သတင်း

လမ်းကင်းစောင့် တပ်သား နှစ်ဦး ဘက်ပြောင်း ခိုလှုံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၆ ရက်။   တနင်္သာရီမြို့နယ်အတွင်း လမ်းကင်းစောင့် တပ်သားနှစ်ဦး လက်နက်နှင့် အတူ ဘက်ပြောင်းခိုလှုံလာသည်ဟု ပြည်သူ့ကာကွယ်ရေး တပ်ဖွဲ့ တာဝန်ရှိသူက ပြောသည်။   မြိတ်ခရိုင်၊ တနင်္သာရီမြို့နယ်၊ အောက်ကင်းကျေးရွာ အခြေစိုက် စစ်ကောင်စီ၏ အမှတ် ၅၅၇ ခြေမြန်တပ်ရင်းမှ လမ်းကင်း တာဝန်ကျ စစ်ကောင်စီ တပ်သားနှစ်ဦး ထွက်ပြေးလာပြီး တနင်္သာရီ ပြည်သူ့ကာကွယ်ရေး အဖွဲ့ ဇုန် - ၅ ထံသို့ လက်နက်နှင့်အတူ ဘက်ပြောင်းခိုလှုံခဲ့သည်ဟု ပကဖ တာဝန်ရှိသူတစ်ဦးက ပြောသည်။   တနင်္သာရီမြို့နယ် ပြည်သူ့ကာကွယ်ရေးအဖွဲ့ တာဝန်ရှိသူတစ်ဦးက “လမ်းကင်း တာဝန်ကျနေတဲ့ အချိန်မှာ ပကဖ အဖွဲ့နဲ့ ဆက်သွယ် ချိတ်ဆက်ပြီး ထွက်ပြေးလာကြတာပါ၊ သူတို့ကို စစ်ကောင်စီက ဖမ်းဆီးပြီး အဓမ္မစစ်မှုထမ်း ဖို့ သင်တန်းကို ပို့ခဲ့တာလို့ ပြောပြတယ်” ဟု ပြောသည်။   စစ်ကောင်စီ ယာဉ်တန်း ဖြတ်သန်းရန်အတွက် ဘန်းလမွတ်နှင့် ပနပ်ငယ်ကျေးရွာ အကြား တွင် ဇွန်လ ၁၉ ရက်နေ့က လမ်းကင်းတာဝန်ကျချိန် လက်နက်နှင့်အတူ ထွက်ပြေးလာကာ ပြည်သူ့ကာကွယ်ရေးအဖွဲ့ထံ ဘက်ပြောင်း ခိုလှုံလာခြင်း ဖြစ်သည်။   ထွက်ပြေးလာသူ နှစ်ဦးသည် MA-3 သေနတ်နှစ်လက်၊ ကျည်ဘောက် ၉ ခုနှင့် ကျည် ၂၄၀ တောင့်ကို ယူဆောင် လာသည်ဟု တနင်္သာရီ ပြည်သူ့ကာကွယ်ရေး အဖွဲ့က ထုတ်ပြန်ထားသည်။   ဘက်ပြောင်း ခိုလှုံလာသူနှစ်ဦးမှာ ရန်ကုန်တိုင်း တိုက်ကြီးမြို့နယ် အမှတ် ၁ ဂျိုးဖြူ စစ်သင်တန်း လေ့ကျင့်ရေး ကျောင်းမှ စစ်မှုထမ်းသင်တန်း အပတ်စဉ် ၁ နှင့် အပတ်စဉ် ၉ သင်တန်းသားများ ဖြစ်ကြကြောင်း ထုတ်ပြန်ချက် တွင် ဖော်ပြထားသည်။   သင်တန်းကျောင်းတွင် သင်တန်း နှစ်လခွဲအကြာ တက်ရပြီးနောက် ဘုတ်ပြင်းမြို့နယ် စကခ ၁၃ တွင် မွမ်းမံသင် တန်း နှစ်ပတ် ထပ်မံတက်ခဲ့ရသေးကြောင်း တနင်္သာရီ-ပကဖ တာဝန်ရှိသူက ဆိုသည်။   ထို့နောက် မြိတ်မြို့ အမှတ် ၁၀၃ ခြေလျင်တပ်ရင်းတွင် နှစ်ရက်အကြာ နေထိုင်ခဲ့ရပြီး တနင်္သာရီမြို့နယ် အောက် ကင်းကျေးရွာ အခြေစိုက် ခမရ ၅၅၇ တပ်တွင် တာဝန်ထမ်းဆောင်ခဲ့ရခြင်း ဖြစ်သည်။

လမ်းကင်းစောင့် တပ်သား နှစ်ဦး ဘက်ပြောင်း ခိုလှုံ

လမ်းကင်းစောင့် တပ်သား နှစ်ဦး ဘက်ပြောင်း ခိုလှုံ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၆ ရက်။  တနင်္သာရီမြို့နယ်အတွင်း လမ်းကင်းစောင့် တပ်…

  • June 26, 2025
ရန်ကုန်-မန္တလေးလမ်းပေါ်ရှိ စစ်ကောင်စီ စခန်း ၉ ခု တပြိုင်တည်း တိုက်ခံရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၅ ရက်။   ရန်ကုန် - မန္တလေး အမြန်လမ်းဟောင်းပေါ်ရှိ စစ်ကောင်စီတပ်ဖွဲ့များ၏ တပ်စခန်း (၉) ခုကို ဇွန်လ ၂၅ ရက်နေ့ (ယနေ့) တွင် တစ်ပြိုက်နက်တည်း ဝင်ရောက်တိုက်ခိုက်ခဲ့သည်ဟု အမျိုးသား ညီညွတ်ရေး အစိုးရ NUG ကာကွယ်ရေးဝန်ကြီးဌာန က ပြောသည်။   အဆိုပါ တပ်စခန်း ၉ ခုသည် ပဲခူးတိုင်း၊ ညောင်လေးပင်၊ ကျောက်တံခါး၊ ဖြူးမြို့နယ်အတွင်းတွင် တည်ရှိပြီး ပြည်သူ့ကာကွယ်ရေးတပ်မတော်-PDF စစ်ဆင်ရေးနယ်မြေ (၂) ကွပ်ကဲမှုအောက်ရှိ တပ်များနှင့် KNLA တပ်ဖွဲ့ များက ယနေ့ နံနက်အစောပိုင်းတွင် ဝင်ရောက်တိုက်ခိုက်ခဲ့သည်ဟု NUG ကာကွယ်ရေး ဝန်ကြီး ဌာနက ဇွန်လ ၂၅ ရက်နေ့ ယနေ့တွင် ထုတ်ပြန်ပြောဆိုသည်။   တိုက်ပွဲအတွင်း စစ်ကောင်စီတပ်မှ ၂၀ ဦးထက်မနည်းသေဆုံးခဲ့ပြီး အများအပြား ထိခိုက်ဒဏ်ရာ ရရှိခဲ့သည့် အပြင် ရဲအုပ်တစ်ဦး အပါအဝင် စစ်သုံ့ပန်း ၃ ဦးကိုလည်း ဖမ်းဆီးရမိခဲ့သည်ဟု ဆိုသည်။ တော်လှန်ရေးပူးပေါင်း တပ်ဘက်က ရဲဘော် ၁ ဦး ကျဆုံးပြီး ၂ ဦး ထိခိုက်ဒဏ်ရာ ရရှိခဲ့သည်ဟု  NUG က ပြောသည်။   ထို့အပြင် လက်နက်ခဲယမ်းများနှင့် စစ်သုံးပစ္စည်း အမြောက်အများကိုလည်း သိမ်းဆည်းရမိခဲ့သည်ဟု NUG ကာကွယ်ရေးဝန်ကြီးဌာန၏ ထုတ်ပြန်ချက်အရ သိရသည်။   တိုက်ခိုက်မှုများကို အမှတ်(၂) စစ်ဆင်ရေးနယ်မြေ၊ တိုင်းစစ်ဌာန(ပဲခူး)၊ ဗျူဟာ(၂၄)၊ အာဠာဝကတပ်ရင်း၊ အမှတ် (၃၅၀၃) တပ်ရင်း၊ဖြူး(ပကဖ)၊ ဗျူဟာ(၂၅)၊ အမှတ်(၃၇၀၂) တပ်ရင်း၊ Spring Warriors Column၊ KNLA တပ်ရင်း(၉)၊ ဗျူဟာ(၂၆)၊ တော်ဝင်ဒေါင်းတပ်ရင်း၊ တောကျီးကန်းတပ်ရင်း တို့ပူးပေါင်း၍ တိုက်ခိုက်ခဲ့ကြခြင်း ဖြစ်သည်ဟု NUG က ဆိုသည်။   Photo - NUG

ရန်ကုန်-မန္တလေးလမ်းပေါ်ရှိ စစ်ကောင်စီ စခန်း ၉ ခု တပြိုင်တည်း တိုက်ခံရ

ရန်ကုန်-မန္တလေးလမ်းပေါ်ရှိ စစ်ကောင်စီ စခန်း ၉ ခု တပြိုင်တည်း တိုက်ခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၅ ရက်။ ရန်ကုန် - မန္တလေး အမြ…

  • June 25, 2025
စစ်ကောင်စီဘက်မှ တပ်ဖွဲ့ဝင် နှစ်ဦး ဘက်ပြောင်းခိုလှုံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၅ ရက်။   စစ်ကောင်စီ၏ တပ်ဖွဲ့ဝင် နှစ်ဦး ပြည်သူ့ကာကွယ်ရေး တပ်ရင်းများထံသို့ ဘက်ပြောင်း ခိုလှုံလာသည်ဟု သက်ဆိုင်ရာ တပ်ရင်းများက သတင်းထုတ်ပြန်ထားသည်။   မြိတ်ခရိုင်၊ ပုလောမြို့နယ်၊ ဘုတ်ခြံကျေးရွာ အခြေစိုက် အမှတ် - ၁၇ ခြေလျင်တပ်ရင်းမှ ဒုတပ်ကြပ်တစ်ဦးနှင့် စာရေး (အကူ) တစ်ဦးတို့ ဘက်ပြောင်းခိုလှုံလာခြင်း ဖြစ်သည်။   မြိတ်ခရိုင် တပ်ရင်း ၁ မှ တာဝန်ရှိသူတစ်ဦးက “ဒုတပ်ကြပ် လုပ်တဲ့သူက အသက်က ၂၈ နှစ်ရှိပြီ။ ၂၀၁၇ ခုနှစ်က တည်းက စစ်တပ်မှာ တာဝန်ထမ်းဆောင်နေတာပါ၊ နောက်တစ်ဦးကတော့ မဲပေါက်ပြီး  စစ်မှုထမ်း အပတ်စဉ် ၂ မှာ သင်တန်းတက်ခဲ့ရတာ၊ အသက်က ၂၀ နှစ်ပါ” ဟု ပြောသည်။   လက်နက်များနှင့်အတူ ပြည်သူ့ကာကွယ်ရေးတပ်မတော်၊ မြိတ်ခရိုင် တပ်ရင်း ၁ ထံသို့ ဇွန်လ ၂၁ ရက်နေ့တွင် ဘက်ပြောင်းခိုလှုံလာသည်။   မြိတ်ခရိုင် တပ်ရင်း ၁ ထံသို့ လာရောက်ခိုလှုံသူ နှစ်ဦးတွင် MA-1 ရိုင်ဖယ် (၁) လက်၊ MA-2 စက်ကလေး (၁) လက်၊ လက်ပစ်ဗုံး (၂) လုံး၊ M-14 နင်းမိုင်း (၁) ခု၊ ကျည်ဘောက် (၁၅)ခု၊ ကပစထုတ် ၅.၅၆ ကျည် (၇၉ဝ) တောင့်တို့ကို ယူဆောင်လာခဲ့သည်ဟု ထုတ်ပြန်ချက်တွင်ဖော်ပြထားသည်။   လက်ရှိတွင် ခိုလှုံလာသူနှစ်ဦးကို တပ်ရင်းအတွင်း စောင့်ရှောက်ထားကာ စိစစ်မှုများပြုလုပ်နေပြီး လက်နက်များ ယူဆောင်လာခဲ့သဖြင့် ဆုငွေ ချီးမြှင့်နိုင်ရန်အတွက် အမျိုးသား ညီညွတ်ရေး အစိုးရ (NUG) ကာကွယ်ရေးဝန် ကြီးဌာနသို့ တင်ပြထားသည်ဟု ဆိုသည်။   ထို့အပြင် ဇွန်လ ၈ ရက်နေ့ကလည်း စစ်ကောင်စီ၏ တပ်ကြပ်ကြီး အဆင့်ရှိသူတစ်ဦး လက်နက်မပါရှိဘဲ ထွက်ပြေးလာကာ ဘက်ပြောင်းခိုလှုံလာသည်ဟု မြိတ်ခရိုင် ပြည်သူ့ကာကွယ်ရေး တပ်မတော် တပ်ရင်း ၃ ကလည်း ဇွန်လ ၂၀ ရက်နေ့တွင် ထုတ်ပြန်ထားသည်။   ဘက်ပြောင်းခိုလှုံလာသူ တပ်ကြပ်ကြီးသည် တနင်္သာရီမြို့နယ် ညောင်ပင်ကွင်းရွာ အခြေစိုက် အမှတ် ၅၆၁ စစ်ကောင်စီ ခြေမြန်တပ်ရင်းမှ စစ်မှုထမ်းသက်တမ်း ၅ နှစ်ရှိသူ ဖြစ်သည်။   မြိတ်ခရိုင်တပ်ရင်း ၃ ၏ တပ်ကြပ်ကြီးအား စစ်ဆေးမေးမြန်းချက်များ အရ စစ်ကောင်စီ၏ တပ်တွင်းရှိ အရာရှိ များက တစ်ကိုယ်ကောင်းဆန်လွန်းပြီး လက်အောက်ငယ်သားများ အပေါ် ခွဲခြားဖိနှိပ်ဆက်ဆံမှုများကို မခံနိုင်၍ ထွက်ပြေး အလင်းဝင်လာခြင်း ဖြစ်သည်ဟု ထွက်ဆိုထားကြောင်း ထုတ်ပြန်ချက်တွင် ဖေါ်ပြထားသည်။

စစ်ကောင်စီဘက်မှ တပ်ဖွဲ့ဝင် နှစ်ဦး ဘက်ပြောင်းခိုလှုံ 

စစ်ကောင်စီဘက်မှ တပ်ဖွဲ့ဝင် နှစ်ဦး ဘက်ပြောင်းခိုလှုံ  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၅ ရက်။  စစ်ကောင်စီ၏ တပ်ဖွဲ့ဝင် နှစ်ဦး ပြည်သူ…

  • June 25, 2025
ဒီးမော့ဆိုတွင် စက်သုံးဆီ ပြတ်လပ်လာသဖြင့် အဆမတန် ဈေးတက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၅ ရက်။   ကရင်နီပြည်၊ ဒီးမော့ဆိုမြို့တွင် စက်သုံးဆီဈေး အဆမတန် မြင့်တက်နေမှုနှင့် ပြတ်လပ်မှုများကြောင့် စစ်ဘေး ရှောင်များ အခက်အခဲ ဖြစ်နေကြသည်။   ဇွန်လ တတိယပတ်အတွင်း စက်သုံးဆီ သယ်ယူသည့် လမ်းတစ်လျှောက်တွင် စစ်ကောင်စီတပ်၊ ပအိုဝ်းပြည်သူ့ စစ်အဖွဲ့ (PNA) ပူးပေါင်းတပ်များ စစ်ကြောင်းထိုးနေသဖြင့် အဝင်လျော့နည်းလာသောကြောင့် ဆီပြတ်လပ်မှု က ပို၍ ဆိုးရွားလာနေသည်ဟု ဆိုကြသည်။   ဒီးမော့ဆို အရှေ့ဘက်ခြမ်းရှိ စစ်ဘေးရှောင်စခန်း တာဝန်ခံ အမျိုးသမီးတစ်ဦးက “ဝယ်လို့ မရတာတော့ မဟုတ် ဘူး။ လိုသလောက် မရတော့ သွားရေးလာရေး ခက်ခဲတာပေါ့။ စစ်ရှောင်စခန်းဆိုတော့ ကိစ္စများတယ်လေ။ တော်လှန်ရေးတပ်လိုလို ဘာလိုလိုနဲ့ တချို့ အရပ်သား လက်နက်ကိုင်တွေ ဆိုရင် လိုသလောက်ရတယ်။ တကယ် က တော်လှန်ရေးဘက်ကလည်း မဟုတ်ဘူး။ ပြီးတော့ တချို့ အဖွဲ့အစည်းနဲ့ ပိုင်တဲ့ သူဌေးတွေပေါ့ သူတို့က တော့ လိုသလောက် ရတယ်” ဟု‌ပြောသည်။   ဒီးမော့ဆိုမြို့နယ်တွင် စက်သုံးဆီဈေး အဆမတန် မြင့်တက်လျက်ရှိပြီး လိုအပ်သလောက်ဝယ်ယူရန် အခက်အခဲ ဖြစ်နေသည်ဟု စစ်ဘေးရှောင်စခန်း တာဝန်ရှိသူများက ပြောသည်။   ပြီးခဲ့သည့် ဇွန်လ ၁၅ ရက်နေ့ အရှေ့ပိုင်းကာလများ၌ ၉၂ တစ်လီတာလျှင် ၅၀၀၀ ကျပ်ဝန်းကျင်သာ ပေါက်ဈေး ရှိခဲ့သော်လည်း ယနေ့ (ဇွန် ၁၈) ရောင်းချသည့် ဈေးနှုန်းများအရ ဒီးမော့ဆိုမြို့နယ်တွင် ၈ ထောင်ကျပ်မှ တစ်သောင်းကျပ်အထိ ဈေးနှုန်းမြင့်တက်လျက် ရှိသည်ဟု ဆိုသည်။   ဒီးမော့ဆိုမြို့နယ်ရှိ စစ်ဘေးရှောင်စခန်းများ၌ တစ်ပတ်လျှင် ဓါတ်ဆီ ၃ ဂါလံနှုန်းခန့် ကုန်ကျနေပြီး လက်ရှိတွင် စက်သုံးဆီ အရောင်းဆိုင် အများစုမှာ ပိတ်ထားသဖြင့် မှောင်ခိုလမ်းကြောင်းများမှ အခက်အခဲများစွာဖြင့် သယ်ယူနေရသည်ဟု ဆိုသည်။   ဒီးမော့ဆို အရှေ့ဘက်ခြမ်းရှိ အသက် ၃၂ နှစ်အရွယ် စစ်ဘေးရှောင် အမျိုးသား တစ်ဦးက “ဆီပြတ်တာတော့ အရင်ကလည်း ပြတ်ဖူးပါတယ်။ ဒီတခေါက်လောက်တော့ မဆိုးဘူး။ စစ်ကြောင်းထိုးတာ တစ်ခုတည်းတော့ မဟုတ်ဘူး ထင်တယ်။ မိုးတွင်းက ကားကြီးမောင်းတော့ လမ်းတွေ ပျက်တယ်လေ။ နောက်ထပ်လာတဲ့ ဆီဘောက်ဆာကားတွေလည်း ပျက်တော့ ကုမ္မဏီဖက်က ပေးမသွားတော့တာ ထင်တယ်။ တချိန်လုံး ဒိုင်းဒိုင်းနဲ့ ချနေတော့ မလာရဲတာလည်း ပါမှာပေါ့” ဟု ပြောသည်။   ဇွန်လ ၁၆ ရက်နေ့မှစ၍ စက်သုံးဆီ အဓိက ဝင်ရောက်သည့် တောင်ငူ - ဒီးမော့ဆို လမ်းအား စစ်ကောင်စီပိတ်မှ ပိတ်ထားသည့်အပြင် ပင်လောင်း - လွိုင်ကော် လမ်းတစ်လျှောက်၌လည်း မကြာခဏ ထိတွေ့တိုက်ပွဲ ဖြစ်ပွားနေ သဖြင့် စက်သုံးဆီ ဈေးကျရန် လတ်တလော မဖြစ်နိုင်သေးဘူးဟု မြေပြင် စစ်ရေး အရင်းအမြစ်များက ခန့်မှန်း ထားကြသည်။   ဒီးမော့ဆိုမြို့နယ် အရှေ့ဘက်ခြမ်းနှင့် အနောက်ဘက်ခြမ်းတွင် စစ်ဘေးရှောင်စခန်းပေါင်း ၁၀၀ ကျော်အထိ ရှိပြီး ၎င်းတို့အနက် စခန်း ၃၀ ဝန်းကျင်ခန့်က စက်သုံးဆီ ပြတ်လပ်လာခြင်းကြောင့် အလှူရှင် နည်းပါးလာခြင်း၊ ရိက္ခာ များသယ်ယူသည့် အချိန်တွင် စက်သုံးဆီ မလုံလောက်ခြင်း စသည့် အခက်အခဲများနှင့် ရင်ဆိုင်နေရသည်ဟု စစ်ဘေးရှောင်များ၏ ပြောပြချက်အရ သိရသည်။

ဒီးမော့ဆိုတွင် စက်သုံးဆီ ပြတ်လပ်လာသဖြင့် အဆမတန် ဈေးတက်

ဒီးမော့ဆိုတွင် စက်သုံးဆီ ပြတ်လပ်လာသဖြင့် အဆမတန် ဈေးတက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၅ ရက်။  ကရင်နီပြည်၊ ဒီးမော့ဆိုမြို့တွင် စက်…

  • June 25, 2025
ဈေးထွက်ဝယ်သည့် စစ်ကောင်စီ တပ်ဖွဲ့များ အလစ်အငိုက် အပစ်ခံရ၊ ၃ ဦးသေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၅ ရက်။   မန္တလေးတိုင်း၊ မြင်းခြံခရိုင်၊ ငါန်းဇွန်မြို့နယ်တွင် ဈေးဝယ်ထွက်လာသည့် စစ်ကောင်စီတပ်သားများ အလစ်ငိုက် ပစ်ခတ်ခံရပြီးနောက် ၃ ဦး ပွဲချင်းပြီး သေဆုံးသည်ဟု မြေပြင်တော်လှန်ရေး တပ်ဖွဲ့ဝင်များက ပြောသည်။   ငါန်းဇွန်မြို့နယ်၊ မင်းနေကုန်းရွာ ရဲစခန်းမှ ကောင်းစဉ်ကျေးရွာသို့ ဈေးဝယ်ထွက်လာသည့် စစ်ကောင်စီတပ်သား ၂၀ ခန့်အား စနိုက်ဘာဖြင့် ချောင်းမြောင်း ပစ်ခတ်ခဲ့ခြင်း ဖြစ်သည်။   Zero ပြောက်ကျားတပ်ဖွဲ့မှ မြေပြင်တာဝန်ရှိသူ တစ်ဦးက “ကျနော်တို့ ၃ ယောက်သေတာ အတည်ပြုလို့ ရတာကတော့ မျက်မြင်ပေါ့။ စနိုက်ဘာနဲ့ ပစ်တာလေ။ စနိုက်ဘာဆိုတော့ ထိထိရောက်ရောက် ပစ်နိုင်မှ ရတာ လေ။ အဲတော့ Scope (မှန်ပြောင်း)ထဲမှာလည်း ပေါ်နေတာပဲ။ သေချာတာတော့ ၃ လက်နဲ့ ပစ်တော့ ၃ ကောင် တိတိကျကျ မှန်ပေါ့။ Distance (အကွာအဝေး)လည်း အရမ်းကြီး မကွာဘူးလေ။ အဲတော့ ကင်းပုန်းဝပ်ပြီးမှ အပိုင် ပစ်ခဲ့တာပေါ့နော်။ အဲတော့  ၃ ယောက်လို့ မျက်မြင် အတည်ပြုနိုင်ပါတယ်” ဟု ပြောသည်။   အဆိုပါ စစ်ဆင်ရေးအား ဇွန်လ ၂၀ ရက်နေ့ နံနက်အစောပိုင်း အချိန်ခန့်တွင် ဖော်ဆောင်ခဲ့ခြင်း ဖြစ်ပြီး ဇွန်လ ၁၉ ရက်နေ့ ကတည်းက တပ်တွင်း သတင်းပေးများ၏ သတင်းပေးမှုကြောင့် လက်ဦးမှု ရယူနိုင်ခဲ့ခြင်း ဖြစ်သည်ဟု ဆိုသည်။   နှစ်ဖက်ထိတွေ့မှုမှာ ၁၀ မိနစ် ခန့်သာ ကြာမြင့်ခဲ့ပြီး စစ်ကောင်စီတပ်ဖက်မှ လက်နက်ကြီးများဖြင့် ပြန်လည် ပစ်ခတ်ခဲ့ သော်လည်း ၎င်းတို့ ရွေ့လျားမှုအား ကင်းပုန်းဝပ်နေသည့် Zero တပ်ဖွဲ့ဝင်များမှ တွေ့မြင်နေရသဖြင့် ၄၀ မမဖြင့် ထောက်၍ အောင်မြင်စွာ ဆုတ်ခွာနိုင်ခဲ့ခြင်း ဖြစ်သည်ဟု ဆိုသည်။   “တန်ပြန်စစ်ကြောင်းထိုးတာမျိုးတော့ မရှိပါဘူး။ ကျနော်တို့ စခန်းထဲက တပ်ကို လာပြီးတော့ သေနတ်တွေနဲ့ ရမ်းပစ်ဖောက်တဲ့ ပုံစံမျိုးပေါ့။ ဒါမျိုး ဖြစ်ပြီးတော့မှ သူတို့လည်း စခန်းထဲ ပြန်ဝင်သွားတယ်ပေါ့။ ကျနော်တို့ လည်း ခွာစစ်ဆင်ပြီးတော့ ရဲဘော်တွေ ပြန်ဆုတ်ခွာနိုင်ခဲ့တယ်ပေါ့” ဟု Zero ပြောက်ကျားတပ်ဖွဲ့မှ တာဝန်ရှိသူ က ဆက်ပြောသည်။   ဇွန်လအတွင်း မြင်းခြံခရိုင်တွင်းရှိ မြင်းခြံ၊ နွားထိုးကြီး၊ တောင်သာ၊ ငါန်းဇွန်၊ မလှိုင် စသည့်မြို့နယ်တွင်းရှိ ကျေးရွာများအား စစ်ကောင်စီတပ်က မကြာခဏ လေကြောင်း တိုက်ခိုက်ခြင်း၊ လက်နက်ကြီး ပစ်ခတ်ခြင်းများ လုပ်ဆောင်နေကြသည်ဟု ဒေသခံများနှင့် မြေပြင်တပ်ဖွဲ့ဝင်များက ဆိုကြသည်။

ဈေးထွက်ဝယ်သည့် စစ်ကောင်စီ တပ်ဖွဲ့များ အလစ်အငိုက် အပစ်ခံရ၊ ၃ ဦးသေဆုံး 

ဈေးထွက်ဝယ်သည့် စစ်ကောင်စီ တပ်ဖွဲ့များ အလစ်အငိုက် အပစ်ခံရ၊ ၃ ဦးသေဆုံး  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၅ ရက်။  မန္တလေးတိုင်း၊ မြင်း…

  • June 25, 2025
လမ်းပိတ်သဖြင့် မန္တလေး- ရွှေဘို- မြစ်ကြီးနား ယာဉ်များ အခက်ကြုံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၅ ရက်။   ကချင်ပြည်နယ်၊ မြစ်ကြီးနားမြို့သို့ ဝင်ရောက်သည့် အဓိက လမ်းမကြီးများအား ၂ ဖက် လက်နက်ကိုင်တပ်များမှ ပိတ်ဆို့ထားသည်ဟု ဒေသတွင်း သတင်းအရင်းအမြစ်များက ပြောသည်။   ဇွန်လ ဒုတိယအပတ်မှ စတင်၍ စစ်ကိုင်းတိုင်း၊ ဝက်လက်မြို့ အနီးတစ်ဝိုက်နေရာများတွင် တိုက်ပွဲများ ပြင်းထန် လာသဖြင့်  မန္တလေး - ရွှေဘိုကားလမ်းပေါ်ရှိ ဆားတောင်မြို့အဝင် ရုံးပင်ကန်ကျေးရွာမှ စပြီး ယာဉ်များ သွားလာ ခွင့်ကို ရက်အကန့်အသတ်မရှိ ပိတ်ပင်ထားသဖြင့် အခက်ကြုံနေကြရသည်။   မြစ်ကြီးနားမြို့ခံ ယာဉ်မောင်းတစ်ဦးက “အခု ရွှေဘိုက ထွက်တဲ့ကားတွေတော့ မိုးညှင်း၊ ဇီးကုန်း၊ စံပယ်၊ နံ့သာ အဲလောက်ထိပဲ ရတယ်။ အရာတော် - ထီးဆောင်း လမ်းပိုင်းကတော့ အမှတ် ၃ လမ်းပိုင်းကနေ သွားလို့ရတယ်။ ကွင်းလမ်းပေါ့။ လမ်း ပိတ်တော့ အချိန်ပိုကြာတယ်။ ဆီပိုကုန်တယ်။ ဈေးလည်းကြီးတော့ တော်ရုံသေရေး၊ ရှင်ရေးမှမဟုတ်ရင် ဘယ်သူမှ မသွားကြတော့ဘူး။ ခရီးသည် အရမ်းခက်တယ်” ဟု ပြောသည်။   မန္တလေး - ရွှေဘို - မြစ်ကြီးနား လမ်းပိုင်း၌ အတက်ကားများကို ဆားတောင်၌ ပိတ်ဆို့ထားပြီး အဆင်းကားများ ကို ရွှေဘိုမှ စတင်၍ သွားခွင့် မပြုတော့သဖြင့် ကွင်းလမ်းများမှ ခက်ခဲစွာ သွားလာနေရသည်ဟု ဆိုသည်။   လက်ရှိ သွားလာနေရသည့် ကွင်းလမ်း၌ မိုးရက်ဆက် ရွာသွန်းသဖြင့် လမ်းပိုင်းအချို့ ရေကျော်နေခြင်း၊ ရွှံ့နွံ့ ဗွက်အိုင်များ ထူထပ်ခြင်း၊ တိုက်ပွဲများ ဖြစ်ပွားလျှင် ရက်ကြာမြင့်စွာ စောင့်ဆိုင်းရခြင်း စသည့် အခက်အခဲများ ရင်ဆိုင်နေရခြင်း ဖြစ်သည်။   မြစ်ကြီးနားမြို့တွင်းရှိ အွန်လိုင်း ဈေးသည်တစ်ဦးက “ခါတိုင်း ၁၄ နာရီလောက်ရှိတဲ့ ခရီးကို အခုက တစ်ပတ် လောက်ကြာနေတယ်။ ကားတွေဆို တစ်ရက်တစ်ရက် ပိတ်တာ အစီး ၂၀၀ နီးပါးလောက် ရှိတာ။ တချို့က လည်း လမ်းရောက်မှ ပြန်လှည့်ချင်တာ လှည့်မရတော့ ကားတွေပိတ်ပြီး ဟွန်းတွေတီး၊ ရန်တွေဖြစ်။ ပစ္စည်းက အဝင် နည်းတော့ ကုန်ဈေးနှုန်းကတက်နဲ့ ဘာလုပ်စားရမလဲတောင် မသိတော့ဘူး” ဟု ပြောသည်။   လတ်တလောတွင် မြစ်ကြီးနားမြို့၌ ဆန်ကြမ်းတစ်အိတ် ကျပ် ၂ သိန်းနီးပါး၊ စားသုံးဆီ တစ်ပိဿာလျှင် ကျပ် ၂ သောင်း နီးပါးဖြင့် ဝယ်ယူနေရပြီး မန္တလေး - ရွှေဘို - မြစ်ကြီးနား လမ်းပိုင်းအား ပြန်လည်ဖွင့်လှစ်ပေးရန် မြို့ခံများနှင့် ယာဉ်လိုင်းများက မျှော်လင့်နေကြသည်။   အလားတူ ဖားကန့် - ကာမိုင်း - မိုးကောင်း - မြစ်ကြီးနား လမ်းနှင့် ဖားကန့် - မိုးညှင်း - အင်းတော်ကြီး -ဝှေ ခါ လမ်းကိုလည်း မကြာခဏ ပိတ်လိုက်၊ ဖွင့်လိုက် အနေအထားများ ဖြစ်နေသဖြင့် မိုးတွင်းကာလ ကုန်စည်များ ဝင်ရောက်မှု နည်းပါးလာပြီး ကုန်ဈေးနှုန်း မြင့်တက်နေကြသည်ဟု ယာဉ်လိုင်း တာဝန်ရှိသူများက ဆိုကြသည်။

လမ်းပိတ်သဖြင့် မန္တလေး- ရွှေဘို- မြစ်ကြီးနား ယာဉ်များ အခက်ကြုံ 

လမ်းပိတ်သဖြင့် မန္တလေး- ရွှေဘို- မြစ်ကြီးနား ယာဉ်များ အခက်ကြုံ  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၅ ရက်။  ကချင်ပြည်နယ်၊ မြစ်ကြီးနားမ…

  • June 25, 2025
 လေကြောင်းတိုက်ခိုက်မှုကြောင့် ကျောက်မဲတွင် အရပ်သား ၄ ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၄ ရက်။   စစ်ကောင်စီတပ်၏ လေကြောင်းတိုက်ခိုက်မှုကြောင့် ကျောက်မဲမြို့တွင် အရပ်သား ၄ ဦး သေဆုံးပြီး ၄ ဦး ထိခိုက်ဒစ်ရာ ရရှိခဲ့သည်။   စစ်ကောင်စီတပ်က ကျောက်မဲမြို့ရှိ ရပ်ကွက် ၃ နှင့် ရပ်ကွက် ၇ ထဲကို တိုက်ပွဲ ဖြစ်ပွားမှု မရှိဘဲ ဂျက်ဖိုက်တာ ဖြင့် ပေါင် ၅၀၀ ဗုံး  ၂ လုံး လာရောက်ကြဲချရာမှ ယခုကဲ့သို့ အရပ်သား ပြည်သူများ ထိခိုက်သေဆုံးခဲ့ရသည်ဟု PSLF/TNLA က ဇွန်လ ၂၄ ရက်နေ့ (ယနေ့) ညတွင် ထုတ်ပြန်သည်။    တအာင်းအမျိုးသား လွတ်မြောက်ရေး တပ်မတော်  PSLF/TNLA က "ဖြစ်စဉ်တွင် ယနေ့ ညနေပိုင်းအချိန်တွင် စစ်ကောင်စီတပ်မှ လေကြောင်းဖြင့် (၂)ကြိမ် ဗုံးလာရောက်ကြဲချမှုကြောင့်  အမျိုးသား (၂)ဦးနှင့် အမျိုးသမီး (၂)ဦး သေဆုံးခဲ့ရပြီး အမျိုးသား (၂)ဦးနှင့် အမျိုးသမီး (၂)ဦးတို့ ထိခိုက်ဒဏ်ရာရရှိခဲ့သည့်အပြင် ပြည်သူလူထု များ၏ နေအိမ် (၁၀)လုံးလည် ထိခိုက်ပျက်စီးသွားခဲ့သည်" ဟု ထုတ်ပြန်ထားသည်။   လူထိခိုက် သေဆုံး ဒဏ်ရာ ရရှိခဲ့သည့်အပြင် အရပ်သား ပြည်သူများ၏ နေအိမ် ၁၀ လုံး ထိမှန် ပျက်စီးခဲ့သည်ဟု ဆိုသည်။   ထို့ကြောင့် ပြည်သူများအနေဖြင့် စစ်ရေး သတိရှိကြရန်နှင့် လေကြောင်းရန် ကာကွယ်ရေးဆိုင်ရာ နည်းလမ်းများ လိုက်နာဆောင်ရွက်ကြရန် PSLF/TNLA က သတိပေးပြောဆိုထားသည်။   ပြီးခဲ့သည့် ဇွန်လ ၁၂ ရက်နေ့ကလည်း စစ်ကောင်စီတပ်သည် နမ္မတူမြို့နယ်၊ မန်လီကျေးရွာထဲကို ဂျက်ဖိုက်တာ ဖြင့် ပေါင် ၅၀၀ ဗုံး ၂လုံး လာရောက်ကြဲချတိုက်ခိုက်ခဲ့သောကြောင့် ဘုန်းကြီးကျောင်း၊ စာသင်ကျောင်းနှင့် ပြည်သူလူထုများ၏ နေအိမ်တစ်ချို့ ထိခိုက်ပျက်စီးသွားခဲ့သည်ဟု PSLF/TNLA  က ပြောသည်။   Photo – PSLF/TNLA

 လေကြောင်းတိုက်ခိုက်မှုကြောင့် ကျောက်မဲတွင် အရပ်သား ၄ ဦးသေဆုံး

 လေကြောင်းတိုက်ခိုက်မှုကြောင့် ကျောက်မဲတွင် အရပ်သား ၄ ဦးသေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၄ ရက်။ စစ်ကောင်စီတပ်၏ လေကြောင်းတိုက…

  • June 24, 2025
SSPP နှင့် TNLA မိုးမိတ်တွင် မိနစ်အနည်းငယ်ကြာ တိုက်ပွဲ ဖြစ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၃ ရက်။   ရှမ်းပြည်နယ်မြောက်ပိုင်း မိုးမိတ်မြို့နယ်တွင် ရှမ်းပြည်တိုးတက်ရေးပါတီ SSPP/SSA  နှင့် တအာင်းအမျိုးသား လွတ်မြောက်ရေးတပ်မတော် PSLF/TNLA တို့ ဇွန်လ ၂၃ ရက် (ယနေ့)တွင် တိုက်ပွဲ ဖြစ်ပွားခဲ့သည်။   PSLF/TNLA မှ SSPP/SSA ရှိရာနေရာသို့ စစ်ကြောင်း ၃ ကြောင်းဖြင့် ထိုးစစ်တိုက်ခိုက်လာ သောကြောင့် မိနစ်အနည်းငယ် တိုက်ပွဲ ဖြစ်ပွားခဲ့သည်ဟု SSPP က ထုတ်ပြန်သည်။   SSPP/SSA ရှေ့တန်းအရာရှိတစ်ဦးက “ ဟုတ်တယ် တိုက်ပွဲက မိုးဟောက်ရဲ တောင်ဘက်ရပ်မှာ ဖြစ်တယ် မိုးဟောက် ကနေ တောင်ဘက်ဆင်းသွားရင် ကျွန်တော်တို့ SSPP/SSA အဖွဲ့ထိုင်ထားတယ် PSLF/TNLA ဘက်က ဘော်ဒေ ကနေ လမ်းမကြီးနောက်ဘက် တစ်ကြောက နေရာယူထားတယ် အခုချိန်ထိတော့ တပ်နှစ်ဖွဲ့တိုအား ချည်းကပ်တင်းမာနေထားတယ်” ဟု ထုတ်ပြန်ချက်ထဲတွင် ပြောဆိုထားသည်။   တိုက်ပွဲမှာ မိနစ်အနည်းငယ် ဖြစ်ပွားပြီးနောက် PSLF/TNLA က ပြန်လည်ဆုတ်ခွာသွားဟု SSPP/SSA က ဆိုသည်။   ယနေ့တွင် ဖြစ်ပွားခဲ့သည့် တိုက်ပွဲ အခြေအနေနှင့် ပတ်သက်၍ PSLF/TNLA ကလည်း ၎င်းတို့၏ တပ်ဖွဲ့များ ကင်းလှည့်နေစဉ် SSPP/SSA က ချုံခိုတိုက်ခိုက်ခဲ့သည်ဟု ထုတ်ပြန်သည်။   PSLF/TNLA က “တအာင်းပြည်၊ တပ်မဟာ(၄)နယ်မြေ၊ မိုးမိတ်မြို့နယ်၊ မိုးဟောက်ကျေးရွာအုပ်စုအတွင်း တအာင်းတပ်မတော်-TNLA စစ်ကြောင်းထွက်ကင်းလှည့်နေစဉ် ရှမ်းပြည်တိုးတက်ရေးပါတီ-SSPP/SSA တပ်ဖွဲ့မှ ခြုံခိုပစ်ခတ်တိုက်ခိုက်ခဲ့ပါသည်။ ရှမ်းပြည်တိုးတက်ရေးပါတီ-SSPP/SSAတပ်ဖွဲ့သည် ယနေ့ နံနက် (၁၀း၁၄)နာရီအချိန်တွင် တစ်ကြိမ်၊ နံနက် (၁၁း၃၆)နာရီအချိန်တွင် တစ်ကြိမ် လက်နက်ငယ်ဖြင့် တအာင်းတပ် မတော်-TNLA တပ်ဖွဲ့ကို ခြုံခိုပစ်ခတ်ခဲ့ပါသည်။ ” ဟု ထုတ်ပြန်ချက်ထဲတွင် PSLF/TNLA က ပြောသည်။   ထို့အပြင် မွန်းလွဲ ၁၂ နာရီ ကျော်တွင် SSPP/SSA က ၎င်းတို့ စစ်ကြောင်းတည်ရှိရာဘက်သို့ လက်နက် ကြီး တစ်လုံး ပစ်ခတ်တိုက်ခိုက်ခဲ့သည်ဟု PSLF/TNLA က ဆိုသည်။   လက်ရှိမှာ တိုက်ပွဲငြိမ်သွားသော်လည်း နှစ်ဖက်တပ်ဖွဲ့အကြားတွင် စစ်ရေးတင်းမာနေသည်ဟု SSPP/SSA က ဆိုသည်။   ပြီးခဲ့သည့် ဇွန်လ ၁၉ ရက်နေ့က PSLF/TNLA တပ်ရင်း ၃ ရင်းက မိုင်းလုံ  မိုးကုတ်ကနေ SSPP/SSA ရှိရာ ကျေးရွာအနီးသို့ တပ်အင် အားဖြည့်တင်းမှုများ လုပ်ဆောင်ခဲ့သည်ဟု SSPP/SSA က ပြောသည်။   SSPP/SSA က “ပြီးခဲ့တဲ့ ၁၉ ရက်နေ့ ဇွန်လ ၂၀၂၅ မှာ TNLA အဖွဲ့ တပ်ရင်း အမှတ် ၂ /အမှတ် ၃ အမှတ် ၉ တို့ အင်အား ၂၀၀ ကျော်ဝန်းကျင်မှ တုန်ဖုန်ကား ၅ စီးနှင့် ဖိုးဝီးကား ၃ စီးတို့ဖြင့် မိုင်းလုံ မိုးကုတ်ကနေ SSPP/SSA ရှိ မိုးဟောက်ကျေးရွာကို စစ်ကြောင်းအင်အားဖြည့်ဆည်းသွားပြီး၊ မိုးမိတ်ကနေ မိုးဟောက်ကျေးရွာကို အင်အား ၈၀ ဝန်းကျင်မှ ထပ်မံဖြည့်ဆည်းကာ SSPP/SSA ရှိတဲ့နေရာကို စစ်ရေးချည်းကပ်ထားနေသည်။” ဟု  ထုတ်ပြန် ချက်ထဲတွင် ထည့်သွင်းထားသည်။   ဇွန်လ ၁၅ ရက်နေ့ကလည်း ကျောက်မဲမြို့နယ် ဟူးဆွန်ကျေးရွာတွင် SSPP/SSA နှင့် PSLF/TNLA တို့ နယ်မြေကိစ္စ အငြင်းပွားရာမှ နှစ်ဖက် တိုက်ပွဲဖြစ်ပွားခဲ့ပြီး PSLF/TNLA ဖက်က ၂ ဦးကျဆုံးကာ ၃ ဦး ထိခိုက် ဒဏ်ရာ ရရှိခဲ့သည်။

SSPP နှင့် TNLA မိုးမိတ်တွင် မိနစ်အနည်းငယ်ကြာ တိုက်ပွဲ ဖြစ်

SSPP နှင့် TNLA မိုးမိတ်တွင် မိနစ်အနည်းငယ်ကြာ တိုက်ပွဲ ဖြစ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၃ ရက်။ ရှမ်းပြည်နယ်မြောက်ပိုင်း မိုးမိ…

  • June 23, 2025
စဉ့်ကူးရှိဆေးရုံကို ဗုံးကြဲ၊ အမျိုးသမီး ၁ ဦးသေ ၁၂ ဦးဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၃ ရက်။ မန္တလေးတိုင်းတွင် စစ်ကောင်စီတပ်၏ ဗုံးကြဲတိုက်ခိုက်မှုကြောင့် ဆေးရုံသို့ မီးဖွားလာသူ အမျိုးသမီး ၁ ဦးသေဆုံးခဲ့ပြီး ဆေးကုသရန်လာသူ ၁၂ ဦး ထိခိုက်ဒဏ်ရာ ရရှိခဲ့သည်။ မန္တလေးတိုင်း၊ စဉ့်ကူးမြို့နယ်နှင့် မတ္တရာမြို့နယ်အစပ်ရှိ မေတ္တာ နန္ဒ ဆေးရုံ(ယက်ကန်းစင်)ဆေးရုံကို စစ်ကောင်စီတပ်က ဗုံးကြဲတိုက်ခိုက်ခဲ့သောကြောင့် မီးဖွားလာသူ အမျိုးသမီး ၁ ဦးသေဆုံးကာ ၁၂ ဦး ထိခိုက်ဒဏ်ရာ ရရှိခဲ့သည်ဟု ပြည်သူ့ကာကွယ်ရေးအဖွဲ့ ပြင်ဦးလွင်ခရိုင် ပြောသည်။ စစ်ကောင်စီတပ်၏ တံတားဦးလေတပ်မှ ဇွန်လ ၂၂ ရက်နေ့ည ၁၁ နာရီ ကျော်တွင် ပေါင် ၃၀၀ ဗုံးဖြင့် တိုကခိုက်မှုကြောင့် မတ္တရာမြို့နယ် ဆည်တော်လမ်းခွဲကျေးရွာမှ ဆေးရုံသို့ မီးဖွားလာသူ အသက် ၃၀ အရွယ် အမျိုးသမီးတစ်ဦးသေဆုံးခဲ့သည်ဟု ပြည်သူ့ကာကွယ်ရေးအဖွဲ့ ပြင်ဦးလွင်ခရိုင် ဇွန်လ ၂၃ ရက်နေ့(ယနေ့)တွင် ထုတ်ပြန်သည်။ ထို့အပြင် ထိခိုက်ဒဏ်ရာ ရရှိသူ ၁၂ ဦးထဲတွင် အသက် ၃၅ နှစ်အရွယ် အမျိုးသမီး တစ်ဦးမှာ ဒဏ်ရာ ပြင်းထန်စွာ ရရှိခဲ့ပြီး စိုးရိမ်ရသည့် အခြေအနေတွင် ရှိနေသည်ဟုဆိုသည်။ သို့သော် ၁၁ ဦးမှာ မစိုးရိမ်ရပေ။ လူထိခိုက်သေဆုံးမှုများအပြင် ဆေးရုံသားဖွားမီးယပ်အဆောင်အပါအဝင် အဆောက်အုံ ၃ လုံးပျက်စီးခဲ့သည်ဟု ပြည်သူ့ကာကွယ်ရေးအဖွဲ့ ပြင်ဦးလွင်ခရိုင် က ပြောသည်။

စဉ့်ကူးရှိဆေးရုံကို ဗုံးကြဲ၊ အမျိုးသမီး ၁ ဦးသေ ၁၂ ဦးဒဏ်ရာရ

စဉ့်ကူးရှိဆေးရုံကို ဗုံးကြဲ၊ အမျိုးသမီး ၁ ဦးသေ ၁၂ ဦးဒဏ်ရာရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၃ ရက်။ မန္တလေးတိုင်းတွင် စစ်ကောင်စီတပ်၏…

  • June 23, 2025
×Close