သတင်း

ကချင်ပြည် မြို့နယ် ၄ ခုတွင် တိုက်ပွဲများ ဖြစ်ပွားနေ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၁၈ ရက်။ ကချင်ပြည်တွင် စစ်ရေးတင်းမာမှု မြို့နယ် ၄ ခုအထိ ပြန့်နှံ့နေပြီး ဖားကန့်တွင် အရပ်သားများ လေကြောင်းနှင့် လက်နက်ကြီး ဒဏ်ခံနေရသည်ဟု ဒေသခံများနှင့် KIO ပြောခွင့်ရက ပြောသည်။ ကချင်ပြည် အတွင်း နိုဝင်ဘာလ ဒုတိယပတ်တွင်း စစ်ကော်မရှင်တပ်နှင့် ကချင်လွတ်လပ်ရေး တပ်မတော် (KIA) တို့အကြား စစ်ရေးတင်းမာမှု နှင့် တိုက်ပွဲများသည် ဗန်းမော်၊ ဝိုင်းမော်၊ ဖားကန့်နှင့် ခေါင်လန်ဖူး စသည့် မြို့နယ်လေးခုအထိ ကျယ်ကျယ် ပြန့်ပြန့် ဖြစ်ပွားနေခြင်း ဖြစ်သည်။ အထူးသဖြင့် ဖားကန့်ဒေသတွင် လေကြောင်းနှင့် လက်နက်ကြီး တိုက်ခိုက်မှုများကြောင့် အရပ်သား သေဆုံး ထိခိုက်မှုများ ဆက်တိုက် ဖြစ်ပွားနေကြောင်း KIO/KIA ပြောခွင့်ရနှင့် ဒေသခံသတင်းရင်းမြစ်များက အတည်ပြုသည်။ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက “ကချင်ပြည်နယ်မှာ တိုက်ပွဲကတော့ ဗန်းမော်၊ နောက် ဝိုင်း မော်၊ ဖားကန့်၊ နောက် ဟိုးခေါင်လန်ဖူးဖက်မှာ အဲဒီလေးနေရာမှာကတော့ တိုက်ပွဲက နေ့တိုင်းလို ဖြစ်တာ ရှိပါ တယ်။ ဒါကြောင့် ကချင်ပြည်နယ် တစ်ခုလုံးနဲ့ ခြုံပြီးမှ ပြောမယ်ဆိုရင်တော့ ခုနပြောတဲ့နေရာမှာကတော့ စစ် ရေး အခြေအနေကတော့ တင်းမာတဲ့ အနေအထား ဖြစ်ပါတယ်” ဟု ပြောသည်။ ဗန်းမော်မြို့နယ်သည် စစ်ရေးတင်းမာမှု အမြင့်ဆုံးနေရာတစ်ခုအဖြစ် ဆက်လက်တည်ရှိနေပြီး၊ KIA က လက် လွှတ်သွားသည့် နေရာများကို ပြန်လည်ထိန်းချုပ်ရန် ကြိုးပမ်းနေချိန်တွင် စစ်ကော်မရှင်ကလည်း နယ်မြေ ပြန်လည် စိုးမိုးရန် ထိုးစစ်ဆင်တိုက်ခိုက်နေသည်။ တိုက်ပွဲများသည် စကခ (၂၁) ဝန်းကျင်၊ နမ်ဖား၊ တာမိုင်းတုံ၊ ဗန်းမော်တက္ကသိုလ်လမ်းမှ မိုးမောက်ဘက်တက် သည့် ၃ မိုင်ဝန်းကျင် နေရာများတွင် ဆက်တိုက် ဖြစ်ပွားနေသည်။ ဗိုလ်မှူးကြီး နော်ဘူက ဗန်းမော်ဒေသ တိုက်ပွဲနှင့် ပတ်သက်၍ “ဗန်းမော်ကတော့ နေရာကတော့ ကျယ်ပြန့် တယ်။ ဆိုတော့ ဟိုဖက်က နည်းနည်း ဆုတ်ပေးလိုက် ဒီဖက်က ကျနော်တို့ ပြန်သိမ်းလိုက် အဲ့လိုမျိုး ပုံစံလေး ပေါ့ နည်းနည်းတော့ ရှေ့တန်းက တိုက်ပွဲပုံစံတော့ အဲလိုဖြစ်နေတယ်။ လေကြောင်းကတော့ Y-12 နဲ့ ဗုံးကြဲတာ တွေ၊ ဂျက်ဖိုက်တာနဲ့ ဂန်းရှင်းနဲ့ ပစ်တာတွေ ဒါကတော့ မော်တာ အသုံးပြုပြီးမှ ပစ်တာတွေ လက်နက်ကြီးတွေ လေကြောင်းတွေ ဒါကတော့ ပြောစရာ မလိုပါဘူး နေ့တိုင်းရှိပါတယ်” ဟု ပြောသည်။ ထို့အပြင် ဖားကန့်မြို့နယ်တွင် နိုဝင်ဘာလ ဒုတိယပတ်အတွင်း စစ်ကော်မရှင်တပ်ဖွဲ့များသည် မြေပြင်တွင် ထိခိုက်မှုများပြားလာ၍ လေကြောင်း နှင့် လက်နက်ကြီးများကို ပိုမိုအသုံးပြုလာခဲ့ရာ အရပ်သားထိခိုက်မှုများ ဖြစ်ပေါ်ခဲ့သည်။ နိုဝင်ဘာလ ၁၁ ရက်နေ့၊ မွန်းလွဲပိုင်းတွင် ဖားကန့်၊ ကထန်ကွက်သစ်ကို စစ်ကော်မရှင်တပ်၏ Y-12 လေယာဉ်ဖြင့် ဗုံးကြဲတိုက်ခိုက်ခဲ့ရာ အသက် ၄၀ ဝန်းကျင် အမျိုးသမီးတစ်ဦး နေရာတွင်ပင် သေဆုံးခဲ့ပြီး၊ ၎င်း၏ ၅ နှစ်အရွယ် သားငယ်မှာ ပြင်းထန်ဒဏ်ရာများ ရရှိခဲ့သည်။ နိုဝင်ဘာလ ၁၃ ရက်နေ့တွင်လည်း ဖားကန့် ဗျူဟာကုန်းမှ လက်နက်ကြီးဖြင့် ပစ်ခတ်မှုကြောင့် လုံးခင်းအုပ်စု၊ မားဆားရွာက မူကြိုကျောင်းဝန်းထဲကို ကျရောက်ပေါက်ကွဲ ခဲ့ရာ ဆရာမတစ်ဦးနှင့် ၄ နှစ်အရွယ် ကလေးငယ် တစ်ဦး ဒဏ်ရာရရှိခဲ့သည်။ ဗိုလ်မှူးကြီး နော်ဘူက “ဗျူဟာကုန်း ဖက်ကနေ လက်နက်ကြီးနဲ့ လှမ်းပစ်လို့ ပြည်သူလူထုတွေ ထိခိုက်တာတော့ ရှိပါတယ်။ ဟိုတနေ့ကတော့ ပြည်သူလူထုတွေ ထိခိုက်တာရှိတယ်။ နောက် လေကြောင်းနဲ့ ပြည်သူလူထုရှိတဲ့ ဖက်ကို ဗုံးကြဲလို့ ပြည်သူလူထု ထိခိုက်တာတွေရှိပါတယ်” ဟု ပြောသည်။ ဝိုင်းမော်ဒေသတွင် မြေပြင်တိုက်ပွဲများ ငြိမ်သက်နေသော်လည်း ဒရုန်းနှင့် လက်နက်ကြီးပစ်ခတ်မှုများ၊ ဂျက်ဖိုက် တာဖြင့် ပစ်ခတ်မှုများ ဆက်လက်ရှိနေဆဲဖြစ်ပြီး ခေါင်လန်ဖူးဖက်တွင်လည်း တိုက်ပွဲများ နေ့တိုင်းလိုလို ဖြစ်ပွားနေဆဲ ဖြစ်သည်။ KIO/KIA နှင့် PDF ပူးပေါင်းတပ်ဖွဲ့များသည် ကချင်ပြည်သူများကို လေကြောင်းနှင့် လက်နက်ကြီး အန္တရာယ်ကို အထူးသတိထားကြရန် သတိပေးထားသည်။  

ကချင်ပြည် မြို့နယ် ၄ ခုတွင် တိုက်ပွဲများ ဖြစ်ပွားနေ

ကချင်ပြည် မြို့နယ် ၄ ခုတွင် တိုက်ပွဲများ ဖြစ်ပွားနေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၁၈ ရက်။  ကချင်ပြည်တွင် စစ်ရေးတင်းမာမှု…

  • November 18, 2025
KNU သိမ်းပိုက်လိုက်သော မောတောင် လမ်းပိုင်းကို စစ်ကော်မရှင် လေကြောင်းမှ ဗုံးကြဲ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၁၈ ရက်။ မောတောင်လမ်းပိုင်းကို စစ်ကော်မရှင်တပ်က လေကြောင်းဖြင့် ဆက်တိုက် ဗုံးကြဲနေသည့်အပြင် စစ်ကူ အင်အား ဆက်တိုက် ဖြည့်တင်းနေသည်ဟု ဒေသခံများနှင့် မြေပြင် သတင်းအရင်းအမြစ်များက ပြောသည်။ မြန်မာ - ထိုင်း နယ်စပ်ရှိ တနင်္သာရီတိုင်းရှိ မောတောင်မြို့ကို KNLA နှင့် PDF ပူးပေါင်းအဖွဲ့တို့က သိမ်းပိုက်ထား ပြီးနောက် လမ်းကြောင်း ပြန်လည်ရရှိရေးအတွက် စစ်ကော်မရှင်တပ်က ဝေဟင်ထိုးစစ်ဆင်နေပြီး စစ်ကူ အင်အားများကို ဖြည့်တင်းနေခြင်း ဖြစ်သည်။ အသက် ၅၀ ခန့်အရွယ် သဲဖြူရွာသား အမျိုးသားတစ်ဦးက “မောတောင်မြို့ သိမ်းပြီးတာနဲ့ နောက်တစ်ရက်မှာ လေယာဉ်တွေက ဆက်တိုက်တက်နေတာ၊ တစ်ရက်တည်းနဲ့ လေယာဉ်အစီးရေ အများဆုံးတက်နေတာကို ပထမဆုံးပဲ မြင်ဖူးတာ” ဟု အတည်ပြု ပြောဆိုသည်။ နိုဝင်ဘာလ ၁၅ ရက်နေ့ တစ်ရက်တည်းမှာပင် လေယာဉ်နှင့် ရဟတ်ယာဉ်များဖြင့် အပြင်းအထန် ဗုံးကြဲ တိုက် ခိုက်ခဲ့သည့်အပြင် စစ်ကူအင်အားကိုပါ အများဆုံး ဖြည့်တင်းခဲ့ကြောင်း ဒေသခံများနှင့် စစ်ရေး သတင်းရင်းမြစ် များက ပြောသည်။ တနင်္သာရီတိုင်း၊ ဘုတ်ပြင်းမြို့နယ်အတွင်းရှိ မောတောင်မြို့သို့ သွားရာလမ်းပိုင်းဖြစ်သည့် သိန်ခွန်းနှင့် သဲဖြူကျေး ရွာ ဝန်းကျင်၌ စစ်ကော်မရှင်တပ်နှင့် PDF ပူးပေါင်းတပ်ဖွဲ့များအကြား နိုဝင်ဘာလ ၁၅ ရက်နေ့ နံနက်ပိုင်းမှ စတင် ၍ တစ်နေ့လုံး တိုက်ပွဲပြင်းထန်ခဲ့သည်။ ထို့နောက် စစ်ကော်မရှင်တပ်သည် လေကြောင်းအင်အားကို အဆက်မပြတ် အသုံးပြုကာ ပြန်လည် တိုက်ခိုက်ခဲ့ သည်။ တိုက်ပွဲဖြစ်ပွားသည့် နိုဝင်ဘာလ ၁၅ ရက်နေ့တွင် မြိတ်လေတပ်စခန်းမှ ပျံတက်လာသည့် Y-12 လေယာဉ် ၂ စီး နှင့် Mi-17 ရဟတ်ယာဉ် ၃ စီး ဖြင့် စတင်ဗုံးကြဲခဲ့ပြီးနောက် ညနေပိုင်းအထိ ဗုံးကြဲတိုက်ခိုက်မှုများ ဆက်တိုက် ပြုလုပ်ခဲ့သည်။ စစ်ကော်မရှင်တပ်သည် သိန်ခွန်းကျေးရွာကို ကျော်လွန်ကာ သဲဖြူကျေးရွာသို့ စစ်ကူအင်အားများကို လေကြောင်းမှသာ ဖြည့်တင်းခဲ့ရသည်။ Mi-17 ရဟတ်ယာဉ် ၃ စီးဖြင့် တစ်ကြိမ်လျှင် စစ်သည် ၃၀ ခန့် နှုန်း ပို့ဆောင်ခဲ့သလို Y-12 လေယာဉ်များပေါ်မှ စစ်သည်များမှာလည်း လေထီးများဖြင့် ဆင်းသက် ဝင်ရောက်ခဲ့ကြောင်း ဒေသခံက ဆိုသည်။ PDF တပ်ဖွဲ့များက မောတောင်မြို့သို့သွားရာ မြေပြင်လမ်းကြောင်းများ (တနင်္သာရီ - ဘုတ်ပြင်း ပြည်ထောင်စု လမ်းမကြီးဘက်မှ လမ်းခွဲများ) ကို ထိန်းချုပ်ထားနိုင်ခဲ့ခြင်းကြောင့် စစ်ကော်မရှင်တပ်သည် မြေပြင်မှ ထိုးစစ် ဆင်ရန် ခက်ခဲကာ လေကြောင်းမှ အင်အားဖြည့်တင်းမှုကို အဓိက အားပြုလာခြင်း ဖြစ်သည်။ နိုဝင်ဘာလအတွင်း တိုက်ပွဲများ ပြင်းထန်လာခြင်းကြောင့် သိန်ခွန်း၊ သဲဖြူကျေးရွာနှင့် အနီးဝန်းကျင်မှ ရွာသား များလည်း ဘေးလွတ်မည့်နေရာများသို့ ထွက်ပြေးတိမ်းရှောင် နေကြရသည်။ မောတောင်မြို့သည် တနင်္သာရီ - ဘုတ်ပြင်းသွား ပြည်ထောင်စု လမ်းမကြီးမှ ၄၇ မိုင်ခန့်အကွာတွင် တည်ရှိပြီး၊ စစ်ကော်မရှင်တပ်သည် ၂၀၂၄ ခုနှစ်၊ ဒီဇင်ဘာနှောင်းပိုင်း ကတည်းက စစ်ကြောင်းထိုးရန် ကြိုးပမ်းခဲ့ခြင်း ဖြစ်သည်။ သို့သော်လည်း KNLA နှင့် PDF ပူးပေါင်းတပ်တို့၏ ခုခံစစ်ကြောင့် ရှေ့ဆက်မတိုးနိုင်ခဲ့ဘဲ ယခုကဲ့သို့ လေကြောင်း အသုံးပြု တိုက်ခိုက်မှုများ အရှိန်မြှင့်တင်လာခြင်း ဖြစ်သည်။  

KNU သိမ်းပိုက်လိုက်သော မောတောင် လမ်းပိုင်းကို စစ်ကော်မရှင် လေကြောင်းမှ ဗုံးကြဲ

KNU သိမ်းပိုက်လိုက်သော မောတောင် လမ်းပိုင်းကို စစ်ကော်မရှင် လေကြောင်းမှ ဗုံးကြဲ သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၁၈ ရက်။  မေ…

  • November 18, 2025
ကျောင်း ဆရာ/မများအား ထောက်ပံ့ရန် ထိုင်းဘတ်ငွေ သန်း ၅၀ အရေးပေါ်လိုအပ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၁၄ ရက်။ ကော်သူးလေဒေသရှိ ကျောင်းဆရာ၊ ဆရာမ ၁ သောင်းကျော်အတွက် ထောက်ပံ့ကြေးပံ့ပိုးရန် ထိုင်းဘတ်ငွေ သန်း ၅၀ အရေးပေါ်လိုအပ်နေသည်။ ကရင်ပြည်အတွင်းရှိ ကော်သူးလေဒေသတွင် တာဝန်ထမ်းဆောင်နေကြသည့် ကျောင်းဆရာ၊ ဆရာမများ အတွက် ၂၀၂၅ - ၂၀၂၆ ပညာသင်နှစ်၏ နှစ်စဉ်ထောက်ပံ့ကြေးများ ပံ့ပိုးပေးနိုင်ရန် အရေးပေါ်ရန်ပုံငွေ ထိုင်း ဘတ်ငွေ သန်း ၅၀ ခန့် လိုအပ်နေကြောင်း ကရင်ပညာရေး အဖွဲ့အစည်းများက ပြောသည်။ ကရင်ဆရာ၊ ဆရာမများအသင်း (KTWG) ၏ Communication and Advocacy တာဝန်ခံ နော်ဖောရှီးဝါး က “ဒီဆရာ ဆရာမတွေက ကော်သူးလေမှာရှိတဲ့ ကျောင်းစုစုပေါင်း ၁,၇၃၈ ကျောင်းရဲ့ ဆရာ၊ ဆရာမတွေ ဖြစ်ပါ တယ်။ ကျောင်းသား၊ ကျောင်းသူပေါင်း ၁၄၉,၇၂၀ ကို စာသင်ပေးနေရတဲ့ ဆရာ၊ ဆရာမတွေလည်း ဖြစ်ပါ တယ်။ ဒီစာသင်နှစ်မှာ ဆိုရင် ကျမတို့ KECD နဲ့ KTWG က ဒီဆရာ၊ ဆရာမတွေရဲ့ နှစ်စဉ်ထောက်ပံ့ငွေက ၈၁ သန်းကျော်ကျော်လောက်ပဲ ရှိသေးတယ်ပေါ့ နော်။ ဆိုတော့ သန်း ၅၀ လောက် လိုအပ်မှု ရှိနေသေးတယ်။ ရာခိုင်နှုန်းအနေနဲ့ ပြောရမယ်ဆိုရင်တော့ ၄၁ ရာခိုင်နှုန်း လိုအပ်နေသေးတယ်” ဟု ပြောသည်။ ကရင်ပညာရေးနှင့် ယဉ်ကျေးမှုဌာန (KECD) နှင့် ကရင်ဆရာ၊ ဆရာမများအသင်း (KTWG) တို့၏ အောက်တိုဘာ လ ၂၀ ရက်နေ့ ထုတ်ပြန်ချက်အရ ကော်သူးလေဒေသတစ်ဝန်းရှိ ကျောင်းပေါင်း ၁,၇၃၈ ကျောင်း မှ ဆရာ၊ ဆရာမ ၁၀,၈၈၀ ဦး အတွက် တစ်ဦးလျှင် ထိုင်းဘတ်ငွေ ၁၂,၀၀၀ ဘတ်နှုန်း ပံ့ပိုးရန် ရည်ရွယ်ထားသော်လည်း ရန်ပုံငွေမလုံလောက်မှုနှင့် ရင်ဆိုင်နေရသည်။ ဆရာ၊ ဆရာမများအတွက် နှစ်စဉ်ထောက်ပံ့ကြေး လုံးဝလွှမ်းခြုံနိုင်ရန်အတွက် စုစုပေါင်း ထိုင်းဘတ်ငွေ သန်း ၁၃၀ ဝန်းကျင် လိုအပ်သော်လည်း လက်ရှိတွင် ၅၉ ရာခိုင်နှုန်းသာ ရရှိထားပြီး ကျန်ရှိသည့် ၄၁ ရာခိုင်နှုန်း ကို အရေးပေါ်ဖြည့်ဆည်းရန် လိုအပ်နေသည်။ အကယ်၍ လိုအပ်သည့် ရန်ပုံငွေကို အချိန်မီ မရရှိပါက နှစ်စဉ်ထောက်ပံ့ကြေးငွေကို ဆရာ၊ ဆရာမများအားလုံး လွှမ်းခြုံနိုင်စေရန်အတွက် သိသိသာသာ လျှော့ချရမည့် အခြေအနေသို့ ရောက်ရှိနိုင်ကြောင်း KTWG က ပြောသည်။ နော်ဖောရှီးဝါးက “အဲ့ဒီလို လျှော့ချလိုက်ရတဲ့အတွက် ဆရာ၊ ဆရာမတွေရဲ့ motivation (စိတ်ဓာတ်ခွန်အား) ကို သွားပြီး ထိခိုက်စေတယ်။ မိသားစုရဲ့ စားဝတ်နေရေး အခက်အခဲရှိရင် ဆရာ၊ ဆရာမတွေလည်း စာသင်ခန်း ထဲမှာ အပြည့်အဝ အာရုံစူးစိုက်နိုင်မှာ မဟုတ်တော့ဘူး။ ဒါ့အပြင် ဆရာ၊ ဆရာမတွေကို ရေရှည် ဆက်လက် ထိန်းသိမ်းနိုင်ဖို့အတွက်လည်း အခက်အခဲတွေရှိလာနိုင်ပြီး ကလေးတွေရဲ့ ပညာရေးကိုပါ ထိခိုက်စေနိုင်ပါတယ်" ဟု ပြောသည်။ 
ကျောင်းဆရာ၊ ဆရာမအများစုမှာ ၎င်းတို့၏ မိသားစု စားဝတ်နေရေး၊ အခြေခံကျန်းမာရေးနှင့် ကလေးပညာရေး တို့အတွက် ဤနှစ်စဉ်ထောက်ပံ့ကြေးငွေကိုသာ မှီခိုနေကြရခြင်း ဖြစ်သည်။ ဘဏ္ဍာရေး အခက်အခဲအပြင် ကုန်ဈေးနှုန်း မြင့်တက်မှု၊ စစ်ကော်မရှင်တပ်၏ စာသင်ကျောင်း၊ ဘုရားကျောင်း၊ နေအိမ်နှင့် ဆေးပေးခန်းတို့ အထိပါ လေကြောင်းမှ ဗုံးကြဲ တိုက်ခိုက်မှုများကြောင့် လုံခြုံသည့်နေရာများသို့ ပြောင်းရွှေ့နေရခြင်းစသည့် စိန်ခေါ်မှုများနှင့်လည်း ရင်ဆိုင်နေကြရသည်။ နော်ဖောရှီးဝါးက ယခင်နှစ်များကလည်း ရန်ပုံငွေ မလုံလောက်မှုများ ရှိခဲ့ဖူးသော်လည်း မြို့နယ်နှင့် ခရိုင်များက စားစရိတ်နှင့် ခရီးစရိတ်များကို တတ်နိုင်သမျှ ကူညီခဲ့သည့်အတွက် အဆင်ပြေအောင် စီမံခန့်ခွဲနိုင်ခဲ့ကြောင်း ပြောသည်။ အရည်အသွေးကောင်းသည့် ပညာရေး လည်ပတ်နိုင်ရန်အတွက် ဆရာ/ဆရာမများ၊ သင်ထောက်ကူ ပစ္စည်းများ နှင့် နှစ်စဉ်ထောက်ပံ့ကြေးများ လုံလောက်စွာ ပံ့ပိုးပေးနိုင်ရန် အရေးပေါ်လိုအပ်နေသည့် ရန်ပုံငွေကို ဝိုင်းဝန်း ကူညီပေးကြပါရန် KECD နှင့် KTWG တို့က အလှူရှင်များနှင့် နိုင်ငံတကာအဖွဲ့အစည်းများထံ အလေးအနက် တောင်းဆိုထားသည်။ ဓာတ်ပုံ - (ပုံဟောင်း) ကရင်ဆရာ၊ ဆရာမများအသင်း (KTWG)

ကျောင်း ဆရာ/မများအား ထောက်ပံ့ရန် ထိုင်းဘတ်ငွေ သန်း ၅၀ အရေးပေါ်လိုအပ်

ကျောင်း ဆရာ/မများအား ထောက်ပံ့ရန် ထိုင်းဘတ်ငွေ သန်း ၅၀ အရေးပေါ်လိုအပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၁၄ ရက်။ ကော်သူးလေဒေသရှိ ကျ…

  • November 14, 2025
တော်လှန်ရေး သမားဟန်ဆောင်ကာ လူ ၆၀ ကျော်ကို ငွေလိမ်သူ ဖမ်းမိ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၄ ရက်။ ကရင်နီ (ကယား) ပြည်တွင် တော်လှန်ရေး ရဲဘော်ဟန်ဆောင်ကာ လူအယောက် ၆၀ ကျော်ကို ငွေကြေး လိမ်လည်သူကို ဖမ်းမိထားသည်ဟု ကရင်နီပြည် ရဲတပ်ဖွဲ့ (KSP) က ပြောသည်။ ကရင်နီပြည်ရှိ လွတ်မြောက်နယ်မြေများနှင့် စစ်ဘေးရှောင်စခန်းများတွင် လူအယောက် ၆၀ ကျော်ထံမှ တော်လှန်ရေး ရန်ပုံငွေနှင့် စစ်ဘေးရှောင် ထောက်ပံ့ကြေးများကို လိမ်လည်ယူခဲ့သူဟု သံသယရှိသူတစ်ဦးကို ကရင်နီပြည် ရဲတပ်ဖွဲ့ (KSP) က နိုဝင်ဘာလ ၁၃ ရက်နေ့တွင် ဖမ်းဆီးရမိခဲ့ကြောင်း အဖွဲ့တာဝန်ရှိသူများက ပြောသည်။ ဖမ်းဆီးခံရသူမှာ အသက် ၂၅ နှစ်ဝန်းကျင်အရွယ် ကိုဆုပြည့်အောင် ဖြစ်ပြီး ၎င်းသည် အွန်လိုင်းစလော့ဂိမ်း (လောင်းကစားဂိမ်း) ကို စွဲလမ်းကာ ဘောလုံးပွဲ၊ ၂ လုံး၊ ၃ လုံး စသည့် လောင်းကစားများကိုလည်း ပြုလုပ်နေသူ ဖြစ်ကြောင်း KSP ၏ စစ်ဆေးမှုမှတ်တမ်းများတွင် ဖော်ပြသည်။ KSP မှ ဒုရဲချုပ် ကိုဘိုဘို က ဖမ်းဆီးစစ်ဆေးမှုအခြေအနေနှင့် ပတ်သက်၍ “သူလိမ်တာက တစ်မျိုးတည်း မဟုတ်ဘူးပေါ့။ လိမ်လည်မှု အမျိုးမျိုးပါတယ်။ လိမ်တာက ပုဒ်မတစ်မျိုးတည်း မဟုတ်ဘူး။ သူပိုက်ဆံချေး ပြီးတော့မှ အလွဲသုံးစားလုပ်တာ ရှိတယ်။ ယုံကြည်အပ်နှံရေး ဖောက်ဖျက်တာတို့ ဘာတို့ အများကြီးပဲ။ အဲ့ဒါ တွေ ပေါ်ပေါက်တဲ့ အပေါ် မူတည်ပြီးတော့မှ မေးရမှာ များတယ်ပေါ့နော်။ အခုချက်ချင်းတော့ အဖြေမထုတ်နိုင် သေးဘူး။ စခန်းမှာတော့ စစ်ဆေးမေးမြန်းတာတွေ လုပ်နေတယ်ဗျ” ဟု ပြောသည်။ ကရင်နီပြည်ကြားကာလ အုပ်ချုပ်ရေးကောင်စီ (IEC) က ထုတ်ပြန်ထားသည့် လောင်းကစား ဥပဒေအရ စလော့ဂိမ်း အသုံးပြု၍ လောင်းကစားပြုလုပ်သူများအား ပြစ်မှုဆိုင်ရာ ဥပဒေအရ ထောင်ဒဏ် ၆ လမှ ၃ နှစ်အထိ ချမှတ်နိုင်သည်ဟု ဆိုသည်။ သို့သော်လည်း ကိုဆုပြည့်အောင် ကျူးလွန်ခဲ့သည့် ပြစ်မှုများမှာ များပြားရှုပ်ထွေးသဖြင့် အပြစ်ဒဏ်ကို ယခု ချက်ချင်း ခန့်မှန်းရန် ခက်ခဲကြောင်း ဒုရဲချုပ် ကိုဘိုဘိုက ဆက်ပြောသည်။ “ဘယ်လောက်ကျမယ် ဆိုတာတော့ ယေဘုယျပြောလို့ မရဘူး။ လိမ်လည်မှုဆိုရင် ဘယ်လောက်ကျမယ် ဆိုတာ မျိုး မရှိဘူး။ လိမ်လည်မှုအတွက် ပုဒ်မကတော့ အများကြီးပေါ့နော်။ သူဘယ်လိုလိမ်လဲ ဆိုတဲ့အပေါ် မူတည်ပြီး တော့မှ ပုဒ်မတွေ ကွဲသွားတယ်။ လိမ်တဲ့ ဒီဂရီအပေါ် မူတည်ပြီးတော့ တရားသူကြီးက သူ့ဟာနဲ့သူ တရားရုံးမှာ သူ့အပြစ်အပေါ် မူတည်ပြီးတော့မှ ထောင်ဒဏ်ငွေဒဏ် ချမှတ်ရမှာပေါ့နော်။” KSP အနေဖြင့် ယခုဖြစ်စဉ်သည် ပထမဆုံးအကြိမ်မဟုတ်ဘဲ တော်လှန်ရေး ၅ နှစ်နီးပါးကာလအတွင်း ငွေကြေး လိမ်လည်သူများစွာကို ဖမ်းဆီးစစ်ဆေးခဲ့ဖူးသည်ဟု ဆိုသည်။ ၂၀၂၁ ခုနှစ်၊ ဩဂုတ်လ ၅ ရက်နေ့၌ စတင်ဖွဲ့စည်းခဲ့သည့် KSP သည် ၄ နှစ်ကျော်ကာလအတွင်း ရဲစခန်း ၁၇ ခုနှင့် ရဲကင်း ၂၀ နီးပါးအထိ တိုးချဲ့နိုင်ခဲ့ပြီးဖြစ်ရာ ပြည်သူများအနေဖြင့်လည်း ရဲတပ်ဖွဲ့အား ဆက်လက် ယုံကြည်မှု ပေးကြရန် ဒုရဲချုပ် ကိုဘိုဘိုက တောင်းဆိုထားသည်။

 တော်လှန်ရေး သမားဟန်ဆောင်ကာ လူ ၆၀ ကျော်ကို ငွေလိမ်သူ ဖမ်းမိ

တော်လှန်ရေး သမားဟန်ဆောင်ကာ လူ ၆၀ ကျော်ကို ငွေလိမ်သူ ဖမ်းမိ သတင်းနှင့် မီဒီယာ ကွန်ရက်၂၀၂၅ ခုနှစ်၊ နိုဝင်ဘာလ ၁၄ ရက်။ ကရင်နီ (ကယား) ပြည်တွင် တော်လှ…

  • November 14, 2025
ရွေးကောက်ပွဲသည် ထောင်ချောက်သာဖြစ်ဟု ကလေးမြို့ လူထု တိုက်ပွဲ ကော်မတီ ပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၁၄ ရက်။ စစ်ကော်မရှင်၏ ရွေးကောက်ပွဲသည် ‘နိုင်ငံရေးထောင်ချောက်’ သက်သက်သာဖြစ်ဟု ကလေးမြို့လူထုတိုက်ပွဲ ဦးဆောင်ကော်မတီ ကြေညာလိုက်သည်။ စစ်ကိုင်းတိုင်း၊ ကလေးမြို့လူထုတိုက်ပွဲ ဦးဆောင်ကော်မတီ (KPSSC) က စစ်ကော်မရှင်က ကျင်းပပြုလုပ်မည့် ရွေးကောက်ပွဲသည် စစ်ရာဇဝတ်မှုများကို ဖုံးကွယ်ရန်နှင့် နိုင်ငံတကာ အသိအမှတ်ပြုမှု ရရှိရန် ကြိုးပမ်းနေခြင်း သာ ဖြစ်ကြောင်း ထုတ်ဖော်ပြောကြားပြီး ယင်းရွေးကောက်ပွဲကို ‘နိုင်ငံရေးထောင်ချောက်’ သက်သက်အဖြစ် ရှုမြင်ကြောင်း သဘောထား ကြေညာချက်တစ်စောင်ကို ထုတ်ပြန်လိုက်သည်။ KPSSC မှ ပထမဆုံးအကြိမ် လူထုတိုက်ပွဲညီလာခံကို လွတ်မြောက်နယ်မြေ တစ်နေရာတွင် အောက်တိုဘာလ ၁၁ ရက်နေ့က ကျင်းပခဲ့ပြီးနောက် ယခုကဲ့သို့ သဘောထားကို ထုတ်ပြန်ခြင်းဖြစ်သည်။ ကော်မတီအဖွဲ့ဝင်တစ်ဦးက စစ်ကော်မရှင်၏ ရွေးကောက်ပွဲအပေါ် ၎င်းတို့၏ သုံးသပ်ချက်ကို အောက်ပါအတိုင်း ရှင်းပြသည်။ “အခုဒီဇင်ဘာလကနေ စတင်ပြီးတော့ စစ်ကောင်စီကနေ ပြုလုပ်မယ့် ရွေးကောက်ပွဲဟာ ကျနော်တို့ မြန်မာ နိုင်ငံရဲ့ သမိုင်းအဆက်ဆက်မှာ ဒီစစ်အာဏာရှင် အပါအဝင် စစ်အုပ်စုတွေရဲ့ နိုင်ငံရေးထွက်ပေါက် အဖြစ် လုပ် တယ်ဆိုတာ သာဓက ရှိထားပြီးပြီပေါ့။ ထိုနည်းတူစွာ အခု မင်းအောင်လှိုင် ဦးဆောင်တဲ့ ဒီစစ်အုပ်စု ပြုလုပ်မယ့် ရွေးကောက်ပွဲကလည်း ထွက်ပေါက်မဟုတ်ဘူး နိုင်ငံရေးအရ စကစရဲ့ ထောင်ချောက်သက်သက်သာ ဖြစ်တယ် ဆိုတာကို ကျနော်တို့ ဆွေးနွေးပြီးတော့ နိုင်ငံရေး ထောင်ချောက်ဆိုပြီးတော့ ပြည်သူလူထုရဲ့ သဘောထားကို တင်ပြပြီးတော့ ကြေညာချက် ထုတ်ပြန်ရတာ ဖြစ်ပါတယ်” ဟု ပြောသည်။ စစ်ကော်မရှင်တပ်သည် ၎င်းတို့၏ ရွေးကောက်ပွဲကို အကောင်အထည် ဖော်နိုင်ရေး အတွက် တော်လှန်ရေး အဖွဲ့များ ထိန်းချုပ်ထားသည့် နေရာများကို ပြန်လည် စိုးမိုးထိန်းချုပ်ရန်၊ နယ်မြေချဲ့ထွင်ရန်အတွက် အပြင်းအထန် ကြိုးပမ်းနေကြောင်း KPSSC က ဆိုသည်။ ထိုသို့ ကြိုးပမ်းရာတွင် နေ့စဉ်နှင့်အမျှ လက်နက်ကြီး၊ လေကြောင်းဗုံးကြဲတိုက်ခိုက်မှု၊ အင်အားအလုံးအရင်းဖြင့် စစ်ကြောင်းထိုးမှုများ ပြုလုပ်နေပြီး စစ်ရာဇဝတ်မှုများလည်း ကျူးလွန်နေသည်ဟု ထုတ်ပြန်ချက်တွင် ဖော်ပြ သည်။ စစ်ကော်မရှင်၏ အပူတပြင်း ကြိုးပမ်းမှုကြောင့် ပြည်သူလူထုမှာ ရှောင်လွဲ၍မရသော အခြေအနေကို ကြုံတွေ့နေရကြောင်းလည်း ကော်မတီအဖွဲ့ဝင်တစ်ဦးက အောက်ပါအတိုင်း သုံးသပ်သည်။ “ရွေးကောက်ပွဲ ဖြစ်လာခဲ့ရင် ဆိုတာထက် စကမဘက်ကနေ ရွေးကောက်ပွဲ မဖြစ်ဖြစ်အောင် အင်မတန်မှ အပူတပြင်း ကြိုးပမ်းနေတယ်။ ဒီလိုအနေအထားမျိုးမှာ ပြည်သူအနေနဲ့ ရှောင်လွှဲလို့မရတဲ့ အနေအထားကို ကြုံတွေ့လာရမှာ ဖြစ်တယ်“ ဟု ပြောသည်။ ကလေးမြို့ လူထုတိုက်ပွဲ ဦးဆောင်ကော်မတီ အနေဖြင့် တရားမျှတမှု၊ လွတ်လပ်မှု၊ ပွင့်လင်းမြင်သာမှု လုံးဝကင်းမဲ့သည့် စစ်ကော်မရှင်၏ ရွေးကောက်ပွဲကို ပြည်သူတစ်ရပ်လုံးနှင့်အတူ အကြွင်းမဲ့ဆန့်ကျင် တိုက်ဖျက် သွားမည် ဟု ထုတ်ပြန်ချက်တွင် ဖော်ပြထားသည်။ ကလေးမြို့ဒေသခံများ၏ ရွေးကောက်ပွဲ အပေါ် သဘောထားနှင့် ပတ်သက်ပြီး KPSSC အဖွဲ့ဝင်တစ်ဦးက ကလေးဒေသသည် လက်နက်ရေးရာနှင့် လူထုတိုက်ပွဲရေးရာ နှစ်ခုစလုံးတွင် အားကောင်းသော ဒေသဖြစ်သည့် အတွက် စစ်ကော်မရှင်၏ အဓိကပစ်မှတ်ထား နှိမ်နင်းခြင်းကို ခံနေရကြောင်း ရှင်းပြခဲ့သည်။ “ဒီလိုအနေအထားမှာ လူထုလွတ်မြောက်ရေး အတွက် အားကောင်းကောင်းနဲ့ လှုပ်ရှားနိုင်ဖို့ဆိုရင် ကျနော်တို့ ကလေးဒေသခံ ပြည်သူလူထု တစ်ရပ်လုံးက ရွေးကောက်ပွဲကို အပြတ်သားဆုံး၊ အရှင်းလင်းဆုံး ဆန့်ကျင် ကြောင်း သဘောထားဖြစ်တယ်” ဟု ၎င်းက ပြောသည်။ ထို့အပြင် KPSSC က ကလေးမြို့အခြေပြု တော်လှန်ရေး အဖွဲ့အစည်းများ အနေဖြင့်လည်း ပြည်သူတစ်ဦးချင်းစီ ယုံကြည်အားကိုးနိုင်သည့် ပြည်သူ့သားကောင်းပီသစွာ ပြုမူနေထိုင်ရန် လိုအပ်ပြီး ယင်းသို့ဖြစ်စေရန် သက်ဆိုင် ရာ တာဝန်ရှိသူများမှ ကြီးကြပ်ပေးရန်လည်း တိုက်တွန်းထားသည်။ ကော်မတီသည် တော်လှန်ရေး အဆုံးသတ် ပန်းတိုင်အထိ ဆက်လက် ချီတက်သွားမည်ဟုလည်း အတိအလင်း ထုတ်ပြန်ထားသည်။ ဓာတ်ပုံ - ပေးပို့ (ကလေးမြို့ လူထုတိုက်ပွဲ ဦးဆောင်ကော်မတီ - KPSSC)  

ရွေးကောက်ပွဲသည် ထောင်ချောက်သာဖြစ်ဟု ကလေးမြို့ လူထု တိုက်ပွဲ ကော်မတီ ပြော

ရွေးကောက်ပွဲသည် ထောင်ချောက်သာဖြစ်ဟု ကလေးမြို့ လူထု တိုက်ပွဲ ကော်မတီ ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၁၄ ရက်။  စစ်ကော်မ…

  • November 14, 2025
တနင်္သာရီ - ထိုင်းနယ်စပ် မောတောင်မြို့ကို KNU.သိမ်းပိုက် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၁၄ ရက်။ KNU ဦးဆောင်သော တပ်များက မောတောင်နယ်စပ်မြို့ကို အပြီးသတ်သိမ်းပိုက်ပြီဟု KNU တပ်မဟာ (၄) အတွင်းရေးမှူး ပဒိုစောအယ်နားက အတည်ပြုပြောသည်။ တနင်္သာရီတိုင်း၊ မြန်မာ - ထိုင်း နယ်စပ်ရှိ အရေးပါသော ကုန်သွယ်ရေးမြို့ဖြစ်သည့် မောတောင်မြို့ တစ်မြို့လုံး ကို ကရင်အမျိုးသား လွတ်မြတ်ရေး တပ်မတော် (KNLA) ဦးဆောင်သော ပြည်သူ့ကာကွယ်ရေး ပူးပေါင်းတပ်ဖွဲ့ များက နိုဝင်ဘာလ ၁၄ ရက်နေ့၊ နံနက်ပိုင်းတွင် အပြီးသတ် သိမ်းပိုက်ထိန်းချုပ်လိုက်နိုင်ပြီ ဖြစ်ကြောင်း သတင်းရရှိသည်။ အဆိုပါ မြို့သိမ်းတိုက်ပွဲတွင် စစ်ကော်မရှင် တပ်ဖွဲ့ဝင် အယောက် ၅၀ ကျော်သည် ထိုင်းနိုင်ငံဘက်ခြမ်းသို့ ထွက်ပြေးခိုလှုံသွားသည်ဟု မြေပြင် သတင်းအရင်းအမြစ်များက ပြောသည်။ နိုဝင်ဘာလ ၁၀ ရက်နေ့တွင် စစ်ကောင်စီတပ်ဖွဲ့က နယ်မြေစိုးမိုးမှု ပြန်လည်ရရှိရန်အတွက် စစ်ကြောင်းထိုးလာ ရာမှ စတင်၍ KNLA ဦးဆောင်သော ပူးပေါင်းတပ်များနှင့် တိုက်ပွဲပြင်းထန်ခဲ့ပြီး၊ မြို့ပေါ်အထိပါ တိုက်ပွဲများ ကူးစက်ခဲ့သည်။ ပူးပေါင်းတပ်များတွင် ဗမာပြည်သူ့လွတ်မြောက်ရေးတပ်တော် (BPLA) ကပါ ပါဝင်တိုက်ခိုက်ခဲ့သည် ဟု တိုက်ပွဲတွင်ပါဝင်ခဲ့သည့် တပ်ဖွဲ့ဝင်တစ်ဦးက အတည်ပြုခဲ့သည်။ နိုဝင်ဘာလ ၁၁ ရက်နေ့ ကတည်းက မြို့မရဲစခန်း၊ လဝကရုံး၊ နယ်စပ်ဂိတ်နှင့် အခြားနေရာအများစုကို သိမ်းပိုက် ထားခဲ့ပြီး ယနေ့ နံနက်ပိုင်းတွင် မြို့ရှိ အဓိကစခန်းကုန်းဖြစ်သည့် နယ်စပ်ဗျူဟာစခန်း (ခလရ-၂၂၄) ကို အပြီးသတ် သိမ်းပိုက်နိုင်ခဲ့ခြင်းဖြစ်သည်။ မောတောင်မြို့ကို အပြီးသတ် ထိန်းချုပ်လိုက်နိုင်ပြီ ဖြစ်ကြောင်း KNU တပ်မဟာ (၄) အတွင်းရေးမှူး ပဒိုစောအယ်နား က အတည်ပြုခဲ့သည်။ အမျိုးသားညီညွတ်ရေးအစိုးရ၏ (NUG) တနင်္သာရီတိုင်းစစ်ဌာန ကွပ်ကဲရေးမှူး တာဝန်ရှိသူကလည်း “စစ်ကော် မရှင်တပ်က စစ်ကြောင်းထိုးတာကို ဟန့်တားနေရင်းကနေ တိုက်ပွဲက မြို့သိမ်းတိုက်ပွဲပုံစံ ပြောင်းလဲ သွားတာ ပါ။ လက်ရှိမှာ မြို့ပတ်ဝန်းကျင်တစ်ခုလုံးကို ပြည်သူ့ကာကွယ်ရေးတပ်တွေက ထိန်းထားနိုင်ပြီ။ မြို့ပေါ်မှာ တော့ စစ်တပ်က ပိတ်မိနေတာတွေရှိနေသေးတယ်၊ နယ်မြေရှင်းလင်းနေတုန်းပဲ၊ အားလုံးပြီးသွားမှ သတင်း ထုတ်ပြန်ပေးပါ့မယ်” ဟု ပြောသည်။ မောတောင်မြို့သိမ်း တိုက်ပွဲအတွင်း စစ်ကော်မရှင် တပ်ဖွဲ့ဝင်များမှာ အထိနာခဲ့ပြီး အများအပြားမှာ ထိုင်းနိုင်ငံ ဘက်သို့ ထွက်ပြေးခိုလှုံခဲ့ကြသည်။ စစ်သား ၃၀ ဦးနီးပါးခန့် ထိုင်းဘက်သို့ ခိုလှုံခဲ့ရာ ထိုင်းစစ်တပ်မှ မြန်မာစစ်သားများထံမှ လက်နက် ၂၀ ကျော်ကို သိမ်းယူလိုက်သည်ဟု စစ်ဘေးရှောင်များက မျက်မြင်တွေ့ရှိခဲ့သည်။ ထိုင်းစစ်တပ်က ဓာတ်ပုံနှင့် ဗီဒီယိုမှတ်တမ်းများကို ပြန်လည်ဖျက်ခိုင်းခဲ့သည်ဟု ဆိုကြသည်။ စစ်ကော်မရှင်တပ်သားများ အပါအဝင် ပျူစောထီးနှင့် ရဲများပါဝင်သည့် အင်အား ၅၀ ခန့် သည် မောတောင်မြို့မှ တစ်ဆင့် ထိုင်းစစ်ကားများ ဝန်းရံကာ ပရာကျွတ်မြို့ဘက်သို့ ထွက်ခွာသွားနေသည်ကိုလည်း စစ်ရှောင်နေသူများ က မြင်တွေ့ခဲ့သည်ဟု ဆိုသည်။ မောတောင်မြို့ကို သိမ်းပိုက်နိုင်လိုက်ခြင်းကြောင့် ထိုင်းနိုင်ငံ၊ ဆင်ခွန်းမြို့နှင့် ထိစပ်နေသည့် အရေးပါသော နယ်စပ်ကုန်သွယ်ရေး လမ်းကြောင်းကို KNU/KNLA က ထိန်းချုပ်လိုက်နိုင်ပြီ ဖြစ်ပြီး၊ KNU တပ်မဟာ (၄) နယ်မြေဖြစ်သည့် တနင်္သာရီတိုင်း၏ အရှေ့ဘက် အကျဆုံး နယ်စပ် ဧရိယာတစ်ခုလုံးကို တော်လှန်ရေးတပ်တို့က ထိန်းချုပ်နိုင်လိုက်ပြီဟုလည်း သုံးသပ်သူများက ဆိုသည်။ လက်ရှိတွင် မြန်မာ - ထိုင်း နယ်စပ်ရှိ ဆင်ခွန် အလယ်ဂိတ်အနီး လမ်းမကြီးနံဘေးနှင့် ရော်ဘာတောများ အတွင်း သို့ မောတောင်မြို့မှ ပြည်သူ ၂,၀၀၀ ကျော် စစ်ဘေးရှောင် ရောက်ရှိနေကြပြီး စားနပ်ရိက္ခာ၊ ဆေးဝါးနှင့် အမိုးအကာများ အရေးပေါ် လိုအပ်နေကြောင်း စစ်ရှောင်ကူညီသူများက ပြောသည်။  

တနင်္သာရီ – ထိုင်းနယ်စပ် မောတောင်မြို့ကို KNU.သိမ်းပိုက်

တနင်္သာရီ - ထိုင်းနယ်စပ် မောတောင်မြို့ကို KNU.သိမ်းပိုက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၁၄ ရက်။  KNU ဦးဆောင်သော တပ်များက …

  • November 14, 2025
ထားဝယ်ခရိုင် ကမြောကင်း တံတားဂိတ် စစ်ဆေးရေး တင်းကြပ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၁၄ ရက်။ ထားဝယ်ခရိုင်၌ တိုက်ပွဲဖြစ်ပွားပြီးနောက် ကမြောကင်းတံတားဂိတ် စစ်ဆေးရေး တင်းကျပ်လိုက်သည်ဟု ဒေသခံများက ပြောသည်။ ထားဝယ်ခရိုင်၊ လောင်းလုံးမြို့နယ်အတွင်း တိုက်ပွဲ ဖြစ်ပွားခဲ့ပြီးနောက် ကမြောကင်းတံတား စစ်ဆေးရေးဂိတ် တွင် စစ်ကော်မရှင် တပ်ဖွဲ့ဝင်များက စစ်ဆေးနေမှုများကို ပြန်လည်တင်းကျပ်လိုက် သဖြင့် ခရီးသွားလာသူများ အခက်အခဲနှင့် ရင်ဆိုင်နေရကြောင်း ဒေသခံများက ပြောသည်။ လောင်းလုံးမြို့နယ်၊ ညင်းမော်ကျေးရွာ ၌ စစ်ကော်မရှင်တပ်နှင့် ပြည်သူ့ကာကွယ်ရေး ပူးပေါင်းတပ်ဖွဲ့တို့အကြား နိုဝင်ဘာလ ၁၂ ရက်နေ့က တိုက်ပွဲပြင်းထန်စွာ ဖြစ်ပွားခဲ့သည့်အတွက် စစ်ဆေးရေးဂိတ်၏ လုံခြုံရေးကို ယခုကဲ့သို့ တင်းကျပ်လိုက်ခြင်းဖြစ်သည်။ စစ်ဆေးမှုများ တင်းကျပ်လာသည့်နောက်ပိုင်းတွင် လောင်းလုံးနှင့် ရေဖြူမြို့နယ်များဘက်မှ လာရောက်ကြသည့် ခရီးသွားများမှာ ကမြောကင်း တံတားဂိတ်ရှေ့သို့ မရောက်မီ ဆိုင်ကယ်၊ စက်ဘီးများကို ဆင်းတွန်းကြရပြီး၊ သုံးဘီးယာဉ်နှင့် ကားပေါ်လိုက်ပါလာသည့် ခရီးသည်များမှာလည်း ယာဉ်ပေါ်မှဆင်း၍ လမ်းလျှောက်၍ အစစ်ဆေးခံနေရသည် ဟု ဆိုသည်။ ခရီးသွားလာသူ အမျိုးသားတစ်ဦးက လက်ရှိအခြေအနေနှင့် ပတ်သက်ပြီး “နိုဝင်ဘာ ၁၂ရက်နေ့ နေ့လယ်ပိုင်း ကတည်းက စစ်ဆေးမှုတွေ ပြန်လုပ်လာတာ လူကြီးလူငယ် ကျောင်းသားတွေပါမကျန် အကုန်လုံးကို စစ်ဆေး နေတာ၊ မှတ်ပုံတင်ရော ခရီးသွားထောက်ခံစာတွေပါ အကုန်တောင်းပြီး စစ်တာ” ဟု ပြောသည်။ ၎င်းက ကမြောကင်းတံတားဂိတ်ရှိ စစ်ကော်မရှင်တပ်ဖွဲ့မှ ယခင်က စစ်ဆေးမှုများကို အတန်အသင့် ဖြေလျှော့ ပေးထားခဲ့သော်လည်း ယခုအခါ ပြန်လည် တင်းကျပ်လိုက်ခြင်းဖြစ်ကြောင်းလည်း ထပ်လောင်းပြောဆိုခဲ့သည်။ ညင်းမော်ကျေးရွာ တိုက်ပွဲကြောင့် အနီးဝန်းကျင်ရှိ ကျေးရွာ လေးရွာထက်မနည်း မှ ဒေသခံပြည်သူများသည် ၎င်းတို့၏ နေရပ်များကို စွန့်ခွာ၍ ထွက်ပြေးတိမ်းရှောင်နေကြရသည်။ တိုက်ပွဲ ဖြစ်ပွားပြီးနောက် စစ်ကော်မရှင် တပ်ဖွဲ့ဝင်များက ဒေသခံပြည်သူပိုင် နေအိမ်နှစ်ဆောင်နှင့် ဆိုင်ကယ် သုံးစီးကိုပါ မီးရှို့ဖျက်ဆီးခဲ့သေးကြောင်း မြေပြင် သတင်းအရင်းအမြစ်များက ဆိုသည်။ တိုက်ပွဲဖြစ်ပွားရာ ဒေသများမှ ရွာသားများ မြို့ပေါ်နေရာများသို့ တိမ်းရှောင်မှု များလာခြင်းကြောင့် စစ်ဆေးရေးဂိတ်များတွင် စစ်ဆေးမှု တင်းကျပ်လာခြင်း ဖြစ်နိုင်သည်ဟု ဒေသခံများက သုံးသပ်ကြသည်။  

ထားဝယ်ခရိုင် ကမြောကင်း တံတားဂိတ် စစ်ဆေးရေး တင်းကြပ်

ထားဝယ်ခရိုင် ကမြောကင်း တံတားဂိတ် စစ်ဆေးရေး တင်းကြပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၁၄ ရက်။  ထားဝယ်ခရိုင်၌ တိုက်ပွဲဖြစ်ပွာ…

  • November 14, 2025
ရာဇဝတ်မှုကြီးများ ကျူးလွန်သူ ၃ ဦးကို မုံးကိုးတွင် သေဒဏ် စီရင် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ နိုဝင်ဘာလ ၁၃ ရက်။ မုံးကိုးခရိုင်တွင် လူသတ်မှုနှင့် မုဒိမ်းမှုကျူးလွန်သူ ၅ ဦးအား ပြစ်ဒဏ်ချမှတ်ခဲ့ရာ သုံးဦးအား သေဒဏ် စီရင်လိုက် သည်ဟု The Kokang (ကိုးကန့် သတင်းကွန်ရက်)က ထုတ်ပြန်သည်။ ကိုးကန့်တပ် MNDAA/MNTJP ၏ တရားစီရင်ရေး အဖွဲ့သည် ဒေသတွင်း တရားဥပဒေစိုးမိုးရေးနှင့် ရာဇဝတ် မှုများကို တင်းတင်းကျပ်ကျပ် ထိန်းချုပ်ရန် ရည်ရွယ်၍ နိုဝင်ဘာလ ၁၁ ရက်နေ့တွင် မုံးကိုးခရိုင်၌ လူထုတရား စီရင်ပွဲကို ကျင်းပခဲ့ခြင်း ဖြစ်သည်ဟု အထူးဒေသ (၁) က ဆိုသည်။ အဆိုပါ တရားစီရင်ပွဲတွင် ကြီးလေးသော ရာဇဝတ်မှုကျူးလွန်သူ ၅ ဦးအား ပြစ်ဒဏ်ချမှတ်ခဲ့ပြီး၊ ၎င်းတို့အနက် လူသတ်မှုကျူးလွန်သူ ၃ ဦးကို သေဒဏ် စီရင်ခဲ့သည် ဟု The Kokang (ကိုးကန့် သတင်းကွန်ရက်)က မှ နိုဝင်ဘာလ ၁၂ ရက်နေ့တွင် ထုတ်ပြန်သည်။ နိုဝင်ဘာလ ၁၁ ရက်နေ့၊ နံနက် ၈ နာရီတွင် မုံးကိုးမြို့နယ် (၄) လမ်း ဘောလုံးကွင်း၌ ကျင်းပသော အခမ်းအနား သို့ တရားစီရင်ရေး အဖွဲ့အစည်းများနှင့် အုပ်ချုပ်ရေး အကြီးအကဲများ တက်ရောက်ခဲ့ကြပြီး၊ ဒေသခံပြည်သူများ က တရားစီရင်မှုကို တက်ရောက်ခဲ့ကြသည်။ မုံးကိုးခရိုင် ပါတီကော်မတီအတွင်းရေးမှူး Mr. Li Zhi Mao က “ဤကိစ္စနှင့်ပတ်သက်၍ MNTJP ပါတီဗဟို ကော် မတီ၏ သဘောထားမှာ တင်းကျပ်ပြီး၊ ဥပဒေအရ အမြန်ဆုံးနှင့် အပြင်းထန်ဆုံး အရေးယူရမည် ဖြစ်ကာ ပြည်သူလူထုအား အေးချမ်းသာယာသော လူမှုပတ်ဝန်းကျင် တစ်ရပ်ကို ပြန်လည် ပေးအပ်ရန် ခိုင်မာစွာရပ် တည်ကြောင်း” ဟု ပြောသည်။ အထူးဒေသအတွင်း လူသတ်မှု၊ ကလေးသူငယ် မုဒိမ်းကျင့်မှုကဲ့သို့သော ပြင်းထန်သည့်အမှုများ ကြိမ်ဖန်များစွာ ဖြစ်ပွားနေသည်ဟုလည်း မုံးကိုးခရိုင် ပါတီကော်မတီအတွင်းရေးမှူး Mr. Li Zhi Mao က ထောက်ပြပြောဆို ခဲ့သည်။ ရည်ရွယ်ချက်ရှိရှိ လူသတ်မှုများ ကျူးလွန်ခဲ့သည့် အသက် ၄၈ နှစ်အရွယ် Mr. Li Xiao Liang၊ အသက် ၄၂ နှစ်အရွယ် Mr. Jin Lao Er နှင့် အသက် ၂၈ နှစ်အရွယ် ကိုဇော်ထက်တို့အား သေဒဏ် ချမှတ်ခဲ့ပြီး ၎င်းတို့၏ ကိုယ်ပိုင်ပစ္စည်းအားလုံးကို ပြည်သူပိုင်သိမ်းဆည်းရန် စီရင်ခဲ့သည်။ အလားတူ ကလေးသူငယ်အား မုဒိမ်းကျင့်မှု ကျူးလွန်ခဲ့သူ အသက် ၄၃ နှစ်အရွယ် ကိုဝင်းထွန်း အား ထောင်ဒဏ် ၁၀ နှစ် ချမှတ်ခဲ့သည်။ ထို့အပြင် ရည်ရွယ်ချက်ရှိရှိဖြင့် ထိခိုက်မှုကို ကျူးလွန်သူ အသက် ၁၈ နှစ်မပြည့်သေးသည့် ကိုဟိန်းထက်ပိုင် ကိုလည်း ထောင်ဒဏ် ၁၄ နှစ် ချမှတ်ခဲ့သည်။ စီရင်ချက်များ ကြေညာပြီးနောက်၊ သေဒဏ်ချမှတ်ခံရသူ သုံးဦးအား တရားစီရင်ရေးအရာရှိများက ဥပဒေနှင့် အညီ သေဒဏ်စီရင်ရာနေရာသို့ ခေါ်ဆောင်သွားခဲ့သည်။ ခေါ်ဆောင်သွားစဉ်တွင် မုံးကိုးမြို့၏ အဓိကလမ်းမများမှ ဖြတ်သန်းပြသခဲ့သည်ဟု ထုတ်ပြန်သည်။ လူထုရှေ့မှောက် တရားစီရင်ခြင်းဖြင့် ဥပဒေ၏ အခွင့်အာဏာကို လူတိုင်းနားလည်စေရန် ရည်ရွယ်ကြောင်း မုံးကိုးခရိုင် ပါတီကော်မတီအတွင်းရေးမှူး Mr. Li Zhi Mao က ပြောဆိုခဲ့သည်။ အထူးဒေသ (၁) အနေဖြင့် ယခုကဲ့သို့ လူထုတရားစီရင်ပွဲကို ဒေသတွင်းနှင့် လားရှိုးမြို့တို့တွင် လေးကြိမ် ကျင်းပခဲ့ပြီးဖြစ်ကြောင်း The Kokang (ကိုးကန့် သတင်းကွန်ရက်)၏ ထုတ်ပြန်ချက်များတွင် ဖော်ပြသည်။ ဤပြစ်ဒဏ် စီရင်ပုံမှာ ကပ်လျက်ရှိ တရုတ်နိုင်ငံ၏ ပြစ်ဒဏ် စီရင်ပုံနှင့် ဆင်တူသည်။  

ရာဇဝတ်မှုကြီးများ ကျူးလွန်သူ ၃ ဦးကို မုံးကိုးတွင် သေဒဏ် စီရင်

ရာဇဝတ်မှုကြီးများ ကျူးလွန်သူ ၃ ဦးကို မုံးကိုးတွင် သေဒဏ် စီရင် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၁၃ ရက်။  မုံးကိုးခရိုင်တွင် …

  • November 13, 2025
ကန့်ဘလူနဲ့ ခင်ဦးကြား စစ်ကော်မရှင်တပ် စစ်ကြောင်းလိုက် ပြုတ် သတင်းနှင့် မီဒီယာ ကွန်ရက်။ 
၂၀၂၅ ခုနှစ်၊ နိုဝင်ဘာလ ၁၃ ရက်။ စစ်ကိုင်းတိုင်း၊ ကန့်ဘလူနှင့် ခင်ဦးမြို့နယ်ကြားတွင် စစ်ကော်မရှင်၏ အဓိက ထိုးစစ်ဆင်နေသော တပ်မ (၃၃) လက်အောက်ခံ စစ်ကြောင်းတစ်ခုလုံး နိုဝင်ဘာလ ၁၂ ရက်နေ့၌ အပြီးအပိုင် ပျက်စီးသွားခဲ့ကြောင်း ဒေသတွင်း တော်လှန်ရေးတပ်ဖွဲ့များနှင့် စစ်ရေးသတင်းရင်းမြစ်များက အတည်ပြု ထုတ်ပြန်လိုက်သည်။ အဆိုပါတိုက်ပွဲတွင် စစ်ကြောင်းမှူးဖြစ်သူ တပ်မ ၃၃ ဗျူဟာမှူး၏ အလောင်းပါ ရရှိခဲ့ပြီး၊ စစ်ကော်မရှင် တပ်ဖွဲ့ဝင် ၂၇ ဦးအထိ အရှင်ဖမ်းမိကာ လက်နက်ခဲယမ်း အများအပြား သိမ်းဆည်းရရှိခဲ့ကြသည်။ နိုဝင်ဘာလ ၁၂ ရက်နေ့တွင် ကန့်ဘလူမြို့နယ်၊ ယင်းတိုက်ကျေးရွာနှင့် ခင်ဦးမြို့နယ်၊ ရှားတောကျေးရွာကြား၌ ကန့်ဘလူခရိုင် ပကဖ အထူးလှုပ်ရှားတပ်ရင်း၊ ရေဦးမြို့နယ် ပကဖ 'ဓူဝံအဖွဲ့'၊ ရွှေဘိုခရိုင် (ခင်ဦး) အမှတ် (၃) တပ်ရင်း အပါအဝင် တော်လှန်ရေးအင်အားစုများ ပူးပေါင်းကာ စစ်ကောင်စီ၏ နှစ်ဖက်ညှပ် စစ်ကြောင်းကို ကြားဖြတ်တိုက်ခိုက်ခဲ့ခြင်းဖြစ်သည်။ စစ်ကြောင်းကို တိုက်ခိုက်ရာတွင် ကန့်ဘလူနယ်မှ နာမည်ကြီး ဘုန်းကြီး ဝါသဝ၏ ပျူစောထီးအဖွဲ့ဝင် အများ အပြား ပါဝင်ခဲ့ကြောင်းလည်း မြေပြင် သတင်းအရင်းအမြစ်များက ပြောသည်။ တော်လှန်ရေးအင်အားစုနှင့် နီးစပ်သူတစ်ဦးက “ဒီတိုက်ပွဲကတော့ စစ်ကိုင်းတိုင်းရဲ့ စစ်မျက်နှာမှာ အောင်ပွဲတစ်ခု ပါ။ တပ်မ ၃၃ လို အဓိကတပ်ရင်းရဲ့ စစ်ကြောင်းတစ်ခုလုံး အပျောက်နော်။ မြေပြင်မှာ စစ်ကြောင်းထိုးတိုင်း ပြုတ်ကုန်တာဟာ ကျနော်တို့အတွက် အားရကျေနပ်စရာပါပဲ” ဟု ပြောသည်။ ကန့်ဘလူမြို့နယ် ပကဖက ဖမ်းမိထားသည့် စစ်သုံ့ပန်းများ၏ ရုပ်သံမှတ်တမ်းကို နိုဝင်ဘာလ ၁၂ ရက်နေ့တွင် ထုတ်ပြန်ခဲ့သည်။ အဆိုပါ ရုပ်သံတွင် စစ်သုံ့ပန်းများမှာ ရွှံ့များပေနေပြီး မြေပြင်ပေါ် လဲကျနေသည့် ပုံစံဖြင့် ပြည်သူ့ကာကွယ်ရေး ရဲဘော်များ၏ ရှေ့တွင် စစ်ဆေးမေးမြန်းခံနေရသည်ကို တွေ့ရသည်။ ကနဦး ထုတ်ပြန်ချက်တွင် စစ်သုံ့ပန်း ၁၄ ဦး ဟု ဖော်ပြထားသော်လည်း နောက်ပိုင်း သတင်းရင်းမြစ်များ၏ အတည်ပြုချက်အရ ၂၇ ဦးအထိ အရှင်ဖမ်းမိထားပြီး လက်နက် ၂၇ လက် သိမ်းဆည်းရမိခဲ့သည်ဟု ကန့်ဘလူခရိုင် တပ်ရင်း ၃ တာဝန်ရှိသူတစ်ဦးက အတည်ပြု ပြောသည်။ ကန့်ဘလူခရိုင် PDF တာဝန်ရှိသူတစ်ဦးက “တကယ်တော့ သူတို့ (စစ်ကောင်စီ) ရဲ့ အားက မြေပြင် ထက် လေကြောင်းကိုပဲ အားထားနေရတာကို ဒီတိုက်ပွဲက သက်သေပြလိုက်တာပါပဲ” ဟု ပြောသည်။ စစ်ကော်မရှင် စစ်ကြောင်းမှာ အပြင်းအထန် အထိနာပြီး သေဆုံးဒဏ်ရာရသူ၊ အဖမ်းခံရသူ များပြားခဲ့ခြင်း ကြောင့် စစ်တပ်က ၎င်းတို့၏ အနောက်မြောက်တိုင်းစစ်ဌာနချုပ် (နမခ) မှ Gyrocopter သုံးစီးဖြင့် နိုဝင်ဘာ ၁၂ ရက်နေ့ ညနေ ၃ နာရီခွဲ အချိန်ခန့်တွင် လေကြောင်းတိုက်ခိုက်မှုများ ပြုလုပ်ခဲ့သည်။ အဆိုပါ တိုက်ပွဲများကြောင့် ခင်ဦးနယ် အနောက်မြောက်ခြမ်းရှိ ငါးရုံကြီး၊ ရှားတော၊ ကျောက်တိုင်၊ ကျီစု စသည့် ကျေးရွာများမှ ပြည်သူ ငါးထောင်ကျော် ထွက်ပြေးတိမ်းရှောင်နေရကြောင်း ခင်ဦးမြို့နယ် သတင်းမှန် ပြန်ကြား ရေးအဖွဲ့က ဆိုသည်။ စစ်ကော်မရှင်တပ်သည် စစ်ကိုင်းတိုင်းရှိ ဗျူဟာလမ်းကြောင်းများကို ထိန်းချုပ်ရန် ကြိုးစားနေသော်လည်း တော်လှန်ရေး အင်အားစုများ၏ ခုခံမှုကြောင့် အထိနာနေခြင်း ဖြစ်သည်။ ပြီးခဲ့သည့် စက်တင်ဘာလကလည်း ခင်ဦး - ရွှေဘို လမ်းပိုင်းတိုက်ပွဲတွင် ဒုဗိုလ်မှူးကြီး အဆင့်များ အပါအဝင် စစ်သည်များစွာ သေဆုံးခဲ့ဖူးသည်။  

ကန့်ဘလူနဲ့ ခင်ဦးကြား စစ်ကော်မရှင်တပ် စစ်ကြောင်းလိုက် ပြုတ်

ကန့်ဘလူနဲ့ ခင်ဦးကြား စစ်ကော်မရှင်တပ် စစ်ကြောင်းလိုက် ပြုတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ နိုဝင်ဘာလ ၁၃ ရက်။  စစ်ကိုင်းတိုင်း၊ ကန့်ဘ…

  • November 13, 2025
×Close