နိုင်ငံတကာသတင်း

အန္တရာယ်ရှိ ယာဉ်မောင်းနှင်မှု ဗီဒီယိုများ ဖြုတ်ချရန် လူမှုကွန်ရက်များကို ဗြိတိန် တိုက်တွန်း   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၂၅ ရက်။   ယာဉ်မဆင်မခြင် မောင်းနှင်မှုကို ဂုဏ်ဖော် အားပေးလှုံ့ဆော်သည့် ရုပ်သံဖိုင်များကို အမြန်ဆုံး စိစစ်ဖယ်ရှားပေးရန် TikTok အပါအဝင် လူမှုကွန်ရက် ကုမ္ပဏီများကို ဗြိတိန်အစိုးရက တိုက်တွန်းလိုက်သည်။   ဗြိတိန်နိုင်ငံ အရှေ့မြောက်ပိုင်းတွင် ယာဉ်လမ်းကြောင်း ပြောင်းပြန် မောင်းနှင်လာသည့် မော်တော်ယာဉ်တစ်စီးက ရဲကင်းလှည့်ယာဉ်ကို ဝင်ရောက်တိုက်မိခဲ့ရာ တာဝန်ထမ်းဆောင်နေသည့် ရဲတပ်ဖွဲ့ဝင် ၂ ဦးနှင့် မော်တော်ယာဉ်ပေါ်ပါ လူငယ် ၅ ဦး၊ စုစုပေါင်း ၇ ဦး ပွဲချင်းပြီး အသက်ဆုံးရှုံးခဲ့သည့် မတော်တဆမှု ဖြစ်ပွားခဲ့ပြီးနောက် ယခုကဲ့သို့ တောင်းဆိုလိုက်ခြင်းဖြစ်သည်။   အဆိုပါ ဖြစ်စဉ်မတိုင်မီ သေဆုံးသွားသူ လူငယ်များအနက် တစ်ဦးသည် ယာဉ်ကို အန္တရာယ်ရှိစွာ မောင်းနှင်ပြထားသည့် စိန်ခေါ်မှု ဗီဒီယိုများကို လူမှုကွန်ရက်ပေါ်သို့ တင်ခဲ့ဖူးကြောင်း သတင်းများ ထွက်ပေါ်ခဲ့သည်။   ဗြိတိန် ကာကွယ်ရေးဝန်ကြီး လုခ် ပိုးလတ် (Luke Pollard) က လူမှုကွန်ရက် ပလပ်ဖောင်းများအနေဖြင့် လမ်းမပေါ်တွင် ယာဉ်မဆင်မခြင် မောင်းနှင်မှုကို အားပေးလှုံ့ဆော်နေသည့် ရုပ်သံဖိုင်များကို အမြန်ဆုံး ဖြုတ်ချပေးရန်နှင့် မိမိတို့ ပလပ်ဖောင်းများကို မိမိတို့ဘာသာ စိစစ်ထိန်းကျောင်းနိုင်ကြောင်း တာဝန်ယူမှု သက်သေပြကြရန် တောင်းဆိုထားသည်။   #TIKTOK #Sharing_dangerous_driving_videos

အန္တရာယ်ရှိ ယာဉ်မောင်းနှင်မှု ဗီဒီယိုများ ဖြုတ်ချရန် လူမှုကွန်ရက်များကို ဗြိတိန် တိုက်တွန်း

အန္တရာယ်ရှိ ယာဉ်မောင်းနှင်မှု ဗီဒီယိုများ ဖြုတ်ချရန် လူမှုကွန်ရက်များကို ဗြိတိန် တိုက်တွန်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၅ ရက်။&n…

  • August 25, 2026
အမေရိကန်၏ လုံခြုံရေး ကတိကဝတ်များအပေါ် အာရှမဟာမိတ်များ သံသယ တိုးလာ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၅ ရက်။   အမေရိကန်ပြည်ထောင်စုသည် မြောက်ကိုရီးယား ခေါင်းဆောင် ကင်ဂျုံအန်းနှင့် ဆွေးနွေးပွဲများ ပြန်လည်စတင်ရန်အတွက် တောင်ကိုရီးယားနှင့် ပူးတွဲပြုလုပ်နေသည့် စစ်ရေးလေ့ကျင့်မှုများကို လျှော့ချခဲ့သည့်အပြင် လာမည့်လတွင် ပြုလုပ်ရန် စီစဉ်ထားသော လေ့ကျင့်မှုတစ်ခုကိုပါ ရုတ်တရက် ဖျက်သိမ်းခဲ့ကြောင်း သိရသည်။   အမေရိကန် သမ္မတ ဒေါ်နယ်ထရမ့်၏ အဆိုပါ ဆုံးဖြတ်ချက်နှင့် အခြား မဟာဗျူဟာမြောက် မူဝါဒ အပြောင်းအလဲများကြောင့် အာရှဒေသတွင်းရှိ မဟာမိတ်နိုင်ငံများအကြား အမေရိကန်အပေါ် လုံခြုံရေးအရ မှီခိုအားကိုးနိုင်မှုအပေါ် သံသယများ တိုးပွားလာနေကြောင်း ရိုက်တာ သတင်းဌာနက ဖော်ပြထားသည်။   မြောက်ကိုရီးယားအပေါ် သမ္မတထရမ့်၏ လျှော့ပေါ့ပေးသည့် ပေါ်လစီသည် အန္တရာယ်ရှိကြောင်း ဂျပန် ကာကွယ်ရေးဝန်ကြီးဟောင်းက ဝေဖန်ခဲ့သည်။   ထို့ပြင် ဂျပန်နိုင်ငံ၌ အမေရိကန်စစ်တပ် အခြေစိုက်စရိတ် ပိုမိုတောင်းခံလာမည်ကိုလည်းကောင်း၊ အရှေ့အလယ်ပိုင်းသို့ အမေရိကန် လေယာဉ်တင်သင်္ဘော ပြောင်းရွှေ့လိုက်ခြင်းကြောင့် အာရှဒေသတွင်း တရုတ်နှင့် မြောက်ကိုရီးယားတို့အပေါ် ဟန့်တားနိုင်စွမ်း ကျဆင်းသွားမည်ကိုလည်းကောင်း ဂျပန်အစိုးရက စိုးရိမ်လျက်ရှိသည်။     ထို့အပြင် အမေရိကန်သည် လာမည့်လအတွင်း တရုတ်သမ္မတ ရှီကျင့်ဖိန်နှင့် ထိပ်သီးအစည်းအဝေး မပြုလုပ်မီ ထိုင်ဝမ်သို့ ရောင်းချမည့် ဒေါ်လာ ၁၄ ဘီလီယံတန် လက်နက် ပက်ကေ့ဂျ်ကိုလည်း ဆိုင်းငံ့ထားသည်။   #American

အမေရိကန်၏ လုံခြုံရေး ကတိကဝတ်များအပေါ် အာရှမဟာမိတ်များ သံသယ တိုးလာ

အမေရိကန်၏ လုံခြုံရေး ကတိကဝတ်များအပေါ် အာရှမဟာမိတ်များ သံသယ တိုးလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၅ ရက်။  အမေရိကန်ပြည်ထောင်စ…

  • August 25, 2026
အီရန်အပေါ် အမေရိကန်က ကမ္ဘာတဝှမ်း စီးပွားရေးပိတ်ဆို့မှု ချမှတ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၅ ရက်။   အမေရိကန်ပြည်ထောင်စုသည် အီရန်နိုင်ငံနှင့် စီးပွားရေး ပတ်သက်မှုရှိနေသည့် ကမ္ဘာတစ်ဝန်းရှိ အဖွဲ့အစည်းများနှင့် နိုင်ငံများအပေါ် စီးပွားရေးအရ ပိတ်ဆို့အရေးယူမှုများကို ပြင်းထန်စွာ ပိုမိုတိုးမြှင့်လိုက်သည်ဟု ကြေညာသည်။   အမေရိကန် ဘဏ္ဍာရေးဝန်ကြီး စကော့တ် ဘက်ဆင့် (Scott Bessent) က အီရန်၏ ဘဏ္ဍာရေး ကွန်ရက်များကို ဖြတ်တောက်ရန် "စီးပွားရေးဆိုင်ရာ D-Day" အမည်ရှိ အရေးပေါ် ထိုးစစ်ဆင်မှုကို ကြေညာလိုက်ပြီး အီရန်နှင့် စီးပွားရေး ပတ်သက်မှုများကို အမြန်ဆုံး ဖြတ်တောက်ကြရန် သတိပေးထားသည်။   အီရန်ရဲ့ နျူကလီးယား၊ ဒုံးကျည်၊ ဆိုက်ဘာနှင့် ရေနံမှောင်ခို ကွန်ရက်များနဲ့ ဆက်စပ်နေတဲ့ ပုဂ္ဂိုလ်၊ အဖွဲ့အစည်းနှင့် ရေနံတင်သင်္ဘော ၆၀ နီးပါးကို အမေရိကန် ဘဏ္ဍာရေးဌာနက နာမည်ပျက် စာရင်းသွင်းအရေးယူခဲ့သည်။   ထို့ပြင် ဒစ်ဂျစ်တယ် ပိုင်ဆိုင်မှု၊ နည်းပညာ၊ ရွှေ၊ လေကြောင်းနှင့် ရေကြောင်း သယ်ယူပို့ဆောင်ရေး စသည့် ကဏ္ဍ ၅ ခုကိုလည်း ဒုတိယအဆင့် ပိတ်ဆို့အရေးယူမှုများ (Secondary sanctions) ပြုလုပ်သွားမည်ဖြစ်သည်။   အမေရိကန် ဒေါ်လာအခြေပြု ဘဏ္ဍာရေးစနစ်မှ ပယ်ထုတ်မခံရရေးအတွက် အီရန်နှင့် စီးပွားရေး လုပ်ကိုင်နေသူများကို ပတ်သက်မှု ဖြတ်တောက်ရန် အချိန်အတိုင်းအတာတစ်ခု သတိပေးလိုက်ခြင်း ဖြစ်သည်။   သမ္မတ ဒေါ်နယ်ထရမ့် ကိုယ်တိုင်လည်း ကမ္ဘာ့ခေါင်းဆောင်များထံ ဖုန်းဆက်၍ တောင်းဆိုလျက်ရှိသည်။   အီရန်ရေနံ အများဆုံး ဝယ်ယူနေသည့် တရုတ်နိုင်ငံနှင့် ပတ်သက်၍မူ ဘဏ်များကို တိုက်ရိုက် အရေးမယူသေးဘဲ သံခင်းတမန်ခင်း နည်းလမ်းဖြင့် သတိပေး ညှိနှိုင်းမှုများ ပြုလုပ်နေသည်ဟု ဆိုသည်။ #Scott_Bessent

အီရန်အပေါ် အမေရိကန်ကကမ္ဘာတဝှမ်း စီးပွားရေးပိတ်ဆို့မှု ချမှတ် 

အီရန်အပေါ် အမေရိကန်ကကမ္ဘာတဝှမ်း စီးပွားရေးပိတ်ဆို့မှု ချမှတ်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၅ ရက်။  အမေရိကန်ပြည်ထောင်စုသည်…

  • August 25, 2026
ယူကရိန်းအတွက် ဥရောပနိုင်ငံများ စစ်ရေးအကူအညီ ပိုမိုတိုးမြှင့်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၂၅ ရက်။   ယူကရိန်းနိုင်ငံအတွက် စစ်ရေးထောက်ပံ့မှုများ ပိုမိုတိုးမြှင့်ရန် ဥရောပခေါင်းဆောင်များ သီးသန့်အစည်းအဝေး ပြုလုပ်ခဲ့ပြီး အဆိုပါ အစည်းအဝေးသို့ ယူကရိန်းသမ္မတ ဇယ်လန်းစကီးက ဗီဒီယိုစနစ်ဖြင့် ပါဝင်တက်ရောက်ခဲ့သည်။   ဆွေးနွေးပွဲတွင် ရုရှား၏ စစ်ရေးစွမ်းရည်ကို လျှော့ချရန်နှင့် ရုရှား၏ အရိပ်သင်္ဘောများကို  ကို နှိမ်နင်းရန် ကိစ္စရပ်များကို အဓိကထား ဆွေးနွေးခဲ့ကြသည်။   အဆိုပါ အစည်းအဝေး၌ ဥရောပသမဂ္ဂ (EU) က ယူကရိန်းအတွက် နောက်ထပ် ယူရို ၆.၁ ဘီလီယံ အကူအညီပေးရန် သဘောတူညီခဲ့သည်။   တစ်ချိန်တည်းမှာပင် ပြင်သစ်နှင့် ဗြိတိန်နိုင်ငံတို့က ဒုံးကျည်ဆိုင်ရာ နည်းပညာများနှင့် စစ်ကူအသစ်များ ထပ်မံပေးအပ်ခဲ့ကြောင်း CNBC သတင်းတွင် ဖော်ပြထားသည်။   ပြင်သစ်သမ္မတ မက်ခရွန်က ယူကရိန်း၏ လေကြောင်းပိုင်နက် ကာကွယ်ရေးအတွက် အဓိက လိုအပ်နေသည့် ကြားဖြတ်ပစ် လေကြောင်းကာကွယ်ရေး ဒုံးကျည်များကို ထောက်ပံ့ပေးသွားမည်ဟု ကြေညာခဲ့သည်။   ဗြိတိန်ဝန်ကြီးချုပ် အန်ဒီ ဘန်းဟမ်းသည်လည်း ရာထူးရရှိပြီးနောက် ပထမဆုံး ပြည်ပခရီးစဉ်အဖြစ် ကိယက်ဗ်မြို့သို့ သွားရောက်ခဲ့ကာ၊ SCALP တာဝေးပစ် ဒုံးကျည် အစိတ်အပိုင်းဆိုင်ရာ လျှို့ဝှက် နည်းပညာများကို ယူကရိန်းအတွင်းရှိ စက်ရုံများ၌ တိုက်ရိုက် တပ်ဆင်ထုတ်လုပ်နိုင်ရေး ဗြိတိန်ကာကွယ်ရေးကုမ္ပဏီကို လွှဲပြောင်းပေးအပ်ခွင့် ပြုလိုက်သည်။   ယခုကဲ့သို့ ဥရောပနိုင်ငံများ၏ စစ်ရေးအကူအညီများ ထွက်ပေါ်လာခြင်းမှာ ယူကရိန်းအလယ်ပိုင်း ခရီဗီရီးမြို့ရှိ လူစည်ကားရာ ဈေးဝယ်စင်တာတစ်ခုကို ရုရှား၏ ဒရုန်းတိုက်ခိုက်မှုကြောင့် အရပ်သား အနည်းဆုံး ၁၆ ဦး သေဆုံးပြီး ၁၂၈ ဦး ဒဏ်ရာရရှိခဲ့သည့် ဖြစ်စဉ်အပြီးတွင် ပြုလုပ်ခဲ့ခြင်း ဖြစ်သည်။ #EU #UkraineWar

ယူကရိန်းအတွက် ဥရောပနိုင်ငံများ စစ်ရေးအကူအညီ ပိုမိုတိုးမြှင့်

ယူကရိန်းအတွက် ဥရောပနိုင်ငံများ စစ်ရေးအကူအညီ ပိုမိုတိုးမြှင့် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၅ ရက်။  ယူကရိန်းနိုင်ငံအတွက် စစ်ရေးထ…

  • August 25, 2026
တရုတ် J-16 နှင့် ပြင်သစ်ပိုင် ရာဖေးလ် လေယာဉ်များ ပူးတွဲစစ်ရေးလေ့ကျင့်မှု ပြုလုပ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၅ ရက်။   တရုတ်နိုင်ငံ၏ စတုတ္ထမျိုးဆက်လွန် J-16 တိုက်လေယာဉ်များသည် အီဂျစ်နိုင်ငံ၌ ပြုလုပ်နေသည့် ပူးတွဲစစ်ရေးလေ့ကျင့်မှုအတွင်း ပြင်သစ်လုပ် ရာဖေးလ် (Rafale) တိုက်လေယာဉ်များနှင့်အတူ ကောင်းကင်ယံတွင် ပူးတွဲ ပျံသန်းလေ့ကျင့်ခဲ့ကြသည်။   မြို့ပြ ဖွံ့ဖြိုးမှု၏ လင်းယုန်များ "Eagles of Civilization" အမည်ရှိ တရုတ်နှင့် အီဂျစ်နိုင်ငံတို့၏ ဒုတိယအကြိမ်မြောက် လေကြောင်း ပူးတွဲစစ်ရေးလေ့ကျင့်မှုကို ဩဂုတ် ၂၂ ရက်မှ စတင်ပြုလုပ်ခဲ့ခြင်းဖြစ်သည်။   J-16 တိုက်လေယာဉ်များသည် မိုင်ပေါင်းများစွာ ခရီးကို ဝေဟင်ဆီဖြည့်စနစ်ဖြင့် ပျံသန်းလာခဲ့ခြင်းဖြစ်သည်။   ယခုလေ့ကျင့်မှုသည် တိုက်လေယာဉ် နှစ်မျိုး၏ စွမ်းဆောင်ရည်ကို တိုက်ရိုက် ယှဉ်ပြိုင်ရန် မဟုတ်ဘဲ၊ လေကြောင်းတိုက်ပွဲ စစ်ဆင်ရေးများ ပူးတွဲ စီမံခန့်ခွဲနိုင်ရန်၊ တိုက်ခိုက်ရေး သဘောတရားများ ညှိယူရန်နှင့် အတွေ့အကြုံ ဖလှယ်ရန် အဓိကထား ဆောင်ရွက်ခြင်းဖြစ်သည်။   စစ်ရေးလေ့ကျင့်မှု အစပိုင်းတွင် သီအိုရီနှင့် လက်တွေ့ လေ့ကျင့်ခန်းများ ဆောင်ရွက်သွားမည်ဖြစ်ပြီး၊ ပူးတွဲပျံသန်းမှုများနှင့် တိုက်ပွဲဝင် စီမံခန့်ခွဲမှုများကို ဆက်လက် ဆောင်ရွက်မည်ဖြစ်သည်။   J-16 တိုက်လေယာဉ်သည် တရုတ် ပြည်သူ့လွတ်မြောက်ရေးတပ်မတော် လေတပ်က အသုံးပြုနေသည့် Generation 4.5 အဆင့်ရှိ တိုက်လေယာဉ်ဖြစ်သည်။     AVIC Shenyang မှ ထုတ်လုပ်၍ ခေတ်မီ အီလက်ထရွန်နစ် လေကြောင်းစနစ်များ၊ အဆင့်မြင့် ရေဒါနှင့် အီလက်ထရွန်နစ် စစ်ဆင်ရေးစနစ် (electronic warfare systems) များ တပ်ဆင်ထားသည်ဟု ဆိုသည်။ #Eagles_of_Civilization

တရုတ် J-16 နှင့် ပြင်သစ်ပိုင်ရာဖေးလ် လေယာဉ်များပူးတွဲစစ်ရေးလေ့ကျင့်မှု ပြုလုပ်

တရုတ် J-16 နှင့် ပြင်သစ်ပိုင်ရာဖေးလ် လေယာဉ်များပူးတွဲစစ်ရေးလေ့ကျင့်မှု ပြုလုပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၅ ရက်။  တရုတ်နိုင်…

  • August 25, 2026
တိုင်ဖုန်းမုန်တိုင်း နာရာကြောင့် တရုတ်နှင့် ဗီယက်နမ်တွင် ရေကြီးမြေပြိုမှုများ ဖြစ်ပွား   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၂၅   တောင်တရုတ်ပင်လယ်တွင် ဖြစ်ပွားခဲ့သည့် တိုင်ဖုန်းမုန်တိုင်း နာရာ (Narra) ၏ ရိုက်ခတ်မှုကြောင့် တရုတ်နိုင်ငံ တောင်ပိုင်းနှင့် ဗီယက်နမ်နိုင်ငံ မြောက်ပိုင်းတို့တွင် မိုးသည်းထန်စွာ ရွာသွန်းပြီး ရေကြီးရေလျှံမှုနှင့် မြေပြိုမှုများ ပြင်းထန်စွာ ဖြစ်ပွားလျက်ရှိသည်။ မုန်တိုင်းအရှိန်ကြောင့် တရုတ်နိုင်ငံတောင်ပိုင်း ကွမ်ရှီးဒေသ၌ မြစ် ၁၅ စင်း၏ ရေမှတ်မှာ စိုးရိမ်ရေမှတ်ထက် ကျော်လွန်သွားခဲ့ပြီး ပြည်သူ ၅၄,၀၀၀ ကျော်ကို အရေးပေါ် ဘေးလွတ်ရာသို့ ရွှေ့ပြောင်းပေးခဲ့ရသည်။   ချုံကျိုးမြို့တွင် လမ်းများနှင့် အဆောက်အအုံများ ရေမြုပ်နေသဖြင့် ကယ်ဆယ်ရေးသမားများက လေထိုးလှေများ အသုံးပြု၍ ပိတ်မိနေသူများကို ကူညီပေးနေရသည်။   မုန်တိုင်းသည် ကွမ်ရှီးပြည်နယ်အတွင်းသို့ ဦးတည်ရွှေ့လျားပြီး အားပျော့သွားနိုင်သော်လည်း ကွမ်ရှီး၊ ကွမ်တုန်း၊ ဟိုင်နန်နှင့် ဖူကျန့် ပြည်နယ်တို့တွင် မိုးသည်းထန်စွာ ဆက်လက်ရွာသွန်းနိုင်ကြောင်း သတိပေးထားသည်။   ဗီယက်နမ်မြောက်ပိုင်း ပြည်နယ် ၂ ခုတွင်လည်း ၂၄ နာရီအတွင်း မိုးရေချိန် မီလီမီတာ ၂၃၆ မှ ၃၀၀ အထိ စံချိန်တင် ရွာသွန်းခဲ့ပြီး မြေပြိုမှုကြောင့် လူ ၁ ဦး သေဆုံးကာ အိမ်ထောင်စု ၄,၃၀၀ ထက်မက ဘေးလွတ်ရာသို့ ရွှေ့ပြောင်းခဲ့ရသည်။   ကမ္ဘာ့အမွေအနှစ်စာရင်းဝင် ဟာလောင်းဘေး တည်ရှိရာ ကွမ်နင်း ပြည်နယ်အပါအဝင် မြို့ပြအချို့ ရေနစ်မြုပ်ခဲ့သဖြင့် သွားလာရေး၊ ငါးဖမ်းလုပ်ငန်းနှင့် ခရီးသွားလုပ်ငန်းများ ရပ်ဆိုင်းခဲ့ရသည်။   ထို့ပြင် မိသားစု ၅၅,၀၀၀ နီးပါး လျှပ်စစ်မီး ပြတ်တောက်ခဲ့ပြီး၊ စပါးနှင့် အခြားစိုက်ပျိုးဧက ၂၅,၀၀၀ ထက်မက ရေနစ်မြုပ် ပျက်စီးခဲ့ကြောင်း သိရသည်။ #Narra

တိုင်ဖုန်းမုန်တိုင်း နာရာကြောင့် တရုတ်နှင့် ဗီယက်နမ်တွင် ရေကြီးမြေပြိုမှုများ ဖြစ်ပွား

တိုင်ဖုန်းမုန်တိုင်း နာရာကြောင့် တရုတ်နှင့် ဗီယက်နမ်တွင် ရေကြီးမြေပြိုမှုများ ဖြစ်ပွား သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၅  တေ…

  • August 25, 2026
အိန္ဒိယတွင် အိုင်ဖုန်းဝယ်ပေးရေး စကားများရာမှ မိသားစု ၃ ဦး တောင်ပေါ်မှ ပြုတ်ကျသေဆုံး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၂၅ ရက်။   အိုင်ဖုန်းအသစ် ဝယ်မပေးသည့်ကိစ္စဖြင့် စကားများရာမှ အသက် ၁၉ နှစ်အရွယ် ဆယ်ကျော်သက် သားဖြစ်သူ တောင်ပေါ်မှ ခုန်ချခဲ့သည်။   ၎င်းအား ကယ်ဆယ်ရန် ကြိုးစားသည့် မိဘနှစ်ပါးပါ အသက်ဆုံးရှုံးခဲ့ရသည့် ဖြစ်ရပ်တစ်ခု အိန္ဒိယနိုင်ငံတွင် ဖြစ်ပွားခဲ့ကြောင်း Hindustan Times သတင်း၌ ဖော်ပြထားသည်။   ဖြစ်စဉ်မှာ နံနက် ၁၀ နာရီခန့်တွင် အဆိုပါ လူငယ်သည် ဖုန်းအသစ်ဝယ်ပေးရန် ပူဆာရာမှ မိဘများနှင့် အချေအတင် စကားများပြီး မဟာရဋ္ဌပြည်နယ်ရှိ ခါဝဒ်ယာ တောင်ကုန်း (Khawadya Hill) ပေါ်သို့ ထွက်သွားခဲ့သည်။   မိဘများက စိုးရိမ်စိတ်ဖြင့် နောက်မှ လိုက်သွားကာ အိမ်ပြန်လာရန် ချော့မော့ ဖျောင်းဖျခဲ့ကြသည်။   လူငယ်ဖြစ်သူ တောင်ပေါ်မှ ခုန်ချရန် ကြိုးစားနေသည့် သတင်းကြောင့် ရဲတပ်ဖွဲ့၊ မီးသတ်တပ်ဖွဲ့နှင့် ဒေသခံများ အခင်းဖြစ်ပွားရာ တောင်ကုန်းသို့ ရောက်ရှိလာခဲ့ကြသည်။ ကယ်ဆယ်ရေးသမားများက တောင်အောက်တွင် ဘေးကင်းလုံခြုံရေး ပိုက်ကွန်များ ဖြန့်ကျက်ရန် ကြိုးစားခဲ့သော်လည်း၊ လူငယ်မှာ တောင်စွန်း၌ နေရာခဏခဏ ရွှေ့ဆိုင်းနေသည့်အတွက် ခုန်ချမည့်နေရာကို ခန့်မှန်းရ ခက်ခဲခဲ့သည်။   အာဏာပိုင်များနှင့် ရပ်မိရပ်ဖများက ၃ နာရီနီးပါး ဝိုင်းဝန်းဖျောင်းဖျခဲ့သော်လည်း နားထောင်မည့် အခြေအနေ မရှိခဲ့ပေ။   မွန်းလွဲ ၁ နာရီကျော်တွင် ဖခင်ဖြစ်သူက သားဖြစ်သူထံ တဖြည်းဖြည်း တိုးကပ်သွားပြီး နောက်ဆုတ်ရန် တောင်းပန်စဉ် လူငယ်က ရုတ်တရက် ခုန်ချလိုက်သဖြင့် ဖခင်ဖြစ်သူပါ လှမ်းဆွဲကယ်ဆယ်ရင်း အောက်သို့ အတူတကွ ပြုတ်ကျသွားခဲ့သည်။   သားနှင့် ခင်ပွန်းဖြစ်သူတို့ မျက်စိရှေ့တွင်ပင် ပြုတ်ကျသွားသည်ကို မြင်တွေ့လိုက်ရသည့် မိခင်ဖြစ်သူသည်လည်း တုန်လှုပ်ချောက်ချားကာ အောက်သို့ ချက်ချင်း လိုက်လံခုန်ချခဲ့ခြင်း ဖြစ်သည်။ #Khawadya_Hill

အိန္ဒိယတွင် အိုင်ဖုန်းဝယ်ပေးရေး စကားများရာမှ မိသားစု ၃ ဦး တောင်ပေါ်မှ ပြုတ်ကျသေဆုံး

အိန္ဒိယတွင် အိုင်ဖုန်းဝယ်ပေးရေး စကားများရာမှ မိသားစု ၃ ဦး တောင်ပေါ်မှ ပြုတ်ကျသေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၅ ရက်။  အိုင်…

  • August 25, 2026
လူတူရိုဘော့က ယူစိန်းဘို့လ်၏ မီတာ ၁၀၀ အပြေးစံချိန်ကို ချိုးဖျက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၅ ရက်။   တရုတ်နိုင်ငံ ပေကျင်းမြို့၌ ကျင်းပသည့် ကမ္ဘာ့လူတူရိုဘော့ အားကစားပြိုင်ပွဲတွင် ရိုဘော့တစ်ရုပ်က အပြေးချန်ပီယံ ယူစိန်းဘို့လ်၏ မီတာ ၁၀၀ အပြေးစံချိန်ကို ချိုးဖျက်သွားခဲ့သည်။   X-Humanoid ကုမ္ပဏီထုတ် အဆိုပါ လူတူ စက်ရုပ် သည် မီတာ ၁၀၀ ကို ၉.၃၉ စက္ကန့်ဖြင့် အရောက်ပြေးနိုင်ခဲ့သည်။ ယင်းမှာ ၂၀၀၉ ခုနှစ်က ယူစိန်းဘို့လ် တင်ရှိခဲ့သည့် လူသားတို့၏ စံချိန် ၉.၅၈ စက္ကန့်ထက် ပိုမိုမြန်ဆန်ခဲ့ခြင်းဖြစ်သည်။   သို့သော် ပန်းဝင်ချိန်တွင် ရိုဘော့မှာ အရှိန်မထိန်းနိုင်ဘဲ မွေ့ယာနှင့် ရိုက်မိကာ လဲကျသွားခဲ့သဖြင့် တာဝန်ရှိသူများက ထမ်းစင်ဖြင့် သယ်ထုတ်ခဲ့ရသည်။   ထို့အပြင် အဆိုပါ ကုမ္ပဏီထုတ် အခြား ရိုဘော့တစ်ရုပ်ကလည်း ၂.၈၈ မီတာအထိ ခုန်ပြကာ ၁၉၉၃ ခုနှစ်က ကူးဘား ကစားသမား တင်ထားခဲ့သည့် ၂.၄၅ မီတာ အမြင့်ခုန် စံချိန်ဟောင်းကို ကျော်လွန်၍ စံချိန်သစ် တင်နိုင်ခဲ့သည်။   ပြိုင်ပွဲဝင် ရိုဘော့ပေါင်း ၂,၀၀၀ ကျော် ပါဝင်ခဲ့သည့် အဆိုပါ ပြိုင်ပွဲတွင် ပြိုင်ပွဲဝင် ရိုဘော့အချို့မှာ လဲကျ၍ ခန္ဓာကိုယ် အစိတ်အပိုင်းများ ကျိုးပဲ့ခြင်းနှင့် မီးလောင်မှုများ ဖြစ်ပွားခဲ့သည်။   #robot #X_Humanoid

လူတူရိုဘော့က ယူစိန်းဘို့လ်၏ မီတာ ၁၀၀ အပြေးစံချိန်ကို ချိုးဖျက်

လူတူရိုဘော့က ယူစိန်းဘို့လ်၏ မီတာ ၁၀၀ အပြေးစံချိန်ကို ချိုးဖျက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၅ ရက်။  တရုတ်နိုင်ငံ ပေကျင်းမြို့၌…

  • August 25, 2026
ဂီနီတွင် အမှိုက်ပုံကြီး ပြိုကျပြီး လူ ၃၀ သေဆုံး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၂၄ ရက်။   အနောက်အာဖရိက ဒေသ ဂီနီနိုင်ငံ၏ မြို့တော် ခိုနကာရီ (Conakry) ရှိ အမှိုက်တောင်ကြီးသည် မိုးသည်းထန်စွာ ရွာသွန်းအပြီး မနက်စောစော ၂ နာရီဝန်းကျင်တွင် အနီးအနားရှိ နေအိမ်များပေါ်သို့ ပြိုကျခဲ့ရာ အများအပြား သေဆုံးခဲ့သည်။   အဆိုပါ မတော်တဆမှုကြောင့် အနည်းဆုံး လူ ၃၀ သေဆုံးကာ ၂၂ ဦး ဒဏ်ရာရရှိခဲ့ပြီး ၆ ဦးမှာ စိုးရိမ်ရသည့် အခြေအနေတွင် ရှိနေသဖြင့် သေဆုံးသူ အရေအတွက် ထပ်မံ မြင့်တက်လာမည်ကို စိုးရိမ်လျက်ရှိကြသည်။   လက်ရှိတွင် စစ်သားများ အပါအဝင် ကယ်ဆယ်ရေး အဖွဲ့ဝင်များ ရောက်ရှိနေပြီး မြေကူးစက်များ အသုံးပြု၍ ပိတ်မိနေသူများကို အလျင်အမြန် ရှာဖွေလျက်ရှိသည်။   ဂီနီ ဝန်ကြီးချုပ် မာမက်ဒူ အူရီ ဘား (Mamadou Oury Bah) ကလည်း အခင်းဖြစ်ပွားရာ ဒေသသို့ ကိုယ်တိုင် သွားရောက်ကာ ရှာဖွေကယ်ဆယ်ရေး လုပ်ငန်းများကို ကြည့်ရှုစစ်ဆေးခဲ့သည်။   #Conakry

ဂီနီတွင် အမှိုက်ပုံကြီး ပြိုကျပြီး လူ ၃၀ သေဆုံး 

ဂီနီတွင် အမှိုက်ပုံကြီး ပြိုကျပြီး လူ ၃၀ သေဆုံး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၄ ရက်။  အနောက်အာဖရိက ဒေသ ဂီနီနိုင်ငံ၏ မြို့…

  • August 24, 2026
×Close