NMG Doh – Page 163 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Nov 19

လက်နက်ကိုင် ရွှေခိုးတူးသည့် မြန်မာနိုင်ငံသား ၄ ဦး ထိုင်းအာဏာပိုင်များ ဖမ်းဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။ ထိုင်း-မြန်မာ နယ်စပ်အနီးရှိ ထိန်းသိမ်းထားသော သဘာဝသစ်တောကြီးအတွင်း တရားမဝင် ရွှေခိုးတူးနေသည့် လက်နက်ကိုင်အဖွဲ့တစ်ဖွဲ့မှ မြန်မာနိုင်ငံသား ၃ ဦးနှင့် ဒေသခံ ကရင်တိုင်းရင်းသား ၁ ဦး စုစုပေါင်း ၄ ဦးကို ထိုင်းအာဏာပိုင်များက နိုဝင်ဘာလ ၁၅ ရက်နေ့တွင် ဝင်ရောက်ဖမ်းဆီးခဲ့သည်။ ထောင်ဖာဖုမ် အမျိုးသားဥယျာဉ် ရေဝေရေလဲ ဒေသကို ဖျက်ဆီးနေသည့် ၎င်းတို့အဖွဲ့ထံမှ ရွှေတူးကိရိယာများ အပြင် လက်လုပ်ရိုင်ဖယ်တစ်လက်ကိုပါ သိမ်းဆည်းရမိခဲ့သည်ဟု ထိုင်းသတင်းဌာနများက ဆိုသည်။ အဆိုပါ ဖြစ်စဉ်သည် ထိုင်းနိုင်ငံ၊ ကန်ချနဘူရီပြည်နယ်၊ ထောင်ဖာဖုမ် အမျိုးသားဥယျာဉ် အတွင်းရှိ ပီလော့ခ်ခီ သစ်တောဒေသတွင် ဖြစ်ပွားခဲ့ခြင်းဖြစ်သည်။ အမျိုးသားဥယျာဉ်အကြီးအကဲ Yutthapong Damsrisuk ၏ ပြောကြားချက်အရ သယံဇာတနှင့် သဘာဝ ပတ်ဝန်းကျင်ဝန်ကြီး၏ ညွှန်ကြားချက်ဖြင့် နယ်ခြားစောင့်ရဲ၊ စစ်တပ်နှင့် ပူးပေါင်းကာ လုံခြုံရေးတိုးမြှင့်ခဲ့ခြင်း ဖြစ်သည်။ အာဏာပိုင်များက တပ်ဆင်ထားသည့် CCTV ကင်မရာများမှ နိုဝင်ဘာလ ၁၅ ရက်နေ့၊ ည ၁၀ နာရီအချိန်ခန့် တွင် လက်နက်တို၊ လက်နက်ရှည်များ ကိုင်ဆောင်ထားသည့် သံသယရှိသူ ၁၅ ဦးခန့် တောထဲသို့ ဝင်ရောက်ကာ ရွှေတူးနေသည်ကို ခြေရာခံမိခဲ့သည်။ ည ၁၁ နာရီခွဲ အချိန်ခန့်တွင် အဖွဲ့ဝင်ရောက်စီးနင်းရာ ရွှေခိုးတူးသူအများစုမှာ နယ်မြေကျွမ်းကျင်မှုဖြင့် မှောင်ရိပ်ခိုကာ ထွက်ပြေးလွတ်မြောက်သွားခဲ့သည်။ ထွက်ပြေးသူများထဲမှ မြန်မာနိုင်ငံသား ၃ ဦး နှင့် ဒေသခံ ကရင်တိုင်းရင်းသား ၁ ဦး စုစုပေါင်း ၄ ဦးကို ဖမ်းဆီးရမိခဲ့သည်။ ဖမ်းဆီးရမိသူများထံမှ စုစုပေါင်း ပစ္စည်း ၄၀ မျိုးကို သိမ်းဆည်းရမိခဲ့ပြီး၊ အဓိကအားဖြင့် ရွှေတူးကိရိယာများ ဖြစ်သည့် သံတူရွင်း၊ ဆောက်၊ တူကြီး၊ လက်လုပ် ၂၂ ရိုင်ဖယ်သေနတ် ၁ လက် နှင့် ကျည်ဆန် ၁၀ တောင့်၊ လက်ကိုင်ဖုန်း ၉ လုံး၊ ဝါယာလက် ၂ လုံး နှင့် မြန်မာငွေကျပ်အချို့ကို သိမ်းဆည်းရမိခဲ့သည်ဟု ထုတ်ပြန်သည်။ ထို့အပြင် ထွက်ပြေးသွားအချို့၏ မြန်မာနိုင်ငံသား မှတ်ပုံတင်များကိုလည်း ထိုနေရာတွင် တွေ့ရှိခဲ့ကြောင်း သတင်းများတွင် ဖော်ပြထားသည်။ ဖမ်းဆီးခံရသူများသည် တရားမဝင် နယ်မြေကျူးကျော်မှု၊ သစ်တောဧရိယာကို ခုတ်ထွင်ရှင်းလင်းဖျက်ဆီးမှု စသည့် စွဲချက်များအပြင်၊ လက်နက်ကိုင်ဆောင်မှုဆိုင်ရာ ဥပဒေများဖြင့်ပါ အရေးယူမည်ဖြစ်သည်။ အမျိုးသားဥယျာဉ်အကြီးအကဲ Yutthapong Damsrisuk က “ကျနော်တို့ဟာ ကျနော်တို့ရဲ့ အရေးကြီးတဲ့ ရေဝေ ရေလဲ သစ်တောတွေကို ကာကွယ်ဖို့အတွက် ဥပဒေကို အကောင်အထည် ဖော်သွားမှာပါ။ သဘာဝ သယံဇာတကို ကျူးကျော်ဖျက်ဆီးတဲ့ ဘယ်လိုပုံစံကိုမဆို ရပ်တန့်နိုင်ဖို့ အဖွဲ့အစည်းအားလုံးနဲ့ ပူးပေါင်း ဆောင်ရွက်သွားမယ်” ဟု ပြောသည်။ ဖမ်းဆီးခံရသူ ၄ ဦးကို ပီလော့ခ်ရဲစခန်းသို့ လွှဲပြောင်းပေးအပ်ခဲ့ပြီး၊ ထွက်ပြေးလွတ်မြောက်သွားသည့် ကျန်ရှိသူများကိုလည်း ဖမ်းဆီးရမိရန် ဆက်လက် ခြေရာခံ စုံစမ်းနေကြောင်း ထိုင်းသတင်းဌာနများက ဆိုသည်။

လက်နက်ကိုင် ရွှေခိုးတူးသည့် မြန်မာနိုင်ငံသား ၄ ဦး ထိုင်းအာဏာပိုင်များ ဖမ်းဆီး

Nov 19

KNU က ဘားအံမြို့နယ်အတွင်း ရွေးကောက်ပွဲကို တရားဝင်ပိတ်ပင် ဆန့်ကျင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။ ကရင်အမျိုးသား အစည်းအရုံး KNU က ဘားအံနယ်မြေအတွင်း စစ်ကော်မရှင်၏ ရွေးကောက်ပွဲကို တရားဝင် ပိတ်ပင် ဆန့်ကျင်လိုက်ပြီး ပြည်သူ့ဆန္ဒ အလွဲသုံးစားလုပ်ခြင်းဟု ထုတ်ပြန် ပြောဆိုလိုက်သည်။ ကရင်အမျိုးသားအစည်းအရုံး (KNU) ဒူးသထူခရိုင် - ဘားအံမြို့နယ် အလုပ်မှုဆောင်ကော်မတီက စစ်ကော်မရှင် က လာမည့် ဒီဇင်ဘာလ ၂၈ ရက်နေ့တွင် ကျင်းပရန် ပြင်ဆင်နေသည့် ရွေးကောက်ပွဲကို ၎င်းတို့ ထိန်းချုပ်နယ်မြေ အတွင်း လုံးဝ ခွင့်ပြုမည်မဟုတ်ဘဲ ဆန့်ကျင်သွားမည်ဟု နိုဝင်ဘာလ ၁၇ ရက်နေ့တွင် တရားဝင် ထုတ်ပြန် ကြေညာလိုက်သည်။ KNU ၏ ထုတ်ပြန်ချက်အရ၊ စစ်ကော်မရှင်သည် နိုင်ငံတစ်ဝန်းတွင် စစ်ရာဇဝတ်မှုများကို ပေါ်ပေါ်ထင်ထင် ကျူးလွန်နေသည့် အဖွဲ့ဖြစ်ပြီး၊ ၎င်းတို့ ကျင်းပမည့် ရွေးကောက်ပွဲသည် တိကျမှန်ကန်သည့် ရလဒ်မဟုတ်ဘဲ ပြည်သူ့ သဘောဆန္ဒကို အလွဲသုံးစားပြုမည့် အတုအယောင် ရွေးကောက်ပွဲ သာဖြစ်ကြောင်း သတ်မှတ်သည်။ KNU ဒူးသထူခရိုင် - ဘားအံမြို့နယ် အလုပ်မှုဆောင်ကော်မတီက ဒေသခံပြည်သူများကို စစ်အာဏာရှင် သက်ဆိုး ရှည်စေမည့် ယင်းရွေးကောက်ပွဲတွင် ပူးပေါင်းပါဝင်ခြင်း မပြုဘဲ၊ အကြမ်းမဖက်သောနည်းဖြင့် ဆန့်ကျင်ရန် တိုက်တွန်းထားသည်။ KNU ၏ ပြောဆိုချက်တွင် စစ်ကော်မရှင်သည် ၎င်းတို့၏ ရွေးကောက်ပွဲ အောင်မြင်ရေးအတွက် ပြည်သူလူထု အပေါ် ဖိအားပေးမှုများ ပြုလုပ်နေကြောင်း ဖော်ပြသည်။ စစ်ကော်မရှင်သည် စစ်မှုထမ်းဥပဒေနှင့် စစ်ဘေးဒဏ်များကို အသုံးချပြီး ပြည်သူများအား မိမိနေရပ်သို့ မပြန်နိုင်အောင် ပြုလုပ်နေသည်။ ကျန်ရှိနေသော ပြည်သူများကိုလည်း ခြိမ်းခြောက်ဖိအားပေးကာ အတင်းအဓမ္မ မဲပေးခိုင်းစေမှုများ ဖြင့် ရင်ဆိုင်နေရသည်ဟု ဆိုသည်။ ထို့အပြင် စစ်ကော်မရှင်သည် ရွေးကောက်ပွဲစနစ်ကို ပြည်သူများ နားလည်ရခက်ခဲစေသော မဲပေးနည်းစနစ်များ၊ အထူးသဖြင့် ၎င်းတို့လိုချင်သည့် ရလဒ်ထွက်စေရန် ရည်ရွယ်သည့် အီလက်ထရောနစ်မဲပေးသည့် လုပ်ငန်းစဉ် များကို အသုံးပြုနေသည်ဟု KNU က ထောက်ပြသည်။ ကရင်စစ်ရှောင်များကို အကူအညီပေးနေသူ တစ်ဦးက "ဒီနယ်မြေမှာဆို စစ်ကြောင့် ပြည်သူတွေ ဘေးလွတ်ရာ ထွက်ပြေးနေရတာ၊ စားဝတ်နေရေး ခက်ခဲနေရတာတွေပဲ ရှိတယ်။ ဒီလိုအခြေအနေမှာ ရွေးကောက်ပွဲ လုပ်မယ် ဆိုတာဟာ လူထုရဲ့ အခက်အခဲကို လုံးဝ မထောက်ထားဘဲ သူတို့ရဲ့ နိုင်ငံရေး ထွက်ပေါက် တစ်ခုတည်းကိုပဲ ကြည့်တာဖြစ်ပါတယ်” ဟု ပြောသည်။ အဆိုပါ ရွေးကောက်ပွဲကို အဓိက တော်လှန်ရေး အင်အားစုများဖြစ်သည့် အမျိုးသားညီညွတ်ရေးအစိုးရ (NUG)၊ ကရင်အမျိုးသား အစည်းအရုံး (KNU) အပါအဝင် အာရက္ခတပ်တော် (AA) စသည့် အဖွဲ့အစည်းများကလည်း တရားမဝင်သော အတုအယောင် ရွေးကောက်ပွဲအဖြစ် ပြင်းပြင်းထန်ထန် ဆန့်ကျင်ထားသည်။ နိုင်ငံရေး လေ့လာသူတစ်ဦးက “KNU ကနေ နယ်မြေဒေသအလိုက် ပြတ်သားတဲ့ ဆန့်ကျင်မှုကို ပြသလိုက်တာ ဟာ စစ်ကောင်စီရဲ့ ရွေးကောက်ပွဲကို တရားဝင်မှု (legitimacy) လုံးဝ မပေးဘူးဆိုတာ ပြသလိုက်တာပဲ” ဟု ပြောသည်။ ပြီးခဲ့သည့် နိုဝင်ဘာလ ၂ ရက်နေ့ကလည်း ကရင်ပြည်၊ ဘားအံမြို့တွင် စစ်ကော်မရှင် လက်အောက်ခံ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ၏ ဆိုင်းဘုတ်ကို ဆုတ်ဖြဲမှုဖြင့် လူငယ်နှစ်ဦး ဖမ်းဆီးခံခဲ့ ရသေးရာ ရွေးကောက်ပွဲနှင့် ပတ်သက်သည့် ဖိနှိပ်မှုများ ရှိနေကြောင်း ထပ်မံတွေ့ရှိရသည်။ ဘားအံမြို အမှတ် ၂ ရပ်ကွက်၊ အုပ်ချုပ်ရေးမှူးရုံး ရှေ့၌ စိုက်ထူထားသည့် USDP ပါတီက လွှတ်တော်ကိုယ်စား လှယ်လောင်း ဝန်ကြီးချုပ်ဦး စောမြင့်ဦး၏ မဲဆွယ်ဗီနိုင်းဖျက်ဆီးခံရပြီး လူငယ် ၂ ဦးကို စစ်ကော်မရှင်က ဖမ်းဆီးခဲ့ပြီး ပုဒ်မ ၂၄ - က ဖြင့် အမှုဖွင့်ထားခြင်း ဖြစ်သည်။

KNU က ဘားအံမြို့နယ်အတွင်း ရွေးကောက်ပွဲကို တရားဝင်ပိတ်ပင် ဆန့်ကျင်

Nov 19

ကချင်စစ်မျက်နှာ ဆက်လက် တင်းမာ၊ ဖားကန့်၌ ကျောက်တူးသူများပါ ဒရုန်းဗုံး ဒဏ်ခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။ ကချင်ပြည်၊ ဗန်းမော်၊ ဖားကန့်နှင့် ပူတာအိုခရိုင်တို့၌ ကချင်လွတ်လပ်ရေး တပ်မတော် (KIA) နှင့် စစ်ကော်မရှင် တပ်တို့ကြား စစ်ရေးတင်းမာမှုများ ဆက်လက်မြင့်တက်နေပြီး လေယာဉ်နှင့် ဒရုန်းဖြင့် တိုက်ခိုက်မှုများ စံချိန် တင် မြင့်တက်လာကာ အရပ်သားများ ထိခိုက်မှုနှုန်းလည်း မြင့်မားလျက်ရှိသည်။ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက “တိုက်ပွဲက နေ့တိုင်းလိုလို ဖြစ်တာ ရှိပါတယ်။ ဒါကြောင့် ကချင်ပြည်နယ် တစ်ခုလုံးနဲ့ ခြုံပြီးမှ ပြောမယ်ဆိုရင်တော့ ဗန်းမော်၊ နောက် ဝိုင်းမော်၊ ဖားကန့် အခြေအနေ ကတော့ တင်းမာတဲ့ အနေအထား ဖြစ်ပါတယ်။ Y-12 နဲ့ ဗုံးကြဲတာတွေ၊ ဂျက်ဖိုက်တာနဲ့ ပစ်တာတွေ လက်နက် ကြီးတွေ လေကြောင်းတွေ ဒါကတော့ ပြောစရာမလိုပါဘူး နေ့တိုင်းရှိပါတယ်” ဟု ပြောသည်။ နိုဝင်ဘာလ ဒုတိယပတ်အတွင်း မြေပြင်တိုက်ပွဲပေါင်း ၅၇ ကြိမ်အထိ ဖြစ်ပွားခဲ့ကြောင်း KIO/KIA ၏ ထုတ်ပြန် ချက်အရ သိရသည်။ KIO/KIA ပြန်ကြားရေးဌာန၏ နိုဝင်ဘာလ ၁၆ ရက်နေ့ ထုတ်ပြန်ချက်အရ နိုဝင်ဘာ ၁၀ ရက်မှ ၁၆ ရက်နေ့ အတွင်း ဗန်းမော်၊ ဖားကန့်၊ ဝိုင်းမော် (လမြန်) နယ်မြေများတွင် တိုက်ပွဲပေါင်း ၅၇ ကြိမ် ဖြစ်ပွားခဲ့သည်။ တိုက်ခိုက်မှုများသည် KIA တပ်မဟာ ၇၊ ၄ နှင့် ၁ နယ်မြေများတွင် အများဆုံးဖြစ်ပွားခဲ့ပြီး ဗန်းမော် စစ်မျက်နှာပြင်တွင် ခုခံတိုက်ပွဲ ၄၇ ကြိမ်၊ ဝိုင်းမော်/လမြန် စစ်မျက်နှာပြင်တွင် ၁၀ ကြိမ်အထိ ဖြစ်ပွားခဲ့သည်။ KIA ပူးပေါင်းတပ်များ၏ ခုခံတိုက်ခိုက်မှုကြောင့် စစ်ကော်မရှင်တပ်ဘက်မှ ထိခိုက်ကျဆုံးမှု များပြားခဲ့ကြောင်း တော်လှန်ရေးအဖွဲ့များက ပြောဆိုသည်။ စစ်ကော်မရှင်တပ်ဖွဲ့များသည် စစ်မြေပြင် ထိတွေ့မှုများမရှိသည့် နေရာများနှင့် အရပ်သားများ၏ စီးပွားရေး လုပ်ငန်းခွင်များကို ပစ်မှတ်ထား တိုက်ခိုက်နေသည်။ ဖားကန့်မြို့နယ်၊ မရှီကထောင်ရပ်ကွက်ထဲ ကျောက်စိမ်းမှော်တစ်ခုတွင် စက်ယန္တရားများမပါဘဲ လက်ကျင်းတူး ရှာဖွေနေသည့် သူများအား ဒရုန်းဖြင့် ဗုံး ၃ လုံး ကြဲချခဲ့ရာ အရပ်သားများ ထိခိုက်မှုရှိခဲ့သည်။ နိုဝင်ဘာလ ၆ ရက်နေ့မှ စတင်ကာ တိုက်ပွဲများပြန်ဖြစ်နေသည့် ဖားကန့်တွင် နိုဝင်ဘာလ ၁၁ ရက်နေ့၌ လေကြောင်း တိုက်ခိုက်မှုကြောင့် ကလေးမိခင်တစ်ဦး သေဆုံးကာ ကလေးငယ်တစ်ဦး ဒဏ်ရာရခဲ့ပြီး၊ နိုဝင်ဘာ လ ၁၃ ရက်နေ့၌လည်း လက်နက်ကြီး ပစ်ခတ်မှုကြောင့် ကလေးငယ်တစ်ဦးနှင့် ကျောင်းဆရာမတစ်ဦး ဒဏ်ရာရခဲ့သည်။ ထို့အပြင် ဝိုင်းမော်မြို့နယ်ရှိ ဆဒုံးမြို့ကို နိုဝင်ဘာ ၁၆ ရက်နေ့တွင် Y-12 ရဟတ်ယာဉ်ဖြင့် ဗုံး ၂ လုံး ရုတ်တရက် ကြဲချတိုက်ခိုက်ခဲ့သည်။ ဆဒုံးမြို့သည် နှစ်ဖက်တပ်ဖွဲ့ ထိတွေ့တိုက်ပွဲ မရှိခဲ့ဘဲ လေကြောင်းမှ ဗုံးကြဲခံရခြင်း ဖြစ်သည်။ ဒေသခံတစ်ဦးက “တိုက်ပွဲမရှိဘဲ လေကြောင်းကနေ ဗုံးလာကြဲသွားတာပါ။ လူတွေက စိုးရိမ်မှုရှိကြတာပေါ့ ဗျာနော်။ ဘာလို့လဲဆိုတော့ တိုက်ပွဲဖြစ်ဖြစ် မဖြစ်ဖြစ် သူတို့က လေကြောင်းရော ဒရုန်းနဲ့ပါ ဗုံးကြဲ တိုက်ခိုက် တာဆိုတော့။ ဗုံးကြဲပြီဆိုရင်လည်း လူထုတွေ နေတဲ့ နေရာတွေကိုပဲ တည့်တည့်လာပစ်ထည့်တာဆိုတော့” ဟု ပြောသည်။ အလားတူ ကချင်ပြည် မြောက်ပိုင်း၊ ပူတာအိုခရိုင်၌လည်း စစ်ရေးတင်းမာမှု မြင့်တက်လာနေသည်။ နိုဝင်ဘာလ ၁၆ ရက်နေ့တွင် တန်ဂျာကျေးရွာအနီး မလိခမြစ်ကြောင်းအတိုင်း စစ်ရေးလှုပ်ရှားလာသော စစ်ကော်မရှင် ပူးပေါင်းတပ် နှင့် KIA ပူးပေါင်းတပ်တို့ ထိတွေ့တိုက်ပွဲဖြစ်ပွားခဲ့သည်။ အဆိုပါ တိုက်ပွဲအတွင်း စစ်ကော်မရှင် ပူးပေါင်းတပ်မှ တပ်ဖွဲ့ဝင်အချို့ ထိခိုက်သေဆုံးမှုရှိပြီး လက်နက်အချို့ သိမ်းဆည်းရမိခဲ့ကြောင်း တော်လှန်ရေးတပ်ဖွဲ့ဝင်တစ်ဦးက ပြောသည်။ စစ်ကော်မရှင်တပ်သည် ပူတာအိုခရိုင်အတွင်း လေကြောင်းဗုံးကြဲမှုများလည်း ပြုလုပ်နေပြီး၊ နိုဝင်ဘာလ ၁၂ ရက်နေ့က မြစ်ကြီးနား - ပူတာအို လမ်းပိုင်းရှိ အင်ဆိုင်းယာန်ကျေးရွာကို ဗုံး ၃ လုံး ကြဲချတိုက်ခိုက်ခဲ့သည်။ တိုက်ပွဲများ ဆက်တိုက် ဖြစ်ပွားနေခြင်းနှင့် စစ်ကော်မရှင်တပ်၏ လေကြောင်း၊ လက်နက်ကြီး အသုံးပြုမှု မြင့်တက်လာခြင်းကြောင့် ဖားကန့်၊ မချမ်းဘော့နှင့် ပူတာအိုမြို့နယ်များရှိ အရပ်သားများ၏ လုံခြုံရေး အခြေအနေမှာ စိုးရိမ်ဖွယ်ရာ ဖြစ်နေသည်။ စစ်ရေးလေ့လာသူတစ်ဦးက "KIA ထုတ်ပြန်ချက်အရ လေကြောင်းနဲ့ ဒရုန်း အသုံးပြုမှု ပမာဏက အရင်ကာလ တွေထက် သိသိသာသာကို များလာတယ်။ ဒါဟာ စစ်ကောင်စီရဲ့ မြေပြင်အင်အား အားနည်းလာတာကြောင့် အရပ်သား ပစ်မှတ်တွေကိုပါ ရည်ရွယ်ချက်ရှိရှိ ထိပါးလာတဲ့ ပုံစံမျိုးလို့ သုံးသပ်ရတယ်။ ဒီအခြေအနေဟာ ဒေသခံတွေရဲ့ စိတ်ပိုင်းဆိုင်ရာ လုံခြုံရေးအတွက် အရမ်းကို စိုးရိမ်စရာပါ” ဟု ပြောသည်။ လက်ရှိတွင် KIA/KPDF ပူးပေါင်းတပ်များက ဒေသခံပြည်သူများအား စစ်ကော်ရှင်တပ်၏ ရမ်းသမ်းပစ်ခတ်မှုနှင့် လေကြောင်းတိုက်ခိုက်မှုများကို သတိပြုကြရန် ထပ်မံ သတိပေးထားသည်။

ကချင်စစ်မျက်နှာ ဆက်လက် တင်းမာ၊ ဖားကန့်၌ ကျောက်တူးသူများပါ ဒရုန်းဗုံး ဒဏ်ခံရ

Nov 18

ရခိုင်တွင် စာသင်ကျောင်းနှင့် အရပ်သား ပစ်မှတ်များ ဗုံးကြဲခံနေရ သတင်းနှင့် မီဒီယာ ကွန်ရက်၊ ၂၀၂၅ ခုနှစ်၊ နိုဝင်ဘာလ ၁၈ ရက်။ ရခိုင်ပြည်တွင် စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှု အရှိန်မြှင့်လုပ်နေပြီး စာသင်ကျောင်းနှင့် အရပ်သားပစ်မှတ်များ ဗုံးကြဲခံရသည်ဟု ဒေသခံများက ပြောသည်။ ရခိုင်ပြည်အတွင်း စစ်ကော်မရှင်တပ်၏ လေကြောင်းနှင့် လက်နက်ကြီး အသုံးပြု တိုက်ခိုက်မှုများမှာ အရေအတွက် များပြားလာနေပြီး နိုဝင်ဘာလ ၁၇ ရက်နေ့ တစ်ရက်တည်းမှာပင် စစ်တွေနှင့် ကျောက်ဖြူမြို့နယ် များတွင် လေကြောင်းတိုက်ခိုက်မှု ၅ ကြိမ်အထိ ပြုလုပ်ခဲ့ကြောင်း အာရက္ခတပ်တော် (AA) က ထုတ်ပြန်သည်။ အထူးသဖြင့် ကျောက်ဖြူမြို့နယ်အတွင်းရှိ စာသင်ကျောင်းတစ်ကျောင်းကို လေကြောင်းဗုံးကြဲပြီးနောက် အသေခံဒရုန်းဖြင့်ပါ ထပ်မံတိုက်ခိုက်ခဲ့သည့် ဖြစ်စဉ် သည် စစ်ကော်မရှင်တပ်၏ အရပ်သားများကို ပစ်မှတ်ထား တိုက်ခိုက်မှုများ ဆိုးရွားလာသည်ကို ပြသနေကြောင်း ဒေသခံများက ပြောဆိုသည်။ “စာသင်ကျောင်း၌ စာသင်ကြားနေကြသော ကျောင်းသား၊ ကျောင်းသူများမှာ အချိန်မီ ရွှေ့ ပြောင်းနိုင်ခဲ့၍ အသက်သေဆုံး၊ ဒဏ်ရာရမှု မရှိခဲ့သော်လည်း ၎င်းစာသင်ကျောင်းအနီးရှိ ဝက် (၂) ကောင် သေဆုံးခဲ့ကာ စာသင်ကျောင်း အဆောက်အအုံမှာ ထိခိုက်ပျက်စီးမှုများရှိခဲ့သည်” ဟု AA က ဆိုသည်။ AA ၏ ထုတ်ပြန်ချက်အရ စစ်ကော်မရှင်တပ်သည် နိုဝင်ဘာလ ၁၇ ရက်နေ့၊ ညနေ ၄ နာရီခွဲခန့်တွင် စစ်တွေမြို့ နယ်၊ အမြင့်ကျွန်းတံတားအနီး ကို Y-12 လေယာဉ်ဖြင့် ဗုံးအလုံး ၆၀ ခန့် ကြဲချခဲ့သည်။ ထို့အပြင် ကျောက်ဖြူမြို့နယ်ရှိ ကျောက်ကလေ၊ မင်းရပ်နှင့် လိပ်တင်ကျေးရွာများကိုလည်း အဆက်မပြတ် တိုက်ခိုက်ခဲ့သည်။ လူနေကျေးရွာများကို ပစ်မှတ်ထား တိုက်ခိုက်မှုများထဲတွင် ကျောက်ဖြူမြို့နယ်၊ လိပ်တင်ကျေးရွာ စာသင် ကျောင်းသည် အဆိုးဆုံး ဖြစ်စဉ်တစ်ခုအဖြစ် ပေါ်ထွက်ခဲ့သည်။ နေ့လယ်ပိုင်းတွင် လေကြောင်းမှ ဗုံးကြဲတိုက်ခိုက်ခဲ့ပြီး၊ မိနစ်ပိုင်းအကြာမှာပင် အသေခံဒရုန်း (Suicide Drone) တစ်စင်း ဖြင့် စာသင်ကျောင်းကို ထပ်မံ တိုက်ခိုက်ခဲ့သည်။ ကျောင်းသား၊ ကျောင်းသူများကို အချိန်မီ ရွှေ့ပြောင်းနိုင်ခဲ့ခြင်းကြောင့် လူအသေအပျောက်မရှိခဲ့သော်လည်း စာသင်ကျောင်းအဆောက်အအုံ ထိခိုက်ပျက်စီးခဲ့ရသည်ဟု AA က ဆိုသည်။ ထို့အပြင် ဇင်ချောင်းကမ်းခြေရှိ စစ်သင်္ဘော နှစ်စီးပေါ်ကနေလည်း လက်နက်ကြီးများဖြင့် မင်းရပ်နှင့် သံချောင်း ကျေးရွာများကို ပစ်ခတ်တိုက်ခိုက်ခဲ့သည်။ ဤဖြစ်စဉ်များ မတိုင်မီ နိုဝင်ဘာလ ၁၅ ရက်နေ့ကလည်း ရသေ့တောင်မြို့နယ်၊ ဘာထလေနှင့် နွားတင်းကုပ် ကျေးရွာတို့ကို လေယာဉ်ဖြင့် ပစ်ခတ်တိုက်ခိုက်ခဲ့ရာ အရပ်သား ၅ ဦး သေဆုံးပြီး ၆ ဦး ဒဏ်ရာရရှိခဲ့သည်။ စစ်ကော်မရှင်တပ်၏ လေကြောင်း တိုက်ခိုက်မှုများကြောင့် ဒေသခံများ၏ စိုးရိမ်မှုမှာ အမြင့်ဆုံးသို့ ရောက်ရှိ နေကြောင်း ကျောက်ဖြူဒေသခံတစ်ဦးက ပြောသည်။ ကျောက်ဖြူဒေသခံတစ်ဦးက “အရင်ကလို တိုက်ပွဲနယ်မြေမှာပဲ မဟုတ်တော့ဘူး။ အခုက လူနေတဲ့ရွာတွေ၊ စာသင်ကျောင်းတွေပါ ရည်ရွယ်ချက်ရှိရှိ ပစ်မှတ်ထားလာတာကို တွေ့နေရတယ်။ ဘယ်နေရာမှ လုံခြုံမှု မရှိတော့ဘူး။ လေယာဉ်သံကြားတာနဲ့ အသက်လုပြီး ပြေးနေရတာပဲ” ဟု ပြောသည်။ AA အနေဖြင့် စစ်ကော်မရှင်တပ်က ကျောက်ဖြူမြို့ရှိ အရပ်သားကျေးရွာများကို လေကြောင်း၊ လက်နက်ကြီး များဖြင့် ဆက်တိုက်တိုက်ခိုက်နေသည့်အတွက် ဒေသခံပြည်သူများကို လေကြောင်းရန်ကို အထူးသတိထား ကြရန် ထပ်မံ သတိပေးထားသည်။

ရခိုင်တွင် စာသင်ကျောင်းနှင့် အရပ်သား ပစ်မှတ်များ ဗုံးကြဲခံနေရ

Nov 18

ကချင်ပြည် မြို့နယ် ၄ ခုတွင် တိုက်ပွဲများ ဖြစ်ပွားနေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၈ ရက်။ ကချင်ပြည်တွင် စစ်ရေးတင်းမာမှု မြို့နယ် ၄ ခုအထိ ပြန့်နှံ့နေပြီး ဖားကန့်တွင် အရပ်သားများ လေကြောင်းနှင့် လက်နက်ကြီး ဒဏ်ခံနေရသည်ဟု ဒေသခံများနှင့် KIO ပြောခွင့်ရက ပြောသည်။ ကချင်ပြည် အတွင်း နိုဝင်ဘာလ ဒုတိယပတ်တွင်း စစ်ကော်မရှင်တပ်နှင့် ကချင်လွတ်လပ်ရေး တပ်မတော် (KIA) တို့အကြား စစ်ရေးတင်းမာမှု နှင့် တိုက်ပွဲများသည် ဗန်းမော်၊ ဝိုင်းမော်၊ ဖားကန့်နှင့် ခေါင်လန်ဖူး စသည့် မြို့နယ်လေးခုအထိ ကျယ်ကျယ် ပြန့်ပြန့် ဖြစ်ပွားနေခြင်း ဖြစ်သည်။ အထူးသဖြင့် ဖားကန့်ဒေသတွင် လေကြောင်းနှင့် လက်နက်ကြီး တိုက်ခိုက်မှုများကြောင့် အရပ်သား သေဆုံး ထိခိုက်မှုများ ဆက်တိုက် ဖြစ်ပွားနေကြောင်း KIO/KIA ပြောခွင့်ရနှင့် ဒေသခံသတင်းရင်းမြစ်များက အတည်ပြုသည်။ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက “ကချင်ပြည်နယ်မှာ တိုက်ပွဲကတော့ ဗန်းမော်၊ နောက် ဝိုင်း မော်၊ ဖားကန့်၊ နောက် ဟိုးခေါင်လန်ဖူးဖက်မှာ အဲဒီလေးနေရာမှာကတော့ တိုက်ပွဲက နေ့တိုင်းလို ဖြစ်တာ ရှိပါ တယ်။ ဒါကြောင့် ကချင်ပြည်နယ် တစ်ခုလုံးနဲ့ ခြုံပြီးမှ ပြောမယ်ဆိုရင်တော့ ခုနပြောတဲ့နေရာမှာကတော့ စစ် ရေး အခြေအနေကတော့ တင်းမာတဲ့ အနေအထား ဖြစ်ပါတယ်” ဟု ပြောသည်။ ဗန်းမော်မြို့နယ်သည် စစ်ရေးတင်းမာမှု အမြင့်ဆုံးနေရာတစ်ခုအဖြစ် ဆက်လက်တည်ရှိနေပြီး၊ KIA က လက် လွှတ်သွားသည့် နေရာများကို ပြန်လည်ထိန်းချုပ်ရန် ကြိုးပမ်းနေချိန်တွင် စစ်ကော်မရှင်ကလည်း နယ်မြေ ပြန်လည် စိုးမိုးရန် ထိုးစစ်ဆင်တိုက်ခိုက်နေသည်။ တိုက်ပွဲများသည် စကခ (၂၁) ဝန်းကျင်၊ နမ်ဖား၊ တာမိုင်းတုံ၊ ဗန်းမော်တက္ကသိုလ်လမ်းမှ မိုးမောက်ဘက်တက် သည့် ၃ မိုင်ဝန်းကျင် နေရာများတွင် ဆက်တိုက် ဖြစ်ပွားနေသည်။ ဗိုလ်မှူးကြီး နော်ဘူက ဗန်းမော်ဒေသ တိုက်ပွဲနှင့် ပတ်သက်၍ “ဗန်းမော်ကတော့ နေရာကတော့ ကျယ်ပြန့် တယ်။ ဆိုတော့ ဟိုဖက်က နည်းနည်း ဆုတ်ပေးလိုက် ဒီဖက်က ကျနော်တို့ ပြန်သိမ်းလိုက် အဲ့လိုမျိုး ပုံစံလေး ပေါ့ နည်းနည်းတော့ ရှေ့တန်းက တိုက်ပွဲပုံစံတော့ အဲလိုဖြစ်နေတယ်။ လေကြောင်းကတော့ Y-12 နဲ့ ဗုံးကြဲတာ တွေ၊ ဂျက်ဖိုက်တာနဲ့ ဂန်းရှင်းနဲ့ ပစ်တာတွေ ဒါကတော့ မော်တာ အသုံးပြုပြီးမှ ပစ်တာတွေ လက်နက်ကြီးတွေ လေကြောင်းတွေ ဒါကတော့ ပြောစရာ မလိုပါဘူး နေ့တိုင်းရှိပါတယ်” ဟု ပြောသည်။ ထို့အပြင် ဖားကန့်မြို့နယ်တွင် နိုဝင်ဘာလ ဒုတိယပတ်အတွင်း စစ်ကော်မရှင်တပ်ဖွဲ့များသည် မြေပြင်တွင် ထိခိုက်မှုများပြားလာ၍ လေကြောင်း နှင့် လက်နက်ကြီးများကို ပိုမိုအသုံးပြုလာခဲ့ရာ အရပ်သားထိခိုက်မှုများ ဖြစ်ပေါ်ခဲ့သည်။ နိုဝင်ဘာလ ၁၁ ရက်နေ့၊ မွန်းလွဲပိုင်းတွင် ဖားကန့်၊ ကထန်ကွက်သစ်ကို စစ်ကော်မရှင်တပ်၏ Y-12 လေယာဉ်ဖြင့် ဗုံးကြဲတိုက်ခိုက်ခဲ့ရာ အသက် ၄၀ ဝန်းကျင် အမျိုးသမီးတစ်ဦး နေရာတွင်ပင် သေဆုံးခဲ့ပြီး၊ ၎င်း၏ ၅ နှစ်အရွယ် သားငယ်မှာ ပြင်းထန်ဒဏ်ရာများ ရရှိခဲ့သည်။ နိုဝင်ဘာလ ၁၃ ရက်နေ့တွင်လည်း ဖားကန့် ဗျူဟာကုန်းမှ လက်နက်ကြီးဖြင့် ပစ်ခတ်မှုကြောင့် လုံးခင်းအုပ်စု၊ မားဆားရွာက မူကြိုကျောင်းဝန်းထဲကို ကျရောက်ပေါက်ကွဲ ခဲ့ရာ ဆရာမတစ်ဦးနှင့် ၄ နှစ်အရွယ် ကလေးငယ် တစ်ဦး ဒဏ်ရာရရှိခဲ့သည်။ ဗိုလ်မှူးကြီး နော်ဘူက “ဗျူဟာကုန်း ဖက်ကနေ လက်နက်ကြီးနဲ့ လှမ်းပစ်လို့ ပြည်သူလူထုတွေ ထိခိုက်တာတော့ ရှိပါတယ်။ ဟိုတနေ့ကတော့ ပြည်သူလူထုတွေ ထိခိုက်တာရှိတယ်။ နောက် လေကြောင်းနဲ့ ပြည်သူလူထုရှိတဲ့ ဖက်ကို ဗုံးကြဲလို့ ပြည်သူလူထု ထိခိုက်တာတွေရှိပါတယ်” ဟု ပြောသည်။ ဝိုင်းမော်ဒေသတွင် မြေပြင်တိုက်ပွဲများ ငြိမ်သက်နေသော်လည်း ဒရုန်းနှင့် လက်နက်ကြီးပစ်ခတ်မှုများ၊ ဂျက်ဖိုက် တာဖြင့် ပစ်ခတ်မှုများ ဆက်လက်ရှိနေဆဲဖြစ်ပြီး ခေါင်လန်ဖူးဖက်တွင်လည်း တိုက်ပွဲများ နေ့တိုင်းလိုလို ဖြစ်ပွားနေဆဲ ဖြစ်သည်။ KIO/KIA နှင့် PDF ပူးပေါင်းတပ်ဖွဲ့များသည် ကချင်ပြည်သူများကို လေကြောင်းနှင့် လက်နက်ကြီး အန္တရာယ်ကို အထူးသတိထားကြရန် သတိပေးထားသည်။

ကချင်ပြည် မြို့နယ် ၄ ခုတွင် တိုက်ပွဲများ ဖြစ်ပွားနေ

Nov 18

KNU သိမ်းပိုက်လိုက်သော မောတောင် လမ်းပိုင်းကို စစ်ကော်မရှင် လေကြောင်းမှ ဗုံးကြဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၈ ရက်။ မောတောင်လမ်းပိုင်းကို စစ်ကော်မရှင်တပ်က လေကြောင်းဖြင့် ဆက်တိုက် ဗုံးကြဲနေသည့်အပြင် စစ်ကူ အင်အား ဆက်တိုက် ဖြည့်တင်းနေသည်ဟု ဒေသခံများနှင့် မြေပြင် သတင်းအရင်းအမြစ်များက ပြောသည်။ မြန်မာ - ထိုင်း နယ်စပ်ရှိ တနင်္သာရီတိုင်းရှိ မောတောင်မြို့ကို KNLA နှင့် PDF ပူးပေါင်းအဖွဲ့တို့က သိမ်းပိုက်ထား ပြီးနောက် လမ်းကြောင်း ပြန်လည်ရရှိရေးအတွက် စစ်ကော်မရှင်တပ်က ဝေဟင်ထိုးစစ်ဆင်နေပြီး စစ်ကူ အင်အားများကို ဖြည့်တင်းနေခြင်း ဖြစ်သည်။ အသက် ၅၀ ခန့်အရွယ် သဲဖြူရွာသား အမျိုးသားတစ်ဦးက “မောတောင်မြို့ သိမ်းပြီးတာနဲ့ နောက်တစ်ရက်မှာ လေယာဉ်တွေက ဆက်တိုက်တက်နေတာ၊ တစ်ရက်တည်းနဲ့ လေယာဉ်အစီးရေ အများဆုံးတက်နေတာကို ပထမဆုံးပဲ မြင်ဖူးတာ” ဟု အတည်ပြု ပြောဆိုသည်။ နိုဝင်ဘာလ ၁၅ ရက်နေ့ တစ်ရက်တည်းမှာပင် လေယာဉ်နှင့် ရဟတ်ယာဉ်များဖြင့် အပြင်းအထန် ဗုံးကြဲ တိုက် ခိုက်ခဲ့သည့်အပြင် စစ်ကူအင်အားကိုပါ အများဆုံး ဖြည့်တင်းခဲ့ကြောင်း ဒေသခံများနှင့် စစ်ရေး သတင်းရင်းမြစ် များက ပြောသည်။ တနင်္သာရီတိုင်း၊ ဘုတ်ပြင်းမြို့နယ်အတွင်းရှိ မောတောင်မြို့သို့ သွားရာလမ်းပိုင်းဖြစ်သည့် သိန်ခွန်းနှင့် သဲဖြူကျေး ရွာ ဝန်းကျင်၌ စစ်ကော်မရှင်တပ်နှင့် PDF ပူးပေါင်းတပ်ဖွဲ့များအကြား နိုဝင်ဘာလ ၁၅ ရက်နေ့ နံနက်ပိုင်းမှ စတင် ၍ တစ်နေ့လုံး တိုက်ပွဲပြင်းထန်ခဲ့သည်။ ထို့နောက် စစ်ကော်မရှင်တပ်သည် လေကြောင်းအင်အားကို အဆက်မပြတ် အသုံးပြုကာ ပြန်လည် တိုက်ခိုက်ခဲ့ သည်။ တိုက်ပွဲဖြစ်ပွားသည့် နိုဝင်ဘာလ ၁၅ ရက်နေ့တွင် မြိတ်လေတပ်စခန်းမှ ပျံတက်လာသည့် Y-12 လေယာဉ် ၂ စီး နှင့် Mi-17 ရဟတ်ယာဉ် ၃ စီး ဖြင့် စတင်ဗုံးကြဲခဲ့ပြီးနောက် ညနေပိုင်းအထိ ဗုံးကြဲတိုက်ခိုက်မှုများ ဆက်တိုက် ပြုလုပ်ခဲ့သည်။ စစ်ကော်မရှင်တပ်သည် သိန်ခွန်းကျေးရွာကို ကျော်လွန်ကာ သဲဖြူကျေးရွာသို့ စစ်ကူအင်အားများကို လေကြောင်းမှသာ ဖြည့်တင်းခဲ့ရသည်။ Mi-17 ရဟတ်ယာဉ် ၃ စီးဖြင့် တစ်ကြိမ်လျှင် စစ်သည် ၃၀ ခန့် နှုန်း ပို့ဆောင်ခဲ့သလို Y-12 လေယာဉ်များပေါ်မှ စစ်သည်များမှာလည်း လေထီးများဖြင့် ဆင်းသက် ဝင်ရောက်ခဲ့ကြောင်း ဒေသခံက ဆိုသည်။ PDF တပ်ဖွဲ့များက မောတောင်မြို့သို့သွားရာ မြေပြင်လမ်းကြောင်းများ (တနင်္သာရီ - ဘုတ်ပြင်း ပြည်ထောင်စု လမ်းမကြီးဘက်မှ လမ်းခွဲများ) ကို ထိန်းချုပ်ထားနိုင်ခဲ့ခြင်းကြောင့် စစ်ကော်မရှင်တပ်သည် မြေပြင်မှ ထိုးစစ် ဆင်ရန် ခက်ခဲကာ လေကြောင်းမှ အင်အားဖြည့်တင်းမှုကို အဓိက အားပြုလာခြင်း ဖြစ်သည်။ နိုဝင်ဘာလအတွင်း တိုက်ပွဲများ ပြင်းထန်လာခြင်းကြောင့် သိန်ခွန်း၊ သဲဖြူကျေးရွာနှင့် အနီးဝန်းကျင်မှ ရွာသား များလည်း ဘေးလွတ်မည့်နေရာများသို့ ထွက်ပြေးတိမ်းရှောင် နေကြရသည်။ မောတောင်မြို့သည် တနင်္သာရီ - ဘုတ်ပြင်းသွား ပြည်ထောင်စု လမ်းမကြီးမှ ၄၇ မိုင်ခန့်အကွာတွင် တည်ရှိပြီး၊ စစ်ကော်မရှင်တပ်သည် ၂၀၂၄ ခုနှစ်၊ ဒီဇင်ဘာနှောင်းပိုင်း ကတည်းက စစ်ကြောင်းထိုးရန် ကြိုးပမ်းခဲ့ခြင်း ဖြစ်သည်။ သို့သော်လည်း KNLA နှင့် PDF ပူးပေါင်းတပ်တို့၏ ခုခံစစ်ကြောင့် ရှေ့ဆက်မတိုးနိုင်ခဲ့ဘဲ ယခုကဲ့သို့ လေကြောင်း အသုံးပြု တိုက်ခိုက်မှုများ အရှိန်မြှင့်တင်လာခြင်း ဖြစ်သည်။

KNU သိမ်းပိုက်လိုက်သော မောတောင် လမ်းပိုင်းကို စစ်ကော်မရှင် လေကြောင်းမှ ဗုံးကြဲ

Nov 14

ကျောင်း ဆရာ/မများအား ထောက်ပံ့ရန် ထိုင်းဘတ်ငွေ သန်း ၅၀ အရေးပေါ်လိုအပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၄ ရက်။ ကော်သူးလေဒေသရှိ ကျောင်းဆရာ၊ ဆရာမ ၁ သောင်းကျော်အတွက် ထောက်ပံ့ကြေးပံ့ပိုးရန် ထိုင်းဘတ်ငွေ သန်း ၅၀ အရေးပေါ်လိုအပ်နေသည်။ ကရင်ပြည်အတွင်းရှိ ကော်သူးလေဒေသတွင် တာဝန်ထမ်းဆောင်နေကြသည့် ကျောင်းဆရာ၊ ဆရာမများ အတွက် ၂၀၂၅ - ၂၀၂၆ ပညာသင်နှစ်၏ နှစ်စဉ်ထောက်ပံ့ကြေးများ ပံ့ပိုးပေးနိုင်ရန် အရေးပေါ်ရန်ပုံငွေ ထိုင်း ဘတ်ငွေ သန်း ၅၀ ခန့် လိုအပ်နေကြောင်း ကရင်ပညာရေး အဖွဲ့အစည်းများက ပြောသည်။ ကရင်ဆရာ၊ ဆရာမများအသင်း (KTWG) ၏ Communication and Advocacy တာဝန်ခံ နော်ဖောရှီးဝါး က “ဒီဆရာ ဆရာမတွေက ကော်သူးလေမှာရှိတဲ့ ကျောင်းစုစုပေါင်း ၁,၇၃၈ ကျောင်းရဲ့ ဆရာ၊ ဆရာမတွေ ဖြစ်ပါ တယ်။ ကျောင်းသား၊ ကျောင်းသူပေါင်း ၁၄၉,၇၂၀ ကို စာသင်ပေးနေရတဲ့ ဆရာ၊ ဆရာမတွေလည်း ဖြစ်ပါ တယ်။ ဒီစာသင်နှစ်မှာ ဆိုရင် ကျမတို့ KECD နဲ့ KTWG က ဒီဆရာ၊ ဆရာမတွေရဲ့ နှစ်စဉ်ထောက်ပံ့ငွေက ၈၁ သန်းကျော်ကျော်လောက်ပဲ ရှိသေးတယ်ပေါ့ နော်။ ဆိုတော့ သန်း ၅၀ လောက် လိုအပ်မှု ရှိနေသေးတယ်။ ရာခိုင်နှုန်းအနေနဲ့ ပြောရမယ်ဆိုရင်တော့ ၄၁ ရာခိုင်နှုန်း လိုအပ်နေသေးတယ်” ဟု ပြောသည်။ ကရင်ပညာရေးနှင့် ယဉ်ကျေးမှုဌာန (KECD) နှင့် ကရင်ဆရာ၊ ဆရာမများအသင်း (KTWG) တို့၏ အောက်တိုဘာ လ ၂၀ ရက်နေ့ ထုတ်ပြန်ချက်အရ ကော်သူးလေဒေသတစ်ဝန်းရှိ ကျောင်းပေါင်း ၁,၇၃၈ ကျောင်း မှ ဆရာ၊ ဆရာမ ၁၀,၈၈၀ ဦး အတွက် တစ်ဦးလျှင် ထိုင်းဘတ်ငွေ ၁၂,၀၀၀ ဘတ်နှုန်း ပံ့ပိုးရန် ရည်ရွယ်ထားသော်လည်း ရန်ပုံငွေမလုံလောက်မှုနှင့် ရင်ဆိုင်နေရသည်။ ဆရာ၊ ဆရာမများအတွက် နှစ်စဉ်ထောက်ပံ့ကြေး လုံးဝလွှမ်းခြုံနိုင်ရန်အတွက် စုစုပေါင်း ထိုင်းဘတ်ငွေ သန်း ၁၃၀ ဝန်းကျင် လိုအပ်သော်လည်း လက်ရှိတွင် ၅၉ ရာခိုင်နှုန်းသာ ရရှိထားပြီး ကျန်ရှိသည့် ၄၁ ရာခိုင်နှုန်း ကို အရေးပေါ်ဖြည့်ဆည်းရန် လိုအပ်နေသည်။ အကယ်၍ လိုအပ်သည့် ရန်ပုံငွေကို အချိန်မီ မရရှိပါက နှစ်စဉ်ထောက်ပံ့ကြေးငွေကို ဆရာ၊ ဆရာမများအားလုံး လွှမ်းခြုံနိုင်စေရန်အတွက် သိသိသာသာ လျှော့ချရမည့် အခြေအနေသို့ ရောက်ရှိနိုင်ကြောင်း KTWG က ပြောသည်။ နော်ဖောရှီးဝါးက “အဲ့ဒီလို လျှော့ချလိုက်ရတဲ့အတွက် ဆရာ၊ ဆရာမတွေရဲ့ motivation (စိတ်ဓာတ်ခွန်အား) ကို သွားပြီး ထိခိုက်စေတယ်။ မိသားစုရဲ့ စားဝတ်နေရေး အခက်အခဲရှိရင် ဆရာ၊ ဆရာမတွေလည်း စာသင်ခန်း ထဲမှာ အပြည့်အဝ အာရုံစူးစိုက်နိုင်မှာ မဟုတ်တော့ဘူး။ ဒါ့အပြင် ဆရာ၊ ဆရာမတွေကို ရေရှည် ဆက်လက် ထိန်းသိမ်းနိုင်ဖို့အတွက်လည်း အခက်အခဲတွေရှိလာနိုင်ပြီး ကလေးတွေရဲ့ ပညာရေးကိုပါ ထိခိုက်စေနိုင်ပါတယ်" ဟု ပြောသည်။  ကျောင်းဆရာ၊ ဆရာမအများစုမှာ ၎င်းတို့၏ မိသားစု စားဝတ်နေရေး၊ အခြေခံကျန်းမာရေးနှင့် ကလေးပညာရေး တို့အတွက် ဤနှစ်စဉ်ထောက်ပံ့ကြေးငွေကိုသာ မှီခိုနေကြရခြင်း ဖြစ်သည်။ ဘဏ္ဍာရေး အခက်အခဲအပြင် ကုန်ဈေးနှုန်း မြင့်တက်မှု၊ စစ်ကော်မရှင်တပ်၏ စာသင်ကျောင်း၊ ဘုရားကျောင်း၊ နေအိမ်နှင့် ဆေးပေးခန်းတို့ အထိပါ လေကြောင်းမှ ဗုံးကြဲ တိုက်ခိုက်မှုများကြောင့် လုံခြုံသည့်နေရာများသို့ ပြောင်းရွှေ့နေရခြင်းစသည့် စိန်ခေါ်မှုများနှင့်လည်း ရင်ဆိုင်နေကြရသည်။ နော်ဖောရှီးဝါးက ယခင်နှစ်များကလည်း ရန်ပုံငွေ မလုံလောက်မှုများ ရှိခဲ့ဖူးသော်လည်း မြို့နယ်နှင့် ခရိုင်များက စားစရိတ်နှင့် ခရီးစရိတ်များကို တတ်နိုင်သမျှ ကူညီခဲ့သည့်အတွက် အဆင်ပြေအောင် စီမံခန့်ခွဲနိုင်ခဲ့ကြောင်း ပြောသည်။ အရည်အသွေးကောင်းသည့် ပညာရေး လည်ပတ်နိုင်ရန်အတွက် ဆရာ/ဆရာမများ၊ သင်ထောက်ကူ ပစ္စည်းများ နှင့် နှစ်စဉ်ထောက်ပံ့ကြေးများ လုံလောက်စွာ ပံ့ပိုးပေးနိုင်ရန် အရေးပေါ်လိုအပ်နေသည့် ရန်ပုံငွေကို ဝိုင်းဝန်း ကူညီပေးကြပါရန် KECD နှင့် KTWG တို့က အလှူရှင်များနှင့် နိုင်ငံတကာအဖွဲ့အစည်းများထံ အလေးအနက် တောင်းဆိုထားသည်။ ဓာတ်ပုံ - (ပုံဟောင်း) ကရင်ဆရာ၊ ဆရာမများအသင်း (KTWG)

ကျောင်း ဆရာ/မများအား ထောက်ပံ့ရန် ထိုင်းဘတ်ငွေ သန်း ၅၀ အရေးပေါ်လိုအပ်

Nov 14

တော်လှန်ရေး သမားဟန်ဆောင်ကာ လူ ၆၀ ကျော်ကို ငွေလိမ်သူ ဖမ်းမိ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၄ ရက်။ ကရင်နီ (ကယား) ပြည်တွင် တော်လှန်ရေး ရဲဘော်ဟန်ဆောင်ကာ လူအယောက် ၆၀ ကျော်ကို ငွေကြေး လိမ်လည်သူကို ဖမ်းမိထားသည်ဟု ကရင်နီပြည် ရဲတပ်ဖွဲ့ (KSP) က ပြောသည်။ ကရင်နီပြည်ရှိ လွတ်မြောက်နယ်မြေများနှင့် စစ်ဘေးရှောင်စခန်းများတွင် လူအယောက် ၆၀ ကျော်ထံမှ တော်လှန်ရေး ရန်ပုံငွေနှင့် စစ်ဘေးရှောင် ထောက်ပံ့ကြေးများကို လိမ်လည်ယူခဲ့သူဟု သံသယရှိသူတစ်ဦးကို ကရင်နီပြည် ရဲတပ်ဖွဲ့ (KSP) က နိုဝင်ဘာလ ၁၃ ရက်နေ့တွင် ဖမ်းဆီးရမိခဲ့ကြောင်း အဖွဲ့တာဝန်ရှိသူများက ပြောသည်။ ဖမ်းဆီးခံရသူမှာ အသက် ၂၅ နှစ်ဝန်းကျင်အရွယ် ကိုဆုပြည့်အောင် ဖြစ်ပြီး ၎င်းသည် အွန်လိုင်းစလော့ဂိမ်း (လောင်းကစားဂိမ်း) ကို စွဲလမ်းကာ ဘောလုံးပွဲ၊ ၂ လုံး၊ ၃ လုံး စသည့် လောင်းကစားများကိုလည်း ပြုလုပ်နေသူ ဖြစ်ကြောင်း KSP ၏ စစ်ဆေးမှုမှတ်တမ်းများတွင် ဖော်ပြသည်။ KSP မှ ဒုရဲချုပ် ကိုဘိုဘို က ဖမ်းဆီးစစ်ဆေးမှုအခြေအနေနှင့် ပတ်သက်၍ “သူလိမ်တာက တစ်မျိုးတည်း မဟုတ်ဘူးပေါ့။ လိမ်လည်မှု အမျိုးမျိုးပါတယ်။ လိမ်တာက ပုဒ်မတစ်မျိုးတည်း မဟုတ်ဘူး။ သူပိုက်ဆံချေး ပြီးတော့မှ အလွဲသုံးစားလုပ်တာ ရှိတယ်။ ယုံကြည်အပ်နှံရေး ဖောက်ဖျက်တာတို့ ဘာတို့ အများကြီးပဲ။ အဲ့ဒါ တွေ ပေါ်ပေါက်တဲ့ အပေါ် မူတည်ပြီးတော့မှ မေးရမှာ များတယ်ပေါ့နော်။ အခုချက်ချင်းတော့ အဖြေမထုတ်နိုင် သေးဘူး။ စခန်းမှာတော့ စစ်ဆေးမေးမြန်းတာတွေ လုပ်နေတယ်ဗျ” ဟု ပြောသည်။ ကရင်နီပြည်ကြားကာလ အုပ်ချုပ်ရေးကောင်စီ (IEC) က ထုတ်ပြန်ထားသည့် လောင်းကစား ဥပဒေအရ စလော့ဂိမ်း အသုံးပြု၍ လောင်းကစားပြုလုပ်သူများအား ပြစ်မှုဆိုင်ရာ ဥပဒေအရ ထောင်ဒဏ် ၆ လမှ ၃ နှစ်အထိ ချမှတ်နိုင်သည်ဟု ဆိုသည်။ သို့သော်လည်း ကိုဆုပြည့်အောင် ကျူးလွန်ခဲ့သည့် ပြစ်မှုများမှာ များပြားရှုပ်ထွေးသဖြင့် အပြစ်ဒဏ်ကို ယခု ချက်ချင်း ခန့်မှန်းရန် ခက်ခဲကြောင်း ဒုရဲချုပ် ကိုဘိုဘိုက ဆက်ပြောသည်။ “ဘယ်လောက်ကျမယ် ဆိုတာတော့ ယေဘုယျပြောလို့ မရဘူး။ လိမ်လည်မှုဆိုရင် ဘယ်လောက်ကျမယ် ဆိုတာ မျိုး မရှိဘူး။ လိမ်လည်မှုအတွက် ပုဒ်မကတော့ အများကြီးပေါ့နော်။ သူဘယ်လိုလိမ်လဲ ဆိုတဲ့အပေါ် မူတည်ပြီး တော့မှ ပုဒ်မတွေ ကွဲသွားတယ်။ လိမ်တဲ့ ဒီဂရီအပေါ် မူတည်ပြီးတော့ တရားသူကြီးက သူ့ဟာနဲ့သူ တရားရုံးမှာ သူ့အပြစ်အပေါ် မူတည်ပြီးတော့မှ ထောင်ဒဏ်ငွေဒဏ် ချမှတ်ရမှာပေါ့နော်။” KSP အနေဖြင့် ယခုဖြစ်စဉ်သည် ပထမဆုံးအကြိမ်မဟုတ်ဘဲ တော်လှန်ရေး ၅ နှစ်နီးပါးကာလအတွင်း ငွေကြေး လိမ်လည်သူများစွာကို ဖမ်းဆီးစစ်ဆေးခဲ့ဖူးသည်ဟု ဆိုသည်။ ၂၀၂၁ ခုနှစ်၊ ဩဂုတ်လ ၅ ရက်နေ့၌ စတင်ဖွဲ့စည်းခဲ့သည့် KSP သည် ၄ နှစ်ကျော်ကာလအတွင်း ရဲစခန်း ၁၇ ခုနှင့် ရဲကင်း ၂၀ နီးပါးအထိ တိုးချဲ့နိုင်ခဲ့ပြီးဖြစ်ရာ ပြည်သူများအနေဖြင့်လည်း ရဲတပ်ဖွဲ့အား ဆက်လက် ယုံကြည်မှု ပေးကြရန် ဒုရဲချုပ် ကိုဘိုဘိုက တောင်းဆိုထားသည်။

တော်လှန်ရေး သမားဟန်ဆောင်ကာ လူ ၆၀ ကျော်ကို ငွေလိမ်သူ ဖမ်းမိ

Nov 14

ရွေးကောက်ပွဲသည် ထောင်ချောက်သာဖြစ်ဟု ကလေးမြို့ လူထု တိုက်ပွဲ ကော်မတီ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၄ ရက်။ စစ်ကော်မရှင်၏ ရွေးကောက်ပွဲသည် ‘နိုင်ငံရေးထောင်ချောက်’ သက်သက်သာဖြစ်ဟု ကလေးမြို့လူထုတိုက်ပွဲ ဦးဆောင်ကော်မတီ ကြေညာလိုက်သည်။ စစ်ကိုင်းတိုင်း၊ ကလေးမြို့လူထုတိုက်ပွဲ ဦးဆောင်ကော်မတီ (KPSSC) က စစ်ကော်မရှင်က ကျင်းပပြုလုပ်မည့် ရွေးကောက်ပွဲသည် စစ်ရာဇဝတ်မှုများကို ဖုံးကွယ်ရန်နှင့် နိုင်ငံတကာ အသိအမှတ်ပြုမှု ရရှိရန် ကြိုးပမ်းနေခြင်း သာ ဖြစ်ကြောင်း ထုတ်ဖော်ပြောကြားပြီး ယင်းရွေးကောက်ပွဲကို ‘နိုင်ငံရေးထောင်ချောက်’ သက်သက်အဖြစ် ရှုမြင်ကြောင်း သဘောထား ကြေညာချက်တစ်စောင်ကို ထုတ်ပြန်လိုက်သည်။ KPSSC မှ ပထမဆုံးအကြိမ် လူထုတိုက်ပွဲညီလာခံကို လွတ်မြောက်နယ်မြေ တစ်နေရာတွင် အောက်တိုဘာလ ၁၁ ရက်နေ့က ကျင်းပခဲ့ပြီးနောက် ယခုကဲ့သို့ သဘောထားကို ထုတ်ပြန်ခြင်းဖြစ်သည်။ ကော်မတီအဖွဲ့ဝင်တစ်ဦးက စစ်ကော်မရှင်၏ ရွေးကောက်ပွဲအပေါ် ၎င်းတို့၏ သုံးသပ်ချက်ကို အောက်ပါအတိုင်း ရှင်းပြသည်။ “အခုဒီဇင်ဘာလကနေ စတင်ပြီးတော့ စစ်ကောင်စီကနေ ပြုလုပ်မယ့် ရွေးကောက်ပွဲဟာ ကျနော်တို့ မြန်မာ နိုင်ငံရဲ့ သမိုင်းအဆက်ဆက်မှာ ဒီစစ်အာဏာရှင် အပါအဝင် စစ်အုပ်စုတွေရဲ့ နိုင်ငံရေးထွက်ပေါက် အဖြစ် လုပ် တယ်ဆိုတာ သာဓက ရှိထားပြီးပြီပေါ့။ ထိုနည်းတူစွာ အခု မင်းအောင်လှိုင် ဦးဆောင်တဲ့ ဒီစစ်အုပ်စု ပြုလုပ်မယ့် ရွေးကောက်ပွဲကလည်း ထွက်ပေါက်မဟုတ်ဘူး နိုင်ငံရေးအရ စကစရဲ့ ထောင်ချောက်သက်သက်သာ ဖြစ်တယ် ဆိုတာကို ကျနော်တို့ ဆွေးနွေးပြီးတော့ နိုင်ငံရေး ထောင်ချောက်ဆိုပြီးတော့ ပြည်သူလူထုရဲ့ သဘောထားကို တင်ပြပြီးတော့ ကြေညာချက် ထုတ်ပြန်ရတာ ဖြစ်ပါတယ်” ဟု ပြောသည်။ စစ်ကော်မရှင်တပ်သည် ၎င်းတို့၏ ရွေးကောက်ပွဲကို အကောင်အထည် ဖော်နိုင်ရေး အတွက် တော်လှန်ရေး အဖွဲ့များ ထိန်းချုပ်ထားသည့် နေရာများကို ပြန်လည် စိုးမိုးထိန်းချုပ်ရန်၊ နယ်မြေချဲ့ထွင်ရန်အတွက် အပြင်းအထန် ကြိုးပမ်းနေကြောင်း KPSSC က ဆိုသည်။ ထိုသို့ ကြိုးပမ်းရာတွင် နေ့စဉ်နှင့်အမျှ လက်နက်ကြီး၊ လေကြောင်းဗုံးကြဲတိုက်ခိုက်မှု၊ အင်အားအလုံးအရင်းဖြင့် စစ်ကြောင်းထိုးမှုများ ပြုလုပ်နေပြီး စစ်ရာဇဝတ်မှုများလည်း ကျူးလွန်နေသည်ဟု ထုတ်ပြန်ချက်တွင် ဖော်ပြ သည်။ စစ်ကော်မရှင်၏ အပူတပြင်း ကြိုးပမ်းမှုကြောင့် ပြည်သူလူထုမှာ ရှောင်လွဲ၍မရသော အခြေအနေကို ကြုံတွေ့နေရကြောင်းလည်း ကော်မတီအဖွဲ့ဝင်တစ်ဦးက အောက်ပါအတိုင်း သုံးသပ်သည်။ “ရွေးကောက်ပွဲ ဖြစ်လာခဲ့ရင် ဆိုတာထက် စကမဘက်ကနေ ရွေးကောက်ပွဲ မဖြစ်ဖြစ်အောင် အင်မတန်မှ အပူတပြင်း ကြိုးပမ်းနေတယ်။ ဒီလိုအနေအထားမျိုးမှာ ပြည်သူအနေနဲ့ ရှောင်လွှဲလို့မရတဲ့ အနေအထားကို ကြုံတွေ့လာရမှာ ဖြစ်တယ်“ ဟု ပြောသည်။ ကလေးမြို့ လူထုတိုက်ပွဲ ဦးဆောင်ကော်မတီ အနေဖြင့် တရားမျှတမှု၊ လွတ်လပ်မှု၊ ပွင့်လင်းမြင်သာမှု လုံးဝကင်းမဲ့သည့် စစ်ကော်မရှင်၏ ရွေးကောက်ပွဲကို ပြည်သူတစ်ရပ်လုံးနှင့်အတူ အကြွင်းမဲ့ဆန့်ကျင် တိုက်ဖျက် သွားမည် ဟု ထုတ်ပြန်ချက်တွင် ဖော်ပြထားသည်။ ကလေးမြို့ဒေသခံများ၏ ရွေးကောက်ပွဲ အပေါ် သဘောထားနှင့် ပတ်သက်ပြီး KPSSC အဖွဲ့ဝင်တစ်ဦးက ကလေးဒေသသည် လက်နက်ရေးရာနှင့် လူထုတိုက်ပွဲရေးရာ နှစ်ခုစလုံးတွင် အားကောင်းသော ဒေသဖြစ်သည့် အတွက် စစ်ကော်မရှင်၏ အဓိကပစ်မှတ်ထား နှိမ်နင်းခြင်းကို ခံနေရကြောင်း ရှင်းပြခဲ့သည်။ “ဒီလိုအနေအထားမှာ လူထုလွတ်မြောက်ရေး အတွက် အားကောင်းကောင်းနဲ့ လှုပ်ရှားနိုင်ဖို့ဆိုရင် ကျနော်တို့ ကလေးဒေသခံ ပြည်သူလူထု တစ်ရပ်လုံးက ရွေးကောက်ပွဲကို အပြတ်သားဆုံး၊ အရှင်းလင်းဆုံး ဆန့်ကျင် ကြောင်း သဘောထားဖြစ်တယ်” ဟု ၎င်းက ပြောသည်။ ထို့အပြင် KPSSC က ကလေးမြို့အခြေပြု တော်လှန်ရေး အဖွဲ့အစည်းများ အနေဖြင့်လည်း ပြည်သူတစ်ဦးချင်းစီ ယုံကြည်အားကိုးနိုင်သည့် ပြည်သူ့သားကောင်းပီသစွာ ပြုမူနေထိုင်ရန် လိုအပ်ပြီး ယင်းသို့ဖြစ်စေရန် သက်ဆိုင် ရာ တာဝန်ရှိသူများမှ ကြီးကြပ်ပေးရန်လည်း တိုက်တွန်းထားသည်။ ကော်မတီသည် တော်လှန်ရေး အဆုံးသတ် ပန်းတိုင်အထိ ဆက်လက် ချီတက်သွားမည်ဟုလည်း အတိအလင်း ထုတ်ပြန်ထားသည်။ ဓာတ်ပုံ - ပေးပို့ (ကလေးမြို့ လူထုတိုက်ပွဲ ဦးဆောင်ကော်မတီ - KPSSC)

ရွေးကောက်ပွဲသည် ထောင်ချောက်သာဖြစ်ဟု ကလေးမြို့ လူထု တိုက်ပွဲ ကော်မတီ ပြော

« Prev 1 … 161 162 163 164 165 … 1,115 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု — August 21, 2026 8:07 pm
ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု — August 21, 2026 8:04 pm
အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း — August 21, 2026 8:02 pm

Recent Posts

ရွှေကူ လေကြောင်းတိုက်ခိုက်မှုတွင် ကိုယ်ဝန်ဆောင် အမျိုးသမီးအပါ အရပ်သားများ ဒဏ်ရာရ
သောင်ရင်းမြစ်ရေတက်ပြီး မြဝတီနှင့် မဲဆောက်တွင် ရေကြီးရေလျှံမှုဖြစ်
အင်းလေးရေ မြင့်တက်လာ၍ ကြိုတင်ရွှေ့ပြောင်းမှုများ ပြုလုပ်
မြောင် ဘုန်းကြီးကျောင်း ဥပုသ်နေ့တွင် ဗုံးကြဲခံရ၍ ၁၂ ဦး ထက်မနည်း သေဆုံး
ဂွနှင့်သံတွဲကို စစ်တပ်က လေယာဉ်အုပ်ဖွဲ့ ဗုံးကြဲမှုကြောင့် စစ်ဘေးရှောင်များ ဒဏ်ရာရ

Archives

Archives

×Close