NMG Doh – Page 147 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Jul 3

မိုးဗြဲလမ်းမကို စစ်ကောင်စီ ထိန်းချုပ်၊ မြို့နေရာများကို PNA နေရာယူ၊ တော်လှန်ရေးတပ်များ အကူအညီလိုအပ်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ မိုးဗြဲ လမ်းမကြီးကို စစ်ကောင်စီ ပြန်လည်ထိန်းချုပ်ပြီးနောက် မြို့တွင်းတိုက်ပွဲများ ဆက်လက် ပြင်းထန်နေ သည်ဟု မြေပြင် သတင်းအရင်းအမြစ်များက ပြောသည်။ ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်၊ မိုးဗြဲလမ်းမကြီး အပါအဝင် မြို့နေရာ အများစုကို စစ်ကောင်စီ၊ ပအိုဝ်းပြည်သူ့စစ်အဖွဲ့ (PNA) တပ်များ ဝင်ရောက်နေယူထားပြီဟု မြေပြင်စစ်ရေး သတင်း အရင်းအမြစ်များက ပြောသည်။ မိုးဗြဲမြို့တွင် တိုက်ပွဲဝင်နေသည့် မြေပြင်စစ်ရေး သတင်းအရင်းအမြစ် တစ်ဦးက “ဘောလုံးကွင်း တစ်ဝိုက်မှာ စစ်ကောင်စီ၊ PNO တွေ ရောက်နေပြီ။ ကင်းစခန်းတွေတော့ ကျသွားပြီ။ မြို့ထဲမှာတော့ တိုက်ပွဲဖြစ်နေတုန်းပဲ။ လက်နက်ကြီးနဲ့ လေကြောင်း ပစ်ကူက အားသာတော့ ကြာရင် တောင့်ခံဖို့ ခက်တယ်” ဟု ပြောသည်။ မိုးဗြဲမြို့၊ ပြည်ထောင်စု လမ်းမကြီး အနီးတစ်ဝိုက်ရှိ ဈေးကုန်း၊ သာယာကုန်း စသည့် ရပ်ကွက်များ အပါအဝင် အရေးပါသည့် နေရာအများစုကို စစ်ကောင်စီတပ်က ယမန်နေ့ည (ဇူလိုင်လ ၂ ရက်နေ့) ၌ ပြန်လည် ထိန်းချုပ် နိုင်ခဲ့ခြင်း ဖြစ်သည်။ မိုးဗြဲမြို့ကို ၂၀၂၄ ခုနှစ် နိုဝင်ဘာလမှ စတင်၍ စစ်ကောင်စီတပ်၊ ပအိုဝ်းပြည်သူ့စစ်အဖွဲ့ (PNA) ပူးပေါင်းတပ်တို့ က စစ်မှုထမ်းအသစ်များ အဓမ္မခေါ်ယူပြီး သာလွန်အင်အားဖြင့် ၈ လကြာ ထိုးစစ်ဆင်ခဲ့ခြင်း ဖြစ်သည်။ တောင်ကြီးမြို့၊ အရှေ့ပိုင်းတိုင်း စစ်ဌာနချုပ် (ရပခ) မှ လွိုင်ကော်မြို့အား မိုးဗြဲလမ်းမကြီးမှ ဖြတ်သန်းသွားလာ ပါက ၉၆ မိုင်သာ ကွာဝေးပြီး ယခု သွားလာရသည့် ဆီဆိုင်လမ်းကြောင်းမှာ မိုင် ၂၀၀ ကျော်ခန့် ကွာဝေးသဖြင့် မိုးဗြဲမြို့မှာ စစ်ကောင်စီ ထောက်ပို့လမ်းကြောင်းအတွက် အချက်အချာကျသည်ဟု ဆိုကြသည်။ မြေပြင်အရင်းအမြစ် တစ်ဦးက “ဆီဆိုင်လမ်းက ကားကြီးသွားဖို့ ခက်တယ်။ သူတို့ မိုးဗြဲရသွားရင် အများကြီး အားသာသွားပြီ။ ပင်လောင်း၊ ညောင်ရွှေဖက်ကနေ သူတို့ (စစ်ကောင်စီ) စစ်မှုထမ်း အများကြီးနဲ့ ခေါ်တက်လာ တာ။ အခြေအနေက တိုက်နေတုန်းဆိုတော့ စောင့်ကြည့်ရမှာပဲ” ဟု ဆက်ပြောသည်။ ပြီးခဲ့သည့် ဇွန်လမှ စတင်၍ ယနေ့ (ဇူလိုင် ၃ ရက်နေ့) အထိ တိုက်ပွဲအတွင်း ကရင်နီ အမျိုးသားများ ကာကွယ် ရေးတပ် (KNDF) ၁၀၂ တပ်ရင်းမှ တပ်စိတ်မှူး တစ်ဦး၊ ပအိုဝ်း အမျိုးသားများ ကာကွယ်ရေးတပ် (PNDF) ၁၀၁၁ တပ်စိတ်မှူး တစ်ဦး အပါအဝင် တပ်ဖွဲ့ဝင် ၄၀ ကျော် ကျဆုံးခဲ့သည်ဟု မြေပြင်တပ်ဖွဲ့ဝင်များက ဆိုသည်။ လက်ရှိ မိုးဗြဲတိုက်ပွဲတွင် KNDF၊ PNDF၊ ဒီးမော့ဆို LPDF၊ မိုးဗြဲ LPDF၊ URF နှင့် ကရင်နီပြည်သူ့ လွတ်မြောက် ရေး တပ်မတော် (KPLA) တို့ ပူးပေါင်း တိုက်ခိုက်လျက်ရှိပြီး လက်နက်ခဲယမ်းနှင့် အကူအညီများစွာ လိုအပ်နေသည်ဟု ဆိုသည်။ စစ်ကောင်စီတပ်က ရွေးကောက်ပွဲ ကျင်းပနိုင်ရေး အတွက် မိုးဗြဲမြို့အား ရရှိရန် လိုအပ်နေပြီး ထိုမှတဆင့် လွိုင်ကော်၊ ဒီးမော့ဆို၊ ဘော်လခဲ စသည့်မြို့နယ်များသို့ ဆက်လက် ထိုးစစ်ဆင်နိုင်မည် ဖြစ်သည်။ မိုးဗြဲမြို့ကို ၂၀၂၃ ခုနှစ် နိုဝင်ဘာလ ၁၁ ရက်နေ့က စတင်ခဲ့သည့် တစ်လေးလုံး စစ်ဆင်ရေးအတွင်း ကရင်နီ တော်လှန်ရေး အင်အားစုများမှ တိုက်ခိုက်သိမ်းယူခဲ့ခြင်း ဖြစ်ပြီး ယင်းကာလများက မြို့တစ်မိုင်ကျော် အကွာ အဝေးတွင် စစ်ကောင်စီ၏ ခြေမြန်တပ်ရင်း ခမရ ၄၄၂ ကျန်ရှိခဲ့ခြင်း ဖြစ်သည်။ သို့ဖြစ်၍ စစ်ကောင်စီတပ်က ခမရ ၄၄၂ မှတဆင့် ခြေကုတ်ယူ၍ ပင်လောင်း ဖယ်ခုံလမ်းအတိုင်း သာလွန် အင်အားအသုံးပြုပြီး လက်နက်ကြီး၊ လေကြောင်း ပစ်ကူများဖြင့် တန်ပြန် ထိုးစစ်ဆင်နေခြင်း ဖြစ်သည်ဟု မြေပြင်အရင်းအမြစ်များက ဆိုသည်။

မိုးဗြဲလမ်းမကို စစ်ကောင်စီ ထိန်းချုပ်၊ မြို့နေရာများကို PNA နေရာယူ၊ တော်လှန်ရေးတပ်များ အကူအညီလိုအပ်နေ

Jul 3

နောင်ချို ဗုံးကြဲ၊ အရပ်သား ၃ ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ ရှမ်းမြောက် နောင်ချိုမြို့နယ်ထဲက သုံးဆယ်ကျေးရွာကို စစ်တပ်က လေကြောင်းမှ ဗုံးကြဲတိုက်ခိုက်ခဲ့ရာ ဒေသခံ အရပ်သား ၃ ဦး သေဆုံးပြီး ၁ ဦး ဒဏ်ရာရရှိခဲ့သည်။ ဇူလိုင်လ ၁ ရက်နေ့ မွန်းလွှဲပိုင်း ၃ နာရီကျော်အချိန်ခန့်တွင် စစ်ကောင်စီတပ်သည် လေကြောင်းမှ ဗုံးကြဲခဲ့ခြင်း ဖြစ်သည်ဟု နောင်ချို ဒေသခံ အမျိုးသားတစ်ဦးက ပြောသည်။ “သုံးဆယ်ရွာကို လေကြောင်း ဗုံးကြဲတဲ့သတင်းက ဟုတ်ပါတယ်ဗျာ။ စစ်တပ်က လေကြောင်းကနေ ဗုံးကြဲ သွားတာ၊ လာကြဲတာတော့ လေးခေါက်ပေါ့နော်။ အဲ့မှာ ပြည်သူ ၃ ယောက်သေတယ်။ တစ်ယောက် ဒဏ်ရာ ရတယ်။ ၁ ရက်နေ့ ၃ နာရီကျော်ကျော်လောက်မှာ လာတာပါ လေယာဉ်က။ လေးခေါက်လုံး ဆက်တိုက်ပေါ့ ဗျာ။ ပြောရမယ်ဆိုရင် အခြေအနေက အမြဲစိုးရိမ်နေရတဲ့ အခြေအနေပါဗျ။” စစ်ကောင်စီက ဦးဆောင်ပြီး ငြိမ်းချမ်းရေး ဆွေးနွေးပွဲ ကျင်းပနေသော်လည်း တဖက်တွင် နိုင်ငံတဝှမ်း လေကြောင်း ဗုံးကြဲမှုများမှာ ရပ်တန့်မသွားခဲ့ပေ။ နောင်ချိုမြို့နယ်ထဲက သုံးဆယ်ကျေးရွာအား လေယာဉ်ဖြင့် လေးကြိမ်ဆက်တိုက် ဗုံးကြဲခဲ့ခြင်းဖြစ်ပြီး ဗုံး ၁၁ လုံးကြဲချ တိုက်ခိုက်ခဲ့သည်ဟု တအာင်းတပ်မတော် TNLA က ထုတ်ပြန်ထားသည်။ လေကြောင်း ဗုံးကြဲမှုထဲ ထိမှန်သေဆုံးသူ ၃ ဦးမှာ အမျိုးသားများ ဖြစ်သည့်အပြင် ထိခိုက်ဒဏ်ရာ ရထားသူ တစ်ဦးမှာလည်း အမျိုးသားဖြစ်သည်ဟု ဆိုသည်။ အရပ်သားများ ထိခိုက် သေဆုံးမှုများအပြင် သုံးဆယ်ကျေးရွာအတွင်းက အိမ်နှစ်လုံးနှင့် ဘုန်းကြီးကျောင်း နှစ်ကျောင်းလည်း ထိမှန်ပျက်စီးခဲ့သည်။ နောင်ချိုမြို့နယ်ထဲတွင် စစ်ကောင်စီတပ်၏ လေကြောင်း တိုက်ခိုက်မှုများအပြင် မြေပြင်၌လည်း စစ်တပ်နှင့် တအာင်းတပ်မတော် TNLA တို့အကြား တိုက်ပွဲများ ပြင်းထန်စွာ ဖြစ်ပွားနေကြသည်။ နောင်ချိုမြို့တွင်း တိုက်ပွဲ အခြေအနေနှင့် ပတ်သက်၍လည်း ဒေသခံတစ်ဦးက “နောင်ချိုမြို့နယ်ထဲက အုမ္မခါး၊ မျက်ချီးနု၊ လုံစံနဲ့ ကျောက်တောရွာတွေမှာတော့ တိုက်ပွဲက ဆက်တိုက် ဖြစ်နေတယ်။ ဒီနေ့အထိလည်း ဖြစ် တုန်းပဲ။ မြို့နဲ့ နီးလားဆိုတော့ နီးတယ်လို့ပဲ ပြောရမှာပေါ့ဗျာနော်။ စစ်တပ်ကလည်း အင်အားတွေ ထပ်တိုးတာ ရော၊ ဒီဘက် TNLA ကလည်း ဆက်တိုက်နေတာရော ဆိုတော့ တိုက်ပွဲကတော့ မရပ်ပါဘူး။ ဒီအတိုင်းပဲ ဆက် ဖြစ်နေတာဗျ” ဟု ပြောသည်။ စစ်ကောင်စီတပ်က တအာင်းတပ်မတော် TNLA က ထိန်းချုပ်ထားသည့် မြို့ရွာများထဲ လေကြောင်းမှ ဗုံးကြဲ တိုက်ခိုက်မှုများ လုပ်လျှက်ရှိရာ ဇွန်လ ၂၉ ရက်နေ့ကလည်း ကျောက်မဲမြို့အား ဂျက်ဖိုက်တာဖြင့် ဗုံးကြဲမှုကြောင့် အမျိုးသမီး ၂ ဦးနှင့် အမျိုးသား ၄ ဦး ထိမှန်ဒဏ်ရာရရှိခဲ့သေးသည်။ ထိုကြောင့် မိဘပြည်သူများ အနေဖြင့် စစ်ကောင်စီတပ်၏ လေ ကြောင်း တိုက်ခိုက်မှုများကို ရှောင်ရှားနိုင်ရန် စစ်ရေးသတိ အမြဲရှိကြဖို့နှင့် လေကြောင်းရန် ကာကွယ်ရေးဆိုင်ရာ နည်းလမ်းများ လိုက်နာဆောင်ရွက်ရန်လည်း လိုအပ်ကြောင်း TNLA က သတိပေးထားသည်။

နောင်ချို ဗုံးကြဲ၊ အရပ်သား ၃ ဦးသေဆုံး

Jul 3

နိုင်ကျဉ်းများ အသက်အန္တရာယ် စိုးရိမ်ရဟု NUG ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ နိုင်ငံတဝှမ်းက အကျဉ်းထောင်များ အတွင်းရှိ နိုင်ငံရေး အကျဉ်းသားများ အားလုံး၏ ကျန်းမာရေးနှင့် အသက် အန္တရာယ်မှာ အထူးစိုးရိမ်နေရဟု အမျိုးသား ညီညွတ်ရေး အစိုးရ (NUG) ပြောသည်။ ဖမ်းဆီး ထိန်းသိမ်းခံနေရသော သမ္မတ ဦးဝင်းမြင့်နှင့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် အပြင် နိုင်ကျဉ်းအားလုံး၏ ကျန်းမာရေး အခြေအနေနှင့် အသက်အန္တရာယ်အတွက် အထူးစိုးရိမ်သည်ဟု NUG က ဆိုသည်။ NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းဘတ်က “နိုင်ငံ့ ခေါင်းဆောင်တွေ ဖြစ်တဲ့ နိုင်ငံတော် သမ္မတ ဦးဝင်းမြင့်၊ နိုင်ငံတော် အတိုင်ပင်ခံ ပုဂ္ဂိုလ် ‌ဒေါ်အောင်ဆန်းစုကြည်တို့ဟာလည်း အကြမ်းဖက် စစ်တပ်ရဲ့ မတရား ဖမ်းဆီးချုပ်နှောင်မှုကို ခံထားရပြီး လုံလောက်တဲ့ ဆေးဝါးကုသမှုတွေ ရရှိမနေကြတာကြောင့် ဒီနိုင်ငံ ခေါင်း ဆောင်တွေနဲ့ နိုင်ငံရေး အကျဉ်းသား အားလုံးရဲ့ ကျန်းမာရေးနဲ့ အသက်အန္တရာယ်ကို အမျိုးသား ညီညွတ်ရေး အစိုးရ အနေနဲ့ အထူးပင် စိုးရိမ်မကင်း ဖြစ်မိပါတယ်” ဟု ပြောသည်။ ဇူလိုင်လ ၁ ရက်နေ့တွင် ပြုလုပ်သော ပြည်သူလူထုနှင့် နိုင်ငံတကာသို့ သတင်းစကား ပြောကြားခြင်း အစီအစဉ် ၌ ဦးနေဘုန်းလတ်က ပြောဆိုလိုက်ခြင်း ဖြစ်သည်။ ဇွန်လ ၂၇ ရက်နေ့က မန္တလေး အိုးဘိုထောင်အတွင်း မန္တလေးတိုင်း လွှတ်တော် ဥက္ကဋ္ဌ ဦးအောင်ကျော်ဦး သည် အချိန်မှီ ဆေးကုသခွင့် မရသောကြောင့် သေဆုံးခဲ့ပြီးနောက် နိုင်ငံရေး အကျဉ်းသားများသည် ထောင်တွင်း ကျန်းမာရေး စောင့်ရှောက်မှု လုံလုံလောက်လောက် မရရှိမှုနှင့် ဖိနှိပ်မှုများကြောင့် မသေဆုံးသင့်ဘဲ အသက် ဆုံးရှုံးနေကြရသည် ဟု ဦးနေဘုန်းလတ်က ဆိုသည်။ အိုးဘိုထောင်တစ်ခု တည်းမှာပင် ၂၀၂၄ ခုနှစ်အတွင်း မန္တလေးတိုင်း ဝန်ကြီးချုပ် ဒေါက်တာဇော်မြင့်မောင် အပါ အဝင် နိုင်ငံရေး အကျဉ်းသား ၃ ဦး ဆက်တိုက် သေဆုံးခဲ့သည်။ ထို့အပြင် မတ်လ ၂၈ ရက်နေ့ကလည်း စစ်ကိုင်းငလျင်အပြင် ဆေးကုသမှု အချိန်မှီမရဘဲ နှောင့်နှေးမှုများကြောင့် မသေဆုံးသင့်ဘဲ သေဆုံးခဲ့ရသည့် နိုင်ငံရေးအကျဉ်းသား အ ယောက် ၅၀ ဦးကျော် ရှိခဲ့သည်။ အဆိုပါ အသက်ဆုံးရှုံးမှုများ အတွက် အကျဉ်းထောင်အတွင်း တာဝန်ရှိသူများ အနေဖြင့် တာဝန်ယူ တာဝန်ခံ ရမည်ဟု ဦးနေဘုန်းလတ်က ဆက်ပြောသည်။ “အကြမ်းဖက် စစ်အုပ်စုရဲ့ လက်အောက်ခံ အကျဉ်းထောင်တွေက အကျဉ်းဦးစီး အရာရှိတွေနဲ့ တာဝန်ရှိသူတွေ အနေနဲ့ နိုင်ငံရေး အကျဉ်းသားတွေ အပေါ် ရက်စက်စွာ ပြုမူ ဖိနှိပ်နေတဲ့ လုပ်ရပ်တွေအတွက် တာဝန်ယူ တာဝန် ခံ ကြရမှာဖြစ်ကြောင်း ပြောကြားလိုပါတယ်။” ထို့အပြင် စစ်ကိုင်းငလျင် လှုပ်ခတ်ခဲ့သည့်နေ့၌ ဒေါ်အောင်ဆန်းစုကြည်၏ ဘယ်ဘက်လက် ဒဏ်ရာရရှိခဲ့ပြီး စိုးရိမ်ရသော အခြေအနေ ရှိနေကြောင်း Suu Foundation က ဇွန်လ ၁၈ ရက်နေ့တွင် ထုတ်ပြန်ထားသည်။ မတ်လ ၂၈ ရက်နေ့က စစ်ကိုင်းမြို့အနီး အခြေပြုလှုပ်ခတ်ခဲ့သော ငလျင်ကြောင့် နေပြည်တော်တွင် ထိခိုက် ပျက်စီးမှု များပြားခဲ့ပြီး ဒေါ်အောင်ဆန်းစုကြည်အား ချုပ်နှောင်ထားသည့် ထောင် အဆောက်အအုံမှာ ပျက်စီးခဲ့ ကာ ဒေါ်အောင်ဆန်းစုကြည်၏ ဘယ်ဘက်လက် ထိခိုက်ဒဏ်ရာရခဲ့သည်ဟု Suu Foundation က ထုတ်ပြန်ထားသည်။

နိုင်ကျဉ်းများ အသက်အန္တရာယ် စိုးရိမ်ရဟု NUG ပြော

Jul 3

ဒေါ်အောင်ဆန်းစုကြည် မွေးနေ့ ကဗျာရွတ်သော နိုင်ကျဉ်းများ တိုက်ပိတ်ခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ ဒေါ်အောင်ဆန်းစုကြည် မွေးနေ့တွင် ကဗျာရွတ်ဖတ် ဂုဏ်ပြုကြသည့် နိုင်ကျဉ်းများ ရိုက်နှက် တိုက်ပိတ်ခံထားရ သည်။ မန္တလေးတိုင်း၊ မြင်းခြံခရိုင်၊ မြင်းခြံအကျဉ်းထောင်တွင် နိုင်ငံရေးအကျဉ်းများကို ထောင်အာဏာပိုင်များနှင့် အကျဉ်းဦးစီးဌာန ဝန်ထမ်းများက ရိုက်နှက်၍ တိုက်ပိတ်ထားကြသည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများ ကွန်ယက် (PPNM) က ထုတ်ပြန်သည်။ PPNM ဦးဆောင် ကော်မတီဝင်ဖြစ်သူ မရောင်နီလင်းက “မြင်းခြံထောင်မှာရှိတဲ့ နိုင်ငံရေး အကျဉ်းသားတွေက ကဗျာ ရွတ်ဖတ်ခဲ့တယ်ပေါ့နော်။ ကဗျာရွတ်ဖတ်ခဲ့မှု အပေါ်မှာ ချက်ချင်းပဲ အဲဒီ လူတွေကို ထုတ်တယ်။ ထုတ် ပြီးတော့ ရိုက်နှက်တယ်။ တချို့လူတွေကိုတော့ ခြေကျင်းခတ်ပြီးတော့ တိုက်ပိတ်ခဲ့တယ်။ ရိုက်နှက်ပြီးတော့ နေပူ လှန်းသေးတယ်ပေါ့နော်။ ၂ ရက်လောက် နေပူခေါ်လှန်းပြီးမှပဲ ခြေကျင်းခတ်ပြီးတော့ တိုက်ပိတ်တာမျိုး တွေ လုပ်ခဲ့တယ်ပေါ့” ဟု ပြောသည်။ ဇွန်လ ၁၉ ရက်နေ့၌ ကျရောက်သည့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် မွေးနေ့တွင် ကဗျာရွတ်ဖတ် ဂုဏ်ပြုခဲ့သဖြင့် ရိုက်နှက်တိုက်ပိတ် ခံထားရခြင်း ဖြစ်သည်။ ဇူလိုင်လ ၂ ရက်နေ့ အထိ တိုက်ပိတ်ခံထားရသည့် နိုင်ကျဉ်းများအား ဆေးကုသခွင့် မပေးဘဲ ထောင်ဝင်စာနှင့် ပါဆယ်များလည်း ပိတ်ထားသဖြင့် အကူညီများ လိုအပ်နေကြသည်ဟု အကျဉ်းဦးစီးနှင့် နီးစပ်သူများက ပြော သည်။ အဆိုပါ ဖြစ်စဉ်မှာ ထောင်စည်းမျဉ်းစည်းကမ်းများ ချိုးဖောက်ခြင်း၊ ထောင်၏ လုံခြုံရေး ပေါက်ကြားသည့် ကိစ္စရပ်များ မဟုတ်သဖြင့် တိုက်ပိတ်သည့် ပြစ်ဒဏ်အား လက်မခံနိုင်ဟု PPNM တာဝန်ရှိသူများက ဆို သည်။ မရောင်နီလင်းက “မြန်မာနိုင်ငံလုံးဆိုင်ရာ နိုင်ငံရေးအကျည်းသားများ ကွန်ယက်အနေနဲ့ ဒီလိုမျိုး ကဗျာလေး ဖတ်ရုံမျှနဲ့ပေါ့နော်။ လူအခွင့်ရေး ချိုးဖောက်နေတဲ့ အကစဝန်ထမ်းတွေ၊ အာဏာပိုင်တွေပေါ့နော် ကျနော်တို့ လူအခွင့်ရေး ပြန်လည်ရရှိတဲ့ အချိန်မှာ တရားမျှတမှု ပြန်လည် ရရှိရန်အတွက် ကြိုးစားအားထုတ်သွား ပါမယ် ရှင့်။ ကြိုးစားဆောင်ရွက်သွားပါမယ်” ဟု ဆက်ပြောသည်။  စစ်ကိုင်းတိုင်း၊ မုံရွာထောင်မှ မန္တလေးတိုင်း၊ အိုးဘိုထောင်သို့ ပြောင်းရွှေ့လာသည့် နိုင်ငံရေးအကျဉ်းသားများ အပါအဝင် အကျဉ်းသား ၂၀၀ ခန့်မှာ ဇွန် ၁၂ ရက်နေ့တွင် ရိုက်နှက်ခံခဲ့ရပြီး ရိုက်နှက်ခံရသူများအတွင်း မုံရွာသပိတ်ခေါင်းဆောင် ကိုဝေမိုးနိုင်မှာ သွေးထွက်လွန်မှုကြောင့် သတိလစ်သွားခဲ့သည်။ အလားတူ မြန်မာတစ်နိုင်ငံလုံးရှိ စစ်ကောင်စီ ထိန်းချုပ်ထားနိုင်ဆဲဖြစ်သော အကျဉ်းထောင်များတွင်လည်း ဒေါ်အောင်ဆန်းစုကြည် မွေးနေ့၌ ကမ်ပိန်း ပြုလုပ်သူများ၊ ကဗျာရွတ်ဖတ်သူများ၊ သံချပ်ထိုးသူများကိုလည်း ဖိနှိပ်မှုများ ပြုလုပ်ခဲ့သေးသည်ဟု ထောင်နှင့် နီးစပ်သူများက ဆိုကြသည်။

ဒေါ်အောင်ဆန်းစုကြည် မွေးနေ့ ကဗျာရွတ်သော နိုင်ကျဉ်းများ တိုက်ပိတ်ခံရ

Jul 3

စစ်မှုထမ်း စုဆောင်းရာတွင် လာဘ်ယူမှုဖြင့် အုပ်ချုပ်ရေးမှူး နှစ်ဦး ဖမ်းဆီး စစ်ဆေးခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ စစ်မှုထမ်း စုဆောင်းရာတွင် လာဘ်ယူမှုဖြင့် ရှမ်းပြည်၏ မြို့တော်၊ တောင်ကြီးတွင် အုပ်ချုပ်ရေးမှူး ၂ ဦးအား ပြည်သူ့စစ်မှုထမ်း စုဆောင်းရေးဗဟိုမှ ဖမ်းဆီးစစ်ဆေးနေသည်ဟု အုပ်ချုပ်ရေးအဖွဲ့နှင့် နီးစပ်သူများက ပြောသည်။ တောင်ကြီးမြို့၊ စိန်ပန်းရပ်ကွက် အုပ်ချုပ်ရေးမှူး ဦးသန်းရွှေနှင့် ရွှေတောင်ရပ်ကွက် အုပ်ချုပ်ရေးမှူး ဦးသောင်းရွှေ တို့အား စစ်မှုထမ်း ကင်းလွတ်ခွင့် ပေးမည်ဟုဆိုကာ သိန်း ၁၀၀ ကျပ် လာဘ်ယူခဲ့သည့်အတွက် မိသားစုဝင်များမှ တိုင်ကြားထားခြင်း ဖြစ်သည်။ ရွှေတောင်ရပ်ကွက်ရုံးနှင့် နီးစပ်သူ တစ်ဦးက “အုပ်ကြီးက သိန်းတစ်ရာပေးရင် စစ်မှုထမ်းလွတ်မယ်ဆိုပြီး တောင်းတာ။ တကယ်တမ်း ခေါ်တဲ့အခါမှ ပါသွားတော့ မကျေနပ်တော့ ရပ်စောက် ဗထူးတပ်ကို လှမ်းတိုင်တာ။ ဟိုကလည်း သူတို့ကိုင်လို့မရတော့ နေပြည်တော်တင်လိုက်တာ။ အခုတော့ နေပြည်တော် ပို့လိုက်ပြီ” ဟု ပြော သည်။ စစ်မှုထမ်း မဲပေါက်သည့် ကရင်နီ စစ်ဘေးရှောင် လူငယ်တစ်ဦးမှာ ဇွန်လအတွင်း တောင်ကြီးမြို့ ကံကြီးရပ်ကွက် တွင် တိမ်းရှောင်နေစဉ် အုပ်ချုပ်ရေးမှူး ၂ ဦးက သိန်း ၁၀၀ ကျပ် တောင်းခံ၍ အညီအမျှ ခွဲယူခဲ့သည်ဟု ဆိုသည်။ သို့ရာတွင် မိသားစုဝင်များမှ တိုင်ကြားမှုကြောင့် တောင်ကြီးမြို့ အမှတ် ၁ ရဲစခန်းတွင် စစ်ဆေးခဲ့ပြီးနောက် ယခု ဇူလိုင်လတွင် ပြည်သူ့စစ်မှုထမ်း ခေါ်ယူရေးအဖွဲ့ ဗဟိုသို့ ဆက်လက်ပို့ဆောင်ကာ စစ်ဆေးနေခြင်း ဖြစ်သည်။ စိန်ပန်းရပ်ကွက်အတွင်း နေထိုင်သည့် စစ်မှုထမ်းအကျုံးဝင်သူ တစ်ဦးက “မဲပေါက်တဲ့လူက ပေးစရာမရှိတော့ မြေကွက်ရောင်းပြီး ပေးလိုက်တာ။ အဲ့ဒါ Facebook မှာ တင်ကြတော့ ဟိုးလေးတကျော် ဖြစ်သေးတယ်။ သတင်းထွက်လို့ ဖမ်းတာတော့ မဟုတ်ပါဘူး။ ဖမ်းမယ်ဆိုရင် သတင်းထွက်နေတာက သန်းရွှေတစ်ယောက်ထဲ မဟုတ်ဘူးလေ။ တိုင်ပြီး တော်တော်ကြာတော့မှ ခေါ်စစ်တာပါ” ဟု ပြောသည်။ စိန်ပန်းနှင့် ရွှေတောင်ရပ်ကွက်မှာ ခြံစည်းရိုးချင်း ထိစပ်လျက်ရှိပြီး အုပ်ချုပ်ရေးမှူး ၂ ဦးမှာလည်း ဆွေးမျိုး တော်စပ်သည်ဟု ပုဂ္ဂိုလ်ရေးအရ နီးစပ်သူများက ဆိုကြသည်။ ရွှေတောင်ရပ်ကွက်ရုံးနှင့် နီးစပ်သူ တစ်ဦးက “အရင်နှစ်ကလည်း လက်နက်မှောင်ခိုမှုနဲ့ ရဲက ခေါ်စစ်သေးတယ်။ သူတို့ချင်း လက်ဝါးရိုက်ထားတော့ ပြန်လွတ် လာတာ။ ရဲက အာရကေ (ပိုက်ဆံ) ဆို သိပ်ကြိုက်တာလေ။ ဒီတခါလည်း ပြန်လွတ်မယ် ထင်တယ်။ သူတို့ လူပဲလေ ထောင်မချလောက်ပါဘူး” ဟု ဆက်ပြောသည်။ ရွှေတောင်နှင့် စိန်ပန်းရပ်ကွက်တို့တွင် စစ်မှုထမ်းကြေးအတွက် အိမ်ထောင်စုတိုင်းမှ အနည်းဆုံး လစဉ် ၃ သောင်းကျပ် ထည့်ဝင်နေရပြီး မဲပေါက်သူများမှာ သိန်းဂဏန်းအထိ ပေးဆောင်နေရကြရသည်။ အမျိုး၊ ဘာသာ၊ သာသနာအဖွဲ့၏ ပြည်နယ်ခေါင်းဆောင် ဖြစ်သည့် ဦးသန်းရွှေမှာ လက်ရှိ မြို့နယ် စစ်မှုထမ်း ခေါ်ယူရေးအဖွဲ့နှင့် ဒေသတွင်း ပျူစောထီး ခေါင်းဆောင်လည်း ဖြစ်ပြီး တောင်ကြီးမြို့အတွင်း လက်နက် ကိုင်ဆောင်ခွင့် ရထားသည့် တစ်ဦးတည်းသော အုပ်ချုပ်ရေးမှူး ဖြစ်သည်ဟု ဆိုကြသည်။ တောင်ကြီးမြို့က စိန်ပန်း၊ ရွှေတောင်နှင့် ရတနာသီရိရပ်ကွက်တို့၏ အုပ်ချုပ်ရေးမှူးများမှာ ပြည်သူ့စစ်မှုထမ်း ဥပဒေ စတင်ကတည်းက လာဘ်ပေးလာဘ်ယူမှု အများဆုံး နာမည်ဆိုးဖြင့် ကျော်ကြားသူများ ဖြစ်ကြသည်ဟု မြို့နေပြည်သူများက ပြောသည်။

စစ်မှုထမ်း စုဆောင်းရာတွင် လာဘ်ယူမှုဖြင့် အုပ်ချုပ်ရေးမှူး နှစ်ဦး ဖမ်းဆီး စစ်ဆေးခံရ

Jun 30

စစ်ကောင်စီ တပ်ဖွဲ့ဝင် တစ်ဦးက အသက် ၇၀ ကျော် အမျိုးသမီးအား လင်ယောက်ျားရှေ့တွင် နှစ်ရက် ဆက်တိုက် မုဒိမ်းကျင့် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၃၀ ရက်။ တနင်္သာရီတိုင်း ထားဝယ်ခရိုင် လောင်းလုံးမြို့နယ်အတွင်းတွင် အသက် ၇၀ အရွယ် အမျိုးသမီးကို စစ်ကောင်စီတပ်ဖွဲ့ဝင် တစ်ဦးက ယောက်ျား ဖြစ်သူ ရှေ့တွင် နှစ်ရက်ဆက်တိုက် မုဒိမ်းကျင့်ခဲ့သည်ဟု နှင်းဆီရောင် အမျိုးသမီးသမဂ္ဂ (ထားဝယ်) က ပြောသည်။ ကညုံကျွန်းကျေးရွာတွင် တပ်စွဲခဲ့သည့် စစ်ကောင်စီတပ်ထဲမှ တပ်ဖွဲ့ဝင်တစ်ဦးက အဆိုပါ အမျိုးသမီးကြီးကို မုဒိမ်းကျင့်ခဲ့ခြင်း ဖြစ်သည်ဟု ဆိုသည်။ နှင်းဆီရောင် အမျိုးသမီးသမဂ္ဂ (ထားဝယ်) အဖွဲ့ တာဝန်ရှိသူက “ဒီလောင်းလုံးမှာ ကျမတို့ အခြေစိုက်လှုပ်ရှား နေတဲ့အတွင်းမှာ ဒီလို ဖြစ်ရပ်မျိုးကတော့ ပထမဆုံးလို့ ပြောလို့ရတယ်ပေါ့နော်။ အဲ့ဖြစ်စဉ်နဲ့ ပတ်သက်ပြီး တော့ ကျမတို့ မှတ်တမ်း ပြုစုထားပါတယ်။ ဘယ်အချိန်မှာ ဘယ်လိုဖြစ်ခဲ့တယ် ဆိုတာကိုပေါ့နော်” ဟု ပြော သည်။ ဇွန်လ ၁၄ ရက်နေ့မှ ကနေ ဇွန်လ ၂၄ ရက်နေ့ အထိ တပ်စွဲခဲ့သည့် စစ်ကောင်စီတပ်ထဲမှ တပ်ဖွဲ့ဝင် တစ်ဦးက အမျိုးသမီးကြီးအား ခင်ပွန်းဖြစ်သူ၏ ရှေ့၌ နှစ်ရက်ဆက်တိုက် ငါးကြိမ်တိုင် မုဒိမ်းကျင့်ခဲ့သည်ဟု နှင်းဆီရောင် အမျိုးသမီးသမဂ္ဂ (ထားဝယ်) အဖွဲ့ တာဝန်ရှိသူက ပြောသည်။ မုဒိမ်းကျင့်ခဲ့သည့် စစ်သားမှာ အသက် ၄၀ ကျော်အရွယ် ဖိုးချေ ဆိုသူဖြစ်ပြီး ကျူးလွန်ခံရသည့် အမျိုးသမီးကို နှင်းဆီရောင် အမျိုးသမီးသမဂ္ဂ (ထားဝယ်) က တွေ့ဆုံမေးမြန်းခဲ့ခြင်း ဖြစ်သည်ဟု ဆိုသည်။ ကျန်းမာရေးမကောင်းသည့် ခင်ပွန်း ဖြစ်သူကို ပြုစုရန်နှင့် အဆိုပါ အမျိုးသမီးသည်လည်း အသက်အရွယ် ကြီးပြီ ဖြစ်သဖြင့် ကျေးရွာအတွင်းသို့ စစ်ကောင်စီ စစ်ကြောင်းဝင်လာချိန်တွင် မတိမ်းရှောင်ဘဲ နေအိမ်၌ နေခဲ့သည့် အချိန်တွင် မုဒိမ်းပြုကျင့် ခံခဲ့ရခြင်းဖြစ်သည်။ လက်ရှိတွင် မုဒိမ်းကျင့်ခံခဲ့ရသည့် အမျိုးသမီးကြီးသည် ရုပ်ပိုင်းဆိုင်ရာ၊ စိတ်ပိုင်းဆိုင်ရာနှင့် ကျန်းမာရေး အခြေ အနေများ ကျဆင်းလျက်ရှိပြီး အထူး ဂရုတစိုက်နှင့် စောင့်ရှောက်ရန် လိုအပ်နေသည်ဟု နှင်းဆီရောင် အမျိုးသမီးများ သမဂ္ဂ (ထားဝယ်) အဖွဲ့ တာဝန်ရှိသူက ပြောသည်။ “အခုချိန်မှာ သူကခန္ဓာကိုယ် အောက်ပိုင်းလည်း နာကျင် ကိုက်ခဲနေတယ်။ ပြီးရင်လည်း သူအားဆေးတွေရော ပိုးသတ်ဆေးတွေလည်း သောက်နေရတယ်။ ပြီးအမျိုးသမီး အင်္ဂါကနေလည်း သွေးတွေ ထွက်ထားတဲ့ခါကြ တော့ လမ်းကလည်း ပုံမှန် ကောင်းကောင်း မလျှောက်နိုင်တဲ့ အနေအထား ရှိနေတာဆိုတော့လေး မနေ့ညဆို သူက ဆေးကုသမှုခံယူနေတဲ့ အနေအထားရှိတယ်ပေါ့နော်။ စိတ်ပိုင်းဆိုင်ရာကိစ္စက သူစစ်ကောင်စီကို အရမ်းကြောက်နေတဲ့ အနေအထားရှိတယ်။” ပြည်သူများ အနေဖြင့် လက်ရှိ စစ်ကောင်စီ လက်ထက်တွင် တရားမျှတမှု ရရှိရန်အတွက် မည့်သည့်နေရာ၊ မည်သူမည်ဝါကို တောင်းဆိုရမည်ကိုပင် မသိကြသလို စိုးရိမ်ကြောက်လန့်နေကြသည်ဟု ဆိုသည်။ စစ်တပ်က အာဏာသိမ်းပြီးချိန်မှ ယနေ့အချိန်ထိ ဒေသတွင်း အုပ်ချုပ်ရေး ယန္တရားများ ပျက်စီးကုန်သည့်အပြင် တရားဥပဒေစိုးမိုးရေးလည်း မရှိတော့ဘဲ စစ်ကောင်စီ တပ်ဖွဲ့ဝင်များကသာ ခြိမ်းခြောက်မှုများ၊ နိုင်ထက် စီးနင်းမှုများ အပြင် အမျိုးမျိုးသော လူ့အခွင့်အရေး ချိုးဖောက်မှုများကိုသာ ကျူးလွန်လျှက်ရှိနေသည်။ နှင်းဆီရောင် အမျိုးသမီးများ သမဂ္ဂ (ထားဝယ်) အဖွဲ့ တာဝန်ရှိသူက “ဖက်ဆစ် စစ်တပ်ဆိုတဲ့အတိုင်း သူတို့က ကျမတို့ ပြည်သူတွေအပေါ်မှာ နည်းမျိုးစုံနဲ့ အရက်စက်ဆုံး အကြမ်းကြုတ်ဆုံး နည်းလမ်းတွေပဲ အသုံးပြု ပြီးတော့ ညှင်းပန်း နှိပ်စက်မယ် ဖိနှိပ်ချုပ်ချယ်မယ်၊ အနိုင်ကျင့်မယ် စော်ကားမယ် အဲ့လိုမျိုးပဲ သူတို့ လုပ်တယ် ပေါ့နော်။ အခုချိန်မှာ ကျမတို့အနေနဲ့ကတော့ ဘယ်နေ့ ဘယ်အချိန်မှာ သူတို့လုပ်ခဲ့လဲဆိုတာ သေချာ မှတ်တမ်း ပြုစုထားဖို့ လိုမယ်ပေါ့နော်။ ဒီစစ်တပ်မှာ တရားမျှတမှုရဖို့အတွက် သွားပြီးတော့ တောင်းဆိုတာက အခုအချိန် မှာ ဘယ်လိုမှ မဖြစ်နိုင်ဘူးလေးနော်။ အဲ့လိုမျိုး မတရား အာဏာသိမ်းထားတဲ့ စစ်တပ်ကို ကျမတို့သွားပြီးတော့ တရားမျှတမှုရအောင် လုပ်ဖို့က တော်တော်လေးကို ခဲယဉ်းတယ်ပေါ့နော်” ဟု ပြောသည်။ ယခုကဲ့သို့ စစ်ကောင်စီ လက်အောက်ခံ တပ်ဖွဲ့ဝင်များ၏ ကျူးလွန်မှုအပေါ် နှင်းဆီရောင် အမျိုးသမီးများ သမဂ္ဂ (ထားဝယ်) အနေဖြင့် အပြင်းအထန် ကန့်ကွက်ရှုတ်ချသည်ဟု ဆိုသည်။ အဆိုပါ စစ်ကောင်စီတပ်သည် ဇွန်လ ၁၄ ရက်နေ့တွင် လောင်းလုံးမြို့ပေါ်မှ ကညုံကျွန်းကျေးရွာသို့ စစ်ကြောင်း ထိုးလာသည့် လမ်းတလျှောက်ရှိ ကျေးရွာများက ဒေသခံ တစ်ရာခန့်ကိုလည်း ဖမ်းဆီးခဲ့သေးသည်။ အလားတူ အသက် ၄၆ နှစ် အရွယ် ဦးမျိုးဇော်အောင် (ခ) ဦးမျိုးကြံအောင်ကိုလည်း လည်လှီးသတ်ဖြတ်ခဲ့ပြီး စစ်ပြဲကျေးရွာနှင့် လောင်းလုံးမြို့ကြား ဆီအုန်းတောထဲတွင် စွန့်ပစ်ခဲ့သည်ဟု ဒီမိုကရေစီ အရေး လှုပ်ရှားမှု သပိတ်ကော်မတီ (ထားဝယ်) က ထုတ်ပြန်ထားသည်။ ကညုံကျွန်းကျေးရွာတွင် တပ်စွဲနေထိုင်စဥ်အတွင်း နေအိမ်အချို့နှင့် ဆိုင်ကယ်များကိုလည်း မီးရှို့ဖျက်ဆီးခဲ့ပြီး နေအိမ်ရာချီကိုလည်း ဖောက်ထွင်းဝင်ရောက်ကာ တန်ဖိုးကြီးပစ္စည်းများကို ယူသွားခဲ့သည်ဟု ဒေသခံများက ဆိုသည်။ ဓါတ်ပုံ - DDMSC

စစ်ကောင်စီ တပ်ဖွဲ့ဝင် တစ်ဦးက အသက် ၇၀ ကျော် အမျိုးသမီးအား လင်ယောက်ျားရှေ့တွင် နှစ်ရက် ဆက်တိုက် မုဒိမ်းကျင့်

Jun 30

ပလက်ဝ သည် ချင်းပြည်နယ်၏ အစိတ်အပိုင်းဖြစ်ကြောင်း ချင်းညီနောင်အဖွဲ့ဝင်များက လက်ခံထားသည်ဟု ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၃၀ ရက်။ ပလက်ဝမြို့နယ်မှာ ချင်းပြည်ထဲက မြို့နယ်၊ ချင်းပြည်၏ အစိတ်အပိုင်း ဖြစ်သည်ဟု ချင်းညီနောင် အဖွဲ့ဝင် အားလုံးက လက်ခံထားသည်ဟု ပြောဆိုလိုက်သည်။ အာရက္ခတပ်တော် ULA/AA က သိမ်းပိုက်ထိန်းချုပ်ထားသော ပလက်ဝမြို့နယ်မှာ ချင်းပြည်၏ အစိတ်အပိုင်း ဖြစ်ကြောင်း အားလုံးက တညီတညွတ်ထဲ လက်ခံထားသည်ဟု ချင်းညီနောင်အဖွဲ့ - CB က ပြောရေးဆိုခွင့်ရှိသူ များ ပြောသည်။ ချင်းညီနောင်အဖွဲ့ ပြောရေးဆိုခွင့်ရှိသူ ဆလိုင်းယောမာန် “ပလက်ဝသည် ချင်းပြည်ဆိုတာကို ချင်းညီနောင်အဖွဲ့ အားလုံးက တညီတညွတ်တည်း ယုံကြည်လက်ခံကြတယ် ဆိုတာ ပြောလိုပါတယ်။ ဒါက ညီနောင်တင်မက တစ်နိုင်ငံလုံးကသိကြပါတယ်” ဟု ပြောသည်။ ဆလိုင်းယောမန်က သတင်းစာရှင်းလင်းပွဲ၌ မီဒီယာများ၏ မေးမြန်းမှုအပေါ် ဇွန်လ ၁၈ ရက်က ဖြေဆိုခဲ့ခြင်း ဖြစ်သည်။ ပလက်ဝမြို့နယ်ကို အာရက္ခတပ်တော် ULA/AA က ရခိုင်ပြည်၏ ခရိုင်တစ်ခုအဖြစ် သတ်မှတ်လိုက်ကြောင်း သတင်းများ ထွက်ပေါ်နေခြင်း ဖြစ်သည်။ ထို့အပြင် ရခိုင်ပြည် အခြေစိုက် မီဒီယာတစ်ခုတွင် ပလက်ဝကို ရခိုင်ပြည်၏ အမှတ် (၈) ခရိုင်အဖြစ် သတ်မှတ်လိုက်ကြောင်း ဇွန်လ ၁၂ ရက်နေ့က သတင်းဖော်ပြခဲ့ပြီးနောက် ချင်းအဖွဲ့အစည်းများနှင့် ချင်းလူထုအကြား ဝေဖန်ပြောဆိုမှုများ မြင့်တက်လာခဲ့သည်။ ပလက်ဝခရိုင်ကို ရခိုင်ပြည်အတွင်း ထည့်သွင်းဖွဲ့စည်းမှုနှင့် ပတ်သက်၍ ULA/AA ကတော့ တရားဝင် ထုတ်ပြန် လာခြင်းမျိုး မရှိသေးပေ။ အလားတူ AA စစ်ဦးစီးချုပ် ဗိုလ်ချုပ်ထွန်းမြတ်နိုင် ကိုယ်တိုင်ကလည်း ပလက်ဝမြို့နယ်သည် ချင်းပြည်ထဲက ဖြစ်ကြောင်း မီဒီယာနှင့် တွေ့ဆုံမေးမြန်းချိန်က ဖြေကြားထားပြီး ဖြစ်သည်ဟု ဆလိုင်းယောမာန်က ပြောသည်။ အာရက္ခတပ်တော် ULA/AA က အိမ်နီးချင်းကောင်း ထက်ပိုသည့် ရဲဘော်ရဲဘက်များ ဖြစ်သည်ဟု ဆလိုင်း ယောမာန်က ဆိုသည်။ တော်လှန်ရေးကာလတွင် နိုင်ငံရေး အမြတ်ထုတ်ချင်သော သဘောနှင့် လူမျိုးရေးမုန်းတီးရေး ပြောဆိုမှုများ ရှိနေသော ကြောင့် အားလုံး သတိထားကြဖို့ လိုသည်ဟုလည်း ဆလိုင်းယောမာန်က သတိပေးပြောဆိုထားသည်။ လက်ရှိ အခြေအနေအရ စစ်ကောင်စီကို တိုက်ခိုက်ရေးကသာ အဓိက အလေးထား ဆောင်ရွက်ရမည့် အချိန် ဖြစ်သည်ဟု ဆလိုင်းယောမာန်က ဆက်ပြောသည်။ “ကျနော်တို့ ဒီအခြေအနေဟာ စစ်ကောင်စီ ပြုတ်ကျရေးကို အလေးထားရမယ့် အချိန် ဆိုတာကို အားလုံး ပြန် အမှတ်ရဖို့လိုတယ်။ စစ်ကောင်စီ ပြုတ်ကျမသွားဘူးဆိုရင် မည်သည့် ထိန်းချုပ်နယ်မြေမဆို အလဟသတ်ပဲ။” ချင်းလက်နက်ကိုင် တော်လှန်ရေး အဖွဲ့အစည်းတစ်ခု ဖြစ်သည့် ချင်းအမျိုးသားတပ်ဦး CNF/CNA ပြောရေး ဆိုခွင့်ရှိသူ ဆလိုင်းထက်နီကလည်း AA ၏ ပလက်ဝဒေသအပေါ် ထိန်းချုပ်မှုကို ဒေသတည်ငြိမ်ရေးအတွက် ယာယီတာဝန်ယူမှု အဖြစ် လက်ခံသည်ဟု ဆိုသည်။ အဆိုပါ အချက်မှာ ပလက်ဝဒေသ၏ အချုပ်အခြာ အာဏာပိုင်ဆိုင်မှုကို အဆုံးအဖြတ်ပေးခြင်း မဟုတ်ဘူးဟု မီဒီယာများအား မကြာခဏ ပြောဆိုလေ့ရှိသည်။ ပလက်ဝမြို့နယ်က ရခိုင်ပြည်နှင့် နယ်မြေထိစပ်နေပြီး အိန္ဒိယ-မြန်မာ ကုလားတန်မြစ်ကြောင်း ဘက်စုံ သယ်ယူ ပို့ဆောင်ရေး စီမံကိန်းလမ်းကြောင်းပေါ်တွင် ရှိခြင်း ဖြစ်သည်။ အာရက္ခတပ်တော် AA က ၂၀၂၄ ခုနှစ်၊ ဇန္နဝါရီလ ၁၄ ရက်နေ့တွင် ပလက်ဝမြို့နယ်ကို စစ်ကောင်စီလက်ကနေ တိုက်ခိုက် သိမ်းပိုက်ခဲ့ပြီးနောက် အုပ်ချုပ်ရေးနှင့် တရားစီရင်ရေး ကိစ္စရပ်များကို ဆောင်ရွက်နေခြင်း ဖြစ်သည်။

ပလက်ဝ သည် ချင်းပြည်နယ်၏ အစိတ်အပိုင်းဖြစ်ကြောင်း ချင်းညီနောင်အဖွဲ့ဝင်များက လက်ခံထားသည်ဟု ပြော

Jun 30

ဗလာမပါ မဲနှိုက်ပြီး ယာဉ် ချောဆွဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၃၀ ရက်။ ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရ ဒေသတွင် အများပြည်သူပိုင်ဆိုင်သည့် ယာဉ်များကို စစ်ကောင်စီ တပ်က ဖိအားပေး ချောဆွဲအသုံးပြုနေသည်ဟု ဒေသခံများက ပြောသည်။ ပင်းတယနှင့် ရွာငံမြို့နယ်ရှိ ကျေးရွာများတွင် ဗလာမပါ မဲနှိုက်စနစ်ဖြင့် ရွေးချယ်၍ ဒေသခံများ ပိုင်ဆိုင်သည့် ယာဉ်များကို ရှေ့တန်းစစ်မြေပြင်အတွက် ဇွန်လ နောက်ဆုံးပတ်အတွင်း ချောဆွဲအသုံးပြုနေခြင်း ဖြစ်သည်။ ပင်းတယဒေသခံ ယာဉ်ပိုင်ဆိုင်သူ တစ်ဦးက “ဖယ်ခုံအရှေ့ဘက်ကမ်းမှာ ဖြစ်နေတဲ့ စစ်ပွဲအတွက်သုံးမှာ။ ထွေအုပ် ကတဆင့် စုံစမ်းထားတာ။ မဲက ၄ ယောက်နှိုက်ရင် ၄ ယောက်လုံး ပေါက်တယ်။ ကားကလည်း ဒီတိုင်းပေးလို့ မရဘူး။ သူတို့ သတ်မှတ်ချက် ရှိတယ်။ ဆီဖြည့်ပေးရမယ် ဘာညာပေါ့။ ဘာကားဖြစ်ဖြစ် အကုန်ပါတယ်” ဟု ပြောသည်။ မဲပေါက်သည့် ကားများမှာ ဆီအပြည့် ဖြည့်ပေးရခြင်း၊ ယာဉ်ကြံ့ခိုင်မှု ရှိအောင် စစ်ဆေးပေးရခြင်း၊ ကားပိုင်ရှင် က စစ်မြေပြင်အထိ ယာဉ်မောင်းအဖြစ် လိုက်ပါပေးရခြင်း စသည့် စည်းကမ်းချက်များစွာ သတ်မှတ်ထားသည် ဟု ဒေသခံများက ပြောသည်။ လက်ရှိ ချောဆွဲနေသည့် ကားများမှာ Hijet, Light Truck, Candar, Dyna စသည့် ၁၄ ပေအောက် ကုန်ယာဉ် များ အများဆုံးဖြစ်ပြီး အိမ်စီးကား အချို့လည်း ပါဝင်ကြသည်ဟု ဆိုသည်။ ပင်းတယမြို့နယ် ထွေအုပ်နှင့် နီးစပ်သူ တစ်ဦးက “သူတို့ခေါ်ရင် မောင်းမယ့်လူက အဆင့်သင့် ရှိနေရတယ်။ ကားစစ်တာလည်း ကိုယ့်အိတ်စိုက်ပဲ။ အခန့်မသင့်ရင် လူပါသေဦးမယ်။ အိမ်သုံးကားတွေတော့ မဲမနှိုက်ရဘူး။ သူတို့က ဒါယူမယ်ဆို ချက်ချင်း လိုက်ရတယ်။ ပိုက်ဆံက အနည်းဆုံး တစ်သောင်း ထည့်ရတယ်။ Without (လိုင်စင်မဲ့) ဆိုရင်တော့ ပြန်မရဘူး” ဟု ပြောသည်။ လတ်တလော စုံစမ်းမှုအရ ပင်းတယနှင့် ရွာငံမြို့နယ်တို့တွင် ယာဉ်အစီးရေပေါင်း ၂၀ ကျော်အထိ ချောဆွဲ အသုံးပြုထားပြီး ယာဉ်အများစုမှာ စစ်ကောင်စီတပ်က အသုံးပြုပြီးသည့်အချိန်တွင် နေအိမ်အရောက် ပြန်လာ ပို့သော်လည်း အချို့မှာ ရက်ပေါင်းများစွာ ကြာသည်အထိ ပြန်မပို့သောကြောင့် ယာဉ်ပိုင်ရှင်များက စိုးရိမ်ပူပန် နေကြရသည်။ စစ်ကောင်စီမှ ထိုသို့ ချောဆွဲမှုများကြောင့် ဒေသခံများ အနေဖြင့် ယာဉ်ပြင်ဆင်မှုအတွက် ငွေကုန်ကြေးကျ များစွာရှိခြင်း၊ အချို့ယာဉ် အပိုပစ္စည်းမှာ ရှားပါးခြင်း၊ စက်သုံးဆီ ဝယ်ယူရန် မလွယ်ကူခြင်း စသည့် အခက်အခဲ များစွာနှင့် ကြုံတွေ့နေရသည်ဟု ယာဉ်ပိုင်ရှင်များ ပြောပြချက်အရ သိရသည်။

ဗလာမပါ မဲနှိုက်ပြီး ယာဉ် ချောဆွဲ

Jun 27

လက်နက်ကြီးကြောင့် ပဲခူးတိုင်းအတွင်း အရပ်သား ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၇ ရက်။ ပဲခူးတိုင်း ညောင်လေးပင်ခရိုင် မုန်းမြို့နယ်တွင် စစ်ကောင်စီတပ်၏ လက်နက်ကြီး ပစ်ခတ်မှုကြောင့် အရပ်သား ပြည်သူ ၂ ဦး ထိမှန် သေဆုံးခဲ့သည်။ စစ်ကောင်စီတပ်၏ လက်နက်ကြီး ပစ်ခတ်မှုကြောင့် မုန်းမြို့နယ်ရှိ ခြောက်အိမ်စု ကျေးရွာမှ အသက် ၃၀ နှစ် အရွယ် မဟန်နီ စိုးနှင့် ကညင်တဲ ကျေးရွာမှ အသက် ၂၀ နှစ်အရွယ် မောင်ဘုန်းချစ်နိုင် တို့ ၂ ဦး ပွဲချင်းပြီး သေဆုံး ခဲ့ရသည်ဟု KNU က ဇွန်လ ၂၇ ရက်နေ့ (ယနေ့) တွင် ထုတ်ပြန်သည်။ စစ်ကောင်စီတပ်၏ ကညွတ်ကွင်း အခြေစိုက် ခမရ ၄၃၉ တပ်စခန်းမှ လင်းရောင်ခင်ကျေးရွာသို့ ဇွန်လ ၂၆ ရက်နေ့ (ယမန်နေ့)က လက်နက်ကြီး ပစ်ခတ်ခဲ့သည်ဟု KNU က ပြောသည်။ ထိုပစ်ခတ်ခဲ့မှုကြောင့် လင်းရောင်ခင်ကျေးရွာသို့ ရောက်ရှိနေသည့် အခြားရွာမှ အရပ်သား ၂ ဦး ထိမှန် သေဆုံးခဲ့ ရခြင်းဖြစ်သည်ဟု KNU က ဆိုသည်။ ထို့အပြင် ကျောက်ကြီးမြို့နယ်ထဲတွင်လည်း နတ်သံကွင်း စစ်ကောင်စီတပ်မှ အင်းနက်လယ်ကွင်းပြင်သို့ ဇွန်လ ၂၄ ရက်နေ့က ၁၂၀ မမ လက်နက်ကြီး တစ်လုံးပစ်ခတ်ခဲ့သည်။ ထို့အတူ ပိန်းဇလုပ်အခြေစိုက် ခလရ-၂၆၄ စစ်ကောင်စီ တပ်မှလည်း ကညင်းကျိုးကျေးရွာထဲကို ဇွန်လ ၂၅ ရက်နေ့က ၁၂၀ မမ လက်နက်ကြီး ၂ လုံးနှင့် သမင်အင်းကုန်းရွာကို ၁ လုံး ပစ်ခတ်ခဲ့သည်ဟု KNU က ဆိုသည်။

လက်နက်ကြီးကြောင့် ပဲခူးတိုင်းအတွင်း အရပ်သား ၂ ဦး သေဆုံး

« Prev 1 … 145 146 147 148 149 … 1,048 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

တရုတ်ခရီးသွား လျော့နည်းသော်လည်း ဂျပန်ခရီးသွားလုပ်ငန်း စံချိန်တင်တိုးတက်
မော်စကိုနှင့် ရုရှားအနှံ့ ယူကရိန်းက ဒရုန်းစစ်ဆင်ရေး ဆင်နွှဲ
အီရန်က UAE နျူကလီးယားစက်ရုံကို ဒရုန်းဖြင့် တိုက်ခိုက်
ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်

Archives

Archives

×Close