သတင်း

တစ်နှစ်အတွင်း အမျိုးသမီး ၈၀၀ နီးပါး စစ်ကော်မရှင်ကြောင့် သေဆုံးဟု BWU ထုတ်ပြန် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၀ ရက်။ မြန်မာနိုင်ငံတစ်ဝန်း တစ်နှစ်အတွင်း အမျိုးသမီး ၈၀၀ နီးပါး သေဆုံးခဲ့ပြီးနောက် စစ်ကော်မရှင်တပ်၏ လူ့အခွင့်အရေးချိုးဖောက်မှုများ ရပ်တန့်ရန် BWU တောင်းဆိုလိုက်သည်။ မြန်မာနိုင်ငံတစ်ဝန်းတွင် ပြီးခဲ့သည့် ၂၀၂၅ ခုနှစ်အတွင်း စစ်ကော်မရှင်၏ အကြမ်းဖက်ဖြိုခွင်းမှုများနှင့် တိုက်ပွဲ များကြောင့် အမျိုးသမီး စုစုပေါင်း ၇၉၂ ဦး သေဆုံးခဲ့ရပြီးနောက်၊ ဆိုးဝါးလှသည့် လူ့အခွင့်အရေး ချိုးဖောက်မှု များကို အမြန်ဆုံးရပ်တန့်စေရန် အာဆီယံနှင့် နိုင်ငံတကာအသိုင်းအဝန်းသို့ မြန်မာ့အမျိုးသမီးသမဂ္ဂ (BWU) က တောင်းဆိုလိုက်သည်။ BWU ၏ တွဲဖက်အထွေထွေအတွင်းရေးမှူး – ၂ မယဉ်မျိုးလှိုင်က ကျူးလွန်သူများ ပြစ်ဒဏ်မှ ကင်းလွတ်ခွင့်ရနေ ခြင်းကို အဆုံးသတ်ရန်နှင့် နိုင်ငံတကာအနေဖြင့် စစ်ကော်မရှင်နှင့် ဆက်သွယ်မှုကို ဖြတ်တောက်ရန် ယခုကဲ့သို့ ပြောသည်။ “စစ်အုပ်စုက သူတို့ တရားဝင်မှုရဖို့အတွက် အကြမ်းဖက်မှုတွေကို ကျူးလွန်နေတာဖြစ်တယ်။ ဒါကြောင့်မို့လို့ သူတို့နဲ့ နိုင်ငံတကာအသိုင်းအဝန်းက အလုပ်တွေလုပ်တယ်၊ ဆက်သွယ်ဆက်ဆံတယ်ဆိုလို့ရှိရင် ဒါက အကြမ်း ဖက်မှုတွေကို အားပေးရာရောက်တယ်ဆိုတဲ့ အချက်နဲ့ပေါ့နော်။ ကျမတို့က နိုင်ငံတကာအသိုင်းအဝန်းကို သူတို့နဲ့ ဆက်သွယ်ဆက်ဆံမှုတွေ ဆက်မလုပ်ဖို့ တိုက်တွန်းချင်တာဖြစ်ပါတယ်” ဟု ၎င်းက ပြောသည်။ မြန်မာ့အမျိုးသမီးသမဂ္ဂ (BWU) က ဇန်နဝါရီလ ၁၅ ရက်နေ့တွင် ထုတ်ပြန်သည့် ၂၀၂၅ ခုနှစ် နှစ်ပတ်လည် အစီရင်ခံစာအရ တစ်နှစ်တာအတွင်း အသက် ၁၈ နှစ်အောက် မိန်းကလေးငယ် ၁၅၄ ဦးနှင့် ကိုယ်ဝန်ဆောင် အမျိုးသမီး ၅ ဦး အပါအဝင် အမျိုးသမီး ၇၉၂ ဦး သေဆုံးခဲ့ကာ ၈၁၅ ဦး ထိခိုက်ဒဏ်ရာရရှိခဲ့ကြောင်း ဖော်ပြ ထားသည်။ သေဆုံးရသည့် အဓိကအကြောင်းရင်းမှာ စစ်ကော်မရှင်၏ လေကြောင်း တိုက်ခိုက်မှုကြောင့် ဖြစ်ပြီး အမျိုးသမီး ၆၂၁ ဦးအထိ အသက်ဆုံးရှုံးခဲ့ရခြင်း ဖြစ်သည်။ ထို့အပြင် လက်နက်ကြီး ပစ်ခတ်မှုကြောင့် ၁၀၂ ဦး၊ မတရား သတ်ဖြတ်ခံရမှုကြောင့် ၃၉ ဦးနှင့် မြေမြှုပ်မိုင်း၊ မီးရှို့သတ်ဖြတ်မှု၊ လိင်ပိုင်းဆိုင်ရာ အကြမ်းဖက်မှုနှင့် ထောင်တွင်း ဆေးဝါးကုသခွင့် မရရှိမှုတို့ကြောင့် ကျန်ရှိသည့် အမျိုးသမီးများ သေဆုံးခဲ့ရကြောင်း အစီရင်ခံစာတွင် အသေးစိတ်ဖော်ပြထားသည်။ ဒေသအလိုက် သေဆုံးမှုစာရင်းတွင် စစ်ကိုင်းတိုင်းသည် အမျိုးသမီး ၂၁၇ ဦးဖြင့် အများဆုံးဖြစ်ပြီး မန္တလေး တိုင်းတွင် ၁၂၃ ဦးနှင့် ရခိုင်ပြည်တွင် ၁၁၉ ဦးဖြင့် ဒုတိယနှင့် တတိယ အများဆုံးဖြစ်ကြောင်း ဖော်ပြသည်။ ရှမ်း၊ မကွေး၊ ပဲခူးနှင့် ကရင်နီ (ကယား) ပြည်တို့တွင်လည်း သေဆုံးမှုများ မြင့်တက်နေဆဲ ဖြစ်သည်။ စစ်ကော်မရှင်သည် လူနေရပ်ကွက်များနှင့် အရပ်သားများရှိရာ နေရာများကို ပစ်မှတ်ထားကာ လေကြောင်း တိုက်ခိုက်မှုများ ပြုလုပ်နေခြင်းအပေါ် ကချင်လူ့အခွင့်အရေး စောင့်ကြည့်ရေးအဖွဲ့ (KHRW) ကလည်း ရှုတ်ချထားသည်။ KHRW ပြောရေးဆိုခွင့်ရှိသူ ဂျေကော့က “စစ်ကောင်စီက ပြည်သူလူထုတွေ နေတဲ့နေရာတွေ၊ လုပ်ငန်းလုပ်တဲ့ နေရာတွေမှာ ရည်ရွယ်ချက်ရှိရှိ လေကြောင်းတိုက်ခိုက်တာ ပိုများပါတယ်။ ဒီလိုအခြေအနေမှာ ကလေးတွေ အပါအဝင် သေဆုံးမှုတွေ ရှိပါတယ်။ မြန်မာပြည်မှာ လူ့အခွင့်အရေးချိုးဖောက်နေတဲ့ စစ်ကောင်စီအုပ်စုကို အမြန်ဆုံး အရေးယူဆောင်ရွက်ပေးဖို့ နိုင်ငံတကာစစ်ခုံရုံးကို ကျနော်တို့အနေနဲ့ တိုက်တွန်းချင်ပါတယ်။ ပြီး တော့ နိုင်ငံတကာအသိုင်းအဝန်းအနေနဲ့ ပြည်သူလူထုနဲ့အတူ ဆက်လက်ရပ်တည်ပေးဖို့ တောင်းဆိုလိုပါတယ်” ဟု ပြောသည်။ လက်ရှိတွင် စစ်ကော်မရှင်တပ်သည် စစ်ရာဇဝတ်မှုနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို ဗြောင်ကျကျ ဆက်လက် ကျူးလွန်နေခြင်းကြောင့် အမျိုးသမီးများသည် နေ့စဉ်နှင့်အမျှ အသက်အန္တရာယ် ခြိမ်းခြောက်ခံနေရသည်။ ထို့ကြောင့် နိုင်ငံတကာအနေဖြင့် စစ်ကော်မရှင်ထံသို့ လက်နက်ခဲယမ်းနှင့် လေယာဉ်ဆီများ မရောက်ရှိစေရန် တိကျသည့် ဒဏ်ခတ်ပိတ်ဆို့မှုများ ပြုလုပ်ပေးရန်နှင့် အရပ်သားများကို ပစ်မှတ်ထားသည့် ရက်စက်ကြမ်းကြုတ် မှုများ ရပ်တန့်ရန် ဖိအားပေး လုပ်ဆောင်ပေးကြပါရန် BWU က ထုတ်ပြန် တောင်းဆိုထားသည်။ ဓာတ်ပုံ - AA Info Desk (ပုံဟောင်း)          

တစ်နှစ်အတွင်း အမျိုးသမီး ၈၀၀ နီးပါး စစ်ကော်မရှင်ကြောင့် သေဆုံးဟု BWU ထုတ်ပြန်

တစ်နှစ်အတွင်း အမျိုးသမီး ၈၀၀ နီးပါး စစ်ကော်မရှင်ကြောင့် သေဆုံးဟု BWU ထုတ်ပြန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၀ ရက်။  မြန…

  • January 20, 2026
နိုင်ငံအချို့က အမေရိကန်ကို ဗီဇာ ပြန်ပိတ် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၀ ရက်။ အမေရိကန်သမ္မတ ဒေါ်နယ်ထရန့်အစိုးရက နိုင်ငံပေါင်း ၃၉ နိုင်ငံအပေါ် ခရီးသွားလာခွင့် ကန့်သတ်လိုက်ပြီးနောက် အာဖရိကနှင့် အာရှနိုင်ငံအချို့က အမေရိကန်နိုင်ငံသားများအပေါ် ဗီဇာကန့်သတ်မှုများဖြင့် အပြန်အလှန် တုံ့ပြန်လာကြသည်။ အာဖရိကနိုင်ငံများဖြစ်သော မာလီ၊ ချဒ်၊ နိုင်ဂျာနှင့် ဘာကီးနားဖားဆို တို့သည် အမေရိကန်နိုင်ငံသားများအား ဗီဇာထုတ်ပေးမှုကို လုံးဝရပ်ဆိုင်းလိုက်ပြီး အပြန်အလှန်မူဝါဒ (Reciprocal Move) ကို ကျင့်သုံးလိုက်ကြသည်။ အလားတူ ပါကစ္စတန်နိုင်ငံသည်လည်း ယခင်က အမေရိကန်နိုင်ငံသားများ ရရှိခဲ့သည့် အခမဲ့ ဆိုက်ရောက်ဗီဇာစနစ်ကို ဖျက်သိမ်းလိုက်ပြီး ဗီဇာကြေး ဒေါ်လာ ၆၀ ပေးဆောင်ရန်နှင့် စိစစ်ချိန် ၇ ရက်အထိ စောင့်ဆိုင်းရန် သတ်မှတ်လိုက်သည်။ အမေရိကန်သည် လုံခြုံရေးအကြောင်းပြချက်ဖြင့် ၂၀၂၅ ခုနှစ်အတွင်း နိုင်ငံပေါင်း ၃၉ နိုင်ငံအား ဗီဇာပိတ်ခဲ့ပြီး၊ ၂၀၂၆ ဇန်နဝါရီတွင် ရွှေ့ပြောင်းအခြေချဗီဇာ ရပ်ဆိုင်းမည့် နိုင်ငံ ၇၅ နိုင်ငံကို ထပ်မံကြေညာခဲ့သည်။   အမေရိကန်က ဗီဇာပိတ်ပင်ထားသော နိုင်ငံများထဲတွင် မြန်မာနိုင်ငံလည်း ပါဝင်သည်။

နိုင်ငံအချို့က အမေရိကန်ကို ဗီဇာ ပြန်ပိတ်

နိုင်ငံအချို့က အမေရိကန်ကို ဗီဇာ ပြန်ပိတ်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၀ ရက်။  အမေရိကန်သမ္မတ ဒေါ်နယ်ထရန့်အစိုးရက နိုင်…

  • January 20, 2026
ဂျပန်ဝန်ကြီးချုပ်က ကြားဖြတ်ရွေးကောက်ပွဲ ကျင်းပရန် ဆုံးဖြတ် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၀ ရက်။ ဂျပန်နိုင်ငံ၏ ပထမဆုံး အမျိုးသမီးဝန်ကြီးချုပ် ဆာနိုင်း တာကာအိချိ (Sanae Takaichi) သည် ၎င်းအပေါ် လူထုထောက်ခံမှုနှုန်း မြင့်မားနေသည့် အချိန်ကို အခွင့်ကောင်းယူ၍ အောက်လွှတ်တော်ကို ဖျက်သိမ်းကာ ကြားဖြတ်ရွေးကောက်ပွဲ ကျင်းပရန် ဆုံးဖြတ်လိုက်သည်။ ရာထူးသက်တမ်း ၃ လအတွင်း လူထုထောက်ခံမှု ၆၀ ရာခိုင်နှုန်းကျော် ရရှိထားသည့် ဝန်ကြီးချုပ်သည် လာမည့် ဖေဖော်ဝါရီ ၈ ရက်တွင် ရွေးကောက်ပွဲကျင်းပရန် စီစဉ်နေခြင်းဖြစ်သည်။ ဂါးဒီးရန်းသတင်းစာ၏ သုံးသပ်ချက်အရ ဤခြေလှမ်းသည် အာဏာရ LDP ပါတီ၏ လွှတ်တော်အတွင်း အားနည်းနေသော မဲအရေအတွက်ကို ပြန်လည်မြှင့်တင်ရန်နှင့် ၎င်း၏ခေါင်းဆောင်မှုအပေါ် ပြည်သူထံမှ တရားဝင်လုပ်ပိုင်ခွင့် (Mandate) ရယူရန် ကြိုးပမ်းခြင်း ဖြစ်သည်ဟု ဆိုသည်။ အစီအစဉ်အရ ဇန်နဝါရီ ၂၃ ရက်တွင် အောက်လွှတ်တော်ကို ဖျက်သိမ်းမည်ဖြစ်သည်။ ကရာတေး ခါးပတ်နက်ရရှိထားသူ၊ အားလပ်ချိန်တွင် ဒရမ်တီးခြင်းနှင့် ဆိုင်ကယ်ကြီးများ စီးခြင်းကို ဝါသနာပါသူ ဝန်ကြီးချုပ် တာကာအိချိသည် တရုတ်နိုင်ငံအပေါ် ပြတ်သားသော သဘောထားရှိသူဖြစ်သည်။   ထိုင်ဝမ်လုံခြုံရေးအတွက် ဂျပန်၏ ကာကွယ်ရေးစနစ်ကိုလည်း အသစ်ပြန်လည် တည်ဆောက်နေသူ ဖြစ်သည်။ ၎င်းက ဝန်ကြီးချုပ်အဖြစ် ဆက်လက်ဆောင်ရွက်ရန် သင့်တော်မှု ရှိ၊ မရှိကို ပြည်သူများက တိုက်ရိုက်ဆုံးဖြတ်ပေးစေလိုကြောင်း ပြောကြားခဲ့သည်။

ဂျပန်ဝန်ကြီးချုပ်က ကြားဖြတ်ရွေးကောက်ပွဲ ကျင်းပရန် ဆုံးဖြတ်

ဂျပန်ဝန်ကြီးချုပ်က ကြားဖြတ်ရွေးကောက်ပွဲ ကျင်းပရန် ဆုံးဖြတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၀ ရက်။  ဂျပန်နိုင်ငံ၏ ပထမဆုံး …

  • January 20, 2026
တရုတ်နိုင်ငံက ဂြိုဟ်တုပေါင်း ၂ သိန်းကျော် လွှတ်တင်ရန် စီစဉ် သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဇန္နဝါရီလ ၂၀ ရက်။ တရုတ်နိုင်ငံသည် အာကာသထဲသို့ ဂြိုဟ်တုပေါင်း ၂ သိန်းကျော် လွှတ်တင်ရန်အတွက် နိုင်ငံတကာ ကြေးနန်းဆက်သွယ်ရေးအဖွဲ့ (ITU) ထံသို့ လျှောက်ထားလိုက်သည်။ အဆိုပါစီမံကိန်းတွင် ဂြိုဟ်တုအစုအဖွဲ့ပေါင်း ၁၂ ခုကျော် ပါဝင်ပြီး အကြီးဆုံးအစုအဖွဲ့နှစ်ခုဖြစ်သည့် CTC-1 နှင့် CTC-2 တို့တွင် တစ်ဖွဲ့လျှင် ဂြိုဟ်တု ၉၆,၀၀၀ ကျော်စီ လွှတ်တင်သွားမည်ဖြစ်သည်။ ဤစီမံကိန်းကို China Mobile ကဲ့သို့သော ဆက်သွယ်ရေးကုမ္ပဏီကြီးများနှင့် ပုဂ္ဂလိက အာကာသကုမ္ပဏီများ ပူးပေါင်းဆောင်ရွက်မည်ဖြစ်ပြီး အာကာသနည်းပညာနှင့် လှိုင်းနှုန်းစဉ်နေရာဦးရန် ရည်ရွယ်ခြင်းဖြစ်သည်။ အကယ်၍ ဤစီမံကိန်း အောင်မြင်ပါက တရုတ်၏ ဂြိုဟ်တုအရေအတွက်သည် လက်ရှိကမ္ဘာပတ်လမ်းအတွင်းရှိ ဂြိုဟ်တုအရေအတွက်ထက် ၁၀ ဆခန့် များပြားလာမည်ဖြစ်သည်။ တရုတ် ဂြိုလ်တုများက အမေရိကန်မှ အီလွန်မာ့စ်၏ SpaceX ထက်ပင် ကျော်လွန်သွားမည်ဖြစ်သည်။ ဤသည်မှာ တရုတ်နိုင်ငံ၏ ရေရှည်အာကာသ မဟာဗျူဟာဖြစ်ပြီး ပြင်ဆင်မှုလုပ်ငန်းစဉ်များမှာ ၂ နှစ်မှ ၇ နှစ်အထိ ကြာမြင့်နိုင်သည်ဟု ဆိုသည်။

တရုတ်နိုင်ငံက ဂြိုဟ်တုပေါင်း ၂ သိန်းကျော် လွှတ်တင်ရန် စီစဉ်

တရုတ်နိုင်ငံက ဂြိုဟ်တုပေါင်း ၂ သိန်းကျော် လွှတ်တင်ရန် စီစဉ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၀ ရက်။  တရုတ်နိုင်ငံသည် အာကာသ…

  • January 20, 2026
ဖမ်းဆီးခံရသော အထောက်အထားမဲ့ မြန်မာလုပ်သားများ ထိုင်းရဲ မွေးနေ့ကို နှုတ်ဆက် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂၀ ရက်။ ထိုင်းနိုင်ငံ အတွင်း တရားမဝင် ဝင်ရောက်မှုဖြင့် ဖမ်းဆီးခံထားရသော မြန်မာအလုပ်သမားများက သူတို့အား ဖမ်းဆီးသည့် ရဲ၏ မွေးနေ့ပွဲကို သီချင်းဖြင့် နှုတ်ဆက်ခဲ့ကြသည်။ ထိုင်းနိုင်ငံအတွင်း တရားမဝင် ဝင်ရောက်လာသည့် မြန်မာနိုင်ငံသားများကို အာဏာပိုင်များက အရှိန်မြှင့် ဖမ်းဆီးလျက်ရှိရာ ဇန်နဝါရီ ၁၈ ရက်နှင့် ၁၉ ရက်တို့တွင် ကန်ချနဘူရီနှင့် အန်ထောင်းခရိုင်တို့၌ မြန်မာလုပ်သား ၇၀ ဦးခန့် ထပ်မံဖမ်းဆီးခံခဲ့ရသည်။ ဇန်နဝါရီ ၁၈ ရက်က ကန်ချနာဘူရီတွင် မြန်မာနိုင်ငံသား ၄၈ ဦးကို ဖမ်းဆီးရမိခဲ့ပြီး ဇန်နဝါရီ ၁၉ ရက်တွင် အန်ထောင်းခရိုင်၌ နောက်ထပ် ၂၂ ဦးကို ထပ်မံဖမ်းဆီးခဲ့ခြင်းဖြစ်သည်။ အန်ထောင်းခရိုင် ဖမ်းဆီးမှုတွင် ထူးခြားချက်အနေဖြင့် ဖမ်းဆီးသည့်အချိန်မှာ ဖမ်းဆီးရေးအဖွဲ့ ခေါင်းဆောင် ရဲတပ်ကြပ်ကြီး ဝီချိုင်၏ မွေးနေ့နှင့် တိုက်ဆိုင်နေရာ ဖမ်းဆီးခံထားရသည့် မြန်မာနိုင်ငံသားများက မွေးနေ့သီချင်း သီဆိုပေးခဲ့ကြသည်။ လက်ရှိတွင် မဲဆောက်မြို့နယ်အတွင်း၌လည်း မြန်မာလုပ်သား ၅၀ ခန့် ထပ်မံဖမ်းဆီးခံထားရသည်။ ဖမ်းဆီးခံရသူအားလုံးကို ဥပဒေအရ အရေးယူရန် သက်ဆိုင်ရာရဲစခန်းများသို့ ပို့ဆောင်ထားသည်ဟု ဆိုသည်။

ဖမ်းဆီးခံရသော အထောက်အထားမဲ့ မြန်မာလုပ်သားများ ထိုင်းရဲ မွေးနေ့ကို နှုတ်ဆက်

ဖမ်းဆီးခံရသော အထောက်အထားမဲ့ မြန်မာလုပ်သားများ ထိုင်းရဲ မွေးနေ့ကို နှုတ်ဆက်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂၀ ရက်။  ထိုင်…

  • January 20, 2026
ကသာတွင် တိုက်ပွဲများ ပြန်လည် ပြင်းထန်၊ စစ်ကော်မရှင်က အဆက်မပြတ် ဗုံးကြဲ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၁၉ ရက်။ စစ်ကိုင်းတိုင်းဒေသကြီး၊ ကသာမြို့တွင် တိုက်ပွဲများ ပြန်လည်ပြင်းထန်လာနေပြီး စစ်ကော်မရှင်တပ်က လေကြောင်းမှ အဆက်မပြတ် ဗုံးကြဲတိုက်ခိုက်နေသည်ဟု မြေပြင်သတင်းရင်းမြစ်က ပြောသည်။ ကသာမြို့တွင် စစ်ကော်မရှင်တပ်နှင့် တော်လှန်ရေး မဟာမိတ် တပ်ပေါင်းစုများအကြား တိုက်ပွဲများ ပြန်လည် ပြင်းထန်နေပြီး စစ်တပ်ဘက်က ဂျက်ဖိုက်တာနှင့် ရဟတ်ယာဉ်များ အပါအဝင် လေကြောင်း အင်အား အလုံး အရင်းဖြင့် အပြင်းအထန် တိုက်ခိုက်နေသည်ဟု စစ်ရေးသတင်းရင်းမြစ်များက ပြောသည်။ မြေပြင်စစ်ရေးသတင်းရင်းမြစ်တစ်ဦးက “မနေ့ကတော့ တော်တော်ဆိုးတယ်။ ဒီနေ့လည်း (သေနတ်သံ) ကြား တော့ကြားရတယ်။ ဒါ‌ပေမဲ့ ဒီနေ့ကတော့ ခပ်ကြဲကြဲပဲ။ မနေ့ကတော့ ခပ်စိပ်စိပ်ကို လေယာဥ်ပျံ Y-12 တွေပျံ တယ်။ ဟက်စကီးဆို နှစ်စီးတွဲတွေပျံတယ်။ ဂျက်ဖိုက်တာတွေပျံတယ်။ တောက်လျှောက်ပေါ့။ အသေကြဲ အသေစော်နေတာ” ဟု ပြောသည်။ ပြီးခဲ့သည့် ဇန်နဝါရီလ ၁၇ ရက် (စနေနေ့) နံနက်ပိုင်းမှ စတင်ကာ ကသာမြို့အခြေစိုက် ခမရ (၃၀၉) တပ်ရင်း အနီးရှိ ဂေါက်ကွင်းနှင့် တပ်ဦးဘုန်းကြီးကျောင်းတစ်ဝိုက်တွင် နှစ်ဖက်တိုက်ပွဲများ ပြန်လည်စတင်ခဲ့ခြင်း ဖြစ်သည်။ ဇန်နဝါရီလ ၁၈ ရက်နေ့ (ယမန်နေ့)ကမူ စစ်ကော်မရှင်တပ်ဘက်က လေကြောင်းတိုက်ခိုက်မှုကို အရှိန်မြှင့်တင်ခဲ့ ကြောင်း စစ်ရေးသတင်းရင်းမြစ်က အတည်ပြုသည်။ ကသာမြို့သိမ်းတိုက်ပွဲမှာ ပြီးခဲ့သည့် ၂၀၂၅ ခုနှစ်၊ ဒီဇင်ဘာလ ၂၈ ရက်နေ့ စစ်ကော်မရှင်၏ ရွေးကောက်ပွဲကာလ တွင် စတင်ခဲ့ခြင်းဖြစ်ပြီး၊ ဇန်နဝါရီလ ၃ ရက်နေ့၌ တိုက်ပွဲအနည်းငယ်ငြိမ်သက်သွားခဲ့သော်လည်း ယခုအခါ ပြန်လည်ပြင်းထန်လာခြင်းဖြစ်သည်။ လက်ရှိတိုက်ပွဲများကြောင့် ခမရ (၃၀၉) အနီးရှိ ရပ်ကွက် (၅)၊ ရပ်ကွက် (၈) နှင့် ရပ်ကွက် (၉) တို့မှ နေအိမ်များစွာ မှာလည်း ထိခိုက်ပျက်စီးမှုများရှိနေသည်။ တိုက်ပွဲများ ပြန်လည် ပြင်းထန်လာမှုကြောင့် မြို့တွင်းသို့ ပစ္စည်းပြန်ယူရန် ပြင်ဆင်နေသည့် စစ်ဘေးရှောင်များ အနေဖြင့် မြို့တွင်းသို့ လုံးဝမဝင်ကြရန် သတိပေးမှုများ ထွက်ပေါ်နေသည်။ မန္တလေးမြို့တွင် စစ်ဘေးရှောင်နေရသည့် ကသာမြို့ခံ အမျိုးသမီးတစ်ဦးက မြို့တွင်းအခြေအနေနှင့်ပတ်သက်၍ ယခုကဲ့သို့ ပြောသည်။ “ကျမတို့ ကသာမြို့နဲ့လည်း အဆက်အသွယ်မရပါဘူး။ ပတ်ဝန်းကျင်ကနေ ကြားတဲ့လူတွေက ပြောပြပေး တာ။ အခြေနေက မကောင်းပါဘူး။ မနေ့တုန်းကလည်း ဗုံးတွေကြဲနေတယ်။ (မြို့ထဲ) မပြန်ခဲ့ကြနဲ့လို့ ပြောခဲ့ တာပဲ” ဟု အဆိုပါ အမျိုးသမီးက ပြောသည်။ ကသာမြို့ခံ အများစုမှာ တိုက်ပွဲစတင်ချိန် ကတည်းက မြစ်ကြီးနား၊ မန္တလေးမြို့ကြီးများအပြင် ဧရာဝတီ မြစ်ကမ်းဘေးရှိ ကျေးရွာများ၊ မိုးညှင်း၊ မိုးကောင်းနှင့် ရှမ်းပြည် မြောက်ပိုင်း မဘိန်းမြို့များအထိ ဖြန့်ကျက် ထွက်ပြေး တိမ်းရှောင်နေကြရသည်။ ကသာမြို့သိမ်းတိုက်ပွဲကို ကချင်လွတ်လပ်ရေး တပ်မတော် (KIA)၊ အမျိုးသား ညီညွတ်ရေး အစိုးရ (NUG) လက်အောက်ခံ ပြည်သူ့ကာကွယ်ရေးတပ် (PDF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF)၊ ပြည်သူ့လွတ်မြောက်ရေး တပ်မတော် (PLA) နှင့် နွေဦးတော်လှန်ရေး မဟာမိတ်တပ်ပေါင်းစု (SRA) တို့ ပူးပေါင်းကာ တိုက်ခိုက်နေခြင်း ဖြစ်သည်။ စစ်ကော်မရှင်ဘက်ကမူ ဗျူဟာမြောက်သည့် ကသာမြို့ကို လက်မလွှတ်ရရေးအတွက် လေကြောင်းအင်အားကို အလွန်အကျွံသုံးစွဲ၍ ခုခံနေကြောင်း စစ်ရေးလေ့လာသူများနှင့် မြေပြင်သတင်းရင်းမြစ်များက သုံးသပ်ကြသည်။

ကသာတွင် တိုက်ပွဲများ ပြန်လည် ပြင်းထန်၊ စစ်ကော်မရှင်က အဆက်မပြတ် ဗုံးကြဲ

ကသာတွင် တိုက်ပွဲများ ပြန်လည် ပြင်းထန်၊ စစ်ကော်မရှင်က အဆက်မပြတ် ဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၁၉ ရက်။  စစ်ကိုင်းတ…

  • January 19, 2026
တရုတ်ထောက်ခံမှု ရရန် မြစ်ဆုံ စီမံကိန်း ပြန်စခြင်းဖြစ်ဟု လေ့လာသူများက ပြော သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၁၉ ရက်။ မြစ်ဆုံစီမံကိန်းအား စစ်ကော်မရှင်က ပြန်စတင်ရန် ကြိုးပမ်းမှုမှာ တရုတ်၏ ထောက်ခံမှုရယူရန် နိုင်ငံရေး အလဲအထပ်လုပ်ခြင်း ဖြစ်သည်ဟု လူ့အခွင့်အရေးတက်ကြွလှုပ်ရှားသူများနှင့် နိုင်ငံရေးလေ့လာသူများက သုံးသပ်ပြောဆိုလိုက်သည်။ စစ်ကော်မရှင်က ကချင်ပြည်ရှိ မြစ်ဆုံစီမံကိန်းအား ပြန်လည် အကောင်အထည်ဖော်ရန် ကြိုးပမ်းလာမှုသည် ၎င်းတို့ကျင်းပမည့် ရွေးကောက်ပွဲအတွက် တရုတ်အစိုးရထံမှ ထောက်ခံမှုရယူရန်နှင့် နိုင်ငံတကာတွင် တရားဝင် မှု ရရှိရန် ရည်ရွယ်သည့် “နိုင်ငံရေးအလဲအထပ်” တစ်ခုသာဖြစ်ကြောင်း ထောက်ပြမှုများ ရှိနေသည်။ နိုင်ငံတကာ၏ အပယ်ခံဖြစ်နေရသော စစ်ကော်မရှင်သည် စီးပွားရေးနှင့် နိုင်ငံရေး အကျပ်အတည်းများမှ လွတ် မြောက်ရန် မြစ်ဆုံစီမံကိန်းအား နိုင်ငံရေးလက်ကွက်တစ်ခု အနေဖြင့် အသုံးချနေခြင်းဖြစ်ကြောင်း ကချင် လူ့အခွင့်အရေး စောင့်ကြည့်ရေး အဖွဲ့ (KHRW) ပြောရေးဆိုခွင့်ရှိသူ ဂျေကော့က ပြောသည်။ ဂျေကော့ က “စစ်ကောင်စီက နိုင်ငံတကာမှာ အပယ်ခံနေရတဲ့ အခြေအနေ ရှိပါတယ်။ စီးပွားရေးအနေနဲ့ရော နိုင်ငံရေး အနေနဲ့ရော အကြပ်အတည်းကို ရင်ဆိုင်နေရတဲ့ အခြေအနေ ဖြစ်ပါတယ်။ မြစ်ဆုံစီမံကိန်းကို သူတို့က အိမ်နီးချင်း နိုင်ငံတွေရဲ့ ထောက်ခံမှုတွေ ငွေကြေးတွေကို အကူအညီ ရယူပြီးမှ နိုင်ငံရေး လက်ကွက်တစ်ခုအနေ နဲ့ အသုံးချဖို့ သူတို့ ကြိုးစားနေပါတယ်” ဟု ပြောသည်။ ပြည်သူလူထု၏ ဆန္ဒအရ ၂၀၁၁ ခုနှစ် ဦးသိန်းစိန် အစိုးရလက်ထက်ကတည်းက ရပ်နားခဲ့သည့် မြစ်ဆုံစီမံကိန်း အား စစ်ရေး၊ နိုင်ငံရေး ကျပ်တည်းနေချိန်တွင် အတင်းအကျပ် ပြန်လည်စတင်ရန် ကြိုးပမ်းခြင်းမှာ ၎င်းတို့၏ အာဏာတည်မြဲရေး အတွက်သာ ဖြစ်ကြောင်း အမျိုးသားညီညွတ်ရေးအစိုးရ (NUG) ဘက်ကလည်း တုံ့ပြန်ထားသည်။ NUG ပြောရေးဆိုခွင့်ရှိသူ ဦးနေဘုန်းလတ် က “အခုလိုအချိန်မှာ စစ်အုပ်စုက မြစ်ဆုံစီမံကိန်းကို ပြန်စဖို့ ကြိုး စားတာဟာ ၎င်းတို့ရဲ့ အာဏာတည်မြဲရေးအတွက် နိုင်ငံရဲ့ နှလုံးသားကို ထိုးကျွေးလိုက်တာပဲ ဖြစ်ပါတယ်” ဟု ဝေဖန်ခဲ့သည်။ စစ်ကော်မရှင်သည် မြစ်ဆုံစီမံကိန်းကို လက်နက်သဖွယ် အသုံးချကာ ၎င်း၏ နောက်ဆုံးကျည်ဆံအဖြစ် အသုံးချနေခြင်းဖြစ်ပြီး၊ ယင်းစီမံကိန်းကြောင့် ကချင်ပြည်နယ်အတွင်း စစ်ရေးပဋိပက္ခများ ပိုမိုကြီးထွားလာနိုင် ကြောင်း ကချင်အမျိုးသမီး အစည်းအရုံး-ထိုင်းနိုင်ငံ (KWAT) မှ သတိပေးသည်။ စီမံကိန်းကြောင့် မြန်မာနိုင်ငံ၏ ရေကြောများ ပျက်စီးနိုင်သည့်အပြင် စစ်ကော်မရှင်က ယင်းဒေသအား ထိန်းချုပ် ရန် အကြမ်းဖက်နည်းလမ်းများကို ပိုမိုသုံးစွဲလာနိုင်ကြောင် KWAT မှ စည်းရုံးလှုံ့ဆော်ရေးအဖွဲ့ တာဝန်ခံ ဆန်ထွယ် က ပြောသည်။ ဆန်ထွယ် က “မြစ်ဆုံစီမံကိန်း ပြန်လုပ်ဖြစ်တယ်ဆိုရင်တော့ မြန်မာတစ်နိုင်ငံလုံးရဲ့ ရေကြောအကုန်လုံးကို ပျက်စီးစေတဲ့ အရာတွေအများကြီးရှိတယ်။ ဒါကို လက်တွေ့ ဆက်လက်လုပ်ဆောင်မယ်ဆိုရင်တော့ ပဋိပက္ခ တွေ ပိုပြီးမှ တိုးပွားစေမယ်၊ မြန်မာစစ်တပ်အနေနဲ့လည်း ဒီဒေသကို ထိန်းချုပ်ဖို့အတွက် ရရာနည်းလမ်းနဲ့ သူတို့ ဆက်ပြီးလုပ်မယ် ပိုပြီးမှ Violence Action (အကြမ်းဖက်မှု)တွေနဲ့ ကချင်ဒေသကို ထိန်းချုပ်ဖို့သူတို့ ကြိုးစား လာမယ့် အခြေအနေလည်းတွေ့ရတယ်။ ဒါက အသေအကြေ အပျက်အစီး ပိုများစေမယ့် လုပ်ရပ်လည်း ဖြစ် လာနိုင်တယ် ပေါ့နော်” ဟု သုံးသပ်သည်။ စစ်ကော်မရှင်သည် ပြီးခဲ့သည့်နှစ် ဩဂုတ်လ ၂၉ ရက်နေ့တွင် ဧရာဝတီမြစ်ဆုံ-မြစ်ညာမြစ်ဝှမ်း ရေအားလျှပ်စစ် စီမံကိန်း ဦးဆောင်အဖွဲ့ကို ဖွဲ့စည်းခဲ့ပြီး တရုတ်နိုင်ငံမှ SPICYN ကုမ္ပဏီနှင့် ပူးပေါင်းဆောင်ရွက်ရန် ညွှန်ကြားခဲ့ သည်။ ထို့နောက် ၂၀၂၅ ခုနှဏ်၊ ဒီဇင်ဘာလ ၁၆ ရက်နေ့တွင်လည်း ဒုတိယ စစ်ခေါင်းဆောင် ဒုဗိုလ်ချုပ်မှူးကြီး စိုးဝင်း ကိုယ်တိုင် ကချင်ပြည်သို့ သွားရောက်ကာ မြစ်ဆုံဒီဇိုင်းအသစ်များ အတွက် တရုတ်နှင့် ညှိနှိုင်းနေပြီဖြစ်ကြောင်း ထုတ်ဖော်ပြောဆိုခဲ့သည်။ တစ်ဖက်တွင်လည်း အမျိုးသား ကာကွယ်ရေးနှင့် လုံခြုံရေးကောင်စီရုံး (ကာလုံ) က စီမံကိန်းနှင့် ပတ်သက်၍ အထောက်အထား မခိုင်လုံဘဲ ကန့်ကွက်ပါက အရေးယူမည်ဟု ဆိုကာ ပြည်သူလူထုအား ဥပဒေဖြင့် ခြိမ်းခြောက်ထားသည်။ သို့သော်လည်း ကချင်လူ့အခွင့်အရေး စောင့်ကြည့်ရေးအဖွဲ့ (KHRW) အပါအဝင် ဒေသခံအဖွဲ့အစည်းများကမူ ပြည်သူ့ဆန္ဒမပါသည့် မြစ်ဆုံစီမံကိန်းအား လုံးဝကန့်ကွက်ကြောင်း ဆက်လက် ထုတ်ဖော်ပြောဆိုနေကြသည်။ ဓာတ်ပုံ - စစ်အာဏာရှင်ဆန့်ကျင်ရေး လူထုကွန်ရက် (ဖားကန့်မြို့နယ်)  

တရုတ်ထောက်ခံမှု ရရန် မြစ်ဆုံ စီမံကိန်း ပြန်စခြင်းဖြစ်ဟု လေ့လာသူများက ပြော

တရုတ်ထောက်ခံမှု ရရန် မြစ်ဆုံ စီမံကိန်း ပြန်စခြင်းဖြစ်ဟု လေ့လာသူများက ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၁၉ ရက်။  မြစ်ဆုံ…

  • January 19, 2026
ရွေးကောက်ပွဲ နောက်ပိုင်း စစ်ပွဲနှင့် လူ့အခွင့်အရေး ချိုးဖောက်မှုများ မြင့်တက်လာနိုင်ဟု တက်ကြွလှုပ်ရှားသူများ ပြော သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၁၉ ရက်။ ရွေးကောက်ပွဲအလွန် ကာလတွင် စစ်ရေးပဋိပက္ခနှင့် လူ့အခွင့် အရေး ချိုးဖောက်မှုများ ပိုမိုမြင့်တက် လာနိုင်သည်ဟု ရွေးကောက်ပွဲစောင့်ကြည့်သူများနှင့် တက်ကြွလှုပ်ရှားသူများက သတိပေး ပြောဆိုလိုက်သည်။ စစ်တပ်က နိုင်ငံရေးထွက်ပေါက် အဖြစ် အပိုင်း ၃ ပိုင်းခွဲ၍ ကျင်းပနေသည့် ရွေးကောက်ပွဲသည် လူထုအား အကျပ်ကိုင် ခြိမ်းခြောက်မှုများဖြင့် ဖော်ဆောင်နေခြင်း ဖြစ်ပြီး၊ ယင်းရွေးကောက်ပွဲအလွန်၌ စစ်ရေး ပဋိပက္ခများနှင့် လူ့အခွင့်အရေးချိုးဖောက်မှုများ ယခုထက် ပိုမိုဆိုးရွားလာနိုင်ကြောင်း သတိပေးလိုက်ခြင်း ဖြစ် သည်။ ကချင်အမျိုးသမီး အစည်းအရုံး-ထိုင်းနိုင်ငံ (KWAT) မှ စည်းရုံးလှုံ့ဆော်ရေးအဖွဲ့ တာဝန်ခံ ဆန်ထွယ် က “ကျမ တို့ မြင်တာကတော့ ဒါကတော့ သူတို့အနေနဲ့ သူတို့နဲ့ မိတ်ဖက်တဲ့ နိုင်ငံတကာတွေနဲ့ ချိတ်ဆက်ပြီးမှ မြန်မာနိုင်ငံ သူတို့ရဲ့ ဒီစီးပွားရေး လမ်းကြောင်းတွေ ဖွင့်ယူပြီးမှ တိုင်းရင်းသားဒေသတွေမှာ စစ်ပဋိပက္ခ ပိုပြီးမှ ဖွင့်ဖို့အတွက် ကို သူတို့ပိုက်ဆံတွေ ရှာသွားနိုင်တဲ့ အခြေအနေလည်း ရှိလာနိုင်တယ် ဒါကြောင့်မို့လို့ ဒီ Election အလွန်ပေါ့ နော်။ ရွေးကောက်ပွဲ အလွန်ကတော့ ပဋိပက္ခတွေနဲ့ သတ်ဖြတ်မှုတွေ ပိုများနိုင်တယ်ဆိုတဲ့ဟာမျိုးကိုလည်း ကျမ တို့ တွေ့ရတယ်ပေါ့နော်” ဟု ပြောသည်။ စစ်ကော်မရှင်သည် ၎င်းတို့၏ ရွေးကောက်ပွဲ ပထမပိုင်းကို ၂၀၂၅ ခုနှစ်၊ ဒီဇင်ဘာလ ၂၈ ရက်တွင် လည်းကောင်း၊ ဒုတိယပိုင်းကို ၂၀၂၆ ခုနှစ်၊ ဇန်နဝါရီလ ၁၁ ရက်တွင်လည်းကောင်း ကျင်းပခဲ့ပြီးဖြစ်ကာ ကျန်ရှိနေသည့် တတိယ ပိုင်းကို ဇန်နဝါရီလ ၂၅ ရက်တွင် ဆက်လက်ပြုလုပ်ရန် စီစဉ်ထားသည်။ ရွေးကောက်ပွဲ ပြင်ဆင်သည့် ကာလတစ်လျှောက်လုံးတွင် စစ်ကော်မရှင်သည် ဥပဒေ အမျိုးမျိုးထုတ်ပြန်ကာ လူထုအား ဖမ်းဆီးထောင်ချခြင်း၊ မဲမထည့်ပါက တက္ကသိုလ်တက်ခွင့် မပြုခြင်းနှင့် စစ်ဘေးရှောင်များ နေရပ် မပြန်ပါက နေအိမ်များကို မီးရှို့မည်ဟု ခြိမ်းခြောက်ခြင်းများ လုပ်ဆောင်ခဲ့သည်။ ထို့အပြင် ကျေးရွာများအတွင်း စစ်ကြောင်းထိုး ဝင်ရောက်ကာ နေအိမ်များကို မီးရှို့ခြင်း၊ လေကြောင်း တိုက်ခိုက် မှုများဖြင့် အရပ်သားများကို ပစ်မှတ်ထားခြင်းနှင့် ခရီးသွားလာခွင့် ကန့်သတ်ခြင်းစသည့် လူ့အခွင့်အရေး ချိုးဖောက်မှုများကို အရှိန်မြှင့်ကျူးလွန်ခဲ့သည်ဟု လူ့အခွင့်အရေးလှုပ်ရှားသူများက ထောက်ပြသည်။ သျှမ်းသံတော်ဆင့်သတင်းဌာန အယ်ဒီတာချုပ် စိုင်းမိဏ်း ကလည်း “စစ်ဘေးစစ်ဒဏ်ကလည်း ဆက်ဖြစ်လာနိုင် ဖွယ်ရှိတယ်။ ဘာလို့လည်းဆိုတော့ ခုနတုန်းက ပြောသလို စစ်ရှိန်က ကျနော်တို့ တိုင်းပြည်မှာ လျော့မသွားဘူး။ တိုက်ပွဲရပ်တယ်ဆိုတာကလည်း ယာယီရပ်ထားတဲ့ပုံစံပဲ ဖြစ်နေတဲ့ အနေအထားပေါ့နော်” ဟု ပြောသည်။

စစ်ကော်မရှင်က ၎င်းတို့စီစဉ်ထားသည့်အတိုင်း ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) အနိုင်ရ ရှိရေးမှ တစ်ဆင့် နိုင်ငံရေး ထွက်ပေါက်ရှာနေသော်လည်း တော်လှန်ရေး အင်အားစုများကမူ ရွေးကောက်ပွဲ ရလဒ်ကို လက်ခံမည်မဟုတ်ဘဲ တိုက်ပွဲများကို ပိုမိုအရှိန်မြှင့်သွားရန် ပြင်ဆင်နေကြသည်။ ကရင်နီပြည် အင်အားစုကိုယ်စားလှယ် ခွန်းသောမတ်စ် က “ရွေးကောက်ပွဲ ပြီးသွားရင်လည်း ကျနော် ထင် တယ်။ စစ်ရေးနဲ့ ပတ်သက်ပြီးတော့ လျှော့ကျသွားမယ့် အခြေအနေမျိုး မရှိဘူး။ ရွေးကောက်ပွဲ ပြီးသွားရင် တောင်မှ ကျနော်တို့ တော်လှန်ရေးဖက်ကတော့ ဒီထက်ပိုအားကောင်းတဲ့ အခြေအနေမျိုးတွေ ပြင်ဆင်မှုတွေ ရှိတယ်။ အဲတော့ ဒီထက်ပိုပြင်းတဲ့ တိုက်ပွဲမျိုးတွေ ဒီထက်ပို ကျယ်ပြန့်မဲ့ တိုက်ပွဲမျိုးတွေ ဆက်ပြီးတော့ သွားမဲ့ အခင်းအကျင်းမျိုးပဲ ရှိပါတယ်ပေါ့” ဟု ပြောသည်။ စစ်ရေးအရ အရှိန်မြှင့်တင်မှုများနှင့် အတူ စစ်အာဏာရှင်စနစ် အမြစ်ပြတ်ရေးအတွက် အမျိုးသမီး အဖွဲ့အစည်း များ အပါအဝင် တော်လှန်ရေး အင်အားစုများအကြား နိုင်ငံရေးအရ ဗျူဟာမြောက် စုစည်းမှုများကလည်း ပိုမိုအားကောင်းလာနေသည်။ မြန်မာ့အမျိုးသမီးသမဂ္ဂ (BWU) မှ မတင်တင်ညို က “ဒီတစ်ခေါက် နွေဦးတော်လှန်ရေးက မဖြစ်မနေ ဒီအာဏာ ရှင်ကို အဆုံးသတ်ရမယ်ဆိုတဲ့ ခံယူချက်က အခုထိ ခိုင်ခိုင်မာမာရှိနေဆဲပဲ။ ရွေးကောက်ပွဲက ဘယ်လိုရလဒ်ပဲ ရ ရှိလာ ရရှိလာ ကျမတို့ကတော့ ပြည်သူလူထုတွေ အားလုံးရဲ့ အကျိုးစီးပွားကို ရှေးရှုတဲ့ အနေနဲ့ကတော့ စစ် အာဏာရှင်စနစ်နဲ့ အာဏာရှင် မှန်သမျှ ပြုတ်ကျဖို့အတွက်တော့ ဆက်ပြီးတော့ တွန်းလှန်သွားရမယ်။ ဒီအချိန် မှာ ဗျူဟာမြောက် တွန်းလှန်မှုမျိုးတွေ ဖြစ်ဖို့လိုတယ်။ ဗျူဟာမြောက် စုစည်းမှုမျိုးတွေ ဖြစ်ဖို့လိုတယ်” ဟု ပြောသည်။ လက်ရှိတွင် တော်လှန်ရေး အင်အားစုများက နိုင်ငံတကာ အသိုင်းအဝိုင်းအနေဖြင့် စစ်ကော်မရှင်၏ အတု အယောင် ရွေးကောက်ပွဲ ကို အသိအမှတ်မပြုရန်နှင့် တော်လှန်ရေး အဖွဲ့အစည်းများ၏ အုပ်ချုပ်ရေး ယန္တရား များကိုသာ အမြန်ဆုံး အသိအမှတ်ပြု ကူညီပေးကြရန် တောင်းဆိုထားကြသည်။ #ရွေးကောက်ပွဲ #လူ့အခွင့်အရေးချိုးဖောက်မှု #စစ်ပွဲ #စစ်ကော်မရှင်        

ရွေးကောက်ပွဲ နောက်ပိုင်း စစ်ပွဲနှင့် လူ့အခွင့်အရေး ချိုးဖောက်မှုများ မြင့်တက်လာနိုင်ဟု တက်ကြွလှုပ်ရှားသူများ ပြော

ရွေးကောက်ပွဲ နောက်ပိုင်း စစ်ပွဲနှင့် လူ့အခွင့်အရေး ချိုးဖောက်မှုများ မြင့်တက်လာနိုင်ဟု တက်ကြွလှုပ်ရှားသူများ ပြော သတင်းနှင့် မီဒီယာ ကွန်ရက်။၂၀၂၆ ခု…

  • January 19, 2026
အထက်တန်း ကျောင်းသူအား မုဒိမ်းပြုကျင့်သူတရားခံကို ဖမ်းမိ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၉ ရက်။   ရှမ်းပြည်၊ တောင်ကြီးမြို့ အထက်တန်းကျောင်းတစ်ကျောင်းမှ အသက် ၁၉ နှစ် အရွယ် ကျောင်းသူ တစ်ဦးအား အဓမ္မပြုကျင့်ခဲ့သည့် တရားခံကို ဖမ်းမိပြီဟု နီးစပ်သည့် ကျောင်းသား မိဘများက ပြောသည်။   ယမန်နေ့ (ဇန်နဝါရီ ၁၈) ၌ သစ်တောရပ်ကွက်၊ အနောက်ဘက် တောင်ကြီးဟိုတယ်လ် အနီးတွင် ဖမ်းမိခဲ့ပြီး အောင်မြေသစ် အထက်တန်းကျောင်းအုပ်၏ သားဖြစ်သူ အသက် ၂၉ နှစ်အရွယ် ကိုဇာနည်သွေး ဆိုသူက ကျူးလွန်ခဲ့ခြင်း ဖြစ်သည်။   ထိုကျောင်းတွင် အပ်နှံထားသည့် ကျောင်းသားမိဘ တစ်ဦးက “သူ့အမျိုးသမီးလည်း ကျောင်းမှာပဲ ဆရာမ လုပ်နေပါတယ်။ သူ့အမျိုးသမီးနဲ့တော့ မဆိုင်ပေမယ့် ကျမတို့ ကလေးကိုတော့ ဆက်ထားဖို့ စဉ်းစားနေပါ တယ်။ ပိုက်ဆံညှစ်ပြီး ပြုကျင့်တာဆိုတော့ တွေးကြည့်တာနဲ့တင် နှလုံးရောဂါ ရစရာပါ။ ကျောင်းသားမိဘ အားလုံး သတိထားစေချင်ပါတယ်” ဟု ပြောသည်။   ရှမ်းပြည်တောင်ပိုင်း၊ တောင်ကြီးမြို့၊ သစ်တောရပ်ကွက်၊ အမှတ် ၉၄ ကျန်းမာရေးရုံးလမ်းတွင် ဖွင့်လှစ်ထား သည့် အောင်မြေသစ် အထက်တန်းကျောင်းတွင် ဇန်နဝါရီလ ၁၅ ရက်နေ့ နေ့လည် ၁၂ နာရီခွဲ အချိန်၌ မုဒိမ်းမှု ဖြစ်ပွားခဲ့သည်ဟု ဆိုကြသည်။   ဖြစ်စဉ်မှာ ဖျားနာနေသည့် ကျောင်းသူတစ်ဦးက ၎င်း၏ အခန်း၌ ခေတ္တအနားယူနေစဉ် ကိုဇာနည်သွေးဆိုသူမှ ရောက်ရှိလာပြီး မဖွယ်မရာ ဓါတ်ပုံများရယူကာ သိန်း ၂၀ ပေးရမည်ဟု ခြိမ်းခြောက်ခဲ့ခြင်း ဖြစ်သည်။   ထိုမှတဖန် ကျောင်းသူဖက်မှ အတူနေရန် ငြင်းဆန်သည်နှင့် တပြိုင်နက် ကိုဇာနည်သွေးက အဓမ္မပြုကျင့်ခဲ့ပြီး နောက်တိမ်းရှောင် ထွက်ပြေးသွားခဲ့သည်ဟု ဆိုသည်။   ကျောင်းဝန်ထမ်းများနှင့် နီးစပ်သူ တစ်ဦးက “ကလေးမလေးက သားအိမ်ပေါက်တယ်လို့ ကြားတယ်။ ဆေးရုံမှာ ပဲ။ တချို့ကလေးတွေကိုတော့ မိဘတွေ ပြန်လာခေါ်သွားတယ်။ ကျောင်းက ဆက်ဖွင့်မှာပါ” ဟု ပြောသည်။   လက်ရှိတွင် ကျူးလွန်သူအား တောင်ကြီးမြို့မ ရဲစခန်းတွင် ချုပ်နှောင်ထားပြီး (ပ) ၁၅/၂၀၂၆ ရာဇသတ်ကြီး ပုဒ်မ ၃၇၆ ဖြင့် မိသားစုဝင်များက တရားစွဲဆိုထားသည်။   တောင်ကြီးမြို့တွင် စစ်အာဏာသိမ်းပြီးနောက်ပိုင်း ခိုးဆိုးလုယက်မှု၊ မူးယစ်ဆေးမှုနှင့် မုဒိမ်းမှုများ မကြာခဏ ဖြစ်ပွားလေ့ရှိပြီး အများစုမှာ စစ်ကော်မရှင် လက်အောက်ခံ ရဲတပ်ဖွဲ့မှ မဖမ်းဆီးနိုင်သည့် အပြင် လာဘ်ပေး လာဘ်ယူများလည်း ပြုလုပ်နေကြသည်ဟု မြို့ခံများက ပြောသည်။

အထက်တန်း ကျောင်းသူအား မုဒိမ်းပြုကျင့်သူတရားခံကို ဖမ်းမိ

အထက်တန်း ကျောင်းသူအား မုဒိမ်းပြုကျင့်သူတရားခံကို ဖမ်းမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၁၉ ရက်။  ရှမ်းပြည်၊ တောင်ကြီးမြို့ အထက်…

  • January 19, 2026
×Close