NUG – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: NUG

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၇ ရက်။ တနင်္သာရီတိုင်းအတွင်း လှုပ်ရှားနေသည့် အမျိုးသားညီညွတ်ရေး အစိုးရ (NUG) ၏ အထူးတိုင်းစစ်ဌာန ဗျူဟာမှူး တစ်ဦး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို ကရင်အမျိုးသားအစည်းအရုံး (KNU) တပ်မဟာ ၄ လက်အောက်ခံ တပ်များက ဖမ်းဆီးထိန်းသိမ်းထားသည်ဟု ထားဝယ်ခရိုင်အမှတ် ၂ တပ်ရင်းက ပြောသည်။ ယနေ့ (ဒီဇင်ဘာ ၁၇ ရက်) နံနက်ပိုင်းတွင် ဖမ်းဆီးထိန်းသိမ်းလိုက်ကြောင်း ထားဝယ်ခရိုင်အမှတ် ၂ တပ်ရင်းက တာဝန်ရှိသူ တစ်ဦးက ပြောသည်။ ဖြစ်စဉ်နှင့်ပတ်သက်၍ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ဘာကြောင့်ဆိုတာလည်း အသေအချာ မသိရသေးဘူး။ အခုက ဆက်ပြီးဖမ်းထားတုန်းပဲ။ တပ်မဟာ ၄ တပ်ရင်း ၁၂ ဌာနချုပ်ကို ခေါ်သွားတယ်လို့တော့ သိရတယ်။ ဗျူဟာမှူးရယ်၊ တပ်ရင်းမှူးရယ်၊ ရဲဘော်အချို့ရယ်က နယ်စပ်ကအပြန် သူတို့တပ်ကို ဖြတ်ရတာမှာ အဲဒီမှာ ထိန်းလိုက်တာ။ ပြီးမှ ဒီမနက်မှာ တပ်ခွဲက ရဲဘော်တွေနဲ့ ထောက်ပို့တွေကိုပါ ဆက်တိုက်ဖမ်းတာ အားလုံး ၄၀ ကျော်၊ ၅၀ နီးပါး ရှိနေပြီ” ဟု ပြောသည်။ ဖမ်းဆီးခံရသူများထဲတွင် အထူးတိုင်းစစ်ဌာန နည်းဗျူဟာ ၃၃ ဗျူဟာမှူး စောဒါးကို၊ တနင်္သာရီတိုင်းစစ်ဌာန ဒရုန်းတပ်ရင်း ဒုတပ်ရင်းမှူး ဒိုရာ နှင့် ထားဝယ်ခရိုင်အမှတ် ၂ တပ်ရင်း (T5) တပ်ရင်းမှူး မင်းသားကြီးတို့ကဲ့သို့ အဆင့်မြင့်အရာရှိများ ပါဝင်နေသည်။ ၎င်းတို့အား KNU တပ်မဟာ ၄၊ တပ်ရင်း ၁၂ လက်အောက်ခံ ကစယ်ဒိုကျားတပ်ဖွဲ့နှင့် ပုတီးတစ်လုံးတပ်ဖွဲ့တို့က ဖမ်းဆီးကာ လက်နက်ခဲယမ်းများကိုပါ သိမ်းဆည်းထားခြင်းဖြစ်သည်။ ဒေသခံများ၏ ပြောဆိုချက်အရ ပြီးခဲ့သည့် ဒီဇင်ဘာလ ၁၆ ရက်နေ့က ထားဝယ်ခရိုင်အမှတ် ၂ တပ်ရင်း တပ်ဖွဲ့ဝင်များနှင့် KNU တပ်ရင်း ၁၂ အောက်ရှိ တပ်ဖွဲ့ဝင်များအကြား ပြဿနာတစ်စုံတစ်ရာ ဖြစ်ပွားခဲ့သည်။ အဆိုပါ ဖြစ်စဉ်များနှင့် ပတ်သက်၍ KNU တာဝန်ရှိသူများကို ဆက်သွယ်နေဆဲ ဖြစ်သည်။ ထိုဖြစ်စဉ် နောက်ပိုင်းတွင် ယခုကဲ့သို့ ဖမ်းဆီးမှုများ ဆက်တိုက်ဖြစ်ပွားလာခြင်းဖြစ်ပြီး လက်ရှိတွင် KNU က သရက်ချောင်းမြို့နယ် ဂုံညှင်းဆိပ်လှေဆိပ် အပါအဝင် လှေဆိပ်အချို့ကိုလည်း ပိတ်ထားကြောင်း ဒေသခံများ၏ ပြောပြချက်အရ သိရသည်။ KNU တပ်မဟာ ၄ အတွင်းရေးမှူး ပဒိုအယ်နားကမူ အခြေအနေအသေးစိတ် မသိရသေးကြောင်း Dawei Watch သတင်းဌာနကို ဖြေကြားထားသည်။ NUG လက်အောက်ခံ တပ်ဖွဲ့ဝင်များအနေဖြင့် ဤဖြစ်စဉ်အပေါ် အမြန်ဆုံး တွေ့ဆုံဖြေရှင်းနိုင်ရန် ကြိုးပမ်းနေ သည်ဟု ဆိုသည်။ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ကျနော်တို့ကတော့ ဘုံရန်သူကိုတိုက်ဖို့အတွက် တော်လှန်သူ တွေနဲ့ လက်တွဲပြီးသွားနေပါတယ်။ မြေပြင်ပွတ်တိုက်မှုလေးတွေကို တွေ့ဆုံညှိနှိုင်းဆွေးနွေးတာတော့ အကောင်းဆုံးပေါ့။ အခုလိုကတော့ ဘယ်လိုမှအဆင်မပြေပါဘူး။ ကျနော်တို့ ဝန်ကြီးဌာနနဲ့ တိုင်းစစ်ဌာနတွေကို တင်ပြထားပြီးပါပြီ။ သူတို့ဘက်ကလည်း တွေ့ဆုံမှုတွေအတွက် လုပ်ဆောင်နေတယ်လို့ သိရတယ်” ဟု ပြော သည်။ လက်ရှိတွင် နှစ်ဖက်တာဝန်ရှိသူများ အကြား တင်းမာမှုများ လျော့ကျစေရန်နှင့် ဖမ်းဆီးခံထားရသူများ ပြန်လည် လွတ်မြောက်ရေးအတွက် အဆင့်မြင့်တာဝန်ရှိသူများအကြား ညှိနှိုင်းမှုများ ဆက်လက်လုပ်ဆောင်နေသည်ဟု ဆိုသည်။   ဓါတ်ပုံ - ဖမ်းဆီးခံထားရသည့် အမှတ် ၃၃ ဗျူဟာမှူး ကိုဘိ (ခ) စောဒါးကို နှင့် ထားဝယ်ခရိုင် အမှတ် ၂ တပ်ရင်းမှူး မင်းသားကြီးတို့၏ ပုံ (Crd)

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၅ ရက်။ တရုတ်၏ ကြီးကြပ်မှုဖြင့် တအာင်းအမျိုးသား လွတ်မြောက်ရေး တပ်မတော် (TNLA) မှ စစ်ကော်မရှင် တပ်ကို မိုးကုတ်-မိုးမိတ်ဒေသ နယ်မြေပြန်လွှဲပေးသည့် အစီအစဉ်ကို အမျိုးသားညီညွတ်ရေး အစိုးရ (NUG) က လက်မခံကြောင်း တရားဝင် ပြောဆိုလိုက် သည်။ NUG သည် အဆိုပါဒေသသို့ ပြန်လည် ဝင်ရောက်လာသော စစ်ကော်မရှင်တပ်များကို ပြည်သူလူထုနှင့် လက်တွဲ ၍ ဆက်လက်တိုက်ပွဲဝင်သွားမည်ဟု ပြောဆိုခဲ့ပြီး၊ လက်ရှိ တိုက်ပွဲများကြောင့် အရပ်သား သေဆုံးမှုများရှိနေ ကြောင်း ဒေသခံများက ဆိုသည်။ NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ဒီဇင်ဘာလ ၁၁ ရက်နေ့တွင် ထုတ် ပြန် ပြောဆိုခဲ့ခြင်းဖြစ်ပြီး၊ ထိုဒေသကို ပြန်လည်ထိန်းချုပ်နိုင်ရေး 'စစ်ဆင်ရေး စစ်ဦးစီးအဖွဲ့' ကို နိုဝင်ဘာလ ၉ ရက်နေ့ကပင် ဖွဲ့စည်းကာ စစ်ရေးလှုပ်ရှားမှုများ လုပ်ဆောင်ခဲ့ကြောင်း ပြောသည်။ တအာင်းတပ် TNLA နှင့် စစ်ကော်မရှင်တပ်တို့အကြား နိုဝင်ဘာလကုန်ပိုင်းက ပြုလုပ်ခဲ့သော နယ်မြေ ပြန်လွှဲ ပေးရေး သဘောတူညီချက်ကို NUG အနေဖြင့် လုံးဝလက်မခံနိုင်ကြောင်း ဦးနေဘုန်းလတ်က ပြောသည်။ “မိုးကုတ် - မိုးမိတ် ဒေသသို့ ကျူးကျော်ဝင်ရောက်လာသော အကြမ်းဖက် စစ်အုပ်စုတပ်တွေကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ပွဲဝင်လျက် ရှိနေပြီး နယ်မြေစိုးမိုးထိန်းချုပ်နိုင်မှု ပြန်လည်ရရှိနိုင်ရေး အတွက် ဆက်လက် တိုက်ပွဲဝင်နေပါတယ်။ မိုးကုတ်–မိုးမိတ်ဒေသသို့ ကျူးကျော်ဝင်လာတဲ့ စစ်အုပ်စုတပ်တွေ ကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ခိုက်မယ့်အပြင် နယ်မြေစိုးမိုးမှု ပြန်လည်ရရှိရေး အတွက် စစ်ရေးအရှိန်မြှင့်သွားမယ်။” မိုးကုတ် - မိုးမိတ်ဒေသသည် နိုင်ငံရေးနှင့် စစ်ရေးအရ အထိမခံသော အခြေအနေဖြစ်သောကြောင့် တရားဝင် ထုတ်ပြန်ချက်များကို အဆောတလျင် မထုတ်ပြန်နိုင်ခဲ့သော်လည်း စစ်ဆင်ရေးများကို စနစ်တကျ ကွပ်ကဲ ဆောင်ရွက်ခဲ့ကြောင်း ဦးနေဘုန်းလတ်က ရှင်းပြသည်။ နိုဝင်ဘာလ ၃၀ ရက်နေ့မှ ဒီဇင်ဘာလ ၆ ရက်နေ့အတွင်း တိုက်ပွဲကြီး ၉ ပွဲအထိ ဖြစ်ခဲ့ပြီး စစ်ကော်မရှင်၏ အရေးပါသည့် စခန်းကုန်းတစ်ခုကို သိမ်းပိုက်နိုင်ခဲ့သည်ဟုလည်း NUG က အတည်ပြုထားသည်။ စစ်ကော်မရှင်တပ်များ မိုးကုတ်နှင့် မိုးမိတ်မြို့များသို့ ပြန်လည် ဝင်ရောက်လာပြီးနောက် နိုဝင်ဘာလ ၃၀ ရက်နေ့မှ စတင်၍ တိုက်ပွဲများ ဆက်တိုက်ဖြစ်ပွားခဲ့ကာ စစ်ကော်မရှင်တပ်က လေကြောင်း တိုက်ခိုက်မှုများကိုပါ လုပ်ခဲ့သည်။ မိုးမိတ်မြို့အနီး ဗုံးကြဲတိုက်ခိုက်မှုကြောင့် ကိုယ်ဝန်ဆောင် အမျိုးသမီးတစ်ဦး အပါအဝင် အရပ်သား ၁၁ ဦး သေဆုံးခဲ့သည် ဟု ဒေသခံများက ပြောသည်။ စစ်ရေးတင်းမာမှုများကြောင့် အရပ်သားပြည်သူများမှာ လုံခြုံရေးအရ ပိုမိုစိုးရိမ်ပူပန်နေရကြောင်း ဒေသခံ တစ်ဦးက ၎င်းတို့၏ အခြေအနေကို ယခုကဲ့သို့ ပြောသည်။ “အခုရက်ပိုင်းမှာ တိုက်ပွဲတွေ ပြန်ဖြစ်လာတော့ အရပ်သားတွေက ကြားထဲက ပိတ်မိပြီး ခံနေရတာပါ။ မိုးမိတ် ဘက် ဗုံးကြဲတိုက်ခိုက်တော့ ကလေးတွေ၊ ကိုယ်ဝန်ဆောင် အမျိုးသမီးတွေပါ သေဆုံးခဲ့ရတယ်။ ဒီလို နယ်မြေ ပြန်လွှဲတာတွေကြောင့် ပြည်သူတွေရဲ့ လုံခြုံရေး ပိုဆိုးလာတာကိုပဲ မြင်ရတယ်။” အဆိုပါဒေသတွင်း စစ်ရေးလှုပ်ရှားမှုများနှင့် ပတ်သက်၍ ကချင်လွတ်လပ်ရေးအဖွဲ့ (KIO/KIA) ၏ ပြောရေး ဆိုခွင့်ရှိသူ ဗိုလ်မှူးကြီးနော်ဘူကလည်း KIA ၏ မဟာမိတ်တပ်ဖွဲ့များ အပေါ် ကူညီထောက်ပံ့မည့် အခြေအနေကို ယခုကဲ့သို့ ပြောသည်။ “တိုက်ပွဲ ဖြစ်လို့ ရှိရင်တော့ အမြဲတမ်းကူညီကြတဲ့ သဘောမျိုးနဲ့ ကူညီတဲ့ အနေအထားလောက်တော့ ရှိမှာပါ။ ဒါပေမယ့် လက်တွေ့ အခြေအနေကတော့ ဘယ်လောက်အထိ ဘယ်လိုအခြေအနေ ရှိတယ်ဆိုတာကတော့ အခုကတော့ ကျနော်က ပြောလို့တော့ အဆင်မပြေဘူးခင်ဗျာ။” မိုးမိတ်မြို့နယ်တွင် KIA တပ်ရင်းများ၊ ABSDF နှင့် PDF များ ပူးပေါင်း၍ အခြေချထားကြောင်း၊ TNLA ဆုတ်ခွာ သည့် မိုးမိတ်မြို့နှင့်ပတ်သက်၍ KIA အနေဖြင့် စစ်ရေးအရ လုပ်ဆောင်ရန် မရှိသော်လည်း မဟာမိတ်တပ်ဖွဲ့များ စစ်ရေးလှုပ်ရှားလာပါက ကူညီသွားမည်ဟု ဗိုလ်မှူးကြီးနော်ဘူက နိုဝင်ဘာလတွင် သတင်းနှင့်မီဒီယာ ကွန်ရက် သတင်းဌာနကို ထုတ်ဖော်ပြောဆိုခဲ့ဖူးသည်။

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား

ဆေးရုံနှင့် အချုပ်ဆောင် ဗုံးကြဲ၊ စေတနာ့ ဝန်ထမ်း ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၁ ရက်။ စစ်ကိုင်းတိုင်းဒေသကြီး၊ ဗန်းမောက်၌ NUG ဆေးရုံနှင့် အချုပ်ဆောင် လေကြောင်းမှ ဗုံးကြဲတိုက်ခိုက်ခံရပြီး စေတနာ့ကျန်းမာရေးဝန်ထမ်း ၂ ဦး သေဆုံးခဲ့သည်။ ဗန်းမောက်မြို့နယ် တောတွင်းတစ်နေရာတွင် အမျိုးသား ညီညွတ်ရေး အစိုးရ (NUG) က ဖွင့်လှစ်ထားသော ဆေးရုံကို စစ်ကော်မရှင်တပ်က နိုဝင်ဘာလ ၁၈ ရက်နေ့၌ လေကြောင်းမှ ဗုံးကြဲတိုက်ခိုက်ခဲ့သဖြင့် သက်တမ်းရင့် စေတနာ့ ကျန်းမာရေးဝန်ထမ်း ၂ ဦး အသက်ဆုံးရှုံးခဲ့ရကြောင်း ဒေသခံသတင်းရင်းမြစ်များက ပြောသည်။ စစ်ကော်မရှင်တပ်၏ တိုက်ခိုက်မှုသည် ဆေးရုံအပြင် ၎င်းနှင့်နီးစပ်သည့် အချုပ်ဆောင်ကိုပါ ပစ်မှတ်ထားခဲ့ပြီး ထိခိုက်ဒဏ်ရာရသူများလည်း များပြားခဲ့သည်ဟု ဆိုသည်။ ဖြစ်စဉ်သည် နိုဝင်ဘာလ ၁၈ ရက်နေ့ ညနေ ၄ နာရီဝန်းကျင်ခန့်က ဖြစ်ပွားခဲ့ခြင်းဖြစ်ပြီး၊ တံတားဦးလေတပ်မှ တက်လာသည့် ဂျက်ဖိုက်တာလေယာဉ်က ဗန်းမောက်မြို့နယ်ရှိ တော်လှန်ရေးအင်အားစုများ ထိန်းချုပ်ရာ နယ်မြေအတွင်း တည်ရှိသော NUG ဆေးရုံနှင့် အချုပ်ဆောင်ကို တိုက်ခိုက်ခဲ့ခြင်းဖြစ်သည်။ တော်လှန်ရေးတပ်ဖွဲ့ဝင်များနှင့် နီးစပ်သည့် ဒေသခံအမျိုးသားတစ်ဦးက “နောက်တန်းဆေးရုံလို့ ပြောရမှာပေါ့။ ကျန်းမာရေးဝန်ထမ်း မိန်းကလေးနဲ့ ကောင်လေး ကျသွားတယ်။ အခုက မြေပြင်မှာက တိုက်ပွဲ နေ့တိုင်းလိုလို ရှိတယ်။ ဒလန်ကြောင့်ပဲ ဖြစ်နိုင်တယ်။ အဲ့နယ်တွေကလည်း သဘောထားမတူတဲ့သူတွေက ပိုများတယ်လေ” ဟု ပြောသည်။ လေကြောင်း တိုက်ခိုက်မှုကြောင့် ဆေးရုံတွင် တာဝန်ထမ်းဆောင်နေသည့် စေတနာ့ဝန်ထမ်း ကျန်းမာရေး ဝန်ထမ်း အမျိုးသားတစ်ဦးနှင့် အမျိုးသမီးတစ်ဦး စုစုပေါင်း ၂ ဦး သေဆုံးခဲ့ရသည်။ ထို့အပြင် အချုပ်ဆောင် တိုက်ခိုက်ခံရမှုတွင် ထိခိုက်ဒဏ်ရာရရှိသူများလည်း များပြားခဲ့သည်။ NUG အစိုးရ၏ ထုတ်ပြန်ချက်အရ စစ်ကော်မရှင်တပ်သည် စစ်ကိုင်းငလျင် လှုပ်ခတ်ပြီးနောက်ပိုင်းတွင် ၎င်းတို့ ထိန်းချုပ်ထားနိုင်ခြင်း မရှိသော တော်လှန်ရေး အင်အားစုများ အားကောင်းသည့် ဒေသများမှ ဆေးရုံ၊ ဆေးခန်း များကို ရည်ရွယ်ချက်ရှိရှိ ပစ်မှတ်ထား တိုက်ခိုက်မှုများ လုပ်လာသည်ဟု ဆိုသည်။ အင်အားပြင်းငလျင် လှုပ်ခတ်ခဲ့သည့် ဧပြီလမှ ပြီးခဲ့သည့် ဇူလိုင်လအထိ စစ်ကောင်စီတပ်သည် နိုင်ငံတစ်ဝှမ်းရှိ ဆေးရုံဆေးခန်းများကို လေကြောင်းတိုက်ခိုက်မှု အကြိမ် ၃၀ တိတိ ပြုလုပ်ခဲ့ကြောင်း NUG က ထုတ်ပြန်ထား သည်။ ယခု ဗန်းမောက်မြို့နယ် တိုက်ခိုက်မှုမတိုင်မီ နိုဝင်ဘာလ ၁၁ ရက်နေ့ကလည်း စစ်ကိုင်းတိုင်း၊ ကနီမြို့နယ်ရှိ ဝင်းမနားတိုက်နယ်ဆေးရုံ ကို စက်တပ်လေထီးဖြင့် ဗုံးကြဲတိုက်ခိုက်ခဲ့သဖြင့် ဆေးကုသမှုခံယူနေသူ ၇ ဦးနှင့် ကျန်းမာရေးဝန်ထမ်း ၁ ဦး သေဆုံးခဲ့သေးသည်။ NUG က စစ်ရေးပဋိပက္ခတွင် အရပ်သားပြည်သူများနှင့် ကျန်းမာရေး စောင့်ရှောက်မှုပေးနေသည့် အဆောက် အအုံများကို ပစ်မှတ်ထား တိုက်ခိုက်ခြင်းသည် နိုင်ငံတကာ ဥပဒေများကို ချိုးဖောက်ခြင်းဖြစ်ကြောင်း အမြဲတစေ ပြစ်တင် ပြောဆိုလျက်ရှိသည်။

ဆေးရုံနှင့် အချုပ်ဆောင် ဗုံးကြဲ၊ စေတနာ့ ဝန်ထမ်း ၂ ဦး သေဆုံး

စစ်ကော်မရှင် ရွေးကောက်ပွဲ NUG လက်မခံ သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ အောက်တိုဘာလ ၂၉ ရက်။ အမျိုးသား ညီညွတ်ရေး အစိုးရ (NUG) သည် စစ်ကော်မရှင်က ဦးဆောင်ကျင်းပမည့် မည်သည့် အတုအယောင် ရွေးကောက်ပွဲကိုမဆို လက်မခံကြောင်း အောက်တိုဘာ ၂၈ ရက်က ထုတ်ဖော် ပြောကြားလိုက်သည်။ NUG သည် နိုင်ငံရေးအရ တရားဝင်မှုရှိသော ၂၀၂၀ ရွေးကောက်ပွဲရလဒ်ကို ဆက်လက်ကိုင်စွဲ ထားပြီး၊ တော်လှန် ရေး အင်အားစုများနှင့် လက်တွဲကာ ဖက်ဒရယ်ဒီမိုကရေစီ ဖွဲ့စည်းပုံ အခြေခံ ဥပဒေပေါ် အခြေခံသည့် ကိုယ်ပိုင် နိုင်ငံရေး လမ်းစဉ်အတိုင်း ဆက်လက်ရပ်တည် ဆောင်ရွက်သွားမည် ဟု ပြောဆိုလိုက်သည်။ NUG ၏ ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က “အမျိုးသား ညီညွတ်ရေး အစိုးရ အနေနဲ့ မိတ်ဖက်တိုင်းရင်းသားအဖွဲ့တွေအပါအဝင် တော်လှန်ရေးအင်အားစုတွေအားလုံးနဲ့ လက်တွဲကာ နိုင်ငံ ရေး အရ တရားဝင်ဆဲဖြစ်တဲ့ ၂၀၂၀ ရွေးကောက်ပွဲ ရလဒ်ကို ဆက်လက်ကိုင်စွဲလျက် ဖက်ဒရယ် ဒီမိုကရေစီ ပဋိညာဉ်အခန်း (၃) နှင့် နိုင်ငံရေး လမ်းညွှန် မြေပုံအဆင့် (၁၁) အတိုင်း ဆက်လက် ဆောင်ရွက်သွားမည် ဖြစ် ကြောင်း ပြောကြားလိုပါသည်” ဟု ပြောသည်။ ဦးနေဘုန်းလတ်က ၎င်း၏ နိုင်ငံတကာနှင့် ပြည်သူလူထုများအား သတင်းစကားပြောကြားခြင်း အစီအစဉ်တွင် NUG ၏ တရားဝင် ရပ်တည်ချက်ကို ထပ်လောင်း အတည်ပြုခဲ့ခြင်း ဖြစ်သည်။ NUG အနေဖြင့် စစ်ကော်မရှင်၏ ရွေးကောက်ပွဲကို လက်မခံဘဲ၊ ၂၀၂၀ ရွေးကောက်ပွဲမှ ဆင်းသက်လာသည့် အဖွဲ့အစည်း တစ်ရပ်အဖြစ် ၎င်းတို့ ချမှတ်ထားသော ဖက်ဒရယ်ဒီမိုကရေစီ နိုင်ငံတော် တည်ဆောက်ရေး လုပ်ငန်းစဉ် အတိုင်းသာ ရှေ့ဆက်သွားမည်ဟု ရှင်းလင်းပြောကြားခဲ့သည်။ NUG သည် အနာဂတ် နိုင်ငံတော် တည်ဆောက်ရေး လုပ်ငန်းစဉ်များကို ဖက်ဒရယ်ဒီမိုကရေစီ ပဋိညာဉ်နှင့် နိုင်ငံရေး လမ်းညွှန်မြေပုံအတိုင်း အဆင့်လိုက် ဆောင်ရွက်သွားမည်ဖြစ်သည်ဟု ဦးနေဘုန်းလတ်က ပြောသည်။ ဤလုပ်ငန်းစဉ်တွင် ဦးစွာ တိုင်းပြုပြည်ပြုညီလာခံ ကျင်းပခြင်း၊ ထို့နောက် ဖက်ဒရယ်ဒီမိုကရေစီ ဖွဲ့စည်းပုံ အခြေ ခံ ဥပဒေ ရေးဆွဲခြင်း၊ ရေးဆွဲပြီးသော ဥပဒေကို လူထုဆန္ဒခံယူပွဲ ကျင်းပကာ အတည်ပြုခြင်းနှင့် နောက်ဆုံး အဆင့်တွင်မှ ရွေးကောက်ပွဲ ကျင်းပခြင်းတို့ ပါဝင်မည် ဟု ၎င်းက ဆက်လက် ရှင်းပြသည်။ “တိုင်းပြုပြည်ပြု ညီလာခံက ရေးဆွဲ အတည်ပြုထားသည့် ဖက်ဒရယ် ဒီမိုကရေစီ ဖွဲ့စည်းပုံ အခြေခံဥပဒေကို လူထုဆန္ဒခံယူပွဲ ကျင်းပပြီး အတည်ပြု ပြဌာန်းခြင်းနဲ့ ရွေးကောက်ပွဲ ကျင်းပခြင်း မူဘောင်အတိုင်း ရပ်တည် ကာ စနစ်ပြောင်း တော်လှန်ရေးကို ဆက်လက် ဆောင်ရွက်သွားမှာ ဖြစ်ပါတယ်” ဟု ပြောသည်။ လက်ရှိတွင် NUG သည် ဖက်ဒရယ် ဒီမိုကရေစီ ပဋိညာဉ်၏ အဆင့် (၈) အရ ဖက်ဒရယ်အသွင် ကူးပြောင်းရေး အခြေခံဥပဒေ (AFTA) ကို တော်လှန်ရေး အဖွဲ့အစည်းများ အကြား စုပေါင်း ရေးဆွဲနေပြီး ဘုံနိုင်ငံရေး သဘောတူညီချက်များ ရရှိရန် တွေ့ဆုံဆွေးနွေးပွဲများ ဆက်လက် ပြုလုပ်နေကြောင်းလည်း သိရသည်။ NUG ၏ ဤရပ်တည်ချက်သည် စစ်တပ်က ကြိုးကိုင်ထားသော ဟန်ပြနိုင်ငံရေး လှည့်စားမှု မဟုတ်ဘဲ၊ ပြည်သူ က တွန်းအားပေးသော အားလုံးပါဝင်နိုင်သည့် ဒီမိုကရေစီနည်းကျ လုပ်ငန်းစဉ်ဖြစ်ကြောင်း NUG ဘက်က အလေးပေး ပြောဆိုထားသည်။ မကြာသေးမီက NUG အပါအဝင် တော်လှန်ရေးအဖွဲ့အစည်း ၂၀ ဖွဲ့ မှ စစ်ကော်မရှင်ကို ဆန့်ကျင်ရေး ဘုံတောင်း ဆိုချက် (၅) ချက်ကို ပူးတွဲ ထုတ်ပြန်ခဲ့သည်။ ထိုဘုံတောင်းဆိုချက်တွင်လည်း စစ်အုပ်စုက စီစဉ်သော မည်သည့် ရွေးကောက်ပွဲကို မဆို ငြင်းပယ်ရန် အချက်များ ပါဝင်ခဲ့သည်။ NUG က အာဆီယံနှင့် နိုင်ငံတကာ အသိုင်းအဝိုင်းအနေဖြင့် နိုင်ငံရေးအရ တရားဝင်မှုရှိသော NUG၊ CRPH နှင့် တိုင်းရင်းသား တော်လှန်ရေးအဖွဲ့အစည်းများ၏ အမြဲတမ်း သက်ဆိုင်မှုရှိသည့် ဤဘုံသဘောတူညီချက် ကို အလေးအနက်ထား စဉ်းစားသင့်ကြောင်း တိုက်တွန်းပြောကြားခဲ့သည်။

စစ်ကော်မရှင် ရွေးကောက်ပွဲ NUG လက်မခံ

ခိုးမှုဖြင့် ဖမ်းဆီးထားသူ သေဆုံးမှုအား သိန်း ၁၅၀ ဖြင့် ကျေအေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ စစ်ကိုင်းတိုင်း၊ အင်းတော်မြို့နယ်တွင် ဆိုင်ကယ်ခိုးမှု သံသယဖြင့် ဖမ်းဆီးခံရသူ သေဆုံးမှုအား ကျပ်သိန်း ၁၅၀ လျော်ကြေးဖြင့် ကျေအေးလိုက်ခြင်းအပေါ် ဝေဖန်မှုများရှိနေသည်။ အင်းတော်မြို့နယ်တွင် ဆိုင်ကယ်ခိုးမှု သံသယဖြင့် ဒေသခံပြည်သူ့ကာကွယ်ရေးအဖွဲ့ (ပကဖ) က ဖမ်းဆီး ခေါ်ဆောင်သွားပြီးနောက် သေဆုံးခဲ့သည့် အမျိုးသားတစ်ဦး၏ အမှုအား ကျန်ရစ်သူမိသားစုကို ကျပ်သိန်း ၁၅၀ လျော်ကြေးပေး၍ ကျေအေးလိုက်ကြောင်း ဒေသခံသတင်းရင်းမြစ်များ၏ ပြောကြားချက်အရ သိရသည်။ ဖြစ်စဉ်မှာ ပြီးခဲ့သည့် အောက်တိုဘာလ (၁၁) ရက်နေ့က အင်းတော်မြို့နယ် ပကဖအဖွဲ့မှ မော်တိတ်ကျေးရွာနေ အသက် ၃၈ နှစ်အရွယ် ကိုဇော်ထွေး အမည်ရှိ အမျိုးသားကို ဆိုင်ကယ်ခိုးမှု သံသယဖြင့် ဖမ်းဆီးခေါ်ဆောင် သွားခဲ့ခြင်း ဖြစ်သည်။ ထို့နောက် ညသန်းခေါင်ယံ (၁) နာရီဝန်းကျင်ခန့်တွင် ကိုဇော်ထွေး သေဆုံးသွားခဲ့ကြောင်း မိသားစုအား အကြောင်းကြားခဲ့ခြင်း ဖြစ်သည်။ ကိုဇော်ထွေး သေဆုံးစဉ်က ခန္ဓာကိုယ်တွင် ပြင်းပြင်းထန်ထန် ရိုက်နှက်ခံရသည့် ဒဏ်ရာများ တွေ့ရှိရကြောင်း ဒေသခံတစ်ဦးက ပြောသည်။ “ဆိုင်ကယ်ပျောက်မှုနဲ့ ပတ်သက်ပြီးတော့ စစ်မေးစရာရှိတယ်ဆိုပြီး ပကဖအဖွဲ့တွေက ဖမ်းခေါ်သွားတယ်။ ည ၁ နာရီကျော် လောက်ကျတော့ မိသားစုကို အကြောင်းကြားလာတယ်တဲ့။ ခေါင်းမှာလည်း ဒဏ်ရာနက်နက်ကြီး တစ်ခုတွေ့တယ်။ တစ်ကိုယ်လုံးလည်း ညိုမည်းနေတယ်။ မျက်နှာတွေလည်း ညိုမည်း။ အဆုတ်ဘက်မှာလည်း ဒဏ်ရာ တွေ တွေ့တယ်” ဟု ဒေသခံတစ်ဦးက ပြောသည်။ ၎င်း၏ ဦးခေါင်းတွင် ဒဏ်ရာနက်နက်ကြီး တစ်ခုအပြင် တစ်ကိုယ်လုံးနှင့် မျက်နှာများမှာ ညိုမဲနေပြီး အဆုတ် ဘက်တွင်လည်း ဒဏ်ရာများ တွေ့ရသည်ဟု အဆိုပါ ဒေသခံက ဖြည့်စွက်ပြောကြားသည်။ သေဆုံးသူ ကိုဇော်ထွေးတွင် ဇနီးဖြစ်သူနှင့် အသက် (၅) နှစ်၊ (၉) နှစ်အရွယ် သားငယ်နှစ်ဦး ကျန်ရစ်ခဲ့သည်။ ကိုဇော်ထွေး သေဆုံးပြီးနောက် ရက်ပိုင်းအကြာတွင် ကသာခရိုင် ပအဖ (ပြည်သူ့အုပ်ချုပ်ရေးအဖွဲ့) တာဝန်ခံလည်းဖြစ်သည့် သေဆုံးသူ၏ ဦးလေးဖြစ်သူက ကြားဝင်ညှိနှိုင်းပေးခဲ့ကြောင်း သိရသည်။ ညှိနှိုင်းမှု၏ ရလဒ်အရ ပကဖအဖွဲ့နှင့် ကျန်ရစ်သူမိသားစုကြားတွင် ငွေကျပ်သိန်း ၁၅၀ ဖြင့် လျော်ကြေးပေးကာ အမှုအား ကျေအေးလိုက်သည်ဟု ဒေသခံသတင်းရင်းမြစ်က အတည်ပြုခဲ့သည်။ “ဒါက ပြဿနာတစ်ခုကို အရေးမယူဘဲ သိုသိုတိတ်တိတ် ငွေပေးပြီးတော့ ကျေအေးခိုင်းလိုက်တဲ့ သဘောမျိုး ပေါ့” ဟု ဒေသခံတစ်ဦးက ဝေဖန်ပြောဆိုသည်။ အဆိုပါဖြစ်စဉ်နှင့် ပတ်သက်၍ ထိရောက်သည့် စုံစမ်းစစ်ဆေး အရေးယူမှုများ လုပ်ဆောင်ပေးရန်နှင့် တော်လှန်ရေးတပ်ဖွဲ့များ အပေါ် စည်းကမ်းပိုင်းဆိုင်ရာ ပိုမိုထိန်းညှိပေးရန် ဒေသခံများက တောင်းဆိုလိုက်သည်။ အင်းတော်မြို့နယ်ကို ပြီးခဲ့သည့် ဧပြီလ (၈) ရက်နေ့တွင် တော်လှန်ရေး အင်အားစုများက စစ်ကော်မရှင်လက်မှ (၈) လကြာ တိုက်ခိုက်ပြီးနောက် အပြီးသတ်သိမ်းပိုက်နိုင်ခဲ့ခြင်းဖြစ်ပြီး၊ လက်ရှိတွင် အမျိုးသား ညီညွတ်ရေး အစိုးရ (NUG) ၏ အုပ်ချုပ်ရေးယန္တရား လည်ပတ်နေသည်။

ခိုးမှုဖြင့် ဖမ်းဆီးထားသူ သေဆုံးမှုအား သိန်း ၁၅၀ ဖြင့် ကျေအေး

စစ်အုပ်စုကို အကြမ်းဖက် အုပ်စုအဖြစ် ဆက်လက် သတ်မှတ်ထားမည်ဟု NUG ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၉ ရက်။ နိုင်ငံတကာကို လှည့်ဖြားရန်နှင့် တရားမဝင်မှုကို တရားဝင်သယောင် ဖန်တီးရန် အမည်သစ်ပြောင်းပြီး အတုအ ယောင် ရွေးကောက်ပွဲ လုပ်မည့် စစ်အုပ်စုကို အကြမ်းဖက်မှု တိုက်ဖျက်ရေး ဥပဒေနှင့် ဆက်လက် အရေးယူ သွားမည်ဟု တော်လှန်ရေး အင်အားစုများက ပြောသည်။ စစ်အုပ်စုသည် ၎င်းတို့၏ အမည်နာမကို ‘နိုင်ငံတော်လုံခြုံရေးနှင့် အေးချမ်းသာယာရေးကော်မရှင်’ ဟု ပြောင်းလဲ ခဲ့သော်လည်း ‘အကြမ်းဖက်အုပ်စု’ အဖြစ် ဆက်လက် တည်ရှိနေမည် ဖြစ်သည်ဟု ပြည်ထောင် စုလွှတ်တော် ကိုယ်စားပြုကော်မတီ (CRPH)၊ အမျိုးသား ညီညွတ်ရေး အတိုင်ပင်ခံ ကောင်စီ (NUCC) နှင့် အမျိုးသား ညီညွတ် ရေး အစိုးရ (NUG) တို့က စက်တင်ဘာလ ၁၈ ရက်နေ့က ပူးတွဲကြေညာချက် ထုတ်ပြန်ထားသည်။ စစ်အုပ်စုက ၎င်းတို့၏ အဖွဲ့အစည်းကို အမည်ပြောင်းလိုက်ခြင်းသည် နိုင်ငံရေး ထွက်ပေါက်တစ်ခု အနေဖြင့် လုပ်ဆောင်ခြင်း ဖြစ်သည်ဟု အမျိုးသား ညီညွတ်ရေး အစိုးရ (NUG) ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ယခုကဲ့သို့ ပြောပါတယ်။ “အဓိကကတော့ မင်းအောင်လှိုင်ဦးဆောင်တဲ့ အကြမ်းဖက်စစ်အုပ်စုက ပထမတော့ စစ်ကော်မတီဆိုတဲ့ နာမည် နဲ့ ပေါ့နော်၊ နစက ဆိုတဲ့ နာမည်နဲ့ ဒါ နိုင်ငံတော်ပုန်ကန်မှုကို ကျူးလွန်ခဲ့တဲ့ စစ်အုပ်စု သာလျှင် ဖြစ်တယ်ပေါ့ နော်။ အဲ့တော့ အခုလည်းပဲ နိုင်ငံတော်လုံခြုံရေးနဲ့ အေးချမ်းသာယာ ရေးကော်မရှင် ဆိုပြီးတော့ နာမည်ပြောင်း လိုက်တာသာ ဖြစ်ပြီးတော့ လူပုဂ္ဂိုလ်တွေက သူတို့ပဲ ဖြစ်တယ်။ ဒီစစ်တပ်က သူတွေပဲ သူတို့ကိုယ်သူတို့ နာမည် တွေ ပြောင်းပြီးတော့ တရားမဝင် အတုအယောင် ရွေးကောက်ပွဲကို လုပ်ကိုင် ဆောင်ရွက်ဖို့ ကြိုးစားလာတဲ့ အခြေ အနေ ဖြစ်ပါတယ်။” စစ်အုပ်စု၏ နာမည်ပြောင်းလဲမှုသည် နိုင်ငံတကာ အသိုင်းအဝိုင်းကို လှည့်ဖြားရန်နှင့် တရားဝင်မှု ရရှိရေးအတွက် အတုအယောင် ရွေးကောက်ပွဲ ပြုလုပ်ရန် ကြိုးပမ်းမှုသာ ဖြစ်သည်ဟု တော်လှန်ရေး အင်အားစုများက ဆို သည်။ ထို့ကြောင့် NUG အစိုးရအနေဖြင့် ၎င်းတို့၏ အကြမ်းဖက်မှု တိုက်ဖျက်ရေး ဗဟိုမှ တစ်ဆင့် အကြမ်းဖက်မှု တိုက်ဖျက်ရေး ဥပဒေကို ကိုင်စွဲပြီး စစ်အုပ်စုနှင့် ၎င်းတို့၏ လက်အောက်ခံများကို အရေးယူဆောင်ရွက်သွားမည် ဦးနေဘုန်းလတ်က ဆက်ပြောသည်။ “အမျိုးသား ညီညွတ်ရေး အစိုးရမှာ အကြမ်းဖက်မှု တိုက်ဖျက်ရေး ဗဟို ရှိပါတယ်။ အဲ့တော့ ဒီအကြမ်းဖက်မှု တိုက်ဖျက်ရေး ဗဟိုက အကြမ်းဖက်မှု တိုက်ဖျက်ရေး ဥပဒေကို ကျနော်တို့ ကိုင်စွဲပြီးတော့ လက်ရှိ အသုံးပြု ပြီးတော့ ဆောင်ရွက်နေတာ ရှိတယ်။ အဲ့တော့ စစ်ကောင်စီ အပါအဝင်ပေါ့နော်၊ သူ့ရဲ့ လက်အောက်ခံ အဖွဲ့အ စည်းတွေကိုလည်းပဲ ဒီအကြမ်းဖက်မှု တိုက်ဖျက်ရေး ဗဟိုကနေပြီးတော့ အကြမ်းဖက်မှု တိုက်ဖျက်ရေးဥပဒေ နဲ့အညီ ဆက်လက်ပြီးတော့ အရေးယူဆောင်ရွက်တာတွေကို ဆက်ဆောင်ရွက်သွားမှာ ဖြစ်ပါတယ်ဗျ။ NUG ရဲ့ စိုးမိုး ထိန်းချုပ်နယ်မြေတွေမှာ ဖမ်းဆီးရမိလို့ ရှိရင်လည်းပဲ ဒါ ဒီဥပဒေနဲ့အညီ အရေးယူသွားမှာ ဖြစ်ပါတယ်။” တော်လှန်ရေး အင်အားစုများ၏ ပူးတွဲ ကြေညာချက်ထဲတွင် အချက် ၅ ချက်ကို အဓိက ဖော်ပြထားပြီး အမည် ပြောင်းလဲထားသည့် စစ်ကော်မရှင်နှင့် ၎င်းတို့၏ လက်အောက်ခံ အဖွဲ့အစည်းများသည် အကြမ်းဖက်အုပ်စုဝင် များသာ ဖြစ်သည်ဟု ဆိုသည်။ ထို့အပြင် စစ်အုပ်စုက တော်လှန်ရေး အင်အားစုများကို အကြမ်းဖက်အဖွဲ့အဖြစ် ကြေညာထားခြင်းများသည် တရားမဝင် ပျက်ပြယ်ပြီး ဖြစ်ကြောင်းနှင့် စစ်အုပ်စု၏ လုပ်ဆောင်ချက်များ အားလုံးသည် တရားဝင်မှုမရှိဟု ပြောသည်။ စစ်အုပ်စုသည် ၂၀၂၁ ခုနှစ် ဖေဖော်ဝါရီလ ၁ ရက်နေ့တွင် နိုင်ငံတော်အာဏာကို မတရားသိမ်းယူခဲ့ခြင်းဖြင့် နိုင်ငံတော် ပုန်ကန်မှုကို ကျူးလွန်ခဲ့သောကြောင့် CRPH က ၂၀၂၁ ခုနှစ် မတ်လ ၁ ရက်နေ့တွင် ‘အကြမ်းဖက် အုပ်စု’ အဖြစ် ကြေညာခဲ့သည်။ ထို့အတူ NUG ကလည်း ၂၀၂၄ ခုနှစ်၊ စက်တင်ဘာလ ၅ ရက်နေ့တွင် ၎င်းတို့အား ‘နိုင်ငံတော်နှင့် ပြည်သူလူထု၏ ရန်သူ’ အဖြစ် သတ်မှတ်ခဲ့သည်။ ယခု ကြေညာချက်သည် ထိုသတ်မှတ်ချက်များ အတိုင်း ဆက်လက်အကျုံး ဝင်ကြောင်း ထပ်လောင်းအတည်ပြု ခြင်း ဖြစ်သည်ဟု ဆိုသည်။ UNI Asia & Pacific၊ ITUC-Asia Pacific စသည့် အလုပ်သမား အဖွဲ့များကလည်း စစ်ကော်မရှင် ပြုလုပ်မည့် ရွေးကောက်ပွဲသည် စစ်အာဏာရှင်စနစ်ကို ခိုင်မြဲစေရန် လုပ်ဆောင်နေခြင်း ဖြစ်သောကြောင့် ရွေးကောက်ပွဲကို ငြင်းပယ်ပြီး အတူ တစ်ကွ လက်တွဲ တိုက်ဖျက်ရန် စက်တင်ဘာလ ၁၅ ရက်နေ့က ပူးတွဲကြေညာ ချက်ထုတ် ပြန်ခဲ့သည်။ ထို့အပြင် International Federation for Human Rights (FIDH) နှင့် ALTSEAN - Burma တို့ကလည်း ဤ ရွေးကောက်ပွဲသည် ရှုပ်ထွေးမှုကို ပိုပြီးဖြစ်စေမည် သာမက ပြည်ပသို့ ထွက်ပြေး တိမ်းရှောင်မှု ပိုများလာနိုင် သည်ဟု ဆိုပြီး ငြင်းပယ်ကြရန် စက်တင်ဘာလ ၈ ရက်နေ့က ကုလသမဂ္ဂ လူ့အခွင့်အရေး ကောင်စီထံ တောင်း ဆိုထားသည်။

စစ်အုပ်စုကို အကြမ်းဖက် အုပ်စုအဖြစ် ဆက်လက် သတ်မှတ်ထားမည်ဟု NUG ပြော

နိုင်ကျဉ်းများအား နှိပ်စက်သော ဝန်ထမ်းများအား အရေးယူနိုင်ရန် NUG ကြိုးပမ်းနေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင် ၃၀ ရက်။ နိုင်ငံတဝှမ်းက အကျဉ်းထောင်များအတွင်း နိုင်ငံရေးအကျဉ်းသားများအား နှိပ်စက်သတ်ဖြတ်ရာတွင် ပါဝင် ပတ်သက်နေသူ ဝန်ထမ်းများအား အပြစ်ပေးအရေးယူနိုင်ရေး NUG က ဆောင်ရွက်နေသည်ဟု ပြောသည်။ နိုင်ငံရေး အကျဉ်းသားများအား ညှဉ်းပန်းနှိပ်စက်ခြင်း၊ သတ်ဖြတ်ခြင်းများတွင် ပါဝင်ပတ်သက်နေသည့် အကျဉ်း ဦးစီးဌာနမှ စစ်ကောင်စီ ထောက်တိုင် ဝန်ထမ်းများကို အရေးယူဆောင်ရွက်သွားမည်ဟု NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ပြောသည်။ “အကြမ်းဖက် စစ်ကောင်စီရဲ့ နိုင်ငံရေးအကျဉ်းသားတွေ အပေါ် ထောင်တွင်း ညှဉ်းပန်းနှိပ်စက်မှုတွေနဲ့ ထောင် တွင်း လူသတ်မှုတွေ ကျူးလွန်နေတဲ့ ဖြစ်စဉ်တွေမှာ ပူးပေါင်း ပါဝင်ပတ်သက်နေကြတဲ့ အကျဉ်း ဦးစီးဌာနက စစ်ကောင်စီ ထောက်တိုင် ၇၀၀၀ ကျော်ရဲ့ ကိုယ်ရေး အချက်အလက်တွေကိုလည်း ရရှိ ထားပြီး ဖြစ်ပြီး ၎င်းတို့ တစ်ဦးချင်းစီရဲ့ ပူးပေါင်း ပါဝင်ပတ်သက်မှုတွေ အပေါ် မူတည်ပြီး ဥပဒေနဲ့အညီ အပြစ်ပေး အရေးယူ ဆောင် ရွက်နိုင်ဖို့ ဆက်လက် ဆောင်ရွက်လျက်ရှိပါတယ်။” ဇူလိုင်လ ၂၉ ရက်နေ့တွင် ပြုလုပ်သည့် ပြည်သူလူထုနှင့် နိုင်ငံတကာသို့ သတင်းစကားပြောကြားခြင်း အစီအစဉ် တွင် ပြောကြားခဲ့သည်။ ယခုပြောဆိုမှုသည် ဇူလိုင်လအတွင်း နိုင်ငံရေးအကျဉ်းသားများ ဆက်တိုက်သေဆုံးမှုများ ဖြစ်ပွားခဲ့ပြီး နောက် ထွက်ပေါ်လာခြင်း ဖြစ်သည်။ ဇူလိုင်အတွင်း၌ ထောင်တွင်း မတရားညှဉ်းပန်း နှိပ်စက်ခံမှုနှင့် ဆေးဝါးကုသခွင့် မရခဲ့သောကြောင့် နိုင်ငံရေး အကျဉ်းသား ၆ ဦးသေဆုံးမှုရှိခဲ့သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် PPNM ၏ စာရင်းများတွင် ဖော်ပြထားသည်။ မန္တလေး အိုးဘိုထောင်တွင် ဆရာတော် ဦးပသံသိယ ပျံလွန်တော်မူခဲ့သည့်အပြင် အိုးဘိုထောင်တွင် ဦးမြင့်ဝေ၊ သထုံထောင်တွင် ဘီးလင်းမြို့နယ် NLD အလုပ်အမှုဆောင် ကိုပြည့်စုံအောင်၊ အင်းစိန်ထောင်တွင် ဒဂုံတက္ကသိုလ် ကျောင်းသား သမဂ္ဂမှ မဝတ်ရည်အောင်၊ ပေါင်းတည်ထောင်တွင် ကိုလှမင်း (ခေါ်) ကိုလှကြီးတို့ သေဆုံးသွား သည်ဟု PPNM က ထုတ်ပြန်ထားသည်။ ဤသေဆုံးမှုများသည် အကျဉ်းထောင်များအတွင်း ဖြစ်ပွားနေသည့် စစ်ရာဇဝတ်မှုများနှင့် လူသား မျိုးနွယ် အပေါ် ကျူးလွန်သည့် ရာဇဝတ်မှုများ၏ သက်သေဖြစ်ပြီး ၎င်းပြစ်မှုများတွင် ပါဝင်ပတ်သက် နေသူများကို တာဝန်ခံမှု၊ တာဝန်ယူမှု ရှိစေရန် NUG က ကြိုးပမ်းနေကြောင်း ဦးနေဘုန်းလတ်က ဆက်ပြောသည်။ “အမျိုးသား ညီညွတ်ရေး အစိုးရအနေနဲ့ အကြမ်းဖက် စစ်ကောင်စီဘက်က ပေါက်ကြားလာတဲ့ အချက် အလက် ပေါင်းများစွာရဲ့ မှန်ကန်မှုနဲ့ ခိုင်မာမှုကို စိစစ်လေ့လာ သုံးသပ်လျက်ရှိပါတယ်။ ဒီအချက် အလက် တွေဟာ အကြမ်းဖက်စစ်ကောင်စီ ကျူးလွန်ခဲ့၊ ကျူးလွန်လျက်ရှိတဲ့ စစ်ရာဇဝတ်မှုတွေ၊ လူ့အခွင့်အရေး ချိုးဖောက်မှုတွေမှာ အားပေးအားမြောက်ပြုသူတွေ၊ ပူးပေါင်း ပါဝင်ပတ်သက်သူတွေ၊ အလိုတူ အလိုပါတွေကို လက်ရှိကာလ အရေးယူ အပြစ်ပေးနိုင်ဖို့အပြင် အသွင်ကူးပြောင်းရေး ကာလ တရားမျှတမှု ဖော်ဆောင်ရေး လုပ်ငန်းစဉ်တွေ အတွက်ပါ ထိရောက်စွာ အသုံးပြုနိုင်ရေး ဆက်လက် ဆောင်ရွက်သွားမှာ ဖြစ်ပါတယ်။” ထိုသို့ တရားမျှတမှု ဖော်ဆောင်ရေးအတွက် အဓိကကျသည့် သက်သေ အထောက်အထားအဖြစ် စစ်ကောင်စီ ဘက်မှ ပေါက်ကြားလာသည့် အချက်အလက်များမှ တစ်ဆင့် အကျဉ်းဦးစီးဌာန အောက်ရှိ ဝန်ထမ်း ၇,၀၀၀ ကျော်၏ ကိုယ်ရေး အချက်အလက်များကို စုဆောင်းရရှိထားသည်ဟု ဦးနေဘုန်းလတ်က ပြောသည်။ NUG အနေဖြင့် ဤအချက်အလက်များကို အတည်ပြု စိစစ်နေပြီး တော်လှန်ရေး ကာလအတွင်း အရေးယူမှုများ အတွက်သာမက အနာဂတ် အသွင်ကူးပြောင်းရေး ကာလ တရားမျှတမှု ဖော်ဆောင်ရေး လုပ်ငန်းစဉ်များတွင်ပါ ထိရောက်စွာ အသုံးပြုသွားမည် ဖြစ်ဟု ဆိုသည်။ PPNM ကလည်း ဇူလိုင်လ ၂၅ ရက်နေ့တွင် စစ်ကောင်စီ လက်အောက်ခံ အကျဉ်းဦးစီးဌာန၊ အရာရှိ ၁၃၃ ဦး၏ အမည်စာရင်းများကို ထုတ်ပြန်လိုက်ပြီး စစ်ဆေး ဖမ်းဆီးပေးရန် တော်လှန်ရေး တပ်ဖွဲ့များကို တောင်းဆိုထား သည်။ PPNM က စစ်ကောင်စီ လက်အောက်ခံ အကျဉ်းဦးစီးဌာန၏ ညွှန်ကြားရေးမှူးချုပ်နှင့် ဒု-ညွှန်ကြားရေးမှူးချုပ် အပါအဝင် ညွှန်ကြားရေးမှူး ၁၉ ဦး၊ ဒုညွှန်ကြားရေးမှူး ၁၉ ဦး၊ လက်ထောက် ညွှန်ကြားရေးမှူး ၉၃ ဦးတို့၏ အမည်စာရင်းများကို မှတ်ပုံတင်နံပါတ်များနှင့် အတူ ထုတ်ပြန်ထားသည်။ စစ်ကောင်စီ လက်အောက်ခံ အကျဉ်းဦးစီးဌာန၊ အရာရှိများသည် အကျဉ်းထောင်တွင်း လူ့အခွင့်အရေး ချိုးဖောက်မှု၊ ဥပဒေမဲ့ သတ်ဖြတ်မှု၊ ညှဉ်းပန်းနှိပ်စက်မှုများကို ကျူးလွန်နေသည်ဟု ဆိုသည်။ အာဏာသိမ်းပြီး နောက်ပိုင်း စစ်တပ်၏ မတရား ဖမ်းဆီး ထိန်းသိမ်းမှုများကြောင့် သေဆုံးခဲ့ရသူ အရေအတွက် မှာလည်း စိုးရိမ်ဖွယ်ရာ မြင့်တက်လျက်ရှိသည်ဟု NUG က ပြောသည်။

နိုင်ကျဉ်းများအား နှိပ်စက်သော ဝန်ထမ်းများအား အရေးယူနိုင်ရန် NUG ကြိုးပမ်းနေ

စစ်ကောင်စီကို အရေးယူကိုင်တွယ်မှု မရှိသောကြောင့် အာဆီယံကို စိတ်ပျက်ဟု NUG ပြော    သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇူလိုင် ၁၇ ရက်။ အာဆီယံအနေဖြင့် စစ်ရာဇဝတ်မှုများ ဆက်လက် ကျူးလွန်နေသည့် စစ်ကောင်စီကို ထိရောက်သည့် အရေးယူ ကိုင်တွယ်မှု မရှိသောကြောင့် စိတ်ပျက်ရသည်ဟု အမျိုးသားညီညွတ်ရေး အစိုးရ NUG က ပြောသည်။ စစ်ကောင်စီက ပြည်သူများအပေါ် စစ်ရာဇဝတ်မှုများ ဆက်လက်ကျူးလွန်နေသော်လည်း အာဆီယံက တိုက် ရိုက် ထုတ်ဖော်ရှုတ်ချခြင်းနှင့် ထိရောက်သည့် အရေးယူကိုင်တွယ်မှု မရှိဘူးဟု ဇူလိုင်လ ၁၆ ရက်နေ့က ထုတ် ပြန် ပြောဆိုလိုက်ခြင်း ဖြစ်သည်။ ဇူလိုင် လဆန်းပိုင်းက ကျင်းပခဲ့သည့် အာဆီယံ နိုင်ငံခြားရေးဝန်ကြီးများ အစည်းအဝေးပွဲ အပြီး ပူးတွဲကြေညာ ချက် သဘောထား ထုတ်ပြန်ချိန်၌ NUG က ပြောဆိုလိုက်ခြင်း ဖြစ်သည်။ ဇူလိုင်လ ၉ ရက်နေ့ မလေးရှားနိုင်ငံ၊ ကွာလမ်ပူမြို့တွင် ၅၈ ကြိမ်မြောက် အာဆီယံ နိုင်ငံခြားရေးဝန်ကြီးများ အစည်းအဝေး ပြုလုပ်အပြီး ထုတ်ပြန်သည့် ကြေညာချက်၌ မြန်မာနိုင်ငံအတွင်း ပဋိပက္ခများပိုမြင့်တက်လာမှုနှင့် လူသားချင်းစာနာ ထောက်ထားမှုဆိုင်ရာ ဆိုးရွားလာမှုအား စိုးရိမ်ပူပန်ကြောင်း၊ စစ်တပ်၏ အကြမ်းဖက် တိုက် ခိုက်မှုများအပေါ် ရှုတ်ချပြီး ချက်ချင်းရပ်တန့်ရန် တိုက်တွန်းထားသော်လည်း အရေးယူ ကိုင်တွယ်မှု မရှိသည် ကိုတွေ့ရကြောင်း NUG က ဆိုသည်။ အာဆီယံ အစည်းအဝေး၏ ပူးတွဲကြေညာချက်၌ စစ်ကောင်စီအပေါ် တိုက်ရိုက်ဖော်ထုတ် ရှုတ်ချပြီး ထိရောက် သည့် အရေးယူကိုင်တွယ်မှု မရှိဘူးဟု NUG က ပြောသည်။ ထိုသို့ ထိရောက်သည့် အရေးယူကိုင်တွယ်မှု မရှိခြင်းသည် အာဆီယံအနေဖြင့် စစ်ကောင်စီကို သွယ်ဝိုက် အကာ အကွယ် ပေးနေသည့် သဘောမျိုး သက်ရောက်နိုင်သည်ဟုလည်း NUG ထောက်ပြထားသည်။ စစ်ကောင်စီသည် ရွေးကောက်ပွဲလုပ်ရန် ပြင်ဆင်နေခြင်းမှာ အာဆီယံ ဘုံသဘောတူညီချက်ပါ အကြမ်းဖက်မှု များ အဆုံးသတ် ရေးဟူသော အချက်ကို ဆန့်ကျင်နေသည်မှာ ထင်ရှားသည်ဟုလည်း NUG က ဆိုသည်။ အာဆီယံအနေဖြင့် စစ်ကောင်စီက လုပ်မည့် အတုအယောင် ရွေးကောက်ပွဲအပေါ် သတိပေးဟန့်တားမှု တစ်စုံ တစ်ရာ မပါရှိသည့်အတွက်လည်း အကြမ်းဖက်စစ်အုပ်စုအား သွယ်ဝိုက်၍ အကာအကွယ်ပေးနေသည့် သဘော မျိုး သက်ရောက်နိုင်ကြောင်း အမျိုးသားညီညွတ်ရေးအစိုးရက ဆိုသည်။ အာဆီယံအနေဖြင့် မြန်မာ့နိုင်ငံ၏ ပဋိပက္ခကို ဖြေရှင်းရာ၌ လက်တွေ့ကျသည့် ဆောင်ရွက်မှုများနှင့် လိုအပ်သည့် မဟာဗျူဟာများကို ချမှတ်ဆောင်ရွက်ဖို့ NUG က တိုက်တွန်းထားသည်။ ဓါတ်ပုံ - Ministry of Foreign Affairs, Kingdom of Thailand

စစ်ကောင်စီကို အရေးယူကိုင်တွယ်မှု မရှိသောကြောင့် အာဆီယံကို စိတ်ပျက်ဟု NUG ပြော

နိုင်ကျဉ်းများ အသက်အန္တရာယ် စိုးရိမ်ရဟု NUG ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ နိုင်ငံတဝှမ်းက အကျဉ်းထောင်များ အတွင်းရှိ နိုင်ငံရေး အကျဉ်းသားများ အားလုံး၏ ကျန်းမာရေးနှင့် အသက် အန္တရာယ်မှာ အထူးစိုးရိမ်နေရဟု အမျိုးသား ညီညွတ်ရေး အစိုးရ (NUG) ပြောသည်။ ဖမ်းဆီး ထိန်းသိမ်းခံနေရသော သမ္မတ ဦးဝင်းမြင့်နှင့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် အပြင် နိုင်ကျဉ်းအားလုံး၏ ကျန်းမာရေး အခြေအနေနှင့် အသက်အန္တရာယ်အတွက် အထူးစိုးရိမ်သည်ဟု NUG က ဆိုသည်။ NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းဘတ်က “နိုင်ငံ့ ခေါင်းဆောင်တွေ ဖြစ်တဲ့ နိုင်ငံတော် သမ္မတ ဦးဝင်းမြင့်၊ နိုင်ငံတော် အတိုင်ပင်ခံ ပုဂ္ဂိုလ် ‌ဒေါ်အောင်ဆန်းစုကြည်တို့ဟာလည်း အကြမ်းဖက် စစ်တပ်ရဲ့ မတရား ဖမ်းဆီးချုပ်နှောင်မှုကို ခံထားရပြီး လုံလောက်တဲ့ ဆေးဝါးကုသမှုတွေ ရရှိမနေကြတာကြောင့် ဒီနိုင်ငံ ခေါင်း ဆောင်တွေနဲ့ နိုင်ငံရေး အကျဉ်းသား အားလုံးရဲ့ ကျန်းမာရေးနဲ့ အသက်အန္တရာယ်ကို အမျိုးသား ညီညွတ်ရေး အစိုးရ အနေနဲ့ အထူးပင် စိုးရိမ်မကင်း ဖြစ်မိပါတယ်” ဟု ပြောသည်။ ဇူလိုင်လ ၁ ရက်နေ့တွင် ပြုလုပ်သော ပြည်သူလူထုနှင့် နိုင်ငံတကာသို့ သတင်းစကား ပြောကြားခြင်း အစီအစဉ် ၌ ဦးနေဘုန်းလတ်က ပြောဆိုလိုက်ခြင်း ဖြစ်သည်။ ဇွန်လ ၂၇ ရက်နေ့က မန္တလေး အိုးဘိုထောင်အတွင်း မန္တလေးတိုင်း လွှတ်တော် ဥက္ကဋ္ဌ ဦးအောင်ကျော်ဦး သည် အချိန်မှီ ဆေးကုသခွင့် မရသောကြောင့် သေဆုံးခဲ့ပြီးနောက် နိုင်ငံရေး အကျဉ်းသားများသည် ထောင်တွင်း ကျန်းမာရေး စောင့်ရှောက်မှု လုံလုံလောက်လောက် မရရှိမှုနှင့် ဖိနှိပ်မှုများကြောင့် မသေဆုံးသင့်ဘဲ အသက် ဆုံးရှုံးနေကြရသည် ဟု ဦးနေဘုန်းလတ်က ဆိုသည်။ အိုးဘိုထောင်တစ်ခု တည်းမှာပင် ၂၀၂၄ ခုနှစ်အတွင်း မန္တလေးတိုင်း ဝန်ကြီးချုပ် ဒေါက်တာဇော်မြင့်မောင် အပါ အဝင် နိုင်ငံရေး အကျဉ်းသား ၃ ဦး ဆက်တိုက် သေဆုံးခဲ့သည်။ ထို့အပြင် မတ်လ ၂၈ ရက်နေ့ကလည်း စစ်ကိုင်းငလျင်အပြင် ဆေးကုသမှု အချိန်မှီမရဘဲ နှောင့်နှေးမှုများကြောင့် မသေဆုံးသင့်ဘဲ သေဆုံးခဲ့ရသည့် နိုင်ငံရေးအကျဉ်းသား အ ယောက် ၅၀ ဦးကျော် ရှိခဲ့သည်။ အဆိုပါ အသက်ဆုံးရှုံးမှုများ အတွက် အကျဉ်းထောင်အတွင်း တာဝန်ရှိသူများ အနေဖြင့် တာဝန်ယူ တာဝန်ခံ ရမည်ဟု ဦးနေဘုန်းလတ်က ဆက်ပြောသည်။ “အကြမ်းဖက် စစ်အုပ်စုရဲ့ လက်အောက်ခံ အကျဉ်းထောင်တွေက အကျဉ်းဦးစီး အရာရှိတွေနဲ့ တာဝန်ရှိသူတွေ အနေနဲ့ နိုင်ငံရေး အကျဉ်းသားတွေ အပေါ် ရက်စက်စွာ ပြုမူ ဖိနှိပ်နေတဲ့ လုပ်ရပ်တွေအတွက် တာဝန်ယူ တာဝန် ခံ ကြရမှာဖြစ်ကြောင်း ပြောကြားလိုပါတယ်။” ထို့အပြင် စစ်ကိုင်းငလျင် လှုပ်ခတ်ခဲ့သည့်နေ့၌ ဒေါ်အောင်ဆန်းစုကြည်၏ ဘယ်ဘက်လက် ဒဏ်ရာရရှိခဲ့ပြီး စိုးရိမ်ရသော အခြေအနေ ရှိနေကြောင်း Suu Foundation က ဇွန်လ ၁၈ ရက်နေ့တွင် ထုတ်ပြန်ထားသည်။ မတ်လ ၂၈ ရက်နေ့က စစ်ကိုင်းမြို့အနီး အခြေပြုလှုပ်ခတ်ခဲ့သော ငလျင်ကြောင့် နေပြည်တော်တွင် ထိခိုက် ပျက်စီးမှု များပြားခဲ့ပြီး ဒေါ်အောင်ဆန်းစုကြည်အား ချုပ်နှောင်ထားသည့် ထောင် အဆောက်အအုံမှာ ပျက်စီးခဲ့ ကာ ဒေါ်အောင်ဆန်းစုကြည်၏ ဘယ်ဘက်လက် ထိခိုက်ဒဏ်ရာရခဲ့သည်ဟု Suu Foundation က ထုတ်ပြန်ထားသည်။

နိုင်ကျဉ်းများ အသက်အန္တရာယ် စိုးရိမ်ရဟု NUG ပြော

« Prev 1 2 3 Next »

ဗုဒ္ဓဟူးနေ့ည ရုပ်သံသတင်း (၇-၁၀-၂၆)

ဗုဒ္ဓဟူးနေ့ညပိုင်း ရုပ်သံသတင်း(၇-၁၀-၂၆)

ဒီကနေ့ အစီအစဉ်ထဲမှာတော့-

– ကျိုက်ထိုမြို့နယ်မှာ တိုက်ပွဲမဖြစ်ပဲ စစ်အုပ်စုက အရပ်သားရွာတွေကို ဗုံးကြဲလို့ ထောင်နဲ့ချီထွက်ပြေးနေရ

– ရခိုင်-ဧရာဝတီ အစပ်မှာ တိုက်ပွဲ ပြင်းထန်ပြီး စစ်အုပ်စုက အစုအပြုံလိုက် ကျဆုံးနေ

– ကချင်ပြည်က ရွှေကူ-ငအိုး လမ်းပိုင်း သုံးသူတွေကို အရေးယူသွားမယ်လို့ KIAသတိပေး

– အလုပ်သမားတွေ ဆီက အခွန်နဲ့ လွှဲငွေ ရရှိဖို့ ပိုမို တင်းကြပ်သွားမယ်လို့ စစ်အုပ်စုပြော

– စစ်အုပ်စု ခေါင်းဆောင် ၇-၈ ရက်နေ့တွေမှာ မလေးရှားကို သွားမည်

– လာအို ဒုတိယမြို့တော်လေဆိပ် ကိုယ်ပိုင်လေယာဉ်ပေါ်တင်တဲ့ မူးယစ်ဆေးဝါး ကီလို ၅၀၀ ကျော်ဖမ်းမိ

– မက်ဒေါ်နယ်(McDonald’s)ကုမ္ပဏီဟာ AI သုံးစွဲပြီး လွတ်လပ်စွာ ယှဉ်ပြိုင်ခွင့်ကို ချိုးဖောက်တယ်ဆိုပြီး တရားစွဲခံရ

– ပထမဆုံး FIFA အာဆီယံ ဖလားကို အင်ဒိုနီးရှား အသင်း ပင်နယ်တီ အဆုံးအဖြတ်နဲ့ ဆွတ်ခူး…..စတာတွေ တင်ဆက်ထားပါတယ်။

×Close

News

တောမီးငြှိမ်းသတ်ရေးအတွက် နိုင်ငံတကာအကူအညီ လက်ခံရန် အင်ဒိုနီးရှား သမ္မတ သဘောတူ — October 16, 2026 6:36 pm
ပါကစ္စတန်တွင် ကျောင်းခေါင်မိုးပြိုကျ၍ အနည်းဆုံး ကလေးငယ် နှင့် ဆရာ/မ ၃၄ ဦး သေဆုံး — October 16, 2026 6:26 pm
တရုတ်နှင့် မြောက်ကိုရီးယား နယ်စပ်ဖြတ်ကျော်မြစ်ကူးတံတားသစ် ဖွင့်လှစ် — October 16, 2026 6:17 pm

Recent Posts

တောမီးငြှိမ်းသတ်ရေးအတွက် နိုင်ငံတကာအကူအညီ လက်ခံရန် အင်ဒိုနီးရှား သမ္မတ သဘောတူ
ပါကစ္စတန်တွင် ကျောင်းခေါင်မိုးပြိုကျ၍ အနည်းဆုံး ကလေးငယ် နှင့် ဆရာ/မ ၃၄ ဦး သေဆုံး
တရုတ်နှင့် မြောက်ကိုရီးယား နယ်စပ်ဖြတ်ကျော်မြစ်ကူးတံတားသစ် ဖွင့်လှစ်
အမေရိကန်နှင့် မြန်မာစစ်အုပ်စုတို့ ဒုတိယအကြိမ်အဖြစ် ဂျပန်တွင် တိုက်ရိုက် တွေ့ဆုံ
စစ်ကိုင်း အထက်ပိုင်း ဝန်းသိုတွင် တိုက်ပွဲပြင်းထန်ပြီး ရဲဘော် ၃ ဦးကျဆုံး၊ ဒေသခံ သောင်းနှင့်ချီ တိမ်းရှောင်ရ

Archives

Archives

×Close