သတင်း

လေကြောင်းတိုက်ခိုက်မှုကို စကားလုံးဖြင့် တားမရဟု အာဆီယံအမတ်များ သတိပေး

 သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၂ ရက်။

 စစ်ကော်မရှင်၏ လေကြောင်းတိုက်ခိုက်မှုများကို စကားလုံးသက်သက်ဖြင့် တားဆီး၍မရနိုင်တော့ကြောင်းနှင့် အာဆီယံအနေဖြင့် ‘ပြည်တွင်းရေးမစွက်ဖက်ရေး’ မူဝါဒကို ကျော်လွန်ကာ လက်တွေ့ကျသည့် ဖိအားများပေးရန် အာဆီယံ လူ့အခွင့်အရေးဆိုင်ရာ လွှတ်တော်အမတ်များအဖွဲ့ (APHR) က တိုက်တွန်းလိုက်သည်။ မြန်မာနိုင်ငံတွင် စစ်အာဏာသိမ်းမှု ၅ နှစ်ပြည့်မြောက်ချိန် ဖေဖော်ဝါရီလ ၁ ရက်နေ့၌ အာဆီယံ လူ့အခွင့်အရေး ဆိုင်ရာ လွှတ်တော်အမတ်များအဖွဲ့ (APHR) က တိုက်တွန်းလိုက်ခြင်း ဖြစ်သည်။ မြန်မာပြည်သူများ ၅ နှစ်တာ ခံစားနေရသည့် ဘေးဒုက္ခများသည် နယ်စပ်ကိုကျော်လွန်၍ ဒေသတွင်း မတည်ငြိမ်မှုများ အထိ ရိုက်ခတ်လာနေပြီဖြစ်ကြောင်း APHR က ထောက်ပြထားသည်။ ထိုင်းလွှတ်တော်အမတ် ရန်စီမံရုန်းက “စကားလုံးတွေနဲ့ပဲ ပြောနေလို့ လေကြောင်းတိုက်ခိုက်မှုတွေကို တားနိုင် မှာ မဟုတ်သလို၊ ဖိအားမပါတဲ့ တွေ့ဆုံဆွေးနွေးမှုတွေကလည်း အရပ်သားတွေကို မကာကွယ်နိုင်ဘူး” ဟု ပြောဆိုလိုက်ပြီး စစ်ကော်မရှင်အပေါ် ထိရောက်သည့် အရေးယူမှုများ ပြုလုပ်ရန် တောင်းဆိုခဲ့သည်။ အလားတူ ၂၀၂၆ ခုနှစ်၏ အာဆီယံဥက္ကဋ္ဌ ဖြစ်လာသည့် ဖိလစ်ပိုင်နိုင်ငံမှ လွှတ်တော်အမတ် လိုင်လာဒီလီမာက လည်း မြန်မာ့အရေးအတွက် ရေရှည်တည်တံ့သော ဖြေရှင်းနည်းများကို အာဆီယံက မဖြစ်မနေ ရှာဖွေရမည်ဟု ဆိုသည်။ စစ်ကော်မရှင်က အတင်းအဓမ္မ ကျင်းပခဲ့သည့် ရွေးကောက်ပွဲအပေါ်တွင်လည်း APHR က ပြင်းပြင်းထန်ထန် ကန့်ကွက်ထားပြီး ယင်းသည် စစ်ရာဇဝတ်ကောင်များကို အကာအကွယ်ပေးရန် ရည်ရွယ်သည့် ‘ဟန်ပြ’ ဖြစ်စဉ်သာဖြစ်ကြောင်း ဝေဖန်ခဲ့သည်။ ပြည်သူများသည် လက်တုံ့ပြန်ခံရမည်ကို ကြောက်ရွံ့၍သာ မဲပေးခဲ့ကြရခြင်းဖြစ်ပြီး၊ အတိုက်အခံပါတီများကို ဖယ်ထုတ်ထားသည့် အဆိုပါရွေးကောက်ပွဲ၌ ကြံ့ခိုင်ရေးပါတီက အနိုင်ရရှိခြင်းမှာ ကြိုတင်ဇာတ်တိုက်ထား သည့်အတိုင်းသာ ဖြစ်သည်ဟု APHR က ဆိုသည်။

လေကြောင်းတိုက်ခိုက်မှုကို စကားလုံးဖြင့် တားမရဟု အာဆီယံအမတ်များ သတိပေး



လေကြောင်းတိုက်ခိုက်မှုကို စကားလုံးဖြင့် တားမရဟု အာဆီယံအမတ်များ သတိပေး သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၂ ရက်။စစ်ကော်မရှင်၏ လေကြောင…

  • February 2, 2026
၅ နှစ်အတွင်း မြန်မာ့စီးပွားရေး ဒေါ်လာဘီလီယံ ၁၀၀ ဆုံးရှုံးခဲ့ကြောင်း ကုလသမဂ္ဂ သတိပေး

သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၂ ရက်။ မြန်မာနိုင်ငံတွင် စစ်အာဏာသိမ်းမှု ၅ နှစ်ပြည့်မြောက်ချိန်၌ ပြည်သူများ၏ ဒုက္ခသည် အဆိုးရွားဆုံးအခြေအနေ သို့ ရောက်ရှိနေပြီး နိုင်ငံ၏ စီးပွားရေးမှာလည်း အမေရိကန်ဒေါ်လာ ဘီလီယံ ၁၀၀ ခန့် ဆုံးရှုံးသွားခဲ့ကြောင်း ကုလသမဂ္ဂက သတိပေး ထုတ်ပြန်လိုက်သည်။ ကုလသမဂ္ဂ၏ နောက်ဆုံးမှတ်တမ်းများ အရ နိုင်ငံအတွင်းရှိ လူဦးရေ၏ လေးပုံတစ်ပုံခန့်သည် ငတ်မွတ်ခေါင်းပါး မှုဒဏ်ကို ရင်ဆိုင်နေရပြီး လူသားချင်းစာနာမှုဆိုင်ရာ အကူအညီများ အရေးပေါ်လိုအပ်နေသည်ဟု ဆိုသည်။ စစ်ကော်မရှင်က အတင်းအဓမ္မ ဖော်ဆောင်နေသည့် ရွေးကောက်ပွဲကာလ အတွင်းမှာပင် လေကြောင်း တိုက်ခိုက်မှုပေါင်း ၄၀၀ ကျော် ပြုလုပ်ခဲ့သဖြင့် အရပ်သား ၁၇၀ ကျော် သေဆုံးခဲ့ရသည်ဟု ဆိုသည်။ ၎င်းတို့အနက် ဇန်နဝါရီလနှောင်းပိုင်းက ကချင်ပြည်၊ ဗန်းမော်မြို့နယ်တွင် ဖြစ်ပွားခဲ့သည့် လေကြောင်းဗုံးကြဲမှု ကြောင့် အရပ်သား ၅၀ ကျော် သေဆုံးခဲ့ရသည့် ဖြစ်ရပ်မှာ အဆိုးရွားဆုံးဖြစ်ခဲ့သည်။ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးက စစ်ကော်မရှင်၏ ရွေးကောက်ပွဲသည် နိုင်ငံရေးထွက်ပေါက် မဟုတ်ကြောင်း ထောက်ပြဝေဖန်လိုက်ပြီး “ဒီရွေးကောက်ပွဲဟာ မြန်မာ့လူ့အဖွဲ့အစည်းကို ပိုမိုစိတ်ဝမ်းကွဲစေတဲ့ ဖြစ်စဉ်သာဖြစ်တယ်” ဟု မှတ်ချက်ပြုခဲ့သည်။ ထို့ပြင် ဒေါ်အောင်ဆန်းစုကြည် အပါအဝင် မတရားဖမ်းဆီးခံထားရသူ အားလုံးကို ချက်ချင်းပြန်လွှတ်ပေးရန်နှင့် အရပ်သားပြည်သူများ အပေါ် ကျူးလွန်နေသည့် အကြမ်းဖက်မှုများကို အမြန်ဆုံးရပ်တန့်ရန် နိုင်ငံတကာ အသိုင်းအဝိုင်းက စစ်ကော်မရှင်ကို ဖိအားပေးကြရန် ကုလသမဂ္ဂက ထပ်မံတိုက်တွန်းထားသည်။ လက်ရှိ မြန်မာနိုင်ငံ၏ အခြေအနေသည် ပြည်တွင်းစစ်ကြောင့် ပျက်စီးယိုယွင်းမှုများ သာမက စီးပွားရေး စနစ်တစ်ခုလုံး ပြိုလဲလုနီးပါးဖြစ်နေသည့် အန္တရာယ်နှင့် ရင်ဆိုင်နေရခြင်း ဖြစ်သည်။

၅ နှစ်အတွင်း မြန်မာ့စီးပွားရေး ဒေါ်လာဘီလီယံ ၁၀၀ ဆုံးရှုံးခဲ့ကြောင်း ကုလသမဂ္ဂ သတိပေး



၅ နှစ်အတွင်း မြန်မာ့စီးပွားရေး ဒေါ်လာဘီလီယံ ၁၀၀ ဆုံးရှုံးခဲ့ကြောင်း ကုလသမဂ္ဂ သတိပေး သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၂ ရက်။  မြ…

  • February 2, 2026
၅ နှစ်အတွင်း အမျိုးသမီး ၁,၀၀၀ နီးပါး လိင်ပိုင်းဆိုင်ရာ အကြမ်းဖက်ခံရဟု WLB ထုတ်ပြန်

 သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဖေဖော်ဝါရီလ ၂ ရက်။ မြန်မာနိုင်ငံတွင် စစ်အာဏာသိမ်းထားသည့် ၅ နှစ်တာကာလအတွင်း အမျိုးသမီးများအပေါ် လိင်ပိုင်းဆိုင်ရာ အကြမ်းဖက်မှုပေါင်း ၁,၀၀၀ နီးပါးအထိ ရှိလာနေပြီဖြစ်ကြောင်း အမျိုးသမီးများအဖွဲ့ချုပ် (မြန်မာနိုင်ငံ) - WLB က ဖေဖော်ဝါရီလ ၁ ရက်နေ့တွင် ထုတ်ပြန်လိုက်သည်။ WLB မှ ထုတ်ပြန်သည့် “၂၀၂၅ ခုနှစ်ကို လည်ပြန်ကြည့်ခြင်း” အစီရင်ခံစာအရ ပြီးခဲ့သည့် ၂၀၂၅ ခုနှစ် တစ်နှစ် တည်းမှာပင် လိင်နှင့် ဂျဲန်ဒါအခြေပြု အကြမ်းဖက်မှုပေါင်း ၂၀၉ မှုအထိ ရှိခဲ့သည်။ အဆိုပါ ကျူးလွန်မှုများထဲတွင် အိမ်တွင်းအကြမ်းဖက်မှုများက အများဆုံးဖြစ်နေသော်လည်း၊ စစ်အုပ်စုက ရည်ရွယ်ချက်ရှိရှိ ကျူးလွန်သည့် မုဒိမ်းမှုများနှင့် လိင်ပိုင်းဆိုင်ရာ နှောင့်ယှက်စော်ကားမှုများမှာလည်း ထိတ်လန့် ဖွယ်ရာ ကိန်းဂဏန်းများဖြင့် ပါဝင်နေသည်။ စစ်အုပ်စုသည် ၎င်းတို့ကျူးလွန်သမျှကို မည်သည့်အရေးယူမှုမျှ မရှိသည့် ‘ပြစ်ဒဏ်ကင်းလွတ်ခွင့် (Impunity)’ ကို အခွင့်ကောင်းယူကာ တိုင်းရင်းသူ အမျိုးသမီးများနှင့် မိန်းကလေးငယ်များကို စစ်လက်နက်သဖွယ် အသုံးချကာ ပစ်မှတ်ထား တိုက်ခိုက်နေခြင်းဖြစ်ကြောင်း WLB က ဝေဖန်ထောက်ပြထားသည်။ ထို့ပြင် ယခုကဲ့သို့သော အကြမ်းဖက်မှုများတွင် စစ်အုပ်စုသာမက အခြားသော လက်နက်ကိုင်အင်အားစု အချို့ လည်း ပါဝင်နေသည်ကို စိစစ်တွေ့ရှိရကြောင်း ဆိုသည်။ ကျူးလွန်သူများကို ထိရောက်စွာ အရေးယူနိုင်ရန်နှင့် အမျိုးသမီးများအပေါ် အကြမ်းဖက်မှုများ ရပ်တန့်စေရန် အတွက် နိုင်ငံတကာ အသိုင်းအဝိုင်းအနေဖြင့် စစ်အုပ်စု၏ အတုအယောင် ရွေးကောက်ပွဲကို ငြင်းပယ်ရန်၊ စစ်ကော်မရှင်ထံ လက်နက်နှင့် လေယာဉ်ဆီ ရောင်းချပေးနေမှုများကို ချက်ချင်းရပ်တန့်ရန် အပါအဝင် အချက် ၄ ချက်ကို WLB က အရေးပေါ် တောင်းဆိုထားသည်။ အမျိုးသမီးများအပေါ် မြေပြင်တွင် ယခုကဲ့သို့ ကျူးလွန်မှုများ ရှိနေသည့်တိုင် စစ်ကော်မရှင်က အတင်းအဓမ္မ လုပ်ဆောင်နေသည့် ရွေးကောက်ပွဲ လုပ်ငန်းစဉ်အပေါ်တွင်မူ ကုလသမဂ္ဂနှင့် အာဆီယံလွှတ်တော်အမတ်များ (APHR) က နိုင်ငံတကာစံနှုန်းများနှင့် ကိုက်ညီမှုမရှိသည့်အပြင် တရားဝင်မှုမရှိကြောင်း ပြင်းပြင်းထန်ထန် ဝေဖန် ကန့်ကွက်ထားကြသည်။ လက်ရှိတွင် မြန်မာနိုင်ငံတဝန်း တိုက်ပွဲများ၊ စစ်ရေးပဋိပက္ခများကြား၌ အမျိုးသမီးများသည် လုံခြုံမှုကင်းမဲ့သည့် ဘဝများကို ဖြတ်သန်းနေရပြီး၊ တရားမျှတမှု ရရှိနိုင်မည့် လမ်းစများမှာလည်း စစ်အုပ်စု၏ ဖိနှိပ်မှုများအောက် တွင် ပျောက်ကွယ်နေဆဲ ဖြစ်သည်ဟု အမျိုးသမီးရေး တက်ကြွလှုပ်ရှားနေသူများက ပြောသည်။

၅ နှစ်အတွင်း အမျိုးသမီး ၁,၀၀၀ နီးပါး လိင်ပိုင်းဆိုင်ရာ အကြမ်းဖက်ခံရဟု WLB ထုတ်ပြန်



၅ နှစ်အတွင်း အမျိုးသမီး ၁,၀၀၀ နီးပါး လိင်ပိုင်းဆိုင်ရာ အကြမ်းဖက်ခံရဟု WLB ထုတ်ပြန် သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဖေဖော်ဝါရီလ ၂ ရက်။ မြန်…

  • February 2, 2026
သွေးစွန်းသော မဲပုံးများနှင့် "Made in China" အရိပ်အောက်က ရွေးကောက်ပွဲ

 သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဇန်နဝါရီလ ၃၀ ရက်။   မြန်မာနိုင်ငံ မြောက်ပိုင်း၏ ကောင်းကင်ယံသည် ဆောင်းရာသီ၏ အအေးဓာတ်ကြောင့် မှိုင်းညို့နေရုံတင်မကဘဲ စစ်ကော်မရှင်၏ လက်နက်ကြီး မီးခိုးငွေ့များကြောင့်ပါ ထပ်ဆင့်အုံ့မှိုင်းနေခဲ့သည်။   မြောက်ပိုင်းဒေသ၏ ဆောင်းက အသားထဲစိမ့်ဝင်အောင် အေးမြလွန်းလှသော်လည်း၊ ရှမ်းပြည်မြောက်ပိုင်းနှင့် ကချင်ပြည်၏ မြို့ပြအချို့တွင်မူ နိုင်ငံရေး အပူရှိန်က တောက်လောင်လျက်ရှိသည်။   စစ်ကော်မရှင်သည် ၎င်းတို့၏ နိုင်ငံရေးထွက်ပေါက် အဖြစ် အပိုင်း (၃) ပိုင်းခွဲ၍ ကျင်းပသည့် ရွေးကောက်ပွဲ၏ နောက်ဆုံးအဆင့်ကို နိုင်ငံတစ်ဝှမ်း၌ အတင်းအဓမ္မ ဖော်ဆောင်လျက်ရှိသည်။   သို့သော် မြေပြင်၌ ကြားနေရသည်မှာ မဲပေးသူတို့၏ ဆန္ဒဖော်ထုတ်သံ သို့မဟုတ် မဲရုံဆီသို့ လျှောက်လှမ်းသည့် ခြေသံများမဟုတ်ပေ။   ဖားကန့်မြို့၏ တုန်ဟီးနေသော လက်နက်ကြီးသံများနှင့် ကျောက်မဲ၊ သီပေါမြို့တို့၏ ခြောက်ကပ်နေသော လမ်းမ ထက်က တိတ်ဆိတ်မှုများသာ ဖြစ်သည်။   လူသူကင်းမဲ့နေသည့် လမ်းမများ၏ ထိုတိတ်ဆိတ်မှုသည်ပင် စစ်ကော်မရှင်၏ အဓမ္မရွေးကောက်ပွဲအပေါ် ပြည်သူတို့၏ အသံတိတ် ဆန့်ကျင်မှုကို သက်သေပြနေသကဲ့သို့ ရှိတော့သည်။ +++ ရှမ်းမြောက်၏ ခြောက်ကပ်သော မဲရုံများနှင့် ‘ကိုယ်စားပြုမှုမဲ့ခြင်း’ +++   ရှမ်းပြည် မြောက်ပိုင်း၏ အချက်အချာကျသော ကျောက်မဲနှင့် သီပေါမြို့နယ်များတွင် ကျင်းပခဲ့သည့် ရွေးကောက်ပွဲသည် ‘ကိုယ်စားပြုမှု လုံးဝမရှိသော ရွေးကောက်ပွဲ’ အဖြစ် သမိုင်းတွင်ခဲ့သည်။   ကျောက်မဲမြို့နယ်တွင် ကျေးရွာအုပ်စုပေါင်း ၈၁ အုပ်စု ရှိသော်လည်း စစ်ကော်မရှင်သည် မြို့ပေါ်ရပ်ကွက် ၉ ခုနှင့် ကျေးရွာအုပ်စု ၅ အုပ်စုတွင်သာ မဲရုံများ ဖွင့်လှစ်နိုင်ခဲ့သည်။   ဤသည်မှာ တစ်မြို့နယ်လုံး၏ ၆ ရာခိုင်နှုန်းခန့်သာ ရှိပြီး ကျန်ရှိသည့် ၉၄ ရာခိုင်နှုန်းသော ဒေသခံများမှာ မဲပေးခွင့် ချန်လှပ်ခံခဲ့ရသည်။   ယင်းအခြေအနေနှင့် ပတ်သက်၍ ရှမ်းတိုင်းရင်းသားများ ဒီမိုကရက်တစ်ပါတီ (SNDP) နှင့် နီးစပ်သူတစ်ဦးက ယခုကဲ့သို့ မှတ်ချက်ပြုသည်။   “အခုကျင်းပတဲ့ ရွေးကောက်ပွဲမှာ ရှမ်းတိုင်းရင်းသားတွေ အများဆုံးနေထိုင်တဲ့ ရွာတွေ မပါဝင်ဘူးပေါ့ဗျာ။ ဒါကြောင့် ဒီရွေးကောက်ပွဲဟာ ဒေသခံတွေကို ကိုယ်စားပြုမှုမရှိသလို တရားမျှတမှုလည်း မရှိပါဘူး။”   ကျောက်မဲမြို့ခံတစ်ဦးကလည်း မဲရုံများ၏ လက်တွေ့ပုံရိပ်ကို ယခုကဲ့သို့ ပြောပြသည်။   “မြို့ထဲမှာ မဲလာပေးတဲ့သူက လက်ချိုးရေလို့ရတယ်။ မဲရုံပိတ်ခါနီးတဲ့အထိ တစ်ယောက်စ နှစ်ယောက်စပဲ လာကြတာ။ စစ်တပ်ကတော့ မဲပေးသူ ၅ သောင်းကျော်ရှိတယ်လို့ ထုတ်ပြန်ထားပေမဲ့ လက်တွေ့မှာတော့ မဲရုံတွေက ခြောက်ကပ်နေတာပါ။ လူတွေက မဲပေးဖို့ထက် လုံခြုံရေးအတွက်ပဲ စိုးရိမ်နေကြတာ။”   အထူးသဖြင့် ရှမ်းတိုင်းရင်းသား အများစု နေထိုင်သည့် ကျေးရွာများမှာ စစ်ကော်မရှင်၏ ထိန်းချုပ်မှုအောက်တွင် မရှိသဖြင့် ရွေးကောက်ပွဲ နယ်မြေအတွင်း မပါဝင်ခဲ့ပေ။   စစ်ကော်မရှင်က မဲပေးသူ ငါးသောင်းကျော်ရှိသည်ဟု ဝါဒဖြန့်ထားသော်လည်း မြေပြင်တွင် မဲရုံများမှာ ခြောက် ကပ်နေခဲ့သည်။   ကျောက်မဲမြို့ခံတစ်ဦး၏ အဆိုအရ မဲရုံပိတ်ခါနီးအချိန်အထိ မဲလာပေးသူမှာ လက်ချိုးရေ၍ ရသလောက်သာ ရှိပြီး လူထုမှာ မဲပေးရန်ထက် လုံခြုံရေးအတွက်သာ စိုးရိမ်နေကြရသည်။   သီပေါမြို့တွင်လည်း မဲပေးသူ မရှိသလောက် နည်းပါးခဲ့ပြီး ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ကသာ ပြိုင်ဘက်မရှိ အနိုင်ရသည့် ပုံစံမျိုးဖြင့် ရွေးကောက်ပွဲကို အဆုံးသတ်ခဲ့သည်။   +++ ဖားကန့်၏ လက်နက်ကြီးသံများကြားက သွေးစွန်းသော ရွေးကောက်ပွဲ +++   ကချင်ပြည်၊ ဖားကန့်မြို့တွင်မူ ရွေးကောက်ပွဲသည် တိတ်ဆိတ်ရုံတင်မကဘဲ အရပ်သားများ၏ သွေးမြေကျမှုနှင့် ပါ ရင်ဆိုင်ခဲ့ရသည်။   စစ်ကော်မရှင်သည် ရွေးကောက်ပွဲ ကျင်းပနိုင်ရန် ဖားကန့်မြို့အဝင်အထွက် တံတားများကို ဇန်နဝါရီ ၂၃ ရက်နေ့ ကတည်းက ပိတ်ဆို့ထားခဲ့သည်။   မြေပြင်အခြေအနေနှင့် ပတ်သက်၍ ဖားကန့်မြို့ခံတစ်ဦးက “မဲရုံတွေကတော့ ဖွင့်ထားတာပဲ၊ ဒါပေမဲ့ တစ်မြို့ လုံးက ဘယ်သူမှလည်း မဲသွားမပေးဘူး၊ အိမ်ထဲမှာပဲ အောင်းနေကြတာ။ အပြင်မှာလည်း လက်နက်ကြီးသံတွေ ကလည်း ကြားနေရတာဆိုတော့ ဘယ်သူက သွားပေးရဲမှာလဲ။ ဝန်ထမ်းအချင်းချင်းပဲ ပေးနေတာ တွေ့ရတယ်” ဟု ပြောသည်။   ဇန်နဝါရီ ၂၅ ရက် နံနက်ပိုင်းမှ စတင်ကာ ရွေးကောက်ပွဲ ကျင်းပစဉ်ကာလအတွင်း ဖားကန့်ဗျူဟာကုန်းနှင့် ရဲစခန်းဘက်မှ လက်နက်ကြီးများ တရစပ် ပစ်ခတ်ခဲ့မှုကြောင့် အရပ်သား ၅ ဦးထက်မနည်း ပြင်းထန်စွာ ဒဏ်ရာရရှိခဲ့သည်။   မြေပြင်၌ ကူညီပေးနေသူတစ်ဦးက “လက်နက်ကြီးကျည်က မြို့ပေါ်ရပ်ကွက်တွေထဲ ကျတာ။ တောင်ပြိုရွာမှာ တစ်ယောက်၊ ဆိပ်မူမှာ နှစ်ယောက် ထိတယ်။ မြို့ပေါ်မှာလည်း ထိတာရှိတော့ အားလုံးပေါင်း ၅ ယောက်ထက် မနည်း ဒဏ်ရာရထားတယ်။ အဲဒီထဲက ၃ ယောက်ကတော့ တော်တော်စိုးရိမ်ရလို့ ခွဲစိတ်ခန်းဝင်နေရတယ်” ဟု ပြောသည်။   နောက်ထပ် မြို့ခံတစ်ဦးကလည်း စစ်တပ်၏ ဖိအားပေးမှုကို ယခုကဲ့သို့ ပြောပြသည်။

 “မနက်ကတည်းက လက်နက်ကြီးသံတွေက တစ်ချက်ပြီးတစ်ချက်ပဲ၊ အိမ်တွေတောင် တုန်နေတာ။ ရွေးကောက်ပွဲ လုပ်နေတဲ့ ရပ်ကွက်တွေထဲကို လက်နက်ကြီးတွေ ကျနေတာဆိုတော့ ဘယ်သူမှ သိပ်ပြီး အပြင်မထွက်ရဲကြဘူး။ စစ်သားတွေကတော့ ကျောင်းတွေထဲမှာ သေနတ်တွေနဲ့ စောင့်နေကြတာပဲ။”   စစ်ကော်မရှင်က မြို့အဝင်အထွက် တံတားများကို ပိတ်ဆို့ကာ လုံခြုံရေး အင်အားအလုံးအရင်းဖြင့် မဲရုံများ ဖွင့်လှစ်ခဲ့သော်လည်း မြေပြင်တွင် မဲပေးသူမှာ ဝန်ထမ်းအချို့သာ ရှိခဲ့သည်။   ရွေးကောက်ပွဲ ကျင်းပနေစဉ်အတွင်း လက်နက်ကြီးကျည်များမှာ ငှက်ပျောတောရပ်ကွက်နှင့် မြို့မရပ်ကွက်ရှိ လူနေအိမ်များပေါ်သို့ ကျရောက်ခဲ့သည်။   ထိုဖြစ်စဉ်ကြောင့် အရပ်သား ၅ ဦးထက်မနည်း ပြင်းထန်စွာ ဒဏ်ရာရရှိခဲ့ပြီး အချို့မှာ အသက်အန္တရာယ် စိုးရိမ်ရသည့် အခြေအနေမျိုး ဖြစ်သည်ဟု ဖားကန့်မြို့ခံအချို့က အတည်ပြုပြောသည်။   အဆိုပါအချက်မှာ စစ်ကော်မရှင်၏ ‘အေးချမ်းတည်ငြိမ်စွာ မဲပေးနေကြသည်’ ဆိုသည့် ထုတ်ပြန်ချက်နှင့် မြေပြင် အခြေအနေ မည်မျှကွာဟနေကြောင်း ပြသနေသည့် သက်သေပင် ဖြစ်သည်။   +++ အမျိုးသား ဒီမိုကရေစီ အဖွဲ့ချုပ် NLD ပါဝင်ခွင့်မရှိတဲ့ ရွေးကောက်ပွဲ +++   ၂၀၂၁ ခုနှစ် စစ်တပ်မှ အာဏာသိမ်းယူသည့် အချိန်တွင် မြန်မာနိုင်ငံတွင် အမျိုးသား ဒီမိုကရေစီ အဖွဲ့ချုပ် NLD ပါတီ ဦးဆောင်သော အစိုးရ ရှိနေခဲ့သည်။   NLD ပါတီသည် ၂၀၁၅ ခုနှစ် ရွေးကောက်ပွဲနှင့် ၂၀၂၀ ရွေးကောက်ပွဲ တို့တွင် ရှမ်းပြည်နှင့် ရခိုင်ပြည်မှ အပ တိုင်းရင်းသား ဒေသများ အပါအဝင် တစ်နိုင်ငံလုံးတွင် သောင်ပြိုကမ်းပြို အနိုင်ရ ထားသော ပါတီ ဖြစ်သည်။   သို့သော်လည်း အမျိုးသား ဒီမိုကရေစီ အဖွဲ့ချုပ် NLD ပါတီမှာ ယခု ရွေးကောက်ပွဲ တွင် ပါဝင် နိုင်ခြင်း မရှိခဲ့ပါ။ ယင်းသည်ပင် ရွေးကောက်ပွဲ၏ အဓိက အကျဆုံးသော အရွေးချယ် ခံပိုင်ခွင့် အခွင့်အရေး ဆုံးရှုံးခဲ့ခြင်း ဖြစ်သည်။   NLD ပါတီသည် ၂၀၂၅-၂၆ ရွေးကောက်ပွဲတွင် ပါဝင်ခြင်းမရှိရသည့် အဓိကအကြောင်းရင်းမှာ စစ်ကောင်စီက ခန့်အပ်ထားသော ပြည်ထောင်စုရွေးကောက်ပွဲကော်မရှင် (UEC) က NLD ပါတီကို နိုင်ငံရေးပါတီအဖြစ်မှ ဖျက်သိမ်းလိုက်ခြင်း ကြောင့် ဖြစ်သည်။   စစ်ကောင်စီက ထုတ်ပြန်ခဲ့သည့် "နိုင်ငံရေးပါတီများ မှတ်ပုံတင်ခြင်းဥပဒေသစ်" အရ သတ်မှတ်ရက်အတွင်း ပါတီကို ပြန်လည်မှတ်ပုံမတင်သည့်အတွက်ကြောင့်ဟု ဆိုကာ ၂၀၂၃ ခုနှစ် မတ်လ ၂၈ ရက် တွင် NLD အပါအဝင် ပါတီပေါင်း ၄၀ ကို ဖျက်သိမ်းကြောင်း ကြေညာခဲ့သည်။   NLD ပါတီဘက်ကမူ စစ်ကောင်စီသည် တရားဝင်အစိုးရမဟုတ်သည့်အတွက် ၎င်းတို့ထုတ်ပြန်သည့် ဥပဒေများကို လိုက်နာရန်မလိုကြောင်းနှင့် အဆိုပါရွေးကောက်ပွဲသည်လည်း တရားမျှတမှုရှိမည်မဟုတ်သဖြင့် မှတ်ပုံတင်မည်မဟုတ်ကြောင်း ကြိုတင်ကြေညာခဲ့သည်။   ရန်ကုန်မြို့ရှိ NLD ဌာနချုပ်အပါအဝင် တစ်နိုင်ငံလုံးရှိ ပါတီရုံးခန်းအများအပြားသည် စီးနင်းခံရခြင်း၊ ချိပ်ပိတ်ခံရခြင်းနှင့် ဗုံးခွဲဖျက်ဆီးခံရခြင်းများကို ကြုံတွေ့ခဲ့ရသည်။   NLD ပါတီမှာ ယခင် ရွေးကောက်ပွဲများတွင် ရှမ်းပြည်နှင့် ရခိုင်ပြည်တို့မှ လွဲ၍ ကျန် ပြည်နယ်များ အားလုံးတွင် အနိုင်ရခဲ့သော ပါတီဖြစ်ရာ NLD ပါဝင်ခွင့်မရခြင်းသည်ပင်လျှင် တိုင်းရင်းသား ဒေသများတွင် နိုင်ငံရေး ပါတီများ၏ ရွေးချယ်ခံပိုင်ခွင့်မှာ လုံးဝ ဆုံးရှုံးနေသည်ကို ပြသနေသည်။   +++ "Made in China" ရွေးကောက်ပွဲ +++   ယခုရွေးကောက်ပွဲ၏ နောက်ကွယ်တွင် တရုတ်နိုင်ငံ၏ ကြီးမားသော တွန်းအားနှင့် ဖိအားများ ပါဝင်နေကြောင်း တက်ကြွလှုပ်ရှားသူများက ထောက်ပြကြသည်။   ကချင်အမျိုးသမီး အစည်းအရုံး-ထိုင်းနိုင်ငံ (KWAT) မှ စည်းရုံးလှုံ့ဆော်ရေးအဖွဲ့ တာဝန်ခံ ဆန်ထွယ်က စစ်ကော်မရှင်၏ ရွေးကောက်ပွဲကို ယခုကဲ့သို့ အမည်တပ်လိုက်သည်။   “စစ်ကော်မရှင်ရဲ့ ရွေးကောက်ပွဲကို ကြည့်ရတာတော့ Made in China ပေါ့နော်၊ တရုတ်ပြည်က ထုတ်လုပ်တဲ့ ရွေးကောက်ပွဲလို့တောင် ပြောလို့ရတယ်။ ကျမတို့ရဲ့ ကချင်ဒေသ မြစ်ဆုံ Dam ကို ပြန်လုပ်ဖို့ ဖိအားပေးနေတာ တွေ၊ လူတွေလွှတ်နေတာတွေ ရှိတယ်။ ဒါတွေက အလဲအလှယ်လုပ်တဲ့ ပုံစံမျိုး ဖြစ်နေလို့ Made in China Election လို့ ပြောလို့ရတာပါ။”   သျှမ်းသံတော်ဆင့် သတင်းဌာန၏ အယ်ဒီတာချုပ် စိုင်းမိဏ်း ကလည်း တရုတ်၏ ဝင်ရောက်စွက်ဖက်မှုကို ယခုကဲ့သို့ သုံးသပ်သည်။   “တိန့်ရှီကျွန်း ပြောတဲ့ စကားကို ကြည့်ခြင်းအားဖြင့် တရုတ်က တခြားနိုင်ငံရဲ့ ပြည်တွင်းရေးကို ဝင်ရောက် မစွတ်ဖက်ပါဘူးဆိုတဲ့ မူဝါဒကို သူတို့ကိုယ်တိုင် ကျော်လွန်ပြီး မြန်မာပြည်အပေါ် ဖိအားပေး ရွေးကောက်ပွဲ လုပ်ခိုင်းတဲ့ ပုံစံဖြစ်နေတယ်။ အာဏာသိမ်းစစ်ခေါင်းဆောင် ကိုယ်တိုင်က အဆင်သင့် ဖြစ်မနေဘဲနဲ့ ရွေးကောက်ပွဲ လုပ်ရတဲ့ သဘောလည်း ပြနေတယ်။”   ရွေးကောက်ပွဲ စောင့်ကြည့်သူများနှင့် တက်ကြွလှုပ်ရှားသူများက စစ်ကော်မရှင်၏ ရွေးကောက်ပွဲကို "Made in China Election" ဟု သတ်မှတ်လိုက်ကြသည်။   တရုတ်နိုင်ငံသည် ၎င်းတို့၏ One Belt One Road (BRI) စီမံကိန်းများနှင့် မြစ်ဆုံရေကာတာ စီမံကိန်းများကို ပြန်လည် အသက်သွင်းရန်အတွက် စစ်ကော်မရှင်ကို ရွေးကောက်ပွဲ ကျင်းပရန် ဖိအားပေးခဲ့ခြင်း ဖြစ်သည်။   တရုတ်အာရှရေးရာ အထူးကိုယ်စားလှယ် တိန့်ရှီကျွန်း၏ ပြောကြားချက်များအရ ဤရွေးကောက်ပွဲသည် တရုတ်၏ တိုက်ရိုက်ဝင်ရောက် စွက်ဖက်မှုနှင့် စစ်ကော်မရှင်၏ တရားဝင်မှု ရှာဖွေမှုတို့ ပေါင်းစပ်ထားသည့် ရလဒ်ဖြစ်ကြောင်း ပေါ်လွင်နေသည်။   +++ ရွေးကောက်ပွဲအလွန် ပိုမိုပြင်းထန်လာမည့် ပဋိပက္ခ +++   ရွေးကောက်ပွဲ ပြီးဆုံးသွားသော်လည်း မြန်မာနိုင်ငံ၏ ပဋိပက္ခမှာ လျော့ကျသွားမည့် လက္ခဏာ မရှိပေ။   စစ်ကော်မရှင်က ကျင်းပခဲ့သည့် ရွေးကောက်ပွဲမှာ ငြိမ်းချမ်းရေးကို ဦးတည်ခြင်းမဟုတ်ဘဲ ပိုမိုကြီးမားသော တိုက်ပွဲများ၏ အစပျိုးခြင်းသာ ဖြစ်ကြောင်း တော်လှန်ရေး အင်အားစုများက သတိပေးလိုက်သည်။   ရှေ့ဆက်လာမည့် စစ်ရေးအခြေအနေကို ကရင်နီပြည် အင်အားစုကိုယ်စားလှယ် ခွန်းသောမတ်စ် က ယခုကဲ့သို့ သုံးသပ်သည်။ “ရွေးကောက်ပွဲ ပြီးသွားရင်လည်း ကျနော် ထင်တယ်။ စစ်ရေးနဲ့ ပတ်သက်ပြီးတော့ လျှော့ကျ သွားမယ့် အခြေအနေမျိုး မရှိဘူး။ ရွေးကောက်ပွဲ ပြီးသွားရင်တောင်မှ ကျနော်တို့ တော်လှန်ရေးဖက်ကတော့ ဒီထက်ပိုအားကောင်းတဲ့ အခြေအနေမျိုးတွေ ပြင်ဆင်မှုတွေ ရှိတယ်။ အဲတော့ ဒီထက်ပိုပြင်းတဲ့ တိုက်ပွဲမျိုးတွေ ဒီထက်ပို ကျယ်ပြန့်မဲ့ တိုက်ပွဲမျိုးတွေ ဆက်ပြီးတော့ သွားမဲ့ အခင်းအကျင်းမျိုးပဲ ရှိပါတယ်ပေါ့။”   တော်လှန်ရေး အင်အားစုများသည် ရွေးကောက်ပွဲ ရလဒ်ကို အသိအမှတ်ပြုမည် မဟုတ်ဘဲ စစ်အာဏာရှင်စနစ် အမြစ်ပြတ်ရေးအတွက် ဗျူဟာမြောက် စုစည်းမှုများဖြင့် ဆက်လက် တိုက်ပွဲဝင်သွားရန် ပြင်ဆင်နေကြသည်။   မြန်မာ့အမျိုးသမီးသမဂ္ဂ (BWU) မှ မတင်တင်ညို ကလည်း ပြည်သူ့ဆန္ဒနှင့် ပတ်သက်၍ “ဒီတစ်ခေါက် နွေဦး တော်လှန်ရေးက မဖြစ်မနေ ဒီအာဏာရှင်ကို အဆုံးသတ်ရမယ်ဆိုတဲ့ ခံယူချက်က အခုထိ ခိုင်ခိုင်မာမာ ရှိနေဆဲ ပဲ။ ရွေးကောက်ပွဲက ဘယ်လိုရလဒ်ပဲ ရရှိလာ ရရှိလာ ကျမတို့ကတော့ ပြည်သူလူထုတွေ အားလုံးရဲ့ အကျိုး စီးပွားကို ရှေးရှုတဲ့ အနေနဲ့ကတော့ စစ်အာဏာရှင်စနစ်နဲ့ အာဏာရှင် မှန်သမျှ ပြုတ်ကျဖို့အတွက်တော့ ဆက်ပြီးတော့ တွန်းလှန်သွားရမယ်” ဟု ပြောသည်။   စစ်အာဏာရှင်စနစ်ကို အဆုံးသတ်ရန်အတွက် ပြည်သူလူထုနှင့် တော်လှန်ရေး အင်အားစုများအကြား ဗျူဟာမြောက် စုစည်းမှုသည် ယခုအချိန်တွင် အရေးအကြီးဆုံး ဖြစ်ကြောင်း တိုက်တွန်းထားသည်။   +++ ခြိမ်းခြောက်မှုအောက်က မဲပုံးများနှင့် သွေးစွန်းမည့် ရွေးကောက်ပွဲအလွန် အလားအလာ +++   ရွေးကောက်ပွဲ ဖြစ်မြောက်ရေးအတွက် စစ်ကော်မရှင်သည် လူထုအား နည်းမျိုးစုံဖြင့် အကျပ်ကိုင်ခဲ့သည်။   ရွေးကောက်ပွဲ ကာလအတွင်းမှာပင် မဲမထည့်သူများကို ခြိမ်းခြောက်ခြင်း၊ နေအိမ်များကို မီးရှို့ခြင်းနှင့် ခရီးသွား လာခွင့် ကန့်သတ်ခြင်းများကို လုပ်ဆောင်ခဲ့သည်။   အထူးသဖြင့် စစ်ဘေးရှောင် ပြည်သူများကို နေရပ်မပြန်ပါက နေအိမ်များ မီးရှို့မည်ဟု ခြိမ်းခြောက်ခြင်း၊ လူငယ် များကို မဲမပေးလျှင် တက္ကသိုလ်တက်ခွင့် ပိတ်ပင်ခြင်း စသည့် လူ့အခွင့်အရေး ချိုးဖောက်မှုများမှာ အထင်အရှား ရှိနေသည်။   KWAT မှ ဆန်ထွယ် က ရွေးကောက်ပွဲအလွန် စိုးရိမ်ရမှုကို ယခုကဲ့သို့ ထပ်လောင်းပြောဆိုသည်။   “ကျမတို့ မြင်တာကတော့ ဒါကတော့ သူတို့အနေနဲ့ သူတို့နဲ့ မိတ်ဖက်တဲ့ နိုင်ငံတကာတွေနဲ့ ချိတ်ဆက်ပြီးမှ မြန်မာနိုင်ငံ သူတို့ရဲ့ ဒီစီးပွားရေး လမ်းကြောင်းတွေ ဖွင့်ယူပြီးမှ တိုင်းရင်းသားဒေသတွေမှာ စစ်ပဋိပက္ခ ပိုပြီးမှ ဖွင့်ဖို့အတွက် ကို သူတို့ပိုက်ဆံတွေ ရှာသွားနိုင်တဲ့ အခြေအနေလည်း ရှိလာနိုင်တယ်။ ဒါကြောင့်မို့လို့ ဒီ Election အလွန်ပေါ့နော်။ ရွေးကောက်ပွဲ အလွန်ကတော့ ပဋိပက္ခတွေနဲ့ သတ်ဖြတ်မှုတွေ ပိုများနိုင်တယ်ဆိုတဲ့ဟာမျိုး ကို လည်း ကျမတို့ တွေ့ရတယ်။”   ယခုကျင်းပခဲ့သည့် စစ်ကော်မရှင်၏ ရွေးကောက်ပွဲသည် မြန်မာ့နိုင်ငံရေး ပြဿနာကို ဖြေရှင်းနိုင်မည့် နည်းလမ်း မဟုတ်ဘဲ နိုင်ငံ၏ အချုပ်အခြာအာဏာနှင့် သယံဇာတများကို တရုတ်နိုင်ငံသို့ အလဲအလှယ်လုပ်ကာ စစ်ခေါင်း ဆောင်များ၏ သက်တမ်းကို ဆွဲဆန့်ရန် ကြိုးပမ်းမှုသာ ဖြစ်သည်ဟု သုံးသပ်ထားကြသည်။   ပြည်သူလူထုမှာ မဲပုံးထဲသို့ ဆန္ဒမဲများ ထည့်ရန်ထက် လေယာဉ်ဗုံးကြဲမှု၊ လက်နက်ကြီး၊ ကျည်ဆန်များကြားမှ အသက်ရှင်သန်ရန်သာ ကြိုးပမ်းနေကြရသည်။   စစ်ကော်မရှင်၏ ရွေးကောက်ပွဲသည် တရားဝင်မှု မရှိသလို၊ ပြည်သူ့၏ ကိုယ်စားပြုမှုလည်း ကင်းမဲ့နေသည်။ အဆိုပါ ရွေးကောက်ပွဲသည် ပြည်သူ့ဆန္ဒကို မျက်ကွယ်ပြုရုံတင်မကဘဲ ပြည်သူ့အသက်ပေါင်းများစွာကို စတေး ၍ ကျင်းပခဲ့ခြင်း ဖြစ်သည်ဟု ဆိုကြသည်။   မတရားမှုကို အခြေခံ၍ တည်ဆောက်ထားသော ရွေးကောက်ပွဲရလဒ်သည် မြန်မာနိုင်ငံအတွက် ပိုမိုနက်ရှိုင်း သော စစ်မီးကိုသာ ယူလာပေးလိမ့်မည်ဟု ပြည်သူများနှင့် ရွေးကောက်ပွဲ စောင့်ကြည့်သူများက ယုံကြည် ထားကြသည်။   မဲပုံးထဲက မဲစာရွက်များထက် မြေပြင်က လက်နက်ကြီးကျည်ခွံများက ပိုမိုများပြားနေသည့် ဤရွေးကောက်ပွဲ သည် မြန်မာ့နိုင်ငံရေး အကျပ်အတည်းအတွက် ထွက်ပေါက်မဟုတ်ဘဲ ပိုမိုနက်ရှိုင်းသော ပဋိပက္ခတွင်းသို့ ဆွဲခေါ် သွားမည့် လမ်းညွှန်ချက်သာ ဖြစ်နေသည်ဟု ထောက်ပြပြောဆိုမှုများ ရှိနေသည်။   ထို့ကြောင့် နိုင်ငံတကာ အသိုင်းအဝိုင်းအနေဖြင့် စစ်ကော်မရှင် ‘အတုအယောင် ရွေးကောက်ပွဲ’ ကို အသိအမှတ် မပြုရန်နှင့် မြေပြင်တွင် အမှန်တကယ် အုပ်ချုပ်ရေး ယန္တရားများကို တည်ဆောက်နေသည့် တော်လှန်ရေး အဖွဲ့အစည်းများ ကိုသာ ကူညီပေးရန် တိုက်တွန်းတောင်းဆိုနေကြသည်။

သွေးစွန်းသော မဲပုံးများနှင့် “Made in China” အရိပ်အောက်က ရွေးကောက်ပွဲ



သွေးစွန်းသော မဲပုံးများနှင့် "Made in China" အရိပ်အောက်က ရွေးကောက်ပွဲ သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဇန်နဝါရီလ ၃၀ ရက်။  မြန်မာနိုင်ငံ မြေ…

  • February 1, 2026
စစ်ကော်မရှင် ဝါဒဖြန့် အကောင့်များ ပိတ်ပေးရန် လူမှု ပလက်ဖောင်များအား JFM တောင်းဆို သတင်းနှင့် မီဒီယာ ကွန်ရက်
၂၀၂၆ ခုနှစ်၊ ဇန္နဝါရီလ ၃၁ ရက်။ Justice For Myanmar (JFM) အဖွဲ့က Alphabet၊ Apple၊ TikTok နှင့် Telegram လူမှု ကွန်ရက် ပလက်ဖောင်းများအား စစ်ကော်မရှင်၏ ဝါဒဖြန့်ချီရေး နှင့် စီးပွားရေး ယန္တရားများ ပိတ်ပင်ပေးရန် တောင်းဆိုလိုက်သည်။ စစ်ကော်မရှင်သည် ၎င်းတို့၏ စီးပွားရေး အကျိုးအမြတ်နှင့် ဝါဒဖြန့်ချိရေးအတွက် နိုင်ငံတကာပလပ်ဖောင်းများ ကို အသုံးချနေခြင်း ဖြစ်ပြီး ယင်းလုပ်ဆောင်ချက်များကို အရေးယူပေးရန် JFM ပြောရေးဆိုခွင့်ရှိသူ မရတနာမောင် က ပြောသည်။ ၎င်းက “Google Play Store နဲ့ Apple App Store တို့မှာ မိုင်တဲလ်လုပ်ငန်းဆောင်ရွက်မှုတွေနဲ့ အခွန်ဝင်ငွေ တို့အတွက် တိုက်ရိုက်ပံ့ပိုးနေတဲ့ Mytel အပ်ပလီကေးရှင်းများကို လက်ခံပေးထားပါတယ်။ TikTok နဲ့ Telegram တို့ကလည်း MRTV ကဲ့သို့သော ဝါဒမှိုင်းဖြန့်အကောင့်များကို လက်ခံပေးထားလျက်ရှိပါတယ်။ ကျမတို့အနေနဲ့ ဒီပလပ်ဖောင်းအားလုံးကို ဆက်သွယ်ထားပြီး၊ အရေးယူဆောင်ရွက်ဖို့ တောင်းဆိုထားပါတယ်” ဟု ပြောသည်။ စစ်ကော်မရှင်၏ ဝါဒမှိုင်းဖြန့်လုပ်ငန်းများနှင့် စီးပွားရေးလုပ်ငန်းများအတွက် အသုံးပြုနေသည့် အကောင့်များနှင့် အပလီကေးရှင်းများကို ချက်ချင်းပိတ်ပင်ပေးရန် Alphabet၊ Apple၊ TikTok နှင့် Telegram စသည့် ကမ္ဘာ့နည်း ပညာ ကုမ္ပဏီကြီးများကို Justice For Myanmar (JFM) က တောင်းဆိုလိုက်ခြင်း ဖြစ်သည်။ ပြီးခဲ့သည့် ဇန်နဝါရီလ ၂၇ ရက်နေ့ကလည်း Facebook ၏ မိခင်ကုမ္ပဏီဖြစ်သော Meta ကုမ္ပဏီသည် စစ်တပ် ထိန်းချုပ်ထားသည့် စီးပွားရေးနှင့် ဝါဒဖြန့်ချိရေးဆိုင်ရာ စာမျက်နှာ၊ ဂရုနှင့် ပရိုဖိုင်းအကောင့် စုစုပေါင်း ၂၇၀ ခုကို ၎င်းတို့၏ မူဝါဒအရ ဖယ်ရှားခဲ့ကြောင်း JFM က ထုတ်ပြန်ထားသည်။ အဆိုပါ ဖယ်ရှားခံရမှုတွင် စစ်တပ်ပိုင် စီးပွားရေးလုပ်ငန်းစုကြီးများ ဖြစ်သော MEC နှင့် MEHL လက်အောက်ခံ မိုင်တဲလ် (Mytel)၊ MECtel၊ ဘဏ်များ၊ လူသုံးကုန်အမှတ်တံဆိပ်များနှင့် ဖျော်ဖြေရေးလုပ်ငန်းများအပြင် 'A Light for Justice 3'၊ 'News Service Station' နှင့် 'Myanmar Information Community' ကဲ့သို့သော စစ်တပ်ဝါဒဖြန့် အကောင့်များလည်း ပါဝင်သည်။ မရတနာမောင်က “မြန်မာစစ်တပ် စီးပွားရေးလုပ်ငန်းတွေကို Facebook နဲ့ အခြား လူမှုကွန်ရက် ပလက် ဖောင်းတွေက အရေးယူပိတ်ပင်မှုက အလွန်အရေးပါပါတယ်။ ဒီစီးပွားရေးလုပ်ငန်းတွေက မင်းအောင်လှိုင်လို စစ်ရာဇဝတ်ကောင်တွေကို တိုက်ရိုက် အကျိုးအမြတ်ရှာဖွေပေးနေတာ ဖြစ်ပြီး၊ ပြစ်ဒဏ်လွင်းကင်းခွင့်ဖြင့် ပြည်သူတွေကို သတ်ဖြတ်နေတဲ့စစ်တပ်အတွက် အခွန်ဝင်ငွေစီးကြောင်းလည်း ဖြစ်ပါတယ်” ဟု ပြောသည်။ စစ်ကော်မရှင်၏ စီးပွားရေးနှင့် ဝါဒဖြန့်ချိရေး အကောင့်ပေါင်း ၁,၀၀၀ ကျော်ကို Meta က ယခုလဆန်းပိုင်းတွင် ဖယ်ရှားခဲ့သလို၊ ပြီးခဲ့သည့် ဒီဇင်ဘာလအတွင်းကလည်း YouTube၊ MediaFire နှင့် X (Twitter) တို့က MITV၊ MRTV နှင့် ရတနာပုံသတင်းစာ အပါအဝင် ဝါဒဖြန့်အကောင့် ၂၈ ခုကို ဖယ်ရှားခဲ့ကြသည်။ အဆိုပါ အကောင့်များသည် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ကျူးလွန်မှုများအတွက် ပံ့ပိုးကူညီနေခြင်းဖြစ်သည်ဟု လူ့အခွင့်အရေးလှုပ်ရှားသူများက ထောက်ပြထားသည်။ JFM အနေဖြင့် စစ်အုပ်စု၏ စီးပွားရေးလုပ်ငန်းများကို နည်းပညာပလပ်ဖောင်းအသီးသီးမှ ဖယ်ရှားနိုင်ရေး အတွက် ဆက်လက် တွန်းအားပေးသွားမည် ဖြစ်ပြီး၊ အများပြည်သူများ အနေဖြင့်လည်း မိမိတို့တွေ့ရှိသည့် စစ်အုပ်စု၏ ဝါဒဖြန့်လုပ်ငန်းနှင့် စီးပွားရေးအကောင့်များကို အသိပေးပေးပို့ကြရန် တိုက်တွန်းထားသည်။

စစ်ကော်မရှင် ဝါဒဖြန့် အကောင့်များ ပိတ်ပေးရန် လူမှု ပလက်ဖောင်များအား JFM တောင်းဆို

စစ်ကော်မရှင် ဝါဒဖြန့် အကောင့်များ ပိတ်ပေးရန် လူမှု ပလက်ဖောင်များအား JFM တောင်းဆို သတင်းနှင့် မီဒီယာ ကွန်ရက်၂၀၂၆ ခုနှစ်၊ ဇန္နဝါရီလ ၃၁ ရက်။  …

  • February 1, 2026
မော်ချီး သတ္တုတွင်း ဗုံးကြဲ၊ အရပ်သား တစ်ဦးသေ သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဇန္နဝါရီလ ၃၁ ရက်။ ကရင်နီ (ကယား) ပြည်၏ အဓိကစီးပွားရေး အချက်အချာဖြစ်သော မော်ချီးခဲသတ္တုတွင်းဒေသကို စစ်တပ်က လေကြောင်းမှတစ်ဆင့် ဗုံးကြဲတိုက်ခိုက်ခဲ့ရာ အရပ်သား ခဲလုပ်သားတစ်ဦး သေဆုံးပြီး ငါးဦးထက်မနည်း ပြင်းထန် ဒဏ်ရာများ ရရှိခဲ့ကြောင်း ဒေသခံများက ပြောသည်။ ဘောလခဲခရိုင်၊ ဖားဆောင်းမြို့နယ်အတွင်းရှိ မော်ချီးဒေသ၊ အမှတ် (၄) ခဲကျင်းနေရာကို ဇန်နဝါရီလ ၃၀ ရက်၊ ညနေ ၄ နာရီခန့်တွင် စစ်ကော်မရှင်တပ်က တိုက်ပွဲဖြစ်ပွားခြင်းမရှိဘဲ လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်။ ယခင်ဖြစ်စဉ်များကဲ့သို့ ကင်းထောက်လေယာဉ်များ ကြိုတင်ပျံသန်းလာခြင်းမရှိဘဲ ရုတ်တရက် ဗုံးကြဲချခဲ့သည့် အပြင် စက်သေနတ်များဖြင့်ပါ အတွဲလိုက် ပစ်ခတ်ခဲ့ခြင်းကြောင့် အလုပ်ခွင်အတွင်းရှိ လုပ်သားများမှာ ဘေးလွတ်ရာသို့ ရှောင်တိမ်းရန် အချိန်မရခဲ့ကြပေ။ ခဲလုပ်ငန်းနှင့် နီးစပ်သူတစ်ဦးက “သေတဲ့ တစ်ယောက်ကတော့ ဟိုဖက်ဒီဖက် ပေါက်သွားတယ်။ ရုတ်တရက်ဆို တော့ ဘယ်သူမှ ထင်မထားဘူးလေ။ အများကြီး ထိကြတယ်။ ကျင်းထဲဝင်ပုန်းချိန်တောင် မရလိုက်ဘူး” ဟု ပြောသည်။ ယမန်နေ့က တိုက်ခိုက်မှုအတွင်း ဗုံးစထိမှန်ခဲ့သူများထဲက တစ်ဦးမှာ  သေဆုံးသွားခဲ့ပြီး ကျန်ရှိသည့် ဒဏ်ရာရရှိ သူ ငါးဦးမှာလည်း စိုးရိမ်ရသည့် အခြေအနေဖြင့် ဆေးကုသမှု ခံယူနေရကြောင်း ဒေသခံများက ပြောသည်။ မော်ချီးဒေသသည် စစ်အာဏာသိမ်းပြီးနောက်ပိုင်း စစ်ကော်မရှင်တပ်၏ လေကြောင်းတိုက်ခိုက်မှုကို အကြိမ် ပေါင်း ၂၀ ထက်မနည်း ခံစားခဲ့ရသည့် ဒေသဖြစ်သည်ဟု မြေပြင်သတင်းရင်းမြစ်များက ဆိုသည်။ ပြီးခဲ့သည့် နိုဝင်ဘာလ ၁ ရက်နေ့ကလည်း အမှတ် (၃) နေရာကို လေကြောင်းတိုက်ခိုက်မှုကြောင့် အရပ်သား ၅ ဦး သေဆုံးခဲ့ရသည့် ဖြစ်စဉ်မျိုး ရှိခဲ့ဖူးသည်။ ကရင်နီတော်လှန်ရေး အဖွဲ့ တာဝန်ရှိသူသူများ၏ သုံးသပ်ချက်အရ ဒီဇင်ဘာလ ၂၈ ရက်နေ့မှ စတင်ခဲ့သည့် ရွေးကောက်ပွဲ ကာလအတွင်း စစ်ကော်မရှင်သည် ဘောလခဲမြို့မှတစ်ဆင့် မော်ချီးဒေသကို ပြန်လည် ထိန်းချုပ် နိုင်ရန် စစ်ရေးအရှိန်မြှင့်တင်နေခြင်း ဖြစ်သည်။ လက်ရှိတွင် စစ်ကော်မရှင်တပ်က တော်လှန်ရေးတပ်ဖွဲ့များ သိမ်းပိုက်ထိန်းချုပ်ထားသည့် မော်ချီးဒေသအတွင်း က အရပ်သားပစ်မှတ်များကိုသာ ဦးတည်ပြီး လေကြောင်းဖြင့် ဗုံးကြဲတိုက်ခိုက်နေခြင်းကြောင့် ဒေသခံများနှင့် စစ်ဘေးရှောင်များမှာ လုံခြုံရေးအတွက် စိုးရိမ်နေကြသည်။

မော်ချီး သတ္တုတွင်း ဗုံးကြဲ၊ အရပ်သား တစ်ဦးသေ

မော်ချီး သတ္တုတွင်း ဗုံးကြဲ၊ အရပ်သား တစ်ဦးသေ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၃၁ ရက်။  ကရင်နီ (ကယား) ပြည်၏ အဓိကစီးပွားရေး …

  • February 1, 2026
ကချင်ပြည်အတွင်း အနည်းဆုံး မြို့နယ် ၄ ခုတွင် တိုက်ပွဲများ ဖြစ်ပွား သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၃၀ ရက်။ ကချင်ပြည်အတွင်း စစ်ကော်မရှင်တပ်က စစ်မျက်နှာအစုံဖွင့်၍ ထိုးစစ်ဆင်နေသဖြင့် ဒေသအနှံ့တွင် တိုက်ပွဲများ ပြင်းထန်နေသည်။ ကချင်ပြည်အတွင်းရှိ ဗန်းမော်၊ ဝိုင်းမော်၊ တနိုင်းနှင့် ဖားကန့်မြို့နယ်တို့တွင် စစ်ကော်မရှင်တပ်၏ အင်အား အလုံး အရင်းဖြင့် ထိုးစစ်ဆင်လာမှုကြောင့် တိုက်ပွဲများ ဆက်တိုက်ဖြစ်ပွားနေပြီး၊ ပူတာအိုနှင့် ခေါင်လန်ဖူးဒေသတို့ တွင်လည်း စစ်ရေးအခြေအနေများ တင်းမာနေကြောင်း ကချင်လွတ်လပ်ရေးအဖွဲ့ (KIO/KIA) က ပြောသည်။ လက်ရှိစစ်ရေးအခြေအနေနှင့် ပတ်သက်၍ KIA ပြန်ကြားရေးတာဝန်ခံ ဗိုလ်မှူးကြီးနော်ဘူက ၎င်းတို့ဘက်မှ ထိုးစစ်ဆင်ခြင်းမျိုး မရှိသော်လည်း စစ်ကော်မရှင်တပ်ဘက်မှ မြေပြင်စစ်ကြောင်းများဖြင့် စတင်ဝင်ရောက်လာ ခြင်းဖြစ်ကြောင်း ဆိုသည်။ ဗန်းမော်မြို့နယ်အတွင်း တိုက်ပွဲအခြေအနေကို ဗိုလ်မှူးကြီးနော်ဘူက “အခုလောလောဆယ်ကတော့ သုံးမိုင်လေး မိုင်ပေါ့ ဗန်းမော်ဖက်ကနေ မိုးမောက် တက်သွားတဲ့ သုံးမိုင်လေးမိုင် နေရာဖက်မှာလည်း နေ့တိုင်းလို တိုက်ပွဲ တွေရှိပါတယ်။ သူက မြေပြင်ကနေ ထိုးစစ်ဆင်လာတဲ့ အခြေအနေနဲ့ ရှိပါတယ်။ လေကြောင်းနဲ့ ပစ်တာ လက်နက်ကြီးနဲ့ ပစ်တာတွေကတော့ ပြောစရာတောင် မလိုဘူးပေါ့။ ဒါတောင် အဲဒီဗန်းမော်ဖက်မှာကတော့ တိုက်ပွဲကတော့ ဆက်ဖြစ်နေတဲ့ ဆိုတဲ့ဟာ ဖြစ်ပါတယ်” ဟု ပြောသည်။ အလားတူ ဝိုင်းမော်မြို့နယ်အတွင်း၌လည်း စစ်ကော်မရှင်တပ်သည် ဗျူဟာကျသည့် လမ်းကြောင်းများမှ တစ်ဆင့် စစ်ကြောင်းထိုးဝင်ရောက်လာနေသဖြင့် ခုခံတိုက်ပွဲများ နေ့စဉ်ဖြစ်ပွားနေသည်။ “ဝိုင်းမော်ဖက်မှာကတော့ ဝိုင်းမော်နဲ့ ဝါရှောင်တက်သွားတဲ့လမ်းရဲ့ မြောက်ဖက်ကျမှာပေါ့ အဲဒီချောင်း တစ်ချောင်းရှိတယ်။ အဲ့ဖက်မှာလည်း လမ်းတွေရှိတာပေါ့ သူတို့က ဗျူဟာလမ်းတွေ ရှိမှာပေါ့။ အဲဒီဖက်မှာ စစ်ကောင်စီဖက်ကနေ ဝင်လာလို့ တိုက်ပွဲတွေ ခုခံတိုက်ပွဲတွေ ရှိပါတယ်။ လက်နက်ကြီးတွေ ဒရုန်းတွေနဲ့က တော့ နေ့တိုင်း ပစ်တာတော့ရှိပါတယ်” ဟု ဗိုလ်မှူးကြီးနော်ဘူက ဆက်လက်ရှင်းပြသည်။ တနိုင်းမြို့နယ်အတွင်းရှိ ရွှေမှော်နှင့် ပယင်းမှော်ဒေသများတွင်လည်း တိုက်ပွဲများ ပြင်းထန်နေပြီး စစ်ကော်မရှင် ၏ အင်အားအလွန်အကျွံသုံး ထိုးစစ်ဆင်မှုကြောင့် KIA နှင့် ပူးပေါင်းတပ်များဘက်မှ ရှေ့တန်းတပ်စခန်းတစ်ခုကို လက်လွတ်လိုက်ရသည့် အခြေအနေများလည်း ရှိခဲ့သည်။ ထို့အပြင် ကချင်ပြည် မြောက်ဖျား ပူတာအိုနှင့် ခေါင်လန်ဖူးဒေသတို့တွင်လည်း စစ်ကော်မရှင်တပ်က ပြည်သူ့ စစ်တပ်ဖွဲ့ဝင်များနှင့် ပူးပေါင်းကာ အင်အားဖြည့်တင်းမှုများ ဆက်တိုက်လုပ်ဆောင်နေသည်။ ခေါင်လန်ဖူးစစ်မျက်နှာနှင့် ပတ်သက်၍ ဗိုလ်မှူးကြီးနော်ဘူက “ဆွမ်ပရာဘွမ်ဖက်မှာကတော့ တိုက်ပွဲကတော့ မရှိဘူး။ ဟိုခေါင်လန်ဖူးဖက်မှာကတော့ သူတို့ကစစ်အင်အားတွေ ထိုးထားပြီးမှ ပြည်သူ့စစ်နဲ့ ပူးပေါင်းပြီး ကျနော်တို့ KIA နဲ့ ပူးပေါင်းတပ်တွေရှိတဲ့ လန်ဆယ်ဖက်ကို သူတို့ ထိုးလာတာ။ ခေါင်လန်ဖူး စစ်မျက်နှာဖက်မှာ တော့ လက်နက်ကြီးနဲ့ 81 ၊ 82 ပေါ့ အဲဒါမျိုးတွေနဲ့ ပစ်တာကတော့ နေ့တိုင်းလို ရှိပါတယ်။ တကယ့်ထိတွေ့ ရင်ဆိုင် တိုက်ပွဲကြီးတွေတော့ မရှိဘူး” ဟု ပြောသည်။ ခေါင်လန်ဖူး စစ်မျက်နှာတွင် စစ်ကော်မရှင်ဘက်မှ လက်နက်ကြီးများကို အဓိကထား အသုံးပြုနေကြောင်း ဗိုလ်မှူးကြီးနော်ဘူက ပြောသည်။ လက်ရှိတွင် ကချင်ပြည်အတွင်းရှိ မြို့နယ်အများစု၌ စစ်ရေးပဋိပက္ခများ မြင့်တက်နေသဖြင့် ဒေသခံပြည်သူများ သည် စစ်ဘေးဒဏ်ကို ဆိုးရွားစွာ ခံစားနေရသည်။ စစ်ကော်မရှင်တပ်၏ စစ်ရေးလှုပ်ရှားမှုများနှင့်အတူ ပေါ်ပေါက်လာသည့် လူ့အခွင့်အရေး ချိုးဖောက်မှုများ ကြောင့် ဒေသခံများမှာ အသက်ဘေးအန္တရာယ်အတွက် စိုးရိမ်ထိတ်လန့်နေကြရကြောင်း ဒေသခံများနှင့် လူ့အခွင့်အရေး လှုပ်ရှားသူများက ပြောသည်။

ကချင်ပြည်အတွင်း အနည်းဆုံး မြို့နယ် ၄ ခုတွင် တိုက်ပွဲများ ဖြစ်ပွား

ကချင်ပြည်အတွင်း အနည်းဆုံး မြို့နယ် ၄ ခုတွင် တိုက်ပွဲများ ဖြစ်ပွား သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၃၁ ရက်။  ကချင်ပြည်အတွင်း စစ်က…

  • January 31, 2026
ထောင်ဖောက်ပြေးမှုနှင့် ပတ်သက်၍ လူထုကို IEC တောင်းပန် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၃၀ ရက်။ ကရင်နီပြည်အတွင်း ထောက်ဖောက်ပြေးမှုကြောင့် ပြည်သူများ အထိပ်တလန့် ဖြစ်ခဲ့ရခြင်းအတွက် ကရင်နီပြည် ကြားကာလ အုပ်ချုပ်ရေး ကောင်စီ (IEC) က လူထုကို ဝန်ချတောင်းပန်ခဲ့သည်။ ကရင်နီပြည်၊ မယ်စဲ့မြို့နယ်ရှိ အမှတ် (၂) အကျဉ်းထောင်တွင် စစ်သုံ့ပန်းများ အုပ်စုဖွဲ့၍ လက်နက်နှင့်အတူ ထောင်ဖောက်ပြေးမှု ဖြစ်ပွားခဲ့ခြင်းကြောင့် ပြည်သူများ စိုးရိမ်ထိတ်လန့်ခဲ့ရသည့်အပေါ် ကရင်နီပြည် ကြားကာလ အုပ်ချုပ်ရေးကောင်စီ (IEC) က လူထုတစ်ရပ်လုံးကို တရားဝင် ဝန်ချတောင်းပန်လိုက်သည်။ ပြီးခဲ့သည့် ဇန်နဝါရီလ ၁၈ ရက်နေ့က ဖြစ်ပွားခဲ့သည့် အဆိုပါဖြစ်စဉ်တွင် စစ်သုံ့ပန်း ၇၆ ဦး၊ ထောင်ဝန်ထမ်း ၂ ဦးနှင့် မူးယစ်ဆေးဝါးအမှုဖြင့် ကျခံနေရသူ ၅ ဦး စုစုပေါင်း (၈၃) ဦးတို့သည် လက်နက် ၉ လက်ကို ယူဆောင်ကာ ထောင်ဖောက်ပြေးခဲ့ကြခြင်းဖြစ်သည်။ IEC ၏ အတွင်းရေးမှူး-၂ ဦးဗညားက “ဒီဟာက ကျနော်တို့တွေရဲ့ အားနည်းချက်ပါ။ ဒီအားနည်းချက်ကို အခြေခံ ပြီးတော့မှ စစ်ကောင်စီကလည်း အကောင်းဆုံး အခွင့်ကောင်း ယူလိုက်တာပေါ့နော်။ လူတွေကို လူလိုဆက်ဆံ တဲ့ အတွက်ကြောင့် ကျနော်တို့ အမှားလည်း ဖြစ်သွားတယ်ပေါ့နော်။ အဲ့ဒါကြောင့်မို့လို့ ကျနော်တို့လည်း တရားဝင် ဝန်ချတောင်းပန်ခြင်း ဖြစ်တယ်” ဟု ပြောသည်။ စစ်ဆေးတွေ့ရှိချက်များအရ အဆိုပါအကျဉ်းသားများသည် ထောင်ဝန်ထမ်း ၂ ဦးနှင့် ချိတ်ဆက်ကာ ၃ လခန့် ကြိုတင်ပြင်ဆင်ခဲ့ကြခြင်း ဖြစ်သည်။ ၎င်းတို့သည် ဆက်သွယ်ရေး အားနည်းချက်များကို အခွင့်ကောင်းယူ၍ အုပ်စုဖွဲ့လှုပ်ရှားခြင်း၊ နယ်စပ်ဖြတ်ကျော် ရန် ဆုံမှတ်များသတ်မှတ်ခြင်းနှင့် ဖုန်းဆင်မ်ကတ်များ၊ ရိက္ခာများကို စနစ်တကျ ပြင်ဆင်ခဲ့ကြကြောင်း IEC ၏ ထုတ်ပြန်ချက်အရ သိရသည်။ ဦးဗညားက “ကျနော်တို့ ထောင်လုပ်တဲ့နေရာနဲ့ တခြားနေရာနဲ့ ဆက်သွယ်ဖို့ အရမ်းခက်ခဲတယ်။ အဲ့တော့ ဖောက်ထွင်းပြေးဖို့အတွက် ကြံတဲ့သူက ပိုအားသာသွား တာပေါ့။ နောက်ထပ် တစ်ခုက ၃ လ ဆိုပေမဲ့လည်း သေချာတာတစ်ခုက ရိုးရိုးကလေးတွေကနေ ကြံစည်တာ မဟုတ်ဘူး။ တကယ့်ကို စနစ်တကျ လုပ်ထားတဲ့ အပေါ်မှာကတော့ သတိမထားမိတာလည်း ပါတာပေါ့နော်” ဟု ပြောသည်။ အကျဉ်းသားများ ထွက်ပြေးပြီးနောက် နယ်မြေခံတော်လှန်ရေးတပ်ဖွဲ့များက လိုက်လံရှင်းလင်းခဲ့ရာ ပြန်လည်ခုခံ သည့် စစ်သုံ့ပန်း ၈ ဦးကို အသေပစ်ခတ်ဖမ်းဆီးနိုင်ခဲ့ပြီး ၂ ဦးကို အရှင်ဖမ်းမိခဲ့သည်။ ကျန်ရှိသည့် အကျဉ်းသားအများစုမှာ ထိုင်းစစ်တပ်ထံ လက်နက်ချ အဖမ်းခံခဲ့ကြသော်လည်း ထိုင်းနှင့် မြန်မာ စစ်အုပ်စုကြား နှစ်ပေါင်းများစွာရှိခဲ့သည့် တပ်ပိုင်းဆိုင်ရာ လုပ်ထုံးလုပ်နည်း သဘောတူညီချက်များအရ စစ်ကော်မရှင်ထံ ပြန်လည်လွှဲပြောင်းပေးခြင်း ခံခဲ့ရသည်။ လက်ရှိတွင် IEC အနေဖြင့် ထောင်ဖောက်ပြေးရာတွင် ပူးပေါင်းပါဝင်ခဲ့သည့် ထောင်ဝန်ထမ်း ၂ ဦးအား ပြစ်မှုဆိုင် ရာ တရားစွဲဆိုထားပြီး ဖြစ်သည်။ နောင်တွင် ထောင်ဝင်စာတွေ့ခြင်းနှင့် အင်တာဗျူးခြင်းများကို ကန့်သတ်သွားမည်ဖြစ်သလို၊ အကျဉ်းထောင် လုံခြုံရေးကို နိုင်ငံတကာဥပဒေများနှင့်အညီ ဖြစ်စေရန် နိုင်ငံတကာအဖွဲ့အစည်းများထံမှ နည်းပညာ အကူ အညီများ ရယူကာ အကြီးစား ပြုပြင်ပြောင်းလဲမှုများ ဆောင်ရွက်သွားမည်ဖြစ်ကြောင်း ထုတ်ပြန်ကြေညာထား သည်။

ထောင်ဖောက်ပြေးမှုနှင့် ပတ်သက်၍ လူထုကို IEC တောင်းပန်

ထောင်ဖောက်ပြေးမှုနှင့် ပတ်သက်၍ လူထုကို IEC တောင်းပန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၃၁ ရက်။  ကရင်နီပြည်အတွင်း ထောက်ဖောက်ပြေးမှ…

  • January 31, 2026
လက်ရှိ ဝန်ကြီးချုပ် အစိုးရသစ်တွင် ဝန်ကြီးချုပ် ဆက်ဖြစ်မည်ကို ဝန်ထမ်းများ စိုးရိမ် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၃၀ ရက်။ ဧရာဝတီတိုင်းဝန်ကြီးချုပ် ဦးတင်မောင်ဝင်း ရွေးကောက်ပွဲအနိုင်ရမှု အပေါ် ဝန်ထမ်းများမှာ စိုးရိမ်နေကြသည်။ ဧရာဝတီတိုင်းဒေသကြီး၏ လက်ရှိဝန်ကြီးချုပ် ဦးတင်မောင်ဝင်းသည် မကြာသေးမီက ကျင်းပပြီးစီးခဲ့သည့် ရွေးကောက်ပွဲတွင် ထပ်မံအနိုင်ရရှိသွားခဲ့သည့်အတွက် အသစ်ဖွဲ့စည်းမည့် အစိုးရအဖွဲ့တွင် ဝန်ကြီးချုပ်အဖြစ် ပြန်လည်ခန့်အပ်ခံရမည်ကို တိုင်းအတွင်းရှိ ဝန်ထမ်းအများစုက စိုးရိမ်နေကြခြင်း ဖြစ်သည်။ ဌာနဆိုင်ရာ ဝန်ထမ်းတစ်ဦးက “ဝန်ကြီးချုပ်က ခက်ထန်တယ်။ တပ်ကလာတာဆိုတော့ တပ်ပုံစံပေါ့။ ရေဗူး ပေါက်တာ မလိုချင်ဘူး၊ ခိုင်းတာလုပ်၊ ပြန်မပြောနဲ့ပဲ။ အကျိုးသင့်အကြောင်းသင့် ဆွေးနွေးညှိနှိုင်းလို့ မရဘူး။ အာဏာနဲ့ပဲ အုပ်ချုပ်တာ၊ အမိန့်ပေးတာ” ဟု ပြောသည်။ ပြီးခဲ့သည့် ဇန်နဝါရီလ ၂၅ ရက်နေ့က ကျင်းပခဲ့သည့် ရွေးကောက်ပွဲအပိုင်း (၃) တွင် ဦးတင်မောင်ဝင်းသည် ရေကြည်မြို့နယ် တိုင်းဒေသကြီးမဲဆန္ဒနယ်မှ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ကိုယ်စားပြု ဝင်ရောက်ယှဉ်ပြိုင်ကာ အနိုင်ရရှိခဲ့ခြင်းဖြစ်သည်။ စစ်ဘက်မှ လာသူဖြစ်သည့်အတွက် ၎င်း၏ တင်းကျပ်ပြီး ခက်ထန်သည့် အုပ်ချုပ်ရေးပုံစံအောက်တွင် ဆက်လက် တာဝန်ထမ်းဆောင်ရမည်ကို ဝန်ထမ်းများက ညည်းတွားနေကြသည်။ ထို့အပြင် ဝန်ကြီးချုပ်သည် ရုံးချိန်ပြင်ပတွင် အရေးကြီးကိစ္စ မရှိဘဲ ဝန်ထမ်းများကို ခေါ်ယူကာ အချိန်ကြာမြင့်စွာ စောင့်ဆိုင်းခိုင်းခြင်း၊ မိမိဌာနနှင့် မသက်ဆိုင်သည့် အလုပ်များကို ခိုင်းစေခြင်းတို့ကြောင့် လုပ်ငန်းခွင်အတွင်း ပျော်ရွှင်မှုကင်းမဲ့နေရသည်ဟု အခြားဝန်ထမ်းများကလည်း ဆိုသည်။ သို့သော် အဂတိလိုက်စားမှု အခွင့်အလမ်းရှိသည့် ဌာနအချို့တွင်မူ ဝန်ကြီးချုပ်၏ လုပ်ပိုင်ခွင့် အလွဲသုံးစား ပြုမှု အပေါ် ကြေနပ်သူများရှိနေစသည်ဟု ဆိုကြသည်။ “ငွေဝင်တဲ့ ဌာနတွေကတော့ ဝန်ကြီးချုပ်ကို ကြိုက်ကြတယ်။ အပေးအယူရှိတာကို လုပ်ပိုင်ခွင့်ထက်ကျော် လွန် ပြီး ငွေကိုသဲ့ပြီး ရှာနိုင်ကြတော့ ပျော်တာပေါ့။ အဲဒီဌာနတွေက မပြောလည်း သိကြပြီးသားပါ” ဟု တိုင်းအစိုးရ အဖွဲ့နှင့် နီးစပ်သူတစ်ဦးက ပြောသည်။ နိုင်ငံရေးလေ့လာသူများနှင့် အခြားပါတီခေါင်းဆောင်များကမူ ဤရွေးကောက်ပွဲရလဒ်သည် ကြိုတင်စီစဉ်ထား သည့် ဇာတ်ညွှန်းအတိုင်း ဖြစ်လာခြင်းသာဖြစ်သည်ဟု ရှုမြင်နေကြသည်။ ရွေးကောက်ပွဲတွင် ဝင်ရောက်ယှဉ်ပြိုင်ခဲ့သည့် ပါတီခေါင်းဆောင်တစ်ဦးက “အကွက်ကျကျ အသေးစိတ် စီမံဖန်တီးထားတဲ့ ဇာတ်လမ်းလေ။ ဇာတ်ကောင်တွေကို နေရာချထားပြီးသား။ မြင်သာထင်သာပါတယ်။ ဒီဝန်ကြီးချုပ်ပဲ ဝန်ကြီးချုပ်ဆက်လုပ်မှာပါ၊ ပြိုင်ဘက်မရှိပါဘူး” ဟု ပြောသည်။ အထူးသဖြင့် ရွေးကောက်ပွဲမတိုင်မီ တပ်မတော်ကာကွယ်ရေး ဦးစီးချုပ် ပုသိမ်မြို့သို့ ရောက်ရှိစဉ်အတွင်း ဝန်ကြီးချုပ်အား သီးခြားခေါ်ယူတွေ့ဆုံခဲ့ခြင်းသည် ၎င်းအား ဝန်ကြီးချုပ်အဖြစ် ဆက်လက်ထားရှိရန် သေချာ စေခဲ့သည့် ထူးခြားသော ဖြစ်စဉ်တစ်ရပ်အဖြစ် သုံးသပ်ကြသည်။ ဦးတင်မောင်ဝင်းသည် ၂၀၂၁ ခုနှစ် သြဂုတ်လ ၁ ရက်နေ့မှစတင်ကာ ဝန်ကြီးချုပ်အဖြစ် တာဝန်ယူခဲ့သူဖြစ်ပြီး ၎င်း၏ လက်ထက်တွင် တိုင်းအတွင်း ဥပဒေကို ငွေဖြင့် ဝယ်ယူလုပ်ကိုင်ရသည့် လုပ်ငန်းများစွာ ပေါ်ပေါက်လာခဲ့ ကြောင်း ဒေသခံလုပ်ငန်းရှင်အချို့က ဆိုသည်။ ၎င်းသည် တပ်မတော် (ကြည်း) ဗိုလ်သင်တန်းကျောင်း (OTS) အပတ်စဉ် ၆၄ ဆင်းဖြစ်ကာ တပ်မ ၂၂ တပ်မမှူးနှင့် အနောက်တောင်တိုင်းစစ်ဌာနချုပ် (နတခ) တိုင်းမှူး တာဝန်များကို ထမ်းဆောင်ခဲ့ဖူးသူ ဖြစ်သည်။ လက်ရှိတွင် တိုင်းအတွင်းရှိ ဝန်ထမ်းများက ဦးတင်မောင်ဝင်း၏ နေရာတွင် အခြားသော အနိုင်ရ ကိုယ်စားလှယ် တစ်ဦးနှင့် အစားထိုးခန့်အပ်ပေးစေလိုကြောင်း ဆန္ဒရှိနေကြသော်လည်း လက်တွေ့တွင်မူ ဦးတင်မောင်ဝင်းပင် ဝန်ကြီးချုပ်အဖြစ် ဆက်လက်အာဏာတည်မြဲမည့် အခြေအနေတွင် ရှိနေသည်ဟု ဆိုကြသည်။  

လက်ရှိ ဝန်ကြီးချုပ် အစိုးရသစ်တွင် ဝန်ကြီးချုပ် ဆက်ဖြစ်မည်ကို ဝန်ထမ်းများ စိုးရိမ်

လက်ရှိ ဝန်ကြီးချုပ် အစိုးရသစ်တွင် ဝန်ကြီးချုပ် ဆက်ဖြစ်မည်ကို ဝန်ထမ်းများ စိုးရိမ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၃၀ ရက်။  …

  • January 31, 2026
×Close