သတင်း

ထားဝယ်တွင် ဧည့်စာရင်းဝင်စစ်ပြီး စစ်မှုထမ်းစုဆောင်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၄ ရက်။    တနင်္သာရီတိုင်း၊ ထားဝယ်မြို့၊ ပိန္နဲတောရပ်ကွက်ရှိ နှင်းဆီလမ်းတွင် ဧည့်စာရင်း ဝင်ရောက်စစ်ဆေးရင်း အမျိုးသား တစ်ဦးကို စစ်မှုထမ်း သင်တန်းတက်ရန် ခေါ်ဆောင်သွားသည်ဟု ရပ်ကွက်နေ ပြည်သူများက ပြော သည်။   ရဲတပ်ဖွဲ့ဝင်နှစ်ဦး၊ စစ်ကောင်စီတပ်ဖွဲ့ဝင်များ၊ ပျူစောထီးများ၊ ဆယ်အိမ်မှူးနှင့် အရပ်ဝတ် အမျိုးသားသုံးဦး ပါ ဝင်သည့် အဖွဲ့က ဇူလိုင်လ ၂ ရက်နေ့ ည ၁၁ နာရီအချိန်က ဝင်ရောက်စစ်ဆေးခဲ့ခြင်း ဖြစ်သည်။   ဧည့်စာရင်းစစ်သည်ဟု ဆိုကာ အိမ်အမှတ်နှင့် အိမ်ထောင်စု စာရင်းများကို တိုက်ဆိုင် စစ်ဆေးပြီးနောက် အသက် ၂၀ ခန့်အရွယ် လူငယ်ကို ခေါ်ဆောင်သွားခြင်းဖြစ်သည်ဟု ရပ်ကွက်နေ ပြည်သူများက အတည်ပြု ပြောဆိုသည်။   နှင်းဆီလမ်းအတွင်းနေထိုင်သူ အသက် ၄၀ ခန့်အရွယ် အမျိုးသားတစ်ဦးက “အရင်က တစ်ခါမှ လမ်းထဲကို ဧည့် စာရင်း လာစစ်တာမျိုး မရှိပါဘူး။ အိမ်ထောင်စု စာရင်းနဲ့ အိမ်နံပါတ် တိုက်ပြီး စစ်တယ်။ ပြီးတော့ သူတို့မှာ ပါ လာတဲ့ စာရင်းစာရွက်နဲ့ တိုက်ပြီးလည်း စစ်တယ်။ ကျန်တဲ့ အိမ်တွေမှာ ဘာမှမဖြစ်ဘူး။ အဲဒီကောင်လေး အိမ်ကြမှပဲ စစ်မှုထမ်း ဆင့်ခေါ်စာ ဆိုပြီး စာရွက်တစ်ရွက် ပေးပြီး တခါတည်း ခေါ်သွားတယ်။ ကျန်တာတော့ ဘာမှ မပြောသွားဘူး” ဟု ပြောသည်။   ထိုသို့ ခေါ်ဆောင်သွားပြီးနောက် ထားဝယ်မြို့ရှိ စစ်ကောင်စီ တပ်ရင်းများ နှင့် ရဲစခန်းတို့တွင် မိသားစုက လိုက် လံ စုံစမ်းသော်လည်း ဇူလိုင်လ ၄ ရက်နေ့ ညနေပိုင်းအချိန်အထိ သတင်းမရရှိသေးကြောင်း နီးစပ်သူများက ပြောသည်။   စစ်မှုထမ်းရန် ဆင့်ခေါ်စာ အပို့ခံရသူများမှာ စစ်မှု မထမ်းလို၍ ထွက်ပြေး တိမ်းရှောင်နေကြသဖြင့် ယခုကဲ့သို့ ဆင့်ခေါ်စာဖြင့် တစ်ခါတည်း အိမ်တိုင်ရာအရောက် စစ်သားစုဆောင်းခြင်း ဖြစ်နိုင်သည်ဟု ထားဝယ်မြို့ခံတစ်ဦး က ဆိုသည်။   စစ်ကောင်စီက ၂၀၂၄ ခုနှစ်၊ မတ်လမှ စတင်ကာ စစ်မှုထမ်း သင်တန်းများ ဖွင့်လှစ်နေပြီး ၂၀၂၅ ခုနှစ်၊ ဇွန်လ အတွင်း၌ အပတ်စဥ် ၁၄ အထိ ရောက်ရှိနေပြီ ဖြစ်သည်။

ထားဝယ်တွင် ဧည့်စာရင်းဝင်စစ်ပြီး စစ်မှုထမ်းစုဆောင်း

ထားဝယ်တွင် ဧည့်စာရင်းဝင်စစ်ပြီး စစ်မှုထမ်းစုဆောင်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၄ ရက်။   တနင်္သာရီတိုင်း၊ ထားဝယ်မြို့၊ ပိန္နဲ…

  • July 4, 2025
စစ်ကောင်စီ အုပ်ချုပ်ရေးမှူး အပါအဝင် နှစ်ဦး အသတ်ခံရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၄ ရက်။    ကော့သောင်းခရိုင်၊ ခမောက်ကြီးမြို့နယ်၊ အေးချမ်းသာကျေးရွာနေသူ တစ်ဦးနှင့် ဆိပ်ဖူးကျေးရွာ အုပ်ချုပ်ရေးမှူး တို့ကို ပစ်ခတ်ရှင်းလင်းခဲ့သည်ဟု ကော့သောင်း (ပကဖ) တာဝန်ရှိသူတစ်ဦးက ပြောသည်။   ခမောက်ကြီးမြို့နယ် ဆိပ်ဖူးကျေးရွာမှ စစ်ကောင်စီခန့် အုပ်ချုပ်ရေးမှူးဖြစ်သည့် အသက် ၄၀ အရွယ် ဦးလှနိုင် ကို ဇူလိုင်လ ၂ ရက်နေ့၊ နံနက် ၁၁ နာရီဝန်းကျင် အချိန်ခန့်တွင် ကျေးရွာ၏ လမ်းပိုင်းတစ်နေရာတွင် ပစ်ခတ်ရှင်း လင်းခဲ့ကြောင်း ထုတ်ပြန်သည်။   ကော့သောင်း ပကဖ တာဝန်ရှိသူက “နှစ်ယောက်စလုံးက စစ်ကောင်စီရဲ့ အမာခံတွေပါပဲ၊ အုပ်ချုပ်ရေးမှူး လုပ် တဲ့သူကတော့ အဓိကပေါ့၊ ပကဖအဖွဲ့ထဲ ဝင်ရောပြီး သတင်းနိုက်တယ်၊ ပြီးတော့ စကစဆီ သတင်း ပြန်ပို့တယ်” ဟု ပြောသည်။   အလားတူ အေးချမ်းသာကျေးရွာမှ ဦးမြင့်ရှိန်ဆိုသူကိုလည်း နေအိမ်၌ပင် ပစ်ခတ်ရှင်းလင်းခဲ့ကြောင်း ဇူလိုင်လ ၄ ရက်နေ့တွင် ကော့သောင်း - ပကဖ အဖွဲ့မှ ထုတ်ပြန်ထားသည်။   ဦးမြင့်ရှိန်သည် WY စိတ်ကြွမူးယစ်ဆေးဝါးရောင်းဝယ်နေသူတစ်ဦးဖြစ်ပြီး စစ်ကောင်စီသတင်းပေးလည်း ဖြစ်သည်ဟု ဖော်ပြထားသည်။   စစ်ကောင်စီသတင်းပေး ဖြစ်သူ ဦးမြင့်ရှိန်ကို ဇူလိုင်လ ၂ ရက်နေ့၊ နံနက် ၁၀ နာရီခန့်တွင် ရှင်းလင်းခဲ့ခြင်း ဖြစ်သည်ဟု ဆိုသည်။   ထိုလုပ်ရပ်များကို မပြုလုပ်ရန်နှင့် နှစ်ဦးစလုံးဆီသို့ ဖုန်းဆက်သွယ်ကာ သတိပေးခြင်း၊ စာပို့သတိပေးခြင်းများနှင့် လူချင်းပါ တွေ့ဆုံ၍ အကြိမ်ကြိမ် သတိပေးနေခဲ့သော်လည်း၊ လိုက်နာခြင်းမရှိဘဲ ဆက်လက် လုပ်ဆောင်နေ သဖြင့် ရှင်းလင်းခဲ့ရခြင်း ဖြစ်ကြောင်း ကော့သောင်း - ပကဖ အဖွဲ့ တာဝန်ရှိသူက ပြေသည်။   ဦးမြင့်ရှိန်သည် စစ်တပ်က အာဏာမသိမ်းခင်ကတည်းက ကော့သောင်းမြို့၊ ရွှေပြည်သာရပ်ကွက်တွင် နေထိုင်သူ ဖြစ်ပြီး အာဏာသိမ်းပြီးသည့်နောက် အေးချမ်းသာကျေးရွာတွင် ဟန်ပြအဖြေင့် စျေးဆိုင်ဖွင့်ကာ ရောင်းချနေသူ ဖြစ်သည်။   အလားတူ ဦးမြင့်ရှိန်သည် မာရမ်းရဲစခန်းမှ ရဲတပ်ဖွဲ့ဝင်များနှင့် စစ်ကောင်စီတပ်မှ တပ်ဖွဲ့ဝင်တို့ကို ပေါင်းသင်း ကာ မူးယစ်ဆေးဝါး ရောင်းဝယ်မှုများ ပြုလုပ်နေသူဖြစ်ကြောင်း ပကဖ အဖွဲ့ဝင်တစ်ဦးက ဆိုသည်။   ပြီးခဲ့သည့် ဧပြီလ ၉ ရက်နေ့က မားရမ်းရဲစခန်းမှူးနှင့်အဖွဲ့ တိုက်ခိုက်ခံရပြီး ကတည်းက  ဦးမြင့်ရှိန်သည် ပြည်သူ့ကာကွယ်ရေး အဖွဲ့များ၏ လှုပ်ရှားမှု အချက်အလက်များကို သတင်းပေး လုပ်ဆောင်ခဲ့ကြောင်း ဆိုသည်။   ကော့သောင်းခရိုင် အတွင်းရှိ ကော့သောင်းမြို့နယ်နှင့် ခမောက်ကြီးမြို့နယ်တို့တွင် မူးယစ်ဆေးဝါး ရောင်းဝယ် သုံးစွဲသူ များပြားနေသဖြင့် တိုင်ကြားလာပါက (သို့မဟုတ်) တွေ့ရှိပါက ထိရောက်စွာ အရေးယူသွားမည် ဖြစ်ကြောင်း ကော့သောင်း ပကဖ အဖွဲ့က ထုတ်ပြန်ထားသည်။

စစ်ကောင်စီ အုပ်ချုပ်ရေးမှူး အပါအဝင် နှစ်ဦး အသတ်ခံရ

စစ်ကောင်စီ အုပ်ချုပ်ရေးမှူး အပါအဝင် နှစ်ဦး အသတ်ခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၄ ရက်။   ကော့သောင်းခရိုင်၊ ခမောက်ကြီးမြို့နယ်…

  • July 4, 2025
ဖားဆောင်းအနီးတွင် စစ်လေယာဉ် ပျက်တွေ့   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။   စစ်ကောင်စီက တိုက်လေယာဉ်တစ်စီး ပျောက်ဆုံးနေကြောင်း ထုတ်ပြန်လာချိန်၌ ကရင်နီပြည်၊ ဖားဆောင်းမြို့ နယ်ထဲ ပျက်ကျခဲ့သည့် စစ်လေယာဉ်ဓါတ်ပုံများကို ကရင်နီတော်လှန်ရေး တပ်ပေါင်းစုက ထုတ်ပြလိုက်သည်။   ဖားဆောင်းမြို့အနီးတွင် စစ်ကောင်စီ ပျက်ကျထားသည့် လေယာဉ်ကိုယ်ထည်နှင့် လေယာဉ်မှူး ရုပ်အလောင်း ၂ လောင်းကို တွေ့ရှိခဲ့သည်ဟု မြေပြင်တပ်ဖွဲ့ဝင်များက အတည်ပြု ပြောဆိုသည်။   ကရင်နီ အမျိုးသားများ ကာကွယ်ရေးတပ် KNDF ၏ ဗဟိုသတင်းနှင့် ပြန်ကြားရေးမှ စောတာအယ်စိုးက  “ဖားဆောင်းမြို့ကို မနက် ၁ နာရီဝန်းကျင်လောက်မှာ စစ်ကောင်စီက လေယာဉ် လေးစီးလောက်နဲ့ လာရောက် ပြီးတော့ ဗုံးကြဲတိုက်ခိုက်ခဲ့တာ ဖြစ်ပါတယ်။ တော်လှန်ရေးတပ်ဖွဲ့တွေရဲ့ လေကြောင်းရန်ကို တန်ပြန် တိုက် ခိုက်တဲ့ လေကြောင်းရန် ကာကွယ်ရေးစနစ်ကြောင့် စစ်ကောင်စီရဲ့ လေယာဉ်လေးစင်းထဲက ဂျက်လေယာဉ် တစ်စင်း ပျက်ကျခဲ့တာဖြစ်ပါတယ်။ တော်လှန်ရေးတပ်ဖွဲ့ဝင်တွေက ပစ်ချလိုက်တာ ဖြစ်ပါတယ်” ဟု ပြော သည်။   တိုက်ခိုက်ရေး လေယာဉ်တစ်စီးမှာ ဇူလိုင်လ ၁ ရက်နေ့ ညပိုင်းက ခရီးဝေး လေ့ကျင့်ပျံသန်းနေချိန် နေပြည် တော်၏ အရှေ့တောင်ဘက် ၁၃၀ ကီလိုမီတာအကွာ၌ ရေဒါမြင်ကွင်းမှ ပျောက်သွားသည်ဟု စစ်ကောင်စီက ထုတ်ပြန်ထားသည်။   ဆက်သွယ်မှု ပြတ်တောက်သွားသော နေရာအနီးတ၀ိုက်ကို ရှာဖွေကယ်ဆယ်ရေးအဖွဲ့များ လွှတ်နိုင်ရေး လုပ်ဆောင်နေသော်လည်း ရာသီဥတုဆိုးဝါးနေသည်ဟု စစ်ကောင်စီက ဆိုသည်။   ဖားဆောင်းနှင့် ဘော်လခဲမြို့နယ်တို့တွင် စစ်ရေးလှုပ်ရှားနေသည့် ကရင်နီ တော်လှန်ရေး တပ်ဖွဲ့ဝင် တစ်ဦးက “ဒီလ ၁ ရက်နေ့တုန်းက ဖားဆောင်းနားမှာ လာဝဲပြီး အသံပျောက်သွားတယ်။ ကြားထဲမှာ မြေပြင်က ပြန်ပစ်တာတွေလည်း ရှိတယ်။ ထိလား၊ မထိလားဆိုတာတော့ ကျနော်တို့လည်း မသိရဘူး။ ပြောချင်တာက လေယာဉ်ပျက်ကျတာ မှန်တယ်။ ကျနော်တို့ ပစ်ချတာလား။ သူ့ဟာသူ စက်ချို့ယွင်းတာလား ဆိုတာတော့ မောင်းတဲ့သူပဲ သေချာသိမယ်” ဟု ပြောသည်။   ထို့နောက် ဇူလိုင်လ ၃ ရက်နေ့၊ နံနက်ပိုင်း၌ ဖားဆောင်းမြို့အနီး သံလွင်မြစ်ကမ်းဘေးတွင် ပျက်စီးနေသည့် FTC 2000 G အမျိုးအစား တိုက်လေယာဉ် ကိုယ်ထည်များကို မီးခိုးလုံးများဖြင့် တွေ့ရှိခဲ့ခြင်း ဖြစ်သည်ဟု ဆိုသည်။   လေယာဉ်ပျက်ကျမှုနှင့် ပတ်သက်၍ ကရင်နီ ဒုစစ်ဦးစီးချုပ် မာဝီကလည်း ၎င်း၏ လူမှုကွန်ယက်စာမျက်နှာ၌ “ကရင်နီမှာ ဖြစ်သည်။ ကရင်နီ စစ်သည်တော်များ၏ လက်ချက် ဖြစ်သည်” ဟု ရေးသားကာ ဓါတ်ပုံများနှင့် တကွ ဖော်ပြထားသည်။   ပျက်ကျသည့် FTC  2000 G အမျိုးအစား တိုက်လေယာဉ်မှာ တရုတ်နိုင်ငံထုတ် ဖြစ်ပြီး အမေရိကန်ဒေါ်လာ ၈ သန်းမှ ၁၀ သန်းကြား (မြန်မာငွေ ၃၀ ဘီလျံကျော်) တန်ဖိုးရှိသည်ဟု နိုင်ငံတကာ စစ်ရေးသတင်း ဖော်ပြချက် များအရ သိရသည်။   ဖားဆောင်းနှင့် ဘော်လခဲမြို့နယ်တို့တွင် စစ်ရေးလှုပ်ရှားနေသည့် တပ်ဖွဲ့ဝင်က “ဂျက်ဖိုက်တာ တစ်စီးလုံး တန်း ပြီး ပျက်ကျဖို့ဆိုရင် FN-6 နဲ့ ပစ်မှပဲ ရမှပါ။ အဲ့ဒါက ဒေါ်လာသန်းချီတန်တွေဆိုတော့ ဝယ်ဖို့လည်း ခက်ပါ တယ်။ ကျနော်တို့မှာ ရှိတဲ့ လက်နက်တွေကတော့ ပွိုင့် ၅၊ ပွိုင့် ၅ တွေက ဒီလောက်အဆင့် မမီသေးပါဘူး” ဟု ဆက်ပြောသည်။   ဖားဆောင်းမြို့နယ်ရှိ စစ်ကောင်စီ တပ်စခန်းများကို ကရင်နီ တော်လှန်ရေး အင်အားစုများက ဇွန်လ ၂၅ ရက်နေ့မှ စတင်၍ ယနေ့အချိန်ထိ ထိုးစစ်ဆင် တိုက်ခိုက်နေပြီး စစ်ကောင်စီဘက်မှ တန်ပြန်လေကြောင်း အသုံးပြုလာ ခြင်း ဖြစ်သည်။   ၂၀၂၃ ခုနှစ် နိုဝင်ဘာလ ၁၁ ရက်နေ့တွင် စတင်ခဲ့သည့် တစ်လေးလုံး စစ်ဆင်ရေး ကာလများအတွင်း ဖားဆောင်း မြို့ရှိ စစ်ကောင်စီလက်အောက်ခံ တပ်ရင်းအများစုကို ကရင်နီတော်လှန်ရေး အင်အားစုများက သိမ်းယူနိုင်ခဲ့ သော်လည်း ခလရ ၁၃၄၊ ၁၃၅ စခန်းများ ကျန်ရှိခဲ့သည်ဟု ဆိုသည်။   လက်ရှိတွင်  ခလရ ၁၃၄ စခန်းအား အောင်မြင်စွာ သိမ်းယူပြီး ဖြစ်ရာ လက်ကျန် စစ်ကောင်စီ တပ်ဖွဲ့ဝင်များမှာ ခလရ ၁၃၅ သို့ သွားရောက် ပေါင်းစည်းထားသည်ဟု မြေပြင်အရင်းအမြစ်များက ပြောဆိုသည်။

ဖားဆောင်းအနီးတွင် စစ်လေယာဉ် ပျက်တွေ့

ဖားဆောင်းအနီးတွင် စစ်လေယာဉ် ပျက်တွေ့ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃ ရက်။  စစ်ကောင်စီက တိုက်လေယာဉ်တစ်စီး ပျောက်ဆုံးနေကြောင်း ထ…

  • July 3, 2025
ထိုင်း-မြန်မာ ဒေသဆိုင်ရာ နယ်ခြား ကော်မတီ အစည်းအဝေး ချင်းမိုင်တွင် ကျင်းပ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ ၃၇ ကြိမ်မြောက် ထိုင်း-မြန်မာ ဒေသဆိုင်ရာ နယ်ခြားကော်မတီ (RBC) အစည်းအဝေးကို ထိုင်းနိုင်ငံ ချင်းမိုင်တွင် ကျင်းပနေသည်။ ထို အစည်းအဝေးကို ဇူလိုင်လ ၂ ရက်နေ့ကနေ ၄ ရက်နေ့အထိ ပြုလုပ်သွားဖြစ်ပြီး စစ်ကောင်စီတပ်က အမှတ် ၄ အထူးစစ်ဆင်ရေး အဖွဲ့မှူး ဒု - ဗိုလ်ချုပ်ကြီး ညွန့်ဝင်းရွှေ တက်ရောက်နေသည်။ ဤ အစည်းအဝေးတွင် နယ်စပ်မြစ်များ ညစ်ညမ်းမှု ‌ဖြေရှင်းရေး လုပ်ငန်းစဉ် အဆိုပြုချက်ကို ထိုင်းဘက်က တင်ပြသွားမည်ဟု ထိုင်းသတင်းများတွင် ဖော်ပြထားသည်။ Photo - CHIANG MAI NEWS

ထိုင်း-မြန်မာ ဒေသဆိုင်ရာ နယ်ခြား ကော်မတီ အစည်းအဝေး ချင်းမိုင်တွင် ကျင်းပ

ထိုင်း-မြန်မာ ဒေသဆိုင်ရာ နယ်ခြား ကော်မတီ အစည်းအဝေး ချင်းမိုင်တွင် ကျင်းပ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃ ရက်။ ၃၇ ကြိမ်မြောက် ထ…

  • July 3, 2025
မိုးဗြဲလမ်းမကို စစ်ကောင်စီ ထိန်းချုပ်၊ မြို့နေရာများကို PNA နေရာယူ၊ တော်လှန်ရေးတပ်များ အကူအညီလိုအပ်နေ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။   မိုးဗြဲ လမ်းမကြီးကို စစ်ကောင်စီ ပြန်လည်ထိန်းချုပ်ပြီးနောက် မြို့တွင်းတိုက်ပွဲများ ဆက်လက် ပြင်းထန်နေ သည်ဟု မြေပြင် သတင်းအရင်းအမြစ်များက ပြောသည်။   ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်၊ မိုးဗြဲလမ်းမကြီး အပါအဝင် မြို့နေရာ အများစုကို စစ်ကောင်စီ၊ ပအိုဝ်းပြည်သူ့စစ်အဖွဲ့ (PNA) တပ်များ ဝင်ရောက်နေယူထားပြီဟု မြေပြင်စစ်ရေး သတင်း အရင်းအမြစ်များက ပြောသည်။   မိုးဗြဲမြို့တွင် တိုက်ပွဲဝင်နေသည့် မြေပြင်စစ်ရေး သတင်းအရင်းအမြစ် တစ်ဦးက “ဘောလုံးကွင်း တစ်ဝိုက်မှာ စစ်ကောင်စီ၊ PNO တွေ ရောက်နေပြီ။ ကင်းစခန်းတွေတော့ ကျသွားပြီ။ မြို့ထဲမှာတော့ တိုက်ပွဲဖြစ်နေတုန်းပဲ။ လက်နက်ကြီးနဲ့ လေကြောင်း ပစ်ကူက အားသာတော့ ကြာရင် တောင့်ခံဖို့ ခက်တယ်” ဟု ပြောသည်။   မိုးဗြဲမြို့၊ ပြည်ထောင်စု လမ်းမကြီး အနီးတစ်ဝိုက်ရှိ ဈေးကုန်း၊ သာယာကုန်း စသည့် ရပ်ကွက်များ အပါအဝင် အရေးပါသည့် နေရာအများစုကို စစ်ကောင်စီတပ်က ယမန်နေ့ည (ဇူလိုင်လ ၂ ရက်နေ့) ၌ ပြန်လည် ထိန်းချုပ် နိုင်ခဲ့ခြင်း ဖြစ်သည်။   မိုးဗြဲမြို့ကို ၂၀၂၄ ခုနှစ် နိုဝင်ဘာလမှ စတင်၍ စစ်ကောင်စီတပ်၊ ပအိုဝ်းပြည်သူ့စစ်အဖွဲ့ (PNA) ပူးပေါင်းတပ်တို့ က စစ်မှုထမ်းအသစ်များ အဓမ္မခေါ်ယူပြီး သာလွန်အင်အားဖြင့် ၈ လကြာ ထိုးစစ်ဆင်ခဲ့ခြင်း ဖြစ်သည်။   တောင်ကြီးမြို့၊ အရှေ့ပိုင်းတိုင်း စစ်ဌာနချုပ် (ရပခ) မှ လွိုင်ကော်မြို့အား မိုးဗြဲလမ်းမကြီးမှ ဖြတ်သန်းသွားလာ ပါက ၉၆ မိုင်သာ ကွာဝေးပြီး ယခု သွားလာရသည့် ဆီဆိုင်လမ်းကြောင်းမှာ မိုင် ၂၀၀ ကျော်ခန့် ကွာဝေးသဖြင့် မိုးဗြဲမြို့မှာ စစ်ကောင်စီ ထောက်ပို့လမ်းကြောင်းအတွက် အချက်အချာကျသည်ဟု ဆိုကြသည်။   မြေပြင်အရင်းအမြစ် တစ်ဦးက “ဆီဆိုင်လမ်းက ကားကြီးသွားဖို့ ခက်တယ်။ သူတို့ မိုးဗြဲရသွားရင် အများကြီး အားသာသွားပြီ။ ပင်လောင်း၊ ညောင်ရွှေဖက်ကနေ သူတို့ (စစ်ကောင်စီ) စစ်မှုထမ်း အများကြီးနဲ့ ခေါ်တက်လာ တာ။ အခြေအနေက တိုက်နေတုန်းဆိုတော့ စောင့်ကြည့်ရမှာပဲ” ဟု ဆက်ပြောသည်။   ပြီးခဲ့သည့် ဇွန်လမှ စတင်၍ ယနေ့ (ဇူလိုင် ၃ ရက်နေ့) အထိ တိုက်ပွဲအတွင်း ကရင်နီ အမျိုးသားများ ကာကွယ် ရေးတပ် (KNDF) ၁၀၂ တပ်ရင်းမှ တပ်စိတ်မှူး တစ်ဦး၊ ပအိုဝ်း အမျိုးသားများ ကာကွယ်ရေးတပ် (PNDF) ၁၀၁၁ တပ်စိတ်မှူး တစ်ဦး အပါအဝင် တပ်ဖွဲ့ဝင် ၄၀ ကျော် ကျဆုံးခဲ့သည်ဟု မြေပြင်တပ်ဖွဲ့ဝင်များက ဆိုသည်။   လက်ရှိ မိုးဗြဲတိုက်ပွဲတွင် KNDF၊ PNDF၊ ဒီးမော့ဆို LPDF၊ မိုးဗြဲ LPDF၊ URF နှင့် ကရင်နီပြည်သူ့ လွတ်မြောက် ရေး တပ်မတော် (KPLA) တို့ ပူးပေါင်း တိုက်ခိုက်လျက်ရှိပြီး လက်နက်ခဲယမ်းနှင့် အကူအညီများစွာ လိုအပ်နေသည်ဟု ဆိုသည်။   စစ်ကောင်စီတပ်က ရွေးကောက်ပွဲ ကျင်းပနိုင်ရေး အတွက် မိုးဗြဲမြို့အား ရရှိရန် လိုအပ်နေပြီး ထိုမှတဆင့် လွိုင်ကော်၊ ဒီးမော့ဆို၊ ဘော်လခဲ စသည့်မြို့နယ်များသို့ ဆက်လက် ထိုးစစ်ဆင်နိုင်မည် ဖြစ်သည်။   မိုးဗြဲမြို့ကို ၂၀၂၃ ခုနှစ် နိုဝင်ဘာလ ၁၁ ရက်နေ့က စတင်ခဲ့သည့် တစ်လေးလုံး စစ်ဆင်ရေးအတွင်း ကရင်နီ တော်လှန်ရေး အင်အားစုများမှ တိုက်ခိုက်သိမ်းယူခဲ့ခြင်း ဖြစ်ပြီး ယင်းကာလများက မြို့တစ်မိုင်ကျော် အကွာ အဝေးတွင် စစ်ကောင်စီ၏ ခြေမြန်တပ်ရင်း ခမရ ၄၄၂ ကျန်ရှိခဲ့ခြင်း ဖြစ်သည်။   သို့ဖြစ်၍ စစ်ကောင်စီတပ်က ခမရ ၄၄၂ မှတဆင့် ခြေကုတ်ယူ၍ ပင်လောင်း ဖယ်ခုံလမ်းအတိုင်း သာလွန် အင်အားအသုံးပြုပြီး လက်နက်ကြီး၊ လေကြောင်း ပစ်ကူများဖြင့် တန်ပြန် ထိုးစစ်ဆင်နေခြင်း ဖြစ်သည်ဟု မြေပြင်အရင်းအမြစ်များက ဆိုသည်။

မိုးဗြဲလမ်းမကို စစ်ကောင်စီ ထိန်းချုပ်၊ မြို့နေရာများကို PNA နေရာယူ၊ တော်လှန်ရေးတပ်များ အကူအညီလိုအပ်နေ

မိုးဗြဲလမ်းမကို စစ်ကောင်စီ ထိန်းချုပ်၊ မြို့နေရာများကို PNA နေရာယူ၊ တော်လှန်ရေးတပ်များ အကူအညီလိုအပ်နေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင…

  • July 3, 2025
နောင်ချို ဗုံးကြဲ၊ အရပ်သား ၃ ဦးသေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။   ရှမ်းမြောက် နောင်ချိုမြို့နယ်ထဲက သုံးဆယ်ကျေးရွာကို စစ်တပ်က လေကြောင်းမှ ဗုံးကြဲတိုက်ခိုက်ခဲ့ရာ ဒေသခံ အရပ်သား ၃ ဦး သေဆုံးပြီး ၁ ဦး ဒဏ်ရာရရှိခဲ့သည်။   ဇူလိုင်လ ၁ ရက်နေ့ မွန်းလွှဲပိုင်း ၃ နာရီကျော်အချိန်ခန့်တွင် စစ်ကောင်စီတပ်သည် လေကြောင်းမှ ဗုံးကြဲခဲ့ခြင်း ဖြစ်သည်ဟု နောင်ချို ဒေသခံ အမျိုးသားတစ်ဦးက ပြောသည်။   “သုံးဆယ်ရွာကို လေကြောင်း ဗုံးကြဲတဲ့သတင်းက ဟုတ်ပါတယ်ဗျာ။ စစ်တပ်က လေကြောင်းကနေ ဗုံးကြဲ သွားတာ၊ လာကြဲတာတော့ လေးခေါက်ပေါ့နော်။ အဲ့မှာ ပြည်သူ ၃ ယောက်သေတယ်။ တစ်ယောက် ဒဏ်ရာ ရတယ်။ ၁ ရက်နေ့ ၃ နာရီကျော်ကျော်လောက်မှာ လာတာပါ လေယာဉ်က။ လေးခေါက်လုံး ဆက်တိုက်ပေါ့ ဗျာ။ ပြောရမယ်ဆိုရင် အခြေအနေက အမြဲစိုးရိမ်နေရတဲ့ အခြေအနေပါဗျ။”   စစ်ကောင်စီက ဦးဆောင်ပြီး ငြိမ်းချမ်းရေး ဆွေးနွေးပွဲ ကျင်းပနေသော်လည်း တဖက်တွင် နိုင်ငံတဝှမ်း လေကြောင်း ဗုံးကြဲမှုများမှာ ရပ်တန့်မသွားခဲ့ပေ။   နောင်ချိုမြို့နယ်ထဲက သုံးဆယ်ကျေးရွာအား လေယာဉ်ဖြင့် လေးကြိမ်ဆက်တိုက် ဗုံးကြဲခဲ့ခြင်းဖြစ်ပြီး ဗုံး ၁၁ လုံးကြဲချ တိုက်ခိုက်ခဲ့သည်ဟု တအာင်းတပ်မတော် TNLA က ထုတ်ပြန်ထားသည်။   လေကြောင်း ဗုံးကြဲမှုထဲ ထိမှန်သေဆုံးသူ ၃ ဦးမှာ အမျိုးသားများ ဖြစ်သည့်အပြင် ထိခိုက်ဒဏ်ရာ ရထားသူ တစ်ဦးမှာလည်း အမျိုးသားဖြစ်သည်ဟု ဆိုသည်။   အရပ်သားများ ထိခိုက် သေဆုံးမှုများအပြင် သုံးဆယ်ကျေးရွာအတွင်းက အိမ်နှစ်လုံးနှင့် ဘုန်းကြီးကျောင်း နှစ်ကျောင်းလည်း ထိမှန်ပျက်စီးခဲ့သည်။   နောင်ချိုမြို့နယ်ထဲတွင် စစ်ကောင်စီတပ်၏ လေကြောင်း တိုက်ခိုက်မှုများအပြင် မြေပြင်၌လည်း စစ်တပ်နှင့် တအာင်းတပ်မတော် TNLA တို့အကြား တိုက်ပွဲများ ပြင်းထန်စွာ ဖြစ်ပွားနေကြသည်။   နောင်ချိုမြို့တွင်း တိုက်ပွဲ အခြေအနေနှင့် ပတ်သက်၍လည်း ဒေသခံတစ်ဦးက “နောင်ချိုမြို့နယ်ထဲက အုမ္မခါး၊ မျက်ချီးနု၊ လုံစံနဲ့ ကျောက်တောရွာတွေမှာတော့ တိုက်ပွဲက ဆက်တိုက် ဖြစ်နေတယ်။ ဒီနေ့အထိလည်း ဖြစ် တုန်းပဲ။ မြို့နဲ့ နီးလားဆိုတော့ နီးတယ်လို့ပဲ ပြောရမှာပေါ့ဗျာနော်။ စစ်တပ်ကလည်း အင်အားတွေ ထပ်တိုးတာ ရော၊ ဒီဘက် TNLA ကလည်း ဆက်တိုက်နေတာရော ဆိုတော့ တိုက်ပွဲကတော့ မရပ်ပါဘူး။ ဒီအတိုင်းပဲ ဆက် ဖြစ်နေတာဗျ” ဟု ပြောသည်။   စစ်ကောင်စီတပ်က တအာင်းတပ်မတော် TNLA က ထိန်းချုပ်ထားသည့် မြို့ရွာများထဲ လေကြောင်းမှ ဗုံးကြဲ တိုက်ခိုက်မှုများ လုပ်လျှက်ရှိရာ ဇွန်လ ၂၉ ရက်နေ့ကလည်း ကျောက်မဲမြို့အား ဂျက်ဖိုက်တာဖြင့် ဗုံးကြဲမှုကြောင့် အမျိုးသမီး ၂ ဦးနှင့် အမျိုးသား ၄ ဦး ထိမှန်ဒဏ်ရာရရှိခဲ့သေးသည်။   ထိုကြောင့် မိဘပြည်သူများ အနေဖြင့် စစ်ကောင်စီတပ်၏ လေ ကြောင်း တိုက်ခိုက်မှုများကို ရှောင်ရှားနိုင်ရန် စစ်ရေးသတိ အမြဲရှိကြဖို့နှင့် လေကြောင်းရန် ကာကွယ်ရေးဆိုင်ရာ နည်းလမ်းများ လိုက်နာဆောင်ရွက်ရန်လည်း လိုအပ်ကြောင်း TNLA က သတိပေးထားသည်။  

နောင်ချို ဗုံးကြဲ၊ အရပ်သား ၃ ဦးသေဆုံး

နောင်ချို ဗုံးကြဲ၊ အရပ်သား ၃ ဦးသေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃ ရက်။  ရှမ်းမြောက် နောင်ချိုမြို့နယ်ထဲက သုံးဆယ်ကျေးရွာကို…

  • July 3, 2025
နိုင်ကျဉ်းများ အသက်အန္တရာယ် စိုးရိမ်ရဟု NUG ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။   နိုင်ငံတဝှမ်းက အကျဉ်းထောင်များ အတွင်းရှိ နိုင်ငံရေး အကျဉ်းသားများ အားလုံး၏ ကျန်းမာရေးနှင့် အသက် အန္တရာယ်မှာ အထူးစိုးရိမ်နေရဟု အမျိုးသား ညီညွတ်ရေး အစိုးရ (NUG) ပြောသည်။   ဖမ်းဆီး ထိန်းသိမ်းခံနေရသော သမ္မတ ဦးဝင်းမြင့်နှင့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် အပြင် နိုင်ကျဉ်းအားလုံး၏ ကျန်းမာရေး အခြေအနေနှင့် အသက်အန္တရာယ်အတွက် အထူးစိုးရိမ်သည်ဟု NUG က ဆိုသည်။   NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းဘတ်က “နိုင်ငံ့ ခေါင်းဆောင်တွေ ဖြစ်တဲ့ နိုင်ငံတော် သမ္မတ ဦးဝင်းမြင့်၊ နိုင်ငံတော် အတိုင်ပင်ခံ ပုဂ္ဂိုလ် ‌ဒေါ်အောင်ဆန်းစုကြည်တို့ဟာလည်း အကြမ်းဖက် စစ်တပ်ရဲ့ မတရား ဖမ်းဆီးချုပ်နှောင်မှုကို ခံထားရပြီး လုံလောက်တဲ့ ဆေးဝါးကုသမှုတွေ ရရှိမနေကြတာကြောင့် ဒီနိုင်ငံ ခေါင်း ဆောင်တွေနဲ့ နိုင်ငံရေး အကျဉ်းသား အားလုံးရဲ့ ကျန်းမာရေးနဲ့ အသက်အန္တရာယ်ကို အမျိုးသား ညီညွတ်ရေး အစိုးရ အနေနဲ့ အထူးပင် စိုးရိမ်မကင်း ဖြစ်မိပါတယ်” ဟု ပြောသည်။   ဇူလိုင်လ ၁ ရက်နေ့တွင် ပြုလုပ်သော ပြည်သူလူထုနှင့် နိုင်ငံတကာသို့ သတင်းစကား ပြောကြားခြင်း အစီအစဉ် ၌ ဦးနေဘုန်းလတ်က ပြောဆိုလိုက်ခြင်း ဖြစ်သည်။   ဇွန်လ ၂၇ ရက်နေ့က မန္တလေး အိုးဘိုထောင်အတွင်း မန္တလေးတိုင်း လွှတ်တော် ဥက္ကဋ္ဌ ဦးအောင်ကျော်ဦး သည် အချိန်မှီ ဆေးကုသခွင့် မရသောကြောင့် သေဆုံးခဲ့ပြီးနောက် နိုင်ငံရေး အကျဉ်းသားများသည် ထောင်တွင်း ကျန်းမာရေး စောင့်ရှောက်မှု လုံလုံလောက်လောက် မရရှိမှုနှင့် ဖိနှိပ်မှုများကြောင့် မသေဆုံးသင့်ဘဲ အသက် ဆုံးရှုံးနေကြရသည် ဟု ဦးနေဘုန်းလတ်က ဆိုသည်။   အိုးဘိုထောင်တစ်ခု တည်းမှာပင် ၂၀၂၄ ခုနှစ်အတွင်း မန္တလေးတိုင်း ဝန်ကြီးချုပ် ဒေါက်တာဇော်မြင့်မောင် အပါ အဝင် နိုင်ငံရေး အကျဉ်းသား ၃ ဦး ဆက်တိုက် သေဆုံးခဲ့သည်။   ထို့အပြင် မတ်လ ၂၈ ရက်နေ့ကလည်း စစ်ကိုင်းငလျင်အပြင် ဆေးကုသမှု အချိန်မှီမရဘဲ နှောင့်နှေးမှုများကြောင့် မသေဆုံးသင့်ဘဲ သေဆုံးခဲ့ရသည့် နိုင်ငံရေးအကျဉ်းသား အ ယောက် ၅၀ ဦးကျော် ရှိခဲ့သည်။   အဆိုပါ အသက်ဆုံးရှုံးမှုများ အတွက် အကျဉ်းထောင်အတွင်း တာဝန်ရှိသူများ အနေဖြင့် တာဝန်ယူ တာဝန်ခံ ရမည်ဟု ဦးနေဘုန်းလတ်က ဆက်ပြောသည်။   “အကြမ်းဖက် စစ်အုပ်စုရဲ့ လက်အောက်ခံ အကျဉ်းထောင်တွေက အကျဉ်းဦးစီး အရာရှိတွေနဲ့ တာဝန်ရှိသူတွေ အနေနဲ့ နိုင်ငံရေး အကျဉ်းသားတွေ အပေါ် ရက်စက်စွာ ပြုမူ ဖိနှိပ်နေတဲ့ လုပ်ရပ်တွေအတွက် တာဝန်ယူ တာဝန် ခံ ကြရမှာဖြစ်ကြောင်း ပြောကြားလိုပါတယ်။”   ထို့အပြင် စစ်ကိုင်းငလျင် လှုပ်ခတ်ခဲ့သည့်နေ့၌ ဒေါ်အောင်ဆန်းစုကြည်၏ ဘယ်ဘက်လက် ဒဏ်ရာရရှိခဲ့ပြီး စိုးရိမ်ရသော အခြေအနေ ရှိနေကြောင်း Suu Foundation က ဇွန်လ ၁၈ ရက်နေ့တွင် ထုတ်ပြန်ထားသည်။   မတ်လ ၂၈ ရက်နေ့က စစ်ကိုင်းမြို့အနီး အခြေပြုလှုပ်ခတ်ခဲ့သော ငလျင်ကြောင့် နေပြည်တော်တွင် ထိခိုက် ပျက်စီးမှု များပြားခဲ့ပြီး ဒေါ်အောင်ဆန်းစုကြည်အား ချုပ်နှောင်ထားသည့် ထောင် အဆောက်အအုံမှာ ပျက်စီးခဲ့ ကာ ဒေါ်အောင်ဆန်းစုကြည်၏ ဘယ်ဘက်လက် ထိခိုက်ဒဏ်ရာရခဲ့သည်ဟု Suu Foundation က ထုတ်ပြန်ထားသည်။

နိုင်ကျဉ်းများ အသက်အန္တရာယ် စိုးရိမ်ရဟု NUG ပြော

နိုင်ကျဉ်းများ အသက်အန္တရာယ် စိုးရိမ်ရဟု NUG ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃ ရက်။  နိုင်ငံတဝှမ်းက အကျဉ်းထောင်များ အတွင်းရှ…

  • July 3, 2025
ဒေါ်အောင်ဆန်းစုကြည် မွေးနေ့ ကဗျာရွတ်သော နိုင်ကျဉ်းများ တိုက်ပိတ်ခံရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။   ဒေါ်အောင်ဆန်းစုကြည် မွေးနေ့တွင် ကဗျာရွတ်ဖတ် ဂုဏ်ပြုကြသည့် နိုင်ကျဉ်းများ ရိုက်နှက် တိုက်ပိတ်ခံထားရ သည်။   မန္တလေးတိုင်း၊ မြင်းခြံခရိုင်၊ မြင်းခြံအကျဉ်းထောင်တွင် နိုင်ငံရေးအကျဉ်းများကို ထောင်အာဏာပိုင်များနှင့် အကျဉ်းဦးစီးဌာန ဝန်ထမ်းများက ရိုက်နှက်၍ တိုက်ပိတ်ထားကြသည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများ ကွန်ယက် (PPNM) က ထုတ်ပြန်သည်။   PPNM ဦးဆောင် ကော်မတီဝင်ဖြစ်သူ မရောင်နီလင်းက “မြင်းခြံထောင်မှာရှိတဲ့ နိုင်ငံရေး အကျဉ်းသားတွေက ကဗျာ ရွတ်ဖတ်ခဲ့တယ်ပေါ့နော်။ ကဗျာရွတ်ဖတ်ခဲ့မှု အပေါ်မှာ ချက်ချင်းပဲ အဲဒီ လူတွေကို ထုတ်တယ်။ ထုတ် ပြီးတော့ ရိုက်နှက်တယ်။ တချို့လူတွေကိုတော့ ခြေကျင်းခတ်ပြီးတော့ တိုက်ပိတ်ခဲ့တယ်။ ရိုက်နှက်ပြီးတော့ နေပူ လှန်းသေးတယ်ပေါ့နော်။ ၂ ရက်လောက် နေပူခေါ်လှန်းပြီးမှပဲ ခြေကျင်းခတ်ပြီးတော့ တိုက်ပိတ်တာမျိုး တွေ လုပ်ခဲ့တယ်ပေါ့” ဟု ပြောသည်။   ဇွန်လ ၁၉ ရက်နေ့၌ ကျရောက်သည့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် မွေးနေ့တွင် ကဗျာရွတ်ဖတ် ဂုဏ်ပြုခဲ့သဖြင့် ရိုက်နှက်တိုက်ပိတ် ခံထားရခြင်း ဖြစ်သည်။   ဇူလိုင်လ ၂ ရက်နေ့ အထိ တိုက်ပိတ်ခံထားရသည့် နိုင်ကျဉ်းများအား ဆေးကုသခွင့် မပေးဘဲ ထောင်ဝင်စာနှင့် ပါဆယ်များလည်း ပိတ်ထားသဖြင့် အကူညီများ လိုအပ်နေကြသည်ဟု အကျဉ်းဦးစီးနှင့် နီးစပ်သူများက ပြော သည်။   အဆိုပါ ဖြစ်စဉ်မှာ ထောင်စည်းမျဉ်းစည်းကမ်းများ ချိုးဖောက်ခြင်း၊ ထောင်၏ လုံခြုံရေး ပေါက်ကြားသည့် ကိစ္စရပ်များ မဟုတ်သဖြင့် တိုက်ပိတ်သည့် ပြစ်ဒဏ်အား လက်မခံနိုင်ဟု PPNM တာဝန်ရှိသူများက ဆို သည်။   မရောင်နီလင်းက “မြန်မာနိုင်ငံလုံးဆိုင်ရာ နိုင်ငံရေးအကျည်းသားများ ကွန်ယက်အနေနဲ့ ဒီလိုမျိုး ကဗျာလေး ဖတ်ရုံမျှနဲ့ပေါ့နော်။ လူအခွင့်ရေး ချိုးဖောက်နေတဲ့ အကစဝန်ထမ်းတွေ၊ အာဏာပိုင်တွေပေါ့နော် ကျနော်တို့ လူအခွင့်ရေး ပြန်လည်ရရှိတဲ့ အချိန်မှာ တရားမျှတမှု ပြန်လည် ရရှိရန်အတွက် ကြိုးစားအားထုတ်သွား ပါမယ် ရှင့်။ ကြိုးစားဆောင်ရွက်သွားပါမယ်” ဟု ဆက်ပြောသည်။ 
စစ်ကိုင်းတိုင်း၊ မုံရွာထောင်မှ မန္တလေးတိုင်း၊ အိုးဘိုထောင်သို့ ပြောင်းရွှေ့လာသည့် နိုင်ငံရေးအကျဉ်းသားများ အပါအဝင် အကျဉ်းသား ၂၀၀ ခန့်မှာ ဇွန် ၁၂ ရက်နေ့တွင် ရိုက်နှက်ခံခဲ့ရပြီး ရိုက်နှက်ခံရသူများအတွင်း မုံရွာသပိတ်ခေါင်းဆောင် ကိုဝေမိုးနိုင်မှာ သွေးထွက်လွန်မှုကြောင့် သတိလစ်သွားခဲ့သည်။   အလားတူ မြန်မာတစ်နိုင်ငံလုံးရှိ စစ်ကောင်စီ ထိန်းချုပ်ထားနိုင်ဆဲဖြစ်သော အကျဉ်းထောင်များတွင်လည်း ဒေါ်အောင်ဆန်းစုကြည် မွေးနေ့၌ ကမ်ပိန်း ပြုလုပ်သူများ၊ ကဗျာရွတ်ဖတ်သူများ၊ သံချပ်ထိုးသူများကိုလည်း ဖိနှိပ်မှုများ ပြုလုပ်ခဲ့သေးသည်ဟု ထောင်နှင့် နီးစပ်သူများက ဆိုကြသည်။

ဒေါ်အောင်ဆန်းစုကြည် မွေးနေ့ ကဗျာရွတ်သော နိုင်ကျဉ်းများ တိုက်ပိတ်ခံရ

ဒေါ်အောင်ဆန်းစုကြည် မွေးနေ့ ကဗျာရွတ်သော နိုင်ကျဉ်းများ တိုက်ပိတ်ခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃ ရက်။  ဒေါ်အောင်ဆန်းစုကြည် …

  • July 3, 2025
စစ်မှုထမ်း စုဆောင်းရာတွင် လာဘ်ယူမှုဖြင့် အုပ်ချုပ်ရေးမှူး နှစ်ဦး ဖမ်းဆီး စစ်ဆေးခံရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။   စစ်မှုထမ်း စုဆောင်းရာတွင် လာဘ်ယူမှုဖြင့် ရှမ်းပြည်၏ မြို့တော်၊ တောင်ကြီးတွင် အုပ်ချုပ်ရေးမှူး ၂ ဦးအား ပြည်သူ့စစ်မှုထမ်း စုဆောင်းရေးဗဟိုမှ ဖမ်းဆီးစစ်ဆေးနေသည်ဟု အုပ်ချုပ်ရေးအဖွဲ့နှင့် နီးစပ်သူများက ပြောသည်။   တောင်ကြီးမြို့၊ စိန်ပန်းရပ်ကွက် အုပ်ချုပ်ရေးမှူး ဦးသန်းရွှေနှင့် ရွှေတောင်ရပ်ကွက် အုပ်ချုပ်ရေးမှူး ဦးသောင်းရွှေ တို့အား စစ်မှုထမ်း ကင်းလွတ်ခွင့် ပေးမည်ဟုဆိုကာ သိန်း ၁၀၀ ကျပ် လာဘ်ယူခဲ့သည့်အတွက် မိသားစုဝင်များမှ တိုင်ကြားထားခြင်း ဖြစ်သည်။   ရွှေတောင်ရပ်ကွက်ရုံးနှင့် နီးစပ်သူ တစ်ဦးက “အုပ်ကြီးက သိန်းတစ်ရာပေးရင် စစ်မှုထမ်းလွတ်မယ်ဆိုပြီး တောင်းတာ။ တကယ်တမ်း ခေါ်တဲ့အခါမှ ပါသွားတော့ မကျေနပ်တော့ ရပ်စောက် ဗထူးတပ်ကို လှမ်းတိုင်တာ။ ဟိုကလည်း သူတို့ကိုင်လို့မရတော့ နေပြည်တော်တင်လိုက်တာ။ အခုတော့ နေပြည်တော် ပို့လိုက်ပြီ” ဟု ပြော သည်။   စစ်မှုထမ်း မဲပေါက်သည့် ကရင်နီ စစ်ဘေးရှောင် လူငယ်တစ်ဦးမှာ ဇွန်လအတွင်း တောင်ကြီးမြို့ ကံကြီးရပ်ကွက် တွင် တိမ်းရှောင်နေစဉ် အုပ်ချုပ်ရေးမှူး ၂ ဦးက သိန်း ၁၀၀ ကျပ် တောင်းခံ၍ အညီအမျှ ခွဲယူခဲ့သည်ဟု ဆိုသည်။   သို့ရာတွင် မိသားစုဝင်များမှ တိုင်ကြားမှုကြောင့် တောင်ကြီးမြို့ အမှတ် ၁ ရဲစခန်းတွင် စစ်ဆေးခဲ့ပြီးနောက် ယခု ဇူလိုင်လတွင် ပြည်သူ့စစ်မှုထမ်း ခေါ်ယူရေးအဖွဲ့ ဗဟိုသို့ ဆက်လက်ပို့ဆောင်ကာ စစ်ဆေးနေခြင်း ဖြစ်သည်။   စိန်ပန်းရပ်ကွက်အတွင်း နေထိုင်သည့် စစ်မှုထမ်းအကျုံးဝင်သူ တစ်ဦးက “မဲပေါက်တဲ့လူက ပေးစရာမရှိတော့ မြေကွက်ရောင်းပြီး ပေးလိုက်တာ။ အဲ့ဒါ Facebook မှာ တင်ကြတော့ ဟိုးလေးတကျော် ဖြစ်သေးတယ်။ သတင်းထွက်လို့ ဖမ်းတာတော့ မဟုတ်ပါဘူး။ ဖမ်းမယ်ဆိုရင် သတင်းထွက်နေတာက သန်းရွှေတစ်ယောက်ထဲ မဟုတ်ဘူးလေ။ တိုင်ပြီး တော်တော်ကြာတော့မှ ခေါ်စစ်တာပါ” ဟု ပြောသည်။   စိန်ပန်းနှင့် ရွှေတောင်ရပ်ကွက်မှာ ခြံစည်းရိုးချင်း ထိစပ်လျက်ရှိပြီး အုပ်ချုပ်ရေးမှူး ၂ ဦးမှာလည်း ဆွေးမျိုး တော်စပ်သည်ဟု ပုဂ္ဂိုလ်ရေးအရ နီးစပ်သူများက ဆိုကြသည်။   ရွှေတောင်ရပ်ကွက်ရုံးနှင့် နီးစပ်သူ တစ်ဦးက “အရင်နှစ်ကလည်း လက်နက်မှောင်ခိုမှုနဲ့ ရဲက ခေါ်စစ်သေးတယ်။ သူတို့ချင်း လက်ဝါးရိုက်ထားတော့ ပြန်လွတ် လာတာ။ ရဲက အာရကေ (ပိုက်ဆံ) ဆို သိပ်ကြိုက်တာလေ။ ဒီတခါလည်း ပြန်လွတ်မယ် ထင်တယ်။ သူတို့ လူပဲလေ ထောင်မချလောက်ပါဘူး” ဟု ဆက်ပြောသည်။   ရွှေတောင်နှင့် စိန်ပန်းရပ်ကွက်တို့တွင် စစ်မှုထမ်းကြေးအတွက် အိမ်ထောင်စုတိုင်းမှ အနည်းဆုံး လစဉ် ၃ သောင်းကျပ် ထည့်ဝင်နေရပြီး မဲပေါက်သူများမှာ သိန်းဂဏန်းအထိ ပေးဆောင်နေရကြရသည်။   အမျိုး၊ ဘာသာ၊ သာသနာအဖွဲ့၏ ပြည်နယ်ခေါင်းဆောင် ဖြစ်သည့် ဦးသန်းရွှေမှာ လက်ရှိ မြို့နယ် စစ်မှုထမ်း ခေါ်ယူရေးအဖွဲ့နှင့် ဒေသတွင်း ပျူစောထီး ခေါင်းဆောင်လည်း ဖြစ်ပြီး တောင်ကြီးမြို့အတွင်း လက်နက် ကိုင်ဆောင်ခွင့် ရထားသည့် တစ်ဦးတည်းသော အုပ်ချုပ်ရေးမှူး ဖြစ်သည်ဟု ဆိုကြသည်။   တောင်ကြီးမြို့က စိန်ပန်း၊ ရွှေတောင်နှင့် ရတနာသီရိရပ်ကွက်တို့၏ အုပ်ချုပ်ရေးမှူးများမှာ ပြည်သူ့စစ်မှုထမ်း ဥပဒေ စတင်ကတည်းက လာဘ်ပေးလာဘ်ယူမှု အများဆုံး နာမည်ဆိုးဖြင့် ကျော်ကြားသူများ ဖြစ်ကြသည်ဟု မြို့နေပြည်သူများက ပြောသည်။

စစ်မှုထမ်း စုဆောင်းရာတွင် လာဘ်ယူမှုဖြင့် အုပ်ချုပ်ရေးမှူး နှစ်ဦး ဖမ်းဆီး စစ်ဆေးခံရ

စစ်မှုထမ်း စုဆောင်းရာတွင် လာဘ်ယူမှုဖြင့် အုပ်ချုပ်ရေးမှူး နှစ်ဦး ဖမ်းဆီး စစ်ဆေးခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၃ ရက်။  စစ်မှ…

  • July 3, 2025
×Close