သတင်း

အရှေ့အလယ်ပိုင်း စစ်ပွဲ ၁၂ ရက်မြောက်တွင် ပိုမို ပြင်းထန်လာ၊ စစ်ပြီးရန် အလားအလာ မရှိသေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၁ ရက်။   အရှေ့အလယ်ပိုင်းဒေသတွင် ဖြစ်ပွားလျက်ရှိသော စစ်ပွဲအတွင်း အပြန်အလှန် ပစ်ခတ်တိုက်ခိုက်မှုများ ပြင်းထန်နေဆဲဖြစ်ပြီး စစ်ပွဲအမြန်ဆုံး အဆုံးသတ်နိုင်မည့် အလားအလာ မတွေ့ရသေးကြောင်း လေ့လာသူများက ဆိုသည်။   အမေရိကန်နှင့် အစ္စရေးတို့၏ လေကြောင်းတိုက်ခိုက်မှုများကြောင့် အီရန်နိုင်ငံ တီဟီရန်မြို့နှင့် အာရတ်ခ် (Arak) မြို့တို့ရှိ လူနေအဆောက်အအုံများ ထိမှန်ပျက်စီးခဲ့ပြီး သေဆုံးသူပေါင်း ၁,၂၅၅ ဦးထက်မနည်း ရှိလာပြီဖြစ်ကြောင်း အီရန်ဘက်က ထုတ်ပြန်ထားသည်။   အီရန်နိုင်ငံတွင် အယာတိုလာ ခိုမေနီ၏ အရိုက်အရာကို ဆက်ခံသည့် သားဖြစ်သူ မိုဂျတာဘာ ခိုမေနီ (Mojtaba Khamenei) အား ထောက်ခံသည့် ဆန္ဒပြပွဲများကို တီဟီရန်မြို့၌ ကျင်းပခဲ့ကြသည်။   အီရန်နိုင်ငံခြားရေးဝန်ကြီးက စစ်ပွဲသည် အချိန်တိုအတွင်း ပြီးဆုံးမည်မဟုတ်ဘဲ လိုအပ်သလို ဆက်လက်တိုက်ပွဲဝင်သွားမည်ဟု တုံ့ပြန်ထားသည်။   တစ်ဖက်တွင်လည်း ကူဝိတ်၊ ယူအေအီး၊ ဆော်ဒီအာရေဗျနှင့် ဘာရိန်းနိုင်ငံတို့သည် အီရန်ဘက်မှ လွှတ်တင်လိုက်သော ဒရုန်းနှင့် ဒုံးကျည်များကို ကြားဖြတ်ဟန့်တားနေရပြီး ဘာရိန်းနိုင်ငံတွင် လူနေအဆောက်အအုံ ထိမှန်မှုကြောင့် အမျိုးသမီးတစ်ဦး သေဆုံးခဲ့သည်။   အမေရိကန်သမ္မတ ဒေါ်နယ်ထရန့်က စစ်ပွဲသည် မကြာမီပြီးဆုံးမည်ဟု ပြောကြားထားသော်လည်း အီရန်၏ စစ်ဘက်ဆိုင်ရာ ပစ်မှတ် ၅,၀၀၀ ကျော်ကို ဆက်လက်တိုက်ခိုက်လျက်ရှိသည်ဟု ဆိုသည်။   စစ်ပွဲ၏ ရိုက်ခတ်မှုကြောင့် ရေနံဈေးနှုန်းများမှာ တစ်စည်လျှင် ၁၂၀ ဒေါ်လာအထိ မြင့်တက်ခဲ့သော်လည်း G7 နိုင်ငံများ၏ ကြားဝင်ဆောင်ရွက်မှုကြောင့် လက်ရှိတွင် ဒေါ်လာ ၉၀ ဝန်းကျင်သို့ ပြန်လည်ကျဆင်းလာခဲ့သည်။ #အီရန်စစ်ပွဲ #အရှေ့အလယ်ပိုင်းစစ်ပွဲ

အရှေ့အလယ်ပိုင်း စစ်ပွဲ ၁၂ ရက်မြောက်တွင် ပိုမို ပြင်းထန်လာ၊ စစ်ပြီးရန် အလားအလာ မရှိသေး

အရှေ့အလယ်ပိုင်း စစ်ပွဲ ၁၂ ရက်မြောက်တွင် ပိုမို ပြင်းထန်လာ၊ စစ်ပြီးရန် အလားအလာ မရှိသေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၁ ရက်။  …

  • March 11, 2026
ညောင်လေးပင် ခရိုင်တွင် လူသားဒိုင်းအဖြစ် ဖမ်းခံထားသူ အားလုံး ကယ်ထုတ်နိုင်ခဲ့ပြီ၊ ကယ်တင်ရေး စစ်ဆင်ရေးအတွင်း တော်လှန်ရေး ရဲဘော် ၁၁ ဦး ကျဆုံး။   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မတ်လ ၁၀ ရက်။   ပဲခူးတိုင်း၊ ညောင်လေးပင်တွင် ဓားစာခံအဖြစ် ဖမ်းဆီးခံထားရသည့် ပြည်သူ ၃၀၀ ကျော်ကို PDF နှင့် KNLA ပူးပေါင်းအဖွဲ့ ကယ်ထုတ်နိုင်ပြီဟု အမျိုးသားညီညွတ်ရေး အစိုးရ NUG ကာကွယ်ရေးဝန်ကြီးဌာန နှင့် ပဲခူးတိုင်း စစ်ဌာနချုပ်က ထုတ်ပြန်သည်။   အဆိုပါ ကယ်ဆယ်ရေးစစ်ဆင်ရေးအတွင်း တော်လှန်ရေးတပ်ဖွဲ့များဘက်မှ ရဲဘော် ၁၁ ဦး ကျဆုံးခဲ့ပြီး စစ်ကော်မရှင်ဘက်မှလည်း ၁၀ ဦးထက်မနည်း သေဆုံးကာ၊ အယောက် ၂၀ ကျော် ဒဏ်ရာအပြင်းအထန် ရရှိခဲ့သည်ဟု NUG က ထုတ်ပြန်ထားသည်။   ညောင်လေးပင်မြို့နယ် အတွင်းရှိ ကျေးရွာများတွင် စစ်ကော်မရှင်တပ်က လူသားဒိုင်းအဖြစ် ဖမ်းဆီးထားသည့် ဓားစာခံပြည်သူ ၃၀၀ ကျော်ကို ပြည်သူ့ကာကွယ်ရေးတပ်မတော် (PDF) နှင့် ကရင်အမျိုးသား လွတ်မြောက် ရေး တပ်မတော် (KNLA) ပူးပေါင်းတပ်ဖွဲ့များက ကယ်ထုတ်နိုင်ခဲ့ခြင်း ဖြစ်သည်။   ရွာသားများ ဖမ်းဆီးခံခဲ့ရသည့် အခြေအနေနှင့် ပတ်သက်၍ ကျောက်ကြီးမြို့နယ်၊ ကရင်အရေးပေါ် ကူညီ ကယ်ဆယ်ရေး ကော်မတီ ပြောရေးဆိုခွင့်ရှိသူ တစ်ဦးက ယခုကဲ့သို့ ရှင်းပြသည်။ 

 “အဲ့နားတစ်ဝိုက်မှာ အဲဒီကျေးရွာတွေကို တပ်က ဝင်စီးပြီးတော့ ရွာသားတွေကို ဖမ်းတယ်။ စစ်တောင်းမြစ် အနောက်ဖက် အဲဒီရေတွင်းကျေးရွာ ကျောင်းကုန်းကျေးရွာ အဲဒီနားတစ် ဝိုက်စသဖြင့် အဲဒီနားတစ်ကြောကရွာ တွေ စစ်ကောင်စီ ဖက်က ရွာသားတွေကို ထိုးစစ်ဆင်ပြီးတော့ ပစ်ခတ်တိုက်ခိုက်မှု ဖြစ်တယ်။ ဖြစ်တဲ့အခါကျ တော့ သူတို့ အဲဒီရွာကို ဝင်စီးလို့ ရတဲ့အခါ ရွာသားတွေကို သူတို့ ဖမ်းဆီးထားတယ်။ လူဦးရေ ၃၀၀ ဝန်းကျင် ခန့်မှန်းခြေပေါ့နော်” ဟု ပြောသည်။   ပြီးခဲ့သည့် မတ်လ ၅ ရက်နေ့မှ စတင်ကာ စစ်ကော်မရှင်၏ တပ်မ (၇၇) ဦးဆောင်သော အင်အား (၄၀၀) ခန့်ရှိ စစ်ကြောင်း ၄ ကြောင်းသည် လက်နက်ကြီး၊ ဒရုန်းနှင့် လေကြောင်းပစ်ကူများအသုံးပြု၍ ညောင်လေးပင်မြို့နယ် ရှိ ရေတွင်းကုန်း၊ ခရုကုန်းနှင့် ကျောင်းကုန်းကျေးရွာများသို့ ဝင်ရောက်စီးနင်းခဲ့ခြင်း ဖြစ်သည်။   ထိုသို့စီးနင်းစဉ်အတွင်း စစ်ကော်မရှင်တပ်သည် ရွာသား ၃၀၀ ကျော်ကို ဓားစာခံအဖြစ် ဖမ်းဆီးခဲ့သည့်အပြင် ကလေးငယ် ၃ ဦးနှင့် ကိုယ်ဝန်ဆောင်အမျိုးသမီး ၁ ဦး အပါအဝင် အပြစ်မဲ့ပြည်သူ ၄၀ ကျော်ကို ရက်စက်စွာ သတ်ဖြတ်ခြင်း၊ ညှဉ်းပန်းနှိပ်စက်ခြင်းများဖြင့် စစ်ရာဇဝတ်မှုများကို ကျူးလွန်ခဲ့သည်။   ယမန်နေ့က အနည်းငယ် လွတ်မြောက်ခဲ့သော်လည်း ကျန်ရှိနေဆဲ ဖြစ်သည်ဟု ကရင်အရေးပေါ် ကူညီ ကယ်ဆယ်ရေး ကော်မတီ ပြောရေးဆိုခွင့်ရှိသူ က ပြောသည်။     “တချို့က ပိတ်မိနေ ဆဲပဲ ပြီးခဲ့တဲ့ မနေ့က ၇ ရက်နေ့ ညကတော့ အသစ်တဖန်ပြန်ပြီးတော့မှ ပစ်ခတ်တိုက်ခိုက်မှု ပြန်စတဲ့နေရာမှာ ဒီဖက် KNU ဖက်က သွားပြီးတော့ ပစ်ခတ်မှု လုပ်ပေးတဲ့အခါ ပြည်သူတွေက ၂၀ ကျော် ၃၀ ကျော် ပြန်လွတ် မြောက်လာတယ်” ဟု ပြောသည်။   မတ်လ ၇ ရက်နေ့တွင် ရွာသားအချို့မှာ ထွက်ပြေးလွတ်မြောက်လာခဲ့ပြီး မတ်လ ၈ ရက်နေ့တွင်မူ ပဲခူးခရိုင် တပ်ရင်း (၂) နှင့် မဟာမိတ်အဖွဲ့တို့က ဖမ်းဆီးခံထားရသူများထဲ အယောက် ၁၅၀ ခန့်ကို ကနဦး ကယ်ထုတ်နိုင်ခဲ့ ပြီး ယနေ့တွင်မူ ပြည်သူ ၃၀၀ ကျော်လုံးကို ကယ်ထုတ်နိုင်ခဲ့ပြီဖြစ်ကြောင်း ထပ်မံ ထုတ်ပြန်လာခြင်း ဖြစ်သည်။   ဖမ်းဆီးခံထားရသည့် ပြည်သူများကို ကယ်တင်ရန်အတွက် အမျိုးသားညီညွတ်ရေး အစိုးရ၊ ပဲခူးတိုင်းစစ်ဌာန ကွပ်ကဲမှုအောက်ရှိ တပ်ရင်းတပ်ဖွဲ့များနှင့် KNLA တပ်မဟာ (၃) တို့ ပူးပေါင်းကာ စစ်ဆင်ရေးဖော်ဆောင်ခဲ့ခြင်း ဖြစ်သည်။   အမျိုးသားညီညွတ်ရေးအစိုးရ (NUG) ၏ ထုတ်ပြန်ချက်အရ ကယ်ထုတ်နိုင်ခဲ့သည့် ပြည်သူ ၃၀၀ ကျော်ကို ဘေးကင်းလုံခြုံရာ ဒေသများသို့ ကူညီပို့ဆောင်ပေးထားပြီး ဖြစ်ကြောင်း သိရသည်။   စစ်ကော်မရှင်တပ်သည် စစ်ရေးအရ အရေးနိမ့်လာချိန်တွင် အရပ်သားပြည်သူများကို လူသားဒိုင်းအဖြစ် အသုံးပြုကာ အကြောက်တရားဖြင့် အုပ်ချုပ်ရန် ကြိုးပမ်းနေခြင်း ဖြစ်ကြောင်းနှင့် ယခုဖြစ်စဉ်သည် ပဲခူးတိုင်း အတွင်း စစ်ကော်မရှင်၏ အဆိုးရွားဆုံး လူ့အခွင့်အရေး ချိုးဖောက်မှုများထဲမှ တစ်ခုဖြစ်ကြောင်း မြေပြင်တွင် ကူညီကယ်ဆယ်ရေး လုပ်ဆောင်နေသူများက သုံးသပ် ပြောဆိုနေကြသည်။   #ညောင်လေးပင်ခရိုင် #ပဲခူးတိုင်း #KNLA #KNDO #PDF #NUG #လူသားဒိုင်းကာ #စစ်ကော်မရှင်တပ် #ကျောက်ကြီးမြို့နယ်

ညောင်လေးပင် ခရိုင်တွင် လူသားဒိုင်းအဖြစ် ဖမ်းခံထားသူ အားလုံး ကယ်ထုတ်နိုင်ခဲ့ပြီ၊ ကယ်တင်ရေး စစ်ဆင်ရေးအတွင်း တော်လှန်ရေး ရဲဘော် ၁၁ ဦး ကျဆုံး။

ညောင်လေးပင် ခရိုင်တွင် လူသားဒိုင်းအဖြစ် ဖမ်းခံထားသူ အားလုံး ကယ်ထုတ်နိုင်ခဲ့ပြီ၊ ကယ်တင်ရေး စစ်ဆင်ရေးအတွင်း တော်လှန်ရေး ရဲဘော် ၁၁ ဦး ကျဆုံး။  သတင်းနှ…

  • March 10, 2026
တိုက်ပွဲ ဖြစ်ပွားခြင်း မရှိပဲ မော်လူးမြို့ကို စစ်ကော်မရှင်က ဗုံးကြဲတိုက်ခိုက်    သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၀ ရက်။   စစ်ကိုင်းတိုင်းနှင့် ကချင်ပြည်အစပ်ရှိ အရေးပါသော လမ်းမကြီးပေါ်တွင် တည်ရှိသည့် မော်လူးမြို့ကို စစ်ကော်မရှင်က လေကြောင်းမှ ဗုံးကြဲတိုက်ခိုက်ခဲ့သဖြင့် ဆယ်ကျော်သက် လူငယ်တစ်ဦး ဒဏ်ရာရရှိကာ ဘာသာရေး အဆောက်အအုံများ ပျက်စီးဆုံးရှုံးခဲ့သည်ဟု ဒေသခံများက ပြောသည်။   ပြီးခဲ့သည့် မတ်လ ၉ ရက်နေ့၊ မွန်းတည့် ၁၂ နာရီဝန်းကျင်တွင် စစ်ကော်မရှင်၏ ဂျက်ဖိုက်တာတစ်စင်းသည် မော်လူးမြို့အနီးရှိ နန်းခွင်းကျင်ကျေးရွာသို့ ဗုံးနှစ်လုံး ကြဲချတိုက်ခိုက်ခဲ့ခြင်းဖြစ်သည်ဟု အင်းတော် တော်လှန်ရေး Indaw Revolution IR က ထုတ်ပြန်သည်။   အဆိုပါ ပေါက်ကွဲမှုကြောင့် ကျေးရွာဘုန်းကြီးကျောင်းဝင်း အတွင်းရှိ အုတ်တံတိုင်းများ ပြိုကျပျက်စီးခဲ့သည့် အပြင် အနီးနားရှိ အဆောက်အအုံ အချို့လည်း ထိခိုက်ပျက်စီးခဲ့ကာ အသက် (၁၀) နှစ် ကျော်အရွယ် လူငယ် အမျိုးသားတစ်ဦး ဗုံးစထိမှန် ဒဏ်ရာရရှိခဲ့သည်။   ဒေသခံအမျိုးသားတစ်ဦးက “လေကြောင်းဗုံးကြဲပြီဆိုတာနဲ့ အကုန်ပြေးကြတာ။ ဝပ်နေတာတစ်ယောက်မှ မရှိဘူး။ လေယာဉ်ဗုံးကြဲပြီ ဗုံးခိုကျင်းမရှိဘူးဆိုရင်တောင် နီးစပ်ရာမြောင်းတွေတို့ မြေနိမ့်ပိုင်းတွေမှာ ဝပ်နေ ရမှာလေ။ ပြေးတယ်ဆိုပိုဆိုးမှာ၊ တကယ်တော့ လေယာဉ်ဗုံးကြဲရင် ပြေးလို့ထိကြတာပါဘဲ” ဟု ၎င်းတို့ကြုံတွေ့ ရသည့် အခြေအနေကို ပြောပြသည်။   လက်ရှိတွင် စစ်ကော်မရှင်တပ်သည် စစ်ကိုင်းတိုင်း မြောက်ပိုင်းနှင့် ကချင်ပြည်အစပ်ရှိ ကောလင်း၊ အင်းတော်၊ မော်လူး၊ ပင်လည်ဘူးနှင့် ကသာမြို့တို့ကို ပစ်မှတ်ထားကာ လေကြောင်းတိုက်ခိုက်မှုများ ဆက်တိုက် လုပ်ဆောင်နေသည်။   ထူးခြားချက်မှာ အဆိုပါဒေသအများစုတွင် တိုက်ပွဲဖြစ်ပွားခြင်းမရှိဘဲ အရပ်သားများကိုသာ ဦးတည်တိုက်ခိုက် နေခြင်း ဖြစ်သည်။   မြေပြင်သတင်းရင်းမြစ်က “ဒီရက်ပိုင်းက စစ်ကိုင်းကချင်အစပ် အင်းတော်ရယ်၊ ထီးချိုင့်လည်းကြဲတယ်။ ကော လင်းကိုလည်း ကြဲတယ်လေ။ ဒီဘက်မှာ စစ်ရေးပစ်မှတ်လည်း ဘာမှမရှိပါဘူး။ တိုက်ပွဲလည်း ဘာမှ မရှိပါဘူး။ အဲ့ဒါကြောင့် ဘယ်လိုကြောင့် ကြဲလဲဆိုတာ ပြောပြလို့ကို မတတ်ဘူး။ ထုံးစံအတိုင်း အရပ်သားတွေကို ပစ်မှတ် ထား ကြဲတဲ့ပုံစံမျိုး ဖြစ်နေပြီ” ဟု ပြောသည်။   မော်လူးမြို့သည် ၂၀၂၃ ခုနှစ်၊ ဒီဇင်ဘာလကတည်းက တော်လှန်ရေးပူးပေါင်းတပ်ဖွဲ့များက သိမ်းပိုက်ထိန်းချုပ် ထားသည့် မြို့ဖြစ်ပြီး လက်ရှိတွင် အမျိုးသားညီညွတ်ရေးအစိုးရ (NUG) ၏ အုပ်ချုပ်ရေးယန္တရား လည်ပတ် နေသော နေရာဖြစ်သည်။   ထို့အပြင် မော်လူးမြို့သည် အင်းတော်နှင့် ကသာမြို့နယ်များမှ စစ်ဘေးရှောင်များ လာရောက်ခိုလှုံရာ အန္တရာယ် ကင်းဇုန်သဖွယ် ဖြစ်နေချိန်တွင် စစ်ကော်မရှင်တပ်က ယခုကဲ့သို့ အရပ်သားများကို ပစ်မှတ်ထား တိုက်ခိုက်လာခြင်း ဖြစ်သည်။   မြေပြင်သတင်းရင်းမြစ်များကမူ စစ်ကော်မရှင်သည် ၎င်းတို့ လက်လွှတ်ထားရသည့် မြို့ရွာများတွင် တော်လှန် ရေး အင်အားစုများ အနေဖြင့် အုပ်ချုပ်ရေး ယန္တရားများ အခြေမချနိုင်ရန်နှင့် ပြည်သူများ ထိတ်လန့်တုန်လှုပ် နေစေရန် ရည်ရွယ်၍ တိုက်ပွဲမရှိဘဲ လေကြောင်းပစ်ကူများကို အလွဲသုံးစားလုပ်ကာ စစ်ရာဇဝတ်မှုများ ကျူးလွန်နေခြင်းဖြစ်ကြောင်း သုံးသပ်ထားကြသည်။   #မော်လူးလေကြောင်းတိုက်ခိုက် #စစ်ကော်မရှင် #စစ်ကိုင်းတိုင်း #ကချင်အစပ် #အင်းတော် #ကသာ

တိုက်ပွဲ ဖြစ်ပွားခြင်း မရှိပဲ မော်လူးမြို့ကို စစ်ကော်မရှင်က ဗုံးကြဲတိုက်ခိုက် 

တိုက်ပွဲ ဖြစ်ပွားခြင်း မရှိပဲ မော်လူးမြို့ကို စစ်ကော်မရှင်က ဗုံးကြဲတိုက်ခိုက်   သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၀ ရက်။  စစ်ကို…

  • March 10, 2026
KIO  သတင်းနှင့် ပြန်ကြားရေးတာဝန်ခံ ဗိုလ်မှူးကြီးနော်ဘူနှင့် အထူးအင်တာဗျူး ကချင်ပြည်အတွင်းက စစ်ရေးအခြေအနေတွေဟာ မြေပြင်မှာ ခဏတာ ငြိမ်သက်နေသလို ထင်ရပေမယ့် တစ်ဖက်မှာတော့ နိုင်ငံတကာ ဖိအားတွေနဲ့ စစ်ရေးတင်းမာမှုတွေက ပိုပြီး မြင့်တက်လာနေပါတယ်။ အင်တာဗျူး အပိုင်း (၁) မြစ်ကြီးနားမှာ လေယာဉ်ကို ဘယ်သူ ပစ်တာလဲ၊ မကြာသေးခင်ကပဲ တရုတ်အစိုးရကိုယ်စားလှယ်အဖွဲ့တစ်ဖွဲ့နဲ့ ကချင် လွတ်လပ်ရေး အဖွဲ့ KIO ဥက္ကဌ ဗိုလ်ချုပ်ကြီး အင်ဘန်လ ခေါင်းဆောင်တဲ့ အဖွဲ့ တို့ တွေ့ဆုံခဲ့ပါတယ်။ တွေ့ဆုံမှုမှာ တရုတ်ဘက်က ဘာတွေ ပြောခဲ့တယ်ဆိုတာကို KIO သတင်းနှင့် ပြန်ကြားရေး တာဝန်ခံ ဗိုလ်မှူးကြီး နော်ဘူက အခုလို ပြောပြပါတယ်။  
ဗိုလ်မှူးကြီးနော်ဘူ - ဖေဖော်ဝါရီလ နောက်ဆုံးအပတ်လောက်မှာ ကျနော်တို့ KIA ဥက္ကဋ္ဌ နဲ့ ဒု-ဥက္ကဋ္ဌ တို့အဖွဲ့နဲ့ တရုတ်က လူကြီးတွေနဲ့ တွေ့တာရှိပါတယ်။ သူတို့မေးတာကတော့ ဖေဖော်ဝါရီလ ၂၀ ရက်နေ့မှာ မြစ်ကြီးနား ပြည်သူလူထု စီးနင်းနေတဲ့ လေယာဉ်ပစ်တာကို KIO/KIA အဖွဲ့အစည်းကနေ ပစ်တာ ဖြစ်ပါတယ်ဆိုပြီးမှ စစ်ကော်မရှင်ကနေ စွပ်စွဲထားတာ ရှိတယ်။ တရုတ်အစိုးရကလည်း အဲ့ဒါကို ကြားလို့ ကျနော်တို့နဲ့ တွေ့တဲ့ အချိန် မှာ ‘ခင်ဗျားတို့ ပစ်တာဟုတ်ပါသလား’ ဆိုပြီးမှ မေးတယ်။ ဒါတစ်ချက်။   မေး - ဟုတ်ကဲ့ လေယာဉ်ပစ်ခတ်မှုနဲ့ ပတ်သက်ပြီး KIO ဘက်က ဘယ်လို ပြန်လည်တုံ့ပြန်ခဲ့လဲဗျ။

 ဗိုလ်မှူးကြီးနော်ဘူ - ကျနော်တို့ကတော့ ဘာတုန့်ပြန်မှု ပေးရမှာလဲ။ လေယာဉ်ပစ်တာက ကျနော်တို့ မဟုတ်ဘူး လို့ ပြောပြီး အဲဒါ တုန့်ပြန်တာပဲ။ ကျနော်တို့ ပစ်တာမဟုတ်ဘူး ကျနော်တို့ ဒါမျိုးပေါ်လစီ မရှိဘူး။ ညွှန်ကြား တာလည်း မရှိဘူး။ ဘယ်အဖွဲ့အစည်းကနေ ပစ်တာလည်း ကျနော်တို့ မသိဘူး လို့ ဖြေထားတယ်။   မေး - တခြားရော ဘာတွေ ပြောလာတာ ရှိသေးလဲ။ စစ်ကော်မရှင်နဲ့ နိုင်ငံရေးဆွေးနွေးဖို့ တရုတ်ရဲ့ အကြံပြုချက်အပေါ် KIO ရဲ့ သဘောထားကရော ဘယ်လိုရှိပါသလဲ။ 
ဗိုလ်မှူးကြီးနော်ဘူ - ဒုတိယအချက်ကတော့ သူတို့အကြံပြုတာကတော့ ခင်ဗျားတို့လည်း စစ်ကော်မရှင်နဲ့ နိုင်ငံရေး ဆွေးနွေးဖို့ အကြံပြု လိုပါတယ် ဆိုပြီးမှ ပြောတာ အဲဒါ နှစ်ချက်။ သုံးချက်ကတော့ တရုတ်ပြည်ရဲ့ နှစ်သစ်ကူးအချိန်ကာလ လည်းဖြစ်နေလို့ ကျနော်တို့ကို နှစ်သစ်ကူးအချိန်ကာလမှာ လာတွေ့ဆုံတာ အဲဒါ သုံးချက် ဖြစ်ပါတယ်။ အဲဒီ ဖေဖော်ဝါရီလ နောက်ဆုံးအပတ်မှာ တွေ့တာ။   နိုင်ငံရေး ဆွေးနွေးပါဆိုတာက ဒါက အမြဲတမ်းပြောနေတဲ့ စကားဖြစ်ပါတယ်။ ကျနော်တို့ ဆွေးနွေးပွဲ လုပ်မယ် ဆိုလို့ရှိရင်တော့ ကျနော်တို့ ဆွေးနွေးဖို့ အဆင့်သင့် ဖြစ်ပါတယ်။ အခုလောလောဆယ် အချိန်ကာလမှာကတော့ စစ်ကော်မရှင်ဖက်ကနေ နိုင်ငံရေးဆွေးနွေး တကယ့် မြန်မာနိုင်ငံလုံးနဲ့ ဆိုင်တဲ့ မြန်မာ့ ပြည်တွင်းစစ် အဆုံးသတ် နိုင်တဲ့ နိုင်ငံရေးဆွေးနွေးပွဲကတော့ အခုချိန်မှာ စစ်ကော်မရှင်ဖက်ကနေ လုပ်မယ့် အလားအလာ ကျနော်တို့လည်း မတွေ့ဘူး။ သူတို့လည်း အဲဒါကို မပြောဘူး။ ဒါကြောင့် ကျနော်တို့လည်း ဆွေးနွေးဖို့ အဆင်မပြေတာ။ တကယ် လို့ နိုင်ငံရေးအပြောင်းအလဲ ရှိနိုင်လောက်တဲ့ ဆွေးနွေးပွဲဆိုလို့ရှိရင်တော့ ကျနော်တို့ တက်ဖို့ အဆင်သင့် ဖြစ်ပါတယ်ဆိုပြီးမှ ကျနော်တို့ ပြောတာ။   အင်တာဗျူး အပိုင်း (၂)   ကချင်ပြည်အတွင်းက စစ်ရေး အခြေအနေတွေ ဘယ်လို ရှိသလဲ။   ပြီးခဲ့တဲ့ ရက်ပိုင်းက ရဟတ်ယာဉ်တစ်စီး ပစ်ချ ခဲ့တယ် ဆိုတာနဲ့ ကချင်ပြည်က စစ်ရေး အခြေအနေတွေကိုတော့ ဗိုလ်မှူးကြီး နော်ဘူက အခုလို ဆက်ပြောပါတယ်။ 
ဗိုလ်မှူးကြီးနော်ဘူ - "ဗန်းမော်ဘက်မှာ တိုက်ပွဲက သိပ်ပြင်းထန်တာတော့ မရှိပေမဲ့ လေကြောင်းကနေ ပစ်တာ တွေ ရှိပါတယ်။ ရဟတ်ယာဉ်တစ်စီး ပစ်ချလိုက်တယ်ဆိုတာကတော့ ပစ်လို့ ထိတော့ထိတယ်လို့ ပြောပါတယ်။ အဲဒီ Mi-17 ရဟတ်ယာဉ်ဟာ ရွှေကူမှာ ခဏဆင်းပြီးမှ ပြန်သွားတယ်လို့ သိရပါတယ်။ လူကြီးပိုင်းတွေ လဲတာ လား၊ ဒါမှမဟုတ် လူနာတွေကို ကယ်ထုတ်တာလားလို့တော့ သုံးသပ်နေကြပါတယ်။ မေး- ကချင်ပြည်တွင်းက တခြားမြို့နယ်တွေရဲ့ မြေပြင် စစ်ရေးအခြေအနေကရော ဘယ်လိုရှိနေလဲ ဗျ။

 ဗိုလ်မှူးကြီးနော်ဘူ - လက်ရှိမှာတော့ ဖားကန့်ဘက်မှာ တိုက်ပွဲငယ်လေးတွေ ရှိပါတယ်။ ဝိုင်းမော်ဘက်မှာတော့ တစ်ပတ်လောက်ရှိပြီ မြေပြင်တိုက်ပွဲ မရှိဘူး။ ဒါပေမဲ့ စစ်ကောင်စီက ဗျူဟာကုန်းတွေကနေ လက်နက်ကြီးနဲ့ လှမ်းပစ်တာကြောင့် တစ်လပ်ကုန်းရပ်ကွက်က ပြည်သူ ၃ ယောက်လောက် ထိခိုက်တာရှိပါတယ်။ ဆွမ်ပရာဘွမ်၊ ခေါင်လန်ဖူးနဲ့ အင်းတော်ကြီးဘက်တွေမှာတော့ မြေပြင်တိုက်ပွဲ မရှိဘဲ ငြိမ်နေပါတယ်။ တချို့နေရာတွေမှာ စခန်းသိမ်းတယ်ဆိုတာကတော့ လော်ဘီတွေ ရေးတာပဲ ဖြစ်မှာပါ။ အမှန်က စစ်ကောင်စီဘက်က ရောက်လာတဲ့ နေရာတွေကို ကျနော်တို့က ပြန်ဆုတ်ခိုင်းတဲ့ ပုံစံလောက်ပဲ ရှိပါတယ်။   မေး - စစ်ကော်မရှင်ရဲ့ လေကြောင်းတိုက်ခိုက်မှုတွေရော ရှိလားဗျ။

 ဗိုလ်မှူးကြီးနော်ဘူ - လေကြောင်းကတော့ တိုက်ပွဲဖြစ်တဲ့နေရာတွေမှာ လာတတ်ပါတယ်။ ဒါပေမဲ့ အဆိုးဆုံးက တော့ တိုက်ပွဲမရှိဘဲနဲ့ ပြည်သူတွေရှိတဲ့နေရာကို ဗုံးကြဲတာပါ။ ဥပမာ ဝိုင်းမော်မြို့နယ် ဆမ်ပိုင်ရွာဆိုရင် တိုက်ပွဲ လည်းမရှိ၊ စခန်းလည်းမရှိဘဲနဲ့ ညသန်းခေါင်ယံအချိန်မှာ လေယာဉ်နဲ့လာပြီး ဗုံးကြဲသွားပါတယ်။ ဒါမျိုး ပြည်သူ လူထု သက်သက်ကို ပစ်မှတ်ထားတာတွေ ရှိနေပါတယ်။ မေး- တခြား ဘယ်နေရာတွေမှာကော စစ်ရေးတင်းမာမှုတွေ ရှိနေပါသလဲ။ 
ဗိုလ်မှူးကြီးနော်ဘူ - ဗန်းမော်၊ ဝိုင်းမော်၊ ဖားကန့်၊ အင်းတော်ကြီးနဲ့ ခေါင်လန်ဖူးတို့မှာတော့ အချိန်မရွေး တိုက်ပွဲ ဖြစ်နိုင်တဲ့အထိ စစ်ရေးတင်းမာနေတဲ့ အနေအထားမှာ ရှိနေပါတယ်ခင်ဗျ။   #ဗိုလ်မှူးကြီးနော်ဘူ #ကချင်လွတ်လပ်ရေးအဖွဲ့ #KIO #KIA #တရုတ်ကိုယ်စားလှယ်တွေ့ဆုံမှု #နိုင်ငံရေးတွေ့ဆုံဆွေးနွေးပွဲ

KIO  သတင်းနှင့် ပြန်ကြားရေးတာဝန်ခံ ဗိုလ်မှူးကြီးနော်ဘူနှင့် အထူးအင်တာဗျူး

KIO  သတင်းနှင့် ပြန်ကြားရေးတာဝန်ခံ ဗိုလ်မှူးကြီးနော်ဘူနှင့် အထူးအင်တာဗျူး ကချင်ပြည်အတွင်းက စစ်ရေးအခြေအနေတွေဟာ မြေပြင်မှာ ခဏတာ ငြိမ်သက်နေသလို ထ…

  • March 10, 2026
အီရန်အမျိုးသမီး ဘောလုံးသမား ၅ ဦးကို ဩစတေးလျ ခိုလှုံခွင့်ပေး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မတ်လ ၁၀ ရက်။   အာရှအမျိုးသမီး ဘောလုံးပြိုင်ပွဲတွင် အီရန်နိုင်ငံတော်သီချင်းကို မသီဆိုဘဲ အာဏာဖီဆန်ခဲ့သည့် အီရန်အားကစားသမား ၅ ဦးကို ဩစတေးလျအစိုးရက လူသားချင်းစာနာထောက်ထားမှုဆိုင်ရာ ဗီဇာ ထုတ်ပေးကာ ဘေးကင်းရာသို့ ပို့ဆောင်ပေးခဲ့သည်။   အဆိုပါ ကစားသမားများသည် ပထမဆုံးပွဲစဉ်မစမီ နိုင်ငံတော်သီချင်း သီဆိုရန် ငြင်းဆန်ခဲ့ခြင်းကြောင့် နေရပ်ပြန်လျှင် အန္တရာယ်ရှိနိုင်သဖြင့် ခိုလှုံခွင့် တောင်းခံခဲ့ကြခြင်း ဖြစ်သည်။   ဩစတေးလျ ဝန်ကြီးချုပ် အန်သိုနီ အယ်လ်ဘာနီးစ်က ၎င်းတို့အား ဘေးကင်းရာသို့ ပို့ဆောင်ထားပြီး ဖြစ်ကြောင်း အတည်ပြုခဲ့ပြီး အမေရိကန်သမ္မတ ထရမ့်ကလည်း ဩစတေးလျ ဝန်ကြီးချုပ်ထံ ဖုန်းဆက်၍ အဆိုပါ အမျိုးသမီးများကို အကာအကွယ်ပေးရန် တိုက်တွန်းခဲ့သည်။   သို့သော်လည်း ကျန်ရှိနေသည့် ကစားသမားများ၏ မိသားစုဝင်အချို့မှာ ခြိမ်းခြောက်ခံနေရကြောင်း သတင်းများ ထွက်ပေါ်နေသည်။   အီရန်အစိုးရဘက်ကမူ ဤဖြစ်ရပ်ကို အမေရိကန်၏ "စိတ်ဓာတ်စစ်ဆင်ရေး" သာဖြစ်ကြောင်း တုံ့ပြန်ထားသော်လည်း ဩစတေးလျအစိုးရကမူ ကျန်ရှိသည့် အသင်းသားများအတွက်လည်း အကူအညီပေးရန် အသင့်ရှိကြောင်း ကမ်းလှမ်းထားသည်။   #အီရန်အမျိုးသမီးဘောလုံးအသင်း #ဩစတေးလျအစိုးရ #ခိုလှုံခွင့်

အီရန်အမျိုးသမီး ဘောလုံးသမား ၅ ဦးကို ဩစတေးလျ ခိုလှုံခွင့်ပေး

အီရန်အမျိုးသမီး ဘောလုံးသမား ၅ ဦးကို ဩစတေးလျ ခိုလှုံခွင့်ပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၀ ရက်။  အာရှအမျိုးသမီး ဘောလုံးပြို…

  • March 10, 2026
အင်ဒိုနီးရှားနိုင်ငံက အိန္ဒိယထုတ် BrahMos ဒုံးကျည်များ ဝယ်ယူမည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၀ ရက်။   အင်ဒိုနီးရှားနိုင်ငံသည် အသံထက်မြန်သော BrahMos (ဘရာမို့စ်) ဒုံးကျည်စနစ်များကို အိန္ဒိယနိုင်ငံမှ ဝယ်ယူရန် သဘောတူညီမှု ရရှိခဲ့သည်။   အင်ဒိုနီးရှား ကာကွယ်ရေးဝန်ကြီးဌာန ပြောရေးဆိုခွင့်ရှိသူ ရီကို ရီကာဒို ဆီရာအစ် Rico Ricardo Sirait က ဤဝယ်ယူမှုသည် ရေကြောင်းကာကွယ်ရေးကဏ္ဍကို ခေတ်မီအောင် မြှင့်တင်ရန်ဖြစ်ပြီး သဘောတူညီချက်တန်ဖိုးမှာ အမေရိကန်ဒေါ်လာ သန်း ၂၀၀ မှ ၃၅၀ အတွင်း ရှိနိုင်ကြောင်း အတည်ပြုခဲ့သည်။   အိန္ဒိယနှင့် ရုရှားတို့ ပူးပေါင်းထုတ်လုပ်သည့် BrahMos ဒုံးကျည်သည် အသံထက် ၃ ဆနီးပါး မြန်ဆန်ပြီး ရေပြင်နှင့် မျဉ်းပြိုင် ပျံသန်းနိုင်သည့်အပြင် လမ်းကြောင်းကို စိတ်ကြိုက် ပြောင်းလဲနိုင်သည်။   ပင်လယ်ရေမျက်နှာပြင်နှင့် အလွန်နီးကပ်စွာ ပျံသန်းနိုင်ခြင်းကြောင့် ရန်သူ့ရေဒါများက ကြားဖြတ်ဖျက်ဆီးရန် ခက်ခဲလှသည်။   အင်ဒိုနီးရှားသည် ဖိလစ်ပိုင်ပြီးနောက် အဆိုပါဒုံးကျည်စနစ်ကို ဝယ်ယူသည့် ဒုတိယမြောက် အရှေ့တောင်အာရှနိုင်ငံ ဖြစ်လာသည်။   တောင်တရုတ်ပင်လယ်နှင့် ထိစပ်နေသော အင်ဒိုနီးရှား ရေပိုင်နက်နှင့် သီးသန့်စီးပွားရေးဇုန်အတွင်း တရုတ်ငါးဖမ်းသင်္ဘောများ ကျူးကျော်ဝင်ရောက်ခြင်းကို တားဆီးရန် ရည်ရွယ်ခြင်းဖြစ်သည်။ #အင်ဒိုနီးရှားနိုင်ငံ #အိန္ဒိယထုတ်BrahMosဒုံးကျည် #BrahMos

အင်ဒိုနီးရှားနိုင်ငံက အိန္ဒိယထုတ် BrahMos ဒုံးကျည်များ ဝယ်ယူမည်

အင်ဒိုနီးရှားနိုင်ငံက အိန္ဒိယထုတ် BrahMos ဒုံးကျည်များ ဝယ်ယူမည်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၀ ရက်။  အင်ဒိုနီးရှားနိုင်ငံသ…

  • March 10, 2026
ဂျပန်နိုင်ငံက ကိုယ်တိုင်ထုတ် အဝေးပစ်ဒုံးကျည်များ စတင်တပ်ဖြန့်မည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၀ ရက်။   ဂျပန်နိုင်ငံသည် တရုတ်နိုင်ငံအထိ လက်လှမ်းမီနိုင်သော ပြည်တွင်းဖြစ် အဝေးပစ်ဒုံးကျည်များကို စတင်တပ်ဖြန့်ရန် ပြင်ဆင်နေကြောင်း ရိုက်တာသတင်းတစ်ရပ်တွင် ဖော်ပြထားသည်။   ဂျပန်နိုင်ငံသည် မိမိတို့ဘာသာ တီထွင်ထုတ်လုပ်ထားသည့် မြေပြင်မှ သင်္ဘောပစ် Type-12 အဝေးပစ်ဒုံးကျည်များကို ဂျပန်အနောက်တောင်ပိုင်းရှိ ကန်ဂွန် (Camp Kengun) တပ်စခန်းတွင် လာမည့် မတ်လ ၃၁ ရက်နေ့၌ အပြီးသတ် နေရာချထားမည်ဖြစ်သည်။       မစ်ဆူဘစ်ရှီ အကြီးစားစက်မှုလုပ်ငန်း (Mitsubishi Heavy Industries) မှ ထုတ်လုပ်သည့် အဆိုပါ Type-12 ဒုံးကျည်သည် ကီလိုမီတာ ၁,၀၀၀ အထိ ပစ်ခတ်နိုင်ပြီး၊ ယခင်က ၂၀၀ ကီလိုမီတာသာ ပစ်ခတ်နိုင်ရာမှ သိသိသာသာ တိုးမြှင့်လိုက်ခြင်း ဖြစ်သည်။   ၎င်းသည် တရုတ်နိုင်ငံအထိ ရောက်ရှိနိုင်သော အကွာအဝေးဖြစ်သည်။ ဝန်ကြီးချုပ် စေနိုင်း တာကာအိချီ Sanae Takaichi ၏ အစိုးရလက်ထက်တွင် ဂျပန်နိုင်ငံသည် စစ်ရေးအင်အားကို မြှင့်တင်လျက်ရှိသည်။   လာမည့်သီတင်းပတ်များအတွင်း သေစေနိုင်သော လက်နက်များကို ပြည်ပသို့ တင်ပို့ရောင်းချခွင့်ဆိုင်ရာ ကန့်သတ်ချက်များကိုလည်း ပယ်ဖျက်ရန် စီစဉ်နေသည်။   တရုတ်နိုင်ငံက ထိုင်ဝမ်အနီးတွင် စစ်ရေးအရ တင်းမာမှုများ ဖန်တီးနေခြင်းကြောင့် ဂျပန်အစိုးရသည် အဆိုပါဒုံးကျည် တပ်ဖြန့်မှုကို သတ်မှတ်ချိန်ထက် တစ်နှစ်စော၍ အကောင်အထည်ဖော်ခြင်း ဖြစ်သည်။ #Japan #အဝေးပစ်ဒုံးကျည်

ဂျပန်နိုင်ငံက ကိုယ်တိုင်ထုတ် အဝေးပစ်ဒုံးကျည်များ စတင်တပ်ဖြန့်မည်

ဂျပန်နိုင်ငံက ကိုယ်တိုင်ထုတ် အဝေးပစ်ဒုံးကျည်များ စတင်တပ်ဖြန့်မည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၀ ရက်။  ဂျပန်နိုင်ငံသည် တရုတ်…

  • March 10, 2026
G7 က သိုလှောင်ထားသော ရေနံများ ထုတ်သုံးဖို့ ဆွေးနွေး၊ ရေနံဈေး အနည်းငယ် ကျ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၀ ရက်။   အရှေ့အလယ်ပိုင်းဒေသတွင် ဖြစ်ပွားနေသော စစ်ပွဲအတွင်း အစ္စရေးနိုင်ငံက အီရန်နိုင်ငံရှိ ရေနံချက်စက်ရုံများနှင့် သိုလှောင်ရုံများကို လေကြောင်းမှ တိုက်ခိုက်ခဲ့သကဲ့သို့၊ အီရန်ဘက်ကလည်း ဆော်ဒီအာရေဗျနိုင်ငံရှိ ရေနံမြေများကို ဒရုန်းများဖြင့် ပြန်လည်တိုက်ခိုက်ခဲ့ခြင်းကြောင့် ကမ္ဘာ့ရေနံဈေးနှုန်းများ မြင့်တက်လျက်ရှိသည်။   ကမ္ဘာ့ရေနံတင်ပို့မှု ငါးပုံတစ်ပုံခန့် ဖြတ်သန်းရာ ဟော်မုဇ်ရေလက်ကြားတွင် သင်္ဘောသွားလာမှုအားလုံးနီးပါး ရပ်တန့်နေခြင်းသည် ရေနံဈေးကွက်အတွက် ကြီးမားသော စိန်ခေါ်မှုတစ်ရပ် ဖြစ်နေသည်။   ထို့ကြောင့် G7 ဘဏ္ဍာရေးဝန်ကြီးများနှင့် အပြည်ပြည်ဆိုင်ရာ စွမ်းအင်အေဂျင်စီ (IEA) တို့သည် အရေးပေါ် အစည်းအဝေးတစ်ရပ် ပြုလုပ်ခဲ့ပြီး ကမ္ဘာ့စွမ်းအင် လိုအပ်ချက်ကို ဖြည့်ဆည်းရန် လိုအပ်သည့် အစီအမံများကို လုပ်ဆောင်သွားမည်ဟု ထုတ်ပြန်ခဲ့သည်။   ယင်းထုတ်ပြန်ချက်နှင့်အတူ အီရန်စစ်ပွဲမှာ ကြာရှည်မည်မဟုတ်ကြောင်း အမေရိကန်သမ္မတ ဒေါ်နယ်ထရမ့်၏ ပြောဆိုချက်ကြောင့် ရေနံတစ်စည်လျှင် အမေရိကန်ဒေါ်လာ ၁၂၀ ခန့်အထိ ရှိနေရာမှ ဒေါ်လာ ၁၀၀ အောက်သို့ ပြန်လည်ကျဆင်းသွားခဲ့သည်။       သမ္မတထရမ့်က ရေနံရှားပါးမှုကို ဖြေရှင်းရန်အတွက် ရုရှားအပေါ် ချမှတ်ထားသော ပိတ်ဆို့အရေးယူမှုအချို့ကို ဖြေလျှော့ပေးရန်အပါအဝင် အခြားသော နည်းလမ်းများကိုပါ စဉ်းစားလျက်ရှိသည်။   တစ်ဖက်တွင်လည်း ကမ္ဘာအနှံ့  လောင်စာဆီရှားပါးမှုများ ကြုံတွေ့လာနေသည်။ နိုင်ငံပေါင်းစုံက နည်းမျိုးစုံဖြင့် လောင်စာ ပြဿနာကို ဖြေရှင်းလျက်ရှိရာ ဖိလစ်ပိုင်အစိုးရက ဆီချွေတာသည့်အနေဖြင့် ဝန်ထမ်းများ တစ်ပတ်လျှင် ရုံးလေးရက်သာ တက်ရောက်ကြရန် မေတ္တာရပ်ခံထားသည်။ #G7 #လောင်စာဆီစျေး

G7 က သိုလှောင်ထားသော ရေနံများ ထုတ်သုံးဖို့ ဆွေးနွေး၊ ရေနံဈေး အနည်းငယ် ကျ

G7 က သိုလှောင်ထားသော ရေနံများ ထုတ်သုံးဖို့ ဆွေးနွေး၊ ရေနံဈေး အနည်းငယ် ကျ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၀ ရက်။  အရှေ့အလယ်ပို…

  • March 10, 2026
ကရင်နီပြည်တွင် စက်သုံးဆီပြတ်လပ်ကာ ဈေးနှုန်း မြင့်တက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၀ ရက်။   ကရင်နီ (ကယား) ပြည်တွင် စက်သုံးဆီပြတ်လပ်မှု အကျပ်အတည်း ဆိုးရွားလာနေပြီး တစ်လီတာ ကျပ်တစ်သောင်းအထိ စံချိန်တင်မြင့်တက်နေသည်ဟု ဒေသခံများက ပြောသည်။   ကရင်နီပြည်အတွင်း စက်သုံးဆီဈေးနှုန်းများ အဆမတန် မြင့်တက်လာခြင်းနှင့်အတူ ဆီပြတ်လပ်မှုများ ဆိုးရွားစွာ ကြုံတွေ့နေရသဖြင့် ဒေသခံများ၏ လူမှုစီးပွားဘဝနှင့် အရေးပေါ် ကယ်ဆယ်ရေးလုပ်ငန်းများပါ ရပ်တန့်လုနီးပါး အခြေအနေနှင့် ရင်ဆိုင်နေရသည်။   ယခင်က ဓာတ်ဆီတစ်လီတာလျှင် ၃,၅၀၀ ကျပ်ဝန်းကျင်သာ ရှိခဲ့သော်လည်း လက်ရှိတွင် ဒီးမော့ဆိုနှင့် မိုးဗြဲမြို့ တို့၌ ၈,၀၀၀ ကျပ်အထိ မြင့်တက်နေပြီး ပီကင်းဒေသဘက်တွင် ၁၀,၀၀၀ ကျပ်အထိ ပေးဝယ်နေရသည်။   ထို့ပြင် မော်ချီးဒေသကဲ့သို့သော ဝေးလံသည့် နေရာများတွင်မူ ငွေပေးဝယ်ရန်ပင် ဆီရောင်းချမည့်သူ မရှိတော့ သည့်အထိ ပြတ်လပ်နေကြောင်း ဒေသခံများက ဆိုသည်။   ကျေးလက်မြေအဖွဲ့ ဒါရိုက်တာ မမူစဲက “ဆီဈေးတက်တဲ့အပြင် ဆီကပြတ်သွားတဲ့ အတွက်ကြောင့်မို့လို့ အရေး ပေါ် ကူညီတဲ့နေရာတွေ၊ အရေးပေါ် သွားလာဖို့ နေရာတွေမှာ အရမ်းခက်ခဲ သွားတယ်။ ပြည်သူတွေအနေနဲ့ ဆိုလို့ရှိရင် နေ့စဉ်နှင့်အမျှ ခက်ခဲမှုတွေ ရှိနေပြီပေါ့နော်။ အခုလိုမျိုး ဆီဈေးတက်တာကြောင့် ဆန်ဈေး တက် သွားတာ နောက်ထပ် ရိက္ခာ ပြတ်လတ်မှုတွေ ငတ်မွတ်မှုတွေ၊ အဲ့ဒီနောက်ဆက်တွဲကတော့ ကိုယ့်ကိုယ်ကို သတ် သေတဲ့ အရာတွေ ဖြစ်လာမှာကိုလည်း ကျမတို့ စိတ်ပူမိပါတယ်ရှင့်” ဟု လက်ရှိရင်ဆိုင်နေရသည့် အခြေအနေ ကို ပြောသည်။   အဆိုပါ စက်သုံးဆီ အကျပ်အတည်းသည် စစ်ရေး၊ နိုင်ငံရေး အခြေအနေများအပြင် လောင်စာဆီ ရှားပါးမှု နှင့် ပြည်တွင်း လောင်စာဆီ ပြတ်လပ်မှု၊ ရှားပါးမှု ဂယက်များကြောင့် ယခုကဲ့သို့ ကရင်နီပြည်၏ ဆီဈေးကွက်ကို ရိုက်ခတ်နေခြင်းဖြစ်သည်ဟု ကရင်နီပြည် ကြားကာလ အုပ်ချုပ်ရေးကောင်စီ (IEC) က ဆိုသည်။   ယင်းနှင့်ပတ်သက်၍ IEC အတွင်းရေးမှူး-၂ ဦးဗညားက “ကျနော်တို့ ပြည်နယ်ထဲကို ထိုင်းကတဆင့်နဲ့ ပြည်တွင်း ဆီကနေတဆင့် ရယူသုံးစွဲ နေရတဲ့ ပြည်နယ် ဖြစ်တော့ ထိုင်းဖက်လည်း ပိတ်ထားတော့ တင်သွင်းခွင့် မရတော့ ဘူးပေါ့။ ပြည်တွင်းက တင်သွင်းတဲ့ လမ်းကြောင်းလည်း ပြည်တွင်း ဓါတ်ဆီပမာဏ ပေါ်မူတည်ပြီး သုံးစွဲရ တော့ ပြည်တွင်းဆီ အကျပ်အတည်းကြောင့် ကျနော်တို့ဆီ ရောက်ဖို့ မလွယ်တော့လို့ပါ” ဟု ပြောသည်။   လက်ရှိတွင် ကရင်နီပြည်အတွင်း ရောင်းချနေသည့် ဆီများသည် လက်ကျန်ပမာဏများသာ ဖြစ်ပြီး နယ်စပ်နှင့် ပြည်တွင်းလမ်းကြောင်းများ ပိတ်ဆို့နေသဖြင့် ထပ်မံဖြည့်တင်းရန် အလွန်ခက်ခဲနေသည်။   အထူးသဖြင့် ဖေဖော်ဝါရီလအတွင်းက ဖားဆောင်းမြို့နယ် တိုက်ပွဲများအတွင်း သံလွင်မြစ်ကူးတံတား၊ ထူးချောင်းတံတားနှင့် ပွန်ချောင်းတံတားများ ပျက်စီးသွားခြင်းက ကုန်စည်စီးဆင်းမှုအတွက် ကြီးမားသော အဟန့်အတား ဖြစ်လာစေခဲ့သည်။   ဒီးမော့ဆို အနောက်ဘက်ခြမ်းမှ ဒေသခံတစ်ဦးကလည်း “ဒီတစ်ရက်နှစ်ရက် အတွင်းမှာ ရုတ်တရက် တော် တော်လေး တက်သွားတယ်ပေါ့နော်။ တစ်လီတာ ၈,၀၀၀ တဲ့။ တော်တော်များများက ပြတ်နေလို့ မရောင်းတာ အဲ့လိုမျိုး ရှိသွားမယ်လို့ ထင်တယ်” ဟု ပြောသည်။     ဤကဲ့သို့ စက်သုံးဆီ ပြတ်လပ်မှုကြောင့် သယ်ယူပို့ဆောင်ရေးနှင့် ကုန်စည်စီးဆင်းမှုများ ရပ်တန့်နေပြီး ပြည်သူ များ၏ နေ့စဉ်သွားလာမှုမှာလည်း ကြီးမားသော စိန်ခေါ်မှုများနှင့် ရင်ဆိုင်နေရသည်။   လက်ရှိတွင် IEC အနေဖြင့် ဤအကျပ်အတည်းကို ဖြေရှင်းနိုင်ရန် အနီးကပ် ဆန်းစစ်နေပြီး ဖြစ်နိုင်ခြေရှိသည့် အစီအမံများကို ချမှတ်လုပ်ဆောင်သွားမည်ဟု ဆိုသည်။   #IEC #စက်သုံးဆီစျေးနှုန်း #ဓာတ်ဆီ #ကရင်နီဒေသ  

ကရင်နီပြည်တွင် စက်သုံးဆီပြတ်လပ်ကာ ဈေးနှုန်း မြင့်တက်

ကရင်နီပြည်တွင် စက်သုံးဆီပြတ်လပ်ကာ ဈေးနှုန်း မြင့်တက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၀ ရက်။  ကရင်နီ (ကယား) ပြည်တွင် စက်သုံးဆီပ…

  • March 10, 2026
×Close