သတင်း

ထိုင်းနဲ့ ဂျပန် ရွေးကောက်ပွဲ အာဏာရ ပါတီတွေ ဦးဆောင်နေ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၈ ရက်။   ထိုင်းနဲ့ ဂျပန် နိုင်ငံတွေ မှာ ရွေးကောက်ပွဲတွေ ကျင်းပနေခဲ့ရာမှာ အာဏာရ ပါတီတွေနဲ့ လက်ရှိ ဝန်ကြီးချုပ်တွေက ရွေးကောက်ပွဲတွေ မှာ အသာစီးရ နေပါတယ်။   ဖေဖော်ဝါရီလ ၈ ရက် ညပိုင်းအထိ မဲတွေ ရေတွက်ပြီးသလောက်မှာ ဂျပန်ရွေးကောက်ပွဲမှာ ဝန်ကြီးချုပ် စနာအဲ တာကာအီချီ Sanae Takaichi က ဒီကနေ့ (တနင်္ဂနွေနေ့) ရွေးကောက်ပွဲမှာ မဲအပြတ်နဲ့ အနိုင်ရသွားပါတယ်။   ဒါကြောင့် ဂျပန် နိုင်ငံမှာ အခွန်ဖြတ်တောက် လျော့ချမှုတွေ လုပ်လာမယ်လို့ မျှော်လင့် ရပါတယ်။ ထိုင်းနိုင်ငံမှာတော့ ယာယီ ဝန်ကြီးချုပ် အနုတင် ချန်ဝီရကူးလ် (Anutin Charnvirakul) ရဲ့ ဖုမ်ကျိုင်ထိုင်း (Bhumjaithai) ပါတီက ထိပ်က ပြေးနေပါတယ်။ အခုည ၉ နာရီ မတိုင်မီ မဲရေတွက်မှုတွေ အရ ယာယီဝန်ကြီးချုပ် အနုတင် ရဲ့ Bhumjaithai ပါတီက ၁၉၇ နေရာရထားပြီး လူငယ်တွေကြား ရေပန်းစားတဲ့ People’s Party (ပြည်သူ့ပါတီ) ကတော့ နေရာ ၁၁၀ လောက် အနိုင်ရထားပါတယ်။ တတိယ နဲ့ စတုတ္ထ နေရာတွေကတော့ ဝန်ကြီးချုပ်ဟောင်း သက်ဆင် ရှီနာဝပ် နဲ့ ဆက်နွယ်တဲ့ ဖွေထိုင်း Pheu Thai  ပါတီနဲ့ စစ်တပ် ကျောထောက်နောက်ခံပြုထားတဲ့ Palang Pracharath (PPRP) ပါတီတို့က ရရှိထားပါတယ်။   ထိုင်းနိုင်ငံမှာ အစိုးရ ဖွဲ့ဖို့ အတွက် ဆိုရင် အနည်းဆုံး အောက်လွှတ်တော်မှာ ၂၅၁ နေရာ ရဖို့ လိုအပ်ပါတယ်။   Bhumjaithai က နေရာ ၃၀၀ ကျော် အနိုင်ရမယ်လို့ ခန့်မှန်းချက်တွေလည်း ရှိနေပါတယ်၊။ ဒါပေမယ့် ၂၅၁ နေရာ မပြည့်ခဲ့ရင်တော့ အခြား ပါတီတစ်ခုခုနဲ့ ညွန့်ပေါင်း အစိုးရ ဖွဲ့ရမှာပါ။ ဝန်ကြီးချုပ် အနုတင်က တော့ ရလဒ်တွေ မသိသေးတဲ့အတွက် ဘာကိုမှ မဆုံးဖြတ်ရသေးဘူးလို့ ပြောပါတယ်။   People’s Party ခေါင်းဆောင်ကတော့ သူတို့ ရွေးကောက်ပွဲ ရှုံးသွားတာကို လက်ခံပြီး အတိုက်အခံအဖြစ် ရပ်တည်မယ်လို့ ပြောထားပါတယ်။

ထိုင်းနဲ့ ဂျပန် ရွေးကောက်ပွဲ အာဏာရ ပါတီတွေ ဦးဆောင်နေ

ထိုင်းနဲ့ ဂျပန် ရွေးကောက်ပွဲ အာဏာရ ပါတီတွေ ဦးဆောင်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၈ ရက်။  ထိုင်းနဲ့ ဂျပန် နိုင်ငံတွေ မှာ ရ…

  • February 8, 2026
Burma Act မှ ရန်ပုံငွေများ နယ်စပ်ဖြတ်ကျော် ကူညီရန် စစ်ရှောင်ကူညီသည့် အဖွဲ့များ မျှော်လင့် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၇ ရက်။ အမေရိကန်သမ္မတ အတည်ပြုလိုက်သည့်  Burma Act ရန်ပုံငွေ ဒေါ်လာ ၁၂၁ သန်းကို စစ်ကော်မရှင်လက်သို့ မရောက်စေပဲ နယ်စပ်မှတစ်ဆင့် တိုက်ရိုက်ကူညီရန် စစ်ရှောင်များနှင့် ၎င်းတို့အား ကူညီနေသည့် အဖွဲ့အစည်း များက မျှော်လင့်နေကြသည်။ မြန်မာနိုင်ငံတဝန်း စစ်ရေးပဋိပက္ခများကြောင့် စစ်ဘေးရှောင်ဦးရေ မြင့်တက်နေချိန်တွင် အမေရိကန်သမ္မတက လူသားချင်းစာနာမှုအကူအညီ ဒေါ်လာ ၇၃ သန်း အပါအဝင် စုစုပေါင်း ရန်ပုံငွေ ၁၂၁ သန်းကို Burma Act အရ ဖေဖော်ဝါရီလ ၃ ရက်နေ့တွင် လက်မှတ်ရေးထိုး အတည်ပြုလိုက်သည်။ အဆိုပါ အကူအညီများသည် စစ်ကော်မရှင်ကို ကျော်ဖြတ်ကာ နယ်စပ်ဖြတ်ကျော် လမ်းကြောင်းများမှ တစ်ဆင့် မြေပြင်အဖွဲ့အစည်းများထံ တိုက်ရိုက်ရောက်ရှိလာရန် စစ်ရှောင်ကူညီသူများက မျှော်လင့်နေကြသည်။ လက်ရှိတွင် မြန်မာနိုင်ငံတဝန်း လေကြောင်းတိုက်ခိုက်မှုများနှင့် စစ်ရေးတင်းမာမှုများကြောင့် စစ်ဘေးရှောင်ဦး ရေ ၃ ဒသမ ၆ သန်းကျော်အထိ ရှိလာသော်လည်း နိုင်ငံတကာအကူအညီများမှာ ဆက်တိုက်လျော့နည်းလာနေ သည်။ အထူးသဖြင့် ကရင်ပြည်တွင် စစ်ဘေးရှောင် ၁ ဒသမ ၂ သန်းကျော်ရှိနေပြီး စားနပ်ရိက္ခာ အကျပ်အတည်းနှင့် အသက်ရှင်သန်ရေးအတွက် ပြင်းထန်စွာ ရုန်းကန်နေရသည်။ ကရင်ငြိမ်းချမ်းရေး အထောက်အကူပြု ကွန်ယက် (KPSN) ပြောရေးဆိုခွင့်ရှိသူ နော်ချယ်ရီက “Burma Act အကြောင်းကတော့ ကျမတို့ ကြားထားတာ တစ်လလောက် ရှိပါပြီ။ သူတို့အနေနဲ့ လူသားချင်းစာနာမှု (Humanitarian) အတွက် Support ပေးမယ်လို့ သိရပါတယ်။ ဇန်နဝါရီ ၃၁ ရက်မှာ အထက်လွှတ်တော်က အတည်ပြုလိုက်ပြီလို့ ကြားပါတယ်။ ကျမတို့ကတော့ အမြဲတမ်း Advocacy လုပ်နေတာက အကူအညီတွေကို စစ်ကော်မရှင် ဆီ မသွားဘဲ နယ်စပ်ဖြတ်ကျော် (Cross-border) လမ်းကြောင်းကနေ မြေပြင်မှာ တကယ် အလုပ်လုပ်နေတဲ့ Local organizations တွေဆီ တိုက်ရိုက်ရောက်ဖို့ပါပဲ။ အဲ့ဒါက ကျမတို့ရဲ့ မျှော်လင့်ချက် ပါပဲ” ဟု ပြောသည်။ စစ်ကော်မရှင်တပ်၏ တရစပ် တိုက်ခိုက်မှုများကြောင့် စစ်ဘေးရှောင်များသည် နေရာအတည်တကျမရှိဘဲ ခဏခဏ ပြောင်းရွှေ့နေရသဖြင့် ရေရှည်စီမံကိန်းများထက် တစ်နေ့တာ အသက်ရှင်သန်ရေးမှာ ပိုမိုအရေးကြီးနေ သည်။ နော်ချယ်ရီကပင် ဆက်လက်၍ “ကျမတို့ကလယ်လွီထူး (ညောင်လေးပင်) ဘက်မှာ လေကြောင်း တိုက်ခိုက်မှု တွေ၊ ဒရုန်းတွေနဲ့ တရစပ်လုပ်နေတော့ IDPs တွေက ခဏခဏ ပြောင်းရွှေ့နေရတယ်။ ကျမတို့မှာ ရေရှည် အတွက် Plan တွေ ရှိပေမယ့် မြေပြင်မှာတော့ Survival (အသက်ရှင်သန်ရေး) အတွက်ပဲ အကုန်လုံး ရုန်းကန် နေရတာပါ။ မိသားစုတစ်စုကို ဆန် ၅ အိတ်လောက် ပေးချင်ပေမယ့် လက်ရှိမှာ ၁ အိတ်လောက်ပဲ ပေးနိုင်တဲ့ အခြေအနေမျိုး ဖြစ်နေပါတယ်” ဟု ရှင်းပြသည်။ ထိုင်း-ကရင်နီနယ်စပ်ရှိ ဒုက္ခသည်စခန်းများတွင်လည်း ရန်ပုံငွေဖြတ်တောက်မှုကြောင့် ဒုက္ခသည် ၈၀ ရာခိုင်နှုန်း ကျော် ရိက္ခာပြတ်တောက်မည့် အန္တရာယ်နှင့် ရင်ဆိုင်နေရသည်။ ကျန်းမာရေးဝန်ဆောင်မှု ပေးနေသည့် IRC ကဲ့သို့ အဖွဲ့အစည်းများမှာလည်း လာမည့် မတ်လတွင် လုပ်ငန်းများ ရပ်နားတော့မည် ဖြစ်သည်။ ကရင်နီဒုက္ခသည်ကော်မတီ (KnRC) ဥက္ကဋ္ဌ ဦးနေကော်ထူးက “တကယ်လို့ ရလာခဲ့ရင်တော့ ဒါက အပေါင်း လက္ခဏာပေါ့။ အခု ကျန်းမာရေးဝန်ဆောင်မှုတွေ လျှော့ချလိုက်လို့ လူထုတွေက မရှိတဲ့ကြားကနေ ကိုယ့်ဘာ သာ ဆေးရုံသွားနေရတာဆိုတော့ ရလာရင်တော့ အဲ့ဒီဘက်ကို အများကြီး အထောက်အကူ ဖြစ်သွားမှာပါ။ နောက်ပြီး အရင်က NGO တွေ ကူညီခဲ့တဲ့ ရေပေးဝေရေးနဲ့ အမှိုက်သိမ်းစနစ်တွေမှာလည်း အခက်အခဲတွေ ရှိနေတာပါ” ဟု ပြောသည်။ ယခုအတည်ပြုလိုက်သော အမေရိကန်၏ ဘတ်ဂျက်တွင် လူသားချင်း စာနာမှုဆိုင်ရာ ရိက္ခာနှင့် ဆေးဝါးများ အပြင်၊ လက်နက်မဟုတ်သော အကူအညီများ၊ ရိုဟင်ဂျာများအတွက် တရားမျှတမှု ရှာဖွေရေးနှင့် နိုင်ငံရေး အကျဉ်းသားများအား ပံ့ပိုးရေးတို့ ပါဝင်နေသည်။ နိုင်ငံတကာ အကူအညီများကို စစ်ကော်မရှင်အား ကျော်ဖြတ်ကာ နယ်စပ်ဖြတ်ကျော်လမ်းကြောင်းများမှ တစ်ဆင့် မြေပြင်အခြေစိုက် လူမှုအဖွဲ့အစည်းများဆီ တိုက်ရိုက်ဖြန့်ဝေခြင်းသည်သာ ဒုက္ခသည်များထံ အကူအညီ အမှန်တကယ် ရောက်ရှိနိုင်မည့် တစ်ခုတည်းသော နည်းလမ်းဖြစ်ကြောင်း ကူညီပေးနေသူများက ပြောသည်။  

Burma Act မှ ရန်ပုံငွေများ နယ်စပ်ဖြတ်ကျော် ကူညီရန် စစ်ရှောင်ကူညီသည့် အဖွဲ့များ မျှော်လင့်

Burma Act မှ ရန်ပုံငွေများ နယ်စပ်ဖြတ်ကျော် ကူညီရန် စစ်ရှောင်ကူညီသည့် အဖွဲ့များ မျှော်လင့် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၇ ရက်။…

  • February 7, 2026
တီမောတရားရုံးက မြန်မာစစ်ခေါင်းဆောင်များ၏ ရာဇဝတ်မှုကြီးများအား လက်ခံ ကြားနာမည် အာဆီယံ သမိုင်းတွင် အဖွဲ့ဝင် နိုင်ငံ အချင်းချင်းကြား ပထမဆုံး လက်ခံကြားနာခြင်း ဖြစ် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၇ ရက်။ အာဆီယံသမိုင်းတွင် ပထမဆုံးအကြိမ်အဖြစ် မြန်မာစစ်ခေါင်းဆောင်များကို အာဆီယံ နိုင်ငံ တစ်နိုင်ငံ ဖြစ်သော အရှေ့တီမောတရားရုံးက အမှုလက်ခံ ဖွင့်လှစ်လိုက်ပြီဟု ချင်းလူ့အခွင့်အရေးအဖွဲ့ (CHRO) က ထုတ်ဖော်ပြောကြားလိုက်သည်။ မြန်မာနိုင်ငံအတွင်း ကျူးလွန်ခဲ့သည့် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများ အတွက် ဗိုလ်ချုပ်မှူးကြီး မင်းအောင်လှိုင် အပါအဝင် ထိပ်တန်းစစ်ဘက်အရာရှိ ၁၀ ဦးကို အရေးယူရန် အရှေ့တီမော (Timor-Leste) နိုင်ငံ တရားစီရင်ရေး အာဏာပိုင်များက လုပ်ငန်းစဉ်များ စတင်လိုက်ခြင်း ဖြစ်သည်။ အဆိုပါ တရားစွဲဆိုမှုကို ပြီးခဲ့သည့် ဇန်နဝါရီလ ၁၂ ရက်နေ့က တင်သွင်းခဲ့ခြင်းဖြစ်ပြီး တီမောတရားရုံးက လက်ခံ ကာ ရှေ့နေခန့်အပ်ခြင်း အပါအဝင် ဥပဒေကြောင်းအရ စစ်ဆေးမှုများ ဆောင်ရွက်နေပြီဖြစ်ကြောင်း CHRO နှင့် Myanmar Accountability Project (MAP) တို့က ပူးတွဲအတည်ပြုခဲ့ကြသည်။ ချင်းလူ့အခွင့်အရေးအဖွဲ့ (CHRO) ၏ စီမံကိန်းမန်နေဂျာ ဆလိုင်းမာန်ဟရဲလျန်က “တီမောလက်စ်တေးနိုင်ငံမှာ လွန်ခဲ့တဲ့ ၁၂ ရက်နေ့မှာ ကျနော်တို့ ချင်းပြည်နယ်မှာ စစ်အစိုးရကနေ ကျူးလွန်တဲ့ စစ်ရာဇဝတ်မှုရယ် လူသား မျိုးနွယ်စုအပေါ် ကျူးလွန်တဲ့ ရာဇဝတ်မှုနဲ့ ပတ်သက်ပြီးတော့ တိုင်တန်းချက် ကျနော်တို့ လျှောက်လဲခဲ့တယ်။ အဲ့ဒီလျှောက်လဲချက်ကို ဖေဖော်ဝါရီလ ၁ ရက်နေ့မှာပဲ လက်ခံပြီးတော့ စစ်ဆေးဖို့ သူတို့က ကျနော်တို့ကို အကြောင်းကြားလာတယ်ပေါ့။ အခုသူတို့ ရှေ့နေလည်း ခန့်ထားပြီပေါ့နော်။ သူတို့ရဲ့ ဥပဒေလမ်းကြောင်း အတိုင်း သူတို့ ဆောင်ရွက်သွားပါလိမ့်မယ်” ဟု ပြောသည်။ ယခုတရားစွဲဆိုမှုတွင် ၂၀၂၂ ခုနှစ်အတွင်း ချင်းပြည်နယ် မတူပီမြို့နယ်၌ ကလေးငယ်တစ်ဦးနှင့် ဂျာနယ်လစ် တစ်ဦး အပါအဝင် လူ ၈ ဦးကို လည်ပင်းလှီးဖြတ် သတ်ဖြတ်မှု၊ ကိုယ်ဝန်ဆောင်အမျိုးသမီးတစ်ဦးအား ခင်ပွန်း ဖြစ်သူရှေ့တွင် အုပ်စုဖွဲ့ မုဒိမ်းကျင့်မှု၊ ခရစ်ယာန်သင်းအုပ်ဆရာ ၄ ဦးကို သတ်ဖြတ်မှုတို့ ပါဝင်သည်။ ထို့အပြင် မင်းတပ်မြို့နယ် ဆေးရုံနှင့် ဘာသာရေး အဆောက်အအုံများကို လေကြောင်းမှ တိုက်ခိုက်မှု စသည့် အဓိကအချက် ၅ ချက်ကို အခြေခံထားခြင်း ဖြစ်သည်။ အရှေ့တီမောနိုင်ငံသည် ၎င်းတို့နိုင်ငံပြင်ပတွင် ဖြစ်ပွားသည့် ပြစ်မှုများကို နိုင်ငံတကာ တရားစီရင်ပိုင်ခွင့် (Universal Jurisdiction) အရ လက်ခံစစ်ဆေးရန် ဖွဲ့စည်းပုံအခြေခံဥပဒေ၌ လမ်းဖွင့်ပေးထားသည့်အတွက် ယခုကဲ့သို့ ရွေးချယ်တရားစွဲဆိုရခြင်း ဖြစ်ကြောင်းလည်း CHRO က ရှင်းပြသည်။ ဆလိုင်းမာန်ဟရဲလျန်က “အာဆီယံအဖွဲ့ဝင်နိုင်ငံ ဖြစ်တဲ့ တီမောလက်စ်တေးက ဒီလိုလက်ခံခြင်းအားဖြင့် စစ်ကောင်စီက နိုင်ငံတကာ ရာဇဝတ်ကောင်တွေ ဖြစ်တယ်ဆိုတဲ့ဟာကို တခြားနိုင်ငံတခြားအစိုးရတွေကလည်း ပိုပြီးတော့ အသိအမှတ်ပြုလာမယ် ပိုပြီးတော့ မြန်မာပြည်သူဖက် ရပ်တည်ပေးမယ်။ တရားမျှတရေး အတွက် လည်း တခြားနိုင်ငံတွေက ပိုပြီးတော့ လမ်းဖွင့်ပေးမယ်လို့ ကျနော်တို့က ယူဆတယ်ပေါ့နော်” ဟု ဆက် ပြောသည်။ ယခုလုပ်ဆောင်ချက်သည် အာဆီယံအဖွဲ့ဝင်နိုင်ငံ အချင်းချင်းကြားတွင် ပထမဆုံးအကြိမ် တရားစွဲဆိုမှု ဖြစ်လာ ပြီး မြန်မာပြည်သူများအတွက် တရားမျှတမှုရရှိရန် အရေးပါသည့် မှတ်တိုင်တစ်ခုဖြစ်ကြောင်း MAP ၏ ညွှန်ကြားရေး မှူး Chris Gunness က ဆိုသည်။ ဆလိုင်းမာန်ဟရဲလျန်က “တီမောနိုင်ငံကနေ မြန်မာပြည်ထုကိုယ်စား ရပ်တည်ပေးပြီးတော့ ဒီလို ဆောင်ရွက် ပေးတဲ့အတွက် ကျနော်တို့ အရမ်းကို ကျေးဇူးတင်တယ်ပေါ့နော်။ ကျနော်တို့ကို အားဖြစ်စေတယ်။ တစ်ခြား အာဆီယံ အဖွဲ့ဝင် နိုင်ငံတွေကလည်း မြန်မာပြည်သူလူထုရဲ့အသံ၊ ကြုံတွေ့နေရတဲ့ အကြမ်းဖက်မှုတွေကိုလည်း ပိုပြီး နားထောင် ပေးပြီးတော့ ကျနော်တို့အရေးထဲမှာ ပါလာပေးလိမ့်မယ်လို့ ကျနော်တို့ ယုံကြည်ပါတယ်။ တခြားနိုင်ငံတွေ ကိုလည်း တီမောနိုင်ငံရဲ့ လုပ်ဆောင်မှုတွေကို အားပေးကြဖို့ တိုက်တွန်းချင်တယ်” ဟု တိုက် တွန်းထားသည်။ လက်ရှိတွင် နိုင်ငံတကာ ရာဇဝတ်မှု ကျူးလွန်မှုဖြင့် တရားစွဲဆိုထားခြင်းဖြစ်သည့် အတွက် စစ်ကော်မရှင် အနေဖြင့် ကန့်ကွက်မှုများ လုပ်ဆောင်နိုင်ခွင့်ရှိမည် မဟုတ်ကြောင်းလည်း ဆလိုင်းမာန်ဟရဲလျန်က ပြောသည်။ ဓါတ်ပုံ - CHRO

တီမောတရားရုံးက မြန်မာစစ်ခေါင်းဆောင်များ၏ ရာဇဝတ်မှုကြီးများအား လက်ခံ ကြားနာမည်။ အာဆီယံ သမိုင်းတွင် အဖွဲ့ဝင် နိုင်ငံ အချင်းချင်းကြား ပထမဆုံး လက်ခံကြားနာခြင်း ဖြစ်

တီမောတရားရုံးက မြန်မာစစ်ခေါင်းဆောင်များ၏ ရာဇဝတ်မှုကြီးများအား လက်ခံ ကြားနာမည်။ အာဆီယံ သမိုင်းတွင် အဖွဲ့ဝင် နိုင်ငံ အချင်းချင်းကြား ပထမဆုံး လက်ခံကြားနာ…

  • February 7, 2026
မော်ချီးမြို့အတွင်း ဗုံးကြဲ တိုက်ခိုက် သဖြင့် သက်ကြီးရွယ်အို အဖွားတစ်ဦး သေဆုံး သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၇ ရက်။ ကရင်နီ (ကယား) ပြည်၊ မော်ချီးမြို့အတွင်းသို့ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ သက်ကြီးရွယ်အို အဖွားတစ်ဦး သေဆုံးခဲ့ပြီး နေအိမ်များ မီးလောင်ပျက်စီးကုန်သည်ဟု ဒေသခံများက ပြော သည်။ ပြီးခဲ့သည့် ဖေဖော်ဝါရီ ၅ ရက်နေ့ နံနက် ၁၂ နာရီဝန်းကျင်ခန့်တွင် မော်ချီးမြို့၊ လောလိုထီး အမှတ် (၄) ရပ်ကွက် အတွင်းသို့ စစ်ကော်မရှင်တပ်က တိုက်ပွဲဖြစ်ပွားခြင်းမရှိဘဲ ဂျက်တိုက်လေယာဉ် တစ်စင်းဖြင့် ဗုံးနှစ်လုံး ကြဲချ တိုက်ခိုက်ခဲ့ခြင်း ဖြစ်သည်။ အဆိုပါ လေကြောင်း တိုက်ခိုက်မှုကြောင့် အသက် ၇၄ နှစ်အရွယ် အဖွားတစ်ဦးမှာ နေအိမ်ပေါ်သို့ ဗုံးတည့်တည့် ကျရောက်ခဲ့သဖြင့် ပွဲချင်းပြီး သေဆုံးခဲ့ရပြီး အခြားဒေသခံ ၃ ဦးလည်း ထိခိုက်ဒဏ်ရာများ ရရှိခဲ့သည်။ ဖြစ်စဉ်နှင့် ပတ်သက်၍ နီးစပ်သူတစ်ဦးက “အဖွားအို တစ်ယောက်က ပွဲချင်းပြီးပဲ။ သူ့အိမ်ပေါ် တည့်တည့် ကျ တာ သူဘယ်လိုမှ ပြေးမရဘူး။ ကျန်တဲ့သူတွေတော့ တအားမဖြစ်ပါဘူး။ ရှပ်ထိ ဘာညာလောက်ပါပဲ။ ဒဏ်ရာ ရတာတော့ ရတယ်။ ဟိုလို အသက်အန္တရာယ်စိုးရိမ်ရတာတော့ မရှိဘူး” ဟု ပြောသည်။ ဗုံးကြဲခံရမှုကြောင့် လူနေအိမ် ၆ လုံးမှာလည်း မီးလောင်ပြာကျ ပျက်စီးသွားခဲ့ပြီး ဒဏ်ရာရရှိသူများကို မြေပြင် အဖွဲ့အစည်းများက ဆေးကုသမှုပေးလျက်ရှိသည်။ မော်ချီးဒေသတွင် ပြီးခဲ့သည့် ဇန်နဝါရီ ၃၀ ရက်နေ့ကလည်း အမှတ် (၄) ကျင်းရှိ ခဲလုပ်ငန်းခွင်တစ်ခုကို စစ်ကော်မရှင်က ဗုံးကြဲခဲ့သဖြင့် အရပ်သား ၆ ဦး ထိခိုက်ခဲ့ဖူးရာ၊ ယခုတိုက်ခိုက်မှုမှာ တစ်ပတ်အတွင်း နှစ်ကြိမ် မြောက် ဖြစ်လာခြင်း ဖြစ်သည်။ ဒေသတွင်း လေကြောင်းကင်းထောက်သူ တစ်ဦးက “ဒီနောက်ပိုင်းက လေကြောင်းက မမှန်တော့ဘူး။ ကင်း ထောက်ရ တအားခက်လာတယ်။ ဒီနေ့က ဒီချိန် လာတယ်ဆိုရင် နက်ဖန်က ဒီချိန် ဟုတ်ချင်မှ ဟုတ်မယ်။ မနက်၊ နေ့၊ ညမရွေး ကြဲနေတာပဲ။ လူတွေလည်း စားဝတ်နေရေးနဲ့ဆိုတော့ သတိမထားနိုင်တော့ဘူး။ မနေ့ညဆိုလည်း ရုတ်တရက်ပဲလေ။ ၁၂ ဆိုတာက ဒီဖက်မှာ အိပ်မောကျနေပြီ” ဟု လက်ရှိအခြေအနေကို ရှင်းပြသည်။ သတ္တုတွင်းလုပ်ငန်း မြောက်မြားစွာရှိသည့် မော်ချီးဒေသကို စစ်အာဏာသိမ်းပြီးနောက်ပိုင်း စစ်ကော်မရှင်က လေကြောင်းမှ အကြိမ် ၂၅ ကြိမ်ခန့်အထိ တိုက်ခိုက်ထားကြောင်း မြေပြင်စောင့်ကြည့်သူများက ဆိုသည်။ စစ်ကော်မရှင်တပ်သည် ဘော်လခဲမြို့မှတစ်ဆင့် မော်ချီးမြို့သို့ စစ်ကြောင်းထိုးနိုင်ရန်အတွက် ရွေးကောက်ပွဲ လုံခြုံရေး အကြောင်းပြချက်ဖြင့် ယခုကဲ့သို့ လေကြောင်းပစ်ကူများကို မကြာခဏ အသုံးပြုနေခြင်းဖြစ်သည်။ လက်ရှိတွင် မော်ချီးဒေသကို ကရင်နီတပ်မတော် (KA) နှင့် ကရင်နီအမျိုးသား စည်းလုံးညီညွတ်ရေးအဖွဲ့ (KNSO) တို့က ပူးပေါင်းထိန်းချုပ်ထားကြောင်း သိရသည်။  

မော်ချီးမြို့အတွင်း ဗုံးကြဲ တိုက်ခိုက် သဖြင့် သက်ကြီးရွယ်အို အဖွားတစ်ဦး သေဆုံး

မော်ချီးမြို့အတွင်း ဗုံးကြဲ တိုက်ခိုက် သဖြင့် သက်ကြီးရွယ်အို အဖွားတစ်ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၇ ရက်။  က…

  • February 7, 2026
ညောင်ဦးမှ ဈေးသည်နှစ်ဦးကို စစ်ကော်မရှင် တပ်က ဖမ်းဆီးသွား သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၇ ရက်။ သံဃာတော်များက လိုက်လံတောင်းပန်သော်လည်း ဖမ်းဆီးထားသည့် ညောင်ဦးမြို့နယ်ထဲက ဈေးသည် လူငယ်နှစ်ဦးကို စစ်ကော်မရှင်က လွှတ်မပေးဘဲ ဖမ်းဆီးသွားသည်ဟု ဒေသခံများက ပြောသည်။ မန္တလေးတိုင်းဒေသကြီး၊ ညောင်ဦးမြို့နယ်အတွင်း ကျေးရွာစဉ်လှည့် စစ်ကြောင်းထိုးနေသည့် စစ်ကော်မရှင်တပ် က ဈေးသည်လူငယ်နှစ်ဦးကို ဖမ်းဆီးသွားခြင်း ဖြစ်သည်။ အဆိုပါ စျေးသည် လူငယ်နှစ်ဦးကို ပြန်လွှတ်ပေးရန် သံဃာတော်များက မေတ္တာရပ်ခံတောင်းပန်ခဲ့သော်လည်း စစ်ကော်မရှင်ဘက်က လက်မခံဘဲ ဖမ်းဆီးခေါ်ဆောင်သွားကြောင်း ဒေသခံများ၏ ပြောပြချက်အရသိရသည်။ ဖြစ်စဉ်နှင့် ပတ်သက်၍ မြောင်ကျေးရွာမှ ဒေသခံတစ်ဦးက “အဖမ်းခံရတဲ့ ကောင်လေးနှစ်ယောက်ကို လွှတ် ပေးဖို့ လယ်ကန်နဲ့ မီးလောင်ဖျားရွာက ဘုန်းကြီး ၄ ပါးက လိုက်လာပြီး တောင်းပန်ပေမဲ့ လွှတ်မပေးခဲ့ဘူး။ ငွေမရလို့လဲဖြစ်မယ်၊ စစ်မှုထမ်းအဖြစ် ရောင်းစားဖို့လဲ ဖြစ်နိုင်တယ်။ စစ်မှုထမ်းဈေးက သိန်းရာကျော်တယ်” ဟု ပြောသည်။ ပြီးခဲ့သည့် ဖေဖော်ဝါရီ ၂ ရက်နေ့မှစတင်ကာ အင်အား ၆၀ ခန့်ဖြင့် စစ်ကြောင်းထိုးလာသည့် စစ်ကော်မရှင်တပ် ဖွဲ့သည် သပွတ်စုကျေးရွာတွင် ရွာစဉ်လှည့်ဈေးရောင်းသည့် လူငယ်တစ်ဦးနှင့် လယ်ကန်ကျေးရွာပြင်တွင် စစ်ကြောင်းရှောင်ရန် ထွက်ပြေးသည့် လူငယ်တစ်ဦးတို့ကို ဖမ်းဆီးခဲ့ခြင်းဖြစ်သည်။ အဆိုပါလူငယ်နှစ်ဦးမှာ မီးလောင်ဖျားနှင့် လယ်ကန်ကျေးရွာတို့မှ ဒေသခံများ ဖြစ်ကြသည်။ ဖမ်းဆီးခံရသူများကို ပြန်လည်လွတ်မြောက်နိုင်ရေးအတွက် လယ်ကန်ကျေးရွာနှင့် မီးလောင်ဖျားကျေးရွာတို့မှ သံဃာတော် ၄ ပါးက စစ်ကြောင်းနောက်သို့ လိုက်လံကာ မေတ္တာရပ်ခံခဲ့ကြသော်လည်း အချည်းနှီးသာ ဖြစ်ခဲ့ ရသည်။ စစ်ကော်မရှင် စစ်ကြောင်းသည် သပွတ်စု၊ ကပ်သခေါင်း၊ လျှော်ပင်အိုင့်နှင့် လယ်ကန်ကျေးရွာများကို ဝင်ရောက် မွှေနှောက်ကာ ဖုန်းနှင့် အဝတ်အစားများ လုယက်ယူငင်ခြင်း၊ ဒေသခံများ၏ ကြက်များကို ဖမ်းဆီးချက်စားခြင်း နှင့် နေအိမ်တစ်လုံးကို မီးရှို့ခြင်းများ ပြုလုပ်ခဲ့သည်။ “ကြက်တွေကိုတော့ စပါယ်ရှယ်ချက်စားသွားကြတာပေါ့။ ရွာကို မီးရှို့မသွားကြတာကိုပဲ မောင်မင်းကြီးသား တွေကို ကျေးဇူးတင်ရမလိုပါပဲ” ဟု လျှော်ပင်အိုင့်ရွာခံတစ်ဦးက စစ်ကြောင်း၏ လုပ်ရပ်ကို ပြောပြသည်။ လက်ရှိတွင် အဆိုပါစစ်ကြောင်းသည် ကျောက်ပြင်ကန်ကျေးရွာမှ တစ်ဆင့် ဂန့်ဂါကျေးရွာဘက်သို့ ဆက်လက် ထွက်ခွာသွားပြီဖြစ်ပြီး၊ လမ်းခရီးတစ်လျှောက်ရှိ နေအိမ်များကို ဝင်ရောက်မွှေနှောက်ကာ လိုချင်သည့် ပစ္စည်းများကို ယူဆောင်သွားကြကြောင်း ဆိုသည်။ ညောင်ဦးမြို့နယ် အတွင်းရှိ ကျေးရွာများကို စစ်ကော်မရှင်တပ်က ဇန်နဝါရီလကုန်ပိုင်းမှ စတင်၍ စစ်ကြောင်း ထိုးကာ နေအိမ်များကို မီးရှို့ဖျက်ဆီးမှုများ ဆက်တိုက် လုပ်ဆောင်နေခြင်း ဖြစ်သည်။  

ညောင်ဦးမှ ဈေးသည်နှစ်ဦးကို စစ်ကော်မရှင် တပ်က ဖမ်းဆီးသွား

ညောင်ဦးမှ ဈေးသည်နှစ်ဦးကို စစ်ကော်မရှင် တပ်က ဖမ်းဆီးသွား သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၇ ရက်။  သံဃာတော်များက လိုက်လံတော…

  • February 7, 2026
ရွာအတွင်း အမြောက်များဖြင့် ပစ်ခတ်သဖြင့် ရဟန်းတပါး ဒဏ်ရာရ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၇ ရက်။ ထားဝယ်ခရိုင်ရှိ ကျေးရွာတစ်ရွာ အတွင်းသို့ စစ်ကော်မရှင်တပ်က အမြောက်များဖြင့် ပစ်ခတ် တိုက်ခိုက်ခဲ့ရာ ဘုန်းကြီးကျောင်း အတွင်း ကျရောက်ပေါက်ကွဲပြီး ရဟန်းတစ်ပါး ထိခိုက် ဒဏ်ရာ ရခဲ့သည်ဟု ဒေသခံများ က ပြောသည်။ တနင်္သာရီတိုင်းဒေသကြီး၊ ထားဝယ်ခရိုင် အရှေ့တောဒေသရှိ ဟိန္ဒားကျေးရွာတောင်ထိပ်ရှိ စစ်ကော်မရှင် တပ်စခန်းနေရာဟောင်းတွင် တပ်စွဲထားသည့် KNLA နှင့် PDF ပူးပေါင်းတပ်ဖွဲ့များကို စစ်ကော်မရှင်စစ်ကြောင်းက ဖေဖော်ဝါရီလ ၄ ရက်နေ့ နံနက် ၅ နာရီခန့်က ဝင်ရောက် ပစ်ခတ်ခဲ့ရာမှ နှစ်ဖက်တိုက်ပွဲ ပြင်းထန်ခဲ့ခြင်းဖြစ်သည်။ ထိုသို့ တိုက်ပွဲဖြစ်ပွားပြီးနောက် နံနက် ၉ နာရီခန့်တွင် စစ်ကော်မရှင်၏ စကခ (၈) ဌာနချုပ်မှနေ၍ တိုက်ပွဲဖြစ်ရာ ဟိန္ဒားကျေးရွာဘက်သို့ ဟောင်ဝစ်ဇာ လက်နက်ကြီး ၅ လုံးထက်မနည်း ပစ်ခတ်ခဲ့သည်။ လက်နက်ကြီးကျည်တစ်လုံးမှာ ဟိန္ဒားရွာဘုန်းကြီးကျောင်းဝန်းအတွင်း ကျရောက်ပေါက်ကွဲခဲ့သဖြင့် ဆွမ်းစား ကျောင်းဆောင် ပျက်စီးခဲ့ရုံမျှမက ရဟန်းတော်တစ်ပါးလည်း ဦးခေါင်းတွင် ရှပ်ထိဒဏ်ရာ ရရှိခဲ့ခြင်းဖြစ်သည်။ အခင်းဖြစ်ပွားပုံနှင့် ပတ်သက်၍ လူနာကို ကူညီပို့ဆောင်ပေးခဲ့သူ အသက် ၄၀ ခန့်အရွယ် ရွာသားတစ်ဦးက “ဝုန်း ဆိုပြီးအသံကြားပြီးတာနဲ့ ဘုန်းကြီးကျောင်းထဲမှာ မီးခိုးလုံးကြီး အူထွက်လာတာကို မြင်ရတယ်။ ပြီးတော့ ဘုန်းကြီးတစ်ပါး ခေါင်းမှာထိသွားလို့ ထားဝယ်ဆေးရုံကို လိုက်ပို့ပေးခဲ့ရသေးတယ်” ဟု ပြောသည်။ စစ်ကော်မရှင်တပ်သည် လက်နက်ကြီးဖြင့် သာမက နံနက် ၁၀ နာရီခန့်တွင် ဂျက်တိုက်လေယာဉ် တစ်စင်းဖြင့် ဗုံးနှစ်လုံး ကြဲချတိုက်ခိုက်ခဲ့သလို စက်သေနတ်များဖြင့်ပါ လှည့်ပတ်ပစ်ခတ်ခဲ့ကြောင်း ဒေသခံများက ဆိုသည်။ အရှေ့တောဒေသတွင် စစ်ရေးအခြေအနေမှာ ဆက်လက်တင်းမာနေပြီး ပြီးခဲ့သည့် ဖေဖော်ဝါရီ ၂ ရက်နေ့က လည်း ကျောက်မဲတောင်စခန်းတွင် KNLA နှင့် PDF ပူးပေါင်းတပ်ဖွဲ့များက ဒရုန်း၊ လက်နက်ကြီးများဖြင့် သွားရောက် တိုက်ခိုက်ခဲ့သဖြင့် နှစ်ဖက်အပြန်အလှန် ပစ်ခတ်မှုများ ဖြစ်ပွားခဲ့သည်။ လက်ရှိတွင် အဆိုပါဒေသအတွင်းသို့ စစ်ကော်မရှင်တပ်က အင်အား ၁၀၀ ခန့်ဖြင့် စစ်ကြောင်းထိုးနေကြောင်း ပြည်သူ့ကာကွယ်ရေးတပ်ဖွဲ့ တာဝန်ရှိသူတစ်ဦးက အတည်ပြုပြောဆိုသည်။ ဇန်နဝါရီလအတွင်းကလည်း သင်္ကန်းတုံးကျေးရွာနှင့် ရေဝိုင်းကျေးရွာရှိ PDF စခန်းငယ်များကို စစ်ကော်မရှင် တပ်က အလစ်အငိုက်ဝင်ရောက်တိုက်ခိုက်ကာ မီးရှို့ဖျက်ဆီးမှုများ ပြုလုပ်ခဲ့ကြောင်း ရွာသားများက ပြောသည်။  

ရွာအတွင်း အမြောက်များဖြင့် ပစ်ခတ်သဖြင့် ရဟန်းတပါး ဒဏ်ရာရ

ရွာအတွင်း အမြောက်များဖြင့် ပစ်ခတ်သဖြင့် ရဟန်းတပါး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၇ ရက်။  ထားဝယ်ခရိုင်ရှိ ကျေးရွာ…

  • February 7, 2026
NCGUB ဝန်ကြီးချုပ် ဒေါက်တာစိန်ဝင်း ကွယ်လွန်   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၆ ရက်။   ဒေါ်အောင်ဆန်းစုကြည်၏ ဝမ်းကွဲ အကို၊ ဗိုလ်ချုပ်အောင်ဆန်း၏ တူ၊ အာဇာနည် ခေါင်းဆောင်ကြီး ဦးဘဝင်း၏ သား ပြည်ထောင်စု မြန်မာနိုင်ငံ အမျိုးသား ညွန့်ပေါင်း အစိုးရ (၁၉၉၀-၂၀၁၂) ၏ ဝန်ကြီးချုပ် ဒေါက်တာ စိန်ဝင်းသည် ဖေဖော်ဝါရီလ ၆ ရက် နံနက် ၆ နာရီ အသက် ၈၂ နှစ်အရွယ်တွင် ကွယ်လွန် အနိစ္စ ရောက်ခဲ့သည်။   ဒေါက်တာ စိန်ဝင်းကို ၁၉၄၄ ခုနှစ် ဒီဇင်ဘာလ ၁၆ ရက်တွင် အာဇာနည် ခေါင်းဆောင်ကြီး ဦးဘဝင်းနှင့် ဒေါ်ခင်စော တို့မှ မွေးဖွားသည်။   သူသည် သင်္ချာပညာရှင် တစ်ဦး ဖြစ်ပြီး ၁၉၇၄ ခုနှစ်တွင် အနောက်ဂျာမဏီနိုင်ငံ ဟန်းဘတ် တက္ကသိုလ် (University of Hamburg) မှ သင်္ချာ ပါရဂူ (Ph.D) ဘွဲ့ကို ရရှိခဲ့သည်။   နိုင်ငံရေး လောကတွင် အချိန်ပြည့် တာဝန်မထမ်းဆောင်မီက ရန်ကုန်တက္ကသိုလ် (RASU) နှင့် စစ်တက္ကသိုလ် (DSA) တို့တွင် သင်္ချာ ပါမောက္ခအဖြစ် တာဝန်ထမ်းဆောင်ခဲ့သည်။   ဒေါက်တာစိန်ဝင်းသည် ၁၉၉၀ ရွေးကောက်ပွဲ တွင် အမျိုးသား ဒီမိုကရေစီ အဖွဲ့ချုပ်၏ ပါတီခွဲ ဖြစ်သည့် အမျိုးသား ဒီမိုကရေစီ ပါတီမှ ပေါက်ခေါင်းမြို့နယ်တွင် အနိုင်ရခဲ့သည့် လွှတ်တော် ကိုယ်စားလှယ် တစ်ဦး ဖြစ်သည်။   ထိုစဉ်က စစ်အစိုးရက ၁၉၉၀ ရွေးကောက်ပွဲ ရလဒ်ကို လစ်လျူရှုပြီး အာဏာလွှဲပြောင်းခြင်း မရှိသည့် အခါ ဒေါက်တာ စိန်ဝင်းနှင့် လွှတ်တော် ကိုယ်စားလှယ် အချို့သည် တိုင်းရင်းသား လက်နက်ကိုင် တပ်ဖွဲ့များ၏ လွတ်မြောက်နယ်မြေများသို့ ထွက်ခွာခဲ့ကြသည်။   ၁၉၉၀ ခုနှစ် တွင် ကရင့်အမျိုးသား အဖွဲ့ချုပ် KNU ဌာနချုပ် ရှိရာ မာနယ်ပလောတွင် ပြည်ထောင်စု မြန်မာနိုင်ငံ အမျိုးသား ညွန့်ပေါင်း အစိုးရ NCGUB ကို ဖွဲ့စည်းသည့် အခါ ဝန်ကြီးချုပ် တာဝန်ကို ယူခဲ့သည်။   မြန်မာဒီမိုကရေစီ အင်အားစုများနှင့် တိုင်းရင်းသား လူမျိုးစု တော်လှန်ရေး အဖွဲ့အစည်းများအကြား ပထမဆုံးအကြိမ် စည်းလုံးညီညွတ်မှုကို တည်ဆောက်နိုင်ခဲ့သည့် မာနယ်ပလောစာချုပ်ကို NCGUB, အမျိုးသား ဒီမိုကရေစီ အဖွဲ့ချုပ် လွတ်မြောက်နယ်မြေ NLD-LA နှင့် မြန်မာနိုင်ငံ ဒီမိုကရေစီ မဟာမိတ် အဖွဲ့ချုပ် တို့အကြား ချုပ်ဆိုသည့် မာနယ်ပလော စာချုပ် ချုပ်ဆိုစဉ်က NCGUB ဝန်ကြီးချုပ် အဖြစ် လက်မှတ်ရေးထိုးခဲ့သည်။   ဒေါက်တာစိန်ဝင်းသည့် NCGUB ကို ဖျက်သိမ်းခဲ့သည့် ၂၀၁၂ ခုနှစ် စက်တင်ဘာလ ၁၄ ရက်နေ့အထိ ဝန်ကြီးချုပ်တာဝန်ကို ထမ်းဆောင်ခဲ့သည်။   NCGUB ဝန်ကြီးချုပ် သက်တမ်းတလျောက် နိုင်ငံတကာ စည်းရုံး လှုံ့ဆော်ရေး လုပ်ငန်းများကို လုပ်ဆောင်ခဲ့သူ ဖြစ်သည်။   ဒေါက်တာစိန်ဝင်း ကွယ်လွန်သွားပြီးနောက် ဇနီးဖြစ်သူ ဒေါ်စီစီ နဲ့ သားသမီး ၂ ဦး ကျန်ရစ်ခဲ့သည်။        

NCGUB ဝန်ကြီးချုပ် ဒေါက်တာစိန်ဝင်း ကွယ်လွန်

NCGUB ဝန်ကြီးချုပ် ဒေါက်တာစိန်ဝင်း ကွယ်လွန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၆ ရက်။  ဒေါ်အောင်ဆန်းစုကြည်၏ ဝမ်းကွဲ အကို၊ ဗိုလ်ခ…

  • February 6, 2026
နျူကလီးယား ကန့်သတ်ရေး စာချုပ် သက်တမ်းတိုးရန် ရုရှား အဆိုပြုချက်ကို အမေရိကန် ပယ်ချ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၆ ရက်။ သက်တမ်းကုန်ဆုံးခဲ့ပြီဖြစ်သော မဟာဗျူဟာမြောက် လက်နက်များလျှော့ချရေးစာချုပ်ကို ရုရှားနိုင်ငံဘက်မှ စာချုပ်သက်တမ်းတိုးရန် ကမ်းလှမ်းခဲ့သော်လည်း အမေရိကန်သမ္မတ ဒေါ်နယ်ထရမ့်က အဆိုပါစာချုပ်သည် အမေရိကန်အတွက် အကျိုးအမြတ်မရှိဟုဆိုကာ ပယ်ချခဲ့သည်။ အမေရိကန်ပြည်ထောင်စုနှင့် ရုရှားနိုင်ငံတို့အကြား ချုပ်ဆိုထားသည့် "New START" ဟုခေါ်ဆိုသော စာချုပ်သည့် ၂၀၂၆ ခုနှစ်၊ ဖေဖော်ဝါရီလ ၅ ရက် ယမန်နေ့တွင်သက်တမ်း ကုန်ဆုံးခဲ့သည်။ သမ္မတထရမ့်သည် နျူကလီးယားထိန်းချုပ်ရေးစာချုပ်သစ်တွင် တရုတ်နိုင်ငံကိုပါ ထည့်သွင်းလိုသော်လည်း လက်ရှိအချိန်အထိ တရုတ်နိုင်ငံဘက်မှ စိတ်ဝင်စားမှုတစ်စုံတစ်ရာ ပြသခြင်းမရှိသေးပေ။ ရုရှားနိုင်ငံကမူ စာချုပ်သက်တမ်းကုန်ဆုံးသွားခြင်းအပေါ် ဝမ်းနည်းကြောင်း ထုတ်ဖော်ပြောကြားခဲ့ပြီး ၎င်းတို့အနေဖြင့် တာဝန်ယူမှုရှိစွာ ဆက်လက်ချဉ်းကပ်သွားမည်ဖြစ်သော်လည်း နိုင်ငံတော်အကျိုးစီးပွားကိုသာ ရှေးရှုသွားမည်ဟု ဆိုသည်။ ယခု သက်တမ်းကုန်ဆုံးသွားသော စာချုပ်အရ နှစ်နိုင်ငံစလုံးသည် တပ်ဖြန့်ထားသည့် နျူကလီးယားထိပ်ဖူးအရေအတွက် (၁,၅၅၀) ထက်မပိုရန်နှင့် ဒုံးကျည်/ဗုံးကြဲလေယာဉ် (၇၀၀) ထက်မပိုရန် ကန့်သတ်ချက်များကို လိုက်နာခဲ့ကြရသည်။ ယခုအခါ ကန့်သတ်ချက်များမရှိတော့သဖြင့် ကမ္ဘာ့အင်အားကြီးနှစ်နိုင်ငံသည် နျူကလီးယားအင်အားကို အကန့်အသတ်မရှိ တိုးချဲ့နိုင်သည့် အခြေအနေသို့ ဆိုက်ရောက်သွားခဲ့ပြီဖြစ်သည်။

နျူကလီးယား ကန့်သတ်ရေး စာချုပ် သက်တမ်းတိုးရန် ရုရှား အဆိုပြုချက်ကို အမေရိကန် ပယ်ချ 

နျူကလီးယား ကန့်သတ်ရေး စာချုပ် သက်တမ်းတိုးရန် ရုရှား အဆိုပြုချက်ကို အမေရိကန် ပယ်ချ  သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၆ ရက်။  သ…

  • February 6, 2026
ဂျပန်၏ ကမ်းလွန် မြေရှား သတ္တု စမ်းသပ် တူးဖော်မှု အောင်မြင် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၆ ရက်။ ဂျပန်နိုင်ငံသည် ပင်လယ်ရေအောက်အနက် ၆ ကီလိုမီတာ (၆,၀၀၀ မီတာ) မှ မြေရှားသတ္တု (Rare Earth) ပါဝင်သော ရွှံ့နွံများကို ကမ္ဘာ့ပထမဆုံးအကြိမ်အဖြစ် အောင်မြင်စွာ တူးဖော်နိုင်ခဲ့ကြောင်း ကြေညာခဲ့သည်။ "ချီကျူး (Chikyu)" အမည်ရှိ ပင်လယ်နက်တူးဖော်ရေးသင်္ဘောသည် တိုကျိုမြို့၏ အရှေ့တောင်ဘက်ရှိ မီနာမီတိုရီရှီးမား (Minamitorishima) ကျွန်းအနီးတွင် ယခုကဲ့သို့ စမ်းသပ်တူးဖော်ခဲ့ခြင်းဖြစ်သည်။ ဂျပန်ဝန်ကြီးချုပ် ဆာနိုင်း တာကာအီချီ (Sanae Takaichi) က ယခုအောင်မြင်မှုသည် မြေရှားသတ္တုထုတ်လုပ်မှုအတွက် နိုင်ငံခြားအပေါ် အလွန်အကျွံမှီခိုနေရမှုကို လျှော့ချနိုင်မည့် ပထမဆုံးခြေလှမ်းဖြစ်ကြောင်း ပြောကြားခဲ့သည်။ အထူးသဖြင့် လျှပ်စစ်ကား (EV) ဘက်ထရီနှင့် ကာကွယ်ရေးနည်းပညာများတွင် မရှိမဖြစ်လိုအပ်သော အဆိုပါသတ္တုများကို တရုတ်နိုင်ငံက အဓိကထိန်းချုပ်ထားရာ ဂျပန်အနေဖြင့် ထောက်ပံ့မှု ပြတ်တောက်မည်ကို စိုးရိမ်လျက်ရှိသည်။ သုတေသီများ၏ ခန့်မှန်းချက်အရ အဆိုပါဒေသရှိ မြေရှားသတ္တုပမာဏသည် နှစ်ပေါင်းရာနှင့်ချီ၍ သုံးစွဲနိုင်လောက်အောင် ကြွယ်ဝသည်။ ဂျပန်နိုင်ငံသည် ရရှိလာသော ရွှံ့နွံများကို ဓာတ်ခွဲစမ်းသပ်ပြီး စီးပွားဖြစ် ထုတ်လုပ်နိုင်သည့်အဆင့်အထိ ဆက်လက်ကြိုးပမ်းသွားမည်ဟု ဆိုသည်။

ဂျပန်၏ ကမ်းလွန် မြေရှား သတ္တု စမ်းသပ် တူးဖော်မှု အောင်မြင်

ဂျပန်၏ ကမ်းလွန် မြေရှား သတ္တု စမ်းသပ် တူးဖော်မှု အောင်မြင်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၆ ရက်။  ဂျပန်နိုင်ငံသည် ပင်လ…

  • February 6, 2026
×Close