သတင်း

မွန်တွင် စစ်မှူထမ်း သစ်စုဆောင်းမှု အရှိန်မြှင့်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၀ ရက်။   စစ်မှုထမ်း အပတ်စဉ် (၁၅) အတွက် စစ်ကောင်စီတပ်က မွန်ပြည်ထဲတွင် နည်းလမ်းမျိုးစုံဖြင့် အတင်း အဓမ္မ စစ်သား စုဆောင်းမှုကို အရှိန် မြှင့်လုပ်လာနေသည်ဟု မွန်ပြည် လူ့အခွင့်အရေး ဖောင်ဒေးရှင်း (HURFOM) က ပြောသည်။   မွန်ပြည်၏ မြို့တော် မော်လမြိုင်တွင် ယာဉ်စည်းကမ်း ချိုးဖောက်မှုနှင့် လိုင်စင်မဲ့ယာဉ်များကို ဖမ်းဆီးမှုများ လုပ်ချိန်၌ စစ်မှုထမ်းအတွက် လူငယ်များကို တစ်ပါတည်း ဖမ်းဆီးသွားခြင်းများ လုပ်နေသည်ဟု မွန်ပြည် လူ့အခွင့်အရေး ဖောင်ဒေးရှင်း (HURFOM) တာဝန်ရှိသူ နိုင်အဲမွန်က ပြောသည်။   “ယာဉ်စည်းကမ်း ထိန်းသိမ်းရေးနဲ့ ပတ်သက်ပြီးတော့ ကျူးလွန်တဲ့ ကိစ္စရပ်တွေမှာ ဆိုလို့ရှိရင် လူငယ်တွေပါ ဖမ်းလိုက်တာတွေ ရှိတယ်။ ဥပမာ ဆိုလို့ရှိရင် ဒီဆိုင်ကယ်ရော လူရော ဖမ်းလိုက်တဲ့ ကိစ္စတွေ ရှိလာတယ်။ အဲ့ဒါ ဘယ်လိုသွားဖြစ်လဲ ဆိုရင် အသက် ၁၈ နှစ်ကနေ အသက် ၃၅ နှစ်အတွင်း သူတို့ လိုချင်တဲ့ အသက် အကန့် အသတ် ထဲမှာရှိတဲ့ ကလေးတွေ ဆိုလို့ရှိရင် ဖမ်းလိုက်တယ်။”   ဇွန်လအတွင်း မော်လမြိုင်မြို့တွင် ယာဉ်စည်းကမ်း ချိုးဖောက်မှုနှင့် လိုင်စင်မဲ့ယာဉ်များကို ဖမ်းဆီးခံခဲ့ရသည့် အမှုပေါင်း ၅၀ ကျော်ရှိသည်ဟု နိုင်အဲမွန်က ပြောသည်။   နိုင်အဲမွန်က “ဖမ်းပြီးတော့ ဆိုင်ကယ်ရော လူရော ဖမ်းလိုက် တယ်။ ဆိုင်ကယ်သိမ်းတယ် လူဖမ်းတယ်ပေါ့နော်။ အဓိက က လူကို ဦးတည်ပြီး ဖမ်းတဲ့ ကိစ္စရပ်တွေက များလာတယ်။ ဆိုလိုတာက ဒီစစ်မှုထမ်းနဲ့ ပတ်သက်ပြီး တော့ သူတို့ မရမက လူအင်အားတွေလိုအပ်ချက်တွေကို ဖြည့်တင်းနေတဲ့သဘော သက်ရောက်နေတယ်” ဟု ဆက် ပြောသည်။   ထို့အပြင် ညအချိန်မတော် အပြင်ထွက်လည်သည့် လူငယ်များ၊ သံသယဖြင့် ဖမ်းဆီးခံရသူများနှင့် မူးယစ် ဆေးဝါး သုံးစွဲသည့် လူငယ်များကို ဆီး စစ်ကာ အမှုဖွင့်ပြီး စစ်မှုထမ်းရန် ပို့ဆောင်ခြင်းများလည်း ရှိနေသည်ဟု နိုင်အဲမွန် က ဆက်ပြောသည်။   “မူးယစ်ဆေးဝါးကို သံသယ ဖြစ်ပြီးတော့ ဖမ်းစစ်လိုက်တယ်။ ဆီးတွေ စစ်လိုက်ပြီးတော့ အဲ့မှာ မူးယစ်ဆေးဝါး သုံးစွဲနေတဲ့ ဆိုတဲ့ အဖြေတွေ့လို့ရှိရင် လူရော အဲ့ဒီအမှုပါ တပ်လိုက်တယ်။ ပြီးရင် လူကို စစ်မှုထမ်း နည်းစပ်ရာ တပ် စစ်စခန်း၊ တပ်စခန်း ဌာနချုပ်တွေ၊ တပ်ရင်း တပ်စခန်းတွေ ပို့လိုက်တယ်။ ပို့ပြီးတော့ အဲ့လိုမျိုး အဓမ္မ သွတ်သွင်းတဲ့ နည်းမျိုးစုံတွေ သုံးပြီးတော့ ကျနော်တို့  စစ်ကောင်စီကတော့ ဒီစစ်သားတွေကို အဓမ္မ စုဆောင်း နေတာကို တွေ့ရတယ်။”   မော်လမြိုင်မြို့ အပါအဝင် မွန်ပြည်ရှိ ပေါင်၊ မုဒုံ၊ သံဖြူဇရပ်၊ ကျိုက်မရော၊ ရေး နှင့် ကျိုက်ထိုမြို့နယ်ထဲတို့တွင် ထိုဖြစ်ရပ်များ ဖြစ်ပေါ်နေပြီး ဧပြီလမှ စတင်ကာ ဇွန်လကုန်အထိ ကာလအတွင်း ဖမ်းဆီးမှုက ပို၍ များလာသည် ဟု (HURFOM) က ဆိုသည်။   မွန်ပြည်အတွင်း အဓမ္မ စုဆောင်းခံရသည့် လူငယ်အများစုကို သံဖြူဇရပ်မြို့နယ်၊ ဝဲကလီကျေးရွာ အခြေစိုက် အမှတ် (၄) တပ်မတော် တန်းမြင့် လေ့ကျင့်ရေးကျောင်းသို့ ပို့ဆောင်လေ့ရှိပြီး အချို့ကို သထုံ၊ ကျိုက်မရောနှင့် တနင်္သာရီတိုင်း၊ ပုလောမြို့နယ်ရှိ လေ့ကျင့်ရေး ကျောင်းများသို့ ပို့ဆောင်နေကြောင်း နိုင်အဲမွန်က ဆိုသည်။   သင်တန်းဆင်းပြီးနောက် ၎င်းတို့ကို မွန်ပြည်နှင့် ကရင်ပြည်သို့ မပို့ဘဲ တိုက်ပွဲများ ပြင်းထန်နေသည့် ရှမ်းပြည် မြောက်ပိုင်း၊ စစ်ကိုင်းတိုင်းနှင့် မြန်မာပြည် အလယ်ပိုင်းဒေသများရှိ ရှေ့တန်း စစ်မြေပြင်များသို့ ပို့ဆောင်နေ သည့် အချက်အလက်များ ရရှိထားသည်ဟု (HURFOM) က ဆိုသည်။   ဓါတ်ပုံ -  မွန်ပြည် ဝန်ကြီးချုပ် ဦးအောင်ကြည်သိန်း နှင့် စစ်မှုထမ်း သင်တန်းသားသစ်များ (ပုံဟောင်း)  

မွန်တွင် စစ်မှူထမ်း သစ်စုဆောင်းမှု အရှိန်မြှင့်

မွန်တွင် စစ်မှူထမ်း သစ်စုဆောင်းမှု အရှိန်မြှင့် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၁၀ ရက်။  စစ်မှုထမ်း အပတ်စဉ် (၁၅) အတွက် စစ်ကောင်စ…

  • July 10, 2025
ဖားဆောင်းမြို့နယ် ရွာတရွာတွင် ဗုံးကြဲမှုကြောင့် ကလေးအပါအဝင် ၅ ဦး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၀ ရက်။   ကရင်နီပြည် ဖားဆောင်းမြို့နယ်ထဲက ကျေးရွာတစ်ရွာအား စစ်ကောင်စီတပ်က လေကြောင်းမှ ဗုံးကြဲတိုက်ခိုက်ရာ ကလေးအပါအဝင် အရပ်သား ၅ ဦး သေဆုံးခဲ့သည်။   ဖားဆောင်းမြို့နယ်၊ မော်ချီးဒေသအတွင်းက လိုလော်ထီးကျေးရွာကို ဇူလိုင်လ ၉ ရက်နေ့၊ ည ၇ နာရီခွဲ အချိန်ခန့်တွင် စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်ဟု ကရင်နီပြည် ကြားကာလ အုပ်ချုပ်ရေး ကောင် စီ (IEC) က ပြောသည်။   စစ်ကောင်စီက တိုက်ပွဲဖြစ်ပွားခြင်းမရှိဘဲ အရပ်သားပြည်သူများ နေထိုင်ရာ နေရာ၊ ကျေးရွာများသို့ လေကြောင်း တိုက်ခိုက်မှုကြောင့် လူအစုလိုက် အပြုံလိုက် သေဆုံးမှုများ ဖြစ်စေသည့်အပေါ်  (IEC) အတွင်း‌ရေးမှူး-၂ ဦးဗညား က ယခုကဲ့သို့ တောင်းဆိုသည်။   ”စစ်ကောင်စီရဲ့ လေယာဉ်ဆီ တင်သွင်းမှုကို နိုင်ငံတကာကနေ ဒီထက်မက ဒဏ်ခတ်မှုတွေ လုပ်ဖို့အတွက် နောက် ပြီးတော့မှ စစ်ကောင်စီကို လေယာဉ်ဆီ တင်ပို့နေတဲ့ ကုမ္ပဏီတွေကို ဥပဒေကြောင်းအရ အပြစ်ပေး အရေးယူ နိုင်ဖို့ တရားစွဲဆိုနိုင်ဖို့ပေါ့နော်။ အထူးသဖြင့် လူသားမျိုးနွယ်စုတွေ အပေါ်  စစ်ရာဇဝတ်မှု ကျူးလွန်နေတဲ့ စစ်ကောင်စီကို ပံ့ပိုးနေတဲ့အတွက် သူတို့မှာလည်း တာဝန်ရှိတဲ့ အတွက်ကြောင့်မို့လို့ အဲ့ဒီ ကုမ္ပဏီတွေကို  တရား ဥပဒေကြောင်းအရ အပြစ်ပေး အရေးယူဖို့အတွက် ကနဦး တောင်းဆိုလိုတယ်။”   လိုလော်ထီးကျေးရွာကို စစ်တပ်က တိုက်ပွဲ ဖြစ်ပွားခြင်းမရှိဘဲ ပေါင် ၅၀၀ ဗုံးဖြင့် လာရောက် ဗုံးကြဲတိုက်ခိုက်ခဲ့ ခြင်း ဖြစ်သည်ဟု ဆိုသည်။   ဗုံးကြဲ တိုက်ခိုက်မှုကြောင့် သေဆုံးခဲ့သူများမှာ အသက် ၃ နှစ်အရွယ် နော်ဝါးစတီးဖိုး၊ အသက် ၈ နှစ်အရွယ် နော်အဲ့အယ် နှင့် အခြား မိသားစုဝင် ၃ ဦးတို့ ဖြစ်ကြသည်။   အဆိုပါ ဗုံးကြဲတိုက်ခိုက်မှုကြောင့် ဒဏ်ရာရရှိသူ ၆ ဦးရှိသည့်အနက် အပြင်းအထန် ဒဏ်ရာရရှိသူ အမျိုးသမီး တစ်ဦးနှင့် အသက် ၁၈ နှစ်အောက်ကလေး ၃ ဦးတို့ ပါဝင်သည်။   ထို့အတူ ဒေသခံ နေအိမ် ၆ လုံး၊ ဘုရားကျောင်းဆောင်၊ ဆုတောင်းအိမ် နှင့် အသင်းတော်ရိပ်သာတို့လည်း ထိမှန် ပျက်စီးခဲ့သည်ဟု ဆိုသည်။   ဦးဗညားက “စစ်လက်နက်တွေကို ရောင်းဝယ်တာ တိုက်ရိုက်ဖြစ်စေ သွယ်ဝိုက်ဖြစ်စေ ရောင်းဝယ်တဲ့ နိုင်ငံတွေ ကို ပိုပြီးတော့ ဖိအားပေးတာတွေ ရောင်းဝယ်တဲ့ ကုမ္ပဏီကို တရားစွဲဆိုပြီးတော့မှ အရေးယူ ပိတ်ဆို့မှုတွေ လုပ် ဖို့အတွက်ကိုလည်း တောင်းဆိုလိုတယ်” ဟု ဆက်ပြောသည်။   ပြီးခဲ့သည့် ဇွန်လ ၂၅ ရက်နေ့တုန်းကလည်း မော်ချီးဒေသအတွင်းရှိ ခဲကျင်းလုပ်ကွက်များ ရှိနေသည့် နေရာကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့မှုကြောင့် ခဲကျင်းလုပ်သား အပါအဝင် ဒေသခံ ၇ ဦး သေဆုံးခဲ့ ပြီး အယောက် ၂၀ ခန့် ထိခိုက်ဒဏ်ရာ ရခဲ့သည်။   စစ်ကောင်စီတပ်က မော်ချီးဒေသအား ယခုနှစ် မတ်လမှ ဇူလိုင်လအထိ ကာလအတွင်း လေကြောင်းမှ ဗုံးကြဲ တိုက်ခိုက်မှု ၇ ကြိမ်ရှိခဲ့ပြီဟု ကရင်နီ အရပ်ဘက် အဖွဲ့အစည်းများ၏ စာရင်များအရ သိရသည်။  

ဖားဆောင်းမြို့နယ် ရွာတရွာတွင် ဗုံးကြဲမှုကြောင့် ကလေးအပါအဝင် ၅ ဦး သေဆုံး 

ဖားဆောင်းမြို့နယ် ရွာတရွာတွင် ဗုံးကြဲမှုကြောင့် ကလေးအပါအဝင် ၅ ဦး သေဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၀ ရက်။  ကရင်နီပြည် ဖာ…

  • July 10, 2025
လေကြောင်း တိုက်ခိုက်မှုကြောင့် မိုးကုတ်မှ ကလေး ၅ ဦး သေ၊ ၅ ဦး ဒဏ်ရာရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၀ ရက်။ 
မန္တလေးတိုင်း၊ ပြင်ဦးလွင်ခရိုင်၊ မိုးကုတ်မြို့တွင် စစ်ကောင်စီတပ်၏ လေကြောင်း တိုက်ခိုက်မှုကြောင့် ကလေး ၅ ဦး သေဆုံးပြီး ၅ ဦး ပြင်းထန်ဒဏ်ရာများ ရရှိသည်ဟု ဒေသတွင်း နီးစပ်သူများက ပြောသည်။   ယမန်နေ့ ဝါဆိုလပြည့်နေ့ (ဇူလိုင်လ ၉ ရက်နေ့) ည ၈ နာရီဝန်းကျင် အချိန်ခန့်တွင် မိုးကုတ်မြို့အဝင်၊ မြို့အရှေ့ ပိုင်းရှိ ပန်းမထိပ်ရပ်ကွက်အား စစ်ကောင်စီက ဂျက်ဖိုက်တာဖြင့် ဗုံးကြဲ တိုက်ခိုက်ခဲ့ခြင်း ဖြစ်သည်။   ရပ်ကွက်နေ ပြည်သူတစ်ဦးက “သေတဲ့ ၂ ယောက်လုံးက ညီအစ်ကိုတွေ၊ သူတို့အိမ် ဗုံးကျပြီးမှ တခြားအိမ်တွေ ထိတာ ဆိုတော့ သူတို့ ၂ ယောက်က ပွဲချင်းပြီးတယ်။ ကျန်တဲ့ကလေးတွေလည်း ဒဏ်ရာပြင်းတော့ သွေးအလှူရှင် အရေးပေါ် လိုနေတယ်” ဟု ပြောသည်။   သေဆုံးသူ ၂ ဦးမှာ အသက် ၁၀ နှစ် အရွယ်နှင့် အသက် ၁၂ အရွယ်တို့ ဖြစ်ကြပြီး ယနေ့ (ဇူလိုင်လ ၁၀ ရက်နေ့)၊ နံနက်ပိုင်း၌ ကလေး ၃ ဦး ထပ်မံသေဆုံးခဲ့သည်။   ထို့အပြင် ပြည်သူ ၅ ဦးအထိ ပြင်းထန်ဒဏ်ရာ ရရှိထားသည်ဟု ရပ်ကွက်နေပြည်သူများက ပြောသည်။   အဆိုပါ လေကြောင်း ဗုံးကြဲတိုက်ခိုက်မှုကြောင့် ရပ်ကွက်အတွင်း လူနေအိမ် ၆ လုံး မီးလောင်ပြာကျ ပျက်စီးခဲ့ပြီး နွား ၇ ကောင်လည်း သေဆုံးသည်ဟု ဆိုသည်။   ပန်းမထိပ်ရပ်ကွက်တွင် နေထိုင်သည့် အမျိုးသား တစ်ဦးက “၃ ယောက်က ဒီမနက်မှ ဆုံးတာ။ ဒဏ်ရာ ပြင်း တော့ ဘယ်လိုမှ ကယ်လို့ မရတော့ဘူး။ ခဏခဏ ကြဲနေတာ တာဝန်ရှိသူတွေကလည်း လေကြောင်း ကာကွယ် မှု ဘာညာ ပညာပေးတာ လုံးဝမရှိဘူး။ ပြည်သူတွေတော့ ပုံမှန်တိုင်း သွားလာနေကြတယ်။ မိုးကုတ်က ခဏ ခဏကြဲတော့ ရိုးသွားပြီ။ ပိုက်ဆံရှိတဲ့လူလောက်ပဲ ရှောင်ကြတာ” ဟု ပြောသည်။   အလားတူ ဇူလိုင်လ ၈ ရက်နေ့ (အဖိတ်နေ့) တွင်လည်း မိုးကုတ်မြို့ အနောက်ပိုင်းရှိ “ကြိုးစားသူများ” အမည်ရှိ ကိုယ်ပိုင် အထက်တန်းကျောင်း တစ်ခုအား စစ်ကောင်စီက လေကြောင်းမှ တိုက်ခိုက်ခဲ့ရာ မပြူး၊ အရီးနှင့် ကိုတိုး ဆိုသည့် ဒေသခံ ၃ ဦးလည်း သေဆုံးခဲ့သေးသည်။   ထို့အပြင် ဇွန်လ ၂၅ ရက်နေ့၌လည်း မိုးကုတ်မြို့ အရှေ့ပိုင်းရှိ အုန်းကိုင်းကျေးရွာအား စစ်ကောင်စီက လေကြောင်းမှ တိုက်ခိုက်ခဲ့ရာ ဒေသခံ ၄ ဦးအထိ ပြင်းထန်ဒဏ်ရာ ရရှိခဲ့ပြီး လူနေအိမ်အများစု ပျက်စီးခဲ့သည်ဟု ဒေသခံများက ပြောသည်။

လေကြောင်း တိုက်ခိုက်မှုကြောင့် မိုးကုတ်မှ ကလေး ၅ ဦး သေ၊ ၅ ဦး ဒဏ်ရာရ 

လေကြောင်း တိုက်ခိုက်မှုကြောင့် မိုးကုတ်မှ ကလေး ၅ ဦး သေ၊ ၅ ဦး ဒဏ်ရာရ  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၁၀ ရက်။  မန္တလေးတိုင်း၊ ပြင…

  • July 10, 2025
ရှမ်းကရင်နီ နယ်စပ်တွင် သျှမ်းပြည် တောင်ပိုင်း အမျိုးသားများ လွတ်မြောက်ရေး အဖွဲ့ SSNLO ဖွဲ့စည်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၉ ရက်။   ရှမ်း - ကရင်နီ နယ်စပ်ရှိ လွတ်မြောက်နယ်မြေ တစ်နေရာတွင် သျှမ်းပြည် တောင်ပိုင်း အမျိုးသားများ လွတ်မြောက် ရေးအဖွဲ့ (SSNLO) ဖွဲ့စည်းလိုက်ပြီဟု ကြေညာသည်။   စစ်အာဏာရှင် ကျဆုံးရေးနှင့် ပြည်သူတစ်ရပ်လုံး လိုလားသည့် ဖက်ဒရယ် ပြည်ထောင်စုအား တည်ဆောက်ရေး အတွက် ယနေ့ (ဇူလိုင် ၉) တွင် စတင်ဖွဲ့စည်းလိုက်ခြင်း ဖြစ်သည်။   SSNLO အတွင်းရေးမှူး ကိုစောက “ကျနော်တို့ SSNLO ဖွဲ့စည်းရခြင်းရဲ့ အဓိက ရည်ရွယ်ချက်ကတော့ စစ် ကောင်စီ အမြန်ဆုံး ပြုတ်ကျရေး၊ နောက်တစ်ခုက လက်နက်ကိုင် တော်လှန်ရေး အခင်းအကျင်းမှာ ပါဝင်နေတဲ့ လက်နက်ကိုင် တော်လှန်ရေး တပ်ဖွဲ့တွေနဲ့ နိုင်ငံရေး အစုအဖွဲ့တွေကြားထဲမှာ နိုင်ငံရေး ဘုံသဘော တူညီချက် တစ်ရပ် ပေါ်ထွက်လာရေးနဲ့ ပြည်သူတွေ လိုလားတဲ့ ဖက်ဒရယ် ဒီမိုကရေစီ ပြည်ထောင်စုကြီး အမြန်ဆုံး ပေါ် ပေါက်လာဖို့အတွက်ကို ရည်ရွယ် ပါတယ်ဗျာ” ဟု ပြောသည်။   Southern Shan National Liberation Organization (SSNLO) အား နွေဦးတော်လှန်ရေး စတင်ချိန်ကတည်းက စစ်အာဏာသိမ်းမှုကို ဆန့်ကျင်ခဲ့သည့် CDM ဝန်ထမ်း များ၊ လက်နက်ကိုင် တော်လှန်ရေး ဆင်နွဲနေသည့် အရပ်ဖက် အသိပညာရှင်၊ အတတ်ပညာရှင်များဖြင့် ဖွဲ့စည်း ထားခြင်း ဖြစ်သည်ဟု ဆိုသည်။   SSNLO အနေဖြင့် ရှမ်းပြည် တောင်ပိုင်းအတွင်းရှိ နိုင်ငံရေး၊ စစ်ရေး ဖော်ဆောင်နေကြသော အစုအဖွဲ့များ ကြားတွင် စည်းလုံးညီညွတ်စွာဖြင့် နိုင်ငံရေး ဘုံသဘောတူညီချက်များ၊ ပေါ်ထွန်းလာစေရန် ကြိုးပမ်းဆောင်ရွက် သွားမည် ဖြစ်ပြီး ပြည်သူနှင့် အနီးကပ် နေထိုင်၍ ပြည်သူ့ဝန်ဆောင်မှု လုပ်ငန်းများကိုလည်း အားသွန်ခွန်စိုက် ဆောင်ရွက်သွားမည်ဟု ဆိုသည်။   “ကျနော်တို့ ရှမ်းတော်လှန်ရေး အစုအဖွဲ့ အများစုကတော့ ရှမ်း - ကရင်နီ နယ်စပ်မှာ အများဆုံး အခြေစိုက်ပြီး တော့ တော်လှန်နေကြတော့ လက်ရှိ ကရင်နီရဲ့ IEC နောက်တခု NUCC NUG တို့နဲ့လည်း နောက်ပိုင်း ညှိနှိုင်း ပေါင်းစပ်မှုတွေ  လုပ်ပြီးတော့ အတူချိတ်ဆက်ပြီးတော့ ဆောင်ရွက်သွားမယ့် အစီစဉ်တွေ ရှိပါတယ်” ဟု အတွင်းရေးမှူး ကိုစောက ဆက်ပြောသည်။   SSNLO အား ၂၀၂၂ ခုနှစ်ကတည်းက ဖွဲ့စည်းရန် ကြိုးပမ်းခဲ့သော်လည်း နည်းပညာ၊ ပညာရှင်အရင်းအမြစ်၊ ဘဏ္ဍရေး စသည့် အခက်အခဲများ ကြောင့် နှောင့်နှေးကြန့်ကြာခဲ့ရခြင်း ဖြစ်ပြီး ယနေ့အချိန်မှသာ ဖွဲ့စည်းနိုင်ခဲ့ခြင်း ဖြစ်သည်။   ရှမ်း - ကရင်နီ နယ်စပ်ရှိ တော်လှန်ရေး အင်အားစုများ အနေဖြင့် ပြည်သူများ ပူးပေါင်းပါဝင်မှုကြောင့်သာ ယန့ အထိ ရေရှည် ရပ်တည်နိုင်ခြင်း ဖြစ်ပြီး လာမည့် ကာလများတွင်လည်း တော်လှန်ရေး အောင်မြင်ရန်အတွက် ဆက်လက် ပါဝင်ပေးကြရန် အတွင်းရေးမှူး ကိုစောက တောင်းဆိုထားသည်။

ရှမ်းကရင်နီ နယ်စပ်တွင် သျှမ်းပြည် တောင်ပိုင်း အမျိုးသားများ လွတ်မြောက်ရေး အဖွဲ့ SSNLO ဖွဲ့စည်း 

ရှမ်းကရင်နီ နယ်စပ်တွင် သျှမ်းပြည် တောင်ပိုင်း အမျိုးသားများ လွတ်မြောက်ရေး အဖွဲ့ SSNLO ဖွဲ့စည်း  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၉ ရ…

  • July 9, 2025
ပေါင်းတည်ထောင်တွင် နိုင်ကျဉ်းတစ်ဦး ရုတ်တရက် သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၉ ရက်။   ပဲခူးတိုင်း၊ ပြည်ခရိုင်၊ ပေါင်းတည် အကျဉ်းထောင်တွင် နိုင်ငံရေး အကျဉ်းသားတစ်ဦး ရုတ်တရက် သေဆုံး သွားသည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ယက် (PPNM) က ထုတ်ပြန်သည်။   ပေါင်းတည်ထောင်တွင် အသက် ၄၅ နှစ်အရွယ် ကိုလှမင်း (ခ) ကိုလှကြီးသည် ဇူလိုင်လ ၅ ရက်နေ့၌ ကျန်းမာ သန်စွမ်းလျှက်ရှိနေခဲ့ရာမှ ရုတ်တရက် နှလုံးရပ် သေဆုံးခဲ့ခြင်း ဖြစ်သည်။   PPNM ဦးဆောင်ကော်မတီဝင် ကိုသိုက်ထွန်းဦးက “ကျနော်တို့ လက်ရှိ အတည်ပြုထား သလောက်တော့ ရုတ်တရက် နှလုံးရပ်ပြီး သေဆုံးသွားတယ်လို့ သိထားရပါတယ်။ ရောဂါခံ ရှိတယ်ဆိုတာမျိုးတော့ မသိထားဘူးပေါ့ နော်။ ရောဂါခံ မရှိဘူး ဆိုပေမယ့် ရုတ်တရက်နှလုံးရပ်ပြီး ဆုံးသွားတယ်ဆိုတဲ့ အခြေနေတစ်ရပ်တော့ ဖြစ်ပေါ် ခဲ့တယ်လို့ ကနဦး သိရှိထားရပါတယ်” ဟု ပြောသည်။   သေဆုံးသူ ကိုလှမင်းမှာ ပုဒ်မ ၅၀ - ည ဖြင့် ထောင်ဒဏ် ၁၀ နှစ် ကျခံနေရသူ ဖြစ်ပြီး ၎င်းမှာ သတိလစ် မေ့မျော နေစဉ်အတွင်း ပြင်ပဆေးရုံသို့ ပို့ဆောင်သည့်အချိန်တွင် ဆေးရုံ၌ သေဆုံးခဲ့ရခြင်း ဖြစ်သည်။   ကိုသိုက်ထွန်းဦးက “နာရေးကိုတော့ အကျဉ်းဦးစီးကနေ ဦးဆောင် သဂြိုဟ်ခဲ့ပြီးမှ မိသားစုဝင်တွေ လိုက်ပါ ပို့ဆောင်ခွင့် ရခဲ့တယ်လို့ ကျနော်တို့ သိရှိထားရပါတယ်” ဟု ဆက်ပြောသည်။   ပုဒ်မ ၅၀-ညမှာ ပြည်သူ့ ငြိမ်ဝပ်ပိပြားရေးအား နှောင့်ယှက်ခြင်း၊ သတင်းအချက်အလက်များ မျှဝေခြင်း၊ သိုလှောင်ခြင်း စသည့် အကြောင်းအရာများအား အရေးယူရန်အတွက် စစ်ကောင်စီက ၂၀၂၁ ခုနှစ်တွင် ပြဌာန်း ခဲ့ခြင်းဖြစ်ပြီး ထောင်ဒဏ် ၃ နှစ်မှ အများဆုံး ၁၀ နှစ် အပြင် တစ်သက်တစ်ကျွန်းအထိ ချမှတ်ခံရနိုင်သည်ဟု ဆိုသည်။   ပေါင်းတည်ထောင်မှာ ထောင်အငယ် ဖြစ်သည့် အလျောက် အကျဉ်းသားများအား ဆိုးရွားစွာ ဖိနှိပ်မှုများ မရှိသည့်အပြင် လတ်တလော ထောင်ဝင်စာသည်လည်း အလွယ်တကူ ပို့ဆောင်၍ရနေသည့် အနေအထားတွင် ရှိသဖြင့် ကိုလှမင်း (ခ) ကိုလှကြီး၌ ရောဂါခံ ရှိမရှိအား ဆက်လက် စုံစမ်းနေဆဲ ဖြစ်သည်ဟု PPNM တာဝန်ရှိသူ များက ဆိုသည်။   သို့သော် PPNM ၏ စောင့်ကြည့် လေ့လာမှုများအရ ပေါင်းတည်ထောင်သည် အခြား အကျဉ်းထောင်များနည်းတူ ဆေးဝါးမလုံလောက်မှုနှင့် ကျန်းမာရေး စောင့်ရှောက်မှုများ လိုအပ်နေဆဲ ဖြစ်သည်ဟု ကိုသိုက်ထွန်းဦးက ပြောသည်။   ၂၀၂၅ ခုနှစ်အတွင်း ဇူလိုင်လ ၈ ရက်နေ့အထိ စစ်ကောင်စီ ထိန်းချုပ်ထားသည့် အကျဉ်းထောင်များတွင် ဆေးဝါး မလုံလောက်ခြင်း၊ ဆေးကုသခွင့် မရရှိခြင်းတို့ကြောင့် သေဆုံးခဲ့ရသည့် နိုင်ကျဉ်းပေါင်း ၁၄ ဦး အထိ ရှိပြီဟု PPNM က စာရင်းပြုစုထားသည်။

ပေါင်းတည်ထောင်တွင် နိုင်ကျဉ်းတစ်ဦး ရုတ်တရက် သေဆုံး 

ပေါင်းတည်ထောင်တွင် နိုင်ကျဉ်းတစ်ဦး ရုတ်တရက် သေဆုံး  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၉ ရက်။  ပဲခူးတိုင်း၊ ပြည်ခရိုင်၊ ပေါင်းတည် အ…

  • July 9, 2025
ဖမ်းဆီးလာစဉ် ထွက်ပြေးသော ကျေးရွာ အုပ်ချုပ်ရေးမှူးကို ပစ်သတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၈ ရက်။   မြိတ်ခရိုင်၊ ကျွန်းစုမြို့နယ် အတွင်းမှ ကျေးရွာအုပ်ချုပ်ရေးမှူးကို  စစ်ဆေးရန် ခေါ်လာစဥ် ထွက်ပြေး၍ ပစ်ခတ်ဖမ်းဆီးရာ ကျည်ထိမှန်သေဆုံးသွားသည်ဟု မြိတ်ခရိုင် တပ်ရင်း ၂ တာဝန်ရှိသူတစ်ဦးက ပြောသည်။   ပြည်သူ့ကာကွယ်ရေး တပ်ဖွဲ့ဝင်များက မဲတောကျေးရွာ အုပ်ချုပ်ရေးမှူး ဦးအောင်မြင့်ကို ဇူလိုင်လ ၅ ရက်နေ့ ည ၁၀ နာရီခွဲ အချိန်ခန့်က ဖမ်းဆီးခေါ်ဆောင်သွားခြင်း ဖြစ်သည်။   မြိတ်ခရိုင် တပ်ရင်း - ၂ တာဝန်ရှိသူက “အတန်တန် သတိပေးပြီးသားပါ။ မူးယစ်ဆေးရောင်းတယ်၊ သုံးလည်း သုံး တယ်။ စစ်မှုထမ်းအတွက်လည်း ပိုက်ဆံကောက်တာတွေ လုပ်တယ်။ ဒါတွေ မလုပ်ဖို့ သတိပေးပြီးသား အဲ့ဒါလည်း ဆက်လုပ်နေလို့ ဖမ်းတာပါ။ သူ့ကို သူ့အိမ်မှာပဲ ဖမ်းမိတာပါ” ဟု ပြောသည်။   ဦးအောင်မြင့်အား ပြည်သူ့ကာကွယ်ရေး တပ်ဖွဲ့များက အတန်တန် သတိပေးနေခဲ့ပြီး မူးယစ်ဆေးဝါး ရောင်း ဝယ်ခြင်း၊ ကိုယ်တိုင် သုံးစွဲခြင်းများနှင့် စစ်မှုထမ်း တပ်သားသစ်များ ခေါ်ယူနေခြင်းတို့အတွက် ငွေကြးကောက် ခံနေခြင်းများကြောင့် စစ်ဆေးရန်အတွက် နေအိမ်တွင် သွားရောက်ဖမ်းဆီးခဲ့သည်ဟု ဒေါင်းနက်အဖွဲ့ဝင် တစ်ဦး က ဆိုသည်။   ဖမ်းဆီးခေါ်ဆောင်လာစဉ် ချောင်းကြီးဝကျေးရွာ အနီးသို့ အရောက်၊ ကျေးရွာအရှေ့တွင် ရှိနေသည့် စစ်သင်္ဘော တစ်စီးမှ  ပူးပေါင်းတပ်ဖွဲ့ဝင်များ ရှိရာ ဘက်သို့ ပွိုင့်ဖိုက်ဖြင့် ပစ်ခတ်ခဲ့သည်ဟု ဆိုသည်။   အဆိုပါ စစ်ကောင်စီ သင်္ဘောမှ ပစ်ခတ်မှုကြောင့် ပြည်သူ့ကာကွယ်ရေး ပူးပေါင်း တပ်ဖွဲ့ဝင်များက နေရာယူ လှုပ်ရှားနေစဉ် ဖမ်းဆီးလာသူ ဦးအောင်မြင့်က အခွင့်ကောင်းယူပြီး  ထွက်ပြေးရန် ကြိုးစားခဲ့သည်ဟု ဆိုသည်။   ထို့ကြောင့် ဦးအောင်မြင့်အား မလွဲမရှောင်သာ ပစ်ခတ် ဖမ်းဆီးရခြင်းဖြစ်ကြောင်း မြိတ်ခရိုင် တပ်ရင်း ၂ မှ သတင်း ထုတ်ပြန်ထားသည်။   ဦးအောင်မြင့်အား ခေါ်ဆောင်လာရာ လမ်းတစ်လျှောက်တွင်လည်း စိတ်ပုံမှန်မဟုတ်ဘဲ ဆေးကြောင်နေသည့် လက္ခဏာကိုလည်း တွေ့ရှိရသည်ဟု ဆိုသည်။   ကျေးရွာ အုပ်ချုပ်ရေးမှူးအား ဖမ်းဆီးခဲ့မှုကို မြိတ်ခရိုင် အမှတ် ၂ တပ်ရင်း၊ တနင်္သာရီမြို့နယ် ပကဖ - ဇုန် ၆ နှင့် ဒေါင်းနက် အဖွဲ့တို့ ပူးပေါင်းလုပ်ခဲ့ခြင်း ဖြစ်ပြီး ပြည်သူ့ ကာကွယ်ရေးတပ်ဖွဲ့ဝင်များ အထိအခိုက် မရှိ ပြန်လည် ဆုတ်ခွာနိုင်ခဲ့ကြောင်း မြိတ်ခရိုင် တပ်ရင်း - ၂ တာဝန်ရှိသူက ပြောသည်။

ဖမ်းဆီးလာစဉ် ထွက်ပြေးသော ကျေးရွာ အုပ်ချုပ်ရေးမှူးကို ပစ်သတ်

ဖမ်းဆီးလာစဉ် ထွက်ပြေးသော ကျေးရွာ အုပ်ချုပ်ရေးမှူးကို ပစ်သတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၈ ရက်။  မြိတ်ခရိုင်၊ ကျွန်းစုမြို့နယ…

  • July 8, 2025
လေကြောင်း တိုက်ခိုက်မှုကြောင့် အသက် ၄ နှစ် အရွယ်ကလေး အပါအဝင် မိသားတစ်စုလုံး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၈ ရက်။   ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်တွင် စစ်ကောင်စီ လေကြောင်း တိုက်ခိုက်မှုကြောင့် အသက် ၄ နှစ်အရွယ် သမီးငယ်လေးတစ်ဦး အပါအဝင် မိသားစု ၃ ဦး သေဆုံးသည်ဟု စစ်ဘေးရှောင်ကူညီရေး အဖွဲ့အစည်း တာဝန်ခံများက ပြော သည်။   ဖယ်ခုံမြို့ အနောက်ဘက်ရှိ စစ်ဘေးရှောင်စခန်းအား စစ်ကောင်စီက ယမန်နေ့ (ဇူလိုင် ၇) ည ၁၁ နာရီ ဝန်းကျင် ခန့်တွင် ပေါင် ၂၀၀ ဗုံးဖြင့် ကြဲချတိုက်ခိုက်ခဲ့ခြင်း ဖြစ်သည်။   စစ်ဘေးရှောင်စခန်းရှိ တာဝန်ရှိသူ တစ်ဦးက “တစ်မိသားစုလုံး ပွဲချင်းပြီးတယ်။ အိပ်နေတုန်း ကြဲတာဆိုတော့ ရှောင်ချိန်တောင် မရလိုက်ဘူး။ အခုက ကင်းပတ်လေယာဉ် အရင်လာဝဲတာမျိုး မရှိတော့ဘူး။ တိုက်ရိုက်ပျံလာ ပြီး လာကြဲတာ” ဟု ပြောသည်။   ဗုံးကြဲ တိုက်ခိုက်မှုကြောင့် အသက် ၄ နှစ်အရွယ် ကလေးငယ် တစ်ဦး၊ အသက်၂၈ နှစ်အရွယ် အမျိုးသား တစ်ဦး နှင့် အသက် ၂၆ နှစ်အရွယ် အမျိုးသမီး တစ်ဦးတို့မှာ ပွဲချင်းပြီး သေဆုံးခဲ့သည်ဟု စစ်ဘေးရှောင်စခန်း တာဝန်ရှိ သူများက ပြောသည်။   ထို့အပြင် အခင်း ဖြစ်ပွားစဉ်အတွင်း ၂ နှစ်အရွယ် ကလေးတစ်ဦး၊ ၁၄ နှစ်အရွယ် ကျောင်းသူ တစ်ဦး၊ အသက် ၅၀ အရွယ် အမျိုးသမီး တစ်ဦးနှင့် ကိုယ်ဝန်ဆောင်တစ်ဦးတို့မှာလည်း ပြင်းထန်ဒဏ်ရာရခဲ့သည်ဟု ဆိုကြသည်။   အလားတူ ဇူလိုင်လ ၇ ရက်နေ့၊ ညနေ ၄ နာရီဝန်းကျင် အချိန်ခန့်၌လည်း ဖယ်ခုံမြို့နယ် အနောက်ဘက်ခြမ်းအား ပေါင် ၂၀၀ ဗုံးဖြင့် လေကြောင်း တိုက်ခိုက်ခဲ့ရာ စစ်ဘေးရှောင် အမျိုးသားတစ်ဦး ပြင်းထန်ဒဏ်ရာ ရရှိခဲ့သေး သည်။   ထိခိုက်ဒဏ်ရာရသူနှင့် နီးစပ်သူ တစ်ဦးက “တစ်ယောက် ထိတာနဲ့ အကုန်လုံး တန်းပြေးကြတာ။ ဗုံးက ၂ လုံး ကြဲတာ။ တစ်လုံးက မကွဲဘူး။ တော်လှန်ရေးတပ်တွေ လာသယ်သွားတယ်” ဟု ပြောသည်။   ရှမ်း - ကရင်နီ နယ်စပ်ရှိ ဖယ်ခုံမြို့နယ်၊ မိုးဗြဲမြို့ရှိ လမ်းမကြီးအား စစ်ကောင်စီ ထိန်းချုပ်ထားပြီး တိုက်ပွဲများ လည်း ဆက်လက် ပြင်းထန်နေသည်ဖြစ်ရာ စစ်ကောင်စီက လေကြောင်းပစ်ကူ အမြောက်အမြား အသုံးပြုလာ ခြင်း ဖြစ်သည်။   ဇူလိုင်လ ၂ ရက်နေ့တွင်လည်း ဒီးမော့ဆိုမြို့နယ် အနောက်ဘက်ခြမ်းရှိ စစ်ဘေးရှောင်စခန်းများအား စစ်ကောင်စီ က ပေါင် ၂၀၀ ဗုံးဖြင့် ကြဲချတိုက်ခိုက်ခဲ့သေးသည်။ သို့သော် အဆိုပါ ဗုံးကြဲမှုထဲ လူထိခိုက်မှု မရှိဟု စစ်ဘေးရှောင် ကူညီရေး ဆောင်ရွက်နေသူများက ပြောသည်။

လေကြောင်း တိုက်ခိုက်မှုကြောင့် အသက် ၄ နှစ် အရွယ်ကလေး အပါအဝင် မိသားတစ်စုလုံး သေဆုံး 

လေကြောင်း တိုက်ခိုက်မှုကြောင့် အသက် ၄ နှစ် အရွယ်ကလေး အပါအဝင် မိသားတစ်စုလုံး သေဆုံး  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၈ ရက်။  ရှမ်…

  • July 8, 2025
တောင်ကြီး ပင်စင်စားများ လစာထုတ်ရန် အခက်ကြုံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၀၈ ရက်။   စမတ်ကတ် မရှိသောကြောင့် တောင်ကြီးမြို့မှ သက်ကြီး အငြိမ်းစားများ ပင်စင်လစာထုတ်ရန် အခက်တွေ့ နေကြသည်။   ရှမ်းပြည်၏ မြို့တော်၊ တောင်ကြီးမြို့ရှိ မြန်မာ့စီးပွားရေးဘဏ်တွင် အသက် ၈၀ ကျော်အရွယ် အငြိမ်းစား ဝန်ထမ်းများအား စမတ်ကတ် မပါရှိဟုဆိုကာ ပင်စင်လစာ ထုတ်မပေးသဖြင့် ၎င်းတို့မှာ စမတ်ကတ်ပြုလုပ်ရန် အတွက် စုပေါင်းရုံးတွင် အချိန်ကြာမြင့်စွာ တန်းစီစောင့်ဆိုင်းနေရသည်ဟု ဆိုသည်။   တောင်ကြီးမြို့ရှိ အငြိမ်းစား ဝန်ထမ်းတစ်ဦး၏ မိသားစုဝင် တစ်ဦးက “အသက် အနည်းဆုံး ၇၀ ကျော်တွေက တံခါးဝမှာ တန်းစီနေကြတာ။ တုန်တုန်ရီရီ လေဖြတ်တာတွေလည်း ပါတယ်။ စောင့်ရတာ ၂ နာရီ ကျော်ကျော် လောက်။ အဲဒါပြီးရင်လည်း ကိစ္စက မပြီးသေးဘူး။ မှားတယ်ဆိုရင် သက်ဆိုင်ရာရုံးတွေ အဆင့်ဆင့် ပြန်သွားရ တယ်။” ဟု ပြောသည်။   စစ်ကောင်စီ လက်အောက်ခံ မြန်မာ့စီးပွားရေးဘဏ်မှ ဇူလိုင်လအတွင်း၌ အငြိမ်းစားဝန်ထမ်းများကို စမတ်ကတ် ပါရှိမှသာ ပင်စင်လစာထုတ်ပေးတော့မည်ဟု ကြေညာထားသည်။   ဇွန်လ ၂၄ ရက်နေ့၌ နိုင်ငံအဝန်းရှိ မြန်မာ့စီးပွားရေး ဘဏ်များတွင်စမတ်ကတ် QR ကုဒ်ပြနိုင်မှသာ ပင်စင်လစာ ထုတ်ပေးတော့မည်ဟု ကြေညာပြီးနောက် တောင်ကြီးမြို့တွင် ဇွန်လ ၂၃ ရက်နေ့ တစ်ရက်တည်းသာလျှင် လုပ်ဆောင်ပေးခဲ့ခြင်း ဖြစ်သည်။   တောင်ကြီးမြို့က အငြိမ်းစားဝန်ထမ်း အမျိုးသမီးတစ်ဦးက “အစက သူတို့ပြောတာတော့ နိုင်ငံခြားသွားမယ့်လူမှ လိုတာတဲ့။ အခုကျတော့မှ ပင်စင်သမားတွေပါ လုပ်ရမယ်ဆိုတော့ ရောဂါသည်တွေက ဘယ်လိုခေါ်ရမလဲ။ အရင်လကလည်း လူကြီးလာလို့သာ အဲနေ့တစ်ရက်တည်း လုပ်ပေးတာ။ နောက်ပိုင်း လုပ်တဲ့သူတွေက ကိုယ့် ကိုယ် စီစဉ်ရမှာ” ဟု ပြောသည်။   တောင်ကြီးမြို့၊ မြန်မာ့ စီးပွားရေးဘဏ်တွင် စမတ်ကတ် မပါသည့် အငြိမ်းစား ဝန်ထမ်းများအား ၃ ရက်အတွင်း ပြုလုပ်ကြရန် ညွှန်ကြားထားသည်ဖြစ်ရာ လက်ရှိတွင် သက်ကြီးရွယ်အိုများမှာ ပင်စင်လစာ မထုတ်ယူနိုင်သေး ပဲ ရှိနေကြသည်။   တောင်ကြီးမြို့ရှိ ပင်စင်ကိုယ်စား ထုတ်ယူခဲ့သူ တစ်ဦးက “အရင်က ကိုယ်စားထုတ်မယ်ဆို လွှဲပြောင်းစာ ရုံးမှာ အဆင့်ဆင့် ယူရတယ်။ အခုက လွှဲစာရရင်လည်း ကံယာကံရှင်ရဲ့ စမတ်ကတ်မပါရင် မရဘူး။ အဖေကလည်း အိပ်ယာထဲလဲနေတော့ သွားလို့ မရဘူး။ ရုံးကလည်း စုရပ်တစ်ခု သတ်မှတ်ပြီး လုပ်ပေးတာ မရှိဘူး” ဟု ပြောသည်။   လက်ရှိ စမတ်ကတ် ပြုလုပ်နေသည့် အငြိမ်းစားဝန်ထမ်းများမှာလည်း မှတ်ပုံတင် အချက်အလက်၊ သန်းခေါင် စာရင်းနှင့် မကိုက်ညီဟု ဆို၍ မြို့နယ်ရုံးများအထိ အဆင့်ဆင့် သွားရခြင်း၊ လူအခြေအနေကြည့်ပြီး ငွေကျပ် သိန်းဂဏန်းအထိ တောင်းခံခြင်းများ ကြုံတွေ့နေကြရသည်။   ထို့အပြင် ယခု ဇူလိုင်လ ၄ ရက်နေ့မှစ၍ E-ID စနစ် ဆာဗာပြင်ဆင်ခြင်း ပြုလုပ်နေသဖြင့် စမတ်ကတ်ပြုလုပ် ခြင်း ယာယီရပ်ဆိုင်းထားသည်ဖြစ်ရာ သက်ကြီး အငြိမ်းစားဝန်ထမ်း အချို့မှာလည်း ပင်စင်လာစာ မထုတ်ယူ နိုင်သေးဘူးဟု ၎င်းတို့ မိသားစုဝင်များက ဆိုကြသည်။   စစ်ကောင်စီ လက်အောက်ခံ လူဝင်မှုကြီးကြပ်ရေးနှင့် ပြည်သူ့အင်အား ဦးစီးဌာန (လဝက)မှ ရပ်ဆိုင်းထားသည့် ကာလအတွင်း အငြိမ်းစားဝန်ထမ်းများ အတွက် ဦးစားပေး လုပ်ဆောင်သွားမည်ဟု ကြေညာထားသော်လည်း လက်ရှိကာလ၌ အကောင်အထည် မဖော်နိုင်သေးဘူးဟု တောင်ကြီးမြို့ရှိ ပင်စင် ကိုယ်စား ထုတ်ယူသူများကြား တွင် ပြောဆိုနေကြသည်။

တောင်ကြီး ပင်စင်စားများ လစာထုတ်ရန် အခက်ကြုံ

တောင်ကြီး ပင်စင်စားများ လစာထုတ်ရန် အခက်ကြုံ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၀၈ ရက်။  စမတ်ကတ် မရှိသောကြောင့် တောင်ကြီးမြို့မှ သက်…

  • July 8, 2025
တနင်္သာရီတိုင်းအတွင်း သုခ တပ်စခန်းကို KNU သိမ်းပိုက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၈ ရက်။   ထိုင်း-မြန်မာနယ်စပ် မျဉ်းပေါ်ရှိ စစ်ကောင်စီတပ်၏ သုခတပ်စခန်းကို KNU က တိုက်ခိုက်သိမ်းပိုက်လိုက်သည်။   အဆိုပါ တပ်စခန်းသည် KNU တပ်မဟာ ၄ မြိတ်-ထားဝယ်ခရိုင်၊ ထိုင်း-မြန်မာ နယ်စပ်မျဉ်းပေါ်တွင် တည်ရှိပြီး ဇူလိုင်လ ၇ ရက်နေ့ (ယမန်နေ့) က သိမ်းပိုက်နိုင်ခဲ့သည်ဟု KNU တပ်မဟာ ၄ မြိတ်-ထားဝယ်ခရိုင် က ဇူလိုင်လ ၈ ရက်(ယနေ့)တွင် ထုတ်ပြန်သည်။   ထိုင်း-မြန်မာ နယ်စပ်ရှိ စစ်ကောင်စီတပ်၏ သုခတပ်စခန်းကို KNU တပ်မဟာ ၄ လက်အောက်ခံ ကရင်အမျိုး သားလွတ် မြောက်ရေးတပ်မတော်  KNLA တပ်ရင်း ၁၀ နှင့် တော်လှန်ရေးပူးပေါင်းတပ်များက သိမ်းပိုက်နိုင်ခဲ့ ခြင်းဖြစ်သည်။   KNU က သိမ်းပိုက်လိုက်သည့် သုခတပ်စခန်းတွင် စစ်ကောင်စီတပ်သား ၃၀ ကျော် တပ်စွဲထားပြီး လက်ရှိတွင် ထိုစစ်ကောင်စီတပ်ဖွဲ့ဝင်များသည် ထိုင်းနိုင်ငံဘက်သို့ ထွက်ပြေးသွားသည်ဟု KNU က ဆိုသည်။   စစ်အာဏာသိမ်းပြီးနောက်ပိုင်း KNU တပ်မဟာ ၄ မြိတ်-ထားဝယ်ခရိုင်က ၎င်းတို့၏ ဌာနချုပ်ဟောင်းဖြစ်သော စစ်ကောင်စီတပ်၏ ထီးခီး၊ထီးထာ ဗျူဟာတပ်စခန်း၊ အမိုနယ်စပ်တပ်စခန်းနှင့် သုခတပ်စခန်းတို့ကို ပြန်လည် သိမ်းပိုက်နိုင်ခဲ့ပြီဖြစ်သည်။ Photo - KNU

တနင်္သာရီတိုင်းအတွင်း သုခ တပ်စခန်းကို KNU သိမ်းပိုက်

တနင်္သာရီတိုင်းအတွင်း သုခ တပ်စခန်းကို KNU သိမ်းပိုက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၈ ရက်။ ထိုင်း-မြန်မာနယ်စပ် မျဉ်းပေါ်ရှိ စစ်…

  • July 8, 2025
×Close