NMG Doh – Page 94 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Nov 20

ဒဏ်ရာရနှင့် သေဆုံးရဲဘော်များအတွက် NUG က တာဝန်ယူရန် မူဝါဒ ချမှတ်မည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၀ ရက်။ စစ်အာဏာရှင်စနစ် တော်လှန်ရေးကာလအတွင်း အသက်ပေးလှူခဲ့သည့် ရဲဘော်များ၏ မိသားစုဝင်များ၊ ကိုယ် လက်အင်္ဂါ စွန့်လွှတ်ခဲ့ရသူများနှင့် ထိခိုက်ဒဏ်ရာရသူများအတွက် တာဝန်ယူသွားနိုင်ရန် မူဝါဒများ ချမှတ်သွားမည်ဟု အမျိုးသား ညီညွတ်ရေး အစိုးရ (NUG) က ထုတ်ဖော် ပြောကြားလိုက်သည်။ လက်ရှိ NUG အစိုးရသာမက အနာဂတ် ဖက်ဒရယ် ဒီမိုကရေစီ နိုင်ငံတော်ကပါ တာဝန်ယူနိုင်ရေးအတွက် မူဝါဒများ ချမှတ်နေပြီး သီးခြားဥပဒေတစ်ရပ် ပြဋ္ဌာန်းနိုင်ရန်ပါ စီစဉ်လျက်ရှိသည်ဟု ဆိုသည်။ NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က “ကိုယ်လက်အင်္ဂါစွန့်လွှတ်ခဲ့ရတဲ့ ရဲဘော်တွေ အတွက် တစ်သက်စာလုံး၊ တစ်ဘဝစာလုံး ကျန်းမာရေး၊ ပညာရေး၊ အသက်မွေးဝမ်းကျောင်းရေး တို့အတွက် တာဝန်ယူတာဝန်ခံနိုင်ဖို့ မူဝါဒတွေကို ချမှတ်ဆောင်ရွက်နေပါတယ်” ဟု ပြောသည်။ NUG ၏ နိုဝင်ဘာလ ၁၉ ရက်နေ့တွင် ပြုလုပ်ခဲ့သော ပြည်သူလူထုနှင့် နိုင်ငံတကာသို့ သတင်းစကား ပြောကြား ခြင်း အစီအစဉ်မှတစ်ဆင့် ယခုကဲ့သို့ အသိပေးခဲ့ခြင်း ဖြစ်သည်။ ဦးနေဘုန်းလတ်က “လက်ရှိ အမျိုးသားညီညွတ်ရေး အစိုးရသာမက အနာဂတ်မှာ ပေါ်ပေါက်လာမယ့် ဖက်ဒရယ် ဒီမိုကရေစီနိုင်ငံကပါ တာဝန်ယူတာဝန်ခံနိုင်ဖို့ ဥပဒေတစ်ခု ပြဌာန်းနိုင်ဖို့ကိုလည်း စီစဉ်ဆောင်ရွက် လျက် ရှိပါတယ်” ဟု ပြောသည်။ NUG အနေဖြင့် တော်လှန်ရေးရဲဘော်များ၏ ကုသရေးနှင့် ပြန်လည်ထူထောင်ရေး ကဏ္ဍတွင် ပုံမှန်အားဖြင့် လစဉ် ကျပ်သိန်း ၁,၀၀၀ မှ ၁,၅၀၀ အထိ သုံးစွဲနေသည်ဟု ဦးနေဘုန်းလတ်က ဆိုသည်။ ဦးနေဘုန်းလတ်၏ ပြောဆိုချက်အရ “တော်လှန်ရေးမှာ မြင့်မြတ်စွာ ကျဆုံးခဲ့ရတဲ့ ရဲဘော်တွေရဲ့ မိသားစုဝင် တွေကို တာဝန်ယူစောင့်ရှောက်နိုင်ဖို့ အတွက်လည်း မူဝါဒများ ချမှတ်နေ” သည်ဟု ပြောသည်။ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော် (PDF) လက်အောက်တွင် ဆေးဝန်ထမ်း ဌာနခွဲကိုလည်း သီးသန့်ဖွဲ့စည်း ထားသည်ဟု ဆိုသည်။ ပြည်တွင်း၌ စစ်ဆေးရုံ ၃၃ ခုနှင့် ဆေးခန်းများ ဖွင့်လှစ်ထားသည့်အပြင် နယ်စပ်ဒေသများရှိ ဆေးရုံများသို့ လွှဲပြောင်းကုသပေးခြင်းနှင့် နိုင်ငံတကာ ကျန်းမာရေးအဖွဲ့အစည်းများနှင့်လည်း ပူးပေါင်းဆောင်ရွက်လျက် ရှိသည်ဟု ပြောသည်။ ထို့အပြင် မသန်စွမ်းဖြစ်သွားသည့် တပ်ဖွဲ့ဝင်များအတွက် ခြေတုလက်တုများ တပ်ဆင်ပေးနိုင်ရန် ပြန်လည် ထူထောင်ရေးစင်တာ ၄ ခု ဖွင့်လှစ်ထားပြီး ဒေသအလိုက် လူမှုအခြေပြုအဖွဲ့အစည်းများနှင့်လည်း ချိတ်ဆက်ဆောင်ရွက်နေသည်။ ရုပ်ပိုင်းဆိုင်ရာ ကုသမှုများအပြင် စိတ်ပိုင်းဆိုင်ရာ ထိခိုက်မှုများကို သက်သာစေရန် ကာကွယ်ရေးဝန်ကြီးဌာန၊ ကျန်းမာရေးဝန်ကြီးဌာနနှင့် တော်လှန်အနုပညာရှင်များ ပူးပေါင်း၍ ‘ခွန်အားမျှ’ အမည်ရှိ နှစ်သိမ့်ဆွေးနွေးပညာ ပေးမှုများကိုလည်း ဆောင်ရွက်ပေးလျက်ရှိသည်။ NUG က အသက်ရင်းကာ တိုက်ပွဲဝင်နေကြသည့် ရဲဘော်များအား လေးစားတန်ဖိုးထားကြောင်း ထပ်လောင်း ပြောကြားပြီး ၎င်းတို့၏ လိုအပ်ချက်များကို ဆက်လက် ဖြည့်ဆည်းပေးသွားမည်ဟု ကတိပြုသည်။ ဦးနေဘုန်းလတ်က “အမျိုးသားညီညွတ်ရေးအစိုးရအနေနဲ့ မြန်မာနိုင်ငံရဲ့ ခေတ်ပြောင်းစနစ်ပြောင်း တော်လှန် ရေးကြီးမှာ အသက်ကို ပဓာနမထားဘဲ ရှေ့တန်းကနေ တော်လှန်တိုက်ပွဲဝင်နေကြတဲ့ PDF တွေ၊ တိုင်းရင်းသား တော် လှန်ရေးတပ်ဖွဲ့ဝင်တွေနဲ့ Local Defense Force (LDF) တွေအားလုံးကို အထူးပဲ လေးစားတန်ဖိုးထားပြီး ၎င်းတို့ရဲ့ လိုအပ်ချက်တွေအတွက် တတ်စွမ်းသမျှ ဖြည့်ဆည်းနိုင်အောင် ကြိုးပမ်းဆောင်ရွက်လျက်ရှိပါတယ်” ဟု ဆက် ပြောသည်။ တော်လှန်ရေး တပ်ဖွဲ့ဝင်များအား စောင့်ရှောက်မှုပေးခြင်းသည် လက်ရှိပဋိပက္ခတွင် အလွန်အရေးကြီးသော ကဏ္ဍ တစ်ခုဖြစ်ပြီး၊ NUG က ယခုကဲ့သို့ တာဝန်ယူမှုသည် ရဲဘော်များ၏ စိတ်ဓာတ်ကို မြှင့်တင်ပေးနိုင်ပြီး တော်လှန်ရေး တည်ငြိမ်ရေးအတွက် အထောက်အကူပြုနိုင်ကြောင်း လေ့လာသူအချို့က သုံးသပ်ကြသည်။

ဒဏ်ရာရနှင့် သေဆုံးရဲဘော်များအတွက် NUG က တာဝန်ယူရန် မူဝါဒ ချမှတ်မည်

Nov 20

ထားဝယ်ခရိုင်အတွက် ဒေသခံရွာသားတစ်ဦး, မြေမြုပ်မိုင်းကြောင့် ဒဏ်ရာရ  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၀ ရက်။  သရက်ချောင်းမြို့နယ်က ရွာသားတစ်ဦး မြေမြုပ်မိုင်းနင်းမိပြီး ဒဏ်ရာ ရသွားခဲ့သည်ဟု ဒေသခံ ရွာသားများက ပြောသည်။   တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်၊ ဝဲရစ်ကျေးရွာတွင် အသက် ၅၅ နှစ်အရွယ် ရွာသားတစ်ဦး လယ်ကွင်းဘေးလမ်းတွင် ထောင်ထားသည့် မြေမြှုပ်မိုင်း နင်းမိခဲ့သဖြင့် ထားဝယ်ဆေးရုံကြီး၌ ဆေးကုသမှု ခံယူနေရကြောင်း ဒေသခံ ရွာသားများက ပြောသည်။   ယခုကဲ့သို့သော မိုင်းအန္တရာယ်များကြောင့် သရက်ချောင်းဒေသခံများသည် ဥယျာဉ်ခြံ လုပ်ငန်းများကို ရပ်နား ထားရပြီး စားဝတ်နေရေး အခက်အခဲနှင့် ရင်ဆိုင်နေရသည်။  ဖြစ်စဉ်သည် နိုဝင်ဘာလ ၁၃ ရက်နေ့က ဝဲရစ်ကျေးရွာတွင် ဖြစ်ပွားခဲ့ခြင်းဖြစ်သည်။  အသက် ၅၅ နှစ်အရွယ် ဦးတင်စိုး နှင့် ၎င်း၏ဇနီးသည်တို့သည် ဆိုင်ကယ်ဖြင့် သွား၍မရသော လမ်းပျက်နေ သည့် နေရာကို လမ်းလျှောက်၍ ဖြတ်သန်းစဉ် လယ်ကွင်းဘေးရှိ လမ်းတစ်နေရာ၌ ထောင်ထားသော မြေမြှုပ် မိုင်းကို နင်းမိခဲ့ခြင်း ဖြစ်သည်။  မိုင်းပေါက်ကွဲမှုကြောင့် ဒဏ်ရာရရှိခဲ့သည့် ဦးတင်စိုးကို ထားဝယ်ဆေးရုံကြီးသို့ ပို့ဆောင်ကာ ဆေးကုသမှု ပေးခဲ့ရသည်။  အသက် ၄၀ ခန့်အရွယ် အမျိုးသမီးတစ်ဦးက “ခြေထောက်နဲ့ နံရိုးနား အစတွေ ထိတယ်၊ သိပ်မစိုးရိမ်ရပါဘူး။ ခြေလည်း မဖြတ်ရဘူးလို့ သူ့အမျိုးသမီးဆီက ကြားရတယ်။ အခုချိန်ထိတော့ ဆေးရုံက ဆင်းမလာသေးဘူး” ဟု ပြောသည်။  မိုင်းနင်းမိသည့် နေရာနှင့် တစ်ဖာလုံခန့် အကွာ ၌ စစ်ကော်မရှင် စစ်ကြောင်းနှင့် ပြည်သူ့ကာကွယ်ရေးတပ် (PDF) တို့အကြား တိုက်ပွဲ ဖြစ်ပွားခဲ့သေးကြောင်းလည်း ၎င်းအမျိုးသမီးက ဆက်လက် ပြောဆိုသည်။  စစ်ကော်မရှင်တပ်ဖွဲ့သည် သရက်ချောင်းမြို့အထွက် ဆင်ကူးမှ ဘုတ်တောင်အထိ ကားလမ်းတစ်လျှောက်ကို အင်အား ၂၀၀ ခန့်ဖြင့် အောက်တိုဘာလ ၂၁ ရက်နေ့ကတည်းက စစ်ကြောင်းထိုးနေသည်မှာ တစ်လနီးပါး ရှိလာပြီ ဖြစ်သည်။  ထိုစစ်ကြောင်း၏ လှုပ်ရှားမှုများကြောင့် သိမ်ကုန်း၊ ဘုတ်တောင်အနီးရှိ ကတွဲ၊ လဘနှင့် ချောက်ချောင်းကျေးရွာ တို့မှ ရွာသားများ၏ နေအိမ်များကိုလည်း မီးရှို့ဖျက်ဆီးမှုများ ဖြစ်ပွားခဲ့သေးသည်ဟု ဒေသခံများက ပြောသည်။  ဒေသခံတစ်ဦးက “သူတို့ (စစ်တပ်) စစ်ကြောင်းထိုးတဲ့အခါ မိုင်းတွေပါ ထောင်ထားခဲ့တာ များတယ်။ ရွာသား တွေက ဥယျာဉ်ခြံထဲတောင် မသွားရဲတော့ဘူး။ အခု ရော်ဘာခြံတွေ၊ ကွမ်းသီးခြံတွေ အားလုံး ရပ်နားထားရ တော့ စားဝတ်နေရေး အခက်အခဲက အရမ်းဆိုးလာပြီ” ဟု ပြောသည်။  စစ်ကော်မရှင်တပ်က စစ်ကြောင်းထိုးနေစဉ် အတွင်း မြေမြှုပ်မိုင်းများကို ထောင်ထားတတ်သည့် အန္တရာယ်များ ကြောင့် ဒေသခံ ရွာသားများသည် ၎င်းတို့၏ ဥယျာဉ်ခြံ လုပ်ငန်းများဖြစ်သော ရော်ဘာ၊ ကွမ်းသီး လုပ်ငန်းများကို ရပ်နားထားကြရသည်ဟု ဆိုကြသည်။

ထားဝယ်ခရိုင်အတွက် ဒေသခံရွာသားတစ်ဦး, မြေမြုပ်မိုင်းကြောင့် ဒဏ်ရာရ 

Nov 20

တက္ကသိုလ်ကျောင်းသားများ ကြိုတင်မဲ ထည့်ရန် ဖိအားပေးခံနေရ  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၀ ရက်။   မြိတ်တက္ကသိုလ် ကျောင်းသားအချို့ စစ်ကော်မရှင်၏ ကြိုတင်မဲ ပေးသွင်းရန် ဖိအားပေးခံနေရသည်ဟု ဒေသခံများနှင့် ကျောင်းသူ/သားများက ပြောသည်။  တနင်္သာရီတိုင်းဒေသကြီး၊ မြိတ်မြို့ရှိ တက္ကသိုလ်ကျောင်းသား/သူ အချို့ကို စစ်ကော်မရှင်က လာမည့် ဒီဇင်ဘာလတွင် ကျင်းပမည့် အတုအယောင် ရွေးကောက်ပွဲအတွက် ကြိုတင်မဲပေးသွင်းရန် ဖိအားပေးနေ ကြောင်း ကျောင်းသား/သူများနှင့် ဒေသခံသတင်းရင်းမြစ်များက ပြောသည်။   ကြိုတင်မဲပေးမှုများ ပြုလုပ်နေသည့် အချိန်တွင် တိုင်းစစ်ကော်မရှင်အဖွဲ့ဝင် ဝန်ကြီးချုပ်အပါအဝင် ဝန်ကြီး အများစုမှာ မြိတ်မြို့သို့ ရောက်ရှိနေကြသည်ဟုလည်း ဆိုသည်။  မြိတ်မြို့နယ်တွင် စစ်ကော်မရှင်က ရွေးကောက်ပွဲကျင်းပမည့် ဒီဇင်ဘာလအတွင်း အခြားတိုင်းနှင့် ပြည်နယ်များ သို့ ပညာသင်သွားရောက်ကြမည့် တက္ကသိုလ်ကျောင်းသား/သူများကို ကြိုတင်မဲထည့်ခိုင်းခြင်း ဖြစ်ကြောင်း ပြည်သူ့ပါတီမှ လွှတ်တော်ကိုယ်စားလှယ်လောင်း ဦးအောင်အောင်က ပြောကြားသည်။  ရွေးကောက်ပွဲ ကော်မရှင်က ရွေးကောက်ပွဲ ကျင်းပမည့် အချိန်အတွင်း မဲဆန္ဒနယ်ပြင်ပ ရောက်ရှိနေမည့် တက္ကသိုလ် ကျောင်းသားများ နိုဝင်ဘာလ ၁၇ ရက်နေ့မှ ၂၁ ရက်နေ့အထိ ကြိုတင်မဲပေးနိုင်ကြောင်း ကြေညာ ထားသည်။  ရွေးကောက်ပွဲ ကျင်းပမည့် ဒီဇင်ဘာလအတွင်း အခြားတိုင်းနှင့် ပြည်နယ်များသို့ ပညာသင်သွားရောက်ကြမည့် တက္ကသိုလ် ကျောင်းသားကျောင်းသူများကို နိုဝင်ဘာလ ၁၃ ရက်နေ့က ကြိုတင်မဲထည့်ခိုင်းခြင်းဖြစ်သည်ဟု ပြည်သူ့ပါတီမှ လွှတ်တော်ကိုယ်စားလှယ်လောင်း ဦးအောင်အောင်က ပြောသည်။  ကြိုတင်မဲပေးခွင့်ရှိသည့် တက္ကသိုလ်ကျောင်းသား စုစုပေါင်း ၃၉ ဦး ရှိပြီး၊ လက်ရှိတွင် ကြိုတင်မဲ လာရောက် ထည့်သူ မည်မျှရှိနေသည်ကိုမူ ရွေးကောက်ပွဲကော်မရှင်အဖွဲ့ကသာ သိရှိနိုင်လိမ့်မည်ဟု ၎င်းက ဆိုသည်။  မြိတ်မြို့ခံ တစ်ဦးက “ဝန်ကြီးချုပ်တွေနဲ့ တိုင်းအဖွဲ့ဝင်တွေပါ မြိတ်ကို ရောက်လာပြီး ကျောင်းသားတွေကို ကြိုတင်မဲပေးခိုင်းတော့ ဖိအားက အရမ်းများပါတယ်။ တကယ်တော့ ကျောင်းသားတွေက ဘယ်သူမှ စိတ်ပါ လက်ပါ မပေးချင်ကြဘူး။ ဒါက အမှန်တကယ် လွတ်လပ်တဲ့ ဆန္ဒမဲပေးမှု မဟုတ်ဘူး၊ အတင်းအဓမ္မ လုပ်ခိုင်းနေ တာ ဖြစ်တယ်ဆိုတာ ကျောင်းသားတွေရော၊ ဒေသခံတွေပါ သိနေကြတယ်” ဟု ပြောသည်။  တစ်ချိန်တည်းတွင် အမျိုးသားညီညွတ်ရေးအစိုးရ (NUG) နှင့် ပြည်သူ့ကာကွယ်ရေးတပ်ဖွဲ့ (PDF) များက စစ်ကော်မရှင်မှ ပြုလုပ်မည့် အတုအယောင် ရွေးကောက်ပွဲကို ပြည်သူများ ဆန့်ကျင်ကန့်ကွက်ကြရန် ဆက်လက် တိုက်တွန်းထားသည်။  NUG အပါအဝင် တော်လှန်ရေး အင်အားစုများက ရွေးကောက်ပွဲအား ဖိအားပေးမဲထည့်ခိုင်းသူများကို တိုင်ကြားနိုင်ကြောင်းနှင့် အတင်းအဓမ္မ မဲပေးခိုင်းစေမှုများကို လက်မခံရန် ထုတ်ပြန်အသိပေးထားသည်။  တနင်္သာရီတိုင်း ဒေသကြီးသည် တော်လှန်ရေး အင်အားစုများနှင့် စစ်ကော်မရှင်တို့အကြား စစ်ရေးပဋိပက္ခများ မကြာခဏ ဖြစ်ပွားနေသည့် ဒေသတစ်ခုဖြစ်သည်။   ယခုကဲ့သို့ ကြိုတင်မဲပေးချိန်တွင် တိုင်းဝန်ကြီးချုပ်နှင့် တိုင်းစစ်ကော်မရှင်အဖွဲ့ဝင် ဝန်ကြီးအများစု မြိတ်မြို့သို့ ရောက်ရှိနေခြင်းသည် ကြိုတင်မဲပေးမှု လုပ်ငန်းစဉ်အပေါ် ဩဇာလွှမ်းမိုးရန် ကြိုးပမ်းခြင်းမျိုး ဖြစ်နိုင်သည်ဟု နိုင်ငံရေး လေ့လာသူအချို့က သုံးသပ်သည်။

တက္ကသိုလ်ကျောင်းသားများ ကြိုတင်မဲ ထည့်ရန် ဖိအားပေးခံနေရ

Nov 19

မြန်မာနိုင်ငံ၏ လူသားချင်းစာနာမှု အကျပ်အတည်း စံချိန်သစ်တင်၊ အနောက်မြောက်နှင့် ရခိုင်ဒေသ အဆိုးဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။  မြန်မာနိုင်ငံသည် ပဋိပက္ခ၊ ရေကြီးမှုနှင့် ၂၀၂၅ ခုနှစ် မတ်လ ငလျင်ဒဏ်တို့ကြောင့် ဖြစ်ပေါ်လာသော အကျပ် အတည်းမျိုးစုံကို ဆက်တိုက်ရင်ဆိုင်နေရပြီး လူသားချင်းစာနာထောက်ထားမှု အခြေအနေမှာ စိုးရိမ်ဖွယ်ရာ ဆိုးရွားနေသည်။   ၂၀၂၅ ခုနှစ်၊ နိုဝင်ဘာလအထိ တစ်နိုင်ငံလုံးတွင် ပြည်တွင်းနေရပ်စွန့်ခွာရသူ (IDPs) အရေအတွက်မှာ ၃.၆ သန်း နီးပါးအထိ ရောက်ရှိခဲ့ရာ စံချိန်တင် အမြင့်ဆုံး အရေအတွက် ဖြစ်လာကြောင်း ကုလသမဂ္ဂ လူသားချင်း စာနာမှု ဆိုင်ရာ ပေါင်းစပ်ညှိနှိုင်းရေးရုံး (UNOCHA) ၏ ထုတ်ပြန်ချက်များအရ သိရသည်။  အထူးသဖြင့် အနောက်မြောက်၊ ရခိုင်နှင့် အရှေ့တောင်ပိုင်းဒေသများသည် ပဋိပက္ခဒဏ်ကို အဆိုးရွားဆုံး ခံစား နေရသည်။   အကြိမ်ကြိမ် ထွက်ပြေးတိမ်းရှောင်လာရသော မိသားစုများသည် အစားအစာ၊ ကျန်းမာရေးစောင့်ရှောက်မှုနှင့် သန့်ရှင်းသောရေ စသည့် မရှိမဖြစ်လိုအပ်သည့် ဝန်ဆောင်မှုများကို အကန့်အသတ်ဖြင့်သာ ရရှိနေသည်။  ကမ္ဘာ့စားနပ်ရိက္ခာ အစီရင်ခံစာများတွင် မြန်မာနိုင်ငံအား ‘အလွန်အရေးကြီးသည့် စိုးရိမ်ဖွယ်ရာ’ အစာငတ်မွတ် မှုဒေသ (hunger hotspot) အဖြစ် ဆက်လက် သတ်မှတ်ထားဆဲဖြစ်သည်။   ရခိုင်ပြည်၊ အထူးသဖြင့် မောင်တောနှင့် ဘူးသီးတောင်မြို့နယ်တို့တွင် အာဟာရ အခြေအနေသည် အလွန်လျင် မြန်စွာ ဆိုးရွားလာဖွယ်ရှိကြောင်း ခန့်မှန်းထားသည်။  ရခိုင် စစ်ရှောင်များအား အကူအညီပေးနေသူ တစ်ဦးက “စခန်းတွေမှာ အရင်ကထက် လူတွေ တိုးလာတာ အရမ်းသိသာတယ်။ အများစုက ကလေးငယ်တွေနဲ့ သက်ကြီးရွယ်အိုတွေပါ။ အစားအစာနဲ့ ဆေးဝါးထောက်ပံ့မှု တွေက မလုံလောက်တော့ဘူး။ တစ်ခါတလေဆို ရေရှားပါးမှုကြောင့် ဝမ်းပျက်ဝမ်းလျှော ရောဂါတွေပါ ဖြစ်လာ မှာ စိုးရိမ်ရတယ်” ဟု ပြောသည်။  ၂၀၂၅ ခုနှစ်၏ ပထမနှစ်ဝက်တွင် မြန်မာနိုင်ငံသည် ပဋိပက္ခ အပြင်းထန်ဆုံး ဒုတိယနိုင်ငံ အဖြစ် သတ်မှတ်ခံခဲ့ရ ပြီး၊ ပဋိပက္ခဖြစ်ပွားသော နယ်မြေများတွင် အရပ်သားများ၏ အခြေအနေမှာ ဆက်လက်ဆိုးရွားနေသည်။   ပဋိပက္ခများအတွင်း မြေမြှုပ်မိုင်းနှင့် အခြားပေါက်ကွဲစေတတ်သည့် လက်နက်များကြောင့် ထိခိုက်မှုများမှာ လည်း ကြီးမားသော စိုးရိမ်စရာ ဖြစ်နေသည်။  UNOCHA ၏ အချက်အလက်များအရ ၂၀၂၅ ခုနှစ် ပထမနှစ်ဝက်တွင် ယင်းလက်နက်များကြောင့် အရပ်သား ၃၅၇ ဦး ထိခိုက်သေဆုံးခဲ့ရပြီး၊ ကလေးသူငယ်များမှာ ထိခိုက်သူစုစုပေါင်း၏ ၂၇ ရာခိုင်နှုန်း အထိ ပါဝင်နေသည်။  ထိုမျှ ကြီးမားသည့် လူသားချင်းစာနာမှု အကျပ်အတည်းကို ရင်ဆိုင်နေရသော်လည်း ၂၀၂၅ ခုနှစ် တစ်နှစ်လုံး အတွက် လိုအပ်သည့် စုစုပေါင်း ရန်ပုံငွေ ဒေါ်လာ ၁.၁ ဘီလီယံ ၏ ၁၅ ရာခိုင်နှုန်း ကိုသာ ယခုထိ ရရှိထားသေး သည်။  ရန်ပုံငွေ ပြတ်လပ်မှုသည် လိုအပ်နေသူ သန်းပေါင်းများစွာအား အသက်ကယ် အကူအညီများ ပေးပို့နိုင်ရေး အတွက် အကြီးအကျယ် ခြိမ်းခြောက်လျက်ရှိသည်။  UNOCHA က ပဋိပက္ခတွင် ပါဝင်သူအားလုံးအနေဖြင့် အရပ်သားများနှင့် အရပ်ဘက် အဆောက်အအုံများကို နိုင်ငံတကာ လူသားချင်းစာနာမှု ဥပဒေ (IHL) အရ ကာကွယ်ပေးရန် အတတ်နိုင်ဆုံး ဆောင်ရွက်ပေးပါရန် အလေးအနက် တိုက်တွန်းနှိုးဆော်ထားသည်။

မြန်မာနိုင်ငံ၏ လူသားချင်းစာနာမှု အကျပ်အတည်း စံချိန်သစ်တင်၊ အနောက်မြောက်နှင့် ရခိုင်ဒေသ အဆိုးဆုံး 

Nov 19

လက်နက်ကိုင် ရွှေခိုးတူးသည့် မြန်မာနိုင်ငံသား ၄ ဦး ထိုင်းအာဏာပိုင်များ ဖမ်းဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။ ထိုင်း-မြန်မာ နယ်စပ်အနီးရှိ ထိန်းသိမ်းထားသော သဘာဝသစ်တောကြီးအတွင်း တရားမဝင် ရွှေခိုးတူးနေသည့် လက်နက်ကိုင်အဖွဲ့တစ်ဖွဲ့မှ မြန်မာနိုင်ငံသား ၃ ဦးနှင့် ဒေသခံ ကရင်တိုင်းရင်းသား ၁ ဦး စုစုပေါင်း ၄ ဦးကို ထိုင်းအာဏာပိုင်များက နိုဝင်ဘာလ ၁၅ ရက်နေ့တွင် ဝင်ရောက်ဖမ်းဆီးခဲ့သည်။ ထောင်ဖာဖုမ် အမျိုးသားဥယျာဉ် ရေဝေရေလဲ ဒေသကို ဖျက်ဆီးနေသည့် ၎င်းတို့အဖွဲ့ထံမှ ရွှေတူးကိရိယာများ အပြင် လက်လုပ်ရိုင်ဖယ်တစ်လက်ကိုပါ သိမ်းဆည်းရမိခဲ့သည်ဟု ထိုင်းသတင်းဌာနများက ဆိုသည်။ အဆိုပါ ဖြစ်စဉ်သည် ထိုင်းနိုင်ငံ၊ ကန်ချနဘူရီပြည်နယ်၊ ထောင်ဖာဖုမ် အမျိုးသားဥယျာဉ် အတွင်းရှိ ပီလော့ခ်ခီ သစ်တောဒေသတွင် ဖြစ်ပွားခဲ့ခြင်းဖြစ်သည်။ အမျိုးသားဥယျာဉ်အကြီးအကဲ Yutthapong Damsrisuk ၏ ပြောကြားချက်အရ သယံဇာတနှင့် သဘာဝ ပတ်ဝန်းကျင်ဝန်ကြီး၏ ညွှန်ကြားချက်ဖြင့် နယ်ခြားစောင့်ရဲ၊ စစ်တပ်နှင့် ပူးပေါင်းကာ လုံခြုံရေးတိုးမြှင့်ခဲ့ခြင်း ဖြစ်သည်။ အာဏာပိုင်များက တပ်ဆင်ထားသည့် CCTV ကင်မရာများမှ နိုဝင်ဘာလ ၁၅ ရက်နေ့၊ ည ၁၀ နာရီအချိန်ခန့် တွင် လက်နက်တို၊ လက်နက်ရှည်များ ကိုင်ဆောင်ထားသည့် သံသယရှိသူ ၁၅ ဦးခန့် တောထဲသို့ ဝင်ရောက်ကာ ရွှေတူးနေသည်ကို ခြေရာခံမိခဲ့သည်။ ည ၁၁ နာရီခွဲ အချိန်ခန့်တွင် အဖွဲ့ဝင်ရောက်စီးနင်းရာ ရွှေခိုးတူးသူအများစုမှာ နယ်မြေကျွမ်းကျင်မှုဖြင့် မှောင်ရိပ်ခိုကာ ထွက်ပြေးလွတ်မြောက်သွားခဲ့သည်။ ထွက်ပြေးသူများထဲမှ မြန်မာနိုင်ငံသား ၃ ဦး နှင့် ဒေသခံ ကရင်တိုင်းရင်းသား ၁ ဦး စုစုပေါင်း ၄ ဦးကို ဖမ်းဆီးရမိခဲ့သည်။ ဖမ်းဆီးရမိသူများထံမှ စုစုပေါင်း ပစ္စည်း ၄၀ မျိုးကို သိမ်းဆည်းရမိခဲ့ပြီး၊ အဓိကအားဖြင့် ရွှေတူးကိရိယာများ ဖြစ်သည့် သံတူရွင်း၊ ဆောက်၊ တူကြီး၊ လက်လုပ် ၂၂ ရိုင်ဖယ်သေနတ် ၁ လက် နှင့် ကျည်ဆန် ၁၀ တောင့်၊ လက်ကိုင်ဖုန်း ၉ လုံး၊ ဝါယာလက် ၂ လုံး နှင့် မြန်မာငွေကျပ်အချို့ကို သိမ်းဆည်းရမိခဲ့သည်ဟု ထုတ်ပြန်သည်။ ထို့အပြင် ထွက်ပြေးသွားအချို့၏ မြန်မာနိုင်ငံသား မှတ်ပုံတင်များကိုလည်း ထိုနေရာတွင် တွေ့ရှိခဲ့ကြောင်း သတင်းများတွင် ဖော်ပြထားသည်။ ဖမ်းဆီးခံရသူများသည် တရားမဝင် နယ်မြေကျူးကျော်မှု၊ သစ်တောဧရိယာကို ခုတ်ထွင်ရှင်းလင်းဖျက်ဆီးမှု စသည့် စွဲချက်များအပြင်၊ လက်နက်ကိုင်ဆောင်မှုဆိုင်ရာ ဥပဒေများဖြင့်ပါ အရေးယူမည်ဖြစ်သည်။ အမျိုးသားဥယျာဉ်အကြီးအကဲ Yutthapong Damsrisuk က “ကျနော်တို့ဟာ ကျနော်တို့ရဲ့ အရေးကြီးတဲ့ ရေဝေ ရေလဲ သစ်တောတွေကို ကာကွယ်ဖို့အတွက် ဥပဒေကို အကောင်အထည် ဖော်သွားမှာပါ။ သဘာဝ သယံဇာတကို ကျူးကျော်ဖျက်ဆီးတဲ့ ဘယ်လိုပုံစံကိုမဆို ရပ်တန့်နိုင်ဖို့ အဖွဲ့အစည်းအားလုံးနဲ့ ပူးပေါင်း ဆောင်ရွက်သွားမယ်” ဟု ပြောသည်။ ဖမ်းဆီးခံရသူ ၄ ဦးကို ပီလော့ခ်ရဲစခန်းသို့ လွှဲပြောင်းပေးအပ်ခဲ့ပြီး၊ ထွက်ပြေးလွတ်မြောက်သွားသည့် ကျန်ရှိသူများကိုလည်း ဖမ်းဆီးရမိရန် ဆက်လက် ခြေရာခံ စုံစမ်းနေကြောင်း ထိုင်းသတင်းဌာနများက ဆိုသည်။

လက်နက်ကိုင် ရွှေခိုးတူးသည့် မြန်မာနိုင်ငံသား ၄ ဦး ထိုင်းအာဏာပိုင်များ ဖမ်းဆီး

Nov 19

KNU က ဘားအံမြို့နယ်အတွင်း ရွေးကောက်ပွဲကို တရားဝင်ပိတ်ပင် ဆန့်ကျင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။ ကရင်အမျိုးသား အစည်းအရုံး KNU က ဘားအံနယ်မြေအတွင်း စစ်ကော်မရှင်၏ ရွေးကောက်ပွဲကို တရားဝင် ပိတ်ပင် ဆန့်ကျင်လိုက်ပြီး ပြည်သူ့ဆန္ဒ အလွဲသုံးစားလုပ်ခြင်းဟု ထုတ်ပြန် ပြောဆိုလိုက်သည်။ ကရင်အမျိုးသားအစည်းအရုံး (KNU) ဒူးသထူခရိုင် - ဘားအံမြို့နယ် အလုပ်မှုဆောင်ကော်မတီက စစ်ကော်မရှင် က လာမည့် ဒီဇင်ဘာလ ၂၈ ရက်နေ့တွင် ကျင်းပရန် ပြင်ဆင်နေသည့် ရွေးကောက်ပွဲကို ၎င်းတို့ ထိန်းချုပ်နယ်မြေ အတွင်း လုံးဝ ခွင့်ပြုမည်မဟုတ်ဘဲ ဆန့်ကျင်သွားမည်ဟု နိုဝင်ဘာလ ၁၇ ရက်နေ့တွင် တရားဝင် ထုတ်ပြန် ကြေညာလိုက်သည်။ KNU ၏ ထုတ်ပြန်ချက်အရ၊ စစ်ကော်မရှင်သည် နိုင်ငံတစ်ဝန်းတွင် စစ်ရာဇဝတ်မှုများကို ပေါ်ပေါ်ထင်ထင် ကျူးလွန်နေသည့် အဖွဲ့ဖြစ်ပြီး၊ ၎င်းတို့ ကျင်းပမည့် ရွေးကောက်ပွဲသည် တိကျမှန်ကန်သည့် ရလဒ်မဟုတ်ဘဲ ပြည်သူ့ သဘောဆန္ဒကို အလွဲသုံးစားပြုမည့် အတုအယောင် ရွေးကောက်ပွဲ သာဖြစ်ကြောင်း သတ်မှတ်သည်။ KNU ဒူးသထူခရိုင် - ဘားအံမြို့နယ် အလုပ်မှုဆောင်ကော်မတီက ဒေသခံပြည်သူများကို စစ်အာဏာရှင် သက်ဆိုး ရှည်စေမည့် ယင်းရွေးကောက်ပွဲတွင် ပူးပေါင်းပါဝင်ခြင်း မပြုဘဲ၊ အကြမ်းမဖက်သောနည်းဖြင့် ဆန့်ကျင်ရန် တိုက်တွန်းထားသည်။ KNU ၏ ပြောဆိုချက်တွင် စစ်ကော်မရှင်သည် ၎င်းတို့၏ ရွေးကောက်ပွဲ အောင်မြင်ရေးအတွက် ပြည်သူလူထု အပေါ် ဖိအားပေးမှုများ ပြုလုပ်နေကြောင်း ဖော်ပြသည်။ စစ်ကော်မရှင်သည် စစ်မှုထမ်းဥပဒေနှင့် စစ်ဘေးဒဏ်များကို အသုံးချပြီး ပြည်သူများအား မိမိနေရပ်သို့ မပြန်နိုင်အောင် ပြုလုပ်နေသည်။ ကျန်ရှိနေသော ပြည်သူများကိုလည်း ခြိမ်းခြောက်ဖိအားပေးကာ အတင်းအဓမ္မ မဲပေးခိုင်းစေမှုများ ဖြင့် ရင်ဆိုင်နေရသည်ဟု ဆိုသည်။ ထို့အပြင် စစ်ကော်မရှင်သည် ရွေးကောက်ပွဲစနစ်ကို ပြည်သူများ နားလည်ရခက်ခဲစေသော မဲပေးနည်းစနစ်များ၊ အထူးသဖြင့် ၎င်းတို့လိုချင်သည့် ရလဒ်ထွက်စေရန် ရည်ရွယ်သည့် အီလက်ထရောနစ်မဲပေးသည့် လုပ်ငန်းစဉ် များကို အသုံးပြုနေသည်ဟု KNU က ထောက်ပြသည်။ ကရင်စစ်ရှောင်များကို အကူအညီပေးနေသူ တစ်ဦးက "ဒီနယ်မြေမှာဆို စစ်ကြောင့် ပြည်သူတွေ ဘေးလွတ်ရာ ထွက်ပြေးနေရတာ၊ စားဝတ်နေရေး ခက်ခဲနေရတာတွေပဲ ရှိတယ်။ ဒီလိုအခြေအနေမှာ ရွေးကောက်ပွဲ လုပ်မယ် ဆိုတာဟာ လူထုရဲ့ အခက်အခဲကို လုံးဝ မထောက်ထားဘဲ သူတို့ရဲ့ နိုင်ငံရေး ထွက်ပေါက် တစ်ခုတည်းကိုပဲ ကြည့်တာဖြစ်ပါတယ်” ဟု ပြောသည်။ အဆိုပါ ရွေးကောက်ပွဲကို အဓိက တော်လှန်ရေး အင်အားစုများဖြစ်သည့် အမျိုးသားညီညွတ်ရေးအစိုးရ (NUG)၊ ကရင်အမျိုးသား အစည်းအရုံး (KNU) အပါအဝင် အာရက္ခတပ်တော် (AA) စသည့် အဖွဲ့အစည်းများကလည်း တရားမဝင်သော အတုအယောင် ရွေးကောက်ပွဲအဖြစ် ပြင်းပြင်းထန်ထန် ဆန့်ကျင်ထားသည်။ နိုင်ငံရေး လေ့လာသူတစ်ဦးက “KNU ကနေ နယ်မြေဒေသအလိုက် ပြတ်သားတဲ့ ဆန့်ကျင်မှုကို ပြသလိုက်တာ ဟာ စစ်ကောင်စီရဲ့ ရွေးကောက်ပွဲကို တရားဝင်မှု (legitimacy) လုံးဝ မပေးဘူးဆိုတာ ပြသလိုက်တာပဲ” ဟု ပြောသည်။ ပြီးခဲ့သည့် နိုဝင်ဘာလ ၂ ရက်နေ့ကလည်း ကရင်ပြည်၊ ဘားအံမြို့တွင် စစ်ကော်မရှင် လက်အောက်ခံ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ၏ ဆိုင်းဘုတ်ကို ဆုတ်ဖြဲမှုဖြင့် လူငယ်နှစ်ဦး ဖမ်းဆီးခံခဲ့ ရသေးရာ ရွေးကောက်ပွဲနှင့် ပတ်သက်သည့် ဖိနှိပ်မှုများ ရှိနေကြောင်း ထပ်မံတွေ့ရှိရသည်။ ဘားအံမြို အမှတ် ၂ ရပ်ကွက်၊ အုပ်ချုပ်ရေးမှူးရုံး ရှေ့၌ စိုက်ထူထားသည့် USDP ပါတီက လွှတ်တော်ကိုယ်စား လှယ်လောင်း ဝန်ကြီးချုပ်ဦး စောမြင့်ဦး၏ မဲဆွယ်ဗီနိုင်းဖျက်ဆီးခံရပြီး လူငယ် ၂ ဦးကို စစ်ကော်မရှင်က ဖမ်းဆီးခဲ့ပြီး ပုဒ်မ ၂၄ - က ဖြင့် အမှုဖွင့်ထားခြင်း ဖြစ်သည်။

KNU က ဘားအံမြို့နယ်အတွင်း ရွေးကောက်ပွဲကို တရားဝင်ပိတ်ပင် ဆန့်ကျင်

Nov 19

ကချင်စစ်မျက်နှာ ဆက်လက် တင်းမာ၊ ဖားကန့်၌ ကျောက်တူးသူများပါ ဒရုန်းဗုံး ဒဏ်ခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။ ကချင်ပြည်၊ ဗန်းမော်၊ ဖားကန့်နှင့် ပူတာအိုခရိုင်တို့၌ ကချင်လွတ်လပ်ရေး တပ်မတော် (KIA) နှင့် စစ်ကော်မရှင် တပ်တို့ကြား စစ်ရေးတင်းမာမှုများ ဆက်လက်မြင့်တက်နေပြီး လေယာဉ်နှင့် ဒရုန်းဖြင့် တိုက်ခိုက်မှုများ စံချိန် တင် မြင့်တက်လာကာ အရပ်သားများ ထိခိုက်မှုနှုန်းလည်း မြင့်မားလျက်ရှိသည်။ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက “တိုက်ပွဲက နေ့တိုင်းလိုလို ဖြစ်တာ ရှိပါတယ်။ ဒါကြောင့် ကချင်ပြည်နယ် တစ်ခုလုံးနဲ့ ခြုံပြီးမှ ပြောမယ်ဆိုရင်တော့ ဗန်းမော်၊ နောက် ဝိုင်းမော်၊ ဖားကန့် အခြေအနေ ကတော့ တင်းမာတဲ့ အနေအထား ဖြစ်ပါတယ်။ Y-12 နဲ့ ဗုံးကြဲတာတွေ၊ ဂျက်ဖိုက်တာနဲ့ ပစ်တာတွေ လက်နက် ကြီးတွေ လေကြောင်းတွေ ဒါကတော့ ပြောစရာမလိုပါဘူး နေ့တိုင်းရှိပါတယ်” ဟု ပြောသည်။ နိုဝင်ဘာလ ဒုတိယပတ်အတွင်း မြေပြင်တိုက်ပွဲပေါင်း ၅၇ ကြိမ်အထိ ဖြစ်ပွားခဲ့ကြောင်း KIO/KIA ၏ ထုတ်ပြန် ချက်အရ သိရသည်။ KIO/KIA ပြန်ကြားရေးဌာန၏ နိုဝင်ဘာလ ၁၆ ရက်နေ့ ထုတ်ပြန်ချက်အရ နိုဝင်ဘာ ၁၀ ရက်မှ ၁၆ ရက်နေ့ အတွင်း ဗန်းမော်၊ ဖားကန့်၊ ဝိုင်းမော် (လမြန်) နယ်မြေများတွင် တိုက်ပွဲပေါင်း ၅၇ ကြိမ် ဖြစ်ပွားခဲ့သည်။ တိုက်ခိုက်မှုများသည် KIA တပ်မဟာ ၇၊ ၄ နှင့် ၁ နယ်မြေများတွင် အများဆုံးဖြစ်ပွားခဲ့ပြီး ဗန်းမော် စစ်မျက်နှာပြင်တွင် ခုခံတိုက်ပွဲ ၄၇ ကြိမ်၊ ဝိုင်းမော်/လမြန် စစ်မျက်နှာပြင်တွင် ၁၀ ကြိမ်အထိ ဖြစ်ပွားခဲ့သည်။ KIA ပူးပေါင်းတပ်များ၏ ခုခံတိုက်ခိုက်မှုကြောင့် စစ်ကော်မရှင်တပ်ဘက်မှ ထိခိုက်ကျဆုံးမှု များပြားခဲ့ကြောင်း တော်လှန်ရေးအဖွဲ့များက ပြောဆိုသည်။ စစ်ကော်မရှင်တပ်ဖွဲ့များသည် စစ်မြေပြင် ထိတွေ့မှုများမရှိသည့် နေရာများနှင့် အရပ်သားများ၏ စီးပွားရေး လုပ်ငန်းခွင်များကို ပစ်မှတ်ထား တိုက်ခိုက်နေသည်။ ဖားကန့်မြို့နယ်၊ မရှီကထောင်ရပ်ကွက်ထဲ ကျောက်စိမ်းမှော်တစ်ခုတွင် စက်ယန္တရားများမပါဘဲ လက်ကျင်းတူး ရှာဖွေနေသည့် သူများအား ဒရုန်းဖြင့် ဗုံး ၃ လုံး ကြဲချခဲ့ရာ အရပ်သားများ ထိခိုက်မှုရှိခဲ့သည်။ နိုဝင်ဘာလ ၆ ရက်နေ့မှ စတင်ကာ တိုက်ပွဲများပြန်ဖြစ်နေသည့် ဖားကန့်တွင် နိုဝင်ဘာလ ၁၁ ရက်နေ့၌ လေကြောင်း တိုက်ခိုက်မှုကြောင့် ကလေးမိခင်တစ်ဦး သေဆုံးကာ ကလေးငယ်တစ်ဦး ဒဏ်ရာရခဲ့ပြီး၊ နိုဝင်ဘာ လ ၁၃ ရက်နေ့၌လည်း လက်နက်ကြီး ပစ်ခတ်မှုကြောင့် ကလေးငယ်တစ်ဦးနှင့် ကျောင်းဆရာမတစ်ဦး ဒဏ်ရာရခဲ့သည်။ ထို့အပြင် ဝိုင်းမော်မြို့နယ်ရှိ ဆဒုံးမြို့ကို နိုဝင်ဘာ ၁၆ ရက်နေ့တွင် Y-12 ရဟတ်ယာဉ်ဖြင့် ဗုံး ၂ လုံး ရုတ်တရက် ကြဲချတိုက်ခိုက်ခဲ့သည်။ ဆဒုံးမြို့သည် နှစ်ဖက်တပ်ဖွဲ့ ထိတွေ့တိုက်ပွဲ မရှိခဲ့ဘဲ လေကြောင်းမှ ဗုံးကြဲခံရခြင်း ဖြစ်သည်။ ဒေသခံတစ်ဦးက “တိုက်ပွဲမရှိဘဲ လေကြောင်းကနေ ဗုံးလာကြဲသွားတာပါ။ လူတွေက စိုးရိမ်မှုရှိကြတာပေါ့ ဗျာနော်။ ဘာလို့လဲဆိုတော့ တိုက်ပွဲဖြစ်ဖြစ် မဖြစ်ဖြစ် သူတို့က လေကြောင်းရော ဒရုန်းနဲ့ပါ ဗုံးကြဲ တိုက်ခိုက် တာဆိုတော့။ ဗုံးကြဲပြီဆိုရင်လည်း လူထုတွေ နေတဲ့ နေရာတွေကိုပဲ တည့်တည့်လာပစ်ထည့်တာဆိုတော့” ဟု ပြောသည်။ အလားတူ ကချင်ပြည် မြောက်ပိုင်း၊ ပူတာအိုခရိုင်၌လည်း စစ်ရေးတင်းမာမှု မြင့်တက်လာနေသည်။ နိုဝင်ဘာလ ၁၆ ရက်နေ့တွင် တန်ဂျာကျေးရွာအနီး မလိခမြစ်ကြောင်းအတိုင်း စစ်ရေးလှုပ်ရှားလာသော စစ်ကော်မရှင် ပူးပေါင်းတပ် နှင့် KIA ပူးပေါင်းတပ်တို့ ထိတွေ့တိုက်ပွဲဖြစ်ပွားခဲ့သည်။ အဆိုပါ တိုက်ပွဲအတွင်း စစ်ကော်မရှင် ပူးပေါင်းတပ်မှ တပ်ဖွဲ့ဝင်အချို့ ထိခိုက်သေဆုံးမှုရှိပြီး လက်နက်အချို့ သိမ်းဆည်းရမိခဲ့ကြောင်း တော်လှန်ရေးတပ်ဖွဲ့ဝင်တစ်ဦးက ပြောသည်။ စစ်ကော်မရှင်တပ်သည် ပူတာအိုခရိုင်အတွင်း လေကြောင်းဗုံးကြဲမှုများလည်း ပြုလုပ်နေပြီး၊ နိုဝင်ဘာလ ၁၂ ရက်နေ့က မြစ်ကြီးနား - ပူတာအို လမ်းပိုင်းရှိ အင်ဆိုင်းယာန်ကျေးရွာကို ဗုံး ၃ လုံး ကြဲချတိုက်ခိုက်ခဲ့သည်။ တိုက်ပွဲများ ဆက်တိုက် ဖြစ်ပွားနေခြင်းနှင့် စစ်ကော်မရှင်တပ်၏ လေကြောင်း၊ လက်နက်ကြီး အသုံးပြုမှု မြင့်တက်လာခြင်းကြောင့် ဖားကန့်၊ မချမ်းဘော့နှင့် ပူတာအိုမြို့နယ်များရှိ အရပ်သားများ၏ လုံခြုံရေး အခြေအနေမှာ စိုးရိမ်ဖွယ်ရာ ဖြစ်နေသည်။ စစ်ရေးလေ့လာသူတစ်ဦးက "KIA ထုတ်ပြန်ချက်အရ လေကြောင်းနဲ့ ဒရုန်း အသုံးပြုမှု ပမာဏက အရင်ကာလ တွေထက် သိသိသာသာကို များလာတယ်။ ဒါဟာ စစ်ကောင်စီရဲ့ မြေပြင်အင်အား အားနည်းလာတာကြောင့် အရပ်သား ပစ်မှတ်တွေကိုပါ ရည်ရွယ်ချက်ရှိရှိ ထိပါးလာတဲ့ ပုံစံမျိုးလို့ သုံးသပ်ရတယ်။ ဒီအခြေအနေဟာ ဒေသခံတွေရဲ့ စိတ်ပိုင်းဆိုင်ရာ လုံခြုံရေးအတွက် အရမ်းကို စိုးရိမ်စရာပါ” ဟု ပြောသည်။ လက်ရှိတွင် KIA/KPDF ပူးပေါင်းတပ်များက ဒေသခံပြည်သူများအား စစ်ကော်ရှင်တပ်၏ ရမ်းသမ်းပစ်ခတ်မှုနှင့် လေကြောင်းတိုက်ခိုက်မှုများကို သတိပြုကြရန် ထပ်မံ သတိပေးထားသည်။

ကချင်စစ်မျက်နှာ ဆက်လက် တင်းမာ၊ ဖားကန့်၌ ကျောက်တူးသူများပါ ဒရုန်းဗုံး ဒဏ်ခံရ

Nov 18

ရခိုင်တွင် စာသင်ကျောင်းနှင့် အရပ်သား ပစ်မှတ်များ ဗုံးကြဲခံနေရ သတင်းနှင့် မီဒီယာ ကွန်ရက်၊ ၂၀၂၅ ခုနှစ်၊ နိုဝင်ဘာလ ၁၈ ရက်။ ရခိုင်ပြည်တွင် စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှု အရှိန်မြှင့်လုပ်နေပြီး စာသင်ကျောင်းနှင့် အရပ်သားပစ်မှတ်များ ဗုံးကြဲခံရသည်ဟု ဒေသခံများက ပြောသည်။ ရခိုင်ပြည်အတွင်း စစ်ကော်မရှင်တပ်၏ လေကြောင်းနှင့် လက်နက်ကြီး အသုံးပြု တိုက်ခိုက်မှုများမှာ အရေအတွက် များပြားလာနေပြီး နိုဝင်ဘာလ ၁၇ ရက်နေ့ တစ်ရက်တည်းမှာပင် စစ်တွေနှင့် ကျောက်ဖြူမြို့နယ် များတွင် လေကြောင်းတိုက်ခိုက်မှု ၅ ကြိမ်အထိ ပြုလုပ်ခဲ့ကြောင်း အာရက္ခတပ်တော် (AA) က ထုတ်ပြန်သည်။ အထူးသဖြင့် ကျောက်ဖြူမြို့နယ်အတွင်းရှိ စာသင်ကျောင်းတစ်ကျောင်းကို လေကြောင်းဗုံးကြဲပြီးနောက် အသေခံဒရုန်းဖြင့်ပါ ထပ်မံတိုက်ခိုက်ခဲ့သည့် ဖြစ်စဉ် သည် စစ်ကော်မရှင်တပ်၏ အရပ်သားများကို ပစ်မှတ်ထား တိုက်ခိုက်မှုများ ဆိုးရွားလာသည်ကို ပြသနေကြောင်း ဒေသခံများက ပြောဆိုသည်။ “စာသင်ကျောင်း၌ စာသင်ကြားနေကြသော ကျောင်းသား၊ ကျောင်းသူများမှာ အချိန်မီ ရွှေ့ ပြောင်းနိုင်ခဲ့၍ အသက်သေဆုံး၊ ဒဏ်ရာရမှု မရှိခဲ့သော်လည်း ၎င်းစာသင်ကျောင်းအနီးရှိ ဝက် (၂) ကောင် သေဆုံးခဲ့ကာ စာသင်ကျောင်း အဆောက်အအုံမှာ ထိခိုက်ပျက်စီးမှုများရှိခဲ့သည်” ဟု AA က ဆိုသည်။ AA ၏ ထုတ်ပြန်ချက်အရ စစ်ကော်မရှင်တပ်သည် နိုဝင်ဘာလ ၁၇ ရက်နေ့၊ ညနေ ၄ နာရီခွဲခန့်တွင် စစ်တွေမြို့ နယ်၊ အမြင့်ကျွန်းတံတားအနီး ကို Y-12 လေယာဉ်ဖြင့် ဗုံးအလုံး ၆၀ ခန့် ကြဲချခဲ့သည်။ ထို့အပြင် ကျောက်ဖြူမြို့နယ်ရှိ ကျောက်ကလေ၊ မင်းရပ်နှင့် လိပ်တင်ကျေးရွာများကိုလည်း အဆက်မပြတ် တိုက်ခိုက်ခဲ့သည်။ လူနေကျေးရွာများကို ပစ်မှတ်ထား တိုက်ခိုက်မှုများထဲတွင် ကျောက်ဖြူမြို့နယ်၊ လိပ်တင်ကျေးရွာ စာသင် ကျောင်းသည် အဆိုးဆုံး ဖြစ်စဉ်တစ်ခုအဖြစ် ပေါ်ထွက်ခဲ့သည်။ နေ့လယ်ပိုင်းတွင် လေကြောင်းမှ ဗုံးကြဲတိုက်ခိုက်ခဲ့ပြီး၊ မိနစ်ပိုင်းအကြာမှာပင် အသေခံဒရုန်း (Suicide Drone) တစ်စင်း ဖြင့် စာသင်ကျောင်းကို ထပ်မံ တိုက်ခိုက်ခဲ့သည်။ ကျောင်းသား၊ ကျောင်းသူများကို အချိန်မီ ရွှေ့ပြောင်းနိုင်ခဲ့ခြင်းကြောင့် လူအသေအပျောက်မရှိခဲ့သော်လည်း စာသင်ကျောင်းအဆောက်အအုံ ထိခိုက်ပျက်စီးခဲ့ရသည်ဟု AA က ဆိုသည်။ ထို့အပြင် ဇင်ချောင်းကမ်းခြေရှိ စစ်သင်္ဘော နှစ်စီးပေါ်ကနေလည်း လက်နက်ကြီးများဖြင့် မင်းရပ်နှင့် သံချောင်း ကျေးရွာများကို ပစ်ခတ်တိုက်ခိုက်ခဲ့သည်။ ဤဖြစ်စဉ်များ မတိုင်မီ နိုဝင်ဘာလ ၁၅ ရက်နေ့ကလည်း ရသေ့တောင်မြို့နယ်၊ ဘာထလေနှင့် နွားတင်းကုပ် ကျေးရွာတို့ကို လေယာဉ်ဖြင့် ပစ်ခတ်တိုက်ခိုက်ခဲ့ရာ အရပ်သား ၅ ဦး သေဆုံးပြီး ၆ ဦး ဒဏ်ရာရရှိခဲ့သည်။ စစ်ကော်မရှင်တပ်၏ လေကြောင်း တိုက်ခိုက်မှုများကြောင့် ဒေသခံများ၏ စိုးရိမ်မှုမှာ အမြင့်ဆုံးသို့ ရောက်ရှိ နေကြောင်း ကျောက်ဖြူဒေသခံတစ်ဦးက ပြောသည်။ ကျောက်ဖြူဒေသခံတစ်ဦးက “အရင်ကလို တိုက်ပွဲနယ်မြေမှာပဲ မဟုတ်တော့ဘူး။ အခုက လူနေတဲ့ရွာတွေ၊ စာသင်ကျောင်းတွေပါ ရည်ရွယ်ချက်ရှိရှိ ပစ်မှတ်ထားလာတာကို တွေ့နေရတယ်။ ဘယ်နေရာမှ လုံခြုံမှု မရှိတော့ဘူး။ လေယာဉ်သံကြားတာနဲ့ အသက်လုပြီး ပြေးနေရတာပဲ” ဟု ပြောသည်။ AA အနေဖြင့် စစ်ကော်မရှင်တပ်က ကျောက်ဖြူမြို့ရှိ အရပ်သားကျေးရွာများကို လေကြောင်း၊ လက်နက်ကြီး များဖြင့် ဆက်တိုက်တိုက်ခိုက်နေသည့်အတွက် ဒေသခံပြည်သူများကို လေကြောင်းရန်ကို အထူးသတိထား ကြရန် ထပ်မံ သတိပေးထားသည်။

ရခိုင်တွင် စာသင်ကျောင်းနှင့် အရပ်သား ပစ်မှတ်များ ဗုံးကြဲခံနေရ

Nov 18

ကချင်ပြည် မြို့နယ် ၄ ခုတွင် တိုက်ပွဲများ ဖြစ်ပွားနေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၈ ရက်။ ကချင်ပြည်တွင် စစ်ရေးတင်းမာမှု မြို့နယ် ၄ ခုအထိ ပြန့်နှံ့နေပြီး ဖားကန့်တွင် အရပ်သားများ လေကြောင်းနှင့် လက်နက်ကြီး ဒဏ်ခံနေရသည်ဟု ဒေသခံများနှင့် KIO ပြောခွင့်ရက ပြောသည်။ ကချင်ပြည် အတွင်း နိုဝင်ဘာလ ဒုတိယပတ်တွင်း စစ်ကော်မရှင်တပ်နှင့် ကချင်လွတ်လပ်ရေး တပ်မတော် (KIA) တို့အကြား စစ်ရေးတင်းမာမှု နှင့် တိုက်ပွဲများသည် ဗန်းမော်၊ ဝိုင်းမော်၊ ဖားကန့်နှင့် ခေါင်လန်ဖူး စသည့် မြို့နယ်လေးခုအထိ ကျယ်ကျယ် ပြန့်ပြန့် ဖြစ်ပွားနေခြင်း ဖြစ်သည်။ အထူးသဖြင့် ဖားကန့်ဒေသတွင် လေကြောင်းနှင့် လက်နက်ကြီး တိုက်ခိုက်မှုများကြောင့် အရပ်သား သေဆုံး ထိခိုက်မှုများ ဆက်တိုက် ဖြစ်ပွားနေကြောင်း KIO/KIA ပြောခွင့်ရနှင့် ဒေသခံသတင်းရင်းမြစ်များက အတည်ပြုသည်။ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက “ကချင်ပြည်နယ်မှာ တိုက်ပွဲကတော့ ဗန်းမော်၊ နောက် ဝိုင်း မော်၊ ဖားကန့်၊ နောက် ဟိုးခေါင်လန်ဖူးဖက်မှာ အဲဒီလေးနေရာမှာကတော့ တိုက်ပွဲက နေ့တိုင်းလို ဖြစ်တာ ရှိပါ တယ်။ ဒါကြောင့် ကချင်ပြည်နယ် တစ်ခုလုံးနဲ့ ခြုံပြီးမှ ပြောမယ်ဆိုရင်တော့ ခုနပြောတဲ့နေရာမှာကတော့ စစ် ရေး အခြေအနေကတော့ တင်းမာတဲ့ အနေအထား ဖြစ်ပါတယ်” ဟု ပြောသည်။ ဗန်းမော်မြို့နယ်သည် စစ်ရေးတင်းမာမှု အမြင့်ဆုံးနေရာတစ်ခုအဖြစ် ဆက်လက်တည်ရှိနေပြီး၊ KIA က လက် လွှတ်သွားသည့် နေရာများကို ပြန်လည်ထိန်းချုပ်ရန် ကြိုးပမ်းနေချိန်တွင် စစ်ကော်မရှင်ကလည်း နယ်မြေ ပြန်လည် စိုးမိုးရန် ထိုးစစ်ဆင်တိုက်ခိုက်နေသည်။ တိုက်ပွဲများသည် စကခ (၂၁) ဝန်းကျင်၊ နမ်ဖား၊ တာမိုင်းတုံ၊ ဗန်းမော်တက္ကသိုလ်လမ်းမှ မိုးမောက်ဘက်တက် သည့် ၃ မိုင်ဝန်းကျင် နေရာများတွင် ဆက်တိုက် ဖြစ်ပွားနေသည်။ ဗိုလ်မှူးကြီး နော်ဘူက ဗန်းမော်ဒေသ တိုက်ပွဲနှင့် ပတ်သက်၍ “ဗန်းမော်ကတော့ နေရာကတော့ ကျယ်ပြန့် တယ်။ ဆိုတော့ ဟိုဖက်က နည်းနည်း ဆုတ်ပေးလိုက် ဒီဖက်က ကျနော်တို့ ပြန်သိမ်းလိုက် အဲ့လိုမျိုး ပုံစံလေး ပေါ့ နည်းနည်းတော့ ရှေ့တန်းက တိုက်ပွဲပုံစံတော့ အဲလိုဖြစ်နေတယ်။ လေကြောင်းကတော့ Y-12 နဲ့ ဗုံးကြဲတာ တွေ၊ ဂျက်ဖိုက်တာနဲ့ ဂန်းရှင်းနဲ့ ပစ်တာတွေ ဒါကတော့ မော်တာ အသုံးပြုပြီးမှ ပစ်တာတွေ လက်နက်ကြီးတွေ လေကြောင်းတွေ ဒါကတော့ ပြောစရာ မလိုပါဘူး နေ့တိုင်းရှိပါတယ်” ဟု ပြောသည်။ ထို့အပြင် ဖားကန့်မြို့နယ်တွင် နိုဝင်ဘာလ ဒုတိယပတ်အတွင်း စစ်ကော်မရှင်တပ်ဖွဲ့များသည် မြေပြင်တွင် ထိခိုက်မှုများပြားလာ၍ လေကြောင်း နှင့် လက်နက်ကြီးများကို ပိုမိုအသုံးပြုလာခဲ့ရာ အရပ်သားထိခိုက်မှုများ ဖြစ်ပေါ်ခဲ့သည်။ နိုဝင်ဘာလ ၁၁ ရက်နေ့၊ မွန်းလွဲပိုင်းတွင် ဖားကန့်၊ ကထန်ကွက်သစ်ကို စစ်ကော်မရှင်တပ်၏ Y-12 လေယာဉ်ဖြင့် ဗုံးကြဲတိုက်ခိုက်ခဲ့ရာ အသက် ၄၀ ဝန်းကျင် အမျိုးသမီးတစ်ဦး နေရာတွင်ပင် သေဆုံးခဲ့ပြီး၊ ၎င်း၏ ၅ နှစ်အရွယ် သားငယ်မှာ ပြင်းထန်ဒဏ်ရာများ ရရှိခဲ့သည်။ နိုဝင်ဘာလ ၁၃ ရက်နေ့တွင်လည်း ဖားကန့် ဗျူဟာကုန်းမှ လက်နက်ကြီးဖြင့် ပစ်ခတ်မှုကြောင့် လုံးခင်းအုပ်စု၊ မားဆားရွာက မူကြိုကျောင်းဝန်းထဲကို ကျရောက်ပေါက်ကွဲ ခဲ့ရာ ဆရာမတစ်ဦးနှင့် ၄ နှစ်အရွယ် ကလေးငယ် တစ်ဦး ဒဏ်ရာရရှိခဲ့သည်။ ဗိုလ်မှူးကြီး နော်ဘူက “ဗျူဟာကုန်း ဖက်ကနေ လက်နက်ကြီးနဲ့ လှမ်းပစ်လို့ ပြည်သူလူထုတွေ ထိခိုက်တာတော့ ရှိပါတယ်။ ဟိုတနေ့ကတော့ ပြည်သူလူထုတွေ ထိခိုက်တာရှိတယ်။ နောက် လေကြောင်းနဲ့ ပြည်သူလူထုရှိတဲ့ ဖက်ကို ဗုံးကြဲလို့ ပြည်သူလူထု ထိခိုက်တာတွေရှိပါတယ်” ဟု ပြောသည်။ ဝိုင်းမော်ဒေသတွင် မြေပြင်တိုက်ပွဲများ ငြိမ်သက်နေသော်လည်း ဒရုန်းနှင့် လက်နက်ကြီးပစ်ခတ်မှုများ၊ ဂျက်ဖိုက် တာဖြင့် ပစ်ခတ်မှုများ ဆက်လက်ရှိနေဆဲဖြစ်ပြီး ခေါင်လန်ဖူးဖက်တွင်လည်း တိုက်ပွဲများ နေ့တိုင်းလိုလို ဖြစ်ပွားနေဆဲ ဖြစ်သည်။ KIO/KIA နှင့် PDF ပူးပေါင်းတပ်ဖွဲ့များသည် ကချင်ပြည်သူများကို လေကြောင်းနှင့် လက်နက်ကြီး အန္တရာယ်ကို အထူးသတိထားကြရန် သတိပေးထားသည်။

ကချင်ပြည် မြို့နယ် ၄ ခုတွင် တိုက်ပွဲများ ဖြစ်ပွားနေ

« Prev 1 … 92 93 94 95 96 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close