သတင်း

ထိုင်းနယ်စပ် ကရင်ပြည်အတွင်း KNU စခန်းသိမ်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၃ ရက်။ ထိုင်း-မြန်မာနယ်စပ်ရှိ စစ်ကောင်စီတပ်၏ ထီးကပလယ်တပ်စခန်းကို တိုက်ခိုက် သိမ်းပိုက်လိုက်သည်ဟု KNU က ပြောသည်။ ကော့ကရိတ်မြို့နယ်ထဲက ထီးကပလယ်တပ်စခန်းကို KNLA၊ KNDO ၊ PDF ပူးပေါင်းတပ်က ဇွန်လ ၂၂ ရက်နေ့ (ယမန်နေ့)က တိုက်ခိုက်သိမ်းပိုက်ခဲ့သည်ဟု KNU က ဇွန်လ ၂၃ ရက်နေ့ (ယနေ့) တွင် ထုတ်ပြန် ပြောဆိုသည်။ အဆိုပါ တပ်စခန်းသည် KNU ကော်သူးလေအုပ်ချုပ်နယ်​မြေ ဒူးပလာယာခရိုင်၊ ကော့ကရိတ်မြို့နယ်ထဲတွင် တည်ရှိပြီး ၎င်းတို့၏ ဌာနချုပ်ဟောင်းတစ်ခုဖြစ်သည်ဟု KNU က ပြောသည်။ စစ်တပ်၏ တိုက်ခိုက်မှုများကြောင့် KNU ဌာနချုပ် မာနယ်ပလောမှ ဆုတ်ရပြီးနောက် ၁၉၉၅ ခုနှစ်တွင် ထီးကပလယ် နေရာကို KNU က ဌာနချုပ်သစ်အဖြစ် တည်ထောင်ခဲ့ပြီး ၂ နှစ် မပြည့်မှီ ၁၉၉၇ ဖေဖော် ဝါရီလတွင် မြန်မာ့တပ်မတော်မှ ထပ်မံတိုက်ခိုက် သိမ်းပိုက်ခံခဲ့ရသည်ဟု KNU က ပြောသည်။ သို့သော် ၂၀၂၁ ခုနှစ် စစ်တပ်အာဏာသိမ်းပြီးနောက် အဆိုပါ တပ်စခန်းကို ၂၈ နှစ်အကြာတွင် KNU နှင့် တော်လှန်ရေးပူးပေါင်းတပ်များက ပြန်လည်တိုက်ခိုက်သိမ်းပိုက်နိုင်ခဲ့သည်။

ထိုင်းနယ်စပ် ကရင်ပြည်အတွင်း KNU စခန်းသိမ်း

ထိုင်းနယ်စပ် ကရင်ပြည်အတွင်း KNU စခန်းသိမ်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၃ ရက်။ ထိုင်း-မြန်မာနယ်စပ်ရှိ စစ်ကောင်စီတပ်၏ ထီးကပလယ်တပ…

  • June 23, 2025
ရှမ်းပြည် အရှေ့ပိုင်း “ဝ” နယ်မြေတွင် မြေရှား သတ္တု ထုတ်လုပ်မှု အဆများစွာ များပြားလာ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၁ ရက်။   ‘ဝ’ ပြည် သွေးစည်းညီညွတ်ရေး တပ်မတော် (UWSA) ထိန်းချုပ်ရာ ရှမ်းပြည် အရှေ့ပိုင်း၊ မိုင်းပေါက်မြို့နယ် အတွင်း မြေရှားသတ္တုတူးဖော်မှု အဆမတန် များပြားလာသည်ဟု ရှမ်းလူ့အခွင့်အရေးမဏ္ဍိုင် (SHRF) က ထုတ် ပြန်သည်။   ဂြိုလ်တုဓာတ်ပုံများ၊ အချက်အလက်များအရ မိုင်းပေါက်ဒေသတွင်း တရုတ်နိုင်ငံမှ ရင်းနှီးမြှုပ်နှံသည့် မြေရှား သတ္တု တူးဖော်ရေးလုပ်ငန်းများ ၈ ဆ များပြားလာသည်ဟု SHRF က ဇွန်လ ၁၉ ရက်နေ့တွင် ထုတ်ပြန်သည်။   ထိုမြေရှားသတ္တု တူးဖော်ရေး လုပ်ငန်းများသည် ဒေသခံပြည်သူအတွက် အကျိုးအမြတ် တစ်စုံတစ်ရာ မရရှိဘဲ တရုတ်လုပ်ငန်းရှင်များ၏ အကျိုးစီးပွားအတွက်သာ ဖြစ်သည်ဟု SHRF က ထောက်ပြထားသည်။   SHRF ပြောရေးဆိုခွင့်ရှိသူ ယိင်းလျန်းဟန် က “အဓိကကတော့ ပြည်သူတွေတော့ အကျိုးအမြတ်မရှိတာ သေ ချာတယ်ပေါ့နော်။ ဒါကတော့ တရုတ်ရဲ့ အကျိုးအမြတ် ပိုများပြီးတော့ ပြည်သူတွေ၊ ဒေသခံပြည်သူတွေ အကျိုးအမြတ် မရှိဘူးလို့ပဲ ပြောနိုင်တယ်ပေါ့နော်” ဟု ပြောသည်။   SHRF ၏ အစီရင်ခံစာတွင် စစ်အာဏာသိမ်းမှု နောက်ပိုင်း UWSA ထိန်းချုပ်ထားသော နယ်စပ်ဒေသများတွင်  မြေရှားသတ္တုတူးဖော်မှု အဆမတန် များပြားလာနေရသည်ကို ဂြိုလ်တုဓာတ်ပုံများ၊ အချက်အလက်များနှင့်တကွ ထုတ်ဖော် ပြသထားသည်။   အထူးသဖြင့် ၂၀၁၅ ခုနှစ်တွင် လုပ်ကွက် (၃) ကွက်သာ ရှိခဲ့ရာမှ ၂၀၂၅ ခုနှစ်နောက်ပိုင်းတွင် လုပ်ကွက် (၂၆) ကွက် ထက်မနည်း တိုးလာခဲ့သည်။   ‘ဝ’ ဒေသအတွင်း မြေရှား ထုတ်လုပ်မှုမှာ ကချင်ပြည်ထဲက မြေရှားတူးဖော်သည့် နယ်မြေများကို ကချင် လွတ်လပ်ရေးအဖွဲ့ KIO/KIA က သိမ်းပိုက်လိုက်ပြီး နောက်ပိုင်း ပိုတိုးသည်ဟုလည်း ဆိုနိုင်သည်။   ကချင်ပြည် ချီဖွေ၊ ပန်ဝါ၊ ဆော့လော်၊ ဖီမော်မြို့နယ်တို့ကို ကချင်လွတ်လပ်ရေး အဖွဲ့ KIO/KIA က ၂၀၂၄ ခုနှစ် အောက်တိုဘာလ ကတည်းက စတင်ထိန်းချုပ်လာနိုင်ခဲ့ပြီးနောက် အဆိုပါ ဒေသများအတွင်းရှိ မြေရှားသတ္တု တူးဖော်ရေး လုပ်ငန်းများ ရပ်တန့်သွားခဲ့ခြင်း ဖြစ်သည်။   ယိင်းလျန်းဟန် က “အဓိကကတော့ KIA/KIA ဒီဘက်မှာ ဒီမြေရှားသတ္တုတူးဖော်မှုတွေ၊ တချို့တွေက အခုဆို ရင် သူတို့ ပြန်ပြီးမှ တချို့ရပ်တန့်နေရတဲ့ နေရာတွေ ရှိတဲ့အခါကျတော့၊ သူတို့ ဒီဘက်ဒေသမှာ ပိုပြီးမှ တိုးပြီး ထုတ်လာတယ်လို့ မြင်ပါတယ်ရှင့်” ဟု ပြောသည်။   အဆိုပါလုပ်ငန်းများသည် အန္တရာယ်ရှိသော ဓာတုပစ္စည်းများကို အသုံးပြုကာ စည်းကမ်းမဲ့ စွန့်ပစ်နေမှုကြောင့် ထောင်ပေါင်းများစွာသော ဒေသခံများ၏ အသက်မွေးဝမ်းကျောင်းမှုနှင့် လုံခြုံရေးကို တိုက်ရိုက် ခြိမ်းခြောက် နေသည်ဟု ဆိုသည်။   ထို့အပြင် ၂၀၂၁ ခုနှစ် ဇူလိုင်လအတွင်းက မိုင်းပေါက်မြို့တွင် ဖြစ်ပွားခဲ့သော အပြင်းအထန် ရေကြီးမှုသည်လည်း မြေရှားတူးဖော်မှုကြောင့် တောတောင်များ ပြုန်းတီးပြီး မြစ်ကြောင်းများ တိမ်ကောလာခြင်း၏ တိုက်ရိုက် အကျိုးဆက် ဖြစ်ကြောင်း အစီရင်ခံစာက ထောက်ပြထားသည်။   သို့သော် ဒေသခံများမှာ အဆိုပါ သဘာဝဘေး အန္တရာယ်များ၏ နောက်ကွယ်မှ အကြောင်းအရင်းကိုပင် မသိရှိ ကြကြောင်း ယိင်းလျန်းဟန် ကဆက်ပြောသည်။   “တကယ့် ဒီမြေရှားတွေကြောင့် ရေကြီးတာကိုတောင်မှ ပြည်သူတွေကိုယ်တိုင်တောင် မသိတဲ့အထိ ဖြစ်နေတယ်ရှင့်” ဟု ဆိုသည်။   အစီရင်ခံစာအရ တူးဖော်ရေးလုပ်ငန်းများတွင် တရုတ်နိုင်ငံ၌ တားမြစ်ထားသည့် ‘in-situ leaching’ နည်းပညာ ကို အသုံးပြုလျက်ရှိသည်။   ထိုနည်းပညာသည် အမိုနီယမ်ဆာလဖိတ် ကဲ့သို့သော ဓာတုပစ္စည်းများကို တောင်စောင်းများအတွင်းသို့ ထိုးသွင်း ပြီး မြေရှားသတ္တုများ ဖော်ယူနေပြီး အသုံးပြုပြီးသည့် ဓာတုစွန့်ပစ်ရည်များသည် ဒေသ၏ အဓိက ရေ အရင်း အမြစ်များ ဖြစ်သော မြစ်ချောင်းများအတွင်း တိုက်ရိုက်စွန့်ပစ်နေပြီး ထိုမှတစ်ဆင့် မဲခေါင်မြစ်အတွင်းသို့ စီးဆင်းသွားသည်ဟု ဖော်ပြထားသည်။   အဆိုပါ ပြဿနာမှာ ဒေသတစ်ခုတည်းတွင် သာမက နယ်စပ်ဖြတ်ကျော် သဘာဝပတ်ဝန်းကျင် ပြဿနာတစ်ရပ် ဖြစ်လာနိုင်သည်ဟု ယိင်းလျန်းဟန် ကဆက်ပြောသည်။   "နယ်စပ်ဖြတ်ကျော် သဘာဝပတ်ဝန်းကျင် ပြဿနာဆိုတာက အခုလက်ရှိ ဒီ မိုင်းယွန်းနားက ဒီမြေရှား သတ္တု တွင်းနဲ့ အသွင်ကြောင့်ပေါ့နော်၊ ကျမတို့ ဒီနမ့်ခုတ်မြစ်ထဲမှာ ရေတွေညစ်ညမ်းတယ်။ ဒီညစ်ညမ်းတဲ့ရေတွေက ထိုင်းဘက်ကို ရောက်သွားတဲ့အခါမှာ ထိုင်းဘက်ကလည်း ပြည်သူတွေလည်း ဒီညစ်ညမ်းမှု ခံစားရတယ်ပေါ့ နော်။ အခု ကျမတို့ ဒီ အခုထုတ်တဲ့ မိုင်းပေါက်ဆိုတာလည်း ဒီလိုပဲ၊ သူတို့ သံလွင်မြစ်ပေါ်မှာပဲ မူတည်ပြီး၊ ဒီရဲ့ မြစ်က စီးတဲ့ရေကလည်း သံလွင်မြစ်ကို စီးသွားမယ်။ သံလွင်မြစ်သည်လည်း ကျမတို့ ဒီနိုင်ငံရဲ့ အကြီးဆုံးမြစ် ဆိုလည်း ဖြစ်တယ်။ နောက်တစ်ခုက မဲခေါင်မြစ်ထဲ စီးမယ်။ မဲခေါင်ဆိုတာကျတော့ ကျမတို့ ဒီထိုင်းနဲ့ မြန်မာ တင် မဟုတ်ဘူး၊ ဟိုးအောက်ဘက် ကျမတို့ နိုင်ငံတကာအထိ စီးသွားတဲ့ နိုင်ငံတကာမြစ် ဖြစ်တယ်ပေါ့နော်။ ဒါကို ပြောချင်တာပါရှင်။"   စစ်ကောင်စီ၏ အာဏာသိမ်းမှု နောက်ပိုင်းမှ ယခုကဲ့သို့ လုပ်ငန်းများ အရှိန်အဟုန်ဖြင့် တိုးပွားလာခြင်းသည် လည်း သက်ဆိုင်ရာ အာဏာပိုင်များ၏ မျက်ကွယ်ပြုမှု သို့မဟုတ် တိတ်တဆိတ် သဘောတူညီမှုများ ရှိနေနိုင် ကြောင်း SHRF ၏ အစီရင်ခံစာတွင် ဖော်ပြထားသည်။   မြေရှားသတ္တုသည် လျှပ်စစ်ကား၊ စမတ်ဖုန်း၊ လေအားလျှပ်စစ်တာဘိုင်များကဲ့သို့သော ခေတ်မီနည်းပညာမြင့် ပစ္စည်းများထုတ်လုပ်ရာတွင် မရှိမဖြစ်လိုအပ်သော ကုန်ကြမ်းတစ်မျိုးဖြစ်ပြီး၊ မြန်မာနိုင်ငံသည် ကမ္ဘာ့တွင် တတိယ အများဆုံး မြေရှားထုတ်လုပ်လျှက်ရှိသည်။   မြေရှား သတ္တု တူးဖော်မှုမှာ တရုတ်နိုင်ငံသည် ကမ္ဘာတွင် အများဆုံး ထုတ်လုပ်လျှက်ရှိပြီး ဒုတိယမှာ အမေရိကန်နှင့် မြန်မာနိုင်က တတိယ ဖြစ်သည်။   အဆိုပါ နိုင်ငံ သုံးနိုင်ငံက ထုတ်လုပ်လိုက်သည့် မြေရှားသတ္တုများကိုမူ တရုတ်နိုင်ငံ၌ သန့်စင်သည်။    

ရှမ်းပြည် အရှေ့ပိုင်း “ဝ” နယ်မြေတွင် မြေရှား သတ္တု ထုတ်လုပ်မှု အဆများစွာ များပြားလာ

ရှမ်းပြည် အရှေ့ပိုင်း “ဝ” နယ်မြေတွင် မြေရှား သတ္တု ထုတ်လုပ်မှု အဆများစွာ များပြားလာ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၁ ရက်။  ‘ဝ’ ပြ…

  • June 21, 2025
အာဏာသိမ်းချိန်နောက်ပိုင်းမှစ၍ ပဋိပက္ခအတွင်း လိင်အကြမ်းဖက်မှု အနည်းဆုံး ၁၀၀၀ နီးပါး ဖြစ်ပွားခဲ့   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၁ ရက်။    နိုင်ငံ တစ်ဝှမ်းတွင် အာဏာသိမ်းကာလအတွင်း ပဋိပက္ခနှင့် ဆက်နွယ်သည့် လိင်ပိုင်းဆိုင်ရာ အကြမ်းဖက်မှု ပေါင်း ၉၆၃ မှု ဖြစ်ပွားခဲ့သည်ဟု အမျိုးသမီးများ အဖွဲ့ချုပ် (မြန်မာနိုင်ငံ) WLB က ပြောသည်။   စစ်တပ်က အာဏာသိမ်းရန် ကြိုးပမ်းသည့် အချိန်မှစ၍ ယခုနှစ် မေလအထိ (WLB) မှ ကောက်ယူထားသည့် စာရင်းများအရ Rape case (မုဒိန်းမှု) ၁၈၃ မှု၊ Sexual & Gender-Based Violence (SGBV) - လိင်ပိုင်း ဆိုင်ရာ နှင့် ကျားမ အခြေပြု အကြမ်းဖက်မှု ၇၅၈ မှု၊ General Gender-Based Violence (GBV) အထွေအထွေ ကျား၊မ အခြေပြု အကြမ်းဖက်မှု ၈၈ မှု တို့ဖြစ်ခဲ့သည် ဟု ဆိုသည်။   အမျိုးသမီးများအဖွဲ့ချုပ် မြန်မာနိုင်ငံ၏ Political Initiative အဖွဲ့ဝင် နော်ဆဲဆဲက “အထူးသဖြင့် စစ်အာဏာ စသိမ်းတဲ့ အချိန်ကစပြီးတော့ပေါ့နော် ၂၀၂၅ ထိဆိုရင် ကျမတို့ WLB ကနေ ကောက်ခံထားတဲ့ အမှုဆိုရင် ၉၆၃ မှုပေါ့နော်။ ဒါပဋိပက္ခနဲ့ဆက်နွယ်တဲ့ လိင်ပိုင်းဆိုင်ရာ အကြမ်းဖက်မှုတွေ ပေါ့နော်။ ဒါတောင်မှ ကျမတို့ WLB အဖွဲ့ဝင်တွေက သူ့နယ်မြေမှာ သူကောက်ခံတဲ့ နယ်မြေလောက်ပဲ ကျမတို့ ကောက်ခံထားတာ ဖြစ်တယ် ပေါ့နော်“ ဟု ပြောသည်။   ပဋိပက္ခနှင့် ဆက်နွယ်သည့် လိင်ပိုင်းဆိုင်ရာ အကြမ်းဖက်မှုများသည် ကရင်နီပြည်တွင် အများဆုံး ဖြစ်ပွားခဲ့ပြီး ၃၆၅ မှု ဖြစ်ခဲ့သည်ဟု WLB က ဆိုသည်။   ထို့အတူ စစ်ကိုင်းတိုင်းတွင် ၃၄၉ မှု၊ ရှမ်းပြည်တွင် ၁၀၂ မှု၊ ကချင်ပြည်တွင် ၄၀ မှု၊ တနင်္သာရီတိုင်းတွင် ၂၇ မှု၊ ချင်းပြည်တွင် ၁၉ မှု၊ ရန်ကုန်တိုင်းတွင် ၆ မှု၊ ကရင်ပြည်တွင် ၃ မှု၊ ရခိုင်ပြည်တွင် ၃ မှု၊ နေပြည်တော်တွင် ၂ မှု၊ မန္တလေးတိုင်းတွင် ၁ မှုနှင့် မကွေးတိုင်းတွင် ၁ မှု ရှိသည်ဟု WLB က စာရင်းကောက်ယူ ရရှိခဲ့သည်။   WLB မှ စာရင်း ကောက်ယူနိုင်ခြင်း မရှိဘဲ ပဋိပက္ခနှင့် ဆက်နွယ်သည့် လိင်ပိုင်းဆိုင်ရာ အကြမ်းဖက်မှုများစွာ ရှိကြောင်းကို နော်ဆဲဆဲက ယခုကဲ့သို့ ဆက်ပြောသည်။   “တစ်ချို့သော အမှုတွေဆိုရင် မိသားစုတွေကို ခြိမ်းခြောက်တာတို့ အထူးသဖြင့် ကျူးလွန်ခံရသူတွေကို ခြိမ်းခြောက်တာတို့ ပြီးလို့ရှိရင်လည်း ဘယ်နေရာမှာ တင်ပြရမလဲ ဖွင့်ပြောရမလဲဆိုတဲ့ ယန္တရားမရှိတာတို့ အင်တာနက် အခက်အခဲတို့  ဒါမျိုးတွေကြောင့် အမှုကိစ္စရပ်တွေ ပျောက်သွားတာတို့ ဒီအမှုတွေကို မှတ်တမ်း မတင်ရတာတို့လည်း အများကြီး ရှိသေးတယ်ပေါ့နော်။”   စစ်ကောင်စီတပ်သည် အသက်မပြည့်သေးသည့် မိန်းကလေးငယ်များ၊ လူနည်းစု အမျိုးသမီးများ၊ သက်ကြီးရွယ် အို အမျိုးသမီးများ နှင့် LGBTQIA+ လိင်စိတ်ခံယူမှု ကွဲပြားသူတို့အား ပစ်မှတ်ထားပြီး အဓမ္မပြုကျင့်မှုကို စစ်လက်နက်ကဲ့သို့ ကျယ်ကျယ်ပြန့်ပြန့် လုပ်ဆောင်နေသည်ဟုလည်း WLB က ဆိုသည်။

အာဏာသိမ်းချိန်နောက်ပိုင်းမှစ၍ ပဋိပက္ခအတွင်း လိင်အကြမ်းဖက်မှု အနည်းဆုံး ၁၀၀၀ နီးပါး ဖြစ်ပွားခဲ့

အာဏာသိမ်းချိန်နောက်ပိုင်းမှစ၍ ပဋိပက္ခအတွင်း လိင်အကြမ်းဖက်မှု အနည်းဆုံး ၁၀၀၀ နီးပါး ဖြစ်ပွားခဲ့ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၁ ရက်။…

  • June 21, 2025
မောတောင်လမ်းပိုင်း တစ်လတာအတွင်း အသွားအလာမရှိ   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၁ ရက်။   တနင်္သာရီမှ နယ်စပ်ရှိ မောတောင် လမ်းပိုင်းရှိ နယ်စပ် ကုန်သွယ်ရေးလမ်းကို ပြန်လည်ဖွင့်လှစ်ထားသည့် တစ်လတာ ကာလအတွင်း အသွားအလာ မရှိခဲ့ဘူးဟု ဒေသတွင်း တာဝန်ရှိသူများက ပြောသည်။   နယ်စပ် ကုန်သွယ်ရေး လမ်းပိုင်းဖြစ်သည့် တနင်္သာရီ - မောတောင်သွား ကားလမ်းကို စစ်ကောင်စီနှင့် ကရင်အမျိုးသား အစည်းအရုံး KNU နှစ်ဘက်စလုံးမှ ဖြတ်သန်း သွားလာခွင့် ပြုထားခဲ့သော်လည်း တစ်လနီးပါးကြာသည့် အချိန်အထိ သွားလာကြသော ခရီးသွားများ မရှိသေးကြောင်း ကော်သူးလေအာမီ (ထီးဆဲ့မဲရွာ တပ်ရင်း) တာဝန်ရှိသူတစ်ဦးက ပြောသည်။   ထီးဆဲ့မဲ့ရွာ တပ်ရင်း ပြန်ကြားရေးတာဝန်ရှိသူက “လက်ရှိမှာ စစ်ကောင်စီတပ်နဲ့ ပြည်သူ့ကာကွယ်ရေး ပူးပေါင်းတပ်ဖွဲ့တွေ အကြား စစ်ရေးတင်းမာနေကြပြီး စစ်ကောင်စီဘက်က နယ်မြေတွေကို ထိန်းချုပ် စိုးမိုး နိုင်ဖို့အတွက် အင်အားဖြည့်တာ၊ ရှေ့ဆက်တိုး ထိုးစစ်ဆင် နေတာမျိုး တွေ့နေရတယ်။ ပူးပေါင်းတပ်ဖွဲ့တွေ ဘက် ကလည်း နယ်မြေတွေ မပေးရရေး ခံစစ် ခုခံပြင်ဆင်မှုတွေ လုပ်နေကြတယ်” ဟု ပြောသည်။   ပြီးခဲ့သည့်နှစ် ဒီဇင်ဘာလ ၁၆ ရက်နေ့မှ စတင်ပြီး မောတောင်လမ်းပိုင်းတွင် တိုက်ပွဲများ ဖြစ်ပွားနေကာ နယ်စပ် ကုန်သွယ်ရေး လမ်းပိုင်းဖြစ်သည့် တနင်္သာရီ - မောတောင် လမ်းအား ခရီးသွားလာဖြတ်သန်းခွင့် ပိတ်လိုက် ခြင်း ဖြစ်သည်။   ယခုနှစ် မေလအလယ်ပိုင်းတွင် ပြန်လည်ဖြတ်သန်းခွင့် ပေးလိုက်သော်လည်း သွားလာနေကြသည့် ခရီးသည် ကားနှင့် ကုန်ကားများ မရှိသေးကြောင်း မောတောင် အမှတ် ၉ ရပ်ကွက်သား တစ်ဦးက ဆိုသည်။   တနင်္သာရီ - မောတောင် ကားလမ်းကို စစ်ကောင်စီတပ်အပြင် ပြည်သူ့ကာကွယ်ရေး တပ်ဖွဲ့များဘက်ကပါ ယခင်ကကဲ့သို့ နံနက် ၆ နာရီမှ ညနေ ၆ နာရီအချိန်ထိ နေ့ဘက်တွင် ဖွင့်လှစ်သွားလာခွင့် ပေးထားခြင်း ဖြစ်သည်။   ထိုသို့ လမ်းဖွင့်လိုက်သည့် နောက်ပိုင်းတွင် စစ်ရေးအရ နှစ်ဦးနှစ်ဘက် ထိပ်တိုက်ရင်ဆိုင်မှု မဖြစ်အောင် ပြည်သူ့ ကာကွယ်ရေး ပူးပေါင်းအဖွဲ့များမှ သတိထား စောင့်စည်းရကြကြောင်း ထီးဆဲ့မဲ့ရွာ တပ်ရင်း ပြန်ကြားရေး တာဝန်ရှိသူက ဆိုသည်။   လက်ရှိ ကားလမ်းပိုင်း တလျောက်၌ စစ်ကောင်စီတပ် နှင့် ပြည်သူ့ကာကွယ် ရေးပူးပေါင်းတပ်ဖွဲ့များမှ ကြီးစိုး ထားပြီး ရုတ်တရက် တိုက်ပွဲဖြစ်လာနိုင်သည့် အခြေအနေ ဖြစ်နေသောကြောင့် တိုက်ပွဲများကြားတွင် ညှပ်၍ ပိတ်မိနိုင်သည့်အတွက် ခရီးသွားလာရန် အစီအစဥ် မရှိသေးကြောင်း ကုန်ကားမောင်းတစ်ဦးက ပြောသည်။   တိုက်ပွဲ ဖြစ်ပွားခဲ့သည့် ၆ လတာ ကာလအတွင်း စစ်ကောင်စီဘက်မှ လေကြောင်းတိုက်ခိုက်မှု အကြိမ်ရေ ၄၀ ထက်မနည်း လုပ်ခဲ့ခြင်းဖြစ်ပြီး တိုက်ပွဲများကြောင့် သိန်ခွန်းကျေးရွာ အုပ်စုအတွင်း စစ်ရှောင်နေရသူပေါင်း သောင်းနှင့်ချီ၍ ရှိနေကြောင်း မြေပြင် သတင်းအရင်းအမြစ်များက ဆိုသည်။

မောတောင်လမ်းပိုင်း တစ်လတာအတွင်း အသွားအလာမရှိ

မောတောင်လမ်းပိုင်း တစ်လတာအတွင်း အသွားအလာမရှိ သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၁ ရက်။  တနင်္သာရီမှ နယ်စပ်ရှိ မောတောင် လမ်းပိုင်းရှိ န…

  • June 21, 2025
တံတား ကျိုးကျမှုကြောင့် မိုးကုတ်-မန္တလေး-လားရှိုး- မူဆယ် ယာဉ်များ အခက်ကြုံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၁ ရက်။   တံတား ကျိုးကျမှုကြောင့် မိုးကုတ် - လားရှိုး - မူဆယ် ယာဉ်လိုင်းများ သွားရေးလာရေး အခက်အခဲ ဖြစ်နေကြသည်။   ရှမ်းပြည်မြောက်ပိုင်း၊ ကျောက်မဲမြို့နယ်၊ မိုင်းလုံမြို့အဝင်ရှိ နမ့်ကော်တံတား ကျိုးကျမှုကြောင့် မိုးကုတ် - လားရှိုး - မူဆယ်ယာဉ်လိုင်းများ သွားရေးလာရေး ခက်ခဲလာနိုင်သည်ဟု ယာဉ်လိုင်း တာဝန်ရှိသူများက ပြောသည်။   ဖြတ်သန်းသွားလာခဲ့သည့် ယာဉ်မောင်း တစ်ဦးက “ကွင်းလမ်းက တံတားဘေးတင်ပဲလေ။ ရေထဲကနေ ဖြတ်ရ တာ။ ကုန်ကားကြီးတွေ ဘက်ဖိုးတွေကျရင် အဲဒီအောက်ကနေ သွားခိုင်းတာပေါ့။ အဲဒါကို မသွားတော့ တံတား ပေါ်ကဆို တံတားက ဝိတ်မခံနိုင်ဘူးလေ။ ဝိတ်က ကားကမြင်တဲ့အတိုင်းပဲလေ အဲဒီမှာ နည်းတာမဟုတ်ဘူး” ဟု ပြောသည်။   ကုန်ကားများ ဖြတ်သန်းမှုကြောင့် ဇွန်လ ၂၀ ရက်နေ့၊ နံနက် ၉ နာရီအချိန်ခန့်တွင် ကျိုးကျပျက်စီးခဲ့ခြင်း ဖြစ်ပြီး လက်ရှိ မြေပြင်တွင် ဖြစ်ပွားနေသည့် တိုက်ပွဲ အခြေအနေများအရ လတ်တလော ပြုပြင်နိုင်ရန် မဖြစ်နိုင်သေးဘူး ဟု ဆိုကြသည်။   လတ်တလော အခြေအနေအရ ကားကြီးများသာ ကွင်းလမ်းမှတဆင့် သွားလာနိုင်ပြီး ကားသေးနှင့် ဆိုင်ကယ် များ ဖြတ်သန်းရန် အန္တရာယ်များသဖြင့် ယာဉ်လိုင်းများ အခက်တွေ့နေခြင်း ဖြစ်သည်။   တံတားကျိုးပြီးနောက် အကျိုးဆက်အနေဖြင့် တံတားအနီးရှိ တစ်မိုင်ကွေ့တွင် ကားအစီးရေ ရာချီ တန်းစီ ပိတ်မိနေသည် ဖြစ်ရာ မြေပြင်တာဝန်ရှိသူများထံသို့ ယာယီတံတား ထိုးပေးရန် တောင်းဆိုထားသည်ဟု ယာဉ် မောင်းများက ဆိုသည်။   ဖြတ်သန်းသွားလာခဲ့သည့် ယာဉ်မောင်း တစ်ဦးက “အရင်နှစ်တွေကျတော့ အဲဒီလမ်းက အသွားလာနည်းတယ် လေ။ အခုဟာက ကျောက်မဲရော၊ လားရှိုးရော၊ မူဆယ်ရော အားလုံးက မန္တလေးကနေသွားတာ။ ကုန်ကား အား လုံးက အဲဒီကနေ သွားနေတာ။ အဲခါကျတော့ ကုန်ကားတွေများတော့ မခံနိုင်တော့ဘူး။ ကွင်းလမ်း လုပ်ထား ပေးလည်း အဲဒီကွင်းလမ်းကနေ မသွားကြလို့ ကုန်ကားတွေက။ အခုအဲဘက်လမ်းက မပြင်နိုင်ဘူးလေ။ တံတား တွေရော၊ လမ်းတွေရော မပြင်နိုင်ဘူး။ အကုန်လုံး တောက်လျှောက်က အဲ့လိုဖြစ်တော့ လမ်းတွေ တော်တော် ပျက်ပါတယ်” ဟု ဆက်ပြောသည်။   နမ့်ကော်တံတား ပျက်စီးမှုကြောင့် မန္တလေး - လားရှိုး - မူဆယ် ယာဉ်လိုင်းနှင့် ကုန်ကားများ အဝင်အထွက် နည်း လာနိုင်ပြီး ကုန်စည်ဝင်ရောက်မှု ကြန့်ကြာခြင်း၊ ခရီးသည်များ လမ်းခရီး အချိန်နှောင့်နှေးခြင်း၊ ရက်ရှည် ပြတ် တောက်ပါက ကုန်စည်များ ဈေးတက်လာနိုင်ခြင်း စသည့်အခက်အခဲများ ရင်ဆိုင်ရဖွယ်ရှိသည်ဟု ယာဉ်မောင်း များက ခန့်မှန်းထားကြသည်။   ကျောက်မဲမြို့နယ်တွင် အင်္ဂလိပ်အစိုးရလက်ထက်က တည်ဆောက်ခဲ့သော တံတားမှာ နမ့်ကော်နှင့် မိုင်းလုံဟူ၍ တံတား ၂ စင်းရှိပြီး မိုင်းလုံတံတားမှာ လက်ရှိချိန်အထိ ခိုင်ခိုင်ခံ့ခံ့ အသုံးပြု၍ ရနေသေးသည်ဟု ဆိုကြသည်။   ကျောက်မဲမြို့နယ်အား လက်ရှိတွင် တအာင်းအမျိုးသား လွတ်မြောက်ရေး တပ်မတော် (TNLA) မှ ထိန်းချုပ်ထား ပြီး စစ်ကောင်စီနှင့် မကြာခဏ ထိတွေ့တိုက်ပွဲများ ဖြစ်ပွားလျက်ရှိသည်။

တံတား ကျိုးကျမှုကြောင့် မိုးကုတ်-မန္တလေး-လားရှိုး- မူဆယ် ယာဉ်များ အခက်ကြုံ

တံတား ကျိုးကျမှုကြောင့် မိုးကုတ်-မန္တလေး-လားရှိုး- မူဆယ် ယာဉ်များ အခက်ကြုံ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၁ ရက်။  တံတား ကျိုးကျမှ…

  • June 21, 2025
ကရင်နီ စစ်ရှောင်များ အကူအညီလိုအပ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၁ ရက်။   ကရင်နီပြည်၊ ဒီးမော့ဆိုမြို့နယ် အနောက်ဘက်ခြမ်းရှိ ထေးကေလျား စစ်‌ဘေးရှောင်စခန်းအတွက် အရေးပေါ် အကူအညီများ လိုအပ်နေသည်ဟု စစ်ဘေးရှောင် ကူညီရေးအဖွဲ့အစည်း တာဝန်ခံများက ပြောသည်။   ထေးကေလျား စစ်ဘေးရှောင်စခန်းတွင် ၂၀၂၅ ခုနှစ်အတွင်း ဇန္နဝါရီလမှ ယခု ဇွန်လအထိ ဆန် ၁၅ အိတ်သာ ရိက္ခာရရှိထားပြီး လာမည့် ဇူလိုင်အတွက် ရိက္ခာအပါအဝင် ပညာရေးနှင့် အခြားကဏ္ဍများအတွက် အကူအညီ လိုအပ်နေခြင်း ဖြစ်သည်။   Jobs For Kayah (JFK) အဖွဲ့မှ တာဝန်ခံ တစ်ဦးက “လက်ရှိအနေနဲ့တော့ ဆရာမ ထောက်ပံ့ကြေးအနေနဲ့ မရှိဘူး ပေါ့နော်။ သူတို့တွေအနေနဲ့ စစ်ဘေးရှောင် ပြည်သူတွေကနေပြီးတော့ ကျောင်းဝင်ကြေးလေးရယ်၊ လစဉ်ကြေး လေးရယ် ကောက်ခံဖို့ အတွက်တော့ သူတို့အစည်းဝေး တိုင်ပင်ထားကြတယ်။ ဒါပေမယ့် မလုံလောက်ဘူးပေါ့ နော်။ နောက်တစ်ချက်က တခြားအဖွဲ့အစည်းတွေကလည်း ဆရာမထောက်ပံ့ကြေး ပေးဖို့ကိစ္စလည်း သေသေ ချာချာ တိတိကျကျ စနစ်တကျ ချထားတာမျိုး မရှိသေးဘူးပေါ့နော်” ဟု ပြောသည်။   အဆိုပါ စခန်းရှိ ကိုယ်ထူကိုယ်ထ စာသင်ကျောင်းတွင်လည်း ဆရာ ၂ ဦးနှင့် ဆရာမ ၁၀ ဦးရှိပြီး ၎င်းတို့အတွက် စာသင်ဆောင်၊ သင်ထောက်ကူပစ္စည်း၊ စာရေးကိရိယာနှင့် ထောက်ပံ့ကြေးများလည်း လိုအပ်လျက်ရှိသည်ဟု ဆိုသည်။   ထို့အပြင် စခန်းသို့ သွားလာရင်တွင်လည်း ၄၅ မိနစ်ခန့် လမ်းလျှောက်ရသည့်အပြင် ကားဖြင့်လည်း ၂ နာရီခန့် သွားလာရပြီး သဖြင့် စက်သုံးဆီ အကူအညီလည်း လိုအပ်သည်ဟု အကူအညီပေးနေသူ တစ်ဦးက ဆက် ပြော သည်။   “ကျနော်တို့ ပြည်နယ်မှာ စက်သုံးဆီ ပြတ်တောက်တဲ့ အပြင်ကို ရောက်လာရင်လည်း အနည်းကျဉ်းတော့ ရောက်လာတာပေါ့။ ဒါပေမယ့် ဆီကတော့ အဆမတန်ကြေးမြင့်နေတယ်ပေါ့နော်။ ၅ ဂါလံတစ်ပုံးကို တစ်သိန်း ကျော် တစ်သိန်းခွဲလောက် အထိ ရှိနေပြီပေါ့နော်။ ဆီတစ်ပီပါဆိုရင် ၁၅ သိန်းလောက် ပေါက်နေတယ်ပေါ့နော်။ အဲ့ဒါ ကြောင့်မို့ ကျနော်တို့ အကူအညီလုပ်ရမှာလည်း တော်တော်လေး အခက်အခဲ ဖြစ်တယ်ပေါ့နော်။ တခြား ကဏ္ဍတွေလည်း အများကြီး အခက်အခဲဖြစ်တယ်ပေါ့။ ကျနော်တို့ဆို ဥပမာ စစ်ဘေးရှောင်တွေကို ရိက္ခာ သွား ပို့တာပဲ ဖြစ်ဖြစ် ကွင်းဆင်းတာပဲ ဖြစ်ဖြစ် သွားဖို့တောင်မှ ဆီကိစ္စနဲ့ ပတ်သက်ပြီးတော့ တော်တော်လေး စဉ်း စားနေရတဲ့ အနေအထား ဖြစ်တယ်ပေါ့နော်။”   လက်ရှိ စခန်းလူဦးရေ စာရင်းအရ အိမ်ထောင်စု ၁၂၆ စု၊ လူဦးရေ ၅၆၃ ဦး ရှိပြီး သက်ကြီးရွယ်အို၊ နာတာရှည် ရောဂါသည်နှင့် မသန်စွမ်းများလည်း ပါဝင်သဖြင့် ဆေးဝါး အကူအညီများလည်း လိုအပ်နေကြသည်ဟု ဆိုကြ သည်။   ထေးကေလျားစခန်းရှိ စစ်ဘေးရှောင်များမှာ လွိုင်ကော်မြို့ပေါ်ရပ်ကွက်၊ လွိုင်ကော်မြို့နယ်တွင်းရှိ ကျေးရွာများ နှင့် လက်ရှိ တိုက်ပွဲများ ဖြစ်ပွားနေသည့် မိုးဗြဲမြို့ အရှေ့ဘက်ကမ်းရှိ ကျေးရွာများမှ စစ်ရှောင်လာကြသူများ ဖြစ် သည်။   အများစုမှာ ၂၀၂၃ ခုနှစ်၊ နိုဝင်ဘာလ ၁၁ ရက်နေ့၌ စတင်ခဲ့သည့် တစ်လေးလုံး စစ်ဆင်ရေး ကာလများ ကတည်း က လာရောက်ခိုလှုံကြသည်ဟု စစ်ဘေးရှောင် ကူညီရေး တာဝန်ခံများက ပြောသည်။

ကရင်နီ စစ်ရှောင်များ အကူအညီလိုအပ်

ကရင်နီ စစ်ရှောင်များ အကူအညီလိုအပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၂၁ ရက်။  ကရင်နီပြည်၊ ဒီးမော့ဆိုမြို့နယ် အနောက်ဘက်ခြမ်းရှိ ထေးကေလျ…

  • June 21, 2025
ကရင်နီပြည်အတွင်း စက်သုံးဆီ ပြတ်လပ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၉ ရက်။   ကရင်နီပြည်အတွင်း စက်သုံးဆီပြတ်လပ်နေပြီး ဈေးပါတက်လာနေသည့်အတွက် သွားလာရေးကိစ္စ အခက်အခဲ များနှင့် ကြုံနေရသည်ဟု ဒေသခံများက ပြောသည်။   ကရင်နီပြည်၊ ဒီးမော့ဆိုမြို့နယ်တွင် ဇွန်လတတိယပတ်တွင် ဓာတ်ဆီ (၁) လီတာ၏ ဈေးနှုန်းမှာ ကျပ် ၈,၀၀၀ မှ ကျပ် ၁၀,၀၀၀ အထိ ရှိလာပြီး ဝယ်ယူရန်လည်း ခက်ခဲနေသည်ဟု ဒေသခံများက ပြောသည်။    ဒီးမော့ဆိုမြို့ အနောက်ဘက်ခြမ်းရှိ ဒေသခံတစ်ဦးက “တစ်ဆိုင်နဲ့ တစ်ဆိုင်ကမတူဘူး။ တစ်ချို့ဆိုင်တွေဆို တစ်သောင်းကျော်တယ်။ တစ်ချို့ဆိုင်တွေဆို ၈,၅၀၀၊ ၉,၀၀၀ အဲ့လောက် ဈေးတက်တယ်။ တစ်ချို့ဆီပန့်တွေ ဆို အကုန်လုံး ပိတ်ပြီလေ။ ပီပါလိုက် ဆိုင်မျိုးတွေဆို သိပ်မတွေ့ရတော့ဘူးလေ။ ဆိုင်သေးတွေလောက်ပဲ ကျန် တယ်။ ၅ ဂါလံပုံး တစ်ပုံး နှစ်ပုံး အဲ့လိုမျိုးပဲ။ ဘာမှမရှိတော့ဘူး သူတို့ဟာ လက်ကျန်ပဲ တင်ရောင်းတဲ့ လူပဲ ရှိတယ်။ အဲ့ကြောင့်မို့လို့ သူတို့ဈေးကို တင်ရောင်းတယ်ပဲ ပြောရမလား” ဟု ပြောသည်။   ဒေသတွင်းရှိ ဆီဆိုင်အချို့ပင် ပိတ်ထားကြသည်ဟု ဒေသခံများက ပြောသည်။   လမ်းပန်းဆက်သွယ်ရေး ခက်ခဲမှုနှင့်အတူ ကရင်နီပြည်အတွင်း စစ်ကောင်စီ၏ စစ်ကြောင်း ထိုးမှုများကြောင့် နှစ်ဖက်တိုက်ပွဲများ ဖြစ်ပွားနေသည့်အတွက် လမ်းကြောင်း အခြေအနေများအရ စက်သုံးဆီ တင်သွင်းနိုင်ရန် လည်း ခက်ခဲနေသည်ဟု ဆိုသည်။   ထိုသို့သော အခြေအနေများကြောင့် လက်ရှိတွင် ဒေသတွင်း စက်သုံးဆီ ပြတ်သွားပြီး ဈေးနှုန်းမှာ ခုန်တက်သွား ခြင်း ဖြစ်သည်ဟု ဒေသခံများက ပြောသည်။   ဒေသခံတစ်ဦးက “ဓာတ်ဆီ‌က တောင်ငူကနေ တစ်ပေါက်ပဲ ရဖို့ရှိတယ်။ ဒီလွိုင်ကော်၊ ဆီဆိုင်တို့ဘက်က ဝင် ပေါက် မရှိလို့လေး။ ဒီတောင်ငူကနေဆို တစ်ပတ် တစ်ခါလား၊ နှစ်ပတ် တစ်ခါလား အဲ့မျိုးပဲ ဝင်လာတော့ ဈေးကတက်တယ် အဲ့လိုမျိုး” ဟု ပြောသည်။   စက်သုံးဆီ ပြတ်လပ်နေပြီး ဈေးနှုန်းမြင့်တက်နေသည့် အတွက် သွားရေးလာရေးအတွက် အခက် ကြုံနေရသည် ဟု ဆိုသည်။   အဆိုပါ ဒေသခံက “ဓာတ်ဆီဈေးတက်တော့ သွားရလာရခက်တယ်လေးနော်။ အခုက ဆိုင်ကယ်တွေ ကားတွေ နဲ့ပဲ ဆိုတော့ ခက်ခဲတယ်ပေါ့။ တစ်နေရာကနေ တစ်နေရာ သွားဖို့ဆိုရင်” ဟု ဆက်ပြောသည်။ ဒီးမော့ဆိုမြို့နယ်တွင် ဇွန်လအစောပိုင်းအထိ ဓာတ်ဆီ ၁ လီတာကို ကျပ် ၅,၀၀၀ ပဲ ရှိခဲ့ရာမှာ လက်ရှိတွင် စျေးခုန် တက်သွားခြင်း ဖြစ်သည်။   ဒေသတွင်း၌ စက်သုံးဆီ အပါအဝင် အခြား ကုန်ပစ္စည်းများဖြစ်သည့် စားနပ်ရိက္ခာ၊ ဆေးဝါး၊ လူသုံးကုန်ပစ္စည်း များပါ တင်သွင်းရန် ခက်ခဲလာနေသည့်အတွက် ကုန်ဈေးနှုန်းများ ထပ်တက်လာမည်ကို ဒေသခံများက စိုးရိမ်နေ ကြသည်။

ကရင်နီပြည်အတွင်း စက်သုံးဆီ ပြတ်လပ်

ကရင်နီပြည်အတွင်း စက်သုံးဆီ ပြတ်လပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၉ ရက်။  ကရင်နီပြည်အတွင်း စက်သုံးဆီပြတ်လပ်နေပြီး ဈေးပါတက်လာနေသည့…

  • June 19, 2025
ရေတပ်က ဖမ်းထားသော ကျန်းမာရေး ဝန်ထမ်းများ ပြန်လွတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၉ ရက်။   ထားဝယ်ခရိုင်၊ ရေဖြူမြို့နယ်၊ ကံပေါက်ဒေသ အခြေစိုက် မောရဝတီ ရေတပ်စခန်းဌာနချုပ်က ဖမ်းဆီး ထိန်းသိမ်းထားသည့် ကျန်းမာရေး ဝန်ထမ်းဟောင်း ၂ ဦး မိသားစုဝင်များအတူ ပြန်လွတ်လာသည်။   ရေဖြူမြို့နယ်၊ လှည်းကုန်းရပ်ကွက်မှ ကျန်းမာရေး ဝန်ထမ်းဟောင်း ၂ ဦး အပါအဝင် မိသားစုဝင်များ ပြန်လည် လွတ်မြောက်လာခဲ့သည်ဟု ရပ်ကွက်သားများက ပြောသည်။   လှည်းကုန်း အမှတ် ၂ ရပ်ကွက်မှ အသက် ၄၀ ခန့်အရွယ် ရပ်ကွက်သားတစ်ဦးက “အမှတ် ၁ ရပ်ကွက်က ဆရာမ ဒေါ်သန်းသန်းမော်တို့ မိသားစု ၃ ယောက်နဲ့ အမှတ် ၂ ရပ်ကွက်က ဆရာ ဦးကျော်စိုးဝင်းတို့ အားလုံး ပြန်လွတ် လာပါပြီ၊ ကျန်းမာရေးလည်း အားလုံးကောင်းကြပါတယ်” ဟု ပြောသည်။   ဖမ်းဆီးခံရပြီးနောက် နှစ်ပတ်ကျော် အကြာ ဇွန်လ ၁၆ ရက်နေ့ မွန်းတည့်ပိုင်းက ပြန်လည် လွတ်မြောက် လာခြင်းဖြစ်သည်ဟု နီးစပ်သူများက ဆိုသည်။   ကံပေါက်တိုက်နယ်ဆေးရုံမှ အငြိမ်းစား သူနာပြုဆရာမ ဒေါ်သန်းသန်းမော်နှင့် မိသားစုဝင်များ ဖြစ်ကြသည့် သားနှင့် သမီးအပါအဝင် တိုက်နယ် ကျန်းမာရေးဌာနမှ ဝန်ထမ်းဟောင်း ဦးကျော်စိုးဝင်း တို့ကို မောရဝတီ ရေတပ်က မေလ ၃၀ ရက်နေ့ ညပိုင်းတွင် လာရောက်ဖမ်းဆီးသွားခဲ့ခြင်း ဖြစ်သည်။   ဆရာ ဦးကျော်စိုးဝင်းသည် စစ်တပ်က အာဏာသိမ်းပြီးနောက် အကြမ်းမဖက် အာဏာဖီဆန်ရေး လှုပ်ရှားမှု CDM တွင် ပါဝင်ခဲ့သဖြင့် ကျန်းမာရေးဌာနမှ အနားပေးခံခဲ့ရသူ တစ်ဦးဖြစ်ပြီး လက်ရှိတွင် အမှတ် ၂ ရပ်ကွက် ထဲ၌ ဆေးခန်းဖွင့်ထားသည်။   ၂၀၂၄ ခုနှစ် သြဂုတ်လက စတင်ပြီး စစ်ကောင်စီ၏ မောရဝတီရေတပ်မှ ကံပေါက်ကျေးရွာအဝင် စစ်ဆေးရေး ဂိတ်တွင် ဆေးဝါး တင်သွင်းခြင်းများကို စည်းကမ်း တင်းကြပ်ထားပြီး ဆေးဝါးများ ရောင်းချလိုပါက စာရင်း တင်ပြပေးကာ ခွင့်ပြု ချက်ရယူနေ ကြရသည်ဟု ရွာသားများက ဆိုသည်။   စစ်အာဏာသိမ်းပြီးသည့်နောက် ၂၀၂၂ ခုနှစ်မှ စတင်၍ ကံပေါက်ဒေသတွင် ဖမ်းဆီးစစ်ဆေးမှုများကို မောရဝတီ ရေတပ်မှ တိုက်ရိုက် လုပ်ဆောင်လေ့ရှိသည်။   ထို့အပြင် ဖမ်းဆီးခံရသူများကို ကံပေါက်နယ်မြေ ရဲစခန်း အချုပ်တွင် မထားဘဲ မောရဝတီ ရေတပ်အတွင်းမှာပင် ဖမ်းဆီးစစ်ဆေးလေ့ရှိကြောင်း ဒေသခံများက ပြောသည်။  

ရေတပ်က ဖမ်းထားသော ကျန်းမာရေး ဝန်ထမ်းများ ပြန်လွတ်

ရေတပ်က ဖမ်းထားသော ကျန်းမာရေး ဝန်ထမ်းများ ပြန်လွတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၉ ရက်။  ထားဝယ်ခရိုင်၊ ရေဖြူမြို့နယ်၊ ကံပေါက်ဒေသ …

  • June 19, 2025
ကော်သူးလေ အစိုးရကို တော်လှန်ရေး အင်အားစုများဖြင့် ညွန့်ပေါင်း ဖွဲ့စည်းမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၈ ရက်။   ကရင်အမျိုးသား အစည်းအရုံး (KNU) က ဖွဲ့စည်းမည့် ကော်သူးလေ အစိုးရတွင် တော်လှန်ရေး အင်အားစု အားလုံး ပါဝင်မည်ဖြစ်ပြီး ညွန့်ပေါင်းအစိုးရ ပုံစံဖြင့် ဖွဲ့စည်းသွားမည်ဟု KNU က ပြောသည်။   အနာဂတ်တွင် ဖွဲ့စည်းမည့် ကော်သူးလေ အစိုးရသည် ကရင်လူမျိုးကိုသာ ကိုယ်စားပြုမည် မဟုတ်ဘဲ၊ တော်လှန် ရေး အင်အားစုအားလုံး ပါဝင်သည့် ‘KNU Plus’ ညွန့်ပေါင်းအစိုးရ ပုံစံဖြင့် ဖွဲ့စည်းသွားမည်ဟု ကရင်အမျိုးသား အစည်းအရုံး KNU ပြောရေးဆိုခွင့်ရှိသူ ပဒိုစောတောနီးက ပြောသည်။   ပဒိုစောတောနီးက “KNU ကတော့ ဦးဆောင်တဲ့ နေရာမှာ ရှိဦးမယ်ဆိုပေမယ့်လို့ တခြားလူတွေလည်း ပါမယ်။ ဆိုလို တာကတော့ ကရင်မဟုတ်တဲ့ တခြားလူမျိုးတွေလည်း ကျနော်တို့ ဒီအဖွဲ့ထဲမှာ၊ ဒီကော်သူးလေထဲမှာ ပေါင်း ဝင်လာမယ်” ဟု ပြောသည်။   အဆိုပါ ပြောဆိုမှုကို ဇွန်လ ၁၄ ရက်နေ့က ကျရောက်သည့် ၇၆ ကြိမ်မြောက် ကော်သူးလေနေ့တွင် ကော်သူး လေ ဖက်ဒရယ်ယူနစ်အကြောင်းနှင့် ပတ်သက်၍ ရှင်းလင်းပြောဆိုရာတွင် ပဒိုစောတောနီးက ထည့်သွင်း ပြော ကြားခဲ့ခြင်း ဖြစ်သည်။   ‘KNU Plus’ မဟာဗျူဟာတွင် KNU က ဦးဆောင်သည့် အခန်းကဏ္ဍမှ ပါဝင်မည် ဖြစ်သော်လည်း ကရင်မဟုတ် သည့် အခြားသော တိုင်းရင်းသားများ၊ လူငယ်များ၊ အမျိုးသမီး အစုအဖွဲ့များနှင့် ၂၀၂၀ ခုနှစ် ရွေးကောက်ပွဲ အနိုင်ရ ကိုယ်စားလှယ်များ၏ ကိုယ်စားပြုမှုကိုပါ ထည့်သွင်းသွားမည်ဟု KNU က ဆိုသည်။   ဖွဲ့စည်းမည့် အုပ်ချုပ်ရေးယန္တရားတွင်လည်း အားလုံးပါဝင်သည့် ဥပဒေပြု ကောင်စီ (Kawthoolei Consultative Council - KCC) နှင့် အလုပ်အမှုဆောင် ကော်မတီ (Kawthoolei Executive Committee - KEC) တို့ ပါဝင် မည်ဖြစ်ပြီး KEC က အစိုးရအဖွဲ့၏ လုပ်ငန်းတာဝန်များကို တာဝန်ယူမည်ဟု ပဒိုစောတောနီးက ဆက်ပြောသည်။   ၎င်းက “ဒါဟာ တကယ့်ကို အောက်ခြေက စုစည်းလာပြီးတော့ ကျနော်တို့ ပြည်ထောင်စုကို တည်ဆောက် မယ် ဆိုတာ ဒါ အလကား ကျနော်တို့ ထိုးခွဲပြီးတော့ အစိတ်စိတ် အမွှာမွှာ ဖြစ်အောင်လုပ်တဲ့ နည်းတွေ မဟုတ်ဘူး။ အားလုံး ပါဝင်နိုင်တဲ့ (inclusiveness) နေရာကနေ ကျနော်တို့ ဖော်ဆောင်သွားမှာ ဖြစ်တယ်" ဟု ပြောသည်။   ကော်သူးလေ အစိုးရကို ၂၀၂၅-၂၀၂၆ ခုနှစ်အတွင်း ဖွဲ့စည်းရန် ရည်မှန်းထားသော်လည်း ခိုင်မာသော မူဝါဒများနှင့် လူသား အရင်းအမြစ်များ ပြင်ဆင်ရန် အချိန်ယူ လုပ်ဆောင်ရမည့် စိန်ခေါ်ချက်များ ရှိနေဆဲဟု KNU က ဆိုသည်။   သို့သော် ကရင်အမျိုးသား အစည်းအရုံး KNU ၏ ‘KNU Plus’ မဟာဗျူဟာသည် နွေဦးတော်လှန်ရေး၏ ညီ ညွတ်မှုကို အခြေခံသည့် အုပ်ချုပ်ရေး ယန္တရားတစ်ရပ် တည်ဆောက်ရန်အတွက် ရည်ရွယ်ထားသည် ဟု ဆို သည်။   KNU ၏ လက်ရှိ နိုင်ငံရေး ချဉ်းကပ်မှုသည် အနာဂတ် ဖက်ဒရယ် ပြည်ထောင်စု တည်ဆောက်ရေးအတွက် လက်တွေ့ကျသော ရှေ့ပြေးပုံစံတစ်ခု ဖြစ်လာနိုင်ပြီး လူမျိုးရေးထက် နိုင်ငံရေးရည်မှန်းချက်တူသူများ စုပေါင်း အုပ်ချုပ်သည့်စနစ်ကို ဖော်ဆောင်လိုသည့် သဘောထားကို ထင်ဟပ်နေသည်ဟု နိုင်ငံရေးလေ့လာသူများ က သုံးသပ်ကြသည်။

ကော်သူးလေ အစိုးရကို တော်လှန်ရေး အင်အားစုများဖြင့် ညွန့်ပေါင်း ဖွဲ့စည်းမည်

ကော်သူးလေ အစိုးရကို တော်လှန်ရေး အင်အားစုများဖြင့် ညွန့်ပေါင်း ဖွဲ့စည်းမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၁၈ ရက်။  ကရင်အမျိုးသား အစ…

  • June 18, 2025
×Close