သတင်း

တရုတ်က TNLA နှင့် စစ်ကောင်စီကို သီးခြားစီ တွေ့ဆုံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၈ ရက်။   နှစ်ဖက်ကြား တိုက်ပွဲများ ဖြစ်ပွားနေသည့် စစ်ကောင်စီတပ်နှင့် တအာင်းအမျိုးသား လွတ်မြောက်ရေး တပ်မ တော် TNLA တို့သည် ဇူလိုင်လအတွင်း တရုတ်နှင့် သီးသန့်စီ တွေ့ဆုံဆွေးနွေးမှုများ လုပ်ခဲ့ကြသည်။   စစ်ကောင်စီနှင့် တအာင်းတပ် (PSLF/TNLA) တို့ အကြား လာမည့်သြဂုတ်လတွင် ပြုလုပ်မည့် တွေ့ဆုံဆွေးနွေးမှု မတိုင်ခင် တရုတ်နှင့် တွေ့ဆုံခဲ့ခြင်း ဖြစ်သည်ဟု PSLF/TNLA ပြောရေးဆိုခွင့်ရှိသူ လွေးယေဦးက ဇူလိုင်လ ၅ ရက်နေ့တွင် လုပ်ခဲ့သည့် အွန်လိုင်း သတင်းစာရှင်းလင်းပွဲတွင် ပြောသည်။   “ဒီကြားမှာတော့ ဒီတိုက်ပွဲတွေ ရပ်ဖို့၊ တစ်ဖက်နဲ့ တစ်ဖက် ထိုးစစ်ဆင်မှုတွေ မလုပ်ဖို့ တရုတ်အစိုးရကနေ တစ်ဆင့် ကြားဝင်ပြီးတော့မှ စေ့စပ်ဆောင်ရွက်တာမျိုးတွေ ရှိပါတယ်။ ပြီးခဲ့တဲ့ ဒီရက်အတွင်းမှာပဲ ကျမတို့ PSLF/TNLA ကို တွေ့ဆုံ ခေါ်ယူပြီးတော့မှ ကျမတို့ ဒီအပစ်ရပ်တွေ၊ အပစ်တွေ ရပ်ကြဖို့၊ ထိုးစစ်ဆင်မှုတွေ မလုပ်ကြဖို့ပေါ့နော်။”   အဆိုပါ တွေ့ဆုံမှုသည် မြေပြင်တွင် တိုက်ပွဲများ ဆက်လက် ပြင်းထန်နေချိန်တွင် တွေ့ဆုံခဲ့ခြင်း ဖြစ်ပြီး နှစ်ဖက် အကြား တင်းမာမှုများ လျှော့ချနိုင်ရေးအတွက် အရေးပါသော ခြေလှမ်းတစ်ရပ်အဖြစ် လွေးယေဦးက ပြော သည်။   “တရုတ် အစိုးရရဲ့ ကြားဝင်စေ့စပ်မှုကတော့ အတော်လေး ခရီးရောက်ပါတယ်။ ကျမတို့ တစ်ဖက်နဲ့တစ်ဖက် ဒီအပစ်ရပ်နိုင်ဖို့လည်း ကြိုးပမ်းဆောင်ရွက် နေတာမျိုးတွေ ရှိပါတယ်။”   ပြီးခဲ့သည့် ရက်ပိုင်းအတွင်း တရုတ်အစိုးရသည် PSLF/TNLA ၏ ဗဟိုကိုယ်စားလှယ်များကို ခေါ်ယူတွေ့ဆုံခဲ့ပြီး အဓိက အားဖြင့် အပစ်အခတ်ရပ်စဲရေး၊ အရပ်သား ပြည်သူများ၏ လုံခြုံရေးနှင့် နယ်စပ်ဒေသ တည်ငြိမ်ရေး တို့ကို ဆွေးနွေးခဲ့ကြောင်း လွေးယေဦးက ပြောသည်။   ထို့အပြင် တရုတ်အစိုးရသည် စစ်ကောင်စီနှင့်လည်း အလားတူ တွေ့ဆုံမှုမျိုး ပြုလုပ်ခဲ့ကြောင်း ပြောဆိုခဲ့သော် လည်း စစ်ကောင်စီဘက်မှ တစ်စုံတစ်ရာ ထုတ်ဖော်ပြောဆိုမှုများ မရှိသေးပေ။   အထက်ပါ တွေ့ဆုံမှုများသည် PSLF/TNLA နှင့် စစ်ကောင်စီတို့ကြား တိုက်ရိုက် တွေ့ဆုံဆွေးနွေးခဲ့ခြင်း မဟုတ် ဘူးဟု ဆိုသည်။ 
လက်ရှိ စစ်ရေး၊ နိုင်ငံရေး အခြေအနေ အရပ်ရပ်အား လာမည့် သြဂုတ်လတွင် ပြုလုပ်ရန် စီစဉ်ထားသော တအာင်းတပ် PSLF/TNLA နှင့် စစ်ကောင်စီတို့ အကြား တရားဝင် တွေ့ဆုံဆွေးနွေးပွဲ အပေါ်သာ မူတည်နေသည် ဟု လွေးယေဦးက ဆိုသည်။   “လာမယ့် သြဂုတ်လမှာ ဒီတွေ့ဆုံဆွေးနွေးမှုကတော့ ဒီသက်ရောက်မှုကတော့ ဘယ်လို ရှိနိုင်မလဲဆိုတာ ကျမတို့ မပြောတတ်သေးဘူး ပေါ့နော်။ အားလုံးကတော့ ဒီစောင့်ကြည့်နေတဲ့ အခြေအနေမျိုး ဖြစ်တယ်။”   မြေပြင်တွင် တိုက်ပွဲများ ဆက်လက် ဖြစ်ပွားနေခြင်းသည် တွေ့ဆုံဆွေးနွေးရေး လုပ်ငန်းစဉ်အတွက် အဓိက စိန် ခေါ်မှု တစ်ရပ်ဖြစ်နေပြီး နှစ်ဖက်အကြား ယုံကြည်မှု တည်ဆောက်နိုင်ရေး အတွက် စိန်ခေါ်မှုအဖြစ် ရှိနေသည်ဟု ဆိုသည်။   တရုတ်နိုင်ငံ၏ ကြားဝင်စေ့စပ်မှုသည် ရှမ်းပြည် မြောက်ပိုင်းရှိ ပဋိပက္ခများကို ဖြေရှင်းရာတွင် အရေးပါသော အခန်းကဏ္ဍမှ ပါဝင်နေပြီး နယ်စပ်ဒေသ တည်ငြိမ်ရေးနှင့် ကုန်သွယ်ရေး လမ်းကြောင်းများ ပုံမှန် ပြန်လည်ပတ် နိုင်ရေးအတွက် ကြိုးပမ်းနေသည်ဟု လွေးယေဦးက ပြောသည်။   လက်ရှိတွင် PSLF/TNLA အနေဖြင့် တွေ့ဆုံဆွေးနွေးရေး လမ်းကြောင်းကို ဆက်လက် ကိုင်စွဲထားသော်လည်း မြေပြင်တွင် လိုအပ်သော စစ်ရေး ပြင်ဆင်မှုများကိုလည်း ပြုလုပ်ထားကြောင်း ဆိုသည်။   လာမည့် တွေ့ဆုံဆွေးနွေးပွဲတွင် နှစ်ဖက်အကြား သဘောတူညီမှုများ ရရှိနိုင်ရေးမှာ မြေပြင် အခြေအနေများနှင့် သံတမန်ရေးရာ ကြိုးပမ်းမှုများ အပေါ်တွင် များစွာ မူတည်နေပြီး တရုတ်နိုင်ငံ၏ ဆက်လက် ကြားဝင်စေ့စပ်မှုမှာ အဆုံးအဖြတ်ပေးနိုင်သော အခန်းကဏ္ဍမှ ပါဝင်နေမည် ဖြစ်သည်ဟု TNLA က ပြောသည်။  

တရုတ်က TNLA နှင့် စစ်ကောင်စီကို သီးခြားစီ တွေ့ဆုံ

တရုတ်က TNLA နှင့် စစ်ကောင်စီကို သီးခြားစီ တွေ့ဆုံ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၈ ရက်။  နှစ်ဖက်ကြား တိုက်ပွဲများ ဖြစ်ပွားနေသည့…

  • July 8, 2025
စစ်ကောင်စီ တပ်ဖွဲ့များအနီးတွင် မနေကြရန် စလင်းကျားပေါက် အဖွဲ့ သတိပေး   သတင်းနှင့် မီဒီယာကွန်ရက်။ ၂၀၂၅ ခုနှစ်၊ ဇူလိုင်လ ၈ ရက်။   စစ်ကောင်စီ စစ်ကြောင်းများအနီး မနေကြရန်နှင့် ပြောက်ကျား စစ်ဆင်ရေး အောင်မြင်ရန်အတွက် ပြည်သူများ ပူးပေါင်းပါဝင်ကြရန် စလင်း ကျားပေါက်အဖွဲ့ သတိပေး ထုတ်ပြန်လာသည်။   မကွေးတိုင်း၊ မင်းဘူးခရိုင် မြောက်ပိုင်း၊ စလင်းမြို့နယ် အခြေစိုက် စလင်းမြို့ပြ (UG) ကျားပေါက်အဖွဲ့မှ စစ်ဆင်ရေး ရာနှုန်းပြည့်အောင်မြင်ရန်အတွက် ပြည်သူများ ပူးပေါင်းပါဝင်ကြရန် သတိပေးထုတ်ပြန်လိုက်သည်။   စလင်းမြို့ပြ (UG) ကျားပေါက်အဖွဲ့ သတင်းတာဝန်ခံ ကိုပြည်သူက “ကျနော်တို့ အနေနဲ့ကလည်း မည်သည့် နေရာမဆို ခွေး(စစ်ကောင်စီ) စစ်ကြောင်းတွေကို ဖောက်ခွဲတိုက်ခိုက်သွားမှာ ဖြစ်တဲ့အတွက် ပြည်သူတွေက လည်း ခွေးစစ်ကြောင်းနဲ့ အနီးစပ်ဆုံးနေရာတွေမှာ သွားလာဖြတ်ခြင်း လုပ်ဆောင်ခြင်း မရှိဖို့နဲ့ ပြုမူနေထိုင်ခြင်း မရှိဖို့အတွက်ကို ကျနော်တို့ကတော့ မေတ္တာရပ်ခံ တိုက်တွန်းထားပါတယ် ခင်ဗျာ” ဟု ပြောသည်။   စလင်းမြို့နယ်ရှိ ပြည်သူများမှာ စစ်ကောင်စီနှင့် နီးကပ်စွာ သွားလာ လှုပ်ရှားနေရသဖြင့် ထိခိုက်မှု မရှိစေရေး အတွက် ဇူလိုင်လ ၇ ရက်နေ့တွင် သတိပေး ထုတ်ပြန်ရခြင်း ဖြစ်သည်ဟု ဆိုသည်။   ဇူလိုင်လ ၆ ရက်နေ့၊ နံနက် ၁၀ နာရီဝန်းကျင် အချိန်ခန့်တွင် စလင်းမြို့နယ်၊ ထန်းလေးပင်ကုန်းအထွက်၊ ညောင် ပင်သာကျောင်းဘေး၌ ပေါ်တာဆွဲနေသည့် အင်အား ၅၀ ပါ စစ်ကောင်စီ တပ်စုအား မိုင်းဆွဲတိုက်ခိုက်ခဲ့သည် ဟု စလင်းမြို့ပြ (UG) ကျားပေါက်အဖွဲ့ သတင်းတာဝန်ခံ ကိုပြည်သူက ပြောသည်။   သို့သော် ယင်းနေရာ၌ ပြည်သူများမှာ စစ်ကောင်စီတပ်နှင့် နီးကပ်စွာ ရှိနေသဖြင့် အချိန်မီ ဖောက်ခွဲခြင်း မပြုနိုင် ဘဲ အနည်းငယ် နောက်ကျခဲ့ရသည်ဟု ကိုပြည်သူက ဆက် ပြောသည်။   “ဆိုင်ကယ်တွေနဲ့ ကားတွေနဲ့ရော ဆိုတော့ ပြည်သူတွေက အနားမှာရှိတော့ ကျနော်တို့ မိုင်းကို တစ်လုံးပဲ ခွဲခဲ့ရ တာပေါ့။ အပြင်းစား မိုင်းကိုတော့ မခွဲလိုက်ရဘူးပေါ့။ မိုင်း ၂ လုံးဆင်တဲ့အထဲမှာ နည်းနည်း ကပ်သီလေးပါတဲ့ မိုင်းတစ်လုံးပဲ ရှိသေးတာပေါ့။ အဲဒီထဲမှာ ပြည်သူတွေက ခွေးနဲ့ အနီးစပ်ဆုံးနေရာ ဖြစ်နေတော့ ကျနော်တို့က ထင်သလို မိုင်းကို ခွဲလို့ မရဘူးပေါ့။ ပြည်သူတွေ အခြေအနေ ကြည့်ပြီးမှ ခွဲခဲ့ရတာဆိုတော့ ထိခိုက်သေဆုံးမှုက တော့ ခွေးတွေဖက်က မရှိခဲ့ပါဘူးဗျာ။”   စစ်ဆင်ရေး အပြီးတွင် အနီးနားရှိ ပြည်သူများအား ရိုက်နှက် စစ်ဆေးခဲ့ပြီး ထန်းလေးပင်ကုန်း ဒေသခံ အသက် ၃၅ နှစ်အရွယ် အမျိုးသမီးတစ်ဦးအား စစ်ကောင်စီတပ်က အဓမ္မဖမ်းဆီး ခေါ်ဆောင်သွားသည်ဟု မျက်မြင်တွေ့ ရှိသူ အချို့က ပြောသည်။   လာမည့် ရက်ပိုင်းများအတွင်း အကြီးစား စစ်ဆင်ရေးအဖြစ် စစ်ကောင်စီက သွားလာလှုပ်ရှားနေသည့် နေရာများ အား အချိန်၊ နေရာမရွေး ဖောက်ခွဲတိုက်ခိုက်သွားမည် ဖြစ်သည့်အတွက် ရဲတပ်ဖွဲ့ဝင်များ နှင့် စစ်ကောင်စီ တပ်ဖွဲ့ များ၏ အနီးနားတွင် လှုပ်ရှားသွားလာခြင်း မလုပ်ကြရန် စလင်းမြို့ပြ (UG) ကျားပေါက်အဖွဲ့ စစ်ရေးဖော်ဆောင် သူများက ပြင်းပြင်းထန်ထန် သတိပေးထားသည်။   ဇူလိုင်လ ၄ ရက်နေ့၊ ညကလည်း စလင်းမြို့ တောင်ဘက်အထွက်၊ အားကစားကွင်းဘေးတွင် စစ်ကောင်စီ တပ်ဖွဲ့ တင် ၁၅ ဦးဝန်းကျင် ရှိနေသည့် ဂိတ်စခန်း တစ်ခုအား အပြင်းစားမိုင်းဖြင့် ဖောက်ခွဲ တိုက်ခိုက်ခဲ့ရာ ဗိုလ်မှူး မိုးဝေယံလင်း အပါအဝင် ၆ ဦးခန့် ပြင်းထန်ဒဏ်ရာများ ရရှိခဲ့သည်ဟု တပ်ဖွဲ့ တာဝန်ရှိသူများက ပြောသည်။

စစ်ကောင်စီ တပ်ဖွဲ့များအနီးတွင် မနေကြရန် စလင်းကျားပေါက် အဖွဲ့ သတိပေး

စစ်ကောင်စီ တပ်ဖွဲ့များအနီးတွင် မနေကြရန် စလင်းကျားပေါက် အဖွဲ့ သတိပေး သတင်းနှင့် မီဒီယာကွန်ရက်။၂၀၂၅ ခုနှစ်၊ ဇူလိုင်လ ၈ ရက်။  စစ်ကောင်စီ စစ်ကြောင်း…

  • July 8, 2025
စစ်မှုထမ်း တပ်သားသစ် ၅ ဦး KNU ထံ ဘက်ပြောင်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၈ ရက်။   စစ်မှုထမ်း တပ်သားသစ် စုဆောင်းခံရပြီး တနင်္သာရီမြို့နယ်ဘက်သို့ ရောက်ရှိနေသည့် စစ်ကောင်စီ တပ်သား ၅ ဦး ကရင်အမျိုးသား အစည်းအရုံး KNU တပ်မဟာ ၄ ထံ ဘက်ပြောင်း ခိုလှုံလာသည်။   KNU တပ်မဟာ ၄၊ လက်အောက်ခံ KNLA တပ်ရင်း ၁၁ ထံဘက်ပြောင်း ခိုလှုံ လာခြင်း ဖြစ်သည်ဟု မြိတ် - ထားဝယ်ခရိုင် ၏ အတွင်းရေးမှူး ပဒိုစောအယ်နားက ပြောသည်။   ထိုင်း - မြန်မာ နယ်စပ်ကုန်သွယ်ရေး လမ်းဖြစ်သည့် တနင်္သာရီမြို့နယ်၊ သိန်ခွန်းကျေးရွာရှိ ရော်ဘာခြံတစ်ခုတွင် တာဝန်ကျနေသည့် စစ်ကောင်စီတပ်ဖွဲ့ဝင် ၅ ဦးမှာ လက်နက်အချို့နှင့်အတူ ဇူလိုင်လ ၅ ရက်နေ့က ဘက်ပြောင်း ခိုလှုံလာခြင်း ဖြစ်သည်။   KNLA တပ်ရင်း ၁၁ မှ တာဝန်ရှိသူက “စစ်ကောင်စီရဲ့ အမှတ် ၁၀၃ ခြေလျင်တပ်ရင်းမှ ထားဝယ်သား အသက် ၂၃ နှစ်အရွယ် စစ်ကောင်စီ တပ်သားနဲ့ ရန်ကုန်ဘက်က အသက် ၃၂ နှစ်အရွယ် စစ်ကောင်စီတပ်သား နှစ်ယောက် က  MA-1 သေနတ် နှစ်လက်၊ ကျည်ဘောက် ၇ ခု နဲ့ ကျည် ၁၉၈ တောင့်ပါလာတယ်၊ ကျန်တဲ့ သုံးယောက် တော့ လက်နက်မပါလာဘူး” ဟု ပြောသည်။   ထွက်ပြေးခိုလှုံလာသူများမှာ ပုလောမြို့နယ်၊ ပလောက်မြို့ရှိ စစ်ကောင်စီ၏ တန်းမြင့် လေ့ကျင်းရေး သင်တန်းကျောင်း (တိုင်းဗဟို) ၁၂ တွင် အပတ်စဥ် ၈ သင်တန်း တက်ရောက်ခဲ့ရသူများ ဖြစ်သည်ဟု ဆိုသည်။   ထားဝယ်မြို့နယ်မှ နှစ်ဦး၊ မြိတ်မြို့နယ်မှ တစ်ဦး၊ ရန်ကုန်တိုင်းမှ တစ်ဦး၊ မြဝတီမြို့မှ တစ်ဦး တို့ ဖြစ်သည်ဟု KNLA တပ်ရင်း ၁၁ မှ တာဝန်ရှိသူက ဆိုသည်။   ၎င်းတို့အနေက် စစ်ကောင်စီ တပ်သားသုံးဦးမှာ အမှတ် ၁၀၃ ခြေလျင်တပ်ရင်း မြိတ်မြို့မှ တစ်ဦးနှင့် ထားဝယ် (ပင်လယ်ပြင် စိုးမိုးရေး) အမှတ်၂၆၇ ခြေလျင်တပ်ရင်းမှ နှစ်ဦးတို့ ဖြစ်ပြီး အသက် ၂၀ ကျော် အရွယ်များ ဖြစ်ကြကြောင်း ဆိုသည်။   ထွက်ပြေးလာသူများထဲမှ တပ်သားနှစ်ဦးမှာ ထိုင်းနိုင်ငံ၊ ရနောင်းမြို့မှ ပြန်ပို့ခံရသူများ ဖြစ်ကြပြီး ကျန်သုံးဦးမှာ ပေါ်တာဆွဲခံရသူများ ဖြစ်ကြသည်။   တနင်္သာရီမြို့နယ်တွင် ဇူလိုင်လ ပထမပတ်အတွင်းမှာပင် ပြည်သူ့ကာကွယ်ရေး တပ်ဖွဲ့များထံ ဘက်ပြောင်းခိုလှုံ လာသည့် စစ်ကောင်စီတပ်သား ခုနှစ်ဦး အထိ ရှိလာပြီဖြစ်သည်။  

စစ်မှုထမ်း တပ်သားသစ် ၅ ဦး KNU ထံ ဘက်ပြောင်း

စစ်မှုထမ်း တပ်သားသစ် ၅ ဦး KNU ထံ ဘက်ပြောင်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၈ ရက်။  စစ်မှုထမ်း တပ်သားသစ် စုဆောင်းခံရပြီး တနင်္သာ…

  • July 8, 2025
ကရင်နီပြည်ရှိ လွတ်မြောက်နယ်မြေ တစ်နေရာတွင် ၆၃ နှစ်ပြည့် ဆဲလ်ဗင်းဇူလိုင် အထိမ်းအမှတ်နေ့ အခမ်းအနား ကျင်းပပြုလုပ် ( ဓာတ်ပုံသတင်း)   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၇ ရက်။   ကရင်နီပြည်ရှိ လွတ်မြောက်နယ်မြေ တစ်နေရာတွင် ဇူလိုင်လ ၇ ရက်နေ့ (ယနေ့)တွင် ကျရောက်သော ၆၃ နှစ်ပြည့် ဆဲလ်ဗင်းဇူလိုင် အထိမ်းအမှတ်နေ့ အခမ်းအနားကို ကျင်းပပြုလုပ်ခဲ့သည်။   ကရင်နီပြည်လုံးဆိုင်ရာ ကျောင်းသားများ သမဂ္ဂမှ ဦးဆောင်ကျင်းပခဲ့ခြင်းဖြစ်ပြီး အခမ်းအနားသို့ KSSU ၏ မိတ်ဖက်အဖွဲ့အစည်းများ၊ မျိုးဆက်ဟောင်းများနှင့် ကရင်နီပြည်ရှိ ကျောင်းသားသမဂ္ဂ အသီးသီးတို့ တက်ရောက်ခဲ့သည်။   အခမ်းအနားတွင် KSSU မှ အမှာစကားပြောကြားခြင်း၊ အဖွဲ့အသီးသီးမှ ပေးပို့လာသည့်သဝဏ်လွှာများ ဖတ်ကြားခြင်း၊ ဆဲဗင်းဇူလိုင် (7 July) ၏ သမိုင်းနောက်ခံ တင်ပြခြင်းနှင့် ကဗျာရွတ်ဆိုခြင်း စသည့်အစီ အစဉ်များ ပြုလုပ်ခဲ့သည်။ Photo - NMG

ကရင်နီပြည် လွတ်မြောက်နယ်မြေ တစ်နေရာတွင် ၆၃ နှစ်ပြည့် ဆဲလ်ဗင်းဇူလိုင် အထိမ်းအမှတ်နေ့ အခမ်းအနား ကျင်းပပြုလုပ် ( ဓာတ်ပုံသတင်း)

ကရင်နီပြည် လွတ်မြောက်နယ်မြေ တစ်နေရာတွင် ၆၃ နှစ်ပြည့် ဆဲလ်ဗင်းဇူလိုင် အထိမ်းအမှတ်နေ့ အခမ်းအနား ကျင်းပပြုလုပ် ( ဓာတ်ပုံသတင်း) သတင်းနှင့် မီဒီယာ ကွန်ရ…

  • July 7, 2025
နောင်ချိုအတွက်  စိတ်မပူကြရန် TNLA ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၆ ရက်။   စစ်ကောင်စီ ထိုးစစ် နောင်ချိုမြို့သို့ အနီးကပ် ရောက်လာနေသော်လည်း စိုးရိမ်မှု မရှိကြရန် တအာင်းတပ် TNLA က ပြောသည်။   ရှမ်းပြည်မြောက်ပိုင်း၊ နောင်ချိုမြို့နယ်တွင် စစ်ကောင်စီတပ်၏ ထိုးစစ်များ ပိုမိုပြင်းထန်လာပြီး နောင်ချိုမြို့နှင့် အနီးကပ်ဆုံး နေရာများအထိ ရောက်ရှိနေသော်လည်း ဒေသခံ ပြည်သူများ အနေဖြင့် စိုးရိမ်မှု မရှိကြရန် တအာင်း အမျိုးသား လွတ်မြောက်ရေး တပ်မတော် PSLF/TNLA က ပြောဆိုလိုက်သည်။   တအာင်းတပ် PSLF/TNLA ပြောရေးဆိုခွင့်ရှိသူ လွေးယေဦးက “ဒီလိုမျိုး နောင်ချိုကို လက်လွှတ်ပေးရတာမျိုး၊ ဆုံးဖြတ်ချက်ချထားတာမျိုးတွေလည်း မရှိသေးဘူး ပေါ့နော်။ ကျွန်မတို့က လက်ရှိကတော့ အကောင်းဆုံးနဲ့ ကျွန်မတို့ ရှိတဲ့ ဒီခုခံကာကွယ်မှုကိုလည်း ကျွန်မတို့ ပြင်ဆင်ထားပါတယ်” ဟု ပြောသည်။   ပလောင်ပြည် လွတ်မြောက်ရေးတပ်ဦး/တအာင်းတပ်မတော် (PSLF/TNLA) ပြောရေးဆိုခွင့်ရှိသူက ဇူလိုင်လ ၅ ရက်နေ့တွင် လုပ်သည့် အွန်လိုင်း သတင်းစာရှင်းလင်းပွဲတွင် ပြောဆိုလိုက်ခြင်း ဖြစ်သည်။   စစ်ကောင်စီ၏ ထိုးစစ်သည် နောင်ချိုမြို့နှင့် အနီးသို့ ရောက်ရှိလာနေပြီး မြို့၏ အနောက်တောင်ဘက် ၇.၄ မိုင် (၁၁.၉ ကီလိုမီတာ) ခန့် အကွာ အုမ္မခါးကျေးရွာတွင် ရောက်ရှိနေပြီး မြို့၏ တောင်ဘက် ၄.၃၅ မိုင် (၇ ကီလိုမီ တာ) ခန့်အကွာ နောင်လင်းကျေးရွာတွင်လည်း ရောက်ရှိနေပြီ ဖြစ်သည်။   အဆိုပါ ကျေးရွာများအနီး၌ စစ်ကောင်စီတပ်သည် ဆက်လက် ထိုးစစ်ဆင်နေပြီး နှစ်ဖက်ကြား တိုက်ပွဲများ လည်း ပြင်းထန်စွာ ဖြစ်ပွားနေသည်။   လက်ရှိတွင် တိုက်ပွဲများကြောင့် မြို့ခံပြည်သူများကို ဘေးလွတ်ရာသို့ ရွှေ့ပြောင်းနေကြရရန် တအာင်းတပ် TNLA က သတိပေးထားသည်။   စစ်ကောင်စီတပ်သည် နောင်ချိုမြို့ပြင်ရှိ ဒေသများထဲသို့ စစ်အင်အား ဖြည့်တင်းမှုများ ပြုလုပ်နေပြီး လေ ကြောင်းမှ တစ်ဆင့်လည်း ထောက်ပံ့ရေး ပစ္စည်းများ ချပေးနေကြောင်း TNLA က ဆိုသည်။   စစ်ကောင်စီ တပ်များသည် မန္တလေး - လားရှိုး - မူဆယ် ကုန်သွယ်ရေး လမ်းမကြီးနှင့် ရပ်စောက် - ကျောက်ဂူ -နောင်ချို လမ်းမကြီးတို့မှ တစ်ဆင့် နောင်ချိုမြို့ဘက်သို့ ဦးတည် ထိုးစစ်ဆင်လျက်ရှိသည်။   တိုက်ပွဲများသည် နောင်ချိုမြို့မှ ၁၀ ကီလိုမီတာပင် မဝေးသော ကန်ကြီးကျေးရွာတွင်လည်း ပြင်းထန်နေသည်။   လွေးယေဦးက “ဒီအပေါ်မှာတော့ လူထုအနေနဲ့ စိုးရိမ်စရာမရှိဘူးလို့တော့ မြင်ပါတယ်။ ပြီးတော့ စကစကနေ ဖြန့်နေတဲ့ ဒီလော်ဘီ စစ်သတင်းတွေလည်း ဒီအပေါ်မှာတော့ လူထုအနေနဲ့ သတိဝီရိယရှိဖို့တော့ လိုအပ်ပါတယ်” ဟု ဆက်ပြောသည်။   စစ်ကောင်စီက နောင်ချိုမြို့ အပါအဝင် တအာင်းတပ် TNLA က ထိန်းချုပ်ထားသော မြို့များမှ ပြန်လည် ဆုတ်ခွာ ပေးရန် တောင်းဆိုခဲ့သော်လည်း TNLA က လက်မခံခဲ့သောကြောင့် မြေပြင်၌ တိုက်ပွဲများ ဆက်လက် ပြင်းထန် နေခြင်း ဖြစ်သည်။   ပြီးခဲ့သည့် ဇွန်လအတွင်း၌ နောင်ချိုမြို့နယ်ထဲ့ ကန်ကြီး၊ ညောင်တော၊ ရှောက်ခြံ၊ ပိန္နဲကုန်း၊ ထွေသွန်း၊ လက်ပံ ကုန်း၊ သရက်ကုန်း၊ အုမ္မတီး၊ အုမ္မခါး၊ ခါလီကုန်း၊ ရေမောင်းတန်း၊ ကုလားထိုး၊ ဉာဏ်တော၊ ဂန့်ကော်၊ ဆမ္မဆယ်၊ ရွှေညောင်ပင်၊ လုံဝယ်၊ လုံစုံ၊ နောင်ရဲ၊ နောင်အော်၊ နောင်လင်၊ နောင်ဖာနှင့် မျက်ချီးနု ကျေးရွာများတွင် နှစ်ဖက် ကြား တိုက်ပွဲဖြစ်ပွားခဲ့သည်ဟု TNLA က ပြောသည်။   စစ်ကောင်စီ၏ လက်ရှိ အနေအထားနှင့် ထိုးစစ်အရှိန်ကို ကြည့်ပါက နောင်ချိုမြို့ကို အလုံးစုံ ပြန်လည် သိမ်းပိုက် နိုင်ရေး ထိုးစစ်ဆင်နေခြင်း ဖြစ်သည်ဟု စစ်ရေး ကျွမ်းကျင်သူ အချို့၏ သုံးသပ်ကြသည်။   နောင်ချိုမြို့ကို ၁၀၂၇ စစ်ဆင်ရေးအတွင်း ၂၀၂၄ ခုနှစ်၊ ဇူလိုင်လ ၁၀ ရက်နေ့တွင် တအာင်းတပ် TNLA က သိမ်း ပိုက်ရရှိခဲ့ခြင်း ဖြစ်ပြီး စစ်ကောင်စီက ယခုနှစ် အစောပိုင်းမှစတင်၍ ပြန်လည်ထိုးစစ်ဆင်လာခြင်း ဖြစ်သည်။

နောင်ချိုအတွက်  စိတ်မပူကြရန် TNLA ပြော

နောင်ချိုအတွက်  စိတ်မပူကြရန် TNLA ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၆ ရက်။  စစ်ကောင်စီ ထိုးစစ် နောင်ချိုမြို့သို့ အနီးကပ် ရော…

  • July 6, 2025
လုပ်သက်ရင့် ရဲတစ်ဦး ဘက်ပြောင်းလာ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၆ ရက်။   စစ်ကောင်စီ လက်အောက်ခံ ရဲတပ်ဖွဲ့မှ လုပ်သက်ဆယ်နှစ်ကျော် ရဲတစ်ဦး ဘက်ပြောင်း ခိုလှုံလာသည်ဟု မြိတ်ခရိုင် ကာကွယ်ရေးတပ်ဖွဲ့ တာဝန်ရှိသူက ပြောသည်။   စစ်ကောင်စီ လက်အောက်ခံ ရဲတပ်သားတစ်ဦး ပြည်သူ့ကာကွယ်ရေး တပ်မတော် (PDF)၊ မြိတ်ခရိုင်၊ အမှတ် (၃) တပ်ရင်းထံသို့ ထွက်ပြေးလာကာ ဘက်ပြောင်းခိုလှုံလာသည်ဟု တပ်ရင်း ၃ တာဝန်ရှိသူ တစ်ဦးက ပြောသည်။   မြိတ်ခရိုင် တပ်ရင်း ၃ တာဝန်ရှိသူက “သူ့မှာ လက်နက်တော့ ပါမလာဘူး၊ မတ်လကတည်းက တနင်္သာရီ မြို့နယ်ထဲကို ထွက်ပြေးလာတာ။ မိဘတွေဆီမှာ နေပြီးမှ PDF တပ်ဖွဲ့နဲ့ ချိတ်ဆက်ပြီး ဘက်ပြောင်းခိုလှုံလာတာပါ” ဟု ပြောသည်။   ကရင်ပြည်၊ လှိုင်းဘွဲ့မြို့မ ရဲစခန်းမှ အသက် ၃၅ နှစ်အရွယ် ရဲတပ်သား ရန်နိုင်လင်းသည် မိဘများရှိရာ တနင်္သာရီ မြို့နယ်သို့ ထွက်ပြေးလာပြီးနောက် ပြည်သူ့ကာကွယ်ရေးတပ်ဖွဲ့ထံ ဇူလိုင်လ ၄ ရက်နေ့က ဘက်ပြောင်း ခိုလှုံလာခြင်း ဖြစ်သည်။   ရဲတပ်သား ရန်နိုင်လင်းသည် ပြည်မြို့၊ ဝက်ထီးကန်ရှိ အမှတ် (၂) အခြေခံ ရဲလေ့ကျင့်ရေး သင်တန်းကျောင်းတွင် အပတ်စဉ် - ၂၉၂ စည်သူတပ်ခွဲ၌ သင်တန်းတက်ရောက်ခဲ့ပြီး ရဲလုပ်သက် ၁၁ နှစ်ရှိပြီ ဖြစ်သည်။   လှိုင်းဘွဲ့မြို့မရဲစခန်းတွင် တာဝန်ကျနေစဉ် စစ်ကောင်စီ၏ ပြည်သူလူထုအပေါ် အကြမ်းဖက်မှုများကို လက်မခံနိုင်သဖြင့် ထွက်ပြေးလာခြင်း ဖြစ်သည်ကို ပြောပြခဲ့သည်ဟု မြိတ်ခရိုင် တပ်ရင်း ၃ တာဝန်ရှိသူက ပြောသည်။   ဘက်ပြောင်းခိုလှုံလာသည့် ရဲတပ်သား ရန်နိုင်လင်းကို မြိတ်ခရိုင်၊ အမှတ် (၃) တပ်ရင်းမှ ကောင်းမွန်စွာ စောင့် ရှောက်ထားရှိပြီး အမျိုးသား ညီညွတ်ရေး အစိုးရ (NUG)၊ ကာကွယ်ရေး ဝန်ကြီးဌာနမှ ချမှတ်ထားသော မူဝါဒနှင့် အညီ ဆက်လက် ဆောင်ရွက်လျက်ရှိနေသည်ဟု ဆိုသည်။   တနင်္သာရီမြို့နယ် အတွင်းရှိ ပြည်သူ့ကာကွယ်ရေး တပ်ဖွဲ့များထံ ၆ လ အတွင်း ဘက်ပြောင်းခိုလှုံလာသည့် စစ်ကောင်စီ တပ်သား အယောက် ၄၀ ဦးအထိ ရှိလာနေပြီဖြစ်ကြောင်း ပြည်သူ့ကာကွယ်ရေး တပ်ဖွဲ့များ၏ ထုတ်ပြန်ချက်များအရ သိရသည်။

လုပ်သက်ရင့် ရဲတစ်ဦး ဘက်ပြောင်းလာ

လုပ်သက်ရင့် ရဲတစ်ဦး ဘက်ပြောင်းလာ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၆ ရက်။  စစ်ကောင်စီ လက်အောက်ခံ ရဲတပ်ဖွဲ့မှ လုပ်သက်ဆယ်နှစ်ကျော် ရ…

  • July 6, 2025
မြန်မာ အလုပ်သမား ၁.၈ သန်း၏ အလုပ်လုပ်ခွင့် (Work Permit) သက်တမ်းတိုးခြင်း ဩဂုတ်လတွင် ပြန်စနိုင်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၄ ရက်။   ထိုင်းနိုင်ငံရှိ အလုပ်လုပ်ကိုင်ခွင့် (Work Permit) သက်တမ်းကုန်ဆုံးသွားသည့် ရွှေ့ပြောင်းလုပ်သား ၁.၈ သန်း အတွက် သက်တမ်းတိုးသည့် လုပ်ငန်းစဉ်ကို လာမည့် ဩဂုတ်လတွင် စတင်နိုင်သည်ဟု အလုပ်သမားအရေး ကူညီဆောင်ရွက်ပေးနေသူများက ပြောသည်။   လက်ရှိတွင် ထိုင်းအစိုးရက သက်တမ်းကုန်နေသည့် ရွှေ့ပြောင်းလုပ်သားများကို ယာယီဖြေလျော့ခွင့် ၆ လ ပေးထားသည်မှာ လာမည့် ဩဂုတ်လ ၁၃ ရက်နေ့တွင် ကုန်ဆုံးတော့မည် ဖြစ်သည်။   ၎င်းတို့အား လာမည့်လအတွင်း ထပ်မံ သက်တမ်းတိုးပေးနိုင်သည်ဟု အလုပ်သမားရေး လုပ်ဆောင်နေသူ ဆူရချိုင် မင်းထွန်းက ပြောသည်။   “ထူးတာကတော့ဗျ သူတို့တွေကတော့ အခု ဒီမကြာမီလေးမှာပေါ့နော် သက်တမ်း တိုးဖို့အတွက် ကိုကတော့ ဒါအလုပ်သမား ဝန်ကြီးဌာနကလည်း ကြေညာပြီးသား ဖြစ်တယ်။ သူတို့ ဖြေလျှော့ထားတာကိုလည်း ပဲ ဒီ ၈ လပိုင်း အထိကိုပဲ ဖြေလျှော့ထားတာ ဖြစ်တဲ့ အတွက်ကြောင့်ပေါ့နော်။ နောက်ထပ် ထပ်မံပြီး နောက် ၆ လ ထပ်ဖြေလျှော့ဖို့ ဆိုတာကလည်း ဝန်ကြီးများ အစည်းအဝေး ထုတ်ပြန်ချက် နောက်ထပ်တစ်ဖန် အဆို ထပ် တင်သွင်းတာမျိုးတွေလည်း ထပ်မရှိသေးဘူး ဆိုတော့ ပေါ့နော်။ အဲဒီတော့ ဒီ ၈ လပိုင်းမှာပဲ ဒီ အတည်ပြုလို့ ရသေးတာပေါ့နော်။”   လက်ရှိတွင် သက်တမ်းကုန်ဆုံးနေသော စာရွက်စာတမ်းများကြောင့် အလုပ်သမားများ၏ ဘဏ်အကောင့်များ အပိတ်ခံရခြင်း၊ အလုပ်ပြောင်းရွှေ့ရာတွင် အခက်အခဲဖြစ်ခြင်း၊ ယာဉ်မောင်းလိုင်စင်ကဲ့သို့သော အရေးကြီးသည့် စာရွက်စာတမ်းများ သက်တမ်းတိုး၍ မရခြင်းတို့ကြောင့် အခက်အခဲများစွာနှင့် ကြုံနေရသည်ဟု ဆိုသည်။   “အဓိကတော့ ကျနော်က ယာဉ်မောင်းလိုင်စင် လုပ်လို့မရဘူး။ ဘဏ်လည်း ဖွင့်မရဘူး။ ကျနော်တို့ကို လုပ်ပေး တဲ့ ဟာက အစကတည်းက စာရွက်စာတမ်းတွေ မစုံဘူးပေါ့လေ။ အဲ့မှာ အခက်အခဲဖြစ်နေတာ ဒီနေ့အထိပဲ။ ခရီးလည်း သွားလို့ရတယ်ဆိုပေမယ့် စာရွက်စာတမ်းက မစုံ၊ ထိုင်းစကားက ကောင်းကောင်း မတတ်တော့ ဗီဇာရအောင်ပဲ စောင့်နေရတယ်” ဟု ချင်းမိုင်မြို့က မြန်မာရွှေ့ပြောင်း အလုပ်သမား တစ်ဦးက ပြောသည်။   ထိုင်းအစိုးရအနေဖြင့် ရွှေ့ပြောင်းလုပ်သားများ၏ အခက်အခဲများကို ထိထိရောက်ရောက် ဖြေရှင်းပေးနိုင်ရန် အလုပ်သမားအရေး ဆောင်ရွက်နေသည့် အဖွဲ့အစည်းများ၊ အလုပ်ရှင်များနှင့် ဆွေးနွေးညှိနှိုင်းမှုများ ပြုလုပ်သွား ရန်လိုအပ်သည်ဟု ဆူရချိုင်မင်းထွန်းက ဆက်ပြောသည်။   “အလုပ်သမားတွေရဲ့ ပြဿနာကို တကယ် ဖြေရှင်းချင်တယ် ဆိုလို့ရှိရင်တော့ အခုလိုမျိုးပေါ့ ထိုင်းနိုင်ငံမှာရှိတဲ့ ရွှေ့ပြောင်း အလုပ်သမားအရေး လုပ်ဆောင်ပေးနေတဲ့ အဖွဲ့အစည်းတွေကို သူတို့ အစည်းအဝေးတွေ ထိုင်ပေါ့ နော်။ ပြီးလို့ရှိရင်လည်း အလုပ်ရှင်တွေနဲ့ အစည်းအဝေးတွေထိုင်။ အဘက်ဘက်ကနေ ခုံပေါ်မှာ ထိုင်ပြီးတော့ အဓိက ပြဿနာ ဖြေရှင်းမယ်ဆိုရင် ကောင်းလာမှာပါခင်ဗျ။”   မြန်မာရွှေ့ပြောင်းအလုပ်သမား ၁.၈ သန်းသည် ယခုနှစ် ဖေဖော်ဝါရီလ ၁၄ ရက်နေ့မှ စတင်ကာ အလုပ် လုပ် ကိုင်ခွင့် ဗီဇာကုန်ဆုံးခဲ့ပြီး ထပ်မံ သက်တမ်းတိုးနိုင်ရန်အတွက် စစ်ကောင်စီ နှင့် ထိုင်းအစိုးရတို့ကြား ညှိနှိုင်းရန် လိုအပ်နေသည့် ကာလတွင် ထိုင်းဘက်က ဩဂုတ်လ ၁၃ ရက်နေ့ အထိ ယာယီနေထိုင် အလုပ်လုပ်ကိုင်ခွင့် ပေးထားခြင်း ဖြစ်သည်။

မြန်မာ အလုပ်သမား ၁.၈ သန်း၏ အလုပ်လုပ်ခွင့် (Work Permit) သက်တမ်းတိုးခြင်း ဩဂုတ်လတွင် ပြန်စနိုင် 

မြန်မာ အလုပ်သမား ၁.၈ သန်း၏ အလုပ်လုပ်ခွင့် (Work Permit) သက်တမ်းတိုးခြင်း ဩဂုတ်လတွင် ပြန်စနိုင်  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၄ ရ…

  • July 5, 2025
ရှမ်း-ကရင်နီ အစပ်က စစ်ရှောင်စခန်း အကူအညီများ လိုအပ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၄ ရက်။   လမ်းပန်းဆက်သွယ်ရေး ခက်ခဲသည့် ရှမ်း-ကရင်နီအစပ်က စက်စေး စစ်ဘေးရှောင်စခန်းမှာ စားနပ်ရိက္ခာနှင့် ဆေးဝါး အကူအညီများ လိုအပ်နေကြသည်။   ရှမ်း-ကရင်နီအစပ်၊ ရှမ်းပြည်တောင်ပိုင်း၊ ဖယ်ခုံမြို့နယ်ရှိ စက်စေး စစ်ဘေးရှောင်စခန်းတွင် အကူအညီများ လိုအပ်နေကြခြင်း ဖြစ်သည်ဟု ဒေသတွင်း စစ်ဘေးရှောင် ကူညီရေး အဖွဲ့အစည်း တာဝန်ခံများက ပြောသည်။   ဖယ်ခုံမြို့တွင်းမှ စက်စေး စစ်ဘေးရှောင်စခန်းသို့ ကားဖြင့် သွားလာပါက ၂ နာရီခန့် ကြာမြင့်ပြီး ထိုမှတဖန် စခန်းသို့ ရောက်ရှိရန်အတွက် မိုးရာသီကာလများ၌ လမ်းလျှောက်ခရီးဖြင့်သာ သွားလာနိုင်သဖြင့် လမ်းပန်း ဆက်သွယ်ရေး ခက်ခဲမှုအရ အကူအညီများ လိုအပ်နေခြင်း ဖြစ်သည်။   စစ်ဘေးရှောင်စခန်းများကို လိုက်လံကူညီပေးနေသည့် Jobs For Kayah (JFK) အဖွဲ့တာဝန်ခံ တစ်ဦးက “တော် တော်ဝေးတယ်။ တကယ့် ကားလမ်းတွေ မရှိဘူးပေါ့နော်။ ဆိုင်ကယ်လမ်းလည်း အရမ်းကျဉ်းပြီးတော့ လမ်း အရမ်းဆိုးတဲ့ နေရာပေါ့။ အဲဒီ ကားလမ်းရတဲ့နေရာကနေ သူတို့ စခန်းကို သွားမယ်ဆိုရင် ဆိုင်ကယ်နဲ့ ဆိုရင် တော့ မိုးရာသီ မဟုတ်ရင် နာရီဝက်လောက် မောင်းရမှာပေါ့နော်။ ဒါပေမယ့် အခု ကျနော်တို့ သွားတာတော့ ပစ္စည်းတွေ ထမ်းပြီးတော့ လမ်းလျှောက်ပြီး သွားရတာက တစ်နာရီကျော်ကျော်တော့ ကားလမ်းရတဲ့ နေရာ ကနေ သူတို့ဆီကို သွားတာပေါ့နော်” ဟု ပြောသည်။   စက်စေးစစ်ဘေးရှောင်စခန်းအား ဖယ်ခုံမြို့နယ်တွင်း ကူညီဆောင်ရွက်ပေးသည့် အဖွဲ့အစည်း တစ်ဖွဲ့သာ ရှိပြီး ထိုအဖွဲ့မှာလည်း လမ်းပန်းဆက်သွယ်ရေး ခက်ခဲသဖြင့် ပျမ်းမျှ တစ်နှစ်လျင် ၂ ကြိမ်ခန့်သာ လာရောက်နိုင်သည် ဟု ဆိုသည်။   လက်ရှိ စခန်း၌ အိမ်ထောင်စု ၁၂၆ စု၊ လူဦးရေ ၅၁၀ ဦး နေထိုင်ကြပြီး ကလေး ၁၄၅ ဦးကိုလည်း Grade 5 အထိ စာသင်ကြားပေးနိုင်သည့် ကိုယ်ထူကိုယ်ထ စာသင်ကျောင်း ဖွင့်လှစ်ထားသည်ဟု ဆိုသည်။   JFK အဖွဲ့တာဝန်ခံက “စာသင်ကျောင်းက အမိုးအကာတော့ အဆင်မပြေဘူးပေါ့နော်။ ဒါပေမယ့် လမ်းပန်း ဆက် သွယ်ရေး အရမ်း ခက်ခဲတော့ ဘယ်လိုပြောမလဲ။ ကျန်းမာရေးဆိုင်ရာ၊ ရိက္ခာပိုင်းဆိုင်ရာ အထွေထွေ ပေါ့နော်။ အဲဒါတွေ အခက်ခဲ ရှိတယ်ပေါ့နော်” ဟု ဆက်ပြောသည်။   လက်ရှိ စခန်းတွင် နေထိုင်သည့် စစ်ဘေးရှောင်များမှာ တောင်ယာစိုက်ပျိုး လုပ်ကိုင်ကြပြီး ဟင်းသီးဟင်းရွက်၊ ပြောင်းနှင့် စပါးတို့ကို အဓိက စိုက်ပျိုးကြသော်လည်း လုံလောက်မှု မရှိသည့်အပြင် ရောင်းချရန်အတွက်လည်း လမ်းပန်းဆက်သွယ်ရေး အရ ခက်ခဲမှုများ ရှိနေသည်ဟု ဆိုသည်။   ကရင်နီပြည်၊ ဒီးမော့ဆိုမြို့နယ်ရှိ စစ်ဘေးရှောင်စခန်းများတွင် အရေးပေါ် ဖြေရှင်းပေးနိုင်သည့် အဖွဲ့အစည်း အချို့ရှိသော်လည်း ဖယ်ခုံမြို့နယ်ရှိ စစ်ဘေးရှောင်စခန်းများမှာ မိုးရာသီ လမ်းပန်းဆက်သွယ်ရေး ခက်ခဲမှုအရ လူသူ အရောက်ပေါက် နည်းသဖြင့် အလှူရှင်များ လာရောက် ကူညီပေးစေလိုသည်ဟု JFK တာဝန်ရှိသူများက တောင်းဆိုထားသည်။   စက်စေး စစ်ဘေးရှောင်စခန်းတွင် ဒီးမော့ဆိုနှင့် ဖယ်ခုံမြို့နယ် အနီးတစ်ဝိုက်မှ ဒေသခံများ လာရောက်ခိုလှုံနေကြ ပြီး လက်ရှိ မိုးဗြဲတိုက်ပွဲကြောင့် စစ်ဘေးရှောင်ဦးရေ ထပ်မံတိုးလာနိုင်သည်ဟု ဒေသတွင်း ကူညီဆောင်ရွက်ပေး သည့် အဖွဲ့အစည်း တာဝန်ခံများက သုံးသပ်နေကြသည်။

ရှမ်း-ကရင်နီ အစပ်က စစ်ရှောင်စခန်း အကူအညီများ လိုအပ်

ရှမ်း-ကရင်နီ အစပ်က စစ်ရှောင်စခန်း အကူအညီများ လိုအပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၅ ရက်။  လမ်းပန်းဆက်သွယ်ရေး ခက်ခဲသည့် ရှမ်း-က…

  • July 5, 2025
လွတ်ရက်စေ့ နိုင်ကျဉ်းနှစ်ဦးကို ထောင်ဘူးဝ တွင် ပြန်ဖမ်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၄ ရက်။    သရက်ထောင်မှ လွတ်မြောက်လာသည့် နိုင်ငံရေးအကျဉ်းသား ၂ ဦး ထောင်ဗူးဝတွင် ပြန်လည် အဖမ်းခံလိုက်ရသည် ဟု အကျဉ်းဦးစီးနှင့် နီးစပ်သူများက ပြောသည်။   မကွေးတိုင်း၊ သရက်ခရိုင်၊ သရက်အကျဉ်းထောင်တွင် လွတ်ရက်စေ့သည့် နိုင်ငံရေးအကျဉ်းသား ၂ ဦး ပြန်လည် ဖမ်းဆီးခံလိုက်ရခြင်း ဖြစ်သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက် (PPNM) က ထုတ်ပြန်သည်။   PPNM ဦးဆောင် ကော်မတီဝင် ဖြစ်သူ မရောင်နီလင်းက “ပြန်ဖမ်းထားတယ်။ သရက်မြို့ရဲ့ မြို့မရဲစခန်းမှာ ဖမ်းဆီး ထိန်းသိမ်းထားတယ်လို့ သိရတယ်။ ကြားတာကတော့ စုံစမ်းသိရှိရသလောက်ဆိုရင် သူတို့ ၂ ဦးကို ၅၂ (က) ပြန်ဖမ်းခံထားရတယ်လို့ သိရှိရပါတယ်” ဟု ပြောသည်။   သရက်အကျဉ်းထောင်မှ ဇွန်လ ၁ ရက်နေ့၌ လွတ်မြောက်လာသည့် နိုင်ကျဉ်း ၄ ဦးအနက် ၂ ဦးကို စစ်ကောင်စီ လက်အောက်ခံ ထောင်အာဏာပိုင်များက ထောင်ဗူးဝတွင် ပြန်လည် ဖမ်းဆီးလိုက်ခြင်း ဖြစ်သည်။   အဆိုပါ နိုင်ကျဉ်း ၂ ဦးမှာ တရားလွှတ်တော်ရှေ့နေ ဦးထွန်းထွန်းအောင်နှင့် ကိုနိုင်လင်းထွန်းတို့ ဖြစ်ပြီး ၂၀၂၁ ခုနှစ် ဇွန်လအတွင်း ပုဒ်မ ၅၀၅-ဂ၊ မတရားအသင်းအက် ဥပဒေ ပုဒ်မ ၁၇-၁ တို့ဖြင့် ထောင်ဒဏ် ၇ နှစ်စီ ချမှတ်ခံ၍ လျှော့ရက်ဖြင့် လွတ်မြောက်လာသူများ ဖြစ်သည်ဟု ဆိုသည်။   လတ်တလောတွင် ၎င်းတို့အား ပြန်လည်ဖမ်းဆီးထားသော်လည်း ကျန်းမာရေး အခြေအနေနှင့် ထောင်ဝင်စာ များမှာ စိုးရိမ်စရာ မရှိဘူးဟု မရောင်နီလင်းက ဆက်ပြောသည်။   “အခြေအနေကတော့ ကောင်းပါတယ်။ မိသားစုနဲ့ အဆက်အသွယ် ရတာမျိုးလည်း ရှိပါတယ်။ ပြီးတော့ သရက်ထောင်မှာ ထောင်ဝင်စာ အခြေအနေကတော့ ပို့ဆောင်လို့ ရနေပါတယ်။”   ၎င်းတို့ ၂ ဦးအား ပြန်လည် ဖမ်းဆီးထားသည့် ပုဒ်မ ၅၂-က မှာ အမျိုးသားလုံခြုံရေး ထိခိုက်စေသည့်အပေါ် အရေးယူသည့် ပုဒ်မများဖြစ်ပြီး တိုင်းပြည်၏ တည်ငြိမ်မှုကို ဖျက်ဆီးသူ၊ အကြံဉာဏ်ပေးသူများအတွက် ရည်ရွယ်သည်ဟု စစ်ကောင်စီက ပြဌာန်းထားသည်။   အလားတူ ဇန္နဝါရီလ ၁၄ ရက်နေ့တွင်လည်း စစ်ကိုင်းတိုင်း၊ ရွှေဘိုထောင်မှ လွတ်မြောက်လာသည့် နိုင်ကျဉ်း ၁၀ ဦးအား ထောင်ဗူးဝတွင် ထောင်အာဏာပိုင်များက ပြန်လည်ဖမ်းဆီး၍ ရွှေဘိုရဲစခန်းတွင် ထိန်းသိမ်းခဲ့ပြီး မတရား ပုဒ်များဖြင့် နှစ်ရှည်ထောင်ဒဏ်များ ထပ်မံချမှတ်ခဲ့ရဖူးသည်။

လွတ်ရက်စေ့ နိုင်ကျဉ်းနှစ်ဦးကို ထောင်ဘူးဝ တွင် ပြန်ဖမ်း

လွတ်ရက်စေ့ နိုင်ကျဉ်းနှစ်ဦးကို ထောင်ဘူးဝ တွင် ပြန်ဖမ်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၅ ရက်။   သရက်ထောင်မှ လွတ်မြောက်လာသည့် နို…

  • July 5, 2025
×Close