စစ်ကိုင်းတိုင်း – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကိုင်းတိုင်း

ဗိုလ်နဂါးတပ်နှင့် NUG ၏ ကာကွယ်ရေး တပ်ဖွဲ့များ အကြား ပစ်ခတ်မှုများ ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၇ ရက်။ စစ်ကိုင်းတိုင်း၊ ပုလဲမြို့နယ်အတွင်း အခြေစိုက်သော ဗိုလ်နဂါး ဦးဆောင်သည့် BNRA နှင့် NUG လက်အောက်ခံ MOD တပ်ရင်းတပ်ဖွဲ့များကြား အပြန်အလှန် ပစ်ခတ်မှုများ ပြင်းပြင်းထန်ထန် ဖြစ်ပွားနေသည်။ ပုလဲမြို့နယ်အတွင်း တော်လှန်ရေးအင်အားစု အချင်းချင်းကြား စစ်ရေးပဋိပက္ခများ အရှိန်မြင့်တက်လာပြီး ဗမာအမျိုးသား တော်လှန်ရေး တပ်မတော် (BNRA) နှင့် အမျိုးသားညီညွတ်ရေးအစိုးရ (NUG) လက်အောက်ခံ ကာကွယ်ရေးတပ်ဖွဲ့များအကြား ယနေ့ ဖေဖော်ဝါရီ ၁၇ ရက် နံနက်ပိုင်းမှ စတင်ကာ အပြန်အလှန် ပစ်ခတ်မှုများ ပြင်းထန်စွာ ဖြစ်ပွားနေသည်။ ယနေ့ နံနက် ၇ နာရီခွဲခန့်မှစတင်၍ ပုလဲမြို့နယ်အတွင်းရှိ ချင်ပြစ်ကျေးရွာနှင့် ပုပ္ပါကျေးရွာအနီးရှိ BNRA ဂိတ် စခန်းများကို NUG ကာကွယ်ရေးဝန်ကြီးဌာန (MOD) လက်အောက်ခံ တပ်ရင်းများက လက်နက်ကြီးများ၊ စက် သေနတ်များနှင့် ဒရုန်းများကို အသုံးပြု၍ လာရောက်တိုက်ခိုက်ခဲ့ခြင်းဖြစ်ကြောင်း BNRA ခေါင်းဆောင် ဗိုလ်နဂါး က ၎င်း၏ လူမှုကွန်ရက်စာမျက်နှာတွင် ရေးသားထားသည်။ ပုလဲမြို့နယ်အတွင်း ဖြစ်ပွားနေသည့် စစ်ရေးအခြေအနေနှင့် ပတ်သက်၍ ဗိုလ်နဂါးက ယခုကဲ့သို့ ရေးသားဖော်ပြ ထားသည်။ “NUG ရဲ့ MOD တပ်ရင်းတွေဟာ ဒီနေ့နံနက် ၇ နာရီခွဲမှစ BNRA ဂိတ်စခန်းများအား လက်နက်ကြီး ပစ်ခတ် ခြင်းနှင့် ဒရုန်းဗုံးသီးများဖြင့်ပါ ကိုလာရောက်တိုက်ခိုက်နေပြီဖြစ်ပါသည်။ အစိုးရအမည်ခံထားခြင်း၊ စစ်ဒေသ တစ်တွင်လည်း KIA အဖွဲ့အစည်းမှ ဦးဆောင်ခြင်းကြောင့် ထိုသို့အကျည်းတန်သော လုပ်ရပ်ကို တော်လှန်ဘက် အချင်းချင်း ပြုလုပ်မည်မဟုတ်ဟု လွန်ခဲ့သော နှစ်များအတွင်း ယူဆထားခဲ့ဖူးသော်လည်း ယခုအခါ အံ့သြဖွယ် ဆိုးသွမ်းမှုကိုမြင်ရပြီ ဖြစ်ကြောင်းနှင့် ပြည်သူအများ လတ်တလော အချိန်အတွင်း ဘေးလွတ်ရာ စစ်ရေး သတိပြု နေကြပါရန် အရေးပေါ် အသိပေးနှိုးဆော်အပ်ပါသည်” အဆိုပါ စစ်ရေးပဋိပက္ခသည် ပြီးခဲ့သည့် ဖေဖော်ဝါရီ ၁၂ ရက်နေ့က နှစ်ဖက်တပ်ဖွဲ့ဝင်များအကြား လက်နက် ပြန်အပ်ရေးကိစ္စ ညှိနှိုင်းရာမှ အငြင်းပွားမှုဖြစ်ပွားကာ NUG လက်အောက်ခံ ယင်းမာပင်ခရိုင် တပ်ရင်း (၄) မှ ရဲဘော်တစ်ဦး သေဆုံးခဲ့သည့် ဖြစ်စဉ်အပြီးတွင် အခြေအနေများ ပိုမိုဆိုးရွားလာခဲ့ခြင်း ဖြစ်သည်။ အဆိုပါဖြစ်စဉ်နှင့် ပတ်သက်၍ BNRA အဖွဲ့က ကျူးလွန်ထားသည်ဆိုသော ရာဇဝတ်မှုများနှင့် စပ်လျဉ်း၍ ဖမ်းဆီးစစ်ဆေးမှုများ ပြုလုပ်နိုင်ရန်အတွက် ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနနှင့် ကာကွယ်ရေး ဝန်ကြီးဌာနတို့ ပူးပေါင်းဆောင်ရွက်လျက်ရှိကြောင်း NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က သတင်းမီဒီယာများသို့ ဖြေကြားထားသည်။ လက်ရှိတွင် တော်လှန်ရေးတပ်ဖွဲ့အချင်းချင်းကြား ပစ်ခတ်မှုများကြောင့် ချင်ပြစ်၊ ကြာစီ၊ ပုပ္ပါ နှင့် မောင်းတုံ ကျေးရွာများမှ ဒေသခံပြည်သူများသည် အိုးအိမ်စွန့်ခွာကာ ဘေးလွတ်ရာသို့ အရေးပေါ် တိမ်းရှောင်နေရသည်။ နှစ်ဖက် ထိခိုက်ကျဆုံးမှု အခြေအနေကို သီးခြားအတည်ပြုနိုင်ခြင်း မရှိသေးသော်လည်း မြေပြင်တွင် စစ်ရေး တင်းမာမှုများ ဆက်လက်ရှိနေဆဲဖြစ်ကာ ဒေသခံများကတော့ တော်လှန်ရေးအင်အားစုများအကြား သွေးကွဲမှု များ အပေါ် စိုးရိမ်ပူပန်လျက် ရှိကြသည်။

ဗိုလ်နဂါးတပ်နှင့် NUG ၏ ကာကွယ်ရေး တပ်ဖွဲ့များ အကြား ပစ်ခတ်မှုများ ပြင်းထန်

ဗန်းမောက်ဒေသခံများ NUG ကို ထောက်ခံသော်လည်း ရွှေလုပ်ကွက်များ ပြန်ဖွင့်ရန် တောင်းဆို   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၁ ရက်။ စစ်ကိုင်းတိုင်း၊ ဗန်းမောက်မြို့နယ် တောင်ပိုင်းရှိ ဒေသခံပြည်သူများနှင့် စစ်ဘေးရှောင် (၅၀၀) ကျော် သည် NUG ကို ပြည်သူ့အစိုးရအဖြစ် ဆက်လက်ထောက်ခံကြောင်း ပြသခဲ့ကြသော်လည်း လက်ရှိကျင့်သုံးနေသည့် ရွှေတူးဖော်မှုမူဝါဒကို ပြန်လည်သုံးသပ်ပေးရန် ဆန္ဒထုတ်ဖော်ခဲ့ကြသည်။ အမျိုးသားညီညွတ်ရေးအစိုးရ (NUG) ကို ပြည်သူ့အစိုးရအဖြစ် ဆက်လက်ထောက်ခံကြောင်း ပြသခဲ့ကြသော် လည်း လက်ရှိကျင့်သုံးနေသည့် ရွှေတူးဖော်မှုမူဝါဒကို ပြန်လည်သုံးသပ်ပေးရန် ဖေဖော်ဝါရီလ (၉) ရက်နေ့က ဆန္ဒထုတ်ဖော်ခဲ့ကြခြင်း ဖြစ်သည်။ ‘NUG အစိုးရ တို့အစိုးရ’ ဟု ကြွေးကြော်ကာ ဆန္ဒပြခဲ့ကြသည့် အဆိုပါလူထုသည် ဒေသခံများ၏ စားဝတ်နေ ရေး အတွက် တိကျခိုင်မာသည့် ရွှေတူးဖော်မှုမူဝါဒ ချမှတ်ပေးရန်နှင့် ပိတ်သိမ်းထားသည့် တစ်နိုင်တစ်ပိုင် လုပ်ကွက်များကို ပြန်လည်ဖွင့်လှစ်ပေးရန် တောင်းဆိုခဲ့ကြခြင်းဖြစ်သည်။ ဆန္ဒထုတ်ဖော်ရာမှု အခြေအနေနှင့် ပတ်သက်၍ “ကျနော်တို့ ဒီက ဗန်းမောက်သူ ဗန်းမောက်သားတွေက စစ်အုပ်စုကို ဘယ်တော့မှ အသိအမှတ်မပြုဘူး။ NUG ကိုပဲ ကိုယ့်အစိုးရလို့ ယုံကြည်တယ်။ ဒါပေမဲ့ အခုက NUG သယံဇာတအဖွဲ့က လုပ်ကွက်တွေအကုန် လိုက်ပိတ်ခိုင်းနေတော့ လက်လုပ်လက်စားတွေ ငတ်မတတ် ဖြစ်နေပြီ။ တော်လှန်ရေးကို ထောက်ခံသလို ကျနော်တို့ ဝမ်းရေးကိုလည်း အစိုးရအနေနဲ့ စာနာပေး စေချင် တယ်” ဟု ပြောသည်။ ယခုကိစ္စနှင့် ပတ်သက်၍ NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က လုပ်ပိုင်ခွင့်ရထားသည့် ကုမ္ပဏီအချို့သည် အစိုးရ၏ မူဝါဒကို ချိုးဖောက်ကာ အစုစားလုပ်ကွက်များကို စနစ်တကျမဟုတ်ဘဲ ပြန်လည်ခ ျထားပေးနေမှုများကြောင့်သာ လုပ်ငန်းပိတ်သိမ်းမှုများ ပြုလုပ်ခဲ့ရခြင်းဖြစ်ကြောင်း တုံ့ပြန်ပြောကြားထား သည်။ ဗန်းမောက်မြို့သည် ပြီးခဲ့သည့် ဖေဖော်ဝါရီလ (၈) ရက်နေ့ကမှ တော်လှန်ရေးအင်အားစုများ လက်လွှတ်ခဲ့ရသည့် မြို့ဖြစ်သော်လည်း စစ်ကောင်စီ၏ အုပ်ချုပ်ရေးယန္တရား စိုးမိုးနိုင်ခြင်းမရှိသည့် မြို့နယ်တောင်ပိုင်းဒေသများတွင် ပြည်သူများက NUG အစိုးရအပေါ် ယုံကြည်မှုရှိနေဆဲဖြစ်ကြောင်း ပြသခဲ့ခြင်းဖြစ်သည်။ အဆိုပါ လူထုဆန္ဒထုတ်ဖော်ပွဲကို ဗန်းမောက်မြို့နယ် ပြည်သူ့လုံခြုံရေးအဖွဲ့ (ပလဖ) က လုံခြုံရေးယူပေးခဲ့ပြီး ဒေသခံများကတော့ အစိုးရနှင့် ပြည်သူကြား မြေပြင်အခြေအနေကို ထင်ဟပ်သည့် မူဝါဒများ ပေါ်ထွက်လာရန် မျှော်လင့်နေကြသည်။

ဗန်းမောက်ဒေသခံများ NUG ကို ထောက်ခံသော်လည်း ရွှေလုပ်ကွက်များ ပြန်ဖွင့်ရန် တောင်းဆို  

အာဏာသိမ်း နှစ်ပတ်လည် အထိမ်းအမှတ် ကျင်းပသူ နိုင်ကျဉ်း အမျိုးသမီး ၅ ဦး တိုက်ပိတ်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၃ ရက်။ စစ်ကိုင်းတိုင်း မော်လိုက် အကျဉ်းထောင်တွင် အာဏာသိမ်း ၅ နှစ်ပြည့် အထိမ်းအမှတ် ကျင်းပသည့် နိုင်ကျဉ်း အမျိုးသမီး ၅ ဦး တိုက်ပိတ်ခံထားရပြီး လုံခြုံရေးအတွက် စိုးရိမ်ရ သည်ဟု နိုင်ကျဉ်းအရေး စောင့်ကြည့်နေသည့် အဖွဲ့အစည်းများက ပြောသည်။ စစ်အာဏာသိမ်းမှု ၅ နှစ်ပြည့်မြောက်သည့် ဖေဖော်ဝါရီလ ၁ ရက်နေ့တွင် ကလေးမြို့နယ်ရှိ မော်လိုက်အကျဉ်းထောင် အတွင်းမှ နိုင်ငံရေးအကျဉ်းသူ ၁၀၀ ကျော်သည် ‘သွေးသစ္စာ’ သီချင်းကို သံပြိုင်ဟစ်ဆိုကာ အာဏာရှင်စနစ်ကို သပိတ် မှောက် ဆန္ဒထုတ်ဖော်ခဲ့ကြခြင်းသည်။ အဆိုပါ ဆန္ဒပြပွဲတွင် အကျဉ်းသူများသည် မတရားစွပ်စွဲထားသည့် အမှုကြီးများကို ပယ်ဖျက်ပေးရန်နှင့် အကျဉ်း သားများအကြား တန်းတူအခွင့်အရေးပေးရန် အဓိကတောင်းဆိုခဲ့ကြသည်။ နိုင်ငံရေးအကျဉ်းသူများအဖွဲ့ (WOPP) ပြောရေးဆိုခွင့်ရှိသူ မဆုမြတ်က “တောင်းဆိုထားတဲ့ အချက်တွေက အမှုကြီးတွေ ပယ်ဖျက်ဖို့တွေ၊ အကျဉ်းသူ အကျဉ်းသားတွေ တန်းတူ အခွင့်အရေး ရရှိဖို့ ဆိုတဲ့အချက်တွေက အရမ်း အခြေခံကျတဲ့ ဖြစ်သင့်တဲ့ လူ့အခွင့်အရေး တောင်းဆိုချက်တွေ ဖြစ်တယ်။ ဒါပေမဲ့ အရင်က အတွေ့ အကြုံတွေ ကြည့်မယ်ဆိုရင် အကျဉ်းထောင် အာဏာပိုင်တွေဘက်က အပြုသဘောဆောင်တဲ့ ညှိနှိုင်းမှုတွေ မရှိခဲ့ဘူး” ဟု ပြောသည်။ အကျဉ်းသူများသည် ၎င်းတို့၏ တောင်းဆိုချက်များကို လာမည့် မြန်မာနှစ်ဆန်း ၁ ရက်နေ့ထက် နောက်မကျဘဲ လိုက်လျောပေးရန် ရာဇသံပေးထားပြီး၊ လိုက်လျောမှုမရှိပါက နှစ်ဆန်း ၂ ရက်နေ့တွင် တစ်နိုင်ငံလုံးရှိ အကျဉ်း ထောင်များနှင့်အတူ တိုက်ပွဲကို အရှိန်မြှင့်သွားမည်ဟု ကြေညာထားသည်။ ဤဆန္ဒပြမှုကြောင့် လက်ရှိတွင် ဦးဆောင်သူအမျိုးသမီး ၁၅ ဦးခန့် တိုက်ပိတ်ခံထားရပြီး ၎င်းတို့၏ လုံခြုံရေး အတွက် စိုးရိမ်ရကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန် ထားသည်။ မြေပြင်သတင်းရင်းမြစ်တစ်ဦးကလည်း “ကျနော်တို့ အကျဉ်းထောင်မှာရှိတဲ့ နိုင်ငံရေးအကျဉ်းသူ အကျဉ်းသား တွေရဲ့ အသံကို ‌ထောင်ပြင်ပမှာရှိတဲ့ ပြည်သူပြည်သားတွေ အနေနဲ့ ဂရုစိုက်ပေးကြပါ။ ကျနော်တို့နိုင်မှ လွတ် မယ့်သူတွေအတွက် ကျနော်တို့ ညီညီညွှတ်ညွှတ်နဲ့ စစ်အာဏာရှင် အပါအဝင် အာဏာရှင်အမြစ်ပြတ်တဲ့အထိ ဆက်လက် ချီတက်ဖို့အတွက် အလေးအနက်တိုက်တွန်းလိုပါတယ်” ဟု ပြောသည်။ မဆုမြတ်က ဆက်လက်၍ “နိုင်ငံရေးအကျဉ်းသူတွေအပါအဝင် အကျဉ်းသူ တစ်ရာကျော်က သွေးသစ္စာ သီချင်း ကို ဆိုပြီးတော့ ဆန္ဒပြခဲ့တာက အကြမ်းဖက်မှုမပါဘဲနဲ့ ကိုယ့်ရဲ့ ယုံကြည်ချက်ကို ဖော်ထုတ်ပြသတဲ့ လုပ်ရပ် တစ်ခုသာ ဖြစ်တယ်။ ဒါကို အာဏာပိုင်တွေဘက်က အပြစ်အဖြစ်နဲ့ သတ်မှတ်ပြီးတော့ ဖိနှိပ်အရေးယူတာက အကျဉ်းသူတွေရဲ့ လွပ်လပ်စွာ ထုတ်ဖော်ပြောဆိုခွင့်ကို ပြင်းထန်စွာ ချိုးဖောက်တာဖြစ်ပြီးတော့ လူ့အခွင့်အရေး ဥပဒေနဲ့ လုံးဝမကိုက်ညီဘူးလို့ မြင်ပါတယ်” ဟု ဝေဖန်ထောက်ပြသည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ စာရင်းများအရ အာဏာသိမ်း ၅ နှစ်တာ ကာလအတွင်း လူပေါင်း ၂၂,၀၀၀ ကျော် မတရားဖမ်းဆီးခံထားရဆဲ ဖြစ်သည်။ နိုင်ငံတကာ အသိုင်းအဝိုင်းအနေဖြင့် စိုးရိမ်ကြောင်း ထုတ်ပြန်ရုံဖြင့် မရပ်ဘဲ အကျဉ်းထောင်များအတွင်း လွတ် လပ်သော စုံစမ်းရေးအဖွဲ့များ ဝင်ရောက်ခွင့်ရရန်နှင့် နိုင်ငံရေး အကျဉ်းသားများ ချက်ချင်းလွတ်မြောက်ရန် လက် တွေ့ကျသည့် ဖိအားပေးမှုများ တိုးမြှင့်လုပ်ဆောင်သင့်ကြောင်း တော်လှန်ရေးအင်အားစုမျာနှင့် နိုင်ကျဉ်းအရေး ဆောင်ရွက်နေသူများက တောင်းဆိုနေကြသည်။

အာဏာသိမ်း နှစ်ပတ်လည် အထိမ်းအမှတ် ကျင်းပသူ နိုင်ကျဉ်း အမျိုးသမီး ၁၅ ဦး တိုက်ပိတ်ခံရ

ရွေးကောက်ပွဲ ကျင်းပစဉ် မြို့အနီး ကျေးရွာများကို ဗုံးကြဲတိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၅ ရက်။ အပိုင်း (၃) ရွေးကောက်ပွဲ ကျင်းပနေသည့် အချိန်တွင် စစ်ကိုင်းတိုင်း ကနီမြို့ပတ်ဝန်းကျင်ကျေးရွာများကို စစ်ကော်မရှင်က လေကြောင်းမှ ဗုံးကြဲ တိုက်ခိုက်ခဲ့သည်။ စစ်ကိုင်းတိုင်း၊ ယင်းမာပင်ခရိုင်၊ ကနီမြို့နယ်တွင် မဲရုံဖွင့်၍ ရွေးကောက်ပွဲလုပ်နေစဉ် မြို့ပတ်လည်ရှိ ကျေးရွာများကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့သည်ဟု မြေပြင် သတင်းရင်းမြစ်က ပြောသည်။ ကနီမြို့နယ်တွင် စစ်အုပ်စုက ရွေးကောက်ပွဲ အပိုင်း (၃) ကို ယနေ့ ဇန်နဝါရီလ ၂၅ ရက်နေ့တွင် ကျင်းပနေသော် လည်း မြို့ပတ်လည်ရှိ ကျေးရွာများကိုမူ လေကြောင်းနှင့် လက်နက်ကြီးများ အသုံးပြု၍ ဗုံးကြဲတိုက်ခိုက်မှုများ ဆက်တိုက် လုပ်ဆောင်နေကြောင်း ဒေသခံသတင်းရင်းမြစ်များက ပြောသည်။ ယနေ့နံနက် ၇ နာရီခွဲခန့်မှ စတင်ကာ စစ်ကော်မရှင်တပ်သည် ကနီမြို့ပေါ်တွင် မဲရုံများဖွင့်လှစ်ထားသော်လည်း မြို့နှင့် ကပ်လျက်ရှိသည့် တဇယ်ချောင်၊ ကျန်းဖျား၊ စိန်ကုန်းနှင့် အလည်ကျွန်းစသည့် ကျေးရွာများကို မုံရွာနမခမှ တက်လာသည့် ပါရာမော်တာ (Paramotor) နှစ်စီးနှင့် ဂျိုင်အိုကော်ပရာ (Gyrocopter) တစ်စီးတို့ဖြင့် အနည်း ဆုံး သုံးကြိမ်ထက်မနည်း ဗုံးကြဲတိုက်ခိုက်ခဲ့ခြင်း ဖြစ်သည်။ ကနီမြို့နယ် ပြည်သူ့အုပ်ချုပ်ရေးအဖွဲ့ (ပအဖ) မှ တာဝန်ရှိသူတစ်ဦးက “မြို့ထဲကနေ လက်နက်ကြီးတွေနဲ့လည်း လှမ်းထုနေသလို လေကြောင်းကနေ ၁၂၀ မမ ဗုံးသီးတွေ ဆယ်လုံးထက်မနည်း လာချသွားပါတယ်။ သူတို့ အဓိကလုပ်နေတာက ရွေးကောက်ပွဲကို တော်လှန်ရေးတပ်တွေ လာတိုက်မှာ ကြောက်လို့ အကာအကွယ်ယူတဲ့ သဘောနဲ့ မြို့ပတ်လည်က ရွာတွေကို ကြိုတင်ပတ်ပစ်နေတာပါ” ဟု ပြောသည်။ ကနီမြို့ပေါ်တွင် မဲရုံသုံးရုံခန့် ဖွင့်လှစ်ထားသော်လည်း မဲလာပေးသူမရှိသလောက် နည်းပါးနေပြီး မဲရုံမှူး တစ်ဦး တည်းကသာ မဲရုံနှစ်ရုံကို တာဝန်ယူနေရသည့် အခြေအနေမျိုးဖြစ်နေကြောင်း မြေပြင်သတင်းရင်းမြစ်က ပြော သည်။ ထို့ပြင် ပြည်သူ့လွှတ်တော်နှင့် တိုင်းလွှတ်တော် ကိုယ်စားလှယ်များအတွက် ယှဉ်ပြိုင်သူမရှိဘဲ စစ်ကော်မရှင် လက်ဝေခံ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) မှ ကိုယ်စားလှယ်များကသာ တစ်ဦးတည်း အမည်စာရင်းပေးထားသဖြင့် မဲမပေးခင်ကတည်းက အနိုင်ရရှိပြီးသား ဖြစ်နေသည်ဟု စောင့်ကြည့်သူများက ဆိုသည်။ ကနီမြို့ခံ အမျိုးသမီးတစ်ဦးက “မနက်ကတည်းက လေယာဉ်သံတွေကြားနေရတာ။ ဗုံးသံတွေကလည်း တုန်နေတာပဲ။ ကျမတို့မှာတော့ မဲပေးဖို့ဝေး လက်နက်ကြီးသံ၊ ဗုံးသံ၊ လေယာဉ်သံပဲ အာရုံစိုက်နေရတာ။ အသံကြားတာနဲ့ ပြေး ဗုံးခိုကျင်းထဲကို” ဟု ပြောသည်။ ကနီမြို့နယ်တွင် ကျေးရွာအုပ်စု ၄၅ အုပ်စုရှိသော်လည်း စစ်ကော်မရှင်သည် မြို့ပေါ်ရပ်ကွက် ၃ ခု၌သာ မဲပုံးထောင်နိုင်ခြင်းဖြစ်သည်။ ပြီးခဲ့သည့် ဇန်နဝါရီလ ၂၂ ရက်နေ့ကလည်း ကနီမြို့နယ်အတွင်း လေကြောင်း တိုက်ခိုက်မှုကြောင့် အရပ်သား တစ်ဦး သေဆုံးကာ ၅ ဦး ဒဏ်ရာရရှိခဲ့သည့် ဖြစ်စဉ်ရှိခဲ့ပြီး ယနေ့တွင်လည်း မုံရွာအခြေစိုက် နမခမှ ပါရာမော်တာများ ကနီမြို့ပေါ်တွင် ဆက်လက်ပျံဝဲနေဆဲ ဖြစ်သည်။ ကနီမြို့သည် ၂၀၂၄ ခုနှစ် မတ်လအတွင်းက တော်လှန်ရေး ပူးပေါင်းတပ်များ၏ မြို့သိမ်းတိုက်ပွဲ ဆင်နွှဲခြင်း ခံခဲ့ရ ဖူးပြီး ၁၁ ရက်ကြာ တိုက်ပွဲအတွင်း စစ်ကော်မရှင်ဘက်မှ ၄၇ ဦးအထိ သေဆုံးခဲ့ဖူးသည့် စစ်ရေးပြင်းထန်ရာ ဒေသတစ်ခုလည်း ဖြစ်သည်။ လက်ရှိတွင် ရွေးကောက်ပွဲ အပိုင်း (၃) တွင် ပါဝင်သည့် ကနီနှင့် ဆားလင်းကြီးမြို့နယ်တို့၌ စစ်ရေးတင်းမာမှု များနှင့် အတူ ဒေသခံများမှာ ဘေးလွတ်ရာသို့ ထွက်ပြေး ပုန်းအောင်းနေကြရသည်။

ရွေးကောက်ပွဲ ကျင်းပစဉ် မြို့အနီး ကျေးရွာများကို ဗုံးကြဲတိုက်ခိုက်

ထောင်အာဏာပိုင်များ စီးပွားရှာမှု တိုးမြင့်လာနေ သတင်းနှင့် မီဒီဲယာကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ စစ်ကိုင်းတိုင်းဒေသကြီး၊ ကလေးအကျဉ်းထောင်အတွင်း အာဏာပိုင်များ စီးပွားရှာနေမှုနှင့် လူ့အခွင့်အရေး ချိုးဖောက်မှုများ မြင့်တက်လာနေသည်ဟု နိုင်ငံရေး အကျဉ်းသားရေး စောင့်ကြည့်နေသူများက ပြောသည်။ ကလေးအကျဉ်းထောင်ရှိ ထောင်အာဏာပိုင်အချို့သည် တရားမဝင်ပစ္စည်းများအား ဈေးတင် ရောင်းချ ခြင်း၊ အကျဉ်းသားများအား ငွေညှစ်ခြင်းနှင့် ကိုယ်ထိလက်ရောက် နှိပ်စက်ခြင်းများ ကျူးလွန်ကာ အကျဉ်း ထောင်ကို ကိုယ်ကျိုးရှာ ဈေးကွက်တစ်ခုသဖွယ် အသုံးချနေကြောင်း မြန်မာနိုင်ငံလုံးဆိုင်ရာ အကျဉ်းသားများ ကွန်ယက် (PPNM) နှင့် ဒေသခံသတင်းရင်းမြစ်များထံမှ သိရသည်။ PPNM ပြောရေးဆိုခွင့်ရှိသူ မရောင်နီလင်းက “လာဘ်ပေးလာဘ်ယူလုပ်တာတွေ၊ အမြတ်တင်ပြီးတော့ ရောင်း ချနေတာမျိုးတွေ၊ တရားမဝင်ပစ္စည်းတွေကို သွင်းပေးပြီးတော့ တရားမဝင်ပစ္စည်းတွေကို သွင်းပေးတယ် ဆိုတာမှာ ဝန်ထမ်းတွေဆီကနေမှပဲ သွင်းလို့ရကြတာပေါ့နော်။ ဒီဝန်ထမ်းတွေက သွင်းပေးပြီးလို့ရှိရင်လည်း မတန်တဆတွေ ပြန်ပြီးတော့ ရောင်းချတယ်။ ပြောရမယ် ဆိုလို့ရှိရင် ထောင်ထဲမှာ စီးပွားရေးလုပ်နေကြ တာ မျိုး ဖြစ်ပါတယ်။ စီးပွားရေးလုပ်တဲ့အခါမှာလည်း အကျဉ်းသား/သူတွေရဲ့ ငွေတွေ၊ ပြီးလို့ရှိရင် ဒီနိုင်ငံရေး အကျဉ်းသား/သူတွေကို ခေါင်းပုံဖြတ်ပြီးတော့မှ ရောင်းချနေတာမျိုးတွေ ဖြစ်ပါတယ်” ဟု ပြောသည်။ ထောင်အာဏာပိုင်များက ကွမ်းပေါင်းနှင့် အကျဉ်းသားများ ကိုယ်တိုင်စိုက်ပျိုးထားသည့် သီးနှံများကို ဈေးနှုန်း ၃ ဆခန့်အထိ အမြတ်တင်ရောင်းချကာ အကျဉ်းသားများအပေါ် ခေါင်းပုံဖြတ်မှုများ ပြုလုပ်နေကြောင်း PPNM က ထုတ်ပြန်လိုက်သည်။ ကလေးအကျဉ်းထောင်အတွင်း ငွေကြေးမပေးဆောင်နိုင်သည့် အကျဉ်းသားများမှာ မြောင်းဖော်ခြင်း၊ တောင် ယာလုပ်ကိုင်ခြင်း၊ အိမ်သာဆေးခြင်းနှင့် အမှိုက်ရှင်းခြင်းစသည့် ပင်ပန်းသောအောက်ခြေသိမ်းအလုပ် (ဘောက်ဆင်း) များကို လုပ်ကိုင်နေရသည်။ ထိုသို့ လုပ်ကိုင်ရာမှ ထွက်ရှိလာသည့် ဟင်းသီးဟင်းရွက်နှင့် သီးနှံများကိုလည်း အာဏာပိုင်များက မတရားယူ ဆောင်ကာ ငွေကြေးတတ်နိုင်သည့် အကျဉ်းသားများထံ ပြန်လည်ရောင်းချနေကြောင်း နိုင်ကျဉ်းဟောင်းများက PPNM ကို ပြောသည်။ “ကလေးထောင်မှာက အခုက ထောင်အာဏာပိုင်တွေက စီးပွားရေးသမားတွေလို ဖြစ်နေတာ။ ပါဆယ်တွေ ကိုလည်း စစ်ဆေးတဲ့နေရာမှာ သူတို့လိုချင်တာကို ယူတယ်၊ ပြီးရင် အထဲမှာ အကျဉ်း သားတွေ စိုက်ထားတဲ့ ဟာကို အပြင်ဈေးထက် အများကြီးတင်ပြီး ပြန်ရောင်းစားနေတာ။ ငွေမရှိတဲ့သူတွေ ဆိုရင် ထောင်ထဲမှာ တော်တော်လေး ငတ်ငတ်ပြတ်ပြတ်နဲ့ ဒုက္ခရောက်နေကြရတယ်” ဟု ပြောသည်။ အဆိုပါ အကျဉ်းထောင်တွင် ကြီးကြပ်ရေးမှူးတစ်ဦးမှာ ရာထူးတိုးလာပြီးနောက်ပိုင်း အကျဉ်းသား များထံမှ ငွေညှစ်၍ အခန်းပြောင်းခြင်း၊ အိပ်ဆောင်ရွှေ့ခြင်းများ ပြုလုပ်ကာ လာဘ်ပေးလာဘ်ယူမှုများကို အထင်အရှား ကျူးလွန်နေကြောင်း အကျဉ်းဦးစီးနှင့် နီးစပ်သူများက ပြောသည်။ မရောင်နီလင်း၏ အဆိုအရ အဆိုပါ ကြီးကြပ်ရေးမှူးသည် ၎င်းကိုယ်တိုင် ကျူးလွန်ခြင်းမျိုး မဟုတ်ဘဲ မူးယစ်ဆေးဝါးမှုဖြင့် ကျခံနေရသူ တစ်ဦးကို လက်ပါးစေအဖြစ် အသုံးချကာ အရောင်းအဝယ်ပြုလုပ်ခြင်း၊ အခြားအကျဉ်းသားများထံ လာရောက်သည့် ပါဆယ်ပစ္စည်းများထဲမှ စားစရာများ ကို ယူခိုင်း၍ စားသောက်ခြင်းများ လုပ်ဆောင်နေကြောင်း သိရသည်။ မရောင်နီလင်းက “တရားမဝင် တင်သွင်းပြီးတော့ ရောင်းချတာမျိုးတွေက အကျဉ်းထောင်တိုင်းမှာ လိုလို ဖြစ်နေတယ်။ စီးပွားရှာ နေတယ်လို့ ကျနော်တို့အနေနဲ့ကတော့ မြင်ပါတယ်ပေါ့နော်။ ထပ်ပြီးတော့ ပြောရ မယ်ဆိုလို့ရှိရင်တော့ အကျဉ်း ထောင်တွေက စီးပွားရှာရမယ့် နေရာမဟုတ်ပါဘူး၊ စီးပွားရေးဈေးကွက်တစ်ခု မဟုတ်ပါဘူး” ဟု ဆက်ပြောသည်။ လက်ရှိတွင် ကလေးအကျဉ်းထောင်၌ စားနပ်ရိက္ခာ လုံလောက်မှုမရှိသည့်အပြင် နိုင်ငံရေးအကျဉ်းသား မိသားစု ဝင်များ ပို့ဆောင်သည့် ရိက္ခာများကိုလည်း အာဏာပိုင်များက ဖြတ်ယူစားသောက်နေသဖြင့် အခြေခံလူတန်းစား အကျဉ်းသားများအတွက် ပိုမိုခက်ခဲနေကြောင်း PPNM က ဆိုသည်။ အလားတူ ရန်ကုန်၊ အင်းစိန်အကျဉ်းထောင်တွင်လည်း အဆောင်မှူး ကျော်လင်းထွန်း ဆိုသူက အဆောင် စည်း ကမ်း အကြောင်းပြ၍ လာဘ်ယူခြင်းနှင့် ရိုက်နှက်နှိပ်စက်ခြင်းများ ကျူးလွန်နေကြောင်း PPNM က ထုတ်ပြန် ထားသည်။ #အကျဉ်းထောင် #နိုင်ငံရေးအကျဉ်းသား #PPNM #စစ်ကိုင်းတိုင်း #ထောင်အာဏာပိုင်

ထောင်အာဏာပိုင်များ စီးပွားရှာမှု တိုးမြင့်လာနေ

ဝက်လက် ဗုံးကြဲတိုက်ခိုက်မှုအတွင်း ၂ လသား အပါအဝင် အရပ်သား ၄ ဦး သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၇ ရက်။ စစ်ကိုင်းတိုင်း၊ ဝက်လက်မြို့နယ် အတွင်း တိုက်ပွဲမရှိဘဲ ဗုံးကြဲတိုက်ခိုက်ခံရပြီး ၂ လသား ကလေးအပါအဝင် ၄ ဦး သေဆုံးခဲ့သည်ဟု ဒေသခံများက ပြောသည်။ ဝက်လက်မြို့နယ်အတွင်းရှိ ကျေးရွာများကို စစ်ကော်မရှင်တပ်က လေကြောင်းမှ အကြောင်းမဲ့ ဗုံးကြဲတိုက်ခိုက်ခဲ့ ရာ နှစ်လသားအရွယ် ကလေးငယ်တစ်ဦးနှင့် သက်ကြီးရွယ်အိုများ အပါအဝင် အရပ်သား ၄ ဦး သေဆုံးသွားခဲ့ ကြောင်း ဒေသခံများက ပြောသည်။ မြေပြင်တွင် ကြုံတွေ့ခဲ့ရသည့် အခြေအနေနှင့်ပတ်သက်၍ ဒေသခံတစ်ဦးက “ဘာတိုက်ပွဲမှ မရှိဘဲ ဒီတိုင်း လာကြဲတာဗျ။ လေယာဉ်သံကြားလို့ ပြေးတုန်းရှိသေးတယ်၊ ဗုံးက ကျလာပြီ။ ရှောင်ချိန်တောင် မရလိုက်ကြ ဘူး။ ၂ လသား ကလေး ဆိုတာ ဘာမှတောင် မသိသေးရှာဘူး၊ အတော်လူစိတ်မရှိကြတာဗျ။ ရွာက စာသင် ကျောင်းရော၊ အိမ်တွေရော အကုန်မီးလောင်ကုန်တာပဲ” ဟု ပြောသည်။ ဇန်နဝါရီလ ၆ ရက်နေ့၊ နံနက်ပိုင်းတွင် မန္တလေး တံတားဦးလေဆိပ်မှ တက်လာသည့် တိုက်လေယာဉ် နှစ်စီးသည် ဝက်လက်မြို့နယ် တောင်ခြမ်းရှိ ပေါက်ကန်ဘူတာကျေးရွာနှင့် ရေသောက်ကန်ကျေးရွာရှိ စာသင်ကျောင်းများကို ပစ်မှတ်ထားကာ ဗုံး ၃ ကြိမ် ကြဲချခဲ့ခြင်းဖြစ်သည်။ အဆိုပါ တိုက်ခိုက်မှုကြောင့် ၂ လသားအရွယ် ကလေးငယ်တစ်ဦးနှင့် အသက် ၆၀ ကျော်၊ ၇၀ ကျော်အရွယ် အဖွားနှစ်ဦးမှာ နေရာ၌ပင် ပွဲချင်းပြီး သေဆုံးခဲ့ပြီး၊ ဦးခေါင်းတွင် ပြင်းထန်ဒဏ်ရာရရှိခဲ့သည့် အသက် ၄၀ အရွယ် အမျိုးသမီးတစ်ဦးမှာလည်း ဆေးကုသမှုခံယူနေစဉ် ညနေပိုင်းတွင် ထပ်မံသေဆုံးသွားခဲ့သည်။ ဗုံးဒဏ်ကြောင့် ကျေးရွာအတွင်းရှိ စာသင်ကျောင်း၊ လူနေအိမ်များနှင့် ကား၊ ဆိုင်ကယ်အချို့လည်း မီးလောင် ပျက်စီးခဲ့ရသည်။ ဝက်လက်မြို့နယ်အတွင်းတွင် စစ်ကော်မရှင်တပ်က လေကြောင်းတိုက်ခိုက်မှုများကို နေ့စဉ်နီးပါး ကျူးလွန်နေပြီး ပြီးခဲ့သည့် ဒီဇင်ဘာလအတွင်း၌ပင် ၁၄ ကြိမ်အထိ ဗုံးကြဲခဲ့ရာ သံဃာတော်များနှင့် ကလေးသူငယ်များအပါအဝင် စုစုပေါင်း ၂၆ ဦး သေဆုံးခဲ့ပြီး ဖြစ်သည်။ Wetlet Informational Network (ဝက်လက် သတင်းကွန်ရက်) မှ တာဝန်ရှိသူတစ်ဦးကလည်း “စစ်တပ်က မြေပြင်မှာ စစ်ကြောင်း ထိုးရုံ တင် မကဘဲ ပြည်သူတွေကို ပစ်မှတ်ထားပြီး လေကြောင်းကနေပါ စနစ်တကျ ကြိုတင်စီစဉ် တိုက်ခိုက်နေတာ ပါ။ တိုက်ပွဲမရှိတဲ့ နေရာတွေကို ဗုံးကြဲတာဟာ စစ်ရာဇဝတ်မှု ကျူးလွန်နေတာဖြစ်လို့ ဒါတွေကို သက်သေ အဖြစ် မှတ်တမ်းတင်ထားပါတယ်” ဟု ပြောသည်။ အမျိုးသားညီညွတ်ရေးအစိုးရ (NUG)၊ လူ့အခွင့်အရေး ဝန်ကြီးဌာန၏ ဇန်နဝါရီ ၄ ရက်နေ့၊ ထုတ်ပြန်ချက်အရ အာဏာသိမ်း ၅ နှစ်အတွင်း စစ်ကောင်မရှင်၏ လေကြောင်းတိုက်ခိုက်မှုဖြစ်စဉ်ပေါင်း ၄၄၉၈ ကြိမ် ရှိခဲ့သည်။ အဆိုပါ စစ်ကော်မရှင်၏ လေကြောင်းတိုက်ခိုက်မှုများကြောင့် သေဆုံးခဲ့ရသည့် အရပ်သားပြည်သူ ၄,၆၈၃ ဦး ရှိပြီး သေဆုံးသူများထဲတွင် အသက် ၁၈ နှစ်အောက် ကလေးသူငယ် ၆၃၇ ဦး ပါဝင်သည်ဟု ထုတ်ပြန်ထားသည်။

ဝက်လက် ဗုံးကြဲတိုက်ခိုက်မှုအတွင်း ၂ လသား အပါအဝင် အရပ်သား ၄ ဦး သေဆုံး

တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂ ရက်။ တော်လှန်ရေး ပူးပေါင်းတပ်များက ကသာမြို့လယ်အထိ ထိုးစစ်ဆင်နိုင်ခဲ့ပြီး စစ်ကော်မရှင် အခြေစိုက်စခန်း ၄ ခုကို သိမ်းပိုက်ထားနိုင်သည်ဟု မြေပြင်စစ်ရေး သတင်းရင်းမြစ်များက ပြောသည်။ စစ်ကိုင်းတိုင်းနှင့် ကချင်ပြည်အစပ်ရှိ ဗျူဟာကျသည့် ခရိုင်ရုံးစိုက်ရာ ကသာမြို့သိမ်းတိုက်ပွဲကို ရွေးကောက်ပွဲ မတိုင်မီ ၂ ရက်အလို ဒီဇင်ဘာ ၂၆ ရက်က စတင်ခဲ့ခြင်း ဖြစ်သည်။ တိုက်ပွဲ အတွင်း တော်လှန် ရေးပူးပေါင်းတပ်ဖွဲ့များက မြို့ပြင်ရှိ ကာကင်းစခန်း ၂ ခုကို ရှေးဦးစွာ သိမ်းပိုက်နိုင်ခဲ့ခြင်းဖြစ်ပြီး၊ ဒီဇင်ဘာလ ၃၀ ရက်နေ့တွင် မြို့တွင်းရှိ စစ်ကောင်စီတပ်စွဲထားရာ အမှတ် (၅) ရပ်ကွက်မှ စိုးမိုးကုန်း (ဘုန်းကြီးကျောင်း) နှင့် အမှတ် (၈) ရပ်ကွက်ရှိ စေတီကုန်းအထိုင်စခန်းတို့ကိုပါ ထပ်မံ သိမ်းပိုက်နိုင်ခဲ့ခြင်း ဖြစ်သည်။ ကသာဒေသခံ တော်လှန်ရေးတပ်ဖွဲ့ဝင်တစ်ဦးက မြေပြင်စစ်ရေးအခြေအနေနှင့် ပတ်သက်၍ ယခုကဲ့သို့ အတည်ပြု ပြောဆိုသည်။ “လက်ရှိကတော့ စခန်း ၄ ခု ရထားပြီ။ တော်လှန်ရေးတပ်တွေ မြို့ထဲကို တောက်လျှောက်ဝင်သွားပြီး မြို့ရဲ့ တစ်ဝက်လောက် ရောက်နေပြီ။ မြို့လယ်ခေါင်လို့တောင် ပြောလို့ရပါတယ်။ စစ်ကောင်စီဘက်ကတော့ ခမရ ၃၀၉ တပ်ရင်းတစ်ခုကနေပဲ အဓိကခုခံနိုင်တော့တဲ့ အခြေအနေပါ။” အမျိုးသားညီညွတ်ရေး အစိုးရ (NUG) လက်အောက်ခံ PDF တပ်ဖွဲ့များနှင့် ကချင်လွတ်လပ်ရေး တပ်မတော် (KIA) ပူးပေါင်းတပ်များ၏ ထိုးစစ်ဆင်မှုကြောင့် စစ်ကော်မရှင်တပ်သည် မြေပြင်လမ်းကြောင်းများ ပြတ်တောက်နေသည်ဟု ဆိုသည်။ ဇန်နဝါရီ ၂ ရက် ယနေ့နံနက်ပိုင်းတွင် ထောက်ပို့လေယာဉ် ၂ စီးအသုံးပြုကာ ခမရ ၃၀၉ တပ်ရင်းအတွင်းသို့ ရိက္ခာနှင့် စစ်ကူတပ်သားများ လေကြောင်းမှတစ်ဆင့် ချပေးခဲ့သည်။ စစ်ကော်မရှင်တပ်သည် ခမရ ၃၀၉ တပ်ရင်းအတွင်းမှ နေ၍ ဒရုန်းနှင့် လက်နက်ကြီးများအသုံးပြုကာ မြို့ပေါ် ရပ်ကွက်များသို့ နေ့စဉ်ဗုံးကြဲတိုက်ခိုက်နေသဖြင့် လူနေအိမ်အများအပြား မီးလောင်ပျက်စီးလျက်ရှိသည်။ ထို့အပြင် Y-12 လေယာဉ်ဖြင့် မြို့ပတ်ပတ်လည်ကို ဗုံးအလုံးပေါင်း ၆၀ ကျော် ဆက်တိုက်ကြဲချခဲ့သလို မြို့အဝင် အထွက်လမ်းများကိုလည်း ပိတ်ဆို့ထားခဲ့သည်။ သို့သော်လည်း ဒီဇင်ဘာလ ၃၁ ရက်နေ့တွင် တော်လှန်ရေးတပ်ဖွဲ့များက လမ်းကြောင်းများ ရှင်းလင်းပေးခဲ့သဖြင့် မြို့ခံပြည်သူများသည် ဘေးလွတ်ရာသို့ အစုလိုက်အပြုံလိုက် ထွက်ခွာနိုင်ခဲ့ကြသည်။ ကသာမြို့မှ စစ်ဘေးရှောင်လာသည့် ဒေသခံတစ်ဦးက ၎င်းတို့ကြုံတွေ့ခဲ့ရသည့် အခြေအနေကို ယခုကဲ့သို့ ပြောပြသည်။ “အရင်နေ့တွေက စစ်တပ်က မြို့ထွက်လမ်းတွေအကုန် ပိတ်ထားတာ။ အခု PDF တွေက မြို့တစ်ဝက်ရပြီ ဆို တော့မှ သူတို့ထိန်းထားတဲ့ နေရာတွေကနေ ပြည်သူတွေ ထွက်လာနိုင်တာပါ။ တော်လှန်ရေးအဖွဲ့တွေက လမ်း ရှင်းပေးတာ၊ ကူညီပေးတာတွေ လုပ်ပေးတယ်။ လေယာဉ်ကလည်း တစ်ညလုံး ဗုံးတွေပတ်ချနေတာ။” လက်ရှိတွင် ကသာမြို့၏ တစ်ဝက်နီးပါးကို တော်လှန်ရေးတပ်များက ထိန်းချုပ်ထားပြီး ခမရ ၃၀၉ တပ်ရင်း အနီးနှင့် ဇေယျာချောင်ရပ်ကွက်များ၌ တိုက်ပွဲများ ဆက်လက်ပြင်းထန်နေသည်။ တိုက်ပွဲအတွင်း စစ်ကော်မရှင် တပ်သား ၅၀ ကျော်ကို အရှင်ဖမ်းမိထားပြီး လက်နက်ခဲယမ်း အချို့ကိုလည်း သိမ်းဆည်းရမိထားသည်ဟု ဆိုသည်။ ကသာခရိုင်အတွင်းရှိ အင်းတော်နှင့် ဗန်းမောက်မြို့များကို ၂၀၂၅ ခုနှစ်အတွင်း တော်လှန်ရေးတပ်ဖွဲ့များက သိမ်းပိုက်ထိန်းချုပ်ထားပြီးဖြစ်ရာ၊ ခရိုင်မြို့ဖြစ်သည့် ကသာကိုပါ သိမ်းပိုက်နိုင်ရေး ထိုးစစ်ဆင်နေခြင်း ဖြစ်သည်။ သို့သော် စစ်ကော်မရှင်တပ်က လေကြောင်းနှင့် လက်နက်ကြီးများကို အလွန်အကျွံ အသုံးပြု၍ ခုခံနေသဖြင့် အရပ်သားထိခိုက်မှုများ ပိုမိုရှိလာနိုင်မည်ကို ဒေသခံများက စိုးရိမ်လျက်ရှိကြသည်။ ကသာ မြို့သိမ်း တိုက်ပွဲနှင့်အတူ ဗန်းမော် တိုက်ပွဲကိုလည်း တော်လှန်ရေး တပ်ဖွဲ့များက စစ်ရှိန် ပြန်မြှင့်ထားခဲ့သည်။

တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ

စစ်ကိုင်း မော်လိုက်၌ စခန်းသိမ်းပြီးနောက် စစ်ရေးတင်းမာမှု ဆက်ရှိ  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာ ၁၆ ရက်။  စစ်ကိုင်းတိုင်း၊ မော်လိုက် ရန်ကင်းတောင် စခန်းကုန်း သိမ်းတိုက်ပွဲတွင် စစ်ကော်မရှင်တပ် ၆ ဦး သေဆုံးကာ လက်နက်ခဲယမ်း အမြောက်အများ သိမ်းဆည်းရမိခဲ့သည်ဟု (Mawlaik Revolution) က ထုတ်ပြန်သည်။ မော်လိုက်မြို့နယ်တွင် ဒေသခံတော်လှန်ရေးတပ်ဖွဲ့များက စစ်ကော်မရှင်တပ်၏ အရေးပါသော ရန်ကင်းတောင် စခန်းကုန်းကို တန်ပြန်ထိုးစစ်ဆင်ကာ ပြန်လည်သိမ်းပိုက်နိုင်ခဲ့ပြီး၊ ထိုတိုက်ပွဲနောက်ပိုင်းတွင် ဆွတ်နန်းကျေးရွာ ပတ်ဝန်းကျင်၌ စစ်ရေးတင်းမာမှုများ ဆက်လက် ဖြစ်ပွားနေဆဲဖြစ်သည်ဟု ဆိုသည်။ မော်လိုက်မြို့နယ် အရှေ့ခြမ်း၊ ရန်ကင်းတောင်စခန်းကုန်းကို စစ်ကော်မရှင်တပ်က ဒီဇင်ဘာ ၉ ရက်နေ့မှ စတင် သိမ်းယူထားခဲ့ခြင်းဖြစ်သည်။ မော်လိုက်တော်လှန်ရေး အင်အားစုများ (Mawlaik Revolution) က ဒီဇင်ဘာ ၁၄ ရက်၊ နံနက် ၁၁ နာရီတွင် တန်ပြန်ထိုးစစ်ကို စတင်ခဲ့ပြီး တစ်နာရီအတွင်းမှာပင် စခန်းကုန်းကို အပြည့်အဝ ပြန်လည်သိမ်းပိုက်နိုင်ခဲ့ခြင်း ဖြစ်သည်။ တိုက်ပွဲအတွင်း စစ်ကော်မရှင်တပ်ဖွဲ့ဝင် ၆ ဦး သေဆုံးခဲ့ပြီး ကျန်ရှိသူများမှာ အနီးအနားရှိ ဆွတ်နန်းကျေးရွာဘက် သို့ ဆုတ်ခွာထွက်ပြေးခဲ့ကြကြောင်း တော်လှန်ရေးအဖွဲ့များက ပြောသည်။ တော်လှန်ရေးအဖွဲ့များ၏ ထုတ်ပြန်ချက်အရ စခန်းကုန်းကို နယ်မြေရှင်းလင်းရာတွင် စစ်ကော်မရှင်တပ် အတွက် အရေးကြီးသည့် လက်နက်ခဲယမ်းများကိုပါ သိမ်းဆည်းရရှိခဲ့သည်။ Mawlaik Revolution က ထုတ်ပြန်ရာတွင် “ရန်ကင်းတောင်စခန်းကုန်းကို သိမ်းပိုက်ရရှိပြီးနောက်၊ ၁၂၂ မမ ရှော့တိုက်ဒုံး ၇ လုံး အပါအဝင် သေနတ်မျိုးစုံနဲ့ ကျည်မျိုးစုံ ထောင်ချီပြီး သိမ်းဆည်းရရှိခဲ့ပါတယ်” ဟု ဆို သည်။ မော်လိုက်ကာကွယ်ရေး တပ်ဖွဲ့ဝင်တစ်ဦး၏ ပြောဆိုချက်အရ “ဒီရန်ကင်းတောင် စခန်းကုန်းဟာ ဆွတ်နန်းရွာက စစ်တပ်အထိုင်စခန်းရဲ့ ကာကင်း (အကာအကွယ် စခန်းငယ်) ဖြစ်တဲ့အတွက် စစ်ကော်မရှင်အတွက် အထိနာတဲ့ ဆုံးရှုံးမှုတစ်ခု ဖြစ်ပါတယ်” ဟု ဆိုသည်။ လက်ရှိ ဒီဇင်ဘာလ ၁၅ ရက်နေ့အထိ ဆွတ်နန်းကျေးရွာ ပတ်ဝန်းကျင်တွင် စစ်ရေးတင်းမာမှုများ ဆက်လက် မြင့်တက်နေဆဲ ဖြစ်သည်။ အလားတူ တော်လှန်ရေး အင်အားစုများက ဆက်လက် ထိန်းချုပ်ထားနိုင်ရေး အတွက် နယ်မြေရှင်းလင်းရေးနှင့် လုံခြုံရေး အစီအမံများ ဆက်လက် လုပ်ဆောင်နေကြောင်း မြေပြင်သတင်းအရင်းအမြစ်များ၏ ပြောပြချက်အရ သိရသည်။

စစ်ကိုင်း မော်လိုက်၌ စခန်းသိမ်းပြီးနောက် စစ်ရေးတင်းမာမှု ဆက်ရှိ 

ရတနာသိင်္ခတံတား ပျက်စီးပြီးနောက် စဉ့်ကူးမြို့နယ်၌ စစ်ရေးတင်းမာမှု အမြင့်ဆုံးရောက်ရှိ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၃၀ ရက်။ စစ်ကိုင်းတိုင်းနှင့် မန္တလေးတိုင်းကို ဆက်သွယ်ထားသည့် ဧရာဝတီမြစ်ကူး ရတနာသိင်္ခတံတား ကျိုးကျ ပျက်စီး သွားပြီးနောက် စစ်တပ်နှင့် တော်လှန်ရေးတပ်ဖွဲ့များ ထိန်းချုပ်ထားသော နယ်မြေနှစ်ခုကြား လုံခြုံရေး အခြေ အနေမှာ အကြီးအကျယ် တင်းမာနေကြောင်း ဒေသခံများက ပြောသည်။ ပေနှစ်ထောင့်လေးရာကျော် ရှည်လျားသည့် ယင်းတံတားသည် အောက်တိုဘာလ ၂၈ ရက်နေ့၊ ည ၁၁ နာရီ အချိန်ခန့်တွင် မိုင်းခွဲခံရပြီး ကျိုးကျသွားခဲ့သည် ဟု ဒေသခံများနှင့် စစ်ရေးသတင်းရင်းမြစ်များက ပြောသည်။ တံတားပျက်စီးမှု ဖြစ်ပြီးနောက် စဉ့်ကူးမြို့နယ်ဘက်ကို စစ်ကော်မရှင်တပ်က တစ်နေ့လုံးနီးပါး လေကြောင်းမှ ဗုံးကြဲတိုက်ခိုက်ခဲ့သည်။ ဒေသခံတစ်ဦးက “ဂျက်လေယာဉ်တွေဟာ ဆက်တိုက်တက်ပြီး ဗုံးငါးကြိမ်လောက်အထိ ကြဲချခဲ့တယ်” ဟု ပြော သည်။ လက်ရှိတွင် တံတား၏ တစ်ဖက်ဖြစ်သော ကျောက်မြောင်းဘက်ခြမ်းကို စစ်တပ်က ထိန်းချုပ်ထားပြီး၊ စဉ့်ကူးမြို့နယ်ကိုမူ MDY-PDF က သိမ်းပိုက်စိုးမိုးထားရာ စစ်ရေးတင်းမာမှု အမြင့်ဆုံးရောက်ရှိနေခြင်း ဖြစ်သည်။ စစ်တပ်ထောက်ခံသူများက တော်လှန်ရေးတပ်ဖွဲ့များကို စွပ်စွဲနေချိန်တွင်၊ ဒေသခံအချို့က တံတားကျိုးကျမှုမှာ စစ်ကော်မရှင်တပ်၏ လက်နက်ကြီးနှင့် ဒရုန်းပစ်ခတ်မှုများနောက် ဖြစ်ပေါ်ခဲ့သည်ဟု ပြန်လည် စွပ်စွဲနေကြ သည်။ ထို့အပြင် စစ်တပ်သည် စဉ့်ကူးမြို့နယ်ထဲသို့ စစ်ကြောင်းထိုးရန် ပြင်ဆင်နေသောကြောင့် ဇရပ်ကွင်းရွာမှ ဒေသခံ များ တိမ်းရှောင်နေရကြောင်း သိရသည်။

ရတနာသိင်္ခတံတား ပျက်စီးပြီးနောက် စဉ့်ကူးမြို့နယ်၌ စစ်ရေးတင်းမာမှု အမြင့်ဆုံးရောက်ရှိ

« Prev 1 2 3 4 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ကျောင်းသူအား အဓမ္မပြုကျင့်သည့် ကျောင်းအုပ်သားကို ထောင်ဒဏ် ၂၅ နှစ် ချမှတ်
AA ထိန်းချုပ် နယ်မြေတွင် ဘဏ်လုပ်ငန်း စတင်ရန် ပြင်ဆင်
ပထမဆုံး အာရက္ခထီ သိန်း ၅၀၀ ဆုရှင် ကျောက်တော်မြို့မှ ထွက်ပေါ်
အင်းတော် တိုက်ပွဲများကြောင့် မြစ်ကြီးနား – မန္တလေး လမ်း သွားလာရေး ခက်ခဲနေ
ဖရူဆိုတွင် လေကြောင်းနှင့် လက်နက်ကြီးကြောင့် စစ်ဘေးရှောင် ၂ ဦး ဒဏ်ရာရ

Archives

Archives

×Close