NUG – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: NUG

NUG အထူးတိုင်းစစ်ဌာနချုပ် လေကြောင်းမှ ဗုံးကြဲခံရပြီး CDM အရာရှိနှင့် ရဲဘော်အချို့ ကျဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ပဲခူးတိုင်း ရွှေကျင်မြို့နယ်နှင့် မွန်ပြည်၊ ကျိုက်ထိုမြို့နယ်အစပ်ရှိ အမျိုးသားညီညွတ်ရေးအစိုးရ (NUG) ကာကွယ် ရေးဝန်ကြီးဌာန၊ အထူးတိုင်းစစ်ဌာနချုပ် အခြေစိုက်နေရာကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့ သဖြင့် CDM လေတပ်အရာရှိတစ်ဦးနှင့် ပြည်သူ့ကာကွယ်ရေးတပ်ဖွဲ့ (PDF) ရဲဘော်များ ကျဆုံးကာ ကွပ်ကဲရေး မှူး အပါအဝင် ထိပ်ပိုင်းခေါင်းဆောင်အချို့ ဒဏ်ရာရရှိခဲ့ကြသည်။ စက်တင်ဘာလ ၂၄ ရက်နေ့၊ နံနက် ၁၁ နာရီခန့်တွင် စစ်ဘက်ဆိုင်ရာ သင်တန်းတစ်ခု ပြုလုပ်နေသည့် NUG အထူးတိုင်းစစ်ဌာန၏ စခန်းနေရာကို စစ်အုပ်စုတပ်က တိုက်လေယာဉ်များအပြင် Y-12 ထောက်ပံ့ရေး လေယာဉ်များပါ အသုံးပြု၍ ဗုံး ၆ လုံးထက်မနည်း ကြဲချတိုက်ခိုက်ခဲ့ခြင်းဖြစ်သည်။ မြေပြင် စစ်ရေးသတင်းရင်းမြစ်တစ်ဦးက “လေယာဉ်နဲ့ ဗုံး ကြဲပြီးတာနဲ့ သိမ်ဇရပ် အမှတ် (၃၁၀) အမြောက် တပ်ရင်းကပါ လက်နက်ကြီးတွေနဲ့ ဆက်တိုက် ပစ်ခတ်ခဲ့တာပါ။ လေကြောင်းနဲ့ လက်နက်ကြီး တိုက်ခိုက်မှုတွေ ကြောင့် CDM လေတပ်တပ်ကြပ်ကြီး နေဝင်းအောင်အပါအဝင် ရဲဘော်တွေ ကျဆုံးခဲ့ရတာပါ။ ကျနော်တို့ရတဲ့ အချက်အလက်ကတော့ ၄ ယောက်လို့တော့ ရထားတယ်။ အသေးစိတ်ဆက်မသိရသေးဘူး” ဟု ပြောသည်။ လေကြောင်းတိုက်ခိုက်မှုကြောင့် အကြမ်းမဖက် အာဏာဖီဆန်ရေးလှုပ်ရှားမှု (CDM) တွင် ပါဝင်လာသည့် လေတပ်တပ်ကြပ်ကြီး နေဝင်းအောင်နှင့် PDF ရဲဘော်အနည်းဆုံး ၄ ဦးခန့် ကျဆုံးခဲ့ပြီး အထူးတိုင်းစစ်ဌာန ကွပ်ကဲရေးမှူး ကိုအောင်စံရှားအပါအဝင် ၄ ဦးခန့် ဒဏ်ရာရရှိခဲ့သည်။ သို့သော် မြေပြင်စစ်ကြောင်းများ အနီးဝန်းကျင်သို့ ထိုးစစ်ဆင်လာနေသဖြင့် သေဆုံး/ဒဏ်ရာရ စာရင်း အတိအကျကို အတည်မပြုနိုင်သေးဘဲ ကျဆုံးသူ အရေအတွက် ပိုမိုမြင့်တက်လာနိုင်ကြောင်း နယ်မြေခံများက ဆိုသည်။ အဆိုပါ စစ်ရေးသတင်းရင်းမြစ်က “တိုက်ခိုက်မှုအပြီးမှာလည်း အနားက တပ်ရင်းတွေကနေ လက်နက်ကြီးနဲ့ တောက်လျှောက် ပစ်နေသလို မြေပြင်စစ်ကြောင်း ၂ ကြောင်းပါ ထိုးလာတယ်။ ဒဏ်ရာရသူတွေကို ဆေးကုသ ပေးဖို့အတွက် မြေပြင်မှာ အခက်အခဲအများကြီး ကြုံနေရတုန်းပဲ” ဟု ပြောသည်။ အဆိုပါ NUG အထူးတိုင်းစစ်ဌာနသည် ပဲခူးတိုင်း၊ မွန်ပြည်နှင့် ကရင်ပြည် နယ်စပ် စစ်တောင်းမြစ်ဝှမ်းဒေသ များတွင် အဓိက စစ်ရေးလှုပ်ရှားနေသည့် တပ်ဖွဲ့ဖြစ်သည်။ ယခုဖြစ်စဉ်နှင့် ပတ်သက်၍ NUG ကာကွယ်ရေးဝန်ကြီးဌာနဘက်မှ တစ်စုံတစ်ရာ တရားဝင် ထုတ်ပြန်ထားခြင်း မရှိသေးသော်လည်း တော်လှန်ရေး အင်အားစုများနှင့် နီးစပ်သူများကမူ လူမှုကွန်ရက်ပေါ်တွင် ကျဆုံးသွားသည့် ရဲဘော်များအတွက် ဝမ်းနည်းကြောင်း စာလွှာများ ရေးသားဖော်ပြနေကြသည်။ ဓာတ်ပုံ- (အထူးတိုင်းစစ်ဌာန / ယခုနှစ်အတွင်း အထူးတိုင်းစစ်ဌာန အစည်းအဝေးတစ်ခုတွင် တွေ့ရသည့် တပ်မှူးများ။) #အထူးတိုင်းစစ်ဌာန

NUG အထူးတိုင်းစစ်ဌာနချုပ် လေကြောင်းမှ ဗုံးကြဲခံရပြီး CDM အရာရှိနှင့် ရဲဘော်အချို့ ကျဆုံး

စစ်အုပ်စု စေလွှတ်သည့် ‘သမဂ္ဂအတု’ ကို ILO ညီလာခံက လက်မခံပဲ ပယ်ချ

သိမ်းဆည်းနယ်မြေ အချို့ လက်လွှတ်နေရကြောင်း NUG ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၅ ရက်။ စစ်အုပ်စု၏ သာလွန်အင်အားဖြင့် ထိုးစစ်ဆင် တိုက်ခိုက်မှုများကြောင့် သိမ်းပိုက်ထိန်းချုပ်ထားသည့် နယ်မြေ အချို့ကို ပြန်လည် လက်လွှတ်နေရသည်ဟု အမျိုးသား ညီညွတ်ရေး အစိုးရ NUG ဝန်ခံပြောဆိုလိုက်သည်။ အဆိုပါ ပြောဆိုမှုကို မေလ ၅ ရက်နေ့ (ယနေ့)တွင် ကျရောက်သည့် ပြည်သူ့ကာကွယ်ရေး တပ်မတော် PDF ဖွဲ့စည်းတည်ထောင်ခြင်း ၅ နှစ်ပြည့် အထိမ်းအမှတ်နေ့ မိန့်ခွန်းတွင် NUG တာဝန်ရှိသူများက ပြောဆိုလိုက် ခြင်းဖြစ်သည်။ NUG ယာယီ သမ္မတ ဒူဝါလရှီးလက “ကျနော်တို့အနေနဲ့ လက်ရှိအချိန်မှာ ကြုံတွေ့နေရတဲ နိုင်ငံရေး စိန်ခေါ်ချက်တွေ အမြောက်အများရှိနေသလို စစ်ရေးအရ လက်လွတ်ဆုံးရှုံးရမှုတစ်ချို့လည်း ခပ်စိပ်စိပ် ကြုံတွေ့နေကြရပါတယ်။ တော်လှန်ရေးရဲ့သ ဘောဟာ အနိမ့်အမြင့် အတက်အကျတွေ ရှိတတ်သလို ရှေ့ နှစ်လှမ်းတိုး နောက်တစ်လှမ်းဆုတ်ရတဲ့ ဖြစ်စဉ်မျိုးတွေလည်း ရှိတတ်ကြောင်းပြောကြားလိုပါတယ်။” ဟု ပြောသည်။ တရုတ်၏ ကြားဝင် ဆောင်ရွက်မှုကြောင့် ရှမ်းမြောက်ဒေသရှိ တော်လှန်ရေး တပ်ဖွဲ့များ သိမ်းဆည်းထားသော မြို့ အချို့ကို လက်လွှတ်ခဲ့ရသည်။ ယင်းတို့တွင် လားရှိုး၊ ကွတ်ခိုင်၊ ကျောက်မဲ၊ သီပေါ၊ နောင်ချိုတို့ပါဝင်သည်။ ထို့အပြင် မကြာသေးမီက မန္တလေးတိုင်းဒေသကြီးအတွင်းရှိ မတ္တရာနှင့် တကောင်းနယ်မြေများ၊ မိုးကုတ်နှင့်မိုးမိတ်မြို့များ၊ နှင့် စစ်ကိုင်းတိုင်း အတွင်း ထီးချိုင့်၊ ဗန်းမောက်၊ ကသာ၊ အင်းတော်၊ မော်လူး စသည့် မြို့များကို စစ်တပ်က ပြန်လည် ထိန်းချုပ်နိုင်ခဲ့သည်။ နယ်မြေအချို့ကို လက်လွတ်ထားရသော်လည်း လက်ရှိ အနေအထားအရ မြေပြင်ပကတိအခြေအနေကို လျစ်လျူရှု့၍ မရသကဲ့သို့ အားလုံးမျှော်မှန်းသည့် တော်လှန်ရေး ရည်မှန်းချက် ပန်းတိုင်ကိုလည်း မျက်ခြေပျက် ၍ မရကြောင်း NUG ယာယီ သမ္မတ ဒူဝါလရှီးလ က ဆိုသည်။ NUG ပြည်ထောင်စုဝန်ကြီးချုပ် မန်းဝင်းခိုင်သန်း ကလည်း ထိန်းချုပ်နယ်မြေများမှ ယာယီဆုတ်ခွာခြင်းသည် ပြည်သူလူထုများ၏ အသက်အိုးအိမ်စည်းစိမ် ထိခိုက်မှုကို ရှောင်ရှားရန် လုပ်ဆောင်ရခြင်းဖြစ်သည်ဟု ပြောသည်။ မန်းဝင်းခိုင်သန်းက “ကျွန်တော်တို့ ပြည်သူ့ကာကွယ်ရေး တပ်ဖွဲ့တွေအနေနဲ့ စစ်ရေးအောင်မြင်မှုတွေ ရရှိနေတဲ့ ကြားကပဲ အကြမ်းဖက် စစ်တပ်ရဲ့ သာလွန်အင်အားနဲ့ ရင်ဆိုင်ကြရတဲ့အခါမှာ ပြည်သူလူထုရဲ့ အသက်အိုးအိမ် စည်းစိမ်ကို ကာကွယ်ဖို့နဲ့ အစုလိုက်အပြုံလိုက် ထိခိုက်နစ်နာမှုတွေ မဖြစ်ပေါ်စေဖို့ အတွက် အလေးထား စဉ်းစားခဲ့ရတာတွေကြောင့် တချို့သော စစ်ဆင်ရေးနယ်မြေတွေမှာ နည်းဗျူဟာအရ ခံစစ်အနေအထားနဲ့ ရင်ဆိုင်ခဲ့ရတာတွေ၊ ယာယီဆုတ်ခွာပေးခဲ့ရတဲ့ မြေပြင် အမှန်တရားတွေ ရှိခဲ့ပါတယ်။” ဟု ပြောသည်။ သိမ်းပိုက်ထိန်းချုပ်ထားသည့် နယ်မြေများမှ ယာယီ ဆုတ်ခွာလိုက်ခြင်းသည် ရန်သူကို ကြောက်၍ မဟုတ်ဘဲ ရှေ့ဆက် ရမည့် ဗျူဟာမြောက် တိုက်ပွဲများအတွက် အင်အားစုဆောင်ခြင်းဖြစ်သည်ဟု မန်းဝင်းခိုင်သန်း က ဆိုသည်။ နယ်မြေဆုတ်ခွာမှုများနှင့် အခက်အခဲ အချို့ရှိသော်လည်း တော်လှန်ရေး အောင်မြင်သည့်အထိ ဆက်လက်တိုက်ပွဲဝင် သွားမည်ဟု NUG ကာကွယ်ရေး ဝန်ကြီးဌာန ပြည်ထောင်စု ဝန်ကြီး ဦးရည်မွန်ကလည်း ပြောသည်။ “လက်ရှိ အခြေအနေမှာ ငါတို့ သိမ်းပိုက်ထားတဲ့ မြို့တချို့ ယာယီစွန့်ခွာရမှု အပါအဝင် အခက်အခဲတချို့ရှိပေမဲ့ ငါတို့အားလုံးရဲ့ ခိုင်မာတဲ သံဋိဌာန်၊ ပြင်းပြတဲ့ ယုံကြည်ချက်၊ ထက်မြက်တဲ့ ညာဏ်ပညာနဲ့ ရင့်သန်တဲ့ စိတ်ခွန်အားကို အရင်းတည်ပြီး လက်တလောအခြေအနေကို အတူတကွ ရင်ဆိုင်ကျော်လွှားကြရမယ်။တော်လှန်ရေး ပန်းတိုင် မရောက်မချင်း စိတ်ဇွဲမလျှော့စတမ်း ဆက်လက်ချီတက်တိုက်ပွဲဝင်သွားကြရမယ်” NUG အနေဖြင့် ပြည်သူ့ကာကွယ်ရေး တပ်မတော်ကို PDF ဖွဲ့စည်းတည်ထောင်ပြီး ၅ နှစ်တာ ကာလအတွင်းတွင် တိုင်းရင်း သား လက်နက်ကိုင် မဟာမိတ် တော်လှန်ရေး အဖွဲ့အစည်းများနှင့်အတူ ပြည်နယ်နှင့် တိုင်းဒေသကြီးများရှိ နယ်မြေအများအပြားကို သိမ်းပိုက်ထိန်းချုပ်နိုင်ခဲ့ပြီး အုပ်ချုပ်ရေး ယန္တရားများကိုလည်း ခိုင်ခိုင်မာမာ တည်ဆောက်နိုင် ခဲ့ကြသည်။ သို့သော် စစ်အုပ်စုက တော်လှန်ရေး အဖွဲ့အစည်းများအတွင်း သပ်သျှိုသွေးခွဲမှုများနှင့် အိမ်နီးချင်းနိုင်ငံအချို့၏ အဖက်ဖက်မှ ပံ့ပိုးကူညီမှုများကို ရယူကာ သာလွန်အင်အားဖြင့် ထိုးစစ်ဆင် တိုက်ခိုက်ရာမှ NUG နှင့် မဟာမိတ်ပူးပေါင်းတပ်များက နယ်မြေအချို့ကို ပြန်လည် လက်လွှတ်ခဲ့ ရခြင်းဖြစ်သည်။ #NUG #NUGကာကွယ်ရေးဝန်ကြီးဌာန #PDF #မန်းဝင်းခိုင်သန်း #ဦးရည်မွန် #ဒူဝါလရှီးလ

သိမ်းဆည်းနယ်မြေ အချို့ လက်လွှတ်နေရကြောင်း NUG ပြော

စစ်တပ်စစ်ကြောင်းများ မော်လူးသို့ ဦးတည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၄ ရက်။ စစ်ကိုင်းတိုင်းဒေသကြီး၊ အင်းတော်မြို့ကို ပြန်လည်ထိန်းချုပ်ခဲ့သည့် စစ်တပ်သည် အမျိုးသားညီညွတ်ရေး အစိုးရ (NUG) ၏ အုပ်ချုပ်ရေး ယန္တရား လည်ပတ်နေသော မော်လူးမြို့သို့ ဦးတည် စစ်ကြောင်းထိုးလာနေသဖြင့် ဒေသခံများ ဘေးလွတ်ရာသို့ ထိန့်လန့်တိမ်းရှောင်နေကြရသည်။ အင်းတော်နှင့် မော်လူးမြို့ကြားရှိ တုံးလုံကျေးရွာအနီးသို့ စစ်တပ် စစ်ကြောင်းများ ရောက်ရှိနေပြီဖြစ်ကြောင်း ဒေသခံတစ်ဦးက အတည်ပြုပြောသည်။ “တုံးလုံရွာဘက်ကိုရောက်ပြီလို့သိရတယ်။ မော်လူးမြို့နားပေါ့ ၅ မိုင်၊ ၇ မိုင်ပတ်ချာလည်ပေါ့။ အင်းတော်နဲ့ မော်လူးကြားမှာ အဲ့ရွာက။ မော်လူးမြို့ကိုဦးတည်ပြီး ပြီးခဲ့တဲ့ မေလ ၂ ရက်နေ့ကတည်းကထွက်သွားတာ” ဟု ဒေသခံတစ်ဦးက ပြောသည်။ မော်လူးမြို့သည် အင်းတော်မြို့၏ မြောက်ဘက် မိုင် ၅၀ ခန့်အကွာ၊ မြစ်ကြီးနား-မန္တလေး ဗျူဟာလမ်းမကြီး ပေါ် တွင် တည်ရှိပြီး စစ်ရေးအရ အရေးပါသည့် မြို့တစ်မြို့ဖြစ်သည်။ အဆိုပါမြို့ကို ၂၀၂၃ ခုနှစ်၊ ဒီဇင်ဘာလအတွင်းက ကချင်လွတ်လပ်ရေး တပ်မတော် (KIA)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး- ကျောင်းသား တပ်မတော် (ABSDF) နှင့် NUG လက်အောက်ခံ ပူးပေါင်းတပ်ဖွဲ့များက တိုက်ခိုက်သိမ်းပိုက်ထားခြင်း ဖြစ်သည်။ ယခုစစ်ကြောင်းထိုးလာသည့် တပ်ဖွဲ့များသည် ထီးချိုင့်၊ တကောင်း၊ ကသာနှင့် အင်းတော်မြို့တို့ကို စစ်တပ်က ပြန်လည် ထိန်းချုပ်ရာတွင် ပါဝင်ခဲ့သည့် တပ်ဖွဲ့များဖြစ်ပြီး တိုက်ပွဲများအတွင်း လက်နက်ခဲယမ်းနှင့် အသေခံ ဒရုန်း (Kamikaze Drone) များကို အမြောက်အမြား အသုံးပြုလေ့ရှိကြောင်း မြေပြင်သတင်းရင်းမြစ်က ဆို သည်။ စစ်ရေးတင်းမာမှု မြင့်တက်လာခြင်းကြောင့် အင်းတော်-မော်လူး လမ်းပိုင်းရှိ ကျေးရွာသားများနှင့် မြို့ပေါ် ဒေသခံများမှာ ကြိုတင်တိမ်းရှောင်နေကြရပြီး ကာကွယ်ရေးတပ်ဖွဲ့များနှင့် နီးစပ်သည့် ဒေသခံတစ်ဦးကလည်း ယခုကဲ့သို့ သတိပေးနှိုးဆော်ထားသည်။ “အရပ်သားတွေကိုတော့ အဓိကကတော့ စစ်ကြောင်းနဲ့ဝေးရာကို ရှောင်ကြဖို့မှာ ချင်တယ်။ နီးမှမရှောင်နဲ့ပေါ့ ကြိုရှောင်ထားကြပေါ့လေ။ ပစ္စည်းတွေကြိုရွှေ့ကြပေါ့လေ။ နီးမှရှောင်ရင်တော့ လက်နက်ကြီးတွေ မတော် တဆ ထိတတ်တယ်လေ။ အဓိကကတော့ ရှောင်ကြဖို့ပါပဲ။” စစ်တပ်သည် ၎င်းတို့လက်လွှတ်ခဲ့ရသည့် မြို့ရွာများကို ပြန်လည်ထိန်းချုပ်နိုင်ရန် အင်အားအလုံးအရင်းဖြင့် စစ်ကြောင်းထိုးမှုများ ဆက်တိုက်ပြုလုပ်နေသဖြင့် မြောက်ပိုင်းစစ်မျက်နှာတွင် စစ်ရေးအခြေအနေမှာ ပိုမို ပြင်းထန်လာနိုင်ကြောင်း စစ်ရေးလေ့လာသူများက သုံးသပ်နေကြသည်။ #မော်လူး #အင်းတော်မြို့ #စစ်တပ်ထိုးစစ် #စစ်ကိုင်းတိုင်း

စစ်တပ်စစ်ကြောင်းများ မော်လူးသို့ ဦးတည်

ရွှေဘို ခရိုင်အတွင်း ခွင့်ပြုချက်မရှိပဲ ဖွင့်လှစ်ထားသော ဂိတ်ပေါင်း ၇၅ ဂိတ်ကို NUG ပိတ်သိမ်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၅ ရက်။ စစ်ကိုင်းတိုင်း၊ ရွှေဘိုခရိုင်အတွင်းရှိ လမ်းပိုင်းများတွင် အထက်အဆင့်ဆင့်၏ ခွင့်ပြုချက်မရှိဘဲ အကြောင်းပြ ချက်အမျိုးမျိုးဖြင့် ဖွင့်လှစ်ထားသည့် အခွန်ဂိတ်နှင့် စစ်ဆေးရေးဂိတ်ပေါင်း ၇၅ ဂိတ်ကို အမျိုးသားညီညွတ်ရေး အစိုးရ (NUG)၊ အမှတ် (၁) စစ်ဒေသက အပြီးတိုင် ပိတ်သိမ်းလိုက်ပြီ ဖြစ်သည်။ အဆိုပါဂိတ်များမှာ မြို့နယ်ပြည်သူ့အုပ်ချုပ်ရေး အဖွဲ့များက ဖွင့်လှစ်ထားသည့် ပြည်ထောင်စုအခွန်ဂိတ်၊ လမ်းပြုပြင်ရေးဂိတ်၊ စည်ပင်ဂိတ်များအပြင် ကာကွယ်ရေးအဖွဲ့အမည်ခံ ဂိတ်များဖြစ်ပြီး မြို့နယ်တစ်ခုလျှင် ပျမ်းမျှ ၂၅ ဂိတ်ခန့်အထိ ဖောင်းပွနေခြင်းဖြစ်သည်။ ထိုသို့ ဂိတ်များပြားနေခြင်းကြောင့် ပြည်သူများအပေါ် ငွေကြေးဝန်ထုပ်ဝန်ပိုးဖြစ်စေခြင်း၊ ခရီးသွားလာမှု နှောင့် နှေးကြန့်ကြာခြင်းနှင့် စည်းကမ်းတကျမရှိခြင်းတို့အပေါ် လူထု၏ တိုင်ကြားချက်များရှိလာသဖြင့် ဖေဖော်ဝါရီ ၁၇ ရက်နေ့ကို နောက်ဆုံးထားကာ ပိတ်သိမ်းရန် ညွှန်ကြားခဲ့ခြင်းဖြစ်ကြောင်း ရွှေဘိုခရိုင်ကွပ်ကဲရေးအဖွဲ့က ဖေဖော်ဝါရီလ ၂၃ ရက်စွဲဖြင့် တရားဝင် ထုတ်ပြန်ခဲ့သည်။ မြေပြင်တွင် ကုန်စည်ပို့ဆောင်နေသည့် အသက် ၄၀ အရွယ် ကုန်တင်ယာဉ်မောင်းတစ်ဦးက ၎င်းကြုံတွေ့ရသည့် အခက်အခဲကို ယခုကဲ့သို့ ပြောပြသည်။ “အရင်ကဆို ရွှေဘိုလမ်းပိုင်းမှာက ဂိတ်တွေက မှိုလိုပေါတာ။ တစ်ဂိတ်ဝင် တစ်ဂိတ်ထွက် ပေးရတဲ့ငွေက မနည်း ဘူး။ ကားခက ရတာနဲ့ ဂိတ်ကြေးပေးရတာနဲ့ တင် အနိုင်နိုင်ပဲ။ အခုလို စနစ်တကျ လုပ်လိုက်တော့ ကျနော်တို့ ယာဉ်မောင်းတွေရော၊ ကုန်သည်တွေပါ အသက်ရှူချောင်သွားတာပေါ့။ ခရီးလည်း ပိုတွင်တာပေါ့ဗျာ။” လက်ရှိတွင် ရွှေဘိုခရိုင်ကွပ်ကဲရေးအဖွဲ့ အနေဖြင့် မလိုအပ်သည့်ဂိတ်များကို ပိတ်သိမ်းစေပြီး လိုအပ်သည့် ဂိတ် များကိုမူ စနစ်တကျ ပေါင်းစည်းနိုင်ရန် မြို့နယ်အသီးသီးရှိ အုပ်ချုပ်ရေး၊ လုံခြုံရေးနှင့် စည်ပင်သာယာရေး အဖွဲ့ များနှင့် ပူးပေါင်းဆောင်ရွက်နေသည်။ နောင်တွင် စစ်ရေးအရ စစ်ဆေးရန်လိုအပ်ပါကလည်း ခရိုင်ကွပ်ကဲရေးအဖွဲ့၏ ခွင့်ပြုမိန့်စာပါရှိမှသာ ဆောင်ရွက် ရတော့မည်ဖြစ်သည်။ အဆိုပါ လမ်းပိုင်းနှင့် ပတ်သက်၍ ဒေသခံအမျိုးသမီးတစ်ဦးကလည်း “ဂိတ်တွေ အများကြီးရှိတော့ သွားရ လာရတာ စိတ်အနှောင့်အယှက် ဖြစ်ရတယ်။ တချို့ဂိတ်တွေက ဘယ်အဖွဲ့မှန်းတောင် သေချာမသိရဘဲ ပိုက်ဆံ တောင်းတာမျိုးတွေ ရှိခဲ့တာ။ အခုလို ခရိုင်ကွပ်ကဲရေးက တရားဝင် ပိတ်သိမ်းလိုက်ပြီဆိုတော့ ပြည်သူတွေ အတွက် ပိုပြီး အဆင်ပြေသွားတာပေါ့” ဟု ပြောသည်။ ထို့အပြင် NUG အစိုးရအနေဖြင့် စစ်ကိုင်းတိုင်းတစ်ခွင်လုံးရှိ အကောက်ခွန်ဂိတ်များကို လျှော့ချပိတ်သိမ်းမည့် စီမံချက်ရှိနေပြီး စစ်ကော်မရှင် ထိန်းချုပ်ထားသည့် မြို့များကို ရှောင်ကွင်းသည့် လမ်းပိုင်းများကိုလည်း စည်ပင် သာယာရေးအခွန်များဖြင့် အကောင်းဆုံးဖြစ်အောင် ပြုပြင်ပေးရန် ညှိနှိုင်းထားသည်ဟု ဆိုသည်။ ရွှေဘိုခရိုင်အတွင်း တော်လှန်ရေးအင်အားစုများ စိုးမိုးထားသည့် နယ်မြေများတွင် အုပ်ချုပ်ရေးနှင့် တရားဥပဒေ စိုးမိုးရေး လုပ်ငန်းများကို စနစ်တကျ အကောင်အထည်ဖော်ရန် ကြိုးပမ်းနေချိန်၌ ယခုကဲ့သို့ တရားမဝင်ဂိတ်များ ကို အရေးယူဆောင်ရွက်ခြင်းသည် ဒေသတွင်း တည်ငြိမ်ရေးအတွက် အလားအလာကောင်းတစ်ခု ဖြစ်သည်ဟု ဒေသခံများက ပြောသည်။ ခရိုင်ကွပ်ကဲရေးအဖွဲ့ကလည်း လိုက်နာခြင်းမရှိသည့် ဂိတ်များကို ထိရောက်စွာ အရေးယူမည့် စနစ်များ တည် ဆောက်ထားပြီး ဖြစ်ကြောင်းနှင့် ပြည်သူလူထု အနေဖြင့် သတ်မှတ်အခွန် ခွဲတမ်းများကို တာဝန်သိစိတ်ဖြင့် ပေးဆောင်ကာ စည်းကမ်းချက်များကို လိုက်နာကြရန် တိုက်တွန်းထားသည်။

ရွှေဘို ခရိုင်အတွင်း ခွင့်ပြုချက်မရှိပဲ ဖွင့်လှစ်ထားသော ဂိတ်ပေါင်း ၇၅ ဂိတ်ကို NUG ပိတ်သိမ်း

ဗိုလ်နဂါးတပ်နှင့် NUG ၏ ကာကွယ်ရေး တပ်ဖွဲ့များ အကြား ပစ်ခတ်မှုများ ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၇ ရက်။ စစ်ကိုင်းတိုင်း၊ ပုလဲမြို့နယ်အတွင်း အခြေစိုက်သော ဗိုလ်နဂါး ဦးဆောင်သည့် BNRA နှင့် NUG လက်အောက်ခံ MOD တပ်ရင်းတပ်ဖွဲ့များကြား အပြန်အလှန် ပစ်ခတ်မှုများ ပြင်းပြင်းထန်ထန် ဖြစ်ပွားနေသည်။ ပုလဲမြို့နယ်အတွင်း တော်လှန်ရေးအင်အားစု အချင်းချင်းကြား စစ်ရေးပဋိပက္ခများ အရှိန်မြင့်တက်လာပြီး ဗမာအမျိုးသား တော်လှန်ရေး တပ်မတော် (BNRA) နှင့် အမျိုးသားညီညွတ်ရေးအစိုးရ (NUG) လက်အောက်ခံ ကာကွယ်ရေးတပ်ဖွဲ့များအကြား ယနေ့ ဖေဖော်ဝါရီ ၁၇ ရက် နံနက်ပိုင်းမှ စတင်ကာ အပြန်အလှန် ပစ်ခတ်မှုများ ပြင်းထန်စွာ ဖြစ်ပွားနေသည်။ ယနေ့ နံနက် ၇ နာရီခွဲခန့်မှစတင်၍ ပုလဲမြို့နယ်အတွင်းရှိ ချင်ပြစ်ကျေးရွာနှင့် ပုပ္ပါကျေးရွာအနီးရှိ BNRA ဂိတ် စခန်းများကို NUG ကာကွယ်ရေးဝန်ကြီးဌာန (MOD) လက်အောက်ခံ တပ်ရင်းများက လက်နက်ကြီးများ၊ စက် သေနတ်များနှင့် ဒရုန်းများကို အသုံးပြု၍ လာရောက်တိုက်ခိုက်ခဲ့ခြင်းဖြစ်ကြောင်း BNRA ခေါင်းဆောင် ဗိုလ်နဂါး က ၎င်း၏ လူမှုကွန်ရက်စာမျက်နှာတွင် ရေးသားထားသည်။ ပုလဲမြို့နယ်အတွင်း ဖြစ်ပွားနေသည့် စစ်ရေးအခြေအနေနှင့် ပတ်သက်၍ ဗိုလ်နဂါးက ယခုကဲ့သို့ ရေးသားဖော်ပြ ထားသည်။ “NUG ရဲ့ MOD တပ်ရင်းတွေဟာ ဒီနေ့နံနက် ၇ နာရီခွဲမှစ BNRA ဂိတ်စခန်းများအား လက်နက်ကြီး ပစ်ခတ် ခြင်းနှင့် ဒရုန်းဗုံးသီးများဖြင့်ပါ ကိုလာရောက်တိုက်ခိုက်နေပြီဖြစ်ပါသည်။ အစိုးရအမည်ခံထားခြင်း၊ စစ်ဒေသ တစ်တွင်လည်း KIA အဖွဲ့အစည်းမှ ဦးဆောင်ခြင်းကြောင့် ထိုသို့အကျည်းတန်သော လုပ်ရပ်ကို တော်လှန်ဘက် အချင်းချင်း ပြုလုပ်မည်မဟုတ်ဟု လွန်ခဲ့သော နှစ်များအတွင်း ယူဆထားခဲ့ဖူးသော်လည်း ယခုအခါ အံ့သြဖွယ် ဆိုးသွမ်းမှုကိုမြင်ရပြီ ဖြစ်ကြောင်းနှင့် ပြည်သူအများ လတ်တလော အချိန်အတွင်း ဘေးလွတ်ရာ စစ်ရေး သတိပြု နေကြပါရန် အရေးပေါ် အသိပေးနှိုးဆော်အပ်ပါသည်” အဆိုပါ စစ်ရေးပဋိပက္ခသည် ပြီးခဲ့သည့် ဖေဖော်ဝါရီ ၁၂ ရက်နေ့က နှစ်ဖက်တပ်ဖွဲ့ဝင်များအကြား လက်နက် ပြန်အပ်ရေးကိစ္စ ညှိနှိုင်းရာမှ အငြင်းပွားမှုဖြစ်ပွားကာ NUG လက်အောက်ခံ ယင်းမာပင်ခရိုင် တပ်ရင်း (၄) မှ ရဲဘော်တစ်ဦး သေဆုံးခဲ့သည့် ဖြစ်စဉ်အပြီးတွင် အခြေအနေများ ပိုမိုဆိုးရွားလာခဲ့ခြင်း ဖြစ်သည်။ အဆိုပါဖြစ်စဉ်နှင့် ပတ်သက်၍ BNRA အဖွဲ့က ကျူးလွန်ထားသည်ဆိုသော ရာဇဝတ်မှုများနှင့် စပ်လျဉ်း၍ ဖမ်းဆီးစစ်ဆေးမှုများ ပြုလုပ်နိုင်ရန်အတွက် ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနနှင့် ကာကွယ်ရေး ဝန်ကြီးဌာနတို့ ပူးပေါင်းဆောင်ရွက်လျက်ရှိကြောင်း NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က သတင်းမီဒီယာများသို့ ဖြေကြားထားသည်။ လက်ရှိတွင် တော်လှန်ရေးတပ်ဖွဲ့အချင်းချင်းကြား ပစ်ခတ်မှုများကြောင့် ချင်ပြစ်၊ ကြာစီ၊ ပုပ္ပါ နှင့် မောင်းတုံ ကျေးရွာများမှ ဒေသခံပြည်သူများသည် အိုးအိမ်စွန့်ခွာကာ ဘေးလွတ်ရာသို့ အရေးပေါ် တိမ်းရှောင်နေရသည်။ နှစ်ဖက် ထိခိုက်ကျဆုံးမှု အခြေအနေကို သီးခြားအတည်ပြုနိုင်ခြင်း မရှိသေးသော်လည်း မြေပြင်တွင် စစ်ရေး တင်းမာမှုများ ဆက်လက်ရှိနေဆဲဖြစ်ကာ ဒေသခံများကတော့ တော်လှန်ရေးအင်အားစုများအကြား သွေးကွဲမှု များ အပေါ် စိုးရိမ်ပူပန်လျက် ရှိကြသည်။

ဗိုလ်နဂါးတပ်နှင့် NUG ၏ ကာကွယ်ရေး တပ်ဖွဲ့များ အကြား ပစ်ခတ်မှုများ ပြင်းထန်

ထိုင်းရောက် မြန်မာလုပ်သားများအကြား ခိုက်ရန်ဖြစ်ပွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၄ ရက်။ ထိုင်းနိုင်ငံရှိ မြန်မာရွှေ့ပြောင်းလုပ်သားများအကြား အုပ်စုဖွဲ့ခိုက်ရန်ဖြစ်ပွားမှုများ ဆက်တိုက်ဖြစ်ပေါ်နေခြင်းအပေါ် အမျိုးသားညီညွတ်ရေးအစိုးရ (NUG) က သတိပေးချက် ထုတ်ပြန်ခဲ့သည်။ စမွတ်ပရာကန်ခရိုင်၌ ဖြစ်ပွားခဲ့သော ဖြစ်စဉ်မှာ နှစ်ဖက်ပြေလည်သွားသော်လည်း ဇန်နဝါရီ ၁၃ ရက်နေ့က ချွန်ဘူရီခရိုင်၌ မြန်မာအလုပ်သမားအချင်းချင်း ရန်ဖြစ်မှုကြောင့် လူနှစ်ဦး ပြင်းထန်စွာ ဒဏ်ရာရရှိခဲ့သည်။ ထိုသို့သော ဖြစ်ရပ်များကြောင့် ထိုင်းလူထု၏ ဝေဖန်မှုနှင့် အာဏာပိုင်များ၏ တင်းကျပ်သော စစ်ဆေးမှုများ ပေါ်ပေါက်လာနိုင်သဖြင့် အိမ်ရှင်နိုင်ငံ၏ ဥပဒေနှင့် ယဉ်ကျေးမှုကို လေးစားလိုက်နာရန် NUG နိုင်ငံခြားရေးဝန်ကြီးဌာနက ဇန်နဝါရီ ၁၄ ရက်တွင် တိုက်တွန်းခဲ့သည်။ အလုပ်သမားအရေး ဆောင်ရွက်သူများကလည်း ပြဿနာများကို လက်တုံ့ပြန်ခြင်းထက် ဥပဒေကြောင်းအရသာ ဖြေရှင်းရန် အကြံပြုထားကြသည်။

ထိုင်းရောက် မြန်မာလုပ်သားများအကြား ခိုက်ရန်ဖြစ်ပွား

NUG က စစ်ခေါင်းဆောင် ၃၃ ဦးကို အကြမ်းဖက်သမားအဖြစ် ကြေညာ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ အမျိုးသားညီညွတ်ရေး အစိုးရ (NUG) သည် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် အပါအဝင် စစ်ကော်မရှင် အဖွဲ့ဝင် ၃၃ ဦးကို အကြမ်းဖက်သမားများအဖြစ် ဒီဇင်ဘာလ ၂၁ ရက်နေ့တွင် တရားဝင် ကြေညာ လိုက်သည်။ ယခုထုတ်ပြန်ချက်သည် ယခင်ကကဲ့သို့ ဥပဒေကြောင်းအရ အရေးယူမည်ဆိုသည့် အသုံးအနှုန်းထက် “လက်ရ ဖမ်းဆီးရမိရေး” ကို အဓိကဦးတည်လာခြင်းကြောင့် ထူးခြားနေသည်။ အမည်ပျက် စာရင်းတွင် စစ်ဗိုလ်ချုပ်ကြီးများ သာမကဘဲ စစ်တပ်နှင့် ပူးပေါင်းဆောင်ရွက်နေသည့် အရပ်သား နိုင်ငံရေးသမားများ ဖြစ်သော ဦးသိန်းညွန့်၊ ဦးခင်မောင်ဆွေနှင့် ဖဒိုမန်းငြိမ်းမောင်တို့ကဲ့သို့ ပုဂ္ဂိုလ်များလည်း ပါဝင်နေသည်။ NUG အနေဖြင့် အာဏာသိမ်းချိန်မှ ၂၀၂၅ ခုနှစ်အထိ စစ်ကော်မရှင်တွင် ပါဝင်ခဲ့သူများကို အကြမ်းဖက် တိုက် ဖျက်ရေး ဥပဒေဖြင့် အရေးယူရန် ဆုံးဖြတ်ခဲ့ခြင်း ဖြစ်သည်။ ယခုကဲ့သို့ ဖမ်းဆီးရမိရေး ကြိုးပမ်းမည့်အပေါ် မြေပြင်ရှိ ရခိုင်လူငယ်တစ်ဦးက ၎င်း၏အမြင်ကို ယခုကဲ့သို့ ပြောသည်။ “အရင်ကတော့ တရားစွဲမယ်ဆိုတာမျိုးပဲ ကြားရတာ။ အခုက လက်ရဖမ်းဖို့အထိ ပါလာတော့ တော်လှန်ရေးက တကယ်ကို အရှိန်တက်လာပြီလို့ ခံစားရတယ်။ တဖက်မှာလည်း ဒါက ဖြစ်နိုင်ချေရှိရဲ့လား ဆိုတာမျိုးလည်း စဉ်းစားမိတယ်။ ဘာပဲပြောပြော စစ်ဗိုလ်ချုပ်တွေတင်မကဘဲ သူတို့ရဲ့ ထောက်တိုင် ဖြစ်တဲ့သူတွေကိုပါ ထည့် လိုက်တာက ပိုထိရောက်ပါတယ်။ ကျနော်တို့ ရခိုင်ကဆိုလည်း ဒေါ်အေးနုစိန်တို့၊ ဒေါက်တာဘရွှေတို့ပါ ပါတယ်။ ဆိုတော့ သူတို့တွေကလည်း စစ်တပ်ရဲ့ အကြမ်းဖက်မှုတွေမှာ တာဝန်ရှိနေကြသူတွေပဲလေ။” NUG ဘက်က အဆိုပါ ၃၃ ဦးအား ဖမ်းဆီးနိုင်ရန် အတွက် တော်လှန်ရေး အင်အားစုများနှင့် ပြည်သူများ ပူးပေါင်းကြရန် တိုက်တွန်းထားချိန်တွင်၊ မြေပြင်၌လည်း စစ်တပ်က ပြုလုပ်မည့် ရွေးကောက်ပွဲဆိုင်ရာ နေရာများတွင် ပေါက်ကွဲမှုများ ဆက်တိုက် ဖြစ်ပွားနေသည်။ “အခုက မြို့ပေါ်တွေမှာလည်း မအေးချမ်းတော့ဘူး။ ရွေးကောက်ပွဲလုပ်မယ့် နေရာတွေနားမှာ ပေါက်ကွဲ တာတွေ ခဏခဏဖြစ်နေတော့ ဘယ်သူမှလည်း မဲသွားထည့်ရဲမှာ မဟုတ်ဘူး။ စစ်တပ်က အတင်းလုပ်နေပေမဲ့ မြေပြင်မှာတော့ သူတို့ရဲ့ အုပ်ချုပ်ရေးက လုံးဝပျက်ပြားနေပြီဆိုတာ သိသာနေတယ်” ဟု ရန်ကုန်မှ လူငယ် တစ်ဦးက ပြောသည်။ NUG အစိုးရအနေဖြင့် သတ်မှတ်ထားသည့် အကြမ်းဖက်သမား ၃၃ ဦးကို အမြန်ဆုံး ဖမ်းဆီးရမိနိုင်ရန် နည်း လမ်းပေါင်းစုံဖြင့် ကြိုးပမ်းသွားမည်ဖြစ်ပြီး၊ ဤလုပ်ငန်းစဉ်တွင် တော်လှန်ရေး အင်အားစုများအပြင် ပြည်သူ တစ်ရပ်လုံးကလည်း တက်ကြွစွာ ပူးပေါင်း ပါဝင်ကြရန်လည်း ပန်ကြားထားသည်။

NUG က စစ်ခေါင်းဆောင် ၃၃ ဦးကို အကြမ်းဖက်သမားအဖြစ် ကြေညာ

ပြင်သစ်အောက်လွှတ်တော်က မြန်မာ စစ်အုပ်စုကို အရေးယူရန် အစိုးရကို တိုက်တွန်းတဲ့ ဆုံးဖြတ်ချက် ချမှတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၉ ရက်။ ၂၀၂၅ ခုနှစ်၊ ဒီဇင်ဘာလ ၁၆ ရက် (အင်္ဂါနေ့) တွင် ပြင်သစ်အောက်လွှတ်တော် (National Assembly) သည် မြန်မာစစ်ခေါင်းဆောင်များကို အရေးယူနိုင်ရေးနှင့် ပတ်သက်၍ အရေးပါသော ဆုံးဖြတ်ချက်တစ်ရပ်ကို တညီတညွတ်တည်း အတည်ပြုခဲ့သည်။ ကုလသမဂ္ဂလုံခြုံရေးကောင်စီ၏ အမြဲတမ်းအဖွဲ့ဝင်ဖြစ်သော ပြင်သစ်နိုင်ငံ၏ ဤဆုံးဖြတ်ချက်သည် မြန်မာနိုင်ငံရှိ လူ့အခွင့်အရေးချိုးဖောက်မှုများကို ရှုတ်ချရုံသာမက အစိုးရ လုပ်ဆောင်ရန် တိုက်တွန်းချက်များကိုပါ ထည့်သွင်း သဘောတူခဲ့သည်။ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရား (IIMM) သို့ နည်းပညာနှင့် သတင်းအချက်အလက်ပိုင်းဆိုင်ရာ ကူညီပံ့ပိုးပေးရန် နှင့် စုဆောင်းရရှိထားသော အထောက်အထားများဖြင့် ကျူးလွန်သူများကို နိုင်ငံတကာခုံရုံးများ၌ အရေးယူနိုင်ရန် ရှေ့တန်းမှ ဦးဆောင်ပါဝင်ပေးရန်အစိုးရကို တိုက်တွန်းထားသည်။ ထိုမျှသာမက အမျိုးသားညီညွတ်ရေးအစိုးရ (NUG) ကို မြန်မာပြည်သူများ၏ တရားဝင်ကိုယ်စားလှယ်အဖြစ် အသိအမှတ်ပြုရန်၊ လောင်စာဆီနှင့် လက်နက်ဝယ်ယူမှုများကို ပိုမိုတင်းကျပ်စွာ ပိတ်ဆို့ရန်နှင့် နယ်စပ်ဖြတ်ကျော် လူသားချင်းစာနာမှုအကူအညီများ ပြည်သူများထံ တိုက်ရိုက်ရောက်ရှိစေရန်အတွက် အကူအညီပေး အကောင်အထည်ဖော်ရန် ပြင်သစ် အစိုးရ ကို တိုက်တွန်းထားသည်။

ပြင်သစ်အောက်လွှတ်တော်က မြန်မာ စစ်အုပ်စုကို အရေးယူရန် အစိုးရကို တိုက်တွန်းတဲ့ ဆုံးဖြတ်ချက် ချမှတ်

ဗုဒ္ဓဟူးနေ့ည ရုပ်သံသတင်း (၇-၁၀-၂၆)

ဗုဒ္ဓဟူးနေ့ညပိုင်း ရုပ်သံသတင်း(၇-၁၀-၂၆)

ဒီကနေ့ အစီအစဉ်ထဲမှာတော့-

– ကျိုက်ထိုမြို့နယ်မှာ တိုက်ပွဲမဖြစ်ပဲ စစ်အုပ်စုက အရပ်သားရွာတွေကို ဗုံးကြဲလို့ ထောင်နဲ့ချီထွက်ပြေးနေရ

– ရခိုင်-ဧရာဝတီ အစပ်မှာ တိုက်ပွဲ ပြင်းထန်ပြီး စစ်အုပ်စုက အစုအပြုံလိုက် ကျဆုံးနေ

– ကချင်ပြည်က ရွှေကူ-ငအိုး လမ်းပိုင်း သုံးသူတွေကို အရေးယူသွားမယ်လို့ KIAသတိပေး

– အလုပ်သမားတွေ ဆီက အခွန်နဲ့ လွှဲငွေ ရရှိဖို့ ပိုမို တင်းကြပ်သွားမယ်လို့ စစ်အုပ်စုပြော

– စစ်အုပ်စု ခေါင်းဆောင် ၇-၈ ရက်နေ့တွေမှာ မလေးရှားကို သွားမည်

– လာအို ဒုတိယမြို့တော်လေဆိပ် ကိုယ်ပိုင်လေယာဉ်ပေါ်တင်တဲ့ မူးယစ်ဆေးဝါး ကီလို ၅၀၀ ကျော်ဖမ်းမိ

– မက်ဒေါ်နယ်(McDonald’s)ကုမ္ပဏီဟာ AI သုံးစွဲပြီး လွတ်လပ်စွာ ယှဉ်ပြိုင်ခွင့်ကို ချိုးဖောက်တယ်ဆိုပြီး တရားစွဲခံရ

– ပထမဆုံး FIFA အာဆီယံ ဖလားကို အင်ဒိုနီးရှား အသင်း ပင်နယ်တီ အဆုံးအဖြတ်နဲ့ ဆွတ်ခူး…..စတာတွေ တင်ဆက်ထားပါတယ်။

×Close

News

တောမီးငြှိမ်းသတ်ရေးအတွက် နိုင်ငံတကာအကူအညီ လက်ခံရန် အင်ဒိုနီးရှား သမ္မတ သဘောတူ — October 16, 2026 6:36 pm
ပါကစ္စတန်တွင် ကျောင်းခေါင်မိုးပြိုကျ၍ အနည်းဆုံး ကလေးငယ် နှင့် ဆရာ/မ ၃၄ ဦး သေဆုံး — October 16, 2026 6:26 pm
တရုတ်နှင့် မြောက်ကိုရီးယား နယ်စပ်ဖြတ်ကျော်မြစ်ကူးတံတားသစ် ဖွင့်လှစ် — October 16, 2026 6:17 pm

Recent Posts

တောမီးငြှိမ်းသတ်ရေးအတွက် နိုင်ငံတကာအကူအညီ လက်ခံရန် အင်ဒိုနီးရှား သမ္မတ သဘောတူ
ပါကစ္စတန်တွင် ကျောင်းခေါင်မိုးပြိုကျ၍ အနည်းဆုံး ကလေးငယ် နှင့် ဆရာ/မ ၃၄ ဦး သေဆုံး
တရုတ်နှင့် မြောက်ကိုရီးယား နယ်စပ်ဖြတ်ကျော်မြစ်ကူးတံတားသစ် ဖွင့်လှစ်
အမေရိကန်နှင့် မြန်မာစစ်အုပ်စုတို့ ဒုတိယအကြိမ်အဖြစ် ဂျပန်တွင် တိုက်ရိုက် တွေ့ဆုံ
စစ်ကိုင်း အထက်ပိုင်း ဝန်းသိုတွင် တိုက်ပွဲပြင်းထန်ပြီး ရဲဘော် ၃ ဦးကျဆုံး၊ ဒေသခံ သောင်းနှင့်ချီ တိမ်းရှောင်ရ

Archives

Archives

×Close