NMG Doh – Page 96 – Network Media Group

NMG Doh

Author: NMG Doh

Nov 13

တနင်္သာရီတိုင်းအတွင်း ထိုင်းနယ်စပ်တွင် တိုက်ပွဲများ ပြင်းထန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၃ ရက်။ တနင်္သာရီတိုင်း ထိုင်းနယ်စပ် မောတောင်တွင် တိုက်ပွဲများ ပြင်းထန်နေပြီး စစ်ကော်မရှင်၏ လေကြောင်းဖြင့် ဗုံးကြဲတိုက်ခိုက်မှု ကြောင့် မြို့မဈေး မီးလောင်သွားသည့်အပြင် ဒေသခံများ ဘေးလွှတ်ရာသို့ ထွက်ပြေးတိမ်းရှောင်နေကြရသည်။ တနင်္သာရီတိုင်း၊ မောတောင်မြို့တွင် နိုဝင်ဘာလ ၁၀ ရက်နေ့က စတင်ခဲ့သော တော်လှန်ရေးတပ်ဖွဲ့များနှင့် စစ်ကော်မရှင်တပ်တို့မှာ မြေပြင်၌ တိုက်ပွဲများ ပြင်းထန်လာပြီးနောက် လေကြောင်းမှပါ ထိုးစစ်ဆင် တိုက်ခိုက်မှုများ လုပ်လာသည်ဟု ဒေသခံများက ပြောသည်။ နိုဝင်ဘာလ ၁၂ ရက်နေ့တွင် စစ်ကော်မရှင်က လေကြောင်းမှ ဗုံးကြဲတိုက်ခိုက်ခဲ့ရာ မြို့မဈေး၊ နာရီစင်နှင့် မွန်ကျောင်းတို့ မီးလောင်ပျက်စီးကာ မြို့ခံ ၂၀၀၀ နီးပါး ထိုင်းနယ်စပ်သို့ ထွက်ပြေးတိမ်းရှောင်နေရကြောင်း ဒေသခံ သတင်းရင်းမြစ်များက အတည်ပြု ပြောသည်။ စစ်ကော်မရှင်တပ်သည် မောတောင်မြို့ရှိ ၎င်းတို့ ထိန်းချုပ်ထားသော စခန်းများမှ လက်နက်ကြီးများဖြင့် စတင် ပစ်ခတ်ခဲ့ပြီး တိုက်ပွဲ ဒုတိယနေ့ (နိုဝင်ဘာလ ၁၂ ရက်နေ့) နံနက် ၉ နာရီခွဲ အချိန်ခန့်တွင် ဂျက်တိုက်လေယာဉ် (Y - 12) ဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။ အဆိုပါ ဗုံးကြဲမှုဖြစ်စဉ်နှင့် ပတ်သက်၍ အသက် ၃၅ နှစ်အရွယ် မောတောင်မြို့ခံ အမျိုးသမီးတစ်ဦး က “လေယာဉ်လာကြဲတာ နာရီဝက်လောက် ကြာတယ်။ နည်းနည်းနှောနှောမဟုတ်ဘူး။ လက်ရှိ ပုန်းရှောင်နေတဲ့ နေရာအထိ မြေကြီးတွေ တုန်နေတာပါပဲ။ မြို့ထဲမှာ ပိတ်မိနေတဲ့သူတွေလည်းရှိတယ်” ဟု ပြောသည်။ ဗုံးကြဲတိုက်ခိုက်မှုနှင့် လက်နက်ကြီး ပစ်ခတ်မှု အသံများကို ထိုင်းနိုင်ငံဘက်ခြမ်း ဆင်ခွန်နယ်ခြားဂိတ်မှပင် ရှင်းလင်းစွာ မြင်တွေ့ကြားသိနေရကြောင်း စစ်ရှောင်များအား အကူအညီပေးနေသူများက ဆိုသည်။ တိုက်ပွဲများကြောင့် မောတောင်မြို့တစ်မြို့လုံးနီးပါးရှိ ဒေသခံ လူဦးရေ ၂၀၀၀ နီးပါးခန့်သည် ထိုင်း -မြန်မာ နယ်စပ်ရှိ ဆင်ခွန် (အလယ်ဂိတ်) စခန်းအနီး လမ်းမကြီးနံဘေးနှင့် ရော်ဘာတောများထဲသို့ ထွက်ပြေးတိမ်းရှောင် နေကြရသည်။ စစ်ဘေးရှောင်များထဲတွင် အမျိုးသမီးများ၊ သက်ကြီးရွယ်အိုများနှင့် ကလေးငယ်များစွာ ပါဝင်ပြီး၊ အချို့မှာ ထိုင်းနိုင်ငံဘက်ခြမ်းသို့ ဝင်ရောက်တိမ်းရှောင်ခဲ့ကြသည်။ လက်ရှိ တိမ်းရှောင်နေသူများ အတွက် စားနပ်ရိက္ခာ၊ ဆေးဝါးနှင့် အမိုးအကာများ အပါအဝင် လူသားချင်း စာနာ ထောက်ထားမှုဆိုင်ရာ အကူအညီများ အရေးပေါ်လိုအပ်နေကြောင်း စစ်ရှောင်များကို ကူညီပေးနေသူများ၏ ပြောပြချက်အရ သိရသည်။ မောတောင်မြို့သည် ထိုင်းနိုင်ငံ၊ ဆင်ခွန်းမြို့နှင့် ထိစပ်နေသည့် အရေးပါသော နယ်စပ်ကုန်သွယ်ရေးမြို့ ဖြစ်ပြီး၊ တိုက်ပွဲများကြောင့် နယ်စပ်ကုန်သွယ်ရေးလမ်းကြောင်းမှာလည်း ရပ်တန့်သွား ခဲ့သည်။ တနင်္သာရီတိုင်းသည် KNU တပ်မဟာ (၄) နယ်မြေဖြစ်ရာ တော်လှန်ရေး တပ်ဖွဲ့များသည် စစ်ကော်မရှင်၏ နယ်စပ်စခန်းအချို့ကို သိမ်းပိုက်ထားခဲ့ခြင်း ဖြစ်သည်။ ထို့ကြောင့် စစ်ကော်မရှင်က လက်လွတ်ဆုံးရှုံးခဲ့ရသည့် နယ်မြေများကို ပြန်လည်ရယူရန်နှင့် ပြည်သူကို အကြောက်တရားသွင်းရန် ရည်ရွယ်ကာ လေကြောင်းဖြင့် ထိုးစစ်ဆင် တိုက်ခိုက် ခြင်း ဖြစ်သည်ဟု KNU က သတင်းမီဒီယာများကို ပြောဆိုထားသည်။

တနင်္သာရီတိုင်းအတွင်း ထိုင်းနယ်စပ်တွင် တိုက်ပွဲများ ပြင်းထန်

Nov 12

ဒီပဲယင်း မြို့နယ် အနောက်ခြမ်း ဗုံးကြဲမှု အရပ်သား ၁၃ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၂ ရက်။ စစ်ကိုင်းတိုင်းဒေသကြီး၊ ဒီပဲယင်းမြို့နယ် အနောက်ခြမ်းရှိ၊ ဆပ်ပြာကျင်းကျေးရွာကို စစ်ကော်မရှင်တပ်က လေကြောင်းတိုက်ခိုက်မှု ဆက်တိုက်လုပ်ခဲ့ရာ အရပ်သားပြည်သူ ၁၃ ဦး ထိခိုက်ဒဏ်ရာ ရရှိခဲ့သည်။ ဆပ်ပြာကျင်းကျေးရွာအား တစ်ရက်တည်းတွင် စစ်ကော်မရှင်တပ်က ဂျက်တိုက် လေယာဉ်များဖြင့် လေကြောင်းတိုက်ခိုက်မှု ငါးကြိမ်ထက်မနည်း လုပ်ခဲ့ပြီး၊ အရပ်သားပြည်သူ ၁၃ ဦး ထိခိုက် ဒဏ်ရာရကာ နေအိမ် ၇ လုံးခန့် ပျက်စီးခဲ့ကြောင်း ဒေသခံအဖွဲ့အစည်းများက အတည်ပြု ပြောသည်။ လက်နက်ကိုင်တော်လှန်ရေး အားကောင်းသည့် ဒီပဲယင်းမြို့နယ်ထဲက ဆပ်ပြာကျင်းကျေးရွာအား စစ်ကော်မရှင်တပ်ဖွဲ့သည် နိုဝင်ဘာလ ၁၀ ရက်နေ့ ညနေပိုင်းတွင် ပြင်းထန်သော လေကြောင်းတိုက်ခိုက်မှုများ ဆက်တိုက်ပြုလုပ်ခဲ့ခြင်း ဖြစ်သည်။ ဒေသခံအဖွဲ့အစည်းများ၏ အဆိုအရ ထိုတိုက်ခိုက်မှုများကို တံတားဦးနှင့် မိတ္ထီလာ လေတပ်စခန်းများမှ ပျံတက်လာသော ဂျက်ဖိုက်တာ လေယာဉ်များက ညနေပိုင်း ၃ နာရီခွဲမှ ၆ နာရီအကြား ဆက်တိုက်ပြုလုပ်ခဲ့ခြင်း ဖြစ်သည်။ လေကြောင်းတိုက်ခိုက်မှုအတွင်း ပေါင် ၅၀၀ အလေးချိန်ရှိ ဗုံးကြီးများ အပြင် စက်သေနတ်များဖြင့်ပါ ပစ်ခတ်ခဲ့ သည်ဟု ဆိုသည်။ ဒေသခံအဖွဲ့အစည်း တာဝန်ရှိသူများ၏ ပြောပြချက်အရ စစ်ကော်မရှင်၏ တိုက်ခိုက်မှုပုံစံသည် သိသာစွာ ပြောင်းလဲလာကြောင်း တွေ့ရသည်။ ဒီပဲယင်းမြို့နယ် စစ်ရှောင် ထောက်ပံ့ရေးအဖွဲ့ တာဝန်ရှိသူတစ်ဦးက “အရင်လို တစ်ကြိမ်တည်း လာပစ်တာမျိုး မဟုတ်ဘဲ နာရီပိုင်းအတွင်းမှာပဲ နေရာတစ်ခုကို အကြိမ်ကြိမ် ပြန်လာပစ် နေတာပါ။ ဒါဟာ ဒဏ်ရာရသူတွေကို အရေးပေါ် ကယ်ဆယ်ရေးလုပ်ငန်းတွေ မလုပ်နိုင်အောင် တားဆီးချင်တဲ့ သဘောပါပဲ။ သူတို့ရဲ့ တိုက်ခိုက်မှုပုံစံက အရမ်းပြောင်း သွားတယ်” ဟု ပြောသည်။ အဆိုပါ ဆက်တိုက် လေကြောင်းတိုက်ခိုက်မှုကြောင့် အရပ်သားပြည်သူ ၁၃ ဦးထက်မနည်း ထိခိုက်ဒဏ်ရာများ ရရှိခဲ့ပြီး၊ စိုးရိမ်ရသည့် အခြေအနေရှိသူများလည်း ပါဝင်ကြောင်း ဒေသခံအဖွဲ့အစည်းများက အတည်ပြုသည်။ ထို့အပြင်၊ ဒေသခံနေအိမ် ၇ လုံးခန့် ပျက်စီးခဲ့ပြီး ၃ လုံးမှာ မီးလောင်ကျွမ်းခဲ့သည်။ ဆပ်ပြာကျင်းကျေးရွာသည် ၂၀၂၁ ခုနှစ်တွင် လက်နက်ကိုင် တော်လှန်ရေးကို စတင်ခဲ့သည့် ဒေသတစ်ခုအဖြစ် လူသိများပြီး၊ ယခုနှစ် မေလက ကျောင်းသား ၂၄ ဦး သေဆုံးခဲ့သည့် အိုးတိန်တွင်းကျေးရွာ နှင့်လည်း ၂ မိုင်ခန့်သာ ကွာဝေးသောကြောင့် စစ်ကော်မရှင်တပ်၏ ပစ်မှတ်ထား တိုက်ခိုက်ခြင်းကို အထူးခံနေရခြင်း ဖြစ်နိုင်သည်ဟု သုံးသပ်နေကြသည်။ ဒီပဲယင်းမြို့နယ် အနောက်ခြမ်းဒေသသည် လက်ရှိအချိန်တွင် တော်လှန်ရေး အင်အားစုများ၏ လွှမ်းမိုးမှု အားကောင်းနေသည့် နယ်မြေဖြစ်သောကြောင့် စစ်ကော်မရှင်တပ်များက လေကြောင်းအသာစီး ကို အသုံးပြု ကာ ထိုးစစ်ဆင်မှုများ မကြာခဏ ပြုလုပ်လျက်ရှိသည်။ ဒေသအတွင်း အခြေအနေ တင်းမာနေဆဲဖြစ်ပြီး၊ ဒေသခံ ပြည်သူ့ကာကွယ်ရေး အဖွဲ့များက ပြည်သူများကို ဘေးကင်းရာ နေရာများနှင့် ကြိုတင်ပြင်ဆင်ထားသော ဗုံးခိုကျင်းများတွင် ခိုလှုံကြရန် အရေးပေါ် တိုက်တွန်း ထားသည်။

ဒီပဲယင်း မြို့နယ် အနောက်ခြမ်း ဗုံးကြဲမှု အရပ်သား ၁၃ ဦး ဒဏ်ရာရ

Nov 12

ဖားကန့် အရပ်ဘက်နေရာများ ဗုံးကြဲ သားအမိနှစ်ဦး ထိပြီး မိခင် သေဆုံး သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ နိုဝင်ဘာလ ၁၂ ရက်။ ကချင်ပြည်၊ ဖားကန့်မြို့နယ်တွင် စစ်ကော်မရှင်တပ်၏ လေကြောင်းမှ ဗုံးကြဲတိုက်ခိုက်မှုကြောင့် သားအမိနှစ်ဦး ထိမှန်ပြီး မိခင်ဖြစ်သူမှာ သေဆုံးသွားသည်။ ဖားကန့်မြို့နယ်တွင် စစ်ကော်မရှင်တပ်ဖွဲ့က ယမန်နေ့ (နိုဝင်ဘာလ ၁၁ ရက်နေ့) မွန်းလွဲပိုင်း၌ လေယာဉ်ဖြင့် ဗုံးကြဲတိုက်ခိုက်ခဲ့ရာ ကထန်ကွက်သစ်ရှိ နေအိမ်တစ်လုံးပေါ်သို့ ကျရောက်ပေါက်ကွဲခဲ့ခြင်း ဖြစ်သည်။ အဆိုပါ ဖြစ်စဉ်အတွင်း အမျိုးသမီးတစ်ဦး နေရာတွင်ပင် သေဆုံးကာ၊ ၎င်း၏ ၅ နှစ်ခန့်အရွယ် သားငယ်မှာ ပြင်းထန်သော ဒဏ်ရာများ ရရှိခဲ့ကြောင်း ဒေသခံသတင်းရင်းမြစ်များက ပြောသည်။ ဖားကန့်ဒေသတွင် နိုဝင်ဘာလ ၆ ရက်နေ့မှစ၍ မြေပြင်တိုက်ပွဲများ ပြင်းထန်လာပြီးနောက် စစ်ကောင်စီသည် လေကြောင်းအသာစီးယူကာ အရပ်သားပစ်မှတ်များကို ပိုမိုတိုက်ခိုက်လာခဲ့ခြင်းဖြစ်သည်။ ယမန်နေ့ နေ့လယ် ၁ နာရီခွဲ ဝန်းကျင်ခန့်တွင် လုံးခင်းကျေးရွာအုပ်စု၊ ကထန်ကွက်သစ်အား Y-12 လေယာဉ်ဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။ အဆိုပါတိုက်ခိုက်မှု ဖြစ်ပွားချိန်တွင် ကထန်ကျေးရွာ၌ မြေပြင်တိုက်ပွဲများ ဖြစ်ပွားခြင်းမရှိဘဲ အရပ်သား ပြည်သူများ သာ အများစု နေထိုင်နေကြခြင်း ဖြစ်သည်။ ဒေသခံ အမျိုးသမီး တစ်ဦးက “အမှန်အတိုင်း ပြောရရင် ဗုံးသံကြားလိုက်တာနဲ့ ဘာလုပ်ရမှန်းမသိဘူး။ စစ်တပ် က လူထုနေတဲ့ နေရာတွေကို တမင်သက်သက် ပစ်တာပါ။ ၅ နှစ်သားလေးကတော့ မသေဘူးပေါ့နော်။ ဒဏ်ရာ ရတယ်။ သူ့အမေကတော့ နေရာမှာတင် ဆုံးသွားတယ်။ လေယာဉ်ကလည်း ဆက်တိုက်ကို ဝဲတာ” ဟု ပြော သည်။ သေဆုံးခဲ့သည့် အမျိုးသမီးမှာ အသက် ၄၀ နှစ်ခန့်ရှိပြီး၊ ဒဏ်ရာပြင်းထန်ရရှိခဲ့သည့် သားငယ်မှာ ၅ နှစ်ခန့်အရွယ် ယောကျာ်းလေးငယ် ဖြစ်ကြောင်းသိရသည်။ ၎င်းတို့၏ နေအိမ်သည် ဗုံးကျရောက်ရာ ပစ်မှတ်ဖြစ်ခဲ့ပြီး နေအိမ်တစ်လုံးလည်း ပျက်စီးခဲ့သည်။ အဆိုပါ လေကြောင်းတိုက်ခိုက်မှုသည် နိုဝင်ဘာလအတွင်း ဖားကန့်ဒေသ၌ ကချင်လွတ်လပ်ရေး တပ်မတော် KIA နှင့် KPDF ပူးပေါင်းတပ်ဖွဲ့ဝင်များက စစ်ကော်မရှင် ယာဉ်တန်းများကို တိုက်ခိုက် ခဲ့ပြီးနောက် ဖြစ်ပေါ်လာ ခြင်း ဖြစ်သည်။ နိုဝင်ဘာလ ၁၀ ရက်နေ့၊ နံနက်ပိုင်းက ဖားကန့်၊ မှော်စီစာလမ်းဆုံတွင် KIA/KPDF ပူးပေါင်းတပ်ဖွဲ့က မိုင်းခွဲ တိုက်ခိုက်ခဲ့ရာ စစ်သား ၁၀ ဦးကျော် သေဆုံးပြီး ၂၀ ဦးကျော် ဒဏ်ရာရခဲ့ကြောင်း စစ်ရေးသတင်းရင်းမြစ် အချို့က ဆိုသည်။ စစ်တပ်သည် မြေပြင်တွင် အထိနာသွားပြီးနောက် အရပ်သားပစ်မှတ်များကို ဗုံးကြဲတိုက်ခိုက်ခြင်းဖြင့် စစ်ရာဇဝတ်မှုများကို ဆက်လက်ကျူးလွန်နေကြောင်း ကချင် လူ့အခွင့်အရေး စောင့်ကြည့်ရေး အဖွဲ့ (KHRW) က ထုတ်ပြန်ထားသည်။ နိုဝင်ဘာလ ၆ ရက်နေ့မှ စတင်၍ ဖားကန့်နှင့် ကာမိုင်းကြားရှိ နမ့်ယားကျေးရွာ၊ လုံးခင်းကျေးရွာအုပ်စု ပတ်ဝန်း ကျင်၊ မှော်စီစာကျေးရွာတို့တွင် မြေပြင်တိုက်ပွဲများ ပြင်းထန်စွာ ဖြစ်ပွားနေဆဲ ဖြစ်သည်။ လက်ရှိ စစ်ရေးအခြေအနေအရ လေကြောင်းအန္တရာယ်၊ လက်နက်ကြီးအန္တရာယ်နှင့် လုံခြုံရေး အခြေအနေ များကို အထူးဂရုပြုနေထိုင်ကြရန် KIA နှင့် KPDF ပူးပေါင်းတပ်ဖွဲ့များက ဒေသခံပြည်သူများကို သတိပေးထား သည်။ ဖားကန့်ဒေသသည် စစ်ကော်မရှင်တပ်၏ နယ်မြေစိုးမိုးမှု တိုးမြှင့်လိုသည့် စစ်ဆင်ရေးများကြောင့် ဒေသခံ အရပ် သား ပြည်သူများ နေ့စဉ်လိုလို ထိခိုက်သေဆုံး ဒဏ်ရာရမှုများနှင့် ရင်ဆိုင်နေရဆဲ ဖြစ်သည်။

ဖားကန့် အရပ်ဘက်နေရာများ ဗုံးကြဲ သားအမိနှစ်ဦး ထိပြီး မိခင် သေဆုံး

Nov 12

မန္တလေးတိုင်းအထက်ပိုင်းတွင် ရွေးကောက်ပွဲအတွက် စစ်ကော်မရှင် ထိုးစစ်ဆင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၂ ရက်။ မန္တလေးတိုင်းဒေသကြီး အထက်ပိုင်းရှိ မတ္တရာ၊ စဥ့်ကူးနှင့် သပိတ်ကျင်းမြို့နယ်တို့တွင် စစ်ကော်မရှင်၏ ထိုးစစ်တိုက်ခိုက်မှုများ ပိုမိုပြင်းထန်လာနေခြင်းမှာ ရွေးကောက်ပွဲအတွက် နယ်မြေရှင်းလင်းနေခြင်း ဖြစ်သည်ဟု ဒေသတွင်း အဖွဲ့အစည်းများနှင့် PDF ဖွဲ့တို့က ပြောဆိုလိုက်သည်။ မတ္တရာ၊ စဥ့်ကူးနှင့် သပိတ်ကျင်းမြို့နယ်များတွင် စစ်ကော်မရှင်တပ်၏ ထိုးစစ်ဆင်တိုက်ခိုက်မှုများ တစ်နေ့ တခြား ပိုမိုပြင်းထန်လာနေပြီး၊ ဒေသခံပြည်သူ ထောင်ပေါင်းများစွာ ဘေးလွတ်ရာသို့ ထွက်ပြေးတိမ်းရှောင်နေ ကြရသည်။ အဆိုပါ ဒေသများသည် လာမည့် ၂၀၂၅ ခုနှစ် ရွေးကောက်ပွဲအတွက် စစ်ကော်မရှင်က လျာထားသည့် မြို့နယ်များ ဖြစ်သောကြောင့် နယ်မြေရှင်းလင်းရန် အင်အားသုံး တိုက်ခိုက်နေခြင်းဖြစ်ကြောင်း ဒေသတွင်း အဖွဲ့အစည်းမျးနှင့် PDF အဖွဲ့တို့က သုံးသပ်သည်။ မန္တလေးတိုင်းအထက်ပိုင်း၊ ဧရာဝတီမြစ်ကြောင်းတစ်လျှောက်ရှိ မတ္တရာ၊ စဥ့်ကူးနှင့် သပိတ်ကျင်းမြို့နယ်များတွင် နိုဝင်ဘာလ ၁၀ ရက်နေ့မှစ၍ စစ်ကောင်စီနှင့် ဒေသခံတော်လှန်ရေးတပ်ဖွဲ့များအကြား တိုက်ပွဲများသည် ပြင်းထန်လာခဲ့သည်။ ဒရုန်းများ၊ လက်နက်ကြီးများနှင့် လေကြောင်းတိုက်ခိုက်မှုများ အသုံးပြုလာသောကြောင့် အရပ်သား ထိခိုက်မှု နှင့် စစ်ဘေးရှောင်ဦးရေ သိသိသာသာ မြင့်တက်လာခဲ့သည်။ ပြည်သူ့ကာကွယ်ရေး တပ်မတော် (မန္တလေး) (MDY-PDF) က နိုဝင်ဘာလ ၁၀ ရက်နေ့တွင် ထုတ်ပြန်ချက် တစ်စောင် ထုတ်ပြန်ခဲ့ပြီး၊ စစ်ကော်မရှင်၏ ရည်ရွယ်ချက်ကို ရှင်းလင်းစွာ ဖော်ပြခဲ့သည်။ MDY-PDF အဖွဲ့၏ ထုတ်ပြန်ချက်ထဲတွင် “တရားမဝင်၊ အတုအယောင် ရွေးကောက်ပွဲ ကို အဓမ္မပြုလုပ်ရန် ဆောင်ရွက်လျက်ရှိပြီး ယင်းကာလမတိုင်မီတွင် သာလွန်အင်အားများစွာ အသုံးပြု၍ မိမိတို့ တော်လှန်ရေး တပ်ဖွဲ့များ၏ ထိန်းချုပ်စိုးမိုးနယ်မြေများကို အပြင်းအထန် ထိုးစစ်ဆင် တိုက်ခိုက်လျက်ရှိသည်။ မတ္တရာမြို့ နယ်၊ စဥ့်ကူးမြို့နယ်နှင့် သပိတ်ကျင်းမြို့နယ်တို့သည်လည်း အကြမ်းဖက် အာဏာသိမ်းစစ်အုပ်စုက အတု အယောင် ရွေးကောက်ပွဲ ပြုလုပ်ရန် လျာထားသည့် မြို့နယ်များစာရင်းတွင် ပါဝင်နေပါသည်” ဟု ဖော်ပြထား သည်။ လက်ရှိတွင် အဆိုပါမြို့နယ် သုံးခုအတွင်းမှ အရပ်သားပြည်သူ သောင်းနှင့်ချီသည် မိမိတို့၏ နေအိမ်များကို စွန့်ခွာ ကာ ဘေးလွတ်ရာသို့ ထွက်ပြေးတိမ်းရှောင်နေရသည်။ စစ်ဘေးရှောင်များအား ကူညီပေးနေသူများ၏ ပြောပြချက်အရ အရေးပေါ် အကူအညီများ ပြင်းထန်စွာ လိုအပ် နေသည်။ စစ်ဘေးရှောင်များကို ကူညီနေသည့် ဒေသခံ ပရဟိတအဖွဲ့ဝင်တစ်ဦး က “စစ်ဘေးရှောင် အများစုက ရုတ် တရက် ထွက်ပြေးလာကြရတာပါ။ အခုချက်ချင်း လိုအပ်နေတာကတော့ ကလေးငယ်တွေနဲ့ သက်ကြီး ရွယ် အိုတွေအတွက် အရေးပေါ် ဆေးဝါး၊ အနွေးထည်တွေ နဲ့ ဆန်၊ ဆီလိုမျိုး အခြေခံ စားနပ်ရိက္ခာတွေပါပဲ။ အခြေ အနေက တကယ်ကို စိုးရိမ်စရာဖြစ်လာပြီ” ဟု ပြောသည်။ MDY-PDF ကမူ စစ်ကော်မရှင်၏ ထိုးစစ်ကို အစွမ်းကုန် ခုခံကာကွယ်သွားမည် ဖြစ်ကြောင်း ပြည်သူလူထုအား အသိပေးထားသည်။ MDY-PDF တပ်ဖွဲ့၏ ထုတ်ပြန်ချက်အရ ၎င်းတို့အနေဖြင့် ပြည်သူလူထုအား တိုက်ပွဲများနှင့်ပတ်သက်၍ ကြိုတင် ပြင်ဆင်မှုများ၊ ဘေးအန္တရာယ်ကင်းရေး အစီအမံများ လုပ်ဆောင်ထားရန် မေတ္တာရပ်ခံ တိုက်တွန်းထားသည်။

မန္တလေးတိုင်းအထက်ပိုင်းတွင် ရွေးကောက်ပွဲအတွက် စစ်ကော်မရှင် ထိုးစစ်ဆင်

Nov 11

ဖားကန့်တိုက်ပွဲများအတွင်း အရပ်သား ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၁ ရက်။ ကချင်ပြည်၊ ဖားကန့်မြို့နယ်က တိုက်ပွဲများ အတွင်း ပေါက်ကွဲမှုများကြောင့် အရပ်သား ၂ ဦး သေဆုံးခဲ့သည်။ ပြီးခဲ့သည့် နိုဝင်ဘာလ ၉ ရက်နေ့တွင် ကာမိုင်းမြို့မှ အင်အား ၁၀၀ ခန့်ရှိသည့် စစ်ကော်မရှင် စစ်ကြောင်းသည် စစ်ကား တစ်စီးနှင့် ဖားကန့်မြို့ထဲ ဝင်လာစဥ် မှော်စီဆာကျေးရွာ အရောက် ကချင်လွတ်လပ်ရေး တပ်မတော် KIA နှင့် ပူးပေါင်းတပ်များက မိုင်းထောင် တိုက်ခိုက်ခဲ့သည်။ တော်လှန်ရေး အင်အားစုများ၏ အဆိုပါ တိုက်ခိုက်မှုတွင် စစ်ကော်မရှင်တပ်ဖွဲ့များ စီးနင်းလာသည့် ကားနောက် ကပ်လိုက်လာသည့် သားအမိနှစ်ဦး မိုင်းဆ ထိမှန်သေဆုံးခဲ့ရပြီး ယမန်နေ့ကမူ မှော်စီဆာ - ဖားကန့် လမ်းမပေါ် တွင် ပေါက်ကွဲမှုကြောင့် အမျိုးသားတစ်ဦး ထပ်မံ သေဆုံးခဲ့ရပြန်သည်။ “ဖားကန့်မြို့ထဲကို ရောက်လာတာကတော့ အတိအကျ ပြောရင် ၉ ရက်နေ့က ဖြစ်မယ်။ ဖားကန့်ကို ကာမိုင်း ဘက်က ဝင်လာတာ။ အဲ့ဒီဝင်လာတဲ့ အင်အားနဲ့ ဖားကန့်နယ်မြေခံ အင်အားနဲ့ ပူးပေါင်းပြီးတော့ နယ်မြေ စိုးမိုးမှု ရရှိရေး သူတို့တွေ လုပ်နေတာ။ သူတို့က ရွေးကောက်ပွဲကာလမှာ နယ်မြေစိုးမိုးမှုရရေးနဲ့ လမ်းကြောင်းတွေ ထိန်းချုပ်ဖို့ လို့ထင်တယ်။” ဖားကန့်မြို့ကို စစ်ကော်မရှင် အင်အားဖြည့်တင်းလာသည့် အကြောင်းအရင်းနှင့် ပတ်သက်၍ ရပ်မိရပ်ဖလည်း ဖြစ်၊ မြို့ခံတစ်ဦးလည်း ဖြစ်သည့် အမျိုးသားတစ်ဦးက သုံးသပ်ရှင်းပြသည်။ အဆိုပါ စစ်ကော်မရှင် စစ်ကြောင်း ကားမိုင်းဆွဲ တိုက်ခိုက်ခံရမှုအပြီး စစ်ကော်မရှင် တပ်သားများက ၎င်းတို့ တိုက်ခိုက်ခံခဲ့ရသည့် အနီးအနားရှိ အရပ်သား နေအိမ်များကို စီးနင်းခဲ့သေးသည်။ ထို့အပြင် စစ်ကော်မရှင် စစ်ကြောင်း တိုက်ခိုက်ခံရမှုတွင် စစ်ကော်မရှင် တပ်ဖွဲ့ဝင်များလည်း သေဆုံးဒဏ်ရာရခဲ့ သည် ဟု မြေပြင် သတင်းအရင်းအမြစ်များက ပြောသည်။ ထို့နောက် ကျန်ရှိသော စစ်သားများက အရပ်သား ကားများကို ချောဆွဲကာ ဘေးလွှတ်ရာသို့ ရွှေ့ပြောင်းခဲ့ကြပြီး စစ်ကော်မရှင် စစ်ကြောင်း တစ်ခုလုံးသည် မှော်စီဆာကျေးရွာရှိ SKY Hotel တွင် ယမန်နေ့ညအထိ အထိုင်ချ တပ်စွဲခဲ့ကြသည်ဟု ဆိုသည်။ “မှော်စီဆာ SKY Hotel မှာက စစ်တပ်က တပ်ဆွဲထားခြင်း မရှိတော့ပါလို့ ပြောလာတာကြောင့် ဝမ်းသာမလို့ ရှိတုန်း မှော်စီဆာရွာ မိန်းလမ်းမကြီးဘက် အုန်းအုန်းနဲ့ ပြင်းထန်တဲ့ ပေါက်ကွဲသံ နှစ် ချက်ကြား။ မှော်စီဆာ တောင်ပေါ် ကျောင်းနဲ့ ချမြစ်ချင်းဝန်းထဲ ကျရောက်ပေါက်ကွဲ” ဟု ဆိုကာ ယနေ့ ဖားကန့်မြို့ အခြေအနေကို အော်ဇော်မိုး- ဖားကန့် ဖေ့စ်ဘုတ်တွင် ရေးသားထားသည်။ ဖားကန့်မြို့တွင် အောက်တိုဘာလ တတိယအပတ်မှ စတင်ကာ တိုက်ပွဲများ ငြိမ်သက်နေရာမှ ပြီးခဲ့သည့် တနင်္ဂနွေနေ့မှ စတင်ကာ နှစ်ဖက်တပ်များ အကြား ထိတွေ့မှုများ ပြန်လည် ဖြစ်ပွားလာခြင်း ဖြစ်ပြီး ယနေ့ထိ နှစ်ဖက် ကြား ပစ်ခတ်မှုများ ဖြစ်ပွားနေသည်ဟု ဒေသခံများက ပြောသည်။ လက်ရှိတွင် ဖားကန့်မြို့နယ်နှင့် ကာမိုင်းကြားရှိ လမ်းကြောင်း တစ်လျှောက်၌ စစ်ရေးတင်းမာမှုများ မြင့်တက် နေပြီး၊ နယ်မြေရှင်းလင်းရေးနှင့် လမ်းကြောင်း ထိန်းချုပ်မှုများကြောင့် အရပ်သားပြည်သူများ၏ လုံခြုံရေး အခြေအနေမှာ စိုးရိမ်ဖွယ်ရာ ဖြစ်နေသည်။

ဖားကန့်တိုက်ပွဲများအတွင်း အရပ်သား ၂ ဦး သေဆုံး

Nov 11

ရွေးကောက်ပွဲ ဝင်မည့်သူကို နိုင်ကျဉ်း အစည်းအရုံးမှ ထုတ်ပယ် သတင်းနှင့် မီဒီယာ ကွန်ရက် ၂၀၂၅ ခုနှစ်၊ နိုဝင်ဘာလ ၁၁ ရက်။ စစ်ကောင်စီက ဦးစီးကျင်းပမည့် ရွေးကောက်ပွဲ ဝင်ပြိုင်မည့် အဖွဲ့ဝင်တစ်ဦးကို ကရင်နီ နိုင်ငံရေး အကျဉ်းသားများ အစည်းအရုံး (KAPP) မှ ထုတ်ပယ်လိုက် သည်။ စစ်ကော်မရှင်က ကျင်းပမည့် ရွေးကော်ပွဲ၌ ပါဝင်ယှဉ်ပြိုင်ရန် ပြင်ဆင်နေသည့် အဖွဲ့ဝင်တစ်ဦးအား ကရင်နီ နိုင်ငံရေး အကျဉ်းသားများ အစည်းအရုံးမှ ထုတ်ပယ်လိုက်သည်ဟု နိုဝင်ဘာလ ၇ ရက်နေ့တွင် ကြေညာချက် ထုတ်ပြန်သည်။ အဖွဲ့ဝင် ဖြစ်သည့် အသက် ၃၀ ဝန်းကျင်အရွယ် ကိုသက်မှူးအောင်ဆိုသူမှာ ကရင်နီ (ကယား) ပြည် ကိုယ်စားပြု ပြည်နယ်လွှတ်တော် နေရာ၌ ပြည်သူ့ပါတီ ကိုယ်စားပြု ဝင်ရောက်ယှဉ်ပြိုင်ရန် ပြင်ဆင်နေခြင်း ဖြစ်သည်။ KPPA မှ ‌ပြောရေးဆိုခွင့်ရှိသူ တစ်ဦးက “ကျနော်တို့အဖွဲ့ သဘောထားကတော့ ရှင်းတယ်လေနော်။ သူက ကရင် နီ ပြည်သူတွေ အပေါ်မှာတော့ သစ္စာဖောက်သွားပြီပေါ့နော်။ နောက်တခုက ကျနော်တို့ ထုတ်ပြန်ချက် အတိုင်း ပဲ။ အဖွဲ့ဝင် အဖြစ်ကနေ ထုတ်ပယ်လိုက်တယ်။ လုံးဝကို နိုင်ငံရေးပိုင်းဆိုင်ရာတွေ ထိတွေ့ဆက်ဆံမှု မပြုတော့ ဘူး ပေါ့နော်။ အဲ့လိုပါပဲ ကျနော်တို့ အမြင်က” ဟု ပြောသည်။ လက်ရှိ ကရင်နီပြည်၌ စစ်ကော်မရှင်တပ်၏ လက်နက်ကြီးနှင့် လေကြောင်းဒဏ်များ နေ့စဉ်ရက်ဆက် ပြည်သူ များ အနေဖြင့် ခံစားနေရသည်ဖြစ်ရာ ကိူသက်မှူးအောင် ပြောဆိုခဲ့သည့် လွှတ်တော်တွင်းသို့ ပြည်သူ့အသံများ ယူဆောင်သွားမည် ဆိုသောအချက်မှာ မဖြစ်နိုင်ဟု ၎င်းက ထပ်လောင်းပြောကြားသည်။ KPPA အနေဖြင့် ၂၀၂၁ ခုနှစ် စစ်အာဏာသိမ်းပြီးနောက်ပိုင်း လွိုင်ကော်ထောင်မှ လွတ်မြောက်လာသည့် နိုင်ကျဉ်းများ အားလုံးကို အဖွဲ့ဝင်အဖြစ် သတ်မှတ်ထားသည်ဟု ဖော်ပြထားသည်။ နိုင်ငံရေး အကျဉ်းသား တစ်ဦးဖြစ်သည့် ကိုသက်မှူးအောင်မှာလည်း ထောင်ကလွတ်မြောက်သည့် အချိန်မှစ၍ KPPA နှင့်အတူ လက်တွဲပြီး နိုင်ကျဉ်းကိစ္စရပ်များတွင် ပါဝင်ကူညီခဲ့ဖူးသူ ဖြစ်သည်။ သို့သော် အဖွဲ့အနေဖြင့် လာမည့် ဒီဇင်ဘာလ ၂၈ ရက်နေ့၌ ကျင်းပမည့် ရွေးကောက်ပွဲအား အပြင်းအထန် ဆန့်ကျင်သဖြင့် ကိုသက်မှူးအောင်ကိုလည်း သစ္စာဖောက်အဖြစ် ကြေညာလိုက်သည်ဟု ဆိုသည်။ စစ်အာသိမ်းပြီး နောက်ပိုင်းကာလများ၌ လွိုင်ကော် အကျဉ်းထောင်မှ လွတ်မြောက်လာသည့် နိုင်ကျဉ်းများမှာ ၎င်းတို့ ယုံကြည်ချက်အတိုင်း ဆက်လက် လျှောက်လှမ်းနေကြပြီး စစ်ကော်မရှင်ထံသို့ ဘက်ပြောင်းခိုလှုံသူမှာ ကိုသက်မှူးအောင် တစ်ဦးသာ ရှိသည်ဟု KPPA ‌ပြောရေးဆိုခွင့်ရှိသူ တစ်ဦးက ဆက်ပြောသည်။ “သူတယောက်ပဲ ရှိတာပေါ့နော်။ ကျန်တဲ့လူတွေကတော့ သူတို့ ယုံကြည်ချက်အတိုင်း ဆက်လုပ်နေတာပေါ့ နော်။ လုပ်ရင်းနဲ့ အသက်ပေးသွားတဲ့ လူတွေ၊ ထောင်ထဲကနေ ပြန်ထွက်လာပြီးမှ သူတို့လုပ်နိုင်ရာ လုပ်ရင်းနဲ့ အသက်ပေးသွားတဲ့ ညီအကိုတွေလည်း ရှိတယ်။ ဒါမဲ့ ဆိုးဝါးတာက သူက စစ်ကောင်စီ ကျင်းပတဲ့ ရွေးကော်ပွဲ ဝင်ပြိင်မှတော့ စစ်ကောင်စီအောက်ပဲ ရောက်သွားတဲ့ သဘောပေါ့နော်။” ယခုဖြစ်ရပ်သည် စစ်ကော်မရှင်၏ အတုအယောင် ရွေးကောက်ပွဲအပေါ် ပြည်သူနှင့် တော်လှန်ရေး အင်အားစု များအကြား သဘောထားကွဲလွဲမှုနှင့် သစ္စာစောင့်သိမှုဆိုင်ရာ စိန်ခေါ်မှုများကို ထင်ရှားစေခဲ့သည်ဟု KPPA က ဆိုသည်။ ကိုသက်မှူးအောင်မှာ ကျောင်းသားသမဂ္ဂ ခေါင်းဆောင် အနေဖြင့် အကြမ်းမဖက် ဆန္ဒပြကာလများ ပြီးဆုံးသည့် နောက်ပိုင်းကာလများ အတွင်း တော်လှန်ရေး တပ်ဖွဲ့များအား ထောက်ပို့ လုပ်ဆောင်ခဲ့ဖူးပြီး ယင်းအမှုဖြင့် လွိုင်ကော်မြို့တွင်း တစ်နေရာ၌ ဖမ်းဆီးခံခဲ့ရခြင်း ဖြစ်သည်။ ထို့နောက် ၎င်းအား နိုင်ငံတော်ပုန်ကန်မှု၊ မတရားအသင်း ဆက်သွယ်မှု၊ လိုင်စင်မဲ့ကား မောင်းနှင်မှု စသည့်စွဲချက် များ ဖြင့် ပုဒ်မ ၅၀၅ - က အရ နှစ်ရှည်ထောင်ဒဏ် ချမှတ်ခဲ့ပြီးနောက် ၃ နှစ်ကျော်အကြာတွင် စစ်ကော်မရှင်၏ လွတ်ငြိမ်းချမ်းသာခွင့်ဖြင့် ပြန်လည် လွတ်မြောက်လာသူ ဖြစ်သည်။

ရွေးကောက်ပွဲ ဝင်မည့်သူကို နိုင်ကျဉ်း အစည်းအရုံးမှ ထုတ်ပယ်

Nov 11

ကြံ့ခိုင် ဖွံ့ဖြိုးရေး ပါတီ ရုံးကို ဖောက်ခွဲ ဖျက်ဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၁ ရက်။ ထားဝယ်ခရိုင်၊ လောင်းလုံးမြို့ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ရုံးအား ဖောက်ခွဲတိုက်ခိုက် လိုက်ခြင်းဖြင့် သံမဏိ လိပ်ပြာတပ်ဖွဲ့က စစ်ကော်မရှင်၏ ရွေးကောက်ပွဲအတုကို ဆန့်ကျင်ကြောင်း ထုတ်ဖော်ကြေညာခဲ့သည်။ ထားဝယ်ခရိုင်၊ လောင်းလုံးမြို့ပေါ်ရှိ (USDP) ရုံးတွင် နိုဝင်ဘာလ ၈ ရက်နေ့၊ နံနက် ၅ နာရီခွဲခန့်က အင်အား ပြင်း ထန်သော ပေါက်ကွဲမှုတစ်ခု ဖြစ်ပွားခဲ့ပြီးနောက် မီးလောင်ကျွမ်းခဲ့ရာ ရုံးတစ်ခုလုံးမီးလောင်ကာ လုံးဝပျက်စီးသွားခဲ့ကြောင်း မြို့ခံများက ပြောသည်။ ပေါက်ကွဲမှုသည် လောင်းလုံးမြို့မ ရဲစခန်းနှင့် မီတာ ၆၀၀ ကျော်သာ ကွာဝေးသော နေရာတွင် ဖြစ်ပွားခဲ့ခြင်း ဖြစ် သည်။ ယခုတိုက်ခိုက်မှုကြောင့် လူအထိအခိုက်မရှိခဲ့သော်လည်း ပါတီရုံးအတွင်းရှိ ပစ္စည်းများအားလုံး မီးလောင်ပြာကျ ခဲ့သည်ဟု မြို့ခံများက ပြောသည်။ လောင်းလုံးမြို့ (က) ရပ်ကွက်မှ အသက် ၅၀ ခန့်အရွယ် အမျိုးသားတစ်ဦးက "ဝုန်း ဆိုတဲ့ အသံက အကျယ်ကြီး ပဲ ကြားရတယ်၊ ပြီးတာနဲ့ မီးခိုးလုံးကြီးထွက်လာတယ်၊ ဒီနေ့ (နိုဝင်ဘာ ၉ ရက်) မနက်ပိုင်းအချိန်ထိ မီးလောင် နေတုန်းပဲ၊ ရုံးထဲက ပစ္စည်းတွေ ဘာမှမကျန်တော့ဘူး၊ အကုန်လုံး ပြာဖြစ်သွားပြီ” ဟု ပြောသည်။ ပေါက်ကွဲမှုဖြစ်ပွားပြီးနောက် တစ်နာရီခန့်ကြာသည် အထိ စစ်ကော်မရှင် တပ်ဖွဲ့ဝင်များ ပေါက်ကွဲမှုဖြစ်ပွားရာသို့ ရောက်ရှိလာခြင်း မရှိသေးကြောင်း ၎င်းမြို့ခံက ဆိုသည်။ အဆိုပါပေါက်ကွဲမှုနှင့်ပတ်သက်၍ လောင်းလုံး သံမဏိလိပ်ပြာတပ်ဖွဲ့မှ နိုဝင်ဘာလ ၉ ရက်နေ့တွင် တရားဝင် ထုတ်ပြန်ကြေညာခဲ့ပြီး စစ်ကော်မရှင်တပ်၏ အတုအယောင် ရွေးကောက်ပွဲကို လက်မခံဘဲ ဆန့်ကျင်သည့်အနေ ဖြင့် ဗုံးဖောက်ခွဲမှုအား ပြုလုပ်ခဲ့ခြင်းဖြစ်ကြောင်း ပြောသည်။ ၎င်းတို့၏ ထုတ်ပြန်ချက်တွင် ပြည်သူများအနေဖြင့် စစ်ကော်မရှင်တပ်၏ ရွေးကောက်ပွဲတွင် ပူးပေါင်းပါဝင်ခြင်း မပြုလုပ်ကြရန် တိုက်တွန်းထားပြီး၊ ရွေးကောက်ပွဲကို နေရာဒေသမရွေး ဆန့်ကျင်တိုက်ခိုက်သွားမည်ဟုလည်း ပြတ်သားစွာ ရေးသားထားသည်။ စစ်ကော်မရှင်တပ်၏ ရွေးကောက်ပွဲကော်မရှင်က ရွေးကောက်ပွဲကို ၂၀၂၅ ခုနှစ် ဒီဇင်ဘာလ ၂၈ ရက်နေ့မှ စတင် ၍ အပိုင်းလိုက် ကျင်းပသွားမည်ဟု ကြေညာထားသည်။ ထားဝယ်ခရိုင်အတွင်း၌ ယခုရက်ပိုင်းအတွင်း စစ်ကော်မရှင်တပ်မှ ရှင်မုတ္ထီး၊ လောင်းလုံးနှင့် ရေဖြူမြို့နယ်ရှိ ကျေးရွာအချို့တွင် လုံခြုံရေး တင်းကျပ်စွာဖြင့် နေအိမ်လိုက် လူဦးရေစာရင်းနှင့် ဓာတ်ပုံများ လိုက်လံကောက်ယူခြင်းများလည်း ရှိနေသည်။

ကြံ့ခိုင် ဖွံ့ဖြိုးရေး ပါတီ ရုံးကို ဖောက်ခွဲ ဖျက်ဆီး

Nov 11

နေအိမ်လူ စာရင်း ကောက်ခံမှုအတွက် ရွာခံများ စိုးရိမ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၁ ရက်။ ထားဝယ်ခရိုင်အတွင်းရှိ ကျေးရွာများတွင် နေအိမ်လိုက် စာရင်းကောက်ယူပြီး မိသားစုဓာတ်ပုံများ ရိုက်ယူခြင်း ကို စစ်ကော်မရှင်တပ်က ပြုလုပ်ခဲ့ရာ၊ ဒေသခံများအား စောင့်ကြည့်ထောက်လှမ်းသွားမည်ကို စိုးရိမ်နေကြသည်။ ထားဝယ်ခရိုင်၊ ထားဝယ်မြို့နယ်၊ ရှင်မုတ္ထီးကျေးရွာတွင် စစ်ကော်မရှင် တပ်ဖွဲ့ဝင်များသည် လုံခြုံရေးအပြည့်ဖြင့် ဝင်ရောက်ကာ အချို့နေအိမ်များမှ မိသားစုဝင်အားလုံးကို ဓာတ်ပုံရိုက်၍ လူဦးရေစာရင်းများကို လိုက်လံကောက် ယူသွားကြောင်း ဒေသခံရွာသားများက ပြောသည်။ နိုဝင်ဘာလ ၆ ရက်နေ့၊ နံနက် ၁၀ နာရီခန့်တွင် စစ်ကော်မရှင် တပ်ဖွဲ့ဝင်များသည် မြေတင်ကားများဖြင့် ရောက်ရှိ လာပြီး ကျေးရွာဘုန်းကြီးကျောင်းတွင် ယာယီတပ်စွဲကာ ယင်းလုပ်ငန်းကို စတင်ခဲ့ခြင်းဖြစ်သည်။ ကျေးရွာတစ်ရွာလုံးကို စာရင်းကောက်ယူခြင်းမျိုး မဟုတ်ဘဲ ရှင်မုတ္ထီးရွာလယ်လမ်းမကြီးအတွင်းရှိ နေအိမ်များ ကိုသာ ရွေးချယ် စာရင်းကောက်ယူသွားခဲ့ခြင်း ဖြစ်သည်ဟု ရွာသားများက ဆိုသည်။ ဒေသခံတစ်ဦး၏ ပြောပြချက်အရ စစ်ကော်မရှင်တပ်၏ လုပ်ရပ်သည် ရိုးရှင်းသော စာရင်းကောက်ယူမှုမျိုး မဟုတ်ဘဲ လုံခြုံရေးတင်းကျပ်စွာ ချထားကာ အရပ်သားများ၏ ကိုယ်ရေးအချက်အလက်များကို ရယူခြင်းဖြစ် သည်။ အသက် ၄၅ နှစ်အရွယ် ရွာသားတစ်ဦးက “စာရင်းကောက်တာက ရွာလယ်လမ်း တစ်လမ်းတည်းပါပဲ၊ အဲဒီလမ်း ထဲက အိမ်တွေမှာရှိတဲ့ မိသားစုဝင်တွေ အားလုံးကို ဓာတ်ပုံရိုက်သွားတယ်၊ ဘာအတွက်ရိုက်တာလဲဆိုတာတော့ မပြောသွားဘူး” ဟု ပြောသည်။ စစ်ကော်မရှင် တပ်ဖွဲ့ဝင်များက ကင်းများချထားပြီးနောက် အရပ်ဝတ်ဝတ်ဆင်ထားသူ အချို့က စာရင်းနှင့် ဓာတ်ပုံ ကောက်ယူခြင်းကို ပြုလုပ်ခဲ့ကြောင်း ၎င်းက ဆက်လက်ပြောဆိုသည်။ စစ်ကော်မရှင် တပ်ဖွဲ့ဝင်များသည် ရှင်မုတ္ထီးကျေးရွာ ပတ်ဝန်းကျင် အနီးတစ်ဝိုက်တွင် နေရာယူထားခဲ့ပြီးနောက် နိုဝင်ဘာလ ၇ ရက်နေ့၊ ညနေပိုင်းတွင်မှ ရွာမှ ပြန်လည် ထွက်ခွာသွားခဲ့သည်ဟု ရွာသားများက ပြောသည်။ အလားတူ စာရင်းကောက်ယူမှုများသည် ထားဝယ်ခရိုင် အတွင်းရှိ လောင်းလုံးမြို့နယ်နှင့် ရေဖြူမြို့နယ်ရှိ ကျေးရွာအချို့တွင်လည်း ယခုရက်ပိုင်းအတွင်း ဆက်တိုက်ပြုလုပ်နေကြောင်း ဒေသတွင်း သတင်းများက ဖော်ပြ သည်။ စစ်ကော်မရှင်တပ်သည် ၎င်းတို့၏ ထိန်းချုပ်နယ်မြေများတွင် လူပုဂ္ဂိုလ် စိစစ်ရေးနှင့် စောင့်ကြည့်လေ့လာရေး စနစ် (PSMS) အပါအဝင် ဒီဂျစ်တယ် နည်းပညာများကို အသုံးပြု၍ ပြည်သူလူထုအား စောင့်ကြည့်ထောက်လှမ်း ရန် ကြိုးပမ်းနေကြောင်း အသံအဖွဲ့ကဲ့သို့သော အရပ်ဘက်အဖွဲ့အစည်းများက ထုတ်ပြန်ထားသည်။ ထားဝယ်ဒေသရှိ နေအိမ်လိုက် ဓာတ်ပုံရိုက်၍ စာရင်းကောက်ယူခြင်းသည် နိုင်ငံသားများ၏ ဇီဝဆိုင်ရာ အချက် အလက် (Biometric Data) များ ရယူစုဆောင်းကာ ဒေသခံများ၏ လှုပ်ရှားမှုများကို ထိန်းချုပ်ရန် ရည်ရွယ်သည့် လုပ်ရပ်ဖြစ်ကြောင်း နိုင်ငံရေး လေ့လာသူများက သုံးသပ်ကြသည်။ ယင်းလုပ်ရပ်များသည် ဒေသခံပြည်သူများအကြား စိုးရိမ်ပူပန်မှုနှင့် မလုံခြုံမှုများကို ပိုမိုမြင့်တက်စေခဲ့သည်။

နေအိမ်လူ စာရင်း ကောက်ခံမှုအတွက် ရွာခံများ စိုးရိမ်

Nov 7

ပုဏ္ဏားကျွန်း လေကြောင်းတိုက်ခိုက်မှုကြောင့် အရပ်သား အနည်းဆုံး ၅ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၇ ရက်။ ရခိုင်ပြည်၊ ပုဏ္ဏားကျွန်းမြို့နယ်ရှိ ကျေးရွာ အချို့ကို စစ်ကော်မရှင်တပ်က လေကြောင်း၊ လက်နက်ကြီး၊ ဒရုန်းများ ဖြင့် ပစ်ခတ်တိုက်ခိုက်မှုများ ပြုလုပ်ခဲ့ရာ ကလေးအပါအဝင် အရပ်သား သေဆုံးမှု ၅ ဦးထက်မနည်း ရှိခဲ့သည်ဟု ဒေသခံများက ပြောသည်။ စစ်ကော်မရှင်တပ်၏ နိုဝင်ဘာလ ၇ ရက်နေ့၊ နံနက်ပိုင်းတွင် လေကြောင်း၊ လက်နက်ကြီးနှင့် ဒရုန်းများဖြင့် ပစ်ခတ်တိုက်ခိုက်ခဲ့ရာ အရပ်သား ၅ ဦး၊ သေဆုံးပြီး ၉ ဦး ဒဏ်ရာရရှိခဲ့သည် ဟု ဒေသခံများနှင့် ဒေသတွင်း သတင်းရင်းမြစ်များက ပြောသည်။ အဆိုပါတိုက်ခိုက်မှုများသည် စစ်တွေမြို့နှင့် အစပ် နေရာအနီးတွင် စစ်ကော်မရှင်နှင့် အာရက္ခတပ်တော် (AA) တို့အကြား စစ်ရေးတင်းမာမှု မြင့်တက်နေချိန်တွင် ဖြစ်ပွားခဲ့ခြင်း ဖြစ်သည်။ နိုဝင်ဘာလ ၇ ရက်နေ့၊ နံနက် ၁၁ နာရီ အချိန်ခန့်တွင် စစ်တွေအခြေစိုက် ခမရ ၃၄၄ တပ်ရင်းမှ ပစ်ခတ်သော ၁၂၀ မမ လက်နက်ကြီးများ ကွမ်းတောင်ကျေးရွာသို့ ကျရောက်ပေါက်ကွဲခဲ့ရာ အသက် (၅၅) နှစ်အရွယ် အမျိုးသားတစ်ဦး ဒဏ်ရာရရှိခဲ့သည်။ ထို့နောက် နံနက် ၁၁ နာရီခွဲဝန်းကျင်၌ အောင်ဖြူပြင်ကျေးရွာကို အသေခံဒရုန်းဖြင့် ဗုံးနှစ်လုံးကြဲချ တိုက်ခိုက်မှု ကြောင့် အမျိုးသမီးတစ်ဦး ထိခိုက်ဒဏ်ရာရခဲ့ပြီး၊ တစ်ပြိုင်နက်တည်းမှာပင် ယိုးတရုတ်ကျေးရွာထဲကို ဂျက်ဖိုက်တာ တိုက်လေယာဉ်ဖြင့် ဗုံးနှစ်လုံးကြဲချ တိုက်ခိုက်ခဲ့သည်။ ပုဏ္ဏားကျွန်းဒေသခံများ၏ ပြောပြချက်အရ ယိုးတရုပ်ကျေးရွာတွင် ဗုံးကြဲတိုက်ခိုက်မှုကြောင့် အရပ်သား အမျိုးသားတစ်ဦးနှင့် အမျိုးသမီးလေးဦး အပါအဝင် ၅ ဦး သေဆုံးခဲ့ပြီး ၇ ဦး ဒဏ်ရာရရှိခဲ့သည်။ ထိခိုက်ဒဏ်ရာရရှိသူများမှာ လက်ရှိတွင် အရေးပေါ်ဆေးဝါးကုသမှု ခံယူနေကြရသည်။ ပုဏ္ဏားကျွန်းလူငယ်များ အစည်းအရုံး တာဝန်ရှိသူက “မနက် ၁၁ နာရီကျော် လောက်ကတည်းက လေကြောင်း တိုက်ခိုက်ခံရတာဗျ၊ ကျနော်တို့ ယိုးတရုတ်ရွာ ဗုံးကြဲတိုက်ခိုက်ခံရတာဗျ။ လူကတော့ ၅ ယောက် သေတယ်။ ၇ ယောက် ဒဏ်ရာ ရတယ်။ ဆေးကုသရေးလည်း အကုန်လုံးက ကျပ်တည်းနေတော့ အကူအညီတွေ လိုအပ်နေ ကြတယ်။ လူတွေကတော့ ထွက်ပြေး ကြတာပေါ့ဗျာ။ ရွာကနေ လူတွေအားလုံးက ထွက်ပြေးကြတာပေါ့ဗျာ” ဟု ပြောသည်။ စစ်ကော်မရှင်သည် ရှမ်းပြည် မြောက်ပိုင်း၌ ညီနောင်မဟာမိတ်သုံးဖွဲ့ထဲက ကိုးကန့်တပ်မတော် MNDAA၊ တအာင်းတပ် TNLA တို့နှင့် စစ်ရေး အပစ်အခတ်ရပ်စဲပြီးသည့်နောက် စစ်ဆင်ရေးနယ်မြေ အချို့ကျုံ့သွားခြင်းကို အခွင့်ကောင်းယူကာ ရခိုင်ပြည်ဘက်သို့ စစ်ရေးအရှိန် မြှင့်လာသည်ဟု AA က အောက်တိုဘာလ ၃၁ ရက်နေ့ တွင် သတိပေးထုတ်ပြန်ထားသည်။ အထက်ပါ ပုဏ္ဏားကျွန်းလူငယ်များ အစည်းအရုံး တာဝန်ရှိသူက “အခုလို အရပ်သားတွေကို ပစ်မှတ်ထား တိုက်ခိုက်တာကို ကျနော်တို့က ကန့်ကွက်ရှုတ်ချတယ်။ စစ်ကို စစ်လိုပဲ တိုက်စေချင်တယ်။ ဒီလို ဟိုယောင် ယောင် ဒီယောင်ယောင်နဲ့ အရပ်သား ပြည်သူတွေကို ဒုက္ခပေးတာမျိုးတော့ မလုပ်စေချင်ဘူး” ဟု ဆက် ပြောသည်။ အောက်တိုဘာလ ၃၁ ရက်နေ့ကလည်း ပုဏ္ဏားကျွန်းမြို့နယ်၊ ပန်းနီလာကျေးရွာကို စစ်ကော်မရှင်တပ်က ဗုံးကြဲ တိုက်ခိုက်ခဲ့ရာ ကလေးငယ်အပါအဝင် ၄ ဦး သေဆုံးပြီး ၉ ဦး ဒဏ်ရာရခဲ့သေးသည်။ စစ်ကော်မရှင်တပ်၏ လေကြောင်း၊ ဒရုန်း၊ လက်နက်ကြီး တိုက်ခိုက်မှုများ မကြာခဏ ဖြစ်ပွားနေခြင်းကြောင့် ဒေသခံများကြား စိုးရိမ်ထိတ်လန့်မှုများ မြင့်တက်နေသည်။ ပုဏ္ဏားကျွန်းမြို့နယ်သည် စစ်ကော်မရှင်တပ်၏ စစ်အုပ်ချုပ်ရေး ကြေညာထားသည့် မြို့နယ် ၆၃ မြို့နယ်ထဲတွင် ပါဝင်နေပြီး၊ လက်ရှိတွင် စစ်တွေ - ပုဏ္ဏားကျွန်းနယ် အစပ်တလျှောက်တွင် စစ်ရေးတင်းမာမှုများ ဆက်လက် ဖြစ်ပေါ်နေဆဲ ဖြစ်သည်။ ဓါတ်ပုံ - ပုဏ္ဏားကျွန်းလူငယ်များ အစည်းအရုံး

ပုဏ္ဏားကျွန်း လေကြောင်းတိုက်ခိုက်မှုကြောင့် အရပ်သား အနည်းဆုံး ၅ ဦး သေဆုံး

« Prev 1 … 94 95 96 97 98 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ