သတင်း

ကရင် ဒေသအတွင်း အရပ်သားများအပေါ် ဗုံးကြဲချသဖြင့် လူ ၄၀ ကျော် သေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၀ ရက်။   ပဲခူးတိုင်း၊ ညောင်လေးပင်ခရိုင် အတွင်း စစ်ကော်မရှင်က ရွာသားများကို ဖမ်းဆီးပြီး လူသားဒိုင်းပြုလုပ်ကာ လေကြောင်းမှ ဗုံးကြဲတိုက်ခိုက်မှုကြောင့် အရပ်သား ၄၀ ကျော် သေဆုံးခဲ့သည်။   ညောင်လေးပင်ခရိုင် (ခလယ်လွီထူ)၊ ကျောက်ကြီး (လယ်ဒို) မြို့နယ် အတွင်းသို့ စစ်ကြောင်းထိုးဝင်ရောက်လာ သော စစ်ကော်မရှင်တပ်က အရပ်သားပြည်သူ ၁၆၀ ခန့်ကို အစုလိုက် အပြုံလိုက် ဖမ်းဆီးကာ လူသားဒိုင်းအဖြစ် အသုံးပြုခဲ့သည်ဟု ကရင်အမျိုးသားအစည်းအရုံး (KNU)က မတ်လ ၉ ရက်နေ့တွင် ထုတ်ပြန်သည်။   ထို့ပြင် လေကြောင်းမှ ဗုံးကြဲတိုက်ခိုက်မှုများကြောင့် ကလေးငယ်များ အပါအဝင် အပြစ်မဲ့ပြည်သူ ၄၀ ကျော် သေဆုံးခဲ့ရသည့် ဖြစ်စဉ်တစ်ခု ဖြစ်ပွားခဲ့သည်။   ပြီးခဲ့သည့် မတ်လ ၅ ရက်နေ့မှစတင်ကာ စစ်ကော်မရှင်၏ ခမရ-၂၀၊ ခလရ-၂၆၄ နှင့် ခမရ-၄၃၉ ပူးပေါင်း စစ်ကြောင်းသည် ရေတွင်းကုန်းကျေးရွာအုပ်စုအတွင်းသို့ ဝင်ရောက်စီးနင်းခဲ့ပြီး ရွာသားများ အကြောင်းမဲ့ ဖမ်းဆီးခဲ့ခြင်း ဖြစ်သည်။   ထို့နောက် မတ်လ ၇ ရက်နေ့တွင် နယ်မြေခံ ကရင်အမျိုးသားလွတ်မြောက်ရေး တပ်မတော် (KNLA) နှင့် တိုက်ပွဲ များ ဖြစ်ပွားခဲ့ရာ စစ်ကော်မရှင်တပ်က ဂျက်ဖိုက်တာနှင့် ဒရုန်းများကိုအသုံးပြုကာ ၎င်းတို့ကိုယ်တိုင် ရွာသားများ ကို ဖမ်းဆီးချုပ်နှောင်ထားသည့် နေရာများသို့ပါ ဗုံးကြဲတိုက်ခိုက်ခဲ့ခြင်း ဖြစ်သည်။   ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီ ပြောရေးဆိုခွင့်ရှိသူက “အဲနားတစ်ဝိုက်မှာ အဲဒီကျေးရွာတွေကို တပ်က ဝင်စီးပြီးတော့ ရွာသားတွေကို ဖမ်းတယ်။ ဖမ်းပြီးတော့မှ လေယာဉ်ဗုံးကြဲတယ်။ အဲဒီမှာ ရွာသားပြည်သူတွေ တော်တော်သေတယ်။ ဒီကျောက်ကြီးမြို့နယ်ထဲက စစ်တောင်းမြစ်အနောက်ဖက် အဲဒီရေတွင်းကျေးရွာ ကျောင်းကုန်းကျေးရွာ အဲဒီနားတစ်ဝိုက် စသဖြင့် အဲဒီနားတကြောကရွာတွေ စစ်ကောင်စီ ဖက်က ရွာသားတွေကို ထိုးစစ်ဆင်ပြီးတော့ ပစ်ခတ်တိုက်ခိုက်မှု ဖြစ်တယ်။ ဖြစ်တဲ့အခါကတော့ သူတို့ အဲဒီရွာ ကို ဝင်စီးလို့ ရတဲ့အခါ ရွာသားတွေကို သူတို့ ဖမ်းဆီးထားတယ်။ ပြီးတော့မှ သူတို့ သတ်တဲ့လူသတ်တယ်ပေါ့ နော်။ အဲဒီထဲမှာတော့ အရပ်သားပစ်ခတ်မှုတွေမှာ ပြည်သူ ခန့်မှန်း ၄၀ ကျော်သေတယ်နော်” ဟု ပြောသည်။   KNU ၏ ထုတ်ပြန်ချက်အရ လေကြောင်းတိုက်ခိုက်မှုကြောင့် ဖမ်းဆီးခံထားရသူများအနက် ၂၅ ဦးခန့် သေဆုံး ခဲ့ရပြီး အခြား ၅ ဦးမှာမူ စစ်ကော်မရှင်တပ်၏ သတ်ဖြတ်ခြင်းကို ခံခဲ့ရသည်ဟု ဆိုသည်။   ကျန်ရှိနေသည့် သေဆုံးစာရင်းများကိုမူ ဆက်လက်စိစစ်နေဆဲ ဖြစ်သည်။ မတ်လ ၇ ရက်နေ့၊ ညပိုင်းတွင် KNLA ဘက်မှ သွားရောက်တိုက်ခိုက်ခဲ့သဖြင့် ဖမ်းဆီးခံထားရသူများအနက်မှ ၂၀ ကျော်၊ ၃၀ ခန့်မှာ ထွက်ပြေး လွတ် မြောက်လာနိုင်ခဲ့သည်။   ကူညီကယ်ဆယ်ရေးကော်မတီ တာဝန်ရှိသူက “ရွာသားတစ်ဝက်လုံးနီးပါးပဲပေါ့နော်။ အဲဒီထဲမှာတော့ တစ်ရွာ လုံးကို ဖမ်းထားတာ။ ဟိုးမနက်ပိုင်းမှာ ဖမ်းထားပြီးတော့ ညနေပိုင်းမှာတော့ တစ်ချို့ ကလေးတွေကိုတော့ ပြန် လွတ်ပေးတယ်။ သူတို့ ခေါ်ချင်ထားတဲ့ ခေါ်ထားတဲ့လူတွေလည်း ရှိနေသေးတယ်ပေါ့နော်။ လူဦးရေ ၃၀၀ ဝန်း ကျင် ခန့်မှန်းခြေ တချို့က ထွက်ပြေးလွတ်မြောက်တယ်။ တချို့ကတော့ ပြန်လွတ်ပေးတယ်။ ကလေးမအေ တွေ နည်းနည်း အသုံးမတည့်တဲ့သူတွေပေါ့ ပြန်လွတ်ပေးတယ်။ သေရတဲ့ အဓိက အကြောင်းအရင်းကတော့ ဘာပဲ ဖြစ်ဖြစ်လေ ပြည်သူတွေကို သတ်တာပဲ” ဟု ဆက်ပြောသည်။   စစ်ကော်မရှင်သည် ၎င်းတို့၏ အာဏာတည်မြဲရေးအတွက် အရပ်သားပြည်သူများကို ပစ်မှတ်ထားသည့် လုပ်ရပ် များကို မြန်မာနိုင်ငံအနှံ့ ကျူးလွန်လျက်ရှိပြီး၊ အထူးသဖြင့် အတုအယောင်ရွေးကောက်ပွဲ ကျင်းပပြီးနောက်ပိုင်း   ကာလများတွင် လူ့အခွင့်အရေး ချိုးဖောက်မှုများမှာ ပိုမိုဆိုးရွားပြင်းထန်လာကြောင်း KNU က ထောက်ပြထား သည်။   လက်ရှိတွင် ရေတွင်းကုန်းနှင့် ကျောင်းကုန်းကျေးရွာတစ်ဝိုက်၌ ပစ်ခတ်မှုများ ဆက်လက်ဖြစ်ပွားနေဆဲဖြစ်ကာ ဒေသခံပြည်သူ အများအပြားမှာ ဘေးလွတ်ရာသို့ ထွက်ပြေးတိမ်းရှောင်နေရသည့်အပြင် အချို့မှာလည်း ပိတ်မိနေဆဲဖြစ်သည်။   #ကျောက်ကြီးမြို့နယ် #ခလယ်လွီထူ #စစ်ရာဇဝတ်မှု #လူသားဒိုင်းကာ #စစ်ကော်မရှင် #ညောင်လေးပင်တိုက်ပွဲ #KNU #KNLA  

ကရင် ဒေသအတွင်း အရပ်သားများအပေါ် ဗုံးကြဲချသဖြင့် လူ ၄၀ ကျော် သေဆုံး

  ကရင် ဒေသအတွင်း အရပ်သားများအပေါ် ဗုံးကြဲချသဖြင့် လူ ၄၀ ကျော် သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၀ ရက်။  ပဲခူးတိုင်း၊ ညောင…

  • March 10, 2026
ရှမ်းနယ်စပ်မှ အမျိုးသမီးငယ်တစ်ဦး ချင်းမိုင်မြို့တွင် အသတ်ခံရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၉ ရက်။    ချင်းမိုင်မြို့၊ ဟန်းဒေါင်းမြို့နယ်တွင် အသက် ၂၂ နှစ်အရွယ် စားပွဲထိုးအမျိုးသမီးငယ်တစ်ဦး အသတ်ခံရမှုတွင် တရားခံအား ဖမ်းဆီးရမိခဲ့ပြီ ဖြစ်သည်။   တရားခံမှာ သေဆုံးသူ၏ ဝမ်းကွဲညီမဖြစ်သူ၏ ရည်စားဖြစ်နေသည်။   အခင်းဖြစ်ပွားသည့်နေရာ၌ ရဲတပ်ဖွဲ့က ဆံပင်ဖြောင့်စက် (Hair Straightener) တစ်ခုကို တွေ့ရှိခဲ့ရာ၊ တရားခံက အဆိုပါစက်၏ လျှပ်စစ်ကြိုးကို အသုံးပြု၍ လည်ပင်းညှစ်သတ်ခဲ့ခြင်းဖြစ်သည်။   တရားခံသည် လူသတ်မှုကျူးလွန်ပြီးနောက် ထွက်ပြေးခြင်းမရှိဘဲ အိမ်ရှေ့သို့ ပါဆယ်လာပို့သူအား သေဆုံးသူ၏ ပိုက်ဆံဖြင့် ပေးချေခဲ့သလို၊ ရဲတပ်ဖွဲ့ဝင်များ စစ်ဆေးစဉ်တွင်လည်း အိမ်နီးချင်း တစ်ဦးကဲ့သို့ ဟန်ဆောင်စောင့်ကြည့်နေခဲ့သည်။   တရားခံ၏ ဝန်ခံချက်အရ ၎င်းသည် သေဆုံးသူအား အဓမ္မပြုကျင့်ရန် ကြိုးပမ်းခဲ့သော်လည်း၊ သေဆုံးသူမှာ ရာသီသွေးပေါ်နေသဖြင့် မပြုလုပ်ခဲ့ကြောင်း ထွက်ဆိုထားသည်။   အဆိုပါအမှုနှင့် ပတ်သက်၍ သေဆုံးသူ၏ ဇာတိမြေဖြစ်သော ဝိန်းဟင် (Wiang Haeng) မြို့နယ်မှ ဒေသခံလူအင်အား ၁၀၀ ကျော်မှာ တရားမျှတမှုရရှိရန်အတွက် ချင်းမိုင်မြို့အထိ လိုက်ပါလာခဲ့ကြပြီး မှုခင်းပြန်လည်သရုပ်ပြစဉ်တွင်လည်း တရားခံအား ဝိုင်းဝန်း ထိုးနှက်တိုက်ခိုက်ရန် ကြိုးပမ်းခဲ့ကြသည်။   #ချင်းမိုင် #စားပွဲထိုးအမျိုးသမီး #မုဒိမ်းမှု

ရှမ်းနယ်စပ်မှ အမျိုးသမီးငယ်တစ်ဦး ချင်းမိုင်မြို့တွင် အသတ်ခံရ

ရှမ်းနယ်စပ်မှ အမျိုးသမီးငယ်တစ်ဦး ချင်းမိုင်မြို့တွင် အသတ်ခံရ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၉ ရက်။   ချင်းမိုင်မြို…

  • March 9, 2026
ဖုန်းဆင်းကတ်အငှား မှတ်ပုံတင်ပေးသူများအား ပြင်းထန်စွာ အရေးယူမည်ဟု ထိုင်းအစိုးရ သတိပေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၉ ရက်။    အခြားသူများအတွက် မိမိအမည်ဖြင့် ဆင်းကတ် (SIM Card) မှတ်ပုံတင်ပေးသူများ ပြင်းထန်သော ထောင်ဒဏ်နှင့် ငွေဒဏ်များ ချမှတ်ခံရနိုင်ကြောင်း ထိုင်းအစိုးရက သတိပေးချက် ထုတ်ပြန်သည်။   အခြားသူတစ်ဦးအတွက် ဆင်းကတ်မှတ်ပုံတင်ပေးပါက ထောင်ဒဏ် ၃ နှစ်နှင့် ဒဏ်ငွေ ဘတ် ၃၀၀,၀၀၀ အထိ ချမှတ်ခံရနိုင်သည်။   ယင်းလုပ်ဆောင်ချက်မှာ ဆိုက်ဘာရာဇဝတ်မှုများကို နှိမ်နင်းရန်ဖြစ်ပြီး၊ အခြားသူအမည်ပေါက် ဆင်းကတ်များအသုံးပြု၍ လိမ်လည်နေသော Call Center ဂိုဏ်းများကို ပစ်မှတ်ထားခြင်းဖြစ်သည်။   ဆင်းကတ်များကို ဝယ်ယူခြင်း၊ ရောင်းချခြင်း၊ ငှားရမ်းခြင်း သို့မဟုတ် ကြော်ငြာပေးခြင်း ပြုလုပ်သူများမှာ ပိုမိုပြင်းထန်သော ပြစ်ဒဏ်အဖြစ် ထောင်ဒဏ် ၂ နှစ်မှ ၅ နှစ်အထိနှင့် ငွေဒဏ် ဘတ် ၂ သိန်းမှ ၅ သိန်းအထိ ချမှတ်ခံရနိုင်ကြောင်း သတိပေးထားသည်။ #Thailand #ThaiSimCard #SimCard #ဖုန်းဆင်းကတ်မှတ်ပုံတင်

ဖုန်းဆင်းကတ်အငှား မှတ်ပုံတင်ပေးသူများအား ပြင်းထန်စွာ အရေးယူမည်ဟု ထိုင်းအစိုးရ သတိပေး

ဖုန်းဆင်းကတ်အငှား မှတ်ပုံတင်ပေးသူများအား ပြင်းထန်စွာ အရေးယူမည်ဟု ထိုင်းအစိုးရ သတိပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၉ ရက်။  …

  • March 9, 2026
ထိုင်ဝမ် ဝန်ကြီးချုပ် ဂျပန် ခရီးစဉ် တရုတ်ကန့်ကွက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၉ ရက်။    ထိုင်ဝမ်ဝန်ကြီးချုပ် ချိုဂျောင်တိုင် (Cho Jung-tai) ၏ ဂျပန်နိုင်ငံခရီးစဉ်နှင့် ပတ်သက်၍ တရုတ်အစိုးရက ပြင်းထန်စွာ ကန့်ကွက်နေကြောင်း Jiji Press သတင်းဌာနက ထုတ်ပြန်သည်။   တရုတ်ဒုတိယနိုင်ငံခြားရေးဝန်ကြီး ဆန်ဝေတုံး (Sun Weidong) သည် တရုတ်နိုင်ငံဆိုင်ရာ ဂျပန်သံအမတ်ကြီးထံသို့ စနေနေ့ညပိုင်းက ဖုန်းဖြင့် ဆက်သွယ်ကန့်ကွက်ခဲ့သလို၊ တိုကျိုမြို့ရှိ တရုတ်သံရုံးကလည်း ဂျပန်နိုင်ငံခြားရေးဝန်ကြီးဌာနသို့ တရားဝင် ကန့်ကွက်လွှာ ပေးပို့ခဲ့သည်။   ထိုင်ဝမ်ဝန်ကြီးချုပ်သည် စနေနေ့က တိုကျိုဒုန်း (Tokyo Dome) ကွင်း၌ ကျင်းပသည့် ထိုင်ဝမ်နှင့် ချက်သမ္မတနိုင်ငံတို့၏ ဘေ့စ်ဘောပြိုင်ပွဲကို သွားရောက်ကြည့်ရှုခဲ့ခြင်းဖြစ်သည်။   ယင်းခရီးစဉ်မှာ ၁၉၇၂ ခုနှစ်နောက်ပိုင်း ဂျပန်နိုင်ငံသို့ သွားရောက်သည့် ပထမဆုံးသော လက်ရှိတာဝန်ထမ်းဆောင်ဆဲ ထိုင်ဝမ်ဝန်ကြီးချုပ်၏ ခရီးစဉ်ဖြစ်သည်။   ဂျပန်နိုင်ငံဘက်ကမူ ၎င်းမှာ ဝန်ကြီးချုပ်၏ ပုဂ္ဂိုလ်ရေးခရီးစဉ်သာဖြစ်သဖြင့် မှတ်ချက်ပေးရန် မရှိကြောင်း တုံ့ပြန်ထားသည်။ #ChoJungtai #ထိုင်ဝမ်ဝန်ကြီးချုပ်

ထိုင်ဝမ် ဝန်ကြီးချုပ် ဂျပန် ခရီးစဉ် တရုတ်ကန့်ကွက်

ထိုင်ဝမ် ဝန်ကြီးချုပ် ဂျပန် ခရီးစဉ် တရုတ်ကန့်ကွက်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၉ ရက်။   ထိုင်ဝမ်ဝန်ကြီးချုပ် ချိုဂျောင…

  • March 9, 2026
အီရန်နိုင်ငံ၏ အမြင့်ဆုံးခေါင်းဆောင်သစ် အဖြစ် အယာတိုလာ ခါမေနီ၏ သားကို ခန့်အပ်၊ တိုက်ခိုက်မှုများ ပြင်းထန်ဆဲ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၉ ရက်။    အီရန်နိုင်ငံ၏ အမြင့်ဆုံးခေါင်းဆောင် အယာတိုလာ အလီခါမေနီ (Ayatollah Ali Khamenei) ကွယ်လွန်ပြီး ၉ ရက်အကြာတွင် အီရန်ဘာသာရေးခေါင်းဆောင်များအဖွဲ့ (Assembly of Experts) သည် ၎င်း၏သားဖြစ်သူ မိုဂျ်တာဘာ ခါမေနီ (Mojtaba Khamenei) ကို အမြင့်ဆုံးခေါင်းဆောင်သစ်အဖြစ် တနင်္ဂနွေနေ့တွင် အတည်ပြုခန့်အပ်ခဲ့သည်။   အမေရိကန်သမ္မတ ဒေါ်နယ်ထရန့်က ခေါင်းဆောင်သစ်ခန့်အပ်မှုတွင် အမေရိကန်၏ သဘောထားပါဝင်ရမည်ဖြစ်ကြောင်း၊ သို့မဟုတ်ပါက အဆိုပါခေါင်းဆောင်မှာ ရေရှည်တည်တံ့မည်မဟုတ်ကြောင်း သတိပေးပြောကြားခဲ့သော်လည်း၊ အီရန်အစိုးရဘက်ကမူ ၎င်းမှာ မိမိတို့၏ ပြည်တွင်းရေးသာဖြစ်ကြောင်း တုံ့ပြန်ခဲ့သည်။   လက်ရှိတွင် အီရန်နိုင်ငံအတွင်း တိုက်ခိုက်မှုများ ဆက်လက်ဖြစ်ပွားလျက်ရှိရာ စနေနေ့ညပိုင်းက အစ္စရေး၏ လေကြောင်းတိုက်ခိုက်မှုကြောင့် တီဟီရန်မြို့ပတ်ဝန်းကျင်ရှိ ရေနံသိုလှောင်ရုံ ၅ ခု မီးလောင်ကျွမ်းခဲ့သည်။   ယင်းအကျိုးဆက်ကြောင့် မြို့ပေါ်တွင် မီးခိုးအမည်းရောင်များ ဖုံးလွှမ်းလျက်ရှိပြီး လေထုညစ်ညမ်းမှု ဆိုးဝါးနေသဖြင့် ပြည်သူများအား နေအိမ်အတွင်း၌သာ နေထိုင်ရန် သတိပေးထားရသည်။   ထို့ပြင် ဓာတ်ဆီဆိုင်များတွင် လောင်စာဆီပြတ်လပ်ခြင်း၊ လျှပ်စစ်နှင့် ရေပေးဝေရေးစနစ်များ ထိခိုက်ခြင်းတို့ ဖြစ်ပေါ်လျက်ရှိသည်။   တစ်ဖက်တွင်လည်း အစ္စရေးနိုင်ငံ၊ တဲလ်အဗစ် (Tel Aviv) မြို့ပေါ်၌ ပေါက်ကွဲသံများ ကြားနေရပြီး လူအချို့ ဒဏ်ရာရရှိမှုများ ရှိနေသည်။   အီရန်ကျန်းမာရေးဝန်ကြီးဌာန၏ ထုတ်ပြန်ချက်အရ ပစ်ခတ်တိုက်ခိုက်မှုများကြောင့် အရပ်သား ၁,၂၀၀ ခန့် သေဆုံးပြီး ၁၀,၀၀၀ ကျော် ဒဏ်ရာရရှိထားသည်။   အစ္စရေး၏ ဗုံးကြဲမှုကြောင့် လက်ဘနွန်နိုင်ငံတွင် ကလေးငယ် ၈၃ ဦး အပါအဝင် လူပေါင်း ၄၀၀ နီးပါး သေဆုံးခဲ့သည်။   အီရန်၏ တိုက်ခိုက်မှုများကြောင့် ဆော်ဒီအာရေးဗီးယားတွင် လူသေဆုံးမှုရှိခဲ့သလို၊ ကူဝိတ်လေဆိပ်ရှိ လောင်စာဆီသိုလှောင်ရုံများလည်း ထိမှန်ခဲ့သည်။   ဟော်မုဇ်ရေလက်ကြား (Strait of Hormuz) တွင်မူ လုံးဝပိတ်ဆို့ထားခြင်း မရှိသေးသော်လည်း ရေယာဉ်အသွားအလာများ ကင်းမဲ့လျက်ရှိသည်။   အမေရိကန်နှင့် မဟာမိတ်ရေတပ်များက ရေနံတင်သင်္ဘောများကို အစောင့်အရှောက်ဖြင့် သွားလာနိုင်ရန် ကြိုးပမ်းနေသော်လည်း အီရန်ဘက်မှ ဒုံးကျည်တိုက်ခိုက်မှုများ ရှိနေသဖြင့် လုံခြုံရေးမှာ စိုးရိမ်ရသည့် အခြေအနေတွင် ရှိနေသည်။   ကမ္ဘာ့ရေနံကုမ္ပဏီအများစုသည် ဟော်မုဇ်ရေလက်ကြားကို ရှောင်ကွင်း၍ အာဖရိကတိုက်ကို ပတ်ရသည့် လမ်းကြောင်းရှည်ကို ပြောင်းလဲအသုံးပြုနေရသဖြင့် ခရီးစဉ် ၂ ပတ်ခန့် ပိုမိုကြာမြင့်ကာ သယ်ယူပို့ဆောင်ခများ အဆမတန် မြင့်တက်လျက်ရှိသည်။ #AyatollahAliKhamenei #MojtabaKhamenei

အီရန်နိုင်ငံ၏ အမြင့်ဆုံးခေါင်းဆောင်သစ် အဖြစ် အယာတိုလာ ခါမေနီ၏ သားကို ခန့်အပ်၊ တိုက်ခိုက်မှုများ ပြင်းထန်ဆဲ

အီရန်နိုင်ငံ၏ အမြင့်ဆုံးခေါင်းဆောင်သစ် အဖြစ် အယာတိုလာ ခါမေနီ၏ သားကို ခန့်အပ်၊ တိုက်ခိုက်မှုများ ပြင်းထန်ဆဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မ…

  • March 9, 2026
Mi-17 ရဟတ်ယာဉ် KIA ပစ်ခတ်မှုကြောင့် အရေးပေါ် ဆင်းသက်ခဲ့ရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၆ ရက်။ တိုက်ပွဲများ ဖြစ်ပွားနေသည့် ကချင်ပြည်၊ ဗန်းမော်မြို့နယ်တွင် စစ်ကော်မရှင် ရဟတ်ယာဉ် တစ်စီး KIA ပစ်ခတ်မှု ကြောင့် ဆီတိုင်ကီ ထိမှန်ကာ အရေးပေါ်ဆင်းသက်ခဲ့ရသည်။ ဗန်းမော်မြို့တိုက်ပွဲအတွင်း ဒဏ်ရာရရှိသွားသည့် စစ်ကော်မရှင် တပ်ရင်းမှူးကို လာရောက်ကယ်ထုတ်သည့် Mi-17 အမျိုးအစား ရဟတ်ယာဉ်တစ်စီးကို ကချင်လွတ်လပ်ရေးတပ်မတော် (KIA) နှင့် ပူးပေါင်းတပ်များက ယနေ့ မတ်လ ၆ ရက် နေ့လယ်ပိုင်းတွင် ပစ်ခတ်တိုက်ခိုက်ခဲ့ခြင်း ဖြစ်သည်။ အဆိုပါ ပစ်ခတ်တိုက်ခိုက်မှုကြောင့် ထိမှန်မှုများရှိပြီး ရွှေကူမြို့အနီးတွင် အရေးပေါ်ဆင်းသက်ခဲ့ရကြောင်း စစ်ရေး သတင်းရင်းမြစ်များက ပြောသည်။ ဖြစ်စဉ်မှာ ယနေ့ မွန်းလွဲ ၂ နာရီခန့်တွင် ဗန်းမော်တိုက်ပွဲအတွင်း ထိခိုက်ဒဏ်ရာရသွားသည့် ဗိုလ်မှူးအဆင့်ရှိ တပ်ရင်းမှူးတစ်ဦးကို လာရောက်ခေါ်ဆောင်စဉ် KIA ပူးပေါင်းတပ်များက လက်နက်ကြီးများဖြင့် ပစ်ခတ် တိုက်ခိုက်ခဲ့ခြင်း ဖြစ်သည်။ ပစ်ခတ်မှုကြောင့် ရဟတ်ယာဉ်၏ ဆီတိုင်ကီနှင့် နောက်ပိုင်းတို့ ထိမှန်သွားပြီး မီးခိုးများအူကာ ရွှေကူမြို့အပြင် ဘက်သို့ အမြန်ဆုံး ဦးတည်ပျံသန်းခဲ့ရသည်။ မြေပြင်သတင်းရင်းမြစ်က “ပုဇင်းက ဗန်းမော်ကနေ ပြန်တက်တာနဲ့ ကျနော်တို့ဘက်က လက်နက်ကြီးနဲ့ လှမ်း ပစ်တဲ့ချိန် ထိသွားတာလို့ ပြောလို့ရတယ်။ ထိသွားတော့ ဆီတိုင်ကီပွင့်သွားတယ်လို့ ပြောတယ်ဗျ။ လေယာဉ်က ပျက်ကျသွားတာမျိုးတော့ မဟုတ်ဘူးနော်။ အခု ကျနော်တို့ ရတဲ့ အချက်အလက်အရဆိုရင် ရွှေကူဘက်မှာ အရေးပေါ် ဆင်းလိုက်ရတဲ့ ပုံစံမျိုးပါ” ဟု ပြောသည်။ ပုဇင်းဆိုသည်မှာ ရဟတ်ယာဉ်ကို ပြောခြင်း ဖြစ်သည်။ အဆိုပါ ရဟတ်ယာဉ်သည် ရွှေကူမြို့အခြေစိုက် ခလရ (၅၆) တပ်ရင်းအတွင်းသို့ ဆင်းသက်ရန် ကြိုးပမ်းခဲ့သော် လည်း မရောက်ရှိမီ မြို့အပြင်ဘက်၌ အရေးပေါ်ဆင်းသက်ခဲ့ရခြင်းဖြစ်ကာ လက်ရှိတွင် Y-12 လေယာဉ် တစ်စီး က ကောင်းကင်မှ အကာအကွယ်ပေးထားသည်ဟုလည်း သတင်းဌာနအချို့တွင် ဖော်ပြကြသည်။ ယနေ့ နေ့လယ်ပိုင်းတွင် ဖြစ်ပွားခဲ့သည့် ရဟတ်ယာဉ် ထိမှန်မှုဖြစ်စဉ်နှင့် ပတ်သက်၍ ကချင်လွတ်လပ်ရေးအဖွဲ့ (KIO/KIA) ပြောရေးဆိုခွင့်ရှိသူ ဗိုလ်မှူးကြီးနော်ဘူက ယခုကဲ့သို့ ပြောသည်။ “ဗန်းမော်ဘက်က တိုက်ပွဲက သိပ်ပြင်းထန်တာတော့ မရှိဘူး။ လေကြောင်းနဲ့ ပစ်တာတွေတော့ ရှိတယ်။ ရဟတ် ယာဉ်တစ်စီး ပစ်ချလိုက်တယ်ဆိုတာကတော့ အခုထက်ထိ confirm မဖြစ်ဘူး။ ပစ်ပြီးမှ ထိတော့ ထိတယ်လို့ တော့ ပြောတယ်။ ရွှေကူမှာ ခနဆင်းပြီးတော့ ပြန်သွားတယ်လို့တော့ ပြောကြတယ်။ Mi-17 လို့တော့ ပြော တယ်။ လူကြီးပိုင်းတွေကိုများ လူလဲတာတွေပေါ့နော် လူနာတွေကို ကယ်ထုတ်တာလား အဲ့လိုမျိုးတော့ သုံးသပ် ကြတယ်။” အလားတူ မတ်လ ၅ ရက်နေ့ကလည်း ဗန်းမော်မြို့နယ်အတွင်း တိုက်ပွဲအချို့ရှိခဲ့သည့်အပြင် စစ်ကော်မရှင်တပ် က လေကြောင်းမှ တစ်ဆင့် ထောက်ပံ့ရေးပစ္စည်းများ လာရောက်ချပေးခဲ့သည့် ဖြစ်စဉ်များရှိခဲ့ကြောင်း ၎င်းက ဆိုသည်။ ဗိုလ်မှူးကြီးနော်ဘူက “ဗန်းမော်ဘက်မှာလည်း တိုက်ပွဲ ရှိတယ်။ လေကြောင်းနဲ့ ပစ်တာတော့ရှိတယ်။ ဒီနေ့ တောင်မှ ပစ္စည်းတွေ ချပေးတယ်လို့ ပြောတယ်။ KIA နဲ့ ပူးပေါင်းတပ်တွေလည်း ထိုးစစ်ဆင်တာတော့ မရှိဘူး။ စစ်ကောင်စီဘက်က ထိုးလာလို့ရှိရင်တော့ ခုခံတိုက်ပွဲ တွေတော့ ရှိပါတယ်” ဟုလည်း မတ်လ ၅ ရက်နေ့တွင် သတင်းနှင့်မီဒီယာကွန်ရက်ကို ပြောဆိုထားသည်။ KIA အနေဖြင့် စစ်အာဏာသိမ်းပြီးနောက်ပိုင်း စစ်ကော်မရှင်၏ တိုက်လေယာဉ်နှင့် ရဟတ်ယာဉ်များကို အကြိမ် ကြိမ် ပစ်ချနိုင်ခဲ့သည်။ ပြီးခဲ့သည့် ၂၀၂၅ ခုနှစ် မေလကလည်း ဗန်းမော်တိုက်ပွဲသို့ စစ်ကူလာသည့် ရဟတ်ယာဉ် ၃ စီးကို တိုက်ခိုက်ခဲ့ရာ တစ်စီးပျက်ကျပြီး ကျန်တစ်စီးမှာ ရွှေကူတွင် အရေးပေါ်ဆင်းသက်ခဲ့ရသည့် သာဓကများ ရှိခဲ့သည်။ ဗန်းမော်မြို့သိမ်းတိုက်ပွဲသည် ၂၀၂၄ ခုနှစ် ဒီဇင်ဘာလမှ စတင်ကာ ယနေ့အထိ တစ်နှစ်ခွဲကျော်ကြာမြင့်လာပြီ ဖြစ်သော်လည်း နှစ်ဖက်စလုံးမှ အရေးပါသည့် တပ်စခန်းများကို လက်လွှတ်ရခြင်း မရှိသေးဘဲ တိုက်ပွဲများမှာ ပြင်းထန်စွာ ဆက်လက်ဖြစ်ပွားနေဆဲဖြစ်သည်။ ယခုဖြစ်စဉ်နှင့် ပတ်သက်၍ စစ်ကော်မရှင်တပ်ဘက်ကမူ တစ်စုံတစ်ရာ ထုတ်ပြန်ခြင်း မရှိသေးပေ။ ဓါတ်ပုံ - ပုံဟောင်း #KIA #KIO #ဗန်းမော်တိုက်ပွဲ #စစ်ကော်မရှင် #Mi-17

Mi-17 ရဟတ်ယာဉ် KIA ပစ်ခတ်မှုကြောင့် အရေးပေါ် ဆင်းသက်ခဲ့ရ

Mi-17 ရဟတ်ယာဉ် KIA ပစ်ခတ်မှုကြောင့် အရေးပေါ် ဆင်းသက်ခဲ့ရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၆ ရက်။ တိုက်ပွဲများ ဖြစ်ပွားနေသည့် ကချင်ပြည…

  • March 6, 2026
ကချင်ပြည်နယ်တွင် အရပ်သား ရပ်ရွာများကို ပစ်မှတ်ထား တိုက်ခိုက်မှုများ ပိုများလာ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၆ ရက်။   ကချင်ပြည်တွင် စစ်ကော်မရှင်က ပြည်သူများရှိရာ ရပ်ရွာများကို လေကြောင်းမှ ပစ်မှတ်ထားတိုက်ခိုက်မှုများ လုပ်နေသည့်အပြင် နှစ်ဖက်ကြား စစ်ရေးတင်းမာမှု မြင့်တက်နေသည်ဟု KIO က ပြောသည်။   စစ်ကော်မရှင်တပ်သည် တိုက်ပွဲဖြစ်ပွားခြင်း မရှိသည့် နေရာများရှိ ပြည်သူလူထုကို လေကြောင်းမှ တစ်ဆင့် ရည်ရွယ်ချက်ရှိရှိ တိုက်ခိုက်နေမှုများအပေါ် ဗိုလ်မှူးကြီးနော်ဘူက ယခုကဲ့သို့ ထောက်ပြထားသည်။   “တိုက်ပွဲမရှိဘဲနဲ့ လေကြောင်းကနေ ဗုံးကြဲတာကတော့ ပြည်သူလူထုတွေ ရှိတဲ့နေရာမှာ ဗုံးကြဲတာလည်း ရှိတော့ရှိတယ်။ အခု သုံးရက်လောက် ဝိုင်းမော်မြို့နယ် ဆမ်ပိုင်ဆိုတဲ့ ရွာမှာလည်း ညသန်းခေါင်ယံ ၁၀ နာရီ ဝန်းကျင်လောက်မှာ ဗုံးကြဲတာ ရှိတယ်။ ဒါကပြည်သူထူပဲရှိတယ်။ တိုက်ပွဲလည်း မရှိဘူး၊ စခန်းလည်း မရှိဘူး၊ ဘာမှမရှိဘူး။ အဲ့ဒီနေရာမှာ ပြည်သူလူထုပဲ ရှိတဲ့နေရာမှာ သူတို့ ဗုံးကြဲတာ ဒါမျိုးတွေတော့ ရှိတယ်” ဟု ၎င်းက ဆက်ပြောသည်။   ကချင်ပြည် အတွင်းရှိ ဗန်းမော်၊ ဝိုင်းမော်နှင့် ဖားကန့်မြို့နယ်တို့တွင် စစ်ရေးအခြေအနေမှာ ဆက်လက် တင်းမာ နေပြီး ပြင်းထန်သော မြေပြင်တိုက်ပွဲကြီးများ မရှိသော်လည်း စစ်ကော်မရှင်တပ်က တိုက်ပွဲမရှိသည့် အရပ်သား နေထိုင်ရာ ကျေးရွာများကို လေကြောင်းနှင့် လက်နက်ကြီးများဖြင့် ပစ်မှတ်ထား တိုက်ခိုက်နေခြင်း ဖြစ်သည်။   ကချင်လွတ်လပ်ရေးအဖွဲ့ KIO/KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက “တင်းမာတာကတော့ ဗန်းမော် ဘက်မှာတော့ အချိန်မရွေး တိုက်ပွဲ ဖြစ်နိုင်တာပေါ့။ ဝိုင်းမော်တို့၊ ဖားကန့်တို့၊ အင်းတော်ကြီးတို့ ပေါ့နော် တင်း မာတဲ့ အနေအထားဖြစ်ပါတယ်။ ခေါင်လံဖူးတို့မှာတော့ အချိန်မရွေး တိုက်ပွဲဖြစ်နိုင်တဲ့ မြို့နယ်တွေ ဖြစ်ပါ တယ်။ ဗန်းမော်ဘက်မှာလည်း တိုက်ပွဲရှိတယ်။ လေကြောင်းနဲ့ ပစ်တာတော့ရှိတယ်။ ဒီနေ့တောင်မှ ပစ္စည်းတွေ ချပေးတယ်လို့ ပြောတယ်။ KIA နဲ့ ပူးပေါင်းတပ်တွေလည်း ထိုးစစ်ဆင်တာတော့ မရှိဘူး။ စစ်ကောင်စီဘက်က ထိုးလာလို့ရှိရင်တော့ ခုခံတိုက်ပွဲတွေတော့ ရှိပါတယ်” ဟု ပြောသည်။   မတ်လ ၅ ရက်နေ့က ဗန်းမော်မြို့နယ်အတွင်း တိုက်ပွဲအချို့ရှိနေပြီး စစ်ကော်မရှင်တပ်က လေကြောင်းမှ တစ်ဆင့် ထောက်ပံ့ရေးပစ္စည်းများ လာရောက်ချပေးခဲ့သည့် ဖြစ်စဉ်များရှိခဲ့ကြောင်းလည်း ဗိုလ်မှူးကြီးနော်ဘူက ပြောသည်။   ဖားကန့်ဘက်တွင်မူ ရက်အနည်းငယ်ကြာ တိုက်ပွဲငယ်လေးများ ဆက်ရှိနေပြီး ဗန်းမော်ဘက်တွင်မူ စစ်ကော်မရှင် တပ်က လက်နက်ကြီးများ၊ ဒရုန်းများနှင့် လေကြောင်းပစ်ခတ်မှုများကို ပုံမှန်လုပ်ဆောင်နေသည်။   ထို့ပြင် ဝိုင်းမော်မြို့နယ် အတွင်းရှိ စစ်ကော်မရှင်၏ ဗျူဟာကုန်းနှင့် တပ်မကုန်းများမှ လက်နက်ကြီးများဖြင့် ရမ်းသန်းပစ်ခတ်မှုကြောင့် ပြီးခဲ့သည့်ရက်ပိုင်းအတွင်းက ဒေသခံပြည်သူ ၃ ဦးထက်မနည်း ထိခိုက်ဒဏ်ရာ ရရှိခဲ့ သည့် ဖြစ်စဉ်များလည်း ရှိခဲ့သည်။   လတ်တလောတွင် ဆွမ်ပရာဘွမ်နှင့် ခေါင်လန်ဖူးဘက်တို့၌ တိုက်ပွဲများ ခေတ္တငြိမ်သက်နေသော်လည်း ဗန်းမော်၊ ဝိုင်းမော်၊ ဖားကန့်နှင့် အင်းတော်ကြီးဒေသတို့တွင် စစ်ရေးတင်းမာမှုများမှာ လျော့ကျသွားခြင်းမရှိဘဲ အချိန်မရွေး တိုက်ပွဲများ ပြန်လည်ပြင်းထန်လာနိုင်သည့် အခြေအနေတွင် ရှိနေသည်။   စစ်ကော်မရှင်က လေကြောင်းအင်အားကို အသုံးပြု၍ လူနေရပ်ရွာများကိုပါ ပစ်မှတ်ထားလာခြင်းကြောင့် ဒေသခံ ပြည်သူများအကြား စိုးရိမ်ထိတ်လန့်မှုများ ပိုမိုမြင့်တက်လျက်ရှိသည်။   #ကချင်တိုက်ပွဲ

ကချင်ပြည်နယ်တွင် အရပ်သား ရပ်ရွာများကို ပစ်မှတ်ထား တိုက်ခိုက်မှုများ ပိုများလာ

ကချင်ပြည်နယ်တွင် အရပ်သား ရပ်ရွာများကို ပစ်မှတ်ထား တိုက်ခိုက်မှုများ ပိုများလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၆ ရက်။  ကချင်ပြည်…

  • March 6, 2026
မူးယစ် မောင်းနှင်မှုဖြင့် အဆိုတော် ဘရစ်တ်နီ စပီးယား ဖမ်းဆီးခံရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၆ ရက်။   ကမ္ဘာကျော်အဆိုတော် ဘရစ်တ်နီ စပီးယားသည် အရက်နှင့် မူးယစ်ဆေးဝါး ရောနှောသုံးစွဲထားပြီး မတ်လ ၄ ရက် ညပိုင်းတွင် မူးယစ်ရီဝေစွာ ကားမောင်းနှင်ခဲ့သည်ဟူသော သံသယဖြင့် ကယ်လီဖိုးနီးယား အဝေးပြေးလမ်းမကြီး ရဲတပ်ဖွဲ့ (CHP) ၏ ဖမ်းဆီးခြင်းကို ခံခဲ့ရကြောင်း ရဲမှတ်တမ်း၌ ဖော်ပြထားပါသည်။ ဘရစ်တ်နီ စပီးယား မောင်းနှင်လာသည့် BMW 430i အမျိုးအစား မော်တော်ယာဉ်သည် လမ်းပေါ်၌ အရှိန်ပြင်းစွာဖြင့် ပုံမှန်မဟုတ်ဘဲ မောင်းနှင်နေကြောင်း တိုင်ကြားချက်အရ ရဲတပ်ဖွဲ့က လိုက်လံတားဆီးခဲ့ခြင်း ဖြစ်သည်။   ၎င်းကို ကြာသပတေးနေ့ နံနက်အစောပိုင်းတွင် ပြန်လည်လွှတ်ပေးခဲ့ပြီး မေလ ၄ ရက်နေ့၌ တရားရုံးသို့ လာရောက်ရန် ဆင့်ခေါ်ထားပါသည်။   ဘရစ်တ်နီ စပီးယားသည် ၁၉၉၀ ပြည့်လွန်နှစ်များ အကုန်တွင် တစ်ကမ္ဘာလုံးကို လွှမ်းမိုးခဲ့သော အဆိုတော်တစ်ဦး ဖြစ်သည်။   အသက် ၁၆ နှစ်အရွယ်တွင် ထွက်ရှိခဲ့သည့် "...Baby One More Time" သီချင်းသည် ကမ္ဘာတစ်ဝှမ်းတွင် အရောင်းရဆုံး ဖြစ်ခဲ့ပြီး ၎င်းကို နေ့ချင်းညချင်း ကြယ်ပွင့်တစ်ဦး ဖြစ်လာစေခဲ့သည်။   ထို့နောက် "Oops!... I Did It Again", "Toxic", "Gimme More" စသည့် သီချင်းများဖြင့် အယ်လ်ဘမ်ပေါင်း သန်း ၁၅၀ ကျော် ရောင်းချခဲ့ရပြီး ပေါ့ပ်ဂီတလောက၏ ပြယုဂ်တစ်ခု ဖြစ်လာခဲ့သည်။   ၂၀၀၇ ခုနှစ်ဝန်းကျင်တွင်မူ ၎င်းသည် စိတ်ပိုင်းဆိုင်ရာ ပြင်းထန်သော ဖိအားများနှင့် ကြုံတွေ့ခဲ့ရသည်။   မီဒီယာများ၏ အလွန်အကျွံ စောင့်ကြည့်ခံရခြင်းနှင့် အိမ်ထောင်ရေးပြိုကွဲခြင်းတို့ကြောင့် စိတ်ပိုင်းဆိုင်ရာ ဝေဒနာခံစားခဲ့ရပြီး ခေါင်းတုံးတုံးခြင်းနှင့် ပါပါရာဇီများကို ထီးဖြင့်ရိုက်ခြင်းများ ဖြစ်ပွားခဲ့သည်။   ၂၀၀၈ ခုနှစ်တွင် တရားရုံးက ၎င်း၏ဖခင်အား ဘရစ်တ်နီ၏ ဘဝနှင့် ငွေကြေးအားလုံးကို စီမံခန့်ခွဲခွင့် ပေးခဲ့သည်။ ၎င်းမှာ ယာယီဟု ထင်မြင်ခဲ့ကြသော်လည်း ၁၃ နှစ်တိုင် ကြာမြင့်ခဲ့သည်။   ၎င်းအား ဖခင်ဖြစ်သူက အကျဉ်းသားတစ်ဦးကဲ့သို့ ချုပ်ကိုင်ထားပြီး အတင်းအကျပ် အလုပ်လုပ်ခိုင်းနေသည်ကို ပရိသတ်များ သိရှိလာကြသောအခါ "ဘရစ်တ်နီကို လွတ်လပ်ခွင့်ပေးပါ" (Free Britney) ဟူသော ကမ္ဘာလုံးဆိုင်ရာ လှုပ်ရှားမှုကြီး ပေါ်ပေါက်လာခဲ့သည်။   ၂၀၂၁ ခုနှစ်၊ နိုဝင်ဘာလတွင်မူ တရားရုံးက အဆိုပါချုပ်ကိုင်မှုကို တရားဝင် ရုပ်သိမ်းပေးခဲ့ပါသည်။   #ဘရစ်တ်နီစပီးယား #Britneyspears

မူးယစ် မောင်းနှင်မှုဖြင့် အဆိုတော် ဘရစ်တ်နီ စပီးယား ဖမ်းဆီးခံရ

မူးယစ် မောင်းနှင်မှုဖြင့် အဆိုတော် ဘရစ်တ်နီ စပီးယား ဖမ်းဆီးခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၆ ရက်။  ကမ္ဘာကျော်အဆိုတော် ဘရစ်တ…

  • March 6, 2026
ပင်လယ်ကွေ့နိုင်ငံများ ရေနံ လမ်းကြောင်းသစ် ရှာဖွေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၆ ရက်။   အီရန်၏ တိုက်ခိုက်မှုအန္တရာယ်ကြောင့် ဟော်မုဇ်ရေလက်ကြားတွင် သင်္ဘောသွားလာမှုများ ရပ်တန့်လုနီးပါး ဖြစ်ပေါ်နေသဖြင့် ဆော်ဒီအာရေဗျနှင့် ယူအေအီး (UAE) နိုင်ငံများသည် အခြားလမ်းကြောင်းသစ်များကို ရှာဖွေလျက်ရှိကြသည်။     ဆော်ဒီအစိုးရပိုင် အာရမ်ကို (Aramco) ကုမ္ပဏီသည် ၎င်းတို့၏ ရေနံစိမ်းများကို ပင်လယ်နီ (Red Sea) လမ်းကြောင်းမှတစ်ဆင့် ပြောင်းလဲတင်ပို့ရန် ကြိုးပမ်းနေကြောင်း ရိုက်တာသတင်းဌာန၌ ဖော်ပြထားသည်။   အမေရိကန်နှင့် အစ္စရေးတို့က အီရန်ကို စတင်တိုက်ခိုက်ခဲ့သည့် သောကြာနေ့မှစ၍ ဆော်ဒီ၊ ယူအေအီး၊ ကူဝိတ်နှင့် အီရတ်နိုင်ငံတို့သည် ဟော်မုဇ်ရေလက်ကြားမှတစ်ဆင့် ရေနံတင်ပို့နိုင်ခြင်း မရှိတော့ပေ။   အီရန်နိုင်ငံကလည်း ဤလမ်းကြောင်းကို ဖြတ်သန်းသည့် မည်သည့်သင်္ဘောကိုမဆို ပစ်ခတ်မည်ဟု ခြိမ်းခြောက်ထားသည်။   ထို့ကြောင့် ဆော်ဒီအာရမ်ကိုကုမ္ပဏီသည် ရေနံထုတ်လုပ်မှု မရပ်နားလိုသဖြင့် အရှေ့-အနောက် ပိုက်လိုင်း (East-West Pipeline) ကို အသုံးပြုကာ ပင်လယ်နီဘက်ရှိ ယန်ဘူ (Yanbu) ဆိပ်ကမ်းမှတစ်ဆင့် ရေနံတင်ပို့ရန် ဝယ်ယူသူများအား အကြောင်းကြားထားသည်။   အဆိုပါပိုက်လိုင်းသည် တစ်ရက်လျှင် ရေနံစည် ၅ သန်းမှ ၇ သန်းအထိ သယ်ဆောင်နိုင်စွမ်း ရှိသည်။   သို့သော်လည်း လမ်းကြောင်းပြောင်းလဲရန်အတွက် စိန်ခေါ်မှုများ ရှိနေပါသေးသည်။   ယန်ဘူဆိပ်ကမ်း၌ ပိုက်လိုင်းမှ ပို့လွှတ်လိုက်သော ရေနံပမာဏအားလုံးကို သင်္ဘောပေါ်သို့ တင်ဆောင်ပေးနိုင်သည့် စွမ်းဆောင်ရည် ရှိ၊ မရှိအပေါ် ကုန်သည်များက သံသယရှိနေကြသည်။       ထို့ပြင် ရေနံပိုက်လိုင်းမှာ အီရန်နှင့် ၎င်း၏မဟာမိတ်များ၏ ပစ်မှတ်ဖြစ်လာနိုင်သကဲ့သို့ ပင်လယ်နီလမ်းကြောင်းတွင်လည်း ယီမင်နိုင်ငံရှိ အီရန်မဟာမိတ်များ၏ တိုက်ခိုက်မှုအန္တရာယ် ရှိနေပါသည်။   ယန်ဘူဆိပ်ကမ်းမှ ရေနံတင်ဆောင်ခများမှာလည်း နှစ်ဆကျော် မြင့်တက်သွားခဲ့သည်။   ဆော်ဒီအာရေဗျနိုင်ငံကဲ့သို့ပင် ယူအေအီးနိုင်ငံ၌လည်း ဟော်မုဇ်ရေလက်ကြားကို ရှောင်ကွင်း၍ ဖူဂျာအီရာ (Fujairah) ဆိပ်ကမ်းသို့ ပို့ဆောင်နိုင်သည့် ပိုက်လိုင်းရှိသော်လည်း အဆိုပါဆိပ်ကမ်းမှာ ဒရုန်းဖြင့် တိုက်ခိုက်ခံခဲ့ရသဖြင့် ရေနံတင်ဆောင်မှုများ နှောင့်နှေးကြန့်ကြာလျက် ရှိပါသည်။ #လောင်စာဆီ #ပင်လယ်ကွေ့နိုင်ငံများ #ဆော်ဒီအာရေဗျ #ယူအေအီး #ရေနံလမ်းကြောင်းသစ် #ရေနံ

ပင်လယ်ကွေ့နိုင်ငံများ ရေနံ လမ်းကြောင်းသစ် ရှာဖွေ

ပင်လယ်ကွေ့နိုင်ငံများ ရေနံ လမ်းကြောင်းသစ် ရှာဖွေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၆ ရက်။  အီရန်၏ တိုက်ခိုက်မှုအန္တရာယ်ကြောင့် ဟေ…

  • March 6, 2026
×Close