NMG Doh – Page 57 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Apr 8

ပအိုဝ်း ပြည်သူစစ် အဖွဲ့က မြေယာများသိမ်းဆည်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်အတွင်းရှိ ပအိုဝ်းတောင်သူများ၏ မြေယာဧက သောင်းချီ အဓမ္မသိမ်းဆည်းခံရပြီး စိုက်ပျိုး၍မရသည့် မြေကွက်ငယ်များဖြင့် အစားထိုးခံနေရ သည်။ ပအိုဝ်းတိုင်းရင်းသား တောင်သူများ ပိုင်ဆိုင်သည့် မြေယာဧက တစ်သောင်းရှစ်ထောင်ကျော်ကို စစ်ကော်မရှင်နှင့် လက်အောက်ခံ ပအိုဝ်းပြည်သူ့စစ် (PNA) အဖွဲ့က မြို့ပြစီမံကိန်းအကြောင်းပြကာ အဓမ္မ သိမ်းယူနေပြီး၊ အစား ပြန်ပေးသည့် မြေကွက်ငယ်များမှာ တောင်သူများအတွက် အသက်မွေးဝမ်းကျောင်းပြုရန်ပင် လုံးဝမလုံလောက် ကြောင်း ဒေသခံများက ပြောသည်။ ဟိုပုံးမြို့နယ်၊ ညောင်ဗက်ကျေးရွာရှိ တောင်သူများပိုင်ဆိုင်သော မြေဧက ၁၄,၀၀၀ ကျော်အပါအဝင် မြို့နယ် အတွင်းရှိ မြေယာများကို PNA နှင့် မြေပွဲစားများ ပူးပေါင်းကာ သိမ်းယူနေခြင်းဖြစ်ပြီး၊ အစားပြန်ပေးသည့် ပေ ၂၀ - ၄၀ ခန့်သာရှိသော မြေကွက်ငယ်များကိုပင် ငွေကျပ်သိန်း ၅၀ ဖြင့် ပြန်လည်ရောင်းချနေသည်ဟု ဆိုသည်။ ဒေသခံတောင်သူတစ်ဦးက “ပအိုဝ်းပြည်သူတွေအနေနဲ့ ယာမြေ ပေ ၂၀ - ၅၀ ဆိုတာက အသက်မွေးဝမ်း ကျောင်း ပြုလို့ မရပါဘူး။ ပအိုဝ်းပြည်သူတွေအနေနဲ့ ကိုယ့်ရဲ့အသက်မွေးဝမ်းကျောင်းပြုဖို့အတွက်က လယ် ယာတွေ၊ တောင်ယာတွေရှိဖို့ လိုပါတယ်။ ဒါကြောင့်ပဲ ပအိုဝ်းပြည်သူတွေရဲ့ မြေကို ဒီလိုမျိုး သိမ်းဆည်းနေတာ ဟာ ပြည်သူလူထုရဲ့ ဘဝကို သတ်ဖြတ်လိုက်တာနဲ့ အတူတူပဲလို့ ကျနော် ပြောချင်ပါတယ်” ဟု ပြောသည်။ အဆိုပါမြေယာများကို ပြီးခဲ့သည့် မတ်လ ၃၀ ရက်နေ့တွင် PNA အဖွဲ့၊ ထွေအုပ်နှင့် မြေပွဲစားများ ရောက်ရှိလာ ပြီး အဓမ္မသိမ်းယူခဲ့ခြင်းဖြစ်သည်။ ထိုသို့သိမ်းယူစဉ် ဒေသခံများနှင့် PNA အဖွဲ့တို့အကြား ရုန်းရင်းဆန်ခတ် ဖြစ်ပွားခဲ့ရာ ဒေသခံ ၁၀ ဦးကို ဟိုပုံး ရဲစခန်း၌ ဖမ်းဆီးထိန်းသိမ်းခဲ့သည်။ ထို့နောက် ဧပြီလ ၆ ရက်နေ့၊ မွန်းလွဲပိုင်းတွင် ဖမ်းဆီးခံထားရသူများအနက် အမျိုးသား ၆ ဦးကို ပြန်လည် လွှတ်ပေးခဲ့သော်လည်း ၎င်းတို့မှာ ရိုက်နှက်နှိပ်စက်ခံထားရသည့် ဒဏ်ရာများ ရရှိထားကြောင်း နီးစပ်သူများက ပြောသည်။ နီးစပ်သူတစ်ဦးက “လွတ်လာတဲ့ ခြောက်ဦးကတော့ အကုန်လုံး အမျိုးသားတွေချည်းပါပဲ။ ဒဏ်ရာတွေတော့ ရထားကြတယ်၊ ရိုက်နှက်နှိပ်စက်ခံရတယ်လို့ သိရပါတယ်။ ကျန်တဲ့ လေးဦးကတော့ အမျိုးသမီး နှစ်ဦး၊ ရွာသူကြီးနဲ့ နောက်တစ်ဦး ကျန်နေသေးတယ်” ဟု ပြောသည်။ လက်ရှိတွင် ဖမ်းဆီးခံထားရသူများနှင့် ကျေးရွာရှိ အိမ်ထောင်စု ၆၆ စုကို ရွာမှ ပြောင်းရွှေ့ပေးမည်ဖြစ်ကြောင်း ခံဝန်ကတိလက်မှတ် ရေးထိုးခိုင်းထားကြောင်းလည်း ဆိုသည်။ ညောင်ဗက်ကျေးရွာရှိ မြေယာများကို ၁၉၉၂ ခုနှစ်ကတည်းက တပ်မတော်နည်းပညာ တက္ကသိုလ်နှင့် စစ်ဘက် ဆိုင်ရာ တပ်ရင်းများ တည်ဆောက်ရန် လျော်ကြေးမပေးဘဲ သိမ်းဆည်းခဲ့ခြင်းဖြစ်သည်။ ၂၀၁၅ ခုနှစ်တွင် အရပ်သားအစိုးရလက်ထက်၌ ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ထံ ပြန်လည် လွှဲပြောင်းပေးခဲ့သော်လည်း ယခုအခါ စစ်ကော်မရှင် အဖွဲ့ဝင် ခွန်စံလွင်နှင့် PNO/PNA ခေါင်းဆောင်များက မြို့ပြစီမံကိန်းအကြောင်းပြကာ မြေပွဲစားများနှင့် ပူးပေါင်း၍ အကွက်ရိုက် ရောင်းစားနေခြင်းဖြစ်ကြောင်း ဒေသခံများက ပြောသည်။ တောင်သူများအနေဖြင့် ယခင်က တစ်ဦးလျှင် အနည်းဆုံး ၂ ဧကခန့် ပိုင်ဆိုင်ကြပြီး စိုက်ပျိုးရေး လုပ်ငန်းဖြင့် အသက်မွေးခဲ့ကြသော်လည်း ယခုအခါ စိုက်ပျိုး၍မရသည့် မြေကွက်ငယ်များဖြင့် အစားထိုးခံရကာ ဘဝ ရပ်တည်ရေးအတွက် အခက်အခဲများနှင့် ရင်ဆိုင်နေရသည်ဟု ပြောသည်။ #PNA #PNO #ပအိုဝ်းပြည်သူ့စစ် #ဟိုပုံးမြို့နယ် #ညောင်ဗက်ကျေးရွာ

ပအိုဝ်း ပြည်သူစစ် အဖွဲ့က မြေယာများသိမ်းဆည်း

Apr 8

ရွှေဘို အနောက်ခြမ်း ဗုံးကြဲမှု ဆရာတော်တစ်ပါးနှင့် အမျိုးသမီး တစ်ဦးသေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ စစ်ကိုင်းတိုင်းဒေသကြီး၊ ရွှေဘိုမြို့နယ်အနောက်ခြမ်းရှိ စစ်ရှောင်စာသင်ကျောင်းကို စစ်ကော်မရှင်တပ်က လေကြောင်းမှ ဗုံးကြဲခဲ့ရာ ဆရာတော်တစ်ပါးနှင့် အမျိုးသမီးတစ်ဦး သေဆုံးခဲ့သည်။ ရွှေဘိုတွင် စစ်ဘေးရှောင်ကလေးငယ်များ ပညာသင်ကြားနေသည့် ဘုန်းတော်ကြီးကျောင်းနှင့် စစ်ရှောင်စခန်းကို စစ်ကော်မရှင်က လေကြောင်းမှ ပစ်မှတ်ထား တိုက်ခိုက်ခဲ့သဖြင့် ဆရာတော်တစ်ပါး ပျံလွန်တော်မူပြီး အမျိုးသမီးတစ်ဦး သေဆုံးသွားကြောင်း ဒေသခံများက ပြောသည်။ ရွှေဘိုမြို့နယ်၊ ဆင်အင်းကျေးရွာရှိ စစ်ရှောင်စာသင်ကျောင်းနေရာသို့ စစ်ကော်မရှင်က ဧပြီလ ၆ ရက်နေ့၊ နံနက်ပိုင်းတွင် ဂျက်ဖိုက်တာ တိုက်လေယာဉ်နှစ်စီးဖြင့် ခြောက်ကြိမ်ထက်မနည်း လာရောက် ဗုံးကြဲခဲ့ခြင်း ဖြစ်သည်။ ထိုသို့ ဗုံးကြဲချိန်တွင် တိုက်ပွဲဖြစ်ပွားနေခြင်းမျိုး မရှိဘဲ စစ်ရှောင်စခန်းကိုသာ တမင်ပစ်မှတ်ထားခြင်းဖြစ်သည်ဟု ဒေသခံများက ဆိုသည်။ မြေပြင်သတင်းရင်းမြစ်က “ကလေးတွေ စာသင်နေတဲ့ ဘုန်းကြီးကျောင်းကို ဂျက်ဖိုက်တာနှစ်စီးနဲ့ တစ်လှည့်စီ ပတ်ပြီး ဗုံးကြဲသွားတာဗျ။ ဗုံးကြဲရုံတင်မကဘူး၊ စက်သေနတ်တွေနဲ့ပါ ဝဲပြီး ပစ်သေးတာ။ ကျောင်းထဲက ဆရာတော်ကတော့ နေရာတင် ပျံလွန်တော်မူတယ်။ ဒကာမကြီးတစ်ယောက်လည်း ခြေထောက်ပြတ်ပြီး အဲ့ဒီ ဒဏ်ရာနဲ့ပဲ သေသွားရရှာတယ်” ဟု ပြောသည်။ အဆိုပါ တိုက်ခိုက်မှုကြောင့် ကျောင်း၌ သတင်းသုံးနေသည့် သက်တော် (၅၀) ကျော်အရွယ် ဆရာတော်မှာ နေရာ၌ပင် ပျံလွန်တော်မူခဲ့ပြီး၊ အသက် (၆၀) ခန့်ရှိ အမျိုးသမီးကြီးတစ်ဦးမှာလည်း ခြေထောက်ပြတ်တောက် သည့် ဒဏ်ရာဖြင့် သေဆုံးသွားခဲ့ခြင်းဖြစ်သည်။ ထို့အပြင် အခြားစစ်ဘေးရှောင် ၃ ဦးလည်း ဒဏ်ရာအပြင်းအထန် ရရှိထားသဖြင့် အရေးပေါ် ဆေးကုသမှု ခံယူနေရသည်။ ဒေသခံတစ်ဦးကလည်း “ကျနော်တို့မှာ ဘာတိုက်ပွဲမှလည်း မရှိဘဲနဲ့ လေယာဉ် ဗုံးဒဏ်ကို ခံလိုက်ရတာ။ ကျောင်းဆောင်တွေလည်း မြေစာပုံဖြစ်ကုန်ပြီ။ ကလေးတွေ ပညာသင်နေတဲ့ နေရာတွေကိုမှ ပစ်မှတ်ထား တာကတော့ လူမဆန်တဲ့ လုပ်ရပ်လို့ပဲ ပြောရမှာပဲဗျ” ဟု ပြောသည်။ စစ်ကော်မရှင်၏ စက်သေနတ်ဖြင့် ပစ်ခတ်မှုနှင့် ဗုံးဒဏ်ကြောင့် စာသင်ကျောင်းဆောင်နှင့် ဘုန်းကြီးကျောင်း အတွင်းရှိ အဆောက်အအုံများစွာ ပြိုကျပျက်စီးခဲ့ရသည်။ ဆင်အင်းကျေးရွာသည် ဧပြီလ ၃ ရက်နေ့ကလည်း လေကြောင်းတိုက်ခိုက်မှု ခံခဲ့ရသဖြင့် လူ ၇ ဦး ဒဏ်ရာရ ရှိခဲ့ဖူးပြီး ယခုအခါ အရပ်သားသေဆုံးမှုပါ ရှိလာခြင်း ဖြစ်သည်။ လက်ရှိတွင် ရွှေဘိုမြို့နယ် အနောက်ခြမ်းရှိ ကျေးရွာများမှာ စစ်ကော်မရှင်၏ လေကြောင်းရန်ကို အမြဲတစေ စိုးရိမ်နေကြရပြီး၊ စစ်ရှောင်များမှာလည်း ဘေးလွတ်ရာသို့ ထပ်မံ တိမ်းရှောင်နေကြရသည်။ #ရွှေဘိုမြို့နယ် #ဆင်အင်းရွာ #စစ်ကိုင်းတိုင်း

ရွှေဘို အနောက်ခြမ်း ဗုံးကြဲမှု ဆရာတော်တစ်ပါးနှင့် အမျိုးသမီး တစ်ဦးသေဆုံး

Apr 8

ဧရာဝတီတိုင်းဒေသကြီး ဝန်ကြီးချုပ် သစ်ကို တိုင်းလွှတ်တော် အတည်ပြု သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ ဧရာဝတီတိုင်းဒေသကြီး၏ ဝန်ကြီးချုပ်သစ်အဖြစ် မြေယာ သိမ်းဆည်းမှုများဖြင့် လူသိများသူ အငြိမ်းစား တိုင်းအထွေထွေ အုပ်ချုပ်ရေးဦးစီးဌာန ညွှန်ကြား ရေးမှူး ဦးအေးကျော်ကို တိုင်းလွှတ်တော်က ကန့်ကွက်သူမရှိ အတည်ပြုခန့်အပ်လိုက်သည်ဟု လွှတ်တော် ကိုယ်စားလှယ် အချို့က ပြောသည်။ ၂၀၂၅ ခုနှစ် အတုအယောင် ရွေးကောက်ပွဲတွင် ပုသိမ်မြို့နယ် အမှတ် (၁) တိုင်းဒေသကြီး လွှတ်တော် ကိုယ်စား လှယ် အဖြစ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) မှ ဝင်ရောက်အရွေးခံခဲ့သူ ဦးအေးကျော်ကို နိုင်ငံတော်သမ္မတအဖြစ် ရွေးချယ်ခံရသူ ဗိုလ်ချုပ်မှူးကြီး မင်းအောင်လှိုင်က ဝန်ကြီးချုပ်အဖြစ် အမည်စာရင်း တင်သွင်းခဲ့ခြင်းဖြစ်ပြီး၊ ဧပြီလ ၆ ရက်နေ့တွင် တိုင်းလွှတ်တော်က အတည်ပြုခဲ့ခြင်းဖြစ်သည်။ ဦးအေးကျော်သည် ယခင်ဝန်ကြီးချုပ် ဦးသိန်းအောင်လက်ထက်တွင် တိုင်းအထွေထွေအတွင်းရေးမှူး (တိုင်းမင်း ကြီး) အဖြစ် ၆ နှစ်ခန့် တာဝန်ထမ်းဆောင်ခဲ့သူဖြစ်ပြီး၊ ၎င်း၏ အုပ်ချုပ်ရေးသက်တမ်းအတွင်း မြေယာ သိမ်းဆည်းမှုဆိုင်ရာ စွပ်စွဲချက်များ ရှိနေသူလည်းဖြစ်သည်။ ဂေါ်ရန်ဂျီကျွန်းဒေသခံ အသက် ၇၀ ကျော်အရွယ် အမျိုးသားတစ်ဦးက “ဝန်ကြီးချုပ် ဦးသိန်းအောင် လက်ထက် က ထွေအုပ်မင်းကြီးလုပ်ခဲ့သူပေါ့။ ကမ်းခြေဒေသက မြေတွေကို ခြိမ်းခြောက်ပြီးသိမ်းတယ်၊ သားသမီးတွေကို အလုပ်ပေးမယ်လို့ မြူဆွယ်ပြီး မဖြစ်စလောက် ငွေကြေးနဲ့ဝယ်တယ်။ နည်းမျိုးစုံသုံးပြီး အာဏာနဲ့ အနိုင်ကျင့် ခဲ့သူပါ" ဟု ပြောသည်။ ထို့ပြင် ဦးအေးကျော်သည် တိုင်းအထွေထွေ အတွင်းရေးမှူးအဖြစ် တာဝန်ယူစဉ်က တိုင်းအတွင်းရှိ စီးပွားရေး လုပ်ငန်းရှင်ကြီးများနှင့် နီးကပ်သော ဆက်ဆံရေးရှိခဲ့ပြီး၊ လာဒ်ပေးလာဒ်ယူကိစ္စများဖြင့် ကြီးပွားချမ်းသာလာသူ ဖြစ်ကြောင်း ပုသိမ်မြို့ရှိ စီးပွားရေးအသိုင်းအဝိုင်းတွင် သတင်းများထွက်ပေါ်နေသည်။ ယခု ဝန်ကြီးချုပ်ရွေးချယ်မှု လုပ်ငန်းစဉ်တွင် စစ်ကော်မရှင်လက်ထက် တိုင်းဝန်ကြီးချုပ်ဟောင်း ဦးတင်မောင် ဝင်းနှင့် ဦးအေးကျော်တို့ နှစ်ဦးအကြား အပြိုင်အဆိုင်ဖြစ်ခဲ့ပြီး စီးပွားရေးလုပ်ငန်းရှင်များက မိမိတို့ နှင့် အဆင် ပြေမည့်သူ အနိုင်ရရှိရေးအတွက် နေပြည်တော်အထိ သွားရောက်ကာ အပြိုင်အဆိုင် ကြိုးပမ်းမှုများ ရှိခဲ့ကြောင်း ကြံ့ခိုင်ရေးပါတီနှင့် နီးစပ်သူများ၏ ပြောပြချက်အရ သိရသည်။ တိုင်းအစိုးရအဖွဲ့ရုံးမှ ဝန်ထမ်းတစ်ဦးက ဦးတင်မောင်ဝင်းနှင့် ဦးအေးကျော်တို့၏ ကွာခြားချက်ကို “ဦးတင်မောင် ဝင်းကို ဝန်ထမ်းတွေက သိပ်မနှစ်သက်ကြဘူး။ ဖိနှိပ်တယ်၊ အထက်စီးဆန်တယ်၊ သူ့အတွက်ပဲကြည့်ပြီး အောက် ခြေ ဝန်ထမ်းတွေကို ငဲ့ကြည့်လေ့မရှိဘူး” ဟု ပြောသည်။ ဦးအေးကျော်နှင့် ရင်းနှီးသည့် အရာရှိဟောင်းတစ်ဦး၏ သုံးသပ်ချက်အရ ဦးအေးကျော်သည် စစ်တပ်မှ အသွင်ပြောင်းလာသူ ဖြစ်သော်လည်း ဦးတင်မောင်ဝင်းထက် ပိုမိုပျော့ပြောင်းကာ အထက်အောက် ဆက်ဆံရေး ပြေပြစ်သူဖြစ်ကြောင်း၊ အထူးသဖြင့် စီးပွားရေးလုပ်ငန်းရှင်များနှင့် ချောမွေ့သော ဆက်ဆံရေးရှိသူဖြစ်ကြောင်း ဆိုသည်။ သို့သော်လည်း ဝန်ကြီးချုပ်သစ် အပေါ် နိုင်ငံရေးလောက၏ အမြင်မှာမူ အကောင်းမြင်မှု နည်းပါးနေသည်။ ၈၈ မျိုးဆက် နိုင်ငံရေးသမားတစ်ဦးက “ဘယ်သူဖြစ်ဖြစ် အတူနဲ့အနူနူတွေချည်းပဲ၊ ကောင်းဖို့ဆိုတာမရှိဘူး။ ဒီယုန်မြင်လို့ ဒီခြုံထွင်ထားတာ၊ သူ့ထက်သူ လူစွမ်းကောင်းတွေပဲ ပေါ်လာမှာ။ နောက်ဘုန်းကြီးက နှစ်ချက် ပိုခေါက်ကြဦးမှာပေါ့” ဟု ပြောသည်။ လက်ရှိ ဧရာဝတီတိုင်းဒေသကြီး လွှတ်တော်တွင် စုစုပေါင်း ကိုယ်စားလှယ် ၇၂ ဦးရှိရာ USDP ပါတီမှ ၃၇ ဦးဖြင့် အများစုနေရာယူထားပြီး၊ တပ်မတော်သား ကိုယ်စားလှယ် ၁၈ ဦး၊ တိုင်းရင်းသား စည်းလုံးညီညွတ်ရေး ပါတီမှ ၇ ဦး၊ ပြည်သူ့ပါတီမှ ၃ ဦး၊ ပြည်သူ့ရှေ့ဆောင်ပါတီမှ ၃ ဦး၊ ကရင်ပြည်သူ့ပါတီမှ ၃ ဦးနှင့် မြန်မာနိုင်ငံ တောင်သူ လယ်သမား ဖွံ့ဖြိုးတိုးတက်ရေး ပါတီမှ ၁ ဦးတို့ ပါဝင်ဖွဲ့စည်းထားသည်။ ဝန်ကြီးချုပ်သစ် ဦးအေးကျော်အနေဖြင့် အတိတ်က မြေယာအငြင်းပွားမှုများနှင့် လာဒ်ပေးလာဒ်ယူ စွပ်စွဲချက် များကို မည်သို့ဖြေရှင်းပြီး၊ ဒေသတွင်း စီးပွားရေးနှင့် အုပ်ချုပ်ရေးယန္တရားကို မည်သို့ ကိုင်တွယ်သွားမည် နည်း ဆိုသည်မှာ စောင့်ကြည့်ရမည့်အချက် ဖြစ်နေသည်။ #ဧရာဝတီတိုင်း #USDP

ဧရာဝတီတိုင်းဒေသကြီး ဝန်ကြီးချုပ် သစ်ကို တိုင်းလွှတ်တော် အတည်ပြု

Apr 7

ကသာမြို့ထဲသို့ ပြန်မဝင်ကြသေးရန် တော်လှန်ရေး တပ်ဖွဲ့များ သတိပေး သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဧပြီလ ၆ ရက်။ စစ်ကိုင်းတိုင်းဒေသကြီး၊ ကသာမြို့ကို ပြန်လည်ထိန်းချုပ်နိုင်ပြီဟု စစ်ကော်မရှင်က ဝါဒဖြန့်နေသော်လည်း တိုက်ပွဲများ အချိန်မရွေးပြန်ဖြစ်လာနိုင်၍ မြို့ထဲပြန်မဝင်သေးရန် တော်လှန်ရေးအင်အားစုများ သတိပေးထားသည်။ စစ်ကော်မရှင်ဘက်က ကသာမြို့ကို ပြန်လည်ထိန်းချုပ်နိုင်ပြီဟု ဝါဒဖြန့်ကာ ဒေသခံပြည်သူများကို မြို့အတွင်း ပြန်လည်ဝင်ရောက်ရန် ဖိအားပေးနေသော်လည်း မြေပြင်တွင် လေကြောင်းတိုက်ခိုက်မှုများ ဆက်ရှိနေဆဲဖြစ်ပြီး တိုက်ပွဲများ အချိန်မရွေး ပြန်လည်ပေါက်ကွဲလာနိုင်သည့် အခြေအနေမျိုးတွင် ရှိနေသည်။ ကသာမြို့တွင် ပြီးခဲ့သည့် မတ်လ ၂၀ ရက်နေ့မှ စတင်ကာ စစ်ကော်မရှင်တပ်များနှင့် KIA၊ PDF ပူးပေါင်းတပ်ဖွဲ့တို့ ကြား တိုက်ပွဲများ အပြင်းအထန် ဖြစ်ပွားခဲ့ခြင်းဖြစ်သည်။ စစ်ကော်မရှင်ဘက်က ဂျက်ဖိုက်တာများ၊ Y-12 လေယာဉ်များ အသုံးပြုကာ တစ်ပတ်ကျော်ကြာ အဆက်မပြတ် ဗုံးကြဲတိုက်ခိုက်ခဲ့ရာ မတ်လ ၂၀ ရက်နေ့က ရပ်ကွက် (၃) ရှိ လေးထပ်ဘုန်းကြီးကျောင်း ဗုံးကြဲခံရမှုကြောင့် သံဃာတော်များနှင့် စစ်ဘေးရှောင်ပြည်သူ ၈၀ ကျော် သေဆုံးခဲ့ရသည့် ဖြစ်စဉ်များ ရှိခဲ့သည်။ ထိုကဲ့သို့ လေကြောင်းမှ အပြင်းအထန် တိုက်ခိုက်ပြီးနောက် မတ်လ ၃၀ ရက်နေ့တွင် မြို့ကို ပြန်လည် ထိန်းချုပ် နိုင်ပြီဟု စစ်ကော်မရှင်တပ်က ကြေညာခဲ့သော်လည်း မြို့၏ သုံးပုံတစ်ပုံကျော်မှာ မီးလောင်ပျက်စီးနေပြီး စစ်ရေး တင်းမာမှုများမှာ လျော့ပါးသွားခြင်း မရှိသေးပေ။ ကသာတော်လှန်ရေးတပ်ဖွဲ့ဝင် တစ်ဦးက “စစ်ကောင်စီဘက်ကတော့ သူတို့က ထိန်းချုပ်လိုက်ပြီ၊ ပြန်လာလို့ ရပြီ ဆိုပြီး ဝါဒဖြန့်နေပေမဲ့ အန္တရာယ် အရမ်းများပါတယ်။ ပြည်သူတွေကို မြို့ထဲမဝင်ကြပါနဲ့ဦးလို့ ကျနော် ပြောချင်ပါတယ်။ ဒါဟာ တိုက်ပွဲက ပြီးသွားတာ မဟုတ်ပါဘူး၊ ဒီတိုက်ပွဲက ပြန်ဖြစ်မှာပါ။ ကျနော်တို့ တော် လှန်ရေးဘက်ကလည်း အရှုံးပေးလို့မရဘူး၊ မနိုင်နိုင်အောင် တိုက်ရမှာပါ။ ဒါဟာ စစ်ရေးအရ ခဏတာ အနည်း ငယ် နောက်ဆုတ်ပေးတဲ့ သဘောပါပဲ၊ အပြီးအပိုင် ထွက်ခွာသွားတာ မဟုတ်ပါဘူး" ဟု မြေပြင်အခြေအနေကို ပြောသည်။ လက်ရှိတွင် တိုက်ပွဲများ ခေတ္တငြိမ်သက်နေသော်လည်း စစ်ကော်မရှင်ဘက်က လေကြောင်းနှင့် လက်နက်ကြီး ပစ်ခတ်မှုများကို နေ့စဉ်လုပ်ဆောင်နေသဖြင့် အရပ်သားထိခိုက်မှုများ ဆက်ရှိနေဆဲဖြစ်သည်။ ကသာမြို့ရှိ ရပ်ကွက် ၁၁ ခုအနက် မြို့ပေါ်ရပ်ကွက်များထဲက ဆေးရုံ၊ နေအိမ်နှင့် ဘုန်းကြီးကျောင်းများမှာလည်း ဗုံးကြဲမှုကြောင့် ပျက်စီးမှု အများအပြား ရှိနေသည်။ တော်လှန်ရေးတပ်ဖွဲ့ဝင်တစ်ဦးကပင် ဆက်လက်၍ “စစ်ကောင်စီဘက်က သူတို့ ပြန်လာလို့ရပြီလို့ ဝါဒဖြန့်သော် လည်း ဒါတွေကို မယုံနဲ့ပေါ့နော်။ တကယ့်မြေပြင်မှာ ဖြစ်နေတဲ့ အတိုင်းအတာတွေက အန္တရာယ် အရမ်းများ ပါတယ်။ ပြန်ဖို့ မလွယ်ပါဘူး။ တချို့လူတွေက ဝါဒမိုင်းတွေ မိနေတယ်၊ အသိပညာတွေ သိလာအောင် ပြောဖို့ ခက်ပါတယ်။ ကျည်ဆံတွေ၊ ဗုံးတွေ ကိုယ့်နား ရောက်လာမှ သိမယ့်လူတွေအတွက်တော့ ပြောရခက်ပါတယ်ဗျ” ဟု သတိပေးပြောဆိုသည်။ တော်လှန်ရေး အင်အားစုများဘက်ကလည်း အလုံးစုံ ဆုတ်ခွာသွားခြင်းမျိုး မဟုတ်ဘဲ တိုက်ပွဲများ ဆက်လက် ဆင်နွှဲရန် ပြင်ဆင်နေကြသဖြင့် ကသာမြို့၏ အခြေအနေမှာ အချိန်မရွေး ပြန်လည်ပေါက်ကွဲလာနိုင်သည့် စစ်ရေး အရ အလွန်စိုးရိမ်ရသော အနေအထားတွင် ရှိနေခြင်း ဖြစ်သည်။ ဓါတ်ပုံ - ပုံဟောင်း (ကသာစစ်ဘေးရှောင် ပြည်သူများ) #ကသာတိုက်ပွဲ #ကသာစစ်ရှောင် #လေကြောင်းတိုက်ခိုက်မှု

ကသာမြို့ထဲသို့ ပြန်မဝင်ကြသေးရန် တော်လှန်ရေး တပ်ဖွဲ့များ သတိပေး

Apr 7

မြစ်ဆုံ စီမံကိန်း ပြန်လည် စတင်ခြင်းမှာ လူတစ်စု အကျိုးစီးပွားသာဖြစ်ဟု KSHRDN ဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၆ ရက်။ မြစ်ဆုံစီမံကိန်း ပြန်စရန် စစ်ကော်မရှင် ကြိုးပမ်းမှုမှာ လူတစ်စု၏ အကျိုးစီးပွားအတွက် ဒေသခံများကို ခြိမ်းခြောက် ဖိအားပေးနေခြင်း ဖြစ်သည်ဟု ကချင်ပြည်နယ် လူ့အခွင့်အရေး ကာကွယ်စောင့်ရှောက်သူများ ကွန်ရက် (KSHRDN) က ပြောဆိုလိုက်သည်။ နိုင်ငံရေးမတည်ငြိမ်မှုနှင့် စစ်ရေးပဋိပက္ခများ ပြင်းထန်နေချိန်တွင် ဆယ်စုနှစ်တစ်ခုကျော်ကြာ ဆိုင်းငံ့ထားသည့် မြစ်ဆုံရေကာတာစီမံကိန်းကို စစ်ကော်မရှင်က ပြန်လည်စတင်ရန် လုပ်ဆောင်လာခြင်းမှာ ပြည်သူလူထု အကျိုးစီးပွားထက် လူတစ်စုအကျိုးကိုသာ ရှေ့ရှုသည့် လုပ်ရပ်ဖြစ်သဖြင့် (KSHRDN) က ဧပြီလ ၁ ရက်နေ့တွင် ထုတ်ပြန်ပြောဆိုလိုက်ခြင်း ဖြစ်သည်။ ကချင်လူ့အခွင့်အရေး စောင့်ကြည့်ရေးအဖွဲ့ KHRW က တာဝန်ရှိသူ တစ်ဦးက “ဒီလိုမျိုးလက်ရှိ နိုင်ငံရေးပဋိပက္ခ ကို လုံးဝဆွေးနွေးမှုတွေ မလုပ်ဆောင်နိုင်သေးခင်၊ အဖြေရှာမှုတွေ မလုပ်နိုင်သေးခင်မှာ ဘယ်စီးပွားရေး၊ ဘယ် အကြီးစား ဖွံ့ဖြိုးရေး စီမံကိန်းမှ လုပ်ဆောင်ဖို့ မသင့်ဘူးလို့ ကျမအနေနဲ့ မြင်ပါတယ်။ ဒီအပေါ်မှာ ဇွတ်လုပ် သွားမယ်ဆိုရင် ဒီဖွံ့ဖြိုးရေးက လူတစ်စုစာ အတွက်ပဲ အကျိုးပြုတဲ့ ဖွံ့ဖြိုးရေးလုပ်ငန်း ဖြစ်ပါလိမ့်မယ်” ဟု ပြောသည်။ စစ်ကော်မရှင်သည် ၂၀၁၁ ခုနှစ်ကတည်းက လူထုကန့်ကွက်မှုကြောင့် ယာယီဆိုင်းငံ့ထားခဲ့ရသည့် အဆိုပါ စီမံကိန်းကို လက်ရှိအခြေအနေတွင် အခွင့်ကောင်းယူကာ ပြန်လည်အသက်သွင်းရန် ကြိုးပမ်းနေခြင်းဖြစ်သည်။ စီမံကိန်းနယ်မြေအတွင်းရှိ ဒေသခံများကို စည်းရုံးသိမ်းသွင်းခြင်း၊ ခြိမ်းခြောက်ခြင်းနှင့် ကန့်ကွက်မှုမလုပ်ရန် ဖိအားပေးခြင်းများ လုပ်ဆောင်နေသည့်အပေါ် ဒေသခံများက စိုးရိမ်နေကြသည်။ စီမံကိန်းကြောင့် ဂေဟစနစ်နှင့် ယဉ်ကျေးမှုအမွေအနှစ်များ ပျက်စီးဆုံးရှုံးမည့်အရေးအပြင် ငလျင်ကြောပေါ်တွင် တည်ရှိနေသည့် ရေကာတာကြီး၏ ဘေးအန္တရာယ်မှာလည်း ကြီးမားလှသည်။ KHRW တာဝန်ရှိသူက “ကမ္ဘာပေါ်မှာ ဘယ်လောက်ကြီးမား ခိုင်ခံ့ပါတယ်ဆိုတဲ့ ရေကာတာ စီမံကိန်းတွေပဲ ဖြစ်ဖြစ် သဘာဝဘေးအန္တရာယ် ဆိုးဝါးတဲ့အခြေအနေ၊ ငလျင်ကြောမှာ ရှိနေတယ်ဆိုရင်တော့ အင်မတန်မှ ကြောက်ဖွယ်ကောင်းပါတယ်။ ဒီတိုက်ပွဲတွေ ဖြစ်နေတဲ့အချိန်မှာ ဒီလိုမျိုး ရေကာတာစီမံကိန်းတွေကို ဘယ်သူ အာမခံပေးသလဲ။ ဖြစ်သွားလို့ရှိရင် ကျမတို့မှာ ပရိုတက်ရှင် မက်ကင်းနစ်ဇင်တွေ ဘာမှချမှတ်ထားတာ မရှိဘူး။ ကျမတို့ ပြည်သူတွေရဲ့ အသက်လုံခြုံရေးနဲ့ ပတ်သက်ပြီးတော့လည်း ဘာမှ မလုပ်ထားပါဘူး” ဟု ဆက် ပြော သည်။ မြေပြင်တွင် စစ်ကော်မရှင်၏ စည်းရုံးဖိအားပေးမှုများကြောင့်လည်း ဒေသခံများသည် စိုးရိမ်ထိတ်လန့်မှုများ ခံစားနေကြရသည်။ (KSHRDN) ပြောခွင့်ရ ဂျေကော့က “ပြည်သူတွေကို ကြည့်ရင် စိတ်ပိုင်းဆိုင်ရာရော ရုပ်ပိုင်းဆိုင်ရာရော Negative ဘက်က ပိုပြီး ခံစားလာရတဲ့ အခြေအနေရှိပါတယ်။ စစ်ကောင်စီက အမြဲတမ်းလာတွေ့တာမျိုး၊ ဘာမှ ကန့်ကွက်ဆန္ဒမပြဖို့ လာပြောတာမျိုးတွေ ရှိနေတဲ့အတွက် ဒေသခံတွေသာမက ဒီနေရာမှာရှိတဲ့သူ အားလုံးကတော့ စိုးရိမ်ထိတ်လန့်မှုတွေ ပိုခံစားလာရမယ့် အခြေအနေရှိတယ်။ တချို့ဆိုရင် အမြဲတမ်း ကြောက်ရွံ့ပြီး နေရတဲ့ အခြေအနေတွေ ရှိပါတယ်” ဟု ဆက်ပြောသည်။ KSHRDN အနေဖြင့် တရုတ်အစိုးရနှင့် စစ်ကော်မရှင်တို့ အနေဖြင့် ပြည်သူလူထု၏ အသံကို နားထောင်ပေး ရန်နှင့် အန္တရာယ်ကြီးမားသည့် မြစ်ဆုံစီမံကိန်းကို ရပ်တန့်ပေးရန် တောင်းဆိုထားသည်။ သိန်းနှင့်ချီသည့် စစ်ဘေးရှောင်များ ရှိနေသည့် ကချင်ပြည်တွင် ယခုကဲ့သို့ စီမံကိန်းပြန်လည် စတင်ရန် ကြိုးပမ်း မှုသည် အဖွဲ့အစည်းများကြား ယုံကြည်မှုကို ပိုမိုပျက်ပြားစေသည့်အပြင် မလိုလားအပ်သည့် ပဋိပက္ခများကိုပါ မီးစထိုးပေးရာ ရောက်ကြောင်း လူ့အခွင့်အရေးအဖွဲ့များက သတိပေးထားသည်။ #မြစ်ဆုံစီမံကိန်း #KHRW #KSHRDN #မြစ်ဆုံရေကာတာ

မြစ်ဆုံ စီမံကိန်း ပြန်လည် စတင်ခြင်းမှာ လူတစ်စု အကျိုးစီးပွားသာဖြစ်ဟု KSHRDN ဆို

Apr 7

ဗီယက်နမ်တွင် ကွန်မြူနစ်ပါတီ အကြီးအကဲအား သမ္မတ အဖြစ်တင်မြှောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၇ ရက်။ ဗီယက်နမ်နိုင်ငံတွင် ကွန်မြူနစ်ပါတီ အထွေထွေအတွင်းရေးမှူးချုပ် တိုလမ် (To Lam) အား ငါးနှစ်သက်တမ်းရှိ နိုင်ငံတော်သမ္မတအဖြစ် ကန့်ကွက်သူမရှိ တညီတညွတ်တည်း ရွေးကောက်တင်မြှောက်လိုက်သည်။ ဤရွေးကောက်တင်မြှောက်မှုသည် ပြီးခဲ့သည့် ၂၀၂၄ ခုနှစ်အတွင်း အဂတိလိုက်စားမှုစွပ်စွဲချက်များဖြင့် ရာထူးမှနုတ်ထွက်ခဲ့ရသည့် ယခင်သမ္မတဟောင်း ဗိုဗန်သူယောင် (Vo Van Thuong) ၏ နေရာတွင် အစားထိုးလိုက်ခြင်းလည်း ဖြစ်သည်။ ယခုအခါ အသက် ၆၉ နှစ်ရှိပြီဖြစ်သည့် သမ္မတ တိုလမ်သည် ပါတီနှင့် နိုင်ငံတော်အာဏာနှစ်ရပ်လုံးကို ၎င်း၏လက်ဝယ်သို့ စုစည်းလိုက်ခြင်းဖြစ်သည်။ ဤခြေလှမ်းသည် အာဏာကို ခွဲဝေကျင့်သုံးသည့် ဗီယက်နမ်၏ အစဉ်အလာမှ သွေဖည်သွားပြီး အိမ်နီးချင်း တရုတ်နှင့် လာအို နိုင်ငံတို့၏ အာဏာတည်ဆောက်ပုံနှင့် အလားသဏ္ဌာန်တူသွားသည်။ ၎င်းအနေဖြင့် အာဏာကို တစ်စုတစ်စည်းတည်း ရရှိသွားခြင်းကြောင့် နိုင်ငံရေးပြုပြင်ပြောင်းလဲမှုများနှင့် အခြေခံအဆောက်အအုံ စီမံကိန်းကြီးများကို ပိုမိုလျင်မြန်စွာ အကောင်အထည်ဖော်ဆောင်သွားမည်ဟု မိန့်ခွန်းတွင် ထည့်သွင်းပြောကြားခဲ့သည်။ သမ္မတသစ် တိုလမ်၏ ရှေ့တွင် တာဝန်ယူခဲ့သူ ဗိုဗန်သူယောင် မှာ ဗီယက်နမ်နိုင်ငံရေးသမိုင်းတွင် သက်တမ်းအတိုဆုံး သမ္မတတစ်ဦး ဖြစ်ခဲ့သည်။ ဗိုဗန်သူယောင်သည် ၂၀၂၄ ခုနှစ်၊ မတ်လအတွင်း ရာထူးသက်တမ်း တစ်နှစ်ကျော်ခန့်တွင် ရာထူးမှ နုတ်ထွက်ခဲ့ရသည်။ ၎င်းတာဝန်ယူခဲ့ဖူးသည့် ကွမ်းငိုင် (Quang Ngai) ပြည်နယ်မှ အဂတိလိုက်စားမှု အရှုပ်တော်ပုံများနှင့် ဆက်နွှယ်နေပြီး ကွန်မြူနစ်ပါတီ၏ စည်းမျဉ်းစည်းကမ်းများကို ဖောက်ဖျက်ခဲ့သည်ဟူသော စွပ်စွဲချက်များကြောင့် ပါတီ၏ ဖိအားပေးမှုဖြင့် ရာထူးမှ နုတ်ထွက်ခဲ့ခြင်း ဖြစ်သည်။ ယခု သမ္မတသစ်ဖြစ်လာသည့် တိုလမ်သည် ယခင်က ပြည်ထဲရေးဝန်ကြီးအဖြစ် တာဝန်ယူစဉ်အတွင်း အဂတိလိုက်စားမှု တိုက်ဖျက်ရေးစီမံချက်များကို အဓိကဦးဆောင်ခဲ့သူ ဖြစ်သည်။ ယခင်သမ္မတ ဗိုဗန်သူယောင် အပါအဝင် ထိပ်သီးခေါင်းဆောင်များ ရာထူးမှနုတ်ထွက်ခဲ့ရသည့် ဖြစ်စဉ်များတွင် တိုလမ်၏ အခန်းကဏ္ဍသည် အဓိကကျခဲ့သည်။ လက်ရှိတွင် သမ္မတ တိုလမ်သည် အီရန်စစ်ပွဲကြောင့် ဖြစ်ပေါ်လာသော ကမ္ဘာလုံးဆိုင်ရာ စွမ်းအင်အကျပ်အတည်းနှင့် စီးပွားရေးမတည်ငြိမ်မှုများကြားမှ ဗီယက်နမ်၏ နှစ်စဉ်စီးပွားရေးတိုးတက်မှုနှုန်းကို ၁၀ ရာခိုင်နှုန်းအထိ ရောက်ရှိရန် ကြိုးပမ်းဆောင်ရွက်သွားရမည် ဖြစ်သည်။ ထို့အပြင် အမေရိကန်နှင့် တရုတ်နိုင်ငံတို့ကြားရှိ နိုင်ငံခြားရေးမူဝါဒဆိုင်ရာ ဟန်ချက်ညီမှုကို ဆက်လက်ထိန်းသိမ်းသွားရန် စိန်ခေါ်မှုများကို ရင်ဆိုင်ဖြတ်ကျော်ရမည် ဖြစ်သည်။ #ToLam #ဗီယက်နမ်သမ္မတ #VoVanThuong

ဗီယက်နမ်တွင် ကွန်မြူနစ်ပါတီ အကြီးအကဲအား သမ္မတ အဖြစ်တင်မြှောက်

Apr 7

Artemis II အာကာသယာဉ် စံချိန်သစ်တင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၇ ရက်။ လကမ္ဘာသို့ ခရီးနှင်နေသည့် NASA ၏ Artemis II အာကာသယာဉ်သည် ၁၉၇၀ ပြည့်နှစ်က Apollo 13 တင်ခဲ့သည့် အဝေးဆုံးခရီးစဉ် စံချိန်ကို ကျော်ဖြတ်ကာ လူသားတို့ ကမ္ဘာမြေမှ အဝေးဆုံးသို့ ရောက်ရှိသည့် မှတ်တမ်းသစ်ကို ဧပြီလ ၆ ရက်နေ့တွင် တင်နိုင်ခဲ့သည်။ Artemis II သည် ကမ္ဘာမြေမှ ကီလိုမီတာပေါင်း ၄၀၆,၇၈၈ (၂၅၂,၇၆၀ မိုင်) အကွာအဝေးအထိ ရောက်ရှိမည်ဖြစ်ကာ ယခင် Apollo 13 ၏ ၄၀၀,၁၇၁ ကီလိုမီတာ စံချိန်ကို ကျော်လွန်သွားခြင်း ဖြစ်သည်။ အာကာသယာဉ်မှူး ၄ ဦး ပါဝင်သော အဖွဲ့သည် လ၏ တစ်ဖက်ခြမ်းကို ပတ်၍ ပျံသန်းရင်း မျက်နှာပြင်လေ့လာရေးလုပ်ငန်းများကို ၆ နာရီကျော်ကြာ လုပ်ဆောင်မည်ဖြစ်သည်။ အဖွဲ့ခေါင်းဆောင် Reid Wiseman နှင့်အတူ အဖွဲ့ဝင်များအဖြစ် ပထမဆုံးသော လူမည်းအာကာသယာဉ်မှူး၊ ပထမဆုံး အမျိုးသမီး အာကာသယာဉ်မှူးနှင့် ပထမဆုံးသော ကနေဒါနိုင်ငံသား အာကာသယာဉ်မှူးတို့ ပါဝင်ပြီး ယခုခရီးစဉ်သည် ၂၀၂၇ နှင့် ၂၀၂၈ ခုနှစ်တို့တွင် ပြုလုပ်မည့် လပေါ်ခြေချရေး ခရီးစဉ်များအတွက် အဓိကပြင်ဆင်မှုများ လုပ်ဆောင်ရန် ဖြစ်သည်ဟု နာဆာက ဆိုသည်။ #ArtemisII #NASA

Artemis II အာကာသယာဉ် စံချိန်သစ်တင်

Apr 7

မြောက်ကိုရီးယား နိုင်ငံခြားရေးမူဝါဒ ပြောင်းလဲမည့် အလားအလာတွေ့ရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၇ ရက်။ မြောက်ကိုရီးယားနိုင်ငံသည် အမေရိကန်နှင့် သံတမန်ရေးရာ ပြန်လည်စတင်နိုင်ရန်အတွက် ၎င်း၏ ကာလရှည်မဟာမိတ် အီရန်နိုင်ငံနှင့် ဆက်ဆံရေးကို သိသိသာသာ လျှော့ချလာကြောင်း တောင်ကိုရီးယား အမျိုးသားထောက်လှမ်းရေးအဖွဲ့ (NIS) က ထုတ်ဖော်ပြောကြားခဲ့သည်။ ဖေဖော်ဝါရီလကုန်ပိုင်းတွင် အီရန်စစ်ပွဲ စတင်ခဲ့သော်လည်း မြောက်ကိုရီးယားသည် အီရန်သို့ လက်နက်နှင့် စစ်ဘက်နည်းပညာများ ပံ့ပိုးပေးနေသည့် အထောက်အထား မရှိတော့ကြောင်း NIS က ဆိုသည်။ ထို့ပြင် အီရန်ခေါင်းဆောင်ကြီး အယာတိုလာ ခါမေနီ ကွယ်လွန်မှုနှင့် ၎င်း၏သားဖြစ်သူ မိုဂျတာဘာ ခါမေနီ ခေါင်းဆောင်သစ်ဖြစ်လာမှုတို့အပေါ် ဝမ်းနည်းကြောင်း သို့မဟုတ် ဂုဏ်ပြုကြောင်း သတင်းစကားများ ပေးပို့ခြင်းမရှိဘဲ ခပ်ခွာခွာနေထိုင်သည့် ပုံစံကို ပြသနေသည်။ ပြည်တွင်းရေးရာတွင်လည်း ခေါင်းဆောင် ကင်မ်ဂျုံအန်၏ သမီးဖြစ်သူ ကင်မ်ဂျူအေးသည် အရိုက်အရာဆက်ခံမည့်သူ ဖြစ်ကြောင်း ခိုင်မာသည့် အရိပ်အယောင်များ ပြသလာသည်။ အသက် ၁၃ နှစ်အရွယ် ဂျူအေးသည် တင့်ကားမောင်းနှင်ခြင်းနှင့် စစ်ရေးလေ့ကျင့်မှုများတွင် ပါဝင်လာခြင်းမှာ ယခင်က ကင်မ်ဂျုံအန် အာဏာမရမီ ပြသခဲ့သည့် ပုံစံအတိုင်းပင် ဖြစ်သည်။ အခြားတစ်ဖက်တွင်မူ မြောက်ကိုရီးယားသည် တောင်ကိုရီးယားအပေါ် တင်းမာသော သဘောထားကို လျှော့ချခဲ့သည်။ ဇန်နဝါရီလအတွင်းက ဒရုန်းကျူးကျော်မှုနှင့် ပတ်သက်၍ တောင်ကိုရီးယားသမ္မတ လီဂျေမြောင်၏ တောင်းပန်မှုကို ကင်မ်ဂျုံအန်၏ ညီမဖြစ်သူ ကင်ယိုဂျုံက "လိမ္မာပါးနပ်ပြီး ကံကောင်းစေသည့် လုပ်ရပ်" ဟု ချီးကျူးပြောဆိုခဲ့ရာ ၎င်းမှာ နှစ်နိုင်ငံဆက်ဆံရေးအတွက် ထူးခြားသည့် အလားအလာ တစ်ခု ဖြစ်လာခဲ့သည်။ #မြောက်ကိုရီးယား #တောင်ကိုရီးယား #ကင်မ်ဂျုံအန် #ကင်ယိုဂျုံ

မြောက်ကိုရီးယား နိုင်ငံခြားရေးမူဝါဒ ပြောင်းလဲမည့် အလားအလာတွေ့ရ

Apr 7

ထိုင်းနိုင်ငံတွင် စက်သုံးဆီ လီတာ ၅၇ သန်း ပျောက်ဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၇ ရက်။ ထိုင်းနိုင်ငံတောင်ပိုင်း၊ ဆူရတ်သာနီပြည်နယ်ရှိ စက်သုံးဆီသိုလှောင်ရုံများသို့ သယ်ယူပို့ဆောင်ရာတွင် စက်သုံးဆီ လီတာ ၅၇ သန်းခန့် လျော့နည်းပျောက်ဆုံးနေမှုကို စစ်ဆေးတွေ့ရှိရသဖြင့် တရားရေးဝန်ကြီးဌာနနှင့် အထူးစုံစမ်းစစ်ဆေးရေးဦးစီးဌာန (DSI) တို့က အထူးအမှုအဖြစ် အရေးယူဆောင်ရွက်လျက်ရှိသည်ဟု ဘန်ကောက်ပို့စ် သတင်းစာတွင် ဖော်ပြသည်။ စုံစမ်းစစ်ဆေးမှုမှတ်တမ်းများအရ ရေနံတင်သင်္ဘောများဖြင့် ဆူရတ်သာနီပြည်နယ်ရှိ သိုလှောင်ရုံ ၆ ခုသို့ စက်သုံးဆီများ ပို့ဆောင်ရာတွင် လီတာ ၂၁၇ သန်း ပို့ဆောင်ခဲ့သော်လည်း လီတာ သန်း ၁၆၀ သာ လက်ခံ ရရှိပြီး ကျန် လီတာ ၅၇ သန်းမှာ ပျောက်ဆုံးသွားခဲ့ခြင်း ဖြစ်သည်။ ထိုင်းနိုင်ငံ၏ တရက်တာ ဒီဇယ် သုံးစွဲမှု ပမာဏမှာ လီတာ ၆၅ သန်း ရှိပြီး စုစုပေါင်း စက်သုံးဆီ သုံးစွဲမှု ပမာဏမှာ လီတာ သန်း ၁၀၀ ခန့်သာ ရှိသဖြင့် ပျောက်ဆုံးသည့် ပမာဏမှာ တရက်တာ စက်သုံးဆီ သုံးစွဲမှု၏ ထက်ဝက်ခန့်ရှိနေသည်။ ဝန်ကြီးချုပ် Anutin Charnvirakul ၏ ညွှန်ကြားချက်အရ အထူးစုံစမ်းစစ်ဆေးရေးဦးစီးဌာန (DSI) တွင် စက်သုံးဆီစီးဆင်းမှု လမ်းကြောင်းတစ်ခုလုံးကို စောင့်ကြည့်စစ်ဆေးရန် အထူးဗဟိုဌာနတစ်ခု ဖွင့်လှစ်ခဲ့သည်။ ရဲတပ်ဖွဲ့နှင့် အုပ်ချုပ်ရေးပိုင်းဆိုင်ရာ အရာရှိများသည် စက်သုံးဆီအရောင်းဆိုင်များမှတစ်ဆင့် မူလသိုလှောင်ရုံများအထိ နောက်ကြောင်းပြန် ခြေရာခံစစ်ဆေးလျက်ရှိပြီး၊ DSI က ရေနံချက်စက်ရုံမှ အရောင်းဆိုင်များအထိ ထောက်ပံ့ရေးကွင်းဆက်တစ်ခုလုံးကို စစ်ဆေးလျက်ရှိသည်။ စက်သုံးဆီများအား ရည်ရွယ်ချက်ရှိရှိ သိုလှောင်ထားခြင်း၊ ရောင်းချရန် ငြင်းဆန်ခြင်း သို့မဟုတ် သယ်ယူပို့ဆောင်ရေးကို နှောင့်နှေးကြန့်ကြာအောင် ပြုလုပ်ခြင်းတို့သည် စက်သုံးဆီကုန်သွယ်မှုဥပဒေအရ ပြစ်မှုမြောက်သဖြင့် ပြင်းထန်စွာ အရေးယူသွားမည်ဟု ဆိုသည်။ လက်ရှိတွင် အာဏာပိုင်များအနေဖြင့် စက်သုံးဆီများကို ဈေးကစားရန်အတွက် တမင်သိုလှောင်ထားခြင်း (Hoarding) နှင့် တရားမဝင် မှောင်ခိုရောင်းဝယ်ခြင်း (Smuggling) တို့ ရှိနိုင်သည်ဟု သံသယရှိထားသည်။ ထို့ကြောင့် သယ်ယူပို့ဆောင်ရေး ကြာမြင့်ချိန်များ ပုံမှန်ထက် ပိုမိုနေမှုနှင့် စာရင်းအင်းအချက်အလက်များကို အသေးစိတ် တိုက်ဆိုင်စစ်ဆေးလျက်ရှိသည်။ တရားရေးဝန်ကြီး Pol Lt Gen Rutthaphon Naowarat က ဤအမှုကို စံနှုန်းတစ်ခုတည်းဖြင့် တိကျစွာ ကိုင်တွယ်ဖြေရှင်းသွားမည်ဖြစ်ကြောင်းနှင့် ပြစ်မှုကျူးလွန်သူများကို ဥပဒေအရ အမြင့်ဆုံး အရေးယူသွားမည်ဖြစ်ကြောင်း အတည်ပြု ပြောကြားထားသည်။ #ထိုင်းစက်သုံးဆီစျေးတက် #ထိုင်းနိုင်ငံ

ထိုင်းနိုင်ငံတွင် စက်သုံးဆီ လီတာ ၅၇ သန်း ပျောက်ဆုံး

« Prev 1 … 55 56 57 58 59 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close