သတင်း

တက္ကသိုလ် တက်ရောက်ခွင့်ရရန် ကြိုတင်မဲပေးရမည်ဟု ကျောင်းသားများ ဖိအားပေးခံရ သတင်းနှင့် မီဒီယာ ကွန်ရက်။
၂၀၂၅ ခုနှစ် ၊ဒီဇင်ဘာလ ၉ ရက်။ တက္ကသိုလ် တက်ရောက်ခွင့်ကို ခြိမ်းခြောက်၍ ရှမ်းပြည်မှ ကျောင်းသား ၂၅၀ ကျော် ကြိုတင်မဲပေးရန် ဖိအားပေး ခံခဲ့ရသည်ဟု ကာယကံရှင်များနှင့် ရှမ်းလူ့အခွင့်အရေး မဏ္ဍိုင်က ပြောသည်။ စစ်ကော်မရှင်က ဒီဇင်ဘာလအတွင်း ကျင်းပမည့် ရွေးကောက်ပွဲအတွက် ‘မဲမပေးပါက တက္ကသိုလ် ဆက်လက် တက်ရောက်ခွင့်ပေးမည် မဟုတ်’ ဟူသည့် ဖိအားပေးမှုများကြောင့် ရှမ်းပြည်မှ တက္ကသိုလ် ကျောင်းသား၊ ကျောင်းသူ ၂၅၀ ကျော်တို့သည် ဆန္ဒမပါဘဲ ကြိုတင်မဲပေးခဲ့ကြရကြောင်း ရှမ်းလူ့အခွင့်အရေး မဏ္ဍိုင် (SHRF) က နိုဝင်ဘာ ၂၈ ရက်နေ့တွင် ထုတ်ပြန်ခဲ့သည်။ SHRF ၏ ပြောရေးဆိုခွင့်ရှိသူ ယိင်းလျန်းဟန်က “မဲမပေးဘူးဆိုရင် သူတို့ ဒီကျောင်းဆက်တက်လို့မရဘူးဆိုတဲ့ ပုံစံမျိုး ဖိအားပေးတာပေါ့နော်။ သူတို့လည်း ကျောင်းမတက်ရမှာလည်းကြောက်တယ်၊ မဲလည်း မပေးချင်ဘူး ဆိုတဲ့ ဖိအားမျိုးတွေလည်းရှိတယ်။ တကယ်လို့ မဲမပေးခဲ့ဘူးဆိုရင် စာရင်းတွေက သူတို့နာမည် အတိအကျ ပါနေတဲ့ အခါကြတော့ ဖမ်းဆီးခံရမှာ ကြောက်တယ်ရှင့်” ဟု ပြောသည်။ ရှမ်းပြည်တောင်ပိုင်းက ပင်းတယ၊ နမ့်စန်၊ ကွန်ဟိန်းမြို့နယ်နှင့် ရှမ်းအရှေ့ပိုင်း မိုင်းဆတ်မြို့နယ်တို့မှ ကျောင်း သား၊ ကျောင်းသူများသည် နေထိုင်ရာ မဲဆန္ဒနယ်ပြင်ပသို့ တက္ကသိုလ်သွားတက်ရမည့်သူများ ဖြစ်ကြသည်။ အများစုမှာ တက္ကသိုလ် ပထမနှစ် တက်ရောက်မည့် မောင်မယ်သစ်လွင်များဖြစ်ကြပြီး၊ ကျောင်းအပ်ရန်အတွက် လိုအပ်သည့် အကျင့်စာရိတ္တကောင်းမွန်ကြောင်း ထောက်ခံစာ နှင့် ပြစ်မှုကင်းရှင်းကြောင်း ရဲစခန်း၏ ထောက် ခံစာများကို ရယူရန် ဒေသတွင်း အုပ်ချုပ်ရေးတာဝန်ရှိသူများ၏ ဖိအားပေးမှုကို လက်ခံခဲ့ကြရသည်။ နမ့်စန်မြို့မှ မန္တလေးမြို့သို့ တက္ကသိုလ်သွားရောက်တက်ရောက်မည့် ကျောင်းသားတစ်ဦးကလည်း ကျောင်းအပ် ရန် ထောက်ခံစာရရှိရေးအတွက် ဆန္ဒမပါဘဲ ကြိုတင်မဲပေးခဲ့ရသည်ဟု ဆိုသည်။ ဖိအားပေးမှုကြောင့် နိုဝင်ဘာလ ၁၇ ရက်နေ့မှ ၂၀ ရက်နေ့ အတွင်း နမ့်စန်မြို့နယ် ရွေးကောက်ပွဲကော်မရှင်ရုံး ၉ ခုတွင် ကျောင်းသား ၇၉ ဦး၊ ပင်းတယမြို့နယ် အထွေထွေအုပ်ချုပ်ရေး ဦးစီးဌာနတွင် ၉၄ ဦး၊ ကွန်ဟိန်းမြို့နယ်ရှိ မဲရုံ ၂ ခုတွင် ၃၆ ဦး နှင့် မိုင်းဆတ်မြို့နယ်ရှိ ရွေးကောက်ပွဲကော်မရှင်ရုံး ၆ ခုတွင် ၄၇ ဦးတို့ ကြိုတင်မဲပေးခဲ့ကြရ သည်။ ယခုကဲ့သို့ ဖိအားပေးခြင်းသည် လွတ်လပ်စွာ ဆန္ဒမဲပေးပိုင်ခွင့်ကို တိုက်ရိုက်ချိုးဖောက်ရာ ရောက်သည်ဟု SHRF က ထောက်ပြသည်။ ယိင်းလျန်းဟန်က “မိဘတွေကတော့ သဘောမကျကြတာ များပါတယ်။ အဓိကကတော့ ရွေးကောက်ပွဲဆိုတာ ဒီမိုကရေစီ နည်းလမ်း ကျကျနဲ့ပေါ့။ ဖိအားပေးပြီး မဲပေးတာမျိုး မရှိရဘူး။ အခုလိုမျိုး ဖိအားပေးတာက လွတ်လပ်စွာ ဆန္ဒမဲပေးပိုင်ခွင့်ကို ချိုးဖောက်ရာကျနေတယ်ရှင့်” ဟု ပြောသည်။ စစ်ကော်မရှင်၏ ယခုရွေးကောက်ပွဲသည် ပြည်သူများ၏ ဆန္ဒမပါဘဲ မဲပေးရန် အတင်းအကျပ် ဖိအားပေးနေ ခြင်းကြောင့် လွတ်လပ်မှု၊ တရားမျှတမှုနှင့် ဒီမိုကရေစီနည်းကျမှု မရှိကြောင်းကို မီးမောင်းထိုးပြနေသည်ဟု SHRF က သုံးသပ်သည်။ ပြည်ထောင်စု ရွေးကောက်ပွဲ ကော်မရှင်ကမူ နိုဝင်ဘာလ ၁၇ ရက်နေ့မှ ၂၁ ရက်နေ့အတွင်း တက္ကသိုလ်၊ ဒီဂရီ ကောလိပ်၊ ကောလိပ်များမှ ကျောင်းသား၊ ကျောင်းသူ စုစုပေါင်း ၂၈,၃၃၉ ဦး တို့သည် ကြိုတင်ဆန္ဒမဲပေးခဲ့ကြ ကြောင်း နိုဝင်ဘာ ၂၁ ရက်နေ့တွင် ထုတ်ပြန်ထားသည်။ စစ်ကော်မရှင်က ရွေးကောက်ပွဲကို ဒီဇင်ဘာ ၂၈ ရက်နေ့၊ ၂၀၂၆ ခုနှစ် ဇန္နဝါရီလ ၁၁ ရက်နေ့နှင့် ဇန္နဝါရီလ ၂၅ ရက်နေ့တို့၌ အပိုင်း (၃) ပိုင်းခွဲ၍ ကျင်းပသွားမည် ဖြစ်သည်ဟု ထုတ်ပြန်ထားသည်။ ဓာတ်ပုံ - MYANMAR NATIONAL PORTAL  

တက္ကသိုလ် တက်ရောက်ခွင့်ရရန် ကြိုတင်မဲပေးရမည်ဟု ကျောင်းသားများ ဖိအားပေးခံရ

တက္ကသိုလ် တက်ရောက်ခွင့်ရရန် ကြိုတင်မဲပေးရမည်ဟု ကျောင်းသားများ ဖိအားပေးခံရ သတင်းနှင့် မီဒီယာ ကွန်ရက်။၂၀၂၅ ခုနှစ် ၊ဒီဇင်ဘာလ ၉ ရက်။  တက္ကသိုလ်…

  • December 9, 2025
ရွေးကောက်ပွဲ ကာကွယ်သည့် ဥပဒေက လူထုနဲ့ မီဒီယာကို ခြိမ်းခြောက်နေကြောင်း သတင်းသမားများပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၉ ရက်။ သေဒဏ်အထိ ပြစ်ဒဏ်ချမှတ်နိုင်သည့် ရွေးကောက်ပွဲ ဥပဒေဖြင့် သတင်းမီဒီယာနှင့် ပြည်သူများ ခြိမ်းခြောက် ခံနေရသည်ဟု သတင်းမီဒီယာ အသိုင်းအဝိုင်းက ပြောသည်။ စစ်ကော်မရှင်က ဇူလိုင်လအတွင်း ပြဋ္ဌာန်းခဲ့သည့် ‘ပါတီစုံဒီမိုကရေစီ အထွေထွေရွေးကောက်ပွဲများကို နှောင့် ယှက်ဟန့်တားခြင်းမှ ကာကွယ်ပေးရေးဥပဒေ’ ကြောင့် သတင်းမီဒီယာလွတ်လပ်ခွင့်နှင့် ပြည်သူလူထု၏ ဝေဖန် ကန့်ကွက်ပိုင်ခွင့်များ ဆုံးရှုံးနေရသည်ဟု ဆိုသည်။ ထို့အပြင် သေဒဏ်အထိ ပြစ်ဒဏ်ချမှတ်နိုင်သော ပြဋ္ဌာန်းချက်များကြောင့် သတင်းထောက်များ အသက် အန္တရာယ် ခြိမ်းခြောက်ခံနေရကြောင်း မီဒီယာအသိုင်းအဝိုင်းက ထုတ်ဖော်ပြောဆိုသည်။ အဆိုပါ ရွေးကောက်ပွဲဥပဒေ၏ ရည်ရွယ်ချက်မှာ သတင်းလွတ်လပ်ခွင့်ကို တိုက်ရိုက်သော်လည်းကောင်း၊ သွယ် ဝိုက်၍သော်လည်းကောင်း ချိုးဖောက်ပြီး ဖော်ထုတ်ရေးသားမှုများ မလုပ်ရဲအောင် ဖိအားပေးခြင်းဖြစ်ကြောင်း သတင်းထောက်များက ထောက်ပြသည်။ ကချင်းသတင်းဌာနက စီနီယာသတင်းထောက် ဦးလဂွေက “ဒီရွေးကောက်ပွဲဥပ‌ဒေတွေ ထုတ်ထားလိုက်တော့ ဘယ်သူမှ မဖော်ထုတ်ရဲအောင် ကောင်းသည်ဖြစ်စေ၊ မကောင်းသည်ဖြစ်စေ ထောက်ခံအောင်ဆိုတဲ့ ပုံစံမျိုးနဲ့ သူက သွယ်ဝိုက်ပြီးမှ မလုပ်ရဲအောင် ထုတ်ပြန်ထားတဲ့ ဥပဒေဖြစ်တယ်။ ဆိုတော့ သတင်းမီဒီယာတွေကို အသက်ပါခြိမ်းခြောက်တဲ့ ဥပဒေဖြစ်တယ်ပေါ့နော်” ဟု ပြောသည်။ ရွေးကောက်ပွဲ ပျက်ပြားစေရန် စာရေးသားခြင်း အပါအဝင် အနှောင့်အယှက်ပေးသည့် လုပ်ရပ်များအတွက် အနည်းဆုံး ထောင်ဒဏ် ၃ နှစ်မှ အမြင့်ဆုံး သေဒဏ်အထိ ချမှတ်နိုင်သော အဆိုပါ ဥပဒေကြောင့် သတင်းမီဒီယာ များ ဖိနှိပ်ခြိမ်းခြောက်မှုများ ခံနေရသည်ဟုလည်း အသံအဖွဲ့က နိုဝင်ဘာလ ၁၉ ရက်နေ့တွင် ထုတ်ပြန်ခဲ့သည်။ ကရင်နီအခြေစိုက် အမျိုးသမီး သတင်းထောက်တစ်ဦးကလည်း ထောင်ဒဏ်တစ်သက်နှင့် သေဒဏ်အထိ ချမှတ်နိုင်ခြင်းသည် သတင်းထောက်များအတွက် အလုပ်လုပ်ခွင့် လွတ်လပ်မှုကို ကန့်သတ်နိုင်သည့် ကြီးမား သော စိုးရိမ်ချက်ဖြစ်လာစေပြီး၊ သတင်းအရင်းအမြစ်များထံမှ သတင်းပေးပို့မှု အားနည်းစေသည်ဟု ပြောသည်။ အဆိုပါဥပဒေသည် ပြည်သူများ၏ လွတ်လပ်စွာ ကန့်ကွက်ပိုင်ခွင့်ကို ချိုးဖောက်သည့်အတွက် ဥပဒေတစ်ရပ် မဟုတ်ဘဲ ဖိနှိပ်ခြိမ်းခြောက်သည့် ယန္တရားတစ်ခုသာ ဖြစ်ကြောင်း ဧရာဝတီသတင်းဌာန အမှုဆောင်အယ်ဒီတာ ဦးရဲနည်က ထောက်ပြသည်။ “ရွေးကောက်ပွဲကို နှောင့်ယှက်ဟန့်တားတယ်ဆိုကတည်းက အဲ့လိုမျိုး ဥပဒေမဟုတ်တော့ဘူးလေ။ အခုဟာက တစ်ဖက်သတ် အာဏာသိမ်းထားပြီးတော့မှ အမိန့်အာဏာနဲ့ ခြိမ်းခြောက်နေတဲ့ အခြေအနေမှာ လွတ်လပ်မျှတ တဲ့ ရွေးကောက်ပဲဆိုတာကတော့ မရှိတော့ဘူးပေါ့နော်။” မြန်မာအင်တာနက်ပရောဂျက် (MIP) မှ ကောက်ယူထားသည့် အချက်အလက်များအရ ယခုနှစ် နိုဝင်ဘာလ ၁၄ ရက်နေ့အထိ ရွေးကောက်ပွဲ ဥပဒေဖြင့် နိုင်ငံတစ်ဝန်းတွင် ၃၂ ဦး ဖမ်းဆီးခံခဲ့ရသည်ဟု သိရသည်။ ထို့ပြင် ကရင်အမျိုးသားအစည်းအရုံး (KNU)၊ ချင်းလဲန်း (Chinland)၊ အာရက္ခတပ်တော် (AA) နှင့် ပြည်သူ့ ကာကွယ်ရေး တပ်မတော် (PDF) အပါအဝင် သတင်းမီဒီယာ ချန်နယ် သုံးခုကိုလည်း အဆိုပါ ရွေးကောက်ပွဲ ကာကွယ်ရေး ဥပဒေဖြင့် တရားစွဲဆိုထားသည်။ စစ်ကော်မရှင်၏ ဥပဒေများသည် နိုင်ငံတကာ စံနှုန်းနှင့် မကိုက်ညီသောကြောင့် မီဒီယာဌာနများအနေဖြင့် မိမိ တို့၏ လုပ်ငန်းကျင့်ဝတ်နှင့်အညီ တစ်စိုက်မတ်မတ် ဆက်လက်ရေးသား ဖော်ထုတ်သွားကြရန် လွတ်လပ်သော မြန်မာသတင်း မီဒီယာကောင်စီ (IPCM) ဥက္ကဋ္ဌ နန်းဖော့ဂေက တိုက်တွန်းထားသည်။ နန်းဖော့ဂေက “သူ့လိုရာ ဆွဲသွင်းတဲ့ ဥပဒေပေါင်းစုံနဲ့တော့ ဒီသတင်းသမားတွေကော သတင်းအရင်းမြစ်တွေ ကို ရော အများပြည်သူကိုရော အချိန်မရွေး သူလုပ်နိုင်တဲ့ ပါဝါ သူ့လက်ထဲမှာရှိတဲ့ အနေအထားမျိုး ဖြစ်တဲ့ အခါ ကြတော့ အားလုံးကတော့ အထူးသတိထားပြီးတော့ လုပ်ဆောင်ကိုင်တွယ်ရမယ့် အနေအထား ဖြစ်တယ်ပေါ့ နော်” ဟု ပြောသည်။ ၎င်းက ရွေးကောက်ပွဲဥပဒေအပြင် မတရားအသင်း ဆက်သွယ်မှုပုဒ်မ (၁၇/၁) နှင့် အသရေဖျက်မှု ပုဒ်မများကဲ့ သို့ စစ်ကော်မရှင်က လိုရာဆွဲသွင်းနိုင်သည့် ဥပဒေပေါင်းစုံဖြင့် သတင်းသမားများနှင့် သတင်းအရင်းအမြစ်များ ကို ခြိမ်းခြောက်နေကြောင်းလည်း ထောက်ပြခဲ့သည်။ ဓါတ်ပုံ - RFA  

ရွေးကောက်ပွဲ ကာကွယ်သည့် ဥပဒေက လူထုနဲ့ မီဒီယာကို ခြိမ်းခြောက်နေကြောင်း သတင်းသမားများပြော

ရွေးကောက်ပွဲ ကာကွယ်သည့် ဥပဒေက လူထုနဲ့ မီဒီယာကို ခြိမ်းခြောက်နေကြောင်း သတင်းသမားများပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၉ ရက်။&nbsp…

  • December 9, 2025
တောင်ကြီးတွင် ဆိုင်ခန်း ၁၀၀ ကျော်ဖယ်ရှားရန် ညွှန်ကြား သတင်းနှင့်မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၉ ရက်။ ရှမ်းပြည်၏ မြို့တော်၊ တောင်ကြီးမြို့တွင် စီးပွားရေးကျဆင်းနေသည့် ကြားမှ စစ်ကော်မရှင်က အားကစားကွင်း ပြင်ဆင်ရန် ဆိုင်ခန်းပေါင်း ၁၀၀ ကျော်ကို ဖယ်ရှားရန် ညွှန်ကြားထားသည်ဟု ဆိုင်ခန်းပိုင်ရှင်များက ပြောသည်။ တောင်ကြီးမြို့တွင် စစ်အာဏာသိမ်းပြီးနောက်ပိုင်း မြို့ခံများ စီးပွားရေးအဖက်ဖက်မှ ကျဆင်းနေသည့်ကြားမှပင် စစ်ကော်မရှင် လက်အောက်ခံ စည်ပင်သာယာရေးက ရှမ်းပြည်နယ် အားကစားကွင်း ပတ်ပတ်လည်ရှိ ဆိုင်ခန်း ပေါင်း ၁၀၀ ကျော်အား ဖျက်သိမ်းဖယ်ရှားရန် ညွှန်ကြားချက် ထုတ်ပြန်ထားခြင်း ဖြစ်သည်။ ဆိုင်ကယ်အပိုပစ္စည်း ရောင်းချနေသည့် ဆိုင်ခန်းပိုင်ရှင်တစ်ဦးက “တောင်ကြီးမြို့က ဘာမှ စစ်ဘေးမကြုံရဘူး ဆိုပေမယ့် ဒီ ၅ နှစ်တာအတွင်း ဘာမှ အလုပ်မဖြစ်ပါဘူး။ ဖွင့်ထားတဲ့ ဆိုင်တွေက အရင်းကိုက်ရုံ ဟန်မပျက် ဖွင့်နေကြတာပါ။ ရပ်ထားရတဲ့အလုပ်က ခပ်များများပါ။ ဘောလုံးကွင်းက ပြင်သင့်တယ်ဆိုပေမယ့် ဒီကာလ တော့ မစာနာရာ ရောက်ပါတယ်” ဟု လက်ရှိ တောင်ကြီးမြို့၏ စီးပွားရေး အခြေအနေကို ထောက်ပြသည်။ အဆိုပါ ဆိုင်ခန်းများကို ဒီဇင်ဘာလ ၁ ရက်နေ့မှ စတင်၍ စည်ပင်မှ ငွေကောက်ခံခြင်း မပြုတော့ဘဲ နှစ်ပတ် အတွင်း ဖယ်ရှားပေးရန် ညွှန်ကြားထားခြင်းဖြစ်ပြီး၊ စစ်ကော်မရှင်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ၏ လာရောက်ကြည့်ရှု့မှု နောက်ဆက်တွဲအဖြစ် လုပ်ဆောင်လာခြင်းဖြစ်သည်ဟု ဒေသခံများက ပြောသည်။ ဖယ်ရှားခံရမည့် ဆိုင်ခန်းများတွင် စားသောက်ဆိုင်၊ အထည်ဆိုင်နှင့် မော်တော်ယာဉ် အပိုပစ္စည်းဆိုင် စသည့် လုပ်ငန်းများ ပါဝင်သည်။ စီးပွားရေး အဆင်မပြေမှုကြောင့် အရင်းရရုံဖြင့်သာ ဆက်လက်ရပ်တည်နေရသည့် ကာလတွင် ရုတ်တရက် ဖယ်ရှားခိုင်းမှုကြောင့် ဆိုင်ရှင်များမှာ ဖောက်သည်ပျက်မည်ကို စိုးရိမ်နေကြရသည်။ ၂၀၂၃ ခုနှစ် မတ်လ အစောပိုင်း၌ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် တောင်ကြီးမြို့သို့ လာရောက် လည်ပတ်ခဲ့စဉ် အားကစားကွင်းအား ကြည့်ရှု့စစ်ဆေးပြီး ပြင်ဆင်ရန် ဆွေးနွေးခဲ့သည်ဟု ဆိုသည်။ စားသောက်ဆိုင် ဖွင့်လှစ်ထားသည့် ဆိုင်ခန်းပိုင်ရှင်တစ်ဦးက ယင်းညွှန်ကြားချက်ကို ယခုကဲ့သို့ အချိန်တိုအတွင်း အကောင်အထည်ဖော်မည်ဟု မထင်မှတ်ထားကြောင်း ပြောသည်။ “မင်းအောင်လှိုင်လာတုန်းက ပြောခဲ့တာတော့ ရှိတာပေါ့။ ဒီလောက်မြန်မယ်လို့ မထင်ကြဘူးလေ။ ပြောင်းဆို လည်း ပြောင်းရမှာပေါ့။ နေရာပြန်ပေးမယ်လို့တော့ မကြားသေးဘူး” ဟု ပြောသည်။ လက်ရှိ အားကစားကွင်းအား ဦးဆောင်ပြင်ဆင်ခွင့်ရသူမှာ စစ်ခေါင်းဆောင်၏ သမီးဖြစ်သူမှ ဖြစ်ပြီး ရုရှားနိုင်ငံ ၏ နည်းပညာ အကူအညီများလည်း ပါဝင်မည်ဟု ဒေသခံအချို့ကြား ပြောဆိုမှုများရှိသော်လည်း သတင်းနှင့်မီဒီယာ ကွန်ရက် သတင်းဌာနအနေဖြင့် အတည်မပြုနိုင်သေးပေ။ အားကစားကွင်း ဘေးတစ်လျှောက်ရှိ ဆိုင်ခန်းပိုင်ရှင်များသည် ဆိုင်ခန်းပြောင်းရွှေ့ပါက စီးပွားရေးကျဆင်းမည့် အပြင်၊ ဆိုင်ခန်းများကို လက်သိပ်ထိုး အရောင်းအဝယ်ပြုလုပ်ထားသူများမှာ လုံးဝဆုံးရှုံးမှုနှင့် ရင်ဆိုင်ရမည်ကို စိုးရိမ်နေကြသည်။ ဘောလုံးကွင်းအနီး နေထိုင်သူတစ်ဦးက “ဆိုင်ခန်းကတော့ ပြည်နယ်အားကာ အပိုင်ပါ။ ဆိုင်ခန်းရှင်တွေက ပြန် ငှားတာပါ။ ငှားတယ်ဆိုတာကလည်း တစ်နည်းပြောရရင် အပိုင်ပေါ့။ ဘယ်လောက်ပိုင်တယ် ပြောပြော နှစ်တိုင်း အခွန်ဆောင်ရတယ်။ ပြောင်းဆို ပြောင်းရတာပဲလေ။ လက်သိပ်ထိုး အရောင်းအဝယ် လုပ်ထားတဲ့ လူတွေတော့ လုံးဝဆုံးမယ်” ဟု ရှင်းပြသည်။ ရှမ်းပြည်နယ် အားကစားကွင်းမှာ ပရိသတ် ၇ ထောင်အထိ ဝင်ဆံ့ပြီး၊ ထိုအားကစားကွင်း ဘေးရှိ ဆိုင်ခန်းများ သည် စစ်အာဏာ မသိမ်းမီ ၂၀၁၆ ခုနှစ်၌လည်း လမ်းဧရိယာနှင့် မလွတ်သဖြင့် ဆိုင်ခန်းရှင်များက ကိုယ်ပိုင်ငွေ ဖြင့် ပြုပြင်တည်ဆောက်ခဲ့ဖူးသည်ဟု ဆိုကြသည်။  

တောင်ကြီးတွင် ဆိုင်ခန်း ၁၀၀ ကျော်ဖယ်ရှားရန် ညွှန်ကြား

တောင်ကြီးတွင် ဆိုင်ခန်း ၁၀၀ ကျော်ဖယ်ရှားရန် ညွှန်ကြား သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၉ ရက်။  ရှမ်းပြည်၏ မြို့တော်၊ တောင်ကြီ…

  • December 9, 2025
ကေတုမတီ လေဆိပ်ကို အသေခံ ဒရုန်းဖြင့် ပစ်ခတ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၉ ရက်။ လေကြောင်းရန် ကာကွယ်ရေးစနစ်ဖြင့် ထားရှိသည့် ကေတုမတီလေဆိပ်ကို အသေခံဒရုန်းဖြင့် တော်လှန်ရေး တပ်ဖွဲ့ တိုက်ခိုက်ခဲ့ရာ လေကာစနစ် (Jammer) ပျက်စီးသွားသည်ဟု ဝရဇိန်တပ်ဖွဲ့က ထုတ်ပြန်သည်။ ပဲခူးတိုင်း၊ တောင်ငူမြို့နယ်ရှိ စစ်ကော်မရှင်၏ တိုက်လေယာဉ်များ အဓိကထားရှိရာ ကေတုမတီ လေတပ်စခန်း ဌာနချုပ်ကို ဝရဇိန်တပ်ဖွဲ့က ဒီဇင်ဘာ ၄ ရက်နေ့တွင် အသေခံဒရုန်းများဖြင့် လျှပ်တပြက် တိုက်ခိုက်ခဲ့ခြင်း ဖြစ်သည်။ အဆိုပါ တိုက်ခိုက်ခံရမှုထဲ လေဆိပ်၏ လေကြောင်းထိန်းချုပ်ရေးတာဝါ (ATC) နှင့် လေကာစနစ် (Jammer) တို့ ထိခိုက်ပျက်စီးခဲ့ကြောင်း ဝရဇိန်တပ်ဖွဲ့၏ ထုတ်ပြန်ချက်အရ သိရသည်။ ဝရဇိန်တပ်ဖွဲ့ သတင်းနှင့်ပြန်ကြားရေး တာဝန်ခံတစ်ဦး၏ ပြောကြားချက်အရ ၎င်းတို့ တိုက်ခိုက်လိုသည့် ရည် ရွယ်ချက် ပြည့်မီရန် ရန်ပုံငွေ အခက်အခဲများစွာ ရင်ဆိုင်ခဲ့ရကြောင်း သိရသည်။ “အဓိကကတော့ ATC နဲ့ Jammer tower ကို တိုက်ခိုက်နိုင်ပါတယ်။ ရည်ရွယ်ချက်က အစီးရေများများနဲ့ တိုက်ခိုက်ချင်တာပါ။ ရံပုံငွေက ဘယ်လိုမှ ရှာလို့မရတော့ ရှိတာနဲ့ အကောင်းဆုံး စီစဉ်လိုက်ရတာပါ” ဟု ၎င်းက ပြောသည်။ ထိုစစ်ဆင်ရေးကို 'Operation Thunderbolt’ အဖြစ် စစ်ကော်မရှင်က သတ်မှတ်ထားသည့် ကေတုမတီ လေဆိပ်အား FPV အသေခံဒရုန်း ၄ စီးဖြင့် တိုက်ခိုက်ခဲ့ခြင်းဖြစ်သည်။ အဆိုပါ ဒရုန်း ၄ စီးအနက် ၂ စီးမှာ ပစ်မှတ်များကို ထိမှန်ခဲ့ပြီး စစ်ကော်မရှင်ဖက်မှ MI-35 ရဟတ်ယာဉ်ဖြင့် တန် ပြန်တိုက်စစ် ဆင်ခဲ့သော်လည်း တပ်ဖွဲ့ဝင်များ အထိအခိုက်အကျအဆုံးမရှိ ဆုတ်ခွာနိုင်ခဲ့ကြောင်း ဝရဇိန်တပ်ဖွဲ့ က ဆိုသည်။ ကေတုမတီလေဆိပ်ကို အသေခံဒရုန်းဖြင့် တိုက်ခိုက်ခဲ့သည့် စစ်ဆင်ရေးကို သံတောင်မြောက်ပိုင်း ပြည်သူ့ ကာကွယ်ရေးအဖွဲ့နှင့် ပူးပေါင်း၍ လုပ်ဆောင်ခဲ့ခြင်း ဖြစ်ပြီး၊ ငွေကြေးမလုံလောက်မှုကြောင့် စစ်ဆင်ရေးအား ၆ လကြာ အချိန်ယူ ပြင်ဆင်ခဲ့ရကြောင်းလည်း ၎င်းတို့ က ဆိုသည်။ ဝရဇိန်တပ်ဖွဲ့သည် ၂၀၂၄ ခုနှစ် ဖေဖော်ဝါရီလတွင် လေကာစနစ် (Jammer) ကို ကျော်လွှားနိုင်သည့် ဒရုန်းများ အား တီထွင်ထုတ်လုပ်နိုင်ခဲ့ခြင်းဖြစ်ပြီး၊ ယင်းသည် တော်လှန်ရေးတပ်ဖွဲ့များအနက် ပထမဆုံး တီထွင်မှုဖြစ် သည်ဟု ဆိုသည်။ ယခုတိုက်ခိုက်မှုတွင်လည်း အဆိုပါ နည်းပညာ အောင်မြင်ခဲ့ကြောင်း ဝရဇိန်တပ်ဖွဲ့က အတည်ပြုပြောဆိုသည်။ ဝရဇိန်တပ်ဖွဲ့ တာဝန်ခံတစ်ဦးက “အရေအတွက်များများနဲ့ ဆက်တိုက် မတိုက်ခိုက်နိုင်တာက လွဲလို့ အခု mission အပေါ်မှာ ကြေနပ်ပါတယ်။ ရန်သူ့လေကာစနစ်ဟာ ကျတော်တို့ ဝရဇိန်ရဲ့ နည်းပညာအောက်မှာ ကျိုးပြတ်ရတာ လက်တွေ့ပါ။ ပြည်သူကို တင်ပြချင်တာကလည်း ကျတော်တို့ကို တာဝန်ပေးပါ၊ ကိုယ်ကျိုး စွန့်ပြီး၊ ပွင့်လင်းမြင်သာစွာနဲ့ တိုင်းပြည်တာဝန် ထမ်းဆောင်ခွင့်ပြုပါလို့ ပြောချင်ပါတယ်” ဟု ပြောသည်။ ဝရဇိန်တပ်ဖွဲ့၏ ရည်ရွယ်ချက်မှာ “ဘယ်ကလာဆိုက်မှန်းမသိ၊ ဘယ်လိုတိုက်သွားတယ်မှန်းမသိ၊ ဘယ်သူတွေ တိုက်သွားတယ်မှန်း မသိအောင် ရန်သူကို Silent mode နဲ့ ချေမှုန်းချင်တာပါ” ဟုလည်း အခြား တပ်ဖွဲ့ဝင် တစ်ဦးက ဆိုသည်။ ယခင်က ကရင်နီပြည်တွင် လက်နက်တပ်ဆင်ခဲ့သည့် ဤတပ်ဖွဲ့သည် ယခုနောက်ပိုင်းတွင် မြေပြန့်သို့ ဆင်းကာ စစ်ကော်မရှင်၏ လေတပ်စခန်းများအား ပစ်မှတ်ထား တိုက်ခိုက်သွားမည်ဟုလည်း အဖွဲ့တာဝန်ရှိသူက ဖြည့်စွက် ပြောသည်။  

ကေတုမတီ လေဆိပ်ကို အသေခံ ဒရုန်းဖြင့် ပစ်ခတ်

ကေတုမတီ လေဆိပ်ကို အသေခံ ဒရုန်းဖြင့် ပစ်ခတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၉ ရက်။  လေကြောင်းရန် ကာကွယ်ရေးစနစ်ဖြင့် ထားရှိသည…

  • December 9, 2025
စစ်ကော်မရှင် ဒရုန်းကြောင့် ဖားကန့်တွင် သားအမိသားအဖ ၃ ဦး သေဆုံး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၈ ရက်။ ကချင်ပြည်၊ ဖားကန့်မြို့နယ်ထဲတွင် စစ်ကော်မရှင်၏ ဒရုန်းဗုံး ပစ်ခတ်မှုကြောင့် မိသားစု ၃ ဦး သေဆုံးခဲ့သည်ဟု ဒေသခံများက ပြောသည်။ ဖားကန့်မြို့ပေါ်ရှိ ဗျူဟာကုန်းမှ စစ်ကော်မရှင်တပ်သားများက ပစ်ခတ်လိုက်သည့် ဒရုန်းဗုံး ထိမှန်ပေါက်ကွဲမှု ကြောင့် မိသားစုတစ်စုတည်းမှ မိဘနှစ်ဦးနှင့်အတူ အသက် ၁၃ နှစ်အရွယ် ကလေးငယ်တစ်ဦးပါ စုစုပေါင်း ၃ ဦး သေဆုံးခဲ့ကြောင်း ဒေသခံသတင်းရင်းမြစ်များက ပြောသည်။ ယမန်နေ့ ဒီဇင်ဘာလ ၇ ရက်နေ့၊ ည ၁၁ နာရီဝန်းကျင်ခန့်တွင် လုံးခင်းအုပ်စု၊ မလောင်ကျေးရွာရှိ နေအိမ်တစ်လုံး ပေါ်သို့ စစ်ကော်မရှင်တပ်၏ ဒရုန်းဗုံးသီး ကျရောက်ပေါက်ကွဲခဲ့ခြင်းဖြစ်သည်။ ဒေသခံအမျိုးသားတစ်ဦးက “သူတို့က ရမ်းသမ်းပစ်လိုက်တာ။ မလောင်ရွာမှာရှိတဲ့ မိသားစုတစ်စုရဲ့ နေအိမ်ကို တည့်တည့်ကျတာ။ အဖေအမေကတော့ ပွဲချင်းပြီးဆုံးသွားတယ်။ မြင်မကောင်းအောင်ဘဲ ဒဏ်ရာတွေရပြီး ဆုံးသွားတာ။ ၄ လသား ကလေးလေးကတော့ အထိအခိုက်မရှိ ကျန်ခဲ့တယ်။ ကလေးငယ်လေးကတော့ မိဘမဲ့ လေး ဖြစ်သွားတာပေါ့” ဟု ပြောသည်။ သေဆုံးသူ မိဘနှစ်ဦးမှာ ပွဲချင်းပြီး သေဆုံးခဲ့ရပြီး၊ အဆိုပါ မိသားစု၏ လသားအရွယ်ကလေးငယ်မှာ အသက်ရှင် ကျန်ရစ်ခဲ့သော်လည်း မိဘမဲ့ဘဝသို့ ရောက်ရှိသွားပြီဟု ဒေသခံများက ပြောသည်။ လက်ရှိတွင် ဖားကန့်မြို့နယ်အတွင်း ကြီးမားသည့် ထိပ်တိုက်တိုက်ပွဲများ မရှိသေးသော်လည်း နှစ်ဖက်တပ်ဖွဲ့များ စောင့်ကြည့်နေသည့် အခြေအနေဖြစ်ပြီး၊ စစ်ကော်မရှင်ဘက်မှ ဒရုန်းဗုံးအပါအဝင် လက်နက်ကြီးများဖြင့် ရမ်းသမ်းပစ်ခတ်မှုများကြောင့် အရပ်သား သေဆုံးမှုများ မကြာမကြာ ဖြစ်ပေါ်နေသည်ဟု ဒေသခံများက ဆိုသည်။ စစ်ကော်မရှင်တပ်သည် ယမန်နေ့ ညပိုင်းမှစ၍ ယနေ့ ဒီဇင်ဘာလ ၈ ရက်နေ့၊ နံနက်ပိုင်းအထိ လက်နက်ကြီးများ နှင့် ဒရုန်းဗုံးများဖြင့် ရမ်းသမ်းပစ်ခတ်နေဆဲ ဖြစ်သည်ဟုလည်း ဒေသခံများက ပြောသည်။ ဒေသခံ အမျိုးသားတစ်ဦးက ယခုလက်ရှိ လှုပ်ရှားမှုများသည် လာမည့်ရွေးကောက်ပွဲနှင့် ဆက်စပ်နိုင်ကြောင်း သုံးသပ် သည်။ “ဖားကန့်မှာက စစ်ရေးလှုပ်ရှားမှုတွေရှိတဲ့အခါမှာ လက်နက်ကြီးတွေ၊ ဒရုန်းတွေနဲ့ အပြန်အလှန် ပစ်ခတ်မှုတွေ ရှိပါတယ်။ ပြီးတော့ ရွေးကောက်ပွဲ ကျင်းပတဲ့ကာလလည်း ဖြစ်နေတော့ သူတို့ဘက်က မြို့တွင်းလှုပ်ရှားပြတာ၊ စစ်ဆေးပြတာတွေ ရှိတယ်။ ရှေ့ရှောက်ပြီးတော့လည်း တိုက်ပွဲတွေ ဖြစ်လာနိုင်တယ်၊ ရွေးကောက်ပွဲကို ဆက် ကျင်းပရင်ပေါ့” ဟု ၎င်းက ပြောသည်။ စစ်ကော်မရှင်တပ်သည် ယခုလအတွင်း ကျင်းပမည့် ရွေးကောက်ပွဲ အောင်မြင်စွာ ဖြစ်မြောက်ရေးအတွက် ဖားကန့်မြို့နယ်တွင်း စစ်အင်အား အလုံးအရင်းဖြင့် နေရာယူထားပြီး နှစ်ဖက် လက်နက်ကိုင်များအကြား မကြာခဏ ထိတွေ့မှုများ ဖြစ်နေသည့် ဒေသလည်း ဖြစ်သည်။ ပြီးခဲ့သည့် အောက်တိုဘာနှင့် နိုဝင်ဘာလများတွင်လည်း နှစ်ဖက်တပ်များ အကြား ထိတွေ့တိုက်ပွဲများကြောင့် ကလေးငယ်များ အပါအဝင် အရပ်သားသေဆုံးမှုများ မြင့်တက်ခဲ့သည်။  

စစ်ကော်မရှင် ဒရုန်းကြောင့် ဖားကန့်တွင် သားအမိသားအဖ ၃ ဦး သေဆုံး

စစ်ကော်မရှင် ဒရုန်းကြောင့် ဖားကန့်တွင် သားအမိသားအဖ ၃ ဦး သေဆုံး  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၈ ရက်။ ကချင်ပြည်၊ ဖားကန့်မြို့နယ…

  • December 9, 2025
ကချင်-စစ်ကိုင်း အစပ် ဗန်းမောက် မြို့နယ် အတွင်း လေကြာင်း တိုက်ခိုက်မှုကြောင့် အရပ်သား တစ်ဦးသေ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ  ၈ ရက်။ တော်လှန်ရေးတပ်များ ထိန်းချုပ်ထားသော ဗန်းမောက်မြို့နယ်ရှိ တရုတ်လုပ်ငန်းရှင်ပိုင် ရွှေလုပ်ကွက် လေကြောင်း တိုက်ခိုက်ခံရပြီး အရပ်သားတစ်ဦး သေဆုံးသွားသည်ဟု ဒေသခံများက ပြောသည်။ စစ်ကိုင်းတိုင်းဒေသကြီး၊ ဗန်းမောက်မြို့နယ် တောင်ပိုင်းရှိ ရွှေလုပ်ကွက်တစ်ခုအား စစ်ကော်မရှင်တပ်က ဂျက် ဖိုက်တာ လေယာဉ်ဖြင့် ဗုံးကြဲတိုက်ခိုက်ခဲ့ရာ အရပ်သားတစ်ဦး သေဆုံးပြီး တရုတ်လူမျိုးလုပ်ငန်းရှင် အချို့ အပါအဝင် ၅ ဦး ဒဏ်ရာရရှိခဲ့ကြောင်း ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့ (ပအဖ) က ထုတ်ပြန်ချက် အရ သိရသည်။ ဒေသခံအမျိုးသားတစ်ဦးက “မြို့နယ် ၃ ခုဆုံတဲ့နေရာပေါ့လေ။ အဲ့ဒီနေရာမှက တရုတ်လုပ်ငန်းရှင်ပိုင်တဲ့ ရွှေ လုပ်ကွက်က အကြီးကြီး၊ တောင်ကြောတစ်ခုလုံး တရုတ်တွေ လုပ်ကိုင်တဲ့ ရွှေလုပ်ကွက်ပေါ့။ ကြဲသွားတာက ရွှေလုပ်ကွက်ထဲဆိုတော့ တစ်ယောက်သေတယ်။ နောက်ထပ် ၅ ယောက်လောက်က ဒဏ်ရာရတယ်” ဟု ပြောသည်။ ဒီဇင်ဘာလ ၇ ရက်နေ့ မွန်းလွဲ ၂ နာရီဝန်းကျင်ခန့်က ဗန်းမောက်မြို့ပေါ်နှင့် မိုင် ၂၀ ခန့်အကွာတွင် တည်ရှိသော 'သုံးမြေဆုံရွှေလုပ်ကွက်' ကို စစ်ကော်မရှင်က လေကြောင်းမှ တိုက်ခိုက်ခဲ့ခြင်းဖြစ်သည်။ အဆိုပါ ရွှေလုပ်ကွက်သည် အင်းတော်၊ ဗန်းမောက်နှင့် ဝန်းသိုမြို့နယ် သုံးခုဆုံရာဒေသဖြစ်ပြီး၊ တရုတ်လုပ်ငန်း ရှင်များ ပိုင်ဆိုင်လုပ်ကိုင်သည့် လုပ်ကွက်ကြီး ဖြစ်ကြောင်း ဒေသခံများက ဆိုသည်။ လေယာဉ်တိုက်ခိုက်မှုတွင် တံတားဦးမှ တက်လာသည့် ဂျက်ဖိုက်တာ ၂ စီးဖြင့် ဗုံးသီး ၈ လုံးအသုံးပြုကာ ၄ ကြိမ်တိုင်တိုင် ဗုံးကြဲတိုက်ခိုက်ခဲ့သည်ဟု အခြေအနေသိရှိသူများက ပြောသည်။ သေဆုံးသူမှာ အသက် ၃၃ နှစ်အရွယ် ကိုငြိမ်းဆိုသူ ဖြစ်ပြီး ထိခိုက်ဒဏ်ရာရရှိသူ ၅ ဦးအနက်မှ ၂ ဦးသည် တရုတ်လူမျိုး လုပ်ငန်းရှင်များ ဖြစ်သည်ဟု ဒေသခံများက အတည်ပြုသည်။ ယခုရက်ပိုင်းအတွင်း တော်လှန်ရေး အင်အားစုများ သိမ်းပိုက်ထားသည့် ဗန်းမောက်မြို့ပေါ်တွင် နှစ်ဖက်တပ်များ အကြား တိုက်ပွဲများ ပြင်းထန်လျှက်ရှိသည်။ ပြီးခဲ့သည့် နိုဝင်ဘာလ ၃၀ ရက်နေ့မှ စတင်ကာ စစ်ကော်မရှင်တပ်နှင့် ရှမ်းနီအမျိုးသားတပ်မတော် (SNA) ပူးပေါင်းတပ်များက ဗန်းမောက်မြို့ ပြန်လည်ရရှိရေးအတွက် အပြင်းအထန် ထိုးစစ်ဆင်နေခြင်း ဖြစ်သည်။ ဒီဇင်ဘာလ ၇ ရက်နေ့အထိ စစ်ကော်မရှင်တပ်သည် ဗန်းမောက်မြို့နယ်အတွင်း လေကြောင်းအသုံးပြု တိုက်ခိုက် မှု ၆ ရက်ဆက်တိုက် ရှိလာပြီ ဖြစ်ကြောင်း ဗန်းမောက်မြို့နယ် ပအဖ က ထုတ်ပြန်ထားသည်။

ကချင်-စစ်ကိုင်း အစပ် ဗန်းမောက် မြို့နယ် အတွင်း လေကြာင်း တိုက်ခိုက်မှုကြောင့် အရပ်သား တစ်ဦးသေ

ကချင်-စစ်ကိုင်း အစပ် ဗန်းမောက် မြို့နယ် အတွင်း လေကြာင်း တိုက်ခိုက်မှုကြောင့် အရပ်သား တစ်ဦးသေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ  …

  • December 9, 2025
မိုးမိတ်မြို့နယ်အတွင်း ဗုံးကြဲတိုက်ခိုက်မှု အရပ်သား ၁၁ ဦးသေဆုံး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၈ ရက်။ တအာင်းအမျိုးသား လွတ်မြောက်ရေးတပ်မတော် (TNLA) ထံမှ ပြန်လည် လွှဲပြောင်းပေးရန် သဘောတူညီ ထားသော မိုးမိတ်မြို့နယ်၊ မြစ်ဆုံကျေးရွာထဲရှိ အရပ်သားများ စုဝေးရာနေရာကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ၁၁ ဦး သေဆုံးခဲ့သည်။ ဒီဇင်ဘာလ ၆ ရက်နေ့တွင် လေကြောင်းတိုက်ခိုက်မှု နှစ်ကြိမ်ပြုလုပ်ခဲ့ရာ စစ်ရှောင်များနှင့် ဒေသခံများ အပါအဝင် အရပ်သား ၁၁ ဦး သေဆုံး ခဲ့ကြောင်း ဒေသခံသတင်းရင်းမြစ်များက အတည်ပြုသည်။ စစ်ကော်မရှင်၏ လေယာဉ်သည် ဒီဇင်ဘာ ၆ ရက်နေ့ နံနက် ၉ နာရီခန့်တွင် မြစ်ဆုံကျေးရွာကို ဗုံးနှစ်ကြိမ် တိုင်တိုင် ကြဲချခဲ့ပြီးနောက် ဒီဇင်ဘာ ၇ ရက်နေ့တွင်လည်း ထပ်မံ၍ လေကြောင်းမှ ဗုံးကြဲတိုက်ခိုက်ခဲ့သေး ကြောင်း ဒေသခံများက ပြောသည်။ လေကြောင်းတိုက်ခိုက်ခံရသည့် နေရာသည် တိုက်ပွဲဖြစ်ပွားနေသည့် စစ်မြေပြင်နေရာမဟုတ်ဘဲ စစ်ဘေး ရှောင်များနှင့် ဒေသခံများ စုဝေးနေထိုင်သည့် နေရာဖြစ်သည်။ သေဆုံးသူ ၁၁ ဦးထဲတွင် ကိုယ်ဝန်ဆောင်အမျိုးသမီးတစ်ဦး အပါအဝင် မိုးကုတ်နှင့် မိုးမိတ်ဒေသများမှ စစ်ဘေးရှောင်လာသူများ ပါဝင်သည်။ စစ်ကော်မရှင်၏ ကျူးလွန်မှုတွင် ပိုမိုဆိုးရွားစေခဲ့သည်မှာ ပထမအကြိမ် ဗုံးကြဲမှုကြောင့် ထိခိုက်ဒဏ်ရာရ နေသူများကို ဒေသခံများက ကူညီကယ်ဆယ်နေစဉ် ဒုတိယအကြိမ် ထပ်မံပစ်ခတ်ခဲ့ခြင်း ဖြစ်သည်။ ယင်းလုပ်ရပ်ကြောင့် သေဆုံးသူများ ထပ်မံဖြစ်ပွားခဲ့ရသည်။ ဒေသခံအမျိုးသားတစ်ဦးက ဖြစ်ရပ်အခြေအနေကို ယခုကဲ့သို့ ပြောသည်။ “လေယာဉ်က ပထမတစ်ကြိမ် ဗုံးကြဲပြီး ထိခိုက်တဲ့သူတွေကို ကျနော်တို့ ဝိုင်းကူညီနေတုန်း ဒုတိယအကြိမ် ထပ်မံပစ်ခတ်ခဲ့တာပါ။ ဒီနေရာက စစ်မြေပြင်မဟုတ်ပါဘူး၊ စစ်ရှောင်ပြည်သူတွေ စုဝေးနေထိုင်တဲ့ အရပ် သားနေရာကို တမင်ပစ်မှတ်ထား တိုက်ခိုက်ခဲ့တာပါပဲ။” မိုးမိတ်မြို့နယ်ကို တအာင်းတပ် TNLA က သိမ်းပိုက်ခဲ့ပြီးနောက် မကြာသေးမီက တရုတ်နိုင်ငံ၏ ကြားဝင် စေ့စပ်မှု ဖြင့် မိုးမိတ်မြို့ကို စစ်ကော်မရှင်ထံ ပြန်လည်လွှဲပြောင်းပေးရန် သဘောတူညီမှု ရယူခဲ့သည်။ အဆိုပါ သဘောတူညီချက်အရ စစ်ကော်မရှင်တပ်သည် မိုးမိတ်မြို့ထဲသို့သာ ပြန်လည်ရောက်ရှိ တပ်စွဲထားဆဲ ဖြစ်ပြီး မြစ်ဆုံကျေးရွာအထိ မရောက်ရှိသေးပေ။ ဒေသခံတစ်ဦးက စစ်ကော်မရှင်တပ်၏ လုပ်ရပ်သည် တည်ဆဲ သဘောတူညီချက်ကို ထပ်မံ ချိုးဖောက်ခြင်း ဖြစ်ကြောင်း ယခုကဲ့သို့ ပြောသည်။ “တရုတ်နိုင်ငံက ကြားဝင်ပြီး မြို့နှစ်မြို့ကို ပြန်လွှဲဖို့ သဘောတူထားချိန်မှာ တိုက်ပွဲမရှိတဲ့ အရပ်သားရွာတွေကို လေကြောင်းနဲ့ တိုက်ရိုက်ပစ်မှတ်ထား တိုက်ခိုက်တာဟာ တည်ဆဲ ငြိမ်းချမ်းရေး သဘောတူညီချက်ကိုပါ စစ်တပ်က ထပ်ချိုးဖောက်တာ ဖြစ်တယ်ဗျ။” ထို့အပြင် တိုက်ခိုက်မှုပြီးနောက် မကွဲသေးသော လေယာဉ်ဗုံးတစ်လုံးသည် ကျေးရွာလမ်းမပေါ်၌ ကျန်ရှိနေခဲ့ရာ အဆိုပါ ဗုံးကြောင့် ရွာသူရွာသားများနှင့် စစ်ရှောင်များအတွက် ထပ်ဆင့်အန္တရာယ်တစ်ခု ဖြစ်ပွားလာနိုင်သည်ဟု စိုးရိမ်ပူပန်မှုများလည်း မြင့်တက်နေသည်။  

မိုးမိတ်မြို့နယ်အတွင်း ဗုံးကြဲတိုက်ခိုက်မှု အရပ်သား ၁၁ ဦးသေဆုံး

မိုးမိတ်မြို့နယ်အတွင်း ဗုံးကြဲတိုက်ခိုက်မှု အရပ်သား ၁၁ ဦးသေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၈ ရက်။ တအာင်းအမျိုးသား လွတ်မြောက…

  • December 9, 2025
FIFA က ၂၀၂၆ ခုနှစ် ကမ္ဘာ့ ဖလား ပွဲစဉ်များ ကြေညာ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၈ ရက်။ ကမ္ဘာမှာ လူကြိုက်အများဆုံး အားကစားပွဲဖြစ်တဲ့ ၂၀၂၆ ခုနှစ် ကမ္ဘာ့ ဖလား အမျိုးသားဘောလုံး ပြိုင်ပွဲ ပွဲစဉ်တွေကို ဒီဇင်ဘာ ၅ ရက်နေ့က ရေးဆွဲခဲ့ပါတယ်။ လာမယ့် ၂၀၂၆ ခုနှစ် ဇွန်လ ၁၁ ရက်နေ့မှာစတင်မယ့် ကမ္ဘာ့ ဖလား ဘောလုံးပြိုင်ပွဲကို မက္ကစီကို၊ အမေရိကန်နဲ့ ကနေဒါ နိုင်ငံ ၃ နိုင်ငံပူးတွဲ ကျင်းပမှာ ပထမဆုံး အဖွင့်ပွဲတွေကိုတော့ မက္ကစီကို နိုင်ငံမှာ စတင်မှာပါ။ ပထမဆုံးပွဲက ဇွန်လ ၁၁ ရက်နေ့ ဂရင်းနစ် စံတော်ချိန် ၂၁း၀၀ နာရီ မြန်မာစံတော်ချိန်နဲ့ ဆိုရင် ဇွန်လ ၁၂ ရက် မနက် ၃နာရီ ခွဲမှာ စတင်မှာ ဖြစ်ပါတယ်။ မက္ကစီကိုစီးတီးမှာ ကျင်းပမယ့် အဲဒီပွဲကိုတော့ မက္ကစီကို အသင်းနဲ့ တောင်အာဖရိက အသင်းတို့ ယှဉ်ပြိုင် ကစားကြမှာ ဖြစ်ပါတယ်။ အသင်း ၄ သင်းစီပါတဲ့ အုပ်စု ၁၂ ခု မှာ အသင်းပေါင်း ၄၈ သင်း ယှဉ်ပြိုင် ကစားကြမှာ ဖြစ်ပါတယ်။ အမေရိကန်၊ ကနေဒါနဲ့ မက္ကစီကိုက နေရာ ၁၆ ခုမှာ ယှဉ်ပြိုင်ကစားကြမှာ ဖြစ်ပြီး နောက်ဆုံး ဖိုင်နယ်ပွဲကိုတော့ အမေရိကန် နိုင်ငံ နယူးယောက်မြို့ နယူးဂျာစီ အားကစားကွင်းမှာ ဇူလိုင်လ ၁၉ ရက်နေ့ ဒေသစံတော်ချိန် နေ့လည် ၃ နာရီ (မြန်မာစံတော်ချိန်ကတော့ ဇူလိုင် ၂၀ ရက် မနက် ၂ နာရီ ခွဲ) မှာ ကစားသွားမှာ ဖြစ်ပါတယ်။ ကမ္ဘာ့ ဖလား အုပ်စု ခွဲတဲ့နေ့မှာတော့ ကမ္ဘာ့ဘောလုံး အဖွဲ့ချုပ် FIFA က FIFA ငြိမ်းချမ်းရေး ဆု ဆိုတဲ့ ဆုအသစ်တစ်ခုကို အမေရိကန် သမ္မတ ဒေါ်နယ် ထရန့်ကို ပေးခဲ့ပါတယ်။ ဘောလုံးပွဲစဉ်တွေကြေညာပြီးနောက်မှာတော့ ကမ္ဘာအနှံ့အပြားမှာ ကိုယ့်အသင်းပါတဲ့ ပွဲစဉ်တွေ ကြည့်နိုင်ဖို့ လေယာဉ်လက်မှတ် ဝယ်ယူမှု အများအပြား ပြုလုပ်နေကြပြီ ဖြစ်ပါတယ်။   ကမ္ဘာ့ ဖလား ပွဲစဉ်များကို အခု လင့်ခ်မှာ ကြည့်ရှု နိုင်ပါတယ်။ https://www.fifa.com/en/tournaments/mens/worldcup/canadamexicousa2026/scores-fixtures?country=QA&wtw-filter=ALL

FIFA က ၂၀၂၆ ခုနှစ် ကမ္ဘာ့ ဖလား ပွဲစဉ်များ ကြေညာ

FIFA က ၂၀၂၆ ခုနှစ် ကမ္ဘာ့ ဖလား ပွဲစဉ်များ ကြေညာ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၈ ရက်။  ကမ္ဘာမှာ လူကြိုက်အများဆုံး အားကစားပ…

  • December 8, 2025
ဂျပန်-တရုတ် စစ်ရေးတင်းမာမှုအတွင်း Lock-on အငြင်းပွားမှုဖြစ်ပွား သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၈ ရက်။ စနေနေ့က ဂျပန်နိုင်ငံ၊ အိုကီနာဝါကျွန်းအနီးရှိ နိုင်ငံတကာရေပိုင်နက်တွင် တရုတ်လေယာဉ်တစ်စင်းက ဂျပန်တိုက်လေယာဉ်များကို ပစ်မှတ်ထားတိုက်ခိုက်နိုင်သည့် ရေဒါဖြင့် ပစ်မှတ်ချိန်မှု (Lock-on) ဖြစ်ပွားခဲ့ခြင်းကြောင့် နှစ်နိုင်ငံအကြား စစ်ရေးတင်းမာမှု ပြင်းထန်ခဲ့သည်။ Lock-on ဟုခေါ်သော ရေဒါဖြင့် ပစ်မှတ်ချိန်မှုသည် ကမ္ဘာ့အသိုင်းအဝိုင်းက ရန်လိုသော အပြုအမူအဖြစ် အသိအမှတ်ပြုထားပြီး တိုက်ပွဲဖြစ်ပွားလုနီးပါး အခြေအနေမျိုးကို ဖြစ်ပေါ်စေနိုင်သည်။ ဤဖြစ်စဉ်သည် နှစ်နိုင်ငံအကြား နှစ်ပေါင်းများစွာအတွင်း အပြင်းထန်ဆုံးသော တိုက်ရိုက်စစ်ရေးရင်ဆိုင်မှု ဖြစ်လာခဲ့သည်။ ဂျပန်အစိုးရက အဆိုပါအပြုအမူကို "အန္တရာယ်ရှိသော" အပြုအမူအဖြစ် ရှုတ်ချခဲ့ပြီး တရုတ်ကို တရားဝင် ကန့်ကွက်ခဲ့သည်။ ထို့အပြင် နောက်ထပ် မဖြစ်ပွားစေရန် တင်းတင်းမာမာ တောင်းဆိုခဲ့သည်။ ဂျပန်လေယာဉ်များကို ပစ်မှတ်ချိန်ခဲ့သော တရုတ် J-15 ဂျက်လေယာဉ်များ သည် တရုတ်၏ လေယာဉ်တင်သင်္ဘော Liaoning မှ ပျံတက်လာခြင်းဖြစ်ပြီး ၎င်းတို့သည် အိုကီနာဝါတောင်ဘက်တွင် စစ်ရေးလေ့ကျင့်နေခဲ့ခြင်းဖြစ်သည်။ တရုတ်ရေတပ်ပြောရေးဆိုခွင့်ရှိသူ ဗိုလ်မှူးကြီး ဝမ်ဆူမန်း (Wang Xuemeng) က ဂျပန်၏ စွပ်စွဲချက်များကို ငြင်းဆိုခဲ့သည်။ ထို့အပြင် ဂျပန်လေယာဉ်များက ကြိုတင်ကြေညာထားသည့် တရုတ်သင်္ဘောအခြေစိုက် စစ်ရေးလေ့ကျင့်မှုများကို အကြိမ်ကြိမ် ချဉ်းကပ်နှောင့်ယှက်ခဲ့သည်ဟု ပြန်လည်စွပ်စွဲခဲ့သည်။ ဤ Lock-on ဖြစ်စဉ်မတိုင်မီကပင် တရုတ်-ဂျပန် ဆက်ဆံရေးမှာ တင်းမာနေခဲ့သည်။ အထူးသဖြင့် ဂျပန်ဝန်ကြီးချုပ်သစ် စေနိုင်း တာကာအီချီ (Sanae Takaichi) က တရုတ်က ထိုင်ဝမ်ကို တိုက်ခိုက်လာပါက ဂျပန်အနေဖြင့် စစ်ရေးအရ ဝင်ရောက်စွက်ဖက်နိုင်ကြောင်း ပြောကြားခဲ့သည့် သဘောထားမျိုး ထွက်ပေါ်လာပြီးနောက် နှစ်နိုင်ငံ ဆက်ဆံရေးမှာ ပိုမိုတင်းမာလာခဲ့ခြင်း ဖြစ်သည်။

ဂျပန်-တရုတ် စစ်ရေးတင်းမာမှုအတွင်း Lock-on အငြင်းပွားမှုဖြစ်ပွား

ဂျပန်-တရုတ် စစ်ရေးတင်းမာမှုအတွင်း Lock-on အငြင်းပွားမှုဖြစ်ပွား သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၈ ရက်။  စနေနေ့က ဂျပန်နိုင်င…

  • December 8, 2025
×Close