နိုင်ငံတကာသတင်း

ယူကရိန်းက ရုရှား ကုန်လှောင်ရုံတစ်ခုကို ထပ်မံတိုက်၊ ရုရှားက စစ်သည် ၃၀၀,၀၀၀ ပို့ရန် ပြင်ဆင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၄ ရက်။   ရုရှားနှင့် ယူကရိန်း စစ်ပွဲအတွင်း စီးပွားရေးဆိုင်ရာ အဆောက်အအုံများကို အပြန်အလှန် ပစ်မှတ်ထား တိုက်ခိုက်မှုများ ပိုမို ပြင်းထန်လာနေပြီး ရုရှားဘက်က စစ်သည်အင်အား အမြောက်အမြား ထပ်မံ စုဆောင်းလာနိုင်သည်ဟု ယူကရိန်း သမ္မတက ပြောကြားခဲ့သည်။   ယူကရိန်းဘက်က ရုရှားနိုင်ငံအတွင်းရှိ စီးပွားရေးဆိုင်ရာ အခြေခံအဆောက်အအုံများကို ဒရုန်းများဖြင့် တိုက်ခိုက်မှု တိုးမြှင့်လာရာ ဩဂုတ်လ ၂၃ ရက်က ရုရှားရှိ အိုဇွန် (Ozon) ကုန်လှောင်ရုံတစ်ခု ဒရုန်းအပျက်အစီးများ ထိမှန်ခဲ့သဖြင့် ဝန်ထမ်း ၃၀၀ ကျော်အား ဘေးလွတ်ရာ ရွှေ့ပြောင်းပေးခဲ့ရကာ လုပ်ငန်းစဉ်များ ရပ်ဆိုင်းခဲ့ရသည်ဟု ရိုက်တာ သတင်းတွင် ဖော်ပြထားသည်။   ရုရှားသမ္မတ ဗလာဒီမီယာ ပူတင်က ယူကရိန်း၏ စီးပွားရေး ပစ်မှတ်များကို တိုက်ခိုက်မှုသည် ဆိုးရွားမှုများကိုပြန့်နှံ့စေသည့် 'ပန်ဒိုရာသေတ္တာ' ကို ဖွင့်လှစ်လိုက်ခြင်း ဖြစ်ပြီး ရုရှားဘက်ကလည်း ယူကရိန်း၏ အထိခိုက်မခံနိုင်ဆုံး စီးပွားရေး ကဏ္ဍများကို ပြန်လည် တုံ့ပြန်တိုက်ခိုက်သွားမည်ဟု သတိပေးခဲ့သည်။   တစ်ဖက်တွင်လည်း ယူကရိန်းသမ္မတ ဗိုလိုဒီမီယာ ဇယ်လန်းစကီးက ရုရှားသည် အရှေ့ပိုင်း ဒိုးနက်စခ် (Donetsk) ဒေသကို အပြီးသတ် သိမ်းပိုက်ရေးအတွက် လာမည့် လများအတွင်း စစ်သည်အင်အား ၃ သိန်းထက်မနည်း ထပ်မံစုဆောင်းလာနိုင်ကြောင်း သတိပေးထားသည်ဟု AP သတင်းတွင် ဖော်ပြထားသည်။   ထို့ပြင် ရုရှား၏ ပဲ့ထိန်းဒုံးကျည်များကို ကာကွယ်ရန် အမေရိကန်ထံမှ ရရှိသည့် Patriot လေကြောင်းရန် ကာကွယ်ရေး ဒုံးကျည် ထောက်ပံ့မှု လျော့ကျလာသည်ကို ထောက်ပြခဲ့ပြီး မဟာမိတ်များထံမှ လေကြောင်းကာကွယ်ရေး အကူအညီများ ပိုမိုရရှိရေး ဆွေးနွေးမှုများ ဆက်လက် ပြုလုပ်နေကြောင်း ဇယ်လန်းစကီးက ပြောကြားခဲ့သည်။     Photo:Reuters and Dmitri Lovetsky / picture alliance   #Russia #Ukraine

ယူကရိန်းက ရုရှား ကုန်လှောင်ရုံတစ်ခုကို ထပ်မံတိုက်၊ ရုရှားက စစ်သည် ၃၀၀,၀၀၀ ပို့ရန် ပြင်ဆင်

ယူကရိန်းက ရုရှား ကုန်လှောင်ရုံတစ်ခုကို ထပ်မံတိုက်၊ ရုရှားက စစ်သည် ၃၀၀,၀၀၀ ပို့ရန် ပြင်ဆင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၄ ရက်။&nbs…

  • August 24, 2026
အင်ဒိုနီးရှားတွင် တောမီးရှို့ သံသယဖြင့် လူ ၇၂ ဦးကို ဖမ်းဆီး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၄ ရက်။   အင်ဒိုနီးရှား ရဲတပ်ဖွဲ့သည် တောမီးနှင့် မြေဆီလွှာ မီးရှို့မှုဆိုင်ရာ သံသယရှိသူ ၇၂ ဦးကို တနင်္ဂနွေနေ့က ဖမ်းဆီးလိုက်သည်။   အဆိုပါ တောမီးများကြောင့် အန္တရာယ်ရှိသော မီးခိုးမြူထူများ ပြင်းထန်စွာ ထွက်ပေါ်ခဲ့ပြီး အိမ်နီးချင်း မလေးရှားနိုင်ငံအထိ ပျံ့နှံ့သွားခဲ့သည်။   အယ်လ်နီညို ရာသီဥတုနှင့် မိုးခေါင်မှုတို့ကြောင့် တောမီးလောင်ကျွမ်းမှု ပိုမို ပြင်းထန်ခဲ့ခြင်း ဖြစ်ပြီး အာဏာပိုင်များက ဆူမားတြားနှင့် ဘော်နီယို ကျွန်းပေါ်ရှိ ပြည်နယ်များတွင် အမှုပေါင်း ၈၉ မှုကို စုံစမ်းစစ်ဆေးလျက်ရှိသည်။   စိုက်ပျိုးမြေရှင်းလင်းရာတွင် ကုန်ကျစရိတ် သက်သာစေရန်အတွက် တမင် မီးရှို့ခဲ့ကြခြင်း ဖြစ်သည်ဟု ရဲတပ်ဖွဲ့က ပြောသည်။   လက်တွေ့ မီးရှို့သူများအပြင် နောက်ကွယ်မှ စိုက်ပျိုးရေး ကုမ္ပဏီများနှင့် ခိုင်းစေသူများကိုပါ ဖော်ထုတ် အရေးယူနိုင်ရေး အင်ဒိုနီးရှား ရဲတပ်ဖွဲ့က ငွေကြေးဆိုင်ရာ မှတ်တမ်းများကို စစ်ဆေးမှုများ ပြုလုပ်နေသည်။   #indonesiawildfire

အင်ဒိုနီးရှားတွင် တောမီးရှို့ သံသယဖြင့် လူ ၇၂ ဦးကို ဖမ်းဆီး 

အင်ဒိုနီးရှားတွင် တောမီးရှို့ သံသယဖြင့် လူ ၇၂ ဦးကို ဖမ်းဆီး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၄ ရက်။  အင်ဒိုနီးရှား ရဲတပ်ဖွဲ့…

  • August 24, 2026
ဂျပန် ကန်တိုဒေသ အင်အားပြင်း ငလျင် လှုပ်ခတ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၄ ရက်။   ဂျပန်နိုင်ငံ တိုကျိုနှင့် ကန်တိုဒေသတွင် အင်အားပြင်း ငလျင်တစ်ခု လှုပ်ခတ်သွားခဲ့ပြီး လာမည့် သီတင်းပတ်အတွင်း အလားတူ ငလျင်များ ထပ်မံလှုပ်ခတ်နိုင်သဖြင့် သတိပေးချက်များ ထုတ်ပြန်ထားသည်။   တနင်္ဂနွေနေ့ မနက်စောစော ၂ နာရီခန့်က ပြင်းအား ရစ်ခ်ျတာစကေး ၅.၉ ရှိသော ငလျင်သည် မြေအောက်အနက် ၆၈ ကီလိုမီတာကို ဗဟိုပြု၍ လှုပ်ခတ်ခဲ့ရာ လူ ၃၇ ဦးထက်မနည်း ဒဏ်ရာရရှိခဲ့သည်။   ဂျပန် မိုးလေဝသ အေဂျင်စီ၏ ထုတ်ပြန်ချက်အရ တိုကျိုမြို့ အဒါချီ (Adachi) ရပ်ကွက် အပါအဝင် အနီးအနား ခရိုင်များတွင် ငလျင်ပြင်းအား အဆင့် ၅ (Lower 5) အထိ ခံစားခဲ့ရပြီး စင်ပေါ်မှ ပစ္စည်းများ ပြုတ်ကျခြင်း၊ မတ်တပ်ရပ်ရန် တစ်ခုခုကို ကိုင်တွယ်ထိန်းထားရခြင်းတို့ ဖြစ်ပေါ်ခဲ့သည်ဟု ဂျပန် သတင်းများတွင် ဖော်ပြသည်။   ငလျင်ကြောင့် ဓာတ်လှေကားများအတွင်း လူပိတ်မိခြင်း၊ ရထားခရီးစဉ်များ နှောင့်နှေးခြင်းနှင့် အီဘရာကီခရိုင်ရှိ မြို့တော်ခန်းမ မျက်နှာကြက်အချို့ ပြိုကျခြင်းတို့ ရှိခဲ့သည်။ အထပ်မြင့် အဆောက်အအုံများတွင် နေထိုင်သူများအနေဖြင့် အချိန်အတန်ကြာ ယိမ်းယိုင်တုန်ခါမှုများကို သိသိသာသာ ခံစားခဲ့ရသည် ဟု ဒေသခံ ဂျပန်သတင်းများတွင် ဖော်ပြသည်။   ဂျပန် ဝန်ကြီးချုပ် ဆာနိုင်း တာကာအီချီ (Sanae Takaichi) က အပျက်အစီး အခြေအနေများကို အတည်ပြုနိုင်ရေး ဆက်လက် လုပ်ဆောင်နေကြောင်း ပြောကြားခဲ့ပြီး ငလျင်ဒဏ် ပြင်းထန်စွာ   ခံစားခဲ့ရသည့် ဒေသများမှ ပြည်သူများအနေဖြင့် လာမည့် သီတင်းပတ်အတွင်း အလားတူ ငလျင်များ ထပ်မံ လှုပ်ခတ်လာနိုင်သဖြင့် အထူးသတိထားကြရန် သတိပေး နှိုးဆော်ထားသည်။   Photo: JIJI PRESS/AFP via Getty Images   #Japanearthquake #Japan #Earthquake #koto

ဂျပန် ကန်တိုဒေသ အင်အားပြင်း ငလျင် လှုပ်ခတ်

ဂျပန် ကန်တိုဒေသ အင်အားပြင်း ငလျင် လှုပ်ခတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၄ ရက်။  ဂျပန်နိုင်ငံ တိုကျိုနှင့် ကန်တိုဒေသတွင် အ…

  • August 24, 2026
အမေရိကန်နှင့် ကနေဒါ ကုန်သွယ်ရေးဆွေးနွေးပွဲ ပျက်၊ ကုန်သွယ်ရေး စစ်ပွဲ စတင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၄ ရက်။   အမေရိကန်နှင့် ကနေဒါနိုင်ငံတို့အကြား ကုန်သွယ်ရေး ဆွေးနွေးပွဲများ ပျက်ပြားသွားပြီးနောက် နှစ်နိုင်ငံ ကုန်သွယ်ရေးစစ်ပွဲ ပိုမို ပြင်းထန်လာနေသည်။   နှစ်နိုင်ငံအကြား သဘောတူညီချက် မရရှိခဲ့သဖြင့် အမေရိကန်ဘက်က စနေနေ့မှစတင်ကာ ဒေါ်လာ ဘီလီယံ ၂၀ တန်ဖိုးရှိ ကနေဒါ ကုန်ပစ္စည်းများအပေါ် အခွန် ၅၀ ရာခိုင်နှုန်း တိုးမြှင့်ကောက်ခံခဲ့သည်။     အဆိုပါ ပမာဏသည် ကနေဒါ၏ အမေရိကန်သို့ ပို့ကုန် စုစုပေါင်း၏ ၅ ရာခိုင်နှုန်းကျော် ရှိသည်။   ဒီလုပ်ရပ်ကြောင့် အမေရိကန် သမ္မတ ဒေါ်နယ်ထရမ့်နှင့် ကနေဒါ ဝန်ကြီးချုပ် မာ့ခ် ကာနီ (Mark Carney) တို့အကြား တင်းမာမှုများ ပိုမိုမြင့်တက်လာခဲ့သည်။     ဝန်ကြီးချုပ် ကာနီက ကုန်သွယ်ရေး ဆွေးနွေးပွဲများကို ချက်ချင်း ရပ်ဆိုင်းကာ ဝါရှင်တန်ရှိ ကနေဒါ ကိုယ်စားလှယ်အဖွဲ့ကို မြို့တော် အော်တာဝါသို့ ပြန်လည် ခေါ်ယူခဲ့သည်။   အမေရိကန်ဘက်က နောက်ဆုံးမိနစ်တွင် ပြောင်းလဲလိုက်သည့် စည်းကမ်းချက်များသည် မတရားသကဲ့သို့ မျှတမှုလည်း မရှိဟု စွပ်စွဲထားပြီး၊ ကနေဒါဘက်ကလည်း အမေရိကန်၏ အခွန်တိုးမြှင့်မှုအပေါ် တန်ပြန်အခွန်များဖြင့် တန်းတူ ပြန်လည်တုံ့ပြန်သွားမည်ဟု ကြေညာခဲ့သည်။   #American #Canada #TradeWar

အမေရိကန်နှင့် ကနေဒါ ကုန်သွယ်ရေးဆွေးနွေးပွဲ ပျက်၊ ကုန်သွယ်ရေး စစ်ပွဲ စတင်

အမေရိကန်နှင့် ကနေဒါ ကုန်သွယ်ရေးဆွေးနွေးပွဲ ပျက်၊ ကုန်သွယ်ရေး စစ်ပွဲ စတင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၄ ရက်။  အမေရိကန်နှင…

  • August 24, 2026
ထိုင်းတောင်ပိုင်း ခရိုင်သုံးခုတွင် တစ်ညတည်း တိုက်ခိုက်မှု ၅၀ ကျော် ဖြစ်ပွား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၄ ရက်။   စနေနေ့ညပိုင်းက ထိုင်းနိုင်ငံတောင်ပိုင်း နရာသီဝတ် (Narathiwat)၊ ယလာ (Yala) နှင့် ပတ္ထနီ (Pattani) ခရိုင်တို့တွင် မီးရှို့မှုနှင့် ဖောက်ခွဲမှု စုစုပေါင်း ၅၁ မှု ဆက်တိုက် ဖြစ်ပွားခဲ့ကြောင်း အယ်လ်ဂျာဇီးယား သတင်း၌ ဖော်ပြထားသည်။   နရာသီဝတ် ပြည်နယ်တွင် လမ်းဘေး ဗုံးပေါက်ကွဲမှုကြောင့် ပြည်သူ ၃ ဦး ဒဏ်ရာရရှိခဲ့သည်။     ထို့အပြင် အစိုးရရုံးများ၊ မော်တော်ယာဉ်များ၊ ဆက်သွယ်ရေး တာဝါတိုင်များနှင့် ရထားလမ်းအချို့ မီးလောင်ပျက်စီးခဲ့သည့်အတွက် နရာသီဝတ် ပြည်နယ်တွင် ညမထွက်ရ အမိန့် ထုတ်ပြန်ခဲ့ရသည်။   ထိုင်း အမှတ် (၄) စစ်ဒေသမှူး ဒုတိယဗိုလ်ချုပ်ကြီး နိုရာသစ် (Norathip Poyanok) က အဆိုပါ တိုက်ခိုက်မှုများသည် အာဏာပိုင်များ၏ မူးယစ်ဆေးဝါးနှင့် မှောင်ခိုကွန်ရက်များအား ဆက်တိုက် နှိမ်နင်းမှုအပေါ် တန်ပြန် လက်တုံ့ပြန်ခြင်း ဖြစ်ကြောင်း ပြောဆိုသည်ဟု ထိုင်း PBS သတင်းတွင် ဖော်ပြထားသည်။   တရားမဝင် စီးပွားရေး လုပ်ငန်းများသည် သောင်းကျန်းသူ အဖွဲ့များ၏ အဓိက ဘဏ္ဍာရေး လမ်းကြောင်း ဖြစ်ပြီး၊ ပြီးခဲ့သည့် ရက်ပိုင်းက ဘတ် ၁၈ သန်းကျော်တန် မှောင်ခိုပစ္စည်းများနှင့် မူးယစ်ဆေးဝါးများ အမြောက်အမြား သိမ်းဆည်းရမိခဲ့သဖြင့် ဘဏ္ဍာရေး ထိခိုက်သွားသူများက တုံ့ပြန်ခြင်း ဖြစ်သည်ဟု ထိုင်းစစ်တပ်က ဆိုသည်။   ထို့ပြင် စစ်ရဟတ်ယာဉ်ပေါ်မှ ပြည်သူများကို ပစ်ခတ်ခဲ့သည်ဆိုသည့် သတင်းများမှာ မဟုတ်မှန်ဘဲ နယ်မြေစိုးမိုးရေး ကင်းလှည့်ရာတွင်သာ ရဟတ်ယာဉ်နှင့် ဒရုန်းများကို အသုံးပြုခဲ့ခြင်း ဖြစ်ကြောင်း ရှင်းလင်းထားသည်။   ဗုဒ္ဓဘာသာဝင် အများစုနေထိုင်သည့် ထိုင်းနိုင်ငံတွင် မလေးရှားနိုင်ငံနှင့် နယ်နိမိတ်ချင်း ထိစပ်နေသော အဆိုပါ တောင်ပိုင်း ခရိုင်သုံးခု၌ မွတ်စလင်ဦးရေ အများဆုံး နေထိုင်ကြပြီး နယ်မြေခံ လူထုများက ပိုမိုကျယ်ပြန့်သော ကိုယ်ပိုင်အုပ်ချုပ်ခွင့် တောင်းဆိုလျက်ရှိကာ အချို့အဖွဲ့အစည်းများမှာ လက်နက်ကိုင် တိုက်ခိုက်လျက်ရှိသည်။ Photo: Narathiwat provincial public relations office   #Narathiwat #Pattani #Yala

ထိုင်းတောင်ပိုင်း ခရိုင်သုံးခုတွင် တစ်ညတည်း တိုက်ခိုက်မှု ၅၀ ကျော် ဖြစ်ပွား 

ထိုင်းတောင်ပိုင်း ခရိုင်သုံးခုတွင် တစ်ညတည်း တိုက်ခိုက်မှု ၅၀ ကျော် ဖြစ်ပွား  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၄ ရက်။  စနေနေ့ည…

  • August 24, 2026
မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၁ ရက်။   ဒေသတွင်း မီဒီယာသတင်းဌာနများနှင့် စီးပွားရေးအရ သဘောတူညီချက် မယူဘဲ သတင်းများကို အသုံးပြုနေသည့် နည်းပညာကုမ္ပဏီကြီးများကို အခွန်ကောက်ခံတော့မည့် ဥပဒေကို ဩစတြေးလျနိုင်ငံက ကြာသပတေးနေ့တွင် အတည်ပြုလိုက်သည်။   "သတင်းအကျိုးအမြတ် ခွဲဝေမှုဆိုင်ရာ ဥပဒေ" အရ Meta၊ Google၊ TikTok နှင့် LinkedIn စသည့် အစိုးရ သတ်မှတ်ချက်မီ နည်းပညာကုမ္ပဏီကြီးများအနေဖြင့် မီဒီယာများနှင့် သဘောတူညီချက် မယူပါက ၎င်းတို့ရရှိသည့် ကြော်ငြာဝင်ငွေ၏ ၂.၅ ရာခိုင်နှုန်းကို အခွန်အဖြစ် ကောက်ယူသွားမည်ဖြစ်သည်။   ရရှိလာသည့် အခွန်ငွေများကို နည်းပညာပလက်ဖောင်းများကို လူကြိုက်များအောင် ကူညီပေးနေသည့် ဒေသတွင်း သတင်းမီဒီယာများသို့ ပြန်လည်ထောက်ပံ့ပေးသွားမည်ဖြစ်သည်။   နည်းပညာကုမ္ပဏီများသည် အနည်းဆုံး မီဒီယာဌာန ၈ ခုနှင့် သဘောတူညီချက် ရယူပါက ယင်းအခွန်ပေးဆောင်ရမှုမှ ကင်းလွတ်ခွင့် ရရှိမည်ဖြစ်သည်။   သတင်းဌာန အသေးစားများနှင့် ပူးပေါင်းဆောင်ရွက်ပါက ကင်းလွတ်ခွင့် အခွင့်အရေး ပိုမိုရရှိမည်ဟု ဥပဒေတွင် ထည့်သွင်းပြဋ္ဌာန်းထားသည်။   နည်းပညာကုမ္ပဏီကြီးများက ကြော်ငြာအများစုကို ရယူသွားသည့်အတွက် ယခင်က ကြော်ငြာလုပ်ငန်းများဖြင့် ရှင်သန်ခဲ့သည့် သတင်းမီဒီယာများမှာ ရပ်တည်ရေးအတွက် အခက်အခဲများနှင့် ရင်ဆိုင်နေကြရသည်။   #Meta #Google #TikTok #LinkedIn

မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု

မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၁ ရက်။  ဒေသတွ…

  • August 21, 2026
ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၂၁ ရက်။   ထိုင်ဝမ်အစိုးရသည် လာမည့်နှစ်အတွက် စံချိန်တင် မြင့်မားသည့် ကာကွယ်ရေးဘတ်ဂျက် မူကြမ်းကို ကြာသပတေးနေ့က အတည်ပြုလိုက်သည်။   လာမည့်နှစ်တွင် စုစုပေါင်း ထိုင်ဝမ်ဒေါ်လာ ၁.၁၂၂၅ ထရီလီယံ (အမေရိကန်ဒေါ်လာ ၃၅ ဘီလီယံကျော်) အသုံးပြုသွားမည်ဖြစ်ပြီး ယင်းဘတ်ဂျက်သည် ထိုင်ဝမ်၏ ခန့်မှန်းကုန်ထုတ်လုပ်မှုတန်ဖိုး (GDP) ၏ ၃.၀၁ ရာခိုင်နှုန်းရှိကာ ယခင်နှစ်ထက် ၁၈ ရာခိုင်နှုန်း တိုးမြှင့်ထားခြင်းဖြစ်သည်။   သမ္မတ လိုင်ချင်တဲက ကာကွယ်ရေးဘတ်ဂျက်ကို GDP ၏ ၃ ရာခိုင်နှုန်းထက် မလျော့စေဘဲ ၂၀၃၀ ပြည့်နှစ်တွင် ၅ ရာခိုင်နှုန်းအထိ တိုးမြှင့်သွားရန် ရည်မှန်းထားသည်။   ယခု အတည်ပြုလိုက်သည့် ဘတ်ဂျက်တွင် ဒရုန်းများနှင့် ဒုံးကျည်များ ဝယ်ယူရေး၊ စစ်တပ်ပင်စင်ရန်ပုံငွေနှင့် ကမ်းခြေစောင့်တပ်ဖွဲ့အတွက် အသုံးပြုမည့် စရိတ်များ ပါဝင်သည်။   #Taiwan

ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု

ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၁ ရက်။  ထိုင်ဝမ်အစိုးရသည် လာမည့်နှစ်အတွက် စံချိ…

  • August 21, 2026
အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၂၁ ရက်။ အမေရိကန်သမ္မတ ဒေါ်နယ်ထရန့်၏ ရုတ်တရက် ညွှန်ကြားချက်ကြောင့် အမေရိကန်နှင့် တောင်ကိုရီးယားနိုင်ငံတို့ နှစ်စဉ် ပူးတွဲပြုလုပ်သည့် စစ်ရေးလေ့ကျင့်မှုကို သတ်မှတ်ရက်ထက် စော၍ ရပ်ဆိုင်းလိုက်ရကြောင်း နိုင်ငံတကာ သတင်းများတွင် ဖော်ပြသည်။ သမ္မတ ထရန့်က အဆိုပါ စစ်ရေးလေ့ကျင့်မှုသည် ကုန်ကျစရိတ် ကြီးမားရုံသာမက မြောက်ကိုရီးယားအပေါ် ရန်လိုရာရောက်စေသည်ဟု စွပ်စွဲခဲ့ပြီး ပင်တာဂွန်စစ်ဌာနချုပ်ကို စစ်ရေးလေ့ကျင့်မှု ပမာဏ လျှော့ချရန် အမိန့်ပေးခဲ့ခြင်းဖြစ်သည်။ ထို့ပြင် တောင်ကိုရီးယားအနေဖြင့် အီရန်နိုင်ငံအပေါ် ဆောင်ရွက်နေသည့် လုပ်ဆောင်ချက်များတွင် ပူးပေါင်းပါဝင်ရန် ငြင်းဆန်ခဲ့သည်ကိုလည်း မကျေမနပ် ပြောကြားခဲ့ကြောင်း Open Magazine တွင် ဖော်ပြထားသည်။ ယင်းဆုံးဖြတ်ချက်သည် မြောက်ကိုရီးယားခေါင်းဆောင် ကင်ဂျုံအန်းနှင့် ပြန်လည်တွေ့ဆုံရန် ကြိုးပမ်းမှုတစ်ခု ဖြစ်နိုင်သော်လည်း တောင်ကိုရီးယားအပါအဝင် ဂျပန်နှင့် ထိုင်ဝမ်စသည့် ဒေသတွင်း မဟာမိတ်နိုင်ငံများကို အံ့အားသင့် စိုးရိမ်စေခဲ့ကြောင်း IRIA (International Relations Insights & Analysis) သတင်းတွင် သုံးသပ်ထားသည်။ တစ်ဖက်တွင်လည်း မြောက်ကိုရီးယားခေါင်းဆောင် ကင်ဂျုံအန်း၏ ညီမဖြစ်သူ ကင်ယိုဂျွန်က စစ်ရေးလေ့ကျင့်မှု လျှော့ချရုံဖြင့် အမေရိကန်၏ ရန်လိုသည့် သဘောထား ပြောင်းလဲသွားမည် မဟုတ်ကြောင်း တုံ့ပြန်ပြောဆိုခဲ့ပြီး လေ့ကျင့်မှု မရပ်ဆိုင်းမီ ရေကြောင်းအတွင်းသို့ ဒုံးကျည်များ ထပ်မံပစ်ခတ် စမ်းသပ်ခဲ့သည်။ အခြားတစ်ဖက်တွင်မူ အမေရိကန်၏ လုံခြုံရေး အာမခံချက်အပေါ် ယုံကြည်မှု လျော့နည်းလာခြင်းကြောင့် တောင်ကိုရီးယားနိုင်ငံအတွင်း ကိုယ်ပိုင်နျူကလီးယားလက်နက် ပိုင်ဆိုင်သင့်သည်ဆိုသည့် အသံများ ပိုမိုကျယ်လောင်လာနေသည်။ #american #southkorea

အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း

အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၁ ရက်။ အမေရိကန်သမ္မတ ဒေါ်နယ်ထရန့်၏ ရ…

  • August 21, 2026
တရုတ်နှင့် အင်ဒိုနီးရှား စစ်ရေးနှင့် စီးပွားရေး ပူးပေါင်းဆောင်ရွက်မှု တိုးမြှင့်ရန် သဘောတူ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၁ ရက်။   ဂျကာတာတွင် ပြုလုပ်ခဲ့သည့် တရုတ်-အင်ဒိုနီးရှား (၂+၂) နိုင်ငံခြားရေးနှင့် ကာကွယ်ရေး ဝန်ကြီးများ အဆင့် အစည်းအဝေးတွင် နှစ်နိုင်ငံ ပူးပေါင်း ဆောင်ရွက်ရေး အတွက် အရေးပါသော သဘောတူညီချက်များ ရရှိခဲ့ကြောင်း ရိုက်တာ သတင်းတပုဒ်တွင် ဖော်ပြသည်။   တရုတ်နှင့် အင်ဒိုနီးရှားနိုင်ငံတို့သည် စစ်ရေး၊ သတ္တုတွင်းထွက်များ၊ စွမ်းအင်၊ နည်းပညာ၊ AI၊ မီးရထားပို့ဆောင်ရေး၊ ဂြိုဟ်တုနှင့် ရေလုပ်ငန်း စသည့် ကဏ္ဍပေါင်းစုံတွင် ပူးပေါင်းဆောင်ရွက်မှု မြှင့်တင်ရန် သဘောတူညီခဲ့ကြသည်။   စစ်ရေးပူးပေါင်းဆောင်ရွက်မှု အနေဖြင့် ပူးတွဲစစ်ရေးလေ့ကျင့်မှုများ၊ စစ်ဘက်အရာရှိများ လဲလှယ်ရေးနှင့် ကာကွယ်ရေးစက်မှုလုပ်ငန်းများတွင် ပူးပေါင်းဆောင်ရွက်မှုများကို တိုးမြှင့်သွားမည်ဖြစ်သည်။   ပြီးခဲ့သည့်သီတင်းပတ်က ထိုင်ဝမ်အရှေ့ဘက် ပင်လယ်ပြင်တွင် တရုတ်နှင့် အင်ဒိုနီးရှား ရေတပ်တို့ ပူးတွဲစစ်ရေးလေ့ကျင့်ခဲ့ကြသည်။ သို့သော် အင်ဒိုနီးရှားဘက်ကမူ ယင်းမှာ တရုတ်နှင့် သီးသန့် ပူးပေါင်းခြင်းမဟုတ်ဘဲ အမေရိကန်၊ ဂျပန်တို့နှင့် ပြုလုပ်လေ့ရှိသည့် ပုံမှန်စစ်ရေးလေ့ကျင့်မှုများကဲ့သို့ပင် ရိုးရိုးလေ့ကျင့်ခန်းတစ်ခုသာ ဖြစ်ကြောင်း ပြန်လည်ရှင်းလင်းခဲ့သည်။     သမ္မတ ပရာဘိုဝို ဆူဘီယန်တို ဦးဆောင်သည့် အင်ဒိုနီးရှားနိုင်ငံသည် တရုတ်နှင့် ရင်းနှီးသော ဆက်ဆံရေးထူထောင်နေသကဲ့သို့ အမေရိကန်နှင့်လည်း ကုန်သွယ်ရေးနှင့် ကာကွယ်ရေး ဆက်ဆံရေးများကို တိုးချဲ့နေပြီး မည်သည့်ဘက်မှ မပါဝင်သည့် ဘက်မလိုက် မူဝါဒကို ကျင့်သုံးလျက်ရှိသည်။   တရုတ်သည် အင်ဒိုနီးရှား၏ အဓိက ရင်းနှီးမြှုပ်နှံသူဖြစ်ပြီး ၂၀၂၆ ခုနှစ် ပထမခြောက်လအတွင်း အမေရိကန်ဒေါ်လာ ၃.၉ ဘီလီယံ ရင်းနှီးမြှုပ်နှံထားသည်။   အထူးသဖြင့် အင်ဒိုနီးရှား၏ နီကယ်ချက်လုပ်ရေး ကဏ္ဍတွင် တရုတ်က အများဆုံး ရင်းနှီးမြှုပ်နှံထားသော်လည်း အင်ဒိုနီးရှား၏ အခွန်အခ တိုးမြှင့်မှု၊ စည်းမျဉ်းသစ်များနှင့် ပတ်သက်၍ တရုတ်ကုမ္ပဏီအချို့၏ မကျေနပ်မှုများနှင့် ရင်ဆိုင်နေရသည်။   #တရုတ် #အင်ဒိုနီးရှား

တရုတ်နှင့် အင်ဒိုနီးရှား စစ်ရေးနှင့် စီးပွားရေး ပူးပေါင်းဆောင်ရွက်မှု တိုးမြှင့်ရန် သဘောတူ 

တရုတ်နှင့် အင်ဒိုနီးရှား စစ်ရေးနှင့် စီးပွားရေး ပူးပေါင်းဆောင်ရွက်မှု တိုးမြှင့်ရန် သဘောတူ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၁ ရက်။&n…

  • August 21, 2026
×Close