NMG Doh – Page 184 – Network Media Group

NMG Doh

Author: NMG Doh

Jan 14

အရပ်သား ကျေးရွာကို ဗုံးကြဲ၊ ရွာသား ၅ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၄ ရက်။ တနင်္သာရီမြို့နယ်အတွင်း ကျေးရွာတစ်ရွာကို စစ်ကောင်စီလေတပ်က တိုက်လေယာဥ်ဖြင့် ဗုံးကြဲ တိုက်ခိုက်ခဲ့ ခြင်းကြောင့် အမျိုးသမီး ၃ ဦးအပါအဝင် ရွာသား ၅ ဦး ထိခိုက်ဒဏ်ရာ ရရှိခဲ့သည်။ တကူကျေးရွာအုပ်စုထဲ သံတိုက်ကျေးရွာကို ဇန္နဝါရီလ ၁၃ ရက်နေ့၊ နံနက်အစောပိုင်းက တိုက်လေယာဥ်ဖြင့် နှစ်ကြိမ်တိုင်တိုင် ဗုံးကြဲတိုက်ခိုက်ခဲ့ခြင်း ဖြစ်သည်။ ကုန်စိမ်းစျေးအနီး နေထိုင်သူ အသက် ၅၀ ခန့်အရွယ် အမျိုးသားတစ်ဦးက “ပထမအကြိမ်ထိတဲ့ သူက ဒဏ်ရာ ပြင်းတယ်၊ ခေါင်းတွေ နောက်ကျောတွေအပြင် ပေါင်မှာ အရိုးပေါ်သွားတယ်။ လက်ရှိ အသက်မသေတာ ကံကောင်းတယ်။ ဒုတိယအကြိမ်မှာ ထိတဲ့သူတွေက တော်သေးတယ် နည်းနည်း ပါးပါးလောက်ပဲ” ဟု ပြော သည်။ ဇန္နဝါရီလ ၁၃ ရက်နေ့၊ နံနက်ပိုင်း ၈ နာရီခွဲအချိန်ခန့်တွင် ရဲစခန်းအနီးဝန်းကျင်ကို ပထမအကြိမ်ဗုံးသီး တစ်လုံး ကြဲချပြီး တိုက်ခိုက်ခဲ့ရာ အသက် ၃၅ နှစ်အရွယ် ရွာသားတစ်ဦး ပြင်းထန်ဒဏ်ရာများ ရရှိခဲ့ပြီး နေအိမ် နှစ်ဆောင် ပျက်ဆီးခဲ့သည်ဟု ရွာသားတစ်ဦးက ဆိုသည်။ ထို့အပြင် သံတိုက်ကျေးရွာ အလယ်ပိုင်းရှိ စာသင်ကျောင်းနှင့် ကုန်စိမ်းဈေး အနီးဝန်းကျင်ကို နံနက် ၉ နာရီ ၄၅ မိနစ်အချိန်တွင် ဒုတိယအကြိမ် ထပ်မံ၍ လေကြောင်းမှ ဗုံးသီးနှစ်လုံးကြဲချ တိုက်ခိုက်ခဲ့သည်။ ဒုတိယအကြိမ် လေကြောင်းတိုက်ခိုက်ခံရမှုတွင် အမျိုးသားတစ်ဦးနှင့် အမျိုးသမီးသုံးဦး ထပ်မံ၍ ထိခိုက်ဒဏ်ရာများရရှိခဲ့ပြီး နောက်ထပ် နေအိမ်နှစ်ဆောင်လည်း ပျက်ဆီးခဲ့သည်။ ဒုတိယအကြိမ်တွင် ကြဲချခဲ့သည့် ဗုံးသီးနှစ်လုံးအနက် တစ်လုံးသာ ပေါက်ကွဲခဲ့ပြီး ဗုံးသီးနောက်တစ်လုံးမှာ မပေါက်ကွဲသေးဘဲ ကျန်ရှိနေသည်ဟု ရွာသားများက ဆိုသည်။ ဗုံကြဲတိုက်ခိုက်ခံရမှုကြောင့် ထိခိုက်ဒဏ်ရာရရှိခဲ့သူ ၅ ဦးမှာ နီးစပ်ရာ ဆေးကုခန်းများတွင် ဆေးကုသမှု ခံယူနေကြရသည်။ စစ်ကောင်စီက နှစ်ဖက်ထိတွေ့တိုက်ပွဲ ဖြစ်ပွားခြင်းမရှိဘဲ သံတိုက်ကျေးရွာကို လေကြောင်းဖြင့် တိုက်ခိုက်ခဲ့ခြင်း ဖြစ်သည်ဟု ရွာသားများက ပြောသည်။ ဇန္နဝါရီလ ၉ ရက်နေ့ကလည်း မြိတ်ခရိုင်၊ ပုလောမြို့နယ်ရှိ စက်တော်ရာကျေးရွာကို စစ်ကောင်စီက လေကြောင်း မှ ဗုံးကြဲတိုက်ခိုက်မှု အကြိမ်ကြိမ် ပြုလုပ်ခဲ့ပြီး ဗုံးသီးအလုံးရေ ၇၀ ထက်မနည်း ကြဲချ တိုက်ခိုက်ခဲ့သည်။

အရပ်သား ကျေးရွာကို ဗုံးကြဲ၊ ရွာသား ၅ ဦး ဒဏ်ရာရ

Jan 14

ပုလောမြို့နယ်အတွင်း လမ်းမတန်းရှိ ကျေးရွာ ၃ ရွာကို စစ်ကောင်စီ မီးရှို့ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၄ ရက်။ မြိတ်ခရိုင်၊ ပုလောမြို့နယ်ရှိ ပုလော - မြိတ် သွားကားလမ်းမကြီးပေါ်မှ ကျေးရွာချင်းဆက် ကျေးရွာ သုံးရွာကို စစ်ကောင်စီတပ်က မီးရှို့ဖျက်ဆီးခဲ့ရာ နှစ်ရက်ကြာသည်အထိ လောင်ကျွမ်းနေဆဲ ဖြစ်သည်ဟု ရွာသားများက ပြောသည်။ ကားလမ်းမပေါ်ရှိ ရွာများဖြစ်ကြသည့် တပို၊ စက်တော်ရာနှင့် ကြဲကျေးရွာ သုံးရွာကို စစ်ကောင်စီတပ်က မီးရှို့ဖျက်ဆီးနေခြင်းဖြစ်သည်။ တပိုကျေးရွာနှင့် စက်တော်ရာကျေးရွာအကြားတွင်ရှိသည့် နေအိမ်ငါးလုံးနှင့် ရော်ဘာခြံဧက ၅၀ ကျော်ကို ဇန္နဝါရီလ ၁၁ ရက်နေ့၊ မွန်းလွှဲ ၁ နာရီခွဲက မီးရှို့ဖျက်ဆီးခဲ့ခြင်းဖြစ်သည်။ မီးရှို့ဖျက်ဆီးခံရသည့် ခြံများမှာ ဇန္နဝါရီလ ၁၃ ရက်နေ့ နံနက်ပိုင်းအချိန်ထိ ဆက်လက်လောင်ကျွမ်းနေဆဲ ဖြစ် သည်ဟု ရွာသားများက ဆိုသည်။ အသက် ၄၀ ခန့်အရွယ် တပိုရွာသားတစ်ဦးက “စက်တော်ရာဘက်မှာ လောင်နေတာကို တောမီးလောင်သလိုမျိုး ဖြစ်နေတယ်။ ညတုန်းက ဝါးမီးပေါက်တဲ့ အသံတွေ တဖေါင်းဖေါင်းနဲ့ ကြားနေရတာ။ အခုရာသီက အရှေ့ လေ တိုက်နေတဲ့ ရာသီလည်းဖြစ်တယ်။ ခြောက်သွေ့ရာသီလည်း ဖြစ်တော့ ပိုဆိုးတာပေါ့။ ရွာသားတွေက ဘေး လွတ်ရာ ရှောင်နေကြရတော့ မငြိမ်းသတ်နိုင်ကြဘူး” ဟု ပြောသည်။ ဇန္နဝါရီလ ၁၃ ရက်နေ့၊ နံနက်ပိုင်းမှာလည်း ကြဲကျေးရွာမှ နေအိမ်များကို စစ်ကောင်စီတပ်က ထပ်မံ၍ မီးရှို့ ဖျက် ဆီးနေပြီး နေအိမ်ဘယ်နှစ်ဆောင် မီးရှို့ခံရကြောင်းနှင့် နောက်ဆက်တွဲ အခြေအနေကိုမူ မသိရှိရသေးဟု ဆိုသည်။ စစ်ကောင်စီ တပ်ဖွဲ့ဝင်များ ဒရုန်းနှင့် တိုက်ခိုက်ခံရပြီးနောက် နေအိမ်နှင့် ရော်ဘာခြံများကို ယခုကဲ့သို့ မီးရှို့ဖျက် ဆီးခဲ့ခြင်း ဖြစ်သည်။ တပိုကျေးရွာအတွင်းသို့ ဝင်ရောက်လာသည့် အင်အား ၁၂၀ ခန့်ပါ စစ်ကောင်စီ စစ်ကြောင်းကို ဇန္နဝါရီလ ၁၁ ရက်နေ့၊ မွန်းလွဲ ၁ နာရီခွဲအချိန်ခန့်က ဒရုန်းဖြင့် ဗုံးသီးအလုံး ၂၀ ကြဲချပြီး တိုက်ခိုက်ခဲ့သည်ဟု မြိတ်ခရိုင် အမှတ် (၁) တပ်ရင်းမှ သတင်း ထုတ်ပြန်ထားသည်။ အဆိုပါ တိုက်ခိုက်မှုတွင် စစ်ကောင်စီတပ်ဖွဲ့ဝင် ရှစ်ဦးကျဆုံးခဲ့ပြီး အထိနာခဲ့သည့် စစ်ကောင်စီ စစ်ကြောင်းက တပိုကျေးရွာမှ စက်တော်ရာကျေးရွာဘက်သို့ ပြန်ဆုတ်လာသည့် အချိန်၌ အိမ်နှင့် ခြံများကို မီးရှို့ဖျက်ဆီးခဲ့ ကြောင်း ထုတ်ပြန်ချက်ထဲတွင် ရေးသားထားသည်။ ဇန္နဝါရီလ ၉ ရက်နေ့ကလည်း ပုလောမြို့နယ်၊ စက်တော်ရာကျေးရွာတွင် တပ်စွဲထားသည့် စစ်ကောင်စီတပ်နှင့် စစ်ကောင်စီ၏ ခြေလျင်တပ်ရင်း ခလရ (၁၇) ကို ပြည်သူ့ကာကွယ်ရေး မဟာမိတ် ပူးပေါင်းတပ်ဖွဲ့များက ဝင်ရောက် တိုက်ခိုက်ခဲ့သေးသည်။

ပုလောမြို့နယ်အတွင်း လမ်းမတန်းရှိ ကျေးရွာ ၃ ရွာကို စစ်ကောင်စီ မီးရှို့

Jan 14

ပုသိမ်မြို့နယ်အတွင်းမှ ဒေသခံများ စစ်ရှောင်နေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၄ ရက်။ ရခိုင်ပြည်နယ် ဂွမြို့နှင့် ထိစပ်နေသည့် ဧရာဝတီတိုင်း၊ ပုသိမ်မြို့နယ်အတွင်း ဖြစ်ပွားနေသည့် တိုက်ပွဲများကြောင့် ပြည်သူများ ရွာလုံးကျွတ်ဘေးလွတ်ရာသို့ စစ်ရှောင်နေကြရသည်။ ပုသိမ်မြို့နယ်၊ ရွှေသောင်ယံမြို့၊ မကျီးဇင်ကျေးရွာရှိ စစ်ကောင်စီတပ်စခန်းများကို အာရက္ခတပ်တော် (AA) နှင့် ပူးပေါင်းတပ်ဖွဲ့များက ဇန္နဝါရီလ ၉ ရက်နေ့ကစပြီး တိုက်ခိုက်ခဲ့ရာ စစ်ကောင်စီတပ်ဖွဲ့ဝင် စစ်သားများနှင့် ရဲတပ် ဖွဲ့ဝင်များ ဆုတ်ခွာသွားသည်ဟု ဒေသခံများက ပြောသည်။ ထိုသို့ ဆုတ်ခွာသွားပြီးနောက် စစ်ကောင်စီတပ်က လေကြောင်းရော ရေတပ်ကနေပါ ပစ်ခတ်တိုက်ခိုက်မှုများ လုပ်လာသဖြင့် မကျီးဇင်ရွာသားများ ဘေးလွတ်ရာသို့ ထွက်ပြေးတိမ်းရှောင်နေကြရသည်ဟု ဆိုသည်။ မကျီးဇင်ကျေးရွာမှ စစ်ရှောင်တစ်ဦးက “ညတုန်းက လေတပ်ကလာပြီး ဗုံးကြဲတယ်။ မနက်မှာ‌ ရေတပ်က ဆက်တိုက်ပစ်တာ။ ဘုန်းကြီး ၁ ပါးနဲ့ လူ ၁ ယောက် သေတယ်။ အိမ်တွေလည်း စိစိညက်ညက် ကြေတာပါပဲ” ဟု ပြောသည်။ စစ်ကောင်စီတပ်၏ လေကြောင်း၊ ရေကြောင်းမှ ပစ်ခတ်တိုက်ခိုက်မှုများကြောင့် မကျီးဇင်ကျေးရွာထဲက ကျောင်းသစ်ဘုန်းကြီးကျောင်း၊ အထက်တန်းကျောင်း၊ ရဲစခန်းနှင့် ဆေးရုံတို့ ပျက်စီးသွားကာ တံတားပါကျိုးကျ သွားပြီဟု မျက်မြင်တွေ့ခဲ့ရသူ အချို့က ပြောသည်။ မကျီးဇင်ကျေးရွာသည် အိမ်ခြေ ၆၀၀ ခန့်ရှိသည့် ကျေးရွာကြီး တစ်ရွာဖြစ်ပြီး လူဦးရေ ၂၀,၀၀၀ ခန့် နေထိုင် လျက်ရှိရာ အနီးအနား ကျေးရွာများသို့ စစ်‌ဘေးရှောင်နေကြရသည်ဟု ဒေသခံများကပြောသည်။ မကျီးဇင်ရွာသား အခြားစစ်ရှောင် တစ်ဦးကလည်း “သဘော့ကန်နဲ့ ရွှေသောင်ယံမှာ တစ်နေ့ကို လူတစ်ယောက် ၁,၀၀၀ ကျပ်ပေးပြီး ဧည့်စာရင်းတိုင်ရတယ်။ ပုသိမ်မှာ လူ ၁‌ ယောက်ကို တစ်လအတွက် ၁,၅၀၀ ပေးပြီး ဧည့်စာရင်း တိုင်နေရတယ်။ ဆွေမျိုးနီးစပ်တွေက ပေးနေလို့ နေစရာလေးတော့ ရှိပါပြီ။ စားဖို့ကတော့ ကြုံရာ ကျဘန်း ရှာလုပ်ရမှာပေါ့” ဟု ပြောသည်။ ဘောမိကျေးရွာမှ တဆင့် ဂျိတ်လတ်သို့ ကူးကာ တောလမ်းအတိုင်း ရွှေသောင်ယံမြို့ပေါ်သို့လည်းကောင်း ကားလမ်းမှ သာပေါင်း၊ ပုသိမ်မြို့များသို့လည်းကောင်း စစ်ရှောင်နေကြရသည်ဟု မကျီး‌ဇင်ရွာသားများက ပြောသည်။ ပုသိမ်မြို့ခံတစ်ဦးက “အိမ်တစ်လုံးကို ငှားပြီး လူ ၂၀ လောက်စုနေကြတာဗျာ။ ကျောတစ်ခင်းစာပေါ့ ငွေကြေး တတ်နိုင်သူတွေကတော့ ကြိုတင်ပြီးအိမ်ဝယ်ထား ပစ္စည်းတွေကြိုရွှေ့ထားကြတာ ဆိုတော့ ဆုံးရှုံးမှု နည်းတယ်။ သူတို့ကတော့ အခြေ မပျက်ဖူးပေါ့” ဟု ပြောသည်။ မကျီးဇင်၊ ဂျိုင်လယ်၊ ဘောမိ၊ ဂျိတ်လတ်ကျေးရွာများမှ ရွာသားများ ရွှေသောင်ယံသို့ စစ်ရှောင်ရန် ရောက်ရှိချိန်တွင် စစ်ကောင်စီမှ ခံစစ်ဆင်ရန် ကား ၁၁ စီးဖြင့် စစ်အင်အား နှင့် လက်နက်ကြီးများ ဖြည့်တင်းကာ အထိုင်ချ ပြင်ဆင် နေသည်ကို တွေ့မြင်ခဲ့ကြရသည်။ ထို့ကြောင့် ရွှေသောင်ယံတွင် မနေရဲတော့ပဲ ပုသိမ်မြို့သို့ အလုံးအရင်းဖြင့် ဝင်ရောက်လာကြခြင်း ဖြစ်သည်ဟု စစ်ဘေး ရှောင်လာသူများက ပြောသည်။ အာရက္ခတပ်တော် AA သည် ဂွမြို့သိမ်းပြီးနောက် ဧရာဝတီတိုင်းထဲက ဒေသခံ ပြည်သူ့ကာကွယ်ရေးတပ်ဖွဲ့များ နှင့် ပူးပေါင်းကာ ဧရာဝတီ - ရခိုင်အစပ်ရှိ မကျီးဇင်ကျေးရွာက စစ်ကောင်စီ စခန်းများကို ယခုရက်ပိုင်းအတွင်း သိမ်းပိုက်ခဲ့ပြီး ထွက်ပြေးသွား သည့် စစ်ကောင်စီတပ်ဖွဲ့များနှင့် ရွှေသောင်ယံကမ်းခြေ၌ တိုက်ပွဲပြင်းထန်လျက်ရှိ သည်။ ထိုသို့ အာရက္ခတပ်တော် AA နှင့် ဒေသခံပြည်သူ့ကာကွယ်ရေးတပ်ဖွဲ့ PDF ပူးပေါင်းအဖွဲ့ ထိုးစစ်မှာ ရွှေသောင်ယံ မြို့ အထိ ရောက်ရှိလာ၍ ချောင်းသာကမ်းခြေသို့ သွားသည့် ပုသိမ် - ချောင်းသာ လမ်းပိုင်းကိုလည်း ဇန္နဝါရီလ ၁၃ ရက်နေ့တွင် ပိတ်ထားသည်ဟု သတင်းများထွက်ပေါ်နေသည်။ ဓါတ်ပုံ - AA (ဂွမြို့သိမ်း တိုက်ပွဲမှ ပုံ)

ပုသိမ်မြို့နယ်အတွင်းမှ ဒေသခံများ စစ်ရှောင်နေရ

Jan 14

အာဏာသိမ်းပြီးနောက်ပိုင်း တရုတ်သို့ ရောင်းစားခံရသူ မိန်းကလေးများကယ်ဆယ်ရေး ခက်ခဲလာ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၄ ရက်။ စစ်တပ်က အာဏာသိမ်းပြီးနောက်ပိုင်း တရုတ်နိုင်ငံသို့ ရောင်းစားခံရသည့် အမျိုးသမီးများအား ကူညီ ကယ် ဆယ်ခွင့် နည်းပါးလာသည်ဟု အမျိုးသမီးအရေး လှုပ်ရှားဆောင်ရွက်နေသူများက ပြောသည်။ ရောင်းစားခံရသူများမှာ ကချင်အမျိုးသမီး အများစု အပါအဝင် မြန်မာနိုင်ငံ အနှံ့အပြားမှ ဖြစ်ကြပြီး တရုတ် မယားအဖြစ် ရောင်းစားခံရခြင်း၊ တရားမဝင် အွန်လိုင်း လောင်းကစားဂိမ်းများတွင် ဖိအားပေး စေခိုင်းခံရခြင်း များ ကြုံတွေ့နေကြရသည်။ ထိုင်းနိုင်ငံ အခြေစိုက် ကချင်အမျိုးသမီး အစည်းအရုံး (KWAT) ပြောရေးဆိုခွင့်ရှိသူ ဆန်ထွယ်က “သူတို့က နိုင်ငံရေးအရ ရော စစ်ရေးအရရော အရမ်းခက်ခဲတဲ့ ကိုယ့်ရဲ့ဒေသမှာ တခြားနေရာမှာ ကိုယ်နဲ့နီးစပ်တဲ့ နယ်စပ် မှာ လုပ်လုပ်ဖို့ အတွက်က များသောအားဖြင့် သူငယ်ချင်းတို့ မိတ်ဆွေတို့ ကိုယ့်ရဲ့ အမျိုးတွေတို့ အဲ့လိုမျိုး ခေါ် ရင်းနဲ့ အလုပ်ရှိတဲ့ ဆိုတဲ့ အောက်မှာပဲ သူတို့က ထွက်လာရင်းနဲ့ တဖက်ကမ်းရောက်တာနဲ့ ရောင်းစားခံရတဲ့ အခြေအနေ ပိုများပါတယ်” ဟု‌ ပြောသည်။ တရုတ်နိုင်ငံသို့ တရားမဝင် ရောင်းစားခံရသည့် အမျိုးသမီးများအား ၂၀၂၁ ခုနှစ် စစ်အာဏာသိမ်းပြီး နောက်ပိုင်း တွင် ကူညီကယ်ဆယ်ခွင့် နည်းပါးလာသည့်အပြင် စာရင်းပြုစုရန်၊ အချက်အလက်ရယူရန်လည်း ပိုမိုခက်ခဲလာ သည်ဟု အမျိုးသမီးအခွင့်အရေး လှုပ်ရှားဆောင်ရွက်နေသူများက ပြောသည်။ ၂၀၂၁ ခုနှစ် စစ်အာဏာသိမ်းပြီးနောက်ပိုင်း ကာလများတွင် နယ်စပ်ဂိတ်များအား တရုတ်ဖက်မှ ပိတ်ထားခြင်း၊ အမျိုးသမီး အဖွဲ့အစည်းများမှာ ပေါ်ပေါ်တင်တင် လှုပ်ရှား၍ မရခြင်း၊ ကူညီပေးသည့် လက်နက်ကိုင် အဖွဲ့အစည်း များအနေဖြင့်လည်း နယ်မြေအခြေအနေအရ လှုပ်ရှားရန် မလွယ်ကူတော့ခြင်းများ ရင်ဆိုင်နေရသည်ဟု ဆိုကြ သည်။ ထို့ကြောင့် တရုတ်နိုင်ငံသို့ သွားရောက်လုပ်ကိုင်ကြသူများမှာ ငွေကြေးအမြောက်အများ ရမည်ဟုဆိုကာ မက်လုံးပေးခံရပြီးနောက် တရုတ်ဇနီးမယားအဖြစ် လူကုန်ကူးခံနေရသည်ဟု ဆန်ထွယ်က ရှင်းပြသည်။ “တကယ်တမ်း ရောင်းစားခံရဖို့ သွားတာတော့ မဟုတ်ဘူးပေါ့။ ဟိုရောက်မှ မလွဲမရှောင်သာ အမျိုးသားက အလုပ်ရှိတယ်ဆိုပြီး ခေါ်သွားရင်းနဲ့ပဲ မယားဖြစ်တာတို့၊ မယားလုပ်ရမှာတို့ အဲ့လိုတွေ ပြောရင်းနဲ့ပဲ လူကုန်ကူး တဲ့ သူတွေဆီ ရောက်သွားတာပေါ့။” ရောင်းစားခံရသည့် အမျိုးသမီးများမှာ လှောင်ပိတ်ခံရခြင်း၊ အဓမ္မလိင်ဆက်ဆံခံရခြင်း၊ ရိုက်နှက်ခံရခြင်းများ ကြုံတွေ့နေရပြီး ထိုအရာများအား ဆန့်ကျင်သူများကိုလည်း နည်းမျိုးစုံဖြင့် ညှင်းပန်းနှိပ်စက်လေ့ ရှိသည်ဟု ထွက်ပြေးလွတ်မြောက်လာသူများက ပြောသည်။ တရုတ်နိုင်ငံတွင် အမျိုးသမီး တစ်ဦးကို တရားမဝင်ပေါက်ဈေး ယွမ် တစ်သောင်းမှ ၅ သောင်းအထိ ပေး၍ ဝယ်ယူကြပြီး ဝေးလံခေါင်ဖျားသည့် ဟဲနန် (Henan) နှင့် စန်းတုန်း (Shandog) ပြည်နယ်များသို့ ခေါ်သွားကြ သည်ဟု ဆိုသည်။ အမျိုးသမီးများ လူကုန်ကူးခံရမှုများ ပပျောက်စေရန်အတွက် နိုင်ငံရေး တည်ငြိမ်မှုရှိရန်၊ ဒေသတွင်း တည်ငြိမ် အေးချမ်းရန်၊ ထိုက်သင့်သည့် လုပ်ခလစာများ ရရှိရန် လိုအပ်သည်ဟု ဆန်ထွယ်က ဆက်လက်ပြောဆိုသည်။ “အမျိုးသမီးတွေကို လူကုန်ကူးနေတဲ့ကိစ္စ လျှော့ချနိုင်ဖို့အတွက်ဆိုရင် ကျမတို့ရဲ့ မြန်မာနိုင်ငံရေး အပြောင်း အလဲကလည်း အများကြီး အရေးကြီးတယ်။ စစ်ပဋိပက္ခတွေ တောက်လျှောက်ဖြစ်နေတဲ့ နယ်မြေ မတည်ငြိမ် မှု အောက်မှာ လုပ်ကိုင်စားသောက်ရတဲ့ အမျိုးသမီးတွေအတွက်က လုံခြုံမှုမရှိတဲ့ အတွက်ကြောင့်မို့လို့ ကိုယ်က တခြားနေရာကို သွားပြီးရှာစားရတဲ့ အခြေအနေမှာ၊ တွန်းပို့လာတဲ့အချိန်မှာ ဒီအမျိုးသမီးတွေအတွက်က vulnerable ဖြစ်လာတယ်ပေါ့နော်။ ဆိုတော့ သူတို့အတွက်က ဒီလိုမျိုးဖြစ်ဖို့ များလာတဲ့ပုံစံတွေ ဖြစ်နေတယ်။ မြန်မာနိုင်ငံက အမျိုးသမီးတွေအတွက်၊ စစ်ရှောင်တွေအတွက် ကူညီပံ့ပိုးမှုတွေ အများကြီး လိုအပ်နေတာကို လည်း ဖြည့်စွက်ပြီး ပြောချင်ပါတယ်။” အလားတူ တရုတ်နိုင်ငံ၌ သာမက ပြည်တွင်းရှိ ရှမ်းမြောက်ဒေသ၊ ရှမ်းအရှေ့ပိုင်းရှိ တာချီလိတ်မြို့နှင့် ထိုင်း-မြန်မာ နယ်စပ် မြဝတီဘက်ခြမ်းရှိ တရားမဝင် အွန်လိုင်း ငွေလိုင်းဂိုဏ်းများဆီသို့လည်း အမျိုးသမီးများ ရောင်းချခံနေမှုများလည်း ရှိနေသည်။ ကချင်အမျိုးသမီး အစည်းအရုံး (ထိုင်းနိုင်ငံ) Kachin Women Association Thailand (KWAT) ၏ စာရင်းအရ ၂၀၁၉ ခုနှစ်မှ ၂၀၂၃ ခုနှစ်အတွင်း အဆိုပါ တရားမဝင် အွန်လိုင်း ငွေလိုင်းဂိုဏ်းများမှ ထွက်ပြေးလွတ်မြောက်လာ သူ ၁၈၇ ဦးရှိသည်ဟု သိရသည်။

အာဏာသိမ်းပြီးနောက်ပိုင်း တရုတ်သို့ ရောင်းစားခံရသူ မိန်းကလေးများကယ်ဆယ်ရေး ခက်ခဲလာ

Jan 13

ခမရ ၅၉၉ မှ စစ်သား နှစ်ဦး အလင်းဝင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၃ ရက်။ ဘုတ်ပြင်း ခမရ - ၅၅၉ တပ်ရင်းမှ တပ်သားသစ် ၂ဦး ဒေါနတပ်ရင်းထံ လက်နက်များနှင့် ဘက်ပြောင်းခိုလှုံ လာ ကြသည်။ တနင်္သာရီတိုင်း ဘုတ်ပြင်းမြို့နယ် အခြေစိုက် စစ်ကောင်စီ၏ ခမရ - ၅၅၉ တပ်ရင်းမှ အဓမ္မ စစ်မှုထမ်း စုဆောင်း ခံရသူ တပ်သားသစ် ၂ ဦး ပြည်သူ့ကာကွယ်ရေးတပ်ဖွဲ့ထံ ဘက်ပြောင်းခိုလှုံလာသည်ဟု တောင်ပိုင်း စစ်ဒေသ တာဝန်ရှိသူက ပြောသည်။ ဘက်ပြောင်းခိုလှုံလာသူနှစ်ဦးသည် ထိုင်းနိုင်ငံတွင် ဖမ်းဆီးခံရပြီးသည့်နောက် မြန်မာနိုင်ငံ ကော့သောင်းကမ်း ဘက်သို့ ပြန်ပို့ခံရကာ စစ်မှုထမ်းအပတ်စဥ် - ၅ အတွက် အဓမ္မစစ်သားသစ် အဖြစ် စုဆောင်းခံရသူများ ဖြစ်ကြ ကြောင်း ဒေါနတပ်ရင်းမှ ဇန္နဝါရီလ ၁၂ ရက်နေ့တွင် ထုတ်ပြန်ထားသည်။ ဒေါနတပ်ရင်းမှူးက “လောလောဆယ်တပ်ရင်း သူတို့ နှစ်ယောက်စလုံးကို ဆုငွေပေးထားတယ်၊ တပ်ရင်းမှာပဲ တော်လှန်ရေး တပ်သားအဖြစ် ဆက်လုပ်မယ်လို့ ပြောတယ်၊ ပါလာတဲ့ လက်နက်စာရင်းတွေကို ပြည်သူ့ရင်ခွင် အစီအစဥ်ကို တင်ပြပြီးတော့ ဆုထပ်ပြီး ချီးမြှင့်ပေးနိုင်ဖို့ စီစဥ်နေပါတယ်” ဟု ပြောသည်။ စစ်ရေးတင်းမာလျက်ရှိနေသည့် မွန်နှင့် ကရင်နယ်စပ်ရှိ အနန်းကွင်း စစ်ဗျူဟာအနီးရှိ ရဲတံခွန်ကျေးရွာသို့ ရှေ့တန်း ပို့ဆောင်ခံထားရပြီး ကင်းစောင့်နေစဉ် ဒေါနတပ်ရင်းနှင့် အဆက်အသွယ်ရယူကာ ထွက်ပြေးလာခဲ့ကြ ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။ ဇန္နဝါရီလ ၁၁ ရက်နေ့တွင် ခိုလှုံလာသည့် စစ်ကောင်စီတပ်သား ၂ ဦးသည် ၎င်းတို့နှင့်အတူ MA-1 (၁) လက်၊ MA-3 (၁) လက်၊ ကျည် (၁၇၅) တောင့်၊ ကျည်ဘောက် (၆) ခုနှင့် လက်ပစ်ဗုံး တစ်လုံးကိုလည်း ယူလာကြသည်။ ဒေါနတပ်ရင်းတွင် စစ်ကောင်စီဘက်မှ ခိုလှုံလာသူဦးရေ စုစုပေါင်း နှစ်ဆယ်ကျော်ရှိနေပြီ ဖြစ်ပြီး စစ်မှုထမ်းသင်တန်းဆင်းသူ တပ်သား ထက်ဝက်နီးပါးခန့် ပါဝင်သည်ဟု ဒေါနတပ်ရင်းမှူးက ဆိုသည်။ စစ်ကောင်စီ၏ စစ်မှုထမ်း အမိန့်ကြောင့် အတင်းအဓမ္မ တပ်သားအဖြစ် စုဆောင်းခံရသူများ အပါအဝင် ပြည်သူ ဘက်မှ ရပ်တည်လိုသည့် တပ်မတော်သားနှင့် ရဲတပ်ဖွဲ့ဝင်များအနေဖြင့် ပြည်သူ့ကာကွယ်ရေး တပ်မတော် ဒေါန တပ်ရင်းနှင့် မဟာမိတ် ပူးပေါင်းတပ်ဖွဲ့များ၊ နီးစပ်ရာ ပြည်သူ့ကာကွယ်ရေး တပ်ဖွဲ့များသို့ ချိတ်ဆက် ပူးပေါင်းနိုင် ကြောင်း တောင်ပိုင်းစစ်ဒေသက အသိပေးတိုက်တွန်းထားသည်။

ခမရ ၅၉၉ မှ စစ်သား နှစ်ဦး အလင်းဝင်

Jan 13

ပြည်သူ့စစ် ဝင်ရောက်ရန် မက်လုံးပေး ခေါ်ယူ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၃ ရက်။ မြိတ်ခရိုင် တနင်္သာရီမြို့နယ်အတွင်းရှိ ထိုင်း - မြန်မာနယ်စပ်မြို့ဖြစ်သည့် မောတောင်မြို့ပေါ်တွင် ပြည်သူ့စစ် အဖွဲ့ ဝင်ရောက်ရန်အတွက် ငွေကြေးပေး၍ ခေါ်ယူနေကြောင်း မြို့ခံများက ပြောသည်။ စစ်ကောင်စီတပ်နှင့် ဆက်စပ်အဖွဲ့အစည်းများက ပြည်သူ့စစ်အဖွဲ့ဝင် အနေဖြင့် ဝင်ရောက်လုပ်ကိုင်လိုသူများကို တစ်နေ့ ထိုင်းဘတ် ၂၀၀ နှုန်းဖြင့် တစ်လလျှင် ဘတ် ၆၀၀၀ ရရှိသွားမည်ဖြစ်သည့် အပြင် ဆန်တစ် အိတ်နှင့် ဆီတစ်ဘူးလည်း ပေးသွားမည် ဖြစ်ကြောင်း ပြောဆို၍ ခေါ်ယူနေခြင်း ဖြစ်သည်။ အသက် ၄၀ ခန့်အရွယ် အမျိုးသားတစ်ဦးက “အရင်တုန်းကတည်းက ပြည်သူ့စစ်မှာ လစာရှိပြီးသားပါ၊ စစ်တပ်က ပိုက်ဆံပေးရုံမကပဲ ဆန်တွေရော ဆီတွေပါ ထောက်ပံ့ပေးပြီး ထပ်ခေါ်တာမျိုးပါ၊ အသိတစ်ယောက်လည်း ဝင်လုပ်နေတာ မိသားစုက စိတ်ပူပြီး မလုပ်စေချင်ဘူး” ဟု ပြောသည်။ ယခုကဲ့သို့ လစာ နှင့် ထောက်ပံ့ပစ္စည်းများ ပေးအပ်၍ ခေါ်ယူနေခြင်းကြောင့် အလုပ်အကိုင် ရှားပါးလာသည့် မောတောင်မြို့မှ ကုန်တင်ကုန်ချ အလုပ်သမားအချို့ ပြည်သူ့စစ်အနေဖြင့် ဝင်ရောက်လုပ်ကိုင်မှုများ ရှိလာနေ သည်ဟု ဒေသခံများက ဆိုသည်။ လက်ရှိတွင် ပြည်သူ့စစ်အဖွဲ့ဝင် အသစ်အဖြစ် ဝင်ရောက်ပြီး သင်တန်းတက်နေသူ အယောက် ၃၀ ခန့်ရှိနေ ကြောင်း မြို့နယ်အုပ်ချုပ်ရေး အဖွဲ့ တာဝန်ရှိသူများနှင့် နီးစပ်သူတစ်ဦး က ဆိုသည်။ တနင်္သာရီ - မောတောင် ကားလမ်းပိုင်းဖြစ်သည့် ရေဖြူ၊ ထုံခါ၊ ချောင်းနှစ်ပေါက်နှင့် သိန်ခွန်းကျေးရွာများတွင် ၂၀၂၄ ခုနှစ် ဒီဇင်ဘာလ တတိယပတ်ခန့်မှ စတင်၍ စစ်ကောင်စီနှင့် PDF ပူးပေါင်းတပ်ဖွဲ့တို့အကြား နှစ်ဖက်တိုက်ပွဲများ ပြင်းထန်နေပြီး ကားလမ်းကိုလည်း ပိတ်ထားသည်။ တိုက်ပွဲများကြောင့် ကားလမ်း ပိတ်ချခဲ့ရပြီးနောက် ထိုင်းဘက်သို့ ကုန်ပစ္စည်းတင်ပို့သည့် ကုန်ကားများ သွားလာ၍ မရတော့သည့်အတွက် မောတောင်မြို့ရှိ ကုန်တင်ကုန်ချလုပ်ငန်းများတွင် အဓိက ဝင်ရောက် လုပ်ကိုင်နေကြသည့် လူငယ်၊ လူရွယ်များမှာ အလုပ်အကိုင် ရှားပါးလာကြခြင်း ဖြစ်သည်။ ထိုသို့ အလုပ်အကိုင် ရှားပါလာသည့်အတွက် အချို့မှာ ပြည်သူ့စစ်အဖွဲ့ထဲသို့ ဝင်ရောက်က လုပ်ကိုင်နေကြ ခြင်းဖြစ်သည်ဟု မြို့ခံများက ပြောသည်။ လတ်တလောတွင် ပြည်သူ့စစ်အဖွဲ့ဝင်အဖြစ် ဝင်ရောက် လုပ်ကိုင်နေကြသူများမှာ ဆန်နှင့်ဆီကို ရရှိကြသော် လည်း လစာဘတ် ၆၀၀၀ ကိုမူ မရရှိကြသေးဘူးဟု ပြည်သူ့စစ်သင်တန်းတက်နေသူများနှင့် နီးစပ်သူ အချို့က ပြောသည်။ လက်ရှိတွင် ပြည်သူ့စစ်အဖွဲ့ဝင် အသစ် အနေဖြင့် ဝင်ရောက် လုပ်ကိုင်နေကြသူများကို အခြေခံ စစ်သင်တန်း ပေးနေပြီး မောတောင်မြို့အဝင် ဘုရားတောင်ရှိ စစ်ကောင်စီက တပ်စွဲထားသည့် နေရာများတွင် ကင်းစောင့်၊ ဂိတ်စောင့်နှင့် ကတုတ်ကျင်းတူးသည့် လုပ်ငန်းများကိုလည်း လုပ်ကိုင်ပေးနေရကြောင်း မြို့ခံများက ဆိုသည်။ ကုန်တင်ကုန်ချ အလုပ်သမားများအား ကုန်တင်ကုန်ချ အလုပ်ကို ဆက်လက် လုပ်ကိုင်လိုပါက အလှည့်ကျ ပြည်သူ့စစ်သင်တန်းကို မဖြစ်မနေ တက်ရောက်ရမည်ဟု ၂၀၂၄ ခုနှစ် နိုဝင်ဘာလကုန်ကလည်း မောတောင်မြို့ ပြည်သူ့စစ်အဖွဲ့က ဖိအားပေးခဲ့ခြင်းမျိုး ရှိခဲ့သေးသည်။ မောတောင်မြို့သည် ထိုင်းနိုင်ငံ၊ ပရာကျွတ်ခရိုင်၊ ပရာကျွတ်မြို့နယ်၊ ဒန်းဆင်းခွန်ကျေးရွာရှိ ဆင်းခွန်နယ်စပ် ဂိတ်နှင့် နှစ်နိုင်ငံ ကုန်သွယ်မှု ပြုလုပ်နေသည့် နယ်စပ်ဂိတ်ရှိရာ မြို့လည်း ဖြစ်သည်။ ဓါတ်ပုံ - မောတောင်မြို့ စစ်ကောင်စီ စစ်ဆေးရေးဂိတ် (ပုံဟောင်း)

ပြည်သူ့စစ် ဝင်ရောက်ရန် မက်လုံးပေး ခေါ်ယူ

Jan 13

စစ်ကောင်စီနှင့် DPLF. အကြား တိုက်ပွဲ ပြင်းထန်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၃ ရက်။ ရှမ်းပြည်တောင်ပိုင်း၊ ရပ်စောက်မြို့နယ်အတွင်း တိုက်ပွဲများ ဆက်လက်ပြင်းထန်နေပြီး ထောင်ချီသော ဒေသခံများ တိမ်းရှောင် နေကြရသည်။ ရပ်စောက်မြို့နယ်၊ ကျောက်ဂူဒေသ အနီးတစ်ဝိုက်တွင် ဓနုပြည်သူ့ လွတ်မြောက်ရေးတပ်ဦး (DPLF)နှင့် စစ်ကောင်စီတပ်တို့ကြား တိုက်ပွဲဆက်လက်ပြင်းထန်လျက် ရှိသည်ဟု မြေပြင်အရင်းအမြစ်များက ပြောသည်။ DPLF စစ်ဖက်ဆိုင်ရာ ပြောရေးဆိုခွင့်ရှိသူ ကိုအမောင်က “အင်အားဖြည့်တင်းတာတွေ၊ လက်နက်ကြီး ပစ်ခတ် တာတွေ ရှိတယ်ဆိုတော့ ကျနော်ထင်တယ် ဒီလမ်းကြောင်းပိတ်တဲ့ ကိစ္စလည်းသူတို့ မဲတာဖြစ်မယ်ပေါ့။ ပြီးတော့မှ ကျနော်တို့ အလစ်ငိုက် ဝင်တိုက်တဲ့အချိန်သူတို့ ခံရတာကြောင့်လည်း ပါမှာပေါ့လေ၊ အဲလိုမျိုး ယူဆ လို့ ရပါတယ်” ဟု ပြောသည်။ ကျောက်ဂူဒေသ အနီးတစ်ဝိုက်တွင် ဒီဇင်ဘာလ ၉ ရက်နေ့ကတည်းကစ၍ တိုက်ပွဲဖြစ်ပွားနေခြင်း ဖြစ်ပြီး စစ်ကောင်စီက လက်နက်ကြီး ပစ်ခတ်မှုအပြင် လေကြောင်းမှလည်း တိုက်ခိုက်လာသဖြင့် ဒေသခံ အယောက် ၃,၅၀၀ ခန့် ဘေးလွှတ်ရာကို တိမ်းရှောင်နေကြရသည်။ စစ်ကောင်စီတပ်များမှာ ကျောက်ဂူဒေသအခြေစိုက် အမတ (၃၄၉) မှ အခြေစိုက် ပစ်ခတ်နေခြင်းဖြစ်ပြီး ကျောက်ဂူ၊ ပယင်းကုန်း၊ ထမင်းပေါင်း စသည့်ကျေးရွာများမှ ဒေသခံများမှာ တိမ်းရှောင်နေကြရသည်။ ကျောက်ဂူဒေသတွင် ဖြစ်ပွားနေသည့် တိုက်ပွဲများအတွင်း စစ်ကောင်စီဖက်မှ အယောက် ၆၀ ကျော်သေဆုံးခဲ့ပြီး လက်ရှိ တိုက်ပွဲများတွင်လည်း ထိခိုက်ဒဏ်ရာရရှိသူများအား အောင်ပန်း ကုတင် ၇၀၀ စစ်ဆေးရုံတွင် ဆေးကုသပေးနေ သည်ဟု မြေပြင်အရင်းအမြစ်များက ဆိုသည်။ မြေပြင်အခြေအနေအရ စစ်ကောင်စီဖက်မှ အင်အားအလုံးအရင်း ဖြည့်တင်းလျက်ရှိပြီး တိုက်ပွဲများ ပိုပြင်းထန် လာနိုင်သည်ဖြစ်ရာ ဒေသခံများအား အမြန်ဆုံး တိမ်းရှောင်ကြရန် ကိုအမောင်က သတိပေးသည်။ “တိုက်ပွဲအခြေအနေကတော့ စစ်ကောင်စီကလည်း အင်အားဖြည့်တင်းမှုတွေ ရှိတဲ့အတွက် ပိုပြီး ပြင်းထန်လာ နိုင်တဲ့ အခြေအနေ ရှိတာပေါ့လေ။ ဆိုတော့ တိုက်ပွဲဖြစ်ပွားတဲ့ နေရာနဲ့ ဝေးတဲ့နေရာမှာ နေကြဖို့ပေါ့။ ပြီးတော့ စစ်ကောင်စီရဲ့ လေယာဉ်နဲ့ လက်နက်ကြီးတွေကို ရှောင်ရှားနိုင်ဖို့အတွက် လုံခြုံတဲ့နေရာတွေမှာ နေကြဖို့ တိုက် တွန်းချင်ပါတယ်။” ကျောက်ဂူဒေသရှိ စစ်ကောင်စီ၏ အမတ ၃၄၉ အပါအဝင် တောင်ထိပ်နှင့် အင်တောကျေးရွာကြားမှ စစ်ကောင်စီ စခန်းများအား ဇန္နဝါရီလ ၄ ရက်နှင့် ၅ ရက်နေ့များအတွင်း DPLF မှ ဝင်ရောက်တိုက်ခိုက်ခဲ့ရာ စစ်ကောင်စီ ပူးပေါင်းတပ်များ အထိအခိုက် အကျအဆုံး များခဲ့သည်ဟု မြေပြင်အရင်းအမြစ်များက ဆိုသည်။ စစ်ကောင်စီ ပူးပေါင်းတပ်ဖက်မှ ပအိုဝ်းပြည်သူ့စစ် (PNA)နှင့် ရှမ်းပြည်ပြန်လည် ထူထောင်ရေးကောင်စီ/ တပ်မတော် (RCSS/ SSA) တို့မှ ယူနီဖောင်းပြောင်း၍ ပါဝင်တိုက်ခိုက်နေသည်ဟု သတင်းများ ထွက်ပေါ်နေ သော်လည်း သတင်းနှင့် မီဒီယာကွန်ယက် အနေဖြင့် သီးခြားအတည်ပြုနိုင်ရေး စုံစမ်းနေဆဲ ဖြစ်သည်။

စစ်ကောင်စီနှင့် DPLF အကြား တိုက်ပွဲ ပြင်းထန်နေ

Jan 13

ဖားကန့်ကျေးရွာ နှစ်ရွာကို စစ်ကောင်စီ ဗုံးကြဲတိုက်ခိုက်၊ အရပ်သားများ သေဆုံးဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၃ ရက်။ ကချင်ပြည်၊ ဖားကန့်မြို့နယ်ထဲက ကျေးရွာနှစ်ရွာကို စစ်ကောင်စီတပ်က လေကြောင်းမှ ဗုံးကြဲတိုက်ခိုက်ခဲ့ခြင်းကြောင့် အရပ်သား ၁၀ ဦးထက်မနည်း ထိမှန်သေဆုံးခဲ့သည်ဟု ဒေသခံများက ပြောသည်။ ဖားကန့်မြို့နယ်၊ လုံးခင်းကျေးရွာအုပ်စုထဲက ဆန်ခါကျေးရွာနှင့် မဇွပ်ယန် (မဆွပ်ယန်) ကျေးရွာတို့ကို ဇန္နဝါရီလ ၁၃ ရက်နေ့ (ယနေ့)၊ နံနက်ပိုင်း ၁၀ နာရီကျော် အချိန်ခန့်က လေကြောင်းကနေ ဗုံးကြဲတိုက်ခိုက်ခဲ့ခြင်း ဖြစ်သည်ဟု ဒေသခံများက ပြောသည်။ ဒေသခံ အမျိုးသားတစ်ဦးက “ဒီနေ့ မနက် ၁၀ နာရီကျော် အချိန်လောက်က ဆန်ခါနဲ့ မဇွပ်ယန် (မဆွပ်ယန်) ရွာ နှစ်ရွာကြားလို့လည်း ပြောလို့ရ တယ်၊ အဲ့ဒီရွာနှစ်ရွာလို့လည်း ပြောလို့ရတယ် အဲ့ဒီနေရာတွေကို လေယာဉ်နဲ့ ဗုံး လာကြဲသွားတယ်။ မဇွပ်ယန် မနောကွင်းဘေးမှာ ကျတယ်။ အဲ့ဒီပတ်ပတ်လည်ကို လေကြောင်းနဲ့ ငါးကြိမ် ဗုံး ကြဲတယ်။ ငါးကြိမ်ကြဲပြီး ပြန် သွား၊ နောက်ထပ်တစ်ခေါက်ထပ်လာ၊ ထပ်လာတော့လည်း ငါးကြိမ်ထပ်ကြဲ အဲ့လို လုပ်သွားတယ်ဗျ။ လူတော့ တော်တော်သေသွားတယ်ဗျ” ဟု ပြောသည်။ မြေပြင်တွင် တိုက်ပွဲဖြစ်ပွားနေခြင်းမျိုး လုံးဝမရှိဘဲ လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်ဟု ဒေသခံများက ပြောသည်။ ဆန်ခါကျေးရွာထိပ်နှင့် ကျေးရွာထဲက ကျောက်စိမ်းတူးဖော်သည့် လုပ်ကွက် နေရာများအပြင် မဇွပ်ယန် (မဆွပ်ယန်) ကျေးရွာရှိ စာသင်ကျောင်းနှင့် မနောကွင်းနေရာများတွင် ဗုံးများ ကျရောက်ပေါက်ကွဲခဲ့သည်။ အဆိုပါနေရာများသည် အရပ်သား ပြည်သူများ နေထိုင် သွားလာလှုပ်ရှားနေသည့် နေရာဖြစ်သောကြောင့် ယခုကဲ့သို့ အရပ်သားများ ထိမှန်သေဆုံး ဒဏ်ရာ ရရှိခဲ့ခြင်း ဖြစ်သည်ဟု ဒေသခံများက ပြောသည်။ သေဆုံးသူ ၁၀ ဦးထက်မနည်းရှိနိုင်သည်ဟု ပြောဆိုနေကြသော်လည်း အတိအကျကိုမူ မသိရသေးပေ။ မြေပြင် သတင်းအရင်းအမြစ်များ ပေးပို့လာသော ဓာတ်ပုံနှင့် ရုပ်သံမှတ်တမ်းများအရ သေဆုံးသူများထဲတွင် ရေမဆေးကျောက် ရှာဖွေသူများပါဝင်ပြီး လမ်းသွားလမ်းလာများ သေဆုံးမှု၊ ဒဏ်ရာ ရရှိမှုများ ရှိနေသည်။ မြေပြင်က အခြေအနေကို သွားကြည့်သူ ဒေသခံ အမျိုးသားတစ်ဦးက “အခုလေယာဉ်နဲ့ ဗုံးကြဲတိုက်ခိုက်ခံရတဲ့ နေရာက ထိန်းချုပ်နယ်မြေအားဖြင့် ပြောရရင် KIA တပ်မဟာ ၉ နေရာ လို့ ပြောလို့ရတယ်။ ဒါပေမယ့် KIA တွေတော့ မရှိပါဘူး။ ဒီမနက်လည်း ပြည်သူတွေ အေးအေးဆေးဆေး သွား လာနေချိန်ကြီးလေ၊ ရေမဆေး သမားတွေ သွားနေလာနေချိန်ပါ။ တိုက်ပွဲကလည်း မရှိတော့ လေယာဉ်နဲ့ ဘယ်သူ ဗုံးကြဲမယ်ထင်မလဲ။ ရက်ရက်စက်စက် နှစ်ခါတောင် လာကြဲသွားတာဗျ။ သေတာရော ဒဏ်ရာရတာရော များတယ်။ ဘယ်လောက် ဆိုတာတော့ အတိအကျ မသိရသေးဘူးပေါ့ဗျာ” ဟု ပြောသည်။ မြေပြင်ရှိ လူမှုကူညီရေးအသင်းများ၊ အနီးဝန်းကျင်က ဒေသခံများက အချင်းချင်းကူညီကယ်ဆယ်ရေး လုပ်နေကြပြီး ဆန်ခါကျေးရွာနှင့် မဇွပ်ယန် (မဆွပ်ယန်) ကျေးရွာက ဒေသခံများမှာမူ လေကြောင်းမှ ထပ်မံဗုံးကြဲ လာမည်ကို စိုးရိမ်သောကြောင့် ဘေးလွှတ်ရာသို့ ထွက်ပြေးတိမ်းရှောင်နေကြပြီဟု ဆိုသည်။ အလားတူ ဖားကန့်မြို့နယ်နှင့် နယ်နိမိတ်ချင်းထိစပ်နေသည့် စစ်ကိုင်းတိုင်း၊ ဟုမ္မလင်းမြို့ နယ်ထဲတွင် စစ်ကောင်စီ တပ်၊ ရှမ်းနီ အမျိုးသားများ တပ်မတော် (SNA) ပူးပေါင်းတပ်တို့နှင့် ကချင်လွတ်လပ်ရေး တပ်မတော် KIA၊ ဟုမ္မ လင်း PDF ပူးပေါင်းတပ်တို့ အကြား မြေပြင်၌ တိုက်ပွဲများ ပြင်းထန်နေချိန် ဇန္နဝါရီလ ၇ ရက်နေ့နှင့် ၈ ရက်နေ့ တွင် လေကြောင်းမှ ဗုံးကြဲတိုက်ခိုက်မှုများ ရှိခဲ့သည်ဟု ဒေသခံများက ပြောသည်။

ဖားကန့်ကျေးရွာ နှစ်ရွာကို စစ်ကောင်စီ ဗုံးကြဲတိုက်ခိုက်၊ အရပ်သားများ သေဆုံးဒဏ်ရာရ

Jan 11

လွိုင်ကော်တွင် လက်နက်ကြီးကြောင့် ကလေးတစ်ဦး သေဆုံး

လွိုင်ကော်တွင် လက်နက်ကြီးကြောင့် ကလေးတစ်ဦး သေဆုံး

« Prev 1 … 182 183 184 185 186 … 1,048 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ