စစ်ကိုင်းတိုင်း – Page 3 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကိုင်းတိုင်း

မော်လိုက်-ကလေး အကျဉ်းထောင်တွင် ဆေးကုသခွင့်အတွက် လာဘ်ထိုးနေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ စစ်ကိုင်းတိုင်းဒေသကြီး၊ ကလေးမြို့နယ်ရှိ မော်လိုက် - ကလေး အကျဉ်းထောင်တွင် ထောင်အာဏာပိုင်များ၏ လာဘ်ပေးလာဘ်ယူမှုကြောင့် အကျဉ်းသားများ၏ အသက်ရှင်သန်ခွင့်ကိုပါ ခြိမ်းခြောက်နေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) က ထုတ်ဖော် ပြောကြားလိုက်သည်။ အထူးသဖြင့် အရေးပေါ် ဆေးကုသခွင့် ရရှိရန် ငွေကြေးပေးချေနေရပြီး၊ ငွေကြေးမတတ်နိုင်သူများမှာမူ အသက်အန္တရာယ်နှင့် ရင်ဆိုင်နေရကြောင်း သိရသည်။ PPNM ၏ ထုတ်ပြန်ချက်အရ မော်လိုက် - ကလေး အကျဉ်းထောင်၌ နိုင်ငံရေး အကျဉ်းသားများ အပါအဝင် အကျဉ်းကျသူများသည် ဆေးဝါး မလုံလောက်မှုနှင့် ရင်ဆိုင်နေရပြီး၊ အရေးပေါ်လူနာများ ပြင်ပဆေးကုသခွင့် ရရန်အတွက် ထောင်ပိုင်ကြီးနှင့် အရာရှိတချို့ကို လာဘ်ငွေပေးမှသာ ခွင့်ပြုပေးနေခြင်း ဖြစ်သည်။ အရေးပေါ် ဆေးကုသခွင့် တစ်ကြိမ်အတွက် ပေးဆောင်ရသည့် ပမာဏမှာ မြန်မာငွေကျပ် ၅ သိန်းမှ ကျပ်သိန်း ၂၀ ကြား ရှိနေပြီး၊ တစ်ခါတရံတွင် ထောင်အာဏာပိုင်များ၏ ကိုယ်ပိုင်အပျော်အပါး KTV ဖိုးကိုပါ တောင်းဆိုနေ သည်ဟု PPNM က ဆိုသည်။ ဒီလို စနစ်တကျ ငွေတောင်းခံမှုများကြောင့် တကယ်ကျန်းမာရေးဆိုးဝါးပြီး ငွေကြေးမတတ်နိုင်သူများသည် အချိန်မီ ကုသခွင့်မရဘဲ မသန်စွမ်းဖြစ်သွားရခြင်း၊ သို့မဟုတ် အသက်ဆုံးရှုံးရခြင်းမျိုးများ ကြုံနေရသည်။ PPNM မှ ဦးဆောင်ကော်မတီဝင် ကိုသိုက်ထွန်းဦးက အခြေအနေကို ယခုကဲ့သို့ ဝေဖန်ပြောဆိုသည်။ “လူ့အသက်ကို အခြေတည်ပြီးတော့မှ စီးပွားရေး လုပ်နေတယ်၊ စီးပွားရေး လုပ်ကွက် လုပ်ငန်းတစ်ခုလို့ပဲ ကျနော် မြင်ပါတယ်။ ဒါဟာ လူတစ်စုရဲ့ မတရား ဖမ်းဆီးခံထားရတဲ့ နိုင်ငံရေး အကျဉ်းသား အပါအဝင် အခြား အကျဉ်းသားတွေရဲ့ ချွေးတွေသွေးတွေပေါ့နော်၊ ဒီကျန်းမာရေး မကောင်းမှုတွေကို ခုတုံးလုပ်ပြီးတော့မှ ငွေရှာ တဲ့ လုပ်ငန်း တစ်ရပ်ကို ပုံဆောင်နေတာကတော့ အင်မတန်ကိုမှ စိတ်ပျက်ဖို့ ကောင်းတဲ့ အခြေအနေလို့ပဲ ကျနော် ပြောချင်ပါတယ်။” PPNM ၏ စာရင်းများအရ ၂၀၂၅ ခုနှစ်၊ ဇန်နဝါရီလမှ အောက်တိုဘာလအထိ ဆေးကုသမှု မရရှိခြင်းကြောင့် အကျဉ်းထောင်အသီးသီးမှ နိုင်ငံရေးအကျဉ်းသား ၂၈ ဦးအထိ ကျဆုံးခဲ့ပြီး ဖြစ်သည်။ ကိုသိုက်ထွန်းဦးက ဆက်လက်၍ “အကျဉ်းသားတစ်ယောက်ရဲ့ အခွင့်အရေးအရ သော်လည်းကောင်း၊ လူသား တစ်ယောက်ရဲ့ အခွင့်အရေးအရ သော်လည်းကောင်း အသက်ရှင်သန်ပိုင်ခွင့်ဟာ အခြေခံ အခွင့်အရေး ဖြစ်ပါ တယ်။ သို့သော်လည်းပဲ အကျဉ်းထောင်ထဲမှာတော့ အကျဉ်းသား၊ အထူးသဖြင့် နိုင်ငံရေးအကျဉ်းသား ဖြစ်တည် မှု အပေါ်မှာ မူတည်၍ သော်လည်းကောင်း၊ ငွေကြေး အဆင်မပြေမှုပေါ်မှာ အခြေတည်ပြီးတော့မှ ခွဲခြား ဆက်ဆံ ခံနေရတဲ့ အခြေအနေတစ်ခုဖြစ်ပါတယ်” ဟု လူ့အခွင့်အရေး ချိုးဖောက်ခံနေရမှုကို ထောက်ပြသည်။ PPNM က ထောင်အာဏာပိုင်များသည် ဖိနှိပ်မှုများအပေါ် ပြည်ထဲရေးကို ဟန်ပြရန်အတွက် ကျန်းမာရေး ဟောပြောပွဲကဲ့သို့သော သရုပ်ပြဓာတ်ပုံများ ရိုက်ကူးပြီး တင်ပြလေ့ရှိကြောင်းလည်း ထောက်ပြခဲ့သည်။ ထို့အပြင် ၂၀၂၂ ခုနှစ် ကာလများက မော်လိုက် - ကလေး အကျဉ်းထောင်တွင် နိုင်ငံရေး အကျဉ်းသားများကို ပစ်ခတ် ဖြိုခွင်းမှုများ၊ လွှတ်ပေးပြီးနောက် ထောင်ဝတွင် ပြန်ဖမ်းဆီးမှုများအထိ ဖိနှိပ်မှုများ ရှိခဲ့သည်ဟု PPNM က ဆိုသည်။ PPNM က လူ့အခွင့်အရေး စံနှုန်းများကို ပေါ်ပေါ်ထင်ထင် ချိုးဖောက်နေသည့် လာဘ်ပေးလာဘ်ယူမှုများနှင့် ဆေးကုသခွင့် ပိတ်ပင်မှုများကို ချက်ချင်း ရပ်တန့်ပေးရန် တောင်းဆိုထားကြသည်။

မော်လိုက်-ကလေး အကျဉ်းထောင်တွင် ဆေးကုသခွင့်အတွက် လာဘ်ထိုးနေရ

ကလေးမြို့နယ် စစ်ရှောင်တစ်သောင်းကျော် အတွက် ဆေးဝါးနဲ့ စားနပ်ရိက္ခာ အရေးပေါ်လိုအပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ စစ်ကိုင်းတိုင်းဒေသကြီး၊ ကလေးမြို့နယ်တွင် စစ်ဘေးရှောင် တစ်သောင်းကျော်အတွက် ဆေးဝါးနှင့် စားနပ်ရိက္ခာ အရေးပေါ် လိုအပ်နေသည်။ ကလေးမြို့နယ်တွင် စစ်ကော်မရှင်တပ်၏ အင်အားအလုံးအရင်းဖြင့် ထိုးစစ်ဆင်မှုများကြောင့် ဒေသခံပြည်သူ တစ်သောင်းကျော်သည် ဘေးလွတ်ရာသို့ အရေးပေါ် ထွက်ပြေးတိမ်းရှောင်နေရပြီး၊ ယင်းစစ်ရှောင်များအတွက် စားနပ်ရိက္ခာ၊ ဆေးဝါးနှင့် ကျန်းမာရေးအကူအညီများ အရေးပေါ် လိုအပ်နေကြောင်း အကူအညီပေးသူများက ပြောသည်။ အောက်တိုဘာလ ၁၆ ရက်နေ့မှ စတင်၍ စစ်ကော်မရှင်တပ်က လေကြောင်းမှ စစ်အင်အား ဖြည့်တင်းကာ ကလေး - တမူး နှင့် ကလေး - ဂန့်ဂေါ လမ်းပိုင်းတစ်လျှောက် စစ်ကြောင်းထိုးလာခြင်းကြောင့် ဒေသခံများ နေရပ်စွန့်ခွာ ထွက်ပြေးနေကြရခြင်း ဖြစ်သည်။ ကလေးမြို့လူထုတိုက်ပွဲ ဦးဆောင်ကော်မတီမှ ပြောရေးဆိုခွင့်ရှိသူ၏ ပြောကြားချက်အရ ထွက်ပြေးတိမ်းရှောင် နေရသူ အရေအတွက်မှာ အိမ်ထောင်စုပေါင်း ၄,၀၀၀ ခန့်နှင့် လူဦးရေ တစ်သောင်းခန့် ရှိနေသည်။ ကလေးမြို့လူထုတိုက်ပွဲ ဦးဆောင်ကော်မတီ ပြောရေးဆိုခွင့်ရှိသူ က “ဒီကျနော်တို့ ဒီ ကလေး - တမူး၊ အိန္ဒိယ -မြန်မာ ချစ်ကြည်ရေး လမ်းမတစ်လျှောက်က ဒီရွာတစ်လျှောက်လုံးပေါ့ဗျာ။ အဲဒီ ကျနော်တို့ ဆယ်ရွာကနေ ရွာပေါင်း ၂၀ လောက်ရှိမယ်။ အဲဒီရွာတွေမှာရှိတဲ့ အိမ်ထောင်စု ဒီ ၄၀၀၀ လောက်က ဒီလူဦးရေဆိုလို့ရှိရင် တစ်သောင်းလောက် ခန့်မှန်းရတယ်။ ဒီဟာတွေဆိုလို့ရှိရင် ကျနော်တို့ အရေးပေါ် တိမ်းရှောင်နေပါတယ်” ဟု လက်ရှိအခြေအနေကို ရှင်းပြသည်။ လက်ရှိတွင် တောတောင်များအတွင်း အဆင်ပြေသလို ခိုလှုံနေကြရသည့် စစ်ရှောင်များထဲ၌ သက်ကြီးရွယ်အို များ၊ ကိုယ်ဝန်ဆောင်မိခင်များ၊ ကလေးသူငယ်များနှင့် မသန်စွမ်းသူများ အများအပြား ပါဝင်နေသည်။ အထူးသဖြင့် ရာသီ အကူးအပြောင်းကာလ ဖြစ်သောကြောင့် ဖျားနာမှုများ များပြားနေပြီး အကူအညီပေးရေး လုပ်ငန်းများအတွက် ဆေးဝါးနှင့် ကျန်းမာရေးစောင့်ရှောက်မှုသည် အဓိက စိန်ခေါ်မှုဖြစ်လာနေသည်။ ကလေးမြို့လူထုတိုက်ပွဲ ဦးဆောင်ကော်မတီ ပြောရေးဆိုခွင့်ရှိသူ က “အခုရှိနေတဲ့အခြေအနေမှာတော့ ဒီအရေး ပေါ် ဆန်နဲ့ရိက္ခာနဲ့၊ ဒီအရေးပေါ်လူသုံးကုန်ပစ္စည်းတွေနဲ့ လက်ရှိ ရာသီဥတုပြောင်း ကာလကြောင့်မို့လို့ ဒီဖျားနာ တာတွေရော တွေ့ရတဲ့အတွက်ကြောင့်မို့လို့ ဒီအရေးပေါ် ကျန်းမာရေး ကူညီစောင့်ရှောက်မှု အလုံအလောက် လိုအပ်ပါတယ်” ဟု ဆက်ပြောသည်။ စစ်ရှောင်ပြည်သူ အချို့အတွက် စေတနာ့ဝန်ထမ်း အဖွဲ့အစည်းများက ကျန်းမာရေးစောင့်ရှောက်မှုကို လက်လှမ်း မီသလောက် လုပ်ဆောင်ပေးနေသော်လည်း၊ မသန်စွမ်း၊ ကလေးသူငယ်များ၏ ကျန်းမာရေးစောင့်ရှောက်မှုကမူ အရေးပေါ် လိုအပ်နေကြောင်း ၎င်းက ဖြည့်စွက်ပြောသည်။ စစ်ရေးလှုပ်ရှားမှုများကြောင့် ဒေသခံများသည် အသက်မွေးဝမ်းကျောင်း လုပ်ငန်းများနှင့် စိုက်ပျိုးရေး လုပ်ငန်း များကိုပါ စွန့်လွှတ်ခဲ့ရခြင်းကြောင့် ရေရှည်တွင် စားဝတ်နေရေး အကျပ်အတည်းများလည်း ရင်ဆိုင်ရဖွယ်ရှိနေ သည်။ အကူအညီပေးရေးအဖွဲ့များကမူ အရေးပေါ်အကူအညီများ အချိန်မီမရပါက လူသားချင်း စာနာမှုဆိုင်ရာ အကျပ် အတည်းသည် ပိုမိုဆိုးလာနိုင်သည်ဟု သုံးသပ်ထားသည်။ ကလေးမြို့ လူထုတိုက်ပွဲ ဦးဆောင် ကော်မတီကလည်း အရေးပေါ် တုံ့ပြန်ရေးအဖွဲ့ကို ဖွဲ့စည်းကြောင်း ကြေညာ ပြီး၊ နိုင်ငံတကာ အဖွဲ့အစည်းများ အပါအဝင် ပြည်တွင်းပြည်ပက အင်အားစုများ အနေဖြင့် စစ်ဘေးရှောင် ပြည်သူများကို အရေးပေါ်ပံ့ပိုးကူညီမှုများ ပြုလုပ်ပေးကြပါရန် မေတ္တာရပ်ခံ တောင်းဆိုထားသည်။

ကလေးမြို့နယ် စစ်ရှောင်တစ်သောင်းကျော် အတွက် ဆေးဝါးနဲ့ စားနပ်ရိက္ခာ အရေးပေါ်လိုအပ်

မော်လိုက်-ကလေးထောင်၌ ဆေးကုသခွင့်အတွက် လာဘ်ငွေ သိန်း ၂၀ အထိ တောင်းခံနေဟု PPNM ပြော  သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ စစ်ကိုင်းတိုင်း၊ မော်လိုက် - ကလေးအကျဉ်းထောင်မှ ထောင်အာဏာပိုင်များသည် အကျဉ်းသားများ၏ အရေး ပေါ် ဆေးကုသခွင့်ကို လာဘ်ငွေတောင်းယူပြီးမှ ခွင့်ပြုပေးနေကြောင်း မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများ ကွန်ရက် (PPNM) က ထုတ်ဖော် ပြောကြားလိုက်သည်။ အကျဉ်းသားများသည် ပြင်ပဆေးကုသခွင့်ရရန် ထောင်အရာရှိများကို တစ်ကြိမ်လျှင် ကျပ် ၅ သိန်းမှ ကျပ်သိန်း ၂၀ ကြား ပေးနေရပြီး၊ ထောင်အာဏာပိုင်များက ၎င်းတို့၏ ကိုယ်ပိုင်အပျော်အပါး KTV ဖိုးကိုပါ တောင်းဆို သည်ဟု PPNM က ဆိုသည်။ PPNM ၏ ထုတ်ပြန်ချက်အရ အရေးပေါ်လူနာများ ပြင်ပဆေးကုသခွင့်ရရန် ထောင်ပိုင်ကြီးနှင့် အရာရှိတချို့ကို လာဘ်ငွေပေးမှသာ ခွင့်ပြုပေးနေခြင်းဖြစ်သည်။ ဆေးဝါးကုသခွင့် ထိန်းချုပ်ခံရမှုကြောင့် နိုင်ငံရေးအကျဉ်းသားတချို့သည် မသန်စွမ်းဖြစ်သွားရသည့်အထိ ဆိုးရွားသော အခြေအနေများ ရင်ဆိုင်နေရသည်။ PPNM စာရင်းများအရ ၂၀၂၅ ခုနှစ်၊ ဇန်နဝါရီလမှ အောက်တိုဘာလအထိ ဆေးကုသမှု မရရှိခြင်းကြောင့် နိုင်ငံရေး အကျဉ်းသား ၂၈ ဦးအထိ ကျဆုံးခဲ့ပြီး ဖြစ်သည်။

မော်လိုက်-ကလေးထောင်၌ ဆေးကုသခွင့်အတွက် လာဘ်ငွေ သိန်း ၂၀ အထိ တောင်းခံနေဟု PPNM ပြော 

ခိုးမှုဖြင့် ဖမ်းဆီးထားသူ သေဆုံးမှုအား သိန်း ၁၅၀ ဖြင့် ကျေအေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ စစ်ကိုင်းတိုင်း၊ အင်းတော်မြို့နယ်တွင် ဆိုင်ကယ်ခိုးမှု သံသယဖြင့် ဖမ်းဆီးခံရသူ သေဆုံးမှုအား ကျပ်သိန်း ၁၅၀ လျော်ကြေးဖြင့် ကျေအေးလိုက်ခြင်းအပေါ် ဝေဖန်မှုများရှိနေသည်။ အင်းတော်မြို့နယ်တွင် ဆိုင်ကယ်ခိုးမှု သံသယဖြင့် ဒေသခံပြည်သူ့ကာကွယ်ရေးအဖွဲ့ (ပကဖ) က ဖမ်းဆီး ခေါ်ဆောင်သွားပြီးနောက် သေဆုံးခဲ့သည့် အမျိုးသားတစ်ဦး၏ အမှုအား ကျန်ရစ်သူမိသားစုကို ကျပ်သိန်း ၁၅၀ လျော်ကြေးပေး၍ ကျေအေးလိုက်ကြောင်း ဒေသခံသတင်းရင်းမြစ်များ၏ ပြောကြားချက်အရ သိရသည်။ ဖြစ်စဉ်မှာ ပြီးခဲ့သည့် အောက်တိုဘာလ (၁၁) ရက်နေ့က အင်းတော်မြို့နယ် ပကဖအဖွဲ့မှ မော်တိတ်ကျေးရွာနေ အသက် ၃၈ နှစ်အရွယ် ကိုဇော်ထွေး အမည်ရှိ အမျိုးသားကို ဆိုင်ကယ်ခိုးမှု သံသယဖြင့် ဖမ်းဆီးခေါ်ဆောင် သွားခဲ့ခြင်း ဖြစ်သည်။ ထို့နောက် ညသန်းခေါင်ယံ (၁) နာရီဝန်းကျင်ခန့်တွင် ကိုဇော်ထွေး သေဆုံးသွားခဲ့ကြောင်း မိသားစုအား အကြောင်းကြားခဲ့ခြင်း ဖြစ်သည်။ ကိုဇော်ထွေး သေဆုံးစဉ်က ခန္ဓာကိုယ်တွင် ပြင်းပြင်းထန်ထန် ရိုက်နှက်ခံရသည့် ဒဏ်ရာများ တွေ့ရှိရကြောင်း ဒေသခံတစ်ဦးက ပြောသည်။ “ဆိုင်ကယ်ပျောက်မှုနဲ့ ပတ်သက်ပြီးတော့ စစ်မေးစရာရှိတယ်ဆိုပြီး ပကဖအဖွဲ့တွေက ဖမ်းခေါ်သွားတယ်။ ည ၁ နာရီကျော် လောက်ကျတော့ မိသားစုကို အကြောင်းကြားလာတယ်တဲ့။ ခေါင်းမှာလည်း ဒဏ်ရာနက်နက်ကြီး တစ်ခုတွေ့တယ်။ တစ်ကိုယ်လုံးလည်း ညိုမည်းနေတယ်။ မျက်နှာတွေလည်း ညိုမည်း။ အဆုတ်ဘက်မှာလည်း ဒဏ်ရာ တွေ တွေ့တယ်” ဟု ဒေသခံတစ်ဦးက ပြောသည်။ ၎င်း၏ ဦးခေါင်းတွင် ဒဏ်ရာနက်နက်ကြီး တစ်ခုအပြင် တစ်ကိုယ်လုံးနှင့် မျက်နှာများမှာ ညိုမဲနေပြီး အဆုတ် ဘက်တွင်လည်း ဒဏ်ရာများ တွေ့ရသည်ဟု အဆိုပါ ဒေသခံက ဖြည့်စွက်ပြောကြားသည်။ သေဆုံးသူ ကိုဇော်ထွေးတွင် ဇနီးဖြစ်သူနှင့် အသက် (၅) နှစ်၊ (၉) နှစ်အရွယ် သားငယ်နှစ်ဦး ကျန်ရစ်ခဲ့သည်။ ကိုဇော်ထွေး သေဆုံးပြီးနောက် ရက်ပိုင်းအကြာတွင် ကသာခရိုင် ပအဖ (ပြည်သူ့အုပ်ချုပ်ရေးအဖွဲ့) တာဝန်ခံလည်းဖြစ်သည့် သေဆုံးသူ၏ ဦးလေးဖြစ်သူက ကြားဝင်ညှိနှိုင်းပေးခဲ့ကြောင်း သိရသည်။ ညှိနှိုင်းမှု၏ ရလဒ်အရ ပကဖအဖွဲ့နှင့် ကျန်ရစ်သူမိသားစုကြားတွင် ငွေကျပ်သိန်း ၁၅၀ ဖြင့် လျော်ကြေးပေးကာ အမှုအား ကျေအေးလိုက်သည်ဟု ဒေသခံသတင်းရင်းမြစ်က အတည်ပြုခဲ့သည်။ “ဒါက ပြဿနာတစ်ခုကို အရေးမယူဘဲ သိုသိုတိတ်တိတ် ငွေပေးပြီးတော့ ကျေအေးခိုင်းလိုက်တဲ့ သဘောမျိုး ပေါ့” ဟု ဒေသခံတစ်ဦးက ဝေဖန်ပြောဆိုသည်။ အဆိုပါဖြစ်စဉ်နှင့် ပတ်သက်၍ ထိရောက်သည့် စုံစမ်းစစ်ဆေး အရေးယူမှုများ လုပ်ဆောင်ပေးရန်နှင့် တော်လှန်ရေးတပ်ဖွဲ့များ အပေါ် စည်းကမ်းပိုင်းဆိုင်ရာ ပိုမိုထိန်းညှိပေးရန် ဒေသခံများက တောင်းဆိုလိုက်သည်။ အင်းတော်မြို့နယ်ကို ပြီးခဲ့သည့် ဧပြီလ (၈) ရက်နေ့တွင် တော်လှန်ရေး အင်အားစုများက စစ်ကော်မရှင်လက်မှ (၈) လကြာ တိုက်ခိုက်ပြီးနောက် အပြီးသတ်သိမ်းပိုက်နိုင်ခဲ့ခြင်းဖြစ်ပြီး၊ လက်ရှိတွင် အမျိုးသား ညီညွတ်ရေး အစိုးရ (NUG) ၏ အုပ်ချုပ်ရေးယန္တရား လည်ပတ်နေသည်။

ခိုးမှုဖြင့် ဖမ်းဆီးထားသူ သေဆုံးမှုအား သိန်း ၁၅၀ ဖြင့် ကျေအေး

ဗန်းမောက်အနီး ကျေးရွာ အချို့ စစ်ကော်မရှင်တပ် ပြန်လည် သိမ်းပိုက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ကချင် - စစ်ကိုင်းအစပ်က ဗန်းမောက်မြို့ကို စစ်ကော်မရှင်တပ်က ထိုးစစ် ပြန်ဆင်လာသောကြောင့် တော်လှန် ရေး အင်အားစုဘက်က ကျေးရွာအချို့မှ ပြန်ဆုတ်ပေးထားရသည်ဟု မြေပြင် သတင်းအရင်းအမြစ်များ က ပြောသည်။ ဗန်းမောက်မြို့ကို စစ်ကော်မရှင်နှင့် ရှမ်းနီတပ်မတော် SNA ပူးပေါင်းအဖွဲ့က ထိုးစစ်ဆင်လာသဖြင့် သိမ်းပိုက် ထားသည့် ကျေးရွာအချို့ကို တော်လှန်ရေးအင်အားစုများ ပြန်လက်လွှတ်ထားရခြင်း ဖြစ်သည်။ စစ်ရေး သတင်းရင်းမြစ် တစ်ဦးက “ကျနော်တို့က တိုးလိုက် သူတို့က တိုးလိုက်ပါပဲ။ အခုက သူတို့က ပြန်တိုး နေတာ။ အင်အားအရမ်းများတယ်။ နှစ်ရွာလောက်ကနေ ပြန်ဆုတ်ပေးထားရတယ်။ ခမိုးဘက်နဲ့ စက်တော ဘက်။ သူတို့က ဟုမ္မလင်းဘက်က နယ်မြေခံ စကစတပ်ရင်း ၂ ရင်းက ကောင်တွေနဲ့ ရှမ်းနီ SNA တို့ ပူးပေါင်း ပြီး ထိုးလာတာ” ဟု ပြောသည်။ အောက်တိုဘာ ၄ ရက်နေ့မှ စတင်ကာ စစ်ကော်မရှင်ဘက်က ဆက်တိုက် ထိုးစစ်ဆင်လာခြင်းဖြစ်ပြီး ဗန်းမောက် မြို့နှင့် ၅ မိုင်အကွာရှိ ခမိုးကျေးရွာ၊ စက်တောကျေးရွာများကို ပြန်လက်လွှတ်ထားရခြင်း ဖြစ်သည်။ စစ်ကော်မရှင်သည် ဗန်းမောက်မြို့ကို ပြန်လည်ထိန်းချုပ်နိုင်ရေး ဟုမ္မလင်းမြို့နယ်ရှိ တပ်မ ၃၃ လက်အောက်ခံ တပ်ဖွဲ့ဝင်များနှင့် နယ်မြေခံ SNA တပ်သားများဖြင့် ပူးပေါင်း ထိုးစစ်ဆင်ဆင်လာသည်ဟု စစ်ရေး သတင်း အရင်းအမြစ်များက ပြောသည်။ စစ်ကော်မရှင် ပူးပေါင်းတပ်သည် တိုက်ပွဲအတွင်း လေကြောင်း အသုံးပြု တိုက်ခိုက်မှုများလည်း လုပ်နေပြီး အောက်တိုဘာလ ၅ ရက်နေ့၊ နေ့လည် ၂ နာရီ ဝန်းကျင်တွင် တိုက်ပွဲအတွင်း လေကြောင်းအသုံးပြု ဗုံးကြဲ တိုက်ခိုက်ခဲ့သေးသည်ဟု ဆိုသည်။ လက်ရှိတွင် နှစ်ဖက်တပ်များသည် ဗန်းမောက်မြို့နှင့် ၅ မိုင်ပတ်ချာလည်တွင် တိုက်ပွဲများ ပြင်းထန်နေပြီး တိုက်ပွဲ အတွင်း အခြေအနေ အသေးစိတ်ကိုမူ အတည်မပြုနိုင်သေးပေ။ တော်လှန်ရေး အင်အားစုများသည် ပြီးခဲ့သည့် စက်တင်ဘာလ ၂၀ ရက်နေ့ ဗန်းမောက်မြို့ကို သိမ်းပိုက်ရရှိခဲ့ပြီး နောက် တစ်ဆက်တည်း၌ပင် ဗန်းမောက်မြို့ အနောက်ခြမ်းကို ဆက်လက် တိုက်ခိုက်ခဲ့ရာ ကျေးရွာအချို့ကို သိမ်းပိုက်ထားခဲ့ရာမှ လက်ရှိတွင် မြို့ကိုလက်မလွှတ်ရရေး ပြန်လည် ခုခံနေကြရသည်။ တော်လှန်ရေး တပ်ဖွဲ့ဝင်တစ်ဦးက “သူတို့က လေယာဥ်တွေပါ သုံးတာလေ။ ကျနော်တို့ကျ လူနဲ့ဒရုန်းဘဲလေ ခံစစ်က မလွယ်ဘူးပေါ့လေ။ ကျနော်တို့က အရင်က ရွှေချောင်း၊ ပင်ဟင်းခါးတွေ အထိ တိုက်ထားနိုင်တဲ့ အနေ အထား။ ဒါပေမဲ့ အခုက သူတို့ ပြန်ထိုးစစ်ဆင်လာတော့ ပင်ဟင်းခါးတို့ စက်တောတို့ကို ကျော်ပြီးထိုးလာတာ” ဟု ပြောသည်။ ဗန်းမောက်မြို့သည် စစ်ကိုင်းတိုင်း အထက်ပိုင်းတွင် တည်ရှိပြီး ကချင်ပြည်နှင့် ကပ်လျှက်တွင် တည်ရှိသည့် မြို့တစ်မြို့ဖြစ်ပြီး ရွှေ၊ သစ် စသည့် သယံဇာတများ ပေါများသည့် ဒေသဖြစ်သည့် အလျောက် နှစ်ဖက်တပ်များ အတွက် အရေးပါသည့် ဒေသတစ်ခုဖြစ်သည်ဟု စစ်ရေးနှင့် နိုင်ငံရေး ကျွမ်းကျင်သူများက ဆိုကြသည်။

ဗန်းမောက်အနီး ကျေးရွာ အချို့ စစ်ကော်မရှင်တပ် ပြန်လည် သိမ်းပိုက်

လေကြောင်း၊ ဒရုန်း၊ လက်နက်ကြီး ပစ်ကူများကြားမှ ဗန်းမောက်မြို့ကို တော်လှန်ရေးပူးပေါင်းအဖွဲ့ သိမ်းပိုက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။ လေကြောင်း၊ ဒရုန်း၊ လက်နက်ကြီး ပစ်ကူများ ကြားမှ စစ်ကိုင်းနှင့် ကချင်အစပ်ဒေသရှိ၊ ကသာခရိုင်ထဲက ဗန်းမောက်မြို့ကို တော်လှန်ရေး ပူးပေါင်းအဖွဲ့က သိမ်းလိုက်ပြီဟု အမှတ် ၁ စစ်ဒေသက ပြောသည်။ ဗန်းမောက်မြို့ကို စက်တင်ဘာလ ၁၅ ရက်နေ့တွင် ထိုးစစ်ဆင်တိုက်ခိုက်ခဲ့ခြင်း ဖြစ်ပြီး ၅ ရက်အကြာ စက်တင် ဘာလ ၂၀ ရက်နေ့တွင် သိမ်းနိုင်ခဲ့ခြင်း ဖြစ်သည်ဟု ထုတ်ပြန်ချက်က ဆိုသည်။ ဗန်းမောက်တိုက်ပွဲတွင် စစ်ကော်မရှင်တပ်နှင့် ရှမ်းနီတပ်မတော် (SNA) တို့က ပေါင်းပြီး တိုက်ခိုက်ခဲ့ခြင်း ဖြစ်သည်။ စက်တင်ဘာလ ၂၀ ရက်နေ့ ညနေပိုင်းမှာ SNA တပ်ဖွဲ့ဝင်များက ဗန်းမောက်မြို့ထဲမှ ဆုတ်ခွာသွား သည်ဟု မြေပြင် သတင်းအရင်းအမြစ်က ပြောသည်။ “ဗန်းမောက်က သူတို့ဘက်က ဆုတ်သွားတယ်။ မြို့ကိုပေးလိုက်တယ်ပေါ့ဗျာ။ စစ်တပ်နဲ့ ရှမ်းနီအဖွဲ့တွေက ဗန်းမောက် အနောက်ဘက်မှာ ရှိနေတုန်းပဲ။ အနောက်ခြမ်းမှာ ရှိတုန်းပဲ။ အဲ့ဒီဒေသ ရွှေနဲ့ သစ် အဓိကလုပ်ကြ တော့ သူတို့က အဲ့ဒီဒေသထဲကနေတော့ လုံးဝထွက်သွားတာမျိုးမဟုတ်ဘူး။ ရှိနေကြတုန်းပဲ” ဟု မြေပြင် သတင်းအရင်းအမြစ်က ပြောသည်။ ဗန်းမောက်မြို့ကို လက်လွှတ်လိုက်ရသည့် စစ်ကော်မရှင်တပ်နှင့် ရှမ်းနီတပ် SNA ပူးပေါင်းအဖွဲ့တို့က လက်ရှိတွင် ဗန်းမောက်မြို့ဝန်းကျင်က ရွှေချောင်း၊ ပင်းဟင်းခါးနှင့် သာယာကုန်းကျေးရွာတို့တွင် ထိုင်ထားသည်ဟု ဆိုသည်။ အလားတူ ဗန်းမောက်မြို့ မြောက်ဘက်ခြမ်းက မံကုန်းနှင့် အနောက်တောကျေးရွာတွင်လည်း ဆက်ရှိနေသည်သေးဟု အမှတ် ၁ စစ်ဒေသက ထုတ်ပြန်ထားသည်။ မြေပြင် သတင်းအရင်းအမြစ်က “အခြေအနေကတော့ ဆက်စောင့်ကြည့်ရမယ့် အခြေအနေဖြစ်တယ်ဗျ။ သူတို့ရဲ့ လုပ်ငန်းတွေက ရှိနေတော့ မြို့ကိုပဲ လက်လွှတ်လိုက်တာ မြို့ပတ်ပတ်လည်မှာက သူတို့ရှိတုန်းပဲ။ တိုက်ပွဲတွေက ဆက်ပြီး ရှိအုံးမယ့် အနေအထားဆိုတာ အတိအကျပြောလို့ရတယ်။ လွယ်လွယ်နဲ့တော့ ဒီလူတွေက ဗန်းမောက်ဒေသကို လက်လွှတ်မှာ မဟုတ်ဘူးဗျ။ သူတို့စီးပွားရေးရှိတယ်လေဗျာ” ဟု ဆက် ပြော သည်။ ဗန်းမောက်မြို့သိမ်း တိုက်ပွဲထဲ စစ်တပ်က လေကြောင်းမှ ဗုံးကြဲတိုက်ခိုက်မှု ၁၀ ကြိမ်လုပ်ခဲ့သည့်အပြင် လက်နက်ကြီး၊ ဒရုန်းများနှင့်လည်း ဆက်တိုက် ပစ်ကူခဲ့သည်ဟု ဆိုသည်။ အဆိုပါ မြို့သိမ်း တိုက်ပွဲထဲ ရှမ်းနီတပ် SNA က ဗိုလ် ၁ ဦး အပါအဝင် အလောင်း ၇ လောင်းကို ရခဲ့သည်ဟု အမှတ် ၁ စစ်ဒေသ၏ ထုတ်ပြန်ချက်အရ သိရသည်။ အလားတူ တော်လှန်ရေး တပ်ဖွဲ့များဘက်ကလည်း ၆ ဦး ကျဆုံးခဲ့သည်ဟု မြေပြင် သတင်းအရင်းအမြစ်က ပြောသည်။

လေကြောင်း၊ ဒရုန်း၊ လက်နက်ကြီး ပစ်ကူများကြားမှ ဗန်းမောက်မြို့ကို တော်လှန်ရေးပူးပေါင်းအဖွဲ့ သိမ်းပိုက်

စစ်ကော်ရှင်နှင့် ပူးပေါင်းနေသည့် ကသည်းလက်နက်ကိုင်အဖွဲ့ တိုက်ခိုက်ခံရ၊ သေဆုံးမှုများ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။ စစ်ကိုင်းတိုင်း၊ ကလေးမြို့နယ်ထဲ၌ မြန်မာစစ်တပ်နှင့် ပေါင်းနေသော အိန္ဒိယနိုင်ငံဘက်က ကသည်းလက်နက် ကိုင် တပ်ဖွဲ့ တိုက်ခိုက်ခံရပြီး သေဆုံးမှုများခဲ့သည်ဟု အမှတ် ၁ စစ်ဒေသက ထုတ်ပြန်သည်။ ကလေးမြို့နယ်ထဲက နန်းဟန်နွဲ့ကျေးရွာတွင် တပ်စွဲထားသည့် မြန်မာစစ်တပ်နှင့် ပေါင်းနေသော အိန္ဒိယနိုင်ငံက ကသည်း လက်နက်ကိုင်အဖွဲ့ကို ပြည်သူ့ကာကွယ်ရေးတပ် (PDF) ၏ ကလေးခရိုင် အခြေစိုက် အမှတ် ၄ တပ်ရင်းက ဒရုန်းဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။ “ကလေးခရိုင် အမှတ် ၄ တပ်ရင်းမှ စက်တင်ဘာလ ၁၅ ရက်တွင် ဒရုန်းဖြင့် ဗုံးကြဲချ တိုက်ခိုက်ခဲ့သည်။ မိမိတို့ ဘက်မှ ဗုံးကြဲချ တိုက်ခိုက်သဖြင့် စစ်ကော်မရှင် ဗိုလ်တစ်ဦး ဦးစီးသည့် ကသည်းလက်နက်ကိုင် တပ်စိတ် (၁) စိတ် သေဆုံးခဲ့သည့်အပြင် စစ်ကော်မရှင် ဗိုလ်မှူးတစ်ဦး ထိခိုက်ဒဏ်ရာရခဲ့သည်” ဟု ထုတ်ပြန်ထားသည်။ တိုက်ခိုက်ခံရမှုထဲ ကသည်းလက်နက်ကိုင်အဖွဲ့က တပ်စိတ်တစ်စိတ် (၁၀ ဦးဝန်းကျင်) သေဆုံးခဲ့သည်ဟု အမှတ် ၁ စစ်ဒေသက စက်တင်ဘာလ ၂၃ ရက်နေ့တွင် သတင်းထုတ်ပြန်ထားသည်။ အဆိုပါ တိုက်ခိုက်မှုကို စက်တင်ဘာလ ၁၅ ရက်နေ့ တွင် လုပ်ဆောင်ခဲ့ခြင်း ဖြစ်သည်ဟု ဆိုသည်။ မြန်မာစစ်တပ်နှင့် ပူးပေါင်းထားသော ကသည်းလက်နက်ကိုင်တပ်မှာ အင်အား ၆၀ ဝန်းကျင် ရှိနေပြီး စက်တင် ဘာလ ပထမပတ်ကတည်းက ကလေးမြို့နယ်ထဲ စစ်ကြောင်းထိုး ဝင်လာခြင်း ဖြစ်သည်ဟု အမှတ် ၁ စစ်ဒေသ က ပြောသည်။ ထို့အပြင် ကသည်းလက်နက်ကိုင်တပ်ဖွဲ့က ဗိုလ်ကြီး တစ်ဦး ဦးစီးသော တပ်ဖွဲ့က အင်အား ၃၀ ခန့်မှာလည်း ကလေးမြို့ရှိ အမှတ် (၁၀) တပ်မတော်တန်းမြင့် လေ့ကျင့်ရေးကျောင်း၌ အရာရှိသင်တန်း တက်နေကြသည်ဟု ဆိုသည်။ ကသည်းလက်နက်ကိုင်တပ်ဖွဲ့မှာ စစ်တပ်က အာဏာသိမ်းပြီးနောက် ၂၀၂၁ ခုနှစ်က စပြီး တမူးခရိုင်ထဲက တမူး မြို့နယ်နှင့် ခန္တီးခရိုင်ထဲက ဟုမ္မလင်းမြို့နယ်တို့တွင် စစ်ကော်မရှင်တပ်နှင့် ပူးပေါင်းကာ တော်လှန်ရေးတပ်ဖွဲ့များ ကို မကြာခဏ တိုက်ခိုက်နေသည်ဟု မြေပြင် သတင်းအရင်းအမြစ်များက ပြောသည်။ တမူးခရိုင်အတွင်း% ကသည်းလက်နက်ကိုင် တပ်ဖွဲ့များမှာ ပူးပေါင်းအင်အား (၅၀၀) ကျော်ခန့် ရှိသည်ဟု အမှတ် ၁ စစ်ဒေသ၏ ထုတ်ပြန်ချက်အရ သိရသည်။ အဆိုပါ ကသည်းလက်နက်ကိုင်အဖွဲ့မှာ စစ်ကိုင်းတိုင်း၊ တမူးခရိုင်ထဲက ဟဲဇင်းကျေးရွာအတွင်း ဝင်ရောက် နေထိုင်နေသည်မှာ ၁၀ စုနှစ် တစ်စုကျော်ရှိလာပြီ ဖြစ်ပြီး လက်နက်နှင့် မူးယစ်ဆေးဝါးများ ရောင်းဝယ်မှုများ လုပ်သည်ဟု မြေပြင် သတင်းအရင်းအမြစ်များက ဆိုသည်။

စစ်ကော်ရှင်နှင့် ပူးပေါင်းနေသည့် ကသည်းလက်နက်ကိုင်အဖွဲ့ တိုက်ခိုက်ခံရ၊ သေဆုံးမှုများ

ဝက်လက် မြို့နယ်အတွင်း ဗုံးကြဲမှု အရပ်သား ၄ ဦး သေဆုံး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ စစ်ကိုင်းတိုင်း၊ ဝက်လက်မြို့နယ် အရှေ့ခြမ်းက ဧရာဝတီမြစ်ကမ်းဘေးတစ်လျောက်ရှိ ကျေးရွာ ၆ ရွာကို စစ်ကော်မရှင်တပ်မှ လေကြောင်းမှ ဗုံးကြဲ တိုက်ခိုက်ခဲ့ရာ အရပ်သား ၄ ဦး သေဆုံးခဲ့ပြီး ၁၃ ဦး ထိမှန်ဒဏ်ရာ ရခဲ့သည်။ လေကြောင်းမှ ဗုံးကြဲတိုက်ခိုက်မှုကို စက်တင်ဘာ ၉ ရက်နေ့နှင့် ၁၀ ရက်နေ့တို့တွင် နှစ်ရက်ဆက်တိုက် လုပ်ခဲ့ ခြင်း ဖြစ်သည်။ Wetlet Informational Network မှ တာဝန်ခံ ကိုနဂါးလေးက “ကျောက်မြောင်းကနေ အောက်ဘက် ဆင်းလာ တဲ့ အထိ မန္တလေး မရောက်မချင်း Y-12 ဝဲပေးပြီးတော့မှ ဝက်လက်မြို့နယ် အရှေ့ခြမ်း ရွာ ၇ ရွာလောက်ကို လေကြောင်း တိုက်ခိုက်မှု ပြုလုပ်သွားတယ်။ စဉ့်ကူးမြို့နယ် ထုံးကြီးကျေးရွာဘက်ကိုလည်း လေကြောင်း တိုက် ခိုက်မှုတွေ ပြုလုပ်သွားတယ်။ အဲ့မှာမှ ကျနော်တို့ ဝက်လက်မြို့နယ်ဘက်က သေဆုံး ပြည်သူ အမျိုးသား ကလေး အပါအဝင် သေဆုံး လေးဦး ရှိပြီးတော့မှ အမျိုးသား၊ အမျိုးသမီး ၁၃ ဦးခန့် ထိခိုက်ဒဏ်ရာ ရရှိပါတယ် ဗျ” ဟု ပြောသည်။ ယခုသေဆုံးမှုများမှာ စက်တင်ဘာလ ၉ ရက်နေ့ ညနေပိုင်းက လေကြောင်း တိုက်ခိုက်ခံရမှုထဲက အခြေအနေ များ ဖြစ်သည်။ စက်တင်ဘာလ ၉ ရက်နေ့၊ ညနေပိုင်းတွင် ဝက်လက်မြို့နယ် အရှေ့ခြမ်းရှိ သစ်ဆိပ့်၊ အင်ဒေါင်း၊ ရုံပင်ကုန်း၊ မင်းကုန်း၊ နဘဲပင်လှ၊ တပ်သာကျေးရွာများကို Y-12 လေယာဉ်ဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။ အလားတူ စက်တင်ဘာလ ၁၀ ရက်နေ့တွင်လည်း သစ်ဆိပ့်ကျေးရွာက စာသင်ကျောင်းကိုလည်း တံတားဦးဘက် မှ တက်လာသည့် ဂျက်ဖိုက်တာဖြင့် ပေါင် ၃၀၀ ဗုံး ထပ်ကြဲခဲ့သေးသည်ဟု Wetlet Informational Network က ထုတ်ပြန်ထားသည်။ ကိုနဂါးလေးက “တံတားဦးတပ်က တက်တဲ့ ဂျက်ဖိုက်တာတစ်စီးနဲ့ ဝက်လက်မြို့နယ် အရှေ့ခြမ်းက သစ်ဆိပ့် ကျေးရွာကို လေကြောင်းတိုက်ခိုက်မှု ပြုလုပ်သွားတယ်။ ဒီတိုက်ခိုက်မှုမှာ ထိခိုက်တာတွေ မရှိဘူး စာသင် ကျောင်းကို ပြုလုပ်သွားတယ်” ဟု ဆိုသည်။ ဗန်းမော်ဘက်မှ စုန်ဆင်းလာသော စစ်သင်္ဘော ရေယာဉ်တန်းကို လေကြောင်းမှ တစ်ဆင့် အနီးကပ် ခြံရံစောင့် ကြည့်ပေးခဲ့ပြီး ကသာ၊ ရွှေကူနှင့် ထီးချိုင့်မြို့နယ်တို့ကို ဖြတ်လာချိန် ဧရာဝတီမြစ်ကမ်းဘေးက ကျေးရွာများကို ဗုံးကြဲ တိုက်ခိုက်ခဲ့သည်။ အဆိုပါ လေကြောင်းတိုက်ခိုက်မှုသည် တိုက်ပွဲဖြစ်ပွားခြင်း မရှိဘဲ အရပ်သား ပြည်သူများသာ နေထိုင်သည့် နေရာများကို တိုက်ခိုက်ခဲ့ခြင်းဖြစ်သည်ဟု ဒေသခံများက ဆိုသည်။ စစ်သင်္ဘောအချို့မှာ မန္တလေး ဂေါဝန်ဆိပ်ကမ်းသို့ စက်တင်ဘာလ ၉ ရက်နေ့တွင် ပြန်လည်ရောက်ရှိသွားပြီ ဟု ကိုနဂါးလေးက ပြောသည်။ သို့သော်နောက်ချန် စစ်သင်္ဘောအချို့ ကျန်ရှိနေသေးသောကြောင့် လေကြောင်းမှ တိုက်ခိုက်မှုများ ဆက်ရှိနေ သေးသည်ဟု ဆိုသည်။ နောက်ချန် သင်္ဘောအချို့မှာ မန္တလေးကို မရောက်မှီ မတ္တရာ အနောက်ဘက်ခြမ်းရှိ စိန်ပန်းကုန်း၊ ရှင်လ၊ ဇလ အစရှိသည့် ကျေးရွာများဘက်တွင် ကျန်နေသေးသောကြောင့် ဝက်လက်မြို့နယ်နှင့် မြစ်ဘေးတစ်လျှောက်ရှိ မိဘပြည်သူများ အနေဖြင့် လေကြောင်း သတိထားကြရန် အသိပေး နှိုးဆော်ထားသည်။

ဝက်လက် မြို့နယ်အတွင်း ဗုံးကြဲမှု အရပ်သား ၄ ဦး သေဆုံး

ဝက်လက်ကို စစ်တပ်က နှစ်ရက်ဆက်တိုက် လေကြောင်းမှ ဗုံးကြဲတိုက်ခိုက်၊ ၄ ယောက်သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၀ ရက်။ စစ်ကိုင်းတိုင်း ဝက်လက်မြို့နယ်ထဲ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှု နှစ်ရက်ဆက်တိုက် လုပ်ခဲ့ရာ ကလေး အပါအဝင် အရပ်သားများ သေဆုံးခဲ့သည်။ စက်တင်ဘာလ ၁၀ ရက်နေ့နှင့် စက်တင်ဘာလ ၉ ရက်နေ့ နှစ်ရက်ဆက်တိုက် ဝက်လက်မြို့ နယ်ထဲ စစ်တပ်က လေယာဉ်သုံး ဗုံးကြဲတိုက်ခိုက်ခဲ့ခြင်း ဖြစ်သည်။ ဝက်လက်မြို့နယ် အရှေ့ခြမ်းရှိ သစ်ဆိပ့်ကျေးရွာက စာသင်ကျောင်းကို တံတားဦးဘက်မှ တက်လာသည့် J-Frighter ဖြင့် ပေါင် ၃၀၀ ဗုံးဖြင့် ကြဲခဲ့ခြင်း ဖြစ်သည်။ စက်တင်ဘာလ ၁၀ ရက်နေ့ ဖြစ်စဉ်နှင့် ပတ်သက်၍ မြေပြင် သတင်းအရင်းအမြစ်က “ဒီနေ့မှာ ပေါင် ၃၀၀ ဗုံသီး သုံးပြီး ဗုံးကြဲခဲ့ပါတယ်။ သစ်ဆိပ့် ရွာ စာသင်ကျောင်းထဲကို တံတားဦးက တက်လာတဲ့ ဂျက်ဖိုက်တာနဲ့ ၁၂ ကျော် လောက်မှာ ကြဲသွားတာပါ။ ပေါင် ၃၀၀ ဗုံသီးနဲ့ လေကြောင်းကနေ တစ်ကြိမ်ကြဲခဲ့တယ်လို့ သတင်းရထား တယ်။ အဲ့မှာက တိုက်ပွဲ ဖြစ်တာမျိုး မရှိဘူးဗျ” ဟု ပြောသည်။ ထို့အပြင် စက်တင်ဘာလ ၉ ရက်နေ့ကလည်း ဝက်လက်မြို့နယ်ထဲကို စစ်တပ်က လေကြောင်းမှ ဗုံးကြဲတိုက်ခိုက် ခဲ့သောကြောင့် ကလေး ၁ ဦး အပါအဝင် အရပ်သား ၄ ဦး သေဆုံးခဲ့တယ်လို့ Wetlet Informational Network (ဝက်လက် သတင်းကွန်ရက်) က ထုတ်ပြန်သည်။ အဆိုပါ လေကြောင်းတိုက်ခိုက်ခံရမှုထဲ အရပ်သား ၁၃ ဦးလည်း ထိမှန်ဒဏ်ရာ ရခဲ့သည်ဟု ထုတ်ပြန်ထားသည်။ ဝက်လက်မြို့နယ် အရှေ့ခြမ်းတွင် စစ်သင်္ဘောများကို ခြံရံပြီး ပျံသန်းနေသည့် Y-12 လေယာဉ်က သစ်ဆိပ့်၊ အင်ဒေါင်း၊ ရုံပင်ကုန်း၊ မင်းကုန်း၊ နဘဲပင်လှနှင့် တပ်သာကျေးရွာတို့ကို ဗုံးကြဲ တိုက်ခိုက်ခဲ့ခြင်း ဖြစ်သည်။

ဝက်လက်ကို စစ်တပ်က နှစ်ရက်ဆက်တိုက် လေကြောင်းမှ ဗုံးကြဲတိုက်ခိုက်၊ ၄ ယောက်သေဆုံး

« Prev 1 2 3 4 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close