သတင်း

အမေရိကန်က တောင်ကိုရီးယားသွင်းကုန်များအပေါ် အခွန်တိုးမြှင့် သတင်းနှင့် မီဒီယာ ကွန်ရက်။
 ၂၀၂၆ ခုနှစ်၊ ဇန္နဝါရီလ ၂၇ ရက်။ အမေရိကန်သမ္မတ ဒေါ်နယ်ထရန့်သည် တောင်ကိုရီးယားနိုင်ငံမှ တင်သွင်းသော ကုန်ပစ္စည်းများအပေါ် သွင်းကုန်ခွန်ကို ၁၅ ရာခိုင်နှုန်းမှ ၂၅ ရာခိုင်နှုန်း အထိ တိုးမြှင့်ကောက်ခံမည်ဟု ကြေညာလိုက်သည်။ တောင်ကိုရီးယားသည် ပြီးခဲ့သည့်နှစ်က ချုပ်ဆိုခဲ့သော ကုန်သွယ်ရေးသဘောတူညီချက်ပါ ကတိကဝတ်များကို လိုက်နာခြင်းမရှိ၍ ယခုလို တိုးမြှင့်ရခြင်း ဖြစ်သည်ဟု သမ္မတထရန့်က ဆိုသည်။ အထူးသဖြင့် အမေရိကန်တွင် ဒေါ်လာ ၃၅၀ ဘီလီယံ ရင်းနှီးမြှုပ်နှံမည်ဆိုသည့် အစီအစဉ်ကို ကိုရီးယားလွှတ်တော်ဘက်က အတည်ပြုရန် နှောင့်နှေးနေခြင်းအပေါ် သမ္မတထရန့်က မကျေမနပ် ဖြစ်နေခြင်းဖြစ်သည်။ တောင်ကိုရီးယားအစိုးရကမူ ယခုကဲ့သို့ အခွန်တိုးမြှင့်မှုကို အမေရိကန်ဘက်က ကြိုတင်အကြောင်းကြားခြင်း မရှိခဲ့ကြောင်း ပြောဆိုထားပြီး၊ ကိုရီးယားစက်မှုဝန်ကြီးသည် ဝါရှင်တန်မြို့သို့ သွားရောက်၍ အမေရိကန် ကူးသန်းရောင်းဝယ်ရေးဝန်ကြီးနှင့် အရေးပေါ် တွေ့ဆုံဆွေးနွေးရန် စီစဉ်နေကြောင်း သိရှိရပါသည်။ အမေရိကန်တွင် ရင်းနှီးမြှုပ်နှံမှုနှင့် ပတ်သက်၍ တောင်ကိုရီးယား လွှတ်တော်တွင် လာမည့် ဖေဖော်ဝါရီလ အတွင်း အတည်ပြုရန် စီစဉ်ထားသည်။

အမေရိကန်က တောင်ကိုရီးယားသွင်းကုန်များအပေါ် အခွန်တိုးမြှင့်

အမေရိကန်က တောင်ကိုရီးယားသွင်းကုန်များအပေါ် အခွန်တိုးမြှင့်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၇ ရက်။  အမေရိကန်သမ္မတ ဒေါ်နယ်ထရန့်…

  • January 27, 2026
Starlink နဲ့ အပြိုင် ဖြစ်လာနိုင်မယ့် ဂြိုလ်တု အင်တာနက် ဝန်ဆောင်မှုကို Blue Origin စတင်မည် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၇ ရက်။ ကမ္ဘာ့ အချမ်းသာဆုံး သူဌေးကြီး တစ်ဦး ဖြစ်ပြီး Amazon ကုမ္ပဏီကို ထူထောင်ခဲ့တဲ့ Jeff Bezos ဟာ Star Link နဲ့ ပြိုင်ဘက် ဖြစ်လာနိုင်မယ့် Tera Wave ဂြိုလ်တု အင်တာနက် ဝန်ဆောင်မှုကို စတင်လုပ်ဆောင်တော့မယ်လို့ ကြေညာလိုက်ပါတယ်။ သူတည်ထောင်ထားတဲ့ Blue Origin ကုမ္ပဏီဟာ TeraWave လို့ အမည်ပေးထားတဲ့ ဂြိုဟ်တုအင်တာနက် ကွန်ရက်တစ်ခုကို တည်ဆောက်သွားမယ်လို့ ဗုဒ္ဓဟူးနေ့က ကြေညာခဲ့ပါတယ်။ ဒီဝန်ဆောင်မှုကို အဓိကအားဖြင့် စီးပွားရေးလုပ်ငန်းကြီးများ၊ Data Center များနဲ့ အစိုးရဌာနတွေကို ပစ်မှတ်ထား ပံ့ပိုးပေးသွားမှာဖြစ်ပါတယ်။ စုစုပေါင်း ဂြိုဟ်တု ၅,၄၀၈ စင်း ကို အာကာသထဲ လွှတ်တင်ဖို့ စီစဉ်ထားပါတယ်။ အချက်အလက်ပေးပို့မှုနှုန်းဟာ တစ်စက္ကန့်ကို 6 Terabits (6 Tbps) အထိ မြန်ဆန်မယ်လို့ ကုမ္ပဏီက ဆိုပါတယ်။ ဆိုလိုတာက အင်တာနက်က ရုပ်ရှင် တစ်ခုကို ၁ စက္ကန့်အတွင်း ဒေါင်းလုဒ် လုပ်နိုင်တဲ့ မြန်နှုန်း ဖြစ်ပါတယ္။ ပထမဆုံး ဂြိုဟ်တုအုပ်စုကိုတော့ ၂၀၂၇ ခုနှစ်၊ စတုတ္ထသုံးလပတ် မှာ စတင်လွှတ်တင်ဖို့ ရည်မှန်းထားပါတယ်။ ဒီဝန်ဆောင်မှုဟာ လက်ရှိ ဂြိုဟ်တု ၉,၀၀၀ ကျော်နဲ့ သုံးစွဲသူ ၉ သန်းရှိတဲ့ Elon Musk ရဲ့ Starlink ကို အဓိက ယှဉ်ပြိုင်မှာဖြစ်သလို၊ Jeff Bezos ကိုယ်တိုင် တည်ထောင်ခဲ့တဲ့ Amazon ကုမ္ပဏီရဲ့ Leo  အင်တာနက်ဝန်ဆောင်မှုနဲ့လည်း ပြိုင်ဘက် ဖြစ်လာမှာပါ။ Blue Origin ဟာ အာကာသခရီးသွားလုပ်ငန်းနဲ့ ဒုံးပျံလွှတ်တင်ရေးကို အဓိကလုပ်ဆောင်နေတဲ့ ကုမ္ပဏီဖြစ်ပါတယ်။ ပြီးခဲ့တဲ့နှစ် နိုဝင်ဘာလအတွင်းမှာ NASA ရဲ့ အာကာသယာဉ်နှစ်စင်းကို New Glenn ဒုံးပျံနဲ့ အောင်မြင်စွာ လွှတ်တင်နိုင်ခဲ့သလို၊ ဒုံးပျံတွန်းကန်စက် (Booster) ကိုလည်း မြေပြင်ပေါ်သို့ အောင်မြင်စွာ ပြန်လည်ဆင်းသက်နိုင်ခဲ့တဲ့ မှတ်တိုင်တစ်ခုကို စိုက်ထူနိုင်ခဲ့ပါတယ်။

Starlink နဲ့ အပြိုင် ဖြစ်လာနိုင်မယ့် ဂြိုလ်တု အင်တာနက် ဝန်ဆောင်မှုကို Blue Origin စတင်မည်

Starlink နဲ့ အပြိုင် ဖြစ်လာနိုင်မယ့် ဂြိုလ်တု အင်တာနက် ဝန်ဆောင်မှုကို Blue Origin စတင်မည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၇ ရက်။&…

  • January 27, 2026
ကျေးရွာ အများစု ချန်လှပ်ခံရသည့် ရွေးကောက်ပွဲ ကိုယ်စားပြုမှု မရှိဟု ရှမ်းမြောက် ဒေသခံများ ပြော သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၆ ရက်။ ကျေးရွာအများစု ချန်လှပ်ခံရသည့် ရှမ်းမြောက်တွင် ကျင်းပခဲ့သည့် ရွေးကောက်ပွဲသည် ကိုယ်စားပြုမှုမရှိဟု ဒေသခံများနှင့် ကိုယ်စားလှယ်လောင်းများက ပြောသည်။ စစ်ကောင်မရှင်၏ အပိုင်း (၃) ရွေးကောက်ပွဲကို ရှမ်းပြည် မြောက်ပိုင်းရှိ ကျောက်မဲ၊ သီပေါနှင့် မက်မန်းမြို့နယ် များတွင် ဇန်နဝါရီလ ၂၅ ရက်နေ့က ကျင်းပခဲ့ကြသည်။ သို့သော် ကျောက်မဲမြို့နယ်ရှိ ကျေးရွာအုပ်စု အများစုမှာ ရွေးကောက်ပွဲ တွင် ပါဝင်ခွင့်မရဘဲ ချန်လှပ်ခံထားရ သည့်အတွက် ကိုယ်စားပြုမှုမရှိသလို တရားမျှတမှုလည်း ကင်းမဲ့နေကြောင်း ကိုယ်စားလှယ်လောင်းများနှင့် ဒေသခံများက ဝေဖန်လိုက်သည်။ ကျောက်မဲမြို့နယ်တွင် ကျေးရွာအုပ်စုပေါင်း ၈၁ အုပ်စု ရှိသည့်အနက် မြို့ပေါ်ရပ်ကွက် ၉ ခုနှင့် ကျေးရွာအုပ်စု ၅ အုပ်စု (စုစုပေါင်း၏ ၆ ရာခိုင်နှုန်းခန့်) တွင်သာ စစ်ကော်မရှင်က မဲရုံ ၂၅ ရုံဖြင့် ရွေးကောက်ပွဲ ကျင်းပနိုင်ခဲ့ခြင်း ဖြစ်သည်။ အထူးသဖြင့် ရှမ်းတိုင်းရင်းသားအများစု နေထိုင်ရာ ကျေးရွာများမှာ ရွေးကောက်ပွဲကျင်းပသည့် နယ်မြေအတွင်း မပါဝင်ခဲ့ပေ။ ယင်းအခြေအနေနှင့် ပတ်သက်၍ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) နှင့် နီးစပ်သူတစ်ဦးက “အခုကျင်းပတဲ့ ရွေးကောက်ပွဲမှာ ရှမ်းတိုင်းရင်းသားတွေ အများဆုံးနေထိုင်တဲ့ ရွာတွေ မပါဝင်ဘူးပေါ့ဗျာ။ ဒါကြောင့် ဒီရွေးကောက်ပွဲဟာ ဒေသခံတွေကို ကိုယ်စားပြုမှုမရှိသလို တရားမျှတမှုလည်း မရှိပါဘူး" ဟု သုံးသပ် ပြောဆိုသည်။ ၁၀၂၇ စစ်ဆင်ရေးအတွင်း TNLA ထိန်းချုပ်မှုအောက် ရောက်ရှိခဲ့သည့် ကျောက်မဲမြို့ကို စစ်တပ်က ၂၀၂၅ ခုနှစ် အောက်တိုဘာလတွင် ပြန်လည်သိမ်းယူခဲ့သော်လည်း မြေပြင်စိုးမိုးမှုမှာ မြို့ပေါ်အနီးတဝိုက်တွင်သာ ရှိနေသည်။ တိုက်ပွဲများကြောင့် စစ်ဘေးရှောင် နေရသူများမှာလည်း နေရပ်သို့ ပြန်မလာနိုင်သေးဘဲ ကျန်ရှိနေသည့် ဒေသခံများမှာလည်း ရွေးကောက်ပွဲအပေါ် စိတ်ဝင်စားမှု ကင်းမဲ့နေသည်ဟု ဆိုကြသည်။ ကျောက်မဲမြို့ခံတစ်ဦးက “မြို့ထဲမှာ မဲလာပေးတဲ့သူက လက်ချိုးရေလို့ရတယ်။ မဲရုံပိတ်ခါနီးတဲ့အထိ တစ် ယောက်စ နှစ်ယောက်စပဲ လာကြတာ။ စစ်တပ်ကတော့ မဲပေးသူ ၅ သောင်းကျော်ရှိတယ်လို့ ထုတ်ပြန် ထားပေမဲ့ လက်တွေ့မှာတော့ မဲရုံတွေက ခြောက်ကပ်နေတာပါ။ လူတွေက မဲပေးဖို့ထက် လုံခြုံရေးအတွက်ပဲ စိုးရိမ်နေကြတာ” ဟု ပြောသည်။ သီပေါမြို့နယ်တွင်လည်း မဲရုံ ၄၁ ရုံဖွင့်လှစ်ကာ မဲပေးပိုင်ခွင့်ရှိသူ ၆ သောင်းကျော်ရှိသည်ဟု ဆိုသော်လည်း လက်တွေ့တွင် မဲပေးသူ မရှိသလောက် နည်းပါးခဲ့ကြောင်း မြို့ခံများက အတည်ပြုသည်။ ကျောက်မဲမြို့နယ်၏ လွှတ်တော်ကိုယ်စားလှယ်နေရာများတွင် စစ်တပ်ကျောထောက်နောက်ခံပြု ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ (USDP) က နေရာအများစုတွင် ပြိုင်ဘက်မရှိ အလိုအလျောက် အနိုင်ရထားပြီး ဖြစ်သည်။ ပြည်သူ့လွှတ်တော်နေရာတွင် USDP နှင့် SNDP (ကျားဖြူ) ပါတီတို့သာ ယှဉ်ပြိုင်ပြီး ပြည်နယ်လွှတ်တော်နေရာ တွင်မူ USDP တစ်ပါတီတည်းသာ ဝင်ရောက်ယှဉ်ပြိုင်ခဲ့ခြင်း ဖြစ်သည်။ ဓါတ်ပုံ - ကျောက်မဲ (ပြန်/ဆက်)

ကျေးရွာ အများစု ချန်လှပ်ခံရသည့် ရွေးကောက်ပွဲ ကိုယ်စားပြုမှု မရှိဟု ရှမ်းမြောက် ဒေသခံများ ပြော

ကျေးရွာ အများစု ချန်လှပ်ခံရသည့် ရွေးကောက်ပွဲ ကိုယ်စားပြုမှု မရှိဟု ရှမ်းမြောက် ဒေသခံများ ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၆ ရ…

  • January 26, 2026
လက်နက်ကြီး ပစ်ခတ်မှုများကြောင့် ဖားကန့်ရွေးကောက်ပွဲ မဲပေးသူ နည်းပါး သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၆ ရက်။ ကချင်ပြည်၊ ဖားကန့်မြို့တွင် ဇန်နဝါရီလ ၂၅ ရက်နေ့က ကျင်းပခဲ့သည့် စစ်ကော်မရှင်၏ အပိုင်း (၃) ရွေးကောက် ပွဲသည် မြို့ပေါ်တွင် လက်နက်ကြီးများ ကျရောက်ပေါက်ကွဲမှုများကြောင့် မဲလာပေးသူမရှိဘဲ တိတ်ဆိတ်စွာ ပြီးဆုံးသွားခဲ့ကြောင်း ဒေသခံများက ပြောသည်။ စစ်ကော်မရှင်သည် ရွေးကောက်ပွဲ ကျင်းပနိုင်ရန် ဖားကန့်မြို့အဝင်အထွက် တံတားများကို ဇန်နဝါရီ ၂၃ ရက်နေ့ ကတည်းက ပိတ်ဆို့ကာ ဗျူဟာကုန်းအနီးရှိ ရပ်ကွက် (၄) ခုတွင် မဲရုံများ ပြင်ဆင်ခဲ့သော်လည်း မြေပြင်တွင် မဲပေးမည့်သူမရှိဘဲ ဝန်ထမ်းအချို့သာ ပေးခဲ့ကြသည်ဟု ဆိုသည်။ ဖားကန့်မြို့ခံတစ်ဦးက မြေပြင်အခြေအနေကို “မဲရုံတွေကတော့ ဖွင့်ထားတာပဲ၊ ဒါပေမဲ့ တစ်မြို့လုံးက ဘယ်သူ မှလည်း မဲသွားမပေးဘူး၊ အိမ်ထဲမှာပဲ အောင်းနေကြတာ။ အပြင်မှာလည်း လက်နက်ကြီးသံတွေက လည်း ကြားနေရတာဆိုတော့ ဘယ်သူက သွားပေးရဲမှာလဲ။ ဝန်ထမ်းအချင်းချင်းပဲ ပေးနေတာ တွေ့ရတယ်” ဟု ပြောသည်။ ရွေးကောက်ပွဲကျင်းပချိန်တွင် ဖားကန့်ဗျူဟာကုန်းနှင့် ရဲစခန်းဘက်မှ လက်နက်ကြီးများ တရစပ်ပစ်ခတ်ခဲ့သလို၊ ကချင်လွတ်လပ်ရေး တပ်မတော် KIA နှင့် KPDF ပူးပေါင်းတပ်ဖွဲ့များဘက်ကလည်း မဲရုံများရှိရာဘက်သို့ ဒရုန်းဗုံးများဖြင့် ပြန်လည်တိုက်ခိုက်ခဲ့ခြင်းကြောင့် တိုက်ပွဲများ ပြင်းထန်ခဲ့သည်။ မြေပြင်၌ ကူညီပေးနေသူတစ်ဦးက “လက်နက်ကြီးကျည်က မြို့ပေါ်ရပ်ကွက်တွေထဲ ကျတာ။ တောင်ပြိုရွာမှာ တစ်ယောက်၊ ဆိပ်မူမှာ နှစ်ယောက် ထိတယ်။ မြို့ပေါ်မှာလည်း ထိတာရှိတော့ အားလုံးပေါင်း ၅ ယောက်ထက် မနည်း ဒဏ်ရာရထားတယ်။ အဲဒီထဲက ၃ ယောက်ကတော့ တော်တော်စိုးရိမ်ရလို့ ခွဲစိတ်ခန်းဝင်နေရတယ်” ဟု ပြောသည်။ ရွေးကောက်ပွဲကျင်းပနိုင်ရန် မြို့ပေါ်ရှိ လမ်းဆုံလမ်းခွများနှင့် အချက်အချာကျသော နေရာများတွင် လုံခြုံရေး အင်အား အလုံးအရင်းဖြင့် ချထားကာ စစ်ဆေးမှုများ တင်းကျပ်ထားသော်လည်း၊ မြေပြင်တွင် လက်နက်ကြီး သံများနှင့် တိုက်ပွဲများ ဆက်တိုက်ကြားနေရသည်ဟု ဆိုကြသည်။ ထို့ပြင် မြို့ခံများကမူ ၎င်းတို့၏ ဆန္ဒအစစ်အမှန်ကို ကိုယ်စားမပြုသည့် ဤရွေးကောက်ပွဲအပေါ် စိတ်ဝင်စားမှု ကင်းမဲ့နေကြသည်ကို တွေ့ရှိရသည်ဟု မြေပြင်သတင်းရင်းမြစ်က ပြောသည်။ စစ်ကော်မရှင်ကမူ ဖားကန့်မြို့တွင် ပြည်သူများ အေးချမ်းတည်ငြိမ်စွာ မဲပေးခဲ့ကြသည်ဟု ထုတ်ပြန်ထားသော် လည်း၊ လက်တွေ့တွင် ဖားကန့်ပြည်သူများမှာ မဲမပေးဘဲ နေအိမ်များ၌သာ နေထိုင်ခြင်းဖြင့် ရွေးကောက်ပွဲကို ဆန့်ကျင်ခဲ့ကြကြောင်း မြေပြင်သတင်းရင်းမြစ်က ပြောသည်။ ဖားကန့်မြို့နယ်အတွင်း စစ်ကောင်မရှင်၏ အပိုင်း (၃) ရွေးကောက်ပွဲ အတွက် မဲရုံပေါင်း (၁၉) ရုံကို ဇန်နဝါရီလ ၂၅ ရက်နေ့ နံနက် ၆ နာရီမှစတင်ကာ ဖွင့်လှစ်ခဲ့သည်ဟု ထုတ်ပြန်ထားသည်။ စစ်ကော်မရှင်သည် ဖားကန့်မြို့ပေါ်ရှိ စုပေါင်းရုံး၊ အခြေခံပညာအထက်တန်းကျောင်းနှင့် ငှက်ပျောတောကျောင်း တို့တွင် မဲရုံအမှတ် (၃၄) မှ (၄၉) အတွင်းရှိ မဲရုံများကိုလည်းကောင်း၊ ကာမိုင်းမြို့နှင့် လီဒိုလမ်းကြောရှိ ကျေးရွာ များဖြစ်သော ဒွန်ဘုန်းခ၊ လဝါး၊ ဒွန်ဘန်၊ မန်ပန်၊ နောင်းမြီ၊ ဝါရာဇွပ်၊ ရှဒူဇွပ်၊ ကောင်ရာနှင့် နန့်ယားကျေးရွာ အုပ်စုတို့တွင် မဲရုံအမှတ် (၁၅) မှ (၂၉) အထိ မဲရုံများကိုလည်းကောင်း စုစုပေါင်း (၁၉) ရုံ ဖွင့်လှစ်ခဲ့သည်ဟု ထုတ်ပြန်ထားသည်။ သို့သော်လည်း ရွေးကောက်ပွဲ ကျင်းပချိန်တွင် ဖားကန့်ဗျူဟာကုန်းနှင့် ရဲစခန်းအနီး တစ်ဝိုက်အပါအဝင် မဲရုံများ ပြင်ဆင်ထားရာ မြို့ပေါ်ရပ်ကွက်များအတွင်း လက်နက်ကြီးများ တရစပ်ပစ်ခတ်မှုနှင့် ပေါက်ကွဲမှုများ ဖြစ်ပွားခဲ့သည်။ ထို့ကြောင့် မြို့ပေါ်ရပ်ကွက်များနှင့် တောင်ပြို၊ ဆိပ်မူကျေးရွာတို့တွင် လက်နက်ကြီးကျည် ကျရောက် ပေါက်ကွဲမှု ကြောင့် ဒေသခံ ၅ ဦးထက်မနည်း ပြင်းထန်စွာဒဏ်ရာရရှိခဲ့သည်။    

လက်နက်ကြီး ပစ်ခတ်မှုများကြောင့် ဖားကန့်ရွေးကောက်ပွဲ မဲပေးသူ နည်းပါး

လက်နက်ကြီး ပစ်ခတ်မှုများကြောင့် ဖားကန့်ရွေးကောက်ပွဲ မဲပေးသူ နည်းပါး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၆ ရက်။  ကချင်ပြည်၊ ဖာ…

  • January 26, 2026
ရွေးကောက်ပွဲအပေါ် နိုင်ငံတကာ အသိအမှတ်ပြုမှု အရေးမကြီးဟု ဗိုလ်ချုပ်မှူးကြီးပြော သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၆ ရက်။ စစ်ကော်မရှင်က ဦးစီးကျင်းပနေသည့် ရွေးကောက်ပွဲအပေါ် နိုင်ငံတကာက အသိအမှတ်ပြုခြင်း ရှိ၊ မရှိထက် မဲလာပေးသည့် ပြည်သူများကိုသာ အသိအမှတ်ပြုကြောင်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုလိုက်သည်။ မန္တလေးမြို့၊ ချမ်းမြသာစည်မြို့နယ်အတွင်း ကျင်းပနေသည့် အပိုင်း (၃) ရွေးကောက်ပွဲ မဲရုံများသို့ သွားရောက် ကြည့်ရှုစဉ် သတင်းမီဒီယာများနှင့် တွေ့ဆုံရာတွင် စစ်ခေါင်းဆောင်က ထည့်သွင်းပြောဆိုခဲ့ခြင်း ဖြစ်သည်။ ၎င်းက ရွေးကောက်ပွဲအပေါ် နိုင်ငံတကာ၏ ဝေဖန်ကန့်ကွက်မှုများကို ပယ်ချခဲ့ပြီး မြန်မာ့ပြည်တွင်းရေးအဖြစ်သာ ရှုမြင်ကြောင်း ဆိုသည်။ "မြန်မာပြည်ထဲက ပြည်သူတွေ မဲပေးတာလေ။ သူတို့အပြင်က လူတွေ မဲပေးတာ မဟုတ်ဘူး။ ဒါကို နိုင်ငံခြားက အသိအမှတ်ပြုတာ၊ မပြုတာ ကျွန်တော်တို့ နားမလည်(ပေးနိုင်)ဘူး။ ပြည်သူက မဲပေးတာ ကျွန်တော်တို့ အသိအမှတ်ပြုမယ်။ ဒီလိုပဲ သွားရမယ်" ဟု ဗိုလ်ချုပ်မှူးကြီး မင်းအောင်လှိုင်က ပြောသည်။ ထို့ပြင် အပိုင်း ၁ နှင့် ၂ ရွေးကောက်ပွဲများတွင် စစ်တပ်ကျောထောက်နောက်ခံပြု ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) က အပြတ်အသတ် အနိုင်ရနေခြင်းမှာ တပ်နှင့် နီးစပ်၍ မဟုတ်ဘဲ ပြည်သူက ပေးချင်သည့်သူကို ပေးခြင်းသာဖြစ်ကြောင်း ၎င်းက ခုခံပြောဆိုခဲ့သည်။ မဲလာမပေးသူများနှင့် ပတ်သက်၍မူ ၎င်းတို့နှစ်သက်သည့် ကိုယ်စားလှယ်မပါခြင်း သို့မဟုတ် လုံခြုံရေး အခြေအနေကြောင့် ဖြစ်နိုင်ကြောင်း သုံးသပ်ခဲ့သည်။ "လာပေးတဲ့သူတွေက သူတို့ ထောက်ခံချင်တဲ့ လူတွေပါလို့ မဲလာပေးတာ။ သူတို့ ထောက်ခံချင်တဲ့ လူတွေ မပါဘူးဆိုရင် မဲလာပေးမှာ မဟုတ်ဘူး" ဟု ၎င်းက ဆက်လက်ပြောဆိုသည်။ စစ်ခေါင်းဆောင်က ထိုသို့ပြောဆိုနေသော်လည်း အာဆီယံကမူ ဤရွေးကောက်ပွဲရလဒ်ကို အသိအမှတ် ပြုမည် မဟုတ်ကြောင်းနှင့် လေ့လာသူများ စေလွှတ်မည်မဟုတ်ကြောင်း ထုတ်ဖော်ပြောဆိုထားသည်။ ဇန်နဝါရီလ ၂၅ ရက်နေ့က ကျင်းပသည့် အပိုင်း (၃) ရွေးကောက်ပွဲကို နိုင်ငံအနှံ့ မြို့နယ် ၆၁ မြို့နယ်တွင် ပြုလုပ် နေခြင်းဖြစ်ပြီး မန္တလေးတိုင်းအတွင်းရှိ ချမ်းမြသာစည်၊ ပုသိမ်ကြီးနှင့် မြင်းခြံ အပါအဝင် ၈ မြို့နယ် ပါဝင်သည်။ သို့သော်လည်း နယ်မြေမတည်ငြိမ်သည့် မိုးကုတ်၊ စဉ့်ကူးနှင့် နွားထိုးကြီးမြို့နယ်များတွင်မူ ရွေးကောက်ပွဲ ကျင်းပနိုင်ခြင်း မရှိကြောင်း မြေပြင်သတင်းရင်းမြစ်များက ပြောသည်။ မြေပြင်အခြေအနေတွင်မူ ဖားကန့်ကဲ့သို့သော မြို့နယ်များ၌ မဲရုံများ ခြောက်ကပ်နေပြီး တိုက်ပွဲများကြောင့် ဒေသခံများ ဘေးလွတ်ရာ ရှောင်တိမ်းနေရသည့် အခြေအနေများ ရှိနေကြောင်း ဒေသတွင်းသတင်းရင်းမြစ်များ က ပြောသည်။

ရွေးကောက်ပွဲအပေါ် နိုင်ငံတကာ အသိအမှတ်ပြုမှု အရေးမကြီးဟု ဗိုလ်ချုပ်မှူးကြီးပြော

ရွေးကောက်ပွဲအပေါ် နိုင်ငံတကာ အသိအမှတ်ပြုမှု အရေးမကြီးဟု ဗိုလ်ချုပ်မှူးကြီးပြော  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၆ ရက်။  စ…

  • January 26, 2026
အမေရိကန် တရားရုံးတစ်ခုက မြန်မာနိုင်ငံသားများအပေါ် ပြည်နှင်ဒဏ်ပေးခြင်းမှ အကာအကွယ်ပေးမှုကို သက်တမ်းတိုး သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၆ ရက်။ အမေရိကန်ရောက် မြန်မာနိုင်ငံသားများအား ပြည်နှင်ဒဏ်ပေးခြင်းမှ အကာအကွယ်ပေးထားသည့် ယာယီ ကာကွယ်မှု အခြေအနေ Temporary Protected Status (TPS) အစီအစဉ်ကို ရပ်ဆိုင်းရန် ထရန့်အစိုးရ၏ ကြိုးပမ်းမှုကို အမေရိကန်ဖက်ဒရယ်တရားသူကြီးတစ်ဦးက တားမြစ်ပိတ်ပင်လိုက် သည်။ အမေရိကန်ပြည်ထောင်စုသို့ ရောက်ရှိနေသည့် မြန်မာရွှေ့ပြောင်းနေထိုင်သူ ၃,၆၀ဝ ကျော်အား ပြည်နှင်ဒဏ်ပေးခြင်းမှ အကာအကွယ်ပေးထားသည့် အစီအစဉ်ကို ရပ်ဆိုင်းရန် ထရန့်အစိုးရ၏ ဆုံးဖြတ်ချက်ကို အမေရိကန်ဖက်ဒရယ်တရားသူကြီးတစ်ဦးက ပိတ်ပင်လိုက်ကြောင်း ဒေသတွင်းသတင်းဌာနများက ဖော်ပြခဲ့ကြသည်။ အမေရိကန် ပြည်ထောင်စု အီလီနွိုက်ပြည်နယ်မှ တရားသူကြီး မက်သရူး ကန်နယ်လီ (Matthew Kennelly) က စာမျက်နှာ ၅၇ မျက်နှာပါရှိသည့် ဆုံးဖြတ်ချက်တစ်ရပ်ကို ထုတ်ပြန်ခဲ့ခြင်း ဖြစ်သည်။ ပြည်တွင်းလုံခြုံရေးဝန်ကြီး ခရစ္စတီနိုမ် (Kristi Noem) ၏ TPS ရပ်ဆိုင်းရန် ဆုံးဖြတ်ချက်သည် မြန်မာနိုင်ငံအတွင်း ဖြစ်ပွားနေသည့် လက်ရှိအခြေအနေများကို လုံလောက်စွာ ထည့်သွင်းစဉ်းစားရန် ပျက်ကွက်ခဲ့ကြောင်း ၎င်းက ထောက်ပြခဲ့သည်။ ဝန်ကြီး ခရစ္စတီ နိုမ်က မြန်မာနိုင်ငံ၏ အခြေအနေများမှာ တိုးတက်ကောင်းမွန်လာသဖြင့် နေရပ်ပြန်ပို့ရန် သင့်တော်ပြီဟု ခုခံပြောဆိုခဲ့သော်လည်း၊ အခြားအစိုးရအရာရှိများ၏ အစီရင်ခံစာများတွင်မူ မြန်မာနိုင်ငံအတွင်း လေကြောင်းတိုက်ခိုက်မှုများ၊ လက်နက်ကြီးများဖြင့် ပစ်ခတ်မှုများ၊ ကျေးရွာများအား မီးရှို့ဖျက်ဆီးမှုများနှင့် လူသားချင်းစာနာထောက်ထားမှုဆိုင်ရာ လိုအပ်ချက်များ အလွန်မြင့်မားနေကြောင်း ဖော်ပြထားသည်ဟု တရားသူကြီးက ရေးသားခဲ့သည်။ ဝန်ကြီးနိုမ်၏ လုပ်ဆောင်ချက်မှာ မြန်မာနိုင်ငံ၏ အခြေအနေ ပြောင်းလဲမှုအပေါ် အခြေခံခြင်းထက် ၎င်း၏ မူဝါဒဖြစ်သော လူဝင်မှုကြီးကြပ်ရေးကို ကန့်သတ်ရန်နှင့် TPS အစီအစဉ်များကို ယေဘုယျအားဖြင့် ဖျက်သိမ်းရန်ဟူသော ပုဂ္ဂိုလ်ရေး ရည်မှန်းချက်ကို ရှေ့တန်းတင်ခဲ့ခြင်းဖြစ်ကြောင်း တရားသူကြီးက စွပ်စွဲထားသည်။ ထို့ကြောင့် တရားသူကြီးက ပြည်တွင်း လုံခြုံရေး ဝန်ကြီးဌာန၏ TPS ရပ်ဆိုင်းရန် ဆုံးဖြတ်ချက်ကို ဆိုင်းငံ့ထားရန် ဆုံးဖြတ်ခဲ့သည်။ သို့ဖြစ်ရာ နောက်ထပ် တစ်စုံတစ်ရာ အမိန့်ချမှတ်ခြင်းမပြုမီ သို့မဟုတ် ဝန်ကြီးဌာနက အယူခံဝင်ပြီး အယူခံ နိုင်သွားခြင်း မရှိပါက လအနည်းငယ် သို့မဟုတ် တစ်နှစ် ကျော်အချိန်ထိ မြန်မာနိုင်ငံသား ၃၆၀၀ ခန့်မှာ TPS ကာကွယ်မှုကို ဆက်လက် ရရှိနေမည်ဖြစ်သည်။   သို့သော်လည်း မြန်မာနိုင်ငံ၏ အခြေအနေများ သိသိသာသာ ပြောင်းလဲကောင်းမွန်သွားသည်ဟု အမေရိကန်အစိုးရက သတ်မှတ်နိုင်ပါက (သို့မဟုတ် တရားရုံးတွင် သက်သေပြနိုင်ပါက) အချိန်မရွေး ပြန်လည်ရပ်ဆိုင်းခံရနိုင်ခြေ ရှိသည်။

အမေရိကန် တရားရုံးတစ်ခုက မြန်မာနိုင်ငံသားများအပေါ် ပြည်နှင်ဒဏ်ပေးခြင်းမှ အကာအကွယ်ပေးမှုကို သက်တမ်းတိုး

အမေရိကန် တရားရုံးတစ်ခုက မြန်မာနိုင်ငံသားများအပေါ် ပြည်နှင်ဒဏ်ပေးခြင်းမှ အကာအကွယ်ပေးမှုကို သက်တမ်းတိုး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါ…

  • January 26, 2026
အရှေ့အလယ်ပိုင်းတွင် အမေရိကန် စစ်အင်အားဖြည့်၊ အီရန်က လက်တုန့်ပြန်ရန် ပြင်ဆင်   သတင်းနှင့် မီဒီယာ ကွန်ရက် ၂၀၂၆ ခုနှစ်၊ ဇန္နဝါရီလ ၂၆ ရက်။ 

ပင်တဂွန်စစ်ဌာနချုပ်သည် အမေရိကန်လေယာဉ်တင်သင်္ဘောအုပ်စုနှင့် ထောင်ပေါင်းများစွာသော စစ်သည်တော်များကို အရှေ့အလယ်ပိုင်းသို့ စေလွှတ်လျက်ရှိသည်။ +++ အမေရိကန်၏ စစ်ရေး ဖြည့်တင်းမှု +++ USS Abraham Lincoln လေယာဉ်တင်သင်္ဘောကြီးသည် ဖျက်သင်္ဘော ၃ စီးနှင့်အတူ တောင်တရုတ်ပင်လယ်မှ ထွက်ခွာလာပြီး လက်ရှိတွင် အိန္ဒိယသမုဒ္ဒရာသို့ ရောက်ရှိနေပြီဖြစ်သည်။ ယင်းသင်္ဘောအုပ်စု ရောက်ရှိလာပါက စစ်သည်အင်အား ၅,၇၀၀ ခန့် တိုးလာမည်ဖြစ်သည်။ မူလက ပါရှန်းပင်လယ်ကွေ့အတွင်းတွေင် ဖျက်သင်္ဘော ၂ စီးနှင့် ဘာရိန်းဆိပ်ကမ်းတွင် ကမ်းခြေစောင့် တိုက်ခိုက်ရေးသင်္ဘော ၃ စီး ရှိနေပြီးသား ဖြစ်သည်။ အမေရိကန် လေတပ်၏ F-15E Strike Eagle တိုက်လေယာဉ်များ ဒေသတွင်းသို့ ရောက်ရှိနေသလို၊ ဗြိတိန်နိုင်ငံကလည်း Typhoon တိုက်လေယာဉ်များကို ကာတာနိုင်ငံသို့ စေလွှတ်ထားသည်။ +++ နောက်ခံ အခြေအနေ +++ အီရန်အစိုးရသည် ဖမ်းဆီးထားသော ဆန္ဒပြသူများကို အစုလိုက်အပြုံလိုက် ကွပ်မျက်မည်ဆိုပါက စစ်ရေးအရ အရေးယူမည်ဟု ထရန့်က ခြိမ်းခြောက်ထားခြင်းဖြစ်သည်။ အကယ်၍ အီရန်က ကွပ်မျက်မှုများ ဆက်လုပ်ပါက ပြီးခဲ့သည့်နှစ်က အီရန်နျူကလီးယားစခန်းများကို တိုက်ခိုက်ခဲ့မှုထက် ပိုမိုပြင်းထန်သည့် စစ်ရေးအရေးယူမှုမျိုး ကြုံရမည်ဟု ထရန့်က သတိပေးထားသည်။ ဆန္ဒပြပွဲများ အတွင်း အီရန် အစိုးရ၏ နှိမ်နင်းမှုကြောင့် လူပေါင်း ၅,၀၀၀ ကျော် သေဆုံးခဲ့ပြီး ၂၇,၀၀၀ ကျော် ဖမ်းဆီးခံထားရကြောင်း တက်ကြွလှုပ်ရှားသူများက ဆိုသည်။ သို့သော်လည်း အီရန်အစိုးရကမူ သေဆုံးသူ ၃,၀၀၀ ကျော်သာရှိကြောင်း ထုတ်ပြန်ထားသည်။ အီရန်အာဏာပိုင်များက ဖမ်းဆီးထားသူများကို အမြန်စီရင်ချက်ချ၍ ကွပ်မျက်သွားမည်ဟု ဆိုထားသလို၊ အမေရိကန် သို့မဟုတ် အစ္စရေးက ကြားဝင်နှောင့်ယှက်ပါက ပြတ်ပြတ်သားသား တုံ့ပြန်မည်ဟု တုံ့ပြန်ထားသည်။ +++ အီရန်၏ တု့န်ပြန်ရန် ပြင်ဆင်မှုများ +++ အမေရိကန်ပြည်ထောင်စု၏ စစ်ရေးအင်အား ပြသမှုများအပေါ် အီရန်နိုင်ငံအနေဖြင့် ထူးခြားသော တုံ့ပြန်မှုများနှင့် စစ်ရေးပြင်ဆင်မှုများကို လုပ်ဆောင်လျက်ရှိသည်။ အီရန်၏ စစ်ဗျူဟာမှာ အမေရိကန်နှင့် ထိပ်တိုက်ရင်ဆိုင်ခြင်းထက် "အချိုးမညီသော စစ်ဗျူဟာ" (Asymmetric Warfare) ကို အဓိကထား ကျင့်သုံးနေသည်ဟု ကျွမ်းကျင်သူများက သုံးသပ်သည်။ အီရန်ဘက်ကလည်း အမေရိကန်က တိုက်ခိုက်လာပါက ကျယ်ကျယ်ပြန့်ပြန့် လက်တုန့်ပြန်တိုက်ခိုက်သွားမည်ဟု ပြောထားသည်။ ၁။ ဒုံးကျည်နှင့် ဒရုန်းအင်အား စုဆောင်းခြင်း အီရန်နိုင်ငံသည် အရှေ့အလယ်ပိုင်းဒေသတွင် အကြီးမားဆုံးသော ဒုံးကျည်အင်အားကို ပိုင်ဆိုင်ထားသည့် နိုင်ငံဖြစ်သည်။ ပဲ့ထိန်းဒုံးကျည်များ (Ballistic Missiles): အကွာအဝေး ကီလိုမီတာ ၂,၀၀၀ အထိ ပစ်ခတ်နိုင်သော ပဲ့ထိန်း ဒုံးကျည် (Ballistic Missiles) များကို ပိုင်ဆိုင်ထားပြီး အစ္စရေးနိုင်ငံနှင့် ဒေသတွင်းရှိ အမေရိကန်စစ်အခြေစိုက်စခန်းများကို တိကျစွာ ထိမှန်နိုင်စွမ်းရှိပါသည်။ ယူကရိန်းစစ်ပွဲတွင် အသုံးပြုခဲ့သည့် Shahed ဒရုန်းများကဲ့သို့ ကုန်ကျစရိတ်သက်သာပြီး အုပ်စုလိုက် တိုက်ခိုက်နိုင်စွမ်းရှိသော အသေခံဒရုန်းများ (Kamikaze Drones): ကို အလုံးအရင်းဖြင့် အသုံးပြုရန် ပြင်ဆင်ထားသည်။ ၂။ ဟော်မုဇ်ရေလက်ကြားအား ပိတ်ဆို့နိုင်စွမ်းရှိခြင်း ကမ္ဘာ့ရေနံတင်ပို့မှု၏ ၂၀ ရာခိုင်နှုန်းကျော် ဖြတ်သန်းရာ ဟော်မုဇ်ရေလက်ကြား (Strait of Hormuz) ကို အီရန်နိုင်ငံက ထိန်းချုပ်ထားနိုင်သည်။ အီရန်တော်လှန်ရေး အစောင့်တပ် (IRGC) သည် အရှိန်ပြင်း တိုက်ခိုက်ရေးလှေငယ်များ၊ ရေမြုပ်မိုင်းများနှင့် ရေငုပ်သင်္ဘောငယ်များကို အသုံးပြု၍ ဤရေလမ်းကြောင်းကို ပိတ်ဆို့ရန် ကြိုးပမ်းနိုင်ပါသည်။ ဤသို့ လုပ်ဆောင်ပါက ကမ္ဘာ့စီးပွားရေး အပေါ် အကျိုးသက်ရောက်မှု အများအပြား ရှိလာနိုင်သည်။ ၃။ ကြားခံလက်နက်ကိုင်တပ်ဖွဲ့များကို အသုံးချခြင်း အီရန်နိုင်ငံသည် ၎င်း၏ နယ်နိမိတ်ပြင်ပရှိ "ခုခံရေးဝင်ရိုး" (Axis of Resistance) ဟု ခေါ်ဆိုသော မဟာမိတ် လက်နက်ကိုင်အဖွဲ့များကို အသုံးချ၍ တိုက်ခိုက်နိုင်စွမ်း ရှိပါသည်။ လက်ဘနွန်ရှိ ဟစ်ဇဘိုလာ (Hezbollah)၊ ယီမင်ရှိ ဟူသီ (Houthis) နှင့် အီရတ်ရှိ ရှီအာ လက်နက်ကိုင်အဖွဲ့များကို အသုံးချ၍ အမေရိကန်၏ အကျိုးစီးပွားများကို နေရာအနှံ့အပြားမှ တပြိုင်နက်တည်း တိုက်ခိုက်နိုင်စွမ်း ရှိထားသည်။ ၄။ ပြည်တွင်းလုံခြုံရေးနှင့် ဆိုင်ဘာကာကွယ်ရေး နိုင်ငံအတွင်း ဖြစ်ပွားနေသော ဆန္ဒပြပွဲများကို နှိမ်နင်းသည့်အပြင် ပြည်ပမှ ဆိုင်ဘာတိုက်ခိုက်မှုများကို ကာကွယ်နိုင်ရန် အင်တာနက် ဖြတ်တောက်ခြင်းနှင့် ဆိုင်ဘာလုံခြုံရေး လုပ်ငန်းစဉ်များကိုလည်း အရှိန်မြှင့် လုပ်ဆောင်လျက်ရှိပါသည်။ အမေရိကန် နှင့် အီရန်တို့ အကြား တင်းမာမှုများ တဖြည်းဖြည်း မြင့်တက်လာနေပြီး အချိန်မရွေး ထပေါက်နိုင်သည့် ချိန်ကိုက်မိုင်း တစ်ခုကဲ့သို့ ဖြစ်နေသည်။

အရှေ့အလယ်ပိုင်းတွင် အမေရိကန် စစ်အင်အားဖြည့်၊ အီရန်က လက်တုန့်ပြန်ရန် ပြင်ဆင်

အရှေ့အလယ်ပိုင်းတွင် အမေရိကန် စစ်အင်အားဖြည့်၊ အီရန်က လက်တုန့်ပြန်ရန် ပြင်ဆင် သတင်းနှင့် မီဒီယာ ကွန်ရက်၂၀၂၆ ခုနှစ်၊ ဇန္နဝါရီလ ၂၆ ရက်။ပင်တဂွန်စစ်ဌာနချ…

  • January 26, 2026
ထိုင်းနိုင်ငံတွင် နီပါး ဗိုင်းရပ်စ် (Nipah Virus) ကာကွယ်ရေး လုပ်ငန်းများစတင် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၆ ရက်။ ထိုင်းနိုင်ငံတွင် အိန္ဒိယမှ စတင်ဖြစ်ပွားလာသော နီပါးဗိုင်းရပ်စ် (Nipah virus) ကူးစက်ပြန့်ပွားမှုကို ကာကွယ်ရန်အတွက် ကိုဗစ်-၁၉ ကာလက ကျင့်သုံးခဲ့သည့် ရောဂါထိန်းချုပ်ရေး လုပ်ငန်းစဉ်များကို ပြန်လည်အသုံးပြုနေပြီဖြစ်ကြောင်း ထိုင်းဝန်ကြီးချုပ် အနူတင် ချန်ဝီရာကူးလ်က တနင်္ဂနွေနေ့တွင် ပြောကြားခဲ့သည်။ လက်ရှိတွင် ထိုင်းနိုင်ငံ၌ နီပါးဗိုင်းရပ်စ် ကူးစက်ခံရသူ မရှိသေးသော်လည်း ကျန်းမာရေးစစ်ဆေးမှု စနစ်များကို ကိုဗစ်-၁၉ ကူးစက်မှုကာလက အသုံးပြုခဲ့သည့် စံနမူနာများအတိုင်း ပြန်လည်ပြင်ဆင်ပြီး ထိရောက်စွာ ဆောင်ရွက်သွားမည် ဖြစ်သည်။ ဤဗိုင်းရပ်စ်မှာ တိရစ္ဆာန်မှ လူကို ကူးစက်သော ဗိုင်းရပ်စ် ဖြစ်ပြီး လင်းနို့များမှ တဆင့် ကူးစက်သည်ဟု ဆိုသည်။ ထို့ပြင် လူလူချင်းလည်း လူမှ ထွက်သော အရည်များကို ထိတွေ့မိချင်းဖြင့် ကူးစက်နိုင်သည်။ ကူးစက်ခံရပါက သေဆုံးနှုန်း သေဆုံးနှုန်း မြင့်မားပြီး  ၄၀% မှ ၇၅% အထိ ရှိနိုင်သည်ဟု ဆိုသည်။ ဤဗိုင်းရပ်စ်အတွက် ကုသရန် ဆေး သို့မဟုတ် ကာကွယ်ဆေး မရှိသေးသောကြောင့် ရောဂါဖြစ်ပွားနိုင်ခြေရှိသည့် နိုင်ငံများမှ လာရောက်သူများကို ပိုမိုတင်းကျပ်စွာ စစ်ဆေးသွားမည် ဖြစ်သည်။ အိန္ဒိယနိုင်ငံတွင် ဖြစ်ပွားနေသည့် နီပါးဗိုင်းရပ်စ်နှင့် ပတ်သက်၍ အလွန်အမင်း စိုးရိမ်ခြင်းမရှိရန် ဝန်ကြီးချုပ်က ပြောကြားခဲ့သည်။ အကြောင်းမှာ ဤဗိုင်းရပ်စ်သည် လေထဲမှတဆင့် မကူးစက်ဘဲ ခန္ဓာကိုယ်ထွက်ရည်များမှတဆင့်သာ ကူးစက်ခြင်းကြောင့် ဖြစ်သည်။ ပြည်သူများအနေဖြင့် ပုံမှန်အတိုင်း နေထိုင်နိုင်ပြီး အစားအစာကို ပူပူနွေးနွေးစားခြင်း၊ ဟင်းခက်ဇွန်းအသုံးပြုခြင်း၊ လက်ကို မကြာခဏ ဆေးကြောခြင်းနှင့် လက်ဆွဲနှုတ်ဆက်ခြင်းများကို ရှောင်ကြဉ်ခြင်း စသည့် ကျန်းမာရေးအလေ့အကျင့်များကို လိုက်နာရန် တိုက်တွန်းထားသည်။ ဆေးဘက်ဆိုင်ရာ သိပ္ပံဌာန ညွှန်ကြားရေးမှူးချုပ် ဒေါက်တာ နတ်သဖွန်းက ရောဂါဖြစ်ပွားလာပါက အသင့်ဖြစ်စေရန်အတွက် - လက်အောက်ခံ ဆေးရုံများတွင် ကျွမ်းကျင်ဝန်ထမ်းများ၊ သီးသန့်လူနာဆောင်များ (Isolation Wards) နှင့် လိုအပ်သော ဆေးဝါးပစ္စည်းများကို အသင့်ပြင်ထားရန် ညွှန်ကြားထားသည်။ ဘန်ကောက်ရှိ Rajavithi ဆေးရုံ နှင့် (Queen Sirikit) ကွင်းသီရိခေတ် ကလေးကျန်းမာရေးဌာန အပါအဝင် အဓိက ဆေးရုံကြီးများတွင် ဘေးကင်းလုံခြုံရေး လမ်းညွှန်ချက်များကို လိုက်နာကျင့်သုံးရန် ညွှန်ကြားထားသည်။ ရောဂါလက္ခဏာများ နီပါးဗိုင်းရပ်စ် ကူးစက်ခံရပါက စတင်ကူးစက်သည်မှ ရောဂါ ဖြစ်ပွားသည်အထိ ပျိုးကာလမှာ ပုံမှန်အားဖြင့် ၄ ရက်မှ ၁၄ ရက် အထိ ကြာမြင့်တတ်ပြီး အောက်ပါလက္ခဏာများ ပေါ်ပေါက်တတ်ပါသည်။ • ကနဦးလက္ခဏာများ: ဖျားခြင်း၊ ပြင်းထန်စွာ ခေါင်းကိုက်ခြင်း၊ ချောင်းဆိုးခြင်း၊ လည်ချောင်းနာခြင်းနှင့် ကြွက်သားများ နာကျင်ကိုက်ခဲခြင်း စသည့် တုပ်ကွေးနှင့်ဆင်တူသော လက္ခဏာများ ခံစားရတတ်သည်။ • ပြင်းထန်သည့် အခြေအနေ: ရောဂါအခြေအနေ ဆိုးရွားလာပါက မူးဝေခြင်း၊ သတိလစ်ခြင်းနှင့် စိတ်ရှုပ်ထွေးခြင်းများ ဖြစ်ပေါ်တတ်ပြီး နောက်ဆက်တွဲ ပြဿနာအနေဖြင့် ဦးနှောက်ရောင်ရမ်းခြင်း (Encephalitis) အထိ ဖြစ်ပွားနိုင်သည်။ • အသက်ရှူလမ်းကြောင်းဆိုင်ရာ: အသက်ရှူရခက်ခဲခြင်းနှင့် အဆုတ်ရောင်ခြင်း စသည့် ဝေဒနာများကိုလည်း ပြင်းထန်စွာ ခံစားရနိုင်သည်။ ကူးစက်နိုင်သည့် နည်းလမ်းများ နီပါးဗိုင်းရပ်စ်သည် တိရစ္ဆာန်မှ လူသို့သော်လည်းကောင်း၊ လူအချင်းချင်းသော်လည်းကောင်း အောက်ပါအတိုင်း ကူးစက်နိုင်ပါသည်။ • တိရစ္ဆာန်မှတစ်ဆင့် ကူးစက်ခြင်း: ဗိုင်းရပ်စ်ပိုး ရှိနေသော လင်းနို့များ ကိုက်ထားသည့် သစ်သီးဝလံများကို စားမိခြင်း သို့မဟုတ် ရောဂါပိုးရှိသော ဝက်များနှင့် တိုက်ရိုက်ထိတွေ့မိခြင်းတို့မှတစ်ဆင့် ကူးစက်နိုင်ပါသည်။ • လူချင်းကူးစက်ခြင်း: ရောဂါပိုးရှိသူ၏ တံတွေး၊ ဆီးနှင့် သွေး စသည့် ခန္ဓာကိုယ်မှ ထွက်သော အရည်များနှင့် တိုက်ရိုက်ထိတွေ့မိခြင်းကြောင့် ကူးစက်နိုင်ပါသည်။ (သို့ရာတွင် ဤဗိုင်းရပ်စ်သည် လေထဲမှတစ်ဆင့် ကူးစက်ခြင်း မရှိကြောင်း သိရှိရပါသည်။) ကာကွယ်ရမည့် နည်းလမ်းများ လက်ရှိအချိန်အထိ နီပါးဗိုင်းရပ်စ်အတွက် ထိရောက်သော ကုသဆေးနှင့် ကာကွယ်ဆေးများ ရှာဖွေတွေ့ရှိခြင်း မရှိသေးသဖြင့် အောက်ပါနည်းလမ်းများဖြင့် ကြိုတင်ကာကွယ်ရန် အထူးအရေးကြီးပါသည်။ • သစ်သီးဝလံများကို သတိပြုခြင်း: တိရစ္ဆာန်များ ကိုက်ထားသည့် လက္ခဏာရှိသော အသီးအနှံများကို စားသုံးခြင်းမှ လုံးဝရှောင်ကြဉ်ရပါမည်။ သစ်သီးများကို မစားသုံးမီ စင်ကြယ်စွာ ဆေးကြောခြင်းနှင့် အခွံနွှာ၍ စားသုံးခြင်းတို့ကို ပြုလုပ်ရပါမည်။ • တိရစ္ဆာန်များနှင့် ထိတွေ့မှုကို ရှောင်ကြဉ်ခြင်း: ဖျားနာနေသော ဝက်များ သို့မဟုတ် လင်းနို့များနှင့် ထိတွေ့မှုကို တတ်နိုင်သမျှ ရှောင်ကြဉ်ရပါမည်။ • တစ်ကိုယ်ရေသန့်ရှင်းရေး ဂရုပြုခြင်း: လက်ကို ဆပ်ပြာနှင့် ရေဖြင့် မကြာခဏ စနစ်တကျ ဆေးကြောရပါမည်။ • အစားအစာကို ကျက်အောင်ချက်ပြုတ်ခြင်း: အစားအစာများကို သန့်ရှင်းလတ်ဆတ်စွာ ပြင်ဆင်ပြီး သေချာစွာ ကျက်အောင် ချက်ပြုတ်စားသောက်ရပါမည်။ Photo:กรมควบคุมโรค กระทรวงสาธารณสุข

ထိုင်းနိုင်ငံတွင် နီပါး ဗိုင်းရပ်စ် (Nipah Virus) ကာကွယ်ရေး လုပ်ငန်းများစတင်

ထိုင်းနိုင်ငံတွင် နီပါး ဗိုင်းရပ်စ် (Nipah Virus) ကာကွယ်ရေး လုပ်ငန်းများစတင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၆ ရက်။  ထိုင…

  • January 26, 2026
ရှောင်ရှောင် (Xiao Xiao) နဲ့ လေလေ (Lei Lei) ပန်ဒါ အမွှာ အိမ်ပြန်ရတော့မယ် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၆ ရက်။ ဂျပန်နိုင်ငံ၊ တိုကျိုမြို့မှာရှိတဲ့ အူအဲနို (Ueno) တိရစ္ဆာန်ဥယျာဉ်မှာ ဇန်နဝါရီလ ၂၅ ရက်၊ တနင်္ဂနွေနေ့က လူတွေ ကြိတ်ကြိတ်တိုး စည်ကားနေခဲ့ပါတယ်။ အဲဒါကတော့ ဂျပန်မှာ နောက်ဆုံးကျန်ရစ်တဲ့ ရှောင်ရှောင် (Xiao Xiao) နဲ့ လေလေ (Lei Lei) ဆိုတဲ့ အမြွှာပန်ဒါလေးနှစ်ကောင်ကို နောက်ဆုံးအကြိမ် လူထုကြည့်ရှုခွင့်ပေးတဲ့နေ့ ဖြစ်လို့ပါပဲ။ ကြည့်ရှုလိုသူတွေ များပြားလွန်းတဲ့အတွက် မဲဖောက်ပြီး ကြည့်ရှုခွင့်ပေးခဲ့ရပါတယ်။ လူ တစ်ဦးကို ၁ မိနစ်နှုန်းနဲ့ လူပေါင်း ၄၀၀၀ ကျော်သာ ပန်ဒါ အမွှာကို မျက်မြင် နှုတ်ဆက်ခွင့်ရခဲ့ကြတယ်လို့ ဆိုပါတယ်။ တချို့လူတွေက ကြည့်ရှုခွင့် မရခဲ့ပေမယ့် ပန်ဒါတွေကို နှုတ်ဆက်တဲ့အနေနဲ့ တိရစ္ဆာန်ရုံကိုတော့ လာလည်ကြတယ်လို့လည်း ဆိုပါတယ်။ တရုတ်နိုင်ငံဟာ ၁၉၇၂ ခုနှစ်၊ ဂျပန်နဲ့ သံတမန်ရေးရာ ပြန်လည်စတင်တဲ့ အထိမ်းအမှတ်အဖြစ် ပန်ဒါတွေကို ပထမဆုံး လက်ဆောင်ပေးခဲ့တာပါ။ ဒါပေမဲ့ အခုအခါမှာတော့ တရုတ်နဲ့ ဂျပန်ကြားမှာ ထိုင်ဝမ်အရေး၊ လုံခြုံရေးနဲ့ ကုန်သွယ်ရေး တင်းမာမှုတွေ ရှိနေပါတယ်။ ဂျပန်ဝန်ကြီးချုပ် စာနာအဲ တာကာအိချိ (Sanae Takaichi) ရဲ့ မှတ်ချက်တွေကြောင့်လည်း တရုတ်ဘက်က မကျေမနပ် ဖြစ်နေပါတယ်။ ဒါကြောင့် ကမ္ဘာတဝှမ်းမှာ ရှိတဲ့ ပင်ဒါ ဝက်ဝံအားလုံးရဲ့ ပိုင်ရှင်ဖြစ်တဲ့ တရုတ်နိုင်ငံက ဂျပန်မှာရှိတဲ့ ပင်ဒါ နှစ်ကောင်ကို ပြန်တောင်းယူ ခဲ့တာပါ။ ပန်ဒါတွေ မရှိတော့တာဟာ စိတ်ဓာတ်ရေးရာတင်မကဘဲ စီးပွားရေးအရပါ ထိခိုက်မှု ရှိနိုင်တယ်လို့ ဆိုပါတယ်။ စီးပွားရေးပညာရှင်တွေရဲ့ တွက်ချက်မှုအရ ပန်ဒါမရှိတဲ့အတွက် ဂျပန်နိုင်ငံဟာ တစ်နှစ်ကို ယန်းဘီလီယံ ၂၀ (အမေရိကန်ဒေါ်လာ ၁၂၈ သန်းခန့်) ဆုံးရှုံးနိုင်တယ်လို့ ဆိုပါတယ်။ ဝက်ဘ်ဆိုက်အင်ဂျင်နီယာ တစ်ယောက်ဖြစ်တဲ့ တာကာဟီရို တာကာအူဂျီ (Takahiro Takauji) ဟာ ဆိုရင် ပန်ဒါတွေကို ချစ်လွန်းလို့ လွန်ခဲ့တဲ့ ၁၅ နှစ်ကတည်းက နေ့တိုင်း တိရစ္ဆာန်ဥယျာဉ်ကို လာခဲ့သူပါ။ သူဟာ ပန်ဒါဓာတ်ပုံပေါင်း ၁၀ သန်းကျော် ရိုက်ကူးခဲ့ပြီး ပန်ဒါလေးတွေကို သူ့သားသမီးတွေလို သဘောထားသူဖြစ်ပါတယ်။ သူကတော့ ဂျပန်မှာ ပင်ဒါတွေ မရှိတဲ့နေ့ ရောက်လာမယ်လို့ သူတခါမှ မတွေးခဲ့မိဘူးလို့ ပြောပါတယ်။

ရှောင်ရှောင် (Xiao Xiao) နဲ့ လေလေ (Lei Lei) ပန်ဒါ အမွှာ အိမ်ပြန်ရတော့မယ်

ရှောင်ရှောင် (Xiao Xiao) နဲ့ လေလေ (Lei Lei) ပန်ဒါ အမွှာ အိမ်ပြန်ရတော့မယ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၆ ရက်။  ဂျပန်နို…

  • January 26, 2026
×Close