September 2025 – Page 6 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Monthly Archive

Archive: September 2025

Sep 12

ပိုလန်နိုင်ငံက ရုရှား ဒရုန်းများ ပစ်ချ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၂ ရက်။ ပိုလန်နိင်ငံက လေပိုင်နက်ကို ကျူးကျော်လာသည်ဟု ဆိုကာ ရုရှား ဒရုန်းများကို ဗုဒ္ဓဟူးနေ့က ပစ်ချလိုက်သည်။ ပိုလန်သည် ယူကရိန်းစစ်ပွဲ အတွင်း ပထမဆုံး ပစ်ခတ်မှု လုပ်ခဲ့သော နေတိုးအဖွဲ့ဝင် နိုင်ငံ ဖြစ်လာခဲ့သည်။ ဤစစ်ဆင်ရေးအတွင်း ပိုလန်နိုင်ငံက F-16 ဂျက်တိုက်လေယာဉ်များ၊ နယ်သာလန်နိုင်ငံက F-35 များ၊ အီတလီက အေဝက် ထောက်လှမ်းရေး လေယာဉ်များနှင့် NATO အဖွဲ့မှ လေထဲတွင် ဆီဖြည့်ပေးနိုင်သည့် လေယာဉ်များ ပါဝင်ခဲ့သည်။ ရုရှားက ပစ်လွှတ်သည့် ဒရုန်း တစ်စီးသည် ပိုလန်ကျေးရွာတရွာရှိ နှစ်ထပ်အိမ်တစ်အိမ်၏ အပေါ်ထပ်ကို ကျရောက်ခဲ့သည်။ ပိုလန် ဝန်ကြီးချုပ် Donald Tusk (ဒေါ်နယ် တပ်စ်ခ်) က ဒုတိယ ကမ္ဘာစစ်နောက်ပိုင်း စစ်ပဋိပက္ခနှင့် အနီးဆုံးရောက်လာနေသည်ဟု လွှတ်တော်ကို ပြောကြားလိုက်သည်။ မော်စကိုဘက်ကတော့ ဒရုန်းများကို ပိုလန်နိုင်ငံဘက်သို့ ပစ်လွှတ်ခြင်းမျိုး မရှိဟု ပြောသည်။ ရုရှားကာကွယ်ရေး ဝန်ကြီးဌာနက ဒရုန်းများကို ယူကရိန်း အနောက်ပိုင်းရှိ စစ်ရေး အဆောက်အဦများကို တိုက်ခိုက်ရန် လွှတ်တင်ခြင်းသာ ဖြစ်ပြီး ပိုလန်ရှိ ပစ်မှတ်များကို တိုက်ခိုက်ရန် အစီအစဉ် မရှိဟု ဆိုသည်။ ပြင်သစ်၊ ဗြိတိန်၊ ဂျာမဏီနဲ့ ကနေဒါ အပါအဝင် နေတိုးနိုင်ငံများက သံသယရှိဖွယ် ရုရှား၏ ကျူးကျော်မှုကို ရှုတ်ချသည်။ ဆလိုဗေးနီးယား၊ ဒိန်းမတ်၊ ဂရိ၊ ပြင်သစ်နဲ့ ဗြိတိန်နိုင်ငံတွေကတော့ ဒီကိစ္စနှင့် ပတ်သက်ပြီး ကုလသမဂ္ဂ လုံခြုံရေး ကောင်စီကို သောကြာနေ့တွင် အစည်းအဝေး ခေါ်ရန် တောင်းဆိုထားသည်။ ပိုလန်နိုင်ငံအနေဖြင့် ရုရှားက ယူကရိန်းကို အပြင်းအထန် တိုက်ခိုက်နေချိန်တွင် အရာဝတ္ထု ၁၉ ခုက ပိုလန် လေပိုင်နက်ထဲသို့ ဝင်ရောက်လာသောကြောင့် ပစ်ချခဲ့သည်ဟု ပြောသည်။ အနည်းဆုံး ဒရုန်းငါးစီးသည် ယူကရိန်းကို လက်နက် ပို့ဆောင်ရာတွင် နေတိုးက သုံးသည့် Rzeszow လေဆိပ်ကို ဦးတည်ပျံသန်းလာခဲ့သည်ဟု နေတိုး၏ အဆင့်မြင့်အရာရှိတယောက်က AP သတင်းဌာနကို ပြောခဲ့သည်။

ပိုလန်နိုင်ငံက ရုရှား ဒရုန်းများ ပစ်ချ

Sep 11

စစ်ကော်မရှင် ဖိအားကြောင့် ဖောင်တော်ဦး ဘုရားပွဲ ကျင်းပရခြင်း ဖြစ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ ဖောင်တော်ဦး ဘုရားပွဲ ကျင်းပရခြင်းမှာ စစ်ကော်မရှင် ဖိအားကြောင့် ဖြစ်သည်ဟုဆို ဒေသခံပြည်သူများက ပြောသည်။ ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသတွင် ဖောင်တော်ဦးဘုရား ဒေသစာရီကြွချီ အပူဇော်ခံပွဲ အား စစ်ကော်မရှင် ဦးဆောင်မှုဖြင့် ကျင်းပရန် စတင်ပြင်ဆင်နေပြီဟု ဘုရားအနီး နေထိုင်သူများက ပြောသည်။ စစ်ကော်မရှင် လက်အောက်ခံ ညောင်ရွှေမြို့နယ် ထွေအုပ်၊ ၎င်းတို့ လက်ဝေခံ အင်းအမျိုးသား အဖွဲ့ချုပ်ပါတီ၊ ပအိုဝ်းအမျိုးသား အဖွဲ့ချုပ်ပါတီ (PNO) နှင့် စစ်ကော်မရှင်ခန့် တိုင်းရင်းသားရေးရာ ဝန်ကြီး ဦးအောင်ကြည်ဝင်း တို့မှ ဦးဆောင်၍ ကျင်းပသွားရန် စီစဉ်ထားခြင်း ဖြစ်သည်။ ဒေသတွင်း တက်ကြွလှုပ်ရှားနေသည့် အင်းလေးအမျိုး သမီးသမဂ္ဂအဖွဲ့ (IWU) အတွင်းရေးမှူး မကြိုးကြာက “ဒီမှာတော့ ဖောင်တော်ဦးဘုရားက အရင်လို ပြင်ဆင်လို့ မပြီးသေးဘူးပေါ့နော်။ မတ်လတုန်းက အင်းလေးမှာ လှုပ်ခတ်ခဲ့တဲ့ ငလျင်ဒဏ်ကြောင့် ဘုရားရင်ပြင်နဲ့ ဖောင်တော်ထားတဲ့ အဆောက်အဦး ပျက်စီးသွားခဲ့တယ်ပေါ့။ ဒါပေမယ့် တစ်ကျောင်းလုံး ပျက်စီးသွားတာ မဟုတ်တော့ ဘုရားပွဲက ကျင်းပလို့ ရတယ်ပေါ့။ ဒါပေမယ့် ဘုရား ကြွပါတဲ့ ၂၁ ဌာန တချို့ ဘုရားကျိန်းကျောင်းတွေ ဆိုရင် ပြင်လို့ မပြီးသေးဘူးလို့ သိရတယ်ပေါ့နော်” ဟု ပြော သည်။ ဘုရားပွဲတော် ကျင်းပရခြင်းမှာ စစ်ကော်မရှင်က ရွေးကော်ပွဲအတွက် မဲဆွယ်ခြင်းနှင့် ပွဲကန်ထရိုက်ဆွဲသူများက လောင်းကစားဝိုင်း ကျင်းပရန်အတွက်သာ ဖြစ်သည်ဟု ဆိုသည်။ အင်းလေး PDF ပြန်ကြားရေး တာဝန်ရှိသူ တစ်ဦးက “ရွာတိုင်းရွာတိုင်းမှာ သူတို့ကို ထောက်ခံအားပေးတဲ့ လူနည်းစု ရှိတယ်ပေါ့။ အဲဒီ လူနည်းစုကနေ တက်တက်ကြွကြွ လုပ်ပြီးတော့ သူတို့ကို မထောက်ခံတဲ့ လူများစု ကို အတင်းအကြပ် ခိုင်းစေပြီးတော့ ပြီးတော့ မထွက်မနေရ မပါဝင် မနေရဆိုတဲ့ ပုံစံမျိုးနဲ့ အတင်းအကြပ် လုပ်ခိုင်းတာမျိုးတော့ ကြားနေရတယ်ဗျ” ဟု ပြောသည်။ အင်းလေးဒေသ၌ ပြီးခဲ့သည့် ၂၀၂၄ ခုနှစ် စက်တင်ဘာလက ရေဘေးအပြင် ယခုနှစ် မတ်လတွင်လည်း ငလျင်ဒဏ်ကြောင့် လူနေအိမ် ရာချီ ပျက်စီးခဲ့ရပြီး လူပေါင်း ၁၀၀ ကျော် ထိခိုက်သေဆုံးခဲ့ရသည်။ ထို့အပြင် လက်ရှိ ကာလ၌လည်း ပျက်စီးသွားသည့် နေအိမ်များ ပြန်လည် တည်ဆောက်ရန် မပြီးစီးသေးသည့် အပြင် ခရီးသွား ဧည့်သည်များလည်း မလာရောက်နိုင်သေးသဖြင့် ပွဲတော်ကျင်းပမည် ဆိုပါက ငွေကြေးခက်ခဲမှု ရှိနိုင်သည်ဟု ဒေသခံများက ဆိုသည်။ ဖောင်တော်ဦးဘုရား အနီး သာလေးကျေးရွာအုပ်စုတွင် နေထိုင်သူ တစ်ဦးက “ဘုရားတောင်ဘက်ဆိုင်တွေ ရေကျန်သေးတယ်။ ဒီရက်ပိုင်း မိုးထပ်ရွာတော့ ရေသာထပ်တက်ရင် အားလုံး ဒုက္ခရောက်ကုန်မယ်။ ပွဲဖြစ်လို့ လည်း ပိုက်ဆံရှာရတာ မဟုတ်ဘူး။ ရေမြုပ်နေရင် ရပ်ဝေးက ဧည့်သည်တွေ လာလို့မရဘူး” ဟု ပြောသည်။ အင်းလေးဒေသ၌ စစ်ကော်မရှင်တပ်က စစ်မှုထမ်းကို လစဉ်ခေါ်ယူလေ့ရှိပြီး ယခု ဘုရားပွဲတော် အကြောင်းပြု၍ စစ်မှုထမ်းအတွက် ပေါ်တာ ဆွဲမည်ကို ဒေသခံများက စိုးရိမ်ပူပန်နေကြသည်။ ဖောင်တော်ဦး ဘုရားပွဲအား လာမည့် သီတင်းကျွတ် လဆန်း ၁ ရက် (စက်တင်ဘာလ ၂၂ ရက်နေ့) မှ စတင်၍ သီတင်းကျွတ် လပြည့်ကျော် ၃ ရက် (အောက်တိုဘာလ ၉ ရက်နေ့) အထိ ကျင်းပမည်ဖြစ်ပြီး စစ်ကော်မရှင် လက်အောက်ခံ ပအိုဝ်းပြည်သူ့စစ်အဖွဲ့ (PNA) က လုံခြုံရေး တာဝန်ယူသွားမည်ဟု ဒေသခံများက ပြောသည်။

စစ်ကော်မရှင် ဖိအားကြောင့် ဖောင်တော်ဦး ဘုရားပွဲ ကျင်းပရခြင်း ဖြစ်

Sep 11

ရခိုင်-မကွေးအစပ် တိုက်ပွဲတွင် စစ်ကော်မရှင်တပ်ဖွဲ့ အယောက် ၇၀ ကျော်သေဆုံးဟု အေအေပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ ရခိုင်ပြည်နှင့် မကွေးတိုင်းအစပ်က တိုက်ပွဲများထဲ စစ်ကော်မရှင်တပ်ဘက်က အယောက် ၇၀ ကျော် သေဆုံးခဲ့သည်ဟု အာရက္ခတပ်တော် ULA/AA က ထုတ်ပြန်သည်။ မကွေးတိုင်း၊ ငဖဲမြို့နယ်ထဲက တိုက်ပွဲ၌ စစ်တပ်ဘက်က အယောက် ၇၀ ကျော် သေဆုံးခဲ့ပြီး လက်နက်ခဲယမ်း များလည်း သိမ်းယူရရှိခဲ့သည်ဟု AA က ဆိုသည်။ ငဖဲမြို့နယ်ထဲက လက်လွှတ်ဆုံးရှုံးထားရသည့် နယ်မြေအချို့ကို ပြန်လည်ရယူနိုင်ရေး စစ်ကောင်မရှင်တပ်က ထိုး စစ်ဆင်နေခြင်း ဖြစ်ပြီး စက်တင်ဘာလ ၇ ရက်နေ့က ဖြစ်ခဲ့သည့် တိုက်ပွဲများအတွင်း စစ်တပ်ဘက်က အသေ ဆုံးများခဲ့သည်ဟု AA က ဆိုသည်။ ငဖဲမြို့နယ်ထဲက စွန်တက်ကျေးရွာ၌ စက်တင်ဘာလ ၄ ရက်နေ့နှင့် ၇ ရက်နေ့တို့တွင် တိုက်ပွဲများ ဖြစ်ခဲ့ပြီး စစ်တပ်ဘက်က ၆၀ ကျော် သေဆုံးခဲ့ခြင်း ဖြစ်သည်ဟု AA က ထုတ်ပြန်ချက်က ဆိုသည်။ ထို့အပြင် စွန်တက်ကျေးရွာ အရှေ့မြောက်ဘက်၊ နတ်ရေကန်ကုန်း တောင်ဘက်၌လည်း စက်တင်ဘာလ ၇ ရက်နေ့ ညနေတွင် တိုက်ပွဲများ ထပ်ဖြစ်ခဲ့ပြီး စစ်တပ်ဘက်က ၁၀ ဦးခန့် သေဆုံးခဲ့သေးသည်ဟု ဆိုသည်။ စစ်တပ်က ဧရာဝတီတိုင်း - ရက္ခိုင်အစပ်၊ မကွေးတိုင်း - ရက္ခိုင်အစပ်နေရာနှင့် ပဲခူးတိုင်း-ရက္ခိုင်အစပ် နေရာတို့တွင် ထိုးစစ်ဆင်နေပြီး နှစ်ဖက်ကြား တိုက်ပွဲများ ပြင်းထန်နေလျှက်ရှိသည်။ အတင်းအဓမ္မ စစ်သား စုဆောင်းခံထားရသူများ၊ စစ်မှုထမ်း တပ်သားသစ်များ အနေဖြင့် အမြန်ဆုံး အလင်းဝင် ကြဖို့ AA က တိုက်တွန်းထားပြီး အလင်းဝင်လာသူများကိုလည်း ကူညီပေးမည်ဟု ဆိုသည်။

ရခိုင်-မကွေးအစပ် တိုက်ပွဲတွင် စစ်ကော်မရှင်တပ်ဖွဲ့ အယောက် ၇၀ ကျော်သေဆုံးဟု အေအေပြော

Sep 11

စစ်တောင်းမြစ်ရေ မကြာခဏ တက်နေခြင်းကြောင့် ဒေသခံများ အခက်တွေ့ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ ပဲခူးတိုင်းဒေသကြီး အရှေ့ပိုင်း တောင်ငူခရိုင် တောင်ငူမြို့နယ်အတွင်း စစ်တောင်းမြစ်ရေသည် မကြာခဏ မြင့်တက်နေသဖြင့် မြေနိမ့်ပိုင်းတွင် နေထိုင်သူများ အခက်အခဲများ ဖြစ်နေကြသည်ဟု ဒေသခံများက ပြော သည်။ မြေနိမ့်ပိုင်းကျေးရွာရှိ ဒေသခံများသည် ယခုနှစ် ဇူလိုင်လမှ စတင်၍ မြစ်ရေတက်မှုကြောင့် ရွှေ့ပြောင်းမှုများ လုပ်နေရပြီး ရေပြန်ကျလျှင် ၎င်းတို့ဒေသသို့ ပြန်လည်နေထိုင်ကာ ယခုတစ်ဖန် ရေတက်လာသဖြင့် ထပ်မံ ရွှေ့ပြောင်း ရမည်ကို စိုးရိမ်နေကြသည်။ တောင်ငူမြို့နယ် မိုးကောင်းကျေးရွာအုပ်စုရှိ အင်းဝိုင်းရွာတွင် လာရောက်နေထိုင်သည့် စစ်ဘေးရှောင် အမျိုးသမီး တစ်ဦးက “ဒီတစ်ခေါက်ပါပါဆို ရေတက်တာသုံးခါလောက်ရှိပြီ။ သုံးခါလုံးပြောင်းရတယ်။ ရေတက် တာလည်း မြန်တယ် အိမ်ကြမ်းပြင်ထိ ရောက်ပြီဆို လူကတော့နေလို့ မရတော့ဘူး။ ဒါကြောင့်မို့လို့ ရေကတော့တစ်ခါကြီး တစ်ခါပြောင်းပဲ။ အရင်နှစ်ကလို ထပ်ကြီးမှာကိုတော့ ကြောက်နေတာပေါ့။ ပြောင်းရရွှေ့ရတာလည်း မလွယ် ဘူး။ အရင်နှစ်ကဆို အိမ်မြုပ်ခါနီးဘဲ ခေါင်မိုးဘဲကျန် ပစ္စည်းတွေ အကုန်းဆုံး။ သူများအိမ်မှာ ပြောင်းရွှေ့ နေရ တာလည်း အိမ်ရှင်ကို အားနာရ တစ်ခါမှ မဟုတ်တာ ခဏခဏ ရေကြီးတော့ အိမ်ငှားပြီး လွတ်ရာမှာ နေမယ် ဆိုလည်း အိမ်ငှားခ စျေးကြီးတယ်” ဟု ပြောသည်။ စစ်တောင်းမြစ်ရေသည် တောင်ငူမြို့တွင် စိုးရိမ်ရေမှတ် အထက်သို့ ပေဝက်ခန့် ကျော်လွန်နေပြီး နောက်တစ်ရက် အတွင်း ၃ လက်မခန့် မြင့်တက်လာနိုင်ကာ စိုးရိမ်ရေမှတ် အထက်၌ ဆက်လက် တည်ရှိနိုင်သည်ဟု မိုးလေဝသ နှင့် ဇလဗေဒ ညွှန်ကြားမှုဦးစီးဌာနက စက်တင်ဘာလ ၉ ရက်နေ့က အသိပေးထုတ်ပြန်ထားသည်။ ထို့ကြောင့် မြစ်ကမ်းနှင့်အနီး မြေနိမ့်ပိုင်း၌ နေထိုင်သူများ အနေဖြင့် ရေဘေးလွတ်ရာများသို့ ရှောင်ရှားနိုင်ရန် မိုးလေဝသနှင့်ဇလဗေဒ ညွှန်ကြားမှုဦးစီးဌာနက သတိပေးထားသည်။ မြစ်ရေမြင့်တက်မှုကြောင့် မကြာခဏ အရွှေ့အပြောင်း လုပ်နေရသည့်အတွက် ရင်ဆိုင်နေရသည့် အခက်အခဲ အခြေအနေကို ဒေသခံတစ်ဦးက ယခုကဲ့သို့ ပြောသည်။ “စစ်ဘေးမက ငလျင်ဘေး၊ ရေဘေး အကြိမ်ကြိမ်ခံစားရတော့ ကလေးတွေပညာရေး၊ စားဝတ်နေရေး၊ စိတ်ဖိ စီးမှု အမျိုးမျိုးပေါ့။ မနေဖူးတဲ့ နေမှာ နေရာချရတော့ အဆင်ပြေအောင် နေရတာပေါ့။ နေရသလောက် ရေ ပေါ်မှာပဲ နေကြတယ်။ ကျန်းမာရေးနဲ့လည်း မညီညွတ်ဘူး။ ကလေးတွေလည်း ခြေထောက်တွေ သဲဝဲစားလို့ အနာဖြစ်ကုန်။ စစ်မှုထမ်းဖို့ကလည်း လိုက်လံဖမ်းနေတော့ အရမ်းခက်ခဲတယ်။ မိန်းကလေးတွေက ပြောင်း ယောက်ကျားတွေက ရေကြီးတဲ့ နေရာမှာပဲ နေခဲ့ရတယ်။ ရှောင်ရတာလည်း သွားလာ ရွှေ့ပြောင်းရတာ ထိတ်လန့်မှုတွေနဲ့ပဲ။” တောင်ငူမြို့နယ်အတွင်း အလယ်ကျွန်း၊ အင်းဝိုင်း၊ ဒိုးသောင်နှင့် ဒိုးအင်းကျေးရွာ စသည့် မြစ်ကမ်းဘေးနှင့် မြေနိမ့် ဒေသများ၌ နှစ်စဉ် မိုးရာသီကာလတွင် မကြာခဏ မြစ်ရေတက်လေ့ရှိပြီး ရေကြီးရေလျှံမှုများကို ကြုံတွေ့ရ သည်ဟု ဆိုကြသည်။ ယခုနှစ် ဇူလိုင်လတုန်းကလည်း မြစ်ရေမြင့်တက်လာပြီး ရေကြီးရေလျှံမှုကြောင့် တောင်ငူမြို့ နယ် ဒိုးသောင် ကျေးရွာအုပ်စုထဲက ရှမ်းဝါးတီကျေးရွာသား တစ်ဦးမှာ ရေစီးနှင့်အတူ မျှောပါသေဆုံးခဲ့သည်။ ဓါတ်ပုံ - Taungoo Rescue အရေးပေါ် ကယ်ဆယ်ရေး ပရဟိတ အဖွဲ့

စစ်တောင်းမြစ်ရေ မကြာခဏ တက်နေခြင်းကြောင့် ဒေသခံများ အခက်တွေ့

Sep 11

တနင်္သာရီတိုင်း ရေဖြူမြို့နယ်တွင် လက်နက်ကြီးကြောင့် ကလေးတစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ ထားဝယ်ခရိုင်၊ ရေဖြူမြို့နယ်၊ ကလိန်အောင်မြို့အနီး ရာဖူးကျေးရွာတွင် လက်နက်ကြီးကျည် ကျရောက် ပေါက် ကွဲမှုကြောင့် ကလေးတစ်ဦး သေဆုံးပြီး အမျိုးသားတစ်ဦး ထိမှန်ဒဏ်ရာ ရခဲ့သည်။ စစ်ကော်မရှင်တပ်က ပစ်ခတ်လိုက်သည့် လက်နက်ကြီးကျည်သည် ရာဖူးကျေးရွာရှိ နေအိမ်တစ်လုံးပေါ် ကျရောက်ပေါက်ကွဲမှုကြောင့် သုံးနှစ်အရွယ် သမီးလေး သေဆုံးပြီး အမျိုးသားတစ်ဦး ဒဏ်ရာရရှိခဲ့သည်ဟု ရွာသားများက ပြောသည်။ စက်တင်ဘာလ ၈ ရက်နေ့၊ နံနက် ၁၁ နာရီအချိန်ခန့်က တိုက်ပွဲ ဖြစ်ပွားနေခြင်းမရှိဘဲ ပြည်သူများနေထိုင်သည့် ရပ်ရွာထဲ အကြောင်းမဲ့ ပစ်ခတ်ခဲ့ခြင်းဖြစ်သည်။ ရာဖူးကျေးရွာ အလယ်ပိုင်းရှိ ရွှေ့ပြောင်း အလုပ်လုပ်ကိုင်ကာ နေထိုင်ကြသည့် ပဲခူးတိုင်းမှ မိသားစု၏ နေအိမ်ပေါ် သို့ လက်နက်ကြီးကျည် ကျရောက်ပေါက်ကွဲခဲ့သဖြင့် အသက် ၃ နှစ်အရွယ် မိန်းကလေးငယ်တစ်ဦး သေဆုံးသွားခဲ့သည်ဟု ရွာသားများက ဆိုသည်။ ထို့အပြင် အိမ်သို့ အလည်ရောက်ရှိနေသူ ရာဖူးရွာသား အသက် ၄၀ အရွယ် ကိုဝင်းရွှေ ဆိုသူလည်း ကျည်စ ထိမှန်ပြီး ခြေထောက်တစ်ဖက် အရိုးကျိုး ဒဏ်ရာရရှိခဲ့ခြင်း ဖြစ်သည်။ ပစ်ခတ်မှုမတိုင်မီ စက်တင်ဘာလ ၇ ရက်နေ့၊ ညပိုင်းတွင် ရာဖူးရွာသား ၁၀ ဦး ထက်မနည်းကို စစ်ကော်မရှင် တပ်က ဖမ်းဆီးသွားခဲ့သေးသည်ဟု ရွာသားများက ဆိုသည်။ အသက် ၄၀ ခန့်အရွယ် ရွာသားတစ်ဦးက “ဖမ်းထားတာ ဆယ်ယောက်ကျော်တယ်၊ အသိမိတ်ဆွေတို့ သားအမိ နှစ်ယောက်လုံးပါသွားတာ၊ အခုလက်ရှိ ရာဖူးရွာအထက်တန်းကျောင်းထဲမှာ ဖမ်းထားတယ်” ဟု ပြောသည်။ စက်တင်ဘာလ ၈ ရက်နေ့တွင် လက်နက်ကြီးဖြင့် ပစ်ခတ်ခဲ့ပြီးနောက် ဖမ်းဆီးထားသည့် ရွာသားများနှင့်အတူ စစ်ကော်မရှင်တပ်ဖွဲ့မှာ ရာဖူးကျေးရွာထဲသို့ ဝင်ရောက်လာခဲ့သည်ဟု ရွာသားများက ပြောသည်။ ရာဖူးကျေးရွာသည် ရေး - ထားဝယ် ကားလမ်းမပေါ်ရှိ ကျေးရွာတစ်ရွာ ဖြစ်ပြီး နှစ်ဖက် စစ်ရေးတင်းမာနေမှုများ ကြောင့် သြဂုတ်လနှောင်းပိုင်းမှ စတင်ပြီး ရွာသားအများစုမှာ ဘေးလွှတ်ရာသို့ ထွက်ပြေး တိမ်းရှောင်နေကြရ သည်။

တနင်္သာရီတိုင်း ရေဖြူမြို့နယ်တွင် လက်နက်ကြီးကြောင့် ကလေးတစ်ဦး သေဆုံး

Sep 11

မြဝတီကို စစ်ကော်မရှင်က နေရာပြန်ယူပြီးနောက် နယ်ခြားစောင့်တပ်ဖွဲ့နှင့် တင်းမာမှုဖြစ် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ ထိုင်း - မြန်မာ နယ်စပ် ကရင်ပြည်၊ မြဝတီမြို့က အချက်အချာကျသည့် နေရာများမှ ကရင် နယ်ခြားစောင့်တပ် BGF အဖွဲ့ ဖယ်ပေးရပြီဟု မြို့ခံများက ပြောသည်။ မြဝတီမြို့ပေါ်ကနေ BGF တပ်ဖွဲ့၏ လုံခြုံရေး ဂိတ်စခန်းများကို စစ်ကော်မရှင်တပ်ဖွဲ့တို့က ပြန်ယူလိုက်ခြင်း ဖြစ် သည်။ စက်တင်ဘာ ၉ ရက်နေ့ ညကစပြီး စစ်တပ်က နေရာ ပြန်ယူလိုက်ခြင်း ဖြစ်သည်ဟု ဒေသခံများက ပြောသည်။ မဲဆောက်ဘက်ခြမ်းကို ရောက်နေသည့် မြဝတီမြို့ခံတစ်ဦးက “မြဝတီမြို့တံတား အောက်ဘက်မှာ တပ်စွဲထားတဲ့ BGF ရဲ့ ဂိတ်ကို စစ်တပ်က ပြန်ယူလိုက်ပါ။ မြို့ပေါ်မှာလည်း စစ်တပ်ကပဲ ပြန်ယူလိုက်တယ်ဗျ။ အခုက ပြော နေကြတာတော့ မြို့လုံခြုံရေးကို စစ်တပ်ကပဲ ပြန်ယူမယ်ပေါ့။ BGF ရော တခြားအဖွဲ့တွေရော အကုန် နေရာ ပြန်ဖယ်ပေး အဲ့လိုမျိုးဗျ” ဟု ပြောသည်။ စစ်တပ်က စစ်တင်ဘာ ၉ ရက်နေ့ ညပိုင်းတွင် ထိုင်း - မြန်မာ အမှတ် ၁ ချစ်ကြည်ရေးတံတား ပတ်လမ်း အောက် ရှိ BGF အဖွဲ့၏ လုံခြုံရေး ကင်းစခန်းကို ဖယ်ရှားခိုင်းပြီးနောက် စစ်ကား ၁၀ စီးခန့် ဝင်လာခဲ့သည်ဟု ဆိုသည်။ လက်ရှိတွင် အဆိုပါနေရာ၌ စစ်ကော်မရှင်တပ်ဖွဲ့ဝင်များ တပ်စွဲထားပြီး လမ်းသွားလမ်းလာ ပြည်သူများကို စစ်ဆေးမှုများ လုပ်နေသည်ဟု မြို့ခံများက ပြောသည်။ အထက်ပါ မြဝတီမြို့ခံက “အခုက မြ၀တီမြို့ပေါ်မှာလည်း လက်နက်ကိုင် အဖွဲ့အစည်းတွေကို စစ်တပ်က သွား လာခွင့် ကန့်သတ်လိုက်ပြီလို့ ကြားတယ်။ အဲ့လိုသတင်းတွေ ထွက်နေတာပေါ့ဗျာ။ အခြေအနေတွေကတော့ စောင့်ကြည့်ရအုံးမှာဗျ။ ဘယ်သွားသွား သူတို့ကို သတင်းပို့ရမယ်တဲ့။” ဟု ဆက်ပြောသည်။ ကော့ကရိတ် - မြဝတီ အာရှလမ်းမကြီး၏ အစိတ်အပိုင်းအချို့နှင့် သင်္ဃန်းညီနောင်တို့ကို စစ်ကော်မရှင်တပ်က ပြန်ရပြီးနောက် မြဝတီမြို့ လုံခြုံရေးကို တိုးလိုက်ပြီးနောက် BGF တပ်ဖွဲ့ကလည်း ဂိတ်စခန်းနေရာများမှ ဖယ်ပေး လိုက်ရခြင်း ဖြစ်သည်။ ထို့အပြင် မြို့အဝင်အထွက် နေရာများ၌လည်း စစ်ဆေးရေး တင်းကြတပ်ထားသည်ဟု ဆိုသည်။ စစ်တပ်က သင်္ဃန်းညီနောင်မှ မြဝတီကို ပြန်ဝင်လာခြင်း ဖြစ်သော်လည်း ကော့ကရိတ် - မြဝတီ အာရှလမ်းမကြီး ကို အပြည့်အဝ မထိန်းချုပ်နိုင်သေးဘူးဟု မြေပြင် သတင်းအရင်းအမြစ်များက ဆိုသည်။ ............................

မြဝတီကို စစ်ကော်မရှင်က နေရာပြန်ယူပြီးနောက် နယ်ခြားစောင့်တပ်ဖွဲ့နှင့် တင်းမာမှုဖြစ်

Sep 11

ဝက်လက် မြို့နယ်အတွင်း ဗုံးကြဲမှု အရပ်သား ၄ ဦး သေဆုံး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ စစ်ကိုင်းတိုင်း၊ ဝက်လက်မြို့နယ် အရှေ့ခြမ်းက ဧရာဝတီမြစ်ကမ်းဘေးတစ်လျောက်ရှိ ကျေးရွာ ၆ ရွာကို စစ်ကော်မရှင်တပ်မှ လေကြောင်းမှ ဗုံးကြဲ တိုက်ခိုက်ခဲ့ရာ အရပ်သား ၄ ဦး သေဆုံးခဲ့ပြီး ၁၃ ဦး ထိမှန်ဒဏ်ရာ ရခဲ့သည်။ လေကြောင်းမှ ဗုံးကြဲတိုက်ခိုက်မှုကို စက်တင်ဘာ ၉ ရက်နေ့နှင့် ၁၀ ရက်နေ့တို့တွင် နှစ်ရက်ဆက်တိုက် လုပ်ခဲ့ ခြင်း ဖြစ်သည်။ Wetlet Informational Network မှ တာဝန်ခံ ကိုနဂါးလေးက “ကျောက်မြောင်းကနေ အောက်ဘက် ဆင်းလာ တဲ့ အထိ မန္တလေး မရောက်မချင်း Y-12 ဝဲပေးပြီးတော့မှ ဝက်လက်မြို့နယ် အရှေ့ခြမ်း ရွာ ၇ ရွာလောက်ကို လေကြောင်း တိုက်ခိုက်မှု ပြုလုပ်သွားတယ်။ စဉ့်ကူးမြို့နယ် ထုံးကြီးကျေးရွာဘက်ကိုလည်း လေကြောင်း တိုက် ခိုက်မှုတွေ ပြုလုပ်သွားတယ်။ အဲ့မှာမှ ကျနော်တို့ ဝက်လက်မြို့နယ်ဘက်က သေဆုံး ပြည်သူ အမျိုးသား ကလေး အပါအဝင် သေဆုံး လေးဦး ရှိပြီးတော့မှ အမျိုးသား၊ အမျိုးသမီး ၁၃ ဦးခန့် ထိခိုက်ဒဏ်ရာ ရရှိပါတယ် ဗျ” ဟု ပြောသည်။ ယခုသေဆုံးမှုများမှာ စက်တင်ဘာလ ၉ ရက်နေ့ ညနေပိုင်းက လေကြောင်း တိုက်ခိုက်ခံရမှုထဲက အခြေအနေ များ ဖြစ်သည်။ စက်တင်ဘာလ ၉ ရက်နေ့၊ ညနေပိုင်းတွင် ဝက်လက်မြို့နယ် အရှေ့ခြမ်းရှိ သစ်ဆိပ့်၊ အင်ဒေါင်း၊ ရုံပင်ကုန်း၊ မင်းကုန်း၊ နဘဲပင်လှ၊ တပ်သာကျေးရွာများကို Y-12 လေယာဉ်ဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။ အလားတူ စက်တင်ဘာလ ၁၀ ရက်နေ့တွင်လည်း သစ်ဆိပ့်ကျေးရွာက စာသင်ကျောင်းကိုလည်း တံတားဦးဘက် မှ တက်လာသည့် ဂျက်ဖိုက်တာဖြင့် ပေါင် ၃၀၀ ဗုံး ထပ်ကြဲခဲ့သေးသည်ဟု Wetlet Informational Network က ထုတ်ပြန်ထားသည်။ ကိုနဂါးလေးက “တံတားဦးတပ်က တက်တဲ့ ဂျက်ဖိုက်တာတစ်စီးနဲ့ ဝက်လက်မြို့နယ် အရှေ့ခြမ်းက သစ်ဆိပ့် ကျေးရွာကို လေကြောင်းတိုက်ခိုက်မှု ပြုလုပ်သွားတယ်။ ဒီတိုက်ခိုက်မှုမှာ ထိခိုက်တာတွေ မရှိဘူး စာသင် ကျောင်းကို ပြုလုပ်သွားတယ်” ဟု ဆိုသည်။ ဗန်းမော်ဘက်မှ စုန်ဆင်းလာသော စစ်သင်္ဘော ရေယာဉ်တန်းကို လေကြောင်းမှ တစ်ဆင့် အနီးကပ် ခြံရံစောင့် ကြည့်ပေးခဲ့ပြီး ကသာ၊ ရွှေကူနှင့် ထီးချိုင့်မြို့နယ်တို့ကို ဖြတ်လာချိန် ဧရာဝတီမြစ်ကမ်းဘေးက ကျေးရွာများကို ဗုံးကြဲ တိုက်ခိုက်ခဲ့သည်။ အဆိုပါ လေကြောင်းတိုက်ခိုက်မှုသည် တိုက်ပွဲဖြစ်ပွားခြင်း မရှိဘဲ အရပ်သား ပြည်သူများသာ နေထိုင်သည့် နေရာများကို တိုက်ခိုက်ခဲ့ခြင်းဖြစ်သည်ဟု ဒေသခံများက ဆိုသည်။ စစ်သင်္ဘောအချို့မှာ မန္တလေး ဂေါဝန်ဆိပ်ကမ်းသို့ စက်တင်ဘာလ ၉ ရက်နေ့တွင် ပြန်လည်ရောက်ရှိသွားပြီ ဟု ကိုနဂါးလေးက ပြောသည်။ သို့သော်နောက်ချန် စစ်သင်္ဘောအချို့ ကျန်ရှိနေသေးသောကြောင့် လေကြောင်းမှ တိုက်ခိုက်မှုများ ဆက်ရှိနေ သေးသည်ဟု ဆိုသည်။ နောက်ချန် သင်္ဘောအချို့မှာ မန္တလေးကို မရောက်မှီ မတ္တရာ အနောက်ဘက်ခြမ်းရှိ စိန်ပန်းကုန်း၊ ရှင်လ၊ ဇလ အစရှိသည့် ကျေးရွာများဘက်တွင် ကျန်နေသေးသောကြောင့် ဝက်လက်မြို့နယ်နှင့် မြစ်ဘေးတစ်လျှောက်ရှိ မိဘပြည်သူများ အနေဖြင့် လေကြောင်း သတိထားကြရန် အသိပေး နှိုးဆော်ထားသည်။

ဝက်လက် မြို့နယ်အတွင်း ဗုံးကြဲမှု အရပ်သား ၄ ဦး သေဆုံး

Sep 11

ဒေါ်အောင်ဆန်းစုကြည် ကျန်းမာကြောင်း သက်သေပြရန် စစ်ကော်မရှင်ကို သားဖြစ်သူ ကိုထိန်လင်း တောင်းဆို သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ကျန်းမာရေးနှင့်ပတ်သက်ပြီး သားငယ်ဖြစ်သူ ကိုထိန်လင်း (ခေါ်) Kim Aris က ၎င်း၏ မိခင် ကျန်းမာရေး ကောင်းမွန်နေကြောင်း သက်သေပြရန် စစ်ကော်မရှင် အား တောင်းဆိုလိုက်သည်။ စစ်ကော်မရှင် ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဒေါ်အောင်ဆန်းစုကြည်၏ ကျန်းမာရေး ဆိုးရွား နေသည်ဟူသော သတင်းများသည် မဟုတ်မှန်ကြောင်း ငြင်းဆိုခဲ့ပြီးနောက် ကိုထိန်လင်း က လူမှုကွန်ရက် စာမျက်နှာမှ တစ်ဆင့် စက်တင်ဘာလ ၁၀ ရက်နေ့တွင် တောင်းဆိုလိုက်ခြင်း ဖြစ်သည်။ ကိုထိန်လင်းက “စစ်တပ်ရဲ့ ပြောရေးဆိုခွင့်ရှိသူက ‘မေမေ နေမကောင်းဘူး’ ဆိုတာ မမှန်ကန်တဲ့သတင်းလို့ ဆိုတယ်။ ဒါဆိုရင် မေမေ့ ကျန်းမာရေး အခြေအနေ အတိအကျကို အတည်ပြုဖို့ မေမေနဲ့ တိုက်ရိုက် ဆက်သွယ်ခွင့်ကို ကျနော် တောင်းဆိုပါတယ်” ဟု ပြောသည်။ စက်တင်ဘာလ အစောပိုင်းတွင် အသက် ၈၀ အရွယ် ဒေါ်အောင်ဆန်းစုကြည်မှာ နုလုံးပိုင်းဆိုင်ရာ အခြေအနေ ပိုဆိုးလာနေပြီး အရေးပေါ် ဆေးကုသမှု လိုအပ်နေကြောင်း သားဖြစ်သူ ကိုထိန်လင်းက ထုတ်ဖော်ပြောဆိုခဲ့ သည်။ ဒေါ်အောင်ဆန်းစုကြည်သည် အကျဉ်းကျနေသည့် အချိန်ကာလအတွင်း လုံလောက်သော ဆေးဝါးကုသမှု မရသည့်အပြင် အခြေခံ လူ့အခွင့်အရေးများလည်း ဆုံးရှုံးနေကြောင်း ကိုထိန်လင်းက ထောက်ပြသည်။ လွတ်လပ်ရေးနှင့် ဒီမိုကရေစီအတွက် တိုက်ပွဲဝင်ခဲ့သည့် မိခင်သည် အကျဉ်းထောင်တွင်း သေဆုံးမှုမျိုးနှင့် မရင်ဆိုင်သင့်ကြောင်းလည်း ၎င်းက ပြောသည်။ ကိုထိန်လင်းက “အသက် ၈၀ အရွယ် ကျနော် မေမေကို ဖမ်းဆီးချုပ်နှောင်ထားတဲ့ အကျဉ်းထောင် အခြေအနေ တွေက မေမေ့ရဲ့ ကျန်းမာရေးကို ထိခိုက်စေမှာ အသေအချာပါ။ မေမေဟာ သူ့ရဲ့ အခြေခံ လူ့အခွင့်အရေးတွေ ကို ပိတ်ဆို့ခံနေရပါတယ်။ မြန်မာပြည်သူတွေ၊ မေမေ့ရဲ့ မိသားစုတွေနဲ့ ကမ္ဘာတစ်ဝန်းက မေမေ့အကြောင်း သိ လိုသူတွေဟာ မေမေရဲ့ အမှန်တကယ် အခြေအနေကို သိခွင့်ရှိတယ်။ မေမေ့မှာလည်း အမှန်တရား၊ လွတ်လပ် ခွင့်၊ လူ့ဂုဏ်သိက္ခာနဲ့ နေထိုင်ဖို့ အခွင့်အရေးရှိတယ်” ဟု ဆက် ပြောသည်။ မိခင်ကြီးက နှလုံးအထူးကုဆရာဝန်ကို တွေ့ချင်ကြောင်း တောင်းဆိုထားသော်လည်း ယနေ့အချိန်ထိ မည်သည့် နေရာတွင် ထိန်းသိမ်းခံရသည်ကိုပင် မသိရသေးဘူးဟု ဆိုသည်။ ဒေါ်အောင်ဆန်းစုကြည်ကို စစ်ကော်မရှင်တပ်က နှစ်ပေါင်း ၂၀ ကျော် ထောင်ဒဏ်ချမှတ်ထားခြင်း ဖြစ်သည်။ သားငယ်ဖြစ်သူ ကိုထိန်လင်းက မိခင် ဒေါ်အောင်ဆန်းစုကြည်နှင့် တွေ့ဆုံခွင့်ပေးဖို့အပြင် ဆေးကုသခွင့်ပေးဖို့ကို တောင်းဆိုထားသည်။ အလားတူ အာရက္ခတပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်ကလည်း ကင်မ်အဲရစ်နှင့် ယခုလ ၆ ရက်နေ့တွင် အွန်လိုင်း၌တွေ့ဆုံစဉ် ဒေါ်အောင်ဆန်းစုကြည်၏ ကျန်းမာရေးအတွက် စိုးရိမ်ကြောင်း ထုတ်ဖော် ပြောကြားခဲ့သည်။ မကြာသေးမီက ဗြိတိန် နိုင်ငံခြားရေး ဝန်ကြီးဟောင်း William Hague ကလည်း ဒေါ်အောင်ဆန်းစုကြည်ကို ချက်ချင်းလွှတ်ပေးရန် တောင်းဆိုထားသည်။ ဒေါ်အောင်ဆန်းစုကြည်၏ ကျန်းမာရေး နှင့် လွတ်မြောက်ရေးအတွက် နိုင်ငံတကာ အသိုင်းအဝိုင်းနှင့် ပြည်သူများ ၏ ဖိအားပေးမှုများ ဆက်လက်မြင့်တက်နေသည်။

ဒေါ်အောင်ဆန်းစုကြည် ကျန်းမာကြောင်း သက်သေပြရန် စစ်ကော်မရှင်ကို သားဖြစ်သူ ကိုထိန်လင်း တောင်းဆို

Sep 10

ဝက်လက်ကို စစ်တပ်က နှစ်ရက်ဆက်တိုက် လေကြောင်းမှ ဗုံးကြဲတိုက်ခိုက်၊ ၄ ယောက်သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၀ ရက်။ စစ်ကိုင်းတိုင်း ဝက်လက်မြို့နယ်ထဲ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှု နှစ်ရက်ဆက်တိုက် လုပ်ခဲ့ရာ ကလေး အပါအဝင် အရပ်သားများ သေဆုံးခဲ့သည်။ စက်တင်ဘာလ ၁၀ ရက်နေ့နှင့် စက်တင်ဘာလ ၉ ရက်နေ့ နှစ်ရက်ဆက်တိုက် ဝက်လက်မြို့ နယ်ထဲ စစ်တပ်က လေယာဉ်သုံး ဗုံးကြဲတိုက်ခိုက်ခဲ့ခြင်း ဖြစ်သည်။ ဝက်လက်မြို့နယ် အရှေ့ခြမ်းရှိ သစ်ဆိပ့်ကျေးရွာက စာသင်ကျောင်းကို တံတားဦးဘက်မှ တက်လာသည့် J-Frighter ဖြင့် ပေါင် ၃၀၀ ဗုံးဖြင့် ကြဲခဲ့ခြင်း ဖြစ်သည်။ စက်တင်ဘာလ ၁၀ ရက်နေ့ ဖြစ်စဉ်နှင့် ပတ်သက်၍ မြေပြင် သတင်းအရင်းအမြစ်က “ဒီနေ့မှာ ပေါင် ၃၀၀ ဗုံသီး သုံးပြီး ဗုံးကြဲခဲ့ပါတယ်။ သစ်ဆိပ့် ရွာ စာသင်ကျောင်းထဲကို တံတားဦးက တက်လာတဲ့ ဂျက်ဖိုက်တာနဲ့ ၁၂ ကျော် လောက်မှာ ကြဲသွားတာပါ။ ပေါင် ၃၀၀ ဗုံသီးနဲ့ လေကြောင်းကနေ တစ်ကြိမ်ကြဲခဲ့တယ်လို့ သတင်းရထား တယ်။ အဲ့မှာက တိုက်ပွဲ ဖြစ်တာမျိုး မရှိဘူးဗျ” ဟု ပြောသည်။ ထို့အပြင် စက်တင်ဘာလ ၉ ရက်နေ့ကလည်း ဝက်လက်မြို့နယ်ထဲကို စစ်တပ်က လေကြောင်းမှ ဗုံးကြဲတိုက်ခိုက် ခဲ့သောကြောင့် ကလေး ၁ ဦး အပါအဝင် အရပ်သား ၄ ဦး သေဆုံးခဲ့တယ်လို့ Wetlet Informational Network (ဝက်လက် သတင်းကွန်ရက်) က ထုတ်ပြန်သည်။ အဆိုပါ လေကြောင်းတိုက်ခိုက်ခံရမှုထဲ အရပ်သား ၁၃ ဦးလည်း ထိမှန်ဒဏ်ရာ ရခဲ့သည်ဟု ထုတ်ပြန်ထားသည်။ ဝက်လက်မြို့နယ် အရှေ့ခြမ်းတွင် စစ်သင်္ဘောများကို ခြံရံပြီး ပျံသန်းနေသည့် Y-12 လေယာဉ်က သစ်ဆိပ့်၊ အင်ဒေါင်း၊ ရုံပင်ကုန်း၊ မင်းကုန်း၊ နဘဲပင်လှနှင့် တပ်သာကျေးရွာတို့ကို ဗုံးကြဲ တိုက်ခိုက်ခဲ့ခြင်း ဖြစ်သည်။

ဝက်လက်ကို စစ်တပ်က နှစ်ရက်ဆက်တိုက် လေကြောင်းမှ ဗုံးကြဲတိုက်ခိုက်၊ ၄ ယောက်သေဆုံး

« Prev 1 … 4 5 6 7 8 … 10 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အမေရိကန် နိုင်ငံရောက် နိုင်ငံခြား သားများ ငွေလွှဲမှုကို အခွန် ၂၅ % ထိတိုးမြှင့်ရန် ပြင်ဆင်နေ
အိန္ဒိယ ဖွား သားအမိ အင်္ဂလန်တွင် တပြိုင်တည်း မြို့တော်ဝန်များ ဖြစ်
စစ်ပွဲတွင် ပတ်သက်နေသည့် ဆော်ဒီတွင် ဘုရားဖူး ၁.၅ သန်းကျော် ဟာဂျီဝတ်ပြုပွဲ ဆင်နွှဲ
ကုလသမဂ္ဂ နျူလက်နက် မပြန့်ပွားရေး ညီလာခံ သဘောတူညီချက်မရပဲ အဆုံးသတ်
Meta, Tiktok နှင့် Google နည်းပညာ ကုမ္ပဏီများ ငွေလိမ် ကြော်ငြာများ မဖယ်ရှားဟု EU ကို တိုင်ကြား

Archives

Archives

×Close