သတင်း

တနင်္သာရီတွင် စစ်ကူ စစ်ကြောင်း မိုင်းဆွဲခံရပြီး ၇ ဦးထက်မနည်း ထိခိုက်သေဆုံး   သတင်းနှင့်မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၃ ရက်။   တနင်္သာရီတွင် စစ်ကူလာသည့် စစ်တပ် စစ်ကြောင်း မိုင်းဆွဲတိုက်ခိုက်ခံရပြီး ၇ ဦးထက်မနည်း ထိခိုက်သေဆုံးမှု ရှိခဲ့သည်။   တနင်္သာရီတိုင်း၊ တနင်္သာရီမြို့နယ်အတွင်းရှိ သိန်ခွန်းကျေးရွာသို့ စစ်ကူပေးရန် ခြေလျင်တက်လာသည့် စစ်တပ် စစ်ကြောင်း မိုင်းဆွဲတိုက်ခိုက်ခံရပြီး ထိခိုက်သေဆုံးမှုများ ရှိနေကြောင်း ဒေသခံများနှင့် တော်လှန်ရေး အင်အားစုများက ပြောသည်။   ဧပြီလ ၂၁ ရက်နေ့၊ နံနက် ၁၁ နာရီခန့်တွင် တနင်္သာရီမြို့မှ သိန်ခွန်းရွာဘက်သို့ ဦးတည်လာသည့် အင်အား ၅၀ ခန့်ပါ စစ်တပ်စစ်ကြောင်းကို ချောင်းနှစ်ပေါက်ကျေးရွာ အနီးတွင် ပြည်သူ့ကာကွယ်ရေးတပ်ဖွဲ့များက မိုင်းဆွဲကြားဖြတ်တိုက်ခိုက်ခဲ့ခြင်း ဖြစ်သည်။   မိုင်းဆွဲခံရပြီးနောက် စစ်တပ်ဘက်က ဒရုန်းများ အသုံးပြုကာ ဗုံးသီးချ တန်ပြန်တိုက်ခိုက်ခဲ့သဖြင့် နှစ်ဖက်ကြား ထိတွေ့မှု ပြင်းထန်ခဲ့သည်။   ပြည်သူ့ကာကွယ်ရေးတပ်ဖွဲ့ဝင်တစ်ဦးက “လောလောဆယ် သူတို့ဘက်က ခုနစ်ယောက်လောက် ထိထားတာပဲ ပြောနိုင်သေးတယ်။ ဒဏ်ရာရတဲ့သူတွေလည်း တွေ့ရတယ်။ အတိအကျသိရအောင်တော့ ဆက်ပြီး စုံစမ်းနေ တုန်းပဲ။ ကျနော်တို့ဘက်ကတော့ အထိအခိုက်မရှိဘဲ ပြန်ဆုတ်လာနိုင်ခဲ့တယ်” ဟု ပြောသည်။   အဆိုပါ မိုင်းဆွဲခံရသည့်ဖြစ်စဉ် ဖြစ်ပွားပြီးနောက် မွန်းတည့် ၁၂ နာရီဝန်းကျင်တွင် တနင်္သာရီမြို့ဘက်မှ သိန်ခွန်း ကျေးရွာဘက်သို့ စစ်ကူဖြည့်တင်းရန် စစ်တပ် လက်အောက်ခံ တပ်သားများ တင်ဆောင်လာသည့် ကား ၄ စီးခန့် တမုတ်ချုံးကျေးရွာကို ဖြတ်သန်းသွားသည်ကို တွေ့မြင်ခဲ့ရကြောင်း ဒေသခံများက ဆိုသည်။   ချောင်းပေါက်ရွာသားတစ်ဦးက “မိုင်းဆွဲခံရတဲ့နေရာမှာ တော်တော်လေး ပွဲကြမ်းသွားတယ်။ စစ်တပ်ဘက်က အထိနာသွားပုံရတယ်၊ ဒါကြောင့် မြို့ထဲကနေ ကားတွေနဲ့ စစ်ကူတွေ အလျင်အမြန် ထပ်လွှတ်နေတာပေါ့။ ရွာသားတွေကတော့ တိုက်ပွဲတွေ ထပ်ဖြစ်မှာစိုးလို့ အခြေအနေကို စောင့်ကြည့်နေရတယ်” ဟု ပြောသည်။   လက်ရှိတွင် တနင်္သာရီမြို့နယ်အတွင်းရှိ ကျေးရွာများတွင် စစ်တပ်ဘက်က စစ်ရေးလှုပ်ရှားမှုများ ဆက်တိုက် ရှိနေသဖြင့် ဒေသခံပြည်သူများ အနေဖြင့် စစ်ရေးသတိရှိကြရန် တော်လှန်ရေးအဖွဲ့အစည်းများက နှိုးဆော် သတိပေးထားသည်။   #မိုင်းဆွဲတိုက်ခိုက် #တနင်္သာရီတိုင်း #PDF #စစ်အုပ်စု

တနင်္သာရီတွင် စစ်ကူ စစ်ကြောင်း မိုင်းဆွဲခံရပြီး ၇ ဦးထက်မနည်း ထိခိုက်သေဆုံး

တနင်္သာရီတွင် စစ်ကူ စစ်ကြောင်း မိုင်းဆွဲခံရပြီး ၇ ဦးထက်မနည်း ထိခိုက်သေဆုံး  သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၃ ရက်။  တနင်္သာရီတ…

  • April 23, 2026
လူသတ်ခဲ့သူက PDF ထံ ဆက်သွယ်၍ အဖမ်းခံ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၃ ရက်။   တနင်္သာရီတိုင်း၊ လောင်းလုံးမြို့နယ်တွင် အမျိုးသားတစ်ဦးကို သေနတ်ဖြင့် ပစ်သတ်ပြီး ထွက်ပြေးသွားသည့် တရားခံဖြစ်သူက ၎င်း၏မိသားစုမှ တစ်ဆင့် ပြည်သူ့ကာကွယ်ရေးတပ်ဖွဲ့ (PDF) ထံ ဆက်သွယ်၍ အဖမ်းခံခဲ့သည်။   ပြီးခဲ့သည့် ဧပြီလ ၂၀ ရက်နေ့၊ ညနေ ၅ နာရီခန့်က လောင်းလုံးမြို့နယ်၊ ဝံတွင်းကျေးရွာတွင် နေထိုင်သူ အသက် (၆၀) အရွယ် ဦးနိုင်ဝင်းအား ဦးစိုးပိုင် ဆိုသူက သေနတ်ဖြင့် ပစ်ခတ်ခဲ့သဖြင့် နေရာတွင်ပင် သေဆုံးသွားခဲ့ခြင်း ဖြစ်သည်။   ပြစ်မှုကျူးလွန်သူ ဦးစိုးပိုင်သည် အခင်းဖြစ်ပွားပြီး နာရီပိုင်းအကြာမှာပင် မိသားစုထံ ဖုန်းဆက်သွယ်ကာ အဖမ်းခံလိုကြောင်း အသိပေးခဲ့ခြင်း ဖြစ်သည်။   ၎င်း၏ မိသားစုဝင်တစ်ဦးက “သူက ဖုန်းဆက်ပြီး သေသွားတဲ့သူ မီးသင်္ဂြိုဟ်ပြီးရင် အဖမ်းခံမယ်လို့ ပြောတယ်။ မိသားစုဝင်တွေက အချိန်မဆွဲနဲ့၊ ထွက်ပြေးနေသလို ဖြစ်နေလိမ့်မယ်လို့ ပြန်ပြောတော့မှ သူ့ကိုလာဖမ်းပါဆိုပြီး တောင်းဆိုတာ။ ဒါကြောင့် ၂၄ နာရီမပြည့်ခင်မှာပဲ PDF အဖွဲ့က သွားဖမ်းတာပါ။ ဦးစိုးပိုင်ကိုယ်တိုင် သေနတ်နဲ့ ကျည်ဆံတွေအပ်ပြီး အဖမ်းခံတာပါ” ဟု အတည်ပြု ပြောဆိုသည်။   ဧပြီလ ၂၁ ရက်နေ့၊ နံနက် ၉ နာရီခန့်တွင် လောင်းလုံးမြို့အနီးရှိ ကျေးရွာတစ်ရွာ၌ PDF အဖွဲ့က ဦးစိုးပိုင်အား သွား ရောက်ထိန်းသိမ်းခဲ့ခြင်းဖြစ်ပြီး၊ ၎င်းသည် အာဏာမသိမ်းမီကတည်းက ပစ္စတိုသေနတ် ကိုင်ဆောင်လေ့ရှိသူ ဖြစ်ကာ ထိုလက်နက်ဖြင့်ပင် ပစ်သတ်ခဲ့ကြောင်း ဝန်ခံထားသည်။   ဒေသခံသတင်းရင်းမြစ်တစ်ခုက “အခုလို ဖြစ်စဉ်မျိုးက ရှားပါတယ်။ များသောအားဖြင့် လူသတ်ပြီးရင် စစ်တပ်ဘက်ကို ပြေးဝင်တာ ဒါမှမဟုတ် ပုန်းနေတာမျိုးပဲ ရှိတာ။ အခုက တရားဥပဒေစိုးမိုးရေးအတွက် တော်လှန်ရေးအဖွဲ့တွေဆီ ယုံယုံကြည်ကြည်နဲ့ အဖမ်းခံတာဆိုတော့ ထူးခြားတယ်လို့ ပြောရမှာပေါ့” ဟု ပြော သည်။   လက်ရှိတွင် ဦးစိုးပိုင်အား ပြည်သူ့ကာကွယ်ရေးအဖွဲ့က ကနဦး စစ်ဆေးမေးမြန်းမှုများ ပြုလုပ်နေပြီး၊ လောင်းလုံး မြို့နယ် ပြည်သူ့လုံခြုံရေးတပ်ဖွဲ့ (ပလဖ) ထံသို့ လွှဲပြောင်းကာ တရားဥပဒေနှင့်အညီ ဆက်လက် အရေးယူ ဆောင်ရွက်သွားမည်ဖြစ်ကြောင်း မိသားစုနှင့်နီးစပ်သူများက ပြောသည်။   #PDF #လောင်းလုံးမြို့နယ် #တနင်္သာရီတိုင်း

လူသတ်ခဲ့သူက PDF ထံ ဆက်သွယ်၍ အဖမ်းခံ

လူသတ်ခဲ့သူက PDF ထံ ဆက်သွယ်၍ အဖမ်းခံ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၃ ရက်။  တနင်္သာရီတိုင်း၊ လောင်းလုံးမြို့နယ်တွင် အမျိုးသား…

  • April 23, 2026
၂၀၂၆ ကမ္ဘာ့ဖလား အဆင့် သတ်မှတ်ချက်  ပြင်သစ် ထိပ်ဆုံးတွင် ရပ်တည်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၃ ရက်။   ၂၀၂၆ ခုနှစ် မြောက်အမေရိက ကမ္ဘာ့ဖလားပြိုင်ပွဲကြီး စတင်ရန် ရက်ပေါင်း ၅၀ အလိုတွင် Fox Sports ၏ နာမည်ကြီးဘောလုံးဝေဖန်ရေးသမား Alexi Lalas က အသင်းများ၏ အင်အားကြီး အဆင့်သတ်မှတ်ချက်ကို ထုတ်ပြန်ခဲ့ရာ ပြင်သစ်က ထိပ်ဆုံးတွင် ရောက်ရှိနေသည်။   ကီလီယန် အမ်ဘာပေ ဦးဆောင်သည့် ပြင်သစ်အသင်း က နံပါတ် ၁ နေရာတွင် ရှိနေပြီး၊ စပိန်က အဆင့် ၂၊ အင်္ဂလန်က အဆင့် ၃ တို့တွင် အသီးသီး ရှိနေသည်။   ကိုလံဘီယာအသင်းက အဆင့် ၄ သို့ ခုန်တက်လာပြီး လက်ရှိချန်ပီယံ အာဂျင်တီးနားကမူ အဆင့် ၅ တွင်သာ ရှိနေသည်။   ဂျပန် က အဆင့် ၁၈ဖြင့် အာရှတွင် အဆင့်အမြင့်ဆုံးဖြစ်ပြီး တောင်ကိုရီးယားက အဆင့် ၂၀ တွင် ရှိနေသည်။ အီရန်မှာ အဆင့် ၃၀ နှင့် ဆော်ဒီအာရေဗျမှာ အဆင့် ၃၁ တွင် ရှိနေသည်။ တောင်ကိုရီးယားမှာ အိမ်ရှင် မက္ကစီကိုနှင့် အုပ်စု တစ်ခုတည်း ကစားရမည် ဖြစ်သည်။   အိမ်ရှင် အမေရိကန်မှာ ခြေစမ်းပွဲရလဒ်များကြောင့် အဆင့် ၁၂ သို့ ရောက်ရှိနေပြီး စီရော်နယ်လ်ဒို၏ ပေါ်တူဂီမှာ အဆင့် ၆ တွင် ရှိနေသည်။   ဟေတီ၊ ကျူရာဆာအိုနှင့် ပနားမားတို့မှာ ဇယား၏ အောက်ဆုံးအဆင့်များတွင် သတ်မှတ်ခံထားရသည်။   #FIFA #FIFAWorldCup2026 #France #၂၀၂၆ကမ္ဘာ့ဖလားဘောလုံးပွဲ #ဖီဖာ

၂၀၂၆ ကမ္ဘာ့ဖလား အဆင့် သတ်မှတ်ချက်  ပြင်သစ် ထိပ်ဆုံးတွင် ရပ်တည်

၂၀၂၆ ကမ္ဘာ့ဖလား အဆင့် သတ်မှတ်ချက်  ပြင်သစ် ထိပ်ဆုံးတွင် ရပ်တည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၃ ရက်။  ၂၀၂၆ ခုနှစ် မြောက်အမေရ…

  • April 23, 2026
ယူကရိန်းအတွက် ယူရို ၉၀ ဘီလီယံ ချေးငွေကို အီးယူ အတည်ပြု   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၃ ရက်။   ယူကရိန်းနှင့် ဟန်ဂေရီနိုင်ငံတို့ကြားရှိ ရေနံပိုက်လိုင်းပြဿနာ ပြေလည်သွားပြီးနောက် ဥရောပသမဂ္ဂ (EU) က ယူကရိန်းအတွက် ယူရို ၉၀ ဘီလီယံ ချေးငွေအကူအညီကို အတည်ပြုလိုက်ပြီဖြစ်သည်။   အနှစ် ၂၀ နီးပါး အာဏာရခဲ့သည့် ဟန်ဂေရီ ဝန်ကြီးချုပ် ဗစ်တာအော်ဘန်သည် ဧပြီလ ၁၂ ရက် ရွေးကောက်ပွဲတွင် ရှုံးနိမ့်သွားခဲ့ပြီးနောက်၊ ဝန်ကြီးချုပ်သစ် ပီတာမက်ဂျာ (Péter Magyar) လက်ထက်တွင် အီးယူနှင့် ဆက်ဆံရေး ပြန်လည်ကောင်းမွန်လာခဲ့ခြင်းဖြစ်သည်။   ဤချေးငွေ၏ သုံးပုံနှစ်ပုံကို စစ်ရေးကာကွယ်ရေးအတွက် အသုံးပြုမည်ဖြစ်ပြီး ကျန်ရှိသည့်ပမာဏကို ဘဏ္ဍာရေးနှင့် တိုင်းပြည်ပြန်လည်တည်ဆောက်ရေးအတွက် သုံးစွဲမည်ဟု ယူကရိန်းက အဆိုပြုထားသည်။   EU သည် ချေးငွေအတည်ပြုရုံတင်မကဘဲ ရုရှားအပေါ် (၂၀) ကြိမ်မြောက် ထပ်တိုးပိတ်ဆို့ အရေးယူမှုများ လုပ်ဆောင်ရန် သဘောတူညီခဲ့ကြသည်။   ရုရှားက ကာဇက်စတန်မှတစ်ဆင့် ဂျာမနီသို့သွားမည့် ရေနံပိုက်လိုင်းကို ဖြတ်တောက်မည်ဟု ဆိုသော်လည်း၊ ဂျာမနီအစိုးရက အခြားလမ်းကြောင်းများရှိသဖြင့် စိုးရိမ်စရာမရှိကြောင်း တုံ့ပြန်ထားသည်။   #EU #ယူကရိန်း #ဥရောပသမဂ္ဂ #အီးယူ

ယူကရိန်းအတွက် ယူရို ၉၀ ဘီလီယံ ချေးငွေကို အီးယူ အတည်ပြု

ယူကရိန်းအတွက် ယူရို ၉၀ ဘီလီယံ ချေးငွေကို အီးယူ အတည်ပြု သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၃ ရက်။  ယူကရိန်းနှင့် ဟန်ဂေရီနိုင်ငံတိ…

  • April 23, 2026
ဟော်မုဇ်ရေလက်ကြား ဆက်ပိတ်ထား၊ ရေနံဈေးနှုန်းများ ထိုးတက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၃ ရက်။   အီရန်အစိုးရသည် အရှေ့အလယ်ပိုင်းဒေသ၏ အချက်အချာကျသော ဟော်မုဇ်ရေလက်ကြား (Strait of Hormuz) ကို ဆက်လက်ပိတ်ထားမည်ဖြစ်ကြောင်း ကြေညာလိုက်ပြီးနောက် ကမ္ဘာ့ရေနံဈေးကွက်တွင် ဈေးနှုန်းများ မြင့်တက်သွားခဲ့သည်။   အစ္စရေး၏ အပစ်အခတ်ရပ်စဲရေး သဘောတူညီချက် ချိုးဖောက်မှုများကြောင့် ရေလက်ကြားအား ပြန်လည်ဖွင့်လှစ်ပေးရန် မဖြစ်နိုင်ကြောင်း အီရန်လွှတ်တော်ဥက္ကဋ္ဌက ပြောကြားခဲ့သည်။   အီရန်တော်လှန်ရေးအစောင့်တပ် (IRGC) သည် ရေလက်ကြားမှ တိတ်တဆိတ်ထွက်ခွာရန် ကြိုးပမ်းသည့် MSC Francesca နှင့် Epaminondas ကုန်တင်သင်္ဘောနှစ်စင်းကို ပစ်ခတ်ဖမ်းဆီးကာ အီရန်ကမ်းရိုးတန်းသို့ ခေါ်ဆောင်သွားခဲ့သည်။   ဤလုပ်ရပ်သည် ပြီးခဲ့သည့်ရက်ပိုင်းအတွင်းက အမေရိကန်တပ်ဖွဲ့များက အီရန်အလံတင် Touska သင်္ဘောနှင့် M/T Tifani ရေနံတင်သင်္ဘောတို့ကို စီးနင်းသိမ်းဆည်းခဲ့မှုအပေါ် တုံ့ပြန်ခြင်းဖြစ်သည်။   တစ်ချိန်တည်းမှာပင် လက်ဘနွန်နှင့် ဂါဇာမြောက်ပိုင်း၌ အစ္စရေး၏ တိုက်ခိုက်မှုများကြောင့် သတင်းထောက်တစ်ဦး၊ ကလေးငယ် ၃ ဦးနှင့် ကုလသမဂ္ဂ ငြိမ်းချမ်းရေးထိန်းသိမ်းမှုတပ်ဖွဲ့ဝင်တစ်ဦး အပါအဝင် စုစုပေါင်း လူ ၁၀ ဦးထက်မနည်း သေဆုံးခဲ့သည်။   အမေရိကန် သမ္မတ ဒေါ်နယ်ထရမ့်ကမူ အီရန်ဘက်မှ ခိုင်မာသော ငြိမ်းချမ်းရေးအဆိုပြုချက် ထွက်ပေါ်လာသည့်တိုင်အောင် အပစ်အခတ်ရပ်စဲရေးကို ဆက်လက်တိုးမြှင့်ထားမည်ဟု ဆိုသည်။   #StraitofHormuz #ဟော်မုဇ်ရေလက်ကြား

ဟော်မုဇ်ရေလက်ကြား ဆက်ပိတ်ထား၊ ရေနံဈေးနှုန်းများ ထိုးတက်

ဟော်မုဇ်ရေလက်ကြား ဆက်ပိတ်ထား၊ ရေနံဈေးနှုန်းများ ထိုးတက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၃ ရက်။  အီရန်အစိုးရသည် အရှေ့အလယ်ပိုင်…

  • April 23, 2026
SCEF က အမျိုးသမီးများကို ဆုံးဖြတ်ချက်ချရာတွင် ပါဝင်စေမည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၃ ရက်။   မကြာမီက ဖွဲ့စည်းလိုက်သည့် တော်လှန်ရေး တပ်ပေါင်းစု ဖြစ်သည့် ဖက်ဒရယ် ဒီမိုကရေစီ ပေါ်ထွန်းရေး ဦးဆောင်ကော်မတီ SCEF တွင် အမျိုးသမီးများ၏ အခန်းကဏ္ဍကို ဆုံးဖြတ်ချက်ချနိုင်သည့် အဓိကမဏ္ဍိုင်အဖြစ် အာဏာခွဲဝေပေး သွားမည်ဟု ကောင်စီတာဝန်ရှိသူများက ပြောဆိုလိုက်သည်။   ယခုဖွဲ့စည်းလိုက်သည့် ကောင်စီတွင် အမျိုးသမီးကဏ္ဍကို သရုပ်ပြသက်သက်မဟုတ်ဘဲ ဖက်ဒရယ် ပြည်ထောင်စုသစ် ပေါ်ထွန်းရေးအတွက် ခိုင်မာသည့် ‘အခြေခံအုတ်မြစ်’ တစ်ခုအဖြစ် သတ်မှတ်ထားကြောင်း တာဝန်ရှိသူများက ပြောသည်။   SCEF ၏ စုဖွဲ့မှုတွင် ပြည်နယ်ဖက်ဒရယ်ယူနစ်များ၊ ပြည်သူ့ကိုယ်စားလှယ်များနှင့်အတူ ‘အမျိုးသမီးမဏ္ဍိုင်’ ကို တန်းတူထားရှိခြင်းမှာ တော်လှန်ရေးကာလအတွင်း တာဝန်ယူမှု၊ တာဝန်ခံမှုဆိုင်ရာ စီမံခန့်ခွဲမှုများကို ပိုမို အားကောင်းစေရန် ဖြစ်ကြောင်း SCEF အတွင်းရေးမှူးအဖွဲ့ဝင် ဦးအောင်ဆန်းမြင့်က ပြောသည်။   “အမျိုးသမီး မဏ္ဍိုင်ကို ကောင်စီဖွဲ့စည်းပုံပါ စဉ်းစားထည့်သွင်းထားခြင်းဟာ ကျနော်တို့ သရုပ်ပြ သက်သက် မဟုတ်ဘူးဆိုတာကို ကျနော့်အနေနဲ့ ပြောချင်ပါတယ်။ အမျိုးသမီး မဏ္ဍိုင်ဟာ ဖက်ဒရယ်ပေါ်ထွန်းရေး ဦးဆောင်ကော်မတီ ကောင်စီရဲ့ အခြေခံ အုတ်မြင့်တစ်ခုဖြစ်ပါတယ်။ အမျိုးသမီးများ ဦးဆောင်မှုမှာ ပါဝင်နေ ခြင်းအားဖြင့် အုပ်ချုပ်စီမံခန့်ခွဲမှု လုပ်ငန်းများ တာဝန်ယူမှု တာဝန်ခံမှုဆိုင်ရာများနဲ့ ဆုံးဖြတ်ချက်ချတဲ့ နေရာ များမှာ ပိုပြီး အားကောင်းစေနိုင်မယ်လို့ ကျနော်တို့ အနေနဲ့ ယုံကြည်ပါတယ်” ဟု ဦးအောင်ဆန်းမြင့်က ပြော သည်။   ‘ဖက်ဒရယ် ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကောင်စီ (SCEF)’ သည် ၅ နှစ်တာ တော်လှန်ရေး ကာလအတွင်း ရရှိခဲ့သည့် သင်ခန်းစာများကို အခြေခံကာ တော်လှန်ရေးမှ အသွင်ကူးပြောင်းရေးကာလသို့ ကူးပြောင်းပေးမည့် ‘ပေါင်းကူးတံတား’ တစ်စင်းအဖြစ်လည်း ရည်ရွယ် ဖွဲ့စည်းထားခြင်း ဖြစ်သည်ဟု ဆိုသည်။   ယခုစုဖွဲ့မှုသည် လွန်ခဲ့သည့် ၅ နှစ်အတွင်းက သင်ခန်းစာများကိုယူ၍ ဖော်ဆောင်သည့် ‘Next Level’ စုဖွဲ့မှု ဖြစ်ပြီး၊ လူဦးရေ၏ ၅၀ ရာခိုင်နှုန်းကျော်ကို ကိုယ်စားပြုသည့် အမျိုးသမီးကဏ္ဍမှာ အဓိကမဏ္ဍိုင်တစ်ခု ဖြစ်ကြောင်း NUG နိုင်ငံခြားရေးဝန်ကြီး ဒေါ်ဇင်မာအောင်ကလည်း အတည်ပြုခဲ့သည်။   ဒေါ်ဇင်မာအောင်က “ကျမတို့ လူဦးရေရဲ့ ၅၀ ရာခိုင်နှုန်းကျော် ကိုယ်စားပြုထားတဲ့ အမျိုးသမီး ကိုယ်စားပြုမှု ဆိုတဲ့ မဏ္ဍိုင်တွေပေါ့နော်။ ဒီစုဖွဲ့မှုတွေမှာ ဒီအခြေခံစဉ်းစားချက်တွေနဲ့ ကျမတို့ စုဖွဲ့ခဲ့ကြတာဖြစ်တယ်။ ဖြတ် သန်းခဲ့တဲ့ ၅ နှစ်အတွင်းက စုဖွဲ့မှုတွေအပေါ်မှာလည်း သင်ခန်းစာတွေယူပြီးတော့ ကျမတို့တွေ ဒီကဏ္ဍ ၅ ရပ် ပါမယ်။ စစ်ရေးရယ်၊ နိုင်ငံခြားရေး၊ လုံခြုံရေး၊ ကာကွယ်ရေး၊ ဖက်ဒရယ်ရေးနဲ့ ဘဏ္ဍာရေးပေါ့နော်။ ဒီလို ဆောင်ရွက်ချက်တွေက တော်လှန်ရေး အခြေအနေကို အောင်မြင်တိုးတက် ကောင်းမွန်စေရုံ သာမကဘဲနဲ့ ကျမ တို့ကိုပါ အသွင်ကူးပြောင်းရေးနဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးဆိုတဲ့ မျှော်မှန်းချက် များအတွက်ပါ အခြေခံကောင်းတွေဖြစ်ဖို့လို့ ချိန်ညှိဆောင်ရွက်သွားမှာ ဖြစ်ပါတယ်” ဟု ပြောသည်။   ဤကောင်စီသည် တစ်ခုတည်းသော ကွပ်ကဲမှုစနစ် (One Command) အောက်တွင် စစ်ရေးဗျူဟာများကို ပေါင်းစပ်ရန် ပြင်ဆင်နေသော်လည်း၊ နယ်စပ်ဒေသရှိ အင်အားကြီးအဖွဲ့အချို့မှာ အိမ်နီးချင်းနိုင်ငံများ၏ ပထဝီ နိုင်ငံရေး ဖိအားကြောင့် တရားဝင်အဖွဲ့ဝင်အဖြစ် မပါဝင်နိုင်သေးသည့်အပေါ် စိန်ခေါ်မှုများ ရှိနေဆဲဖြစ်သည်။   သို့သော်လည်း အဆိုပါအဖွဲ့များနှင့် မဟာမိတ် (Alliance) လမ်းကြောင်းမှတစ်ဆင့် စစ်ရေးနှင့် နိုင်ငံရေးအရ အမြဲထိတွေ့ချိတ်ဆက်နေကြောင်း SCEF ၏ ဧပြီလ ၁၂ ရက်နေ့က ပြုလုပ်သည့် သတင်းစာရှင်းလင်းပွဲတွင် ထည့်သွင်း ပြောဆိုထားသည်။   လာမည့် ရက်ပေါင်း ၆၀ အတွင်း SCEF အနေဖြင့် အခြားသော တော်လှန်ရေးအင်အားစုများ ထပ်မံပါဝင် လာရေးနှင့် ပြည်တွင်းပြည်ပ ထောက်ခံမှုရရှိရေးကို ဦးစားပေး လုပ်ဆောင်သွားမည် ဖြစ်ပြီး၊ အချုပ်အခြာ အာဏာကို ခွဲဝေကျင့်သုံးခြင်းနှင့် ပူးပေါင်းခေါင်းဆောင်မှုမူများဖြင့် ဖက်ဒရယ်ပြည်ထောင်စုသစ်ဆီသို့ ဆက် လက်ချီတက်သွားမည် ဟု ဆိုသည်။   #SCEF #အမျိုးသမီးကဏ္ဍ #အမျိုးသမီးပါဝင်မှု

SCEF က အမျိုးသမီးများကို ဆုံးဖြတ်ချက်ချရာတွင် ပါဝင်စေမည်

SCEF က အမျိုးသမီးများကို ဆုံးဖြတ်ချက်ချရာတွင် ပါဝင်စေမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၃ ရက်။  မကြာမီက ဖွဲ့စည်းလိုက်သည့် တေ…

  • April 23, 2026
ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၂ ရက်။   နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် မတရားဖမ်းဆီးခံထားရသည့် နိုင်ငံရေး အကျဉ်းသား အားလုံး ခြွင်းချက်မရှိ အမြန်ဆုံး လွတ်မြောက်ရေးအတွက် နိုင်ငံတကာ အသိုင်းအဝန်း အနေဖြင့် ယခုထက်ပို၍ ထိရောက်ပြီး လက်တွေ့ကျသည့် ဖိအားပေးမှုများ လုပ်ဆောင်ရန် Blue Shirt Movement-Myanmar နှင့် မဟာမိတ်အဖွဲ့ ၅၈ ဖွဲ့က တောင်းဆိုလိုက်သည်။   ဧပြီလ ၁၀ ရက်နေ့မှ ၂၁ ရက်နေ့အထိ (၁၂) ရက်တိုင်တိုင် ပြုလုပ်ခဲ့သည့် Blue Shirt Campaign လူထုလှုပ်ရှားမှု နှင့်အတူ ကုလသမဂ္ဂ (UN)၊ ဥရောပသမဂ္ဂ (EU)၊ အာဆီယံနှင့် အမေရိကန်အပါအဝင် အိမ်နီးချင်းနိုင်ငံများမှ ခေါင်းဆောင်များ အနေဖြင့် မြန်မာ့နိုင်ငံရေးအကျဉ်းသားအရေးကို အထူးအလေးထား ဆောင်ရွက်ပေးရန် တိုက်တွန်းခဲ့ခြင်း ဖြစ်သည်။   Blue Shirt Movement-Myanmar မှ ပြောရေးဆိုခွင့်ရှိသူ ကိုကောင်းယံလင်းက “အမှန်တကယ်တော့ နိုင်ငံရေး အကျဉ်းသားအများစု မလွတ်မြောက်သေးပါဘူး။ လွတ်ငြိမ်းချမ်းသာပေးတယ်ဆိုတဲ့ နေရာမှာလည်း ထောင်ထဲမှာ နှစ်အကြာကြီးနေပြီး လွတ်ရက်စေ့ခါနီးသူတွေက အများစုပါ။ ဒါကြောင့် စစ်အုပ်စုရဲ့ အကျဉ်းထောင်တွေထဲမှာ ခံစားနေရတဲ့ လူ့အခွင့်အရေးချိုးဖောက်မှုတွေနဲ့ ဒေါ်အောင်ဆန်းစုကြည်အပါအဝင် အားလုံးလွတ်မြောက်ဖို့အတွက် နိုင်ငံတကာက အစဉ်တစိုက် ဖိအားပေးစေချင်ပါတယ်” ဟု ပြောသည်။   လက်ရှိတွင် အသက် ၈၀ ကျော်အရွယ်ရှိပြီ ဖြစ်သည့် ဒေါ်အောင်ဆန်းစုကြည်၏ ကျန်းမာရေးနှင့် ပတ်သက်၍ စစ်အုပ်စုက သတင်းအမှောင်ချထားသည့်အပေါ် နိုင်ငံရေးအင်အားစုများက အထူးစိုးရိမ်နေကြသည်။     ဆိုရှယ်ဒီမိုကရက်တစ်ပါတီ (SDP) အထွေအထွေအတွင်းရေးမှူး ကိုကျော်ကိုကိုက “လက်ရှိ ထောင်ထဲမှာရှိတဲ့ ဒေါ်အောင်ဆန်းစုကြည် အပါအဝင် ကျန်တဲ့ နိုင်ငံရေးအကျဉ်းသားအားလုံးရဲ့ အသက်အန္တရာယ်က အင်မတန်မှ စိုးရိမ်စရာကောင်းတယ်။ အခု အခြေအနေ ဘာတွေဖြစ်နေမှန်းလည်း မသိဘူး။ သတင်းအမှောင် ချထားတာ တွေလည်း ရှိတယ်” ဟု ထောက်ပြသည်။   အလားတူ နိုင်ငံရေးအကျဉ်းသူများအဖွဲ့ (WOPP) ဦးဆောင်တာဝန်ခံ မဇူးဇူးမေယွန်းကလည်း “အတုအယောင် အစိုးရက လက်ရှိအထိ ဘာမှ တိတိကျကျ မဖော်ပြတဲ့အတွက် ကျမတို့အနေနဲ့က ဒေါ်အောင်ဆန်းစုကြည်နဲ့ တကွ ကျန်ရှိနေတဲ့ နိုင်ငံရေး အကျဉ်းသားတွေ လွတ်မြောက်ဖို့အရေးကို ပိုပြီးတော့ အရွေ့တစ်ခုကို သွားဖို့ လိုအပ်လာပြီလို့ သုံးသပ်ချင်ပါတယ်” ဟု ပြောသည်။   အထူးသဖြင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကျန်းကျန်းမာမာနှင့် အသက်ရှင်လျက်ရှိ ကြောင်း ခိုင်မာသည့် သက်သေပြရန် "Proof of Life" ကမ်ပိန်းကို သားဖြစ်သူ ဦးထိန်လင်းနှင့်အတူ ပြည်သူများ က ယခုရက်ပိုင်းအတွင်း စတင်လိုက်ကြသည်။   All in One Piece Movement အဖွဲ့က ဦးဆောင်သည့် ဤလှုပ်ရှားမှုသည် မိခင်ဖြစ်သူ၏ ကျန်းမာရေး အခြေ အနေကို သားတစ်ဦးအနေဖြင့် သိရှိခွင့်ရရှိရန်ဟူသော အခြေခံလူသားအခွင့်အရေးအပေါ် မူတည်ကာ တောင်းဆိုထားခြင်း ဖြစ်သည်။   ကိုထိန်လင်းနှင့်အတူ မြန်မာ့အရေးလှုပ်ရှားနေသူများက ကုလသမဂ္ဂနှင့် အမေရိကန်အပါအဝင် နိုင်ငံတကာ အသိုင်းအဝန်းအနေဖြင့် စစ်အုပ်စုအပေါ် ဖိအားပေးရန်၊ အတုအယောင်ရွေးကောက်ပွဲကို အသိအမှတ်မပြုရန်နှင့် ပြည်သူကို ဗုံးကြဲနေသည့် လေယာဉ်ဆီတင်သွင်းမှုများကို ရပ်တန့်ပေးရန် တိုက်တွန်းထားသည်။   လက်ရှိတွင် ဒေါ်အောင်ဆန်းစုကြည်၏ သတင်းများကို စစ်အုပ်စုဘက်က လုံးဝအမှောင်ချထားသည့်အတွက် ၎င်း၏ အသက်အန္တရာယ်အတွက် ပြည်တွင်းပြည်ပရှိ ပြည်သူများက အထူးစိုးရိမ်ပူပန်နေကြသည်။   PPNM ၏ မှတ်တမ်းများအရ အာဏာသိမ်းကာလအတွင်း အကျဉ်းထောင်တွင်း ကျန်းမာရေးစောင့်ရှောက်မှု မလုံလောက်ခြင်းနှင့် ညှဉ်းပန်းနှိပ်စက်ခံရခြင်းတို့ကြောင့် နိုင်ငံရေးအကျဉ်းသား ၂၇၉ ဦးခန့် အသက်ဆုံးရှုံးခဲ့ရပြီး ဖြစ်သည်။   မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ဦးဆောင်ကော်မတီဝင် ကိုသိုက်ထွန်းဦးက “ကျနော်တို့ ပြည်သူလူထု တစ်ရပ်လုံးက ရောက်ရှိရာနိုင်ငံတွေမှာ ကြိုးစားနေကြသလိုပဲ၊ နိုင်ငံတကာ အသိုင်း အဝန်း အနေနဲ့လည်း ပိုပြီး လက်တွေ့ကျတဲ့ ဆောင်ရွက်မှုတွေ၊ မလွတ်လာခင်စပ်ကြားမှာ ကူညီစောင့်ရှောက်မှု တွေ ပိုပေးဖို့ အတွက် ကျနော်တို့ ရည်ရွယ်ပါတယ်” ဟု ပြောသည်။   AAPP ၏ ထုတ်ပြန်ချက်အရ လက်ရှိအချိန်ထိ ကလေးသူငယ် ၆၀၀ ကျော်အပါအဝင် နိုင်ငံရေးအကျဉ်းသား ၁၄,၀၀၀ ကျော် ဖမ်းဆီးချုပ်နှောင်ခံထားရဆဲ ဖြစ်သည်။   ထို့ကြောင့် နိုင်ငံတကာအနေဖြင့် စစ်အုပ်စုအား အသိအမှတ်မပြုရန်နှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများအတွက် တာဝန်ခံစေရေး အရှိန်မြှင့် ဆောင်ရွက်ပေးရန် Blue Shirt Movement က အလေး အနက် တိုက်တွန်းထားသည်။   ဓါတ်ပုံ - PPNM   #ဒေါ်အောင်ဆန်းစုကြည် #နိုင်ကျဉ်း #PPNM #ကိုထိန်လင်း #စစ်အုပ်စု

ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို

ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၂ ရက်။  နိုင်ငံ…

  • April 22, 2026
ဖားကန့်တွင် ဆရာဝန် အပါအဝင် လူ ၂၀ ခန့်ကို စစ်တပ်က ဖမ်းခေါ်သွား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၂ ရက်။   ကချင်ပြည်၊ ဖားကန့်မြို့နယ်တွင် စစ်တပ်နှင့် ပြည်သူ့စစ်ပူးပေါင်းအဖွဲ့များက ပုဂ္ဂလိကဆေးခန်းနှင့် မိုတယ် တစ်ခုကို အင်အားသုံးစီးနင်းပြီး ဆရာဝန်များ အပါအဝင် လူအယောက် ၂၀ ခန့်ကို ဖမ်းဆီးသွားကြောင်း ဒေသခံများနှင့် မြေပြင်သတင်းရင်းမြစ်များက ပြောသည်။   ဧပြီလ ၂၁ ရက်နေ့၊ ည ၁၀ နာရီဝန်းကျင်ခန့်တွင် လုံးခင်းကျေးရွာအုပ်စုရှိ ‘မိုင်’ ပုဂ္ဂလိကဆေးခန်းနှင့် ‘ဥရုဆွတ် အောင်’ မိုတယ်တို့ကို စစ်တပ်က ဝင်ရောက်စီးနင်းခဲ့ခြင်းဖြစ်ပြီး၊ ဖမ်းဆီးခံရသူများထဲတွင် ဆေးကုသမှုခံယူ နေသည့် လူနာတစ်ဦးပင် ပါဝင်သွားခဲ့သည်။   လုံခြုံရေးအရ အမည်မဖော်လိုသည့် လုံးခင်းဒေသခံတစ်ဦးက “ညကြီးအချိန်မတော် သေနတ်တွေနဲ့ ဝိုင်းပြီး ဝင်လာတာ။ ဆေးခန်းထဲက ဆရာဝန်တွေ၊ သူနာပြုတွေနဲ့ ဝန်ထမ်းတွေကိုပါ ရိုက်နှက်ပြီး ဖမ်းသွားတာ။ ဖုန်းတွေ၊ ပိုက်ဆံတွေလည်း အကုန်သိမ်းသွားတယ်။ လက်ရှိအချိန်ထိ သူတို့ကို ဘယ်ခေါ်သွားမှန်းမသိရတော့ မိသားစုတွေက အရမ်းစိုးရိမ်နေကြတယ်” ဟု ပြောသည်။   အဆိုပါ အုပ်စုလိုက်ဖမ်းဆီးမှုသည် ဖားကန့်ဒေသအတွင်း တိုက်ပွဲများ ပြင်းထန်လာနိုင်သည့် အခြေအနေနှင့် တိုက်ရိုက်ဆက်စပ်နေကြောင်း သုံးသပ်မှုများရှိနေသည်။   ယနေ့ ဧပြီ ၂၂ ရက်တွင်ပင် KIA တပ်မဟာ (၉)၊ တပ်ရင်း (၆) က ဖားကန့်-နန်ယား-ကာမိုင်း လမ်းပိုင်းကို ရက်အကန့်အသတ်မရှိ (ယာယီ) ပိတ်လိုက်ကြောင်း ထုတ်ပြန်ခဲ့သည်။   KIA နှင့် နီးစပ်သည့် အမျိုးသားတစ်ဦးက “စစ်ကောင်စီဘက်က စစ်ကြောင်းထိုး လှုပ်ရှားတာတွေရှိနေလို့ လမ်းပိတ်လိုက်တာပါ။ ယာဉ်ကြီးယာဉ်ငယ်တွေရော လူပါ သွားလာလို့ မရတော့ဘူး။ အခုလို လမ်းပိတ် လိုက်ပြီဆိုတော့ စစ်တပ်ဘက်က အထိနာမှာစိုးလို့ မြို့ထဲကလူတွေကို လိုက်ဖမ်းပြီး လူသားဒိုင်းလုပ်ဖို့ ပြင်နေ တာလားလို့ သံသယရှိတယ်” ဟု ပြောသည်။   ပြီးခဲ့သည့် ဧပြီလ ၆ ရက်နေ့မှစ၍ စစ်တပ်ဘက်က စစ်ကူစစ်ကြောင်းများ အလုံးအရင်းနှင့် တက်လာနေသကဲ့သို့၊ ဧပြီ ၂ ရက်နေ့ကလည်း အင်မားယန်ကျေးရွာရှိ စစ်တပ်ကာကင်းစခန်းများကို KIA/KPDF ပူးပေါင်းတပ်များက တိုက်ခိုက်သိမ်းပိုက်ခဲ့သဖြင့် နှစ်ဖက်စစ်ရေးမှာ အထူးတင်းမာနေသည်။   လက်ရှိတွင် လုံးခင်းကျေးရွာအတွင်း စစ်တပ်က နေရာအနှံ့ယူထားပြီး လမ်းသွားလမ်းလာများကို တင်းတင်း ကျပ်ကျပ် စစ်ဆေးဖမ်းဆီးမှုများ လုပ်နေသည်ဟု ဒေသခံများက ပြောသည်။   ထို့အပြင် ဒေသခံပြည်သူများမှာ စစ်ရေးအခြေအနေများကြောင့် ဒေသတွင်း ကုန်စည်ပြတ်တောက်မည်ကို သာမက တိုက်ပွဲအကြား ညှပ်မည်ကိုပါ စိုးရိမ်ထိတ်လန့်နေကြသည်။   #ဖားကန့် #စစ်အုပ်စု #ကချင်ပြည်နယ်

ဖားကန့်တွင် ဆရာဝန် အပါအဝင် လူ ၂၀ ခန့်ကို စစ်တပ်က ဖမ်းခေါ်သွား

ဖားကန့်တွင် ဆရာဝန် အပါအဝင် လူ ၂၀ ခန့်ကို စစ်တပ်က ဖမ်းခေါ်သွား  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၂ ရက်။  ကချင်ပြည်၊ ဖားကန့်မြို…

  • April 22, 2026
တရုတ်နိုင်ငံခြားရေး ဝန်ကြီး ဝမ်ယိ မြန်မာသို့ လာမည်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၂ ရက်။   တရုတ်နိုင်ငံခြားရေးဝန်ကြီး ဝမ်ယိသည် ဗုဒ္ဓဟူးနေ့မှ တနင်္ဂနွေနေ့အထိ ကမ္ဘောဒီးယား၊ ထိုင်းနှင့် မြန်မာနိုင်ငံများသို့ သွားရောက်မည်ဖြစ်ကြောင်း တရုတ်အစိုးရက အင်္ဂါနေ့ (ဧပြီ ၂၁ ရက်) တွင် ပြောကြားခဲ့သည်။   ကမ္ဘောဒီးယားနှင့် ထိုင်းမှ အပြန်တွင် မြန်မာနိုင်ငံသို့ ရောက်ရှိမည်ဖြစ်ပြီး နေပြည်တော်တွင် စစ်အုပ်စု ခေါင်းဆောင် ဦးမင်းအောင်လှိုင်နှင့် တွေ့ဆုံမည်ဟု သတင်းများ ထွက်ပေါ်နေသည်။   ကမ္ဘောဒီးယားနိုင်ငံတွင် ဝမ်ယိသည် ကာကွယ်ရေးဝန်ကြီး ဒုံကျွင်းနှင့်အတူ "တရုတ်-ကမ္ဘောဒီးယား ၂+၂ မဟာဗျူဟာမြောက် ဆွေးနွေးပွဲ" (နိုင်ငံခြားရေးဝန်ကြီးများနှင့် ကာကွယ်ရေးဝန်ကြီးများအဆင့်) ၏ ပထမဆုံးအကြိမ် ဖွင့်လှစ်သည့် အစည်းအဝေးသို့ တက်ရောက်မည်ဖြစ်ကြောင်း နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကော့ကျိကွန်း (Guo Jiakun) က ပြောကြားခဲ့သည်။   ယခုခရီးစဉ်အတွင်း ကမ္ဘောဒီးယားနိုင်ငံနှင့် အဆင့်မြင့် လုံခြုံရေးနှင့် သံတမန်ရေးရာ ပူးပေါင်းဆောင်ရွက်မှု ပုံစံသစ်တစ်ရပ် ဖော်ဆောင်ရန် မျှော်မှန်းထားကြသည်။   ပြောရေးဆိုခွင့်ရှိသူ ကော့ကျိကွန်းက ကမ္ဘောဒီးယား၊ ထိုင်းနှင့် မြန်မာနိုင်ငံတို့အား တရုတ်နိုင်ငံ၏ “ချစ်ကြည်ရင်းနှီးသော အိမ်နီးချင်းနိုင်ငံများ” အဖြစ် ရည်ညွှန်းပြောဆိုခဲ့သည်။   ယခုခရီးစဉ်သည် နိုင်ငံခေါင်းဆောင်များအကြား ရရှိထားသည့် ဘုံသဘောတူညီချက်များကို လက်တွေ့ကျသော တိုးတက်မှုများအဖြစ် ဖော်ဆောင်ပေးနိုင်မည်ဟု ပေကျင်းက မျှော်လင့်ကြောင်း ပြောသည်။   ထို့အပြင် တရုတ်နိုင်ငံအနေဖြင့် ဘက်စုံမဟာဗျူဟာမြောက် ပူးပေါင်းဆောင်ရွက်မှုများကို မြှင့်တင်ရန်၊ နိုင်ငံသုံးနိုင်ငံမှ ပြည်သူများအတွက် ပိုမိုကောင်းမွန်သော အကျိုးကျေးဇူးများ ဖော်ဆောင်ပေးရန်နှင့် ဒေသတွင်း ငြိမ်းချမ်းရေး၊ တည်ငြိမ်ရေး၊ ဖွံ့ဖြိုးတိုးတက်ရေးနှင့် သာယာဝပြောရေးတို့အတွက် ပိုမိုအထောက်အကူပြုရန် ရည်မှန်းထားကြောင်း ၎င်းက ဖြည့်စွက်ပြောကြားခဲ့သည်။   ကမ္ဘောဒီးယားနိုင်ငံနှင့် ပြုလုပ်မည့် ပထမဆုံးအကြိမ် ၂+၂ ဆွေးနွေးပွဲတွင် နှစ်နိုင်ငံ ဆက်ဆံရေး၊ နိုင်ငံရေးနှင့် လုံခြုံရေးဆိုင်ရာ ကိစ္စရပ်များ၊ ကာကွယ်ရေးနှင့် လုံခြုံရေး ပူးပေါင်းဆောင်ရွက်မှုများ၊ ဒေသတွင်းနှင့် နိုင်ငံတကာ အခြေအနေများ စသည့် ကျယ်ပြန့်သော ကဏ္ဍရပ်များကို ဆွေးနွေးမည် ဖြစ်သည်။   ကမ္ဘောဒီးယားမှ အပြန်တွင် ထိုင်းနိုင်ငံသို့ ရောက်ရှိမည်ဖြစ်သည်။ ထိုင်းဝန်ကြီးချုပ် အနုတင်က တရုတ်နိုင်ငံခြားရေး ဝန်ကြီး ဝမ်ယိ ကြာသပတေးတွင်ရောက်ရှိမည် ဖြစ်ကြောင်း နှင့် ဆွေးနွေးမည့်အကြောင်းအရာများကို ကန့်သတ်ထားခြင်း မရှိဟု သတင်း‌ထောက်များအားပြောသည်။     ထို့နောက်တွင်မှ မြန်မာနိုင်ငံသို့ သွားရောက်မည်ဖြစ်သည်။     #တရုတ်နိုင်ငံခြားရေးဝန်ကြီး #ဝမ်ယိ

တရုတ်နိုင်ငံခြားရေး ဝန်ကြီး ဝမ်ယိ မြန်မာသို့ လာမည်

တရုတ်နိုင်ငံခြားရေး ဝန်ကြီး ဝမ်ယိ မြန်မာသို့ လာမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၂ ရက်။  တရုတ်နိုင်ငံခြားရေးဝန်ကြီး ဝမ်ယိသည…

  • April 22, 2026
×Close