သတင်း

ရှောင်ရှောင် (Xiao Xiao) နဲ့ လေလေ (Lei Lei) ပန်ဒါ အမွှာ အိမ်ပြန်ရတော့မယ် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၆ ရက်။ ဂျပန်နိုင်ငံ၊ တိုကျိုမြို့မှာရှိတဲ့ အူအဲနို (Ueno) တိရစ္ဆာန်ဥယျာဉ်မှာ ဇန်နဝါရီလ ၂၅ ရက်၊ တနင်္ဂနွေနေ့က လူတွေ ကြိတ်ကြိတ်တိုး စည်ကားနေခဲ့ပါတယ်။ အဲဒါကတော့ ဂျပန်မှာ နောက်ဆုံးကျန်ရစ်တဲ့ ရှောင်ရှောင် (Xiao Xiao) နဲ့ လေလေ (Lei Lei) ဆိုတဲ့ အမြွှာပန်ဒါလေးနှစ်ကောင်ကို နောက်ဆုံးအကြိမ် လူထုကြည့်ရှုခွင့်ပေးတဲ့နေ့ ဖြစ်လို့ပါပဲ။ ကြည့်ရှုလိုသူတွေ များပြားလွန်းတဲ့အတွက် မဲဖောက်ပြီး ကြည့်ရှုခွင့်ပေးခဲ့ရပါတယ်။ လူ တစ်ဦးကို ၁ မိနစ်နှုန်းနဲ့ လူပေါင်း ၄၀၀၀ ကျော်သာ ပန်ဒါ အမွှာကို မျက်မြင် နှုတ်ဆက်ခွင့်ရခဲ့ကြတယ်လို့ ဆိုပါတယ်။ တချို့လူတွေက ကြည့်ရှုခွင့် မရခဲ့ပေမယ့် ပန်ဒါတွေကို နှုတ်ဆက်တဲ့အနေနဲ့ တိရစ္ဆာန်ရုံကိုတော့ လာလည်ကြတယ်လို့လည်း ဆိုပါတယ်။ တရုတ်နိုင်ငံဟာ ၁၉၇၂ ခုနှစ်၊ ဂျပန်နဲ့ သံတမန်ရေးရာ ပြန်လည်စတင်တဲ့ အထိမ်းအမှတ်အဖြစ် ပန်ဒါတွေကို ပထမဆုံး လက်ဆောင်ပေးခဲ့တာပါ။ ဒါပေမဲ့ အခုအခါမှာတော့ တရုတ်နဲ့ ဂျပန်ကြားမှာ ထိုင်ဝမ်အရေး၊ လုံခြုံရေးနဲ့ ကုန်သွယ်ရေး တင်းမာမှုတွေ ရှိနေပါတယ်။ ဂျပန်ဝန်ကြီးချုပ် စာနာအဲ တာကာအိချိ (Sanae Takaichi) ရဲ့ မှတ်ချက်တွေကြောင့်လည်း တရုတ်ဘက်က မကျေမနပ် ဖြစ်နေပါတယ်။ ဒါကြောင့် ကမ္ဘာတဝှမ်းမှာ ရှိတဲ့ ပင်ဒါ ဝက်ဝံအားလုံးရဲ့ ပိုင်ရှင်ဖြစ်တဲ့ တရုတ်နိုင်ငံက ဂျပန်မှာရှိတဲ့ ပင်ဒါ နှစ်ကောင်ကို ပြန်တောင်းယူ ခဲ့တာပါ။ ပန်ဒါတွေ မရှိတော့တာဟာ စိတ်ဓာတ်ရေးရာတင်မကဘဲ စီးပွားရေးအရပါ ထိခိုက်မှု ရှိနိုင်တယ်လို့ ဆိုပါတယ်။ စီးပွားရေးပညာရှင်တွေရဲ့ တွက်ချက်မှုအရ ပန်ဒါမရှိတဲ့အတွက် ဂျပန်နိုင်ငံဟာ တစ်နှစ်ကို ယန်းဘီလီယံ ၂၀ (အမေရိကန်ဒေါ်လာ ၁၂၈ သန်းခန့်) ဆုံးရှုံးနိုင်တယ်လို့ ဆိုပါတယ်။ ဝက်ဘ်ဆိုက်အင်ဂျင်နီယာ တစ်ယောက်ဖြစ်တဲ့ တာကာဟီရို တာကာအူဂျီ (Takahiro Takauji) ဟာ ဆိုရင် ပန်ဒါတွေကို ချစ်လွန်းလို့ လွန်ခဲ့တဲ့ ၁၅ နှစ်ကတည်းက နေ့တိုင်း တိရစ္ဆာန်ဥယျာဉ်ကို လာခဲ့သူပါ။ သူဟာ ပန်ဒါဓာတ်ပုံပေါင်း ၁၀ သန်းကျော် ရိုက်ကူးခဲ့ပြီး ပန်ဒါလေးတွေကို သူ့သားသမီးတွေလို သဘောထားသူဖြစ်ပါတယ်။ သူကတော့ ဂျပန်မှာ ပင်ဒါတွေ မရှိတဲ့နေ့ ရောက်လာမယ်လို့ သူတခါမှ မတွေးခဲ့မိဘူးလို့ ပြောပါတယ်။

ရှောင်ရှောင် (Xiao Xiao) နဲ့ လေလေ (Lei Lei) ပန်ဒါ အမွှာ အိမ်ပြန်ရတော့မယ်

ရှောင်ရှောင် (Xiao Xiao) နဲ့ လေလေ (Lei Lei) ပန်ဒါ အမွှာ အိမ်ပြန်ရတော့မယ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၆ ရက်။  ဂျပန်နို…

  • January 26, 2026
အမေရိကန်က နည်းပညာသုံးစွဲမှုနှင့် မဟာမိတ်များကို တာဝန်ပိုယူစေမည့် မဟာဗျူဟာကို သုံးစွဲမည် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၆ ရက်။ အမေရိကန်ပြည်ထောင်စုသည် ၎င်း၏ ၂၀၂၆ ခုနှစ် အမျိုးသားကာကွယ်ရေးမဟာဗျူဟာ (National Defense Strategy) တွင် စစ်အင်အားတစ်ခုတည်းကိုသာမကဘဲ မဟာမိတ်ကွန်ရက်နှင့် နည်းပညာရပ်များကို ပေါင်းစပ်အသုံးပြု၍ ရန်သူကို ဟန့်တားမည့် 'ပေါင်းစပ်ဟန့်တားခြင်း' (Integrated Deterrence) မူဝါဒကို အဓိကကဏ္ဍမှ ထည့်သွင်းထားကြောင်းမည်ဟု ထုတ်ပြန်သည်။ အမေရိကန်သည် ကမ္ဘာ့လုံခြုံရေးကို တစ်ဦးတည်း ကိုင်တွယ်ဖြေရှင်းမည့်အစား မဟာမိတ်နိုင်ငံများကို တာဝန်ခွဲဝေယူစေခြင်းအားဖြင့် 'တာဝန်ခွဲဝေထမ်းဆောင်မှု' (Burden Sharing) ကို ဖော်ဆောင်လျက်ရှိသည်။ ဥပမာအားဖြင့် ဩစတြေးလျကို နျူကလီးယားစွမ်းအင်သုံး ရေငုပ်သင်္ဘောများ ထောက်ပံ့ခြင်းနှင့် ဂျပန်၊ ကိုရီးယားနိုင်ငံတို့အား ကာကွယ်ရေးတာဝန်များကို ပိုမိုဝိုင်းဝန်းထမ်းဆောင်စေခြင်းတို့ ဖြစ်သည်။ သမရိုးကျ ကြည်း၊ ရေ၊ လေ စစ်အင်အားများအပြင် အာကာသ၊ ဆိုင်ဘာ၊ နည်းပညာနှင့် စီးပွားရေးပိတ်ဆို့မှုများကိုပါ တပြိုင်နက်တည်း အသုံးပြုသွားမည်ဟု မဟာဗျူဟာ တွင် ထည့်သွင်းရေးဆွဲထားသည်။ ထိုမျှသာမက နည်းပညာရပ်များပေါင်းစပ်မှုကိုလည်း ထည့်သွင်းထားသည်။ AI (ဉာဏ်ရည်တု)၊ လူမဲ့ဒရုန်းများနှင့် လေဆာနည်းပညာများကိုပါ ပေါင်းစပ်အသုံးပြုရန် စီစဉ်ထားသည်။ အမေရိကန်၏ ကာကွယ်ရေးမဟာဗျူဟာတွင် အဓိကပြိုင်ဘက်အဖြစ် တရုတ်နိုင်ငံကို သတ်မှတ်ထားပြီး ရုရှား၏ ကျူးကျော်မှုကိုလည်း အလေးထားတုံ့ပြန်သွားမည်ဖြစ်သည်။ ထို့ပြင် ဆက်သွယ်ရေးနှင့် လျှပ်စစ်ဓာတ်အားကဲ့သို့သော အရေးပါသည့် အခြေခံအဆောက်အအုံများကိုလည်း ဆိုင်ဘာတိုက်ခိုက်မှုများမှ အထူးကာကွယ်သွားရန် ဦးစားပေးထားသည်။

အမေရိကန်က နည်းပညာသုံးစွဲမှုနှင့် မဟာမိတ်များကို တာဝန်ပိုယူစေမည့် မဟာဗျူဟာကို သုံးစွဲမည်

အမေရိကန်က နည်းပညာသုံးစွဲမှုနှင့် မဟာမိတ်များကို တာဝန်ပိုယူစေမည့် မဟာဗျူဟာကို သုံးစွဲမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၆ ရက်။&nb…

  • January 26, 2026
ရပ်စောက်လမ်းရှိ ဂိတ်များ ငွေတောင်းခံမှုများသဖြင့် ကုန်စည်စီးဆင်းမှု ကျဆင်း သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၅ ရက်။ ရှမ်းပြည် တောင်ပိုင်း၊ ရပ်စောက်လမ်းတစ်လျှောက် စစ်ဆေးရေးဂိတ် များတွင် လမ်းကြေး အဆမတန် တောင်းခံနေခြင်းကြောင့် ကုန်စည်စီးဆင်းမှု ထက်ဝက်ကျော်လျော့နည်းသွားသည်ဟု ဒေသတွင်း သတင်းရင်းမြစ် များက ပြောသည်။ ရပ်စောက်မြို့နယ် အနီးတစ်ဝိုက်တွင် စစ်ကော်မရှင်တပ်နှင့် တိုင်းရင်းသား လက်နက်ကိုင်တပ်ဖွဲ့ အသီးသီးက စစ်ဆေးရေးဂိတ်များ တိုးချဲ့ကာ လမ်းကြေးနှင့် အခွန်အခများကို မတန်တဆ ကောက်ခံနေခြင်းကြောင့် ကုန်စည်စီးဆင်းမှုများ ထက်ဝက်ကျော် လျော့နည်းသွားခြင်း ဖြစ်သည်ဟု ဆိုသည်။ စစ်ဆေးရေး ဂိတ် ၂၅ ခုက လမ်းကြေး သိန်း ၂၀ အထိ တောင်းခံနေသည်ဟု ယာဉ်မောင်းများက ပြောသည်။ ယာဉ်မောင်းတစ်ဦးက “စစ်တပ်လည်း ပေးရတယ်။ ရှမ်းကျား (RCSS/ SSA) လည်း ပေးရတယ်။ PNO လည်း ပါတယ်။ အကုန်တူတူပဲ။ ခရီးသည်ဆို သိပ်မပေးရဘူး။ အဓိက သူတို့ တောင်းတာက ပြောင်းကား၊ ကုန်ကား တွေ။ ပိုက်ဆံပါမှန်း သူတို့ သိတယ်လေ။ မပေးဘူးဆိုရင် ကုန်ရော လူရော ဖြတ်လို့မရဘူး” ဟု ပြောသည်။ ရပ်စောက်မြို့သို့ ဝင်ရောက်သည့် လမ်းတစ်လျှောက်တွင် စစ်ဆေးရေးဂိတ်ပေါင်း ၂၅ ခုအထိ ရှိနေပြီး ခရီးသွား လာသူများနှင့် ကုန်သည်များသည် ကားအမျိုးအစားအလိုက် ငွေကျပ် ၃ သောင်းမှ သိန်း ၂၀ အထိ ပေးဆောင်နေ ရခြင်း ဖြစ်သည်။ ၎င်းဂိတ်များတွင် စစ်ကော်မရှင်တပ်များ သာမက ရှမ်းပြည်ပြန်လည်ထူထောင်ရေး ကောင်စီ (RCSS/SSA) နှင့် ပအိုဝ်းပြည်သူ့စစ်အဖွဲ့ (PNO) တို့ကလည်း အသီးသီး ကောက်ခံနေကြသည်။ ကုန်ကားများ အနေဖြင့် သာစည်မြို့မှ ရပ်စောက်သို့ ဝင်ရောက်ရာ မြို့ဦးဂိတ်တွင် တစ်စီးလျှင် ၂ သိန်းကျပ် ပေးဆောင် နေရသလို၊ ကျောက်ဂူဘက်မှ တက်လာပါက ဘန်းကန်ကျေးရွာဂိတ်တွင် ဘီးခွန်အဖြစ် တစ်နှစ်စာ တစ်သိန်းကျပ် ထပ်မံပေးဆောင်နေရသည်ဟု ဆိုသည်။ အဆိုးရွားဆုံးမှာ ဘန်းကန်ကျေးရွာဂိတ်တွင် သီးနှံခွန် အမည်ဖြင့် ၁၀ ဘီးကားတစ်စီးလျှင် သိန်း ၂၀ ကျပ်၊ ၆ ဘီးကား ၁၈ သိန်းကျပ်နှင့် ၁၂ ဘီးကား ၁၅ သိန်းကျပ် စသည့်ဖြင့် မတန်တဆ ကောက်ခံနေခြင်း ဖြစ်သည်။ ပြီးခဲ့သည့်ရက်ပိုင်းက လမ်းခရီးဖြတ်သန်းခဲ့သူတစ်ဦးက “ဂိတ်တွေက အကာကွယ်ပေးဖို့လား၊ ဓားပြတိုက်ဖို့ လားတောင် မသဲကွဲတော့ဘူး။ လာရင် ဘေးချရပ်ခိုင်းတယ်။ လုံးဝမစစ်ဘူးနော်။ ဘာပါလဲ မေးတယ်။ ကုန်စည် အပေါ်မူတည်ပြီး ပိုက်ဆံဆောင်းတယ်။ အချင်းချင်းလည်း သူတို့ ညှိထားတယ်။ ရှေ့ဂိတ်မှာ ဆောင်ထားတာ စာရွက် ပြရတယ်။ နောက်ဂိတ်က အဲအတိုင်း တောင်းတယ်” ဟု ပြောသည်။ လက်ရှိတွင် သာစည်မှ ရပ်စောက်မြို့အထိ လမ်းတလျှောက်၌ နန့်ပလန်တံတား၊ ကျောက်ဆုံ၊ မန်ကျည်းကုန်း၊ ကျောက်ဂူ၊ အင်တော၊ ဇော်ဂျီဆည်၊ လယ်ခေါင်း၊ ထင်းကွင်းသဲတောင်၊ တပ်ဦး နှင့် ဗထူးမြို့အနီးရှိ မင်းကြီး သုံးပါးဂိတ် အပါအဝင် စုစုပေါင်း ဂိတ်ပေါင်း ၂၅ ဂိတ်က စောင့်ကြိုကောက်ခံနေခြင်း ဖြစ်သည်။ ဤကဲ့သို့ လမ်းကြေးများ အဆမတန် မြင့်မားလာမှုကြောင့် ယခင်က တစ်ရက်လျှင် အစီးရေ ၆၀ ခန့် ထွက်ရှိ သည့် ကုန်စည်ကားများသည် လက်ရှိတွင် အစီးရေ ၂၀ ခန့်သာ ထွက်ခွာနိုင်တော့ကြောင်း ယာဉ်မောင်းများက ပြောသည်။ ယခုကဲ့သို့ ကုန်စည်စီးဆင်းမှု လျော့ကျသွားခြင်းကြောင့် လာမည့်လပိုင်းအတွင်း ရှမ်းပြည်တောင်ပိုင်းရှိ မြို့နယ် များတွင် ကုန်စည်ပြတ်လပ်မှုနှင့် ကုန်ဈေးနှုန်း အဆမတန် မြင့်တက်လာမည့်အန္တရာယ်ကို ကုန်သည်များက စိုးရိမ်မကင်း ခန့်မှန်းပြောဆိုနေကြသည်။ ဓါတ်ပုံ - ပုံဟောင်း (ရပ်စောက်-ကျောက်ဂူလမ်းပိုင်း) #ရပ်စောက်စစ်ဆေးရေးဂိတ် #အခွန်ကောက် #ငွေတောင်းခံ  

ရပ်စောက်လမ်းရှိ ဂိတ်များ ငွေတောင်းခံမှုများသဖြင့် ကုန်စည်စီးဆင်းမှု ကျဆင်း

ရပ်စောက်လမ်းရှိ ဂိတ်များ ငွေတောင်းခံမှုများသဖြင့် ကုန်စည်စီးဆင်းမှု ကျဆင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၅ ရက်။  ရှမ်းပ…

  • January 25, 2026
ဒေသခံ နာဂများ နယ်စပ် ခြံစည်းရိုး ခတ်ခြင်းကို ဆန့်ကျင် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၅ ရက်။ မြန်မာ - အိန္ဒိယ နယ်စပ်တစ်လျှောက် ခြံစည်းရိုးခတ်မည့် အိန္ဒိယအစိုးရ၏ အစီအစဉ်ကို မလိုလားသဖြင့် ဒေသခံ နာဂပြည်သူလူထုက ပိုစတာများ စိုက်ထူကာ အသံတိတ် ဆန္ဒဖော်ထုတ်ခဲ့ကြကြောင်း ညီညွတ်သော တန်ရှန်းနာဂကောင်စီ (UTNC) က ပြောသည်။ အိန္ဒိယနိုင်ငံ၊ နန်ပေါင်မြို့၌ ကျင်းပသည့် ပန်ဆောင်ပတ်စ် အပြည်ပြည်ဆိုင်ရာပွဲတော် (PPIF) ကာလအတွင်း မြန်မာနိုင်ငံဘက်ခြမ်းရှိ နာဂပြည်သူများက အဆိုပါပွဲတော်သို့ သွားရောက်ဆင်နွှဲခြင်းမပြုဘဲ ‘နယ်စပ်ခြံစည်းရိုး အလိုမရှိ’ ဟူသည့် လှုပ်ရှားမှုကို ပန်ဆောင်နယ်စပ်ဈေးတွင် ဇန်နဝါရီလ ၂၀ ရက်နှင့် ၂၁ ရက်နေ့တို့၌ ပြုလုပ်ခဲ့ ကြခြင်း ဖြစ်သည်။ UTNC ဥက္ကဋ္ဌ ဦးချစ်ယောင်းက “ကျနော်တို့ နာဂလူထု ပြည်သူလူထု တစ်ရပ်လုံးက UTNC ရဲ့ ဦးဆောင်မှုထဲမှာ အားလုံးလိုက်ပါပြီးတော့ စိတ်တူကိုယ်တူနဲ့ ဒီခြံစည်းရိုးဟာ ပြည်သူတစ်ရပ်လုံးက မလိုလားပါဘူးဆိုတဲ့ ရပ်တည် ပေးမှုကို အားလုံးက မြင်တွေ့ကြရတာဖြစ်တယ်။ တစ်ဖက်ကလည်းဘဲ ဒီလိုလှုပ်ရှားဆောင်ရွက်မှု အားဖြင့် သတင်းမီဒီယာတွေ အိန္ဒိယဘက်မှာရှိတဲ့ အစိုးရတာဝန်ရှိ လူကြီးအားလုံး မြင်တွေ့ပြီးတော့ သိရှိသွားနိုင်တာ ဖြစ်ပါတယ်” ဟု ပြောသည်။ ဆန္ဒပြပွဲတွင် ‘နယ်စပ်ခြံစည်းရိုး အလိုမရှိ’၊ ‘ဌာနေတိုင်းရင်းသားများ၏ အခွင့်အရေးကို လေးစားပါ’ နှင့် ‘ခြံစည်း ရိုးကာရံခြင်းကို ရုတ်သိမ်းပေးပါ’ ဟူသည့် အချက်သုံးချက်ကို အဓိကတောင်းဆိုခဲ့ကြသည်။ အိန္ဒိယအစိုးရဘက်မှ ဆန္ဒပြပိုစတာများကို ဖြုတ်ချခြင်းများ ရှိခဲ့သော်လည်း နာဂပြည်သူများက နည်းမျိုးစုံဖြင့် ဆက်လက် ကန့်ကွက်ခဲ့ကြရာ အဆိုပါလှုပ်ရှားမှုကြောင့် ခရီးသွားများနှင့် သတင်းမီဒီယာများအကြား စိတ်ဝင်စား မှု မြင့်တက်ခဲ့ပြီး အိန္ဒိယဗဟိုအစိုးရအထိ သတင်းရောက်ရှိသွားခဲ့သည်။ ဇန်နဝါရီလ ၂၁ ရက်နေ့တွင် UTNC ကိုယ်စားလှယ်များနှင့် အိန္ဒိယနိုင်ငံ နန်ပေါင်မြို့ Assam Rifles တပ်ခွဲမှူးတို့ တွေ့ဆုံခဲ့ရာ၌ PPIF ပွဲတော်ပြီးနောက် နှစ်နိုင်ငံ နယ်စပ်ဖြတ်ကျော် သွားလာခြင်း (FMR) ကို ခေတ္တဆိုင်းငံ့ထားမည် ဖြစ်ပြီး အစိုးရချင်း ညှိနှိုင်းပြီးမှသာ ပြန်လည်ဖွင့်လှစ်ပေးမည်ဟု အိန္ဒိယဘက်က အကြောင်းပြန်ခဲ့သည်။ အိန္ဒိယအစိုးရက ခြံစည်းရိုးကာရံခြင်းကို မရုတ်သိမ်းသရွေ့ ဆက်လက်ကန့်ကွက်သွားမည်ဟု ဦးချစ်ယောင်းက ပြောသည်။ “ကျနော်တို့ကတော့ တောက်လျှောက် ငြိမ်းချမ်းစွာနဲ့ဘဲ ကျနော်တို့လူထု ဌာနေတိုင်းရင်းသားတွေရဲ့ အခွင့် အရေး ဖြစ်တယ်ဆိုတဲ့ အပေါ်မှာ ကျနော်တို့ရပ်တည်ပြီးတော့ သူတို့ မရုတ်သိမ်းပေးသရွေ့ ဒီခြံစည်းရိုး လုပ်ငန်း တွေကိုတော့ တောက်လျှောက် ကန့်ကွက်တောင်းဆို သွားမှာပဲ ဖြစ်ပါတယ်” ဟု ပြောသည်။ နယ်စပ်ခြံစည်းရိုး ကာရံခြင်းသည် နယ်စပ်တစ်ဖက်တစ်ချက်စီတွင် နေထိုင်ကြသော ဆွေမျိုးသားချင်း နာဂ မိသားစုများကြား ခွဲခြားပစ်လိုက်ခြင်း ဖြစ်သဖြင့် ဒေသခံများက ပြင်းပြင်းထန်ထန် ကန့်ကွက်နေကြခြင်း ဖြစ် သည်။ သို့သော် အိန္ဒိယဘက်ကမူ ပြီးခဲ့သည့်နှစ် နိုဝင်ဘာလ ၂၇ ရက်နေ့မှ စတင်ကာ နယ်စပ်မှတ်တိုင် (၁၇၃) အနီးတွင် ခြံစည်းရိုးခတ်ခြင်း လုပ်ငန်းများကို ဆက်လက်လုပ်ဆောင်နေဆဲ ဖြစ်သည်။ အိန္ဒိယဗဟိုအစိုးရက လုံခြုံရေးအရ ဤစီမံကိန်းကို မဖြစ်မနေ လုပ်ဆောင်ရခြင်းဖြစ်ကြောင်း အကြောင်းပြထား ပြီး ညီညွတ်သော တန်ရှန်းနာဂကောင်စီ (UTNC) ၏ ထုတ်ပြန်ချက်အရ မြန်မာနိုင်ငံဘက်ကရှိ မြေပြင်အုပ်ချုပ် ရေး အဖွဲ့များကလည်း ကန့်ကွက်စာတင်ထားသည်ဟု ဆိုသည်။   ဓာတ်ပုံ - United Tangshang Naga Council    

ဒေသခံ နာဂများ နယ်စပ် ခြံစည်းရိုး ခတ်ခြင်းကို ဆန့်ကျင်

ဒေသခံ နာဂများ နယ်စပ် ခြံစည်းရိုး ခတ်ခြင်းကို ဆန့်ကျင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၅ ရက်။  မြန်မာ - အိန္ဒိယ နယ်စပ်တစ်လ…

  • January 25, 2026
ရွေးကောက်ပွဲ ကျင်းပစဉ် မြို့အနီး ကျေးရွာများကို ဗုံးကြဲတိုက်ခိုက် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၅ ရက်။ အပိုင်း (၃) ရွေးကောက်ပွဲ ကျင်းပနေသည့် အချိန်တွင် စစ်ကိုင်းတိုင်း ကနီမြို့ပတ်ဝန်းကျင်ကျေးရွာများကို စစ်ကော်မရှင်က လေကြောင်းမှ ဗုံးကြဲ တိုက်ခိုက်ခဲ့သည်။ စစ်ကိုင်းတိုင်း၊ ယင်းမာပင်ခရိုင်၊ ကနီမြို့နယ်တွင် မဲရုံဖွင့်၍ ရွေးကောက်ပွဲလုပ်နေစဉ် မြို့ပတ်လည်ရှိ ကျေးရွာများကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့သည်ဟု မြေပြင် သတင်းရင်းမြစ်က ပြောသည်။ ကနီမြို့နယ်တွင် စစ်အုပ်စုက ရွေးကောက်ပွဲ အပိုင်း (၃) ကို ယနေ့ ဇန်နဝါရီလ ၂၅ ရက်နေ့တွင် ကျင်းပနေသော် လည်း မြို့ပတ်လည်ရှိ ကျေးရွာများကိုမူ လေကြောင်းနှင့် လက်နက်ကြီးများ အသုံးပြု၍ ဗုံးကြဲတိုက်ခိုက်မှုများ ဆက်တိုက် လုပ်ဆောင်နေကြောင်း ဒေသခံသတင်းရင်းမြစ်များက ပြောသည်။ ယနေ့နံနက် ၇ နာရီခွဲခန့်မှ စတင်ကာ စစ်ကော်မရှင်တပ်သည် ကနီမြို့ပေါ်တွင် မဲရုံများဖွင့်လှစ်ထားသော်လည်း မြို့နှင့် ကပ်လျက်ရှိသည့် တဇယ်ချောင်၊ ကျန်းဖျား၊ စိန်ကုန်းနှင့် အလည်ကျွန်းစသည့် ကျေးရွာများကို မုံရွာနမခမှ တက်လာသည့် ပါရာမော်တာ (Paramotor) နှစ်စီးနှင့် ဂျိုင်အိုကော်ပရာ (Gyrocopter) တစ်စီးတို့ဖြင့် အနည်း ဆုံး သုံးကြိမ်ထက်မနည်း ဗုံးကြဲတိုက်ခိုက်ခဲ့ခြင်း ဖြစ်သည်။ ကနီမြို့နယ် ပြည်သူ့အုပ်ချုပ်ရေးအဖွဲ့ (ပအဖ) မှ တာဝန်ရှိသူတစ်ဦးက “မြို့ထဲကနေ လက်နက်ကြီးတွေနဲ့လည်း လှမ်းထုနေသလို လေကြောင်းကနေ ၁၂၀ မမ ဗုံးသီးတွေ ဆယ်လုံးထက်မနည်း လာချသွားပါတယ်။ သူတို့ အဓိကလုပ်နေတာက ရွေးကောက်ပွဲကို တော်လှန်ရေးတပ်တွေ လာတိုက်မှာ ကြောက်လို့ အကာအကွယ်ယူတဲ့ သဘောနဲ့ မြို့ပတ်လည်က ရွာတွေကို ကြိုတင်ပတ်ပစ်နေတာပါ” ဟု ပြောသည်။ ကနီမြို့ပေါ်တွင် မဲရုံသုံးရုံခန့် ဖွင့်လှစ်ထားသော်လည်း မဲလာပေးသူမရှိသလောက် နည်းပါးနေပြီး မဲရုံမှူး တစ်ဦး တည်းကသာ မဲရုံနှစ်ရုံကို တာဝန်ယူနေရသည့် အခြေအနေမျိုးဖြစ်နေကြောင်း မြေပြင်သတင်းရင်းမြစ်က ပြော သည်။ ထို့ပြင် ပြည်သူ့လွှတ်တော်နှင့် တိုင်းလွှတ်တော် ကိုယ်စားလှယ်များအတွက် ယှဉ်ပြိုင်သူမရှိဘဲ စစ်ကော်မရှင် လက်ဝေခံ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) မှ ကိုယ်စားလှယ်များကသာ တစ်ဦးတည်း အမည်စာရင်းပေးထားသဖြင့် မဲမပေးခင်ကတည်းက အနိုင်ရရှိပြီးသား ဖြစ်နေသည်ဟု စောင့်ကြည့်သူများက ဆိုသည်။ ကနီမြို့ခံ အမျိုးသမီးတစ်ဦးက “မနက်ကတည်းက လေယာဉ်သံတွေကြားနေရတာ။ ဗုံးသံတွေကလည်း တုန်နေတာပဲ။ ကျမတို့မှာတော့ မဲပေးဖို့ဝေး လက်နက်ကြီးသံ၊ ဗုံးသံ၊ လေယာဉ်သံပဲ အာရုံစိုက်နေရတာ။ အသံကြားတာနဲ့ ပြေး ဗုံးခိုကျင်းထဲကို” ဟု ပြောသည်။ ကနီမြို့နယ်တွင် ကျေးရွာအုပ်စု ၄၅ အုပ်စုရှိသော်လည်း စစ်ကော်မရှင်သည် မြို့ပေါ်ရပ်ကွက် ၃ ခု၌သာ မဲပုံးထောင်နိုင်ခြင်းဖြစ်သည်။ ပြီးခဲ့သည့် ဇန်နဝါရီလ ၂၂ ရက်နေ့ကလည်း ကနီမြို့နယ်အတွင်း လေကြောင်း တိုက်ခိုက်မှုကြောင့် အရပ်သား တစ်ဦး သေဆုံးကာ ၅ ဦး ဒဏ်ရာရရှိခဲ့သည့် ဖြစ်စဉ်ရှိခဲ့ပြီး ယနေ့တွင်လည်း မုံရွာအခြေစိုက် နမခမှ ပါရာမော်တာများ ကနီမြို့ပေါ်တွင် ဆက်လက်ပျံဝဲနေဆဲ ဖြစ်သည်။ ကနီမြို့သည် ၂၀၂၄ ခုနှစ် မတ်လအတွင်းက တော်လှန်ရေး ပူးပေါင်းတပ်များ၏ မြို့သိမ်းတိုက်ပွဲ ဆင်နွှဲခြင်း ခံခဲ့ရ ဖူးပြီး ၁၁ ရက်ကြာ တိုက်ပွဲအတွင်း စစ်ကော်မရှင်ဘက်မှ ၄၇ ဦးအထိ သေဆုံးခဲ့ဖူးသည့် စစ်ရေးပြင်းထန်ရာ ဒေသတစ်ခုလည်း ဖြစ်သည်။ လက်ရှိတွင် ရွေးကောက်ပွဲ အပိုင်း (၃) တွင် ပါဝင်သည့် ကနီနှင့် ဆားလင်းကြီးမြို့နယ်တို့၌ စစ်ရေးတင်းမာမှု များနှင့် အတူ ဒေသခံများမှာ ဘေးလွတ်ရာသို့ ထွက်ပြေး ပုန်းအောင်းနေကြရသည်။  

ရွေးကောက်ပွဲ ကျင်းပစဉ် မြို့အနီး ကျေးရွာများကို ဗုံးကြဲတိုက်ခိုက်

ရွေးကောက်ပွဲ ကျင်းပစဉ် မြို့အနီး ကျေးရွာများကို ဗုံးကြဲတိုက်ခိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၅ ရက်။  အပိုင်း (၃) ရွေ…

  • January 25, 2026
ရွေးကောက်ပွဲ ကျင်းပစဉ် ဖားကန့် မြို့ပေါ် ရပ်ကွက်များအား လက်နက်ကြီးဖြင့် ပစ်ခတ် သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဇန္နဝါရီလ ၂၅ ရက်။ ကချင်ပြည် ဖားကန့် မြို့ပေါ် ရပ်ကွက် တချို့တွင် ရွေးကောက်ပွဲ အပိုင်း (၃) ကျင်းပနေစဉ် လက်နက်ကြီးကျည်များ ကျရောက်ပေါက်ကွဲ သဖြင့် ဒေသခံ ၅ ဦး ထိခိုက်ဒဏ်ရာရခဲ့သည်ဟု မြို့ခံ သတင်းရင်းမြစ်များက ပြောသည်။  ကချင်ပြည်၊ ဖားကန့်မြို့ပေါ်ရပ်ကွက် အချို့တွင် စစ်ကော်မရှင်က အပိုင်း (၃) ရွေးကောက်ပွဲ ကျင်းပရန် ကြိုးပမ်း နေသည့် ဇန်နဝါရီလ ၂၅ ရက်နေ့၌ လူနေရပ်ကွက်များ အတွင်းသို့ လက်နက်ကြီးကျည်များ ပစ်ခတ်ခဲ့ခြင်း ဖြစ်သည်။ စစ်ကော်မရှင်က မော်ဝမ်း၊ ငှက်ပျောတော၊ အေးမြသာယာနှင့် မြို့မရပ်ကွက်တို့ရှိ စာသင်ကျောင်းများကို အခြေပြုကာ ရွေးကောက်ပွဲပြုလုပ်နေစဉ် မြို့ပေါ်ရပ်ကွက်များအတွင်းသို့ လက်နက်ကြီးကျည်များ ကျရောက် ခဲ့ခြင်း ဖြစ်သည်။ ဖားကန့်မြို့ခံ အမျိုးသားတစ်ဦးက “မနက်ကတည်းက လက်နက်ကြီးသံတွေက တစ်ချက်ပြီးတစ်ချက်ပဲ၊ အိမ်တွေတောင် တုန်နေတာ။ ရွေးကောက်ပွဲ လုပ်နေတဲ့ ရပ်ကွက်တွေထဲကို လက်နက်ကြီးတွေ ကျနေတာ ဆိုတော့ ဘယ်သူမှ သိပ်ပြီး အပြင်မထွက်ရဲကြဘူး” ဟု ပြောသည်။ ဇန်နဝါရီလ ၂၅ ရက်နေ့၊ နံနက်ပိုင်းတွင် ငှက်ပျောတောရပ်ကွက် အတွင်းရှိ ကုန်စုံဆိုင်တစ်ဆိုင်နှင့် မြို့မကလပ် ကုန်းရှိ လူနေအိမ်များ ပေါ်သို့ လက်နက်ကြီးကျည်များ ကျရောက်ခဲ့ခြင်းကြောင့် အိမ်ထဲတွင်ရှိနေသည့် အရပ်သား ၅ ဦး ဒဏ်ရာရရှိ ခဲ့ကာ လူမှုကူညီရေးအသင်းများက ဆေးခန်းသို့ ပို့ဆောင်ပေးထားရသည်ဟု ဆိုသည်။ အခြားဖားကန့် ဒေသခံတစ်ဦးကလည်း “လက်နက်ကြီးကျည်က ရပ်ကွက်တွေထဲ ကျနေတာဆိုတော့ ဘယ်သူမှ မဲသွားဖို့ မစဉ်းစားအားဘူး၊ အသက်ဘေးကိုပဲ ကြောက်နေရတာ။ စစ်သားတွေကတော့ ကျောင်းတွေထဲမှာ သေနတ်တွေနဲ့ စောင့်နေကြတာပဲ၊ သွားတဲ့လူတွေ ပြောတော့ မဲရုံနားမှာလည်း စစ်သားတွေ၊ ရဲတွေ လက်နက် တွေနဲ့ စောင့်နေကြတာ” ဟု ပြောသည်။ စစ်ကော်မရှင်တပ်သည် ဖားကန့်မြို့အဝင်အထွက် တံတားများကို ဇန်နဝါရီ ၂၃ ရက်ကတည်းက ပိတ်ဆို့ထားပြီး မြို့ပေါ်ရပ်ကွက် ၅ ခုတွင် မဲရုံများဖွင့်လှစ်ရန် ကြိုးပမ်းခဲ့သော်လည်း တိုက်ပွဲများကြောင့် မဲထည့်သူမရှိသလောက် နည်းပါးနေခြင်း ဖြစ်သည်ဟု မြို့ခံများက ပြောသည်။ စစ်ကော်မရှင် ဗျူဟာကုန်းမှ ပစ်ခတ်သည့် လက်နက်ကြီးများသည် တော်လှန်ရေးအဖွဲ့များ ထိန်းချုပ်ရာ ဆိပ်မူ ကျေးရွာ အုပ်စုဘက်သို့လည်း ကျရောက်ခဲ့သဖြင့် အရပ်သား ၂ ဦး ထပ်မံဒဏ်ရာရရှိခဲ့ကြောင်း မြေပြင်သတင်း ရင်းမြစ်က ပြောသည်။ ကချင်ပြည် အတွင်း ဗန်းမော်၊ မံစီ၊ မိုးမောက်၊ ဖားကန့်နှင့် ရွှေကူတို့တွင် ရွေးကောက်ပွဲကျင်းပမည်ဟု စစ်ကော်မရှင်က ကြေညာ ထားသော်လည်း ဖားကန့်နှင့် ရွှေကူမြို့နယ်တို့တွင်သည ရွေးကောက်ပွဲ အပိုင်း ၃ ကို နေရာအချို့တွင်သာ လုပ်နိုင်ခဲ့ခြင်း ဖြစ်သည်။ သို့သော် ဖားကန့်တွင်လည်း ယခုကဲ့သို့ လက်နက်ကြီးသံများ ဆက်တိုက်ကြား နေရသဖြင့် ဒေသခံများမှာ စိုးရိမ်ထိတ်လန့်နေပြီး မဲပေးသူလည်း နည်းပါးသည်ဟု ဆိုကြသည်။ ဓါတ်ပုံ - စစ်ကော်မရှင် (မြို့နယ် ပြန်/ဆက်)  

ရွေးကောက်ပွဲ ကျင်းပစဉ် ဖားကန့် မြို့ပေါ် ရပ်ကွက်များအား လက်နက်ကြီးဖြင့် ပစ်ခတ်

ရွေးကောက်ပွဲ ကျင်းပစဉ် ဖားကန့် မြို့ပေါ် ရပ်ကွက်များအား လက်နက်ကြီးဖြင့် ပစ်ခတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၅ ရက်။  ကခ…

  • January 25, 2026
နာရေး ဆုတောင်းပွဲကို ဗုံးကြဲ တိုက်ခိုက်ရာ အရပ်သားများ အစုအပြုံလိုက် သေဆုံး သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၃ ရက်။ ကချင်ပြည်၊ ဗန်းမော်မြို့နယ်ရှိ ကျေးရွာတစ်ရွာတွင် နာရေးရက်လည် ဆုတောင်းပွဲ ပြုလုပ်ရန် ပြင်ဆင်နေသည့် အရပ်သားပြည်သူများကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့သဖြင့် ကလေးငယ်များ အပါ အဝင် ဒေသခံ ၂၁ ဦး သေဆုံးခဲ့ပြီး၊ ၂၈ ဦး ထိခိုက်ဒဏ်ရာ ရရှိခဲ့သည်။ ဇန်နဝါရီလ ၂၂ ရက်နေ့၊ ညနေ ၄ နာရီ အချိန်ခန့်တွင် ဗန်းမော်မြို့၏ အနောက်ဘက်ကမ်း ၅ မိုင်ခန့်အကွာရှိ ကောင်ဂျာကျေးရွာအတွင်းသို့ စစ်ကော်မရှင်တပ်က ဂျက်ဖိုက်တာဖြင့် ဗုံး ၃ လုံး ကြဲချတိုက်ခိုက်ခဲ့ခြင်း ဖြစ်သည် ဟု ကချင်လွတ်လပ်ရေးတပ်မတော် (KIO/KIA) သတင်းနှင့် ပြန်ကြားရေးတာဝန်ခံ ဗိုလ်မှူးကြီးနော်ဘူက အတည်ပြု ပြောသည်။ ဗိုလ်မှူးကြီးနော်ဘူက “သူတို့ ရက်လည်ဆုတောင်းပွဲ လုပ်ဖို့ ပြင်ဆင်နေတဲ့အချိန်မှာ ညနေပိုင်း မနေ့က ညနေ ပိုင်း ၄ နာရီခွဲ အချိန်မှာ အဲဒီ စစ်ကော်မရှင်က ဂျက်ဖိုက်တာနဲ့ လာပြီးမှ ဗုံးကြဲတယ်တဲ့ ဗုံးကြဲတော့ လူက နည်း နည်းစုနေတဲ့ အချိန်ဆိုတော့ ထိခိုက်တာကတော့ များတာပေါ့။ အခုထက်ထိ ရရှိထားတဲ့ သတင်းကတော့ သေတဲ့ လူတွေကတော့ ၂၁ ယောက် ဖြစ်တယ်တဲ့ တကယ်လို့များ တိုးလို့ရှိရင်တော့ ၂၂ ယောက်များ ဖြစ်မလား ဒါကတော့ အတည်ပြုလို့တော့ မရသေးပါဘူးနော်” ဟု ဆိုသည်။ ထိခိုက်ဒဏ်ရာရရှိသူများနှင့် ပတ်သက်၍လည်း “ဒဏ်ရာရပြီးမှ ဆေးရုံရောက်တဲ့ လူတွေကတော့ ၂၈ ယောက် ရှိပါတယ်။ ဆိုတော့ ၂၈ ယောက်ထဲက အယောက် ၂၀ ကတော့ ဆေးရုံတင်ပြီးမှ ကုသရတယ်။ ကျန်တဲ့ ၈ ယောက်ကိုတော့ အပြင်လူနာ အနေနဲ့ ကုသပေးနေတယ်” ဟု ၎င်းက ဆက်ပြောသည်။ အဆိုပါ တိုက်ခိုက်ခံရသည့် နေရာသည် တိုက်ပွဲဖြစ်ပွားခြင်း မရှိသည့်အပြင် လက်နက်ကိုင် အဖွဲ့အစည်းများ လည်း မရှိဘဲ စစ်ဘေးရှောင် ပြည်သူများ ခိုလှုံနေသည့် နေရာများကိုပါ ပစ်မှတ်ထား တိုက်ခိုက်ခဲ့ခြင်း ဖြစ် ကြောင်း မြေပြင်သတင်းရင်းမြစ်များက ပြောသည်။ ဗိုလ်မှူးကြီးနော်ဘူက “အဲဒီနေရာမှာတော့ တိုက်ပွဲလည်း မရှိပါဘူး။ နောက်အဲဒီရွာမှာလည်း လက်နက်ကိုင် အဖွဲ့အစည်းတွေလည်း မရှိပါဘူး။ သူတို့စစ်ရှောင် ပြည်သူလူထုတွေရှိတယ်။ အရင်က ရွာတွေဖြစ်နေတယ်။ နောက်စစ်ရှောင် ပြည်သူလူထုတွေ ရောက်လာတယ်။ စာသင်ကျောင်းတွေရှိတယ်။ ဆိုတော့ မနေ့က ဗုံးကြဲတဲ့ အချိန်မှာ ဂျက်ဖိုက်တာကတော့ ပတ်ပြီးမှ သုံးနေရာလောက်ကို ဗုံးကြဲတယ်လို့တော့ ပြောတယ်။ သုံးနေရာ ဆိုတာ ခုနပြောတဲ့ အဲဒီ နာရေးအိမ်မှာလည်း နောက်စာသင်ကျောင်းတို့ ဈေးတန်းနဲ့ အဲဒီ စစ်ရှောင်စခန်းတို့ ပေါ့နော် အဲဒီမှာ ပတ်ပြီးမှ ဗုံးကြဲတယ်လို့ ပြောပါတယ်” ဟု ရှင်းပြသည်။ စစ်ကော်မရှင်တပ်သည် ဗန်းမော်မြို့အတွင်းရှိ ၎င်းတို့လက်လွတ်ထားရသည့် နေရာများကို ပြန်လည်ရယူရန် တိုက်ပွဲများ ပြင်းထန်စွာ ဖော်ဆောင်နေသော်လည်း ယခုကဲ့သို့ မြို့ပြင်ကျေးရွာများရှိ အရပ်သားများကိုပါ လေကြောင်းမှ ရည်ရွယ်ချက်ရှိရှိ တိုက်ခိုက်လာခြင်းမှာ ပြည်သူများကို ခြိမ်းခြောက်သည့် လုပ်ရပ်ဖြစ်ကြောင်း စစ်ရေးစောင့်ကြည့်နေသူများက ထောက်ပြထားသည်။။ ကချင်ပြည် အတွင်းရှိ မြို့နယ်အများစုတွင် စစ်ရေးတင်းမာမှုများ မြင့်တက်နေသကဲ့သို့ စစ်ကော်မရှင်တပ်၏ လေကြောင်း တိုက်ခိုက်မှုနှင့် လူ့အခွင့်အရေး ချိုးဖောက်မှုများကြောင့် ဒေသခံပြည်သူများသည် နေ့စဉ်နှင့်အမျှ လုံခြုံမှု ကင်းမဲ့နေပြီး စိုးရိမ်ထိတ်လန့်စွာ နေထိုင်နေရကြောင်း လူ့အခွင့်အရေး လှုပ်ရှားသူများက ထောက်ပြ ပြောဆိုထားသည်။

နာရေး ဆုတောင်းပွဲကို ဗုံးကြဲ တိုက်ခိုက်ရာ အရပ်သားများ အစုအပြုံလိုက် သေဆုံး

နာရေး ဆုတောင်းပွဲကို ဗုံးကြဲ တိုက်ခိုက်ရာ အရပ်သားများ အစုအပြုံလိုက် သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၃ ရက်။  ကချင်ပ…

  • January 23, 2026
တနှစ်အတွင်း ရန်ကုန်တိုင်း၌ စစ်ကော်မရှင်၏ ဖမ်းဆီးမှု ခံရသူ ၂၀၀၀ ကျော်ရှိ။ ၁၅၀၀ နီးပါး ပျောက်ဆုံးနေ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၃ ရက်။ ရန်ကုန်တိုင်းအတွင်းရှိ မြို့နယ်အသီးသီးတွင် ၂၀၂၅ ခုနှစ် တစ်နှစ်တာအတွင်း စစ်ကော်မရှင်၏ မတရား ဖမ်းဆီး ခြင်းခံရသူ စုစုပေါင်း ၂,၀၃၅ ဦးအထိ ရှိခဲ့ကြောင်း Rangoon Scout Team (RST) အဖွဲ့က ထုတ်ပြန်လိုက်သည်။ အဆိုပါ ဖမ်းဆီးမှုများသည် ကိုကိုကျွန်းမြို့နယ်မှအပ ကျန်ရှိသည့် မြို့နယ် ၄၄ ခုလုံးတွင် ဖြစ်ပွားခဲ့ခြင်းဖြစ်ပြီး စစ်မှုထမ်းရန်အတွက် လမ်းပေါ်တွင် ဖမ်းဆီးခြင်း၊ နေအိမ်များအထိ လိုက်လံရှာဖွေခြင်းနှင့် နိုင်ငံရေးအရ စွပ်စွဲ ဖမ်းဆီးခြင်းများ ပါဝင်နေသည်။ RST မှ သတင်းအချက်အလက်ဆိုင်ရာ တာဝန်ရှိသူတစ်ဦးက “လူ ၂,၀၃၅ ဦးက ဖမ်းဆီးခံရတဲ့ လူဦးရေ စုစုပေါင်းပါ။ စစ်မှုထမ်းအတွက် လမ်းပေါ် လိုက်ဆွဲတာတွေကော၊ စာရင်းနဲ့ အိမ်ထိလိုက်ရှာဆွဲတာတွေကော ပါပါတယ်။ အဲ့အပြင် တော်လှန်ရေးအလုပ်တွေ လုပ်လို့၊ စစ်တပ်ကို ဝေဖန်လို့၊ ရွေးကောက်ပွဲကို ဝေဖန်လို့ စသဖြင့် စွပ်စွဲပြီး ဖမ်းတာတွေလည်း ပါပါတယ်ဗျ” ဟု ပြောသည်။ မှတ်တမ်းများအရ ဖမ်းဆီးခံရသူ ၂,၀၃၅ ဦးအနက် ၂၈၂ ဦးသာ ပြန်လည်လွတ်မြောက်ခဲ့ပြီး ၂၉၄ ဦးမှာ အကျဉ်း ထောင်များနှင့် စစ်သင်တန်းကျောင်းများသို့ ပို့ဆောင်ခံခဲ့ရသည်ဟု RST က ဇန်နဝါရီလ ၂၁ ရက်နေ့တွင် ထုတ်ပြန်သည်။ ကျန်ရှိသည့် ၁,၄၅၉ ဦးမှာမူ မည်သည့်နေရာသို့ ရောက်ရှိနေမှန်းမသိဘဲ ယနေ့တိုင် ပျောက်ဆုံးနေဆဲဖြစ်သည်ဟု ထုတ်ပြန်ချက်ထဲတွင် ဖော်ပြထားသည်။ အထူးသဖြင့် စစ်မှုထမ်းဥပဒေဖြင့် ဖမ်းဆီးခေါ်ဆောင်ခံရသူ ၃၉၃ ဦးရှိသည့်အနက် ၁၇၇ ဦးမှာ စစ်သင်တန်း ကျောင်းများသို့ ရောက်ရှိသွားခဲ့ကြောင်း RST က ဖော်ပြသည်။ အဆိုပါ စစ်မှုထမ်းရန် ဖမ်းဆီးခံရသူများထဲမှ ၂၉ ဦးမှာ ငွေကြေးဖြင့် ပြန်လည်ရွေးချယ်နိုင်သဖြင့် လွတ်မြောက် လာခဲ့ပြီး ၁၅ ဦးမှာမူ ကိုယ်တိုင် ထွက်ပြေးလွတ်မြောက်နိုင်ခဲ့ကြသည်။ RST တာဝန်ရှိသူက “စစ်မှုထမ်းအတွက် ဖမ်းခံရတဲ့ စာရင်းက ကျနော်တို့ လူရင်းတွေဆီက သိရတာကော၊ မီဒီယာသတင်းတွေကော ပါပါတယ်။ ပိုက်ဆံနဲ့ ပြန်ရွေးလိုက်နိုင်တာတွေရော အဲကနေ သိရတာပေါ့နော်။ အဲ့ ဖြစ်စဉ်တွေကလည်း ကာယ ကံရှင်တွေနဲ့ နီးစပ်သူတွေဆီက သိရတာနဲ့ မီဒီယာသတင်းတွေကနေ ဒေတာယူထား တာပါ။ ကျနော်တို့ သိရ သလောက် ဒေတာတွေပါ။ မြေပြင်နဲ့တော့ အနည်းငယ်ကွာနိုင်ပါတယ်။ ဒီစာရင်းထက် တော့ မလျော့နိုင်ပါဘူး” ဟု ဆက်လက်ရှင်းပြသည်။ ၂၀၂၅ ခုနှစ်အတွင်း စစ်မှုထမ်းအပတ်စဉ် ၉ မှ ၂၀ အထိ ခေါ်ယူခဲ့ရာတွင် ရန်ကုန်တိုင်းအတွင်း၌ အပတ်စဉ် ၁၂ ခုစာအတွက် လူဦးရေ ၆,၀၀၀ ခန့်အထိ စစ်မှုထမ်းရန် စုဆောင်းဖမ်းဆီးခံခဲ့ရနိုင်သည်ဟု RST က ခန့်မှန်းထား သည်။ ရန်ကုန်သည် လူဦးရေ အများဆုံးရှိရာ ဒေသဖြစ်သဖြင့် အခြားပြည်နယ်နှင့် တိုင်းများထက် အဖမ်းအဆီး ပိုမိုများပြားနိုင်ကြောင်းလည်း သုံးသပ်ကြသည်။ မြို့နယ်အလိုက် ဖမ်းဆီးမှုများတွင် သာကေတမြို့နယ်သည် လူဦးရေ ၁၅၀ ဝန်းကျင်ဖြင့် အများဆုံးဖြစ်ပြီး၊ မြောက်ဒဂုံမြို့နယ်တွင် ၁၁၀ ဝန်းကျင်ဖြင့် ဒုတိယအများဆုံးဖြစ်သည်။ သင်္ဃန်းကျွန်း၊ မြောက်ဥက္ကလာ၊ အင်းစိန်၊ လှိုင်နှင့် တာမွေမြို့နယ်တို့တွင်လည်း တစ်မြို့နယ်လျှင် လူ ၁၀၀ နီးပါးခန့်စီ ဖမ်းဆီးခံခဲ့ရကြောင်း ဆိုသည်။ ယခုထုတ်ပြန်သည့် စာရင်းတွင် ခိုးဆိုးလုယက်မှု၊ မူးယစ်ဆေးဝါးနှင့် ရာဇဝတ်မှုများကြောင့် ဖမ်းဆီးခံရသူများ မပါဝင်ဘဲ စစ်ကောင်စီကို ဆန့်ကျင်မှုနှင့် အကြောင်းမဲ့ မတရားဖမ်းဆီးခံရသူများကိုသာ သီးသန့်ကောက်ယူ ထား ခြင်းဖြစ်ကြောင်း RST က ဆိုသည်။ လက်ရှိတွင် ရန်ကုန်မြို့နေ လူငယ်များမှာ လမ်းပေါ်ထွက်ရန်ပင် လုံခြုံမှုမရှိတော့ဘဲ စစ်ဘေးအန္တရာယ်၏ ခြိမ်းခြောက်မှုအောက်တွင် ရှင်သန်နေထိုင်နေကြရသည်။  

တနှစ်အတွင်း ရန်ကုန်တိုင်း၌ စစ်ကော်မရှင်၏ ဖမ်းဆီးမှု ခံရသူ ၂၀၀၀ ကျော်ရှိ။ ၁၅၀၀ နီးပါး ပျောက်ဆုံးနေ

တနှစ်အတွင်း ရန်ကုန်တိုင်း၌ စစ်ကော်မရှင်၏ ဖမ်းဆီးမှု ခံရသူ ၂၀၀၀ ကျော်ရှိ။ ၁၅၀၀ နီးပါး ပျောက်ဆုံးနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ …

  • January 23, 2026
သတင်းသမားများ အလုပ်လုပ်ရာတွင် ပဋိပက္ခ အခြေအနေများက အကြီးမားဆုံး စိန်ခေါ်မှု ဖြစ်လာ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၃ ရက်။ လက်ရှိဖြစ်ပွားနေသည့် ပဋိပက္ခများအတွင်း သတင်းထောက်များ အတွက် ဘေးကင်းလုံခြုံရေးနှင့် သတင်း လွတ်လပ်စွာ ရယူခွင့်ရရှိရေးသည် အကြီးမားဆုံးသော စိန်ခေါ်မှုဖြစ်နေကြောင်း လွတ်လပ်သော မြန်မာ သတင်းမီဒီယာ ကောင်စီ (IPCM) က သတိပေး ပြောကြားလိုက်သည်။ စစ်အာဏာ သိမ်းပြီးနောက်ပိုင်း မြန်မာနိုင်ငံသည် ကမ္ဘာ့အဆိုးဆုံး သတင်းလွတ်လပ်ခွင့် ဖိနှိပ်ခံရသည့် နိုင်ငံများ စာရင်းတွင် ပါဝင်နေပြီး၊ စစ်ကော်မရှင် ထိန်းချုပ်ရာ ဒေသများသာမက တော်လှန်ရေးတပ်ဖွဲ့များ ထိန်းချုပ်ရာ နယ်မြေအချို့တွင်လည်း လုံခြုံရေးအကြောင်းပြချက်ဖြင့် သတင်းလုပ်ငန်း လွတ်လပ်စွာ လုပ်ကိုင်ခွင့် ကန့်သတ်ခံနေရသည်ဟု ဆိုသည်။ IPCM ၏ အတွင်းရေးမှူး ဦးတိုးဇော်လတ်က “လုံခြုံရေး အကြောင်းပြချက်နဲ့ လွတ်လပ်စွာ သတင်းယူခွင့် တစ်ချို့ နေရာတွေမှာ မရှိပါဘူး။ သတင်းသမားတွေ သတင်းရယူပိုင်ခွင့်ကို လုံလုံခြုံခြုံနဲ့ အထူးသဖြင့်တော့ နှစ်ဖက်စလုံးမှာပါပဲ စစ်ကောင်စီအုပ်ချုပ်တဲ့ နေရာကော တခြား တော်လှန်ရေးအုပ်စု အုပ်ချုပ်တဲ့ နေရာတွေ မှာပါ ပြောတာပါ။ ဥပမာ - အညာလို ဒေသမှာလည်း ပသုံးလုံးနဲ့ကြားမှာ သတင်းရယူဖို့ အခက်အခဲ အများကြီး ရှိတယ်လို့ မြေပြင်သတင်းတွေက ပြောပါတယ်” ဟု ပြောသည်။ မြေပြင်တွင် သတင်းရယူနေသည့် ကရင်နီအခြေစိုက် အမျိုးသမီးသတင်းထောက် တစ်ဦးကလည်း ပဋိပက္ခ ဒေသများအတွင်း ကြုံတွေ့ရသည့် အခက်အခဲကို ယခုကဲ့သို့ ပြောသည်။ “စစ်ဘက်ဆိုင်ရာနဲ့ ပတ်သက်ပြီးတော့ သတင်းယူဖို့ သွားတဲ့အခါမှာဆိုရင် ကျမတို့ တပ်ရင်းတပ်ဖွဲ့ အများကြီးနဲ့ ကြုံရတယ်ပေါ့နော်။ သူတို့က ဒီဟာကို မယူပါနဲ့ ဒီဟာကို မလုပ်ပါနဲ့ ကိုယ့်ကို ပြောလိုက်လို့ရှိရင် ကိုယ့်မှာ တခြားရွေးချယ်စရာ မရှိဘူးပေါ့နော်။ အဲ့လို ကြုံရတဲ့အခါဆိုရင် စိတ်ထဲမှာ နည်းနည်း အောင့်လာတယ် ပြီးရင် ကြောက်လာတယ်။” ပြီးခဲ့သည့်ကာလအတွင်း သတင်းမီဒီယာသမားများ အပေါ် ကိုယ်ထိလက်ရောက် ကျူးလွန်မှုများနှင့် ဖမ်းဆီးမှု များ ဆက်တိုက်ဖြစ်ပွားခဲ့သည်။ ၂၀၂၄ ခုနှစ်ကုန်ပိုင်းတွင် အရာတော်မြို့နယ်၌ အမျိုးသမီးသတင်းထောက် မငြိမ်းချမ်းစုကြည် ကိုယ်ထိ လက် ရောက် စော်ကားခံခဲ့ရသလို၊ ၂၀၂၅ ခုနှစ်အတွင်း၌လည်း မောင်တောအခြေစိုက် သတင်းထောက် မမုဒြာကို အာရက္ခတပ်တော် (AA) က ဖမ်းဆီးခဲ့သည့် ဖြစ်စဉ်များ ရှိခဲ့သည်။ ထို့ပြင် အလွတ်တန်း သတင်းထောက် မဆွတ်ရိန်ပန် (ခေါ်) ဆွမ်ကိုလည်း စစ်ကော်မရှင်က ပုဒ်မအမျိုးမျိုးဖြင့် ထောင်ဒဏ် ၁၃ နှစ်အထိ ချမှတ်ခဲ့သည်။ စစ်အာဏာသိမ်းပြီး ၅ နှစ်တာကာလအတွင်း စစ်ကော်မရှင်၏ ဖမ်းဆီးနှိပ်စက်မှုနှင့် သတ်ဖြတ်မှုများကြောင့် သတင်းသမား ၇ ဦး သေဆုံးခဲ့ရပြီး ၂၀၀ ကျော် ဖမ်းဆီးခံခဲ့ရသည်။ လက်ရှိ ဇန်နဝါရီလ ဒုတိယပတ်အထိ သတင်းသမား ၂၇ ဦး (အမျိုးသမီး ၅ ဦးအပါအဝင်) မှာ အကျဉ်းထောင် များ၌ ပြစ်ဒဏ်ကျခံနေရဆဲ ဖြစ်သည်။ ၎င်းတို့အနက် ၁၄ ဦးမှာ ထောင်တစ်သက် အပါအဝင် နှစ်ရှည်ထောင်ဒဏ် များ ချမှတ်ခံထားရသည်။ ဦးတိုးဇော်လတ်က “ရှေ့လျှောက် ရွေးကောက်ပွဲအလွန် မီဒီယာကဏ္ဍတွေကတော့ စိန်ခေါ်မှုတွေ ပိုများပါမယ်။ အဲ့အတွက် သတင်းမီဒီယာ သမားတွေရဲ့ လုံခြုံရေး လွတ်လပ်စွာ သတင်းရရှိရေး အဲ့ဒါတွေကို ကြိုးစားလုပ်ကိုင် သွားတဲ့ အခါမှာ အထူးသဖြင့် လွတ်မြောက်နယ်မြေမှာ အုပ်ချုပ်နေတဲ့ တော်လှန်ရေး အဖွဲ့အသီးသီးရဲ့ ပူးပေါင်း ဆောင်ရွက်မှုကို ကျနော်တို့အနေနဲ့ အဓိက ညှိနှိုင်းဆောင်ရွက်ဖော်ဆောင်သွားမယ်” ဟု ရှေ့လုပ်ငန်းစဉ်ကို ပြော သည်။ IPCM အနေဖြင့် သတင်းသမားများ လုံခြုံစွာ သတင်းရယူနိုင်ရေးအတွက် ကရင်အမျိုးသားအစည်းအရုံး KNU၊ ကရင်နီပြည် ကြားကာလအုပ်ချုပ်ရေး ကောင်စီ IEC၊ တအာင်းတပ်မတော် TNLA၊ အမျိုးသား ညီညွတ်ရေး အစိုးရ NUG နှင့် ချင်းညီနောင် (Chin Brotherhood) စသည့် အဖွဲ့အစည်းများနှင့် ညှိနှိုင်းဆောင်ရွက်မှုများ ပြုလုပ်ခဲ့ပြီး ဆက်လက် လုပ်ဆောင် သွားမည်ဟု ဆိုသည်။ ထို့ပြင် IPCM ၏ ဇန်နဝါရီ ၁၇ ရက်နှင့် ၁၈ ရက်နေ့များတွင် ကျင်းပခဲ့သည့် ဒုတိယအကြိမ်မြောက် ညီလာခံကို တက်ရောက်လာသော ကိုယ်စားလှယ်များက မြန်မာနိုင်ငံရှိ အကျဉ်းထောင်အသီးသီးတွင် ဖမ်းဆီးခံထားရသည့် သတင်းသမား ၂၇ ဦးကို ခြွင်းချက်မရှိ အမြန်ဆုံးပြန်လွှတ် ပေးရန်နှင့် သတင်းသမားများအပေါ် ပစ်မှတ်ထား ဖမ်းဆီးနှိပ်စက်ခြင်းများကို ချက်ချင်းရပ်တန့်ရန် တောင်းဆိုခဲ့ကြသည်။ လက်နက်ကိုင်ပဋိပက္ခကြားတွင် သတင်းသမားများ လုံခြုံစွာသတင်းရယူပိုင်ခွင့်ကို အာဏာပိုင်များက လေးစား အသိအမှတ်ပြုရန်နှင့် နိုင်ငံတကာအဖွဲ့အစည်းများအနေဖြင့်လည်း လွတ်လပ်သော မြန်မာသတင်းမီဒီယာများ ရေရှည်ရပ်တည်နိုင်ရေးအတွက် ပံ့ပိုးကူညီပေးရန် ဇန်နဝါရီလ ၁၉ ရက်နေ့တွင် ထုတ်ပြန် တောင်းဆိုထားသည်။ ဓာတ်ပုံ - RFA (ပုံဟောင်း)

သတင်းသမားများ အလုပ်လုပ်ရာတွင် ပဋိပက္ခ အခြေအနေများက အကြီးမားဆုံး စိန်ခေါ်မှု ဖြစ်လာ

သတင်းသမားများ အလုပ်လုပ်ရာတွင် ပဋိပက္ခ အခြေအနေများက အကြီးမားဆုံး စိန်ခေါ်မှု ဖြစ်လာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၃ ရက်။  …

  • January 23, 2026
×Close