NMG Doh – Page 165 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Nov 11

ဖားကန့်တိုက်ပွဲများအတွင်း အရပ်သား ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၁ ရက်။ ကချင်ပြည်၊ ဖားကန့်မြို့နယ်က တိုက်ပွဲများ အတွင်း ပေါက်ကွဲမှုများကြောင့် အရပ်သား ၂ ဦး သေဆုံးခဲ့သည်။ ပြီးခဲ့သည့် နိုဝင်ဘာလ ၉ ရက်နေ့တွင် ကာမိုင်းမြို့မှ အင်အား ၁၀၀ ခန့်ရှိသည့် စစ်ကော်မရှင် စစ်ကြောင်းသည် စစ်ကား တစ်စီးနှင့် ဖားကန့်မြို့ထဲ ဝင်လာစဥ် မှော်စီဆာကျေးရွာ အရောက် ကချင်လွတ်လပ်ရေး တပ်မတော် KIA နှင့် ပူးပေါင်းတပ်များက မိုင်းထောင် တိုက်ခိုက်ခဲ့သည်။ တော်လှန်ရေး အင်အားစုများ၏ အဆိုပါ တိုက်ခိုက်မှုတွင် စစ်ကော်မရှင်တပ်ဖွဲ့များ စီးနင်းလာသည့် ကားနောက် ကပ်လိုက်လာသည့် သားအမိနှစ်ဦး မိုင်းဆ ထိမှန်သေဆုံးခဲ့ရပြီး ယမန်နေ့ကမူ မှော်စီဆာ - ဖားကန့် လမ်းမပေါ် တွင် ပေါက်ကွဲမှုကြောင့် အမျိုးသားတစ်ဦး ထပ်မံ သေဆုံးခဲ့ရပြန်သည်။ “ဖားကန့်မြို့ထဲကို ရောက်လာတာကတော့ အတိအကျ ပြောရင် ၉ ရက်နေ့က ဖြစ်မယ်။ ဖားကန့်ကို ကာမိုင်း ဘက်က ဝင်လာတာ။ အဲ့ဒီဝင်လာတဲ့ အင်အားနဲ့ ဖားကန့်နယ်မြေခံ အင်အားနဲ့ ပူးပေါင်းပြီးတော့ နယ်မြေ စိုးမိုးမှု ရရှိရေး သူတို့တွေ လုပ်နေတာ။ သူတို့က ရွေးကောက်ပွဲကာလမှာ နယ်မြေစိုးမိုးမှုရရေးနဲ့ လမ်းကြောင်းတွေ ထိန်းချုပ်ဖို့ လို့ထင်တယ်။” ဖားကန့်မြို့ကို စစ်ကော်မရှင် အင်အားဖြည့်တင်းလာသည့် အကြောင်းအရင်းနှင့် ပတ်သက်၍ ရပ်မိရပ်ဖလည်း ဖြစ်၊ မြို့ခံတစ်ဦးလည်း ဖြစ်သည့် အမျိုးသားတစ်ဦးက သုံးသပ်ရှင်းပြသည်။ အဆိုပါ စစ်ကော်မရှင် စစ်ကြောင်း ကားမိုင်းဆွဲ တိုက်ခိုက်ခံရမှုအပြီး စစ်ကော်မရှင် တပ်သားများက ၎င်းတို့ တိုက်ခိုက်ခံခဲ့ရသည့် အနီးအနားရှိ အရပ်သား နေအိမ်များကို စီးနင်းခဲ့သေးသည်။ ထို့အပြင် စစ်ကော်မရှင် စစ်ကြောင်း တိုက်ခိုက်ခံရမှုတွင် စစ်ကော်မရှင် တပ်ဖွဲ့ဝင်များလည်း သေဆုံးဒဏ်ရာရခဲ့ သည် ဟု မြေပြင် သတင်းအရင်းအမြစ်များက ပြောသည်။ ထို့နောက် ကျန်ရှိသော စစ်သားများက အရပ်သား ကားများကို ချောဆွဲကာ ဘေးလွှတ်ရာသို့ ရွှေ့ပြောင်းခဲ့ကြပြီး စစ်ကော်မရှင် စစ်ကြောင်း တစ်ခုလုံးသည် မှော်စီဆာကျေးရွာရှိ SKY Hotel တွင် ယမန်နေ့ညအထိ အထိုင်ချ တပ်စွဲခဲ့ကြသည်ဟု ဆိုသည်။ “မှော်စီဆာ SKY Hotel မှာက စစ်တပ်က တပ်ဆွဲထားခြင်း မရှိတော့ပါလို့ ပြောလာတာကြောင့် ဝမ်းသာမလို့ ရှိတုန်း မှော်စီဆာရွာ မိန်းလမ်းမကြီးဘက် အုန်းအုန်းနဲ့ ပြင်းထန်တဲ့ ပေါက်ကွဲသံ နှစ် ချက်ကြား။ မှော်စီဆာ တောင်ပေါ် ကျောင်းနဲ့ ချမြစ်ချင်းဝန်းထဲ ကျရောက်ပေါက်ကွဲ” ဟု ဆိုကာ ယနေ့ ဖားကန့်မြို့ အခြေအနေကို အော်ဇော်မိုး- ဖားကန့် ဖေ့စ်ဘုတ်တွင် ရေးသားထားသည်။ ဖားကန့်မြို့တွင် အောက်တိုဘာလ တတိယအပတ်မှ စတင်ကာ တိုက်ပွဲများ ငြိမ်သက်နေရာမှ ပြီးခဲ့သည့် တနင်္ဂနွေနေ့မှ စတင်ကာ နှစ်ဖက်တပ်များ အကြား ထိတွေ့မှုများ ပြန်လည် ဖြစ်ပွားလာခြင်း ဖြစ်ပြီး ယနေ့ထိ နှစ်ဖက် ကြား ပစ်ခတ်မှုများ ဖြစ်ပွားနေသည်ဟု ဒေသခံများက ပြောသည်။ လက်ရှိတွင် ဖားကန့်မြို့နယ်နှင့် ကာမိုင်းကြားရှိ လမ်းကြောင်း တစ်လျှောက်၌ စစ်ရေးတင်းမာမှုများ မြင့်တက် နေပြီး၊ နယ်မြေရှင်းလင်းရေးနှင့် လမ်းကြောင်း ထိန်းချုပ်မှုများကြောင့် အရပ်သားပြည်သူများ၏ လုံခြုံရေး အခြေအနေမှာ စိုးရိမ်ဖွယ်ရာ ဖြစ်နေသည်။

ဖားကန့်တိုက်ပွဲများအတွင်း အရပ်သား ၂ ဦး သေဆုံး

Nov 11

ရွေးကောက်ပွဲ ဝင်မည့်သူကို နိုင်ကျဉ်း အစည်းအရုံးမှ ထုတ်ပယ် သတင်းနှင့် မီဒီယာ ကွန်ရက် ၂၀၂၅ ခုနှစ်၊ နိုဝင်ဘာလ ၁၁ ရက်။ စစ်ကောင်စီက ဦးစီးကျင်းပမည့် ရွေးကောက်ပွဲ ဝင်ပြိုင်မည့် အဖွဲ့ဝင်တစ်ဦးကို ကရင်နီ နိုင်ငံရေး အကျဉ်းသားများ အစည်းအရုံး (KAPP) မှ ထုတ်ပယ်လိုက် သည်။ စစ်ကော်မရှင်က ကျင်းပမည့် ရွေးကော်ပွဲ၌ ပါဝင်ယှဉ်ပြိုင်ရန် ပြင်ဆင်နေသည့် အဖွဲ့ဝင်တစ်ဦးအား ကရင်နီ နိုင်ငံရေး အကျဉ်းသားများ အစည်းအရုံးမှ ထုတ်ပယ်လိုက်သည်ဟု နိုဝင်ဘာလ ၇ ရက်နေ့တွင် ကြေညာချက် ထုတ်ပြန်သည်။ အဖွဲ့ဝင် ဖြစ်သည့် အသက် ၃၀ ဝန်းကျင်အရွယ် ကိုသက်မှူးအောင်ဆိုသူမှာ ကရင်နီ (ကယား) ပြည် ကိုယ်စားပြု ပြည်နယ်လွှတ်တော် နေရာ၌ ပြည်သူ့ပါတီ ကိုယ်စားပြု ဝင်ရောက်ယှဉ်ပြိုင်ရန် ပြင်ဆင်နေခြင်း ဖြစ်သည်။ KPPA မှ ‌ပြောရေးဆိုခွင့်ရှိသူ တစ်ဦးက “ကျနော်တို့အဖွဲ့ သဘောထားကတော့ ရှင်းတယ်လေနော်။ သူက ကရင် နီ ပြည်သူတွေ အပေါ်မှာတော့ သစ္စာဖောက်သွားပြီပေါ့နော်။ နောက်တခုက ကျနော်တို့ ထုတ်ပြန်ချက် အတိုင်း ပဲ။ အဖွဲ့ဝင် အဖြစ်ကနေ ထုတ်ပယ်လိုက်တယ်။ လုံးဝကို နိုင်ငံရေးပိုင်းဆိုင်ရာတွေ ထိတွေ့ဆက်ဆံမှု မပြုတော့ ဘူး ပေါ့နော်။ အဲ့လိုပါပဲ ကျနော်တို့ အမြင်က” ဟု ပြောသည်။ လက်ရှိ ကရင်နီပြည်၌ စစ်ကော်မရှင်တပ်၏ လက်နက်ကြီးနှင့် လေကြောင်းဒဏ်များ နေ့စဉ်ရက်ဆက် ပြည်သူ များ အနေဖြင့် ခံစားနေရသည်ဖြစ်ရာ ကိူသက်မှူးအောင် ပြောဆိုခဲ့သည့် လွှတ်တော်တွင်းသို့ ပြည်သူ့အသံများ ယူဆောင်သွားမည် ဆိုသောအချက်မှာ မဖြစ်နိုင်ဟု ၎င်းက ထပ်လောင်းပြောကြားသည်။ KPPA အနေဖြင့် ၂၀၂၁ ခုနှစ် စစ်အာဏာသိမ်းပြီးနောက်ပိုင်း လွိုင်ကော်ထောင်မှ လွတ်မြောက်လာသည့် နိုင်ကျဉ်းများ အားလုံးကို အဖွဲ့ဝင်အဖြစ် သတ်မှတ်ထားသည်ဟု ဖော်ပြထားသည်။ နိုင်ငံရေး အကျဉ်းသား တစ်ဦးဖြစ်သည့် ကိုသက်မှူးအောင်မှာလည်း ထောင်ကလွတ်မြောက်သည့် အချိန်မှစ၍ KPPA နှင့်အတူ လက်တွဲပြီး နိုင်ကျဉ်းကိစ္စရပ်များတွင် ပါဝင်ကူညီခဲ့ဖူးသူ ဖြစ်သည်။ သို့သော် အဖွဲ့အနေဖြင့် လာမည့် ဒီဇင်ဘာလ ၂၈ ရက်နေ့၌ ကျင်းပမည့် ရွေးကောက်ပွဲအား အပြင်းအထန် ဆန့်ကျင်သဖြင့် ကိုသက်မှူးအောင်ကိုလည်း သစ္စာဖောက်အဖြစ် ကြေညာလိုက်သည်ဟု ဆိုသည်။ စစ်အာသိမ်းပြီး နောက်ပိုင်းကာလများ၌ လွိုင်ကော် အကျဉ်းထောင်မှ လွတ်မြောက်လာသည့် နိုင်ကျဉ်းများမှာ ၎င်းတို့ ယုံကြည်ချက်အတိုင်း ဆက်လက် လျှောက်လှမ်းနေကြပြီး စစ်ကော်မရှင်ထံသို့ ဘက်ပြောင်းခိုလှုံသူမှာ ကိုသက်မှူးအောင် တစ်ဦးသာ ရှိသည်ဟု KPPA ‌ပြောရေးဆိုခွင့်ရှိသူ တစ်ဦးက ဆက်ပြောသည်။ “သူတယောက်ပဲ ရှိတာပေါ့နော်။ ကျန်တဲ့လူတွေကတော့ သူတို့ ယုံကြည်ချက်အတိုင်း ဆက်လုပ်နေတာပေါ့ နော်။ လုပ်ရင်းနဲ့ အသက်ပေးသွားတဲ့ လူတွေ၊ ထောင်ထဲကနေ ပြန်ထွက်လာပြီးမှ သူတို့လုပ်နိုင်ရာ လုပ်ရင်းနဲ့ အသက်ပေးသွားတဲ့ ညီအကိုတွေလည်း ရှိတယ်။ ဒါမဲ့ ဆိုးဝါးတာက သူက စစ်ကောင်စီ ကျင်းပတဲ့ ရွေးကော်ပွဲ ဝင်ပြိင်မှတော့ စစ်ကောင်စီအောက်ပဲ ရောက်သွားတဲ့ သဘောပေါ့နော်။” ယခုဖြစ်ရပ်သည် စစ်ကော်မရှင်၏ အတုအယောင် ရွေးကောက်ပွဲအပေါ် ပြည်သူနှင့် တော်လှန်ရေး အင်အားစု များအကြား သဘောထားကွဲလွဲမှုနှင့် သစ္စာစောင့်သိမှုဆိုင်ရာ စိန်ခေါ်မှုများကို ထင်ရှားစေခဲ့သည်ဟု KPPA က ဆိုသည်။ ကိုသက်မှူးအောင်မှာ ကျောင်းသားသမဂ္ဂ ခေါင်းဆောင် အနေဖြင့် အကြမ်းမဖက် ဆန္ဒပြကာလများ ပြီးဆုံးသည့် နောက်ပိုင်းကာလများ အတွင်း တော်လှန်ရေး တပ်ဖွဲ့များအား ထောက်ပို့ လုပ်ဆောင်ခဲ့ဖူးပြီး ယင်းအမှုဖြင့် လွိုင်ကော်မြို့တွင်း တစ်နေရာ၌ ဖမ်းဆီးခံခဲ့ရခြင်း ဖြစ်သည်။ ထို့နောက် ၎င်းအား နိုင်ငံတော်ပုန်ကန်မှု၊ မတရားအသင်း ဆက်သွယ်မှု၊ လိုင်စင်မဲ့ကား မောင်းနှင်မှု စသည့်စွဲချက် များ ဖြင့် ပုဒ်မ ၅၀၅ - က အရ နှစ်ရှည်ထောင်ဒဏ် ချမှတ်ခဲ့ပြီးနောက် ၃ နှစ်ကျော်အကြာတွင် စစ်ကော်မရှင်၏ လွတ်ငြိမ်းချမ်းသာခွင့်ဖြင့် ပြန်လည် လွတ်မြောက်လာသူ ဖြစ်သည်။

ရွေးကောက်ပွဲ ဝင်မည့်သူကို နိုင်ကျဉ်း အစည်းအရုံးမှ ထုတ်ပယ်

Nov 11

ကြံ့ခိုင် ဖွံ့ဖြိုးရေး ပါတီ ရုံးကို ဖောက်ခွဲ ဖျက်ဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၁ ရက်။ ထားဝယ်ခရိုင်၊ လောင်းလုံးမြို့ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ရုံးအား ဖောက်ခွဲတိုက်ခိုက် လိုက်ခြင်းဖြင့် သံမဏိ လိပ်ပြာတပ်ဖွဲ့က စစ်ကော်မရှင်၏ ရွေးကောက်ပွဲအတုကို ဆန့်ကျင်ကြောင်း ထုတ်ဖော်ကြေညာခဲ့သည်။ ထားဝယ်ခရိုင်၊ လောင်းလုံးမြို့ပေါ်ရှိ (USDP) ရုံးတွင် နိုဝင်ဘာလ ၈ ရက်နေ့၊ နံနက် ၅ နာရီခွဲခန့်က အင်အား ပြင်း ထန်သော ပေါက်ကွဲမှုတစ်ခု ဖြစ်ပွားခဲ့ပြီးနောက် မီးလောင်ကျွမ်းခဲ့ရာ ရုံးတစ်ခုလုံးမီးလောင်ကာ လုံးဝပျက်စီးသွားခဲ့ကြောင်း မြို့ခံများက ပြောသည်။ ပေါက်ကွဲမှုသည် လောင်းလုံးမြို့မ ရဲစခန်းနှင့် မီတာ ၆၀၀ ကျော်သာ ကွာဝေးသော နေရာတွင် ဖြစ်ပွားခဲ့ခြင်း ဖြစ် သည်။ ယခုတိုက်ခိုက်မှုကြောင့် လူအထိအခိုက်မရှိခဲ့သော်လည်း ပါတီရုံးအတွင်းရှိ ပစ္စည်းများအားလုံး မီးလောင်ပြာကျ ခဲ့သည်ဟု မြို့ခံများက ပြောသည်။ လောင်းလုံးမြို့ (က) ရပ်ကွက်မှ အသက် ၅၀ ခန့်အရွယ် အမျိုးသားတစ်ဦးက "ဝုန်း ဆိုတဲ့ အသံက အကျယ်ကြီး ပဲ ကြားရတယ်၊ ပြီးတာနဲ့ မီးခိုးလုံးကြီးထွက်လာတယ်၊ ဒီနေ့ (နိုဝင်ဘာ ၉ ရက်) မနက်ပိုင်းအချိန်ထိ မီးလောင် နေတုန်းပဲ၊ ရုံးထဲက ပစ္စည်းတွေ ဘာမှမကျန်တော့ဘူး၊ အကုန်လုံး ပြာဖြစ်သွားပြီ” ဟု ပြောသည်။ ပေါက်ကွဲမှုဖြစ်ပွားပြီးနောက် တစ်နာရီခန့်ကြာသည် အထိ စစ်ကော်မရှင် တပ်ဖွဲ့ဝင်များ ပေါက်ကွဲမှုဖြစ်ပွားရာသို့ ရောက်ရှိလာခြင်း မရှိသေးကြောင်း ၎င်းမြို့ခံက ဆိုသည်။ အဆိုပါပေါက်ကွဲမှုနှင့်ပတ်သက်၍ လောင်းလုံး သံမဏိလိပ်ပြာတပ်ဖွဲ့မှ နိုဝင်ဘာလ ၉ ရက်နေ့တွင် တရားဝင် ထုတ်ပြန်ကြေညာခဲ့ပြီး စစ်ကော်မရှင်တပ်၏ အတုအယောင် ရွေးကောက်ပွဲကို လက်မခံဘဲ ဆန့်ကျင်သည့်အနေ ဖြင့် ဗုံးဖောက်ခွဲမှုအား ပြုလုပ်ခဲ့ခြင်းဖြစ်ကြောင်း ပြောသည်။ ၎င်းတို့၏ ထုတ်ပြန်ချက်တွင် ပြည်သူများအနေဖြင့် စစ်ကော်မရှင်တပ်၏ ရွေးကောက်ပွဲတွင် ပူးပေါင်းပါဝင်ခြင်း မပြုလုပ်ကြရန် တိုက်တွန်းထားပြီး၊ ရွေးကောက်ပွဲကို နေရာဒေသမရွေး ဆန့်ကျင်တိုက်ခိုက်သွားမည်ဟုလည်း ပြတ်သားစွာ ရေးသားထားသည်။ စစ်ကော်မရှင်တပ်၏ ရွေးကောက်ပွဲကော်မရှင်က ရွေးကောက်ပွဲကို ၂၀၂၅ ခုနှစ် ဒီဇင်ဘာလ ၂၈ ရက်နေ့မှ စတင် ၍ အပိုင်းလိုက် ကျင်းပသွားမည်ဟု ကြေညာထားသည်။ ထားဝယ်ခရိုင်အတွင်း၌ ယခုရက်ပိုင်းအတွင်း စစ်ကော်မရှင်တပ်မှ ရှင်မုတ္ထီး၊ လောင်းလုံးနှင့် ရေဖြူမြို့နယ်ရှိ ကျေးရွာအချို့တွင် လုံခြုံရေး တင်းကျပ်စွာဖြင့် နေအိမ်လိုက် လူဦးရေစာရင်းနှင့် ဓာတ်ပုံများ လိုက်လံကောက်ယူခြင်းများလည်း ရှိနေသည်။

ကြံ့ခိုင် ဖွံ့ဖြိုးရေး ပါတီ ရုံးကို ဖောက်ခွဲ ဖျက်ဆီး

Nov 11

နေအိမ်လူ စာရင်း ကောက်ခံမှုအတွက် ရွာခံများ စိုးရိမ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၁ ရက်။ ထားဝယ်ခရိုင်အတွင်းရှိ ကျေးရွာများတွင် နေအိမ်လိုက် စာရင်းကောက်ယူပြီး မိသားစုဓာတ်ပုံများ ရိုက်ယူခြင်း ကို စစ်ကော်မရှင်တပ်က ပြုလုပ်ခဲ့ရာ၊ ဒေသခံများအား စောင့်ကြည့်ထောက်လှမ်းသွားမည်ကို စိုးရိမ်နေကြသည်။ ထားဝယ်ခရိုင်၊ ထားဝယ်မြို့နယ်၊ ရှင်မုတ္ထီးကျေးရွာတွင် စစ်ကော်မရှင် တပ်ဖွဲ့ဝင်များသည် လုံခြုံရေးအပြည့်ဖြင့် ဝင်ရောက်ကာ အချို့နေအိမ်များမှ မိသားစုဝင်အားလုံးကို ဓာတ်ပုံရိုက်၍ လူဦးရေစာရင်းများကို လိုက်လံကောက် ယူသွားကြောင်း ဒေသခံရွာသားများက ပြောသည်။ နိုဝင်ဘာလ ၆ ရက်နေ့၊ နံနက် ၁၀ နာရီခန့်တွင် စစ်ကော်မရှင် တပ်ဖွဲ့ဝင်များသည် မြေတင်ကားများဖြင့် ရောက်ရှိ လာပြီး ကျေးရွာဘုန်းကြီးကျောင်းတွင် ယာယီတပ်စွဲကာ ယင်းလုပ်ငန်းကို စတင်ခဲ့ခြင်းဖြစ်သည်။ ကျေးရွာတစ်ရွာလုံးကို စာရင်းကောက်ယူခြင်းမျိုး မဟုတ်ဘဲ ရှင်မုတ္ထီးရွာလယ်လမ်းမကြီးအတွင်းရှိ နေအိမ်များ ကိုသာ ရွေးချယ် စာရင်းကောက်ယူသွားခဲ့ခြင်း ဖြစ်သည်ဟု ရွာသားများက ဆိုသည်။ ဒေသခံတစ်ဦး၏ ပြောပြချက်အရ စစ်ကော်မရှင်တပ်၏ လုပ်ရပ်သည် ရိုးရှင်းသော စာရင်းကောက်ယူမှုမျိုး မဟုတ်ဘဲ လုံခြုံရေးတင်းကျပ်စွာ ချထားကာ အရပ်သားများ၏ ကိုယ်ရေးအချက်အလက်များကို ရယူခြင်းဖြစ် သည်။ အသက် ၄၅ နှစ်အရွယ် ရွာသားတစ်ဦးက “စာရင်းကောက်တာက ရွာလယ်လမ်း တစ်လမ်းတည်းပါပဲ၊ အဲဒီလမ်း ထဲက အိမ်တွေမှာရှိတဲ့ မိသားစုဝင်တွေ အားလုံးကို ဓာတ်ပုံရိုက်သွားတယ်၊ ဘာအတွက်ရိုက်တာလဲဆိုတာတော့ မပြောသွားဘူး” ဟု ပြောသည်။ စစ်ကော်မရှင် တပ်ဖွဲ့ဝင်များက ကင်းများချထားပြီးနောက် အရပ်ဝတ်ဝတ်ဆင်ထားသူ အချို့က စာရင်းနှင့် ဓာတ်ပုံ ကောက်ယူခြင်းကို ပြုလုပ်ခဲ့ကြောင်း ၎င်းက ဆက်လက်ပြောဆိုသည်။ စစ်ကော်မရှင် တပ်ဖွဲ့ဝင်များသည် ရှင်မုတ္ထီးကျေးရွာ ပတ်ဝန်းကျင် အနီးတစ်ဝိုက်တွင် နေရာယူထားခဲ့ပြီးနောက် နိုဝင်ဘာလ ၇ ရက်နေ့၊ ညနေပိုင်းတွင်မှ ရွာမှ ပြန်လည် ထွက်ခွာသွားခဲ့သည်ဟု ရွာသားများက ပြောသည်။ အလားတူ စာရင်းကောက်ယူမှုများသည် ထားဝယ်ခရိုင် အတွင်းရှိ လောင်းလုံးမြို့နယ်နှင့် ရေဖြူမြို့နယ်ရှိ ကျေးရွာအချို့တွင်လည်း ယခုရက်ပိုင်းအတွင်း ဆက်တိုက်ပြုလုပ်နေကြောင်း ဒေသတွင်း သတင်းများက ဖော်ပြ သည်။ စစ်ကော်မရှင်တပ်သည် ၎င်းတို့၏ ထိန်းချုပ်နယ်မြေများတွင် လူပုဂ္ဂိုလ် စိစစ်ရေးနှင့် စောင့်ကြည့်လေ့လာရေး စနစ် (PSMS) အပါအဝင် ဒီဂျစ်တယ် နည်းပညာများကို အသုံးပြု၍ ပြည်သူလူထုအား စောင့်ကြည့်ထောက်လှမ်း ရန် ကြိုးပမ်းနေကြောင်း အသံအဖွဲ့ကဲ့သို့သော အရပ်ဘက်အဖွဲ့အစည်းများက ထုတ်ပြန်ထားသည်။ ထားဝယ်ဒေသရှိ နေအိမ်လိုက် ဓာတ်ပုံရိုက်၍ စာရင်းကောက်ယူခြင်းသည် နိုင်ငံသားများ၏ ဇီဝဆိုင်ရာ အချက် အလက် (Biometric Data) များ ရယူစုဆောင်းကာ ဒေသခံများ၏ လှုပ်ရှားမှုများကို ထိန်းချုပ်ရန် ရည်ရွယ်သည့် လုပ်ရပ်ဖြစ်ကြောင်း နိုင်ငံရေး လေ့လာသူများက သုံးသပ်ကြသည်။ ယင်းလုပ်ရပ်များသည် ဒေသခံပြည်သူများအကြား စိုးရိမ်ပူပန်မှုနှင့် မလုံခြုံမှုများကို ပိုမိုမြင့်တက်စေခဲ့သည်။

နေအိမ်လူ စာရင်း ကောက်ခံမှုအတွက် ရွာခံများ စိုးရိမ်

Nov 7

ပုဏ္ဏားကျွန်း လေကြောင်းတိုက်ခိုက်မှုကြောင့် အရပ်သား အနည်းဆုံး ၅ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၇ ရက်။ ရခိုင်ပြည်၊ ပုဏ္ဏားကျွန်းမြို့နယ်ရှိ ကျေးရွာ အချို့ကို စစ်ကော်မရှင်တပ်က လေကြောင်း၊ လက်နက်ကြီး၊ ဒရုန်းများ ဖြင့် ပစ်ခတ်တိုက်ခိုက်မှုများ ပြုလုပ်ခဲ့ရာ ကလေးအပါအဝင် အရပ်သား သေဆုံးမှု ၅ ဦးထက်မနည်း ရှိခဲ့သည်ဟု ဒေသခံများက ပြောသည်။ စစ်ကော်မရှင်တပ်၏ နိုဝင်ဘာလ ၇ ရက်နေ့၊ နံနက်ပိုင်းတွင် လေကြောင်း၊ လက်နက်ကြီးနှင့် ဒရုန်းများဖြင့် ပစ်ခတ်တိုက်ခိုက်ခဲ့ရာ အရပ်သား ၅ ဦး၊ သေဆုံးပြီး ၉ ဦး ဒဏ်ရာရရှိခဲ့သည် ဟု ဒေသခံများနှင့် ဒေသတွင်း သတင်းရင်းမြစ်များက ပြောသည်။ အဆိုပါတိုက်ခိုက်မှုများသည် စစ်တွေမြို့နှင့် အစပ် နေရာအနီးတွင် စစ်ကော်မရှင်နှင့် အာရက္ခတပ်တော် (AA) တို့အကြား စစ်ရေးတင်းမာမှု မြင့်တက်နေချိန်တွင် ဖြစ်ပွားခဲ့ခြင်း ဖြစ်သည်။ နိုဝင်ဘာလ ၇ ရက်နေ့၊ နံနက် ၁၁ နာရီ အချိန်ခန့်တွင် စစ်တွေအခြေစိုက် ခမရ ၃၄၄ တပ်ရင်းမှ ပစ်ခတ်သော ၁၂၀ မမ လက်နက်ကြီးများ ကွမ်းတောင်ကျေးရွာသို့ ကျရောက်ပေါက်ကွဲခဲ့ရာ အသက် (၅၅) နှစ်အရွယ် အမျိုးသားတစ်ဦး ဒဏ်ရာရရှိခဲ့သည်။ ထို့နောက် နံနက် ၁၁ နာရီခွဲဝန်းကျင်၌ အောင်ဖြူပြင်ကျေးရွာကို အသေခံဒရုန်းဖြင့် ဗုံးနှစ်လုံးကြဲချ တိုက်ခိုက်မှု ကြောင့် အမျိုးသမီးတစ်ဦး ထိခိုက်ဒဏ်ရာရခဲ့ပြီး၊ တစ်ပြိုင်နက်တည်းမှာပင် ယိုးတရုတ်ကျေးရွာထဲကို ဂျက်ဖိုက်တာ တိုက်လေယာဉ်ဖြင့် ဗုံးနှစ်လုံးကြဲချ တိုက်ခိုက်ခဲ့သည်။ ပုဏ္ဏားကျွန်းဒေသခံများ၏ ပြောပြချက်အရ ယိုးတရုပ်ကျေးရွာတွင် ဗုံးကြဲတိုက်ခိုက်မှုကြောင့် အရပ်သား အမျိုးသားတစ်ဦးနှင့် အမျိုးသမီးလေးဦး အပါအဝင် ၅ ဦး သေဆုံးခဲ့ပြီး ၇ ဦး ဒဏ်ရာရရှိခဲ့သည်။ ထိခိုက်ဒဏ်ရာရရှိသူများမှာ လက်ရှိတွင် အရေးပေါ်ဆေးဝါးကုသမှု ခံယူနေကြရသည်။ ပုဏ္ဏားကျွန်းလူငယ်များ အစည်းအရုံး တာဝန်ရှိသူက “မနက် ၁၁ နာရီကျော် လောက်ကတည်းက လေကြောင်း တိုက်ခိုက်ခံရတာဗျ၊ ကျနော်တို့ ယိုးတရုတ်ရွာ ဗုံးကြဲတိုက်ခိုက်ခံရတာဗျ။ လူကတော့ ၅ ယောက် သေတယ်။ ၇ ယောက် ဒဏ်ရာ ရတယ်။ ဆေးကုသရေးလည်း အကုန်လုံးက ကျပ်တည်းနေတော့ အကူအညီတွေ လိုအပ်နေ ကြတယ်။ လူတွေကတော့ ထွက်ပြေး ကြတာပေါ့ဗျာ။ ရွာကနေ လူတွေအားလုံးက ထွက်ပြေးကြတာပေါ့ဗျာ” ဟု ပြောသည်။ စစ်ကော်မရှင်သည် ရှမ်းပြည် မြောက်ပိုင်း၌ ညီနောင်မဟာမိတ်သုံးဖွဲ့ထဲက ကိုးကန့်တပ်မတော် MNDAA၊ တအာင်းတပ် TNLA တို့နှင့် စစ်ရေး အပစ်အခတ်ရပ်စဲပြီးသည့်နောက် စစ်ဆင်ရေးနယ်မြေ အချို့ကျုံ့သွားခြင်းကို အခွင့်ကောင်းယူကာ ရခိုင်ပြည်ဘက်သို့ စစ်ရေးအရှိန် မြှင့်လာသည်ဟု AA က အောက်တိုဘာလ ၃၁ ရက်နေ့ တွင် သတိပေးထုတ်ပြန်ထားသည်။ အထက်ပါ ပုဏ္ဏားကျွန်းလူငယ်များ အစည်းအရုံး တာဝန်ရှိသူက “အခုလို အရပ်သားတွေကို ပစ်မှတ်ထား တိုက်ခိုက်တာကို ကျနော်တို့က ကန့်ကွက်ရှုတ်ချတယ်။ စစ်ကို စစ်လိုပဲ တိုက်စေချင်တယ်။ ဒီလို ဟိုယောင် ယောင် ဒီယောင်ယောင်နဲ့ အရပ်သား ပြည်သူတွေကို ဒုက္ခပေးတာမျိုးတော့ မလုပ်စေချင်ဘူး” ဟု ဆက် ပြောသည်။ အောက်တိုဘာလ ၃၁ ရက်နေ့ကလည်း ပုဏ္ဏားကျွန်းမြို့နယ်၊ ပန်းနီလာကျေးရွာကို စစ်ကော်မရှင်တပ်က ဗုံးကြဲ တိုက်ခိုက်ခဲ့ရာ ကလေးငယ်အပါအဝင် ၄ ဦး သေဆုံးပြီး ၉ ဦး ဒဏ်ရာရခဲ့သေးသည်။ စစ်ကော်မရှင်တပ်၏ လေကြောင်း၊ ဒရုန်း၊ လက်နက်ကြီး တိုက်ခိုက်မှုများ မကြာခဏ ဖြစ်ပွားနေခြင်းကြောင့် ဒေသခံများကြား စိုးရိမ်ထိတ်လန့်မှုများ မြင့်တက်နေသည်။ ပုဏ္ဏားကျွန်းမြို့နယ်သည် စစ်ကော်မရှင်တပ်၏ စစ်အုပ်ချုပ်ရေး ကြေညာထားသည့် မြို့နယ် ၆၃ မြို့နယ်ထဲတွင် ပါဝင်နေပြီး၊ လက်ရှိတွင် စစ်တွေ - ပုဏ္ဏားကျွန်းနယ် အစပ်တလျှောက်တွင် စစ်ရေးတင်းမာမှုများ ဆက်လက် ဖြစ်ပေါ်နေဆဲ ဖြစ်သည်။ ဓါတ်ပုံ - ပုဏ္ဏားကျွန်းလူငယ်များ အစည်းအရုံး

ပုဏ္ဏားကျွန်း လေကြောင်းတိုက်ခိုက်မှုကြောင့် အရပ်သား အနည်းဆုံး ၅ ဦး သေဆုံး

Nov 7

အင်းတော် တော်လှန်ရေး အဖွဲ့က အင်းတော်မြို့နယ်တွင် ညမထွက်ရ အမိန့်ထုတ်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၇ ရက်။ စစ်ကိုင်းတိုင်း၊ ကသာခရိုင်အတွင်းရှိ အင်းတော်မြို့နယ်တွင် နယ်မြေလုံခြုံရေးနှင့် တရားဥပဒေစိုးမိုးရေးအတွက် ညမထွက်ရအမိန့် ထုတ်ပြန်လိုက်သည်။ အင်းတော်မြို့နယ်ကို အပြီးသတ်သိမ်းပိုက် ထိန်းချုပ်ထားသည့် ပြည်သူ့ကာကွယ်ရေးတပ်ဖွဲ့ (PDF) က နယ်မြေ လုံခြုံရေးနှင့် တရားဥပဒေစိုးမိုးရေးအတွက် ညမထွက်ရအမိန့် ကို နိုဝင်ဘာလ ၁ ရက်နေ့မှစတင်ကာ ရက်အကန့် အသတ်မရှိ ထုတ်ပြန်လိုက်ကြောင်း Indaw Revolution (IR) အဖွဲ့က ထုတ်ပြန်သည်။ တော်လှန်ရေးအင်အားစုများ လွှမ်းမိုးထားသည့် အင်းတော်မြို့နယ်တွင် မကြာသေးမီက မှောင်ရိပ်ခို ခိုးဆိုး လုယက်မှုများ၊ မူးယစ်ရမ်းကားမှုများ များပြားလာခြင်းကြောင့် အဆိုပါပြစ်မှုများ လျော့ပါးစေရန်အတွက် ညအချိန် သွားလာခွင့်ကို ကန့်သတ်လိုက်ခြင်းဖြစ်သည်ဟု ဖော်ပြထားသည်။ ထုတ်ပြန်ချက်အရ ဒေသခံပြည်သူများသည် ည ၈ နာရီမှ နံနက် ၄ နာရီအထိ မြို့နယ်အတွင်း ဖြတ်သန်းသွား လာခြင်း မပြုလုပ်ရန် ကန့်သတ်ထားသည်။ အမိန့်ထုတ်ပြန်ရခြင်း၏ အဓိကအကြောင်းရင်းနှင့် ပတ်သက်၍ အင်းတော် PDF နှင့် နီးစပ်သူတစ်ဦးက “အဓိက တော့ အင်းတော်မြို့နယ်မှာ ခိုးဆိုးလုယက်မှုတွေ များလာတယ်။ မူးယစ်ရမ်းကား သောင်းကျန်းတာတွေ များ လာတာကြောင့်ပါ။ ပြီးရင် အမှောင်ခိုပြီးတော့ မူးယစ်ဆေး သုံးစွဲတာတွေ၊ ခိုးမှုတွေ များလာတာပေါ့လေ။ ဒါ့ကြောင့် သူတို့အနေနဲ့ ဒီအကြောင်းအရာတွေ ပပျောက်အောင် ဆောင်ရွက်စရာရှိတဲ့အတွက် အမိန့်ထုတ်ပြန် လိုက်တာပေါ့” ဟု ပြောသည်။ သို့သော် ညမထွက်ရအမိန့် ထုတ်ပြန်ချက်အတွင်း တော်လှန်ရေး တပ်ဖွဲ့ဝင်များ၏ တာဝန်အရ သွားလာခြင်း နှင့် ပြည်သူများ အနေဖြင့် ကျန်းမာရေးအရ အရေးပေါ် သွားလာခြင်းများကိုမူ အဆိုပါ ကန့်သတ်ချက်မှ ကင်းလွတ် ခွင့် ပြုထားသည်။ “တော်လှန်ရေးတပ်တွေ တာဝန်အရ သွားလာခြင်းနဲ့ ပြည်သူတွေ အရေးပေါ် ကျန်းမာရေး အခြေနေအရ သွားလာခြင်းတွေတော့ ကန့်သတ်မှုမှာ မပါဝင်ဘူး” ဟုလည်း ၎င်းဒေသခံအဖွဲ့နှင့် နီးစပ်သူက ပြောသည်။ အင်းတော်မြို့နယ်သည် စစ်ကိုင်းတိုင်းနှင့် ကချင်ပြည်အစပ်၊ ရွှေဘို - မြစ်ကြီးနား လမ်းမကြီးပေါ်တွင် တည်ရှိ သည့် ဗျူဟာမြောက် အချက်အချာကျသော မြို့နယ် ဖြစ်သည်။ တော်လှန်ရေး အင်အားစုများက အင်းတော်မြို့ကို ပြီးခဲ့သည့် ဧပြီလ ၇ ရက်နေ့တွင် အပြီးသတ် သိမ်းပိုက် ထိန်းချုပ်ခဲ့ပြီးနောက် အမျိုးသား ညီညွတ်ရေး အစိုးရ (NUG) ၏ အုပ်ချုပ်ရေး ယန္တရားများ လည်ပတ်နေသော ဒေသတစ်ခုလည်း ဖြစ်သည်။ မြို့ကို သိမ်းပိုက်ပြီး နောက်ပိုင်း စစ်ကော်မရှင်တပ်က မြို့ပေါ်သို့ ပြန်လည် ထိုးစစ်ဆင်ခြင်း မရှိသေးဘဲ အခြေ အနေ ငြိမ်သက်နေသဖြင့် ဒေသခံများလည်း နေရပ်၌ ပြန်လည်နေထိုင်လျက်ရှိသည်။ သို့ရာတွင် ဒေသတွင်း တရားဥပဒေ စိုးမိုးရေး ထိခိုက်လာမှုများကြောင့် PDF အနေဖြင့် ယခုကဲ့သို့ အချိန်ကန့် သတ် ထိန်းချုပ်မှုများ ပြုလုပ်လာခြင်းဖြစ်သည်ဟု ဒေသခံအချို့က ဆိုသည်။ ဓါတ်ပုံ - အင်းတော် PDF အဖွဲ့ (Indaw Revolution (IR))

အင်းတော် တော်လှန်ရေး အဖွဲ့က အင်းတော်မြို့နယ်တွင် ညမထွက်ရ အမိန့်ထုတ်ပြန်

Nov 7

စစ်ကော်မရှင်က ဝက်လက် အနောက်ခြမ်း ကျေးရွာ ၇ ရွာ မီးရှို့ဖျက်ဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၇ ရက်။ စစ်ကော်မရှင် တပ် စစ်ကြောင်းများ အပြင်းအထန် ထိုးဝင်လာနေသည့် စစ်ကိုင်းတိုင်း၊ ဝက်လက်မြို့နယ် အနောက်ခြမ်း၌ တစ်ပတ်အတွင်း ကျေးရွာပေါင်း ၇ ရွာ မီးရှို့ခံလိုက်ရသည်။ ဝက်လက်မြို့နယ် အနောက်ခြမ်းကို စစ်ကော်မရှင်တပ်က အင်အား အလုံးအရင်းဖြင့် စစ်ကြောင်းထိုး ဝင်ရောက် စီးနင်းရာ တစ်ပတ်အတွင်း ကျေးရွာ ၇ ရွာကို မီးရှို့ဖျက်ဆီးခဲ့သည် ဟု Wetlet Informational Network (WIN) (ဝက်လက် သတင်း ကွန်ရက်) က ထုတ်ပြန်သည်။ တော်လှန်ရေး အင်အားစုများ အားကောင်းသည့် ဝက်လက် အနောက်ဘက်ခြမ်းကို စစ်တပ်က တစ်နှစ်ဝန်းကျင် ခန့် စစ်ကြောင်းထိုးခြင်း မရှိခဲ့ရာမှ ယခုတစ်ကြိမ် စစ်ရေးလှုပ်ရှားမှုကြောင့် ဒေသခံ သောင်းနှင့်ချီ၍ ဘေးလွတ် ရာသို့ ထွက်ပြေးတိမ်းရှောင်နေကြရသည်။ နိုဝင်ဘာလ ၁ ရက်နေ့မှ စတင်ကာ ဆားတောင်မြို့နှင့် ရွှေဘိုမြို့အခြေစိုက် စစ်ကော်မရှင် စစ်ကြောင်းက အင်အား ၄၀၀ ကျော်ဖြင့် စစ်ကြောင်း နှစ်ကြောင်းခွဲကာ ဝက်လက်မြို့နယ် အနောက်ဘက်ခြမ်းသို့ စစ်ရေး လှုပ်ရှားမှုများ ပြုလုပ်ခဲ့ခြင်း ဖြစ်သည်။ အဆိုပါ စစ်ကြောင်းနှစ်ကြောင်းသည် နိုဝင်ဘာလ ၄ ရက်နေ့တွင် တမာကုန်း၊ ရွာတော်ကုန်း၊ တံတားဦး၊ ထုံးဘို ကျေးရွာများ၊ နိုဝင်ဘာလ ၅ ရက်နေ့တွင် စစ်ဘေးရှောင်နေအိမ်များ၊ မူးကြီးကျေးရွာ တို့အပြင် နိုဝင်ဘာလ ၆ ရက်နေ့က မြင်တော်ကျေးရွာတို့ကိုပါ စီးနင်းမီးရှို့ဖျက်ဆီးခဲ့ကြောင်း မြေပြင်သတင်းရင်းမြစ်က ပြောသည်။ စစ်ကော်မရှင်တပ်၏ စစ်ကြောင်းထိုးလာရခြင်းနှင့် ပတ်သက်၍ ဒေသခံတစ်ဦးက “ကျနော်တို့အင်အားစုက ရွာသာကြီးအထိုင်ကို ဝင်ရောက်သိမ်းပိုက်တဲ့ အခါကျတော့ ကျနော်တို့ဘက်က လိုအပ်ချက်တွေကြောင့် မသိမ်းနိုင်သေးဘူး။ အဲ့ချိန်မှာ သူတို့က အင်အားဖြည့်ပြီးတော့ နယ်မြေပတ်ရှင်းတယ်။ ပြီးတော့ ရွာတွေကို မီးရှို့တယ်။ အဲ့လို ယူဆပါတယ်” ဟု ပြောသည်။ ပြီးခဲ့သည့် အောက်တိုဘာလ ဒုတိယအပတ်တွင် ဝက်လက်မြို့နယ် ရွာသာကြီးကျေးရွာတွင် အထိုင်ချထားသည့် စစ်ကော်မရှင်တပ်နှင့် တော်လှန်ရေး အင်အားစုများအကြား တိုက်ပွဲများ ပြင်းထန်စွာ ဖြစ်ပွားခဲ့ရာ စစ်တပ်ဘက် က လေကြောင်းတိုက်ခိုက်မှုများ ပြုလုပ်ခဲ့သေးသည်။ အဆိုပါတိုက်ပွဲ အပြီးတွင် စစ်ကော်မရှင်တပ်က Mi-17 ထောက်ပို့ရဟတ်ယာဥ်များ အသုံးပြုကာ ရွာသာကြီး ကျေးရွာရှိ အထိုင်စခန်းကို အင်အားဖြည့်တင်းမှုများ ပြုလုပ်ခဲ့သည်ဟု တော်လှန်ရေး အင်အားစုများက ပြော သည်။ ဒေသခံများ၏ ပြောပြချက်အရ ဝက်လက် အနောက်ခြမ်းဒေသသည် တော်လှန်ရေးအင်အားစုများ လွှမ်းမိုးထား သော ဧရိယာ ဖြစ်သည်။ ဒေသခံတစ်ဦးက “အနောက်ခြမ်းက စစ်ကြောင်းမထိုးတာကြာပြီ တစ်နှစ်ဝန်းကျင်လောက်ရှိပြီ။ ဒီနှစ်ထဲမှာ တော့ ဒါပထမဆုံးဘဲ။ ဒီမှာက ကျနော်တို့တွေက စိုးမိုးထားတာ၊ သူတို့က အထိုင်ဘဲရှိတာ အထိုင်ကနေ ဘယ်မှ မထွက် ဘူး” ဟု ပြောသည်။ ယခုတစ်ကြိမ် စစ်ကြောင်းထိုးမှုကြောင့် ကျေးရွာပေါင်း ၂၀ ခန့် မှ အရပ်သားများ ဘေးလွတ်ရာသို့ ထွက်ပြေး တိမ်းရှောင် နေကြရသည်။ စစ်ကော်မရှင်တပ်သည် လာမည့် ဒီဇင်ဘာလတွင် ပြုလုပ်မည့် အပိုင်း (၁) ရွေးကောက်ပွဲ အတွက် ကျင်းပမည့် မြို့နယ် ၁၀၂ မြို့နယ်ကို ထုတ်ပြန်ထားရာ စစ်ကိုင်းတိုင်းမှ မြို့နယ် ၁၂ ခု ပါဝင်သည်။ ဝက်လက်မြို့နယ် အနောက်ခြမ်းကို ယခုကဲ့သို့ အင်အားသုံး စစ်ရေး လှုပ်ရှားလာခြင်းမှာ ရွေးကောက်ပွဲ ကျင်းပ မည့် မြို့နယ်များအတွင်း နယ်မြေစိုးမိုးမှု ရရှိရေးအတွက် စစ်ရေး အပြင်းအထန် လှုပ်ရှားခြင်း ဖြစ်ကြောင်း နိုင်ငံရေး လေ့လာသုံးသပ်သူများက ယူဆကြသည်။ ထို့ကြောင့် Wetlet Informational Network (WIN) က ဝက်လက်မြို့နယ် အနောက်ခြမ်းမှ ဒေသခံများအနေ ဖြင့် စစ်ကော်မရှင်တပ်၏ လေကြောင်း တိုက်ခိုက်မှုများကို သတိထားကြရန် နှင့် အရေးကြီး အချက်အလက်နှင့် စာရွက်စာတမ်းများကို ကြိုတင်ပြင်ဆင်ထားကြရန် သတိပေးနှိုးဆော်ထားသည်။

စစ်ကော်မရှင်က ဝက်လက် အနောက်ခြမ်း ကျေးရွာ ၇ ရွာ မီးရှို့ဖျက်ဆီး

Nov 7

ဗန်းမော်တွင် တိုက်ပွဲများ ပြင်းထန်ဆဲဖြစ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၇ ရက်။ ကချင်ပြည်၊ ဗန်းမော်မြို့နယ်အတွင်း၌ တိုက်ပွဲများမှာ နေ့စဉ်နှင့်အမျှ ပြင်းထန်စွာ ဖြစ်ပွားနေဆဲဖြစ်ပြီး၊ နိုဝင်ဘာ လ ၆ ရက်နေ့ တွင် စစ်ကော်မရှင်၏ ခလရ (၄၇) တပ်ရင်းဘက်၌ တိုက်ပွဲများ ပိုမိုပြင်းထန်ခဲ့ကြောင်း ကချင် စစ်ရေးသတင်းရင်းမြစ်များက ပြောသည်။ ကချင်လွတ်လပ်ရေး တပ်မတော် (KIA) သည် ဗန်းမော်မြို့ကို ထိုးစစ်ဆင်လျက်ရှိပြီး၊ စစ်ကော်မရှင်တပ် က ၎င်းတို့ လက်လွတ်ဆုံးရှုံးခဲ့ရသည့် နေရာများကို ပြန်လည်သိမ်းပိုက်နိုင်ရန်အတွက် အင်အား အလုံးအရင်း ဖြင့် ကြိုးပမ်းတိုက်ခိုက်နေခြင်းကြောင့် တိုက်ပွဲများ ဆက်တိုက်ဖြစ်ပွားနေခြင်းဖြစ်သည်။ ကချင်လွတ်လပ်ရေးအဖွဲ့ (KIO) ၏ သတင်းနှင့်ပြန်ကြားရေး တာဝန်ခံ ဗိုလ်မှူးကြီး နော်ဘူ က “ဗန်းမော်ဘက်မှာ တော့ နေ့တိုင်း တိုက်ပွဲ ဖြစ်ပါတယ်။ အခုအချိန်မှာကတော့ စစ်ကော်မရှင် စစ်သားတွေလည်း သူတို့ လက်လွှတ် ဆုံးရှုံး ခဲ့တဲ့ စခန်းတွေ၊ နေရာတွေ၊ မြို့ရွာရပ်ကွက်တွေ ပြန်ထိန်းချင်လို့ မြေပြင်ကနေလည်း ထိုးတာ။ လက် နက်ကြီးမျိုးစုံနဲ့ ပစ်ပြီးမှ ဒီဗန်းမော်မြို့မှာတော့ တိုက်ပွဲက တော်တော်ပြင်းထန်တယ်။ တိုက်ပွဲတွေက ဆက် တိုက်ဖြစ်တယ်။ အဲ့ဒါက ဗန်းမော်ဘက်က အခြေအနေ” ဟု အတည်ပြုပြောဆိုသည်။ ဗန်းမော်မြို့သိမ်းတိုက်ပွဲသည် ၂၀၂၄ ခုနှစ် ဒီဇင်ဘာလ ကတည်းက စတင်ခဲ့သည်ဖြစ်ရာ လက်ရှိအချိန်အထိ ၁၀ လနီးပါး ကြာမြင့်လာပြီဖြစ်သည်။ နိုဝင်ဘာလ ပထမပတ်အတွင်း နှစ်ဖက်ကြား တိုက်ပွဲများ ပြင်းထန်နေသည့် နေရာများမှာ ဗန်းမော်တက္ကသိုလ်ဝင်း နေရာ၊ ၃ မိုင် နေရာ နှင့် စစ်ကော်မရှင်တပ်၏ ခလရ ၄၇ တပ်ရင်းအနီးတစ်ဝိုက်တို့ဖြစ်သည်ဟု KIO သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက ပြောသည်။ တိုက်ပွဲများ ပြင်းထန်ရခြင်း၏ အဓိကအကြောင်းအရင်းမှာ နှစ်ဖက်၏ အပြန်အလှန် ထိုးစစ်များကြောင့် ဖြစ်သည်။ ပြီးခဲ့သည့် ဇူလိုင်၊ ဩဂုတ်လ အတွင်း စစ်ကော်မရှင်တပ်သည် စစ်သင်္ဘော အစီး ၂၀ ကျော် အသုံးပြု၍ စစ်လက် နက်နှင့် ရိက္ခာများ ပို့ဆောင်နိုင်ခဲ့သည်။ ထို့အပြင် လေကြောင်းတိုက်ခိုက်မှုများအပြင် အဆင့်မြင့် ဒရုန်းများကိုပါ သိသိသာသာ အသုံးပြုလာခဲ့သည်။ KIA အနေဖြင့် အောက်တိုဘာလဆန်းပိုင်းအတွင်း လက်လွတ်လိုက်ရသည့် ကာကင်းတပ်စခန်း ၃ ခု နှင့် ရွှေပြည် သာက KBC ဘုရားကျောင်းဝင်းနေရာ တို့ကို ပြန်လည်သိမ်းပိုက်နိုင်ခဲ့သော်လည်း၊ ဗန်းမော်မြို့ကို အပြီးသတ် ထိန်းချုပ်နိုင်ရန်အတွက် နှစ်ဖက်တပ်ဖွဲ့တို့ကြား တိုက်ပွဲများ ဆက်လက် ပြင်းထန်နေဆဲဖြစ်သည်။ ဗန်းမော်အပြင် ကချင်ပြည်ရှိ အခြားစစ်မျက်နှာများတွင်လည်း စစ်ရေးတင်းမာမှုများ ဆက်လက် ရှိနေကြောင်း ဗိုလ်မှူးကြီးနော်ဘူက ဆက် ပြောသည်။ “နောက် ဝိုင်းမော်ဘက်မှာလည်း လေကြောင်းနဲ့ ပစ်တာတွေ၊ လက်နက်ကြီးနဲ့ ပစ်တာတွေ ရှိတယ်။ မြေပြင်နေ တော့ သူတို့ထိုးတက်တာ မတွေ့ရဘူး။ ဖားကန့်ဘက်မှာတော့ တပတ်လောက်တော့ ငြိမ်နေပါတယ်။ လန်ဆယ် ဘက်မှာကတော့ သူတို့လည်း ထိုးလာလို့ ကျနော်တို့ ခုခံတိုက်ပွဲတွေ ရှိပါတယ်။ ဒါပေမယ့် ကျနော်တို့ ရွာတွေ ဘာတွေ ရွာနာမည်တွေ သိပ်မသိဘူး။ ကျနော်တို့လည်း သိပ်မကျွမ်းဘူး။” အဆိုပါ ပြောဆိုချက်အရ ဝိုင်းမော်ဘက်တွင် လေကြောင်းနှင့် လက်နက်ကြီး ပစ်ခတ်မှုများရှိနေသော်လည်း မြေပြင်၌ ထိုးစစ်မှာ ငြိမ်သက်နေပြီး၊ လန်ဆယ်ဘက် တွင်မူ KIA နှင့် စစ်ကော်မရှင်တပ်တို့အကြား ခုခံတိုက်ပွဲ များ ဖြစ်ပွားလျက်ရှိနေသည်။ ဗန်းမော်တိုက်ပွဲကို ရပ်တန့်စေရန်အတွက် နိုင်ငံရေးဖိအားများလည်း ရှိနေသည်။ ပြီးခဲ့သည့် အောက်တိုဘာလ ဒုတိယအပတ် တွင် KIO နှင့် တရုတ်အာဏာပိုင်များ တို့ တရုတ်နိုင်ငံ၊ ကူမင်းမြို့၌ တွေ့ဆုံခဲ့ပြီးနောက် တိုက်ပွဲ ငြိမ်သက်သွားပြီဆိုသော သတင်းများ လူမှုကွန်ရက်တွင် ပျံ့နှံ့ခဲ့သည်။ သို့သော်လည်း စစ်ကော်မရှင် ဝါဒဖြန့်သူများက KIO/KIA နှင့် စစ်တပ်တို့ တွေ့ဆုံဆွေးနွေးရန် ပြင်ဆင်နေပြီဟု ဝါဒဖြန့်မှုများ ဆက်တိုက်ပြုလုပ်နေသည်ကို KIA ဘက်က ငြင်းဆိုထားသည်။ ဗန်းမော်မြို့သည် ဗန်းမော်၊ မိုးမောက်၊ မံစီ၊ ရွှေကူ မြို့နယ်တို့ပါဝင်သော ခရိုင်ရုံးစိုက်ရာ ဒေသဖြစ်ပြီး၊ KIA နှင့် ပူးပေါင်းတပ်များက မိုးမောက်နှင့် မံစီမြို့များကိုမူ သိမ်းပိုက်ထားပြီး ဖြစ်သည်။

ဗန်းမော်တွင် တိုက်ပွဲများ ပြင်းထန်ဆဲဖြစ်

Nov 6

KNU မှ ပဋိပက္ခဒဏ်ခံ လူငယ်များအတွက် အနာဂတ် ပညာရေးဖော်ဆောင်မည် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၆ ရက်။ ကရင်အမျိုးသား အစည်းအရုံး (KNU) သည် ပဋိပက္ခနယ်မြေများမှ လူငယ်များအတွက် အာမခံချက်ရှိသော ပညာရေးစနစ် ဖော်ဆောင်ရန် ရည်ရွယ်၍ ‘ကော့သူးလေ အဆင့်မြင့်ပညာရေးကောင်စီ (Council of Higher Education, Kawthoolei)’ ကို ဥပဒေအရ အဖွဲ့အစည်းတစ်ခုအဖြစ် တည်ထောင်ရန် မူအားဖြင့် သဘော တူညီခဲ့ကြောင်း နိုဝင်ဘာလ ၆ ရက်နေ့တွင် ထုတ်ပြန်ခဲ့သည်။ အဆိုပါ ဆုံးဖြတ်ချက်ကို နိုဝင်ဘာလ ၆ ရက်နေ့က ကျင်းပသော ကော့သူးလေ အဆင့်မြင့်ပညာရေးဆိုင်ရာ ဦးဆောင်ညီလာခံတွင် ပညာရေးခေါင်းဆောင်နှင့် ပညာရှင်များ အပါအဝင် အယောက် ၈၀ ကျော် ပါဝင် ဆွေးနွေးပြီးနောက် ချမှတ်ခဲ့ခြင်းဖြစ်သည်။ အဆိုပါ ကောင်စီကို ဖွဲ့စည်းရခြင်းမှာ ပဋိပက္ခဒဏ်ခံနေရသည့် ဒေသများတွင် ပညာရေး၏ စဉ်ဆက်မပြတ်ရှိမှု ကို သေချာစေဖို့ရန်နှင့် အရည်အသွေးရှိသည့် ပညာရေးကို ဆက်လက်ပံ့ပိုးရန် ဖြစ်သည်ဟု ဆိုသည်။ ထိုကောင်စီသည် အဆင့်မြင့် ပညာရေး ကဏ္ဍအတွက် အုပ်ချုပ်မှု ဖွဲ့စည်းပုံနှင့် မူဝါဒများကို ခိုင်မာစေရန်၊ လက်ရှိ နှင့် ရေရှည် စိန်ခေါ်မှုများကို ဖြေရှင်းရန် မဟာဗျူဟာမြောက် လမ်းညွှန်မှုများ ပေးအပ်ရန် ရည်ရွယ်သည်။ KNU ထုတ်ပြန်ချက်တွင် “ဒီပဏာမ ခြေလှမ်းဟာ နောက်မျိုးဆက် လူငယ်တွေကို တတ်သိပညာ တပ်ဆင်ပေးရုံ သာမကဘဲ၊ ကော့သူးလေရဲ့ မိမိကိုယ်ကို ဆုံးဖြတ်ပိုင်ခွင့်နဲ့ ရေရှည်တည်တံ့တဲ့ နိုင်ငံတည်ဆောက်ရေး မျှော်မှန်း ချက်ကို အထောက်အကူ ပြုဖို့အတွက်ပါ” ဟု ဖော်ပြထားသည်။ ဤလုပ်ဆောင်ချက်သည် ပဋိပက္ခများကြားမှနေ၍ အနာဂတ်ကို တည်ဆောက်မည့် ပညာရေးစနစ် သစ် တစ်ခုကို စနစ်တကျ ခိုင်မာအောင် လုပ်ဆောင်ရန် ခြေလှမ်းသစ်တစ်ခုသည်ဟု KNU က ဆိုသည်။

KNU မှ ပဋိပက္ခဒဏ်ခံ လူငယ်များအတွက် အနာဂတ် ပညာရေးဖော်ဆောင်မည်

« Prev 1 … 163 164 165 166 167 … 1,115 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု — August 21, 2026 8:07 pm
ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု — August 21, 2026 8:04 pm
အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း — August 21, 2026 8:02 pm

Recent Posts

ရွှေကူ လေကြောင်းတိုက်ခိုက်မှုတွင် ကိုယ်ဝန်ဆောင် အမျိုးသမီးအပါ အရပ်သားများ ဒဏ်ရာရ
သောင်ရင်းမြစ်ရေတက်ပြီး မြဝတီနှင့် မဲဆောက်တွင် ရေကြီးရေလျှံမှုဖြစ်
အင်းလေးရေ မြင့်တက်လာ၍ ကြိုတင်ရွှေ့ပြောင်းမှုများ ပြုလုပ်
မြောင် ဘုန်းကြီးကျောင်း ဥပုသ်နေ့တွင် ဗုံးကြဲခံရ၍ ၁၂ ဦး ထက်မနည်း သေဆုံး
ဂွနှင့်သံတွဲကို စစ်တပ်က လေယာဉ်အုပ်ဖွဲ့ ဗုံးကြဲမှုကြောင့် စစ်ဘေးရှောင်များ ဒဏ်ရာရ

Archives

Archives

×Close