သတင်း

ချင်း-စစ်ကိုင်း အစပ်တွင် တိုက်ပွဲများ ပြင်းထန်၊ စစ်ကော်မရှင်တပ်ဖွဲ့ဝင် ၅၀ ကျော် သေဆုံး

သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၂၄ ရက်။ ချင်း-စစ်ကိုင်း နယ်စပ်တိုက်ပွဲများ အရှိန်မြင့်၊ လေကြောင်းတိုက်ခိုက်မှုများ ကြားမှ စစ်ကော်မရှင်တပ်ဖွဲ့ဝင် ၅၀ ကျော် သေဆုံးခဲ့သည်ဟု ချင်းပြည်ကောင်စီ ထုတ်ပြန်သည်။ ချင်းပြည်နယ်နှင့် စစ်ကိုင်း-မကွေးဒေသ နယ်နိမိတ်တစ်လျှောက်တွင် နိုဝင်ဘာလ တတိယပတ်အတွင်း တိုက်ပွဲများ အရှိန်အဟုန်ဖြင့် ပြန်လည်မြင့်တက်ခဲ့ပြီး စစ်ကော်မရှင်တပ်ဖွဲ့ဝင် ၅၀ ကျော် ထပ်မံသေဆုံးခဲ့သည်ဟု ချင်းပြည်ကောင်စီ (Council of Chinland) ကာကွယ်ရေးဌာနက ထုတ်ပြန်ကြေညာခဲ့သည်။ အဆိုပါ ထုတ်ပြန်ချက်တွင် စစ်ကော်မရှင်တပ်သည် ဂျက်တိုက်လေယာဉ်များအပြင် Y-12 လေယာဉ်များဖြင့်ပါ ဗုံးကြဲတိုက်ခိုက်မှုများ ပြုလုပ်ခဲ့သော်လည်း တော်လှန်ရေး မဟာမိတ်တပ်ဖွဲ့များက ကြံ့ကြံ့ခံခုခံကာကွယ်နိုင်ခဲ့ ကြောင်း ထုတ်ပြန်ချက်ထဲ၌ ဖော်ပြထားသည်။ မြေပြင် သတင်းအရင်းအမြစ် တစ်ဦးက “လက်ရှိမှာ တိုက်ပွဲက ဆက်လက် ပြင်းထန်နေဆဲဖြစ်ပေမယ့် လေယာဉ် အဆမတန် သုံးနေတာကို ခုခံကာကွယ် တိုက်ခိုက်နေပါတယ်” ဟု ပြောသည်။ တိုက်ပွဲများသည် ကလေး-ဂန့်ဂေါလမ်းပိုင်းအပြင် ဖလမ်းနှင့် တီးတိန်မြို့နယ်အတွင်း၌ပါ အပြင်းအထန်ဖြစ်ပွားခဲ့ ခြင်း ဖြစ်သည်။ ချင်းပြည်ကောင်စီ၏ ထုတ်ပြန်ချက်အရ စစ်ကော်မရှင်တပ်သည် တော်လှန်ရေးတပ်များအား အပြင်းအထန် ထိုးစစ်ဆင်ခဲ့ရာတွင် လေကြောင်းအင်အားကို အဆမတန် အသုံးပြုခဲ့သည်။ အထူးသဖြင့် နိုဝင်ဘာလ ၁၈ ရက်နေ့ တစ်ရက်တည်းမှာပင် ဗုံးအလုံးရေ ၁၅၀ ကျော်အထိ ကြဲချခဲ့သည်ဟု ဆိုသည်။ ထို့အပြင် စစ်ကော်မရှင်တပ်သည် မြေပြင်စစ်ဆင်ရေးများတွင် ဒရုန်းများကိုလည်း အဆမတန် အသုံးပြုနေသည် ကို တွေ့ရကြောင်း ဖော်ပြထားသည်။ ထိုသို့သော ပြင်းထန်သည့် လေကြောင်းအန္တရာယ်ကြားမှ ချင်းလဲန်အစိုးရတပ်ဖွဲ့ စစ်ကြောင်း (၁) နှင့် (၂) တို့သည် ကျောင်းသားတပ်မတော် (ABSDF) ၊ ကန်ပက်လက်တော်လှန်ရေးတပ် (KRF)၊ ယောကာကွယ် ရေးတပ် (YDF) အပါအဝင် မဟာမိတ်အဖွဲ့ကြီးများစွာဖြင့် လက်တွဲကာ စစ်ကော်မရှင်တပ်ကို ထိုးဖောက်တိုက်ခိုက်ခဲ့ခြင်း ဖြစ်သည်။ တော်လှန်ရေးပူးပေါင်းတပ်များ၏ ထိုးစစ်ကြောင့် စစ်ကော်မရှင်တပ်ဖွဲ့ဝင် အယောက် ၅၀ ခန့် သေဆုံးခဲ့ပြီး၊ ဒဏ်ရာရရှိသူများကို စစ်ကော်မရှင်တပ်က Mi-17 ရဟတ်ယာဉ်များဖြင့် သယ်ထုတ်သွားရသည်ဟု ဆိုသည်။ တော်လှန်ရေးတပ်များဘက်ကလည်း စစ်သုံ့ပန်းအချို့အပြင် လက်နက်ခဲယမ်းများကိုပါ ထပ်မံသိမ်းဆည်းရမိခဲ့ ကြောင်း ထုတ်ပြန်ခဲ့သည်။ ပူးပေါင်းတပ်ဖွဲ့ တာဝန်ရှိသူ တစ်ဦးက “ကျနော်တို့ဘက်က အခုလို ကြီးမားတဲ့ ထိုးစစ်ကို အောင်မြင်စွာ တန်ပြန် နိုင်ခဲ့တာဟာ မဟာမိတ်အဖွဲ့အစည်းတွေရဲ့ စည်းလုံးညီညွတ်မှုနဲ့ ရဲဘော်တွေရဲ့ စိတ်ဓာတ်ခွန်အားကြောင့်ပါပဲ” ဟု ပြောသည်။ လက်ရှိ တိုက်ပွဲဖြစ်ပွားရာ နယ်မြေဖြစ်သည့် ကလေး-ဂန့်ဂေါလမ်းပိုင်းသည် ယခင်ကတည်းက စစ်ရေးအရ အရေးပါသော လမ်းကြောင်းဖြစ်ပြီး ချင်းပြည်နှင့် မကွေး၊ စစ်ကိုင်းဒေသတို့အတွက် ထောက်ပို့လမ်းကြောင်း လည်း ဖြစ်သည်။ စစ်ကော်မရှင်တပ်သည် မြေပြင်တွင် အသာစီးမရသည့် အခါတိုင်း လေကြောင်းအင်အားကို အပြင်းအထန် အသုံးပြုလေ့ရှိပြီး၊ ယခုတိုက်ပွဲများတွင်လည်း အင်အားကြီး လေကြောင်းတိုက်ခိုက်မှုကြားမှ တော်လှန်ရေး အင်အားစုများက ကြံ့ကြံ့ခံနေရဆဲ ဖြစ်ကြောင်း ဒေသခံ သတင်းရင်းမြစ်များ၏ ပြောပြချက်အရ သိရသည်။ တိုက်ပွဲအခြေအနေမှာ ဆက်လက်တင်းမာနေဆဲဖြစ်ပြီး စစ်ကော်မရှင်တပ်ဘက်က စစ်အင်အားနှင့် ရိက္ခာများ ဖြည့်တင်းလျက်ရှိသည်ဟု ဆိုသည်။  

ချင်း-စစ်ကိုင်း အစပ်တွင် တိုက်ပွဲများ ပြင်းထန်၊ စစ်ကော်မရှင်တပ်ဖွဲ့ဝင် ၅၀ ကျော် သေဆုံး


ချင်း-စစ်ကိုင်း အစပ်တွင် တိုက်ပွဲများ ပြင်းထန်၊ စစ်ကော်မရှင်တပ်ဖွဲ့ဝင် ၅၀ ကျော် သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၂၄ ရက်။ …

  • November 24, 2025
ဥယျာဉ်ခြံသွားလမ်း၌ မိုင်းနင်းမိသော ရွာသား ခြေထောက်ဖြတ်တောက်ခံရ သတင်းနှင့်မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၂၂ ရက်။ တနင်္သာရီတိုင်း ထားဝယ်အရှေ့တောဒေသတွင် ခြံမှအပြန်လမ်း၌ မိုင်းနင်းမိသော ရွာသား ခြေထောက် ဒူးအောက်ပိုင်း ဖြတ်တောက်လိုက်ရသည်ဟု ဒေသခံ ရွာသားများက ပြောသည်။ စစ်ရေးပဋိပက္ခများ မကြာခဏ ဖြစ်ပွားလေ့ရှိသည့် ထားဝယ်ခရိုင်၊ အရှေ့တောဒေသတွင် ဥယျာဉ်ခြံမှ အိမ်သို့ ပြန်လာသည့် အသက် ၄၀ အရွယ် ရွာသားတစ်ဦးသည် လူအများသွားလာနေသည့် လမ်းမပေါ်တွင် မြေမြှုပ်မိုင်း နင်းမိသဖြင့် ပြင်းထန်ဒဏ်ရာရရှိခဲ့ပြီး ခြေထောက်အား ဒူးအောက်ပိုင်းမှ ဖြတ်တောက်လိုက်ရခြင်း ဖြစ်သည်။ အသက် ၄၀ ခန့်အရွယ် ရွာသားတစ်ဦးက “မိုင်းနင်းမိတဲ့ ခြေထောက်အား ဒူးအောက်ပိုင်းကနေ ဖြတ်ပစ်လိုက်ရ တာဗျ” ဟု ပြောသည်။ ဖြစ်စဉ်မှာ နိုဝင်ဘာလ ၁၇ ရက်နေ့က တောင်သုံးလုံးကျေးရွာသား ကိုအောင်မင်းဦး (၄၀) နှစ် သည် ကျောက်မဲတောင်ကျေးရွာရှိ တရုတ်သင်္ချိုင်းအနောက်ဘက်၌ရှိသော ၎င်းပိုင် ဥယျာဉ်ခြံထဲမှ အိမ်ပြန်လာစဉ် လမ်းတွင် မိုင်းနင်းမိခြင်းဖြစ်သည်။ မိုင်းပေါက်ကွဲမှုကြောင့် ပြင်းထန်စွာ ဒဏ်ရာရရှိခဲ့သူကို ထားဝယ်ဆေးရုံသို့ ပို့ဆောင်ကုသခဲ့ရပြီး လူ့အသက်ကို ကယ်တင်နိုင်ရန်အတွက် ခြေထောက်ဖြတ်တောက်မှု ပြုလုပ်ခဲ့ရသည်။ အဆိုပါ မိုင်းပေါက်ကွဲသည့်လမ်းမှာ ဥယျာဉ်ခြံသွားလာရာ အဓိကလမ်းကြောင်းဖြစ်ပြီး၊ ယာဉ်များပင် သွားလာနိုင်လောက်အောင် ကျယ်ဝန်းသည့်လမ်းဖြစ်သော်လည်း မိုင်းထောင်ထားခြင်း ခံခဲ့ရသည်။ ထိုလမ်းကို တောခုတ်သမားများပင် ပုံမှန် အသုံးပြုနေသည့်အတွက် အန္တရာယ်ကင်းသည်ဟု ယူဆခဲ့ကြောင်း ဒေသခံများက ပြောသည်။ မိုင်းပေါက်ကွဲခဲ့သည့် လမ်းအနေအထားနှင့်ပတ်သက်၍ အခြား ရွာသားတစ်ဦးက “မိုင်းနင်းမိတဲ့ ခြံအနီးတစ်ဝိုက် မှာ တောခုတ်သမားတွေ တောခုတ်နေကြတော့ ဘာမှမဖြစ်ကြမယ် မထင်ဘူးပေါ့၊ အိမ်ပြန်လာတဲ့ လမ်းမှာ ဖြစ် သွားတာ၊ ပေါက်ကွဲတဲ့လမ်းက အကျယ်ကြီးပါ ကားတစ်စီး အေးအေးဆေးဆေး မောင်းဝင်သွားလာလို့ရတယ်” ဟု  ပြောသည်။ ထားဝယ်အရှေ့တောဒေသသည် တိုက်ပွဲများ မကြာခဏ ဖြစ်ပွားလျက်ရှိသည့် နယ်မြေတစ်ခုဖြစ်ပြီး၊ လူအများ ဖြတ်သန်းသွားလာသည့် လမ်းများ၊ လယ်တောများနှင့် ကျေးရွာများအနီးဝန်းကျင်တွင် စစ်ကော်မရှင်တပ်နှင့် အခြား လက်နက်ကိုင် အဖွဲ့အစည်းများက မြေမြှုပ်မိုင်းများ ထောင်ထားသဖြင့် ဒေသခံရွာသားများမှာ မကြာခဏ ထိခိုက်သေဆုံးမှုများ ကြုံတွေ့နေရပြီး ဥယျာဉ်ခြံသွားလမ်းများသည်ပင် အသက်အန္တရာယ်နှင့် ရင်ဆိုင်နေရ ကြောင်း ရွာသားများက ဆိုသည်။  

ဥယျာဉ်ခြံသွားလမ်း၌ မိုင်းနင်းမိသော ရွာသား ခြေထောက်ဖြတ်တောက်ခံရ

ဥယျာဉ်ခြံသွားလမ်း၌ မိုင်းနင်းမိသော ရွာသား ခြေထောက်ဖြတ်တောက်ခံရ သတင်းနှင့်မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၂၂ ရက်။ တနင်္သာရီတိုင်း ထားဝယ်အရှ…

  • November 22, 2025
ဒဝယ်(ထားဝယ်) အမျိုးသားနေ့ပွဲတော်ကျင်းပရာ ဝန်းကျင်တွင် စစ်အင်အားများဖြင့် လုံခြုံရေး တင်းကျပ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၂၂ ရက်။ မြို့အဝင်အထွက်တွင် ပုံမှန်ထက် တင်းကျပ်သော လုံခြုံရေးအောက်မှ ဒဝယ် (ထားဝယ်) အမျိုးသားနေ့ ပွဲတော်ကို ကျင်းပခဲ့ရသည်ဟု မြို့ခံများက ပြောသည်။ နိုဝင်ဘာလ ၂၀ ရက် (နတ်တော်လဆန်း ၁ ရက်) နေ့တွင် ကျရောက်ခဲ့သည့် ထားဝယ်အမျိုးသားနေ့ အထိမ်း အမှတ် ဂီတဖျော်ဖြေပွဲအား ဒေသတွင်း တင်းမာမှုများ မြင့်တက်နေချိန်တွင် စစ်ကော်မရှင်၏ လုံခြုံရေး အလွန်အမင်း တင်းကျပ်စွာ ချထားမှုအောက်မှ ကျင်းပခဲ့ရကြောင်း ထားဝယ်မြို့ခံများ၏ ပြောကြားချက်အရ သိရသည်။ အသက် ၄၅ နှစ်အရွယ် အင်းဝန်းရွာသားတစ်ဦးက “အရင်ရက်ကတည်းက တစ်ရက်ကြိုပြီး မြေတင်ကား ၂ စီးအပြည့်နဲ့ စစ်တပ်က လုံခြုံရေးလာချသွားတယ်” ဟု ပြောသည်။ ထိုပွဲတော်ကို ပြည်သူလူထု၏ ယဉ်ကျေးမှုဆိုင်ရာ အထိမ်းအမှတ်အဖြစ် ကျင်းပခဲ့သော်လည်း၊ ပွဲတော်ကို ဝန်းရံထားသည့် လက်နက်ကိုင်တပ်များ၏ အင်အားပြသမှုကြောင့် ဒေသခံများအကြား သတိထား စောင့်ကြည့် စရာဖြစ်ခဲ့သည်။ အဆိုပါ တေးဂီတဖျော်ဖြေပွဲကို ညနေ ၆ နာရီမှ ည ၁၂ နာရီအထိ ထားဝယ်မြို့ ကမ်းနားလမ်းရှိ ရိုးရာသပိတ်မျှော ပွဲတော် ကျင်းပသည့် ပန်းခြံအတွင်း၌ ပြုလုပ်ခဲ့ခြင်းဖြစ်သည်။ အဆိုတော်များဖြစ်သည့် မိုးကောင်းလွင်၊ သားလေး၊ အေမီဈာန်နှင့် ထားဝယ်တိုင်းရင်းသား တေးသံရှင်များက ပါဝင်သီဆိုဖျော်ဖြေခဲ့ကြသည်ဟု မြို့ခံများက ပြောသည်။ ထားဝယ်အမျိုးသားနေ့အား ၂၀၁၇ ခုနှစ်မှ စတင်ကာ နှစ်စဉ် နတ်တော်လဆန်း ၁ ရက်နေ့အဖြစ် သတ်မှတ်ခဲ့ခြင်း ဖြစ်သည်။ ဖျော်ဖြေပွဲ ကျင်းပနေချိန်တွင် လောင်းလုံးမြို့နယ်ဘက်ခြမ်းရှိ အင်းဝန်းကျေးရွာနှင့် သာယာကုန်းကျေးရွာ အနီးဝန်းကျင်တွင် စစ်အင်အား အများအပြား ချထားကာ အစစ်အဆေးများဖြင့် လုံခြုံရေးတင်းကျပ်ထားခဲ့ခြင်း ဖြစ်သည်ဟု နီးစပ်သူများက ပြောသည်။ ထို့အပြင် ထားဝယ်မြို့၏ အဓိက အဝင်အထွက်ဂိတ်ဖြစ်သည့် ကမြောကင်းတံတား စစ်ဆေးရေးဂိတ်တွင်လည်း ခရီးသွားလာသူများကို ပုံမှန်ရက်များကထက် ပို၍ စစ်ဆေးမှုများ တင်းကျပ်နေသည်ဟု ဆိုကြသည်။ ပွဲကျင်းပမည့် နေရာနှင့် ကမ်းနားလမ်းတစ်လျှောက်တွင်မူ နံနက်ပိုင်းအချိန်ထိ လုံခြုံရေးချထားသည်ကို ထင်ရှား စွာ မတွေ့ရှိခဲ့ရသော်လည်း ပွဲတော်ကို ဝန်းရံထားသည့် စစ်ရေးတင်းမာမှုများက ဒေသခံကို စိတ်ပိုင်းဆိုင်ရာ မလုံခြုံမှု အခြေအနေကို ခံစားရစေသည်ဟု ဆိုသည်။

ဒဝယ်(ထားဝယ်) အမျိုးသားနေ့ပွဲတော်ကျင်းပရာ ဝန်းကျင်တွင် စစ်အင်အားများဖြင့် လုံခြုံရေး တင်းကြပ်

ဒဝယ်(ထားဝယ်) အမျိုးသားနေ့ပွဲတော်ကျင်းပရာ ဝန်းကျင်တွင် စစ်အင်အားများဖြင့် လုံခြုံရေး တင်းကြပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၂၂ ရက…

  • November 22, 2025
ဆေးရုံနှင့် အချုပ်ဆောင် ဗုံးကြဲ၊ စေတနာ့ ဝန်ထမ်း ၂ ဦး သေဆုံး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၂၁ ရက်။ စစ်ကိုင်းတိုင်းဒေသကြီး၊ ဗန်းမောက်၌ NUG ဆေးရုံနှင့် အချုပ်ဆောင် လေကြောင်းမှ ဗုံးကြဲတိုက်ခိုက်ခံရပြီး စေတနာ့ကျန်းမာရေးဝန်ထမ်း ၂ ဦး သေဆုံးခဲ့သည်။ ဗန်းမောက်မြို့နယ် တောတွင်းတစ်နေရာတွင် အမျိုးသား ညီညွတ်ရေး အစိုးရ (NUG) က ဖွင့်လှစ်ထားသော ဆေးရုံကို စစ်ကော်မရှင်တပ်က နိုဝင်ဘာလ ၁၈ ရက်နေ့၌ လေကြောင်းမှ ဗုံးကြဲတိုက်ခိုက်ခဲ့သဖြင့် သက်တမ်းရင့် စေတနာ့ ကျန်းမာရေးဝန်ထမ်း ၂ ဦး အသက်ဆုံးရှုံးခဲ့ရကြောင်း ဒေသခံသတင်းရင်းမြစ်များက ပြောသည်။ စစ်ကော်မရှင်တပ်၏ တိုက်ခိုက်မှုသည် ဆေးရုံအပြင် ၎င်းနှင့်နီးစပ်သည့် အချုပ်ဆောင်ကိုပါ ပစ်မှတ်ထားခဲ့ပြီး ထိခိုက်ဒဏ်ရာရသူများလည်း များပြားခဲ့သည်ဟု ဆိုသည်။ ဖြစ်စဉ်သည် နိုဝင်ဘာလ ၁၈ ရက်နေ့ ညနေ ၄ နာရီဝန်းကျင်ခန့်က ဖြစ်ပွားခဲ့ခြင်းဖြစ်ပြီး၊ တံတားဦးလေတပ်မှ တက်လာသည့် ဂျက်ဖိုက်တာလေယာဉ်က ဗန်းမောက်မြို့နယ်ရှိ တော်လှန်ရေးအင်အားစုများ ထိန်းချုပ်ရာ နယ်မြေအတွင်း တည်ရှိသော NUG ဆေးရုံနှင့် အချုပ်ဆောင်ကို တိုက်ခိုက်ခဲ့ခြင်းဖြစ်သည်။ တော်လှန်ရေးတပ်ဖွဲ့ဝင်များနှင့် နီးစပ်သည့် ဒေသခံအမျိုးသားတစ်ဦးက “နောက်တန်းဆေးရုံလို့ ပြောရမှာပေါ့။ ကျန်းမာရေးဝန်ထမ်း မိန်းကလေးနဲ့ ကောင်လေး ကျသွားတယ်။ အခုက မြေပြင်မှာက တိုက်ပွဲ နေ့တိုင်းလိုလို ရှိတယ်။ ဒလန်ကြောင့်ပဲ ဖြစ်နိုင်တယ်။ အဲ့နယ်တွေကလည်း သဘောထားမတူတဲ့သူတွေက ပိုများတယ်လေ” ဟု ပြောသည်။ လေကြောင်း တိုက်ခိုက်မှုကြောင့် ဆေးရုံတွင် တာဝန်ထမ်းဆောင်နေသည့် စေတနာ့ဝန်ထမ်း ကျန်းမာရေး ဝန်ထမ်း အမျိုးသားတစ်ဦးနှင့် အမျိုးသမီးတစ်ဦး စုစုပေါင်း ၂ ဦး သေဆုံးခဲ့ရသည်။ ထို့အပြင် အချုပ်ဆောင် တိုက်ခိုက်ခံရမှုတွင် ထိခိုက်ဒဏ်ရာရရှိသူများလည်း များပြားခဲ့သည်။ NUG အစိုးရ၏ ထုတ်ပြန်ချက်အရ စစ်ကော်မရှင်တပ်သည် စစ်ကိုင်းငလျင် လှုပ်ခတ်ပြီးနောက်ပိုင်းတွင် ၎င်းတို့ ထိန်းချုပ်ထားနိုင်ခြင်း မရှိသော တော်လှန်ရေး အင်အားစုများ အားကောင်းသည့် ဒေသများမှ ဆေးရုံ၊ ဆေးခန်း များကို ရည်ရွယ်ချက်ရှိရှိ ပစ်မှတ်ထား တိုက်ခိုက်မှုများ လုပ်လာသည်ဟု ဆိုသည်။ အင်အားပြင်းငလျင် လှုပ်ခတ်ခဲ့သည့် ဧပြီလမှ ပြီးခဲ့သည့် ဇူလိုင်လအထိ စစ်ကောင်စီတပ်သည် နိုင်ငံတစ်ဝှမ်းရှိ ဆေးရုံဆေးခန်းများကို လေကြောင်းတိုက်ခိုက်မှု အကြိမ် ၃၀ တိတိ ပြုလုပ်ခဲ့ကြောင်း NUG က ထုတ်ပြန်ထား သည်။ ယခု ဗန်းမောက်မြို့နယ် တိုက်ခိုက်မှုမတိုင်မီ နိုဝင်ဘာလ ၁၁ ရက်နေ့ကလည်း စစ်ကိုင်းတိုင်း၊ ကနီမြို့နယ်ရှိ ဝင်းမနားတိုက်နယ်ဆေးရုံ ကို စက်တပ်လေထီးဖြင့် ဗုံးကြဲတိုက်ခိုက်ခဲ့သဖြင့် ဆေးကုသမှုခံယူနေသူ ၇ ဦးနှင့် ကျန်းမာရေးဝန်ထမ်း ၁ ဦး သေဆုံးခဲ့သေးသည်။ NUG က စစ်ရေးပဋိပက္ခတွင် အရပ်သားပြည်သူများနှင့် ကျန်းမာရေး စောင့်ရှောက်မှုပေးနေသည့် အဆောက် အအုံများကို ပစ်မှတ်ထား တိုက်ခိုက်ခြင်းသည် နိုင်ငံတကာ ဥပဒေများကို ချိုးဖောက်ခြင်းဖြစ်ကြောင်း အမြဲတစေ ပြစ်တင် ပြောဆိုလျက်ရှိသည်။  

ဆေးရုံနှင့် အချုပ်ဆောင် ဗုံးကြဲ၊ စေတနာ့ ဝန်ထမ်း ၂ ဦး သေဆုံး

ဆေးရုံနှင့် အချုပ်ဆောင် ဗုံးကြဲ၊ စေတနာ့ ဝန်ထမ်း ၂ ဦး သေဆုံး  သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၂၁ ရက်။  စစ်ကိုင်းတိုင်းဒေသကြ…

  • November 21, 2025
နယ်စပ် ခြံစည်းရိုးကာရံရေး ဒေသခံ နာဂများ ကန့်ကွက် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၂၁ ရက်။ အိန္ဒိယ၏ နယ်စပ်ခြံစည်းရိုး ကာရံရေး အစီအစဉ်သည် နာဂမိသားစုဝင်များ၏ ပေါင်းသင်းဆက်ဆံရေးကို နှစ်ခြမ်းခွဲမည့် ခြိမ်းခြောက်မှုဖြစ်ကြောင်း ညီညွတ်သော တန်ရှန်းနာဂကောင်စီ (UTNC)  UTNC ထုတ်ပြန် ပြောဆိုလိုက်သည်။ အိန္ဒိယအစိုးရ၏ အိန္ဒိယ - မြန်မာ နယ်စပ်တစ်လျှောက် ခြံစည်းရိုးကာရံမည့် အစီအစဉ်ကို ညီညွတ်သော တန်ရှန်းနာဂကောင်စီ (UTNC) က နိုဝင်ဘာလ ၁၈ ရက်နေ့တွင် ပြင်းထန်စွာ ကန့်ကွက်လိုက်သည်။ အဆိုပါ ခြံစည်းရိုးသည် နယ်နိမိတ်မျဉ်း၏ တစ်ဖက်တစ်ချက်စီတွင် နေထိုင်ကြသည့် နာဂမိသားစုဝင်များ၏ ဘိုးဘွားစဉ်ဆက် လူမှုပတ်ဝန်းကျင်၊ မိသားစုဆက်ဆံရေးနှင့် စားဝတ်နေရေး အပြန်အလှန်မှီခိုမှုကို ပြင်းထန်စွာ ထိခိုက်ပျက်စီးစေမည့် ခြိမ်းခြောက်မှုဖြစ်ကြောင်း UTNC က ထုတ်ပြန်ထားသည်။ UTNC ၏ ပြောရေးဆိုခွင့်ရှိသူက “ကျနော်တို့က ဟိုဘက် အိမ်ဦးနဲ့ကြမ်းပြင်လိုပဲ ဘိုးဘွားစဉ်ဆက် ဒီနယ်စပ်မှာ ကူးလူးဆက်ဆံခဲ့ကြတာပါ။ မိသားစုရေးရာ၊ လူမှုရေးရာ၊ စားဝတ်နေရေး အားလုံးကို ဒီလိုပဲ သွားလာနေကြ တယ်။ ဒီလိုရှိနေတဲ့အရာကြီးကို သူတို့က အခိုင်အမာ ခြံစည်းရိုးခတ်မယ်လို့ ပြောရင် ဒါ ကျွန်တော်တို့ မိသားစု ထဲမှာ ပြောပြလို့မရတဲ့၊ တန်ဖိုးထားရမယ့် လူမှုပတ်ဝန်းကျင် နယ်ပယ်ထဲက အရာတွေ အားလုံးကတော့ ဖျက် ဆီးခံရတယ်လို့ ဒီလိုကို စိတ်ထိခိုက်ကြတာပေါ့” ဟု ပြောသည်။ နယ်စပ်ဒေသခံ နာဂပြည်သူများသည် နိုင်ငံများ ကွဲပြားနေသော်လည်း မိသားစုဝင်များ၊ ဆွေမျိုးများအဖြစ် နေ့စဉ် နှင့်အမျှ ခြေလျင်ခရီးဖြင့် သွားလာကာ စားနပ်ရိက္ခာများ အပြန်အလှန် မျှဝေဖလှယ်ခြင်းဖြင့် ဘိုးဘွားစဉ်ဆက် နေထိုင်လာခဲ့ကြခြင်းဖြစ်သည်။ ထိုသို့ ပေါင်းကူးဆက်ဆံမှုများအား ခြံစည်းရိုးက အပြီးတိုင် ပိတ်ဆို့မည်ကို ဒေသခံများက အပြင်းအထန် စိုးရိမ် ပူပန်နေကြသည်။ UTNC ၏ ထုတ်ပြန်ချက်အရ အိန္ဒိယဘက်မှ ခြံစည်းရိုးကာရံမည့် လုပ်ငန်းများကို နန်းယွန်းမြို့နယ်အတွင်းရှိ အိန္ဒိယ - မြန်မာ နယ်ခြားမှတ်တိုင် ၁၇၃ (ပန်ဆောင်တောင်ကြား လမ်း) နှင့် ၁၇၂ အကြား စတင်ဆောက်ရွက် နေပြီဖြစ်သည်။ UTNC ပြောရေးဆိုခွင့်ရှိသူက လုပ်ငန်းစတင်နေမှု အခြေအနေနှင့်ပတ်သက်၍ “သူတို့ အတိုင်းအတာ အနေနဲ့ ကျနော်တို့ မေးကြည့်တော့ ဒါ အခုက အဲ ဘက်ဟိုးနှစ်စီးရယ်၊ ဘူဒူဇာတစ်စီးရယ်နဲ့ ဒီတစ်ဖာလုံလောက်ကို သူတို့ မြေရှင်းနေပြီပေါ့၊ ပစ္စည်းပစ္စယတွေ ပုံနေပြီဆိုပြီးတော့ ဒီလိုအခြေအနေလည်း သိရတယ်” ဟု ပြောသည်။ အိန္ဒိယအစိုးရသည် ယခုလုပ်ငန်းစဉ်နှင့် ပတ်သက်၍ မြန်မာနိုင်ငံဘက်ခြမ်းရှိ နာဂပြည်သူလူထုနှင့် ကြိုတင် တွေ့ဆုံဆွေးနွေးခြင်း မရှိဘဲ မြေပြင်ရှင်းလင်းမှုများ စတင်ခဲ့ခြင်းဖြစ်ကြောင်း UTNC က ပြစ်တင်ပြောဆိုသည်။ UTNC အနေဖြင့်လည်း နိုဝင်ဘာလ ၁၅ ရက်နေ့တွင်မှ ဒေသခံလူကြီးများမှ တစ်ဆင့် လူကိုယ်တိုင် လာရောက် အသိပေးခြင်းကြောင့်သာ အခြေအနေကို သိရှိခဲ့ရသည်ဟု ဆိုသည်။ ခြံစည်းရိုးကာရံပြီးနောက် တရားဝင်သတ်မှတ်ထားသည့် လမ်းကြောင်းမှသာ သွားလာခွင့်ပြုမည်ဆိုပါက ငွေကြေးတတ်နိုင်သူများမှ လွဲ၍ သာမန်ဒေသခံပြည်သူများ အတွက် မိသားစုဝင်များထံ သွားရောက်တွေ့ဆုံရန် အလွန်ခက်ခဲသွားမည်ဟု UTNC က ထောက်ပြသည်။ ထို့ကြောင့် UTNC အနေဖြင့် ခြံစည်းရိုးကာရံမည့် အစီအစဉ်အပေါ် အိန္ဒိယအစိုးရက လူသားချင်းစာနာမှုဖြင့် ပြန်လည် သုံးသပ်ပေးရန်နှင့် လုပ်ငန်းများ ရပ်တန့်ပေးရန် တောင်းဆိုထားသည်။ ပြည်သူလူထု၏ ဆန္ဒကို လျစ်လျူရှုကာ ဆက်လက် အကောင်အထည်ဖော်ပါက ကန့်ကွက်မှုများကို ဆက်လက် လုပ်ဆောင်သွားမည် ဖြစ်ကြောင်း UTNC က ကြေညာထားသည်။ အိန္ဒိယအစိုးရသည် ပြီးခဲ့သည့် ဇန်နဝါရီလတွင် မြန်မာနိုင်ငံနှင့် ထိစပ်နေသည့် နယ်စပ်တစ်လျှောက် ခြံစည်းရိုး ကာရံရန်နှင့် နှစ်နိုင်ငံ ပြည်သူများ ဗီဇာမလိုဘဲ သွားလာခွင့်ပြုထားသည့် Free Movement Regime (FMR) ကို ဖျက်သိမ်းရန် ဆုံးဖြတ်ခဲ့သည်။ UTNC သည် နာဂကိုယ်ပိုင် အုပ်ချုပ်ခွင့်ရဒေသ၊ နန်းယွန်းမြို့နယ်အတွင်းရှိ တန်ရှန်း နာဂမျိုးနွယ်စုများကို ကိုယ်စားပြု သည့် အဖွဲ့အစည်းတစ်ခု ဖြစ်သည်။  

နယ်စပ် ခြံစည်းရိုးကာရံရေး ဒေသခံ နာဂများ ကန့်ကွက်

နယ်စပ် ခြံစည်းရိုးကာရံရေး ဒေသခံ နာဂများ ကန့်ကွက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၂၁ ရက်။  အိန္ဒိယ၏ နယ်စပ်ခြံစည်းရိုး ကာရံရ…

  • November 21, 2025
မိုးကုတ်မိုးမိတ် ပြန်အပ်ရေး ဆုံးဖြတ်ချက်ကြောင့် တအာင်းတပ်ကို လူထု ယုံကြည်မှု ကျဆင်းမည် သတင်းနှင့် မီဒီယာ ကွန်ရက်။ 
၂၀၂၅ ခုနှစ်၊ နိုဝင်ဘာလ ၂၁ ရက်။ တအာင်းတပ် TNLA ၏ မိုးမိတ်နှင့် မိုးကုတ်မြို့ပြန်ပေးရေး ဆုံးဖြတ်ချက်သည် ဒေသခံများကို စိုးရိမ်ထိတ်လန့် စေသည့်အပြင် တော်လှန်ရေး အင်အားစု၏ စုစည်းညီညွတ်မှုနှင့် ရည်မှန်းချက်အပေါ် သံသယ မေးခွန်းထုတ်မှုများ ဖြစ်ပေါ်စေခဲ့သည်။ တအာင်းအမျိုးသား လွတ်မြောက်ရေးတပ်မတော် (TNLA) က တရုတ်နိုင်ငံ၏ ကြားဝင်စေ့စပ်မှုဖြင့် စစ်ကော်မ ရှင်နှင့် အပစ်အခတ်ရပ်စဲပြီး မိုးမိတ်နှင့် မိုးကုတ်မြို့ တို့ကို ပြန်လည်အပ်နှံမည်ဟူသော ဆုံးဖြတ်ချက်ကြောင့် ဒေသခံပြည်သူများအကြား အလွန်အမင်း စိုးရိမ်ထိတ် လန့်မှုများ ဖြစ်ပေါ်လျက်ရှိသည်။ စစ်ကော်မရှင်၏ လက်အောက်သို့ ပြန်လည်ကျရောက်မည့် အရေးကို ဒေသခံများက လုံးဝလက်မခံလိုဘဲ၊ တအာင်းတပ် TNLA ၏ ဤဆုံးဖြတ်ချက်သည် အမျိုးသား တော်လှန်ရေးတစ်ခုလုံး၏ ရည်မှန်းချက်ကို လျစ်လျူ ရှုရာရောက်သည်ဟု နယ်မြေခံ နိုင်ငံရေး လေ့လာသုံးသပ်သူများက ပြောသည်။ တအာင်းတပ် TNLA က အပစ်အခတ်ရပ်စဲရေးနှင့် မြို့ပြန်ပေးမည့် သတင်းကို ထုတ်ပြန်သည့်နေ့တွင် မိုးကုတ်နှင့် မိုးမိတ်မြို့ခံများသည် ကြီးမားသော စိတ်ပိုင်းဆိုင်ရာ ထိခိုက်မှုကို ခံစားခဲ့ရကြောင်း ဒေသခံများက ပြောသည်။ မိုးကုတ် ဒေသခံတစ်ဦးက “အဲ့နေ့က ၂၉ ရက်နေ့လေနော်။ သတင်းက နေ့လည် ၂ နာရီခွဲက သိလိုက်တယ်။ ဒီဟာကြီး ထွက်လာတဲ့အချိန်မှာ အခုလက်ရှိပြည်သူတွေဟာ တအား စိုးရိမ်ထိတ်လန့် ကုန်တာပေါ့နော်။ ဆောက်တည်ရာမရ ဖြစ်ကုန်တာ ပြည်သူလူထုတိုင်းက။ တစ်ဖက်ရဲ့ ဥစ္စာနဲ့ လုပ်ကိုင်သွားတာ သိသာတယ်လေ” ဟု ပြောသည်။ အထူးသဖြင့် စစ်ကော်မရှင်၏ အုပ်ချုပ်မှုအောက်သို့ ပြန်လည်ကျရောက်မည့် အရေးကို အကြီးအကျယ် စိုးရိမ်နေကြခြင်း ဖြစ်သည်။ မြို့ခံပြည်သူများသည် ယခင်က စစ်ကော်မရှင်တပ် လက်အောက်တွင် ရင်ဆိုင်ခဲ့ရသော ရက်စက်မှုများကို လက်ခံနိုင်ခြင်း မရှိတော့ဘဲ၊ တိုက်ပွဲကြား၌ပင် အရပ်သားများအပေါ် ကျူးလွန်သွားသည့် ရက်စက်မှုများစွာ ရှိခဲ့ခြင်း ကြောင့် TNLA ၏ ဆုံးဖြတ်ချက်အပေါ် စိတ်ပျက်ဝမ်းနည်းမှုနှင့် စိတ်တိုဒေါသထွက်မှုများ ဖြစ်ပေါ်နေကြသည်။ မိုးမိတ်ဒေသခံ တစ်ဦးက “စစ်ကောင်စီဆို ဟို့အရင်က ပြည်သူလူထုကို ဆက်ဆံတာက ကျတော့ ဒီတိုက်ပွဲကြား မှာပဲ ရှိတယ်ပေါ့နော်။ ပြည်သူလူထုကို လုပ်သွားတဲ့ ရက်စက်မှုတွေ အများကြီး ဆိုတော့ ဒါက လက်သင့်မခံနိုင် ဘူး” ဟု ပြောသည်။ တအာင်းတပ် TNLA အနေဖြင့် ၎င်းတို့ အပစ်အခတ်ရပ်စဲရခြင်းမှာ မြို့များ ဗုံးမကြဲခံရဘဲ ပြည်သူများ ထပ်မံ မထိခိုက်စေရန်ဖြစ်သည်ဟု ထုတ်ပြန်ထားသော်လည်း၊ ဒေသခံအများစုက ယင်းမှာ အပေါ်ယံ အကြောင်းပြချက်သာ ဖြစ်သည်ဟု နယ်ခံများက ရှုမြင်နေကြသည်။ ဒေသခံပြည်သူများသည် မိမိတို့ဒေသ အေးချမ်းရေးထက် တော်လှန်ရေးတစ်ခုလုံး အောင်မြင်ရန် ဆန္ဒရှိပြီး၊ TNLA ၏ ဆုံးဖြတ်ချက်သည် ၎င်းတို့၏ တိုင်းရင်းသားအကျိုးစီးပွားကိုသာ အဓိက ဦးစားပေးသွားသည်ဟု ဝေဖန်မှုများ ထွက်ပေါ်လာသည်။ မိုးကုတ်မြို့ခံတစ်ဦးက “ကိုယ့်မြို့ပဲ မကြဲဘူးဆိုရင်တော့ ကိုယ်တွေက ချမ်းသာနေပြီးမှ ကျန်တဲ့သူတွေက ဆင်းရဲနေတာ ကျနော်တို့က ကြည့်ရက်နိုင်မှာလား နိုင်ငံသား တစ်ယောက်အနေနဲ့” ဟု ပြောသည်။ တအာင်းတပ် TNLA ၏ ဆုံးဖြတ်ချက်သည် အမျိုးသားရေး ရည်မှန်းချက်ကို သွေဖယ်သွားမည်ကို စိုးရိမ် ကြောင်း မိုးကုတ်မြို့ခံက ပြောဆိုသည်။ ထို့ပြင် တအာင်းတပ် TNLA ၏ ဆုံးဖြတ်ချက်သည် မိုးကုတ်မြို့ရှိ အခြားတော်လှန်ရေးအဖွဲ့များ (PDF များ) ကို ကြိုတင်အသိပေးခြင်းမရှိဘဲ တရားဝင်ထုတ်ပြန်ပြီးမှသာ သိရှိခဲ့ရခြင်းဖြစ်သောကြောင့် တော်လှန်ရေး အင်အား စုများ အကြား စုစည်းညီညွတ်မှုနှင့် ပြင်ဆင်မှုဆိုင်ရာ အခက်အခဲများ ကြုံတွေ့နေရကြောင်းလည်း တခြား အင်အားစုများနှင့် နီးစပ်သော ဒေသခံက ပြောသည်။ စစ်ကော်မရှင်ကို ပြန်လည်အပ်နှံမည့် ပုံစံမျိုးကို လုံးဝလက်မခံနိုင်သော်လည်း၊ အခြားတော်လှန်ရေး အဖွဲ့များနှင့် လက်တွဲညီညီ တိုက်ပွဲဝင်မည်ဆိုပါက ရှုံးသည်ဖြစ်စေ၊ နိုင်သည်ဖြစ်စေ လက်ခံနိုင်စရာရှိသည်ဟု ဒေသခံများက ပြောကြသည်။  

မိုးကုတ်မိုးမိတ် ပြန်အပ်ရေး ဆုံးဖြတ်ချက်ကြောင့် တအာင်းတပ်ကို လူထု ယုံကြည်မှု ကျဆင်းမည်

မိုးကုတ်မိုးမိတ် ပြန်အပ်ရေး ဆုံးဖြတ်ချက်ကြောင့် တအာင်းတပ်ကို လူထု ယုံကြည်မှု ကျဆင်းမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၂၁ ရက်။&nbs…

  • November 21, 2025
စစ်ကော်မရှင်၏ လက်နက်ကြီး မိသားစု နေအိမ်ပေါ်ကျ၊ အသက် ၂ နှစ် ကလေးငယ် သေဆုံး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၂၁ ရက်။ ကချင်ပြည်၊ ဖားကန့်မြို့ပေါ်တွင် တပ်စွဲထားသည့် စစ်ကော်မရှင် တပ်ဖွဲ့များက ရမ်းသမ်းပစ်ခတ်ခဲ့သော လက်နက်ကြီး ထိမှန်၍ နိုဝင်ဘာလ ၂၀ ရက်နေ့ ညက၊ အသက် ၂ နှစ်အရွယ် မိန်းကလေးငယ်တစ်ဦး သေဆုံးခဲ့ရပြီး၊ မိသားစုဝင် ၄ ဦး ထိခိုက်ဒဏ်ရာရရှိခဲ့သည်။ အဆိုပါ ဖြစ်စဉ်သည် ကမ္ဘာ့ကလေးသူငယ် အခွင့်အရေးနေ့ (World Children's Day) တွင် ဖြစ်ပွားခဲ့ခြင်း ဖြစ်သည်။ သေဆုံးခဲ့ရသည့် ကလေးငယ်မှာ မချိုသံလွင် ဖြစ်ပြီး အသက် ၂ နှစ်အရွယ်သာ ရှိသေးသည်။ ၎င်း၏ မိသားစုဝင် ၄ ဦးဖြစ်သည့် အသက် ၆၂ နှစ်အရွယ် ဒေါ်သိပ္ပ၊ အသက် ၄၅ နှစ်အရွယ် မဌေးဌေးမာ၊ အသက် ၃၅ နှစ်အရွယ် မပြုံးပြုံး နှင့် အသက် ၃၂ နှစ်အရွယ် ကိုထွန်းသူတို့သည်လည်း ပြင်းထန်ဒဏ်ရာများ ရရှိခဲ့ပြီး လက်ရှိတွင် ဆေးကုသမှုခံယူနေရသည်။ ဖြစ်စဉ်မှာ နိုဝင်ဘာလ ၂၀ ရက်နေ့ ည ၁၁ နာရီဝန်းကျင်ခန့်တွင် ဖားကန့်မြို့ရှိ ဗျူဟာကုန်းနှင့် မရှီကထောင် ရပ်ကွက်ရှိ ရခိုင်ကုန်းတို့တွင် တပ်စွဲထားသည့် စစ်ကော်မရှင်တပ်များက ဆိုင်းတောင် (ဆိပ်မူ) ကျေးရွာဘက်သို့ လက်နက်ကြီး ၁၀ လုံး ကျော်ခန့် ရမ်းသမ်းပစ်ခတ်ခဲ့ရာမှ အရပ်သားများ ထိခိုက်သေဆုံးရခြင်းဖြစ်သည်။ ဒေသခံအမျိုးသားတစ်ဦးက “ညက တပ်မကုန်းကနေ လက်နက်ကြီးနဲ့ ရမ်းသမ်းပစ်ခတ်တာ ဆိုင်းတောင်မှာ မိသားစုတစ်စုနေအိမ်ပေါ်ကို ကျလို့ ကလေးငယ်တစ်ဦး သေဆုံးသွားပါတယ်။ ကျန်တဲ့မိသားစုတွေကတော့ ဒဏ်ရာရတယ်လို့ ကြားရပါတယ်။ အခုလည်း ဆေးကုသမှု ခံယူနေတယ်လို့ သိရပါတယ်” ဟု ပြောသည်။ ဖားကန့်မြို့၏ လက်ရှိ စစ်ရေးအခြေအနေသည် နှစ်ဖက် လက်နက်ကိုင်တပ်များအကြား တိုက်ရိုက် ထိတွေ့ တိုက်ပွဲများ မရှိဘဲ အေးဆေးနေသည့် အခြေအနေဖြစ်သော်လည်း စစ်ရေးတင်းမာမှုများ ဆက်လက်ရှိနေသည်။ စစ်ကော်မရှင်တပ်ဖွဲ့များသည် အရပ်သားများ နေထိုင်သည့် ကျေးရွာများအတွင်းသို့ လက်နက်ကြီးများဖြင့် အကြောင်းမဲ့ ရမ်းသမ်းပစ်ခတ်လေ့ရှိကြောင်း ဒေသခံများက ဆိုသည်။ ဖားကန့် မြို့ခံတစ်ဦးက “စစ်ရေးကတော့ လောလောဆယ် အခြေအနေ အေးနေတယ်။ တိုက်ပွဲဖြစ်တာမရှိဘဲနဲ့ ရပ်ရွာထဲကို လက်နက်ကြီးတွေနဲ့ ပစ်ထည့်နေတာ ဟုတ်တယ်” ဟု ပြောသည်။ ပြီးခဲ့သည့် နိုဝင်ဘာလ ဒုတိယအပတ်ကလည်း ဖားကန့်မြို့နယ်အတွင်း စစ်ကော်မရှင် စစ်ကြောင်းများ ဝင်ရောက်လာပြီးနောက် နှစ်ဖက်တိုက်ပွဲများ ဖြစ်ပွားခဲ့ရာ ကလေးငယ်တစ်ဦးနှင့် အမျိုးသမီး ၂ ဦး အပါအဝင် အရပ်သား ၄ ဦးအထိ သေဆုံးခဲ့သည်။ အမျိုးသားညီညွတ်ရေး အစိုးရ (NUG) ၏ လူ့အခွင့်အရေးဆိုင်ရာ ဝန်ကြီးဌာနမှ ထုတ်ပြန်ချက်များအရ အာဏာသိမ်းပြီးနောက်ပိုင်းမှ ယခုနှစ် အောက်တိုဘာလ ၃၁ ရက်နေ့အထိ နိုင်ငံတစ်ဝှမ်းတွင် စစ်ကော်မရှင်၏ တိုက်ခိုက်မှုနှင့် အစုလိုက်အပြုံလိုက် သတ်ဖြတ်မှုများကြောင့် အရပ်သား ၉,၀၀၀ ကျော် သေဆုံးခဲ့ရပြီး၊ အဆိုပါ စာရင်းများတွင် အသက် ၁၈ နှစ်အောက် ကလေးငယ် ၁,၂၀၀ နီးပါး ပါဝင်နေသည်ဟု ဆိုသည်။  

စစ်ကော်မရှင်၏ လက်နက်ကြီး မိသားစု နေအိမ်ပေါ်ကျ၊ အသက် ၂ နှစ် ကလေးငယ် သေဆုံး

စစ်ကော်မရှင်၏ လက်နက်ကြီး မိသားစု နေအိမ်ပေါ်ကျ၊ အသက် ၂ နှစ် ကလေးငယ် သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၂၁ ရက်။  ကချင်ပြ…

  • November 21, 2025
မော်ချီး သတ္တုတွင်းကို ဗုံးကြဲ၊ ခဲလုပ်သား ငါးဦးထက်မနည်း သေဆုံး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၂၁ ရက်။ ကရင်နီ (ကယား) ပြည်၊ ဖားဆောင်းမြို့နယ်ရှိ မော်ချီးဒေသကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့သဖြင့် သတ္ထုတွင်းလုပ်ငန်းခွင်အတွင်း အလုပ်လုပ်နေသော အရပ်သား ခဲလုပ်သား ၅ ဦးထက်မနည်း နေရာတွင်ပင် သေဆုံးခဲ့ရသည်။ နိုဝင်ဘာလ ၂၁ ရက်နေ့၊ နံနက်ပိုင်းတွင် တိုက်ပွဲဖြစ်ပွားခြင်းမရှိဘဲ ဗုံးကြဲတိုက်ခိုက်ခဲ့သဖြင့် ခဲလုပ်သား ၅ ဦးထက်မနည်း နေရာတွင်ပင် သေဆုံးခဲ့ရကြောင်း ဒေသခံသတင်းရင်းမြစ်များက အတည်ပြု ပြောသည်။ အဆိုပါ တိုက်ခိုက်ခံရမှုထဲ၌ အမျိုးသမီးများ အပါအဝင် ၁၀ ဦးကျော် ထိခိုက်ဒဏ်ရာရရှိခဲ့သည်။ ဒေသခံတစ်ဦးက “တိုက်ပွဲဖြစ်စရာ အခြေအနေ လုံးဝမရှိဘဲ၊ သူတို့က လေယာဉ်နဲ့ တိုက်ရိုက်လာကြဲတာပါ။ ကျနော်တို့ ခဲလုပ်သားတွေ ထိပြီး သေဆုံးရတာပါ” ဟု ပြောသည်။ လေကြောင်းတိုက်ခိုက်မှုသည် ယနေ့ နံနက် ၈ နာရီခွဲခန့်မှစ၍ မော်ချီးဒေသရှိ ခဲမဖြူနှင့် အဖြိုက်နက် သတ္ထုများ ထွက်ရှိရာ ကေတီ၊ ညောင်ပင်နှင့် အမှတ်(၂) စက်ရုံ နေရာများ၊ ကီဒေခဲတွင်း အနီးတဝိုက် အပါအဝင် နေရာ သုံးခုခန့်ကို ဆက်တိုက် ဗုံးကြဲတိုက်ခိုက်ခဲ့ခြင်းဖြစ်သည်။ သေဆုံးသူများမှာ အားလုံး အမျိုးသားများဖြစ်ပြီး၊ ထိခိုက်ဒဏ်ရာရရှိသူများတွင် သက်ကြီး အမျိုးသမီးများ လည်း ပါဝင်ကြောင်း ဒေသခံများက ပြောသည်။ ဒေသခံများနှင့် စစ်ရှောင်ကူညီရေးအဖွဲ့များ၏ ပြောဆိုချက်များအရ ဗုံးကြဲတိုက်ခိုက်ခဲ့သည့် နေရာများတွင် မြေပြင်တိုက်ပွဲ တစ်စုံတစ်ရာ ဖြစ်ပွားခြင်းမရှိခဲ့ဘဲ အရပ်သားများ အလုပ်လုပ်နေသည့် နေရာများကိုသာ တိုက်ရိုက် ပစ်မှတ်ထားတိုက်ခိုက်ခဲ့ခြင်း ဖြစ်သည်။ မော်ချီးဒေသသည် မြန်မာနိုင်ငံ၏ သတ္ထုတူးဖော်ရေးအတွက် အရေးပါသော ခဲမဖြူနှင့် အဖြိုက်နက် ထွက်ရှိရာ ဒေသဖြစ်ပြီး၊ ပြီးခဲ့သည့် ၂၀၂၄ ခုနှစ်၊ ဇန်နဝါရီလ ၂၇ ရက်နေ့ တွင် ကရင်နီတော်လှန်ရေး တပ်ပေါင်းစုက စစ်ကော်မရှင် လက်မှ သိမ်းပိုက် ထိန်းချုပ်ထားသည့် မြို့ဖြစ်သည်။ မော်ချီးဒေသသည် စစ်ကော်မရှင်၏ လေကြောင်းတိုက်ခိုက်မှုကို အကြိမ်ပေါင်းများစွာ ကြုံတွေ့ခဲ့ရသော နေရာဖြစ်သည်။ ပြီးခဲ့သည့် ဩဂုတ်လ ၁၇ ရက်နေ့တုန်းကလည်း လူစည်ကားသော (၁၆) ကုန်းရပ်ကွက်ကို လေကြောင်းမှ ဗုံးကြဲခဲ့သောကြောင့် အသက်ငါးနှစ်အရွယ် ကလေးငယ်အပါအဝင် အရပ်သား ၂၃ ဦး သေဆုံးခဲ့သည့် ဖြစ်စဉ်ရှိခဲ့ဖူးသည်။ ထို့အပြင် ဇွန်လ ၂၅ ရက်နေ့တွင်လည်း တောင်ပေါ်ရွာရှိ ခဲတွင်းတစ်ခုကို တိုက်ခိုက်ခဲ့ရာ ခဲလုပ်သား ၆ ဦး သေဆုံးခဲ့သည်။ ဒေသတွင်း တော်လှန်ရေးအဖွဲ့များက လေကြောင်းအန္တရာယ်မှ ရှောင်ရှားနိုင်ရန်အတွက် ဒေသခံလူထုများနှင့် စစ်ရှောင်များအနေဖြင့် လေယာဉ်သံကြားပါက ဗုံးခိုကျင်းများ (သို့မဟုတ်) ပုန်းအောင်းနိုင်သည့် နေရာများတွင် နေထိုင်ကြရန် အထူးသတိပေးထားသည်။  

မော်ချီး သတ္တုတွင်းကို ဗုံးကြဲ၊ ခဲလုပ်သား ငါးဦးထက်မနည်း သေဆုံး

မော်ချီး သတ္တုတွင်းကို ဗုံးကြဲ၊ ခဲလုပ်သား ငါးဦးထက်မနည်း သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၂၁ ရက်။  ကရင်နီ (ကယား) ပြည်…

  • November 21, 2025
စစ်ကော်မရှင် တပ်များအား TNLA ခေါ်လာမည်ကို ဒေသခံများ စိုးရိမ်

သတင်းနှင့် မီဒိဘာ ကွန်ရက်။
၂၀၂၅ ခုနှစ်၊ နိုဝင်ဘာလ ၂၀ ရက်။ 

‘စစ်ကော်မရှင်တပ်အား TNLA က လုံခြုံရေးယူပေးရမည်’ ဟု သဘောတူထားသည် ဟူသော အတည်မပြုနိုင်သည့် သတင်းများကြောင့် မိုးကုတ် ဒေသခံများ ထိတ်လန့်ကာ ဘေးလွှတ်နိုင်မည့် နေရာများသို့ ဆက်တိုက် စစ်ဘေးရှောင်နေကြသည်။

မိုးကုတ်မြို့တွင် ဒေသခံပြည်သူများသည် တအာင်းအမျိုးသား လွတ်မြောက်ရေးတပ်မတော် (TNLA) နှင့် စစ်ကော်မရှင်တပ် (စကမ) တို့အကြား သဘောတူညီချက်များ ထွက်ပေါ်လာခြင်းကြောင့် စိုးရိမ်ပူပန်မှု မြင့်တက် နေသည်။ 

TNLA က စစ်ကော်မရှင်တပ်အား လုံခြုံရေးယူပေးကာ မြို့တွင်းသို့ ပြန်လည်ခေါ်ယူပေးရမည်ဟူသော အတည်မပြုနိုင်သည့် သတင်းများကြောင့် မိုးကုတ်မြို့ခံများမှာ စစ်ရှောင်နေကြရပြီး၊ ယခုတစ်ကြိမ် စစ်ရှောင်သူဦးရေမှာ မြို့သိမ်းတိုက်ပွဲ မဖြစ်ပွားမီက ရှောင်တိမ်းသူဦးရေထက် ပိုမိုများပြားလာကြောင်း ဒေသခံသတင်းရင်းမြစ်များက ပြောသည်။

PDF နှင့် နီးစပ်သည့် မြေပြင်အရင်းအမြစ်များ၏ ပြောဆိုချက်အရ TNLA နှင့် စစ်ကော်မရှင်တပ်တို့အကြား လားရှိုးမြို့တွင် ပြီးခဲ့သည့် နိုဝင်ဘာလ ၁၂ ရက်နေ့ခန့်က မိုးကုတ်မြို့မှ ဆုတ်ခွာရေးအတွက် တွေ့ဆုံဆွေးနွေးကာ သဘောတူ လက်မှတ်ရေးထိုးခဲ့ကြသည်ဟု သတင်းများထွက်ပေါ်နေသည်။

ထွက်ပေါ်နေသည့် သတင်းများအရ လာမည့် နိုဝင်ဘာလ ၃၀ ရက်နေ့တွင် TNLA မှ စစ်ကော်မရှင်တပ်အား လုံခြုံရေးယူပေး၍ မြို့တွင်းသို့ ခေါ်ဝင်လာရမည်ဖြစ်ပြီး၊ လမ်းခရီးတစ်လျှောက် ကျည်မပေါက်ရန်အတွက်လည်း TNLA က တာဝန်ခံပေးရမည်ဟု ဆိုသည်။

PDF တပ်ရင်းများအား ထောက်ပို့လုပ်ဆောင်နေသူ တစ်ဦးက “မြို့ခံတွေတော့ စိုးရိမ်လို့ တော်တော်များများ တော့ ရှောင်ကုန်ကြပြီဗျ။ အဖွဲ့တွေကလည်း ခဏတော့ ရှောင်ထားပေးရတာမျိုးတွေ ရှိပါတယ်ဗျ။ PDFတွေ ကို ထောက်ခံမှုက လျော့ကျသွားတာ မရှိပေမယ့်လည်း လောလောဆယ်မှာ တိုက်လို့ မရသေးဘူးဆိုတော့ နည်း နည်းတော့ အားငယ်သွားတာမျိုးတော့ ရှိတာပေါ့ ပြည်သူတွေဖက်က” ဟု ပြောသည်။

အဆိုပါ သတင်းသည် တရားဝင် အတည်ပြုချက် မရသေးသော်လည်း ဒေသခံများအကြား စိုးရိမ်ပူပန်မှု မြင့်မား နေပြီး စစ်ရှောင်နေကြရသည်။ 

ယခုတစ်ကြိမ် စစ်ရှောင်သည့် လူဦးရေသည် ယခင်မြို့သိမ်းတိုက်ပွဲ မဖြစ်ပွားခင်က ရှောင်ကြသည့် လူဦးရေထက် ပိုမိုများပြားလျက်ရှိသည်။

မြေပြင် သတင်းအရင်းအမြစ်တစ်ဦးက “အကုန်လုံးကလည်း ပြောနေကြတယ်ဆိုတော့ အတည်လောက်နီးနီး ဖြစ်နေပါတယ်။ ဒါပေမယ့် ပလောင်ကတော့ တရားဝင် ထုတ်ပြန်တာမျိုး မရှိဘူးဗျ။ အခု ရှောင်တာက တော် တော်များတယ်” ဟု အခြေအနေကို ရှင်းပြသည်။

အဆိုပါ အခြေအနေများ၊ သတင်းထွက်ပေါ်နေမှုများနှင့် ပတ်သက်၍ တအာင်းတပ် TNLA ပြောရေးဆိုခွင့်ရှိသူကို ဆက်သွယ်ခဲ့သော်လည်း ဆက်သွယ်၍ မရပေ။

စစ်ရှောင်နေကြသည့် ဒေသခံများအနက် CDM (Civil Disobedience Movement) ဝန်ထမ်းများအား TNLA ထိန်းချုပ်နယ်မြေများတွင် လာရောက်ခိုလှုံကြရန် ဖိတ်ခေါ်မှုများလည်း ရှိနေသည်ဟု သတင်းများက ဆိုသည်။

လက်ရှိတွင် TNLA ဘက်မှ တရားဝင် မဆုတ်ခွာသေးသော်လည်း ရုံးပိုင်းဆိုင်ရာပစ္စည်းများ စတင်ရွှေ့ပြောင်း နေပြီး၊ ယခင်က ချိတ်ပိတ်ထားသည့် နေအိမ်များမှလည်း ပစ္စည်းများ သယ်ထုတ်နေကြသည်ဟု PDF နှင့် နီးစပ်သည့် စစ်ရေးသတင်းရင်းမြစ်အချို့က ပြောသည်။

တရုတ်နိုင်ငံ ကူမင်းမြို့၌ အောက်တိုဘာ ၂၈ ရက်နေ့က တရုတ်အစိုးရ ကြားခံမှုဖြင့် TNLA နှင့် စစ်ကော်မရှင် တပ်တို့အကြား တွေ့ဆုံဆွေးနွေးခဲ့ပြီးနောက် မိုးကုတ်မြို့ပေါ်မှ TNLA တပ်များ ဆုတ်ခွာရန် သဘောတူ လက်မှတ် ရေးထိုးခဲ့ခြင်း ဖြစ်သည်။

မိုးကုတ်ဒေသခံများမှာ စစ်ကော်မရှင်တပ် ပြန်လည် ဝင်ရောက်လာပါက တက်ကြွလှုပ်ရှားသူများ ဖမ်းဆီးခံရ မည့်အပြင် ၎င်းတို့၏ နေအိမ်များ ချိတ်ပိတ်ခံရမည်ကိုပါ စိုးရိမ်နေကြရသည်။ 

ထို့ကြောင့် စစ်ကော်မရှင်တပ်အား လက်မခံကြောင်း ပြသသည့်အနေဖြင့် သံပုံးတီး ဆန္ဒထုတ်ဖော်မှုများ လုပ်ခဲ့ကြသည်။  

စစ်ကော်မရှင် တပ်များအား TNLA ခေါ်လာမည်ကို ဒေသခံများ စိုးရိမ်


စစ်ကော်မရှင် တပ်များအား TNLA ခေါ်လာမည်ကို ဒေသခံများ စိုးရိမ် သတင်းနှင့် မီဒိဘာ ကွန်ရက်။၂၀၂၅ ခုနှစ်၊ နိုဝင်ဘာလ ၂၀ ရက်။‘စစ်ကော်မရှင်တပ်အား TNLA က လုံ…

  • November 20, 2025
×Close