NMG Doh – Page 150 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Dec 19

ဘင်္ဂလားဒေ့ရှ် နိုင်ငံမြို့တော် ဒါကာရှိ သတင်းစာတိုက် ၂ ခု မီးရှို့ခံရ သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ ဒီဇင်ဘာလ ၁၉ ရက်။ ဘင်္ဂလားဒေ့ရှ်နိုင်ငံ ဒါကာမြို့မှာ ဆန္ဒပြ လူအုပ်ကြီးထဲက လူတချို့က သတင်းစာ တိုက် ၂ ခုကို (ဒီဇင်ဘာ ၁၉ရက် ) ဒီကနေ့မှာ မီးရှို့ခဲ့လို့ သတင်းသမားတွေ ပိတ်မိနေခဲ့ပါတယ်။ Mr. Sharif Osmen Hadi (မစ္စတာ ရှာရစ်ဖ် အိုစမန် ဟာဒီ) လို့ခေါ်တဲ့ လူငယ်ခေါင်းဆောင်တစ်ဦး လုပ်ကြံခံရမှုနဲ့ ပတ်သက်ပြီး ဆန္ဒပြပွဲတွေ ပြင်းထန်နေတာလည်း ဖြစ်ပါတယ်။ ဘင်္ဂလားဒေ့ရှ်နိုင်ငံရဲ့ ၂၀၂၄ အရေးတော်ပုံမှာ အဓိကပါဝင်ခဲ့သူ အသက် ၃၂ နှစ်အရွယ် လူငယ်ခေါင်းဆောင် Mr. Hadi ဟာ ပြီးခဲ့တဲ့အပတ်က ဗလီတစ်ခုကအထွက်မှာ သေနတ်နဲ့ ပစ်ခတ်ခံခဲ့ရပါတယ်။ သူဟာ စင်ကာပူဆေးရုံမှာ ဆေးကုသမှုခံယူနေရင်း ဒီဇင်ဘာ ၁၈ ရက်နေ့မှာ ကွယ်လွန်သွားခဲ့ပါတယ်။ သူ့ကို သတ်ဖြတ်သူတွေကို အရေးယူပေးဖို့ တောင်းဆိုရာကနေ ဆန္ဒပြပွဲတွေ အရှိန်မြင့်လာပြီး ဒီဇင်ဘာ ၁၉ ရက်နေ့မှာ ဒါကာမြို့ရှိ နာမည်ကြီးသတင်းစာတိုက်တွေဖြစ်တဲ့ Prothom Alo နဲ့ The Daily Star အဆောက်အအုံတွေ မီးရှို့ဖျက်ဆီးခံခဲ့ရပါတယ်။ သတင်းထောက်တွေဟာ အဆောက်အအုံထဲမှာ ပိတ်မိနေခဲ့ပြီး မီးသတ်သမားတွေက ဝန်ထမ်း ၂၇ ဦးကို ကယ်ထုတ်ခဲ့ရပါတယ်။ The Daily Star သတင်းစာတိုက်သမိုင်းတစ်လျှောက် ပထမဆုံးအကြိမ်အဖြစ် သတင်းစာထုတ်ဝေမှု ရပ်နားခဲ့ရပါတယ်။ ဒီသတင်းစာတိုက်တွေဟာ အိန္ဒိယနိုင်ငံဘက်ကို ဘက်လိုက်တယ်လို့ စွပ်စွဲခံနေရတာ ဖြစ်ပါတယ်။ အခုသေဆုံးသွားတဲ့ လူငယ်ခေါင်းဆောင် Mr. Hadi ဟာလည်း အိန္ဒိယကို ပြင်းပြင်းထန်ထန် ဝေဖန်လေ့ရှိသူတစ်ဦး ဖြစ်ပါတယ်။ သတင်းစာတိုက် တာဝန်ရှိသူတွေက ဒါဟာ သတင်းလွတ်လပ်ခွင့်နဲ့ လွတ်လပ်စွာ သဘောထားကွဲလွဲခွင့်ကို တိုက်ခိုက်တာဖြစ်တယ်လို့ ဆိုပါတယ်။ သတင်းထောက်များ ကာကွယ်စောင့်ရှောက်ရေး ကော်မတီ (CPJ) ကလည်း ဒီအကြမ်းဖက်မှုကို စိုးရိမ်ကြောင်းနဲ့ တရားခံတွေကို အရေးယူဖို့ တိုက်တွန်းထားပါတယ်။ Mr. Hadi ပါဝင်ခဲ့တဲ့ Inqilab Mancha အဖွဲ့ကတော့ ဒီမီးရှို့ဖျက်ဆီးမှုတွေဟာ အခွင့်ကောင်းယူလိုသူတွေက လုပ်ဆောင်တာဖြစ်ပြီး သူတို့အဖွဲ့နဲ့ မသက်ဆိုင်ကြောင်း ငြင်းဆိုထားပါတယ်။ ဘင်္ဂလားဒေ့ရှ် ရဲတပ်ဖွဲ့က သေနတ်သမားတွေကို ဖမ်းဆီးနိုင်ဖို့အတွက် သံသယရှိသူ ဓာတ်ပုံတွေကို ထုတ်ပြန်ထားပြီး သတင်းပေးနိုင်သူကို တာကာ ၅ သန်း (စင်ကာပူဒေါ်လာ ၅ သောင်းကျော်) ဆုကြေးငွေ ထုတ်ပြန်ထားပါတယ်။

ဘင်္ဂလားဒေ့ရှ် နိုင်ငံမြို့တော် ဒါကာရှိ သတင်းစာတိုက် ၂ ခု မီးရှို့ခံရ

Dec 18

မြစ်ဆုံစီမံကိန်းကို ဒီဇိုင်းအသစ်ဖြင့် ပြန်စမည်ဟု စစ်ခေါင်းဆောင်တစ်ဦးပြော၊ ဒေသခံများစိုးရိမ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၈ ရက်။ ပြည်သူကန့်ကွက်ထားသည့် မြစ်ဆုံစီမံကိန်းကို 'ကွန်ကရစ်ကျောက်ဖြည့်တမံ' ဒီဇိုင်းအသစ်ဖြင့် ပြန်စရန် စစ်ကော်မရှင်တပ်က စီစဉ်နေသည့်အပေါ် ဒေသခံများ စိုးရိမ်နေကြသည်။ ပြည်သူတစ်ရပ်လုံး၏ ပြင်းပြင်းထန်ထန် ကန့်ကွက်မှုများကြောင့် ဆယ်စုနှစ်တစ်ခုကျော်ကြာ ရပ်ဆိုင်းထားခဲ့ရ သည့် ဧရာဝတီမြစ်ဆုံ ရေအားလျှပ်စစ်စီမံကိန်းကို "ကွန်ကရစ်ကျောက်ဖြည့်တမံ" (Concrete Faced Rockfill Dam - CFRD) ဒီဇိုင်းအသစ်ဖြင့် ပြန်လည်တည်ဆောက်ရန် စစ်ကော်မရှင်က စီစဉ်နေခြင်း ဖြစ်သည်။ ဒီဇင်ဘာလ ၁၆ ရက်နေ့က မြစ်ကြီးနားမြို့သို့ ရောက်ရှိနေသည့် ဒုတိယစစ်ခေါင်းဆောင် ဒုတိယဗိုလ်ချုပ်မှူးကြီး စိုးဝင်းက မြစ်ဆုံစီမံကိန်းကို ပြန်လည်စတင်ရန် တရုတ်ကုမ္ပဏီများနှင့် ဆွေးနွေးသဘောတူညီမှု ရရှိထားပြီ ဖြစ်ကြောင်း ပြောဆိုခဲ့သည်။ စီမံကိန်းသည် စစ်ကိုင်းပြတ်ရွေ့ကြောနှင့် နီးကပ်သော်လည်း ယခုဒီဇိုင်းအသစ်မှာ ငလျင်ဒဏ်ကို အထူးခံနိုင်ရည် ရှိမည် ဖြစ်ကြောင်းလည်း ၎င်းက ဆိုသည်။ စစ်ကော်မရှင်သည် ပြီးခဲ့သည့် လပိုင်းအတွင်းကလည်း မြစ်ဆုံစီမံကိန်း ဦးဆောင်အဖွဲ့ကို ပြန်လည်ဖွဲ့စည်းကာ စီမံကိန်းကို အတင်းအကျပ် ပြန်လည်အသက်သွင်းရန် ခြေလှမ်းပြင်လာခြင်း ဖြစ်သည်။ ယခုကဲ့သို့ စီမံကိန်းပြန်စမည့် အပေါ် နေရပ်စွန့်ခွာရမည့်အရေး ဒေသခံများက စိုးရိမ်လျှက်ရှိသည်။ မြစ်ဆုံ ဒေသခံအမျိုးသမီးတစ်ဦး “အရင်ကလည်း စီမံကိန်းကြောင့်ဆိုပြီး ကျမတို့ရွာတွေကို အတင်းရွှေ့ခိုင်းခဲ့ တာ။ အခုမှ နေသားတကျဖြစ်စ ပြုကာရှိသေးတယ်၊ နောက်ထပ်တစ်ခါ အိုးအိမ်တွေစွန့်ပြီး ပြေးရဦးမယ်ဆို တော့ ရင်ထဲမှာ ဘယ်လိုမှ မကောင်းဘူး။ ဒီမြစ်ကြီးက ကျမတို့ရဲ့ မိခင်လိုပဲ၊ အခုလိုမျိုး အတင်းအကျပ်ကြီး ထပ်လုပ်မယ်ဆိုတာက မတင်ကို လုပ်တာ။ တိုက်ပွဲတွေကလည်း ဖြစ်၊ နိုင်ငံရေးကလည်း မကောင်းတော့ ဒါကို အခွင့်ကောင်းယူပြီး လုပ်တာ” ဟု ပြောသည်။ ထို့အပြင် စီမံကိန်းပြန်စမည့်အပေါ် မြစ်ကြီးနားမြို့ခံ အမျိုးသားတစ်ဦးက ၎င်း၏ စိုးရိမ်ပူပန်မှုကို ယခုကဲ့သို့ ပြောသည်။ "ကျနော်တို့အတွက် မြစ်ဆုံဆိုတာ အသက်သွေးကြောပါ။ ငလျင်ဒဏ်ခံနိုင်ပါတယ်ဆိုတဲ့ စကားကို လုံးဝ မယုံ ကြည်ဘူး။ တမံကြီးသာ ကျိုးသွားရင် မြစ်ကြီးနားတင်မကဘူး ဧရာဝတီမြစ်ကမ်းဘေးက မြို့တွေအားလုံး ရေအောက်ရောက်ကုန်မှာ။ အခုက လူတွေကို အတင်းဖယ်ခိုင်းပြီး သဘာဝပတ်ဝန်းကျင်ကို ဖျက်ဆီးဖို့ လုပ်နေတာပါ။" မြစ်ဆုံစီမံကိန်းသည် ၂၀၁၁ ခုနှစ်ကတည်းက သဘာဝပတ်ဝန်းကျင် ပျက်စီးမည့်အန္တရာယ်နှင့် လူမှုစီးပွား ထိခိုက် မှုများကြောင့် တစ်နိုင်ငံလုံးအတိုင်းအတာဖြင့် ကန့်ကွက်ခဲ့ကြသဖြင့် ရပ်ဆိုင်းခဲ့ရခြင်းဖြစ်သည်။ ယခုစီမံကိန်းကြောင့် စင်္ကာပူနိုင်ငံ အရွယ်အစားခန့်ရှိသော နယ်မြေများ ရေနစ်မြုပ်နိုင်သည့်အပြင် လူပေါင်း သောင်းချီ နေရပ်စွန့်ခွာရမည့် ဘေးအန္တရာယ်ရှိနေကြောင်း ပတ်ဝန်းကျင်ထိန်းသိမ်းရေး ပညာရှင်များက သတိပေးထားသည်။ နိုင်ငံရေးလေ့လာသူများကမူ စစ်ကော်မရှင်တပ်သည် ၎င်းတို့၏ ထွက်ပေါက်အတွက် တရုတ်နိုင်ငံ၏ ထောက်ခံမှု ရရှိရန် ပြည်သူ့ဆန္ဒကို လစ်လျူရှုကာ မြစ်ဆုံစီမံကိန်းကို လုပ်ဆောင်နေခြင်းဖြစ်သည်ဟု ဝေဖန်ကြသည်။

မြစ်ဆုံစီမံကိန်းကို ဒီဇိုင်းအသစ်ဖြင့် ပြန်စမည်ဟု စစ်ခေါင်းဆောင်တစ်ဦးပြော၊ ဒေသခံများစိုးရိမ်

Dec 18

ရေဖြူ အုပ်ချုပ်ရေးရုံးများနှင့် ရွေးကောက်ပွဲရုံးကို တော်လှန်ရေး ပူးပေါင်းတပ်များ မီးရှို့ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၈ ရက်။ တနင်္သာရီတိုင်း၊ ရေဖြူမြို့ပေါ်ရှိ အုပ်ချုပ်ရေးယန္တရားများကို တော်လှန်ရေးပူးပေါင်းတပ်များ ဝင်ရောက်စီးနင်း ပြီးနောက် ရွေးကောက်ပွဲ ကော်မရှင်ရုံး အပါအဝင် အဆောက်အအုံ ၆ ခုကို မီးရှို့ဖျက်ဆီးခဲ့ကြသည်။ ရေဖြူမြို့ပေါ်ရှိ စစ်ကော်မရှင်၏ အုပ်ချုပ်ရေးယန္တရားများကို တော်လှန်ရေးပူးပေါင်းတပ်ဖွဲ့များက အလုံးအရင်း ဖြင့် ဝင်ရောက်စီးနင်းတိုက်ခိုက်ခဲ့ရာ ရေဖြူမြို့ကို ခေတ္တထိန်းချုပ်နိုင်ခဲ့သည့်အပြင် ရွေးကောက်ပွဲ ကော်မရှင်ရုံး အပါအဝင် အုပ်ချုပ်ရေးယန္တရားအဆောက်အအုံများကို မီးရှို့ရှင်းလင်းနိုင်ခဲ့ကြောင်း ပြည်သူ့ကာကွယ်ရေး တပ်မတော်၊ ထားဝယ်ခရိုင် အမှတ် (၁) တပ်ရင်းက သတင်းထုတ်ပြန်သည်။ ပြီးခဲ့သည့် ဒီဇင်ဘာလ ၁၂ ရက်နေ့တွင် ဖော်ဆောင်ခဲ့သော ဤစစ်ဆင်ရေးသည် စစ်ကော်မရှင်က ကျင်းပရန် ပြင်ဆင်နေသည့် အတုအယောင်ရွေးကောက်ပွဲကို တုံ့ပြန်ဆန့်ကျင်သည့်အနေဖြင့် လုပ်ဆောင်ခဲ့ခြင်းဖြစ်သည်။ တော်လှန်ရေးပူးပေါင်းတပ်ဖွဲ့များသည် ရေဖြူမြို့ပေါ်ရှိ အထွေထွေအုပ်ချုပ်ရေးဦးစီးဌာနရုံးနှင့် မြို့မရဲစခန်းတို့ကို ဝင်ရောက်စီးနင်းခဲ့ပြီး၊ တစ်ပြိုင်တည်းမှာပင် မြို့အနီးရှိ ခမရ (၄၀၆)၊ (၄၀၇)၊ အမတ (၃၀၄) တပ်ရင်းများနှင့် တံတားစစ်ဆေးရေးဂိတ်တို့ကို ဒရုန်းများ၊ လက်နက်ကြီးများဖြင့် အရှိန်အဟုန်မြှင့် တိုက်ခိုက်ခဲ့ကြသည်။ တိုက်ပွဲအခြေအနေနှင့်ပတ်သက်၍ တော်လှန်ရေးတပ်ဖွဲ့ဝင်တစ်ဦးက “တိုက်ပွဲက တော်တော်လေး ပြင်းထန်ခဲ့ တယ်။ အကြမ်းဖက် စစ်တပ်ဘက်က အယောက် ၂၀ နီးပါးလောက် ထိခိုက်သေဆုံးနိုင်တယ်လို့ ခန့်မှန်းရပါ တယ်။ ကျနော်တို့ဘက်ကတော့ မြို့ပေါ်က အုပ်ချုပ်ရေးယန္တရား အဆောက်အအုံ ၆ ခုထက်မနည်းကို မီးရှို့ ရှင်းလင်းနိုင်ခဲ့ ပြီး အထိအခိုက်မရှိ ပြန်လည်ဆုတ်ခွာနိုင်ခဲ့ပါတယ်” ဟု ပြောသည်။ ဤစစ်ဆင်ရေးကို ထားဝယ်အခြေစိုက် တော်လှန်ရေးမဟာမိတ် ၁၃ ဖွဲ့ဖြစ်သော TPLF၊ ထားဝယ်ခရိုင်အမှတ် (၁) တပ်ရင်း၊ ဒေါနစစ်ကြောင်းများ၊ ရေဖြူပကဖ၊ Ba Htoo Army နှင့် အခြားမဟာမိတ်တပ်ဖွဲ့များ စနစ်တကျ ပူးပေါင်းဖော်ဆောင်ခဲ့ခြင်းဖြစ်သည်။ တိုက်ခိုက်မှုအတွင်း ရွေးကောက်ပွဲကော်မရှင်ရုံး၊ ထွေအုပ်ရုံးနှင့် ရဲစခန်းအတွင်းရှိ အဆောက်အအုံအချို့ မီးလောင် ပျက်စီးခဲ့သည်။ မြို့ပေါ်စီးနင်းတိုက်ခိုက်ခံရပြီးနောက် လက်ရှိတွင် စစ်ကော်မရှင်ဘက်က ရေဖြူမြို့ပေါ်၌ စစ်အင်အား အလုံးအရင်း ထပ်မံဖြည့်တင်းထားသလို၊ အနီးနားရှိကျေးရွာများသို့လည်း စစ်ကြောင်းထိုး ဝင်ရောက်နေခြင်း ကြောင့် စစ်ရေးတင်းမာမှုများ ဆက်လက်မြင့်တက်နေသည်။ ဒေသခံ သတင်းရင်းမြစ်များ၏ အဆိုအရ ရေဖြူမြို့ ပတ်ဝန်းကျင်တွင် တိုက်ပွဲများ ဆက်လက်ဖြစ်ပွားနေပြီး ခရီးသွားပြည်သူများအနေဖြင့် လုံခြုံရေးသတိပြုကြရန်လည်း သတိပေးနှိုးဆော်ထားသည်။

ရေဖြူ အုပ်ချုပ်ရေးရုံးများနှင့် ရွေးကောက်ပွဲရုံးကို တော်လှန်ရေး ပူးပေါင်းတပ်များ မီးရှို့

Dec 18

မြောက်ဦး ဆေးရုံ ဗုံးကြဲမှု ညီနောင် မဟာမိတ် အဖွဲ့များ အပါအဝင် တော်လှန်ရေး အင်အားစုများ ရှုတ်ချ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၈ ရက်။ ရခိုင်ပြည်၊ မြောက်ဦးမြို့ရှိ ပြည်သူ့ဆေးရုံကြီးအား စစ်တပ်က လေကြောင်းမှ ဗုံးကြဲတိုက်ခိုက်ခဲ့ခြင်းကြောင့် ကလေးငယ်များ၊ ဆေးဝန်ထမ်းများနှင့် လူနာများ အစုလိုက် အပြုံလိုက် သေဆုံးခဲ့ရသည့် ဖြစ်စဉ်သည် ရက်စက် ကြမ်းကြုတ်သော စစ်ရာဇဝတ်မှုဖြစ်ကြောင်း တော်လှန်ရေးအင်အားစုများနှင့် ညီနောင်မဟာမိတ်များက ကန့်ကွက်ရှုတ်ချလိုက် သည်။ ဒီဇင်ဘာလ ၁၀ ရက်နေ့ အပြည်ပြည်ဆိုင်ရာ လူ့အခွင့်အရေးနေ့ညတွင် မြောက်ဦးဆေးရုံအား ပေါင် ၅၀၀ ဗုံးနှစ်လုံးဖြင့် ကြဲချခဲ့ခြင်းကြောင့် လသားအရွယ် ကလေးငယ်များ၊ ကိုယ်ဝန်ဆောင်မိခင်များနှင့် သက်ကြီးရွယ်အို များ အယောက် ၃၀ ကျော် သေဆုံးခဲ့ရပြီး ၇၇ ဦးထက်မနည်း ထိခိုက်ဒဏ်ရာရရှိခဲ့ခြင်းဖြစ်သည်။ သို့သော်လည်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကမူ ဒီဇင်ဘာလ ၁၅ ရက်နေ့တွင် ကျင်းပသည့် လေတပ် ၇၈ နှစ်မြောက် အခမ်းအနား၌ ယင်းလုပ်ရပ်များအား လုပ်ဆောင်ခဲ့သည့် လေတပ်အား တာဝန်ကျေပွန်မှုနှင့် "ရဲစွမ်းသတ္တိရှိခြင်း" ဟု ဂုဏ်ပြုပြောဆိုခဲ့သည်။ မြေပြင်က ဒေသခံတစ်ဦးက “ဗုံးက ဆေးရုံအလယ်တည့်တည့်ကို ကျတာ။ လူနာတွေက ကုတင်ပေါ်မှာတင် ပွဲ ချင်းပြီး သေကုန်ကြတာပါ။ သွေးအိုင်ထဲမှာ ကလေးငယ်လေးတွေရဲ့ ရုပ်အလောင်းတွေကို တွေ့ရတာဟာ ဘယ် လိုမှ မေ့လို့မရနိုင်တဲ့ စိတ်ဒဏ်ရာပဲပေါ့နော်။ ဒါဟာ တိုက်ပွဲမဟုတ်ဘူး၊ ဆေးရုံကို တမင်သက်သက် ရည်ရွယ် ချက်ရှိရှိ သတ်ဖြတ်ခဲ့တာပါ” ဟု ပြောသည်။ ဤစစ်ရာဇဝတ်မှုနှင့်ပတ်သက်၍ ညီနောင်မဟာမိတ်အဖွဲ့ဝင်များဖြစ်သည့် MNDAA နှင့် TNLA တို့က ဒီဇင်ဘာ လ ၁၆ ရက်နေ့တွင် ပူးတွဲထုတ်ပြန်ချက်တစ်ရပ် ထုတ်ပြန်ခဲ့ပြီး စစ်ကော်မရှင်၏ လုပ်ရပ်များသည် မြန်မာနိုင်ငံ အား "ကျရှုံးနိုင်ငံအဖြစ်သို့ အဆုံးစွန်ထိ တွန်းပို့နေခြင်း" ဖြစ်ကြောင်း ရှုတ်ချခဲ့သည်။ ထို့အပြင် ကုလသမဂ္ဂနှင့် ကမ္ဘာ့အင်အားကြီးနိုင်ငံများ အနေဖြင့် စစ်ကော်မရှင်တပ်၏ လုပ်ရပ်ဆိုးများကို အမြန်ဆုံး ရပ်တန့်ပေးရန်လည်း မေတ္တာရပ်ခံထားသည်။ တစ်ဆက်တည်းမှာပင် ဦးမင်းကိုနိုင် အပါအဝင် လူပုဂ္ဂိုလ်နှင့် အဖွဲ့အစည်း ၄၅ ခုတို့က ‘တော်လှန်သွေးချင်းများ သန္နိဋ္ဌာန်ပြုချက်’ ကို ထုတ်ပြန်ခဲ့ပြီး စစ်အုပ်စုသည် ယင်းစစ်ရာဇဝတ်မှုကို ဖုံးကွယ်ရန် လူမျိုးရေးမုန်းတီးမှုများ ဖြင့် လမ်းလွှဲလှုံ့ဆော်နေခြင်းကို သတိပြုကြရန် သတိပေးလိုက်သည်။ “အကြမ်းဖက်စစ်တပ်က မြောက်ဦးပြည်သူ့ဆေးရုံကို ဗုံးကြဲပြီး ပြည်သူလူထုအား သတ်ဖြတ်မှုမှာ အရပ်သား များ အပေါ် ရည်ရွယ်ချက်ရှိရှိ ကျူးလွန်သည့် ရက်စက်ကြမ်းကြုတ်သော စစ်ရာဇဝတ်မှုဖြစ်သည်။ ၎င်းဖြစ်ရပ် ကို အခြေပြုလျက် အကြမ်းဖက်စစ်အုပ်၏ လူမျိုးရေးမုန်းတီးလှုံ့ဆော် လမ်းလွှဲနေခြင်းအား သတိပြုကြရမည် ဖြစ်သည်” ဟု ပူးတွဲကြေညာချက်တွင် ဖော်ပြထားသည်။ စစ်ကော်မရှင်တပ်သည် ယခုနှစ်အတွင်း ပြည်သူ့အခွန်ငွေများဖြင့် လေယာဉ်နှင့် ရဟတ်ယာဉ် အစင်းပေါင်း ၁၆၀ ကျော် ထပ်မံဝယ်ယူထားပြီး ရခိုင်ပြည်အတွင်းရှိ ဆေးရုံများ၊ စာသင်ကျောင်းများနှင့် ဘာသာရေး အဆောက် အအုံများကို ပစ်မှတ်ထားကာ တိုက်ခိုက်မှုများ ဆက်တိုက် ကျူးလွန်လျက်ရှိကြောင်း အာရက္ခတပ်တော် AA ၏ ထုတ်ပြန်ချက်များအရ သိရသည်။ ဓါတ်ပုံ - Wai Hun Aung

မြောက်ဦး ဆေးရုံ ဗုံးကြဲမှု ညီနောင် မဟာမိတ် အဖွဲ့များ အပါအဝင် တော်လှန်ရေး အင်အားစုများ ရှုတ်ချ

Dec 18

CDM ဆရာမ နှင့် ခင်ပွန်း ဓါးဖြင့်အချက်ပေါင်းများစွာ ထိုးသတ်ခံရ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၈ ရက်။ တနင်္သာရီတိုင်း ပုလောမြို့နယ်အတွင်း CDM ဆရာမ တစ်ဦးနှင့် သူ၏ ခင်ပွန်းတို့ ဓါးဖြင့် အချက်ပေါင်းများစွာ ထိုးသတ်ခံရသည်။ တနင်္သာရီတိုင်းဒေသကြီး၊ မြိတ်ခရိုင်၊ ပုလောမြို့နယ်အတွင်းရှိ ဆားခဲကျေးရွာတွင် CDM ဆရာမတစ်ဦးနှင့် ခင်ပွန်းဖြစ်သူတို့သည် ၎င်းတို့၏ နေအိမ်အတွင်း၌ပင် ဓားဖြင့် အချက်ပေါင်းများစွာ ထိုးသတ်ခြင်း ပြည်သူ့ကာကွယ်ရေးတပ်မတော်၊ မြိတ်ခရိုင် အမှတ် (၁) တပ်ရင်းထံမှ သိရသည်။ ဖြစ်စဉ်မှာ ဒီဇင်ဘာလ ၁၆ ရက်နေ့ နံနက် ၂ နာရီခန့်တွင် အသက် ၄၉ နှစ်အရွယ်ရှိ CDM ဆရာမ ဒေါ်အေးသီအောင်နှင့် ခင်ပွန်းဖြစ်သူတို့အား အမည်မသိ လူတစ်စုက နေအိမ်အတွင်း ဝင်ရောက်လုပ်ကြံခဲ့ခြင်း ဖြစ်သည်။ သတ်ဖြတ်ခံရသူ ဒေါ်အေးသီအောင်သည် ပုလောမြို့နယ် ပညာရေးဘုတ်အဖွဲ့ဝင်တစ်ဦး ဖြစ်ပြီး တော်လှန်ရေး နယ်မြေအတွင်းရှိ ကလေးငယ်များ၏ ပညာရေးအတွက် ရှေ့တန်းမှ ဦးဆောင်ကြိုးပမ်းနေသူတစ်ဦးလည်း ဖြစ်သည်။ အခင်းဖြစ်ပွားခဲ့သည့် အခြေအနေနှင့်ပတ်သက်၍ ဒေသခံရွာသားတစ်ဦးက "နေအိမ်ထဲမှာပဲ ဒေါ်အေးသီတာတို့ လင်မယားကို ဓားနဲ့ အချက်ပေါင်းမနည်းဘူး ထိုးသတ်ခံရတာ။ ပါးစပ်တွေ၊ လည်ပင်းတွေနဲ့ မျက်နှာတွေမှာ ရစရာမရှိအောင်ပါပဲ။ ဆရာမကြီးမှာက ဒဏ်ရာပိုများတယ်၊ ယောကျာ်းလုပ်တဲ့သူမှာက နည်းတယ်။ သူတို့အိမ်နေရာက လူပြတ်တယ်" ဟု ပြောသည်။ ဆားခဲကျေးရွာသည် ပြည်သူ့ကာကွယ်ရေးအဖွဲ့များ စိုးမိုးထားသည့် နယ်မြေအတွင်း တည်ရှိပြီး ယခုကဲ့သို့ တော်လှန်ရေးတွင် တက်ကြွစွာ ပါဝင်နေသည့် ပညာရေးဝန်ထမ်းတစ်ဦး ရက်စက်စွာ လုပ်ကြံခံရမှုအပေါ် ဒေသခံများအကြား တုန်လှုပ်ခြောက်ခြားမှုများ ဖြစ်ပေါ်နေသည်။ သတ်ဖြတ်ခံခဲ့ရသည့် ဇနီးမောင်နှံ၏ ရုပ်အလောင်းများကို ဒီဇင်ဘာလ ၁၇ ရက်နေ့ နံနက်ပိုင်းတွင် ကျေးရွာ သုသာန်၌ မီးသင်္ဂြိုဟ်လိုက်ပြီဖြစ်ကြောင်း ရွာသားများက ပြောသည်။ ဤလုပ်ရပ်သည် လူမဆန်သော အကြမ်းဖက်လုပ်ရပ်ဖြစ်ကြောင်းနှင့် ကျူးလွန်သူများကို ဖမ်းဆီးအရေးယူနိုင်ရန် အထူးစုံစမ်းစစ်ဆေးရေးအဖွဲ့ ဖွဲ့စည်းဆောင်ရွက်နေကြောင်း မြိတ်ခရိုင် အမှတ် (၁) တပ်ရင်းက သတင်း ထုတ်ပြန်ခဲ့သည်။ “ဆရာမတို့ လင်မယားနှစ်ဦးကို ရက်စက်စွာ သတ်ဖြတ်ခြင်းသည် လူမဆန်သော အကြမ်းဖက်လုပ်ရပ်မျိုး ဖြစ်သဖြင့် ပြင်းထန်စွာ ရှုတ်ချသည်” ဟု ထုတ်ပြန်ချက်တွင် ဖော်ပြထားသည်။ လက်ရှိတွင် မြိတ်ခရိုင်အတွင်း၌ စစ်ကော်မရှင်တပ်များနှင့် ဒေသခံကာကွယ်ရေးတပ်များ အကြား စစ်ရေး တင်းမာမှုများ ရှိနေသည်။ တော်လှန်ရေးအင်အားစုများ စိုးမိုးထားသည့် နယ်မြေများအတွင်း၌ပါ ယခုကဲ့သို့ လုပ်ကြံသတ်ဖြတ်မှုများ ပေါ်ပေါက်လာခြင်းကြောင့် နယ်မြေလုံခြုံရေးနှင့် ပတ်သက်၍ စိုးရိမ်မှုများ မြင့်တက်လျက်ရှိကြောင်း ဒေသခံများက ပြောသည်။

CDM ဆရာမ နှင့် ခင်ပွန်း ဓါးဖြင့်အချက်ပေါင်းများစွာ ထိုးသတ်ခံရ

Dec 18

ထိုင်း-ကမ္ဘောဒီးယား နယ်စပ်ပဋိပက္ခအတွက် တရုတ်နိုင်ငံက ကိုယ်စားလှယ် စေလွှတ်မည် သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ ဒီဇင်ဘာလ ၁၈ ရက်။ ထိုင်းနှင့် ကမ္ဘောဒီးယားနိုင်ငံတို့အကြား ဖြစ်ပွားနေသည့် နယ်စပ်တိုက်ပွဲများကို စေ့စပ်ညှိနှိုင်းပေးရန် တရုတ်နိုင်ငံ၏ အာရှရေးရာ အထူးကိုယ်စားလှယ်သည် ဒီဇင်ဘာလ ၁၈ ရက်နေ့တွင် နှစ်နိုင်ငံလုံးသို့ သွားရောက်မည်ဖြစ်သည်။ ထိုင်းနိုင်ငံဆိုင်ရာ တရုတ်သံရုံးက တရုတ်နိုင်ငံအနေဖြင့် အိမ်နီးချင်းကောင်း ပီပီ နယ်စပ်တင်းမာမှုများအပေါ် အထူးစိုးရိမ်ကြောင်းနှင့် ငြိမ်းချမ်းရေး ဆွေးနွေးမှုများ ဖြစ်ပေါ်လာရန် တက်ကြွစွာ ပါဝင်မည်ဖြစ်ကြောင်း ထုတ်ပြန်ခဲ့သည်။ ပြီးခဲ့သည့် အောက်တိုဘာလက အာဆီယံထိပ်သီးညီလာခံတွင် နှစ်နိုင်ငံကြား ငြိမ်းချမ်းရေး သဘောတူညီချက် လက်မှတ်ရေးထိုးခဲ့သော်လည်း ဒီဇင်ဘာ ၇ ရက်နေ့မှစ၍ နယ်စပ်တွင် အဆင့်မြင့်ဒုံးကျည်များနှင့် လေယာဉ်များအသုံးပြုကာ တိုက်ပွဲများ ပြန်လည်ပြင်းထန်လာခဲ့သည်။ တိုက်ပွဲများအတွင်း ကမ္ဘောဒီးယားတပ်ဖွဲ့များထံမှ တရုတ်ထုတ် တင့်ကားဖျက်ဒုံးကျည်အချို့ကို သိမ်းဆည်းရမိခဲ့သော်လည်း တရုတ်နိုင်ငံက တစ်ဖက်သတ်လက်နက်ထောက်ပံ့ခြင်းမျိုး မရှိကြောင်း ထိုင်းဘက်က ပြောကြားထားသည်။ အမေရိကန်၏ အပစ်အခတ်ရပ်စဲရေး ကြိုးပမ်းမှုများ မအောင်မြင်ခဲ့သည့်နောက်တွင် တရုတ်နိုင်ငံက ကြားဝင်ဆောင်ရွက်လာခြင်း ဖြစ်သည်။

ထိုင်း-ကမ္ဘောဒီးယား နယ်စပ်ပဋိပက္ခအတွက် တရုတ်နိုင်ငံက ကိုယ်စားလှယ် စေလွှတ်မည်

Dec 18

အမေရိကန်က ထိုင်ဝမ်သို့ အကြီးမားဆုံး စစ်လက်နက်များ ရောင်းချရန် ပြင်ဆင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၈ ရက်။ အမေရိကန်ပြည်ထောင်စုသည် ထိုင်ဝမ်သို့ ဒေါ်လာ ၁၁.၁ ဘီလီယံ တန်ဖိုးရှိ စစ်လက်နက်ပစ္စည်း (၈) မျိုးကို ရောင်းချရန် စီစဉ်နေသည်။ ယင်းသည် သမိုင်းတစ်လျှောက် ထိုင်ဝမ်သို့ အကြီးမားဆုံးသော စစ်လက်နက် ရောင်းချမှု ဖြစ်လာမည် ဖြစ်သည်။ ထိုင်ဝမ် သို့ ရောင်းချမည့် လက်နက်များတွင် HIMARS ဒုံးကျည်စနစ်များ၊ အသေခံဒရုန်းများ၊ ဟောင်ဝပ်ဇာ အမြောက်ကြီးများနှင့် စစ်ဘက်ဆိုင်ရာ ဆော့ဖ်ဝဲများ ပါဝင်သည်။ ထိုင်ဝမ်ကာကွယ်ရေးဝန်ကြီးဌာနက ဤဝယ်ယူမှုသည် အင်အားချင်းမမျှသော စစ်ပွဲများတွင် အသာစီးရယူရန်နှင့် ဒေသတွင်းတည်ငြိမ်ရေးအတွက် ရည်ရွယ်ခြင်းဖြစ်ကြောင်း ထုတ်ပြန်ထားသည်။ သမ္မတ ဒေါ်နယ်ထရန့်၏ ဒုတိယမြောက် သက်တမ်းအတွင်း ထိုင်ဝမ်နှင့် ဒုတိယအကြိမ်မြောက် သဘောတူညီချက်ဖြစ်သော ဤအစီအစဉ်သည် အမေရိကန်လွှတ်တော်အတွင်း နှစ်ပါတီလုံး၏ ထောက်ခံမှုဖြင့် အတည်ပြုနိုင်ရန် သေချာသလောက်ရှိနေသည်။ ယင်းသည် တရုတ်နိုင်ငံ၏ စစ်ရေးအရ ဖိအားပေးမှုများကို တုံ့ပြန်ရန် ထိုင်ဝမ်၏ ကာကွယ်ရေးစွမ်းရည် မြှင့်တင်မှုတစ်ရပ်လည်း ဖြစ်သည်။

အမေရိကန်က ထိုင်ဝမ်သို့ အကြီးမားဆုံး စစ်လက်နက်များ ရောင်းချရန် ပြင်ဆင်

Dec 18

တရုတ်နိုင်ငံက နည်းပညာ အဆင့်မြင့် ချစ်ပ် (Chip) တွေ ထုတ်နိုင်တော့မလား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၈ ရက်။ တရုတ်နိုင်ငံသည် အနောက်နိုင်ငံများ၏ နည်းပညာပိတ်ဆို့မှုကို ကျော်ဖြတ်နိုင်ရန်အတွက် "မန်ဟက်တန်စီမံကိန်း" (Manhattan Project) ဟု တင်စားရလောက်သည့် လျှို့ဝှက်စီမံကိန်းတစ်ရပ်ကို အကောင်အထည်ဖော်လျက်ရှိကြောင်း ရိုက်တာသတင်းဌာနက ဖော်ပြခဲ့သည်။ တရုတ်နိုင်ငံ ရှန်ကျန်း (Shenzhen) မြို့ရှိ လျှို့ဝှက်ဓာတ်ခွဲခန်းတစ်ခု၌ ၂၀၂၅ ခုနှစ် အစောပိုင်းတွင် အဆင့်မြင့် Chip များ ထုတ်လုပ်ရန် မရှိမဖြစ်လိုအပ်သော EUV (ခရမ်းအောက်ရောင်ခြည်လွန် လစ်သိုဂရပ်ဖီ) စက်ပစ္စည်း၏ ရှေ့ပြေးပုံစံတစ်ခုကို အောင်မြင်စွာ တည်ဆောက်နိုင်ခဲ့သည်။ အဆိုပါစီမံကိန်းကို နယ်သာလန်အခြေစိုက် ASML ကုမ္ပဏီမှ အနားယူသွားသော တရုတ်နွယ်ဖွား အင်ဂျင်နီယာများကို ခေါ်ယူ၍ နည်းပညာပြန်လည်ဆန်းစစ် တည်ဆောက်ခြင်း (Reverse-engineering) နည်းလမ်းဖြင့် လုပ်ဆောင်ခဲ့ခြင်းဖြစ်သည်။ တရုတ်အစိုးရ၏ ပံ့ပိုးမှုဖြင့် Huawei ကုမ္ပဏီက အနီးကပ်ကြီးကြပ်လျက်ရှိပြီး၊ ပါဝင်သည့် သိပ္ပံပညာရှင်များသည် တင်းကျပ်သော လုံခြုံရေးစည်းမျဉ်းများအောက်၌ လျှို့ဝှက်လုပ်ကိုင်နေကြရသည်။ လက်ရှိတွင် ရှေ့ပြေးပုံစံစက်သည် အလုပ်လုပ်နိုင်ပြီဖြစ်သော်လည်း အဆင့်မြင့် Optical Systems များ ထုတ်လုပ်ရန် စိန်ခေါ်မှုများရှိနေသေးသဖြင့် ၂၀၃၀ ပြည့်နှစ်ခန့်မှသာ အဆင့်မြင့် Chip များကို လက်တွေ့ထုတ်လုပ်နိုင်ဖွယ်ရှိကြောင်း နည်းပညာရှင်များက ခန့်မှန်းထားကြသည်။ တရုတ်၏ ရည်ရွယ်ချက်မှာ အဆင့်မြင့် နည်းပညာသုံး ထုတ်ကုန်များထုတ်လုပ်ရာတွင် အမေရိကန် အပေါ် မှီခိုရမှုကို လျော့ချရန် သို့မဟုတ် လုံးဝ အမှီအခို ကင်းရန် ကြိုးပမ်းနေမှု ဖြစ်သည်ဟု နိုင်ငံတကာ သတင်းများတွင် သုံးသပ်ထားသည်။

တရုတ်နိုင်ငံက နည်းပညာ အဆင့်မြင့် ချစ်ပ် (Chip) တွေ ထုတ်နိုင်တော့မလား

Dec 18

“အကြောက်တရားနဲ့ မဲပေးရတော့မယ့် စစ်ကော်မရှင်ထိန်းချုပ်မှုအောက်က ကရင်နီဒေသခံများ…” By Kantarawaddy Times ကရင်နီပြည်၊ လွိုင်ကော်မြို့ “မဲပေးခြင်းက ပြောင်းလဲမှုကို ကြုံမယ်လို့ မယုံကြည်ဘူး။ အခုတောင်မှ အရင်ခေတ်ကလိုမျိုး အာဏာရှင်စနစ်တွေကို ပြန်ခံစားနေရပြီ အကောင်ကြီးကြီး (ရာထူးကြီးသူ၊ အာဏာရှိသူ ) မြင်ရင် ကြောက်နေရတယ်။” လို့ အသက် ၂၇ နှစ်အရွယ် လွိုင်ကော်မြို့ခံ အမျိုးသမီးတစ်ဦးက မဲပေးရမယ့် အခြေအနေနဲ့ ပတ်သက်ပြီး ပြောပါတယ်။ သူမကတော့ လွိုင်ကော်မြို့တွင်းမှာ ဈေးရောင်းတဲ့ အလုပ်နဲ့ အသက်မွေးဝမ်းကြောင်းပြုနေပြီး ရွေးကောက်ပွဲက နေ့စဉ်စားဝတ်နေရေးလောက် အရေးမကြီးဘူးလို့ ပြောပါတယ်။ ဒါ့အပြင် ကိုယ်ပေးလိုက်တဲ့ မဲတပြားကြောင့် လက်ရှိဖြစ်ပွားနေတဲ့ ပဋိပက္ခတွေကို ကျော်လွှားပေးနိုင်မယ်၊ ဒါမှမဟုတ် အမှန်တကယ်ကောင်းမွန်တဲ့ နိုင်ငံရေးအပြောင်းအလဲ တခုခု ရှိလာမယ်ဆိုတာကိုတော့ အယုံကြည်မရှိဘူးလို့ ဆက်ပြောပါတယ်။ ရွေးကောက်ပွဲကျင်းပမယ့်ရက် နီးကပ်လာပေမယ့် ကရင်နီဒေသခံ လူထုတွေကတော့ စစ်ကော်မရှင် ပြုလုပ်မယ့် ရွေးကောက်ပွဲကို စိတ်ဝင်စားမှု မရှိကြပါဘူး။ စစ်ကော်မရှင် လက်လှမ်းမမီတဲ့ နေရာဒေသက ပြည်သူတွေက ရွေးကောက်ပွဲကို စိတ်မဝင်စားကြပေမယ့် ၊ စစ်ကော်မရှင် ထိန်းချုပ်တဲ့ လွိုင်ကော်မြို့နေ လူထုတွေကတော့ အမျိုးမျိုးသော ဖိအားတွေကြောင့် မဖြစ်မနေ မဲ ပေးရမယ့် အခြေအနေ ဖြစ်လာပါတယ်။ လွိုင်ကော်မြို့မှာ စစ်ရဲ့အကျိုးဆက်ကြောင့် ပစ္စည်းဥစ္စာ၊ နေအိမ် အားလုံးပျက်စီးဆုံးရှုံးသွားတဲ့ သူတွေရှိပြီး သူတို့ဟာ ရရာအလုပ် လုပ်ကိုင်ရင်း အသက်ရှင်သန်နိုင်ဖို့ ရုန်းကန်ရပါတယ်။ လွိုင်ကော်မြို့ဟာ ကရင်နီပြည်ရဲ့ မြို့တော်ဖြစ်ပြီး စစ်ကော်မရှင် အုပ်ချုပ်ရေးစနစ် လည်ပတ်တဲ့ မြို့တမြို့ပါ။ မြို့တွင်းမှာတော့ မြို့အင်္ဂါရပ်နဲ့ ကိုက်ညီတဲ့ တက္ကသိုလ်တွေ ၊ အခြေခံကျောင်းတွေ ၊ မြို့မဈေး နဲ့ အထင်ကရ လည်ပတ်စရာ နေရာတွေကို စစ်ကော်မရှင်ရဲ့ ဌာနဆိုင်ရာတွေကနေ ဆောင်ရွက်နေပေမယ့်လည်း မြို့အဝင်အထွက်က စစ်ဆေးရေးဂိတ်တွေမှာ တင်းကြပ်မှု ပိုများလာတယ်လို့ မြို့ခံတွေက ပြောပါတယ်။ ပြီးခဲ့တဲ့နှစ်တွေက ဖြစ်ပွားတဲ့ တိုက်ပွဲတွေကြောင့် တိမ်းရှောင်သွားကြတဲ့ လူထုတွေဟာ လွိုင်ကော်မြို့တွင်းကို ပြန်လာနေထိုင်ကြသူတွေလည်း များလာပါတယ်။ ၂၀၂၅ ခုနှစ် မတ်လမှာ စစ်ကော်မရှင် ထိန်းချုပ်ထားတဲ့နေရာတွေမှာ သူတို့ ကောက်ယူထားတဲ့စာရင်းအရ လွိုင်ကော်မြို့နယ်မှာ လူဦးရေ နှစ်သောင်းကျော် ( ၂၃၈၄၈ ) ဦး ရှိပါတယ်။ ရွေးကောက်ပွဲအပေါ် လွိုင်ကော်မြို့ခံတွေရဲ့ သဘောထားများ စစ်ကော်မရှင် ပြုလုပ်တဲ့ ရွေးကောက်ပွဲမှာ ဆန္ဒမပါပဲ မဲထည့်ရမှာ စိုးရိမ်တဲ့အပြင် စစ်တပ်အုပ်ချုပ်ရေးအောက်မှာ မနေလိုတဲ့အတွက် လွိုင်ကော်မြို့ကို မပြန်သေးဘူးလို့ ဒီးမော့ဆိုအနောက်ခြမ်းမှာ စစ်ရှောင်နေတဲ့ အသက် ၃၀ အရွယ် လွိုင်ကော်မြို့ခံ အမျိုးသမီးတစ်ဦးက ပြောပါတယ်။ “ပြည်သူလူထု တစ်ယောက်အနေနဲ့ ဒီရွေးကောက်ပွဲကို အယုံကြည်မရှိသလို လွိုင်ကော်ပြန်ပြီး မဲပြန်ထည့်မှာလည်း မဟုတ်ပါဘူး။” လို့ သူမက ပြောပါတယ်။ ဝင်ရောက်ယှဉ်ပြိုင်ကြတဲ့ ပါတီတချို့က ပြီးခဲ့တဲ့ နိုဝင်ဘာလ မှာ ရွေးကောက်ပွဲ မဲဆွယ်စည်းရုံးရေးကို ကျယ်ကျယ်ပြန့်ပြန့် ကြိုးစားလုပ်ဆောင်နေကြပေမယ့် မြို့ခံအများစုဟာ ရွေးကောက်ပွဲအပေါ် စိတ်ဝင်စားမှု မရှိကြဘူးလို့ မြို့ခံအမျိုးသားတစ်ဦးက ပြောပါတယ်။ “သွားတဲ့သူတွေကိုတော့ ဆန်၊ဆီ ဝေတယ်။ အင်္ကျီတွေ ဝေတယ်တဲ့။ သူတို့က ရပ်ကွက်တွေရဲ့ မူကြိုကျောင်းတွေမှာ ဟောပြောပွဲလုပ်တာ လူစုလူဝေးလုပ်လို့ရတဲ့ ဖူဆယ်ဘောလုံးကွင်းတို့ အိမ်အောက်ထပ်တို့ပေါ့။ ကြံ့ဖွတ်(ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ) ကပဲ ပိုလုပ်တာ တွေ့တယ်။” လို့ သူက ပြောပါတယ်။ မဲဆွယ်စည်းရုံးရေးလုပ်တဲ့ မှတ်တမ်းပုံတွေအရ လာရောက်သူတွေက စစ်တပ်အသိုင်းအဝန်း ၊ တပ်မိသားစု ၊ ဝန်ထမ်းတချို့တွေ ဖြစ်ပြီး လူဦးရေ အများဆုံး (၅၀) ဝန်းကျင်သာ ရှိတာကို တွေ့ရပါတယ်။ မဲဆွယ်ပွဲ လာရောက်သူတွေကို ဆန် ၊ ဆီ ၊ အင်္ကျီပေးဝေတာ က ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP ) နဲ့ ပြည်သူ့ရှေ့ဆောင်ပါတီ (PPP ) ဖြစ်တယ်လို့ သွားရောက်ပါဝင်ခဲ့သူတွေက ပြောပါတယ်။ မဲမထည့်သူကို စစ်ကော်မရှင်က ဘယ်လိုအရေးယူမလဲ စစ်ကော်မရှင် ထိန်းချုပ်ထားတဲ့ မြို့ပေါ်မှာတော့ လက်နက်ကိုင်ခြိမ်းခြောက်ပြီး ပြည်သူလူထုတွေကို ဖိအားပေးမဲထည့်ဖို့ လုပ်ဆောင်တာ မရှိပေမယ့် တခြားနည်းလမ်းတွေနဲ့ ဖိအားပေးနေတယ်လို့ နောက်ထပ်မြို့ခံတစ်ဦးကလည်း အခုလို ပြောပါတယ်။ ”မပေးပဲတော့ မနေရဲဘူး။ ထောင်သုံးနှစ်ချမယ်လို့ ပြောနေကြတာပဲ။ ဘယ်ပါတီပေးပေး သိပ်ထူးစရာတော့ မရှိပါဘူး။” လို့ အဆိုပါ မြို့ခံတစ်ဦးက ပြောပါတယ်။ ရွေးကောက်ပွဲကျင်းပမယ့်ရက်မှာ မဲလာမပေးပါက ရွေးကောက်ပွဲ ဟန့်တားနှောက်ယှက်တဲ့ ဥပဒေနဲ့ ဖမ်းဆီးအရေးယူမယ်လို့ ခြိမ်းခြောက်ပြောဆိုမှုတချို့လည်း ကြားနေရတယ်လို့ အဆိုပါ မြို့ခံက ဆက်ပြောပါတယ်။ ဒါကတော့ ပြည်သူတွေကြား ကောလဟာလတွေအဖြစ် ပြန့်နှံ့နေတဲ့ ရွေးကောက်ပွဲနဲ့ ပတ်သက်ပြီး ဖိအားပေးခြိမ်းခြောက်မှုတွေပါ။ တဖက်မှာလည်း ရွေးကောက်ပွဲ ဖြစ်မြောက်နိုင်ရေး ဟန့်တားမယ့်သူတွေ မရှိစေဖို့ ပြီးခဲ့တဲ့ စက်တင်ဘာလအတွင်းမှာ အသက်မပြည့်သေးတဲ့ ကလေး ၃ ဦးအပါအဝင် ၅ ဦးကို စစ်မကော်ရှင်က ရွေးကောက်ပွဲကို နှောင့်ယှက်ဟန့်တားခြင်းမှ ကာကွယ်ပေးရေးဥပဒေပုဒ်မ ၂၃ ( က ) နဲ့ အမှုဖွင့်ပြီး ဖမ်းဆီးအရေးယူခဲ့ပါတယ်။ “ဖမ်းခံရတဲ့ ကောင်လေးတွေက ထောင် ၈ နှစ်ကျသွားတယ်။ ပိုက်ဆံလိုက်ရတယ် မလိုက်ရင် ပိုဆိုးနိုင်တယ်ဆိုလို့ ညစ်လိုက်တာပေါ့။ ဖမ်းခံရတဲ့သူတွေကို ဆွဲစိလိုက်တယ်။ ပိုက်ဆံလိုက်တဲ့ ကလေးကိုတော့ တပ်ထဲမပို့ဘူး ထောင်ချလိုက်တယ်။” လို့ ဖမ်းဆီးခံရသူတွေနဲ့ နီးစပ်သူတစ်ဦးက ပြောပါတယ်။ လက်ရှိ လွိုင်ကော်မြို့တွင်းမှာ ပြည်သူ့စစ်မှုထမ်းဥပဒေအရ အတင်းအဓမ္မ စစ်မှုထမ်းဖို့ ခေါ်ဆောင်ခံရမှာကို ကြောက်လန့်နေကြတဲ့အပြင် ရွေးကောက်ပွဲနဲ့ပတ်သက်ပြီး ပြောဆိုဖို့ကို မဝံ့ရဲကြပါဘူး။ ဒါ့အပြင် အသွားအလာကို သတိထားနေရသလို အပြောအဆိုကိုလည်း ဆင်ခြင်ရတယ်လို့ လွိုင်ကော်မြို့ခံတွေက ပြောပါတယ်။ မြို့ခံမဟုတ်သူတွေဆီက မဲ ရဖို့ စစ်ကော်မရှင် ဘယ်လိုလုပ်နေသလဲ။ လက်ရှိမှာတော့ လွိုင်ကော်မြို့တွင်းမှာ မြို့ခံအပြင် တခြားမြို့နယ်တွေကနေ လာရောက်တိမ်းရှောင် ကြသူတွေကိုလည်း မဲပေးရမယ့် စာရင်းထဲ ထည့်သွင်းထားပါတယ်။ ဖားဆောင်း ၊ ဘောလခဲ ၊ မော်ချီး ၊ ရှားတော စတဲ့ မြို့နယ်တွေကနေ လာရောက် စစ်ဘေးရှောင်ကြတဲ့ ပြည်သူတွေဆီက မဲရရှိဖို့အတွက် လွိုင်ကော်မြို့မှာ နေထိုင်ပါက ယာယီနေထိုင်ခွင့်လျှောက်ခိုင်းသလို မိမိဆန္ဒနဲ့ မဲပေးလိုကြောင်းကိုလည်း စာရင်းဖြည့်စေပြီးမှ နေထိုင်ခွင့်ရတယ်လို့ ဆိုပါတယ်။ “ပြန်ဝင်တဲ့ သူအကုန်လုံးက သူတို့က အဆင်သင့် မဲနာမည်ပါပြီးသား။ လာတဲ့သူဆို နာမည်စာရင်းတွေ ကောက်တယ်။ မိသားစု လူဦးရေတွေ သူတို့ ကောက်တယ်။ ဓာတ်ပုံမှတ်တမ်းတွေ ယူပြီးတော့ တခါတည်း မဲအတွက် သူတို့ ဆွယ်ထားပြီးသား။ ယာယီနေထိုင်ခွင့် မလျှောက်ရင်လည်း နေလို့မရဘူး” လို့ ဖားဆောင်းမြို့နယ်ကနေ လွိုင်ကော်မြို့ကို လာရောက်စစ်ရှောင်နေသူတစ်ဦးက ပြောပါတယ်။ ရွေးကောက်ပွဲကာလမှာ ပဋိပက္ခတွေ ပိုတိုးလာနိုင် ရွေးကောက်ပွဲကျင်းပမယ့် ဒီဇင်ဘာလအတွင်း လူ့အခွင့်အရေးချိုးဖောက်မှု ပိုများလာနိုင်တယ်လို့ ဒေသခံတွေက ပြောဆိုနေကြပါတယ်။ ယခု ရွေးကောက်ပွဲပြုလုပ်မယ့် လအတွင်းမှာပဲ စစ်ကော်မရှင်တပ်က လေကြောင်းကနေ တော်လှန်ရေးတပ်ဖွဲ့တွေ ထိန်းချုပ်ထားတဲ့ နယ်မြေတွေက အရပ်သားတွေကို ဗုံးကြဲတိုက်ခိုက်ခဲ့ပါတယ်။ ဒီဇင်ဘာလ ၆ ရက်နေ့က လွိုင်ကော်မြို့နယ် ပါလောင်းကျေးရွာအုပ်စုက စစ်ရှောင်စခန်းတစ်နေရာကို စစ်ကော်မရှင်က လေကြောင်းကနေ ဗုံးကြဲတိုက်ခိုက်ခဲ့ပါတယ်။ အလားတူ ဒီဇင်ဘာ ၇ ရက်နေ့ ညပိုင်းမှာ ဒီးမော့ဆိုအနောက်ခြမ်းက နေရာ ၃ ခုကို ဗုံးကြဲတိုက်ခိုက်ခဲ့တာပါ။ အဲ့ဒီနေရာတွေဟာ တိုက်ပွဲဖြစ်ပွားတဲ့ ဧရိယာမဟုတ်သလို စစ်ဘေးတိမ်းရှောင်ကြတဲ့ နေရာတွေသာ ဖြစ်ပြီး စစ်ကော်မရှင်က အကြောင်းမဲ့တိုက်ခိုက်ခဲ့တာပါ။ အဆိုပါ နေရာတွေဟာ လွိုင်ကော်မြို့နဲ့ ထိစပ်နေတဲ့ မြို့နယ်တွေ ဖြစ်ပါတယ်။ “လေယာဉ်က စစ်ရှောင်တဲ့နေရာတွေဖက်ကို ဗုံးလာကြဲတယ် ခနခဏကြုံတွေ့နေရတယ်။ မထူးဆန်းတော့ဘူး။ မကြောက်ဘူးလားဆိုတော့ ကြောက်တာပဲလေ။ ဗုံးခိုကျင်းထဲပဲ အားကိုးရတာပေါ့” လို့ ဒီးမော့ဆိုဒေသခံ အမျိုးသမီးတစ်ဦးက ပြောပါတယ်။ ဒါ့အပြင် ဒီးမော့ဆိုမြို့၊ ငွေတောင်အခြေစိုက် ခလရ ( ၁၀၂ ) တပ်က လက်နက်ကြီးတွေနဲ့ နေ့စဉ်ရက်ဆက် ပစ်ခတ်နေတာကြောင့် လူထုတွေဟာ စိုးရိမ်ထိတ်လန့်နေရတယ်လို့ ပြောပါတယ်။ တပ်မြို့လို့တင်စားကြတဲ့ ဘောလခဲမြို့ က ရွေးကောက်ပွဲ အခြေအနေ လွိုင်ကော်မြို့နယ်ရဲ့ တောင်ဘက်ခြမ်းမှာရှိပြီး စစ်တပ်မြို့လို့ ဒေသအခေါ်ရှိတဲ့ ဘောလခဲမြို့ကိုလည်း စစ်ကော်မရှင်တပ်က ထိန်းချုပ်ထားပါတယ်။ လွိုင်ကော်မြို့နဲ့ မိုင် ၃၀ ကျော် အကွာအဝေးမှာရှိပြီး ၂၀၁၄ ခုနှစ် သန်းခေါင်စာရင်းအရ ဘောလခဲမြို့နယ်မှာ လူဦးရေ ( ၈၄၈၀ ) ရှိပြီး အိမ်ခြေ ၁, ၅၀၀ ကျော် ရှိပါတယ်။ ဘောလခဲမြို့နယ်မှာ စစ်တပ်ရဲ့ ဗျုဟာတပ်ရှိပြီး တပ်စခန်းတွေလည်း များပြားတာကြောင့် စစ်တပ်နဲ့ ပတ်သက်နေတဲ့ မိသားစုအသိုင်းအဝန်း ၊ ထောက်ခံသူအုပ်စု ၊ ဌာနဆိုင်ရာဝန်ထမ်း တွေက အများဆုံး နေထိုင်ကြပါတယ်။ ဒေသတွင်း တိုက်ပွဲတွေအပြင် ကုန်စည်လမ်းကြောင်းမရောက်ရှိသလို စားဝတ်နေရေးကို ရုန်းကန် ရှာဖွေစားသောက်နေရတဲ့ ဘောလခဲမြို့ခံအများစုက နေရပ်ကိုစွန့်ခွာပြီး တခြားနေရာတွေမှာ တိမ်းရှောင်နေထိုင်ကြပါတယ်။ လက်ရှိ မြို့ပေါ်မှာ လူဦးရေ ၂၀၀ ဝန်းကျင် ကျန်ရစ်ပြီး စစ်တပ်မိသားစုဝင်၊ တပ်အသိုင်းအဝိုင်း ၊ ဝန်ထမ်း နဲ့ ဒေသခံ တချို့သာရှိတယ်လို့ တိမ်းရှောင်လာတဲ့ မြို့ခံအမျိုးသားတစ်ဦးက ပြောပြပါတယ်။ လူဦးရေ ရာဂဏန်းသာ ရှိတဲ့ မြို့မှာ ဒီဇင်ဘာလ ၂၈ ရက်နေ့မှာ ပြုလုပ်မယ့် ရွေးကောက်ပွဲအပိုင်း ( ၁ ) အတွက် ဘောလခဲမြို့က ပါဝင်နေတာပါ။ တရားမျှတပြီး လွတ်လပ်တဲ့ ပါတီစုံဒီမိုကရေစီ ရွေးကောက်ပွဲလို့ စစ်ကော်မရှင်က ကြေညာနေပေမယ့် ဒါဟာ နိုင်ငံရေးလှည့်ကွက်ဖြစ်သလို အတုအယောင် ရွေးကောက်ပွဲဖြစ်တယ်လို့ ဘောလခဲ မြို့ခံ လူငယ် အမျိုးသမီးတစ်ဦးက အခုလို သုံးသပ်ပါတယ်။ “ဘောလခဲမှာ ဘယ်သူတွေများ ကျန်ရှိနေအုံးမလဲပေါ့ တော်တော်များများက စစ်ဘေးတိမ်းရှောင် နေကြရတယ်လေး။ သူတို့တွေ ဘယ်လို မဲပေးလို့ ရမလဲပေါ့။ ဒါက လုပ်ကွက်တစ်ခုပဲ။ နိုင်ငံရေးကို တရားဝင်ပုံစံနဲ့ အကွက်ရွေ့ ကစားနေတယ်လို့ မြင်တယ်။”လို့ သူမက ပြောပါတယ်။ ဘောလခဲမြို့ပေါ်မှာ တစ်ကြိမ်တစ်ခါမျှ တိုက်ပွဲမဖြစ်ဖူးပေမယ့် စစ်တပ်ရဲ့အုပ်ချုပ်မှုမှာ မလုံခြုံဘူးလို့ ခံစားရသလို အကြောက်တရားနဲ့ပဲ ရှင်သန်ရတာကြောင့် တိမ်းရှောင်ဖို့ ရွေးချယ်ခဲ့တယ်လို့ အသက် ၄၀ အရွယ် မြို့ခံအမျိုးသားတစ်ဦးက ပြောပါတယ်။ ဒီလိုအခြေအနေမှာ လူထုအသံကို ကိုယ်စားပြုတဲ့ ရွေးကောက်ပွဲလို့ ခေါင်းစဉ်တပ်တာဟာ မှန်ကန်မှု မရှိသလို နိုင်ငံတကာမှာ အသိအမှတ်ပြုခံရအောင် ဟန်ပြတစ်ခုသာ ဖြစ်တယ်လို့ အဆိုပါ အမျိုးသားက ဆိုပါတယ်။ ဘောလခဲမြို့တွင်းမှာတော့ မည်သည့်ပါတီကမှ မဲဆွယ်စည်းရုံးတာ မရှိသလို မဲပေးတာဖြစ်စေ ၊ မဲမပေးတာဖြစ်စေ လူထုတွေအပေါ် တစ်စုံတစ်ရာ ပြောင်းလဲသွားမှာ မဟုတ်လို့ ပုံမှန်အနေအထား တခုလို ဖြစ်နေပြီလို့ ဒေသခံတွေက ပြောပါတယ်။ စစ်ကော်မရှင် ရွေးကောက်ပွဲကျင်းပမဲ့ နေရာများ.. စစ်ကော်မရှင်က ကရင်နီပြည်ရဲ့ မြို့နယ် ၄ မြို့နယ်မှာ ရွေးကောက်ပွဲ ကျင်းပမှာဖြစ်လို့ ဒါဟာ ကရင်နီပြည် မြို့နယ်ရဲ့ ထက်ဝက် ဖြစ်ပါတယ်။ စစ်ကော်မရှင် အပြည့်အဝ ထိန်းချုပ်ထားနိုင်တယ်လို့ ဆိုနိုင်တဲ့ လွိုင်ကော် နဲ့ ဘောလခဲ မြို့နဲ့ မြို့တွင်းနေရာအနည်းအကျဉ်းကိုသာ ထိန်းချုပ်ထားနိုင်တဲ့ ဖရူဆိုမြို့ပေါ်နဲ့ ဒီးမော့ဆိုမြို့ပေါ် တွေ ဖြစ်ပါတယ်။ စစ်ကော်မရှင်က ဒီဇင်ဘာလ ၂၈ ရက်နေ့မှာ ပြုလုပ်မယ့် ရွေးကောက်ပွဲ အပိုင်း ( ၁ ) အတွက် လွိုင်ကော် ၊ ဘောလခဲ ၊ ၂၀၂၆ ခုနှစ် ဇန်နဝါရီလ ၁၁ ရက်နေ့မှာ ပြုလုပ်မယ့် အပိုင်း ( ၂ ) အတွက် ဖရူဆို ၊ ဒီးမော့ဆို စတဲ့ မဲဆန္ဒနယ်တွေကို ထုတ်ပြန်ကြေညာပြီး ဖြစ်ပါတယ်။ ရွေးကောက်ပွဲကျင်းပမယ်လို့ ကြေညာထားပေမယ့် မြို့နယ်တစ်ခုလုံးမှာ လုပ်နိုင်တာမဟုတ်ဘဲ စစ်တပ်အခြေစိုက်ရာ စခန်း ၊ ထိန်းချုပ်နိုင်တဲ့ ဧရိယာအတွင်းမှာသာ ပြုလုပ်နိုင်မှာပါ။ ပြည်ထောင်စုရွေးကောက်ပွဲကော်မရှင် UEC ရဲ့ ဒီဇင်ဘာလ ၅ ရက်နေ့ ထုတ်ပြန်စာအရ ကရင်နီက ကျေးရွာအုပ်စု ( ၅၁ ) ခုမှာ ရွေးကောက်ပွဲပြုလုပ်နိုင်မှာ မဟုတ်ပါဘူး။ လွိုင်ကော်မြို့နယ်မှာဆိုရင် တော်လှန်ရေးတပ်ဖွဲ့တွေ ထိန်းချုပ်ထားတဲ့ ပါလောင်း နဲ့ တီးလုံကျေးရွာ အုပ်စုကလွဲလို့ ကျန်တဲ့နေရာအားလုံးမှာ ပြုလုပ်သွားမှာဖြစ်ပါတယ်။ ဒီးမော့ဆိုမြို့နယ်မှာ ၂၆ အုပ်စု ၊ ဖရူဆိုမြို့နယ်မှာ ၂၃ အုပ်စု ၊ ဘောလခဲမြို့နယ်မှာ (၁၀) အုပ်စု မှာ ရွေးကောက်ပွဲပြုလုပ်နိုင်မှာ မဟုတ်ပါဘူး။ ၂၀၂၄ခုနှစ် လူဦးရေ သန်းခေါင်စာရင်းအရ ကရင်နီပြည်မှာ လူဦးရေ ၃ သိန်း ဝန်းကျင်ရှိပြီး အဲ့ဒီထဲ ၁၂.၉ ရာခိုင်နှုန်းဖြစ်တဲ့ လူဦးရေ သုံးသောင်းကျော်စာရင်းကို ကောက်ယူထားပါတယ်။ ကရင်နီပြည်မှာ မြို့နယ် ၇ မြို့ ရှိတဲ့အထဲ တော်လှန်ရေးအင်အားစုတွေ အလုံးစုံထိန်းချုပ်ထားတဲ့ ရှားတော ၊ မယ်စဲ့မြို့နယ် နဲ့ နောက်ဆုံး စစ်ကော်မရှင်တပ်ရဲ့ လက်ကျန်တပ်ရင်း ခလရ (၁၃၄ )တစ်ခုသာ ကျန်တော့တဲ့ ဖားဆောင်းမြို့နယ်မှာတော့ ရွေးကောက်ပွဲပြုလုပ်နိုင်ခြင်း မရှိပါဘူး။ ရွေးကောက်ပွဲပြုလုပ်မယ့် ကရင်နီပြည်က မဲဆန္ဒနယ်အသီးသီးကနေ ဝင်ရောက်ယှဉ်ပြိုင်မယ့် ပါတီ ၄ ခုရှိပြီး ရွေးကောက်ခံမယ့် ကိုယ်စားလှယ်လောင်း (၈၇) ဦး ရှိပါတယ်။ ပါတီ ၄ ခုကတော့ တစ်နိုင်ငံလုံးအတိုင်းအတာနဲ့ ဝင်ရောက်ရွေးကောက်ခံမယ့် နိုင်ငံရေးပါတီတွေအဖြစ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)၊ တိုင်းရင်းသား စည်းလုံးညီညွတ်ရေးပါတီ (NUP) ၊ ပြည်သူ့ရှေ့ဆောင်ပါတီ (PPP ) နဲ့ ပြည်နယ်အခြေစိုက် ကယားပြည်နယ်ပြည်သူ့ပါတီ (KySPP) ဖြစ်ပါတယ်။ လက်ရှိ ရွေးကောက်ပွဲ ပြုလုပ်မယ့် မြို့နယ် ၄ ခု အပြင် ရှမ်း – ကရင်နီနယ်စပ်မှာလည်း ပြီးခဲ့တဲ့ ဩဂုတ်လအစောပိုင်းကတည်းက စစ်ကော်မရှင်က စစ်ကြောင်းထိုးလာပြီးနောက် လက်ရှိမှာ စစ်မျက်နှာ (၅) ခုဖြစ်တဲ့ ပင်လောင်း-ဖယ်ခုံ နယ်စပ် စစ်မျက်နှာ၊ လွိုင်ကော်အရှေ့ခြမ်း စစ်မျက်နှာ၊ မိုးဗြဲ-နန်းမယ်ခုံစစ်မျက်နှာ၊ ဒီးမော့ဆို-ဖရူဆို စစ်မျက်နှာ၊ ဘောလခဲစစ်မျက်နှာတို့မှာ စစ်ကောင်စီတပ်တွေ စစ်ကြောင်းထိုးနေတာကြောင့် တော်လှန်ရေးတပ်ဖွဲ့တွေနဲ့ တိုက်ပွဲဖြစ်ပွားနေဆဲ ဖြစ်ပါတယ်။ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က တရားမျှတပြီး သိက္ခာရှိတဲ့ ပါတီစုံဒီမိုကရေစီရွေးကောက်ပွဲ လို့ ခေါ်ဆိုနေပေမယ့် လူထုတွေရဲ့ လွတ်လပ်စွာပြောဆိုခွင့် ၊ အရပ်သားရှိရာ နေရာတွေကို လေယာဉ်ကြဲတာ ၊ လက်နက်ကြီးပစ်ခတ်တာတွေကို လုပ်ဆောင်နေဆဲ ဖြစ်ပြီး စစ်ကော်မရှင်လက်အောက်က လူထုတွေကတော့ ရွေးကောက်ပွဲဆန္ဒမဲအတွက် မဖြစ်မနေ မဲပေးရတော့မှာပါ။

“အကြောက်တရားနဲ့ မဲပေးရတော့မယ့် စစ်ကော်မရှင်ထိန်းချုပ်မှုအောက်က ကရင်နီဒေသခံများ…”

« Prev 1 … 148 149 150 151 152 … 1,114 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အယ်လ်နီညိုကြောင့် ပနားမားတူမြောင်း သင်္ဘောသွားလာမှု လျော့ချမည် — August 21, 2026 3:56 pm
အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို — August 20, 2026 2:35 pm
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ် — August 20, 2026 2:33 pm

Recent Posts

အယ်လ်နီညိုကြောင့် ပနားမားတူမြောင်း သင်္ဘောသွားလာမှု လျော့ချမည်
မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ
စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ
နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက်
အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို

Archives

Archives

×Close