သတင်း

အာလူးဈေး ကျသဖြင့် ရှမ်းတောင် တောင်သူများ အရှုံးပေါ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၅ ရက်။   စိုက်ပျိုးစရိတ် ကြီးမြင့်သော်လည်း အာလူးဈေး ထိုးကျနေသဖြင့် ရှမ်းတောင်မှ တောင်သူများ အရှုံးပေါ်နေကြ သည်။   ရှမ်းပြည် တောင်ပိုင်းမှ ထွက်ရှိသော အာလူးများမှာ သင်္ကြန်ကာလအပြီး၌ ဈေးနှုန်းများ ဆက်တိုက် ထိုးကျလာ သောကြောင့် စိုက်ပျိုးတောင်သူများ အရှုံးပေါ်ကာ အခက်အခဲနှင့် ရင်ဆိုင်နေကြရကြောင်း ဒေသတွင်း စိုက်ပျိုးရေး သတင်းရင်းမြစ်များက ပြောသည်။   မြေပြင် အခြေအနေများအရ မြန်မာပြည်အထက်ပိုင်း အညာဈေးကွက်နှင့် ပြည်ပဝယ်လိုအား ကျဆင်းလာခြင်း၊ ဈေးကွက်အတွင်းသို့ တရုတ်အာလူးများ အလုံးအရင်းဖြင့် ဝင်ရောက်လာခြင်းတို့ကြောင့် ယခုကဲ့သို့ ဈေးနှုန်းများ ထိုးဆင်းသွားခြင်းဖြစ်သည်။   ဟဲဟိုးမြို့ရှိ တောင်သူတစ်ဦးက ၎င်းတို့ကြုံတွေ့နေရသည့် အခြေအနေကို လက်ဖက်ရည်ဈေးနှုန်းနှင့် နှိုင်းယှဉ် ကာ ယခုကဲ့သို့ ပြောသည်။   “လက်ဖက်ရည်တစ်ခွက် တစ်ထောင်ကျော်ပြီ။ ကျနော်တို့ အာလူးစိုက်တာ တစ်ပိဿာ တစ်ထောင်ပဲ ရတယ်။ နောက်နှစ်တွေပဲ မျှော်ရတော့မယ်” ဟု ပြောသည်။     အာလူးဈေးနှုန်း ကျဆင်းရသည့် နောက်ထပ် အကြောင်းအရင်းတစ်ခုမှာ စက်သုံးဆီရှားပါးမှုကြောင့် သယ်ယူ ပို့ဆောင်ခ (တန်ဆာခ) မြင့်တက်လာခြင်းနှင့် စားအုန်းဆီဈေး မြင့်တက်မှုကြောင့် ဒေသတွင်း အာလူးကြော် လုပ်ငန်းများ ရပ်ဆိုင်းလိုက်ရခြင်းတို့ကြောင့် ဖြစ်သည်ဟု ဆိုကြသည်။   လက်ရှိတွင် ရှမ်းတောင်၌ အာလူးတစ်ပိဿာလျှင် ကျပ် ၁,၀၀၀ သာ ပေါက်ဈေးရှိပြီး ရန်ကုန်ဈေးကွက်တွင် လည်း ကျပ် ၁,၈၀၀ နှုန်း၌သာ ရပ်တန့်နေသည်။   တောင်သူများအနေဖြင့် မြေဩဇာနှင့် ပိုးသတ်ဆေးစသည့် စိုက်ပျိုးစရိတ်များ ကြီးမြင့်လာသည့်အပြင် စက်သုံး ဆီကိုလည်း မှောင်ခိုလမ်းကြောင်းမှ ဈေးကြီးပေးဝယ်ခဲ့ရသဖြင့် နစ်နာဆုံးရှုံးမှု ပိုမိုများပြားနေခြင်းဖြစ်သည်။   အာလူးမျိုးရင်းများ ဝယ်ယူစဉ်က တစ်ပိဿာလျှင် ကျပ် ၆,၀၀၀ ကျော်အထိ ပေးခဲ့ရသဖြင့် လက်ရှိနစ်နာမှုများ ကို ကာမိရန်အတွက် အနိမ့်ဆုံး တစ်ပိဿာ ၄,၀၀၀ ကျပ်အထိ ရရှိရန် မျှော်လင့်နေကြသည်။   အောင်ပန်းရှိ ပွဲရုံလုပ်ငန်းရှင်တစ်ဦးကမူ ဈေးကွက်အခြေအနေနှင့် ပတ်သက်၍ ယခုကဲ့သို့ ပြောသည်။   “အာလူးဈေးကွက် ကျရင်လည်း ကြာတယ်။ တက်ရင်လည်း တော်တော်နဲ့ မဆင်းဘူး။ မိုးကုန်အထိတောင် တက်ဖို့ဝေးပါသေးတယ်” ဟု ပြောသည်။   ယနေ့ (ဧပြီလ ၂၅ ရက်နေ့) ရှမ်းပြည်တောင်ပိုင်း၊ အောင်ပန်းမြို့ ကုန်စည်ရောင်းဝယ်ရေး ပွဲရုံတစ်ခု၏ ထုတ်ပြန် ချက်အရ အာလူးဈေးနှုန်းများမှာ အရွယ်အစားအလိုက် S-2/ S-3 အမျိုးအစား ၃,၀၀၀ ကျပ်၊ S-1-OK တစ်ပိဿာ ၂,၀၀၀ ကျပ်နှင့် ဂေါ်လီဆိုဒ်မှာ ကျပ် ၁,၀၀၀ အထိ ပေါက်ဈေးရှိနေသည်။   ပြည်တွင်းဖြစ် အာလူးများ ဈေးကွက် မကောင်းသည့်ကြားမှ တရုတ် L6 အာလူးများမှာလည်း တစ်ပိဿာ ကျပ် ၁,၀၀၀ နှုန်းဖြင့် ဈေးကွက်အတွင်း နေရာယူထားကြောင်း ပွဲရုံလုပ်ငန်းရှင်များက ပြောသည်။   #အာလူးစိုက်တောင်သူ #အာလူးစျေး #ဟဲဟိုး #စိုက်ပျိုးစရိတ်

အာလူးဈေး ကျသဖြင့် ရှမ်းတောင် တောင်သူများ အရှုံးပေါ်

အာလူးဈေး ကျသဖြင့် ရှမ်းတောင် တောင်သူများ အရှုံးပေါ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၅ ရက်။  စိုက်ပျိုးစရိတ် ကြီးမြင့်သော်လည်း…

  • April 25, 2026
စက်သုံးဆီဈေး ကွာဟမှုကြောင့် စစ်ရှောင်များ စားရေ ရိက္ခာ ရှားပါးမှု ကြုံ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၅ ရက်။   တော်လှန်ရေးတပ်ဖွဲ့များ ထိန်းချုပ်ရာ ကရင်နီပြည်အတွင်း ဒေသအလိုက် စက်သုံးဆီဈေးနှုန်း ကွာဟချက် ကြီးမားနေခြင်းကြောင့် စစ်ဘေးရှောင်များမှာ စားနပ်ရိက္ခာပြတ်လပ်မှု၊ ရေရှားပါးမှုဒဏ်များကို ရင်ဆိုင်နေကြရ သည်။   လက်ရှိတွင် ကရင်နီပြည်အတွင်း လောင်စာဆီ တစ်လီတာ ပေါက်ဈေးမှာ ထိုင်းနယ်စပ်နှင့် နီးစပ်သည့် မယ်စဲ့မြို့ တွင် ကျပ် ၁၀,၀၀၀ ခန့်ရှိသော်လည်း၊ စစ်ဘေးရှောင်အများစု ခိုလှုံရာ ဒီးမော့ဆိုမြို့နယ် အနောက်ဘက်ခြမ်းတွင် ကျပ် ၁၃,၅၀၀ ရှိနေသည်။   လမ်းပန်းဆက်သွယ်ရေး ပိုမိုခက်ခဲသော ဖရူဆိုမြို့နယ် အနောက်ဘက်ခြမ်းတွင်မူ ဆီတစ်လီတာလျှင် ကျပ် ၁၆,၀၀၀ မှ ၁၈,၀၀၀ အထိ ဒေသအလိုက် ဈေးနှုန်းမြင့်တက်နေကြောင်း စစ်ရှောင်များက ပြောသည်။   စက်သုံးဆီဈေး မြင့်တက်လာမှုနှင့်အတူ ကုန်ဈေးနှုန်းများပါ လိုက်လံတက်လာခြင်းကြောင့် စစ်ဘေးရှောင်များ အတွက် ထောက်ပံ့မှုများ ယခင်ကထက် နည်းပါးသွားကြောင်း စစ်ဘေးရှောင်ကူညီကယ်ဆယ်ရေးအဖွဲ့ Karenni Hope တာဝန်ခံ ကိုလွမ်းက ပြောသည်။   “အရင်က ဆန်တစ်အိတ် တစ်သိန်းဝန်းကျင်ပဲ ရှိရာကနေ အခု တစ်သိန်းခွဲလောက်အထိ ဝယ်နေရတယ်။ ဆီတွေဆိုရင်လည်း အရင်ကထက် တစ်ဆခွဲလောက် တက်သွားတယ်။ သွားဖို့လာဖို့ကစ ခက်ခဲသွားတော့ စစ်ဘေးရှောင်တွေဘက်မှာ အများကြီး ပိုပြီးခက်ခဲသွားတာပေါ့” ဟု ၎င်းက ပြောသည်။   အထူးသဖြင့် ဖရူဆိုမြို့နယ် အတွင်းရှိ ဒိုးပရယ်ကျေးရွာအုပ်စုကဲ့သို့ စစ်ဘေးရှောင် ထောင်နှင့်ချီ ခိုလှုံရာနေရာ များတွင် ရိက္ခာပြတ်လပ်မှုမှာ ပိုမိုဆိုးဝါးလာနေသည်။   စစ်ဘေးရှောင်စခန်း တာဝန်ရှိသူတစ်ဦးက အရေးပေါ်ဆန် ထုတ်ယူရမှု အခြေအနေနှင့် ပတ်သက်ပြီး ယခုကဲ့သို့ ရှင်းပြသည်။   စစ်ဘေးရှောင်စခန်း တာဝန်ရှိသူက “အရေးပေါ်ဆန် အိတ် ၁၀၀ လောက် ထားလိုက်ပါတော့ ဒီအိမ်ထောင်စု ၁၀၀ ဆီ တစ်ခါတလေ တစ်လတောင်မရှိဘူး ကုန်သွားပြီ။ အရင်တုန်းကဆို အရေးပေါ်ဆန်တောင်မှ တော်တော်နဲ့ မထုတ်ဘူး။ ထုတ်တဲ့လူကတော့ နည်းတယ်။ အခုက များသည်ထက် များလာတယ်။ သူများက ကျနော်တို့ကို စားနပ်ရိက္ခာ ပေးမယ်ဆိုရင် ကိုယ့်ဘာသာသွားသယ်လို့ရှိရင်လည်း ကားခမတတ်နိုင်ဘူး။ ဆီဈေးက အဆမတန် တက်နေတော့ မတတ်နိုင်ဘူးလေ။” ဟု ပြောသည်။   ရိက္ခာအခက်အခဲ အပြင် နွေရာသီကာလ ရေကန်များ ခန်းခြောက်သွားသဖြင့် ရေရှားပါးမှုနှင့်လည်း ထပ်ဆင့် ရင်ဆိုင်နေရသည်။   အိမ်ထောင်စု ၃၀ ခန့်အတွက် နှစ်ရက်စာသာ အသုံးပြုနိုင်သည့် ရေသယ်ကားတစ်စီးလျှင် ယခင်နှစ်က ကျပ် ၃ သိန်းသာ ပေးရသော်လည်း၊ ယခုနှစ်တွင် ဆီဈေးကြောင့် ကျပ် ၄ သိန်းခွဲအထိ မြင့်တက်နေကြောင်း ဆိုသည်။   စစ်ရှောင်ကာလ ကြာမြင့်လာသည်နှင့်အမျှ အလုပ်အကိုင်မရှိခြင်း၊ ကုန်ဈေးနှုန်းကြီးမြင့်ခြင်းတို့ကြောင့် စစ်ဘေး ရှောင်များမှာ လုံခြုံရေးအရ စိုးရိမ်ရသည့်ကြားမှပင် နေရပ်ပြန်၍ တောင်ယာလုပ်ကိုင်ရန် စဉ်းစားလာနေကြ သည်။     လက်ရှိတွင် ဖရူဆိုမြို့နယ်အတွင်း ရိက္ခာ၊ ရေနှင့် ကျန်းမာရေးဆိုင်ရာ အခက်အခဲများ ပိုတိုး၍ ရင်ဆိုင်လာနေရ သဖြင့် လူသားချင်းစာနာမှု အကူအညီများ မြေပြင်သို့ တိုက်ရိုက်ရောက်ရှိနိုင်မည့် လမ်းကြောင်းများ အရေးပေါ် ဖော်ဆောင်ပေးရန် ဒေသခံအဖွဲ့အစည်းများက တောင်းဆိုထားကြသည်။   #လမ်းပန်းဆက်သွယ်ရေး #စက်သုံးဆီ #ကရင်နီ

စက်သုံးဆီဈေး ကွာဟမှုကြောင့် စစ်ရှောင်များ စားရေ ရိက္ခာ ရှားပါးမှု ကြုံ

စက်သုံးဆီဈေး ကွာဟမှုကြောင့် စစ်ရှောင်များ စားရေ ရိက္ခာ ရှားပါးမှု ကြုံ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၅ ရက်။  တော်လှန်ရေးတပ်…

  • April 25, 2026
တရုတ်ဂြိုလ်တု အကူအညီဖြင့် အီရန်က အမေရိကန်နှင့် အစ္စရေး စစ်စခန်းများကို ထောက်လှမ်းနေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီ ၂၄ ရက်။   အမေရိကန်အစိုးရက အရှေ့အလယ်ပိုင်းဒေသဆိုင်ရာ ဂြိုဟ်တုဓာတ်ပုံနှင့် ဒေတာ အချက်အလက်များကို ရက်အကန့်အသတ်မရှိ ပိတ်ပင်ကန့်သတ်လိုက်သော်လည်း အီရန်နိုင်ငံသည် တရုတ်နိုင်ငံ၏ အဆင့်မြင့်ဂြိုဟ်တုနည်းပညာကို အသုံးပြု၍ အမေရိကန်နှင့် အစ္စရေး စစ်အခြေစိုက်စခန်းများကို တိကျစွာ ပစ်မှတ်ထားထောက်လှမ်းလျက်ရှိကြောင်း နိုင်ငံတကာ သတင်းများတွင် ဖော်ပြကြသည်။   ယခင်က နိုင်ငံတကာသုတေသီများနှင့် သတင်းမီဒီယာများသည် အမေရိကန်အခြေစိုက် ဂြိုဟ်တုကုမ္ပဏီများထံမှ အချက်အလက်များ ရယူခဲ့ကြသည်။   သို့သော်လည်း ယခုအခါ အမေရိကန်အစိုးရ၏ ဖိအားကြောင့် အဆိုပါကုမ္ပဏီများက ဝန်ဆောင်မှုပိတ်ပင်လိုက်သည့် အတွက် လိုအပ်ချက်နေရာကို တရုတ်ဂြိုဟ်တုကုမ္ပဏီများက အစားထိုးဝင်ရောက်လာခြင်းဖြစ်သည်။   အီရန်တော်လှန်ရေးအစောင့်တပ် (IRGC) သည် တရုတ်ပုဂ္ဂလိကကုမ္ပဏီဖြစ်သော Earth Eye Co ထံမှ TEE-01B ဂြိုဟ်တုကို အမေရိကန်ဒေါ်လာ ၃၆.၆ သန်းဖြင့် ဝယ်ယူခဲ့ခြင်း ဖြစ်သည်။   အဆိုပါဂြိုဟ်တုသည် မြေပြင်အရာဝတ္ထုများကို ၀.၅ မီတာ (Half-meter resolution) အထိ ကြည်လင်ပြတ်သားစွာ ရိုက်ကူးနိုင်စွမ်းရှိသဖြင့် ရန်သူ့လေယာဉ်အမျိုးအစားနှင့် ပျံသန်းရန်ပြင်ဆင်နေသည့် အခြေအနေများကိုပါ အသေးစိတ်ထောက်လှမ်းနိုင်သည်။   တရုတ်က အီရန်အပေါ် နိုင်ငံတကာပိတ်ဆို့မှုများကို ရှောင်လွှဲနိုင်ရန်အတွက် ဂြိုဟ်တုကို တရုတ်မြေပေါ်တွင် တည်ဆောက်လွှတ်တင်ခဲ့ပြီး အာကာသလမ်းကြောင်းအတွင်းသို့ ရောက်ရှိချိန်မှသာ အီရန်ထံသို့ တိုက်ရိုက်ထိန်းချုပ်ခွင့် လွှဲပြောင်းပေးခဲ့ခြင်းဖြစ်ပါသည်။   အီရန်သည် ဤဂြိုဟ်တုအကူအညီဖြင့် ဆော်ဒီအာရေးဗီးယားရှိ Prince Sultan လေတပ်စခန်းအပါအဝင် ဒေသတွင်းရှိ အမေရိကန်စခန်းများကို စောင့်ကြည့်ခဲ့ပြီး အမေရိကန်ဆီဖြည့်လေယာဉ် ၅ စီးနှင့် AWACS ထောက်လှမ်းရေးလေယာဉ်တစ်စီးကို ထိမှန်အောင် တိုက်ခိုက်နိုင်ခဲ့သည်ဟု သတင်းများက ဆိုသည်။   #အီရန်အစ္စရေးတိုက်ပွဲ #တရုတ်ဂြိုလ်တု #ဂြိုလ်တုနည်းပညာ #အီရန်ထောက်လှမ်းရေး

တရုတ်ဂြိုလ်တု အကူအညီဖြင့် အီရန်က အမေရိကန်နှင့် အစ္စရေး စစ်စခန်းများကို ထောက်လှမ်းနေ

တရုတ်ဂြိုလ်တု အကူအညီဖြင့် အီရန်က အမေရိကန်နှင့် အစ္စရေး စစ်စခန်းများကို ထောက်လှမ်းနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီ ၂၄ ရက်။  အမ…

  • April 24, 2026
ဂျာမနီက သမိုင်းတွင် ပထမဆုံးသော စစ်ဘက်ဆိုင်ရာ မဟာဗျူဟာသစ်ကို ထုတ်ပြန်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၄ ရက်။   ဂျာမနီကာကွယ်ရေးဝန်ကြီး Boris Pistorius သည် ဂျာမန်စစ်တပ် (Bundeswehr) ကို ခေတ်နှင့်အညီ ပြုပြင်ပြောင်းလဲရန်အတွက် သမိုင်းတစ်လျှောက် ပထမဆုံးသော စစ်ဘက်ဆိုင်ရာ မဟာဗျူဟာသစ်ကို ထုတ်ဖော်ကြေညာလိုက်ပါသည်။   ဤမဟာဗျူဟာသည် ရုရှား-ယူကရိန်းစစ်ပွဲကြောင့် ပြောင်းလဲလာသော ကမ္ဘာ့လုံခြုံရေးအခြေအနေအရ ဂျာမန်စစ်တပ်ကို ပိုမိုမြန်ဆန်ပြီး နည်းပညာမြင့်မားသော စစ်တပ်ဖြစ်လာစေရန် ရည်ရွယ်ခြင်းဖြစ်ပါသည်။   မဟာဗျူဟာသစ်၏ ထူးခြားချက်မှာ လက်နက်အရေအတွက်ထက် စွမ်းဆောင်ရည် (Capability) ကိုသာ အဓိကထားတော့မည်ဖြစ်ပြီး လေကြောင်းရန်ကာကွယ်ရေး၊ အချက်အလက်အခြေပြု စစ်ဆင်ရေးနှင့် AI နည်းပညာများကို ပိုမိုအသုံးပြုသွားမည်ဖြစ်ပါသည်။   အဝေးပစ်လက်နက်စွမ်းရည် မြှင့်တင်မှုအဖြစ် လက်ရှိရှိနေသည့် Taurus ဒုံးကျည်များထက် ပိုမိုဝေးလံသော အကွာအဝေး ၁,၀၀၀ ကီလိုမီတာခန့်အထိ ပစ်ခတ်နိုင်သည့် JASSM-ER ဒုံးကျည်များကို ဝယ်ယူသွားရန် စီစဉ်လျက်ရှိသည်။   ထို့အပြင် စစ်သည်အင်အားကိုလည်း ၄၆၀,၀၀၀ အထိ တိုးမြှင့်သွားမည်ဖြစ်ကာ ဗျူရိုကရေစီလုပ်ထုံးလုပ်နည်းများကို လျှော့ချ၍ စစ်တပ်ကို ဒစ်ဂျစ်တယ်စနစ်သို့ ပြောင်းလဲသွားမည်ဟု ဆိုသည်။ 

မဟာဗျူဟာကို ထုတ်ပြန်သည်ဟု ဆိုသော်လည်း အချက်အလက်အများအပြားကိုမူ လျို့ဝှက်အဖြစ် ထိန်းသိမ်းထားဆဲလည်း ဖြစ်သည်။   #germany #ဂျာမဏီ #စစ်ဖက်ဆိုင်ရာ #မဟာဗျူဟာ

ဂျာမနီက သမိုင်းတွင် ပထမဆုံးသော စစ်ဘက်ဆိုင်ရာ မဟာဗျူဟာသစ်ကို ထုတ်ပြန်

ဂျာမနီက သမိုင်းတွင် ပထမဆုံးသော စစ်ဘက်ဆိုင်ရာ မဟာဗျူဟာသစ်ကို ထုတ်ပြန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၄ ရက်။  ဂျာမနီကာကွယ်ရေးဝ…

  • April 24, 2026
FIFA က အီတလီအသင်းအား အီရန် နေရာတွင် အစားထိုးရန် အဆိုပြုချက်ကို ပယ်ချ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၄ ရက်။ လာမည့် ၂၀၂၆ ကမ္ဘာ့ဖလားပြိုင်ပွဲတွင် အီရန်အသင်းအစား အီတလီအသင်းကို အစားထိုးဝင်ရောက်ယှဉ်ပြိုင်စေရန် အမေရိကန်ဘက်မှ အဆိုပြုချက်ကို ကမ္ဘာ့ဘောလုံးအဖွဲ့ချုပ် (FIFA) က တရားဝင်ငြင်းပယ်လိုက်သည်။ အမေရိကန်သမ္မတ၏ အထူးကိုယ်စားလှယ် Paolo Zampolli က အီရန်နှင့် အမေရိကန်ကြား တင်းမာမှုများကြောင့် အီရန်အစား အီတလီကို အစားထိုးရန် အဆိုပြုခဲ့ခြင်းဖြစ်သည်။ သို့သော်လည်း FIFA ဥက္ကဋ္ဌ Gianni Infantino က အားကစားကို နိုင်ငံရေးနှင့် မရောထွေးသင့်ကြောင်းနှင့် အီရန်အသင်းသည် ခြေစစ်ပွဲအောင်မြင်ထားသဖြင့် သေချာပေါက် ပါဝင်ခွင့်ရမည်ဖြစ်ကြောင်း အတည်ပြုခဲ့ပါသည်။ အီရန်အစိုးရကလည်း အမေရိကန်၏ လုပ်ရပ်မှာ ကိုယ်ကျင့်တရားပျက်ပြားမှုဖြစ်ကြောင်း တုံ့ပြန်ခဲ့သည်။ အီတလီအစိုးရတာဝန်ရှိသူများကလည်း အားကစားသမားပီသစွာ ကွင်းအတွင်း၌သာ ခြေစစ်ပွဲအောင်မြင်မှု ရယူလိုကြောင်းနှင့် ဤအဆိုပြုချက်မှာ ရှက်ဖွယ်ကောင်းကြောင်း ပြောကြားခဲ့သည်။ အီရန်အသင်းသည် ဇွန်လ ၁၁ ရက်နေ့တွင် စတင်မည့် ၂၀၂၆ ကမ္ဘာ့ဖလားပြိုင်ပွဲ၌ နယူးဇီလန်၊ ဘယ်လ်ဂျီယံ၊ အီဂျစ်တို့နှင့်အတူ အမေရိကန်နိုင်ငံရှိ မြို့ကြီးများတွင် အုပ်စုပွဲစဉ်များ ယှဉ်ပြိုင်ကစားသွားရမည် ဖြစ်သည်။ ၂၀၂၆ ခုနှစ် အမျိုးသား ကမ္ဘာ့ ဖလား ဘောလုံးပွဲကို အမေရိကန် ပြည်ထောင်စု၊ ကနေဒါနှင့် မက္ကစီကို နိုင်ငံများတွင် ပြိုင်ပွဲများခွဲ၍ ကျင်းပသွားမည် ဖြစ်သည်။ #အီရန်ဘောလုံးအသင်း #အီတလီဘောလုံးအသင်း #ဒေါ်နယ်ထရမ့် #ကမ္ဘာ့ဖလားဘောလုံးပွဲ #FIFAWorldCup2026

FIFA က အီတလီအသင်းအား အီရန် နေရာတွင် အစားထိုးရန် အဆိုပြုချက်ကို ပယ်ချ

FIFA က အီတလီအသင်းအား အီရန် နေရာတွင် အစားထိုးရန် အဆိုပြုချက်ကို ပယ်ချ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၄ ရက်။ လာမည့် ၂၀၂၆ ကမ္ဘာ့ဖလား…

  • April 24, 2026
ဆီပြတ် မီးပြတ်သဖြင့် ရေသန့်နှင့် သောက်ရေများ ဈေးတက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၄ ရက်။   ဧရာဝတီတိုင်း ဒေသကြီး၊ ပုသိမ်မြို့တွင် ဖေဖော်ဝါရီလဆန်းပိုင်းမှ စတင်၍ လျှပ်စစ်မီးပြတ်တောက်မှုနှင့် စက်သုံးဆီဈေးနှုန်း ကြီးမြင့်မှုဒဏ်များကြောင့် သောက်ရေအဖြစ် အသုံးပြုနေသည့် စက်ရုံထုတ်ရေသန့်နှင့် တွင်းရေဈေးနှုန်းများ တစစ မြင့်တက်လာနေကြောင်း မြို့ခံများက ပြောသည်။   ပုသိမ်မြို့သည် ပင်လယ်နှင့်နီးကာ ဒီရေဝင်ထွက်မှုရှိသဖြင့် ရေချိုတူးဖော်ရရှိရန် ခက်ခဲသော ဒေသတစ်ခု ဖြစ်သည်။   လက်ရှိတွင် ရေသန့်တံဆိပ် အမျိုးအစားပေါ် မူတည်ကာ ၂၀ လီတာတစ်ဗူးလျှင် ယခင် ၁,၀၀၀ ကျပ်မှ ၁,၅၀၀ ကျပ်အထိလည်းကောင်း၊ တွင်းရေနှင့် စက်တွင်းရေ ၅ ဂါလံတစ်ပုံးလျှင် ၃၀၀ ကျပ်မှ ၅၀၀ ကျပ်အထိ လည်း ကောင်း ဈေးနှုန်းများ အသီးသီး မြင့်တက်သွားခြင်း ဖြစ်သည်။   အမှတ် (၄) ရပ်ကွက်မှ အသက် ၅၀ ခန့်ရှိ အမျိုးသမီး တစ်ဦးက “ဧရာမင်းနဲ့ ကောင်းသန့်တံဆိပ် ရေသန့်တွေ ကတော့ တစ်ဗူး ၁,၅၀၀ ကျပ်ပဲ။ ကျန်တဲ့တံဆိပ်တွေကတော့ ၁,၂၀၀ ရှိတယ်၊ ၁,၃၀၀ ရှိတယ်။ လူကြိုက် များ တဲ့ အပေါ်လိုက်ပြီး ဈေးအနည်းအများ ကွာသွားတာ” ဟု ပြောသည်။   ပုသိမ်မြို့ပေါ်တွင် ရေချိုရေသန့် ထွက်ရှိသည့် နေရာရှားပါးပြီး ဘိုကနောင်နှင့် ကျောက်စရစ်ကုန်း ရပ်ကွက်ရှိ အချို့နေရာများတွင်သာ တူးဖော်ရရှိနိုင်ခြင်းဖြစ်သည်။   အဆိုပါ ရပ်ကွက်များရှိ ရေတွင်းများမှ ရေကို မြို့ခံအများစုက အားကိုးနေရခြင်းလည်း ဖြစ်သည်။   အမှတ် (၄) ရပ်ကွက်မှ အသက် ၈၀ ခန့်ရှိ အမျိုးသားတစ်ဦးက “ဘိုကနောင်နဲ့ ကျောက်စရစ်ကုန်း ရပ် ကွက်မှာက ရေကောင်းတယ်၊ ရေချိုရေသန့်ထွက်တာပေါ့။ နေရာတိုင်းတော့ မဟုတ်ဘူးလေ။ တချို့နေရာမှာ တူးလို့ရတာ။ အဲဒီလူတွေဆီက ဝယ်ပြီး လက်တွန်းလှည်း၊ တုတ်တုတ်တွေနဲ့ လှည့်ရောင်းကြတာကို ဝယ်သုံး ကြရတာ” ဟု လက်ရှိအခြေအနေကို ရှင်းပြသည်။   ရေသန့်ထုတ်လုပ်သူများဘက်ကမူ လျှပ်စစ်မီးမမှန်ခြင်းနှင့် စက်သုံးဆီကို ခွဲတမ်းဖြင့် ဝယ်ယူနေရခြင်း၊ မှောင်ခို ဈေးကွက်တွင် ဈေးကြီးပေးဝယ်နေရခြင်းများကြောင့် ယခုကဲ့သို့ ဈေးတင်ရောင်းချရခြင်း ဖြစ်ကြောင်း ဆိုကြသည်။   ရေသန့်ထုတ်လုပ်သူတစ်ဦးက “လျှပ်စစ်မီးမရတော့ မီးစက်မောင်းပြီး စက်လည်ရတယ်။ ရေသန့်ပို့တော့ စက်သုံးဆီဈေးက ၂ ဆ ဖြစ်နေပြီလေ။ အဲဒီတော့ ရေသန့်ဈေးတင်လိုက်ရတယ်။” ဟု ပြောသည်။   ယခုအခါ ပုသိမ်မြို့ပေါ်တွင် ဧရာကင်း၊ NECTAR၊ ချိုအေးမြ၊ ကောင်းသန့်၊ စွယ်တော်နှင့် KMZ စသည့် ရေသန့် တံဆိပ်များ ထုတ်လုပ်ရောင်းချနေသော်လည်း အစစအရာရာ ကုန်ဈေးနှုန်းကြီးမြင့်မှုကြောင့် ရေရောင်းချသူ များလည်း အခက်တွေ့နေကြသည်။   ရေတွင်းမှ ရေကိုခပ်ယူကာ ရောင်းချရခြင်းဖြစ်သော်လည်း အခြေခံကုန်ဈေးနှုန်းများ အဆမတန် မြင့်တက်လာ ခြင်း ကြောင့် မိသားစု စားဝတ်နေရေး ပြေလည်စေရန်အတွက် ရေဈေးနှုန်းကို တိုးမြှင့်ရောင်းချရခြင်း ဖြစ်ကြောင်း လက်တွန်းလှည်းဖြင့် ရေရောင်းချသူတစ်ဦးက ဆိုသည်။     လက်ရှိတွင် ညောင်ပင်သာဘုန်းကြီးကျောင်း၊ ရွှေစည်းခုံဘုရားနှင့် ရွှေမုဌောဘုရားရှိ ရေတွင်းများမှာ ရေကောင်း ရေသန့် ထွက်ရှိသည့် နေရာများအဖြစ် လူသိများနေဆဲဖြစ်သော်လည်း မြို့လုံးကျွတ် သုံးစွဲရန်အတွက်မူ အခက် အခဲများ ရှိနေဆဲဖြစ်သည်။   နွေအပူရှိန် မြင့်တက်လာသည့်နှင့်အမျှ လျှပ်စစ်မီးနှင့် စက်သုံးဆီ အကျပ်အတည်းများကြောင့် ပုသိမ်မြို့ခံတို့မှာ သောက်ရေအတွက်ပါ ကုန်ကျစရိတ် ပိုမိုသုံးစွဲနေရဟု ပြောဆိုနေကြသည်။   #ဧရာဝတီတိုင်း #ပုသိမ်မြို့ #သောက်သုံးရေ

ဆီပြတ် မီးပြတ်သဖြင့် ရေသန့်နှင့် သောက်ရေများ ဈေးတက်

ဆီပြတ် မီးပြတ်သဖြင့် ရေသန့်နှင့် သောက်ရေများ ဈေးတက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၄ ရက်။  ဧရာဝတီတိုင်း ဒေသကြီး၊ ပုသိမ်မြို့…

  • April 24, 2026
ကိုရင်ငယ်ကို အချက်ပေါင်းများစွာ ရိုက်နှက်ခဲ့သည့် ကျောင်းထိုင်ဘုန်းကြီးအား ဖမ်းဆီး အမှုဖွင့်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၄ ရက်။   ကိုရင်ငယ်ကို အချက်ပေါင်းများစွာ ပြင်းပြင်းထန်ထန် ရိုက်နှက်သည့် ရုပ်သံ လူမှု ကွန်ရက်တွင် ပြန့်နှံ့သွားပြီးနောက် ရိုက်နှက်သည့် ကျောင်းထိုင်ဘုန်းကြီးကို သာသနာရေးဆိုင်ရာ စည်းကမ်းများအရ လူဝတ် လဲစေပြီးနောက် ထောင်ဒဏ်ချမှတ်နိုင်သည့် ပုဒ်မများဖြင့် အမှုဖွင့်ဖမ်းဆီးလိုက်သည်။   ဖြစ်စဉ်မှာ ပြီးခဲ့သည့် ဧပြီလ ၂၁ ရက်နေ့ ညနေပိုင်းက တနင်္သာရီတိုင်းဒေသကြီး၊ မြိတ်မြို့ရှိ ပဋိပတ္တိတောရကျောင်းတွင် ကျောင်းထိုင် ဘုန်းကြီးဖြစ်သူ ဦးတေဇက ကိုရင်ငယ်ကို အချက်ပေါင်းများစွာ ပြင်းပြင်းထန်ထန် ရိုက်နှက်ခဲ့ခြင်းဖြစ်သည်။   အဆိုပါ ရိုက်နှက်မှု ဗီဒီယိုဖိုင်သည် လူမှုကွန်ရက်ပေါ်တွင် ကျယ်ကျယ်ပြန့်ပြန့် ပျံ့နှံ့သွားခဲ့ပြီးနောက် ဒေသခံ ပြည်သူများနှင့် ဘာသာရေးအသိုင်းအဝိုင်းအတွင်း ပြင်းထန်သော ဝေဖန်မှုများနှင့် စိုးရိမ်တုန်လှုပ်မှုများ မြင့်တက် ခဲ့ခြင်း ဖြစ်သည်။   ထိုကိစ္စနှင့် ပတ်သက်၍ အမှုကို လိုက်ပါကူညီဆောင်ရွက်ပေးနေသည့် ဆရာတော် ဦးသုနန္ဒက "ဧပြီ ၂၂ ရက်နေ့ မနက်ပိုင်းမှာ သာသနာရေးဦးစီးဌာနရယ်၊ ထွေ/အုပ်နဲ့ ရဲတွေက ကျောင်းထိုင်ဘုန်းကြီး ဦးတေဇကို ခေါ်ယူ စစ် ဆေးပါတယ်။ ပြီးတော့ ညနေပိုင်းမှာ လူဝတ်လဲပြီး ရာဇသတ်ကြီးပုဒ်မ ၂၉၅-က နဲ့ အရေးယူ ဆောင်ရွက် ထားပါတယ်" ဟု မိန့်ကြားသည်။   လက်ရှိတွင် ရာဇသတ်ကြီးပုဒ်မ ၂၉၅-က ဖြစ်သော ကိုးကွယ်သည့် ဘာသာသာသနာ သို့မဟုတ် ဘာသာရေး ယုံကြည်မှုကို စော်ကားခြင်းဖြင့် ဘာသာရေးစိတ်ဓာတ်ကို နာကျင်စေရန် မသမာစိတ်ဖြင့် ကျူးလွန်သည့် ပုဒ်မဖြင့် အမှုဖွင့်ထားခြင်းဖြစ်သည်။   အဆိုပါ ပုဒ်မသည် အာမခံမရနိုင်သလို ကျေအေးခွင့်လည်းမရှိဘဲ အလုပ်ကြမ်းနှင့် ထောင်ဒဏ် ၂ နှစ်အထိ ချမှတ်ခံရနိုင်သည့် ပုဒ်မ ဖြစ်သည်။   ထို့ပြင် ထောင်ဒဏ်တစ်မျိုးမျိုးကို ဖြစ်စေ၊ ငွေဒဏ်ကို ဖြစ်စေ၊ ဒဏ် ၂ ရပ်လုံးကို ဖြစ်စေ ချမှတ်နိုင်သော ပုဒ်မလည်း ဖြစ်သည်။   ကျောင်းထိုင်ဘုန်းကြီး ဦးတေဇ၏ ရိုက်နှက်မှုကြောင့် ဒဏ်ရာများရရှိခဲ့သည့် ကိုရင်ငယ်မှာမူ လတ်တလောတွင် ဆေးရုံ၌ ကုသမှုခံယူနေရပြီး အသက်အန္တရာယ် စိုးရိမ်စရာမရှိသော်လည်း ရရှိထားသည့် ဒဏ်ရာများကြောင့် စိတ်ပိုင်းဆိုင်ရာ ထိခိုက်မှုများရှိနေနိုင်ကြောင်း ဒေသတွင်း သတင်းရင်းမြစ်များက ပြောသည်။   လတ်တလောတွင် အဆိုပါ ဖြစ်ရပ်ကြောင့် မြိတ်မြို့နယ်အတွင်းရှိ အခြားသော ဘုန်းတော်ကြီးသင် ပညာရေး ကျောင်းများနှင့် ဘုန်းကြီးကျောင်းများတွင်လည်း သာသနာရေးဆိုင်ရာ ကြီးကြပ်မှုများ ပိုမိုတင်းကျပ်လာ နိုင်ကြောင်း မြိတ်မြို့ခံ အချို့က ပြောဆိုနေကြသည်။   #ပဋိပတ္တိတောရကျောင်း #ပဋိပတ္တိတောရကျောင်းထိုင်ဘုန်းကြီး #ကိုရင်လေး

ကိုရင်ငယ်ကို အချက်ပေါင်းများစွာ ရိုက်နှက်ခဲ့သည့် ကျောင်းထိုင်ဘုန်းကြီးအား ဖမ်းဆီး အမှုဖွင့်

ကိုရင်ငယ်ကို အချက်ပေါင်းများစွာ ရိုက်နှက်ခဲ့သည့် ကျောင်းထိုင်ဘုန်းကြီးအား ဖမ်းဆီး အမှုဖွင့် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၄ ရက်။&nb…

  • April 24, 2026
PNA တပ် ပျော်ပွဲ အတွက် လူထု ထံမှ ငွေကောက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၃ ရက်။   ရှမ်းပြည် တောင်ပိုင်း၊ ပအိုဝ်း ကိုယ်ပိုင်အုပ်ချုပ်ခွင့်ရဒေသ အတွင်းရှိ ကျေးရွာများတွင် ပအိုဝ်းပြည်သူ့စစ် (PNA) အဖွဲ့က တပ်ဖွဲ့ဝင်များ၏ ‘ပျော်ပွဲရွှင်ပွဲ’ အတွက်ဟု ဆိုကာ ဒေသခံများထံမှ ငွေကြေးများ ထပ်မံကောက်ခံနေ ကြောင်း ပြောသည်။   ကျောက်တလုံးကြီးမြို့နယ်ခွဲ အတွင်းရှိ ကျေးရွာများတွင် ယခင်က တစ်နှစ်လျှင် နှစ်ကြိမ် စစ်မှုထမ်းကြေး ကောက်ခံလေ့ရှိသော်လည်း၊ ယခုအခါ ပျော်ပွဲရွှင်ပွဲခေါင်းစဉ်အပြင် အခြားသော ခေါင်းစဉ်မျိုးစုံဖြင့် ပူးတွဲ ကောက်ခံလာခြင်းဖြစ်သည်ဟု ဒေသခံများက ပြောသည်။   ကျေးရွာရှိ အိမ်ထောင်စု တစ်စုလျှင် အနည်းဆုံး ကျပ် ၅,၀၀၀ မှ ၅၀,၀၀၀ အထိ ပေးဆောင်နေရပြီး နိုင်ငံခြား ရောက်နေသူများအတွက်လည်း ကောက်ခံသည်ဟု ဆိုသည်။   ဒေသတွင်း တောင်သူတစ်ဦးက “ထည့်ရတာတော့ အရမ်းမများပါဘူး။ ဒါပေမဲ့ ခဏခဏလာတယ်။ အကြောင်း မျိုးမျိုးပြတယ်လေ။ ဒီဘက်မှာလည်း စိတ်ရှုပ်ရတာပေါ့။ ခြံအလုပ်တစ်ဖက်၊ သူတို့အစည်းအဝေးတွေက တစ်ဖက်နဲ့ မနားရပါဘူး” ဟု ပြောသည်။   ပအိုဝ်းဒေသအတွင်း ခြောက်လတစ်ကြိမ် စစ်မှုထမ်းကြေးအဖြစ် ကျပ် ၃ သိန်း ပေးဆောင်ရသည့်အပြင် ယာဉ် ခွန်နှင့် စစ်အသုံးစရိတ် ခေါင်းစဉ်များကြောင့် တစ်အိမ်ထောင်လျှင် အနည်းဆုံး ကျပ် ၇ သိန်းခန့်အထိ ကုန်ကျနေ ကြောင်း ဆိုသည်။   နိုင်ငံခြားရောက် လူငယ်များမှာမူ နှစ်ဆပေးဆောင်ရသည်ဟု ဒေသခံများက ပြောသည်။   PNA ထံတွင် စစ်မှုထမ်းပြီး နေရပ်ပြန်လာသူတစ်ဦးကလည်း “အမျိုးမျိုးကောက်တာပဲ။ အခုနောက်ပိုင်းဆို သူတို့ မီဒီယာသင်တန်းပေးတယ်ပြောတယ်။ တကယ်က ထောက်လှမ်းရေးသင်တန်းပေါ့။ အဲဒါလည်း ငွေထည့် ရတာပဲ၊ လူလည်း လိုက်ရသေးတယ်” ဟု ပြောသည်။   အလားတူ ညောင်ရွှေမြို့နယ် အင်းလေးအရှေ့ဘက်ကမ်းတွင်လည်း နေရပ်ပြန်လာသည့် စစ်ဘေးရှောင်များထံမှ တစ်အိမ်လျှင် ကျပ်တစ်သိန်းစီ ကောက်ခံနေကြောင်း ဆိုသည်။   ဒေသခံများအနေဖြင့် စီးပွားရေးကျပ်တည်းနေသော်လည်း ငွေမထည့်ပါက လူမှုအသိုင်းအဝိုင်းမှ ဖယ်ကျဉ်မည် ဟူသော ခြိမ်းခြောက်မှုများကြောင့် အကြွေးချေးငှားကာ ထည့်ဝင်နေရသည့် အခြေအနေသို့ ဆိုက်ရောက်နေ ကြသည်။   လက်ရှိတွင် PNA ၏ လုပ်ရပ်များကြောင့် ပအိုဝ်းကျေးရွာများအတွင်း လူမှုစီးပွားဘဝများ ပိုမိုကျပ်တည်း လာနေပြီး ဒေသခံများမှာ စစ်ရေးဖိအားနှင့် ငွေကြေးဖိအား နှစ်ရပ်ကြားတွင် မြေစာပင်ဖြစ်နေရကြောင်း ဆိုသည်။   #PNA #ပအိုဝ်းပြည်သူ့စစ် #ပအိုဝ်းကိုယ်ပိုင်အုပ်ချုပ်ခွင့်ရဒေသ #ကျောက်တလုံးကြီးမြို့နယ်ခွဲ #ရှမ်းတောင်

PNA တပ် ပျော်ပွဲ အတွက် လူထု ထံမှ ငွေကောက်

PNA တပ် ပျော်ပွဲ အတွက် လူထု ထံမှ ငွေကောက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၃ ရက်။  ရှမ်းပြည် တောင်ပိုင်း၊ ပအိုဝ်း ကိုယ်ပိုင်အု…

  • April 23, 2026
အင်းတော် ထိုးစစ် ပြင်ဆင်မှုကြောင့် ဒေသခံများ ရှောင်တိမ်းနေရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၃ ရက်။   အင်းတော်ကို စစ်တပ်က ပြန်လည်စစ်ကြောင်းထိုးရန် ပြင်ဆင်နေမှုများကြောင့် ဒေသခံများ ဘေးလွတ်ရာသို့ ရှောင်တိမ်းရန် အရေးပေါ် ပြင်ဆင်နေကြသည်။   အမျိုးသားညီညွတ်ရေး အစိုးရ (NUG) နှင့် တော်လှန်ရေး အင်အားစုများ ထိန်းချုပ်ထားသည့် စစ်ကိုင်းတိုင်း ဒေသကြီး၊ အင်းတော်မြို့ကို စစ်တပ်က ပြန်လည်သိမ်းပိုက်ရန် စစ်ကြောင်းထိုးမည်ဆိုသည့် သတင်းများ ထွက်ပေါ်လာပြီးနောက် ဒေသခံပြည်သူများ ဘေးလွတ်ရာသို့ တိမ်းရှောင်ရန် အရေးပေါ်ပြင်ဆင်မှုများ ပြုလုပ်နေကြခြင်း ဖြစ်သည်။   ပြီးခဲ့သည့် ဧပြီလ ၁၉ ရက်နေ့က ကသာမြို့ရှိ ခမရ (၃၀၉) တပ်ရင်းသို့ ရောက်ရှိလာသည့် စစ်တပ်စစ်ကြောင်း သည် အင်းတော်မြို့ဘက်သို့ စစ်ကြောင်းထိုးရန် အသင့်ပြင်နေခြင်း ဖြစ်ကြောင်း စစ်ရေးသတင်းရင်းမြစ်များက ဆိုသည်။   အဆိုပါစစ်ကြောင်းသည် ပြီးခဲ့သည့် မတ်လအတွင်းက တကောင်းမြို့နှင့် ထီးချိုင့်မြို့တို့ကို စီးနင်းခဲ့သည့် အင်အားများဖြစ်ကြောင်း ဒေသခံများက ပြောသည်။   အင်းတော်ဒေသခံတစ်ဦးက “အင်းတော်က ဒေသခံတွေကတော့ အကုန်ပြင်ဆင်ထားကြတာပေါ့။ စစ်ကြောင်း လာပြီဆိုတာနဲ့ ချက်ချင်းပြေးနိုင်အောင် အထုပ်အပိုးတွေ အဆင်သင့်လုပ်ထားကြတယ်။ ဟိုလိုမျိုး အစုလိုက် အပြုံလိုက် ရှောင်တာမျိုးတော့ မရှိသေးပေမယ့် လူတိုင်းကတော့ အရေးပေါ် အခြေအနေအတွက် နိုးနိုးကြား ကြား ရှိနေကြတယ်” ဟု လက်ရှိမြေပြင်အခြေအနေကို ရှင်းပြသည်။   စစ်တပ်ကို ထောက်ခံသည့် တယ်လီဂရမ်ချန်နယ်များတွင်လည်း အင်းတော်မြို့ကို ပြန်လည်သိမ်းပိုက်မည့် အကြောင်း ဝါဒဖြန့်မှုများ ဆက်တိုက်ပြုလုပ်နေသဖြင့် Indaw Revolution (IR) အဖွဲ့ကလည်း ဒေသခံများအား အထူးသတိရှိရန် ထုတ်ပြန်ထားသည်။   IR အဖွဲ့က “ဒီရက်ပိုင်းအတွင်း အင်းတော်ကို စစ်ကြောင်းထိုးဖို့ သေချာသလောက်ရှိနေပါတယ်။ တိုက်ပွဲတွေ ဖြစ်လာနိုင်သလို လေကြောင်းတိုက်ခိုက်မှုတွေလည်း အပြင်းအထန်ရှိနိုင်တာမို့ မိဘပြည်သူတွေအနေနဲ့ ဆေး ဝါး၊ ရိက္ခာနဲ့ အရေးကြီးပစ္စည်းတွေကို အသင့်ထုတ်ပိုးထားသင့်ပါတယ်” ဟု သတိပေးထားသည်။   အင်းတော်မြို့ကို အမှတ် (၁) စစ်ဒေသရှိ ကာကွယ်ရေးတပ်ဖွဲ့ဝင်များနှင့် ကချင်လွတ်လပ်ရေးတပ်မတော် (KIA) ပူးပေါင်းအဖွဲ့များက သိမ်းပိုက်ထားသည်မှာ ယခုလ ဧပြီ ၇ ရက်နေ့တွင် တစ်နှစ်ပြည့်မြောက်ခဲ့ပြီ ဖြစ်သည်။   စစ်တပ်အနေဖြင့် စစ်ရေးအရ အရေးပါသည့် အင်းတော်မြို့ကို ပြန်လည်ရရှိရန် ကြိုးပမ်းလာနေခြင်းကြောင့် ဒေသခံတော်လှန်ရေး အင်အားစုများကလည်း မြေပြင်စစ်ရေးနှင့် လေကြောင်းအန္တရာယ်ကို အထူးဂရုပြုကြရန် ဒေသခံများကို နှိုးဆော်ထားသည်။   #အင်းတော်တိုက်ပွဲ #KIA #စစ်အုပ်စု

အင်းတော် ထိုးစစ် ပြင်ဆင်မှုကြောင့် ဒေသခံများ ရှောင်တိမ်းနေရ

အင်းတော် ထိုးစစ် ပြင်ဆင်မှုကြောင့် ဒေသခံများ ရှောင်တိမ်းနေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၃ ရက်။  အင်းတော်ကို စစ်တပ်က ပြန်လ…

  • April 23, 2026
×Close