သတင်း

အမေရိကန်က အီရန်ကို နျူကလီးယားအရေး မဆွေးနွေးပါက တိုက်ခိုက်မည်ဟု ရာဇသံပေး  သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၉ ရက်။ အမေရိကန်ပြည်ထောင်စုသည် ပင်လယ်ကွေ့ဒေသရှိ အီရန်နိုင်ငံအနီးတဝိုက်တွင် စစ်အင်အား အကြီးအကျယ် ဖြည့်တင်းပြီးနောက်၊ နျူကလီးယားအစီအစဉ်နှင့် ပတ်သက်၍ ဆွေးနွေးရန် အီရန်အတွက် အချိန်ကုန်ဆုံးတော့မည်ဖြစ်ကြောင်း သတိပေးလိုက်သည်။ အကယ်၍ သဘောတူညီချက်တစ်စုံတစ်ရာ မရရှိပါက အင်အားသုံးဖြေရှင်းမည်ဟု အဓိပ္ပာယ်ရသည့် "မြန်ဆန်၍ ပြင်းထန်သော အကြမ်းဖက်မှု" မျိုးနှင့် ရင်ဆိုင်ရမည်ဟု ပြင်းထန်စွာ ခြိမ်းခြောက်ထားသည်။ အမေရိကန်သည် "Armada" ဟုခေါ်ဆိုသည့် ကြီးမားသော ရေတပ်စစ်သင်္ဘောစုကြီးကို စေလွှတ်ခဲ့ရာ၊ ယခုအခါ USS Abraham Lincoln လေယာဉ်တင်သင်္ဘော ဦးဆောင်သော စစ်သင်္ဘောအုပ်စုသည် ပင်လယ်ကွေ့ဒေသသို့ ရောက်ရှိနေပြီဖြစ်သည်။ ထို့အပြင် ဂျော်ဒန်၊ ကာတာနှင့် ဘာရိန်းနိုင်ငံရှိ အမေရိကန်အခြေစိုက်စခန်းများတွင်လည်း တိုက်လေယာဉ်များ၊ ဒုံးခိုကွယ်ရေးစနစ်များနှင့် ထောက်လှမ်းရေးလေယာဉ်များကို တိုးမြှင့်ချထားသည်။ အီရန်နိုင်ငံခြားရေးဝန်ကြီး အာဘာ့စ် အာရာချီကမူ ၎င်းတို့၏ လက်နက်ကိုင်တပ်ဖွဲ့များသည် မောင်းခလုတ်ပေါ် လက်တင်ထားပြီးဖြစ်ကာ ကျူးကျော်မှုမှန်သမျှကို ချက်ချင်းတုံ့ပြန်ရန် အသင့်ရှိကြောင်း၊ ၎င်းတို့၏ နျူကလီးယားအစီအစဉ်မှာလည်း ငြိမ်းချမ်းသော ရည်ရွယ်ချက်သာဖြစ်ကြောင်း တုံ့ပြန်ခဲ့သည်။ တစ်ချိန်တည်းမှာပင် အီရန်နိုင်ငံအတွင်း၌ ငွေကြေးတန်ဖိုးကျဆင်းမှုနှင့် အုပ်ချုပ်သူများအပေါ် မကျေနပ်မှုကြောင့် ဆန္ဒပြပွဲများ ပြင်းထန်နေပြီး၊ နှိမ်နင်းမှုအတွင်း သေဆုံးသူဦးရေမှာ အနည်းဆုံး ၆,၃၀၀ မှ ၃၀,၀၀၀ ခန့်အထိ ရှိနိုင်ကြောင်း လူ့အခွင့်အရေးအဖွဲ့များက ခန့်မှန်းထားသည်။

အမေရိကန်က အီရန်ကို နျူကလီးယားအရေး မဆွေးနွေးပါက တိုက်ခိုက်မည်ဟု ရာဇသံပေး 

အမေရိကန်က အီရန်ကို နျူကလီးယားအရေး မဆွေးနွေးပါက တိုက်ခိုက်မည်ဟု ရာဇသံပေး   သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၉ ရက်။  အမေရိကန…

  • January 29, 2026
အင်္ဂလန် အသင်းတော်ရဲ့ အကြီးအကဲကို ပထမဆုံးအကြိမ်အဖြစ် အမျိုးသမီးကို ခန့်အပ် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၉ ရက်။ အင်္ဂလန်အသင်းတော်ရဲ့ အကြီးအကဲ Archbishop of Canterbury (ကန်တာဘာရီ ဂိုဏ်းချုပ်ဆရာတော်ကြီး) အဖြစ် Bishop Sarah Mullally (ဘိရှော့ ဆာရာ မူလာလီ)ကို လန်ဒန်မြို့၊ စိန့်ပေါလ် ကာသီဒရယ် ဘုရားကျောင်းကြီးမှာ ၂၀၂၆ ခုနှစ်၊ ဇန်နဝါရီလ ၂၈ ရက်နေ့က တရားဝင်အတည်ပြု ခန့်အပ်ခဲ့ပါတယ်။ ဘိရှော့ ဆာရာ ဟာ အင်္ဂလန်အသင်းတော်ရဲ့ ၁၀၆ ပါးမြောက် ဂိုဏ်းချုပ်ဆရာတော်ဖြစ်လာပြီး ဒီရာထူးကို ရရှိတဲ့ ပထမဆုံး အမျိုးသမီး ဖြစ်ပါတယ်။ သူမဟာ အင်္ဂလန်အသင်းတော်တင်မကဘဲ တစ်ကမ္ဘာလုံးမှာရှိတဲ့ အင်္ဂလိကန်ဘာသာဝင် ၈၅ သန်းလောက်ရဲ့ ဝိညာဉ်ရေးရာအကြီးအကဲလည်း ဖြစ်လာပါတယ်။ ဒါဟာ ရိုမန် ကက်သလစ် အသင်းတော်က ပုပ်ရဟန်းမင်းကြီးလို ရာထူးမျိုး ဖြစ်ပါတယ်။ ဒီအသင်းတော်ရဲ့ အသင်းဝင်တွေကို အင်္ဂလန် နိုင်ငံမှာ အင်္ဂလန် အသင်းတော်လို့ ခေါ်ပြီး ကျန်ကမ္ဘာ အနှံ့က အသင်းဝင်တွေကိုတော့ အင်္ဂလိကန် အသင်းတော်လို့ ခေါ်ပြီး နိုင်ငံအလိုက် သာသနာပိုင်တွေက ဦးဆောင်ပါတယ်။ ဒါပေမယ့် အင်္ဂလန် နိုင်ငံမှာရှိတဲ့ အင်္ဂလန် အသင်းတော်ရဲ့ ကန်တာဘာရီ ဆရာတော်ကြီးကတော့ အင်္ဂလန် အသင်းတော်ရဲ့ ဂိုဏ်းချုပ် ဆရာတော်ကြီး ဖြစ်ပြီး ကျန် အင်္ဂလိကန် အသင်းတော်တွေရဲ့ ဝိညာဉ်ရေးရာ အကြီးအကဲ ဖြစ်ပါတယ်။ ဘိရှော့ ဆာရာဟာ အမှုတော်ဆောင်လုပ်ငန်းတွေကို လာမယ့် မတ်လ၊ Canterbury Cathedral မှာ ကျင်းပမယ့် ဘိသိက်ခံပွဲ (Enthronement) အပြီးမှာ စတင်မှာ ဖြစ်ပါတယ်။ သူမဟာ အရင်က အင်္ဂလန်နိုင်ငံရဲ့ သူနာပြုအရာရှိချုပ် (Chief Nursing Officer) အဖြစ် တာဝန်ထမ်းဆောင်ခဲ့ဖူးသူလည်း ဖြစ်ပါတယ်။ အင်္ဂလန်အသင်းတော် သက်တမ်းတစ်လျှောက် နှစ်ပေါင်းရာနဲ့ချီပြီး ဒီအမြင့်ဆုံးရာထူးကို အမျိုးသားတွေပဲ ဆက်ခံခဲ့တာပါ။ အခု စာရာ မူလာလီ တက်လာတာဟာ အင်္ဂလိကန်လောကမှာ အမျိုးသမီးတွေရဲ့ အခန်းကဏ္ဍ အမြင့်ဆုံးအဆင့်ကို ရောက်ရှိသွားတာကို ပြသနေပါတယ်။ သူမဟာ ရာထူးလက်ခံစကားမှာ အသင်းတော်အတွင်း အရင်ကဖြစ်ပွားခဲ့တဲ့ လိင်ပိုင်းဆိုင်ရာစော်ကားမှု ခံရသူတွေရဲ့ အသံကို နားထောင်ပေးမယ်လို့ ကတိပြုခဲ့ပါတယ်။ ဒါဟာ အရှုပ်တော်ပုံတွေကြောင့် နာမည်ပျက်ခဲ့ရတဲ့ အသင်းတော်ရဲ့ ပုံရိပ်ကို ပြန်လည်တည်ဆောက်ဖို့ ကြိုးစားတဲ့ ခြေလှမ်းသစ်တစ်ခု ဖြစ်ပါတယ်။ သူမဟာ အင်္ဂလန်တင်မကဘဲ ကမ္ဘာတစ်ဝန်းက အင်္ဂလိကန်အသင်းတော်တွေရဲ့ ခေါင်းဆောင်ဖြစ်လာတဲ့အတွက်၊ အမျိုးသမီး သိက္ခာတော်ရဆရာတွေကို လက်မခံသေးတဲ့ ရှေးရိုးစွဲနိုင်ငံတွေနဲ့ အသင်းတော်တွေကြားမှာ ဘယ်လို စည်းလုံးမှုကို တည်ဆောက်မလဲဆိုတာ စိတ်ဝင်စားစရာ ဖြစ်နေပါတယ်။ သူမကို အကြီးအကဲ ခန့်အပ်မှုကို ရှေးရိုးစွဲ အဖွဲ့အချို့က ကန့်ကွက်နေကြဆဲ ဖြစ်ပါတယ်။

အင်္ဂလန် အသင်းတော်ရဲ့ အကြီးအကဲကို ပထမဆုံးအကြိမ်အဖြစ် အမျိုးသမီးကို ခန့်အပ်

အင်္ဂလန် အသင်းတော်ရဲ့ အကြီးအကဲကို ပထမဆုံးအကြိမ်အဖြစ် အမျိုးသမီးကို ခန့်အပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၉ ရက်။  အင်္ဂလ…

  • January 29, 2026
စစ်ကော်မရှင် ဝါဒဖြန့်အကောင့်  ၂၇၀ ကျော်ကို Facebook ထပ်မံဖယ်ရှား သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဇန်နဝါရီလ ၂၉ ရက်။ စစ်ကော်မရှင်၏ စီးပွားရေးလုပ်ငန်းများနှင့် ဝါဒဖြန့်ချိရေးတွင် အသုံးပြုနေသည့် Facebook အကောင့်၊ ဂရု (Group) နှင့် ပရိုဖိုင်း (Profile) စုစုပေါင်း ၂၇၀ ကို Facebook ၏ မိခင် ကုမ္ပဏီဖြစ်သော Meta ကုမ္ပဏီက လူမှုကွန်ရက်စာမျက်နှာပေါ်မှ ထပ်မံဖယ်ရှား လိုက်သည်။ ယခုလုပ်ဆောင်ချက်သည် စစ်တပ်ထိန်းချုပ်ထားသော စီးပွားရေးလုပ်ငန်းများနှင့် မီဒီယာများကို ပိတ်ပင်သည့် Meta ၏ မူဝါဒအရ ဆောင်ရွက်ခြင်းဖြစ်ပြီး၊ ဖယ်ရှားခံရသည့်အထဲတွင် စစ်ခေါင်းဆောင်မိသားစုနှင့် ဆက်နွှယ် နေသည့် မိုင်တဲလ် (Mytel) ထုတ်ကုန်များ၊ မြန်မာဘီယာ၊ ဒဂုန်ဘီယာ၊ အင်းဝဘဏ်နှင့် မြဝတီဘဏ်ကဲ့သို့သော အဓိကစီးပွားရေးဒေါက်တိုင်များ ပါဝင်နေသည်။ ထို့အပြင် ပြင်ဦးလွင်ရှိ နန်းမြိုင်ကဖီးနှင့် Indoor Skydiving ကဲ့သို့သော အပန်းဖြေလုပ်ငန်းများနှင့် ဆက်စပ် သည့် အကောင့်များကိုလည်း ပိတ်ပင်ခဲ့သည်ဟု Justice For Myanmar (JFM) က ဇန်နဝါရီလ ၂၇ ရက်နေ့တွင် ထုတ်ပြန်သည်။ ယခုအကောင့်များသည် မြန်မာနိုင်ငံအတွင်း ကျူးလွန်နေ သည့် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို ငွေကြေးအရ သော်လည်း ကောင်း၊ ဝါဒဖြန့်ချိရေးအရသော်လည်းကောင်း ပံ့ပိုးကူညီနေသည့် လုပ်ငန်းများဖြစ်သည်ဟု Justice For Myanmar (JFM) က ထုတ်ပြန်သည်။ JFM ၏ တိုင်ကြားချက်ကြောင့် ဖယ်ရှားခံရသည့်အထဲတွင် ‘A Light for Justice 3’၊ ‘News Service Station’ နှင့် ‘Myanmar Information Community’ ကဲ့သို့သော စစ်တပ်ဝါဒဖြန့်အကောင့်များလည်း ပါဝင်သည်။ JFM က “အဆိုပါအကောင့်များသည် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ် မှုများကို ပြစ်ဒဏ်ခံရခြင်းကင်းလွတ်စွာဖြင့် ကျူးလွန်လျက်ရှိသည့် စစ်တပ်ကို ပံ့ပိုးကူညီခဲ့သည့်အကောင့်များ ဖြစ်သည်” ဟု ဆိုသည်။ ထို့အပြင် Alphabet (Google)၊ Apple၊ TikTok နှင့် Telegram တို့အနေဖြင့်လည်း စစ်ကော်မရှင်၏ စီးပွားရေး နှင့် ဝါဒဖြန့်အကောင့်များကို ချက်ချင်းပိတ်ပင်ရန် JFM က ဆက်လက်တောင်းဆိုထားသည်။ ပြီးခဲ့သည့် ဇန်နဝါရီလဆန်းပိုင်းကလည်း မိုင်တဲလ်ကုမ္ပဏီနှင့် ပတ်သက်သည့် အကောင့်ပေါင်း ၁,၀၀၀ ကျော်ကို Facebook က ဖယ်ရှားခဲ့သလို၊ ဒီဇင်ဘာလအတွင်းကလည်း Youtube နှင့် X (Twitter) အပါအဝင် အခြား နည်းပညာ ကုမ္ပဏီများက စစ်တပ်ဝါဒဖြန့် အကောင့်များကို အရှိန်အဟုန်ဖြင့် ဖယ်ရှားခဲ့ကြသည်။

စစ်ကော်မရှင် ဝါဒဖြန့်အကောင့်  ၂၇၀ ကျော်ကို Facebook ထပ်မံဖယ်ရှား

စစ်ကော်မရှင် ဝါဒဖြန့်အကောင့်  ၂၇၀ ကျော်ကို Facebook ထပ်မံဖယ်ရှား သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဇန်နဝါရီလ ၂၉ ရက်။ စစ်ကော်မရှင်၏ စီးပ…

  • January 29, 2026
ထိုင်း-မြန်မာနယ်စပ် ဖလူးဒေသတွင် စစ်ကော်မရှင်က ပေါင် ၅၀၀ ဗုံးများ ဖြင့် တိုက်ခိုက် သတင်းနှင့် မီဒီယာာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၉ ရက်။ ထိုင်း-မြန်မာနယ်စပ် အနီး မဲဆောက်မြို့ တဘက်ကမ်း မင်းလက်ပံ့နှင့် ဖလူး ကျေးရွာများအနီး တိုက်ပွဲများတွင် စစ်ကော်မရှင်တပ်က ပြင်းအားမြင့် ဗုံးများဖြင့် ကြဲချ တိုက်ခိုက်သဖြင့် ထိုင်းနိုင်ငံ ဘက်ခြမ်းတွင်ပါ တုန်ခါမှုများ ဖြစ်ခဲ့ရသည်ဟု ထိုင်းသတင်းမီဒီယာများက ဖော်ပြကြသည်။ ကရင်ပြည်၊ မြဝတီမြို့တောင်ဘက်ခြမ်းရှိ ဗျူဟာအရ အရေးပါသော မင်းလက်ပံနှင့် ဖလူးကျေးရွာများဘက်သို့ စစ်ကော်မရှင်တပ်က ဖျက်အားပြင်း ပေါင် ၅၀၀ ဗုံးများဖြင့် လေကြောင်းမှ ဗုံးကြဲတိုက်ခိုက်ခဲ့သည်ဟု မြေပြင် သတင်းရင်းမြစ်များက ပြောသည်။ အဆိုပါ လေကြောင်းမှ ဗုံးကြဲတိုက်ခိုက်မှုထဲ ပေါက်ကွဲမှုဒဏ်ကြောင့် ထိုင်းနိုင်ငံဘက်ခြမ်း မဲဆောက်မြို့ရှိ နေအိမ်များပါ တုန်ခါသွားခဲ့ကြောင်း ထိုင်းသတင်းမီဒီယာများက ဖော်ပြကြသည်။ ဇန်နဝါရီလ ၂၈ ရက် နံနက်ပိုင်းတွင် စစ်ကော်မရှင်တပ်သည် ဂျက်ဖိုက်တာများ အသုံးပြုကာ ပေါင် ၅၀၀ ဗုံး ၅ လုံးထက်မနည်း ကြဲချတိုက်ခိုက်ခဲ့ခြင်းဖြစ်သည်။ မြေပြင်ထိုးစစ်များတွင် ၃ လကျော်ကြာသည့်တိုင် ရှေ့မတိုးနိုင်ဘဲ အကျအဆုံးများနေခြင်းကြောင့် ယခုကဲ့သို့ လေကြောင်းပစ်ကူကို အပြင်းအထန် အသုံးပြုလာခြင်းဖြစ်သည်ဟု စစ်ရေးသတင်းရင်းမြစ်များက ဆိုသည်။ မြေပြင် သတင်းရင်းမြစ်တစ်ဦးက “မနက်ပိုင်းကတည်းက လေယာဉ်က လေးကြိမ်ထက်မနည်း လာကြဲတာ။ လက်နက်ကြီးတွေကလည်း ၁၂၀ မမ တွေနဲ့ ရမ်းပစ်နေတာ။ မြေပြင်ကနေ သူတို့တက်လို့မရလို့ လေယာဉ်နဲ့ တရစပ်လာကြဲနေတာ” ဟု ပြောသည်။ စစ်ကော်မရှင်တပ်သည် မြဝတီတောင်ပိုင်းတွင် လက်လွှတ်ခဲ့ရသော တပ်စခန်းများကို ပြန်လည်ရရှိရန် ၂၀၂၅ ခုနှစ် အောက်တိုဘာလကတည်းက စစ်ကြောင်း ၃ ကြောင်းဖြင့် ထိုးစစ်ဆင်နေခြင်း ဖြစ်သည်။ သို့သော် ကရင်အမျိုးသား လွတ်မြောက်ရေး တပ်မတော် KNLA ပူးပေါင်းတပ်များ၏ အဓိကခံစစ်စည်းဖြစ်သော မင်းလက်ပံကျေးရွာအနီးတွင် ပိတ်ဆို့ခံထားရခြင်းကြောင့် လက်ရှိအချိန်အထိ နယ်မြေအသာစီး မရသေးဘဲ ဖြစ်နေသည်။ မဲဆောက်မြို့တွင် နေထိုင်သည့် မြန်မာတစ်ဦးက “ကျနော်တို့ နေတဲ့နေရာကနေပါ ကြားနေရတာ။ ထိုင်းသတင်း မှာလည်း ပါတယ်လေ။ အိမ်တွေတုန်ကုန်တာ၊ ကျည်တွေ အိမ်နံရံတွေလာတာ အခုတလောက တောက်လျှောက် ပဲ ဖြစ်နေတာ။ ညဘက်တွေဆိုလည်း လက်နက်ကြီးသံတွေ ခဏခဏကြားရတယ်၊ ဒီနေ့ကတော့ အကြမ်းဆုံး ပဲ" ဟု ပြောသည်။ ယခုကဲ့သို့ စစ်ကော်မရှင်တပ်၏ လေကြောင်းနှင့် လက်နက်ကြီး တိုက်ခိုက်မှုများကြောင့် ဖလူး၊ မင်းလက်ပံနှင့် လေးကေကော် အပါအဝင် ကျေးရွာ ၁၀ ရွာခန့်မှ ဒေသခံ ၅,၀၀၀ ကျော်သည် ဘေးလွတ်ရာသို့ ထွက်ပြေးတိမ်းရှောင်နေရသည်။ ၎င်းတို့သည် လနှင့်ချီကာ စစ်ဘေးရှောင်နေရခြင်း ဖြစ်သဖြင့် အမိုးအကာ၊ ဆေးဝါးနှင့် စားနပ်ရိက္ခာ အခက်အခဲ များဖြင့် ရင်ဆိုင်နေရကာ အရေးပေါ်အကူအညီများ လိုအပ်လျက်ရှိကြောင်း အကူအညီပေးနေသူများက ပြောသည်။

ထိုင်း-မြန်မာနယ်စပ် ဖလူးဒေသတွင် စစ်ကော်မရှင်က ပေါင် ၅၀၀ ဗုံးများ ဖြင့် တိုက်ခိုက်

ထိုင်း-မြန်မာနယ်စပ် ဖလူးဒေသတွင် စစ်ကော်မရှင်က ပေါင် ၅၀၀ ဗုံးများ ဖြင့် တိုက်ခိုက် သတင်းနှင့် မီဒီယာာ ကွန်ရက်။၂၀၂၆ ခုနှစ်၊ ဇန္နဝါရီလ ၂၉ ရက်။  …

  • January 29, 2026
KNPP ဦးဆောင်မှုအသစ်တွင် အမျိုးသမီးများနှင့် လူငယ်များ နေရာပိုရလာ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၉ ရက်။ ကရင်နီအမျိုးသား တိုးတက်ရေးပါတီ KNPP ဦးဆောင်မှု အသစ်ဖွဲ့စည်းရာတွင် မျိုးဆက်သစ်လူငယ်နှင့် အမျိုးသမီးခေါင်းဆောင် များကို နေရာပေးလိုက်ပြီး ဖက်ဒရယ်ခရီးစဉ်သစ်ကို အရှိန်မြှင့်မည်ဟု ပြောဆိုလိုက်သည်။ KNPP ၏ (၁၅) ကြိမ်မြောက် ပါတီကွန်ဂရက်တွင် ပါတီ၏ ခေါင်းဆောင်မှုပိုင်းကို အသစ်ပြန်လည် ရွေးချယ် တင်မြှောက်ခဲ့ရာ ဗဟိုကော်မတီဝင်များထဲ၌ အမျိုးသမီးနှင့် လူငယ်များ သိသိသာသာ ပိုမိုပါဝင်လာသည်။ ပြီးခဲ့သည့် ဇန်နဝါရီလ ၁၉ ရက်နေ့မှ ၂၄ ရက်နေ့အထိ ကရင်နီပြည်၊ ဆီဘာရားမြို့နယ်၊ တလဲဒူဆီတွင် ကျင်းပခဲ့ သည့် အဆိုပါကွန်ဂရက်၌ ဗဟိုကော်မတီဝင် ၃၀ ဦးကို အတည်ပြုခဲ့ပြီး ယင်းအနက် ၈ ဦးမှာ အမျိုးသမီးများ ဖြစ်ကြကာ ၅ ဦးမှာ အသက် ၃၅ နှစ်အောက် လူငယ်များ ဖြစ်ကြသည်။ အထူးသဖြင့် အရံဗဟိုကော်မတီဝင် ၁၂ ဦးအနက် ၅၀ ရာခိုင်နှုန်းမှာ အမျိုးသမီးများဖြစ်လာခြင်းက KNPP ၏ ထူးခြားသော ခေါင်းဆောင်မှုအပြောင်းအလဲပင် ဖြစ်သည်။ ပါတီ၏ ရှေ့လုပ်ငန်းစဉ်များတွင် မျိုးဆက်သစ်လူငယ်များ၏ စွမ်းဆောင်ရည်နှင့် အမျိုးသမီးများ၏ ဦးဆောင်မှု ကို ပိုမိုနေရာပေးရန် ရည်မှန်းထားကြောင်း KNPP ၏ အထွေထွေအတွင်းရေးမှူး ဦးအောင်ဆန်းမြင့်က ပြော သည်။ ၎င်းက “ဒီကွန်ဂရက်မှာ လူငယ်တွေ အများကြီး ပါလာကြတယ်ပေါ့နော်။ ဆိုတော့ ကျွန်တော်တို့ပါတီ အရံဗဟို ကော်မတီဝင် ၁၂ ယောက်လုံးက ဒါ့အပြင် ၅၀ ရာခိုင်နှုန်းက အမျိုးသမီးတွေ ဖြစ်တယ်ပေါ့နော်။ ဒီကွန်ရက်မှာ တော့ အမျိုးသမီးတွေက ခေါင်းဆောင်မှုနေရာတွေ အများကြီး ရထားတာပေါ့နော်” ဟု ပြောသည်။ ပါတီ၏ ထိပ်ပိုင်းခေါင်းဆောင်များအဖြစ် ဥက္ကဋ္ဌ ခူဦးရယ်၊ ဒုတိယဥက္ကဋ္ဌ ခူထဲဘူး၊ အထွေထွေအတွင်းရေးမှူး ဦးအောင်ဆန်းမြင့်တို့က ဆက်လက်ဦးဆောင်သွားမည်ဖြစ်သည်။ ထူးခြားချက်အနေဖြင့် ဒုဥက္ကဋ္ဌဖြစ်သူ ခူထဲဘူးသည် အမျိုးသားညီညွတ်ရေးအစိုးရ (NUG) ၏ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန ဒုဝန်ကြီးအဖြစ်မှ ပြီးခဲ့သည့် ဒီဇင်ဘာလ ၂၄ ရက်တွင် တရားဝင်နုတ်ထွက်ခဲ့ပြီး ပြည်နယ်အတွင်းရေးရာများကို ပိုမိုအာရုံစိုက်လုပ်ဆောင်သွားမည်ဖြစ်သည်။ ယင်းနုတ်ထွက်မှုနှင့် ပတ်သက်၍ ဦးအောင်ဆန်းမြင့်က “ခူးထဲဘူးက NUG မှာ ဒုဝန်ကြီးအဖြစ် ပါဝင်ဖို့အတွက် ကရင်နီပြည် အတိုင်ပင်ခံကောင်စီကနေမှ စေလွှတ်လိုက်တာဖြစ်တယ်။ သူကနေပြီးမှ ပြည်တွင်းရေးကိုပဲ အာရုံစိုက် လုပ်နိုင်ရန်အတွက်ဆိုပြီးတော့ ပြောလာတဲ့အတွက် KSCC ကပဲ ပြန်ပြီးတော့မှ NUG ကနေ သူ့ကို ပြန်ခေါ်ယူလိုက်တာပဲ ဖြစ်တယ်ပေါ့နော်။ ကျနော်တို့ NUG မှာ ပါဝင်နေတဲ့လူတွေက ကျနော်တို့ အဖွဲ့အစည်း ကိုယ်စားပြုတယ်လို့ မဟုတ်ဘူး။ ကျနော်တို့ ပြည်နယ် ကိုယ်စားပြု အနေနဲ့ သွားပါတာဖြစ်တယ်” ဟု ပြော သည်။ KNPP သည် အောက်ခြေမှ အထက်သို့ တည်ဆောက်သည့် ဖက်ဒရယ်စနစ် (Bottom-up Federalism) ကို ကျင့်သုံးကာ အနာဂတ် ဖက်ဒရယ်ဒီမိုကရေစီ ပြည်ထောင်စု တည်ဆောက်နိုင်ရေးအတွက် မဟာမိတ် တော်လှန်ရေး အင်အားစုများနှင့် အသွင်ကူးပြောင်းရေးကာလ တစ်လျှောက်လုံး ပူးပေါင်းဆောင်ရွက်သွားမည် ဖြစ်သည်။ ဦးအောင်ဆန်းမြင့်က “ကျနော်တို့ကတော့ ကျနော်တို့ ပြည်နယ်အားကောင်းရေး၊ စည်းလုံးညီညွတ်ရေး ဒီထက်ပိုပြီးမှ တည်ဆောက်သွားပြီးမှ စစ်အာဏာရှင် ပြုတ်ကျရေးအတွက် အစွမ်းကုန် ကြိုးစားသွားမယ်။ ဒါ့အပြင် ကျနော်တို့ တခြားသော ပြည်နယ် ဖက်ဒရယ်ယူနစ်တွေနဲ့ ပူးပေါင်းပြီးတော့မှ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် မူဝါဒတွေ ချမှတ်ရေးဆွဲသွားမယ်။ နောက်ပြီးမှ ဒါကိုလည်း အကောင် အထည်ဖော်သွားဖို့လည်း ရည်ရွယ်ချက်တွေ ရှိပါတယ်” ဟု ဆက် ပြောသည်။ ၁၉၅၇ ခုနှစ်တွင် စတင်ဖွဲ့စည်းခဲ့သည့် KNPP သည် နွေဦးတော်လှန်ရေးတွင် အစောဆုံး ပါဝင်လာခဲ့သည့်အပြင် ကရင်နီပြည်နယ် အတိုင်ပင်ခံ ကောင်စီ (KSCC) နှင့် ကရင်နီပြည် ကြားကာလ အုပ်ချုပ်ရေးကောင်စီ (IEC) တို့ကို ဦးဆောင်ဖွဲ့စည်းကာ ပြည်နယ်အဆင့် အုပ်ချုပ်ရေးယန္တရားကို အောင်မြင်စွာ ဖော်ဆောင်နေသည့် အဖွဲ့အစည်း တစ်ခု ဖြစ်သည်။

KNPP ဦးဆောင်မှုအသစ်တွင် အမျိုးသမီးများနှင့် လူငယ်များ နေရာပိုရလာ

KNPP ဦးဆောင်မှုအသစ်တွင် အမျိုးသမီးများနှင့် လူငယ်များ နေရာပိုရလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၉ ရက်။  ကရင်နီအမျိုးသား …

  • January 29, 2026
တိုက်ပွဲဖြစ်နေသည့် ကသာမြို့တွင် ကျောင်းသားများအား ကျောင်းတက်ခိုင်းသဖြင့် အန္တရာယ် စိုးရိမ်နေရ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၉ ရက်။ စစ်ကိုင်းတိုင်း ကသာမြို့တွင် တိုက်ပွဲဧရိယာနှင့် ၂ မိုင်အကွာ၌ရှိသော ကျောင်းတွင် စစ်ကော်မရှင်က ကျောင်းပြန်ဖွင့်ခဲ့ရာ ကျောင်းသားများ၏ အသက်အန္တရာယ် စိုးရိမ်နေရသည်ဟု ကာကွယ်ရေး တပ်ဖွဲ့များက ပြောသည်။ စစ်ကိုင်းတိုင်းဒေသကြီး၊ ကသာမြို့တွင် မြို့သိမ်းတိုက်ပွဲများ ပြင်းထန်စွာ ဖြစ်ပွားနေသော်လည်း စစ်ကော်မရှင်က တိုက်ပွဲဖြစ်ပွားရာ တည်နေရာနှင့် ၂ မိုင်အကွာ၌ ကျောင်းများ ပြန်လည်ဖွင့်လှစ်ထားခြင်းကြောင့် ကျောင်းသား၊ ကျောင်းသူများ၏ အသက်အန္တရာယ်ကို ကာကွယ်ရေးတပ်ဖွဲ့များက စိုးရိမ်နေကြသည်။ ကျောင်းပြန်ဖွင့်ချိန်တွင် မြို့ထဲ၌ ကျန်ရစ်သူများသာ တက်ရောက်ခဲ့ကြသော်လည်း ယခုရက်ပိုင်းတွင် စစ်ဘေး ရှောင် အချို့ပါ နေရပ်ပြန်၍ ကျောင်းတက်နေကြသည့်အပေါ် ကာကွယ်ရေးတပ်ဖွဲ့ဝင်တစ်ဦးက ယခုကဲ့သို့ ပြော သည်။ “တချို့စစ်ရှောင်ထွက်လာပြီးမှ စစ်ရှောင်စခန်းမှလက်ခံထားပြီးမှ သူတို့ကလေးတွေကျောင်းထားချင်လို့ဆိုပြီး ကသာမြို့ထဲကို ပြန်ဝင်သွားတဲ့ကိစ္စပေါ့ဗျာ။ ပြန်ဝင်သွားတာတော့မများပါဘူး။ ဒါပေမဲ့ ဒီကလေးတွေရဲ့ အန္တရာယ်ပေါ့နော်။ စစ်ပွဲဖြစ်နေတဲ့ အနီးဆုံးဧရိယာထဲမှာ ကလေးတွေဘယ်လောက်အန္တရာယ်များသလဲ။ စစ်ကောင်စီက ဒါလူသားဒိုင်းအဖြစ် အသုံးချနေတာကို သူတို့ တကယ်ဘဲမသိလို့လားပေါ့။” ကသာမြို့သိမ်းတိုက်ပွဲ စတင်သည့်နေ့မှ စ၍ မြို့ပေါ်ရှိ ကျောင်းများအားလုံး ပိတ်ထားခဲ့ရပြီး မြို့ခံအများစုမှာ လည်း ဘေးလွတ်ရာသို့ တိမ်းရှောင်နေကြရသော်လည်း၊ စစ်ကော်မရှင်က ပြီးခဲ့သည့် ဇန်နဝါရီလ ၁၈ ရက်နေ့မှ စတင်ကာ အထက (၃) ကျောင်းတွင် ကျောင်းများစုပေါင်း၍ ပြန်လည်ဖွင့်လှစ်ခဲ့ရာ ကျောင်းသား ၃၀၀ ဝန်းကျင် တက်ရောက်နေကြသည်။ ကသာမြို့ရှိ အထက (၂) ကျောင်းမှာ တိုက်ပွဲ စတင်စဉ်ကပင် နှစ်ဖက်ပစ်ခတ်မှုများအကြား မီးလောင်ပျက်စီးခဲ့ ရပြီး၊ အထက (၁) ကျောင်းမှာမူ ရဲစခန်းနှင့်နီးကပ်သဖြင့် ကျောင်းဖွင့်ရန် မဖြစ်နိုင်သည့် အခြေအနေတွင် ရှိနေ သည်။ တစ်ဖက်တွင်လည်း ကသာမြို့ပေါ်၌ အရပ်သားသေဆုံးမှုများ ရှိနေပြီး ရုပ်အလောင်းများမှာ လမ်းပေါ်တွင် ပုပ်ပွ ကာ အလောင်းကောက်သူမရှိသည့် အခြေအနေအထိ ဆိုးရွားနေသည်။ အရပ်သားထိခိုက်မှုစာရင်းကို ကောက်ယူရန်ပင် ခက်ခဲနေသည့် အခြေအနေနှင့် ပတ်သက်၍ အထက်ပါ ကာကွယ်ရေးတပ်ဖွဲ့ဝင်က ဆက်လက်ပြောဆိုသည်။ “အရပ်သား ထိခိုက်မှုအခြေနေတွေက ပြောဖို့ခက်ပါတယ်။ တချို့လူသူမသိဘဲ ပျောက်ဆုံးပြီးတော့မှ နောက်မှ အလောင်း ပြန်တွေ့တာတွေမျိုးတွေလည်း ရှိတာပေါ့။ ရမ်းသမ်းပစ်ခတ်မှုနဲ့ ထိခိုက်တာတွေကတော့ အရပ်သား တွေ မှန်းသိရက်နဲ့ ဘာလို့ တမင်ရည်ရွယ်ပြီးပစ်လည်းတော့မပြောတတ်ဘူးပေါ့ဗျာ” ဟု ၎င်းက ပြောသည်။ လက်ရှိတွင် တိုက်ပွဲများမှာ စတင်ချိန်ကလောက် မပြင်းထန်တော့သော်လည်း နှစ်ဖက်စစ်ရေး ဆက်လက် တင်း မာနေဆဲဖြစ်ပြီး စစ်ကော်မရှင်ဘက်က မြို့လက်မလွှတ်ရရေးအတွက် လက်နက်ကြီးများအပြင် လေကြောင်း တိုက်ခိုက်မှုများကိုပါ အသုံးပြု၍ ခုခံနေသည်ဟု ဆိုသည်။ အဆိုပါ တိုက်ပွဲအခြေအနေများကြောင့် လာမည့် အတန်းတင်စာမေးပွဲနှင့် မတ်လ ၁၁ ရက်မှ ၁၈ ရက်အထိ ကျင်းပမည့် တက္ကသိုလ်ဝင်တန်း ဖြေဆိုကြမည့် ကျောင်းသား၊ ကျောင်းသူများမှာ အခက်အခဲများစွာနှင့် ရင်ဆိုင် နေရကာ ၎င်းတို့၏ ပညာရေးနှင့် အသက်အန္တရာယ် လုံခြုံရေးအတွက် စိုးရိမ်မှုများ မြင့်တက်လျက်ရှိသည်။

တိုက်ပွဲဖြစ်နေသည့် ကသာမြို့တွင် ကျောင်းသားများအား ကျောင်းတက်ခိုင်းသဖြင့် အန္တရာယ် စိုးရိမ်နေရ

တိုက်ပွဲဖြစ်နေသည့် ကသာမြို့တွင် ကျောင်းသားများအား ကျောင်းတက်ခိုင်းသဖြင့် အန္တရာယ် စိုးရိမ်နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၉ ရ…

  • January 29, 2026
စစ်ကော်မရှင်တပ်က နေအိမ် ၃၀ ကျော်ကို မီးရှို့ ဖျက်ဆီး သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၉ ရက်။ မန္တလေးတိုင်း ညောင်ဦး မြို့နယ်အတွင်းရှိ ကျေးရွာ တရွာကို စစ်ကော်မရှင် စစ်ကြောင်းက ဝင်ရောက် မီးရှို့ရာ နေအိမ် ၃၀ ကျော် မီးလောင် ပြာကျ သွားခဲ့သည်ဟု ဒေသခံများက ပြောသည်။ ညောင်ဦးမြို့နယ်အတွင်းသို့ စစ်ကြောင်းထိုး ဝင်ရောက်လာသည့် စစ်ကော်မရှင် တပ်ဖွဲ့ဝင်များက ကျေးရွာများကို ဆက်တိုက်မီးရှို့ဖျက်ဆီးခဲ့ရာ တစ်ရက်အတွင်း ကျောက်ပြင်ကန်ကျေးရွာရှိ နေအိမ် ၃၀ ကျော် မီးလောင်ပြာကျခဲ့ကြောင်း ဒေသခံများက ပြောသည်။ ဇန်နဝါရီလ ၂၈ ရက်၊ နေ့လယ် ၃ နာရီခွဲအချိန်ခန့်တွင် အင်အား ၇၀ ခန့်ပါဝင်သည့် စစ်ကော်မရှင် စစ်ကြောင်း သည် ကျောက်ပြင်ကန်ကျေးရွာ အနောက်မြောက်ပိုင်းရှိ နေအိမ်များကို မီးရှို့ဖျက်ဆီးခဲ့ခြင်းဖြစ်ပြီး၊ နေအိမ် ၃၂ အိမ်ခန့် မီးလောင်ဆုံးရှုံးခဲ့ရသည်။ ဖြစ်စဉ်နှင့်ပတ်သက်၍ အသက် ၄၀ ခန့်ရှိ ကျောက်ပြင်ကန်ရွာသားတစ်ဦးက “စစ်ကြောင်းထိုးလာတာ ကြိုသိလို့ တစ်ရွာလုံး ညထဲကရှောင်နေကြတာ။ မနက် ၇ နာရီကျော်လောက်မှာ ရွာကိုရောက်ပြီး စတည်းချမွှေနေတာ။ ၃ နာရီခွဲလောက်မှာ မီးခိုးလုံးတွေတက်လာတော့ မီးရှို့ပြီဆိုတာသိတာ။ ပြန်ထွက်သွားပြီဆိုမှ လူငယ်တွေစုပြီး မီးသတ်ကြရတာ” ဟု ပြောသည်။ အဆိုပါ စစ်ကော်မရှင် စစ်ကြောင်းသည် ဇန်နဝါရီလ ၂၇ ရက်နေ့က ညောင်ဦး - ကျောက်ပန်းတောင်း ကားလမ်း၊ ရွှေလှိုင်းကျေးရွာမှ တစ်ဆင့် ရွှေစာရံဘုရားသို့ ကား ၃ စီးဖြင့် ရောက်ရှိလာခဲ့ခြင်းဖြစ်သည်။ ထိုမှတစ်ဆင့် ခြေလျင်စစ်ကြောင်းထိုးကာ ဇီးစမြင်ကျေးရွာတွင် ညအိပ်စခန်းချပြီးနောက်၊ နောက်တစ်နေ့နံနက် ၇ နာရီခွဲတွင် ကျောက်ပြင်ကန်ကျေးရွာသို့ ဝင်ရောက်လာခြင်း ဖြစ်သည်ဟု ဒေသခံများက ပြောသည်။ ၎င်းတို့သည် ကျေးရွာအတွင်း ချက်ပြုတ်စားသောက်ပြီး နေအိမ်များကို စိတ်ကြိုက်မွှေနှောက် ရှာဖွေမှုများ ပြုလုပ်ကာ စစ်ကြောင်းပြန်အထွက်တွင်မှ နေအိမ်များကို ရည်ရွယ်ချက်ရှိရှိ မီးရှို့ခဲ့ခြင်းဖြစ်သည်ဟု ဆိုသည်။ စစ်ကြောင်း ပြန်ထွက်သွားသော်လည်း ဒေသခံများမှာ ရွာအတွင်းသို့ ပြန်လည်ဝင်ရောက်ရန် စိုးရိမ်နေကြဆဲ ဖြစ်သည်။ ကျောက်ပြင်ကန်ရွာသားတစ်ဦးက “စစ်ကြောင်းမရှိတော့ပေမယ့် ရွာထဲကိုမဝင်ကြသေးဘူး။ တောထဲမှာပဲ နေကြတုန်းပဲ။ မီးလောင်ထားတဲ့အနံ့တွေက မခံနိုင်ဘူး။ ကြောက်တာလဲပါတာပေါ့။ ငြိမ်အောင်စောင့်ပြီး နေကြရတာ” ဟု ၎င်းတို့၏ လက်ရှိအခက်အခဲကို ပြောပြသည်။ စစ်ကော်မရှင် စစ်ကြောင်းသည် ကျောက်ပြင်ကန်ကျေးရွာမှ တစ်ဆင့် ဂျိုးကန်ကျေးရွာကိုဖြတ်၍ ကန်နီပေါက်ကျေးရွာဘက်သို့ ဆက်လက်ထွက်ခွာသွားကြသည်ဟု ဆိုသည်။ ထို့ပြင် ဇန်နဝါရီလ ၂၇ ရက်နေ့၊ နံနက်ပိုင်းကလည်း အဆိုပါစစ်ကြောင်းသည် ကျောက်ပြင်ကန်ကျေးရွာ အရှေ့တောင်ဘက်ရှိ မုန်တိုင်ကျေးရွာကို ဝင်ရောက်မီးရှို့ခဲ့သဖြင့် နေအိမ် ၃၀ ကျော် မီးလောင်ဆုံးရှုံးခဲ့ရသေး သည်။ လက်ရှိတွင် ညောင်ဦးမြို့နယ်အတွင်း စစ်ကော်မရှင် စစ်ကြောင်းများ၏ ဆက်တိုက်စစ်ကြောင်းထိုး မီးရှို့မှုများ ကြောင့် ကျေးရွာ အများအပြားမှ ဒေသခံထောင်နှင့်ချီကာ ဘေးလွတ်ရာ တောတောင်များအတွင်း တိမ်းရှောင်နေ ကြရပြီး အရေးပေါ်အကူအညီများ လိုအပ်လျက်ရှိသည်။

စစ်ကော်မရှင်တပ်က နေအိမ် ၃၀ ကျော်ကို မီးရှို့ ဖျက်ဆီး

စစ်ကော်မရှင်တပ်က နေအိမ် ၃၀ ကျော်ကို မီးရှို့ ဖျက်ဆီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၉ ရက်။  မန္တလေးတိုင်း ညောင်ဦး မြို့န…

  • January 29, 2026
ထိုင်းနိုင်ငံတွင် တောဆင်ရိုင်းကောင်ရေ ထိန်းချုပ်ရန် ပထမဆုံးအကြိမ် သန္ဓေတားဆေး စမ်းသပ်ထိုးနှံ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၉ ရက်။ ထိုင်းနိုင်ငံ အရှေ့ပိုင်း သစ်တောထူထပ်သော ဒေသများတွင် တောဆင်ရိုင်းများအား သားဆက်ခြားစေရန် သန္ဓေတားဆေး စမ်းသပ်ထိုးနှံသည့် စီမံကိန်းကို စတင်လိုက်ပြီဖြစ်ကြောင်း ထိုင်းသတင်းအေဂျင်စီ (TNA) က ထုတ်ပြန်ခဲ့သည်။ အာရှဆင်ရိုင်းများသည် မျိုးသုဉ်းပျောက်ကွယ်မည့် အန္တရာယ်ရှိသော သတ္တဝါများအဖြစ် သတ်မှတ်ခံထားရသော်လည်း၊ အဆိုပါဒေသ၌ ဆင်ကောင်ရေ အဆမတန် များပြားလာကာ ဒေသခံပြည်သူများအား အန္တရာယ်ဖြစ်စေသည့်အတွက် ယခုကဲ့သို့ စမ်းသပ်ဆောင်ရွက်ရခြင်း ဖြစ်သည်။ အချက်အလက်များအရ ထိုင်းနိုင်ငံ အရှေ့ဘက်ပိုင်း တောတောင်များရှိ တောဆင်ရိုင်းဦးရေသည် ဆယ်စုနှစ်တစ်ခုအတွင်း ၃၃၄ ကောင်မှ ၇၉၉ ကောင်အထိ တိုးပွားလာခဲ့ရာ ပျမ်းမျှအားဖြင့် နှစ်စဉ် ၈.၂ ရာခိုင်နှုန်းနှုန်းဖြင့် မြင့်တက်လာခြင်းဖြစ်သည်။ ထိုသို့ ဆင်ကောင်ရေ တိုးပွားလာမှုကြောင့် တောတွင်း၌ အစာရေစာ ရှားပါးလာပြီး ဆင်များသည် အစာရှာဖွေရန် လူနေရပ်ကွက်များအတွင်းသို့ ကျူးကျော်ဝင်ရောက်လာကြသည်။ ထိုသို့ လူနှင့်ဆင် ပဋိပက္ခဖြစ်ပွားမှုများကြောင့် ၂၀၁၂ ခုနှစ်မှ စတင်ကာ လူပေါင်း ၁၄၁ ဦး သေဆုံးခဲ့ရပြီး ဖြစ်သည်။ ယခု စမ်းသပ်လိုက်သော သန္ဓေတားဆေးမှာ ဆင်များကို သားကြောဖြတ်ခြင်း သို့မဟုတ် ခွဲစိတ်ကုသခြင်းမျိုး မဟုတ်ဘဲ ကိုယ်ဝန်မရအောင် တားဆီးပေးသည့် ကာကွယ်ဆေးအမျိုးအစား ဖြစ်သည်။ အဆိုပါဆေးအား တစ်ကြိမ်ထိုးနှံထားပါက ၇ နှစ်အထိ ကိုယ်ဝန်မရအောင် တားဆီးပေးနိုင်ပြီး ဆေးအာနိသင် ကုန်ဆုံးသွားပါကလည်း ဆင်များအနေဖြင့် မူလအတိုင်း ကိုယ်ဝန် ပြန်လည်ဆောင်နိုင်မည်ဖြစ်သည်။ ထို့အပြင် ဤကာကွယ်ဆေးကြောင့် ဆင်များ၏ ကျန်းမာရေး၊ နို့တိုက်ကျွေးမှုနှင့် အုပ်စုလိုက်နေထိုင်သည့် အမူအကျင့်များအပေါ် တစ်စုံတစ်ရာ ထိခိုက်မှုမရှိဟု ဆိုသည်။ ပထမဆုံးအကြိမ် စမ်းသပ်မှုအဖြစ် ပြီးခဲ့သည့် တနင်္လာနေ့ညက ထရတ် (Trat) ခရိုင်ရှိ Namtok Khlong Kaeo အမျိုးသားဥယျာဉ်တွင် ဆင်မကြီး ၃ ကောင်ကို စတင်ထိုးနှံခဲ့သည်။ ဆင်များအား ဘေးအန္တရာယ်မဖြစ်စေရန် မေ့ဆေးအသုံးပြုခြင်း မရှိဘဲ လေသေနတ် (Air rifle) ဖြင့် ဆေးမြှားပစ်ကာ ထိုးနှံခဲ့ခြင်းဖြစ်သည်။ အဆိုပါ စီမံကိန်းကို အစိုးရအာဏာပိုင်များနှင့် ချင်းမိုင်တက္ကသိုလ်မှ ပညာရှင်များက ပူးပေါင်းဆောင်ရွက်နေခြင်းဖြစ်ပြီး ဆေးထိုးနှံထားသော ဆင်များကို ၄၈ နာရီကြာ အနီးကပ်စောင့်ကြည့်သွားမည် ဖြစ်သည်။ ထို့အပြင် နောင် ၇ နှစ်တာကာလအတွင်း ဆေးအာနိသင် ထိရောက်မှုရှိမရှိ သိရှိနိုင်ရန် ၆ လတစ်ကြိမ် သွေးနှင့် မစင်များကို စစ်ဆေးသည့် ရေရှည်လေ့လာမှုများကိုလည်း ဆက်လက်ပြုလုပ်သွားမည်ဖြစ်ကြောင်း သိရသည်။ Photo - DNP News

ထိုင်းနိုင်ငံတွင် တောဆင်ရိုင်းကောင်ရေ ထိန်းချုပ်ရန် ပထမဆုံးအကြိမ် သန္ဓေတားဆေး စမ်းသပ်ထိုးနှံ

ထိုင်းနိုင်ငံတွင် တောဆင်ရိုင်းကောင်ရေ ထိန်းချုပ်ရန် ပထမဆုံးအကြိမ် သန္ဓေတားဆေး စမ်းသပ်ထိုးနှံ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၉ ရက…

  • January 29, 2026
ထီးချိုင့်တွင် မြို့သိမ်း တိုက်ပွဲများ တကျော့ပြန် ဖြစ်ပွား သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၉ ရက်။ စစ်ကိုင်းတိုင်းဒေသကြီး၊ ထီးချိုင့်မြို့တွင် မြို့သိမ်းတိုက်ပွဲများ တကျော့ပြန် စတင်နေပြီး ဧရာဝတီ တံတား အနီးနှင့် မြို့ပေါ်နေရာအချို့တွင် နှစ်ဖက်တိုက်ပွဲများ ပြင်းထန်နေကြောင်း တော်လှန်ရေးအင်အားစု များနှင့် နီးစပ်သူများက ပြောသည်။ ဇန်နဝါရီလ ၂၈ ရက်နေ့၊ နံနက်အစောပိုင်းမှစ၍ တော်လှန်ရေးတပ်ဖွဲ့များက မြို့ကိုထိန်းချုပ်နိုင်ရန် စနစ်တကျ အင်အားဖြည့်တင်းကာ ထိုးစစ်ဆင်လာခြင်းဖြစ်သည်။ လက်ရှိစစ်ရေးအခြေအနေနှင့် ပတ်သက်၍ တော်လှန်ရေးတပ်ဖွဲ့နှင့် နီးစပ်သူတစ်ဦးက “သူတို့ဘက်က တိုးလို့ လည်း မဟုတ်ဘူး။ ကိုယ့်ဘက်က ကပ်တာ။ မြို့သိမ်းဖြစ်မယ်။ ကိုယ့်ဘက်ကစနစ်တကျနဲ့အင်အားဖြည့်တာ။ တံတားပတ်ဝန်းကျင်နဲ့မြို့နေရာတချို့တွေမှာအဓိကဖြစ်နေတာဗျ” ဟု အခြေအနေကို ရှင်းပြသည်။ ကချင်ပြည် အစပ်တွင် တည်ရှိသည့် ထီးချိုင့်မြို့ကို ပြီးခဲ့သည့် ၂၀၂၃ ခုနှစ် နိုဝင်ဘာလအတွင်းကလည်း တော်လှန်ရေး အင်အားစုများက ပထမအကြိမ် မြို့သိမ်းတိုက်ပွဲ ဆင်နွှဲခဲ့ဖူးသည်။ ထိုစဉ်က မြို့၏နေရာ အတော်များများကို ထိန်းချုပ်နိုင်ခဲ့သော်လည်း စစ်ကော်မရှင်တပ်၏ လေကြောင်း တိုက်ခိုက်မှုနှင့် အရပ်သားနေအိမ်များကို ဦးတည်မီးရှို့ဖျက်ဆီးမှုများကြောင့် မြို့လုံးကျွတ်နီးပါး ပျက်စီးခဲ့ရကာ ပြန်လည်ဆုတ်ခွာခဲ့ရသည်။ ယခုအခါ မြို့သိမ်းတိုက်ပွဲပြင်းထန်နေသည့် ကသာမြို့နှင့် မဝေးကွာလှသော ထီးချိုင့်တွင် တိုက်ပွဲသံများ တစ်ကျော့ပြန် ထွက်ပေါ်လာခြင်းဖြစ်သည်။ ကသာမြို့မြစ်ကမ်းနဘေးရှိ ဒေသခံတစ်ဦးကလည်း “ကျနော်တို့က ကသာနယ်လို့သာပြောတာ ထီးချိုင့်နဲ့ ပိုနီး တယ်။ တအုန်းအုန်းနဲ့ အကျယ်ကြီးကို ကြားနေရတာ” ဟု ယမန်နေ့မှစ၍ ယနေ့အထိ တိုက်ပွဲသံများ ဆက် တိုက်ကြားနေရသည့် အပေါ် ပြောပြသည်။ စစ်ရေးလေ့လာသူများ၏ သုံးသပ်ချက်အရ ကသာနှင့် ထီးချိုင့်မြို့တို့သည် မန္တလေး - စစ်ကိုင်း - ဗန်းမော် လမ်း ကြောင်း တစ်လျှောက် ရေကြောင်း၊ ကုန်းလမ်းကြောင်းများဖြင့် ချိတ်ဆက်နိုင်သည့် ဗျူဟာမြောက် ဒေသများ ဖြစ်ခြင်းကြောင့် နှစ်ဖက်စစ်ရေးအရ အလွန်အရေးပါသော နေရာများဖြစ်သည်။ လက်ရှိတွင် တိုက်ပွဲအတွင်း နှစ်ဖက်ထိခိုက်သေဆုံးမှု အခြေအနေများကိုမူ အတည်မပြုနိုင်သေးကြောင်း မြေပြင်သတင်းရင်းမြစ်က ပြောသည်။ ဓါတ်ပုံ - Tigyaing Revolution (TR)

ထီးချိုင့်တွင် မြို့သိမ်း တိုက်ပွဲများ တကျော့ပြန် ဖြစ်ပွား

ထီးချိုင့်တွင် မြို့သိမ်း တိုက်ပွဲများ တကျော့ပြန် ဖြစ်ပွား သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၉ ရက်။  စစ်ကိုင်းတိုင်းဒေသကြီး…

  • January 29, 2026
×Close