သတင်း

ဆိုင်းဘုတ် ဘာသာပြောင်းညွှန်ကြားမှု နားလည်မှု လွဲခြင်းဖြစ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၈ ရက်။     အုပ်ချုပ်ရေးမှူးများ နားလည်မှုလွဲခြင်းကြောင့် တောင်ကြီးမြို့တွင် ဆိုင်းဘုတ်များအား မြန်မာဘာသာဖြင့် ပြောင်းလဲ အသုံးပြုနေကြရသည်။   ရှမ်းပြည်၏ မြို့တော်၊ တောင်ကြီးတွင် စစ်ကောင်စီ လက်အောက်ခံ မြို့နယ်အထွေထွေ အုပ်ချုပ်ရေး ဦးစီးဌာနမှ မြို့တွင်းရှိ နိုင်ငံခြားဘာသာဖြင့် ရေးထိုးထားသည့် ဆိုင်းဘုတ်များ အားလုံးကို မြန်မာဘာသာဖြင့် ပြောင်းလဲ အသုံးပြုရန် ညွှန်ကြားထားသည်ဟု မြို့ခံ ဈေးသည်များက ပြောသည်။   မြို့မဈေးအောက်ထပ်တွင် ရောင်းချနေသည့် အထည်ဆိုင်ပိုင်ရှင်တစ်ဦးက “စည်ပင်နဲ့ ထွေအုပ်ဆီက စာလာတာ က ဥပမာ အိုးရှင်းဆိုရင် ဈေးဝယ်စင်တာ အဲ့လိုမျိုးပဲ ဖော်ပြခိုင်းတာပါ။ အုပ်ကြီးတွေက ဘုမသိဘမသိ မြန်မာ လို ပြန်ပြရမယ်ဆိုတော့ အိုးရှင်းကနေ သမုဒ္ဒရာ ဖြစ်သွားတယ်။ ဆိုင်းဘုတ်ကို မြန်မာဘာသာ ပြန်ခိုင်းတာ မဟုတ်ပါဘူး။ အခုတော့ တစ်မြို့လုံး ဟာသတွေ ဖြစ်နေတယ်” ဟု ပြောသည်။   မြို့နယ်ထွေအုပ်မှ မြန်မာဘာသာဖြင့် ဖော်ပြရမည်ဟု ညွှန်ကြားထားသော်လည်း အုပ်ချုပ်ရေးမှူးများက နား လည်မှု လွဲသဖြင့် ဆိုင်းဘုတ်များအား တိုက်ရိုက်မြန်မာဘာသာသို့ ပြန်ဆိုပြီး ဖော်ပြနေရခြင်း ဖြစ်သည်။   ပြီးခဲ့သည့် ရက်သတ္တတစ်ပတ်အတွင်း မြို့တွင်းရှိ ဆိုင်းဘုတ်များအား မြန်မာဘာသာသို့ ပြောင်းလဲရန် မြို့နယ် ထွေအုပ်မှ အရောင်းဆိုင်များ၊ သင်တန်းများ၊ ဟော်တယ်များ စသည့် စီးပွားရေးလုပ်ငန်းများကို ညွှန်ကြားထား ခဲ့ခြင်း ဖြစ်သည်ဟု ဆိုသည်။   လက်ရှိတွင် အရှေ့မြို့ပတ်လမ်း၊ ဗိုလ်ချုပ်အောင်ဆန်းလမ်း၊ အနောက်မြို့ပတ်လမ်း စသည့် အဓိက လမ်းမကြီး ၃ ခုပေါ်မှ ဆိုင်းဘုတ် အားလုံးနီးပါးမှာ မြန်မာဘာသာသို့ ပြောင်းလဲထားကြပြီဟု ဆိုသည်။   အရှေ့မြို့ပတ်လမ်းရှိ ဈေးသည်တစ်ဦးက “ဆိုင်မှာလာပြောတော့ ကောင်းကောင်းမွန်မွန် မပြောဘဲ တစ်ဈေးလုံး ဟိန်းလား ဟောက်လား လုပ်သွားတာ။ နောက်သတင်းတွေမှာ ပါလာတော့ သူတို့ လာတောင်းပန်တယ်။ တချို့ ဆိုင်တွေပေါ့။ ဆိုင်အားလုံးတော့ မဟုတ်ပါဘူး။ စာထဲမှာလည်း မပြောင်းရင် ဘာလုပ်မယ် ညာလုပ်မယ်လို့ မပါ ပါဘူး။ တခုခုဆို အကုန်လုံးက ကြောက်လန့်ပြီး ပြောင်းကြတော့ ဟိုးလေးတကျော် ဖြစ်သွားတာပါ” ဟု ပြော သည်။   တောင်ကြီးမြို့ခံ စီးပွားရေး လုပ်ငန်းရှင်များ အနေဖြင့် လက်ရှိ ပြောင်းလဲထားသည့် ဆိုင်းဘုတ်များမှာ ငွေကျပ် သိန်းဂဏန်း ကုန်ကျထားသည် ဖြစ်ရာ ယခင် နိုင်ငံခြားဘာသာသို့ ထပ်မံပြောင်းလဲရန် အတွက် ငွေကြေး မတတ် နိုင်သဖြင့် ချက်ချင်း မလုပ်ဆောင်နိုင်သေးဘူးဟု ဆိုသည်။   ထို့အပြင် ဆိုင်အချို့မှာလည်း ကောလဟာလ သတင်းများ အမျိုးမျိုး ထွက်ပေါ်နေသဖြင့် ယခင် ညွှန်ကြားထား သည့် အတိုင်း မူရင်း နိုင်ငံခြားဘာသာများ အစား မြန်မာဘာသဖြင့် ပြန်ဆို၍ ယာယီ သဘောဖြင့်သာ ဗွီနိုင်း ချိတ်ဆွဲထားသည်ဟု မြို့ခံများ၏ ပြောပြချက်အရ သိရသည်။

ဆိုင်းဘုတ် ဘာသာပြောင်းညွှန်ကြားမှု နားလည်မှု လွဲခြင်းဖြစ်

ဆိုင်းဘုတ် ဘာသာပြောင်းညွှန်ကြားမှု နားလည်မှု လွဲခြင်းဖြစ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၈ ရက်။  အုပ်ချုပ်ရေးမှူးများ နားလည်မှုလွ…

  • June 18, 2025
ပင်လယ်မှ စစ်ကြောင်းနှင့် ကာကွယ်ရေးပူးပေါင်းတပ်များ တိုက်ပွဲ ဖြစ်   သတင်းနှင့် မီဒီယာကွန်ရက်။ ၂၀၂၅ ခုနှစ်၊ ဇွန်လ ၁၈ ရက်။   ပုလောမြို့နယ်ထဲ ပင်လယ်ဘက်မှ စက်လှေများဖြင့် စစ်ကြောင်းထိုးလာသည့် စစ်ကောင်စီတပ်ဖွဲ့ နှင့် ပြည်သူ့ ကာကွယ်ရေး ပူးပေါင်းတပ်ဖွဲ့တို့ တိုက်ပွဲများ ဖြစ်ပွားနေသဖြင့် ဘေးလွတ်ရာသို့ တိမ်းရှောင်နေကြရသည်ဟု ရွာသားများက ပြောသည်။   တိုက်ပွဲကြောင့် တောင်ခေါင်းလောင်း၊ ကုလားမခေါင်းနှင့် ခန္တီကျေးရွာတို့မှ ရွာသားများ အားလုံးနီးပါး ဇွန်လ ၁၇ ရက်အထိ မိုးထဲလေထဲတွင် ထွက်ပြေးတိမ်းရှောင် နေကြရသည်ဟု စစ်ရှောင်နေသူ အမျိုးသမီးတစ်ဦးက ဆို သည်။   မြိတ်ခရိုင်၊ ပုလောမြို့နယ်၊ ခန္တီကျေးရွာအုပ်စုအတွင်းရှိ တောင်ခေါင်းလောင်းကျေးရွာသို့ ဇွန်လ ၁၄ ရက်နေ့ မွန်းတည့် ၁၂ နာရီအချိန်ခန့်က ကင်းမွန်မီးထွန်းစက်လှေ ၂ စီးဖြင့် စစ်ကောင်စီက စစ်ကြောင်းထိုးလာခြင်း ဖြစ်သည်။   အဆိုပါ စစ်ကြောင်းနှင့် ပြည်သူ့ကာကွယ်ရေး ပူးပေါင်းတပ်တို့အကြား ၄၅ မိနစ်ခန့်ကြာ တိုက်ပွဲဖြစ်ပွားခဲ့ ကြောင်း တောင်ခေါင်းတောင် ရွာသားများက ပြောသည်။   အသက် ၄၀ ခန့်အရွယ် တောင်ခေါင်း လောင်းရွာသားတစ်ဦးက “လက်နက်ကြီးတွေက ရေကြောင်းရော၊ ကုန်း ပေါ်ကရော ပစ်နေတာ၊ ကုလားမခေါင်းနဲ့ တောင်ခေါင်းလောင်းရွာမှာတော့ ရွာသားတွေမရှိကြတော့ဘူး၊ နီးစပ် ရာမှာ ရှောင်တိမ်းနေကြရတယ်၊ စစ်ကောင်စီဘက်က ထိခိုက်မှုတွေရှိလို့ ဥယျာဥ်ကမ်းရွာမှာ ဝင်ကပ်ပြီး ဆေး ကုနေတယ်” ဟု ပြောသည်။   တိုက်ပွဲ ဖြစ်ပွားနေစဥ်တွင် တောင်ခေါင်းလောင်းကျေးရွာဘက်သို့ ပြင်ဘုကြီးကျေးရွာ ရေပြင်အနီးရှိ စစ်သင်္ဘော ပေါ်မှ လက်နက်ကြီးများဖြင့် ပစ်ခတ်ခဲ့ပြီး ကထောင်းနီကျေးရွာတွင် ရှိနေသည့် စစ်ကောင်စီ တပ်ဖွဲ့ကလည်း ခန္တီကျေးရွာဘက်သို့ လက်နက်ကြီးဖြင့် ဆက်တိုက် ပစ်ကူပေးခဲ့သည်။   ဇွန်လ ၁၄ ရက်နေ့၊ မွန်းလွဲ ၁ နာရီ အချိန်ခန့်တွင် ဥယျာဉ်ကမ်းကျေးရွာဘက်မှ စစ်ကောင်စီ လှေများ ပြန်ထွက် လာချိန်တွင်လည်း ‌တိုက်ပွဲ ထပ်မံဖြစ်ပွားခဲ့သေးကြောင်း ရွာသားများက ဆိုသည်။    ထိုနေ့ ညနေပိုင်းတွင် စစ်ကောင်စီတပ်ဖွဲ့ဝင် အယောက် ၅၀ ခန့်ပါသည့် အခြားစက်လှေတစ်စီးဖြင့် ခန္တီကျေးရွာ ၏ တစ်ဖက်ကမ်းတွင်ရှိသည့် ပြင်ဘုငယ်ကျေးရွာသို့ အင်အားဖြည့်တင်းရန် ရောက်ရှိလာခဲ့ပြီး စစ်ရေးတင်းမာ နေသဖြင့် အချိန်မရွေး တိုက်ပွဲ ထပ်မံဖြစ်ပွားနိုင်နေသည့် အခြေအနေမျိုး ဖြစ်နေသည်။   တိုက်ပွဲအတွင်း စစ်ကောင်စီတပ်ဘက်မှ ထိခိုက်သေဆုံးမှု အခြေအနေကို မသိရသေးသော်လည်း ပြည်သူ့ကာ ကွယ်ရေး ပူပေါင်းတပ်ဖွဲ့များဘက်တွင် ထိခိုက်မှုမရှိကြောင်း ပူးပေါင်းတပ်ဖွဲ့ တာဝန်ရှိသူ တစ်ဦးက ဆိုသည်။   စောင့်ကြို တိုက်ခိုက်မှုကို မြိတ်ခရိုင် ပြည်သူ့ကာကွယ်ရေး တပ်မတော် အမှတ် ၁ တပ်ရင်း၊ တပ်ခွဲ (၁)၊ ပုလော - ပကဖ၊ KNDO၊ KNLA စသည့်တပ်များ ပူးပေါင်းပါဝင်ခဲ့ကြသည်။

ပင်လယ်မှ စစ်ကြောင်းနှင့် ကာကွယ်ရေးပူးပေါင်းတပ်များ တိုက်ပွဲ ဖြစ်

ပင်လယ်မှ စစ်ကြောင်းနှင့် ကာကွယ်ရေးပူးပေါင်းတပ်များ တိုက်ပွဲ ဖြစ် သတင်းနှင့် မီဒီယာကွန်ရက်။ ၂၀၂၅ ခုနှစ်၊ ဇွန်လ ၁၈ ရက်။  ပုလောမြို့နယ်ထဲ ပင်လယ်ဘက်…

  • June 18, 2025
သပိတ်ခေါင်းဆောင် ဝေမိုးနိုင်ကို ထောင်ပြောင်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၄ ရက်။   မုံရွာအကျဉ်းထောင်တွင် ထိန်းသိမ်းခံထားရသည့် မုံရွာသပိတ်ခေါင်းဆောင် ကိုဝေမိုးနိုင် အပါအဝင် နိုင်ကျဉ်း များနှင့် အခြား ရာဇဝတ်အကျဉ်းသား ၂၀၀ ခန့်ကို စစ်ကောင်စီက အခြားထောင်များသို့ ပြောင်းရွှေ့လိုက်သည်။   ထောင်ဒဏ် ၇၄ နှစ် ချမှတ်ခံထားရသည့် မုံရွာသပိတ်ခေါင်းဆောင် ကိုဝေမိုးနိုင် နှင့် အကျဉ်းသား ၂၀၀ ခန့်ကို ဇွန်လ ၁၂ ရက်နေ့တွင် ထောင်ပြောင်း လိုက်ခြင်းဖြစ်သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် PPNM က ထုတ်ပြန်သည်။   PPNM ၏ ပြောရေးဆိုခွင့်ရှိသူ ကိုသိုက်ထွန်းဦးက “ကျနော်တို့ ဒီမနေ့မနက် ၅ နာရီနဲ့ ၆ နာရီဝန်းကျင်ကြားမှာ ပေါ့နော်၊ ဒီမုံရွာအကျဉ်းထောင်ကနေ ကျနော်တို့ မုံရွာရဲ့ သပိတ်ခေါင်းဆောင် တစ်ဦးဖြစ်တဲ့ ကိုဝေမိုးနိုင် အပါ အဝင် ဒီသပိတ်ခေါင်းဆောင်တွေ၊ နိုင်ငံရေး တက်ကြွလှုပ်ရှားသူတွေ၊ နိုင်ငံရေးသမားတွေနဲ့ တခြား ရာဇဝတ် အကျဉ်းသားတွေပေါ့နော်၊ အားလုံးကို စုစည်းပြီးမှ အယောက် ၂၀၀ ဝန်းကျင်လောက်ကို ဒါ နမခက စစ်တပ်က လုံခြုံရေးယူပြီးမှ ခေါ်ထုတ်သွားတာရှိပါတယ်” ဟု ပြောသည်။   ဇွန်လ ၁၂ ရက်နေ့၊ နံနက်ပိုင်းတွင် အနောက်မြောက်တိုင်း စစ်ဌာနချုပ် (နမခ) မှ တပ်ဖွဲ့ ဝင်များသည် သံချပ်ကာ ကား ၂ စီး၊ အိမ်စီးကား ၃ စီးနှင့် ဆယ့်နှစ်ဘီး ကုန်တင်ကား ၆ စီး ပါဝင်သော ယာဉ်တန်းဖြင့် မုံရွာထောင်မှ အကျဉ်းသားများကို လာခေါ်သွားခြင်း ဖြစ်သည်ဟု PPNM က ဆိုသည်။   အဆိုပါ အကျဉ်းသားများကို မန္တလေးတိုင်းရှိ အိုးဘိုနှင့် မြင်းခြံ အကျဉ်းထောင်အပြင် မကွေးတိုင်းရှိ မကွေး အကျဉ်းထောင်သို့ ခွဲ၍ ပို့ဆောင်မည်ဖြစ်ပြီး အဓိက ဦးတည်ရာမှာ အိုးဘိုအကျဉ်းထောင် ဖြစ်သည်ဟု ဆိုသည်။   ဤသို့ရွှေ့ပြောင်းရခြင်းမှာ စစ်ကိုင်းတိုင်းအတွင်း တော်လှန်ရေး အင်အားစုများ၏ စစ်ရေးလှုပ်ရှားမှုများ အရှိန်မြင့်လာခြင်းကြောင့် မုံရွာအကျဉ်းထောင်၏ လုံခြုံရေးအပေါ် စစ်ကောင်စီက စိုးရိမ်လာခြင်းဖြစ်နိုင်ကြောင်း ကိုသိုက်ထွန်းဦးက သုံးသပ်သည်။   “ပို့ရတဲ့ ရည်ရွယ်ချက်ကတော့ ကျနော်တို့ သုံးသပ်တာကတော့ ဒါ လက်ရှိ စစ်ကိုင်းတိုင်းဟာ စစ်ရေးအရ အရှိန် မြင့်လာတယ်။ တိုင်းပြည်မှာ ကောင်းကောင်း အင်အားမဖြန့်ထားနိုင်တဲ့ စစ်ကောင်စီအနေနဲ့က ဒီအညာမှာ စစ်ရေး အားကောင်းလာတာနဲ့ အမျှ ဒီမုံရွာဟာ လုံခြုံတယ်လို့ သူတို့ မခံစားရတော့တဲ့ အခြေအနေဖြစ်တယ်လို့ ကျနော်တို့ သုံးသပ်ပါတယ်။” 
ထို့အပြင် ဤရွှေ့ပြောင်းမှုသည် အကျဉ်းသားများနှင့် ၎င်းတို့၏ မိသားစုဝင်များကြား အဆက်အသွယ် ဖြတ် တောက်ရန်နှင့် သတင်းစီးဆင်းမှုကို ဟန့်တားရန် ရည်ရွယ်နိုင်သည်ဟုလည်း ကိုသိုက်ထွန်းဦးက ဆိုသည်။   ရွှေ့ပြောင်းခံရသည့် အကျဉ်းသားများအတွက် နေရာထိုင်ခင်း၊ အစားအသောက်နှင့် လုံခြုံရေးဆိုင်ရာ စိုးရိမ်မှုများ လည်း ရှိနေသည်ဟု နိုင်ကျဉ်းအရေး စောင့်ကြည့်နေသူများက ဆိုသည်။   အထူးသဖြင့် အဓိက ပို့ခံရဖွယ်ရှိသည့် အိုးဘိုအကျဉ်းထောင်သည် ငလျင်ဒဏ်ကြောင့် အဆောက်အအုံများ၏ ခံနိုင်အားမှာ စိုးရိမ်နေရပြီး လက်ရှိတွင်ပင် အကျဉ်းသားဦးရေနှင့် ပြည့်ကြပ်နေပြီ ဖြစ်သည်။   ကိုသိုက်ထွန်းဦးက “ပို့လိုက်တဲ့ ထောင်ကလည်း မန္တလေး အိုးဘိုအကျဉ်းထောင် ဖြစ်တယ်။ မန္တလေး အိုးဘို အကျဉ်းထောင်ဟာ ငလျင်ဒဏ်ကြောင့်မို့လို့ ထိခိုက်ပျက်စီးမှု များစွာ ကြုံထားရတဲ့ ထောင်တစ်ခု ဖြစ်ပါတယ်။ ဒီလို အခြေအနေမျိုးမှာ နဂိုမူလ ရှိပြီးသားလူတွေရော၊ ထပ်ရောက်လာတဲ့ လူတွေကိုပါ စုပြုံပြီး ထားမယ် ဆိုရင် အားလုံးရဲ့ အသက်အန္တရာယ် စိုးရိမ်မှုတွေရှိနိုင်တယ်” ဟု ပြောသည်။   နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ ဇွန်လ ၁၃ ရက်နေ့ ထုတ်ပြန်ချက်အရ စစ်တပ်က အာဏာသိမ်းပြီးနောက် ဖမ်းဆီးခံခဲ့ရသူ စုစုပေါင်း ၂၉,၂၇၂ ဦးရှိပြီး၊ ၎င်းတို့အနက် ၂၂,၁၂၀ ဦးမှာ ဆက်လက် ထိန်းသိမ်းခံထားရဆဲ ဖြစ်သည်။   PPNM အနေဖြင့် ရွှေ့ပြောင်းခံရသည့် အကျဉ်းသားများ၏ အခြေအနေနှင့် ၎င်းတို့အပေါ် ညှဉ်းပန်းနှိပ်စက်မှုများ ရှိ၊ မရှိကို ဆက်လက် စောင့်ကြည့်သွားမည်ဟု ဆိုသည်။

သပိတ်ခေါင်းဆောင် ဝေမိုးနိုင်ကို ထောင်ပြောင်း

သပိတ်ခေါင်းဆောင် ဝေမိုးနိုင်ကို ထောင်ပြောင်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၄ ရက်။  မုံရွာအကျဉ်းထောင်တွင် ထိန်းသိမ်းခံထားရသည့် မု…

  • June 14, 2025
ရေကြီးရေလျှံမှုများကြောင့် ညောင်ရွှေဒေသခံများ ရွှေ့ပြောင်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၄ ရက်။   ရှမ်းပြည်တောင်ပိုင်း၊ ညောင်ရွှေမြို့နယ်၊ ညောင်ရွှေမြို့ပေါ်နှင့် အင်းလေးဒေသတွင် ရေကြီးရေလျှံမှုများကြောင့် ဒေသခံများ စတင်ပြောင်းရွှေ့နေကြပြီဟု ဒေသတွင်း လူမှုကယ်ဆယ်ရေး အသင်းဝင်များက ပြောသည်။   ပြီးခဲ့သည့် ရက်သတ္တတစ်ပတ် ကတည်းက တောင်ကြီးနှင့် ဟဲဟိုးမြို့တွင် မိုးရက်ဆက် ရွာသွန်းမှုကြောင့် ဇွန်လ ၁၀ ရက်နေ့မှ စတင်၍ လက်ရှိချိန်အထိ ရေ ၃ ပေခန့် မြင့်တက်လာပြီး အချို့လူနေအိမ်များတွင် ရေစတင် ဝင်ရောက်လာခြင်း ဖြစ်သည်။   ကံသာရပ်ကွက်တွင် နေထိုင်သူ တစ်ဦးက “မီးတော့ လာလိုက်ပြတ်လိုက် ရေတော့တက်နေတုန်း။ ဘယ်ချိန်ပြီး မလဲ မသိဘူး။ ပိုက်ဆံရှိတဲ့လူ တော်တော်များများကတော့ ကြိုပြောင်းကြပြီ။ ကျနော်တို့လည်း စောင့်ကြည့်နေ ပါတယ်။ ဒီညစောင့်ကြည့်လို့မှ ထပ်တက်လာတယ် ဆိုရင်တော့ ပြောင်းရမှာပေါ့နော်” ဟု ပြောသည်။   ဇွန်လ ၁၄ ရက်နေ့၊ နေ့လည်ပိုင်း အခြေအနေအရ သာစည်ရပ်၊ မိုင်းလီရပ်တို့ အပါအဝင် ဆိပ်ကမ်းဘေးရှိ ရပ်ကွက်များမှာ လျှပ်စစ်မီးများ ပြတ်တောက်နေပြီး သောက်သုံးရေနှင့် စားနပ်ရိက္ခာများ ခက်ခဲလာနိုင်သဖြင့် နီးစပ်ရာမြို့များနှင့် ဘုန်းကြီးကျောင်း နေရာများသို့ စတင်ပြောင်းရွှေ့နေကြပြီ ဖြစ်သည်။   လက်ရှိတွင် ညောင်ရွှေ - တောင်ကြီး ကားဂိတ်နေရာအထိ စက်လှေများ ဝင်ရောက်နိုင်ပြီး ကမ္ဘောဇဘဏ်အနီးသို့ ရေရောက်ရှိရင် အနည်းငယ်သာ လိုတော့သည်ဖြစ်ရာ ဒေသခံများမှ စိုးရိမ်ပူပန်နေကြသည်။   ဒေသတွင်း လူမှုကယ်ဆယ်ရေး အသင်းဝင် တစ်ဦးက “ညောင်ရွှေမှာက စစ်ဘေးရှောင်စခန်းတွေ များတယ်။ ကယားဘက်က လာတောတွေ၊ ပင်လောင်းဘက်က လာတာတွေ အများကြီးပဲ။ အခုရေကြီးပြီဆိုတော့ သူတို့ လည်း ဘယ်သွားလို့ သွားရမှန်းမသိ ဖြစ်နေတယ်။ ပြီးတော့ ဈေးသည်တွေပေါ့။ ရက်ရှည်ပိတ်ရရင် သူတို့ လည်း မလွယ်ဘူး။ မနှစ်ကဆို ရေတက်တာ တအားမြန်တော့ ပြေးမရတာတွေ ရှိတယ်။ ညဘက်အိပ်ချိန် ရုတ် တရက် တက်လာရင် မလွယ်လို့ ကြိုပြောင်းကြပါလို့ သတိပေးချင်တယ်” ဟု ပြောသည်။   ညောင်ရွှေမြို့နယ် အတွင်းရှိ လယ်ဧက ထောင်ချီမှာလည်း ရေမြုပ်ပျက်စီးနေပြီး ငရုတ်၊ မြေပဲ၊ ဖရုံ စသည့် စိုက်ခင်းများမှာလည်း ရေလွှမ်းခံနေရသဖြင့် တောင်သူများအတွက် နစ်နာဆုံးရှုံးမှု များစွာရှိသည်ဟု ဆိုသည်။   တောင်ကြီးမြို့မှ စီးဆင်းလာသည့် ရေများကြောင့် လာမည့် ၃ ရက်အတွင်း ညောင်ရွှေမြို့နယ်တွင် ရေ ၃ ပေမှ ၇ ပေအထိ မြင့်တက်လာနိုင်သည်ဟုလည်း မိုးလေဝသမှ ခန့်မှန်းထားသဖြင့် ကုန်းမြင့်ပိုင်းနေရာများသို့ ရွှေ့ပြောင်း ကြရန် မြို့တွင်း၌ လူမှုကယ်ဆယ်ရေး အသင်းဝင်များက လိုက်လံ သတိပေးနေကြသည်။   အလားတူ ညောင်ရွှေမြို့နှင့် ၇ မိုင်ခန့်သာဝေးသည့် တောင်ကြီးမြို့နယ်၊ ရွှေညောင်မြို့တွင်လည်း တာယော ချောင်းမှ ရေအဆက်မပြတ် တက်နေပြီး လူနေအိမ်အချို့ စတင်နစ်မြုပ်လာသဖြင့် ပြောင်းရွှေ့နေကြရပြီဟု မြေပြင်သတင်းရင်မြစ်များ ပေးပို့ချက်အရ သိရသည်။

ရေကြီးရေလျှံမှုများကြောင့် ညောင်ရွှေဒေသခံများ ရွှေ့ပြောင်း

ရေကြီးရေလျှံမှုများကြောင့် ညောင်ရွှေဒေသခံများ ရွှေ့ပြောင်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၄ ရက်။  ရှမ်းပြည်တောင်ပိုင်း၊ ညောင်ရွှေ…

  • June 14, 2025
စစ်ကောင်စီ၏ နျူကလီးယား ကြိုးပမ်းမှုမှာ စစ်ရေးအတွက်သာ ဖြစ်သည်ဟု NUG ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၄ ရက်။   နျူကလီးယား ရရှိအောင်  စစ်ကောင်စီ၏ ကြိုးပမ်းမှုသည် စစ်ရေးအတွက်သာ ဖြစ်သည်ဟု အမျိုးသား ညီညွတ်ရေး အစိုးရ NUG က စွပ်စွဲ ပြောဆိုလိုက်သည်။   အမျိုးသား ညီညွတ်ရေး အစိုးရ (NUG) ပြည်ထောင်စု ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ် က ဇွန်လ ၁၀ ရက်နေ့တွင် ပြုလုပ်သော နိုင်ငံတကာနှင့် ပြည်သူလူထုများအား သတင်းစကားပြော ကြားခြင်း အစီအစဉ်တွင် ထည့်သွင်းပြောကြားခဲ့ခြင်း ဖြစ်သည်။   ဦးနေဘုန်းလတ်က “အကြမ်းဖက် စစ်ခေါင်းဆောင် မင်းအောင်လှိုင်ဟာ ငြိမ်းချမ်းတဲ့ ရည်ရွယ်ချက်တွေနဲ့ အသုံးပြုမယ်လို့ အကြောင်းပြပြီးတော့ စစ်ရေးအတွက် နျူကလီးယား နည်းပညာရယူဖို့ကို ကြိုးပမ်းမှုတွေ အရှိန်မြှင့် လုပ်ဆောင်လာနေတာ တွေ့ရပါတယ်” ဟု ပြောသည်။   ထို့အပြင် စစ်ကောင်စီ၏ နျူကလီးယား နည်းပညာရရှိရေး ကြိုးပမ်းမှုများသည် ပြည်တွင်း ဒီမိုကရေစီရေး လှုပ် ရှားမှု အတွက် သာမက အာဆီယံဒေသတွင်းနှင့် နိုင်ငံတကာ တည်ငြိမ်ရေးအတွက်ပါ ကြီးမားသော စိုးရိမ်ဖွယ်ရာ ခြိမ်းခြောက်မှု တစ်ရပ်အဖြစ် ရှိနေသည်ဟု NUG က ပြောသည်။   လက်ရှိတွင် စစ်ကောင်စီသည် တိုင်းပြည်ဘဏ္ဍာကို အသုံးပြု၍ ဝယ်ယူထားသော စစ်လက်နက်များဖြင့် ပြည်သူ လူထုကို ပစ်မှတ်ထားပြီး စာသင်ကျောင်းများ၊ ဆေးရုံများနှင့် လူနေရပ်ကွက်များကို ဗုံးကြဲ တိုက်ခိုက်ခြင်း၊ လက်နက်ကြီးများဖြင့် ပစ်ခတ်ခြင်းတို့ကို နေ့စဉ်နှင့်အမျှ ကျူးလွန်နေသည်ဟု ဆိုသည်။   ဤသို့သော အခြေအနေတွင် နျူကလီးယား နည်းပညာကဲ့သို့သော အဖျက် စွမ်းအားကြီးမားသည့် လက်နက် တစ်ခုကို ပိုင်ဆိုင်သွားမည် ဆိုပါက ဒေသတွင်းတည်ငြိမ်ရေးနှင့် လုံခြုံရေးကို ဆိုးရွားစွာ ထိခိုက်စေနိုင်မည်ဟု ဦးနေဘုန်းလတ်က ဆက်ပြောသည်။   ၎င်းက “ပြည်သူလူထုကို နေ့စဉ်ရက်စက် တိုက်ခိုက်သတ်ဖြတ်နေတဲ့ အကြမ်းဖက်စစ်ခေါင်းဆောင် မင်းအောင် လှိုင်ရဲ့ လက်ထဲကို နျူကလီးယားစွမ်းအင်သုံး လက်နက်တစ်စုံတစ်ရာသာ ရောက်ရှိသွားမယ်ဆိုရင် ဒါဟာ ဒေသ တွင်း နိုင်ငံတွေ အတွက်ပါ မတွေးဝံ့စရာ အခြေအနေတစ်ခု ဖြစ်သွားမှာ ဖြစ်ပါတယ်” ဟု ပြောသည်။   စစ်ကောင်စီ၏ နျူကလီးယား ရည်မှန်းချက်သည် စစ်အာဏာရှင်ဟောင်း ဦးသန်းရွှေ လက်ထက် ၂၀၀၇ ခုနှစ် ကတည်းက ရုရှားနိုင်ငံနှင့် ပူးပေါင်းဆောင်ရွက်မှုကို စတင်လုပ်ဆောင်ခဲ့သည်။   ထိုအချိန်ကတည်းက ‘ငြိမ်းချမ်းသောရည်ရွယ်ချက်’ ဟူသော ခေါင်းစဉ်အောက်တွင် နျူကလီးယား နည်းပညာကို ရယူရန် ကြိုးပမ်းခဲ့ပြီး ဦးသိန်းစိန် အစိုးရလက်ထက် ၂၀၁၅ ခုနှစ်တွင် ရုရှားနိုင်ငံပိုင် နျူကလီးယားကော်ပိုရေးရှင်း Rosatom နှင့် နားလည်မှု စာချွန်လွှာရေးထိုးခဲ့သည်။ ထိုအစီစဉ်များသည် NLD အစိုးရ လက်ထက်တွင် ရပ်တန့် ခဲ့သည်။   သို့သော် ၂၀၂၁ ခုနှစ် ဖေဖော်ဝါရီလ စစ်အာဏာသိမ်းမှု နောက်ပိုင်းတွင် စစ်ကောင်စီ ခေါင်းဆောင် ဗိုလ်ချုပ်မှူး ကြီး မင်းအောင်လှိုင်သည် ထိုနျူကလီးယား အိပ်မက်ကို ပြန်လည် အသက်သွင်းလာခဲ့သည်။   အာဏာ သိမ်းပြီးချိန်မှ စတင်၍ ရုရှားနိုင်ငံနှင့် ဆက်ဆံရေးကို အရှိန်အဟုန်မြှင့် လုပ်ဆောင်ခဲ့ပြီး ၂၀၂၂ ခုနှစ် ဇူလိုင်လမှ ၂၀၂၃ ခုနှစ် အောက်တိုဘာလအထိ ၁၅ လတာ ကာလအတွင်း နားလည်မှု စာချွန်လွှာများ ရေးထိုးခဲ့ သည်။   ထို့အပြင် ရန်ကုန်မြို့တွင် နျူကလီးယား သတင်းအချက်အလက် စင်တာဖွင့်လှစ်ခြင်း၊ ပူးပေါင်းဆောင်ရွက်မှု ၁၄ ခု အတွက် သဘောတူညီမှုများ ပြုလုပ်ခြင်းနှင့် နောက်ဆုံးတွင် ဓာတ်ပေါင်းဖို တည်ဆောက်ရေး အတွက် လက် တွေ့ ပြင်ဆင်လာခြင်းများ အထိ အချိန်တိုအတွင်း တစ်ဆင့်ပြီးတစ်ဆင့် တိုးမြှင့်လုပ်လာခဲ့သည် ဟု ဦးနေဘုန်းလတ် က ပြောသည်။   ထိုသို့ လုပ်ဆောင်နေခြင်းသည် နိုင်ငံတကာ အသိုင်းအဝိုင်း၏ နျူကလီးယား လက်နက် မပြန့်ပွားရေး ကြိုးပမ်း မှုများကို စစ်ကောင်စီက ပြောင်ပြောင်တင်းတင်း စိန်ခေါ်နေခြင်းဖြစ်သည် ဟု NUG က ဆိုသည်။   ထို့ကြောင့် စစ်ကောင်စီ၏ နျူကလီးယား ရရှိရေး ကြိုးပမ်းမှုများသည် ကမ္ဘာ့အသိုင်းအဝိုင်း တစ်ခုလုံးအတွက်ပါ ကြီးမားသော ခြိမ်းခြောက်မှု ဖြစ်လာနိုင်သောကြောင့် နိုင်ငံတကာ အစိုးရများနှင့် အဖွဲ့အစည်းများ အနေဖြင့် စစ်ကောင်စီ အပေါ် ထိရောက်သော ဖိအားပေးမှုများနှင့် ဒဏ်ခတ်အရေး ယူမှုများ အချိန်မီ ချမှတ်ဆောင်ရွက်ရန် အရေးတကြီး လိုအပ်နေပြီဟု ဦးနေဘုန်းလတ် က သတိပေး ပြောကြားထားသည်။

စစ်ကောင်စီ၏ နျူကလီးယား ကြိုးပမ်းမှုမှာ စစ်ရေးအတွက်သာ ဖြစ်သည်ဟု NUG ပြော

စစ်ကောင်စီ၏ နျူကလီးယား ကြိုးပမ်းမှုမှာ စစ်ရေးအတွက်သာ ဖြစ်သည်ဟု NUG ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၄ ရက်။  နျူကလီးယား ရရှိအော…

  • June 14, 2025
ငလျင်ဒဏ်ကြောင့် အိုးဘိုထောင် အတွင်း သေဆုံးမှုများကို စစ်ကောင်စီ သတင်းအမှောင်ချထားခဲ့   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၄ ရက်။   မန္တလေးမြို့ရှိ အိုးဘိုအကျဉ်းထောင်တွင် မတ်လကုန်ပိုင်းက လှုပ်ခတ်ခဲ့သည့် အင်အားပြင်းငလျင်ကြောင့် အကျဉ််းသား/သူ အယောက် ၇၀ ဦး အထက် သေဆုံးခဲ့သော်လည်း စစ်ကောင်စီက သတင်းအမှောင် ချထားခဲ့သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM)က မကြာသေးမီက ထုတ်ပြန်သည်။   ထိုအင်အားပြင်းငလျင်ကြောင့် အကျဉ််းသား/သူ သေဆုံးမှုထဲတွင် နိုင်ငံရေး အကျဉ်းသူ ၁၈ ဦး နှင့် နိုင်ငံရေး အကျဉ်းသား ၃၁ ဦး စုစုပေါင်း ၄၉ ဦးလည်း သေဆုံးခဲ့ကြောင်း PPNM က အတည်ပြုထားသည်။   PPNM ဦးဆောင်ကော်မတီဝင် မရောင်နီလင်း “ကျနော်တို့မှာ ဖြန့်ထားတဲ့ ကွန်ရက်တွေရှိပါတယ်။ အဲ့ဒီကနေမှ သေဆုံး ခဲ့တဲ့သူတွေ အချိတ်အဆက်တွေ ရှိတယ်ပေါ့နော်။ အဲ့ဒီလူတွေကို ကျနော်တို့ အတည်ပြုပြီတော့မှ အကျဉ်းသား အကျဉ်းသူ ၄၉ ဦးရှိတယ်လို့ ထုတ်ပြန်ခဲ့တာ ဖြစ်ပါတယ်။ တိတိကျကျနဲ့ ကျနော်တို့ နာမည် စာရင်းတွေလည်း ရထားပါတယ်” ဟု ပြောသည်။   PPNM ၏ မှတ်တမ်းကောက်ယူမှုများ အရ သေးဆုံးခဲ့သည့် နိုင်ငံရေးအကျဉ််းသား/သူ ၄၉ ဦးမှာ အသက် အရွယ်အားဖြင့် အသက် ၅၄ နှစ် နှင့် ၂၂ နှစ်ကြား ရှိသူများ ဖြစ်သည်။   အဆိုပါ အကျဉ်းသား သေဆုံးမှုများနှင့် ပတ်သက်ပြီး စစ်ကောင်စီမှ သတင်းထုတ်ပြန်မှုများ မရှိဘဲ သတင်း အမှောင်ချ ဖုံးကွယ်ထားသည်ဟု PPNM က ပြောသည်။   နိုင်ငံရေး အကျဉ််းသူ/သား ၄၉ ဦး သေဆုံးမှုကို စစ်ကောင်စီမှ သတင်းအမှောင်ချ ဖုံးကွယ်ထားသည်နှင့် ပတ်သက်၍ မရောင်နီလင်းက ယခုကဲ့သို့ ဆက်ပြောသည်။   “သတင်း အမှောင် ဘာလို့ ဖုံးကွယ်ထားလဲဆိုရင် ဒါက အဆောက်အအုံတွေထဲမှာ ပိတ်ထားတာတွေကြောင့် ပြီးလို့ရှိရင် ဒီအဆောက်အအုံတွေကလည်း မခိုင်ဘူးလေ။ မခိုင်တဲ့ ကြားကနေမှ အပေါက်တွေ ပိတ်ပြီးတော့ ဝန်ထမ်းတွေက ပြေးကြတာပေါ့နော်။ အဲ့လိုမျိုးတွေနဲ့ တာဝန်ယူမှု တာဝန်ခံမှု မရှိတဲ့အတွက် သေဆုံးသွား ခဲ့ရတာတွေကို လူသိမှာ စိုးတယ်ပေါ့နော်။ အပြစ်ပြောကြမှာ စိုးတဲ့အတွက် သတင်း အမှောင်ချထားတာပဲ ဖြစ်ပါတယ်။”   အိုးဘိုအကျဉ်းထောင်ရှိ နိုင်ငံရေး အကျဉ်းသားများ သေဆုံးမှုကို သတင်း အမှောင်ချထားမူကြောင့် သေဆုံး သူများ၏ မိသားစုဝင်နှင့် အဆက်အသွယ်မရှိဘဲ ရက်လည်ဆွမ်းကျွေးပင် မပြုလုပ်ရသေးဘူးဟု PPNM က ပြောသည်။   မရောင်နီလင်းက “တစ်ချို့ဆိုလို့ရှိရင် အခုချိန်ထိ မိသားစုဝင်တွေက ဒီငလျင်လှုပ်လို့မို့လို့ နိုင်ငံရေး အကျဉ်း သားတွေ သေတယ်ဆိုတာကို မသိကြသေးတဲ့ မိသားစုတွေလည်း ရှိပါတယ်” ဟု ပြောသည်။   လက်ရှိ အချိန်ထိ အိုးဘိုအကျဉ်းထောင်တွင် နိုင်ငံရေး အကျဉ်းသားများ အပါအဝင် အကျဉ်းသားများ အတွက် အကူအညီများ၊ ထောက်ပံ့မှုများ များစွာ လိုအပ်သဖြင့် လူ့အခွင့်အရေးနှင့် တရားမျှတမှုကို ဖော်ဆောင် နေကြ သည့် အဖွဲ့အစည်းများ အနေဖြင့် ထောက်ပံ့မှုများရရှိရေး ဆောင်ရွက်ပေးစေလိုသည်ဟု PPNM က တောင်းဆို ထားသည်။  

ငလျင်ဒဏ်ကြောင့် အိုးဘိုထောင် အတွင်း သေဆုံးမှုများကို စစ်ကောင်စီ သတင်းအမှောင်ချထားခဲ့

ငလျင်ဒဏ်ကြောင့် အိုးဘိုထောင် အတွင်း သေဆုံးမှုများကို စစ်ကောင်စီ သတင်းအမှောင်ချထားခဲ့ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၄ ရက်။  မန္တလ…

  • June 14, 2025
ရှမ်းတောင် စစ်ရှောင်များ ထွက်ပြေး တိမ်းရှောင်ရပြန်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၄ ရက်။   စစ်ကောင်စီတပ်နှင့် ပအိုးဝ်ပြည်သူ့စစ်များ အင်အားအလုံးအရင်းဖြင့် စစ်ကြောင်းထိုးလာသောကြောင့် ရှမ်းတောင်က စစ်ရှောင်ပြည်သူများ ဖယ်ခုံမြို့နယ်ထဲရှိ စစ်ဘေးလွတ်သည့် နေရာများနှင့် ကရင်နီပြည်ထဲကို ထွက်ပြေးတိမ်းရှောင်နေကြရသည်။   ရှမ်းတောင်၊ ဖယ်ခုံမြို့နယ်ထဲက ဖယ်ခုံအင်း အရှေ့ခြမ်းရှိ ဆောင်နန်းခဲ၊ လွယ်ပေါ၊ နမ့်ပေါ်လုံ၊ လဟယ်၊ ပိန္နဲကုန်း အပါအဝင် အခြားသော ကျေးရွာများက စစ်ရှောင်ပြည်သူ ၆,၀၀၀ ခန့် နေရပ်မှ စွန့်ခွာထွက်ပြေး လာကြခြင်း ဖြစ်သည်။   ကရင်နီပြည် ကြားကာလ အုပ်ချုပ်ရေးကောင်စီ IEC အတွင်းရေးမှူး-၂ ဦးဗညားက “လောလောဆယ် ကျနော်တို့ အုပ်ချုပ်ရေး နယ်မြေထဲက ဒီမောဆိုမြို့နယ်နဲ့ ဖယ်ခုံမြို့နယ်ထဲ ရွှေ့ပြောင်းနေကြတယ်။ စစ်ရှောင် ၆၀၀၀ ဝန်း ကျင် ရောက်လာတယ်” ဟု ပြောသည်။   ရှမ်း-ကရင်အစပ်က ဖယ်ခုံမြို့နယ်ထဲသို့ စစ်ကောင်စီတပ်နှင့် ပအိုဝ်းပြည်သူ့စစ်အဖွဲ့ (PNO) ပူးပေါင်းအဖွဲ့က အင်အား အလုံးအရင်းနှင့် စစ်ကြောင်းထိုး ဝင်လာသောကြောင့် ယခုကဲ့သို့ ဘေးလွှတ်ရာကို တိမ်းရှောင်လာကြ ခြင်း ဖြစ်သည်။   အဆိုပါ ရှမ်းတောင်က စစ်ရှောင် ၆,၀၀၀ ကျော်အတွက် အရေးပေါ် အကူအညီများ လိုအပ်နေသည်ဟု ဦးဗညား က ဆက်ပြောသည်။   “လောလောဆယ်တော့ အမိုးအကာ၊ သောက်သုံးရေ၊ နေရာထိုင်ခင်း၊ ပြီးတော့ ရွှေ့ပြောင်းဖို့အတွက် ဓာတ်ဆီနဲ့ စားနပ်ရိက္ခာတွေ အရေးပေါ်လိုအပ်နေပါတယ်။”   ဇွန်လဆန်းပိုင်းမှ စတင်၍ ရှမ်း-ကရင်နီ အစပ်တွင် စစ်ကောင်စီတပ်နှင့် ကရင်နီတော်လှန်ရေး ပူးပေါင်းအဖွဲ့တို့ ကြား စစ်ရေးတင်းမာမှုများ ပြန်လည် မြင့်တက်လာနေပြီး ပင်လောင်းမြို့နယ်၊ ဆောင်းပြောင်းကျေးရွာကို စစ်တပ် နှင့် PNO ပူးပေါင်းတပ်က ထိန်းချုပ်ထားလိုက်သည်။   ဇွန်လ ၇ ရက်နေ့က စတင်၍ ဖယ်ခုံမြို့နယ်ဘက်ကို အင်အား ၁,၀၀၀ ခန့်ဖြင့် ဆက်လက် စစ်ကြောင်းထိုးနေပြီး ကျေးရွာများထဲသို့ လက်နက်ကြီးများဖြင့် ပစ်ခတ်မှုများပါ ဆက်တိုက်လုပ်နေသည်ဟု မြေပြင် သတင်း အရင်း အမြစ်များက ပြောသည်။   အလားတူ ရှမ်းပြည်တောင်ပိုင်း၊ ညောင်ရွှေမြို့နယ်၊ ရေပူကျေးရွာအနီးတွင်လည်း တိုက်ပွဲများ ပြင်းထန်လျက် ရှိသည်။ တော်လှန်ရေး တပ်ဖွဲ့များကလည်း တိုက်ပွဲဖြစ်ပွားရာ အနီးဝန်းကျင်ရှိ ပြည်သူများ အနေဖြင့် မိမိတို့၏ လုံခြုံရေး အတွက် စစ်ရေးသတိပေးချက်များကို အထူးဂရုပြု လိုက်နာဆောင်ရွက်ကြရန် မေတ္တာရပ်ခံကြောင်း ထုတ်ပြန် ထားသည်။   စစ်ကောင်စီတပ်၏ လက်နက်ကြီး ပစ်ခတ်မှုများနှင့် လေကြောင်းမှ တိုက်ခိုက်မှုများကြောင့် ဇွန်လအတွင်း ဖယ်ခုံမြို့နယ်ထဲတွင် အရပ်သားပြည်သူ ၃ ဦး၊ သေဆုံးပြီး ၆ ဦး ဒဏ်ရာရရှိခဲ့ကြောင်း ဖယ်ခုံ ပြည်သူ့ကာကွယ် ရေးတပ် (PDF) တပ်ရင်း ၁၀၀၆ က ဇွန်လ ၁၁ ရက်နေ့တွင် ထုတ်ပြန်ခဲ့သည်။   ထိခိုက်သေဆုံးသူ အများစုမှာ ကလေးသူငယ်များနှင့် အမျိုးသမီးများဖြစ်ကြောင်း အဆိုပါထုတ်ပြန်ချက်တွင် ဖော်ပြထားသည်။   ရှမ်း-ကရင်နီ အစပ်ရှိ ဖယ်ခုံဒေသမှာ စစ်ရေး၊ စီးပွားရေးအရ အချက်အချာကျသည့် နေရာဖြစ်သောကြောင့် နှစ်ဖက်တပ်များက ထိန်းချုပ်နိုင်ရေး အပြိုင်အဆိုင် ကြိုးပမ်းနေကြခြင်း ဖြစ်သည်။

ရှမ်းတောင် စစ်ရှောင်များ ထွက်ပြေး တိမ်းရှောင်ရပြန်

ရှမ်းတောင် စစ်ရှောင်များ ထွက်ပြေး တိမ်းရှောင်ရပြန် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၄ ရက်။  စစ်ကောင်စီတပ်နှင့် ပအိုးဝ်ပြည်သူ့စစ်မျာ…

  • June 14, 2025
အိုးဘိုထောင်တွင် နိုင်ကျဉ်း တစ်ဦး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန် လ ၁၄ ရက်။   မန္တလေးတိုင်း၊ အိုးဘိုအကျဉ်းထောင်တွင် နိုင်ငံရေးအကျဉ်းသား တစ်ဦးမှာ ဆေးကုသစရိတ် မလုံလောက်သဖြင့် သေဆုံးသွားသည်။   မန္တလေးတိုင်း၊ ချမ်းမြသာစည်မြို့နယ်၊ ချမ်းမြသာစည်မြို့နယ်၊ ချမ်းမြသာစည် ရဲစခန်းတွင် ပုဒ်မ ၅၀၅-ကနှင့် ၅၀-ည တို့ဖြင့် တရားစွဲဆိုခံရပြီး ထောင်ဒဏ် ၁၈ နှစ် ကျခံနေသူ အသက် ၅၄ နှစ်အရွယ် ဦးမော်ထူး သေဆုံးခဲ့သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက် (PPNM) က ထုတ်ပြန်သည်။   ဆေးကုသစရိတ် မလုံလောက်သဖြင့် သေဆုံးခဲ့ရသည်ဟု ထောင်နှင့် နီးစပ်သူများက ပြောသည်။   PPNM ဦးဆောင်ကော်မတီဝင် ကိုသိုက်ထွန်းဦးက “အဓိက ဦးမော်ထူး ဆုံးတာက ဒီငလျင်ကြောင့်မို့လို့ ထိခိုက် ဒဏ်ရာရတဲ့အခါမှာ ဆိုးဆိုးဝါးဝါး ထိခိုက်ဒဏ်ရာရတဲ့အတွက် ပြင်ပဆေးရုံမှာ ကုသမှုခံယူနေရသူ ဖြစ်ပါတယ်။ ကုသမှုကလည်း အော်ပရေးရှင်း ၂ ကြိမ်လောက်တော့ လုပ်ပြီးပါပြီ။ လည်ပင်းတွေ၊ ခေါင်းတွေ အဓိက ထိခိုက် ခဲ့တဲ့ နေရာက အန္တရာယ်များတော့ ဆေးဝါးကုသစရိတ်၊ ခွဲစိတ်စရိတ်ကအစ ကုန်ကျမှုက ထောင်တွေဖက်က တာဝန်ယူတာ မဟုတ်ဘဲနဲ့ အကျဉ်းသားတွေဖက်ကပဲ ကိုယ့်စရိတ်နဲ့ကိုယ်ကုသရတာ ဖြစ်တယ်။ အဲ့လို အခြေ အနေမျိုးမှာ အခြေခံမိသားစုကနေ အဖမ်းခံရတဲ့သူ ဖြစ်တဲ့အတွက် ဒီကုသစရိတ် ကုန်ကျမှု မခံနိုင်တဲ့အဆုံးမှာ ခုလိုမျိုး ကျဆုံးခဲ့ရတယ်လို့ပဲ ကျနော်တို့ စိတ်မကောင်းစွာနဲ့ အသိပေးချင်ပါတယ်” ဟု ပြောသည်။   ထောင်တွင်း၌ ဆေးကုသစရိတ် သိန်း ၈၀ ခန့် လိုအပ်သော်လည်း လိုအပ်သည့် ပမာဏ မပြည့်မီသဖြင့် ခွဲစိတ်ကုသမှု နောက်တကြိမ် ထပ်မလုပ်နိုင်ပဲ ဇွန်လ ၁၃ ရက်နေ့၊ နံနက် ၇ နာရီခန့်တွင် သေဆုံးခဲ့ရခြင်း ဖြစ်သည်။   ငလျင်ဘေးကြောင့် ၎င်းရရှိခဲ့သည့် ဒဏ်ရာများမှာ ပြင်းထန်သည်ဖြစ်ရာ ခွဲစိတ်ကုသမှု ၂ ကြိမ်ခံယူပြီး နောက်ပိုင်း တွင် ကျန်းမာရေး ပြန်လည် ကောင်းမွန်လာခြင်း မရှိဘဲ Coma (ကိုမာ) ဝင်သွားခဲ့သည်ဟုလည်း နီးစပ်သူများ က ပြောသည်။   “ကျနော်တို့ ၁၃ သိန်း ၆ သောင်းအထိပဲ ကူညီမှုရခဲ့ပြီး ဒီတခုတည်းပဲ ကျနော်တို့ ကူညီနိုင်ခဲ့ပါတယ်။ ဒါဟာ သူရဲ့ Operation တချို့အတွက် အထောက်အကူ ဖြစ်ခဲ့ပေမယ့် တကယ်လုပ်ရမယ့် Operation တစ်ခုအတွက် ကျနော်တို့ ပြည့်မီတဲ့ အခြေအနေ မရခဲ့ပါဘူး။ မကူညီနိုင်ခဲ့ပါဘူး” ဟု ကိုသိုက်ထွန်းဦးက ဆက်ပြောသည်။   အလားတူ ပဲခူးတိုင်း၊ သာယာဝတီ အကျဉ်းထောင်တွင် ဇွန်လ ၁၀ ရက်နေ့၌ နိုင်ကျဉ်း ဖြစ်သူ ဦးကျော်စိုးဦးမှာ လည်း လုံလောက်သည့် ကျန်းမာရေးစောင့်ရှောက်မှု မရရှိသဖြင့် သေဆုံးခဲ့ရသည်ဟု ဆိုသည်။   အိုးဘိုထောင်နှင့် သာယာဝတီ အကျဉ်းထောင်တွင် နိုင်ကျဉ်းများအား နေ့စဉ်နှင့်အမျှ ထောင်အာဏာပိုင်များက တင်းတင်းကြပ်ကြပ် အုပ်ချုပ်ခြင်း၊ ဖိနှိပ်ခြင်းများ ခံနေရလေ့ ရှိသည်။   သို့ဖြစ်၍ လာမည့် ဒေါ်အောင်ဆန်းစုကြည် မွေးနေ့ပွဲ၌ ကမ်ပိန်းတွင် ပါဝင်ကြမည့် နိုင်ကျဉ်းများကိုလည်း ဖိနှိပ်မှု များ ရှိလာနိုင်သဖြင့် လေ့လာစောင့်ကြည့်နေသည်ဟု PPNM တာဝန်ရှိသူများက ပြောဆိုထားသည်။

အိုးဘိုထောင်တွင် နိုင်ကျဉ်း တစ်ဦး သေဆုံး 

အိုးဘိုထောင်တွင် နိုင်ကျဉ်း တစ်ဦး သေဆုံး  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန် လ ၁၄ ရက်။  မန္တလေးတိုင်း၊ အိုးဘိုအကျဉ်းထောင်တွင် နိုင်ငံရေ…

  • June 14, 2025
ပခုက္ကူမြို့နယ်ရှိ ပျူစောထီးရွာအား အညာမြေ တပ်ပေါင်းစု ဝင်ရောက်တိုက်ခိုက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၃ ရက်။   ပခုက္ကူမြို့နယ်ထဲက ပျူစောထီးကျေးရွာအား အညာမြေတပ်ပေါင်းစုမှ ဝင်ရောက်တိုက်ခိုက်ရာ စစ်ကောင်စီ တပ်ဖွဲ့ဝင် ၅ ဦး သေဆုံးခဲ့သည်။   မကွေးတိုင်း၊ ပခုက္ကူမြို့နယ်၊ ပျူစောထီး အခြေစိုက် အနောက်မန်ကျည်းကန်ကျေးရွာအား အလစ်အငိုက် ဝင်ရောက် တိုက်ခိုက်မှုတွင် စစ်ကောင်စီတပ်ဖွဲ့ဝင် ၅ ဦး သေဆုံးပြီး ၂ ဦးမှာ ပြင်းထန်ဒဏ်ရာ ရရှိခဲ့သည်ဟု မြေပြင်အရင်းအမြစ်များက ပြောသည်။   အညာမြေတပ်ပေါင်းစု သတင်းတာဝန်ခံ ကိုဘိုဘိုသန့်ဇင်က “မန်ကျည်းကန်တို့၊ သဲကြီးတော့ စတဲ့ ပျူစောထီး ရွာတွေကတော့ ကျနော်တို့ဖက်ကို ပြန်ပြီးတော့ မထိုးလာဘူးဗျ။ အဲ့လို မထိုးလာဘူးဆိုတာက ကျနော်တို့ ဝင်ပြီးတော့ တိုက်ခိုက်ကတည်းက သူတို့ရဲ့ တချို့တဝက် ပြည်စောထီးနဲ့ စစ်ခွေးတွေက အခုပေါက်မြို့နယ်ကို ဦးတည်နေတဲ့ အင်အား ၄၀၀ ကျော်စစ်ကြောင်းထဲ ပါသွားတဲ့အတွက် ကျနော်တို့က အင်အားနည်းတဲ့အချိန်မှာ ဝင်ပြီးတော့ လုံးလိုက်တာမလို့ သူတို့ဖက်က ပြန်ပြီးတော့ တန်ပြန်တော့ မထိုးနိုင်ဘူးခင်ဗျ။ အခု အခြေအနေ ကတော့ ဒီတိုင်းပြီးတဲ့ အနေထား ဖြစ်သွားတာပေါ့” ဟု ပြောသည်။   စစ်ကောင်စီနှင့် ပျူစောထီး ပူးပေါင်းတပ်ဖွဲ့များ အင်အားနည်းနေသည့် အချိန်တွင် ပခုက္ကူမြို့နှင့် မြစ်ခြေမြို့ ကြားရှိ အနောက်မန်ကျည်းကန်ကျေးရွာအား အညာမြေတပ်ပေါင်းစုမှ ဝင်ရောက်တိုက်ခိုက်ခဲ့ခြင်း ဖြစ်သည်။   ဇွန်လ ၁၀ ရက်နေ့၊ နံနက် ၅ နာရီမှ ၇ နာရီအထိ ၂ နာရီကြာ ဖြစ်ပွားခဲ့သည့် တိုက်ပွဲအတွင်း စစ်ကောင်စီ၏ ဘန်ကာ ၃ လုံး သိမ်းယူနိုင်ခဲ့ပြီး ဘဲကြီးကုန်းကျေးရွာ အခြေစိုက် ပျူစောထီးများနှင့် ပခုက္ကူတပ်မ ၁၀၁ မှ စစ်ကူ ရောက်ရှိလာမှုကြောင့် ပြန်လည်ဆုတ်ခွာပေးခဲ့ရသည်ဟု ဆိုသည်။   တိုက်ပွဲအတွင်း အညာမြေတပ်ပေါင်းစုမှ တပ်ဖွဲ့ဝင် ၃ ဦးမှာ မစိုးရိမ်ဒဏ်ရာများ ရရှိခဲ့ပြီး လက်ရှိတွင် လုံခြုံသည့် နေရာတွင် ဆေးကုသမှု ခံယူနေသည်ဟု ကိုဘိုဘိုသန့်ဇင်က ဆက်ပြောသည်။   “ကျနော်တို့ဖက်က ရဲဘော် ၃ ယောက်ကတော့ ပွဲအတွင်းမှာ အပြန်အလှန် ပစ်ကြရင်းနဲ့ လက်ပြတ်သီး ထိသွား တာပေါ့။ လက်ပြတ်သီး ထိသွားတဲ့အခါမှာ ရဲဘော်တစ်ယောက်ကတော့ သက်တောင့်သက်တာ ဒဏ်ရာမျိုး ဖြစ် ပြီးတော့ ရဲဘော်တစ်ယောက်ကတော့ နည်းနည်းလေးတော့ ပြင်းထန်တာမျိုးလည်း မဟုတ်ဘူး။ မပြင်းထန်တာ မျိုးလည်း မဟုတ်တဲ့ အခြေအနေပေါ့။ သူကတော့ နားရွက်နောက်ပိုင်းနဲ့ လည်ပင်းနားလေး နည်းနည်း ထိခိုက် သွားတာပေါ့။ အဲဒါကိုတော့ ဆေးဝါးကုသနေပါတယ်။”   အဆိုပါ စစ်ဆင်ရေးအား အညာမြေတပ်ပေါင်းစုနှင့်အတူ ဧရာဒေါင်းတပ်ဖွဲ့၊ နယ်စည်းမခြား(PKU) ကိုရေခဲနှင့် ဗလညီနောင် ခေါင်းဆောင်လူငယ်‌ ပြောက်ကျား တပ်ဖွဲ့၊ ဝံပုလွေ ပြောက်ကျားတပ်ဖွဲ့၊ PLO ပြောက်ကျားတပ်ဖွဲ့၊ မုန်တိုင်း ပြောက်ကျားတပ်ဖွဲ့၊ DYT ပျောက်ကြားတပ်ဖွဲ့၊ BLY ပေါက်(ပကဖ)၊ သခင်ဖိုးလှကြီး (မကွေးခရိုင် ပကဖ တပ်ခွဲ ၆) Burmese Revolution Ranger, PI PDF, God fo myaing, 21bagan, Younth Guettilla force(Y.G.F) စသည့် အဖွဲ့များမှ ပူးပေါင်းစစ်ရေး ဖော်ဆောင်ခဲ့ခြင်း ဖြစ်သည်။   ဇွန်လ ၁၂ ရက်နေ့ စစ်ရေး အခြေအနေအရ စစ်ကောင်စီ၏ အင်အား ၄၀၀ ပါ စစ်ကြောင်းမှာ ကမ္မမြို့တွင် တပ်ဖြန့်ထားပြီး ဒေသခံများထံမှ သိမ်းယူထားသည့် ကား ၃ စီးနှင့် ညောင်ဂျစ်ပင်ကျေးရွာရှိ ဘုန်းကြီးကျောင်း တွင် ရိက္ခာစုဆောင်းနေသည်ဟု ဆိုကြသည်။   ထို့အပြင် ဂျိုးပျံကျေးရွာ၌လည်း ရိက္ခာတင်သည့် စစ်ကောင်စီယာဉ်တန်းများ တွေ့ရသည်ဟု မြေပြင် သတင်းပေး များ၏ ပြောပြချက်အရ သိရသည်။

ပခုက္ကူမြို့နယ်ရှိ ပျူစောထီးရွာအား အညာမြေ တပ်ပေါင်းစု ဝင်ရောက်တိုက်ခိုက်

ပခုက္ကူမြို့နယ်ရှိ ပျူစောထီးရွာအား အညာမြေ တပ်ပေါင်းစု ဝင်ရောက်တိုက်ခိုက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၃ ရက်။  ပခုက္ကူမြို့နယ်ထဲ…

  • June 13, 2025
×Close