NMG Doh – Page 95 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Mar 24

အီရန်ရှိ လျှပ်စစ်ဓါတ်အားပေးစက်များ တိုက်ခိုက်မှု ခေတ္တရွှေ့ဆိုင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၄ ရက်။ အမေရိကန်သမ္မတ ဒေါ်နယ်ထရန့်က အီရန်နိုင်ငံနှင့် ငြိမ်းချမ်းရေးဆွေးနွေးမှုများမှာ အပြုသဘောဆောင်သည့် တိုးတက်မှုများရှိနေသဖြင့် အီရန်လျှပ်စစ်ဓာတ်အားပေးစက်ရုံများအား တိုက်ခိုက်မည့်အစီအစဉ်ကို ၅ ရက် ရွှေ့ဆိုင်းလိုက်ကြောင်း ထုတ်ဖော်ပြောကြားခဲ့သည်။ အီရန်နိုင်ငံအနေဖြင့် ဟော်မုဇ်ရေလက်ကြားကို အာရှ အချိန် ယနေ့မွန်းလွဲပိုင်း နောက်ဆုံးထား၍ ပြန်လည်ဖွင့်လှစ်ပေးရန်၊ ပျက်ကွက်ပါက စစ်ရေးအရ တုံ့ပြန်မည်ဟူသော အမေရိကန်၏ ရာဇသံထုတ်ပြန်ပြီးနောက် ထွက်ပေါ်လာခြင်းဖြစ်သည်။ သို့သော် အီရန်အစိုးရပိုင်မီဒီယာများကမူ ဆွေးနွေးမှုများရှိနေခြင်းကို ငြင်းဆိုထားပြီး သမ္မတထရန့်သည် အီရန်၏တုံ့ပြန်မှုကို စိုးရိမ်သဖြင့် နောက်ဆုတ်သွားခြင်းဖြစ်သည်ဟု တုံ့ပြန်ရေးသားထားသည်။ အခြားတစ်ဖက်တွင်မူ အီရန်နိုင်ငံခြားရေးဝန်ကြီးဌာန အဆင့်မြင့်အရာရှိတစ်ဦးက အမေရိကန်ထံမှ ကမ်းလှမ်းချက်များကို ကြားခံနိုင်ငံများမှတစ်ဆင့် လက်ခံရရှိထားပြီး ယင်းအချက်အလက်များကို သုံးသပ်နေကြောင်း CBS သတင်းဌာနသို့ အတည်ပြုပြောကြားထားသည်။ လက်ရှိဖြစ်ပွားနေသော ၂၄ ရက်ကြာ စစ်ပွဲအတွင်း အမေရိကန်က အီရန်ပစ်မှတ်ပေါင်း ၉,၀၀၀ ကျော်ကို တိုက်ခိုက်ခဲ့ရာ ကလေးငယ် ၂၁၄ ဦး အပါအဝင် လူပေါင်း ၃,၂၀၀ ကျော် သေဆုံးခဲ့ကြောင်း လူ့အခွင့်အရေးအဖွဲ့များက ထုတ်ပြန်ထားသည်။ အီရန်နိုင်ငံကလည်း ဟော်မုဇ်ရေလက်ကြားအတွင်း ရေမိုင်းများ အမြောက်အမြား ချထားပြီးဖြစ်ကြောင်းနှင့် လျှပ်စစ်ဓာတ်အားပေးစက်ရုံများ တိုက်ခိုက်ခံရပါက ရေလက်ကြားကို လုံးဝပိတ်ပစ်မည်ဟု ခြိမ်းခြောက်ထားသည်။ #အီရန်စစ်ပွဲ #ဟော်မုဇ်ရေလက်ကြား

အီရန်ရှိ လျှပ်စစ်ဓါတ်အားပေးစက်များ တိုက်ခိုက်မှု ခေတ္တရွှေ့ဆိုင်း

Mar 24

Google AI က CODE မလိုပဲ APP အသစ်တွေ လုပ်နိုင်ပြီ သတင်းနှင့် မီဒီယာ ကွန်ရက်။ ၂၀၂၆ ခုနှစ် မတ်လ ၂၄ ရက်။ Google AI Studio က CODE တွေ ထည့်စရာမလိုပဲ ရိုးရိုးစာသားတွေနဲ့ ကိုယ်လိုချင်တဲ့ App တစ်ခု ဖြစ်လာအောင် လုပ်ဆောင်နိုင်ပြီဖြစ်ပါတယ်။ အဆင့်မြှင့်တင်မှုဟာ နည်းပညာသမားတွေတင်မကဘဲ သာမန်လူတွေအတွက်ပါ Application (App) တစ်ခု တည်ဆောက်ရတာကို အရမ်းလွယ်ကူသွားစေမယ့် အပြောင်းအလဲတစ်ခု ဖြစ်တယ်လို့ ဆိုပါတယ်။ အရင်က App တစ်ခု ဆောက်ချင်ရင် ကွန်ပျူတာစာသား (Code) တွေကို တစ်ကြောင်းချင်း ရိုက်နေရတာပါ။ အခု "Vibe Coding" ဆိုတာကတော့ ကိုယ်ဖြစ်ချင်တဲ့ ပုံစံ (Vibe) ကို စာနဲ့ ရိုးရိုးလေး ပြောပြလိုက်ရုံနဲ့ AI က Code ရေးတာတင်မကဘဲ App တစ်ခုလုံး ဖြစ်လာအောင် နောက်ကွယ်က လိုအပ်တာတွေပါ အကုန်လုပ်ပေးသွားတာကို ဆိုလိုတာပါ။ ဒီထဲမှာ Antigravity လို့ ခေါ်တဲ့ AI Agent အသစ် ပါဝင်လာပါတယ်။ သူက ဘာလုပ်ပေးလဲဆိုရင် ကိုယ်ပေးတဲ့ အမိန့်ကို နားထောင်ပြီး App တစ်ခု ဖြစ်လာဖို့ အဆင့်ဆင့် လုပ်ဆောင်ပေးတယ်။ ရှေ့မှာ ဘာလုပ်ထားလဲဆိုတာကို မှတ်မိနေတဲ့အတွက် စကားပြောသလိုမျိုး အောက်ကနေ ထပ်ဆင့်ပြီး ပြင်ခိုင်းလို့ ရပါတယ်။ App တစ်ခုမှာ လူတွေမြင်ရတဲ့ အပြင်ပိုင်းတင်မကဘဲ နောက်ကွယ်က ဒေတာသိမ်းဆည်းတာ (Database) နဲ့ လူတစ်ယောက်ချင်းစီ အကောင့်ဝင်ဖို့ (Login) လုပ်ရတာတွေက အရမ်း ခက်ခဲပါတယ်။ အခု AI Studio မှာတော့ AI က ကိုယ့် App အတွက် Login စနစ်လိုတယ်လို့ ယူဆရင် Firebase ဆိုတဲ့ စနစ်နဲ့ ချိတ်ပြီး အလိုအလျောက် ထည့်ပေးသွားမှာ ဖြစ်ပါတယ်။ ငွေပေးချေမှု စနစ်တွေ (Payment Systems) နဲ့ တခြား Google ဝန်ဆောင်မှုတွေကိုလည်း အလွယ်တကူ ချိတ်ဆက်ပေးနိုင်ပါပြီ။ အရင်က AI တွေက Code အစိပ်အပိုင်းလေးတွေပဲ ထုတ်ပေးနိုင်တာပါ။ အခုကတော့ App တစ်ခုလုံးကို တကယ့်လူသုံးလို့ရတဲ့အထိ (Production-ready) အပြီးအစီး လုပ်ပေးနိုင်တော့မှာပါ။ ဂိမ်းဆော့တဲ့ App တွေ၊ အဖွဲ့အစည်းလိုက် အလုပ်လုပ်တဲ့ App တွေကို AI နဲ့တင် အပြီးဆောက်နိုင်တော့မှာ ဖြစ်ပါတယ်။ ဒါဟာ အပလီကေးရှင်း အသစ်တွေ လုပ်ဖို့ Coding ကို အချိန်အကြာကြီး သင်ယူနေစရာ မလိုတော့ပဲ ကိုယ်လိုချင်တဲ့ ပုံစံကို ပြောပြရုံနဲ့ လုပ်ဆောင်နိုင်တော့မှာ ဖြစ်ပါတယ်။ #GoogleAI #Google #APP #Application

Google AI က CODE မလိုပဲ APP အသစ်တွေ လုပ်နိုင်ပြီ

Mar 24

မြန်မာဘက်ပို့မည့် ဒီဇယ် လီတာ ၂၀၀၀၀ မဲဆောက်တွင် ဖမ်းမိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ ထိုင်း-မြန်မာနယ်စပ်၊ မဲဆောက်မြို့တွင် မြန်မာနိုင်ငံဘက်ခြမ်းသို့ မှောင်ခိုလမ်းကြောင်းမှတစ်ဆင့် တရားမဝင် ပို့ဆောင်မည့် ဒီဇယ်ဆီလီတာ ၂၀၀၀၀ နှင့်အတူ ဆီသယ်ယာဉ်တစ်စီးကို ထိုင်းအာဏာပိုင်များက ဖမ်းဆီးရမိခဲ့သည်။ ပြီးခဲ့သည့် မတ်လ ၂၂ ရက်နေ့ မွန်းလွဲပိုင်းတွင် တာ့ခ်ခရိုင်မှ စစ်တပ်၊ ရဲနှင့် အကောက်ခွန်အရာရှိများ ပါဝင်သော ပူးပေါင်းစစ်ဆေးရေးအဖွဲ့သည် သတင်းပေးချက်အရ မဲဆောက်မြို့၊ ထာ့ဆိုင်လိုဝက်ဒေသရှိ သောင်ရင်းမြစ် ကမ်းဘေးတစ်လျှောက် ရှာဖွေစစ်ဆေးခဲ့ခြင်းဖြစ်သည်။ ထိုသို့ စစ်ဆေးစဉ် မြဝတီဘက်ခြမ်းရှိ ကာစီနိုရုံများနှင့် မျက်နှာချင်းဆိုင်၊ ဂျပန်ပစ္စည်းဟောင်းများ တင်ပို့သည့် “၁၃ ဂိတ်” ဝင်းအတွင်း ရပ်နားထားသော ဆယ်ဘီးတပ် ဆီသယ်ယာဉ်တစ်စီးကို တွေ့ရှိခဲ့ခြင်း ဖြစ်သည်။ အဆိုပါ ဆယ်ဘီးတပ်ယာဉ်ကို ဆီသယ်ယူနိုင်ရန် အထူးပြုပြင်ထားပြီး ယာဉ်ပေါ်တွင် ဒီဇယ်ဆီလီတာ ၂၀၀၀၀ (ဂါလံ ၂၀၀၀၀ ခန့်) ကို တင်ဆောင်ကာ မြန်မာနိုင်ငံသို့ မှောင်ခိုပို့ဆောင်ရန် ပြင်ဆင်နေစဉ် ဖမ်းဆီးရမိခဲ့ခြင်း ဖြစ်သည်။ အာဏာပိုင်များသည် ဆီတင်ကားမောင်းသူနှင့်အတူ မြန်မာနိုင်ငံသားတစ်ဦးကိုပါ ထိန်းသိမ်းခဲ့သည်ဟု ထိုင်းသတင်းဌာနများတွင် ဖော်ပြသည်။ ထို့ပြင် ဆီသယ်ကားနှင့် နီးစပ်ရာ ဂိုဒေါင်တစ်ခုအတွင်း ဝင်ရောက်ရှာဖွေရာတွင် ၄၅၀၀ လီတာဆံ့ သိုလှောင်ကန် နှစ်ခု (ဆီလီတာ ၃၀၀ ခန့် ကျန်ရှိ)၊ ၂၀၀ လီတာဆံ့ ဆီတိုင်ကီ ၁၀၁ လုံးနှင့် ၃၀ လီတာဆံ့ ဆီပုံး ၈၅ ပုံးတို့ကိုလည်း စစ်ဆေးတွေ့ရှိခဲ့သည်။ အဆိုပါ ပုံးများမှာ ဆီဖြည့်သွင်းပြီးပါက သောင်ရင်းမြစ်ကို ဖြတ်ကျော်၍ မှောင်ခိုတင်ပို့ မည့် ပစ္စည်းများ ဖြစ်မည်ဟု အာဏာပိုင်များက ယူဆထားသည်။ လက်ရှိတွင် တာ့ခ်ခရိုင်အတွင်းရှိ မြို့နယ် ၅ ခု၌ စက်သုံးဆီပြတ်လပ်မှုနှင့် ရင်ဆိုင်နေရပြီး ဒေသခံများမှာ ဆီဆိုင် များတွင် နာရီနှင့်ချီ တန်းစီဝယ်ယူနေရသည့် အခြေအနေဖြစ်နေသည်။ တစ်ဖက်ရှိ မြဝတီမြို့တွင်လည်း ဆီပြတ်လပ်နေမှုကြောင့် နယ်စပ်မှတစ်ဆင့် ဆီမှောင်ခိုတင်ပို့မှုများ မြင့်တက်လာနေခြင်း ဖြစ်သည်။ တာ့ခ်ခရိုင် အုပ်ချုပ်ရေးအဖွဲ့က စက်သုံးဆီမှောင်ခိုကူးမှုကို ပြတ်ပြတ်သားသား တားဆီးနှိမ်နင်းသွားမည်ဟု ထုတ်ပြန်ထားပြီး၊ ဖမ်းဆီးရမိသည့် ဆီသယ်ယာဉ်နှင့် လောင်စာဆီများကို သိမ်းဆည်းကာ ဥပဒေအရ အရေးယူ နိုင်ရန် မဲဆောက်ရဲစခန်းသို့ လွှဲပြောင်းပေးအပ်ထားကြောင်း ထိုင်းသတင်းများက ဆိုသည်။ #မြဝတီမဲဆောက် #စက်သုံးဆီမှောင်ခို

မြန်မာဘက်ပို့မည့် ဒီဇယ် လီတာ ၂၀၀၀၀ မဲဆောက်တွင် ဖမ်းမိ

Mar 24

ဗုံးကြဲမှုကြောင့် အရပ်သား ၈၀ ခန့် အစုအပြုံလိုက် သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ စစ်ကိုင်းတိုင်းဒေသကြီးအတွင်းရှိ ကသာ၊ မြောင်နှင့် ကနီမြို့နယ်များတွင် စစ်ကော်မရှင်တပ်က တိုက်လေယာဉ် များအသုံးပြု၍ လူနေကျေးရွာများ၊ ဘုန်းကြီးကျောင်းများနှင့် စာသင်ကျောင်းများကို ပစ်မှတ်ထားကာ ဗုံးကြဲ တိုက်ခိုက်ခဲ့ခြင်းကြောင့် အရပ်သား ၈၀ ခန့် အစုလိုက်အပြုံလိုက် သေဆုံးခဲ့ရသည်။ ကသာမြို့တွင် သံဃာနှင့် အရပ်သား ၈၀ ခန့် အစုလိုက်အပြုံလိုက် သေဆုံးခဲ့ရသလို၊ မြောင်မြို့နယ်တွင် လည်း ရက်သားအရွယ် ကလေးငယ်တစ်ဦး သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။ ကသာမြို့ပေါ်ရှိ စစ်ဘေးရှောင်များ ခိုလှုံနေသည့် ရပ်ကွက် (၃) မဟာလေးထပ် ဘုန်းကြီးကျောင်းကို စစ်ကော်မရှင်က တိုက်လေယာဉ် ၅ စီးဖြင့် ပြီးခဲ့သည့် မတ်လ ၂၀ ရက်နေ့ နံနက် ၁၁ နာရီခွဲခန့်တွင် ဗုံးကြဲ တိုက်ခိုက်ခဲ့ခြင်း ဖြစ်သည်။ အဆိုပါ တိုက်ခိုက်မှုကြောင့် ကျောင်းတိုက်အတွင်း ခိုလှုံနေသည့် သံဃာတော်များနှင့် စစ်ဘေးရှောင် ၈၀ ခန့် သေဆုံးခဲ့ပြီး ၃၀ ကျော် ပြင်းထန်စွာ ဒဏ်ရာရရှိခဲ့သည်။ အခင်းဖြစ်ပွားရာတွင် ပါဝင်ခဲ့သည့် ဒေသခံတစ်ဦးက “ကျောင်းပေါ်ကို ဗုံးတွေတည့်တည့်ကျတာ။ မီးလောင်တဲ့ အထဲပါသွားတော့ ရုပ်တွေက မပေါ်တော့ဘူး။ ကိုယ့်မိသားစုဝင် အလောင်းကိုတောင် ရှာမရတော့လို့ ၇၀ ကျော် လောက်ကို ကျောင်းဝန်းထဲမှာတင် စုပြီး မြေမြှုပ်သင်္ဂြိုဟ်လိုက်ရတယ်။ အခုလည်း မြို့အဝင်အထွက်တွေ ပိတ်ထားတော့ ဒဏ်ရာရတဲ့သူတွေ ဆေးကုဖို့ သွေးနဲ့ ဆေးဝါးတွေ အရေးပေါ် လိုနေပါတယ်” ဟု ပြောသည်။ အလားတူ မတ်လ ၂၀ ရက်နေ့တွင်ပင် မြောင်မြို့နယ်၊ နဘက်စံပြကျေးရွာကို တံတားဦးလေတပ်မှ တက်လာ သည့် တိုက်လေယာဉ်တစ်စီးက ဗုံးကြဲတိုက်ခိုက်ခဲ့ရာ တစ်လမပြည့်သေးသည့် ရက်သားအရွယ် ကလေးငယ် တစ်ဦး နေရာတွင်ပင် သေဆုံးခဲ့ပြီး၊ အမျိုးသမီးတစ်ဦးလည်း ဒဏ်ရာဖြင့် ကွယ်လွန် သွားခဲ့သည်။ မြောင်မြို့နယ် ဒေသခံတစ်ဦးကလည်း မြေပြင်အခြေအနေနှင့် ပတ်သက်၍ “တိုက်ပွဲဖြစ်တာလည်း မရှိဘဲနဲ့ ရွာထဲကို လာကြဲတာ။ ရက်သားလေးကတော့ ဗုံးစမှန်ပြီး နေရာမှာတင် ဆုံးသွားရှာတယ်။ ဆီစက်နားလည်း ဗုံးကျတော့ အိမ်တွေလည်း မီးလောင်ကုန်ပြီ။ ရွာထဲမှာ ဘယ်သူမှ မနေရဲတော့ဘဲ အကုန်ပြေးနေကြရတယ်” ဟု ပြောသည်။ ထို့အပြင် မတ်လ ၂၁ ရက်နေ့ကလည်း ကနီမြို့နယ်၊ ဆူးလေကုန်းကျေးရွာရှိ ဘုန်းကြီးကျောင်းနှင့် စာသင်ကျောင်း များကို တိုက်လေယာဉ် ၈ စီးဖြင့် တပြိုင်နက် ဗုံးကြဲခဲ့ရာ ဘုန်းကြီးတစ်ပါးနှင့် လူနှစ်ဦး ထိခိုက် ဒဏ်ရာရရှိကာ အဆောက်အအုံများစွာ ပျက်စီးခဲ့သည်။ လက်ရှိတွင် ကသာမြို့အဝင်အထွက်များကို စစ်ကော်မရှင်က ပိတ်ဆို့ထားပြီး မြို့ခံများမှာ မြို့ထဲတွင် ပိတ်မိနေ ကြသည်။ တစ်ဖက်တွင် ပြည်သူ့လေကြောင်းခရီးစဉ်များမှာ လေယာဉ်ဆီပြတ်လပ်မှုကြောင့် ဖျက်သိမ်းနေရသော်လည်း၊ စစ်ကော်မရှင်သည် ရုရှားနှင့် အီရန်နိုင်ငံများမှ လေယာဉ်ဆီများကို တိုးမြှင့်တင်သွင်းကာ တော်လှန်ရေးနယ်မြေရှိ အရပ်သားများအပေါ် ဗုံးကြဲရန် အရှိန်အဟုန်မြှင့် အသုံးပြုနေကြောင်း Justice for Myanmar က ထောက်ပြ ထားသည်။ #စစ်ကိုင်းတိုင်း #ကသာလေကြောင်းတိုက်ခိုက် #မြောင်လေကြောင်းတိုက်ခိုက်မှု #ကနီလေကြောင်းတိုက်ခိုက်မှု

ဗုံးကြဲမှုကြောင့် အရပ်သား ၈၀ ခန့် အစုအပြုံလိုက် သေဆုံး

Mar 23

နှိပ်စက်သည်ဟု နာမည်ကျော်သည့် ရဲတပ်ကြပ် ထွက်ပြေးရာမှ သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ စစ်ကြောရေးတွင် နှိပ်စက်ညှဉ်းပန်းရာ၌ နာမည်ကျော်သည့် ရဲတပ်ကြပ် ဝေယံ ဖမ်းဆီးထားစဉ် ထွက်ပြေး၍ ပစ်ခတ်ခံရကာ သေဆုံးသွားသည်။ ထားဝယ်ခရိုင်အတွင်းရှိ စစ်ကြောရေးစခန်းများ၌ နိုင်ငံရေးအကျဉ်းသားများအား ရှာဖွေဖမ်းဆီးခြင်းနှင့် ညှဉ်းပန်း နှိပ်စက်ခြင်းများတွင် ပါဝင်ပတ်သက်သည်ဟု နာမည်ကျော်သည့် ရဲတပ်ကြပ်တစ်ဦးကို ဓဝယ်အမျိုးသား လွတ်မြောက်ရေးတပ်တော် (DNLA) က ဖမ်းဆီးရမိခဲ့ပြီးနောက်၊ ထွက်ပြေးရန် ကြိုးပမ်းစဉ် ပစ်ခတ်ဖမ်းဆီးရာမှ သေဆုံးသွားခဲ့သည်။ သေဆုံးသွားသူမှာ ထားဝယ်ခရိုင် ဒုစရိုက်နှိမ်နင်းရေးရဲတပ်ဖွဲ့မှ ရဲတပ်ကြပ် ဝေယံ (ခ) နဘုလယ်ရဲဝေယံ ဖြစ်ပြီး ၎င်းကို ဓဝယ်အမျိုးသားလွတ်မြောက်ရေးတပ်တော် (DNLA)၊ ဒူရကစစ်ကြောင်းက မတ်လ ၁၉ ရက်နေ့တွင် ထားဝယ်မြို့နယ်အတွင်းရှိ ကျေးရွာတစ်ရွာ၌ ဖမ်းဆီးရမိခဲ့ခြင်းဖြစ်သည်။ ၎င်းသည် ၂၀၂၁ ခုနှစ် အာဏာသိမ်းပြီးနောက်ပိုင်း စစ်ကော်မရှင်၏ ရဲတပ်ဖွဲ့ဆိုင်ရာ ဂုဏ်ထူးဆောင်တံဆိပ် ချီးမြှင့်ခြင်း ခံထားရသူတစ်ဦးလည်း ဖြစ်သည်။ ဒူရကစစ်ကြောင်း တာဝန်ရှိသူတစ်ဦးက “သူ့ကို အရှင်ဖမ်းမိထားတာပါ။ ကျနော်တို့ဘက်က စစ်သုံ့ပန်း ကျင့် ဝတ်နဲ့ အညီ ကောင်းမွန်အောင်ထားပြီး စစ်ဆေးနေတာပါ။ ဒါပေမဲ့ ၂၁ ရက်နေ့ ညနေပိုင်းမှာ သူက အိမ်သာ တက်ချင်တယ်ဆိုပြီး အကြောင်းပြတယ်၊ ရဲဘော်တွေအလစ်မှာ ထွက်ပြေးဖို့ ကြိုးစားတာကြောင့် လိုက်လံ ဖမ်းဆီးရာမှာ ကျည်ထိမှန်ပြီး သေဆုံးသွားတာ ဖြစ်ပါတယ်” ဟု ရှင်းပြသည်။ သေဆုံးသူ ရဲတပ်ကြပ် ဝေယံမှာ ထားဝယ်မြို့ပေါ်ရှိ စစ်ကြောရေးစခန်း သုံးခုအနက် ခရိုင်စစ်ကြောရေးတွင် တာဝန်ကျသူဖြစ်ပြီး စစ်ကြောရေးကာလအတွင်း နှိပ်စက်ညှဉ်းပန်းမှုများကြောင့် “နဘုလယ်ရဲဝေယံ” ဟူ၍ နာမည်ဆိုးဖြင့် ကျော်ကြားသူ ဖြစ်သည်ဟု ဆိုသည်။ ထို့ပြင် ၎င်းကို ဖမ်းဆီးရမိချိန်တွင် သိမ်းဆည်းရရှိခဲ့သည့် ဖုန်းအတွင်းမှ စစ်ကော်မရှင်က ထားဝယ်မြို့ပေါ်တွင် ထပ်မံဖမ်းဆီးရန် စီစဉ်ထားသည့် မြို့ခံအချို့၏ အမည်စာရင်းများကိုလည်း တွေ့ရှိခဲ့ရသည်ဟု ဒူရကစစ်ကြောင်း တာဝန်ရှိသူက ပြောသည်။ အဆိုပါ စာရင်းတွင် ပါဝင်နေသည့် မြို့ခံများအား ဘေးလွတ်ရာသို့ တိမ်းရှောင်နိုင်ရန် ဒူရကစစ်ကြောင်းမှ အချိန်မီ သတိပေးနိုင်ခဲ့ဟု ဆိုသည်။ လက်ရှိတွင် ထားဝယ်ခရိုင်အတွင်း၌ တော်လှန်ရေးတပ်ဖွဲ့များနှင့် စစ်ကော်မရှင်တပ်တို့အကြား စစ်ရေး တင်းမာမှု များ ဆက်ရှိနေပြီး၊ စစ်ကော်မရှင်ဘက်ကလည်း မြို့ပေါ်လုံခြုံရေးနှင့် ဖမ်းဆီးမှုများကို ယခင်ကထက် ပိုမို တင်းကျပ်ထားကြောင်း ဒေသတွင်း သတင်းရင်းမြစ်များက ပြောသည်။ #DNLA #ထားဝယ် #စစ်ကော်မရှင်တပ် #ဓဝယ်အမျိုးသားလွတ်မြောက်ရေးတပ်တော် #နဘုလယ်ဒေသ

နှိပ်စက်သည်ဟု နာမည်ကျော်သည့် ရဲတပ်ကြပ် ထွက်ပြေးရာမှ သေဆုံး

Mar 23

စစ်ကော်မရှင် လက်နက်ကြီးကြောင့် သားအဖ ၂ ဦးသေ၊ သားအမိ ၂ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ တိုက်ပွဲဖြစ်ပွားခြင်းမရှိဘဲ စစ်ကော်မရှင်တပ်က လက်နက်ကြီးဖြင့် ပစ်ခတ်ခဲ့ရာ သားအဖနှစ်ဦး သေဆုံးပြီး သားအမိနှစ်ဦး ဒဏ်ရာရရှိခဲ့သည်။ တနင်္သာရီတိုင်းဒေသကြီး၊ ထားဝယ်ခရိုင်၊ ရေဖြူမြို့နယ်တွင် စစ်ကော်မရှင်တပ်က လက်နက်ကြီးဖြင့် အကြောင်း မဲ့ ပစ်ခတ်ခဲ့မှုကြောင့် နေအိမ်တစ်လုံးပေါ် ကျရောက်ပေါက်ကွဲပြီး အလုပ်သမားမိသားစုဝင် သားအဖနှစ်ဦး သေဆုံးကာ သားအမိနှစ်ဦး ပြင်းထန်စွာ ဒဏ်ရာရရှိခဲ့ကြောင်း ဒေသခံများက ပြောသည်။ ဖြစ်စဉ်နှင့်ပတ်သက်၍ အသက် ၄၀ ဝန်းကျင်အရွယ်ရှိ အလုပ်သမားတစ်ဦးက “တိုက်ပွဲဖြစ်တာမရှိဘဲ ပစ်တာ ပါ။ မိသားစု ၅ ယောက်မှာ အဖေလုပ်တဲ့သူနဲ့ ၁၅ နှစ်အရွယ် သမီးအကြီးဆုံးတို့ နှစ်ယောက်လုံး နေရာမှာတင် ဆုံးသွားတယ်။ သားအလတ်နဲ့ အမေဖြစ်သူကတော့ ဒဏ်ရာတွေနဲ့ ဆေးကုနေရတယ်။ ကံကောင်းတာက လသားအရွယ် သားအငယ်ဆုံးလေးကတော့ ဘာမှမဖြစ်ဘဲ လွတ်သွားတယ်” ဟု ပြောသည်။ ဖြစ်စဉ်မှာ မတ်လ ၂၀ ရက်နေ့ မွန်းလွဲပိုင်းအချိန်တွင် ကလိန်အောင်မြို့အနီးရှိ ရာဖူးရွာဟောင်း၌ တပ်စွဲထားသည့် စစ်ကောင်စီ၏ ပူးပေါင်းစစ်ကြောင်းက ၁၂၀ မမ လက်နက်ကြီးများဖြင့် ၁၀ လုံးထက်မနည်း ပစ်ခတ်ခဲ့ခြင်း ဖြစ်သည်။ အဆိုပါ လက်နက်ကြီးကျည်များသည် စစ်ကော်မရှင်တပ်မှ ဗိုလ်မှူးတစ်ဦး ပိုင်ဆိုင်သည့် ရော်ဘာခြံအတွင်းရှိ အလုပ်သမားနေအိမ်ပေါ်သို့ တိုက်ရိုက်ကျရောက် ပေါက်ကွဲခဲ့ခြင်း ဖြစ်သည်။ အဆိုပါ လက်နက်ကြီးများကို ရာဖူးကျေးရွာဟောင်းတွင် အခြေစိုက်ထားသည့် စစ်ကော်မရှင်၏ ခလရ ၂၈၂၊ ၂၇၃ နှင့် ခမရ ၄၀၈၊ ၄၀၉၊ ၄၁၀ ပူးပေါင်းစစ်ကြောင်းမှ ပစ်ခတ်ခဲ့ခြင်းဖြစ်သည်။ ရာဖူးကျေးရွာအနီးတွင် ပြီးခဲ့သည့် မတ်လ ၁၉ ရက်နေ့က စစ်ကော်မရှင်တပ်နှင့် ပြည်သူ့ကာကွယ်ရေးတပ်ဖွဲ့ (PDF) တို့အကြား ထိတွေ့တိုက်ပွဲတစ်ကြိမ် ဖြစ်ပွားခဲ့သော်လည်း၊ ယခု သားအဖနှစ်ဦး သေဆုံးသည့်ဖြစ်စဉ်မှာမူ တိုက်ပွဲဖြစ်ပွားခြင်းမရှိသည့် အချိန်တွင် အကြောင်းမဲ့ ပစ်ခတ်ခံရခြင်းဖြစ်သည်ဟု ဒေသခံများက ဆိုသည်။ လက်ရှိတွင် ရေး-ထားဝယ် ကားလမ်းမကြီးပေါ်၌ တည်ရှိသည့် ရာဖူးကျေးရွာ၏ တစ်ဖက်တစ်ချက်စီတွင် စစ်ကော်မရှင်တပ်နှင့် ပြည်သူ့ကာကွယ်ရေးတပ်များက ကိုယ်စီနေရာယူထားကြပြီး စစ်ရေးတင်းမာနေဆဲ ဖြစ်သည်။ စစ်ကော်မရှင်တပ်၏ လက်နက်ကြီး ပစ်ခတ်မှုများကြောင့် ဒေသခံရွာသားများမှာ လုံခြုံရေးအတွက် စိုးရိမ် ထိတ်လန့် နေကြသည်။ #တနင်္သာရီတိုင်း #ရေဖြူမြို့နယ် #ကလိန်အောင်မြို့ #ရာဖူးရွာ #ထားဝယ်ခရိုင်

စစ်ကော်မရှင် လက်နက်ကြီးကြောင့် သားအဖ ၂ ဦးသေ၊ သားအမိ ၂ ဦး ဒဏ်ရာရ

Mar 23

အပစ်ရပ်သော်လည်း တအာင်းပြည်သူများ စိုးရိမ်နေရဆဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ ရှမ်းပြည် မြောက်ပိုင်းတွင် နယ်မြေအငြင်းပွားမှုများကြောင့် တိုက်ပွဲများအထိ ဖြစ်ပွားခဲ့သည့် ကိုးကန့်တပ် (MNDAA) နှင့် တအာင်းတပ် (TNLA) တို့အကြား အပစ်အခတ်ရပ်စဲရေး သဘောတူညီချက် ရရှိသွားပြီ ဖြစ်သော်လည်း မြေပြင်တွင်မူ တအာင်းတိုင်းရင်းသားများ၏ ယဉ်ကျေးမှုနှင့် စာပေဆိုင်ရာ အခွင့်အရေးများ ကန့်သတ်ပိတ်ပင်ခံနေရကြောင်း ဒေသခံများက ပြောသည်။ ကိုးကန့်ဒေသ လောက်ကိုင်မြို့တွင် ၄ ရက်ကြာ ဆွေးနွေးခဲ့ပြီးနောက် မတ်လ ၂၁ ရက်နေ့တွင် အဓိက သဘောတူ ညီချက် (၅) ချက် ရရှိခဲ့ခြင်းဖြစ်သည်။ အဆိုပါ တွေ့ဆုံမှုနှင့်ပတ်သက်၍ PSLF/TNLA သတင်းနှင့်ပြန်ကြားရေး တာဝန်ခံ လွေးယေဦးက ယခုကဲ့သို့ အတည်ပြုပြောသည်။ “တွေ့ဆုံဆွေးနွေးမှုမှာ နှစ်ဖက်တပ်တွေ အပစ်ရပ်နိုင်ဖို့ သဘောတူခဲ့တယ်။ နောက်ပြီး နှစ်ဖက်တပ်က မဟာမိတ် အဖြစ် ဆက်လက်ရပ်တည်ဖို့၊ နောက်တစ်ခုက နယ်မြေတွေ သတ်မှတ်နိုင်ခဲ့တယ်။ နယ်မြေနဲ့ ပတ်သက်ပြီးတော့ ပြောနိုင်ခြင်းမရှိသေးဘူး။ တခြားတပ် နေရာချထားရေးတွေ တဖြည်းဖြည်း သတ်မှတ်ထားတဲ့ နေရာ ပြန် ရောက်မှပဲ ပြောနိုင်မှာ ဖြစ်ပါတယ်။ လောလောဆယ် ကွတ်ခိုင်ကိုတော့ MNDAA က ဆက်လက်ထိန်းချုပ်မှာ ဖြစ်တယ်။ နောက်ထပ်တစ်ခုကတော့ နှစ်ဖက်တပ်ကြား ထိန်းသိမ်းထားတဲ့ တပ်သားတွေ၊ လက်နက်ခဲယမ်းတွေ ပြန်လည်အပ်နှံဖို့ နှစ်ဖက်သဘောတူတာတွေ ရှိတယ်” အဆိုပါ အပစ်ရပ်စဲရေး သဘောတူညီချက် မရရှိမီ ရက်ပိုင်းအလို မတ်လ ၁၇ ရက်နေ့က မန်ပြိန်းကျေးရွာသူကြီး ဦးနိုင်ကိန်အား MNDAA တပ်ဖွဲ့ဝင်များက အကြောင်းမဲ့ ပစ်သတ်ခဲ့ခြင်းနှင့် မတ်လ ၁၅ ရက်နေ့က လွယ်ဆိုင် ကျေးရွာရှိ ဘုန်းကြီးကျောင်းနှင့် စာသင်ကျောင်းများ ဒရုန်းဗုံးထိမှန် ပျက်စီးခဲ့သည့် ဖြစ်စဉ်များကြောင့် ဒေသခံ များမှာ စိုးရိမ်ထိတ်လန့်နေဆဲ ဖြစ်သည်။ အလားတူ မြေပြင်အခြေအနေတွင် MNDAA အုပ်ချုပ်ရေးအောက် ရောက်ရှိသွားသည့် ကွတ်ခိုင်မြို့နယ် အတွင်း ရှိ တအာင်းကျေးရွာ ၁၄ ရွာထက်မနည်းတွင် တအာင်းအမျိုးသားအလံများအား ဖြုတ်ချခိုင်းခြင်းနှင့် တအာင်း စာပေဖြင့် ရေးထိုးထားသော ဆိုင်းဘုတ်များကို မြန်မာ (သို့မဟုတ်) တရုတ်ဘာသာဖြင့်သာ လဲလှယ်ရေးသားရန် ဖိအားပေး ညွှန်ကြားမှုများ ရှိနေသည်။ နမ့်ဖတ်ကာဘက်မှ တအာင်းဒေသခံ အမျိုးသမီးတစ်ဦးက “အပစ်ရပ်တယ်ဆိုတာ ကြားရလို့ ဝမ်းသာပေမဲ့ မြေ ပြင်မှာတော့ ကျမတို့က ကြောက်နေရတုန်းပဲ။ အမြဲတော့ သတိနဲ့ နေရမယ့် အနေအထားမျိုးပေါ့နော်။ ကိုးကန့် တပ်သားတွေက အိမ်ထဲအထိ ဝင်မွှေပြီး ဆိုင်ကယ်တွေ၊ အိမ်သုံးပစ္စည်းတွေ ယူသွားကြတယ်။ ပိုဆိုးတာက ကျမတို့ရဲ့ တအာင်းအလံတွေကို ဖြုတ်ခိုင်းပြီး တအာင်းစာနဲ့ ရေးထားတဲ့ ဆိုင်းဘုတ်တွေကို ပေးမသုံးတော့ဘူး” ဟု ပြောသည်။ ထို့အပြင် ပြီးခဲ့သည့် မတ်လ ၁၄ ရက်နေ့က ဖြစ်ပွားခဲ့သော ကွတ်ခိုင်တိုက်ပွဲအတွင်း MNDAA ၏ ဒရုန်းဗုံးဖြင့် ပစ်ခတ်မှုကြောင့် အရပ်သားများ သေဆုံးခဲ့ရသည့် ဖြစ်စဉ်ကလည်း ဒေသခံများ အကြား စိုးရိမ်ထိတ်လန့်မှုကို ပိုမိုမြင့်တက်စေခဲ့သည်။ လက်ရှိတွင် နှစ်ဖက်ခေါင်းဆောင်များက အငြင်းပွားမှုများကို ဆွေးနွေးအဖြေရှာရန် သဘောတူထားကြ သော်လည်း နယ်မြေစိုးမိုးမှု အပြောင်းအလဲကြားတွင် တအာင်းတိုင်းရင်းသားတို့၏ လုံခြုံရေး၊ ယဉ်ကျေးမှု ဆိုင်ရာ ကန့်သတ်မှုများနှင့် လူမျိုးရေးဆိုင်ရာ အခွင့်အရေးများမှာ ကြီးမားသော စိန်ခေါ်မှုများနှင့် ရင်ဆိုင်နေရဆဲ ဖြစ်သည်။ #TNLA #MNDAA #အပစ်ရပ် #ကွတ်ခိုင်

အပစ်ရပ်သော်လည်း တအာင်းပြည်သူများ စိုးရိမ်နေရဆဲ

Mar 23

တိုင်းရင်းသား အဖွဲ့များအား နိုင်ငံခြားသားများက သင်တန်းများပေးခဲ့ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ အိန္ဒိယ အမျိုးသား စုံစမ်းစစ်ဆေးရေး အေဂျင်စီ (NIA) တွင် ထိန်းသိမ်းထားသည့် အမေရိကန် နှင့် ယူကရိန်း နိုင်ငံသားများက မြန်မာနိုင်ငံရှိ တိုင်းရင်းသား လက်နက်ကိုင် အဖွဲ့အစည်းများကို သင်တန်းများပေးပြီး ဒရုန်းနှင့် ဂျမ်မာများကို ထောက်ပံ့ခဲ့သည်ဟု တရားရုံးတွင် NIA က ထွက်ဆိုခဲ့ကြောင်း The Pioneer သတင်းစာတွင် ဖော်ပြသည်။ အမေရိကန်နိုင်ငံသား Van Dyke နှင့် ယူကရိန်းနိုင်ငံသားများဖြစ်ကြသော Maksym Honcharuk, Petro Hubra, Ivan Sukmanovskyi, Marian Stefankiv, Taras Slyviak နှင့် Viktor Kaminskyi တို့ ၇ ဦးကို ၂၀၂၆ ခုနှစ်၊ မတ်လ ၂၇ ရက်နေ့အထိ NIA က ထိန်းသိမ်းထားမည်ဖြစ်ပြီး တင်းကျပ်သော မတရားအသင်းကာကွယ်ရေးအက်ဥပဒေ (UAPA) ဖြင့် တရားစွဲဆိုထားသည်။ NIA သည် လက်နက်နှင့် ကိရိယာများ သယ်ယူပို့ဆောင်ရာတွင် ပါဝင်ကူညီခဲ့သည့် အိန္ဒိယအရှေ့မြောက်ပိုင်းရှိ ဒေသခံများကိုပါ ယခုအခါ စုံစမ်းစစ်ဆေးလျက်ရှိသည်။ အထူးသဖြင့် မီဇိုရမ် (Mizoram) နှင့် အာသံ (Assam) ပြည်နယ်များမှတစ်ဆင့် အဆိုပါအဖွဲ့အား ကူညီပေးခဲ့သူအချို့ကို ဖော်ထုတ်နိုင်ခဲ့ပြီဟု သတင်းတွင် ဖော်ပြသည်။ ၎င်းတို့အဖွဲ့သည် ကမ္ဘာလှည့်ခရီးသွားဗီဇာဖြင့် ဥရောပမှ ဒရုန်းနှင့် ဂျမ်မာများ သွင်းခဲ့ပြီး မြန်မာနိုင်ငံအတွင်းသို့ ဝင်ရောက်ကာ တိုင်းရင်းသား လက်နက်ကိုင် တပ်ဖွဲ့များကို ဒရုန်းတပ်ဆင်ခြင်း၊ တိုက်ပွဲဝင်ခြင်းနှင့် ဆက်သွယ်ရေးလှိုင်းနှောင့်ယှက်ခြင်း နည်းဗျူဟာများ သင်ကြားပေးခဲ့သည်ဟု ဆိုသည်။ အမေရိကန် နိုင်ငံသား Van Dyke သည် "Sons of Liberty International" အဖွဲ့ကို တည်ထောင်သူဖြစ်ပြီး လစ်ဗျား၊ ဆီးရီးယားနှင့် ယူကရိန်းစစ်ပွဲများတွင် ပါဝင်တိုက်ခိုက်ခဲ့သူလည်း ဖြစ်သည်။ ယခုအခါ သူသည် တိုက်ပွဲအတွေ့အကြုံရှိသော ယူကရိန်းစစ်ပြန်များကို စုဆောင်းကာ မြန်မာနိုင်ငံရှိ တိုင်းရင်းသားတပ်ဖွဲ့များအား နည်းပညာဖြန့်ဝေပေးရန် ကြိုးပမ်းခဲ့ခြင်းဖြစ်သည်ဟု The Pioneer သတင်းတွင် ဖော်ပြပါရှိသည်။

တိုင်းရင်းသား အဖွဲ့များအား နိုင်ငံခြားသားများက သင်တန်းများပေးခဲ့

Mar 23

ကင်ဂျုံအန်းကို နိုင်ငံတော် ရေးရာ ကော်မရှင် ဥက္ကဋ္ဌအဖြစ် ပြန်လည်ခန့်အပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ မြောက်ကိုရီးယား ခေါင်းဆောင် ကင်ဂျုံအန်းဟာ အနောက်တိုင်းဝတ်စုံကို ဝတ်ဆင်ထားပြီး သူ့ရဲ့အဘိုးနဲ့ ဖခင်တို့ရဲ့ ရုပ်တုကြီးနှစ်ခုရှေ့မှာ ထိပ်တန်းအရာရှိတွေနဲ့အတူ စင်မြင့်အလယ်မှာ ထိုင်နေတာကို တွေ့ရပါတယ်။ ဒီဓါတ်ပုံကို မတ်လ ၂၃ ရက် တနင်္လာနေ့မှာ ထုတ်ပြန်ခဲ့တာက‌တော့ ကိုရီးယား ဗဟို သတင်း အေဂျင်စီ KCNA လို့ခေါ်တဲ့ မြောက်ကိုရီးယားရဲ့ နိုင်ငံပိုင် သတင်းဌာန ဖြစ်ပါတယ်။ ဒီရုပ်ပုံနဲ့ အတူ ဖော်ပြတဲ့ အကြောင်းအရာကတော့ မြောက်ကိုရီးယားနိုင်ငံရဲ့ အာဏာပိုင် ဥပဒေပြုလွှတ်တော်က ကင်ဂျုံအန်းကို နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌအဖြစ် ပြန်လည်ရွေးချယ်တင်မြှောက်လိုက်တဲ့ အကြောင်းပဲ ဖြစ်ပါတယ်။ နျူကလီးယား လက်နက်ပိုင်ဆိုင်ထားတဲ့ မြောက်ကိုရီးယားရဲ့ အမြင့်ဆုံး မူဝါဒချမှတ်ရေးနဲ့ အုပ်ချုပ်ရေးအဖွဲ့ဖြစ်တဲ့ နိုင်ငံတော်ရေးရာကော်မရှင် (State Affairs Commission) ရဲ့ အကြီးအကဲအဖြစ် ကင်ဂျုံအန်းကို ပြန်လည်ခန့်အပ်ကြောင်း KCNA သတင်းဌာနက ကြေညာခဲ့တာပါ။ "ဒီကနေ့ (မတ်လ ၂၂ ရက်) မှာ ကျင်းပတဲ့ ၁၅ ကြိမ်မြောက် ပြည်သူ့လွှတ်တော် ပထမအကြိမ် ညီလာခံမှာ ရဲဘော်ကင်ဂျုံအန်းကို မြောက်ကိုရီးယားနိုင်ငံရဲ့ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌအဖြစ် ပြန်လည်ရွေးချယ်လိုက်ပါတယ်" လို့ KCNA က ဖော်ပြခဲ့ပါတယ်။ အဲဒီ ဆုံးဖြတ်ချက်ဟာ မြောက်ကိုရီးယား ပြည်သူတစ်ရပ်လုံးရဲ့ တစ်ခဲနက် ဆန္ဒကို ထင်ဟပ်တာဖြစ်တယ်လို့လည်း သတင်းမှာ ပါရှိပါတယ်။ ဝေဖန်သူတွေကတော့ မြောက်ကိုရီးယားရဲ့ ရွေးကောက်ပွဲတွေဟာ ကြိုတင်သတ်မှတ်ထားပြီးသား ဖြစ်ပြီး ခေါင်းဆောင်ပိုင်းအတွက် ဒီမိုကရေစီနည်းကျ ယောင်ယောင်ပြရုံသက်သက်သာ ဖြစ်တယ်လို့ ထောက်ပြကြပါတယ်။ ကင်ဂျုံအန်းဟာ ၁၉၄၈ ခုနှစ်မှာ သူရဲ့အဘိုးဖြစ်သူ ကင်အီဆွန်း တည်ထောင်ခဲ့တဲ့ မြောက်ကိုရီးယားနိုင်ငံရဲ့ တတိယမြောက် အုပ်ချုပ်သူဖြစ်ပြီး ၂၀၁၁ ခုနှစ် ဖခင်ဖြစ်သူ ကွယ်လွန်ပြီးနောက်ပိုင်းကစလို့ အုပ်ချုပ်ခဲ့တာပါ။ ဒီညီလာခံမတိုင်ခင်မှာ လွှတ်တော်ကိုယ်စားလှယ် ၆၈၇ ဦးကို အရင်ရွေးချယ်ခဲ့ကြပြီး အသက် ၁၇ နှစ်အထက် မြောက်ကိုရီးယားနိုင်ငံသားတွေအနေနဲ့ အာဏာရပါတီက တင်သွင်းထားတဲ့ တစ်ဦးတည်းသော ကိုယ်စားလှယ်လောင်းကို ထောက်ခံဖို့ ဒါမှမဟုတ် ကန့်ကွက်ဖို့ပဲ ရွေးချယ်ခွင့်ရှိတာပါ။ လွှတ်တော်ကိုယ်စားလှယ်သစ်တွေကို ၉၉.၉၃ ရာခိုင်နှုန်းက ထောက်ခံမဲပေးခဲ့ပြီး ၀.၀၇ ရာခိုင်နှုန်းကသာ ကန့်ကွက်ခဲ့ကြောင်း၊ မဲပေးသူဦးရေ ၉၉.၉၉ ရာခိုင်နှုန်း ရှိခဲ့ကြောင်း KCNA က ဆိုပါတယ်။ နိုင်ငံရဲ့ တတိယ ခေါင်းဆောင်လည်း ဖြစ် တတိယ မျိုးဆက်လည်း ဖြစ်တဲ့ ကင်ဂျုံ အန်းက တော့ သူ့ရဲ့ ဆက်ခံသူအဖြစ် သမီးဖြစ်သူ ကင်ဂျူအေ Kim Ju Ae ကို မကြာသေးခင်က ရွေးချယ်ထားပါတယ်။

ကင်ဂျုံအန်းကို နိုင်ငံတော် ရေးရာ ကော်မရှင် ဥက္ကဋ္ဌအဖြစ် ပြန်လည်ခန့်အပ်

« Prev 1 … 93 94 95 96 97 … 1,113 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အစိုးရ ပိတ်လို့ လူသိပိုများလာတဲ့ အိန္ဒိယ ရုပ်ရှင်ကား — August 20, 2026 12:15 pm
တရုတ်နိုင်ငံခြားရေးဝန်ကြီး ဝမ်ယိ တောင်ကိုရီးယားနှင့် အင်ဒိုနီးရှားသို့ သွားမည် — August 19, 2026 2:17 pm
ဒုံးကျည်ဖြင့် တိုက်ခိုက်ခံရပြီးနောက် အီရန်အပေါ် UAE က ကုန်သွယ်ရေး ပိတ်ဆို့ — August 19, 2026 2:14 pm

Recent Posts

အစိုးရ ပိတ်လို့ လူသိပိုများလာတဲ့ အိန္ဒိယ ရုပ်ရှင်ကား
တနင်္သာရီ လောင်းလုံးတွင် စစ်တပ်က ရမ်းသမ်းပစ်ခတ်၍ သားအဖ ၂ ဦး သေဆုံး
ဘန်ကောက် မြန်မာသံရုံးက PV ပတ်စပို့ သက်တမ်းတိုးခြင်း ရုတ်တရက် ရပ်ဆိုင်း
မောင်တော နယ်စပ်နှင့် မြို့တွင်း၌ AA လုံခြုံရေး တင်းကျပ်စွာ တိုးမြှင့်ထား
ပင်လည်ဘူးတွင် စစ်တပ်က ရက်ဆက် ဗုံးကြဲ၍ ကလေးငယ်အပါအဝင် ၉ ဦးထက်မနည်း သေဆုံး

Archives

Archives

×Close