သတင်း

သမ္မတ ထရန့်အား လုပ်ကြံရန် ကြိုးပမ်းသူမှာ မဟာဘွဲ့ရ အင်ဂျင်နီယာ ကျောင်းဆရာဖြစ်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၇ ရက်။   အိမ်ဖြူတော်သတင်းထောက်များအသင်း (WHCA) ၏ နှစ်ပတ်လည် ညစာစားပွဲတွင် အမေရိကန်သမ္မတ ဒေါ်နယ်ထရန့်အား လုပ်ကြံရန် ကြိုးပမ်းမှုဖြင့် အသက် ၃၁ နှစ်အရွယ် ကယ်လီဖိုးနီးယားပြည်နယ်သား ကိုးလ် တောမတ်စ် အလန် (Cole Tomas Allen) ကို ဖမ်းဆီးထိန်းသိမ်းလိုက်သည်။   ကိုးလ် အလန်သည် ကယ်လီဖိုးနီးယား စက်မှုတက္ကသိုလ် (Caltech) ဆင်း စက်မှုအင်ဂျင်နီယာတစ်ဦးဖြစ်ပြီး ကွန်ပျူတာသိပ္ပံ မဟာဘွဲ့ရရှိထားသူ ဖြစ်သည်။   ၎င်းသည် နာဆာ (NASA) တွင် အလုပ်သင်ဆင်းခဲ့ဖူးသည့်အပြင် ဗီဒီယိုဂိမ်းထုတ်လုပ်သူနှင့် အထက်တန်းပြဆရာတစ်ဦးအဖြစ် လုပ်ကိုင်နေသူဖြစ်ကာ ၂၀၂၄ ခုနှစ်၊ ဒီဇင်ဘာလတွင် "တစ်လတာ အကောင်းဆုံးကျောင်းဆရာ" ဆုကိုပင် ရရှိထားသူဖြစ်သည်။   စုံစမ်းစစ်ဆေးချက်များအရ ၎င်းသည် တိုက်ခိုက်မှုမစတင်မီ ၁၀ မိနစ်အလိုတွင် မိသားစုထံသို့ တောင်းပန်စာတစ်စောင် ပေးပို့ခဲ့သည်။   ထိုစာတွင် လက်ရှိအစိုးရ၏ လုပ်ဆောင်ချက်များအပေါ် ပြင်းထန်စွာ မကျေနပ်ကြောင်းနှင့် အစိုးရအဖွဲ့ဝင်များကို ရာထူးအဆင့်အလိုက် ပစ်မှတ်ထားတိုက်ခိုက်ရန် ၎င်းတွင် တာဝန်ရှိသည်ဟု ခံယူထားကြောင်း ဖော်ပြထားသည်။   ၎င်းသည် လော့စ်အိန်ဂျလိစ်မှ ဝါရှင်တန်ဒီစီသို့ ရထားဖြင့် လာရောက်ခဲ့ခြင်းဖြစ်ပြီး၊ ပြောင်းချောသေနတ် တစ်လက်၊ ပစ္စတိုတစ်လက်နှင့် ဓားများကို ကိုင်ဆောင်ကာ လုံခြုံရေးဂိတ်ကို ကျော်ဖြတ်ဝင်ရောက်ရန် ကြိုးပမ်းစဉ် ဖမ်းဆီးခံခဲ့ရခြင်း ဖြစ်သည်။  

သမ္မတ ထရန့်အား လုပ်ကြံရန် ကြိုးပမ်းသူမှာ မဟာဘွဲ့ရ အင်ဂျင်နီယာ ကျောင်းဆရာဖြစ် 

သမ္မတ ထရန့်အား လုပ်ကြံရန် ကြိုးပမ်းသူမှာ မဟာဘွဲ့ရ အင်ဂျင်နီယာ ကျောင်းဆရာဖြစ်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၇ ရက်။  အိမ်ဖြူ…

  • April 27, 2026
ရုရှား အကူအညီဖြင့် လုပ်ဆောင်မည့် ထားဝယ် စီမံကိန်းများ အလုပ်ဖြစ်ရန် အလားအလာနည်း   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၇ ရက်။   ထားဝယ်ရေနက်ဆိပ်ကမ်း စီမံကိန်းအား ရုရှား အကူအညီဖြင့် အသက်သွင်းရန် စစ်အုပ်စုက ကြိုးပမ်းနေမှုမှာ လက်တွေ့၌ မဖြစ်နိုင်ဟု အရပ်ဘက် အဖွဲ့အစည်းများက ပြောသည်။   ထားဝယ်ရေနက်ဆိပ်ကမ်း စီမံကိန်းနယ်မြေအတွင်းရှိ ဗျူဟာမြောက် ပြည်ထောင်စုလမ်းမကြီးအား တော်လှန် ရေး တပ်ဖွဲ့များက ထိန်းချုပ်ထားသဖြင့် ရုရှားနိုင်ငံ၏ အကူအညီဖြင့် စစ်အုပ်စုက ပြန်လည်အသက်သွင်းမည့် ကိစ္စမှာ လက်တွေ့၌ ဖြစ်မြောက်လာနိုင်ခြေမရှိကြောင်း ဒေသတွင်း လူ့အခွင့်အရေးလှုပ်ရှားသူများနှင့် အရပ်ဘက် အဖွဲ့အစည်းများက ပြောသည်။   စစ်အုပ်စု၏ စွမ်းအင်ဝန်ကြီး ဦးကိုကိုလွင်သည် ဧပြီလ ၁၇ ရက်နေ့က ရုရှားနိုင်ငံသို့ ရောက်ရှိစဉ်အတွင်း Inter RAO ကုမ္ပဏီနှင့် တွေ့ဆုံ၍ ထားဝယ်ရေနက်ဆိပ်ကမ်း၌ ကျောက်မီးသွေးသုံး လျှပ်စစ်ဓာတ်အားပေးစက်ရုံ၊ ရေနံချက်စက်ရုံနှင့် LNG ဆိပ်ကမ်းများ တည်ဆောက်နိုင်ရေး ဆွေးနွေးခဲ့ခြင်းဖြစ်သည်။   ထို့ပြင် ရုရှားမှ မြန်မာသို့ ရေနံစိမ်းနှင့် ဓာတ်မြေဩဇာများ သက်သာသောဈေးနှုန်းဖြင့် တင်ပို့နိုင်ရန် စီးပွားရေးနှင့် နည်းပညာဆိုင်ရာ ပူးပေါင်းဆောင်ရွက်မှုစာချွန်လွှာ (MoC) ကိုလည်း လက်မှတ်ရေးထိုးခဲ့သည်။   ယခင်အစိုးရ လက်ထက်ကတည်းက ဒေသခံများ ပြင်းပြင်းထန်ထန် ကန့်ကွက်ခဲ့သည့် စီမံကိန်းများကို စစ်တပ် က ပြန်လည်စတင်ရန် ပြင်ဆင်နေသည့်အပေါ် ထားဝယ်အမျိုးသမီးသမဂ္ဂ အထွေထွေအတွင်းရေးမှူး-၁ မယ်းသီတာက ယခုကဲ့သို့ ပြောသည်။   “ကျောက်မီးသွေး လျှပ်စစ်ဓာတ်အားပေးစက်ရုံ ထောင်ဖို့ တောက်လျှောက် အရင်အစိုးရလက်ထက်ကတည်းက ဒီလိုမျိုးလုပ်ခဲ့တာရှိတယ်။ ဒါပေမဲ့ ဒေသခံတွေကလည်း ဒီဟာတွေနဲ့ ပတ်သက်ပြီး တောက်လျှောက် ကန့်ကွက်ခဲ့လို့ပဲ ရပ်သွားခဲ့တာပေါ့နော်။ လူထုက ဒီဟာနဲ့ ပတ်သက်လာရင်တော့ ငြိမ်နေမှာ မဟုတ်ဘူးပေါ့နော်။ သူတို့ စီမံကိန်း အကောင်အထည်ဖော်ဖို့ကျတော့ သူတို့ထင်သလိုတော့ မလွယ်ကူလောက်ဘူးလို့ သုံးသပ်မိတာပေါ့နော်” ဟု မယ်သီတာက ပြောသည်။   စစ်အုပ်စုသည် နိုင်ငံခြားဝင်ငွေရရှိရန် ရည်ရွယ်ချက်ဖြင့် နယ်မြေရှင်းလင်းရေးများ လုပ်ဆောင်ခဲ့သော်လည်း လက်ရှိအချိန်အထိ စီမံကိန်းနယ်မြေမှာ တည်ငြိမ်မှုမရှိသေးကြောင်း လူ့အခွင့်အရေး မှတ်တမ်းကွန်ရက် မြန်မာနိုင်ငံ (ND-Burma) ၏ ပြောရေးဆိုခွင့်ရှိသူ နိုင်အဲမွန်က ထောက်ပြသည်။   နိုင်အဲမွန်က “သူတို့ပြန်ပြီးတော့ ဖော်ဆောင်ချင်တာ မနှစ်တစ်နှစ်ကတည်းက။ အခုရုရှားရဲ့ အကူအညီတွေနဲ့ စက်မှုစွမ်းအားတွေ ပြန်ပြီးတော့ ဖော်ဆောင်မယ် နိုင်ငံခြားဝင်ငွေရအောင် လုပ်မယ်ဆိုတဲ့ ရည်ရွယ်ချက်နဲ့ နယ် မြေ ရှင်းလင်းရေးတွေ လုပ်ခဲ့တာ။ ဒါပေမဲ့ ဒီနေ့ကာလအထိ အဲ့ဒီနေရာက တကယ် တည်ငြိမ်တဲ့နေရာ မဖြစ် ဘူး။ ဆိုတော့ လွယ်လွယ်တော့ သူတို့ လုပ်လို့ ရလိမ့်မယ်လို့မထင်ဘူး” ဟု ပြောသည်။   စီမံကိန်းကို ပြန်လည်စတင်မည်ဟု စစ်အုပ်စုက ကြေညာပြီးနောက်ပိုင်း နဘုလယ်ဒေသရှိ ကျေးရွာများ အတွင်း သို့ စစ်တပ်က အင်အားအလုံးအရင်းဖြင့် စစ်ကြောင်းထိုးလာသဖြင့် ဒေသခံထောင်နှင့်ချီ မှာ ဘေးလွှတ်ရာသို့ ထွက်ပြေးတိမ်းရှောင်နေရသည်။   ဒေါနတနင်္သာရီ-စစ်ဘေးရှောင်များ အထောက်အကူပြုရေးအဖွဲ့မှ ကိုယောနသံက “စီမံကိန်းကို ပြန်စတင်မယ် လို့ စစ်တပ်ဘက်က ပြောလာတာတွေရှိတော့ ဒီဒေသတစ်ဝိုက်ကို ထိန်းချုပ်နိုင်ရေးအတွက် စစ်တပ်ဘက်က စစ်အင်အား အလုံးအရင်း အသုံးပြုပြီးတော့မှ စစ်ကြောင်းထိုးတာ၊ ရေကြောင်းနဲ့ လေကြောင်း ပစ်ကူတွေနဲ့ပါ တိုက်ခိုက်တာမျိုးတွေလုပ်ပြီး တော်လှန်ရေးတပ်ဖွဲ့တွေနဲ့ စစ်ရေးတင်းမာမှုတွေ အရင်ကထက် ပိုပြီးတော့ မြင့်မားလာမှာကိုတော့ ဒေသခံပြည်သူတွေအနေနဲ့ စိုးရိမ်နေကြတာ ရှိပါတယ်” ဟု ပြောသည်။   လက်ရှိတွင် အင်အား ၁၂၀ ခန့်ပါဝင်သော စစ်တပ် စစ်ကြောင်းသည် နဘုလယ်ဒေသရှိ ကျေးရွာများအတွင်း တစ်ရွာဝင်တစ်ရွာထွက် ဝင်ရောက်စီးနင်းမှုများ လုပ်ဆောင်နေပြီး ဧပြီလ ၂၀ ရက်နေ့ကလည်း ထိန်ကြီးကျေးရွာ ရှိ မင်္ဂလာဆောင်တစ်ခုကို ဝင်ရောက်စီးနင်းကာ ဒေသခံ ၂၀ ကျော်ကို ခေတ္တဖမ်းဆီးထိန်းသိမ်းခဲ့သေးသည်။   ထားဝယ်အမျိုးသမီးသမဂ္ဂကမူ ယခုအခင်းအကျင်းအရ စီမံကိန်းကြောင့် ပြည်သူများ ပိုမိုထိခိုက်လာနိုင်သဖြင့် နိုင်ငံတကာမှ ဝိုင်းဝန်းဖိအားပေးရန်နှင့် ဒေသတွင်း တော်လှန်ရေးအင်အားစုများအနေဖြင့်လည်း ပြည်သူလူထုကို မျက်နှာမူသည့် တူညီသောအသံဖြင့် ကန့်ကွက်ပေးကြရန် တိုက်တွန်းထားသည်။   စာရွက်ပေါ်မှ သဘောတူညီချက်များသည် မြေပြင်စစ်ရေးနှင့် လူထုကန့်ကွက်မှုများကြားတွင် လက်တွေ့ ဖြစ်လာရန် ခက်ခဲနေဦးမည်ဖြစ်ကြောင်း အရပ်ဘက်အဖွဲ့အစည်းများက ထောက်ပြပြောဆိုထားသည်။   #ထားဝယ်ရေနက်ဆိပ်ကမ်းစီမံကိန်း

ရုရှား အကူအညီဖြင့် လုပ်ဆောင်မည့် ထားဝယ် စီမံကိန်းများ အလုပ်ဖြစ်ရန် အလားအလာနည်း

ရုရှား အကူအညီဖြင့် လုပ်ဆောင်မည့် ထားဝယ် စီမံကိန်းများ အလုပ်ဖြစ်ရန် အလားအလာနည်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၇ ရက်။  ထားဝယ်…

  • April 27, 2026
ဖားကန့်တွင် စစ်ရေးတင်းမာ၊ အရပ်သားများ ထိခိုက်သေဆုံးမှုများ ရှိနေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၇ ရက်။   ကချင်ပြည်နယ် ဖားကန့်တွင် စစ်ရေး တင်းမာနေပြီး အရပ်သား ထိခိုက် သေကြေမှုများ ရှိနေသည်ဟု ဒေသခံများက ပြောသည်။   ကချင်ပြည်၊ ဖားကန့်တွင် စစ်တပ်နှင့် ပြည်သူ့စစ် ပူးပေါင်းအဖွဲ့များက စစ်ကြောင်းထိုး ဝင်ရောက်လာပြီးနောက် အရပ်သားပြည်သူများကို ပစ်သတ်မှုများ ဆက်တိုက်ကျူးလွန်နေသဖြင့် ဒေသအတွင်း စစ်ရေးအခြေအနေ အလွန်တင်းမာနေကာ အချိန်မရွေး တိုက်ပွဲကြီးများ ပေါက်ကွဲလာနိုင်ကြောင်း ဒေသခံများက ပြောသည်။   ဧပြီလ ၂၄ ရက်နှင့် ၂၅ ရက်နေ့များအတွင်း ဖားကန့်မြို့နယ်၌ စစ်တပ်၏ ပစ်ခတ်မှုကြောင့် အမျိုးသမီးတစ်ဦး အပါအဝင် အနည်းဆုံး အရပ်သား ၄ ဦး သေဆုံးခဲ့သည်။   ဧပြီလ ၂၄ ရက်နေ့က ဖားကန့်-ကာမိုင်းလမ်းပေါ်ရှိ နန့်ယားကျေးရွာ အနီးတွင် ခရီးသွားကားတစ်စီးကို စစ်တပ်က ပစ်ခတ်ခဲ့ရာ အသက် ၂၆ နှစ်အရွယ် မရွှေဇင်ဦး သေဆုံးခဲ့ပြီး အမျိုးသားတစ်ဦး ပြင်းထန်ဒဏ်ရာ ရရှိခဲ့သည်။   ထို့ပြင် ဧပြီလ ၂၅ ရက်နေ့ မွန်းလွဲပိုင်း၌လည်း လုံးခင်းကျေးရွာအုပ်စု အတွင်းရှိ မှော်ဆီစာနှင့် အောင်သာယာ ကျေးရွာတို့တွင် အမျိုးသား ၃ ဦး ထပ်မံပစ်သတ်ခံခဲ့ရသည်။     ကချင်လွတ်လပ်ရေးအဖွဲ့ (KIO) ပြောရေးဆိုခွင့်ရှိသူ ဗိုလ်မှူးကြီးနော်ဘူက “ဖားကန့်ဖက်မှာ စစ်ရေးလှုပ်ရှားမှု တွေကတော့ နေ့တိုင်းရှိပါတယ်။ အဲဒီလုံးခင်းဖက်က ဆေးဆိုင်တွေ၊ တည်းခိုခန်းတွေ တော်တော်များများမှာ သူတို့ဝင်ပြီးမှ ပြည်သူလူထုတွေကို ဖမ်းသွားတာ။ နောက် သူတို့ မသင်္ကာတဲ့ ရပ်ကွက်ထဲမှာ ဗျူဟာကုန်းကနေ လက်နက်ကြီး ပစ်လို့ ပြည်သူလူထုတွေ ထိခိုက်တာလည်း နေ့တိုင်းလိုရှိပါတယ်။ ဖားကန့်တစ်ခွင်လုံးမှာ အချိန်မရွေးတိုက်ပွဲတွေ ဖြစ်နိုင်တဲ့ အခြေအနေဖြစ်ပါတယ်” ဟု ပြောသည်။   မြေပြင်စစ်ရေး သတင်းရင်းမြစ်များ၏ အဆိုအရ ဧပြီလ ၂၅ ရက်နေ့ မွန်းတည့်ချိန်တွင် လုံးခင်းဂေါက်ကွင်းနှင့် ဆေးရုံဟောင်းတလျှောက် တပ်စွဲထားသည့် စစ်တပ်နှင့် ပြည်သူ့စစ်ပူးပေါင်းအဖွဲ့များကို KIA နှင့် PDF ပူးပေါင်း တပ်များက ဒရုန်းဖြင့် ဗုံးကြဲတိုက်ခိုက်ခဲ့ရာ စစ်တပ်ဘက်မှ သေဆုံးမှုရှိခဲ့ကြောင်း သိရသည်။   အဆိုပါ တိုက်ခိုက်မှုကြောင့် အထိနာသွားသည့် စစ်တပ်က ရမ်းသမ်းပစ်ခတ်မှုများ လုပ်ဆောင်ရာမှ အရပ်သား များ သေဆုံးခဲ့ခြင်း ဖြစ်နိုင်ကြောင်း ဒေသခံများက ပြောသည်။   လက်ရှိတွင် စစ်တပ်သည် ဆုံးရှုံးသွားသော နယ်မြေများကို ပြန်လည်ရယူရန်အတွက် အမှတ် (၃) ဒေသကွပ်ကဲမှု စစ်ဌာနချုပ်နှင့် တပ်မ (၃၃) လက်အောက်ခံတပ်ရင်းများ အပြင် ဝါရာဇွပ်ပြည်သူ့စစ် အင်အားများကိုပါ အသုံးပြု၍ ဖားကန့်ကျောက်စိမ်းမြေ အတွင်းသို့ အလုံးအရင်းဖြင့် စစ်ကြောင်းထိုးနေသည်။   စစ်တပ် စစ်ကြောင်းများ ဆက်တိုက်ဝင်ရောက်လာခြင်းကြောင့် KIA အမှတ် (၆) တပ်ရင်းက ဖားကန့်-နန့်ယား-ကာမိုင်း လမ်းပိုင်းကို ဧပြီ ၂၂ ရက်နေ့မှစတင်ကာ အများပြည်သူ အနေဖြင့် ဖြတ်သန်းသွားလာခြင်း မပြုရန် ရက်အကန့်အသတ်မရှိ ပိတ်ပင်ထားသည်။   ဖားကန့်ဒေသတွင် ပြီးခဲ့သည့် ဖေဖော်ဝါရီလနှင့် ဧပြီလလယ်ပိုင်းကလည်း စစ်တပ်က အရပ်သားများကို ပစ်သတ်၍ လမ်းပေါ်တွင် အလောင်းစွန့်ပစ်ခဲ့သည့် ဖြစ်စဉ်များ ရှိခဲ့ဖူးသည်။   #ဖားကန့်တိုက်ပွဲ #အရပ်သားထိခိုက်မှု

ဖားကန့်တွင် စစ်ရေးတင်းမာ၊ အရပ်သားများ ထိခိုက်သေဆုံးမှုများ ရှိနေ

ဖားကန့်တွင် စစ်ရေးတင်းမာ၊ အရပ်သားများ ထိခိုက်သေဆုံးမှုများ ရှိနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၇ ရက်။  ကချင်ပြည်နယ် ဖားကန့်…

  • April 27, 2026
တနင်္သာရီတိုင်းတွင် စစ်တပ်၏ အခိုင်အမာ စခန်းတစ်ခုကို KNLA ပူးပေါင်းတပ်များ သိမ်းပိုက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၇ ရက်။   မြိတ်-ကော့သောင်း လမ်းပေါ်ရှိ စစ်တပ်၏ ဘိုဒါးစခန်းကို KNLA ပူးပေါင်းတပ်များ တိုက်ခိုက်သိမ်းပိုက် လိုက်သည်။   တနင်္သာရီတိုင်းဒေသကြီး၊ ဘုတ်ပြင်းမြို့နယ်အတွင်းရှိ မြိတ်-ကော့သောင်း ပြည်ထောင်စုကားလမ်းမပေါ်တွင် အခိုင်အမာတပ်စွဲထားသည့် စစ်တပ်၏ ဘိုဒါးစခန်းကို KNLA နှင့် ပူးပေါင်းတပ်ဖွဲ့များက ၅ ရက်ကြာ တိုက်ခိုက် ပြီးနောက် သိမ်းပိုက်နိုင်ခဲ့ခြင်းသည်။   ဘုတ်ပြင်းမြို့နှင့် ပြည်ကြီးမဏ္ဍိုင်မြို့အကြား အမှတ် (၈) ပြည်ထောင်စုကားလမ်းပေါ်တွင် တည်ရှိပြီး စစ်တပ်က ၂ နှစ်ကျော်ကြာ တပ်စွဲထားသည့် အဆိုပါစခန်းကို ကရင်အမျိုးသား လွတ်မြောက်ရေး တပ်မတော် (KNLA) နှင့် ပြည်သူ့ကာကွယ်ရေး ပူးပေါင်းတပ်ဖွဲ့များက ဧပြီလ ၂၄ ရက်နေ့ ညနေ ၃ နာရီခန့်တွင် သိမ်းပိုက်နိုင်ခဲ့ခြင်း ဖြစ်ကြောင်း KNU တပ်မဟာ (၄) မြိတ်-ထားဝယ်ခရိုင်က ထုတ်ပြန်သည်။   တိုက်ပွဲအခြေအနေနှင့် ပတ်သက်၍ KNU တပ်မဟာ (၄) ၏ အတွင်းရေးမှူး ပဒိုစောအယ်နားက “စခန်းကနေ စစ်တပ်တပ်ဖွဲ့ဝင်တွေ အားလုံး ထွက်ပြေးသွားကြတယ်။ ပူးပေါင်းအဖွဲ့တွေဘက်က ဘာမှထိခိုက်ကျဆုံးမှု မရှိဘူး။ အရပ်သားတွေလည်း ဖမ်းဆီးသတ်ဖြတ်ခံရတာမျိုးတွေလည်း မရှိဘူး” ဟု အတည်ပြုပြောသည်။   ဘိုဒါးစခန်းတွင် စစ်တပ် လက်အောက်ခံ တပ်သားအယောက် ၂၀ ခန့် အခြေစိုက်ထားခြင်း ဖြစ်ပြီး ပူးပေါင် းတပ်ဖွဲ့များဘက်မှ ဒရုန်းဖြင့် ဗုံးသီးချတိုက်ခိုက်မှုများ ပြုလုပ်ခဲ့ရာ စစ်သားများ စခန်းကိုစွန့်ခွာ၍ ထွက်ပြေးသွားကြခြင်းဖြစ်သည်။   အဆိုပါစခန်းကို ဧပြီလ ၂၀ ရက်နေ့ကတည်းက စတင်ထိုးစစ်ဆင်ခဲ့ခြင်းဖြစ်ပြီး တိုက်ပွဲ ၅ ရက်မြောက်နေ့တွင် နယ်မြေရှင်းလင်းရေး လုပ်ဆောင်နိုင်ခဲ့ခြင်း ဖြစ်သည်။   မြိတ်-ကော့သောင်း လမ်းပိုင်းသည် ဒေသတွင်း ကုန်သွယ်ရေးနှင့် စစ်ရေးအရ အလွန်အရေးပါသည့် လမ်းမကြီး ဖြစ်ပြီး ယခုကဲ့သို့ စစ်တပ်၏ အခိုင်အမာစခန်း တစ်ခုကို သိမ်းပိုက်နိုင်ခြင်းသည် တော်လှန်ရေးတပ်ဖွဲ့များ အတွက် လမ်းပိုင်းစိုးမိုးမှုတွင် အားသာချက်တစ်ခု ဖြစ်လာနိုင်ကြောင်း စစ်ရေးလေ့လာသူများက သုံးသပ်ကြ သည်။   လက်ရှိတွင် သိမ်းပိုက်ရရှိထားသည့် ဘိုဒါးစခန်းပတ်ဝန်းကျင်၌ နယ်မြေစိုးမိုးရေးလုပ်ငန်းများ ဆက်လက် ဆောင် ရွက်နေပြီး ဒေသခံပြည်သူများအနေဖြင့် ခရီးသွားလာရာတွင် စစ်ရေးသတိရှိကြရန် တော်လှန်ရေး ပူးပေါင်း တပ်ဖွဲ့များက အသိပေးထားသည်။   #ဘိုဒါးစခန်း #KNUတပ်မဟာ၄ #KNLA #မြိတ်ထားဝယ်ခရိုင်

တနင်္သာရီတိုင်းတွင် စစ်တပ်၏ အခိုင်အမာ စခန်းတစ်ခုကို KNLA ပူးပေါင်းတပ်များ သိမ်းပိုက်

တနင်္သာရီတိုင်းတွင် စစ်တပ်၏ အခိုင်အမာ စခန်းတစ်ခုကို KNLA ပူးပေါင်းတပ်များ သိမ်းပိုက်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၇ ရက်။  …

  • April 27, 2026
ကျေးရွာ အုပ်ချုပ်ရေးမှူး ကို လက်နက်ကိုင်အဖွဲ့က ဖမ်းဆီးခေါ်ဆောင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၇ ရက်။   ထားဝယ်တွင် ရှင်မုတ္ထီးကျေးရွာ အုပ်ချုပ်ရေးမှူးကို လက်နက်ကိုင်အဖွဲ့တစ်ခုက ဖမ်းဆီးခေါ်ဆောင်သွားသည်ဟု မိသားစုနှင့်နီးစပ်သူများက ပြောသည်။   တနင်္သာရီတိုင်းဒေသကြီး၊ ထားဝယ်မြို့နယ်ရှိ ရှင်မုတ္ထီးကျေးရွာအုပ်ချုပ်ရေးမှူးကို လက်နက်ကိုင်အဖွဲ့တစ်ခုက လာရောက်ဖမ်းဆီးသွားပြီးနောက် ယနေ့တိုင် ပြန်လည်လွတ်မြောက်လာခြင်း မရှိသေးဘဲ ပျောက်ဆုံးနေကြောင်း ဒေသခံများက ပြောသည်။   အသက် (၄၀) ကျော်အရွယ် ကျေးရွာအုပ်ချုပ်ရေးမှူး ဦးသက်စိုးပိုင်သည် ဧပြီလ ၂၃ ရက်နေ့ ညနေပိုင်းက ရှင်မုတ္ထီးနှင့် ရောင်းမော်ကျေးရွာကို ဆက်သွယ်ထားသည့် လမ်းပိုင်းရှိ ဈေးဆိုင်တစ်ဆိုင်တွင် ပစ္စည်း ဝင်ဝယ်နေစဉ် လက်နက်ကိုင်များက လာရောက်ဖမ်းဆီးသွားခြင်း ဖြစ်သည်။   အသက် (၅၀) ခန့်အရွယ် ရှင်မုတ္ထီးရွာသားတစ်ဦးက “ဈေးဆိုင်မှာ ပစ္စည်းဝင်ဝယ်နေတုန်း မေးမြန်းစရာရှိလို့ ဆိုပြီး အေးအေးဆေးဆေးပဲ ခေါ်ဆောင်သွားတယ်။ ရိုက်တာနှက်တာမျိုးတော့ မရှိဘူး” ဟု ပြောသည်။   ဖမ်းဆီးခေါ်ဆောင်သွားသည့် လက်နက်ကိုင်အဖွဲ့မှာ မည်သည့်အဖွဲ့အစည်း ဖြစ်သည်ကို တိတိကျကျ မသိရ သေးသလို မည်သည့် အကြောင်းအရင်းကြောင့် ဖမ်းဆီးသွားသည်ကိုလည်း လက်ရှိအချိန်အထိ ထုတ်ပြန် ကြေညာထားခြင်း မရှိသေးပေ။   ဦးသက်စိုးပိုင်နှင့် နီးစပ်သူ အမျိုးသားတစ်ဦးကမူ ယနေ့အချိန်ထိ ၎င်းမှာ ပြန်လည် လွတ်မြောက်လာခြင်း မရှိသေးကြောင်း အတည်ပြုသည်။   ရှင်မုတ္ထီးကျေးရွာသည် ထားဝယ်မြို့၏ အရှေ့တောင်ဘက် (၆) မိုင်ခန့်အကွာတွင် တည်ရှိပြီး ၂၀၁၄ ခုနှစ် သန်းခေါင်စာရင်းအရ လူဦးရေ (၄,၀၀၀) ကျော် နေထိုင်သည့် ကျေးရွာကြီးတစ်ရွာ ဖြစ်သည်။   ယခုကဲ့သို့ လူစည်ကားရာ လမ်းပိုင်းရှိ ဆိုင်အတွင်း၌ပင် ကျေးရွာအုပ်ချုပ်ရေးမှူး ဖမ်းဆီးခံရခြင်းကြောင့် ဒေသခံများအတွင်း လုံခြုံရေးအရ စိုးရိမ်မှုများ မြင့်တက်နေသည်။   တနင်္သာရီတိုင်း အတွင်းရှိ ကျေးရွာအုပ်ချုပ်ရေးမှူးများသည် မကြာခဏဆိုသလို ဖမ်းဆီးခံရခြင်း သို့မဟုတ် ပစ်ခတ်ခံရခြင်းများ ရှိနေပြီး ယခုဖြစ်စဉ်နှင့် ပတ်သက်၍ သက်ဆိုင်ရာ နယ်မြေခံလုံခြုံရေးအဖွဲ့များဘက်မှ တစ်စုံတစ်ရာ ထုတ်ပြန်ပြောဆိုခြင်း မရှိသေးပေ။   #ထားဝယ် #ရှင်မုတ္ထီးကျေးရွာအုပ်ချုပ်ရေးမှူး

ကျေးရွာ အုပ်ချုပ်ရေးမှူး ကို လက်နက်ကိုင်အဖွဲ့က ဖမ်းဆီးခေါ်ဆောင်

ကျေးရွာ အုပ်ချုပ်ရေးမှူး ကို လက်နက်ကိုင်အဖွဲ့က ဖမ်းဆီးခေါ်ဆောင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၇ ရက်။  ထားဝယ်တွင် ရှင်မုတ္ထီ…

  • April 27, 2026
အမှိုက်ကား မလာ၍ ပုသိမ်မြို့ခံများ အခက်တွေ့   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၇ ရက်။   ဧရာဝတီတိုင်းဒေသကြီး၊ ပုသိမ်မြို့နယ် စည်ပင်သာယာရေးကော်မတီက အခွန်များကို တိုးမြှင့်ကောက်ခံခဲ့ သော် လည်း စက်သုံးဆီပြတ်လပ်သည်ဟု အကြောင်းပြကာ ရပ်ကွက်များအတွင်း အမှိုက်သိမ်းယာဉ်များ လာရောက် ခြင်း မရှိတော့သဖြင့် မြို့ခံများ အမှိုက်စွန့်ပစ်ရန် အခက်အခဲဖြစ်နေကြသည်။   ပုသိမ်စည်ပင်သည် ၂၀၂၅-၂၀၂၆ ဘဏ္ဍာနှစ်၊ ဒုတိယ (၆) လပတ်အတွက် အဆောက်အအုံနှင့် မြေခွန်၊ လမ်းမီးခွန်၊ အမှိုက်နှင့် အညစ်အကြေးခွန် စသည့် အခွန် (၃) မျိုးပေါင်းကို ယခင်နှစ်ကထက် ၁၀ ရာခိုင်နှုန်း တိုးမြှင့်ကောက်ခံ ခဲ့ခြင်း ဖြစ်သည်။   အသက် (၅၀) ကျော်အရွယ် အခွန်ထမ်းတစ်ဦးက “တစ်နှစ်ကို နှစ်ကြိမ်ဆောင်ရတာ၊ ခြောက်လတစ်ကြိမ်ပေါ့။ မြေခွန်လို့ပဲ အလွယ်ခေါ်ကြတာ။ အရင်နှစ်က ၁၄၀၀ ကျပ် ဆောင်ရတယ်၊ ဒီနှစ်မှာ ၂၁၀၀ ကျပ်ထိ တက်ဆောင်ရတာ။ အခွန်သာတိုးဆောင်နေရတာ အမှိုက်ကားက မလာတာကြာပြီ” ဟု ပြောသည်။   စစ်အုပ်စုက ပြုလုပ်သည့် ရွေးကောက်ပွဲ ကာလမတိုင်မီက တစ်ရက်ခြား အချိန်မှန် လာရောက်ခဲ့သော်လည်း မတ်လဆန်းပိုင်းမှ စတင်ကာ အမှိုက်သိမ်းယာဉ်များမှာ သုံးရက်ခြား တစ်ခါခန့်သာ လာရောက်တော့ကြောင်း မြို့ခံများက ဆိုသည်။   ပုသိမ်မြို့ခံ အသက် (၄၀) အရွယ် အမျိုးသားတစ်ဦးကလည်း “သူတို့လုပ်မယ့် ရွေးကောက်ပွဲ မတိုင်ခင်တုန်း ကတော့ မြို့ကလမ်းမတွေပေါ်မှာ အမှိုက်တစ်စမြင် တစ်စကောက် ဆိုတဲ့ဆောင်ပုဒ်နဲ့ မြို့တော်သာယာလှပ သန့်ရှင်းစေရမယ်တဲ့ မဲဆွယ်တာလေ။ ခုကတော့ ငြမ်းဖျက်တာမဟုတ်ဘူး၊ ဖြိုပါပစ်လိုက်တာ” ဟု စည်ပင်၏ ပြောင်းလဲသွားသော အခြေအနေကို ဝေဖန်ပြောဆိုသည်။   ဖေဖော်ဝါရီလအတွင်း အရှေ့အလယ်ပိုင်း စစ်ရေးအခြေအနေကြောင့် စက်သုံးဆီဈေးနှုန်းများ မြင့်တက်လာမှုကို အခွင့်ကောင်းယူကာ စည်ပင်က အမှိုက်သိမ်းခြင်းလုပ်ငန်းကို လျှော့ချခဲ့ခြင်းဖြစ်ကြောင်း မြို့ခံများက ယူဆနေ ကြသည်။   အမှတ် (၂) ရပ်ကွက်မှ အမျိုးသမီးတစ်ဦးက “စည်ပင်က ဆီပြတ်တာကို အခွင့်ကောင်းယူပြီး အမှိုက်သိမ်းကား ပျောက်သွားလိုက်တာ။ တစ်ပတ် တစ်ရက်လောက်ကနေ ခုတော့ သင်္ကြန်မကျခင်ကတည်းက လုံးလုံး မလာ တော့တာ ခုချိန်ထိပဲ” ဟု ပြောသည်။   ထို့ပြင် စည်ပင်ဝန်ထမ်းအချို့သည် သတ်မှတ်ထားသည့် အမှိုက်သိမ်းခေါက်ရေကို လျှော့ချကာ ပိုလျှံသည့် စက်သုံးဆီများကို မှောင်ခိုဈေးကွက်တွင် ပြန်လည်ရောင်းချ၍ ကိုယ်ကျိုးရှာနေကြကြောင်း စည်ပင်ဝန်ထမ်း တစ်ဦးက ပြောသည်။   ထိုသို့ ရပ်ကွက်များအတွင်း အမှိုက်မသိမ်းသော်လည်း ငွေကြေးပေးနိုင်သည့် ကုန်စိမ်းဒိုင်များနှင့် ကြံဆိုင်ကြီးများ ရှိရာ နတ်လမ်းတစ်ကြောတွင်မူ အမှိုက်များကို နေ့စဉ်သိမ်းပေးနေကြောင်း ဈေးသည်များက ဆိုသည်။   မြို့မဈေးမှ ဈေးသည်တစ်ဦးက “နတ်လမ်းက ကြံဆိုင်တွေနဲ့ ကုန်စိမ်းဒိုင်တွေက ငွေပေးနိုင်ကြတော့ သူတို့ အမှိုက်တွေကိုတော့ တစ်နေ့မှမပျက်ဘူး သိမ်းပေးနေတာ” ဟု ပြောသည်။   လက်ရှိတွင် အမှိုက်ပုံများအနီး နေထိုင်သူများမှာ အနံ့ဆိုးများ၊ ယင်ကောင်နှင့် ကြွက်များ ပေါများလာမှုကြောင့် ကျန်းမာရေး ထိခိုက်မည်ကို စိုးရိမ်နေကြပြီး မိုးမကျမီ အမှိုက်များကို အမြန်ဆုံး ရှင်းလင်းပေးရန် လိုလားနေကြ သည်။   ပုသိမ်စည်ပင်သည် အများပိုင် မြေကွက်များကို လက်သိပ်ထိုးရောင်းချခြင်း၊ လာဒ်ငွေယူ၍ အထပ်မြင့် အဆောက်အအုံများ ဆောက်လုပ်ခွင့်ပြုခြင်းနှင့် အိုးဝေ၊ ဆိုင်ကယ် ဘီးခွန်များကို ယခင်ကထက် (၂) ဆ တိုးမြှင့် ကောက်ခံနေခြင်းတို့ကြောင့်လည်း မြို့ခံများ၏ ဝေဖန်မှုကို ခံနေရသည်။   #ဧရာဝတီတိုင်း #ပုသိမ်

အမှိုက်ကား မလာ၍ ပုသိမ်မြို့ခံများ အခက်တွေ့

အမှိုက်ကား မလာ၍ ပုသိမ်မြို့ခံများ အခက်တွေ့ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၇ ရက်။  ဧရာဝတီတိုင်းဒေသကြီး၊ ပုသိမ်မြို့နယ် စည်ပင်…

  • April 27, 2026
အမေရိကန် သမ္မတ ဒေါ်နယ်ထရန့် တက်ရောက်တဲ့ ညစာစားပွဲမှာ ပစ်ခတ်မှု ဖြစ်ပွား   သတင်းနဲ့ မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၆ ရက်။   ဝါရှင်တန်ဒီစီရဲ့ ခမ်းနားထည်ဝါလှတဲ့ စနေနေ့ညချမ်းဟာ ရုတ်တရက်ဆိုသလို ထိတ်လန့်တုန်လှုပ်ဖွယ်ရာ အခိုက်အတန့်တွေနဲ့ ပြည့်နှက်သွားခဲ့ပါတယ်။   ဝါရှင်တန်ဟီလ်တန်ဟိုတယ်မှာ ကျင်းပနေတဲ့ အိမ်ဖြူတော်သတင်းထောက်များအသင်း (WHCA) ရဲ့ နှစ်ပတ်လည်ညစာစားပွဲမှာ သေနတ်သံလိုမျိုး ကျယ်လောင်တဲ့ အသံတွေထွက်ပေါ်လာပြီးနောက် သမ္မတ ဒေါ်နယ်ထရန့်ကို လုံခြုံရေးအဖွဲ့ဝင်တွေက အရေးပေါ် ဘေးကင်းရာကို ခေါ်ဆောင်သွားခဲ့ရပါတယ်။   ဖြစ်စဉ်ဖြစ်ပွားခဲ့ပုံ   ဝါရှင်တန်ဟီလ်တန်ဟိုတယ်ရဲ့ ခမ်းမကြီးအတွင်းမှာတော့ တီးဝိုင်းရဲ့ သံစဉ်တွေ၊ ဝတ်စုံပြည့်ဝတ်ဆင်ထားတဲ့ အစိုးရအဖွဲ့ဝင်တွေနဲ့ သတင်းထောက်တွေရဲ့ ရယ်မောသံတွေကြောင့် စည်ကားလို့နေတယ်လို့ အဲဒီပွဲမှာ တက်ရောက်နေတဲ့ သတင်းထောက်တွေက ပြန်ရေးကြပါတယ်။     သမ္မတ ဒေါ်နယ်ထရန့်ဟာ သမ္မတသက်တမ်းအတွင်း ပထမဆုံးအကြိမ်အဖြစ် ဒီညစာစားပွဲကို တက်ရောက်လာတာဖြစ်ပြီး စင်မြင့်ထက်မှာ ဂုဏ်သရေရှိလူကြီးမင်းတွေနဲ့အတူ နေရာယူထားခဲ့ပါတယ်။   ဒါပေမယ့်လည်း ပျော်ရွှင်စရာကောင်းနေတဲ့ အခိုက်အတန့်ဟာ ကျယ်လောင်လှတဲ့ အသံဗလံတွေကြောင့် ရုတ်ချည်းပျက်ပြယ်သွားခဲ့ပါတယ်။   ခန်းမထဲက ဧည့်သည်တွေဟာ "ဝပ်နေကြ! အောက်ဆင်းနေကြ!" ဆိုတဲ့ အော်ဟစ်သံတွေနဲ့အတူ ကြမ်းပြင်ပေါ်ကို မှောက်ချလိုက်ကြရပါတယ်။   "ကျွန်မ စားပွဲအောက်ကိုပဲ ငုပ်လျှိုးနေလိုက်တော့တယ်။ ဘာဖြစ်နေလဲဆိုတာ မသိရတဲ့အတွက် အန္တရာယ်ကို မစွန့်စားနိုင်ဘူးလေ" လို့ One America News သတင်းထောက် Alexandra Ingersoll က အခြေအနေကို ပြန်ပြောင်းပြောပြပါတယ်။   အသံတွေထွက်ပေါ်လာပြီး စက္ကန့်ပိုင်းအတွင်းမှာပဲ လျို့ဝှက် လုံခြုံရေး Secret Service တပ်ဖွဲ့ဝင်တွေဟာ လက်နက်တွေကိုယ်စီနဲ့ သမ္မတကို ဝိုင်းရံလိုက်ကြပြီး စင်နောက်ဘက်ကတစ်ဆင့် ဘေးကင်းရာကို အမြန်ဆုံး ခေါ်ဆောင်သွားခဲ့ပါတယ်။   အဲဒီ အချိန်မှာတော့ ခန်းမထဲက ဂီတသံတွေ ရပ်တန့်သွားပြီး ကြောက်လန့်တုန်လှုပ်နေတဲ့ ဧည့်သည်တွေကြားထဲမှာ လုံခြုံရေးအေးဂျင့်တွေဟာ သေနတ်တွေကိုင်ဆောင်ပြီး နေရာအနှံ့ ဖြန့်ကြက်စစ်ဆေးခဲ့ကြပါတယ်။     ထူးခြားတဲ့ တိုက်ဆိုင်မှုတစ်ခုကတော့ ဒီဟိုတယ်ဟာ လွန်ခဲ့တဲ့ ၄၅ နှစ်က အမေရိကန် သမ္မတ ရော်နယ်ရေဂင် လုပ်ကြံသတ်ဖြတ်ခံရမှုကနေ ကံကောင်းထောက်မစွာ လွတ်မြောက်ခဲ့တဲ့ ဟော်တယ်ပဲ ဖြစ်နေပါတယ်။   ညစာစားပွဲကနေ ဘေးကင်းရာကို အရေးပေါ်ရွှေ့ပြောင်းပေးခဲ့ရသူတွေထဲမှာ ကျန်းမာရေးဝန်ကြီး Robert F. Kennedy Jr လည်း ပါဝင်ခဲ့ပါတယ်။ သူဟာ ၁၉၆၃ ခုနှစ်က လုပ်ကြံခံခဲ့ရတဲ့ သမ္မတ ဂျွန်အက်ဖ်ကနေဒီရဲ့ တူတော်စပ်သူဖြစ်ပါတယ်။   အဲဒီလိုပဲ သမ္မတရဲ့ အုပ်ချုပ်ရေးအဖွဲ့ဝင် တစ်ဦးဖြစ်တဲ့ Mehmet Oz ကလည်း အရေးပေါ်ထွက်ခွာသွားခဲ့ပါတယ်။   ဒီပစ်ခတ်မှု အတွင်းမှာ သမ္မတနှင့် သမ္မတကတော် လုံခြုံဘေးကင်းစွာ လွတ်မြောက်ခဲ့ပြိး အိမ်ဖြူတော်ကို ပြန်လှည့် သွားခဲ့ပါတယ်။   လုပ်ကြံ သတ်ဖြတ်ဖို့ ကြိုးစားခဲ့တယ်လို့ သံသယ ရှိသူ တစ်ဦးကို ဖမ်းဆီးထိန်းသိမ်းထားပါတယ်။   ဝါရှင်တန်ဟီလ်တန်ဟိုတယ် ပတ်ဝန်းကျင်မှာတော့ ရဲတပ်ဖွဲ့ဝင်တွေက လမ်းတွေကို ပိတ်ဆို့ပြီး လုံခြုံရေးအဆင့်မြှင့်တင်ထားသလို၊ ကောင်းကင်ယံမှာလည်း ရဟတ်ယာဉ်တွေနဲ့ ကင်းလှည့်နေပါတယ်။   #အမေရိကန်သမ္မတဒေါ်နယ်ထရမ့် #ပစ်ခတ်မှု #လုပ်ကြံမှု #ဝါရှင်တန်ဟီလ်တန်ဟိုတယ်

အမေရိကန် သမ္မတ ဒေါ်နယ်ထရန့် တက်ရောက်တဲ့ ညစာစားပွဲမှာ ပစ်ခတ်မှု ဖြစ်ပွား

အမေရိကန် သမ္မတ ဒေါ်နယ်ထရန့် တက်ရောက်တဲ့ ညစာစားပွဲမှာ ပစ်ခတ်မှု ဖြစ်ပွား သတင်းနဲ့ မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၆ ရက်။  ဝါရှင်တန်ဒီစီရဲ…

  • April 26, 2026
ကချင်ပြည်မှာ စစ်ရေး ပိုမို တင်းမာလာနိုင်ဟု KIO သတိပေး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၅ ရက်။   စစ်ဦးစီးချုပ်အသစ် “လက်စွမ်းပြလိုမှုနှင့်အတူ” ကချင်ပြည်အတွင်း စစ်ရေးပိုမိုတင်းမာလာနိုင်ဟု ကချင်လွတ်လပ် ရေးအဖွဲ့ KIO သတိပေးလိုက်သည်။   စစ်တပ်ဘက်မှ စစ်ဦးစီးချုပ်အသစ် အပြောင်းအလဲပြုလုပ်လာမှုနှင့်အတူ လက်စွမ်းပြလိုသည့် ဆန္ဒရှိနိုင်သဖြင့် ကချင်ပြည်အတွင်း ရှေ့လာမည့်ကာလများတွင် စစ်ရေးပိုမိုတင်းမာလာနိုင်ကြောင်း၊ ပြည်သူများအနေဖြင့် စစ်ရေးသတင်းများကို အမြဲနားစွင့်ကာ သတိဖြင့် သွားလာကြရန် KIO အဖွဲ့၏ သတင်းနှင့်ပြန်ကြားရေး တာဝန်ခံ ဗိုလ်မှူးကြီးနော်ဘူက ပြောဆိုလိုက်သည်။   လက်ရှိစစ်ရေးအခြေအနေနှင့် ပတ်သက်၍ ဗိုလ်မှူးကြီးနော်ဘူက “စစ်ကော်မရှင်တွေလည်း အခုသူတို့ အပြောင်း အလဲတွေပေါ့နော်။ အင်္ကျီတွေ အဝတ်အထည်တွေလဲပြီးမှ အစိုးရဖွဲ့စည်းတဲ့ အချိန်ကာလဆိုတော့ သူတို့လည်း စစ်ဦးစီးချုပ်လည်း အခု အသစ် ပြန်ရွေးလာတယ်ဆိုတော့ သူလည်း နည်းနည်းလက်စွမ်းပြချင်တဲ့ ဆန္ဒလည်း ရှိမှာပေါ့။ ဒါကြောင့် စစ်ရေး အခြေအနေကိုတော့ အမြဲတမ်းနားထောင်ဖို့ အရေးကြီးပါတယ်” ဟု ပြောသည်။   မြေပြင်အခြေအနေများအရ ဗန်းမော်မြို့နယ်ရှိ ခလရ (၄၀) ပတ်ဝန်းကျင်တွင် စစ်တပ်နှင့် ကချင်လွတ်လပ်ရေး တပ်မတော် KIA ပူးပေါင်းတပ်များအကြား တိုက်ပွဲများ နေ့စဉ်နီးပါး ဖြစ်ပွားနေပြီး စစ်တပ်ဘက်မှ လက်နက်ကြီး၊ ဒရုန်းနှင့် လေကြောင်းတိုက်ခိုက်မှုများကို အမြဲတမ်းပြုလုပ်နေကြောင်း ဆိုသည်။   ထို့ပြင် ဝိုင်းမော်မြို့နယ်ရှိ မိုင်းနားနှင့် စံပြတောင်တစ်ဝိုက်တွင်လည်း ထိတွေ့ရင်ဆိုင်တိုက်ပွဲများ ခပ်စိပ်စိပ် ဖြစ်ပွားနေသဖြင့် အမြဲတမ်း သတိအနေအထားဖြင့် စောင့်ကြည့်နေရသည့် အခြေအနေဖြစ်သည်။   တနိုင်းဒေသရှိ ပယင်းမှော်ဘက်တွင် KIA နှင့် ပူးပေါင်းတပ်များက စစ်တပ်၏ အခိုင်အမာစခန်းများကို ထိုးစစ် ဆင်နေကြောင်း ဗိုလ်မှူးကြီးနော်ဘူက အတည်ပြုသည်။ ဧပြီလ ၂၄ ရက်နေ့အထိ တိုက်ပွဲများ ဆက်ဖြစ်နေ သည်ဟု ပြောသည်။   “ပယင်းမှော်ဖက်မှာ ဖြစ်ပါတယ်။ နန်ဗျူချောင်းတစ်ကြောလုံးမှာရှိတဲ့ စစ်ကော်မရှင်တပ်တွေ အဓိကကတော့ ဝှေ့လော့ဆိုတဲ့ စခန်းရယ်၊ နောက် ဟာလောင်ကောင်ဆိုတဲ့ စခန်းရယ်ပေါ့။ အဲဒီစခန်း ၂ ခုရဲ့ ရှေ့တန်း ကာကင်း ဖြစ်နေတဲ့ အဲဒီလမ်းတစ်ကြောမှာ ဖွင့်ထားတဲ့ ကာကင်းပို့စ် ၂ ခုကတော့ သိမ်းပိုက်လိုက်တာ ရှိပါတယ်။ ဒါပေ မယ့် ဟို အခိုင်အမာ လုပ်ထားတဲ့ စခန်း ၂ ခုကိုတော့ မသိမ်းရသေးပါဘူး။ အဲဒီနေရာဖက်မှာလည်း တိုက်ပွဲက တော့ ဆက်ဖြစ်နေပါတယ်” ဟု ဗိုလ်မှူးကြီးနော်ဘူက ပြောသည်။   ဖားကန့်ဒေသတွင် တိုက်ပွဲများ တစ်ပတ်ခန့် ငြိမ်သက်နေသော်လည်း စစ်တပ်၏ ဗျူဟာကုန်းမှ လက်နက်ကြီး များဖြင့် ရမ်းသန်းပစ်ခတ်မှုကြောင့် ပြည်သူထိခိုက်ဒဏ်ရာရသူ နေ့စဉ်နှင့်အမျှတိုးလာနေသည်ဟု ဆိုသည်။   ထို့ပြင် ဧပြီလ တတိယပတ်အတွင်း လုံးခင်းဘက်ရှိ ဆေးဆိုင်နှင့် တည်းခိုခန်းများတွင် ပြည်သူများကို ဖမ်းဆီးမှု များရှိနေသဖြင့် ဖားကန့် တစ်ခွင်လုံးတွင် အချိန်မရွေး တိုက်ပွဲများ ပြန်လည်ပြင်းထန်လာနိုင်သည့် အခြေအနေ တွင် ရှိနေသည်။   အခြားတစ်ဖက်တွင်မူ ခေါင်လန်ဖူးဒေသရှိ စစ်တပ်လက်အောက်ခံ ပြည်သူ့စစ်များအတွင်း စစ်မတိုက်ချင်သဖြင့် ထွက်ပြေးမှုများ ရှိနေသည်။     ပူတာအိုအခြေစိုက် ပြည်သူ့စစ်အဖွဲ့ဝင်များသည် နေရပ်ပြန်ပါက ပြန်လည်ဖမ်းဆီးခံရမည်ကို စိုးရိမ်နေကြပြီး ဒေသခံများ၏ ပြောပြချက်အရ ၎င်းတို့မှာ ကြောက်လန့်နေသည့် အနေအထားရှိကြောင်း သိရသည်။   လက်ရှိတွင် လမ်းပိုင်းအချို့ကို ပြည်သူလူထု လုံခြုံရေးအတွက် KIA ဘက်မှ အကန့်အသတ်မရှိ ပိတ်ထားရခြင်း ဖြစ်ပြီး၊ ပြည်သူများအနေဖြင့် ခရီးသွားလာရာတွင် မြေပြင်နှင့် ဝေဟင်သတင်းများကို ဂရုတစိုက် နားထောင်ရင်း သွားလာကြရန် ဗိုလ်မှူးကြီးနော်ဘူက တိုက်တွန်းထားသည်။   #ကချင်တိုက်ပွဲ #KIA #KIO #စစ်အုပ်စု

ကချင်ပြည်မှာ စစ်ရေး ပိုမို တင်းမာလာနိုင်ဟု KIO သတိပေး

ကချင်ပြည်မှာ စစ်ရေး ပိုမို တင်းမာလာနိုင်ဟု KIO သတိပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၅ ရက်။  စစ်ဦးစီးချုပ်အသစ် “လက်စွမ်းပြလိ…

  • April 25, 2026
ထိရောက်သည့် ဖိအားပေးအရေးယူမှုများလုပ်ရန် အာဆီယံအား ND-Burma တိုက်တွန်း   သတင်းနှင့် မီဒီယာကွန်ရက်။
၂၀၂၆ ခုနှစ်၊ ဧပြီလ ၂၅ ရက်။   မြန်မာ့အရေး ဖြေရှင်းရန် ချမှတ်ထားသည့် အာဆီယံ၏ ဘုံသဘောတူညီချက် ၅-ချက်သည် ငါးနှစ်ကြာမြင့်သည့် တိုင် လက်တွေ့တွင် အလုပ်မဖြစ်ဘဲ ကျရှုံးနေသဖြင့် နည်းလမ်းသစ်တစ်ရပ်ကို အရေးပေါ် ချမှတ်ဆောင်ရွက်ရန် လူ့အခွင့်အရေးမှတ်တမ်းကွန်ရက်-မြန်မာနိုင်ငံ (ND-Burma) က တိုက်တွန်းတောင်းဆိုလိုက်သည်။   ဧပြီလ ၂၄ ရက်နေ့တွင် ND - Burma က ထုတ်ပြန်သည့် အစီရင်ခံစာ၌ အာဆီယံအနေဖြင့် လက်တွေ့မကျသည့် နည်းလမ်းများကို စွန့်လွှတ်ရန် ထောက်ပြထားသည်။   အာဆီယံက ၎င်းတို့၏ ဘုံသဘောတူညီချက်ကို လိုက်နာရန် တိုက်တွန်းနေသော်လည်း စစ်အုပ်စုသည် လက်နက် အားကိုးဖြင့် အဓမ္မဖိနှိပ်မှုများကိုသာ ကျူးလွန်နေကြောင်း မွန်ပြည် လူ့အခွင့်အရေး ဖောင်ဒေးရှင်း (HURFOM) ဒါရိုက်တာ နိုင်အဲမွန်က ပြောသည်။   “အဓိကကတော့ ဒီစစ်ကောင်စီရဲ့ ပြည်သူလူထုအပေါ်မှာ ဖိနှိပ်ပြီးတော့ လက်နက်အားကိုးနဲ့ အုပ်ချုပ်ချင်တဲ့ စိတ်အာသီသတွေက အမြဲတမ်းရှင်သန်နေဆဲ ဖြစ်တယ်ပေါ့နော်။ အာဆီယံကနေ ချမှတ်ထားတဲ့ ဘုံသဘော တူညီချက် ၅ ချက်ကို လိုက်နာပြီးတော့ မဖြစ်မနေ ဆောင်ရွက်ဖို့ တောက်လျှောက် ဝိုင်းတွဲပြီးတော့ ခေါ်တယ် ပေါ့နော်။ တိုက်တွန်းတယ်။”   နိုင်အဲမွန်က “ဒါပေမဲ့ စစ်အုပ်စုက ပြည်သူလူထုရဲ့ သဘောထားကို ဆန့်ကျင်ပြီးတော့ ပြည်သူ့အစိုးရဆီကနေ အာဏာကို မတရားရယူ၊ အဓမ္မနည်းနဲ့ အုပ်ချုပ်ဖို့ လုပ်တဲ့အခါကျတော့ သူ့ပြည်သူကို တောက်လျှောက် ဖိနှိပ်တယ်” ဟု ပြောသည်။   ND-Burma ၏ မှတ်တမ်းများအရ ၂၀၂၅ ခုနှစ် နှောင်းပိုင်းမှ ၂၀၂၆ ခုနှစ်အစောပိုင်းအထိ မြန်မာနိုင်ငံအတွင်း လူ့အခွင့်အရေး ချိုးဖောက်မှုများ ဆက်တိုက်မြင့်တက်နေပြီး နေရပ်စွန့်ခွာထွက်ပြေးရသူ (IDPs) ဦးရေမှာ ၄ သန်းအထိ ရှိလာနိုင်ကြောင်း ခန့်မှန်းထားသည်။   လက်ရှိအခြေအနေမှာ ညှိနှိုင်းရေးထက် ထိရောက်စွာ အရေးယူရမည့် အဆင့်သို့ ရောက်ရှိနေပြီဖြစ်ကြောင်း နိုင်အဲမွန်က ဆက်လက်ထောက်ပြသည်။   “စစ်အုပ်စုက ဒီအဆင့်မှာ မဟုတ်တော့ဘူး။ တကယ်တမ်းကျတော့ လုံးဝ Sanction တွေနဲ့ ထိထိရောက်ရောက် အရေးယူရမယ့်အဆင့်၊ ကျူးလွန်လာတဲ့ စစ်ရာဇဝတ်မှုတွေအတွက် ICC ကို ပို့ရမယ့် အဆင့်အထိတောင် ရောက်နေပြီ။ Five-Point Consensus က တကယ်တမ်းကျတော့ စစ်တပ်နဲ့ ညှိနှိုင်းရေးအပေါ်မှာပဲ အခြေခံ ပြီး သံတမန်ရေးအရ တွန်းတာဖြစ်တယ်။ ဆိုတော့ ဒီအချက်မှာ ပြည်သူလူထု တော်တော်များများ ဖြစ်စေချင် တာက ဒီဖိနှိပ်တာတွေကို ရပ်၊ ပြီးလို့ရှိရင် ပြည်သူက အုပ်ချုပ်တဲ့ NUG အစိုးရနဲ့ ညှိနှိုင်းဖို့ပဲ” ဟု နိုင်အဲမွန်က ပြောသည်။   အာဆီယံနှင့် နိုင်ငံတကာအနေဖြင့် စစ်အုပ်စု၏ အတုအယောင် (Sham) ရွေးကောက်ပွဲရလဒ်များကို အသိအမှတ်မပြုရန်နှင့် တရားဝင်မှု မပေးရန်လည်း အစီရင်ခံစာက သတိပေးထားသည်။   စစ်အုပ်စုကို အသိအမှတ်ပြုခြင်းသည် “မကောင်းမှုကို အားပေးသလို” ဖြစ်သွားမည် ဖြစ်သောကြောင့် မြန်မာပြည်သူများ၏ ဒီမိုကရေစီရေး လှုပ်ရှားမှုကိုသာ ထောက်ပံ့ကူညီရန် ND-Burma က တိုက်တွန်းထား သည်။   #NDBurma #အာဆီယံ #နိုင်အဲမွန်

ထိရောက်သည့် ဖိအားပေးအရေးယူမှုများလုပ်ရန် အာဆီယံအား ND-Burma တိုက်တွန်း

ထိရောက်သည့် ဖိအားပေးအရေးယူမှုများလုပ်ရန် အာဆီယံအား ND-Burma တိုက်တွန်း  သတင်းနှင့် မီဒီယာကွန်ရက်။၂၀၂၆ ခုနှစ်၊ ဧပြီလ ၂၅ ရက်။  မြန်မာ့အရေး ဖြ…

  • April 25, 2026
×Close