သတင်း

မိုးကုတ်အား တပတ်အတွင်း ၃ ကြိမ်မြောက် ဗုံးကြဲရာ ကလေးအပါအဝင် ၈ ဦး ဒဏ်ရာရ   သတင်းနှင့် မီဒီယာကွန်ရက်။ ၂၀၂၅ ခုနှစ်၊ ဇူလိုင်လ ၁၅ ရက်။   မန္တလေးတိုင်း၊ မိုးကုတ်မြို့ကို တစ်ပတ်အတွင်း တတိယ အကြိမ်မြောက် လေကြောင်းတိုက်မှု ထပ်မံ ပြုလုပ်ခဲ့ရာ ကလေး အပါအဝင် ၈ ဦး ထိခိုက်ဒဏ်ရာ ရသည်ဟု ဒေသခံများက ပြောသည်။   မန္တလေးတိုင်း ပြင်ဦးလွင်ခရိုင်၊ မိုးကုတ်မြို့ရှိ ပန်းမထိပ်ရပ်ကွက် ဂေါ်ရခါး အပေါ်ရွာအား ဇူလိုင်လ ၁၃ ရက်နေ့၊ ည ၁၀ နာရီခွဲဝန်းကျင် အချိန်ခန့်၌ စစ်ကောင်စီက တိုက်ပွဲဖြစ်ပွားခြင်း မရှိဘဲ ဂျက်ဖိုက်တာဖြင့် လာရောက် ကြဲချခဲ့ခြင်း ဖြစ်သည်။   ပန်းမထိပ်နှင့် ရပ်ကွက်ချင်း နီးစပ်သူ တစ်ဦးက “ဂေါ်ရခါး ရွာကြဲတာ ဆိုပေမယ့် ဗမာတွေလည်း ထိတယ်။ ရပ်ကွက်ချင်း တော်တော် လှမ်းတာတောင် အိမ်ကအရမ်း တုန်သွားတယ်။ မနေ့ည ကြဲတာ အသိထဲက လက် သမား ဆရာမော်လီအိမ်လည်း ထိတယ်။ သူတို့ မိသားစုထိတယ်လို့ လှမ်းပြောလာတယ်” ဟု ပြောသည်။   ဗုံးကြဲ တိုက်ခိုက်ခံရမှု အတွင်း အသက် ၁၀ နှစ်ဝန်းကျင် ကလေး ၃ ဦး အပါအဝင် ဒေသခံရွာသား ၈ ဦး ပြင်းထန် ဒဏ်ရာများ ရရှိခဲ့သည်ဟု ဆိုသည်။   အဆိုပါ ၈ ဦးမှာ နဖူး၊ ပေါင်ခြံ၊ ဝမ်းဗိုက်၊ ဦးခေါင်း စသည့် နေရာများတွင် ထိမှန်ဒဏ်ရာများ ရရှိခဲ့ခြင်း ဖြစ်ပြီး တစ်ဦးမှာ အသက်အန္တရာယ် စိုးရိမ်ရသည့်အပြင် အချိန်နှင့်အမျှ သေဆုံးသူ စာရင်း တိုးလာနိုင်သည်ဟု မြေပြင်၌ အကူအညီပေးနေသူများ၏ ပြောပြချက်များအရ သိရသည်။   ပန်းမထိပ်ရပ်ကွက်တွင် နေထိုင်သူတစ်ဦးက “တော်တော် စိတ်ကင်ဆာ ပေးတာပဲ။ မနေ့ည တစ်ညလုံး ဘယ်သူ မှ မအိပ်ရဲဘူး။ ရှေ့ရက်တွေလည်း နိုးစက်ပေးပြီး ကျင်းထဲ ပြေးပြေးဆင်းနေရတာ။ မိုးကုတ်ကြဲရင် ကလေး တွေပဲ အများဆုံး ထိတာဆိုတော့ မိဘတွေလည်း စိတ်ဒဏ်ရာ ရနေကြပြီ” ဟု ပြောသည်။   အလားတူ ဇူလိုင်လ ၉ ရက်နေ့၊ ည ၈ နာရီဝန်းကျင် အချိန်ခန့်၌လည်း ပန်းမထိပ်ရပ်ကွက်အား လေကြောင်းမှ တိုက်ခိုက်ခဲ့ရာတွင် အသက် ၁၀ နှစ်ဝန်းကျင် အရွယ် ကလေး ၅ ဦး သေဆုံးပြီး ၅ ဦး ပြင်းထန်ဒဏ်ရာများ ရရှိခဲ့ သည်ဟု ရပ်ကွက်နေပြည်သူများက ပြောဆိုသည်။   ထို့အပြင် ဇူလိုင်လ ၈ ရက်နေ့ ည၌လည်း မိုးကုတ်မြို့ အနောက်ပိုင်းရှိ ‘ကြိုးစားသူများ’ အထက်တန်းကျောင်း အား ပေါင် ၂၀၀ ဗုံးဖြင့် ကြဲချတိုက်ခိုက်ခဲ့ပြီး အရပ်သား ၃ ဦး သေဆုံးခဲ့ရသည်ဟု ကျောင်းတာဝန်ရှိသူများက ပြောသည်။

မိုးကုတ်အား တပတ်အတွင်း ၃ ကြိမ်မြောက် ဗုံးကြဲရာ ကလေးအပါအဝင် ၈ ဦး ဒဏ်ရာရ

မိုးကုတ်အား တပတ်အတွင်း ၃ ကြိမ်မြောက် ဗုံးကြဲရာ ကလေးအပါအဝင် ၈ ဦး ဒဏ်ရာရ သတင်းနှင့် မီဒီယာကွန်ရက်။၂၀၂၅ ခုနှစ်၊ ဇူလိုင်လ ၁၅ ရက်။  မန္တလေးတိုင်း၊ မိ…

  • July 15, 2025
ရွေးကောက်ပွဲကို အယုံအကြည်မရှိကြောင်း တအာင်းပါတီပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၅ ရက်။   စစ်ကောင်စီက ကျင်းပရန် ပြင်ဆင်နေသည့် ရွေးကောက်ပွဲသည် နိုင်ငံတော်၏ အချုပ်အခြာ အာဏာကို မတရား ရယူရန် ကြိုးပမ်းသည့် အတုအယောင် လုပ်ရပ်တစ်ခုသာ ဖြစ်ကြောင်း တအာင်း (ပလောင်) အမျိုးသားပါတီ (TNP) က ပြောသည်။   လက်ရှိ စစ်ကောင်စီက ကျင်းပရန် ရည်ရွယ်နေသည့် ရွေးကောက်ပွဲကို အယုံအကြည် မရှိကြောင်း TPN ပါတီ၏ အထွေထွေ အတွင်းရေးမှူး မိုင်းနိုင်ဂေါင်ဇာရ်က ပြောသည်။   “ဒီရွေးကောက်ပွဲက စစ်မှန်တဲ့ ရွေးကောက်ပွဲလည်း မဖြစ်နိုင်သလို၊ တရားမျှတတဲ့ ရွေးကောက်ပွဲလည်း မဖြစ် နိုင်ဘူး။ ပြီးတော့ ရွေးကောက်ပွဲကို ခွဲပြီး အပိုင်းလိုက် ပြုလုပ်မယ်လို့လည်း ပြောထားတာ တွေ့တော့ ပိုပြီး တောင် ယုံကြည်လို့ မရဘူးပေါ့နော်။”   ဇွန်လ ၂၇ ရက်နေ့မှ ဇွန်လ ၂၉ ရက်နေ့အထိ ပြုလုပ်ခဲ့သော TNP ၏ ၆ လပတ် မျက်နှာစုံညီ အစည်းအဝေးအပြီး ထုတ်ပြန်ချက်တွင် စစ်ကောင်စီ၏ ရွေးကောက်ပွဲ ပြင်ဆင်နေမှုကို အဓိကထား ကန့်ကွက်ခဲ့ပြီး အဆိုပါ လုပ်ရပ် သည် တရားဝင်မှု မရှိကြောင်း အတိအလင်း ထုတ်ပြန်ထားသည်။   လက်ရှိအချိန်တွင် ရွေးကောက်ပွဲ ကျင်းပရေးထက် စစ်တပ်သည် နိုင်ငံရေးမှ နုတ်ထွက်ပြီး အကြမ်းဖက်မှုများ အတွက် တာဝန်ခံရန် လိုလားသည်ဟု ဆက်ပြောသည်။   မိုင်းနိုင်ဂေါင်ဇာရ်က “ဒီအချိန်မှာ ရွေးကောက်ပွဲက မြန်မာနိုင်ငံအတွက် အရေးမကြီးသေးပါဘူး။ အရေးကြီးတာ က ဒီအကြမ်းဖက်မှုကို အမြန်ဆုံး ရပ်တန့်ပြီး မြန်မာစစ်တပ်ဟာ နိုင်ငံရေး လုပ်ငန်းစဉ်တွေမှာ မပါဝင်တော့ ကြောင်း အတိအလင်း ထုတ်ပြန်ပြီး သူကျူးလွန်ခဲ့တဲ့ ရာဇဝတ်မှုတွေ အတွက် တရားရင်ဆိုင်ဖို့ပဲ ဖြစ်တယ်” ဟု ပြောသည်။     TPN ပါတီ၏ ဗဟိုကော်မတီ အစည်းအဝေးအပြီး ဇူလိုင်လ ၁၂ ရက်နေ့က ထုတ်ပြန်သည့် သဘောထား ထုတ်ပြန် ချက်ထဲတွင် စစ်ကောင်စီ၏ “လူသားမဆန်သော စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သော ရာဇဝတ်မှုများ” ကို ကန့်ကွက်ကြောင်း၊ နိုင်ငံတကာ အသိုင်းအဝိုင်းအနေဖြင့် အမြန်ဆုံး အရေးယူ ဆောင်ရွက် ပေးရန် တိုက်တွန်းထားသည်။     ဒေသခံ တအာင်းပြည်သူများ တရုတ်၏ ဖိအားကို ရင်ဆိုင်နေရချိန် စစ်ကောင်စီသည် တရုတ်ကို အားကိုးပြီး ရွေးကောက်ပွဲ ကျင်းပရန် ဖိအား ပေးလာနိုင်ခြေနှင့် ပတ်သက်၍လည်း မိုင်းနိုင်ဂေါင်ဇာရ် က ယခုကဲ့သို့ ပြောဆိုသည်။   “တရုတ်ဘက်က သူများရဲ့ ပြည်တွင်းရေးကို ဝင်ရောက် မစွက်ဖက်ဘူးလို့ ပြောထားတယ်။ သူကသာ အတင်း အကြပ် ဖိအားပေး တကယ် လုပ်နေတယ် ဆိုရင်တော့ တကယ့်နိုင်ငံကြီး တစ်နိုင်ငံကောင်း မပီသဘူးပေါ့နော်။”    စစ်ကောင်စီ၏ အုပ်ချုပ်ရေးနှင့် ရွေးကောက်ပွဲကို ငြင်းပယ်သည့် အပြင် TNP ပါတီ အနေဖြင့် တအာင်းဒေသ အတွက် ၎င်းတို့၏ နိုင်ငံရေးလမ်းပြမြေပုံကိုလည်း ထုတ်ပြန်ချက်တွင် ချပြခဲ့သည်။   TNP ပါတီ သည် တအာင်း နိုင်ငံရေး အတိုင်ပင်ခံ ကော်မတီ (TPCC) မှ တအာင်းပြည် ကောင်စီ (TLC) အဖြစ်သို့ ပြောင်းလဲ ဖွဲ့စည်းမှုကိုလည်း ထောက်ခံပြီး TLC မှ ဦးဆောင် အကောင်အထည် ဖော်မည့် ‘တအာင်းပြည် တော် လှန်ရေး ကာလ အစိုးရ အစီအမံ’ တွင် အပြည့်အဝ ပူးပေါင်း ဆောင်ရွက်သွားမည် ဖြစ်ကြောင်း အတည်ပြု ထားသည်။   TNP ပါတီသည် စစ်ကောင်စီ၏ နိုင်ငံရေး လုပ်ငန်းစဉ်များကို ဆန့်ကျင်ပြီး ဘုံရန်သူဖြစ်သည့် အာဏာရှင် စနစ်ကို အမြစ်ပြတ် တိုက်ဖျက်ကာ၊ ဖက်ဒရယ် ဒီမိုကရေစီ နိုင်ငံတော်သစ် တည်ဆောက်ရေးကိုသာ ဦးတည်ကြောင်း အတည်ပြု ပြောကြားထားသည်။

ရွေးကောက်ပွဲကို အယုံအကြည်မရှိကြောင်း တအာင်းပါတီပြော

ရွေးကောက်ပွဲကို အယုံအကြည်မရှိကြောင်း တအာင်းပါတီပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၁၅ ရက်။  စစ်ကောင်စီက ကျင်းပရန် ပြင်ဆင်နေသည့်…

  • July 15, 2025
ရွေးကောက်ပွဲ ဝင်မည့် USDP ကိုယ်စားလှယ်တစ်ဦး လုပ်ကြံခံရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၅ ရက်။   စစ်ကောင်စီ ရွေးကောက်ပွဲ ယှဉ်ပြိုင်မည့် ပြည်ထောင်စု ကြံ့ခိုင်ရေးနှင် ဖွံ့ဖြိုးရေးပါတီ (USDP) မှ ကိုယ်စားလှယ် တစ်ဦး လုပ်ကြံခံလိုက်ရသည်။   ရှမ်းပြည်တောင်ပိုင်း၊ မောက်မယ်မြို့နယ်တွင် (USDP) မှ ကိုယ်စားလှယ် အမတ်တစ်ဦး လုပ်ကြံ သတ်ဖြတ်ခံရ သည်ဟု ဒေသတွင်း နီးစပ်သူများက ပြောသည်။   ယခင် ရွေးကောက်ပွဲများတွင် မောက်မယ်မြို့နယ်က အနိုင်ရခဲ့သော  စိုင်းငေါင်းဆိုင်ဟိန်းကို ၎င်း၏ နေအိမ်နှင့် ၂ မိုင်ခန့် ကွာဝေး သည့် တောင်ယာခြံထဲ၌ အမည်မသိ လက်နက်ကိုင် လူတစ်စုက လာရောက် ပစ်ခတ်ခဲ့ခြင်း ဖြစ်သည်ဟု ဆို သည်။   မောက်မယ်မြို့နယ်ရှိ USDP ပါတီဝင်များနှင့် အဆက်အသွယ်ရှိသူ တစ်ဦးက “သူ့အစ်ကို လိုက်သွားတော့ အလောင်းတွေ့တယ်လို့ ကြားတယ်။ တစ်ချို့ ခြံချင်းနီးတဲ့သူတွေ ပြောတာတော့ ဆိုင်ကယ် ၂ စီးဝင်လာပြီး ပစ်သံ ဘာညာကြားတယ်လို့လည်း ပြောကြတာပဲ။ သူက စစ်တပ်ဖက်က ဆိုပေမယ့် လူကောင်း တစ်ယောက် ပါ။ မောက်မယ်မှာ မသိတဲ့သူ မရှိဘူး” ဟု ပြောသည်။   စိုင်းငေါင်းဆိုင်ဟိန်းအား ဇူလိုင်လ ၁၁ ရက်နေ့၊ နံနက် ၉ နာရီ အချိန်ခန့်တွင် ဦးခေါင်း၌ သေနတ်ဒဏ်ရာ ၂ ချက်ဖြင့် သေဆုံးနေသည့် အလောင်းကို တွေ့ရှိခဲ့ရပြီး သေဆုံးချိန်၌ အသက် ၆၂ နှစ် ရှိပြီဟု ဆိုသည်။   သေဆုံးသူမှာ မောက်မယ်မြို့နယ်အတွင်း နာမည်ပျက် မရှိသော်လည်း လက်ရှိကာလ၌ စစ်ကောင်စီနှင့် အနီးကပ် နေ၍ ရွေးကောက်ပွဲအတွက် အားကြိုးမာန်တက် ပြင်ဆင်နေသူ ဖြစ်သည်ဟု ဒေသခံများက ပြောသည်။   စိုင်းငေါင်းဆိုင်ဟိန်းနှင့် ပုဂ္ဂိုလ်ရေးအရ နီးစပ်သူ တစ်ဦးက “မောက်မယ်မှာက PDF တွေ မရှိဘူးဆိုတော့ ပြောရ ခက်ပါတယ်။ သူအာဏာ ရတုန်းကတော့ တော်တော်လုပ်ပေးခဲ့ပါတယ်။ လူတိုင်းကို ပြုံးပြုံးရယ်ရယ်ပဲ ဆက်ဆံ တယ်။ ပေါင်းသင်းဆက်ဆံရေး တအားကောင်းတယ်။ ဒီကာလတော့ ဘက်မတူရင် ပစ်သတ်ကြတာတော့ တော် တော် စိတ်မကောင်း ဖြစ်မိတယ်” ဟု ပြောသည်။   ကျောင်းဆရာဟောင်း တစ်ဦးဖြစ်သည့် စိုင်းငေါင်းဆိုင်ဟိန်းသည် ၂၀၁၀၊ ၂၀၁၅၊ ၂၀၂၀ အထွေထွေ ရွေးကောက်ပွဲ ကာလများအတွင်း ၃ ကြိမ်တိတိ အနိုင်ရခဲ့သူ ဖြစ်ပြီး လာမည့် စစ်ကောင်စီ ရွေးကောက်ပွဲ အတွက်လည်း ယှဉ်ပြိုင်ရန် ထပ်မံရွေးချယ်ခံထားရသူ ဖြစ်သည်။   မောက်မယ်မြို့နယ်၏ နေရာအများစုကို ပအိုဝ်းအမျိုးသား လွတ်မြောက်ရေး တပ်မတော် (PNLA) မှ ထိန်းချုပ် ထားပြီး သျှမ်းပြည်ပြန်လည် ထူထောင်ရေးကောင်စီ/ သျှမ်းပြည် တပ်မတော် (RCSS/ SSA) ကလည်း မကြာ ခဏ ဝင်ရောက် သွားလာလေ့ရှိသည်ဟု ဒေသခံများက ပြောသည်။

ရွေးကောက်ပွဲ ဝင်မည့် USDP ကိုယ်စားလှယ်တစ်ဦး လုပ်ကြံခံရ

ရွေးကောက်ပွဲ ဝင်မည့် USDP ကိုယ်စားလှယ်တစ်ဦး လုပ်ကြံခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၁၅ ရက်။  စစ်ကောင်စီ ရွေးကောက်ပွဲ ယှဉ်ပြို…

  • July 15, 2025
ယခု နှစ်အတွင်း ကရင်နီတွင် လေကြောင်းတိုက်ခိုက်မှုကြောင့် အရပ်သား ၃၃ ဦး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၁ ရက်။   ကရင်နီပြည်တွင် စစ်ကောင်စီ၏ လေကြောင်း တိုက်ခိုက်မှုကြောင့် ၆ လကျော်အတွင်း အရပ်သား ပြည်သူ ၃၃ ဦး သေဆုံးခဲ့ပြီး ထိခိုက်ဒဏ်ရာရရှိသူ ၉၄ ဦး ရှိခဲ့သည်ဟု ကရင်နီပြည် ကြားကာလ အုပ်ချုပ်ရေးကောင်စီ (IEC) က ပြောသည်။   ကရင်နီပြည်နယ် အတွင်း ယခုနှစ် ဇန္နဝါရီလမှ ဇူလိုင်လ ၉ ရက်နေ့အထိ လေကြောင်းမှ ဗုံးကြဲ တိုက်ခိုက်ခံရမှု များကြောင့် သေဆုံးခဲ့သည့် အရပ်သားပြည်သူ ၃၃ ဦးအထဲတွင် ကလေးသူငယ် ၂ ဦး၊ အမျိုးသမီး ၉ ဦး၊ အမျိုးသား ၁၅ ဦး နှင့် အချက်အလက် အတိအကျ မသိရသူ ၇ ဦး တို့ ဖြစ်သည်။   ကရင်နီပြည် ကြားကာလ အုပ်ချုပ်ရေးကောင်စီ (IEC) အတွင်းရေးမှုး ၂ ဦးဗညားက “လေကြောင်းရန် တိုက် ခိုက်မှုက ကျနော်တို့ ကရင်နီပြည်မှာ ခဏခဏဖြစ်တယ်။ နေရာတိုင်းနီးပါးမှာ ဖြစ်တယ်ပေါ့နော်။ ပြည်သူ လူထုကလည်း အနည်းနဲ့ အများကတော့ ဒီအပေါ်မှာ သတိဝိရိယရှိကြတယ်။ လိုအပ်တဲ့ ဗုံးခိုကျင်းတွေကလည်း တချို့ မြို့နယ်အလိုက် ဒေသအလိုက် သူတို့ဟာ ရှိတယ်ပေါ့နော်။ သို့ပေမဲ့လည်း ညကြီးညနက်မှာ လာကြဲတာ ရှိသလို တစ်ခါတစ်လေကလည်း လုံးဝ မထင်မှတ်ထားတဲ့ အချိန်မှာပေါ့နော်။ ကျနော်တို့ကလည်း လေကြောင်း ရန် ကြိုတင်အသိပေး၊ ကြိုတင်ကာကွယ်တဲ့ စနစ်ကလည်း အရမ်း အားနည်းတယ်ပေါ့နော်။ အားနည်းတဲ့ အတွက်ကြောင့်မို့လို့ အားလုံးကို အသိမပေးနိုင်တာလည်း စိတ်မကောင်း ဖြစ်ရတယ်ပေါ့နော်” ဟု ပြောသည်။   ၆ လကျော်ကာလ အတွင်း လေကြောင်း တိုက်ခိုက်မှုများကြောင့် ကလေးသူငယ် ၁၃ ဦး၊ အမျိုးသမီး ၁၀ ဦး၊ အမျိုးသား ၁၆ ဦး နှင့် အချက် အလက် အတိအကျ မသိရသူ ၅၅ ဦး စုစုပေါင်း ၉၄ ဦးတို့ ထိခိုက်ဒဏ်ရာရခဲ့ သည်။   စစ်ကောင်စီက စစ်ရေးပစ်မှတ် အရပ်သားပစ်မှတ် မခွဲခြားဘဲ ကရင်နီပြည်အတွင်း လေကြောင်း တိုက်ခိုက်မှုများ ပိုမို၍ လုပ်လာနေသောကြောင့် အရပ်သားပြည်သူများ အတွက် စစ်မဲ့ဇုန် (Safe zone) သတ်မှတ်ဆောင်ရွက် ပေးရန် နိုင်ငံတကာကို ဦးဗညားက ယခုကဲ့သို့ တောင်းဆိုထားသည်။   “ပြည်သူလူထုတွေ နေထိုင်တဲ့အရပ်မှာ ဗုံးကြဲတာတွေ တိုက်ခိုက်မှုတွေ မလုပ်ဖို့အတွက် အဲ့ဒီနေရာတွေကို Safe Zone (စစ်မဲ့ဇုန်) တွေ No Fly Zone (လေယာဉ်မပျံသန်းရဇုန်) တွေကို အတတ်နိုင်ဆုံး ထူထောင်ပြီးတော့မှ လူထုရဲ့ အသက် အိုးအိမ် စည်းစိမ်ကို ကာကွယ်ဖို့ အတွက် နိုင်ငံတကာရဲ့ ဖိအားပေါ့နော် နိုင်ငံတကာရဲ့ အကူအညီ လိုအပ်တယ်ပေါ့နော်။”   ထို့အတူ လက်နက်ကြီး ပစ်ခတ်ခြင်း၊ ဒရုန်းဖြင့် ဗုံးကြဲခြင်း၊ ပစ်ခတ်သတ်ဖြတ်ခြင်း၊ မိုင်းနင်းမိခြင်းတို့ကြောင့် လည်း ၆ လကျော်အတွင်း ကလေးသူငယ် ၆ ဦး၊ အမျိုးသမီး ၃ ဦး၊ အမျိုးသား ၁၈ ဦး နှင့် အချက်အလက် အတိအကျ မသိရသူ ၂ ဦးတို့ စုစုပေါင်း ၂၉ ဦး သေဆုံးခဲ့ပြီး အရပ်သားပြည်သူ ၁၁၄ ဦးတို့ ထိခိုက်ဒဏ်ရာရရှိခဲ့ သည်။   ကရင်နီပြည်အတွင်း၌ စစ်ကောင်စီတပ်က အရပ်သား ပြည်သူများအား ပစ်မှတ်ထားပြီး စစ်ရာဇဝတ်မှု ကျူးလွန် နေသည် သာမက ပြည်သူ့နေအိမ်များကို မီးရှို့ဖျက်ဆီးခြင်း၊ ကုန်စည်စီးဆင်းမှုများ ပြတ်တောက်စေရန် ယာဉ် လမ်းကြောင်းများ ပိတ်ဆို့ခြင်းနှင့် ပြည်သူများနေထိုင်ရာ ဒေသများသို့ စစ်ဆင်ရေး အကြိမ်ကြိမ် ပြုလုပ်ခြင်း စသည့် လူ့အခွင့်အရေးချိုး ဖောက်မှုများကို ကျူးလွန်နေဟု (IEC) က ဇူလိုင်လ ၉ ရက်နေ့ ထုတ်ပြန်ချက်ထဲတွင် ဖော်ပြထားသည်။

ယခု နှစ်အတွင်း ကရင်နီတွင် လေကြောင်းတိုက်ခိုက်မှုကြောင့် အရပ်သား ၃၃ ဦး သေဆုံး

ယခု နှစ်အတွင်း ကရင်နီတွင် လေကြောင်းတိုက်ခိုက်မှုကြောင့် အရပ်သား ၃၃ ဦး သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၁၂ ရက်။  ကရင်နီပြည်…

  • July 12, 2025
စစ်ကောင်စီတပ်က ပုဂံ/ညောင်ဦးတွင် ရွာ ၆ ရွာ မီးရှို့   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၁ ရက်။   ပုဂံ/ညောင်ဦးမြို့နယ်အတွင်းရှိ ကျေးရွာ ၆ ရွာကို စစ်ကြောင်းထိုးလာသည့် စစ်ကောင်စီ လက်အောက်ခံ တပ်ဖွဲ့ ဝင်များက တိုက်ပွဲဖြစ်ပွားခြင်း မရှိဘဲ နေအိမ်များကို မီးရှို့သွားသည်ဟု ဒေသခံများက ပြောသည်။   မန္တလေးတိုင်း၊ ညောင်ဦးမြို့နယ်၊ ပုဂံမြို့အရှေ့တောင်ဘက်ရှိ ကျေးရွာများထဲမှ ချောင်းရှည်၊ ပွဲတိုင်း၊ အနောက်အုံ၊ ဇီးစမြင်၊ ကျောက်ပြင်ကန်နှင့် မြောင်ကျေးရွာတို့ကို စစ်ကြောင်း ထိုးဝင်ရောက်လာပြီး နေအိမ်များကို မီးရှို့ခဲ့ခြင်း ဖြစ်‌သည်ဟု ဇီးစမြင်ရွာသား တစ်ဦးက ပြောသည်။   အဆိုပါ ကျေးရွာများကို ဇူလိုင်လ ၈ ရက်နေ့နှင့် ၉ ရက်နေ့တို့တွင် စစ်ကောင်စီတပ်ဖွဲ့ဝင်များက မီးရှို့ဖျက်ဆီးခဲ့ ခြင်း ဖြစ်သည်။   အနောက်အုံရွာသားတစ်ဦးက “တစ်နေရာထဲ မဟုတ်ဘူး ၃ နေရာလောက်ကို တစ်ပြိုင်တည်း ရှို့တာ။ ရွာသား တွေ မီးမငြိမ်းနိုင်အောင် ထိုင်စောင့်နေသေးတာ။ ကိုယ့်အိမ်ကိုယ့်ရွာ မီးလောင်နေတာကို ထိုင်ကြည့်နေရတဲ့ အဖြစ် ဗျာ။ ဘယ်လောက် ရင်နာစရာကောင်းတယ်ဆိုတာ စဉ်းစားသာကြည့်ပေါ့” ဟု ပြောသည်။   ဇူလိုင်လ ၈ ရက်နေ့တွင် ညောင်ဦး - ကျောက်ပန်းတောင်း ကားလမ်း ရွှေလှိုင်းဘက်မှ အင်အား ၈၀ ကျော်ခန့်ဖြင့် စစ်ကြောင်းထိုးလာခြင်း ဖြစ်ပြီး နံနက် ၉ နာရီ အချိန်ခန့်တွင် ပွဲတိုင်းကျေးရွာကို စတင်မီးရှို့ပြီးနောက် ချောင်း ရှည်၊ အနောက်အုံနှင့် ဇီးစမြင်ကျေးရွာတို့ကို ဆက်လက် မီးရှို့ခဲ့ခြင်း ဖြစ်ကြောင်း ဒေသခံများက ပြောသည်။   မီးရှို့ခံရသည့် အဆိုပါ ကျေးရွာများမှ ရွာသူ/ရွာသားများသည် ကျောက်ပြင်ကန်ကျေးရွာ ဘုန်းကြီးကျောင်း၌ စစ်ဘေးရှောင်‌အဖြစ် ရောက်ရှိလာကြပြီး လက်ရှိတွင် လူဦးရေ ၇၀၀ ခန့်ရှိသည်ဟု ကျောက်ပြင်ကန်ရွာသား တစ်ဦးက ပြောသည်။   ကျောက်ပြင်ကန်ရွာသား “စစ်ဘေးရှောင်တွေကို ရွာကစုပေါင်းပြီး ညစာကို ကုလားပဲနှပ် ငရုတ်သီးငပိကျော်နဲ့ ချဉ်ပေါင်ဟင်းချို ချက်ပြီး ကျွေးမွေးခဲ့တာပေါ့။ ဆန် ၄ အိတ်ကုန်တယ်။ ကူညီရိုင်းပင်းကြတာပေါ့ အညာဓလေ့ ပေါ့” ဟု ပြောသည်။   ဇူလိုင်လ ၉ ရက်နေ့တွင် ဇီးစမြင်ကျေးရွာတွင် ညအိပ်နားနေသည့် အဆိုပါ စစ်ကောင်စီ စစ်ကြောင်းသည် ကျောက်ပြင်ကန်ကျေးရွာသို့ ဆက်၍ စစ်ကြောင်းထိုးလာသဖြင့် ရွာသားများ ထွက်ပြေးခဲ့ကြရသည်။   ထိုနေ့ နံနက် ၉ နာရီအချိန်ခန့်တွင် ကျောက်ပြင်ကန်ကျေးရွာအတွင်း နေရာ ၃ နေရာခွဲကာ နေအိမ်များကို မီးရှို့နေသည်ကို တွေ့မြင်ခဲ့ရသည်ဟု ရွာသားများက ပြောသည်။   ဇီးစမြင်ရွာသား တစ်ဦးကလည်း “စစ်ဘေးရှောင်လာတဲ့ သူတွေကို ကူညီလို့စောင့်ရှောက်လို့များလား မသိပါ ဘူး။ မကူညီနိုင်အောင် လူတွေ ဒီ့ထက်ပိုပြီး အတိဒုက္ခရောက်အောင် ခိုကိုးရာမဲ့အောင်ဆိုတဲ့ စိတ်ဆိုး စိတ်ယုတ် တွေနဲ့ ကျောက်ပြင်ကန်ကိုပါ မီးရှို့တာထင်ပါရဲ့ဗျာ” ဟု ပြောသည်။   ထိုနေ့ မွန်းတည့်ချိန်ခန့်တွင် ကျောက်ပြင်ကန်ကျေးရွာ၏ တောင်ဖက်ရှိ မြောင်ကျေးရွာကို စစ်ကြောင်းထိုးကာ ရွာအနောက်ဖက်မှ ဝင်ရောက်ပြီး မီးရှို့သွားခဲ့သေးသည်ဟု ဆိုသည်။   ရွာသားများ ဝင်ရောက်၍ မီးငြိမ်းသတ်ခြင်း မလုပ်နိုင်အောင် မြောင်ကျေးရွာထဲတွင် စခန်းချ ချက်ပြုတ် စားသောက်ကာ အဖိုးတန် ပစ္စည်းများ ရှာဖွေယူသွားကြသည်ဟု ရွာသားများက ပြောသည်။   စစ်ကောင်စီ တပ်ဖွဲ့ဝင်များ၏ မီးရှို့ခံရသဖြင့် ကျောက်ပြင်ကန်ကျေးရွာတွင် နေအိမ် ၂၂ လုံး၊ မြောင်ကျေးရွာတွင် နေအိမ် ၄၇ လုံး မီးလောင်ကျွမ်းခဲ့သည်ဟု သိရပြီး အခြားမီးရှို့ခံရသည့် ကျေးရွာ ၄ ရွာမှ ဆုံးရှုံးမှုများကိုမူ တိတိ ကျကျ မသိရသေးကြောင်း ကျောက်ပြင်ကန် ကျေးရွာသားများက ပြောသည်။

စစ်ကောင်စီတပ်က ပုဂံ/ညောင်ဦးတွင် ရွာ ၆ ရွာ မီးရှို့

စစ်ကောင်စီတပ်က ပုဂံ/ညောင်ဦးတွင် ရွာ ၆ ရွာ မီးရှို့ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၁၂ ရက်။  ပုဂံ/ညောင်ဦးမြို့နယ်အတွင်းရှိ ကျေးရွ…

  • July 12, 2025
ချောက် - ညောင်ဦးကားလမ်းပေါ်မှ ကျေးရွာ ၂ ရွာ မီးရှို့ဖျက်ဆီးခံရ   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ  ၁၂ ရက်။   ချောင်းတစ် ချောင်းသာခြားသည့် ချောက် - ညောင်ဦး ကားလမ်းပေါ်ရှိ ကျေးရွာနှစ်ရွာကို စစ်ကြောင်းထိုး လာ သည့် စစ်ကောင်စီတပ်ဖွဲ့ဝင်များက တိုက်ပွဲဖြစ်ပွားခြင်း မရှိဘဲ နေအိမ်များကို မီးရှို့သွားသည်ဟု ဒေသခံများက ပြောသည်။   မန္တလေးတိုင်း၊ညောင်ဦးမြို့နယ်၊ ချောက် - ညောင်ဦး ကားလမ်းဘေးမှ မီးလောင်ဖျားတောင်နှင့် မီးလောင်ဖျား မြောက်ကျေးရွာတို့ကို ဇူလိုင်လ ၁၂ ရက်‌နေ့၊ နံနက် ၉ နာရီခန့်မှ စတင်ကာ စစ်ကောင်စီ စစ်ကြောင်းက မီးရှို့ ဖျက်ဆီးနေခြင်း ဖြစ်သည်။   အဆိုပါကျေးရွာ နှစ်ရွာကို မီးရှို့ဖျက်ဆီးခဲ့သည့် စစ်ကောင်စီ စစ်ကြောင်းမှာ စဉ့်ကူကျေးရွာမှ ထွက်ခွာလာသည့် အင်အား ၁၀၀ ကျော်ခန့် စစ်ကြောင်းမှ မီးရှို့ခဲ့ခြင်းဖြစ်ကြောင်း ရွာသားများက ပြောသည်။   အသက် ၅၀ ကျော်ခန့် မီးလောင်ဖျားတောင်ရွာသား တစ်ဦးက “စဉ့်ကူက ထွက်လာတဲ့ စစ်ကြောင်း ပြည်တော် သာရွာကို ရောက်ပြီလို့ သတင်းကြားတော့ ကိုင်းထဲကို ပြေးကြရတာပေါ့။ မီးတောက်တွေ တွေ့မှပဲ ရွာကို မီးရှို့ပြီဆိုတာ သိရတာ” ဟု ပြောသည်။   စစ်ကောင်စီ တပ်ဖွဲ့ဝင်များသည် မီးလောင်ဖျားတောင်ကျေးရွာကို မီးရှို့ပြီးနောက် မီးလောင်ဖျား‌မြောက်ကျေးရွာ ကို ဆက်ပြီး မီးရှို့ခြင်းဖြစ် ကြောင်း၊ ထို့နောက် နေအိမ်များ အတွင်းရှိ ပစ္စည်းများကို ရှာဖွေကာ တန်ဖိုးရှိ ပစ္စည်း များကို ယူဆောင်သွားကြသည်ဟု ဆိုသည်။   ထို့အပြင် ကျေးရွာအတွင်း သေနတ်ဖြင့်လည်း ရမ်းသန်း ပစ်ခတ်သွားကြောင်း မီးလောင်ဖျားမြောက်ရွာသား အချို့က ပြောသည်။   “တောင်ရွာထက် မြောက်ရွာက ပိုပြီး အိမ်ခြေ ဆုံးရှုံးမှုများ မယ်လို့ ထင်တာပဲ။ မီးတောက်ကို ကြည့်ပြီး ခန့်မှန်း ရတာလေ။ ရွာနားကို မကပ်ရဲကြသေးဘူး” ဟု မီးလောင်ဖျားမြောက် ရွာသားတစ်ဦးက ပြောသည်။   ထို့အပြင် ပျူစောထီးရွာဖြစ်သည့် ဂန့်ဂါကျေးရွာဘက်မှလည်း အင်အား ၇၀ ကျော်ခန့်ပါသည့် စစ်ကြောင်းမှာ မီးလောင်ဖျားတောင်/မြောက် ကျေးရွာဘက်သို့ ဦးတည်ကာ စစ်ကြောင်းထိုးလာနေကြောင်း၊ အနီးရှိ ရွာသာ ကျေးရွာထဲကိုလည်း သေနတ်ပစ်ဖောက်ကာ ဝင်ရောက်လာသည်ဟု ဆိုသည်။   ရွာသာကျေးရွာအတွင်းသို့ ဝင်ရောက်လာပြီးနောက် ရွာသားများ၏ နေအိမ်များကို မွှေနှောက်ရှာဖွေပြီး အဖိုးတန် ပစ္စည်းများကို ယူသွားကြသည်ဟု ဆိုသည်။   ရွာသားတစ်ဦးက “အခုက စဉ့်ကူ ရဲစခန်းက ထွက်လာတဲ့ စစ်ကြောင်းရယ်၊ ဂန့်ဂါစစ်ကြောင်းရယ် နှစ်ဖက်ညှပ် ပြီး စစ်ကြောင်းထိုးတာ။ မြေသန့်တောင်နဲ့ မအူပင် ရွာကြားမှာ တလောက တော်လှန်ရေး အဖွဲ့တွေရဲ့ မိုင်းစာ မိ လို့ ပျက်နေတဲ့ သံချပ်ကာ ကားရှိတယ်။ အဲဒီမှာ တဲထိုးပြီး စစ်သားတွေ စောင့်နေကြတာ။ ပြန်မသယ်နိုင် မချင်း တော့ စစ်ကြောင်းတွေ ထိုးနေဦးမယ်ထင်တယ်” ဟု ပြောသည်။   အဆိုပါ စစ်ကြောင်းများကြောင့် ညောင်ဦး - ချောက် ကားလမ်းဘေးရှိ ကျေးရွာများ ဖြစ်သော ရွာသာ၊ ညောင် လှ၊ မအူပင်၊ မြေသန့်တောင်၊ ဇက၊ ကြအို၊ ကြအိုကျွန်း၊ ရွာသစ်၊ မီးလောင်ဖျားတောင်/မြောက် ကျေးရွာနှင့် ပြည် တော်သာကျေးရွာတို့မှ ပြည်သူ များမှာ မိုးရေထဲတွင် စစ်ဘေး တိမ်းရှောင်နေကြရသည် ဟု ဒေသခံများက ပြောသည်။

ချောက် – ညောင်ဦးကားလမ်းပေါ်မှ ကျေးရွာ ၂ ရွာ မီးရှို့ဖျက်ဆီးခံရ

ချောက် - ညောင်ဦးကားလမ်းပေါ်မှ ကျေးရွာ ၂ ရွာ မီးရှို့ဖျက်ဆီးခံရ သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဇူလိုင်လ  ၁၂ ရက်။ ချောင်းတစ် ချောင်းသာခြားသ…

  • July 12, 2025
လောင်းလုံးတွင် ခရီးသွားထောက်ခံစာ လုပ်သူ များပြားလာ   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၂ ရက်။   လောင်းလုံး မြို့မရဲစခန်းတွင် ၄ ရက် ဆက်တိုက် ခရီးသွားထောက်ခံစာ လာလုပ်သူများ ပြည့်ကြပ်နေကြောင်း ရဲစခန်းဝင်းအတွင်း နေထိုင်သူများက ပြောသည်။   လောင်းလုံးမြို့မှ ထားဝယ်မြို့ပေါ်သို့ အသွား ကမြောကင်း တံတားဂိတ်မှ ဖြတ်သန်းလျှင် ထောက်ခံစာ ပါမှသာ ဖြတ်သန်းနေသည့် အတွက် လောင်းလုံး ရဲစခန်းတွင် ထောက်ခံစာ လုပ်သူများ ဇူလိုင်လ ၈ ရက်နေ့မှ စတင်ပြီး လေးရက် ဆက်တိုက် ပြည့်ကြပ်နေခြင်း ဖြစ်သည်။   ရဲစခန်းတွင် ခရီးသွား ထောက်ခံစာ လာလုပ်သူများကို တစ်ကိုယ်လုံး စစ်ဆေးပြီး CDM ဝန်ထမ်း ဟုတ် မဟုတ်ကိုပါ စစ်ဆေးနေကြောင်း ကိုယ်တိုင်ကြုံခဲ့ရသူ အချို့က ပြောသည်။   အသက် ၅၀ ခန့်အရွယ် အမျိုးသားတစ်ဦးက “CDM လုပ်ထားတဲ့သူ ဆိုရင်တော့ သွားမလုပ်တာက အကောင်း ဆုံးပဲ၊ မှတ်ပုံတင်ထဲမှာ ဝန်ထမ်းဆိုပြီးပါခဲ့ရင် စစ်ဆေးခံ ထိပြီလေ၊ ပြီးတော့ ထောက်ခံစာလုပ်သူတွေကိုလဲ ခြေ လက် မျက်နှာကအစ အကုန်လုံးစစ် ဆေးနေတာ” ဟု ပြောသည်။   စစ်တပ်က အာဏာသိမ်းပြီး နောက်ပိုင်း လောင်းလုံးမြို့နယ်၏ တောင်ဘက်ခြမ်းရှိ ကျေးရွာများသည် သပိတ် လှုပ်ရှားမှုများ၊ CDM လှုပ်ရှားမှုများနှင့် လက်နက်ကိုင် တပ်ဖွဲ့ဝင်များ အင်အားအကောင်းဆုံး ဒေသတစ်ခုလည်း ဖြစ်နေခဲ့သည်။   လောင်းလုံး ရဲစခန်းတွင် ထောက်ခံစာ ပြုလုပ်ရန်အတွက် မှတ်ပုံတင် မိတ္တူတစ်စောင်၊ သန်းခေါင်စာရင်း မိတ္တူ တစ်စောင်နှင့် ပတ်စ်ပို့အရွယ် ဓာတ်ပုံနှစ်ပုံကို ပေးရပြီး ထောက်ခံစာ၏ သက်တမ်းမှာ ခြောက်လရှိသည်ဟု ဆိုသည်။   စစ်အာဏာသိမ်းခဲ့သည့် အစောပိုင်း ကာလများတွင်လည်း ခရီးသွားလာပါက ရပ်ကျေး အုပ်ချုပ်ရေးမှူး ထောက် ခံစာ ပါရမည်ဟု တင်းကြပ်ခဲ့ဖူးသည်။   လက်ရှိတွင် ကမြောကင်း တံတား ဖြတ်သန်းသူ အားလုံးကို အချိန်ပြည့် စစ်ဆေးနေခြင်းမျိုး မဟုတ်ဘဲ ခရီးသည် တင်ကားဖြင့် သွားလာကြသူများနှင့် လောင်းလုံးမြို့နယ် တောင်ဘက်ခြမ်းမှ လာရောက်ကြသူများကို အဓိကထား စစ်ဆေးနေကြောင်း ခရီးသွားများက ဆိုသည်။   ထားဝယ်မြို့ အဝင်ရှိ အခြား စစ်ဆေးရေးဂိတ်များတွင်မူ ထောက်ခံစာ မလိုအပ်ဘဲ သွားလာခွင့် ရနေသေး ကြောင်း ခရီးသွားများက ပြောသည်။

လောင်းလုံးတွင် ခရီးသွားထောက်ခံစာ လုပ်သူ များပြားလာ

လောင်းလုံးတွင် ခရီးသွားထောက်ခံစာ လုပ်သူ များပြားလာ သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၁၂ ရက်။ လောင်းလုံး မြို့မရဲစခန်းတွင် ၄ ရက် ဆက်…

  • July 12, 2025
အမှတ် - ၅၅၈ တပ်ရင်းမှ ထွက်လာသည့် စစ်‌ကောင်စီ စစ်ကြောင်း တိုက်ခိုက်ခံရ   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၂ ရက်။   မြိတ်ခရိုင်၊ တနင်္သာရီမြို့နယ်၊ ဇဝဲကျေးရွာအခြေစိုက် စစ်ကောင်စီတပ်ရင်းမှ ခြေလျင်ထွက်လာသည့် စစ်ကောင် စီ စစ်ကြောင်းကို မြေပြင်မှ မိုင်းဆွဲတိုက်ခိုက်ပြီးနောက် ဝေဟင်မှ ဒရုန်းဖြင့်ပါ ထပ်မံတိုက်ခဲ့ကြောင်း ပြည်သူ့ ကာကွယ်ရေး ပူးပေါင်းတပ်ဖွဲ့ တာဝန်ရှိသူက ပြောသည်။   စစ်ကောင်စီ အမှတ် -  ၅၅၆ ခြေမြန်တပ်‌ရင်းမှ ထွက်လာသည့် အင်အား ၃၀ ခန့်ပါ စစ်ကြောင်းကို ဇူလိုင်လ ၉ ရက်နေ့ ညနေ ၄ နာရီခန့်က ရမ်းဖိုကျေးရွာ အရောက်တွင် မိုင်းဆွဲတိုက်ခိုက်ခဲ့ခြင်း ဖြစ်သည်။   ထိုသို့ မိုင်းဆွဲ တိုက်ခိုက်ချိန် စစ်ကောင်စီတပ်ကလည်း လက်နက်ကြီးဖြင့် ၆ ချက်ခန့် ပြန်လည်ပစ်ခတ်ခဲ့သည်ဟု ပြည်သူ့ ကာကွယ်ရေး ပူးပေါင်းတပ်ဖွဲ့ တာဝန်ရှိသူ တစ်ဦးက ပြောသည်။   မိုင်းဆွဲတိုက်ခိုက်မှုကြောင့် ရမ်းဖိုရွာရှိ လူမနေသည့် အိမ်များ အတွင်းသို့ ဝင်ပြေးသွားကြသော စစ်ကောင်စီ တပ်သားများကို ဝေဟင်မှ ဒရုန်းဖြင့် ဗုံးသီး ၂ လုံးချပြီး ထပ်မံ တိုက်ခိုက်ခဲ့သေးသည်ဟု ဗိုလ်ခရင်း တပ်ဖွဲ့၏ တပ်ဖွဲ့ဝင် တစ်ဦးက ဆိုသည်။   “ရမ်းဖို ဘုန်းကြီးကျောင်း အနားမှာ သူတို့ လမ်းကင်းယူဖို့ လုပ်နေတုန်း မိုင်းဆွဲလိုက်တာပါ။ လူနေ အိမ်တွေထဲ ဝင်ပြေးကြတယ်။ အဲဒီဝင်ပြေးတဲ့ အိမ်တွေကို သူတို့ ထိခိုက်မှုတော့ စုံစမ်းနေတုန်းပဲ၊ ပူးပေါင်းတပ်ဖွဲ့ဘက်က အထိအခိုက်မရှိဘဲ ပြန်ဆုတ်လာနိုင်ခဲ့တယ်။”   စစ်ကောင်စီတပ်ဖွဲ့က ရမ်းဖိုကျေးရွာတွင် အင်အား ၁၀၀ နီးပါးခန့် ဖြည့်တင်းထားပြီး လမ်းကင်းယူထားသည်မှာ တစ်လကျော်ကြာလာပြီ ဖြစ်သည်။   ထို့ကြောင့် ရမ်းဖိုကျေးရွာက ရွာသားများလည်း အိုးပစ်အိမ်ပစ် တိမ်းရှောင်နေသည်မှာ တစ်လကျော်ရှိပြီ ဖြစ် သည်။   မိုင်းဆွဲ တိုက်ခိုက်ခြင်းနှင့် ဒရုန်းဖြင့် ဗုံးသီးချ တိုက်ခိုက်မှုကို မြိတ် ပြည်သူ့ ကာကွယ်ရေး အဖွဲ့၊ ဗိုလ်ခရင်းတပ်ဖွဲ့၊ တနင်္သာရီ - ပကဖ ဇုန် ၃ တို့ ပူးပေါင်းလုပ်ဆောင်ခဲ့သည်ဟု မြိတ် - ပကဖ အဖွဲ့က ထုတ်ပြန်ထားသည်။   ရမ်းဖိုကျေးရွာသည် မြိတ် - တနင်္သာရီ ပြည်ထောင်စု လမ်းမကြီးပေါ်တွင် တည်ရှိပြီး တနင်္သာရီမြို့နှင့် ၁၂ မိုင်ခန့် သာ ကွာဝေးသည်။

အမှတ် – ၅၅၈ တပ်ရင်းမှ ထွက်လာသည့် စစ်‌ကောင်စီ စစ်ကြောင်း တိုက်ခိုက်ခံရ

အမှတ် - ၅၅၈ တပ်ရင်းမှ ထွက်လာသည့် စစ်‌ကောင်စီ စစ်ကြောင်း တိုက်ခိုက်ခံရ သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၁၂ ရက်။ မြိတ်ခရိုင်၊ တနင်္သ…

  • July 12, 2025
မြစ်ရေအတက်တွင် ချင်းတွင်း မြစ်ကြောင်းအတိုင်း စစ်ကောင်စီ သင်္ဘော ၃၀ ကျော် ဆန်တက်လာ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၀ ရက်။   မြစ်ရေတက်သည်ကို အခွင့်ကောင်းယူ၍ ချင်းတွင်းမြစ်ကြောင်း အတိုင်း ဆန်တက်လာသည့် စစ်သင်္ဘောနှင့် ဖလပ်ရေယာဥ် အစီးရေ ၃၀ ကျော်ရှိနေသည်ဟု အခြေအနေကို စောင့်ကြည့်နေသည့် သတင်းအရင်းအမြစ် များက ပြောသည်။   မန္တလေးမြို့မှ ချင်းတွင်းမြစ်ကြောင်း အတိုင်း အထက်ကို ဦးတည်ကာ ဆန်တက်လာသည့် စစ်သင်္ဘောနှင့် ဖလပ်ရေယာဥ် စုစုပေါင်း ၃၀ ကျော်ရှိသည်ဟု ဆိုကြသည်။   စစ်ကောင်စီတပ်သည် ချင်းတွင်းမြစ်ရေတက်သည်ကို အခွင့်ကောင်းယူကာ မြစ်ကြောင်းတစ်လျှောက်တွင် ရှိသည့် စစ်ကောင်စီတပ်၏ စခန်းများနှင့် အထက်ဘက် ဟုမ္မလင်းမြို့နယ်အထိ စစ်အင်အားနှင့် ရိက္ခာများ ဖြည့်တင်းလေ့ရှိသည်။   ချောင်းဦးမြို့နယ်မှ ကာကွယ်ရေးတပ်ဖွဲ့ဝင် အမျိုးသားတစ်ဦးက “စုစုပေါင်း အစီးရေက ၃၀ ကျော်တယ်။ သူတို့ က ကြေးနီတွေ တင်တာရှိတယ်။ ဆားလင်းကြီး ဝမ်ပေါင်ကပေါ့။ ဖလပ်ခွံ အရေအတွက်က တော်တော်လေး များတယ်။ ဒီနှစ်တော့ အစီးရေ ပိုသုံးတာပေါ့လေ။ ၃၀ ကျော်ကြီး ဆန်လာတာဆိုတော့လေ။ အရင်နှစ်တွေက ၁၀ စီး ၁၅ စီးပဲ တွေ့ရတာ။ အရင်နှစ်တွေကတော့ ဒီလောက်မရှိဘူးပေါ့လေ” ဟု ပြောသည်။   ယခုတစ်ကြိမ် ဆန်တက်လာသော ရေယာဥ်များထဲတွင် စစ်သင်္ဘော ၄ စီးနှင့် အတူ ဖလပ်ရေယာဥ် များစွာ ပါဝင်ပြီး စုစုပေါင်း ရေယာဥ် ၃၀ ကျော်ရှိသည့် အတွက် ယခင်နှစ်များကထက် ပိုများပြားသည့် အင်အား ဖြစ် သည်ဟု ချောင်းဦးမြို့နယ်ထဲက ကာကွယ်ရေးတပ်ဖွဲ့ဝင် အမျိုးသားက ပြောသည်။   ထို့အပြင် ရေယာဥ်များ ဆန်တက်လာချိန်၌လည်း မြစ်ကမ်းဘေး တစ်လျှောက် လက်နက်ကြီး လက်နက်ငယ် များဖြင့် ရမ်းသမ်း ပစ်ခတ်မှုများရှိသည့် အပြင် လုံခြုံရေးယူ ပစ်ခတ်ပေးသည့် ပါရာမော်တာ ပစ်ခတ်မှုကြောင့် ဆားလင်းကြီးမြို့နယ်က အရပ်သား ၄ ဦး သေဆုံးခဲ့ရသည်ဟု အညာ ပစ်တိုင်းထောင်လေးများ အဖွဲ့က ဇွန်လ ၂၈ ရက်နေ့ ထုတ်ပြန်ထားသည်။   လက်ရှိတွင် အဆိုပါ ရေယာဥ်များသည် ပဇူလိုင်လ ၈ ရက်နေ့က မုံရွာမြို့နယ်ရှိ အုံးပင်ဆိပ်နှင့် အလုံမင်းဒေါင့် ဆိပ်ကမ်းတို့တွင် ခွဲ၍ ယနေ့အထိ ဆိုက်ကပ်ရန် ပြင်ဆင်မှုများ လုပ်နေကြောင်း မြေပြင် သတင်းအရင်းအမြစ် များက ပြောသည်။   အညာပစ်တိုင်းထောင်လေးများ အဖွဲ့က တာဝန်ရှိသူ အမျိုးသမီးတစ်ဦးက “အခုတက်လာတာက အစီးရေ စုစုပေါင်း ၃၀ ကျော်ရှိပြီး အရင်ရှိနေတဲ့ ရေယာဥ်တွေပါ ပေါင်းရင် ၅၀ နီးပါးလောက် ရှိတယ်။ စစ်သင်္ဘော ကတော့ နည်းမှာပေါ့နော်။ သူတို့က လုံခြုံရေးအနေနဲ့ လိုက်တာ ကုန်တင်သင်္ဘောတွေက ပိုများတယ်” ဟု ပြောသည်။   ထိုသို့ စစ်သင်္ဘောနှင့် ကုန်တင်သင်္ဘော ဖလပ်ရေယာဥ်များစွာ အသုံးပြုနေခြင်းသည် အထက်ဘက်၌ တံတား ပြုပြင်ရန်နှင့် ဆားလင်းကြီးမြို့နယ်မှ ဝမ်ပေါင်ကုမ္ပဏီရှိ ကြေးနီများ သယ်ယူရန် အပြင် မြစ်ကြောင်း တစ်လျှောက်ရှိ စစ်စခန်းများကို စစ်အင်အားနှင့် ရိက္ခာများ တင်ပို့ရန် ဖြစ်သည်ဟု အထက်ပါ အမျိုးသမီးက ဆိုသည်။   တစ်ဖက်တွင် ဆန်တက်လာသည့် မြစ်ကြောင်းတစ်လျှောက် ဆားလင်းကြီးမြို့နယ်နှင့် ချောင်းဦးမြို့နယ် အကြား တွင် ကာကွယ်ရေးတပ်များနှင့် တိုက်ပွဲများ ပြင်းထန်ခဲ့သည်ဟု ချောင်းဦး မြို့နယ်က ကာကွယ်ရေး တပ်ဖွဲ့ဝင်က ဆက်ပြောသည်။   “သူတို့ အရင်နှစ်တွေက ပစ်ခတ်ခံရလေ့ရှိတဲ့ နေရာတွေကို လက်နက်ကြီးတွေ လက်နက်ငယ်တွေနဲ့ ရမ်းသမ်း ပစ်လေ့ရှိတယ်။ ပါရာမော်တာနှစ်စီးနဲ့ ချသွားသေးတယ် ဆားလင်းကြီး မြို့နားပေါ့လေ။ ချောင်းဦးနယ်က ကံကြီး ကုန်းပျူရွာ နားမှာလည်း တိုက်ပွဲ ဖြစ်သေးတယ်။ သူတို့က ရိက္ခာပို့တဲ့ အချိန်ဖြစ်တာပေါ့။”   စစ်ကောင်စီတပ်သည် ဇူလိုင်လ ၄ ရက်နေ့က စတင်၍ မန္တလေးမြို့ ရွှေကြက်ယက်ဆိပ်ကမ်းမှ ဧရာဝတီ မြစ်ကြောင်းကနေ စုန်ဆင်းလာပြီး ချင်းတွင်းမြစ်ကြောင်း အတိုင်း အထက်ကို ဆန်တက်ရန် ကြိုးစားလာခြင်း ဖြစ်သည်။     ဓာတ်ပုံ - ချင်းတွင်းမြစ်ကြောင်းပေါ်တွင် တွေ့ရသည့် စစ်သင်္ဘောနှင့် ဖလပ်ရေယာဥ်များ (အညာ ပစ်တိုင်းထောင် လေးများ)

မြစ်ရေအတက်တွင် ချင်းတွင်း မြစ်ကြောင်းအတိုင်း စစ်ကောင်စီ သင်္ဘော ၃၀ ကျော် ဆန်တက်လာ

မြစ်ရေအတက်တွင် ချင်းတွင်း မြစ်ကြောင်းအတိုင်း စစ်ကောင်စီ သင်္ဘော ၃၀ ကျော် ဆန်တက်လာ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၀ ရက်။  မြစ်…

  • July 10, 2025
×Close