီယာ ကွန်ရက်။ ၂၀၂၆ ခုနှစ်၊  ဧပြီလ ၁၇ ရက်။     ကော်သူးလေ အတိုင်ပင်ခံ ကောင် စီနှင့် အုပ်ချုပ်ရေးကောင်စီတို့သည် နယ်မြေအတွင်း အုပ်ချုပ်ရေးယန္တရား ပိုမိုအားကောင်းလာစေရန်နှင့် နိုင်ငံ တကာနှင့် ချိတ်ဆက်သည့် လူထုဝန်ဆောင်မှုလုပ်ငန်းများကို အရှိန်မြှင့်တင် ဆောင်ရွက်နေသည်ဟု ပြောသည်။   အဆိုပါ ကောင်စီနှစ်ရပ်ကို ကရင်အမျိုးသားအစည်းအရုံး (KNU) က ဧပြီလ ၁၀ ရက်နေ့က စတင်ဖွဲ့စည်းခဲ့ခြင်း ဖြစ်ပြီး၊ ယခင်ကရှိခဲ့သော အုပ် ချုပ်ရေး လုပ်ငန်းများကို အခြေခံကာ နိုင်ငံတကာချိတ်ဆက်မှုများမှတစ်ဆင့် ပိုမိုထိရောက်သော အုပ်ချုပ်ရေး ပုံစံသစ်ကို ဖော်ဆောင်သွားမည်ဖြစ်သည်။   ယခုခြေလှမ်းနှင့် ပတ်သက်၍ KNU ပြောရေးဆိုခွင့်ရှိသူ ပဒိုစောကလယ်စေးက “နောက်ထပ် ဒီထက် ကျနော်တို့ မျှော်လင့်တာက ဒီထက်ကောင်းမွန်တဲ့ အုပ်ချုပ်ရေး လုပ်ငန်းတွေ အထူးသဖြင့်တော့ ဒီ ပြည်သူ့ ဝန်ဆောင်မှု လုပ်ငန်းတွေ ဖြစ်တဲ့ ဌာနတွေပေါ့နော် အဲဒါတွေက ပိုပြီး အလုပ်လုပ်လာနိုင်မယ် နိုင်ငံတကာနဲ့လည်း ပိုပြီး ချိတ် ဆက်ဆောင်ရွက်လာနိုင်တယ်ဆိုတဲ့ ပိုပြီး ကောင်းမွန်လာနိုင်တဲ့ အနေအထားတော့ ကျနော်တို့ မျှော်လင့်ထားတာ ဖြစ်ပါတယ်” ဟု ပြောသည်။   ကောင်စီသစ်များ အနေဖြင့် ပြည်တွင်းရှိ အခြားသော ဖက်ဒရယ်ယူနစ်များနှင့်လည်း ညှိနှိုင်းချိတ်ဆက်သွားမည် ဖြစ်ပြီး၊ စစ်အာဏာရှင်စနစ်ကို တိုက်ဖျက်ရင်း တော်လှန်ရေးအသွင်ကူးပြောင်းမှုကာလ (Transitional Period) ကို စနစ်တကျ ကျော်ဖြတ်နိုင်ရန် ပြင်ဆင်နေခြင်းဖြစ်သည်ဟု ဆိုသည်။   တော်လှန်ရေးနှင့် အုပ်ချုပ်ရေး ဟန်ချက်ညီရန် လိုအပ်မှုကိုလည်း ပဒိုစောကလယ်စေးက “တစ်ဖက်က တော် လှန်ရေး အခန်းကဏ္ဍနဲ့ ပတ်သက်ပြီးတော့ ကျနော်တို့ မေ့ထားလို့မရဘူး။ တော်လှန်ရေး ကာလဖြစ်နေတဲ့ အပေါ်မှာ တော်လှန်ရေး လုပ်ငန်းကိုတော့ တစ်စိုက်မတ်မတ် ကျနော်တို့ အတိုင်ပင်ခံကောင်စီနဲ့ တွဲဖက်ပြီး တော့ပေါ့နော်။ ဒီအုပ်ချုပ်ရေးကောင်စီနဲ့ ဟန်ချက်ညီ ကျနော်တို့ တော်လှန်ရေး လုပ်ငန်းကိုလည်း ကျနော်တို့ ဆက်လက်အကောင်အထည်ဖော် တိုးမြှင့်သွားနိုင်မှာ ဖြစ်တယ်လို့ ကျနော်တို့ အဲ့လိုပဲ ယုံကြည် နားလည်ထား ပါတယ်” ဟု ဖြည့်စွက် ပြောသည်။   ကော်သူးလေ အတိုင်ပင်ခံကောင်စီ (Kawthoolei Consultative Council - KCC) ၏ စုဖွဲ့မှုတွင် KNU ဗဟို ကိုယ်စားလှယ်များ၊ ခရိုင် ၇ ခုမှ ကိုယ်စားလှယ်များ၊ လူမျိုးစုအလိုက် ကိုယ်စားလှယ်များ၊ အမျိုးသမီးနှင့် လူငယ် အစုအဖွဲ့များအပြင် ၂၀၂၀ ရွေးကောက်ပွဲ အနိုင်ရကိုယ်စားလှယ်များပါ ပါဝင်ဖွဲ့စည်းထားသည်။   “အထူးသဖြင့် တော်လှန်ရေးကာလ ကော်သူးလေ အတိုင်ပင်ခံကောင်စီထဲမှာ ပါဝင်တဲ့ ကိုယ်စားလှယ်တွေ က တော့ ဗဟိုအဆင့်၊ KNU ရဲ့ ဗဟိုအဆင့် ကိုယ်စားလှယ်တွေပါသလို ခရိုင် ၇ ခုရဲ့ ကိုယ်စားလှယ်တွေလည်း ပါဝင်မှာ ဖြစ်ပါတယ်။ နောက်တော့ အဲဒီ ခရိုင်တွေထဲမှာ ရှိနေကြတဲ့ လူမျိုး ကိုယ်စားလှယ်တွေလည်း ပါဝင်မှာ ဖြစ်သလို အမျိုးသမီးနဲ့ လူငယ်အစုအဖွဲ့တွေ ပါဝင်ကြမှာ ဖြစ်ပါတယ်။ အဲဒီအထဲမှာ ၂၀၂၀ ရွေးကောက်ပွဲ အနိုင်ရခဲ့တဲ့ ကိုယ်စားလှယ်တွေလည်း ပါဝင်မှာ ဖြစ်ပါတယ်” ဟု စုဖွဲ့မှုပုံစံကို ပဒိုကလယ်စေးက ရှင်းပြသည်။   ကောင်စီအသစ်များ အနေဖြင့် ဒီမိုကရေစီနှင့် လူ့အခွင့်အရေးကို အာမခံထားသလို၊ တာဝန်ယူမှု တာဝန်ခံမှု အပြည့်ဖြင့် လုပ်ဆောင်သွားမည်ဟု ခံဝန်ကတိပြုထားကြသည်။   ထို့အပြင် ကော်သူးလေ၏ တည်ငြိမ်မှုကို နှောင့်ယှက်မည့် မည်သည့်အတားအဆီးကိုမဆို အစုအဖွဲ့အားလုံးက စုပေါင်းကာကွယ်သွားမည်ဟု ဆိုသည်။   လက်ရှိတွင် KNU နယ်မြေအသီးသီး၌ စစ်ရေးအရှိန် မြင့်တက်နေသော်လည်း ယခုကဲ့သို့ အုပ်ချုပ်ရေးမဏ္ဍိုင်ကို ခိုင်မာစွာ တည်ဆောက်လိုက်ခြင်းမှာ အနာဂတ် ဖက်ဒရယ်ပြည်ထောင်စု တည်ဆောက်ရေးအတွက် အသွင် ကူးပြောင်းမှုကာလ ပြင်ဆင်ချက်များထဲမှ တစ်ခုဖြစ်ကြောင်း KNU ဘက်က ထုတ်ပြန်ထားသည်။   #KNU #KawthooLeiCouncil #KCC #KGC

KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ

KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊  ဧပြီလ ၁၇ ရက်။  ကော်သူးလေ အတိုင်ပင်ခံ ကောင် စီနှင…

  • April 17, 2026
တော်လှန်ရေး အစုအဖွဲ့များအကြား သွေးကွဲမှုများ ရှောင်ကျဉ်ရန် KNDF ခေါင်းဆောင်ပြော   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၁၇ ရက်။   တော်လှန်ရေး အစုအဖွဲ့များအကြား အချင်းချင်း ပြန်လည် တိုက်ခိုက်နေမှုများကို အမြန်ဆုံး အဆုံးမသတ်နိုင်ပါက မျှော်မှန်းထားသည့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးမှာ ဖြစ်လာနိုင်မည် မဟုတ်ကြောင်း ကရင်နီအမျိုးသားများ ကာကွယ်ရေးတပ် (KNDF) ဒုတိယ စစ်ဦးစီးချုပ် မာဝီက ပြောဆိုလိုက်သည်။   ယနေ့ (ဧပြီလ ၁၇ ရက်နေ့) တွင် ကျရောက်သည့် မြန်မာနှစ်သစ်ကူး နှစ်ဆန်းတစ်ရက်နေ့ နှုတ်ဆက် စကား အတွင်း ၎င်းက ထည့်သွင်းပြောကြားခဲ့ခြင်းဖြစ်ပြီး၊ အာဏာရှင်များ အလိုကျဖြစ်စေမည့် အချင်းချင်း သွေးကွဲမှု များကို ရှောင်ရှားရန် တိုက်တွန်းခဲ့သည်။   ဒု-စစ်ဦးစီးချုပ် မာဝီက “ကျဉ်းမြောင်းတဲ့ အမျိုးသားရေးမှာပဲ ကျနော်တို့တွေ ပိတ်မိမနေကြဘဲနဲ့ ကျယ်ပြော တဲ့ အမျိုးသားရေးနဲ့ ပြည်ထောင်စုရေးကို ကျနော်တို့ ရှေးရှုလုပ်ဆောင်ကြရပါလိမ့်မယ်။ အဲ့ဒီအတွက် ကိုလည်း အလေးအနက် တိုက်တွန်းနှိုးဆော်လိုပါတယ်။ အာဏာရှင်တွေ ကြိုက်တဲ့ ကျနော်တို့ အချင်းချင်းတွေ ပြန် တိုက် ခိုက်ကြ၊ သွေးကွဲကြတာမျိုးတွေကို တတ်နိုင်ဆုံး ကျနော်တို့ ရှောင်ရှားကြရမယ်။ ဦးနှောက်ကြီးရမယ်၊ နှလုံး သားကြီး ရမယ်။ ကျနော်တို့ ဒီလို အခက်အခဲတွေကို ကျနော်တို့ရဲ့ ကြီးမားတဲ့ မျှော်မှန်းချက်တွေ၊ ဉာဏ် ပညာ တွေနဲ့ ကျော်လွှားကြရအောင်လို့လည်း ကျနော် ဆုတောင်းလိုပါတယ်” ဟု ပြောသည်။   လက်ရှိတွင် စစ်အာဏာသိမ်းမှု ၅ နှစ်ကျော်ကာလသို့ ရောက်ရှိလာသော်လည်း နွေဦးတော်လှန်ရေးသည် ကြံ့ကြံ့ ခံ ရုန်းကန်နေဆဲဖြစ်ပြီး၊ ရည်ရွယ်ချက်များ ပြည့်မီအောင် အသက်၊ ချွေးများစွာဖြင့် ဆက်လက် ပေးဆပ်နေကြရ ဆဲ ဖြစ်ကြောင်း ၎င်းက ဆိုသည်။     အောင်ပွဲရရှိရန် စည်းလုံးညီညွတ်မှုသည် အဓိကဖြစ်ကြောင်းကိုလည်း “တစ်နိုင်ငံလုံး စည်းလုံးညီညွတ်စွာနဲ့ တိုက်မှ အောင်ပွဲရမယ် ဆိုတာကိုလည်း ကျွန်တော်တို့ အားလုံးက သိပြီး ဖြစ်ပါတယ်။ ဒါကြောင့် ဒီနှစ်သစ် ကစပြီးတော့ အာဏာရှင်စနစ် အပြီးတိုင် ပြိုလဲဖို့ ကျနော်တို့က ကဏ္ဍအသီးသီးမှာ တိုက်ပွဲဝင်နေကြတဲ့သူတွေ အားလုံး အားလုံး စည်းလုံးကြဖို့ကိုလည်း ဆုတောင်း မေတ္တာပို့သပါတယ်” ဟု ဒု-စစ်ဦးစီးချုပ် မာဝီက နှစ်သစ်မင်္ဂလာ နှုတ်ဆက်စကားအတွင်း ဆုတောင်းထားသည်။   ထို့ပြင် လေပေါ်တွင် တိုက်ဆောက်၍ မရသကဲ့သို့ မြေပြင်စိုးမိုးမှုနှင့် အာမခံချက်ရှိသော အခြေအနေများရှိမှသာ အရာရာကို တည်ဆောက်နိုင်မည်ဖြစ်သဖြင့်၊ ပြည်ထောင်စုသစ် တည်ဆောက်ရေးတွင် ပြည်နယ်တိုင်း ညီညွတ် မှုရှိရန်နှင့် တစ်နိုင်ငံလုံးရှိ တော်လှန်ရေးအင်အားစုများ စုစည်း၍ အနိုင်ယူကြရန် ဒု-စစ်ဦးစီးချုပ် မာဝီက တိုက်တွန်းနှိုးဆော်ထားသည်။   လက်ရှိတွင် ကရင်နီပြည်အတွင်း၌ စစ်အစိုးရတပ်များနှင့် တိုက်ပွဲများ ဆက်လက်ပြင်းထန်နေသကဲ့သို့ အခြား သော တိုင်းရင်းသားနယ်မြေအချို့တွင်လည်း တော်လှန်ရေးအဖွဲ့အချင်းချင်းကြား နယ်မြေစိုးမိုးမှုဆိုင်ရာ ပွတ် တိုက်မှုများ ရှိနေသည့်အတွက်၊ KNDF ဒုစစ်ဦးစီးချုပ်၏ ယခုမိန့်ခွန်းမှာ တော်လှန်ရေးအင်အားစုများအကြား အချင်းချင်း စုစည်းကြရန် နှိုးဆော်ချက်တစ်ခုအဖြစ် ထွက်ပေါ်လာခြင်း ဖြစ်သည်။   #KNDF #မာဝီ #KNDFဒုစစ်ဦးစီးချုပ်

တော်လှန်ရေး အစုအဖွဲ့များအကြား သွေးကွဲမှုများ ရှောင်ကျဉ်ရန် KNDF ခေါင်းဆောင်ပြော

တော်လှန်ရေး အစုအဖွဲ့များအကြား သွေးကွဲမှုများ ရှောင်ကျဉ်ရန် KNDF ခေါင်းဆောင်ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၇ ရက်။  တော်လ…

  • April 17, 2026
ထားဝယ် ဗဟိုသင်္ကြန်မဏ္ဍာပ် အနီး ဒရုန်း တိုက်ခိုက်မှုတွင် အမျိုးသမီးတစ်ဦး ဒဏ်ရာရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၁၇ ရက်။   ထားဝယ်မြို့ပေါ်ရှိ တနင်္သာရီတိုင်း အစိုးရ ဗဟိုသင်္ကြန်မဏ္ဍပ်အနီး ဒရုန်းဖြင့် ဗုံးချတိုက်ခိုက်ခံရမှုများအတွင်း သရက်ချောင်းမြို့နယ်မှ လာရောက်စစ်ဘေးရှောင်နေသည့် အသက် ၅၉ နှစ်အရွယ် အမျိုးသမီးတစ်ဦး ဗုံးစ ထိမှန်ကာ ပြင်းထန်ဒဏ်ရာရရှိခဲ့ကြောင်း မြို့ခံများထံမှ သိရသည်။   သင်္ကြန်အကြိုနေ့ဖြစ်သည့် ဧပြီလ ၁၃ ရက်၊ ညနေ ၃ နာရီခန့်က ဗဟိုမဏ္ဍပ်နှင့် မီတာ ၆၀၀ ခန့်သာ ကွာဝေးသော ရှမ္မလည်ဆွဲရပ်ကွက်၊ နတ်စင်လမ်းထိပ်တွင် ဒရုန်းဗုံးသီး ကျရောက်ပေါက်ကွဲခဲ့ခြင်း ဖြစ်သည်။   အဆိုပါ ပေါက်ကွဲမှုကြောင့် ရှမ္မလည်ဆွဲရပ်ကွက်အတွင်းရှိ နတ်စင်လမ်းထဲတွင် စစ်ဘေးလာရောက် တိမ်းရှောင် နေသူ ဒေါ်စန်းယုမှာ ဗုံးစထိမှန်ခဲ့ခြင်း ဖြစ်သည်။   ဒဏ်ရာရရှိမှု အခြေအနေနှင့် ပတ်သက်၍ ရှမ္မလည်ဆွဲရပ်ကွက်တွင် နေထိုင်သည့် အသက် ၃၅ နှစ်အရွယ် အမျိုးသမီးတစ်ဦးက “အမျိုးသမီးရဲ့ ခါးကနေ ဗိုက်ထဲကို ဖောက်ဝင်သွားတာမို့ ဒဏ်ရာတော့ အတော်လေး ပြင်းတယ်။ အခုလက်ရှိက ထားဝယ်ဆေးရုံကြီးမှာ ဆေးကုသနေရတယ်” ဟု ပြောသည်။   ဗုံးပေါက်ကွဲမှု ဖြစ်ပွားပြီးနောက် စစ်အစိုးရ တပ်ဖွဲ့ဝင်များ ရောက်ရှိလာကာ နတ်စင်လမ်းအတွင်း စစ်ဆေးမှုများ ပြုလုပ်ခဲ့ပြီး ပြန်လည်ထွက်ခွာသွားခဲ့ကြောင်း မြို့ခံများက ပြောသည်။     အဆိုပါ သင်္ကြန်အကြိုနေ့ ညနေ ၄ နာရီခန့်တွင် ထားဝယ်မြို့ ဗိုလ်ချုပ်ကြေးရုပ်အနီး၌ တိုင်းဝန်ကြီးချုပ် ဇော်နိုင်ဦး ကိုယ်တိုင်တက်ရောက်၍ ဗဟိုမဏ္ဍပ်ဖွင့်ပွဲ ပြုလုပ်နေစဉ်အတွင်း ဒရုန်းဖြင့် တိုက်ခိုက်မှုများ ထပ်မံ ဖြစ်ပွားခဲ့သေးသည်။   ထိုနေ့တစ်နေ့တည်းမှာပင် တိုင်းလွှတ်တော်၊ ဝန်ကြီးများအိမ်ရာ၊ တိုင်းရဲတပ်ဖွဲ့ရုံးနှင့် ထားဝယ်ခရိုင် အထွေထွေ အုပ်ချုပ်ရေးမှူးရုံး အစရှိသည့် စစ်အစိုးရ၏ အုပ်ချုပ်ရေးယန္တရား အခြေစိုက်ရာ နေရာများအနီးသို့ ဒရုန်းဖြင့် ဗုံးချတိုက်ခိုက်မှုများ ဆက်တိုက်ရှိခဲ့ကြောင်း မြို့ခံများက ဆိုသည်။   ထို့ပြင် ဧပြီလ ၁၄ ရက်၊ သင်္ကြန်အကျနေ့ ညပိုင်းတွင်လည်း ဗဟိုမဏ္ဍပ်အနီး ဒရုန်းဖြင့် ဗုံးချခံခဲ့ရသော်လည်း ထိခိုက်မှု အခြေအနေကိုမူ အသေးစိတ် မသိရပေ။   ယခုနှစ် ထားဝယ်သင်္ကြန်ကာလအတွင်း မြို့ပေါ်ရှိ မဏ္ဍပ်များ၌ စစ်အစိုးရက လုံခြုံရေး အထူး တင်းကျပ်ထား သည့် ကြားမှ ဒရုန်းဖြင့် ပစ်မှတ်ထား တိုက်ခိုက်ခံနေရခြင်း ဖြစ်သည်။   လက်ရှိတွင် ဒရုန်းဗုံးစ ထိမှန်ခဲ့သည့် စစ်ရှောင်အမျိုးသမီး ဒေါ်စန်းယုမှာ ထားဝယ်ပြည်သူ့ဆေးရုံကြီး၌ ဆေးကုသမှုခံယူနေရဆဲ ဖြစ်သည်။   #ထားဝယ်သင်္ကြန်  #ဒရုန်းတိုက်ခိုက်မှု

ထားဝယ် ဗဟိုသင်္ကြန်မဏ္ဍာပ် အနီး ဒရုန်း တိုက်ခိုက်မှုတွင် အမျိုးသမီးတစ်ဦး ဒဏ်ရာရ 

ထားဝယ် ဗဟိုသင်္ကြန်မဏ္ဍာပ် အနီး ဒရုန်း တိုက်ခိုက်မှုတွင် အမျိုးသမီးတစ်ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၇ ရက်။  ထားဝယ…

  • April 17, 2026
စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၁၇ ရက်။   မြန်မာနှစ်ဆန်း (၁) ရက်၊ ယနေ့တွင် ထုတ်ပြန်သည့် လွတ်ငြိမ်းချမ်းသာခွင့်တွင် အာဏာသိမ်းချိန်ကတည်းက ဖမ်းဆီးထောင်ချခံထားရသည့် နိုင်ငံတော်သမ္မတ ဦးဝင်းမြင့်အား လက်ရှိကျခံနေရသော ပြစ်ဒဏ်အားလုံးမှ လွတ်ငြိမ်းခွင့်ပြုလိုက်ကြောင်း စစ်တပ်ဘက်က တရားဝင် ထုတ်ပြန်လိုက်သည်။   ယနေ့ ထုတ်ပြန်သည့် စစ်အသွင်ပြောင်း အစိုးရ နိုင်ငံတော်သမ္မတရုံး၏ အမိန့်အမှတ် ၄၂ / ၂၀၂၆ အရ တောင်ငူအကျဉ်းထောင်တွင် ပြစ်ဒဏ်ကျခံနေရသော သမ္မတဦးဝင်းမြင့်အား ရာဇဝတ်ကျင့်ထုံးဥပဒေ ပုဒ်မ ၄၀၁၊ ပုဒ်မခွဲ (၁) အရ ကျန်ရှိနေသည့် ပြစ်ဒဏ်များအပေါ် လျှော့ပေါ့၍ လွတ်ငြိမ်းခွင့်ပြုလိုက်ခြင်းဖြစ်သည်။   အဆိုပါ လွတ်ငြိမ်းခွင့်အမိန့်တွင် သမ္မတဦးဝင်းမြင့် အနေဖြင့် နောက်တစ်ကြိမ် ပြစ်မှုထပ်မံကျူးလွန်ပါက ယခုလျှော့ပေါ့ပေးခဲ့သည့် ပြစ်ဒဏ်များကိုပါ ဆက်လက်ကျခံရမည်ဟူသော စည်းကမ်းချက်ပါဝင်ပြီး စစ်ခေါင်းဆောင် ဦးမင်းအောင်လှိုင်က နိုင်ငံတော်သမ္မတအဖြစ် လက်မှတ်ရေးထိုး ထုတ်ပြန်ထားခြင်းဖြစ်သည်။   သမ္မတဦးဝင်းမြင့်သည် ၂၀၂၁ ခုနှစ် ဖေဖော်ဝါရီလ ၁ ရက်၊ အာဏာသိမ်းမှုစတင်ကတည်းက ဖမ်းဆီး ထိန်းသိမ်းခံခဲ့ရသူဖြစ်ပြီး စစ်အုပ်စု၏ မတရားစွပ်စွဲချက်များဖြစ်သော အဂတိမှုများနှင့် ရွေးကောက်ပွဲဆိုင်ရာ ပုဒ်မ ၁၃၀(က) အပါအဝင် အမှုပေါင်းများစွာဖြင့် စုစုပေါင်း ထောင်ဒဏ် (၁၄) နှစ်အထိ ချမှတ်ခံခဲ့ရသူဖြစ်သည်။   သမ္မတဦးဝင်းမြင့် လွတ်မြောက်လာသည့် သတင်းများနှင့်အတူ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစု ကြည်ကိုလည်း နေအိမ်အကျယ်ချုပ်သို့ ပြောင်းရွှေ့ထားရှိမည်ဆိုသည့် သတင်းများ ကျယ်ကျယ် ပြန့်ပြန့် ထွက်ပေါ်နေသည်။   အဆိုပါ သတင်းများကြောင့် အမျိုးသားဒီမိုကရေစီအဖွဲ့ချုပ် (NLD) ပါတီမှ ဗဟိုအလုပ်အမှုဆောင်အဖွဲ့ဝင် အချို့နှင့် ရှေ့နေများသည် နေပြည်တော်သို့ သွားရောက်နေကြပြီဖြစ်သည်။   ပါတီဥက္ကဋ္ဌ ဒေါ်အောင်ဆန်းစုကြည်အား နေအိမ်အကျယ်ချုပ်သို့ ပြောင်းရွှေ့မည်ဟူသော သတင်းများကြောင့် လူကိုယ်တိုင် တွေ့ဆုံခွင့်ရရှိရန် ကြိုးပမ်းသွားမည်ဖြစ်ကြောင်းနှင့် လက်ရှိတွင် ရှေ့နေများလည်း နေပြည်တော်သို့ ရောက်ရှိနေပြီဖြစ်ကြောင်း NLD ဗဟိုအလုပ်အမှုဆောင်အဖွဲ့ဝင် ဒေါက်တာမျိုးညွန့်က အတည်ပြုပြောဆိုထား သည်။   အတိုင်ပင်ခံဒေါ်အောင်ဆန်းစုကြည်နှင့် သမ္မတဦးဝင်းမြင့်တို့သည် ဖမ်းဆီးထိန်းသိမ်းခံထားရသည်မှာ ရက်ပေါင်း ၁,၉၀၀ ကျော် ရှိလာပြီဖြစ်သည်။   ပြီးခဲ့သည့် ရက်ပိုင်းအတွင်းကလည်း ဒေါ်အောင်ဆန်းစုကြည်အား စစ်အုပ်စု၏ ထိပ်တန်းစစ်ဗိုလ်ချုပ်ကြီး အချို့ က သွားရောက်တွေ့ဆုံခဲ့သည်ဆိုသည့် သတင်းများကြောင့် ယခုနှစ်ဆန်း ၁ ရက်တွင် ၎င်းတို့၏ အခြေအနေနှင့် ပတ်သက်၍ နိုင်ငံရေးအရ စိတ်ဝင်စားမှု မြင့်တက်လျက်ရှိသည်။   လက်ရှိတွင် စစ်အုပ်စုသည် စစ်ရေးအရ အရှုံးများနှင့် ရင်ဆိုင်နေရချိန်တွင် နိုင်ငံရေးထွက်ပေါက်အဖြစ် ယခု ကဲ့သို့ အပြောင်းအလဲအချို့ကို ဖန်တီးလာခြင်းဖြစ်နိုင်ကြောင်း နိုင်ငံရေးလေ့လာသူများက သုံးသပ်နေကြသော် လည်း၊ သမ္မတဦးဝင်းမြင့်၏ လွတ်မြောက်လာပြီးနောက်ပိုင်း အခြေအနေနှင့်ပတ်သက်၍ သီးခြားအတည်ပြုချက် များကိုမူ ဆက်လက်စောင့်ကြည့်နေရဆဲ ဖြစ်သည်။   #သမ္မတဦးဝင်းမြင့် #ဒေါ်အောင်ဆန်းစုကြည်

စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး

စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၇ ရက်။  မြန်မာနှစ်ဆန်း …

  • April 17, 2026
အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၁၆ ရက်   အမေရိကန်ဦးဆောင်သော ရေတပ်အင်အားစုများသည် အီရန်နိုင်ငံ၏ အဓိကဝင်ငွေရရှိရာ ရေနံတင်ပို့မှုကို အပြီးတိုင် ဖြတ်တောက်ရန် ရည်ရွယ်၍ ဟော်မုဇ်ရေလက်ကြားကို စတင်ပိတ်ဆို့လိုက်ပြီ ဖြစ်သည်။   ဤစစ်ရေးလှုပ်ရှားမှုကြောင့် ကမ္ဘာ့လောင်စာဆီ ဈေးကွက်နှင့် ဒေသတွင်း တည်ငြိမ်မှုအပေါ် စိုးရိမ်မှုများ မြင့်တက်နေသည်။   အိမ်ဖြူတော်သည် အီရန်နိုင်ငံအား စီးပွားရေးအရ အကျပ်ကိုင်ရန်အတွက် "ရေတပ်ပိတ်ဆို့မှု" (Naval Blockade) နည်းလမ်းကို အသုံးပြုလာခြင်းဖြစ်သည်။   အမေရိကန် စစ်ဌာနချုပ် ဖြစ်သော CENTCOM ၏ ထုတ်ပြန်ချက်အရ အီရန်ဆိပ်ကမ်းများသို့ အဝင်အထွက်ပြုလုပ်သည့် သင်္ဘောအားလုံးကို ကြားဖြတ်စစ်ဆေးသွားမည် ဖြစ်သော်လည်း အခြားပင်လယ်ကွေ့နိုင်ငံများ၏ သင်္ဘောများကိုမူ လွတ်လပ်စွာ သွားလာခွင့်ပြုမည်ဟု ဆိုသည်။ ကျွမ်းကျင်သူအချို့ကမူ ၎င်းမှာ အီရန်မှလာသော ကုန်စည်များကိုသာ တားဆီးခြင်းဖြစ်၍ "ရေတပ် ကာရန်ဆီးခြင်း" (Naval Quarantine) ဟုလည်း သုံးနှုန်းကြသည်။   တနင်္လာနေ့မှစတင်၍ အီရန်နှင့် ဆက်နွှယ်သည့် ရေနံတင်သင်္ဘော ၈ စီးထက်မနည်းကို ကြားဖြတ်တားဆီးခဲ့ပြီး ဖြစ်သည်။ ၎င်းတို့အနက် တရုတ်ပိုင် သင်္ဘောတစ်စီးလည်း ပါဝင်ခဲ့သည်။   သတင်းဌာနများ၏ ခွဲခြမ်းစိတ်ဖြာချက်အရ အီရန်သည် ရေနံတင်ပို့မှု လုံးဝရပ်တန့်သွားပါက ၎င်း၏ ရေနံသိုလှောင်ကန်များ ကုန်ခမ်း မသွားမီအထိ ရေနံကို ဆက်လက်ထုတ်လုပ်နိုင်မည် ဖြစ်သည်။ သိုလှောင်ကန်များ ကုန်သွားပါက ထုတ်လုပ်မှုကို မဖြစ်မနေ လျှော့ချရမည်ဖြစ်သည်။   သုတေသန အဖွဲ့တစ်ခု ဖြစ်သော FGE NextantECAက အီရန်သည် ၎င်း၏ ရေနံထုတ်လုပ်မှုကို (၂) လမှ (၃) လအထိ ဆက်လက် လုပ်ဆောင်နိုင်မည်ဟု ခန့်မှန်းသည်။   အခြား သုတေသန အဖွဲ့ဖြစ်သော Energy Aspects ကမူ အီရန်၏ သိုလှောင်နိုင်စွမ်းမှာ နည်းပါးသဖြင့် (၁၆) ရက်ခန့်သာ ခံနိုင်ရည်ရှိပြီး မေလအတွင်း ထုတ်လုပ်မှု သိသိသာသာ လျှော့ချရလိမ့်မည်ဟု ဆိုသည်။   ဟော်မုဇ်ရေလက်ကြားသည် တစ်ရက်လျှင် သင်္ဘောအစီးပေါင်း ၁၄၀ နီးပါး ဖြတ်သန်းနေသည့် နေရာဖြစ်ရာ သင်္ဘောအားလုံးကို စစ်ဆေးရန်မှာ အမေရိကန်ရေတပ်အတွက် ခက်ခဲမည့် လုပ်ငန်းစဉ် ဖြစ်သည်။   ပိတ်ဆို့မှုများသည် စစ်ဘက်ကို ထိခိုက်စေရန် ရည်ရွယ်သော်လည်း အမှန်တကယ်တွင် အရပ်သားများ၏ စားနပ်ရိက္ခာနှင့် စိုက်ပျိုးရေးကဏ္ဍကို ပိုမိုထိခိုက်စေလေ့ရှိသည်။ အီရန်၏ ရေနံဝင်ငွေ ပြတ်တောက်မှုသည် ၎င်းတို့၏ စားနပ်ရိက္ခာ တင်သွင်းမှုကိုပါ ထိခိုက်လာနိုင်ခြေ ရှိသည်။   #ဟော်မုဇ်ရေလက်ကြား # NavalBlockade #American #Iran #အီရန်စစ်ပွဲ #CENTCOM

အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့

အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၆ ရက်  အမေရိကန်ဦးဆောင်သော ရေတပ်အင်အားစုများ…

  • April 16, 2026
BBC က ဝန်ထမ်း ၂၀၀၀ လျှော့မည်   သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဧပြီလ ၁၆ ရက်။   ကမ္ဘာ့ အကြီးဆုံး သတင်းဌာနကြီး တစ်ခု ဖြစ်သည့် ဗြိတိသျှ အသံလွှင့် ကော်ပိုရေးရှင်း BBC က နှစ်နှစ်အတွင်း နှစ်စဉ်အသုံးစရိတ်၏ ၁၀ ရာခိုင်နှုန်း (ပေါင် သန်း ၅၀၀) ကို ချွေတာရန်အတွက် ဝန်ထမ်းအင်အား ၂,၀၀၀ ခန့်ကို လျှော့ချသွားမည်ဖြစ်ကြောင်း ဗုဒ္ဓဟူးနေ့က ကြေညာခဲ့သည်။   BBC ၏ ယာယီညွှန်ကြားရေးမှူးချုပ် Rhodri Talfan Davies က ဝန်ထမ်းများနှင့် စကားပြောဆိုရာတွင် ယခုလူလျှော့မှုသည် ဆယ်စုနှစ်တစ်ခုကျော်အတွင်း အကြီးမားဆုံးဖြစ်ကြောင်း ပြောကြားခဲ့သည်။   အဓိကဖြတ်တောက်မှုများကို ၂၀၂၇ ခုနှစ်၊ ဧပြီလ ၁ ရက်နေ့တွင် စတင်မည့် ဘဏ္ဍာရေးနှစ်တွင် လုပ်ဆောင်သွားမည်ဖြစ်သည်။   ငွေဖောင်းပွမှု၊ လိုင်စင်ကြေးနှင့် လုပ်ငန်းဝင်ငွေများအပေါ် ဖိအားသက်ရောက်မှု၊ နှင့် ကမ္ဘာ့စီးပွားရေး မတည်ငြိမ်မှုများကြောင့် ယခု ကဲ့သို့ ဆုံးဖြတ်ရခြင်း ဖြစ်သည်ဟု ဆိုသည်။   လာမည့်လတွင် Google အမှုဆောင်ဟောင်း Matt Brittin က BBC ၏ ညွှန်ကြားရေးမှူးချုပ်အဖြစ် တာဝန်ယူမည်ဖြစ်သည်။       ယခင်ညွှန်ကြားရေးမှူးချုပ် Tim Davie နှင့် သတင်းဌာနအကြီးအကဲ Deborah Turness တို့သည် အမေရိကန်သမ္မတ ဒေါ်နယ်ထရမ့်၏ ၂၀၂၁ ခုနှစ် ဇန်နဝါရီ ၆ ရက် မိန့်ခွန်းနှင့်ပတ်သက်သော မှတ်တမ်းတင်ရုပ်ရှင်တွင် လွဲမှားစွာ တည်းဖြတ်မိသည့်ကိစ္စကြောင့် ရာထူးမှ နုတ်ထွက်ခဲ့ကြသည်။   ထိုကိစ္စနှင့်ပတ်သက်၍ ဒေါ်နယ်ထရမ့်က BBC ကို သိက္ခာချမှုဖြင့် ဒေါ်လာ ၁၀ ဘီလီယံ လျော်ကြေးတောင်းကာ တရားစွဲဆိုထားသည်။   လက်ရှိတွင် BBC ကို ဗြိတိန်အိမ်ထောင်စုများထံမှ တစ်နှစ်လျှင် ပေါင် ၁၈၀ ကောက်ခံသည့် "လိုင်စင်ကြေး" (License Fee) ဖြင့် လည်ပတ်နေခြင်းဖြစ်သည်။   သို့သော် Streaming ဝန်ဆောင်မှုများ ခေတ်စားလာသည့်အတွက် ဤကဲ့သို့ လိုင်စင်ကြေးကောက်ခံ သည့်စနစ်ကို ကန့်ကွက်သူများ များပြားလာသည်။   ဘီဘီစီ၏ မြန်မာ ဌာနအပါအဝင် ဘာသာစကား ဌာနခွဲများကမူ ဗြိတိန် အစိုးရ နိုင်ငံခြားရေး ဌာန၏ ရန်ပုံငွေ ထောက်ပံ့မှုကို ရရှိကြသည်။   လူအင်အားလျော့ချမှုတွင် မည်သည့် ဌာနမှ မည်သည့် ဝန်ထမ်းများကို လျှော့ချမည်ကို ကြေညာခြင်း မရှိသေးသကဲ့သို့ မြန်မာအပါအဝင် ဘာသာစကား ဝန်ဆောင်မှုများ Language Services ပါဝင်မှု ရှိမရှိကို မသိရသေးပါ။   လက်ရှိ ဗြိတိန်လေဘာအစိုးရက BBC အတွက် မျှတပြီး ရေရှည်တည်တံ့သော ရန်ပုံငွေစနစ်ဖြစ်စေရန် ကတိပြုထားသော်လည်း လိုင်စင်ကြေးအစား အခြားပုံစံဖြင့် အစားထိုးရန် စဉ်းစားနေသည်။   ၁၉၂၂ ခုနှစ်တွင် စတင်တည်ထောင်ခဲ့သော BBC သည် လက်ရှိတွင် ဗြိတိန်ပြည်တွင်းနှင့် ဒေသတွင်း ရုပ်သံလိုင်း ၁၅ လိုင်း၊ ရေဒီယိုအသံလွှင့်ဌာနများစွာနှင့် ကမ္ဘာကျော် World Service အပါအဝင် ဒစ်ဂျစ်တယ်ဝန်ဆောင်မှုများကိုပါ လုပ်ဆောင်လျက်ရှိသည်။   #BBC #MattBrittin  #TimDavie #DeborahTurness

BBC က ဝန်ထမ်း ၂၀၀၀ လျှော့မည်

BBC က ဝန်ထမ်း ၂၀၀၀ လျှော့မည် သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဧပြီလ ၁၆ ရက်။ ကမ္ဘာ့ အကြီးဆုံး သတင်းဌာနကြီး တစ်ခု ဖြစ်သည့် ဗြိတိသျှ အသံလွှင့်…

  • April 16, 2026
×Close