သတင်း

ရုရှားကိုယ်စားလှယ်နှင့်တွေ့ဆုံမှုတွင် စစ်ခေါင်းဆောင် ပြန်လည်ပေါ်ထွက်လာ

 သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၄ ရက်။ သတင်းမီဒီယာများနှင့် လူမြင်ကွင်းမှ ရက်အတန်ကြာ ပျောက်ဆုံးနေခဲ့သော ယာယီသမ္မတနှင့် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် (ယမန်နေ့) ဖေဖော်ဝါရီ ၃ ရက်နေ့တွင် ရုရှားကိုယ်စားလှယ်အဖွဲ့ နှင့် တွေ့ဆုံကာ လူမြင်ကွင်းသို့ ပြန်လည်ရောက်ရှိလာသည်။ ဗိုလ်ချုပ်မှူးကြီး မင်းအောင်လှိုင်သည် နေပြည်တော်တွင် ရုရှားနိုင်ငံ၊ လုံခြုံရေးကောင်စီ အတွင်းရေးမှူး ဆာဂေးရွှိုင်းဂူ ဦးဆောင်သောအဖွဲ့နှင့် တွေ့ဆုံခဲ့ကြောင်း စစ်ကော်မရှင်က သတင်းထုတ်ပြန်ထားသည်။ ထိုသို့တွေ့ဆုံရာတွင် မြန်မာနှင့် ရုရှားနှစ်နိုင်ငံကြား ပူးပေါင်းဆောင်ရွက်နေသည့် ကဏ္ဍအသီးသီးကို ဆွေးနွေးခဲ့ ကြပြီး အထူးသဖြင့် ကာကွယ်ရေးနှင့် လုံခြုံရေးကဏ္ဍ၊ ဆိုက်ဘာလုံခြုံရေးနှင့် သတင်းအချက်အလက် လုံခြုံရေးဆိုင်ရာ ကိစ္စရပ်များကို အလေးထား ဆွေးနွေးခဲ့ကြသည်ဟု ဆိုသည်။ ထို့ပြင် လက်ရှိ ဒေသတွင်း ပြဿနာတစ်ရပ် ဖြစ်နေသော အွန်လိုင်းငွေကြေးလိမ်လည်မှု တိုက်ဖျက်ရေးတွင် လည်း ရုရှားနှင့် ပူးပေါင်းဆောင်ရွက်မည့် ကိစ္စရပ်များ ပါဝင်ကြောင်း ဖော်ပြထားသည်။ စစ်ခေါင်းဆောင်သည် မန္တလေးမြို့ရှိ အလယ်ပိုင်းတိုင်းစစ်ဌာနချုပ် (လပခ) သို့ ရောက်ရှိနေစဉ် တော်လှန်ရေး တပ်ဖွဲ့တစ်ခု၏ ရှော့တိုက်ဒုံးဖြင့် တိုက်ခိုက်ခြင်းကို ခံခဲ့ရသည်ဟု သတင်းများ ထွက်ပေါ်ခဲ့ပြီးနောက်ပိုင်း လူမြင်ကွင်းမှ ရက်အတန်ကြာ ပျောက်ဆုံးနေခဲ့ခြင်း ဖြစ်သည်။ ထိုအတောအတွင်း နိုင်ငံတော်ပြန်တမ်း အချို့တွင် ဗိုလ်ချုပ်မှူးကြီး မင်းအောင်လှိုင်၏ အမည်ဖြင့် လက်မှတ်ရေး ထိုး ထုတ်ပြန်မှုများ ရှိခဲ့သော်လည်း လူကိုယ်တိုင် ပေါ်ထွက်လာခြင်း မရှိသည့်အတွက် ကျန်းမာရေးနှင့် ပတ်သက်၍ ကောလဟာလ အမျိုးမျိုး ထွက်ပေါ်ခဲ့သည်။ ယမန်နေ့က ထုတ်ပြန်ခဲ့သည့် ရုပ်သံနှင့် ဓာတ်ပုံမှတ်တမ်းများတွင် စစ်ခေါင်းဆောင်ကို ရုရှားကိုယ်စားလှယ်နှင့် အတူ ပြန်လည်မြင်တွေ့ခဲ့ရပြီးနောက် ၎င်း၏လက်မှတ်ဖြင့် ‘ပြည်ထောင်စုအတိုင်ပင်ခံကောင်စီဥပဒေ’ ကိုလည်း ချက်ချင်းဆိုသလို ထုတ်ပြန်ခဲ့သည်။ လေ့လာသူများကမူ ယခုကဲ့သို့ လူမြင်ကွင်းသို့ ပြန်လည်ပေါ်ထွက်လာခြင်းနှင့် ဥပဒေသစ်တစ်ရပ်ကို အလျင် အမြန် ထုတ်ပြန်ခြင်းသည် စစ်ခေါင်းဆောင်၏ အာဏာတည်မြဲရေးနှင့် နိုင်ငံရေးအရ အကာအကွယ်ယူရန် ပြင်ဆင်မှုတစ်ခု ဖြစ်နိုင်သည်ဟု သုံးသပ်နေကြသည်။ #ဗိုလ်ချုပ်မှူးကြီးမင်းအောင်လှိုင် #စစ်ကော်မရှင်

ရုရှားကိုယ်စားလှယ်နှင့်တွေ့ဆုံမှုတွင် စစ်ခေါင်းဆောင် ပြန်လည်ပေါ်ထွက်လာ



ရုရှားကိုယ်စားလှယ်နှင့်တွေ့ဆုံမှုတွင် စစ်ခေါင်းဆောင် ပြန်လည်ပေါ်ထွက်လာ သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၄ ရက်။ သတင်းမီဒီယာများန…

  • February 4, 2026
မိသားစုအတွက် ၂ မိုင်ခွဲ ရေကူးအကူအညီတောင်းခဲ့သူ ၁၃ နှစ်သား သူရဲကောင်းကလေးငယ် သတင်းနှင့် မီဒီယာကွန်ရက်။
၂၀၂၆ ခုနှစ်၊ ဖေဖော်ဝါရီလ ၄ ရက်။ ဩစတေးလျ ကမ်းခြေတစ်ခုမှာတော့ အမေဖြစ်သူနဲ့ မိသားစုအတွက် ၂ မိုင် ခွဲလောက်ပင်လယ်ပြင် ကို ရေကူးပြီး အကူအညီသွားတောင်းခဲ့တဲ့ ၁၃ နှစ်သားလေးဟာ သူရဲကောင်းအဖြစ်နဲ့ အများက ချီးကျူးခဲ့ကြရပါတယ်။  အဖြစ်အပျက်ကလေးဖြစ်ခဲ့တာကတော့ ပြီးခဲ့တဲ့ ဇန္နဝါရီလ ကုန်ပိုင်း သောကြာနေ့က ဖြစ်ပါတယ်။  သြစတြေးလျနိုင်ငံရဲ့ Quindalup ကွင်ဒါလု(ပ်) ကမ်းခြေမှာပါ။ ဂျိုအန် အက်ပယ်လ်ဘီး Joanne Appelbee နဲ့ သူ့ရဲ့ ကလေး ၃ ယောက်ဟာ အားလပ်ရက်မှာ ပျော်ပျော်ပါးပါး ကယက်လှေစီးနေခဲ့ကြပါတယ်။ အဲဒီ အချိန်မှာပဲ ရုတ်တရက် တိုက်ခတ်လာတဲ့ လေပြင်းနဲ့ လှိုင်းလုံးတွေက သူတို့ကို ကမ်းခြေနဲ့ မိုင်ပေါင်းများစွာ ဝေးရာ ပင်လယ်ပြင်ထဲကို ဆွဲခေါ်သွားခဲ့ပါတယ်။ အခြေအနေက စက္ကန့်နဲ့အမျှ စိုးရိမ်ရလာတဲ့အခါမှာ မိခင်ဖြစ်သူ ဂျိုအန်ဟာ ခက်ခဲတဲ့ ဆုံးဖြတ်ချက်တစ်ခုကို ချခဲ့ရပါတယ်။ အဲဒါကတော့ အသက် ၁၃ နှစ်အရွယ် သားကြီးဖြစ်သူ အော်စတင် Austin ကို အကူအညီတောင်းဖို့ ကမ်းခြေဆီ ရေကူးခိုင်းလိုက်တာပါပဲ။ Austin ဟာ ကနဦးမှာ လှေငယ်လေးနဲ့ ထွက်လာခဲ့ပေမဲ့ လှေက ရေဝင်ပြီး မြုပ်သွားခဲ့ပါတယ်။ အဲဒီနောက်မှာ သူဟာ အသက်ကယ်အင်္ကျီကို ဝတ်ပြီး ရေကူးခဲ့ပေမဲ့ အင်္ကျီက သူ့ရဲ့ အရှိန်ကို နှေးကွေးစေတယ်လို့ ယူဆပြီး အသက်အန္တရာယ်ကြားကနေ အင်္ကျီကို ချွတ်ချခဲ့ပါတယ်။ ၂ မိုင်ခွဲကျော် ခရီးကို ၄ နာရီကြာအောင် မနားတမ်း ကူးခတ်ခဲ့ပြီးနောက် ညနေ ၆ နာရီမှာတော့ သူဟာ ကမ်းခြေကို မောဟိုက်စွာနဲ့ ရောက်ရှိခဲ့ပါတယ်။ တစ်ဖက်မှာလည်း မိခင်ဖြစ်သူဟာ ကျန်ရှိနေတဲ့ ကလေးနှစ်ယောက်ကို ပျောက်မသွားအောင် ဖက်တွယ်ထားရင်း ပင်လယ်ပြင်ထဲမှာ ၁၀ နာရီကြာအောင် အသက်လုခဲ့ရပါတယ်။ အော်စတင်ရဲ့ အကူအညီတောင်းခံမှုကြောင့် လူပျောက်ရှာတဲ့ ကယ်ဆယ်ရေး ရဟတ်ယာဉ်က သူတို့ကို တွေ့ရှိချိန်မှာတော့ သူတို့ဟာ ကမ်းခြေကနေ ၉ မိုင် (၁၄ ကီလိုမီတာ) အထိ ဝေးရာကို မျောပါနေခဲ့ပါပြီ။ ကလေးငယ်တွေဟာ အအေးဒဏ်ကြောင့် တုန်ရီနေပြီး ခြေထောက်တွေမှာ အာရုံမရှိတော့တဲ့အထိ ဖြစ်နေခဲ့ရပါတယ်။ ကယ်ဆယ်ရေး အဖွဲ့ဝင် တစ်ဦးက အော်စတင်ရဲ့ ကြိုးစားမှုဟာ superhuman လူသားစွမ်းဆောင်ရည်ထက် ပိုတဲ့ လုပ်ဆောင်ချက်ဖြစ်တယ်လို့ ချီးကျူးခဲ့ပါတယ်။ ဒါပေမဲ့ Austin ကတော့ သူဟာ သူရဲကောင်းမဟုတ်ပါဘူးလို့ ငြင်းဆိုပါတယ်။ သူက သူ့အနေနဲ့ လုပ်သင့်တာကို လုပ်ခဲ့တာပါ လို့ပဲ ရိုးရိုးလေး ပြောခဲ့ပါတယ်။ ဒီနေ့မှာတော့ သတ္တိရှိတဲ့ သားဖြစ်သူကြောင့် မိခင်ဖြစ်သူ Joanne ဟာ သူ့ရဲ့ ရင်သွေး ၃ ယောက်လုံးနဲ့အတူ ဘေးကင်းရာကို ပြန်ရောက်ခဲ့ပြီ ဖြစ်ပါတယ်။

မိသားစုအတွက် ၂ မိုင်ခွဲ ရေကူးအကူအညီတောင်းခဲ့သူ ၁၃ နှစ်သား သူရဲကောင်းကလေးငယ်

မိသားစုအတွက် ၂ မိုင်ခွဲ ရေကူးအကူအညီတောင်းခဲ့သူ ၁၃ နှစ်သား သူရဲကောင်းကလေးငယ် သတင်းနှင့် မီဒီယာကွန်ရက်။၂၀၂၆ ခုနှစ်၊ ဖေဖော်ဝါရီလ ၄ ရက်။  ဩစတေး…

  • February 4, 2026
ထိုင်းနိုင်ငံတွင် "ကြက်တူရွေးအဖျား" (Parrot Fever) တွေ့ရှိကြောင်း အတည်ပြု သတင်းနှင့် မီဒီယာကွန်ရက်။
၂၀၂၆ ခုနှစ်၊ ဖေဖော်ဝါရီလ ၄ ရက်။ ထိုင်းနိုင်ငံတွင် "ကြက်တူရွေးအဖျား" (Parrot Fever) ဟု လူသိများသည့် ကူးစက်ရောဂါပိုး တစ်မျိုးအား ပထမဆုံးအကြိမ် စစ်ဆေးတွေ့ရှိရကြောင်း အတည်ပြုထုတ်ပြန်ကာ သတိပေးချက်များ ထုတ်ပြန်ထားသည်။ အဆိုပါရောဂါပိုး ကူးစက်ခံရသည့် ပထမဆုံးလူနာကို ၂၀၂၅ ခုနှစ် နှောင်းပိုင်းတွင် စတင်တွေ့ရှိခဲ့ခြင်း ဖြစ်သည်။ ရောဂါကူးစက်ခံရသူမှာ ငှက်များကို လေဝင်လေထွက် မကောင်းသောနေရာ၌ မွေးမြူထားသူဖြစ်ပြီး၊ ငှက်လှောင်အိမ်များ သန့်ရှင်းရေးလုပ်ဆောင်စဉ် နှာခေါင်းစည်း (Mask) နှင့် လက်အိတ် (Gloves) စသည့် ကာကွယ်ရေးပစ္စည်းများ အသုံးမပြုခဲ့ခြင်းကြောင့် ကူးစက်ခံရခြင်းဖြစ်သည်ဟု ခန့်မှန်းရသည်။ လက်ရှိတွင် အဆိုပါလူနာမှာ ဆေးကုသမှု ခံယူပြီးနောက် ကျန်းမာရေး ပြန်လည်ကောင်းမွန်လာပြီဖြစ်သည်။ ရောဂါအကြောင်းနှင့် ကူးစက်ပုံ ဤရောဂါသည် ဘက်တီးရီးယားပိုးတစ်မျိုးကြောင့် ဖြစ်ပွားခြင်းဖြစ်ပြီး ကြက်တူရွေး၊ ခို၊ ဘဲ၊ ကြက်ဆင် အပါအဝင် ငှက်အမျိုးမျိုးနှင့် ကြက်ဘဲမျိုးနွယ်ဝင် တိရစ္ဆာန်များတွင် တွေ့ရှိရတတ်သည်။ ငှက်အညစ်အကြေးအခြောက်များ၊ အမွေးအတောင်များနှင့် ငှက်များမှထွက်သည့် အရည်များမှတစ်ဆင့် လွင့်စင်လာသော အမှုန်အမွှားများကို ရှူရှိုက်မိရာမှ လူသို့ ကူးစက်ခြင်း ဖြစ်သည်။ ၎င်းသည် အသက်ရှူလမ်းကြောင်းဆိုင်ရာ ရောဂါများနှင့် ဆင်တူသဖြင့် သတိမမူမိဘဲ ရှိတတ်သည်။ ရောဂါလက္ခဏာများမှာ - ·       အပြင်းအဖျားတက်ခြင်းနှင့် ချမ်းတုန်ခြင်း၊ ·       ပြင်းထန်စွာ ခေါင်းကိုက်ခြင်း၊ ·       ကြွက်သားများ နာကျင်ကိုက်ခဲခြင်းနှင့် ·       ချောင်းခြောက်ဆိုးခြင်းတို့ ဖြစ်ပွားတတ်ပါသည်။ ကာကွယ်ရန် အကြံပြုချက်များ ရောဂါကူးစက်မှုကို ကာကွယ်နိုင်ရန်အတွက် မလိုအပ်ဘဲ ငှက်များနှင့် ငှက်အညစ်အကြေးများကို တိုက်ရိုက်ကိုင်တွယ်ခြင်းမှ ရှောင်ကြဉ်ရမည်။ ငှက်လှောင်အိမ်များ သန့်ရှင်းရေးလုပ်ဆောင်ပါက နှာခေါင်းစည်းနှင့် လက်အိတ်များကို မပျက်မကွက် ဝတ်ဆင်ရမည်ဖြစ်ပြီး၊ တိရစ္ဆာန်များကို ကိုင်တွယ်ပြီးတိုင်း လက်ကို ဆပ်ပြာဖြင့် စင်ကြယ်အောင် ဆေးကြောရမည်။ ထို့ပြင် ဖျားနာခြင်း သို့မဟုတ် ချောင်းဆိုးခြင်းများ ဖြစ်ပွားလာပါက မိမိတွင် ငှက်များနှင့် ထိတွေ့ဖူးသည့် ရာဇဝင်ရှိပါက ဆရာဝန်ထံ အတိအကျ ပြောပြရန် တိုက်တွန်းထားပါသည်။

ထိုင်းနိုင်ငံတွင် “ကြက်တူရွေးအဖျား” (Parrot Fever) တွေ့ရှိကြောင်း အတည်ပြု

ထိုင်းနိုင်ငံတွင် "ကြက်တူရွေးအဖျား" (Parrot Fever) တွေ့ရှိကြောင်း အတည်ပြု  သတင်းနှင့် မီဒီယာကွန်ရက်။၂၀၂၆ ခုနှစ်၊ ဖေဖော်ဝါရီလ ၄ ရက်။  ထ…

  • February 4, 2026
ထိုင်းနိုင်ငံ အထွေထွေရွေးကောက်ပွဲနှင့် မြန်မာနိုင်ငံသားများ အပေါ် ပါတီများ၏ သဘောထား သတင်းနှင့် မီဒီယာကွန်ရက်။
၂၀၂၆ ခုနှစ်၊ ဖေဖော်ဝါရီလ ၄ ရက်။   လာမည့် ၂၀၂၆ ခုနှစ်၊ ဖေဖော်ဝါရီလ ၈ ရက် (တနင်္ဂနွေနေ့) တွင် ထိုင်းနိုင်ငံ၌ အစိုးရသစ်တစ်ရပ် ပေါ်ထွက်လာစေရန်အတွက် အထွေထွေရွေးကောက်ပွဲကို ကျင်းပသွားမည် ဖြစ်သည်။ လက်ရှိတွင် လူကြိုက်များရေပန်းစားနေသည့် အဓိကပါတီကြီး (၄) ခုရှိပြီး၊ ၎င်းတို့၏ မူဝါဒများနှင့် မြန်မာနိုင်ငံအပေါ် ထားရှိသည့် သဘောထားများကို ဘန်ကောက်ပို့စ် (Bangkok Post) သတင်းစာက ဖော်ပြထားသည်။ ၁။ ဘွန်ဂျိုင်ထိုင်းပါတီ (Bhumjaithai Party) လက်ရှိ ယာယီဝန်ကြီးချုပ် အနုတင် ချာန်ဝီရကူးလ် (Anutin Charnvirakul) ဦးဆောင်သည့် ပါတီဖြစ်သည်။ မြန်မာနိုင်ငံနှင့် ပတ်သက်၍ တရားမဝင် အလုပ်သမားများ ဝင်ရောက်မှုနှင့် မှောင်ခိုပစ္စည်းစီးဆင်းမှုများကို တားဆီးနိုင်ရန်အတွက် နယ်စပ်တစ်လျှောက် တံတိုင်းများ တည်ဆောက်သွားမည့် မူဝါဒကို ကိုင်စွဲထားသည်။ ၂။ ပြည်သူ့ပါတီ (People’s Party) နတ်ထဖုန်း ရောင်ပန်ညာဝပ် (Natthaphong Ruengpanyawut) ဦးဆောင်သော ဤပါတီသည် ဖျက်သိမ်းခံလိုက်ရသည့် Move Forward ပါတီ၏ မျိုးဆက်သစ်ဖြစ်ပြီး လူငယ်ထုနှင့် မြို့ပြလူထုကြားတွင် အားပေးမှု အများဆုံး ရရှိထားသည်။ နိုင်ငံခြားသား အလုပ်သမား မှတ်ပုံတင်ခြင်း လုပ်ငန်းစဉ်များကို ပိုမိုရိုးရှင်း ပွင့်လင်းမြင်သာစေရန်နှင့် ပွဲစားခများ၊ အဂတိလိုက်စားမှုများကို တိုက်ဖျက်ရန် ကတိပြုထားသည်။ ထို့ပြင် နယ်စပ်ဒုက္ခသည်များကို လူသားချင်းစာနာမှုဆိုင်ရာ အကူအညီများ ပိုမိုပေးအပ်ရန်နှင့် ၎င်းတို့၏ လုံခြုံရေးကို အာမခံချက်ပေးရန် လိုလားသည်။ ဤပါတီ အာဏာရလာပါက မြန်မာအတိုက်အခံ အင်အားစုများနှင့် ဆက်ဆံရေး ပိုမိုကောင်းမွန်လာဖွယ် ရှိသည်။ ၃။ ဖွေထိုင်းပါတီ (Pheu Thai Party) ဝန်ကြီးချုပ်ဟောင်း တပ်ဆင်ရှင်နာဝပ်၏ ထောက်ခံသူများနှင့် မျိုးဆက်များ ဦးဆောင်သည့် ပါတီဖြစ်သည်။ ဝန်ကြီးချုပ် ပေထုံတန်ရှင်နာဝပ် ရာထူးမှ ဖယ်ရှားခံရပြီးနောက် ယော့ချနန် ဝမ်စဝပ် (Yodchanan Wongsawat) က ဦးဆောင်လျက်ရှိသည်။ စီးပွားရေးဆိုင်ရာ မူဝါဒများကို ဦးစားပေးပြီး "သူဌေးဖြစ်စေမည့် အစီအစဉ်" အဖြစ် နေ့စဉ် ဘတ် (၁) သန်းဆု (၉) ဆု မဲဖောက်ပေးမည့် အစီအစဉ်ဖြင့် မဲဆွယ်လျက်ရှိသည်။ မြန်မာနိုင်ငံသားများနှင့် ပတ်သက်၍ ပြန်လည်မောင်းထုတ်ခြင်းထက် စနစ်တကျ မှတ်ပုံတင်စေခြင်းကို ပိုမိုလိုလားသော ပါတီဖြစ်သည်။ ၄။ ဒီမိုကရက်ပါတီ (Democrat Party) ထိုင်းနိုင်ငံ၏ သက်တမ်းအရင့်ဆုံး ပါတီဖြစ်ပြီး ပါတီခေါင်းဆောင်ဟောင်း အဖိဆစ် ဝေ့ချာချီဝ (Abhisit Vejjajiva) ပြန်လည်ပါဝင်လာခြင်းကြောင့် စိတ်ဝင်စားမှု မြင့်တက်နေသည်။ ၎င်းတို့၏ မူဝါဒမှာ လူ့အခွင့်အရေး (Human Rights) အပေါ် အခြေခံသော်လည်း၊ ယခု ၂၀၂၆ ရွေးကောက်ပွဲတွင်မူ အခြားပါတီများနည်းတူ တရားမဝင် ဝင်ရောက်မှုများကို စနစ်တကျ ထိန်းချုပ်သွားမည်ဟု ပြောဆိုထားသည်။

ထိုင်းနိုင်ငံ အထွေထွေရွေးကောက်ပွဲနှင့် မြန်မာနိုင်ငံသားများ အပေါ် ပါတီများ၏ သဘောထား

ထိုင်းနိုင်ငံ အထွေထွေရွေးကောက်ပွဲနှင့် မြန်မာနိုင်ငံသားများ အပေါ် ပါတီများ၏ သဘောထား သတင်းနှင့် မီဒီယာကွန်ရက်။၂၀၂၆ ခုနှစ်၊ ဖေဖော်ဝါရီလ ၄ ရက်။  …

  • February 4, 2026
အီရန် ဒရုန်းကို အမေရိကန် ပစ်ချ၊ အမေရိကန် သင်္ဘောအနီး အီရန် လက်နက်တပ်ဆင်ထားသော လှေများ စစ်ရေးလှုပ်ရှား သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၄ ရက်။ အမေရိကန်နှင့် အီရန်တို့အကြား သံတမန်ရေးအရ ဆွေးနွေးရန် ပြင်ဆင်နေသော်လည်း ၂၀၂၆ ခုနှစ်၊ ဖေဖော်ဝါရီလ ၃ ရက်နေ့တွင် စစ်ရေးအရ ထိပ်တိုက်တွေ့မှုများ ပေါ်ပေါက်ခဲ့သည်။  အာရေဗျပင်လယ်ပြင်အတွင်းရှိ အမေရိကန် လေယာဉ်တင်သင်္ဘော USS Abraham Lincoln အနားသို့ “ရန်လိုစွာ ချဉ်းကပ်လာသည်” ဆိုသော အီရန်ဒရုန်းတစ်စင်းကို အမေရိကန်၏ F-35C တိုက်လေယာဉ်က ပစ်ချခဲ့သည်။ ထို့ပြင် ဟော်မုဇ်ရေလက်ကြားအတွင်း၌လည်း အမေရိကန်အလံလွှင့်ထူထားသော ဓာတုဗေဒပစ္စည်းတင်သင်္ဘောတစ်စင်းအား အီရန်တော်လှန်ရေးအစောင့်တပ်ဖွဲ့ (IRGC) က ဝိုင်းရံပိတ်ဆို့ခဲ့သဖြင့် အမေရိကန်စစ်သင်္ဘောနှင့် လေတပ်က ကူညီပေးခဲ့ရသည်။ လက်ရှိတွင် နှစ်နိုင်ငံဆွေးနွေးပွဲမှာ နေရာသတ်မှတ်ချက်နှင့် ဆွေးနွေးမည့် အကြောင်းအရာများအပေါ် သဘောထားကွဲလွဲလျက်ရှိသည်။ အီရန်ဘက်က နျူကလီးယားအရေးကိုသာ ဆွေးနွေးလိုသော်လည်း အမေရိကန်သမ္မတ ဒေါ်နယ်ထရမ့်က ဆွေးနွေးမှု အဆင်မပြေပါက ဆိုးကျိုးများ ဖြစ်လာနိုင်ကြောင်း သတိပေးထားသည်။

အီရန် ဒရုန်းကို အမေရိကန် ပစ်ချ၊ အမေရိကန် သင်္ဘောအနီး အီရန် လက်နက်တပ်ဆင်ထားသော လှေများ စစ်ရေးလှုပ်ရှား

အီရန် ဒရုန်းကို အမေရိကန် ပစ်ချ၊ အမေရိကန် သင်္ဘောအနီး အီရန် လက်နက်တပ်ဆင်ထားသော လှေများ စစ်ရေးလှုပ်ရှား  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော…

  • February 4, 2026
မြန်မာနိုင်ငံအတွက် ဒေါ်လာ ၁၂၁ သန်း ရန်ပုံငွေပါဝင်သည့် ဥပဒေကြမ်းကို သမ္မတ ထရမ့် လက်မှတ်ရေးထိုး အတည်ပြု သတင်းနှင့် မီဒီယာ ကွန်ရက် 
၂၀၂၆ ခုနစ်၊ ဖေဖော်ဝါရီ ၄ ရက်။ အမေရိကန်သမ္မတ ဒေါ်နယ်ထရမ့်သည် မြန်မာနိုင်ငံအတွက် အကူအညီများ ပါဝင်သည့် H.R. 7148 (Consolidated Appropriations Act, 2026) အစိုးရအသုံးစရိတ် ဥပဒေကြမ်းကို ၂၀၂၆ ခုနှစ်၊ ဖေဖော်ဝါရီလ ၃ ရက်နေ့တွင် လက်မှတ်ရေးထိုး အတည်ပြုလိုက်ပြီ ဖြစ်သည်။ ထို့ကြောင့် Burma Act အရ မြန်မာနိုင်ငံအတွက် လျာထားသော အမေရိကန်ဒေါ်လာ ၁၂၁ သန်း ရန်ပုံငွေသည် တရားဝင် ဥပဒေအဖြစ် အတည်ဖြစ်သွားပြီ ဖြစ်သည်။ အဆိုပါ ဥပဒေအရ ခွဲဝေချထားပေးမည့် ရန်ပုံငွေများကို အောက်ပါ ကဏ္ဍကြီး ၄ ခုတွင် အဓိက အသုံးပြုသွားရန် သတ်မှတ်ထားသည် - ၁။ နယ်စပ်ဖြတ်ကျော် လူသားချင်းစာနာမှု အကူအညီများ ရန်ပုံငွေ၏ အများဆုံးအပိုင်းဖြစ်သော ဒေါ်လာ ၇၅ သန်းခန့် ကို နယ်စပ်ဒေသတစ်လျှောက်ရှိ စစ်ဘေးရှောင်ပြည်သူများအတွက် အစားအသောက်၊ ဆေးဝါးနှင့် အမိုးအကာများ ထောက်ပံ့ပေးနိုင်မည့် လူသားချင်းစာနာမှု အကူအညီများအဖြစ် အသုံးပြုသွားမည် ဖြစ်သည်။ ၂။ တော်လှန်ရေးအင်အားစုများအတွက် နည်းပညာပံ့ပိုးမှု (Non-lethal Support) တိုင်းရင်းသား လက်နက်ကိုင်အဖွဲ့အစည်းများ (EAOs) နှင့် ပြည်သူ့ကာကွယ်ရေးတပ်မတော် (PDF) များအတွက် ဒေါ်လာ ၂၅ သန်းခန့် သတ်မှတ်ထားသည်။ ဤအကူအညီတွင် သေစေနိုင်သော လက်နက်များ ပါဝင်ခြင်းမရှိဘဲ ဆက်သွယ်ရေးစက်များ၊ နည်းပညာပိုင်းဆိုင်ရာ ပံ့ပိုးမှုများနှင့် စီမံခန့်ခွဲမှုစွမ်းရည် မြှင့်တင်ရေး လုပ်ငန်းများအတွက် ရည်ရွယ်သည်။ ၃။ ဒီမိုကရေစီ ယန္တရားနှင့် အုပ်ချုပ်ရေးပိုင်း ခိုင်မာစေခြင်း အမျိုးသားညီညွတ်ရေးအစိုးရ (NUG) နှင့် အခြားသော အရပ်ဘက် အဖွဲ့အစည်းများက ထိန်းချုပ်ထားသော နယ်မြေများတွင် ပြည်သူ့ဝန်ဆောင်မှု လုပ်ငန်းများနှင့် အုပ်ချုပ်ရေးယန္တရားများ ပိုမိုခိုင်မာလာစေရန် ထောက်ပံ့ပေးသွားမည် ဖြစ်သည်။ ၄။ နိုင်ငံရေးအကျဉ်းသားများနှင့် CDM တပ်ဖွဲ့ဝင်များ ကူညီရေး မြန်မာနိုင်ငံအတွင်းရှိ နိုင်ငံရေးအကျဉ်းသားဟောင်းများအား ပြန်လည်ထူထောင်ရေး ကူညီပေးရန်နှင့် စစ်ကောင်စီတပ်မှ ခွဲထွက်ကာ ပြည်သူ့ရင်ခွင် ခိုလှုံလာသည့် အလင်းဝင်တပ်ဖွဲ့ဝင် (CDM) များအား စောင့်ရှောက်နိုင်ရန်အတွက်လည်း ရန်ပုံငွေများ ပါဝင်သည်။ ဥပဒေအဖြစ် အတည်ပြုပြီး ဖြစ်သော်လည်း သမ္မတ ထရမ့်၏ အစိုးရသစ်သည် DOGE (Department of Government Efficiency - အစိုးရ စွမ်းဆောင်ရည်မြှင့်တင်ရေးဌာန) မှတစ်ဆင့် နိုင်ငံခြား အကူအညီပေးအပ်မှုများကို ပြန်လည်စိစစ်လျက် ရှိသည်။   ထို့ကြောင့် ရန်ပုံငွေများ မြေပြင်သို့ အမှန်တကယ် စီးဆင်းရောက်ရှိရန်အတွက် လုပ်ထုံးလုပ်နည်းဆိုင်ရာ အချိန်အတိုင်းအတာတစ်ခု ထပ်မံစောင့်ဆိုင်းကောင်း စောင့်ဆိုင်းရနိုင်သေးသည်။

မြန်မာနိုင်ငံအတွက် ဒေါ်လာ ၁၂၁ သန်း ရန်ပုံငွေပါဝင်သည့် ဥပဒေကြမ်းကို သမ္မတ ထရမ့် လက်မှတ်ရေးထိုး အတည်ပြု

မြန်မာနိုင်ငံအတွက် ဒေါ်လာ ၁၂၁ သန်း ရန်ပုံငွေပါဝင်သည့် ဥပဒေကြမ်းကို သမ္မတ ထရမ့် လက်မှတ်ရေးထိုး အတည်ပြု သတင်းနှင့် မီဒီယာ ကွန်ရက်။၂၀၂၆ ခုနစ်၊ ဖေဖော်ဝ…

  • February 4, 2026
ကချင်တွင် KIA က စစ်မျက်နှာ ၃ ခုဖွင့်၍ ထိုးစစ်ဆင်၊ စခန်း ၆ ခုထက်မနည်း သိမ်းပိုက်ရရှိ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီ ၄ ရက်။ ကချင်ပြည်အတွင်းရှိ ဝိုင်းမော်၊ ဖားကန့်နှင့် မိုးညှင်း-အင်းတော်ကြီးဒေသတို့တွင် KIA ပူးပေါင်းတပ်ဖွဲ့များက စစ်မျက်နှာ ၃ ခု တစ်ပြိုင်နက်ဖွင့်ကာ ပြင်းထန်သော ထိုးစစ်ဆင်မှုများ ပြုလုပ်ခဲ့ရာ စစ်ကော်မရှင်တပ်စခန်း ၆ ခုထက်မနည်းကို သိမ်းပိုက်ရရှိခဲ့ကြောင်း စစ်ရေးသတင်းရင်းမြစ်များက ပြောသည်။ ဖေဖော်ဝါရီလ ၂ ရက်နေ့ နံနက်ပိုင်းမှ စတင်ခဲ့သည့် အဆိုပါ ထိုးစစ်အတွင်း ဝိုင်းမော်မြို့နယ် မိုင်းနားဒေသနှင့် လမြန်ကျေးရွာအနီးရှိ စစ်ကော်မရှင် တပ်စခန်း ၄ ခုကို ကချင်လွတ်လပ်ရေးတပ်မတော် KIA က သိမ်းပိုက်နိုင်ခဲ့ သည်။ အဆိုပါ စခန်းသိမ်းတိုက်ပွဲအတွင်း စစ်ကော်မရှင်ဘက်မှ သေဆုံးရုပ်အလောင်းအချို့၊ သုံ့ပန်းများနှင့် လက်နက်ခဲ ယမ်း အမြောက်အမြားကိုပါ သိမ်းဆည်းရမိခဲ့သည်။ ဝိုင်းမော်မြို့နယ်အတွင်း မြေပြင်အခြေအနေနှင့် ပတ်သက်၍ မြေပြင်သတင်းရင်းမြစ် တစ်ဦးက “တိုက်ပွဲကတော့ တော်တော်ပြင်းတယ်ဗျ။ မနေ့ကဆိုရင် မိုင်းနားဘက်က စခန်းတွေကို KIA က ဝင်သိမ်းတာ အကုန်ရသွားပြီလို့ သိရတယ်။ စစ်တပ်ဘက်ကတော့ လက်လွှတ်လိုက်ရတာများတော့ ဝိုင်းမော်မြို့ဘက်ကို ဂျက်ဖိုက်တာတွေနဲ့ လာကြဲတာရော၊ လက်နက်ကြီးနဲ့ လှမ်းထုတာရော တောက်လျှောက်ပဲ။ ရွာသားတွေလည်း ဘေးလွတ်ရာကို အသည်းအသန် ပြေးနေကြရတယ်” ဟု ပြောသည်။ အလားတူ အင်းတော်ကြီးဒေသတွင်လည်း လုံးတုံနှင့် ဟဲပါးကျေးရွာအနီးရှိ အရေးပါသော ကာကင်းစခန်းများကို KIA က တိုက်ခိုက်သိမ်းပိုက်နိုင်ခဲ့သည်။ ဖားကန့်ဒေသတွင်လည်း စစ်ကြောင်းထိုးလာသည့် စစ်ကော်မရှင်တပ်ကို KIA က တန်ပြန်တိုက်ခိုက်ခဲ့ရာ တပ်ရင်းမှူးအဆင့်ရှိသူ တစ်ဦး သေဆုံးကာ စစ်ကော်မရှင်တပ်များ အထိနာပြီး ဆုတ်ခွာသွားခဲ့ရသည်ဟု ဆိုသည်။ သို့သော် မြို့ပေါ်တွင်မူ စစ်ကောင်မရှင်၏ လက်နက်ကြီး ပစ်ခတ်မှုများကြောင့် စာမေးပွဲဖြေဆိုနေသည့် ကျောင်းဝင်းအတွင်း ကျရောက်ပေါက်ကွဲကာ ကလေးငယ်များ ထိခိုက်ဒဏ်ရာရရှိခဲ့သည့် ဖြစ်စဉ်ကြောင့် ဒေသခံများ ထိတ်လန့်နေကြသည်။ ဗိုလ်မှူးကြီးနော်ဘူကလည်း ဗန်းမော်မြို့ရှိ ခြေကုတ်စခန်းအချို့ကို ဇန်နဝါရီလကုန်ပိုင်းတွင် သိမ်းယူနိုင်ခဲ့ကြောင်း အတည်ပြုထားပြီး၊ လက်ရှိတွင် KIA အနေဖြင့် ယခင်လက လက်လွှတ်ခဲ့ရသည့် နယ်မြေအတော်များများကို ပြန်လည်စိုးမိုးထားနိုင်ပြီ ဖြစ်သည်။ ဖားကန့်မြို့မှ ဒေသခံတစ်ဦးကမူ “စစ်မြေပြင်မှာ သူတို့တိုက်နေတာက တစ်ပိုင်းပေါ့ဗျာ။ ဒါပေမဲ့ မြို့ပေါ်က ကျောင်းထဲကို လက်နက်ကြီးကျတာတော့ တော်တော်ဆိုးတယ်။ ကလေးတွေ စာမေးပွဲဖြေနေတုန်း ဖြစ်တာ ဆိုတော့ မိဘတွေရော ကလေးတွေရော အကုန်လုံးက လန့်ကုန်ကြတာ” ဟု ပြောသည်။ လက်ရှိတွင် ကချင်ပြည်အတွင်း စစ်ရေးအရှိန် မြင့်တက်နေဆဲဖြစ်ပြီး စစ်ကော်မရှင် ဘက်မှ လေကြောင်း တိုက်ခိုက်မှုများ ပိုမိုပြုလုပ်လာနိုင်သဖြင့် ပြည်သူများအနေဖြင့် သတိကြီးစွာ နေထိုင်ကြရန် တော်လှန်ရေး အင်အားစုများက တိုက်တွန်းထားသည်။

ကချင်တွင် KIA က စစ်မျက်နှာ ၃ ခုဖွင့်၍ ထိုးစစ်ဆင်၊ စခန်း ၆ ခုထက်မနည်း သိမ်းပိုက်ရရှိ

ကချင်တွင် KIA က စစ်မျက်နှာ ၃ ခုဖွင့်၍ ထိုးစစ်ဆင်၊ စခန်း ၆ ခုထက်မနည်း သိမ်းပိုက်ရရှိ သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီ ၄ ရက်။ ကချင…

  • February 4, 2026
အာဏာသိမ်း နှစ်ပတ်လည် အထိမ်းအမှတ် ကျင်းပသူ နိုင်ကျဉ်း အမျိုးသမီး ၅ ဦး တိုက်ပိတ်ခံရ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၃ ရက်။ စစ်ကိုင်းတိုင်း မော်လိုက် အကျဉ်းထောင်တွင် အာဏာသိမ်း ၅ နှစ်ပြည့် အထိမ်းအမှတ် ကျင်းပသည့် နိုင်ကျဉ်း အမျိုးသမီး ၅ ဦး တိုက်ပိတ်ခံထားရပြီး လုံခြုံရေးအတွက် စိုးရိမ်ရ သည်ဟု နိုင်ကျဉ်းအရေး စောင့်ကြည့်နေသည့် အဖွဲ့အစည်းများက ပြောသည်။ စစ်အာဏာသိမ်းမှု ၅ နှစ်ပြည့်မြောက်သည့် ဖေဖော်ဝါရီလ ၁ ရက်နေ့တွင် ကလေးမြို့နယ်ရှိ မော်လိုက်အကျဉ်းထောင် အတွင်းမှ နိုင်ငံရေးအကျဉ်းသူ ၁၀၀ ကျော်သည် ‘သွေးသစ္စာ’ သီချင်းကို သံပြိုင်ဟစ်ဆိုကာ အာဏာရှင်စနစ်ကို သပိတ် မှောက် ဆန္ဒထုတ်ဖော်ခဲ့ကြခြင်းသည်။ အဆိုပါ ဆန္ဒပြပွဲတွင် အကျဉ်းသူများသည် မတရားစွပ်စွဲထားသည့် အမှုကြီးများကို ပယ်ဖျက်ပေးရန်နှင့် အကျဉ်း သားများအကြား တန်းတူအခွင့်အရေးပေးရန် အဓိကတောင်းဆိုခဲ့ကြသည်။ နိုင်ငံရေးအကျဉ်းသူများအဖွဲ့ (WOPP) ပြောရေးဆိုခွင့်ရှိသူ မဆုမြတ်က “တောင်းဆိုထားတဲ့ အချက်တွေက အမှုကြီးတွေ ပယ်ဖျက်ဖို့တွေ၊ အကျဉ်းသူ အကျဉ်းသားတွေ တန်းတူ အခွင့်အရေး ရရှိဖို့ ဆိုတဲ့အချက်တွေက အရမ်း အခြေခံကျတဲ့ ဖြစ်သင့်တဲ့ လူ့အခွင့်အရေး တောင်းဆိုချက်တွေ ဖြစ်တယ်။ ဒါပေမဲ့ အရင်က အတွေ့ အကြုံတွေ ကြည့်မယ်ဆိုရင် အကျဉ်းထောင် အာဏာပိုင်တွေဘက်က အပြုသဘောဆောင်တဲ့ ညှိနှိုင်းမှုတွေ မရှိခဲ့ဘူး” ဟု ပြောသည်။ အကျဉ်းသူများသည် ၎င်းတို့၏ တောင်းဆိုချက်များကို လာမည့် မြန်မာနှစ်ဆန်း ၁ ရက်နေ့ထက် နောက်မကျဘဲ လိုက်လျောပေးရန် ရာဇသံပေးထားပြီး၊ လိုက်လျောမှုမရှိပါက နှစ်ဆန်း ၂ ရက်နေ့တွင် တစ်နိုင်ငံလုံးရှိ အကျဉ်း ထောင်များနှင့်အတူ တိုက်ပွဲကို အရှိန်မြှင့်သွားမည်ဟု ကြေညာထားသည်။ ဤဆန္ဒပြမှုကြောင့် လက်ရှိတွင် ဦးဆောင်သူအမျိုးသမီး ၁၅ ဦးခန့် တိုက်ပိတ်ခံထားရပြီး ၎င်းတို့၏ လုံခြုံရေး အတွက် စိုးရိမ်ရကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန် ထားသည်။ မြေပြင်သတင်းရင်းမြစ်တစ်ဦးကလည်း “ကျနော်တို့ အကျဉ်းထောင်မှာရှိတဲ့ နိုင်ငံရေးအကျဉ်းသူ အကျဉ်းသား တွေရဲ့ အသံကို ‌ထောင်ပြင်ပမှာရှိတဲ့ ပြည်သူပြည်သားတွေ အနေနဲ့ ဂရုစိုက်ပေးကြပါ။ ကျနော်တို့နိုင်မှ လွတ် မယ့်သူတွေအတွက် ကျနော်တို့ ညီညီညွှတ်ညွှတ်နဲ့ စစ်အာဏာရှင် အပါအဝင် အာဏာရှင်အမြစ်ပြတ်တဲ့အထိ ဆက်လက် ချီတက်ဖို့အတွက် အလေးအနက်တိုက်တွန်းလိုပါတယ်” ဟု ပြောသည်။ မဆုမြတ်က ဆက်လက်၍ “နိုင်ငံရေးအကျဉ်းသူတွေအပါအဝင် အကျဉ်းသူ တစ်ရာကျော်က သွေးသစ္စာ သီချင်း ကို ဆိုပြီးတော့ ဆန္ဒပြခဲ့တာက အကြမ်းဖက်မှုမပါဘဲနဲ့ ကိုယ့်ရဲ့ ယုံကြည်ချက်ကို ဖော်ထုတ်ပြသတဲ့ လုပ်ရပ် တစ်ခုသာ ဖြစ်တယ်။ ဒါကို အာဏာပိုင်တွေဘက်က အပြစ်အဖြစ်နဲ့ သတ်မှတ်ပြီးတော့ ဖိနှိပ်အရေးယူတာက အကျဉ်းသူတွေရဲ့ လွပ်လပ်စွာ ထုတ်ဖော်ပြောဆိုခွင့်ကို ပြင်းထန်စွာ ချိုးဖောက်တာဖြစ်ပြီးတော့ လူ့အခွင့်အရေး ဥပဒေနဲ့ လုံးဝမကိုက်ညီဘူးလို့ မြင်ပါတယ်” ဟု ဝေဖန်ထောက်ပြသည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ စာရင်းများအရ အာဏာသိမ်း ၅ နှစ်တာ ကာလအတွင်း လူပေါင်း ၂၂,၀၀၀ ကျော် မတရားဖမ်းဆီးခံထားရဆဲ ဖြစ်သည်။ နိုင်ငံတကာ အသိုင်းအဝိုင်းအနေဖြင့် စိုးရိမ်ကြောင်း ထုတ်ပြန်ရုံဖြင့် မရပ်ဘဲ အကျဉ်းထောင်များအတွင်း လွတ် လပ်သော စုံစမ်းရေးအဖွဲ့များ ဝင်ရောက်ခွင့်ရရန်နှင့် နိုင်ငံရေး အကျဉ်းသားများ ချက်ချင်းလွတ်မြောက်ရန် လက် တွေ့ကျသည့် ဖိအားပေးမှုများ တိုးမြှင့်လုပ်ဆောင်သင့်ကြောင်း တော်လှန်ရေးအင်အားစုမျာနှင့် နိုင်ကျဉ်းအရေး ဆောင်ရွက်နေသူများက တောင်းဆိုနေကြသည်။  

အာဏာသိမ်း နှစ်ပတ်လည် အထိမ်းအမှတ် ကျင်းပသူ နိုင်ကျဉ်း အမျိုးသမီး ၁၅ ဦး တိုက်ပိတ်ခံရ

အာဏာသိမ်း နှစ်ပတ်လည် အထိမ်းအမှတ် ကျင်းပသူ နိုင်ကျဉ်း အမျိုးသမီး ၁၅ ဦး တိုက်ပိတ်ခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၃ ရက်။  …

  • February 4, 2026
ဖားကန့် တိုက်ပွဲအတွင်း စစ်ကော်မရှင် တပ်ခွဲမှူး သေဆုံး၊ တပ်သား ၆ ဦး ဘက်ပြောင်းခိုလှုံ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဖောဖော်ဝါရီလ ၃ ရက်။ ကချင်ပြည်၊ ဖားကန့်မြို့တွင် ဖြစ်ပွားနေသည့် တိုက်ပွဲထဲ စစ်ကော်မရှင်တပ်ဘက်မှ တပ်ခွဲမှူး တစ်ဦးသေဆုံးပြီး တပ်သား ၆ ဦး တော်လှန်ရေးပူးပေါင်းတပ်ဖွဲ့ထံ ဘက်ပြောင်းခိုလှုံလာသည်။ ဖားကန့်မြို့တွင် ဖြစ်ပွားနေသည့် တိုက်ပွဲများအတွင်း စစ်ကော်မရှင် တပ်ဘက်မှ ဗိုလ်ကြီးအဆင့်ရှိ တပ်ခွဲမှူး တစ်ဦး သေဆုံးခဲ့ပြီး စစ်ကော်မရှင် တပ်သား ၆ ဦးသည် လက်နက်များနှင့်အတူ တော်လှန်ရေး အင်အားစုများ ထံသို့ နှစ်ရက်အတွင်း ဘက်ပြောင်းခိုလှုံလာခြင်း ဖြစ်သည်။ တော်လှန်ရေးတပ်ဖွဲ့နှင့် နီးစပ်သည့် ဒေသခံတစ်ဦးက “အလင်းဝင်တဲ့သူတွေကနေတစ်ဆင့်ပဲ သူတို့ဘက်က တပ်ခွဲမှူးအရာရှိအဆင့်ရှိ သေဆုံးတာ သိရတာပါ။ ပြီးရင် အဲ့ဒီစစ်ကြောင်းထိုးတဲ့ တပ်ရင်းက မနေ့က တစ်ယောက် ဒီနေ့ ၅ ယောက် စုစုပေါင်း ၆ ယောက် အလင်းဝင်လာတာပါ” ဟု အတည်ပြု ပြောကြားသည်။ ပြီးခဲ့သည့် ဇန်နဝါရီလ ၃၀ ရက်နေ့မှ စတင်၍ စစ်ကော်မရှင်တပ်က ကချင်လွတ်လပ်ရေး တပ်မတော် KIA နှင့် KPDF တပ်ဖွဲ့များ အထိုင်ချရာ မရှီကထောင်၊ ထုံးဘိုနှင့် ဆိပ်မူကျေးရွာများဘက်သို့ စစ်ကြောင်းထိုးလာရာမှ တိုက်ပွဲများ အရှိန်မြင့်တက်နေခြင်းဖြစ်သည်။ အဆိုပါ တိုက်ပွဲပြင်းထန်နေသည့် ကြားမှပင် ဖေဖော်ဝါရီလ ၂ ရက်နေ့တွင် စစ်ကော်မရှင် တပ်သားတစ်ဦး စတင် ဘက်ပြောင်းလာခဲ့ပြီး၊ ဖေဖော်ဝါရီလ ၃ ရက်နေ့တွင်မူ နောက်ထပ် တပ်သား ၅ ဦး ထပ်မံခိုလှုံလာခဲ့ခြင်း ဖြစ် သည်။ ဘက်ပြောင်းလာသည့် တပ်သားများသည် မိုးကောင်းအခြေစိုက် အမှတ် (၃) စစ်ဆင်ရေးကွပ်ကဲမှုဌာနချုပ် (စကခ-၃) လက်အောက်ခံ ခမရ ၃၈၁ တပ်ရင်းမှ ဖြစ်ကြောင်း မြေပြင်စစ်ရေး သတင်းရင်းမြစ်က ပြောသည်။ အလားတူ တိုက်ပွဲအတွင်း သေဆုံးသွားသည့် အရာရှိမှာ တပ်ခွဲမှူး ဗိုလ်ကြီး ဇာနည်အောင် ဖြစ်ပြီး ၎င်းသေဆုံးမှု ကို ဘက်ပြောင်းလာသူများ၏ ပြောပြချက်အရ သိရှိရခြင်း ဖြစ်သည်ဟု ဆိုသည်။ တော်လှန်ရေးတပ်ဖွဲ့များဘက်က ပထမဦးဆုံး ဘက်ပြောင်းလာသည့် တပ်သားကို ကျပ်သိန်း ၃၀ ဆုကြေးငွေ ချီးမြှင့်ခဲ့ပြီးနောက်ပိုင်း ကျန်တပ်သားများ ထပ်မံရောက်ရှိလာခြင်း ဖြစ်သည်ဟု ဆိုသည်။ လက်ရှိတွင် ဖားကန့်၌ တိုက်ပွဲများ ဆက်လက်ပြင်းထန်နေပြီး နှစ်ဖက်လက်နက်ကြီး ပစ်ခတ်မှုများကြောင့် ၂ ရက်အတွင်း ကလေးငယ် ၂ ဦး သေဆုံးကာ ၁၆ ဦး ထိခိုက်ဒဏ်ရာရရှိထားပြီး စစ်ရေးအခြေအနေမှာ ဆက်လက် တင်းမာနေဆဲ ဖြစ်သည်။

ဖားကန့် တိုက်ပွဲအတွင်း စစ်ကော်မရှင် တပ်ခွဲမှူး သေဆုံး၊ တပ်သား ၆ ဦး ဘက်ပြောင်းခိုလှုံ

ဖားကန့် တိုက်ပွဲအတွင်း စစ်ကော်မရှင် တပ်ခွဲမှူး သေဆုံး၊ တပ်သား ၆ ဦး ဘက်ပြောင်းခိုလှုံ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဖောဖော်ဝါရီလ ၃ ရက်။&nbs…

  • February 4, 2026
×Close